CNI Sport News

၂၀၂၄ ခုနှစ်၊ ဖေဖော်ဝါရီ ၂၀

ယူနိုက်တက်အသင်းရဲ့ အစုရှယ်ယာရှင် ဆာဂျင်ရက်ကလစ်ဖ်ဟာ ပီအက်စ်ဂျီအသင်းက ခေါ်ယူဖို့ စိတ်ဝင်စား နေတဲ့ တိုက်စစ်မှူး ရက်ရှ်ဖိုဒ့်ကို အသင်းမှာ ဆက်ထိန်းထားဖို့ ဆန္ဒရှိနေတယ်လို့ သိရပါတယ်။

ရက်ရှ်ဖိုဒ့်ဟာ ပြီးခဲ့တဲ့ရာသီကလို စွမ်းဆောင်နိုင်ခြင်းမရှိသေးပေမယ့် ယူနိုက်တက်အသင်းမှာ ဦးစားပေး ကစားသမားအဖြစ် ဆက်ပြီးရှိနေတာပါ။ ရက်ရှ်ဖို့ဒ်ဟာ ဒီရာသီမှာ ယူနိုက်တက်အသင်းအတွက် ပရီးမီးယားလိဂ် ၂၄ ပွဲကစားအပြီးမှာ ၅ ဂိုးသာသွင်းယူနိုင်ခဲ့သလို ဂိုးဖန်တီးမှုကလည်း ၃ ဂိုးသာပြုလုပ်ထားနိုင်ခဲ့တာဖြစ်ပါတယ်။ အင်္ဂလန်ကစားသမားဟာ ပြီးခဲ့တဲ့ရာသီက ယူနိုက်တက်အသင်းအတွက် ပြိုင်ပွဲစုံ ဂိုး ၃၀ သွင်းယူနိုင်ခဲ့တာကြောင့် အသင်းကသူ့ကို တစ်ပတ်လုပ်ခပေါင် ၃၂၅,၀၀၀ အထိတိုးပေးပြီး စာချုပ်သစ်ချုပ်ဆိုခဲ့တာပါ။

ရက်ရှ်ဖိုဒ့်ဟာ ဒီရာသီမှာ ခြေစွမ်းပြသနိုင်ဖို့ ရုန်းကန်နေရပေမယ့် ပီအက်စ်ဂျီအသင်းဟာ တိုက်စစ်မှူး ဘတ်ပီ ရဲ့နေရာမှာ အစားထိုးဖို့ ခေါ်ယူချင်နေတာဖြစ်ပါတယ်။ ဘတ်ပီဟာ ဒီရာသီအကုန်မှာ အသင်းကနေ ထွက်ခွာပြီး ရီးရယ်လ်အသင်းထံ ပြောင်းဖို့ရှိနေတာကြောင့် ပီအက်စ်ဂျီအသင်းဟာ ရက်ရှ်ဖိုဒ့်ကို ခေါ်ယူဖို့ ပစ်မှတ်ထား နေတာပါ။ ပီအက်စ်ဂျီအသင်းဟာ ပြီးခဲ့တဲ့ရာသီတွေကတည်းက ရက်ရှ်ဖိုဒ့်ကို ခေါ်ယူဖို့ စိတ်ဝင်စားခဲ့ပေမယ့် ကစားသမားက ယူနိုက်တက်အသင်းနဲ့ စာချုပ်သစ်ချုပ်ဆိုသွားခဲ့တာဖြစ်ပါတယ်။

ဒါပေမယ့် Football Insider က ဆာဂျင်ရက်ကလစ်ဖ်နဲ့ INEOS တို့က ရက်ရှ်ဖိုဒ့်ကို ဒီရာသီထက်ကျော်လွန်ပြီး အသင်းမှာဆက်ထိန်းထားဖို့ ဆန္ဒရှိနေတယ်လို့ ဖော်ပြခဲ့တာပါ။ ဗြိတိန်ဘီလျံနာ ဆာဂျင်ရက်ကလစ်ဖ်ဟာ ပြီးခဲ့တဲ့ ရာသီက ယူနိုက်တက်အသင်းမှာ ရက်ရှ်ဖိုဒ့်အကောင်းဆုံးလုပ်နိုင်ခဲ့တာကို သိရှိထားတာဖြစ်ပါတယ်။ ရက်ရှ်ဖိုဒ့်နဲ့ ယူနိုက်တက်အသင်းတို့ချုပ်ဆိုထားတဲ့ စာချုပ်ဟာ ၂၀၂၈ ခုနှစ်အထိ သက်တမ်းရှိနေပြီး ကစားသမားဟာ ပြီးခဲ့တဲ့လက ကွင်းပြင်ပပြဿနာတွေကြောင့် အသင်းရဲ့ အရေးယူမှုကို ခံထားရတာပါ။ 

