CNI Sport News
၂၀၂၄ ခုနှစ်၊ စက်တင်ဘာ ၂၇
ပရက်စတန်အသင်း တိုက်စစ်မှူး အိုစမာဂျစ်ဟာ လီဗာပူးလ်အသင်းကနေ ဘလက်ဘန်းအသင်းထံ အငှားနဲ့ လာရောက်ကစားနေတဲ့ နောက်ခံလူ အိုဝင်ဘက်ကို ကိုက်ခဲ့တာကြောင့် ၄ လအထိ ပွဲပယ်ခံရဖွယ်ရှိနေပါတယ်။
အင်္ဂလန်ဘောလုံးအဖွဲ့ချုပ်(FA)ဟာ ကြမ်းတမ်းတဲ့ အပြုအမူ ပြုလုပ်ခဲ့တဲ့ အိုစမာဂျစ်ကို စွဲချက်တင်ထားပြီး စက်တင်ဘာလ ၃၀ ရက် နောက်ဆုံးထားပြီး တုန့်ပြန်မှု ပြုလုပ်ဖို့ထုတ် ပြန်ထားတာပါ။
ပရက်စတန်နဲ့ ဘလက်ဘန်းအသင်းတို့ရဲ့ ချန်ပီယံရှစ်ပွဲစဉ်မှာ နှစ်ဖက်အသင်း ကစားသမားတွေ အချင်းများခဲ့ရာ အိုစမာဂျစ်က အိုဝင်ဘက်ကို ကိုက်ခဲ့တဲ့ ရုပ်သံဟာ ဆိုရှယ်မီဒီယာပေါ်မှာ ပျံ့နှံ့ခဲ့တာ ဖြစ်ပါတယ်။
အိုဝင်ဘက်ကလည်း ပရက်စတန်အသင်း ကစားသမား ဟိုလ်မက်စ်ကို ကန်ခဲ့တဲ့အတွက် တိုက်ရိုက်အနီကတ်နဲ့ ကွင်းလယ်ဒိုင်လူကြီးရဲ့ ထုတ်ပယ်ခြင်းကို ခံခဲ့ရပါတယ်။
အိုဝင်ဘက်ဟာ သူအကိုက်ခံရတဲ့အပေါ် ကွင်းလယ်ဒိုင်လူကြီးကို စောဒကတက်ခဲ့ပေမယ့် အိုစမာဂျစ်ဟာ အဝါကတ်သာ ပြသခံခဲ့ရတာပါ။
အိုစမာဂျစ်က ပြိုင်ဘက်ကစားသမား အချင်းများနေစဉ်
အခုအချိန်မှာတော့ အိုစမာဂျစ်ဟာ ကြမ်းတမ်းတဲ့ အပြုအမှု ပြုလုပ်ခဲ့တယ်လို့ စွဲချက်တင်ခြင်းခံခဲ့ရပြီး ၄ လအထိ ပွဲပယ်ပြစ်ဒဏ် ချမှတ်ခံရနိုင်တယ်လို့ The Sun က ဖော်ပြထားတာ ဖြစ်ပါတယ်။
ဘလက်ဘန်းအသင်းနည်းပြ ယူစတက်စ်က အိုဝင်ဘက် အကိုက်ခံရတဲ့ ဖြစ်ရပ်အပေါ် ကွင်းလယ်ဒိုင်လူကြီး မမြင်တွေ့ခဲ့တာဟာ ရှက်ဖို့ကောင်းတယ်လို့ ပွဲအပြီးမှာ ပြောခဲ့တာပါ။
အိုဝင်ဘက်ကတော့ ဒီပွဲမှာထိခဲ့တဲ့ အနီကတ်ကြောင့် ဒီတစ်ပတ်ကစားမယ့် ကျူပီအာအသင်းနဲ့ပွဲစဉ်မှာ ဘလက်ဘန်းအသင်းအတွက် ပါဝင်ခွင့်ရမှာ မဟုတ်ပါဘူး။
၂၀၁၃ ခုနှစ်တုန်းက ချယ်လ်ဆီးအသင်းနဲ့ လီဗာပူးလ်အသင်းတို့ ကစားခဲ့တဲ့ပွဲစဉ်မှာ လီဗာပူးလ်အသင်း တိုက်စစ်မှူး ဆွာရက်ဇ်က ချယ်လ်ဆီးအသင်း နောက်ခံလူ အိုင်ဗန်နိုဗစ်ကို ကိုက်ခဲ့တဲ့အတွက် ၁၀ ပွဲပယ် ပြစ်ဒဏ် ချမှတ်ခြင်းခံခဲ့ရတာ ဖြစ်ပါတယ်။
Source: Goal
