CNI Sport News
၂၀၂၄ ခုနှစ်၊ စက်တင်ဘာ ၂၆
ယူနိုက်တက်အသင်းနည်းပြ အဲရစ်တန်ဟတ်က တွမ်တီးအသင်းနဲ့ သရေကျခဲ့တဲ့ ယူရိုပါလိဂ်ပွဲစဉ်မှာ ပြိုင်ဘက် အသင်းက နေရာတိုင်းအတွက် တိုက်ပွဲဝင်ခဲ့ပေမယ့် သူတို့ဘက်က ၁၀၀ ရာခိုင်နှုန်း ပေးခဲ့ခြင်းမရှိဘူးလို့ ပြောခဲ့ ပါတယ်။
အဲရစ်တန်ဟတ်က “ဒီပွဲမှာ တွမ်တီးအသင်းဟာ နေရာတိုင်းအတွက် တိုက်ပွဲဝင်ခဲ့ပြီး ကျနော်တို့ကတော့ ဒီလို မလုပ်နိုင်ခဲ့ပါဘူး။ ၉၉ ရာခိုင်နှုန်းက လုံလောက်မှု မရှိတဲ့အတွက် ၁၀၀ ရာခိုင်နှုန်းပေးရမှာပါ။ ကျနော်တို့ဟာ ဒုတိယဂိုးသွင်းပြီး ပွဲကိုအဆုံးသတ်ပစ်ရမှာပါ။ ဒီအတွက် သွင်းဂိုးတွေကို ရယူနိုင်ရမယ်ဆိုတာ ရှင်းပါတယ်။ အဆုံးသတ်ပိုင်းကို ပိုကောင်းအောင် လုပ်ရမှာဖြစ်ပြီး ဂိုးတွေသွင်းယူနိုင်ဖို့အတွက် ရှေ့တန်းမှာ လုံလောက်တဲ့ ကစားသမားတွေရှိပါတယ်”လို့ ပြောခဲ့တာပါ။
ယူနိုက်တက်အသင်းဟာ နည်းပြ အဲရစ်တန်ဟတ်ရဲ့ အသင်းဟောင်း တွမ်တီးအသင်းနဲ့ ကစားခဲ့တဲ့ ယူရိုပါလိဂ် အဖွင့်ပွဲစဉ်မှာ ၁ ဂိုးစီ သရေကျခဲ့တာ ဖြစ်ပါတယ်။
ဒီပွဲမှာ အဲရစ်ဆန်က ယူနိုက်တက်အသင်းအတွက် ဦးဆောင်ဂိုး သွင်းယူနိုင်ခဲ့ပေမယ့် သူ့ရဲ့အမှားကနေ တွမ်တီး အသင်းကို ချေပဂိုးပြန်ပေးခဲ့ရတာပါ။
ယူနိုက်တက်အသင်း ယှဉ်ပြိုင်နေစဉ်
ယူနိုက်တက်အသင်းဟာ ဒီပွဲမှာ စိတ်ပျက်စရာကောင်းတဲ့ ခြေစွမ်းတွေပြသခဲ့ပြီး တွမ်တီးအသင်းက သူတို့ထက် ပိုပြီးလိုချင်ခဲ့တယ်လို့ အဲရစ်ဆန်က ပွဲအပြီးမှာ ပြောခဲ့ပါတယ်။
အဲရစ်ဆန်က “စိတ်ပျက်စရာကောင်းခဲ့ပါတယ်။ ကျနော်တို့ဟာ ပိုကောင်းတဲ့ရလဒ်ကို လိုချင်ပေမယ့် လုံလောက်မှု မရှိခဲ့ပါဘူး။ တွမ်တီးအသင်းကို ကြည့်ရတာက ကျနော်တို့ထက် ပိုပြီးလိုချင်တဲ့ပုံရခဲ့ပြီး ဒါက မှန်ကန်တဲ့အရာ မဟုတ်ပါဘူး။ ကျနော်တို့ဟာ ဒီပွဲမှာ မရှုံးနိမ့်ခဲ့ပေမယ့် ရှုံးနိမ့်သလို ခံစားခဲ့ရပါတယ်”လို့ ပြောခဲ့တာပါ။
ယူနိုက်တက်အသင်းဟာ ပြီးခဲ့တဲ့ ပဲလေ့စ်အသင်းနဲ့ ပရီးမီးယားလိဂ်ပွဲစဉ်မှာ ဂိုးမရှိ သရေကျခဲ့ပြီးနောက် တွမ်တီးအသင်းနဲ့ပါ သရေကျခဲ့လို့ ၂ ပွဲဆက်တိုက် နိုင်ပွဲပျောက်ဆုံးခဲ့ရပါတယ်။
ယူနိုက်တက်အသင်းဟာ တနင်္ဂနွေနေ့မှာ စပါးအသင်းနဲ့ ပရီးမီးယားလိဂ်ပွဲစဉ် ယှဉ်ပြိုင်ရမှာဖြစ်ပြီး နိုင်ပွဲ ပြန်လည်ရယူနိုင်ဖို့ ပစ်မှတ်ထားနေတာ ဖြစ်ပါတယ်။
Source: ESPN