ယူနိုက်တက်အသင်းဟာ လက်ရှိအချိန်မှာ အကောင်းဆုံးပုံစံကို ပြန်လည်ရရှိနေပြီး ၂၀၂၄ ခုနှစ်ထဲ ကစားခဲ့တဲ့ ပွဲတွေမှာ ရှုံးပွဲမရှိသေးတဲ့ မှတ်တမ်းကောင်းတစ်ခုကို ပိုင်ဆိုင်ထားပါတယ်။ ယူနိုက်တက်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Sportsmole

CNI Sport News

၂၀၂၄ ခုနှစ်၊ ဖေဖော်ဝါရီ ၂၀

ရီးရယ်လ်နဲ့ ချယ်လ်ဆီး ကစားသမားဟောင်း ဟာဇက်က ဆော်ဒီလိဂ်ဟာ ပြင်သစ်လိဂ်ထက် ပိုပြီးကောင်းတယ်လို့ အယ်လ်နာဆာအသင်းခေါင်းဆောင် ရော်နယ်ဒို ပြောခဲ့တာကို ပြန်ပြီးတုန့်ပြန်လိုက်ပါတယ်။

ဟာဇက်က “ရော်နယ်ဒို ပြောတာကို ကျနော်သဘောမတူပေမယ့် ဒါကထင်မြင်ချက်တစ်ခုပါ။ ဆော်ဒီလိဂ်ကို ကြည့်ရင် သူတို့မှာ နာမည်ကြီးတဲ့ ကစားသမားတွေရှိပေမယ့် သူတို့ဟာ အသင်းကြီးတွေ မဟုတ်ပါဘူး။ ပြင်သစ် မှာဆိုရင် နာမည်ကြီး ကစားသမားတွေနည်းပေမယ့် သူတို့မှာ အသင်းကြီးတွေရှိပါတယ်။ လီဂူးအသင်းတွေက ဆော်ဒီအသင်းတွေနဲ့ ယှဉ်ပြိုင်ရင် အနိုင်ရမယ်ဆိုတာ သေချာပါတယ်။ လူတွေထင်သလို လွယ်လွယ်ကူကူနဲ့တော့ မဟုတ်ပါဘူး။ ဒါပေမယ့် ပြင်သစ်လိဂ်ရဲ့ အဆင့်အတန်းက ကောင်းပါတယ်”လို့  Obi One Podcast ကိုပြောခဲ့ တာပါ။

ဟာဇက်ဟာ ချယ်လ်ဆီးအသင်းထံ ၂၀၁၂ ခုနှစ်မှာ မပြောင်းမရွှေ့ခင် ပြင်သစ်လီဂူး-၁ ကလပ်အသင်းဖြစ်တဲ့ လိုင်လီအသင်းမှာ ကစားခဲ့ပြီး ပြင်သစ်လီဂူး-၁ နဲ့ ပြင်သစ်ဖလားကို ရယူနိုင်ခဲ့တာဖြစ်ပါတယ်။ 

ပေါ်တူဂီအသင်းခေါင်းဆောင် ရော်နယ်ဒိုဟာ အယ်လ်နာဆာအသင်းကို ရောက်ရှိပြီးကတည်းက ဆော်ဒီပရိုလိဂ် ဟာ ကမ္ဘာ့ထိပ်တန်းလိဂ်ထဲကို ရောက်ရှိနိုင်သလို ပြင်သစ်လိဂ်ထက် ပိုပြီးကောင်းတယ်လို့ ပြောခဲ့တာပါ။ 

ရော်နယ်ဒိုနဲ့ ဟာဇက်ကို တွေ့ရစဉ်

ရော်နယ်ဒိုဟာ မကြာသေးခင်က Globe Soccer Awards ပွဲမှာလည်း ဒီအကြောင်းကို ထပ်ပြီးပြောခဲ့ပါတယ်။

ရော်နယ်ဒိုက “ရိုးရိုးသားသားပြောရရင် ဆော်ဒီလိဂ်ဟာ ပြင်သစ်လိဂ်ထက် ပိုပြီးမဆိုးဘူးလို့ ကျနော်ထင်ပါတယ်။ ပြင်သစ်လိဂ်မှာ အလွန်ကောင်းမွန်တဲ့ ၂ သင်း၊ ၃ သင်းသာရှိပြီး ဆော်ဒီလိဂ်က ပိုပြီးပြိုင်ဆိုင်မှုပြင်းထန်တယ်လို့ ကျနော်ထင်ပါတယ်။ ကျနော်ဒီမှာကစားတာ ၁ နှစ်ရှိပြီဖြစ်တာကြောင့် ဒီအကြောင်းကို ပြောနိုင်တာပါ။ အခု အချိန်မှာ ကျနော်တို့လိဂ်ဟာ ပြင်သစ်လိဂ်ထက် ပိုကောင်းပြီး တိုးတက်မှုတွေရှိနေတုန်းပဲ”လို့ ပြောခဲ့တာပါ။

ဆော်ဒီလိဂ်မှာရှိတဲ့ ကလပ်အသင်းတွေဟာ ပြီးခဲ့တဲ့နွေရာသီက ဘန်ဇီမာ၊ နေမာ၊ မာနေး၊ မာရက်ဇ်၊ ကန်တီ အစ ရှိတဲ့ ဥရောပထိပ်သီး ကစားသမား အများအပြားကို ငွေကြေး အများအပြားသုံးစွဲပြီး ခေါ်ယူအားဖြည့်ခဲ့ပါတယ်။ 

