CNI Sport News
၂၀၂၄ ခုနှစ်၊ စက်တင်ဘာ ၂၇
အီတလီကွင်းလယ်လူ လိုကာတယ်လီဟာ လွန်ခဲ့တဲ့ ၃ နှစ်က အာဆင်နယ်အသင်းထံ ပြောင်းရွှေ့ဖို့ ငြင်းဆန်ခဲ့တဲ့ အတွက် နောင်တမရဘူးလို့ ပြောခဲ့ပါတယ်။
ဒါပေမယ့် သူဟာ အာတီတာနဲ့ အာဆင်နယ်အသင်းကို ချီးကျူးမှု ပြုလုပ်သွားခဲ့ပါတယ်။
လိုကာတယ်လီက “အာဆင်နယ်ထံ မပြောင်းခဲ့တဲ့အပေါ် ကျနော် နောင်တမရပါဘူး။ ကျနော်ဟာ ဘောလုံးပွဲတွေ ကြည့်ရတာကို နှစ်သက်ပြီး အာဆင်နယ်အသင်းပွဲတွေ ကြည့်ရတာကိုလည်း သဘောကျပါတယ်။ အာဆင်နယ် အသင်းနည်းပြ အာတီတာကိုလည်း ကျနော်လေးစားပါတယ်”လို့ Tuttosport နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
လိုကာတယ်လီဟာ ဆက်ဆူအိုလိုအသင်းမှာ ခြေစွမ်းပြသနိုင်ခဲ့သလို အီတလီအသင်းကို ယူရို ၂၀၂၀ ဖလား ရရှိအောင် အကူအညီ ပေးနိုင်ခဲ့တာကြောင့် အသင်းကြီးတွေရဲ့ ပစ်မှတ်ဖြစ်ခဲ့ပါတယ်။
ဒီအချိန်တုန်းက အာဆင်နယ်အသင်းဟာ လိုကာတယ်လီကို ခေါ်ယူချင်တာကြောင့် ကမ်းလှမ်းမှုတွေ ပြုလုပ်ခဲ့ တာပါ။
လိုကာတယ်လီကို တွေ့ရစဉ်
ဒါပေမယ့် အာဆင်နယ်အသင်းဟာ လိုကာတယ်လီကို ခေါ်ယူဖို့အတွက် ဂျူဗင်တပ်စ်အသင်းနဲ့ ယှဉ်ပြိုင်ခဲ့ရပြီး ကစားသမားက ဂျူဗင်တပ်စ်အသင်းထံ ပြောင်းရွှေ့ဖို့ ရွေးချယ်ခဲ့တာ ဖြစ်ပါတယ်။
လိုကာတယ်လီဟာ ဂျူဗင်တပ်စ်အသင်းကို ရောက်ရှိခဲ့တဲ့ ၂၀၂၁ ခုနှစ်ကတည်းကနေ အခုအချိန်ထိ ကိုပါအီတာလီယာဖလားသာ ရယူထားနိုင်ခဲ့တာပါ။
အီတလီကွင်းလယ်လူဟာ ဂျူဗင်တပ်စ်အသင်း ပရိသတ်အဖြစ် ကြီးပြင်းလာခဲ့တာကြောင့် ဂျူဗင်တပ်စ်အသင်းကို ရွေးချယ်တာ အံ့အားသင့်စရာတော့ မဟုတ်ပါဘူး။
ဂျူဗင်တပ်စ်အသင်းဟာ ဒီရာသီနည်းပြသစ် သီယာဂိုမော့တာ လက်ထက်မှာ စီးရီးအေရာသီအစ အဖွင့်ပွဲစဉ် ၂ ပွဲ စလုံး အနိုင်ရခဲ့ပေမယ့် နောက်ဆုံး ၃ ပွဲဆက်တိုက် ဂိုးမရှိ သရေကျခဲ့တာပါ။
ဂျူဗင်တပ်စ်အသင်းဟာ ဒီတစ်ပတ် စီးရီးအေပွဲစဉ်အဖြစ် ဂျီနိုအာအသင်းနဲ့ ယှဉ်ပြိုင်ရမှာဖြစ်ပြီး ကြားရက်ထဲမှာ ချန်ပီယံလိဂ်ပွဲစဉ်အဖြစ် လိုက်ပ်ဇစ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Metro