ဒါပေမယ့် အင်္ဂလန်ကွင်းလယ်လူ ဟန်ဒါဆန် အပါအဝင် ကစားသမားအချို့ဟာ ဆော်ဒီလိဂ်မှာ ကစားရတာ အဆင်ပြေခြင်းမရှိလို့ ရာသီဝက် ကစားအပြီးမှာ ပြန်လည်ထွက်ခွာခဲ့ကြတာ ဖြစ်ပါတယ်။

Source: Mirror

CNI Sport News

၂၀၂၄ ခုနှစ်၊ ဖေဖော်ဝါရီ ၂၀

ပရီးမီးယားလိဂ်ကလပ် ပဲလေ့စ်အသင်းဟာ ဖရန့်ဖတ်အသင်း နည်းပြဟောင်း ဂလက်စ်နာကို နည်းပြသစ်အဖြစ် ခန့်အပ်လိုက်ပြီလို့ တရားဝင် ကြေညာလိုက်ပါတယ်။

အသက် ၄၉ နှစ်အရွယ်ရှိ သြစတြီးယားလူမျိုး ဂလက်စ်နာဟာ ပဲလေ့စ်အသင်း နည်းပြရာထူးကနေ နုတ်ထွက်ခဲ့တဲ့ ရွိုင်းဟော့ဒ်ဆန်ရဲ့နေရာမှာ နည်းပြသစ်အဖြစ် အစားထိုးတာဝန်ယူမှာပါ။ 

ပဲလေ့စ်အသင်းဟာ ဒီရာသီမှာ ရလဒ်တွေ ဆိုးရွားနေပြီး နောက်ဆုံးကစားခဲ့တဲ့ ၁၇ ပွဲမှာ ၁၀ ပွဲအထိ အရေးနိမ့်ကာ ပရီးမီးယားလိဂ် အမှတ်ပေးဇယားအဆင့် ၁၅ နေရာမှာ ရပ်တည်နေတာ ဖြစ်ပါတယ်။ 

ဂလက်စ်နာဟာ ပဲလေ့စ်အသင်းနဲ့ ၂၀၂၆ ခုနှစ်၊ ဇွန်လအထိ စာချုပ်ချုပ်ဆိုခဲ့တာပါ။

သြစတြီးယားလူမျိုးနည်းပြဟာ ဒီတစ်ပတ်ဘန်လေအသင်းနဲ့ ကစားမယ့်ပွဲစဉ်မှာ ပဲလေ့စ်အသင်းကို စတင်ပြီး ကိုင်တွယ်ရမှာ ဖြစ်ပါတယ်။ 

ဂလက်စ်နာဟာ ဖေဖော်ဝါရီ ၂၀ ရက် မနက်ပိုင်းက ကစားခဲ့တဲ့ အဲဗာတန်အသင်းနဲ့ ပဲလေ့စ်အသင်းတို့ ၁ ဂိုးစီ သရေကျတဲ့ ပွဲစဉ်ကို ပွဲကြည့်စင်ပေါ်ကနေ ကြည့်နေခဲ့တာပါ။ 

ရွိုင်းဟောဒ့်ဆန်နဲ့ ဂလက်စ်နာကို တွေ့ရစဉ်

ဒီပွဲကို ရွိုင်းဟောဒ့်ဆန်ရဲ့ နည်းပြအဖွဲ့ဝင်တွေဖြစ်တဲ့ ရေးလီဝင်တန်နဲ့ မက္ကာသီတို့က ကိုင်တွယ်ခဲ့တာ ဖြစ်ပါတယ်။ 

ဂလက်စ်နာဟာ သူ့ရဲ့ နည်းပြဘဝ အစကို သြစတြီးယားကလပ် SV ရိဒ်အသင်းမှာ စတင်ခဲ့တာဖြစ်ပြီး ဒီအသင်းမှာ ၁၉ နှစ်ကြာ ကစားသမားဘဝကို ဖြတ်သန်းခဲ့တာပါ။

ဂလက်စ်နာဟာ SV ရိဒ်အသင်းကို ကိုင်တွယ်အပြီးမှာ ဂျာမန်ကလပ်တွေဖြစ်တဲ့ ဝုလ်ဖ်ဘတ်နဲ့ ဖရန့်ဖတ်အသင်း တွေကို ကိုင်တွယ်ခဲ့တာ ဖြစ်ပါတယ်။

၂၀၂၂ ခုနှစ်မှာ ဖရန့်ဖတ်အသင်းကို ကိုင်တွယ်ခဲ့တဲ့ ဂလက်စ်နာဟာ သူ့ရဲ့ပထမရာသီမှာ ဖရန့်ဖတ်အသင်းကို ယူရိုပါလိဂ် ဆုဖလားရယူပေးနိုင်ခဲ့တာပါ။

ဂလက်စ်နာဟာ ပြီးခဲ့တဲ့နှစ်က ဖရန့်ဖတ်အသင်းကို ချန်ပီယံလိဂ်ပြိုင်ပွဲရဲ့ ၁၆ သင်း အဆင့်ထိ ရောက်ရှိအောင် ပို့ဆောင်ပေးနိုင်ခဲ့ပေမယ့် အသင်းဟာ ဘွန်ဒစ်လီဂါမှာ ၁၀ ပွဲဆက်တိုက် နိုင်ပွဲပျောက်ဆုံးပြီးနောက် နည်းပြ ရာထူးကနေ ထွက်ခွာခဲ့ပါတယ်။

ဂလက်စ်နာဟာ ပဲလေ့စ်အသင်းရဲ့ နည်းပြသစ်အဖြစ် မခန့်အပ်ခံရခင်ကတည်းက စပါးအသင်းနဲ့ ဝုလ်ဗ်စ်အသင်းရဲ့ ပွဲစဉ်ကို သွားရောက်ကြည့်ရှုခဲ့ပြီး မတ်လ ၂ ရက်မှာ ကစားရမယ့် စပါးအသင်းနဲ့ပွဲစဉ်အတွက် ကြိုတင်ပြင်ဆင်မှု တွေ ပြုလုပ်ခဲ့တာ ဖြစ်ပါတယ်။

Source: BBC

CNI Sport News

 ၂၀၂၄ ခုနှစ်၊ ဖေဖော်ဝါရီ ၂၀

အင်တာမိုင်ယာမီ အသင်းခေါင်းဆောင် မက်ဆီက ဟောင်ကောင်မှာ ကျင်းပခဲ့တဲ့ ခြေစမ်းပွဲမှာ ပါဝင် မကစားနိုင်ခဲ့တာဟာ ဒဏ်ရာကြောင့်ဖြစ်ပြီး နိုင်ငံရေးကြောင့် မဟုတ်ဘူးလို့ Weibo ဆိုရှယ်မီဒီယာမှာ ဗွီဒီယိုပို့စ်တင်ကာ ပြောခဲ့ပါတယ်။

မက်ဆီက “ဟောင်ကောင်ပွဲအပြီးမှာ ပြောခဲ့တဲ့ အရာတွေ အများကြီးကို ဖတ်လည်းဖတ်ခဲ့ရသလို ကြားလည်း ကြားခဲ့ရပါတယ်။ ဒီဗွီဒီယိုကို တင်ခဲ့တာဟာ အမှန်အကန် အကြောင်းအရာကို ပေးချင်လို့ဖြစ်ပြီး ဘယ်သူမှ မမှန်မကန်တဲ့ အကြောင်းအရာတွေကို ဆက်ဖတ်ဖို့ မလိုအပ်ပါဘူး။ နိုင်ငံရေး အကြောင်းပြချက်တွေနဲ့ မှန်ကန်မှု မရှိတဲ့ အခြားအကြောင်းပြချက်တွေကြောင့် မကစားချင်ကြဘူးလို့ လူတွေပြောနေကြပါတယ်။ ကျနော်ဟာ ကစားသမားဘဝ စတင်ကတည်းက တရုတ်နဲ့ အလွန်ရင်းနှီးတဲ့ အထူးဆက်ဆံရေးရှိပါတယ်။ ဒီပွဲကို မပါဝင် နိုင်ခဲ့တာက ဒဏ်ရာကြောင့်ပါ” လို့ ပြောခဲ့တာပါ။

မက်ဆီဟာ ဟောင်ကောင်ခြေစမ်းပွဲမှာ အင်တာမိုင်ယာမီ အသင်းအတွက် ပါဝင်ကစားခဲ့ခြင်းမရှိဘဲ ၃ ရက် အကြာမှာ ကစားတဲ့ ဂျပန်ခြေစမ်းပွဲမှာ လူစားဝင် ကစားသမားအဖြစ် ပါဝင်ကစားသွားခဲ့တာ ဖြစ်ပါတယ်။ 

မက်ဆီကို တွေ့ရစဉ်

အဲဒါကြောင့် တရုတ်အစိုးရမီဒီယာတွေ၊ ဟောင်ကောင်နိုင်ငံရေးသမားတွေနဲ့ ပရိသတ်တွေက မက်ဆီကို ဒေါသတ ကြီးနဲ့ တုန့်ပြန်မှုတွေ ပြုလုပ်ခဲ့ကြတာပါ။ 

ဒီအဖြစ်အပျက်အပြီးမှာ ဟန်ကျိုးနဲ့ ဘေဂျင်းတို့ဟာ မတ်လမှာ ကျင်းပဖို့ စီစဉ်ထားတဲ့ အာဂျင်တီးနားအသင်းရဲ့ ခြေစမ်းပွဲတွေမှာ လက်ခံကျင်းပမှာ မဟုတ်ဘူးလို့ ကြေညာခဲ့ပါတယ်။

အဲဒါကြောင့် မက်ဆီဟာ Weibo ဆိုရှယ်မီဒီယာမှာ ဒီအခြေအနေတွေကို ရှင်းရှင်းလင်းလင်း ပြောလာခဲ့တာပါ။ 

အင်တာမိုင်ယာမီ အသင်းခေါင်းဆောင်ဟာ ဒဏ်ရာရနေပေမယ့် ဟောင်ကောင် ခြေစမ်းပွဲမတိုင်ခင် တစ်ရက်အလို မှာ လေ့ကျင့်ရေးကွင်းကို လာရောက်ကြည့်ရှုတဲ့ ပရိသတ်တိုင်းအတွက် လေ့ကျင့်ဖို့ ကြိုးစားပြီး အားစိုက် လုပ်ဆောင်ခဲ့တယ်လို့လည်း ပြောခဲ့ပါတယ်။ 

ဂျပန်မှာ မိနစ်အနည်းငယ် ကစားခဲ့တာက ဒဏ်ရာကနေ ပိုကောင်းလာတယ်လို့ ခံစားခဲ့ရသလို ကြံ့ခိုင်မှုပိုင်းကို ပြင်ဆင်ဖို့အတွက်ဖြစ်တယ်လို့ သူ့ရဲ့ ဗွီဒီယိုထဲမှာ ထည့်သွင်းပြောခဲ့တာပါ။

မက်ဆီဟာ လက်ရှိအချိန်မှာ ကြံ့ခိုင်မှု အပြည့်အဝ ရှိနေပြီဖြစ်လို့ ဖေဖော်ဝါရီ ၂၁ ရက်မှာ ကစားမယ့် ရီးရယ်လ် ဆော့လိတ်အသင်းနဲ့ ရာသီသစ် မေဂျာလိဂ်ပွဲစဉ်မှာ အင်တာမိုင်ယာမီ အသင်းအတွက် ပွဲထွက် ပါဝင်ကစားဖို့ အဆင်သင့် ဖြစ်နေပြီလို့ သိရပါတယ်။

Source: besoccer

CNI Sport News

၂၀၂၄ ခုနှစ်၊ ဖေဖော်ဝါရီ ၁၉

ဘာစီလိုနာအသင်းတိုက်စစ်မှူးဟောင်း ဆွာရက်ဇ်က သူ့ရဲ့ စိတ်ပြောင်းသွားမှုကြောင့် အာဆင်နယ်အသင်းနဲ့ ဘန်ဇီမာ တို့ရဲ့ အပြောင်းအရွှေ့ပျက်ပြယ်ခဲ့တဲ့အကြောင်းကို ဖွင့်ဟသွားခဲ့ပါတယ်။

ဆွာရက်ဇ်က “၂၀၁၄ ကမ္ဘာ့ဖလားမတိုင်ခင်က ရီးရယ်လ်က ကျနော့်ကို ခေါ်ယူချင်ခဲ့ပြီး အရာအားလုံးက လမ်းကြောင်းမှန်ပေါ်ရောက်နေခဲ့ပါတယ်။ သူတို့က ဘန်ဇီမာကို အာဆင်နယ်ထံ ရောင်းချဖို့ စီစဉ်နေပြီး အဆုံးသတ်ဖို့ပဲရှိပါတော့တယ်။ ဒါပေမယ့် ကမ္ဘာ့ဖလားပြိုင်ပွဲလည်းစရော ဘာစီလိုနာက ဒီပြိုင်ပွဲထဲပါဝင်လာခဲ့ပြီး ကျနော်လည်း ဘာစီလိုနာကို သဘောကျပါတယ်။ နောက်ဆုံးမှာတော့ ဒီရွေးချယ်စရာ ၂ ခုထဲက ကျနော့်ရဲ့ အိပ်မက်ဖြစ်တဲ့ ဘာစီလိုနာကို ရွေးချယ်ခဲ့တာပါ” လို့ DelSol 99.5 FM radio station ကို ပြောခဲ့တာပါ။

၂၀၁၃ ခုနှစ်မှာ ဆွာရက်ဇ်ဟာ လီဗာပူးလ်အသင်းကနေ ထွက်ခွာဖို့ ဆန္ဒပြင်းပြခဲ့ပြီး အာဆင်နယ်အသင်းက နွေ ရာသီမှာ ပေါင်သန်း ၄၀ နဲ့ ၁ ပေါင်ကမ်းလှမ်းခဲ့တာဖြစ်ပါတယ်။ လူအများကြားပြောစရာဖြစ်ခဲ့တဲ့ အာဆင်နယ် အသင်းရဲ့ ကမ်းလှမ်းမှုကို လီဗာပူးလ်အသင်းက ပယ်ချခဲ့တာပါ။ ၂၀၁၄ ခုနှစ်မှာတော့ ဆွာရက်ဇ်ဟာ ဘာစီလိုနာ အသင်းကို ပြောင်းရွှေ့ခဲ့ပြီး တစ်ရာသီအတွင်း ဆုဖလား ၃ လုံးအပါအဝင် ဆုဖလားအောင်မြင်မှု အများအပြား ရယူနိုင်ခဲ့တာဖြစ်ပါတယ်။

ဒါပေမယ့် ဆွာရက်ဇ်ဟာ ဘာစီလိုနာအသင်းထံ မပြောင်းရွှေ့ခင် ရီးရယ်လ်အသင်းထံ ပြောင်းရွှေ့ဖို့ နီးစပ်ခဲ့သေး တယ်လို့ ပြောခဲ့တာပါ။ ရီးရယ်လ်အသင်းဟာ ဆွာရက်ဇ်ကို ခေါ်ယူဖို့အတွက် အကြိုသဘောတူညီမှုရခဲ့ပြီး ဘန်ဇီမာကို အာဆင်နယ်အသင်းထံ ရောင်းချကာ ပြောင်းရွှေ့ကြေး ရှာဖွေဖို့ စီစဉ်ခဲ့တာဖြစ်ပါတယ်။ ဒါပေမယ့် ဆွာရက်ဇ်ဟာ ၂၀၁၄ ကမ္ဘာ့ဖလားပြိုင်ပွဲမှာ အီတလီနောက်ခံလူ ချီလီနီကို ကိုက်ခဲ့တာကြောင့် ရီးရယ်လ်အသင်းရဲ့ စိတ်ဝင်စားမှုဟာ လျော့နည်းသွားခဲ့ပါတယ်။

ဒီအချိန်မှာ ဘာစီလိုနာအသင်းက အရှိန်မြှင့်ကြိုးပမ်းခဲ့တာကြောင့် ဆွာရက်ဇ်ဟာ ကတ်တလန်ကလပ်နဲ့ အပြောင်း အရွှေ့ဖြစ်ခဲ့တာပါ။ ဆွာရက်ဇ်ဟာ ဘာစီလိုနာအသင်းမှာ မက်ဆီ၊နေမာတို့နဲ့ အတွဲအဖက်မိခဲ့ပြီး ၂၀၁၄-၁၅ ရာသီ မှာ အသင်းကို ဆုဖလား ၃ လုံးရယူပေးနိုင်ခဲ့တာဖြစ်ပါတယ်။

Source:Metro

CNI Sport News

၂၀၂၄ ခုနှစ်၊ ဖေဖော်ဝါရီ ၂၀

ဖိလစ်ပိုင်နာမည်ကြီး လက်ဝှေ့သမား ပတ်ကွီအိုဟာ အခုနှစ်ထဲကျင်းပမယ့် ပဲရစ်အိုလံပစ်ပြိုင်ပွဲမှာ ပါဝင် ယှဉ်ပြိုင်ခွင့်ရဖို့ ငြင်းပယ်ခံခဲ့ရပြီးနောက် သူ့ရဲ့အိုလံပစ်အိပ်မက် ပြီးဆုံးသွားပြီလို့ ဝန်ခံခဲ့ပါတယ်။

ပတ်ကွီအိုက “ကျနော် အလွန်ဝမ်းနည်းပြီး စိတ်ပျက်မိပေမယ့် အိုလံပစ်ပြိုင်ပွဲရဲ့ အသက် ကန့်သတ်ချက်တွေကို ကျနော်နားလည်ပြီး လက်ခံပါတယ်”လို့ သူ့ရဲ့ ထုတ်ပြန်ချက်ထဲမှာ ဖော်ပြထားတာပါ။

ဖိလစ်ပိုင်အိုလံပစ်ကော်မတီဟာ ပဲရစ်အိုလံပစ်ပြိုင်ပွဲမှာ ပတ်ကွီအိုကို ပါဝင်ယှဉ်ပြိုင်ခွင့်ပေးဖို့ တောင်းဆိုခဲ့ပေမယ့် နိုင်ငံတကာအိုလံပစ်ကော်မတီ(IOC)က ပယ်ချခဲ့တာဖြစ်ပါတယ်။

IOC ဟာ အိုလံပစ် လက်ဝှေ့ပြိုင်ပွဲဝင်မယ့် လက်ဝှေ့သမားတွေအတွက် အသက် ၄၀ နှစ်အရွယ်အထိသာ ယှဉ်ပြိုင် ခွင့်ပေးဖို့ ကန့်သတ်ထားတာပါ။

အဲဒါကြောင့် အသက် ၄၅ နှစ်အရွယ်ရှိ ပတ်ကွီအိုကို အိုလံပစ်ပြိုင်ပွဲမှာ ပါဝင်ယှဉ်ပြိုင်ခွင့်ပြုဖို့အတွက် IOC ဟာ သူတို့ရဲ့ ဝင်ခွင့်စည်းမျဉ်းတွေကို မပြောင်းလဲဖို့ ဆုံးဖြတ်ခဲ့တာ ဖြစ်ပါတယ်။

ပတ်ကွီအိုကို တွေ့ရစဉ်

IOC ဟာ အိုလံပစ်ပြိုင်ပွဲရဲ့ လက်ဝှေ့ပွဲအတွက် အသက်ကန့်သတ်ချက်ကို ၂၀၁၃ ခုနှစ်မှာ အသက် ၃၄ နှစ်ကနေ အသက် ၄၀ နှစ်အထိ ပြောင်းလဲခဲ့တာပါ။

ဒီလိုပြောင်းလဲမှုကြောင့် ပတ်ကွီအိုဟာ ၂၀၁၆ ရီယိုအိုလံပစ်ပြိုင်ပွဲမှာ ပါဝင်ယှဉ်ပြိုင်ခွင့်ရဖို့ ရှိခဲ့ပေမယ့် ဒီအချိန် တုန်းက ပတ်ကွီအိုဟာ ဖိလစ်ပိုင်နိုင်ငံမှာ အထက်လွှတ်တော်အမတ်အဖြစ် ရွေးချယ်ခံရလို့ မပါဝင်နိုင်ခဲ့ပါဘူး။ 

အဲဒါကြောင့် ဖိလစ်ပိုင်အိုလံပစ်ကော်မတီက အိုလံပစ်ပြိုင်ပွဲမှာ ပါဝင် မယှဉ်ပြိုင်ဖူးတဲ့ ပတ်ကွီအိုကို ပဲရစ်အိုလံပစ် ပြိုင်ပွဲမှာ ပါဝင်ယှဉ်ပြိုင်ခွင့်ရဖို့ ကြိုးစားခဲ့ပေမယ့် မအောင်မြင်ခဲ့တာ ဖြစ်ပါတယ်။

ပတ်ကွီအိုကတော့ သူပါဝင်လို့ မရပေမယ့် ပဲရစ်အိုလံပစ်ပြိုင်ပွဲမှာ ပါဝင်ယှဉ်ပြိုင်ကြမယ့် ဖိလစ်ပိုင် အားကစား သမားတွေကို အားပေးသွားမယ်လို့ ပြောခဲ့တာပါ။ 

ပတ်ကွီအိုဟာ ထိုင်းကစ်ဘောက်ဆာ တစ်ဦးနဲ့ ဧပြီ ၂၀ ရက် ဘန်ကောက်မှာ သရုပ်ပြပွဲ ထိုးသတ်ဖို့ ရှိတယ်လို့ သိရပါတယ်။

Source: CNA

CNI Sport News

၂၀၂၄ ခုနှစ်၊ ဖေဖော်ဝါရီ ၁၉

ဘိုင်ယန်မြူးနစ်အသင်းဟာ ဘိုချန်အသင်းကို အရေးနိမ့်ပြီး နောက်ဆုံး ၃ ပွဲ ဆက်တိုက်ရှုံးပွဲနဲ့ ကြုံတွေ့ခဲ့ရပေမယ့် နည်းပြတူချယ်လ်ကတော့ သူအသင်းမှာဆက်ရှိမယ်လို့ ပြောလိုက်ပါတယ်။

တူချယ်လ်က “ကျနော်ဟာ ကိုယ့်ကိုကိုယ်ယုံကြည်မှုရှိလားနဲ့ နည်းပြအဖွဲ့ဝင်တွေက ရလဒ်ဆိုးတွေကနေ ပြန် ကောင်းအောင်လုပ်နိုင်မလားဆိုပြီး ခင်ဗျားတို့ ကျနော့်ကိုမေးရင် ကျနော်ကတော့ ဟုတ်တယ်လို့ပဲ ဖြေရမှာပါ။ ရှုံးနိမ့်ပြီးတိုင်းမှာ ဖိအားတွေက ပိုပြီးတိုးလာပါတယ်။ ဒါပေမယ့် ကျနော်တို့ဟာ ဘယ်တော့မှရပ်တန့်သွားမှာ မဟုတ်သလို ကြိုးစားမှုကိုလည်း ဘယ်တော့မှရပ်တန့်သွားမှာမဟုတ်ပါဘူး။ ဒီပွဲကို နောက်ထပ် ၅ ကြိမ်ထပ် ကစားရင် ၅ ကြိမ်စလုံး ကျနော်တို့ အနိုင်ရမှာပါ။ ဒီရှုံးပွဲအတွက်ကစားသမားတွေကို အပြစ်တင်မှာ မဟုတ်ပါဘူး” လို့ ပြောခဲ့တာပါ။

ဘိုင်ယန်မြူးနစ်အသင်းဟာ ဘိုချန်အသင်းကို ၃ ဂိုး-၂ ဂိုးနဲ့ အရေးနိမ့်ပြီးနောက် ၂၀၁၅ ခုနှစ်၊မေလ နောက်ပိုင်း ပထမဆုံးအကြိမ်ပြိုင်ပွဲစုံ ၃ ပွဲဆက်ရှုံးနိမ့်ခဲ့တာဖြစ်ပါတယ်။ ဘိုင်ယန်မြူးနစ်အသင်းဟာ ဒီရှုံးပွဲကြောင့် ဘွန်ဒစ်လီဂါအမှတ်ပေးဇယားထိပ်ဆုံးနေရာက လေဗာကူဆင်အသင်းနဲ့ ၈ မှတ်အထိ ကွာဟသွားခဲ့ပြီး နည်းပြ တူချယ်လ်အပေါ်မှာလည်း ဖိအားတွေပိုပြီးတိုးလာခဲ့တာပါ။ ဒါပေမယ့် ဘိုင်ယန်မြူးနစ်အသင်းကတော့ တူချယ်လ် ကို နည်းပြရာထူးက ထုတ်ပယ်ဦးမှာမဟုတ်ဘူးလို့ အတည်ပြုထားပါတယ်။

ဘိုင်ယန်မြူးနစ်ကွင်းလယ်လူ ဂေါ်ရက်စကာက “မပြီးဆုံးသေးတဲ့ ထိတ်လန့်စရာရုပ်ရှင်တစ်ခုလို ကျနော် ခံစားနေရပါတယ်။ လက်ရှိအခိုက်အတန့်မှာ အရာအားလုံးက ကျနော်တို့ရဲ့ ဆန့်ကျင်ဘက်ဖြစ်နေပါတယ်။ ကျနော် တို့ဟာ အရာအားလုံးကိုကြိုးစားခဲ့တာကြောင့် ခင်ဗျားတို့ ကျနော်တို့ကို အပြစ်တင်လို့မရဘူး”လို့ ပြောခဲ့တာပါ။

ဘိုင်ယန်မြူးနစ်အသင်းဟာ ဒီတစ်ပတ်ဘွန်ဒစ်လီဂါပွဲစဉ်အဖြစ် လိုက်ပ်ဇစ်အသင်းနဲ့ ယှဉ်ပြိုင်ရမှာဖြစ်ပြီး ရှုံးပွဲ ဆက်နေမှုကို ရပ်တန့်နိုင်ဖို့ မျှော်လင့်နေတာဖြစ်ပါတယ်။ 

Source:ESPN

CNI Sport News

၂၀၂၄ ခုနှစ်၊ ဖေဖော်ဝါရီ ၁၉

ယူနိုက်တက်အသင်းနည်းပြ အဲရစ်တန်ဟတ်က အသင်းအနေနဲ့ ထိပ်ဆုံး ၄ သင်းထဲကို ဝင်ရောက်ချင်တယ်ဆိုရင် အဆုံးသတ်ပိုင်း ပိုပြီးကောင်းအောင်လုပ်ဖို့ လူတန်အသင်းနဲ့ ပွဲအပြီးမှာ ကစားသမားတွေကို ပြောလိုက်ပါတယ်။

အဲရစ်တန်ဟတ်က “ကျနော်တို့ ဒီပွဲမှာ အခွင့်အရေးတွေကို အသုံးမချနိုင်ခဲ့ပါဘူး။ ကျနော်တို့ ဒီထက်ပိုပြီး ဂိုးတွေ အများကြီး သွင်းယူသင့်တယ်လို့ ထင်ပါတယ်။ ဒီပွဲမှာ ကျနော်တို့ အခွင့်အရေးအများကြီး ရရှိခဲ့ပြီး ဂိုးတွေလည်း ပိုပြီးသွင်းသင့်ပါတယ်။ ကျနော်တို့ အဆုံးသတ်ပိုင်း ပိုကောင်းဖို့လိုအပ်ပြီး ဂိုးအများအပြား သွင်းယူရမှာပါ”လို့ ပြော ခဲ့တာပါ။

ယူနိုက်တက်အသင်းဟာ လူတန်အသင်းနဲ့ ကစားခဲ့တဲ့ပွဲစဉ်မှာ တိုက်စစ်မှူး ဟော့ဂျ်လန်းရဲ့ ပွဲကစားချိန် ၇ မိနစ် အတွင်း သွင်းယူခဲ့တဲ့ ၂ ဂိုးကြောင့် ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။ 

လူတန်အသင်းအတွက် ချေပဂိုးကို မော်ရစ် သွင်းယူပြီးနောက်မှာ ယူနိုက်တက်အသင်းဟာ ဂိုးရနိုင်မယ့် ကြီးမားတဲ့ အခွင့်အရေးတွေ ရခဲ့ပေမယ့် ဟော့ဂျ်လန်း၊ ဂါနာချိုနဲ့ ဘရူနိုဖာနန်ဒက်စ်တို့ အသုံးမချနိုင်ခဲ့လို့ ယူနိုက်တက်အသင်း ဟာ ဂိုးပြတ်နိုင်ပွဲ မရရှိခဲ့တာပါ။

 ယူနိုက်တက်အသင်းကို တွေ့ရစဉ်

ဒီပွဲမှာ ယူနိုက်တက်အသင်းအတွက် ၂ ဂိုး သွင်းယူပေးခဲ့တဲ့ တိုက်စစ်မှူး ဟော့ဂျ်လန်းဟာ ပရီးမီးယားလိဂ် သမိုင်း တစ်လျှောက် ၆ ပွဲ ဆက်တိုက် ဂိုးသွင်းယူနိုင်တဲ့ အသက်အငယ်ဆုံး ကစားသမားအဖြစ် မှတ်တမ်းရေးထိုး နိုင်ခဲ့ပါ တယ်။ 

နည်းပြ အဲရစ်တန်ဟတ်ကတော့ ဟော့ဂျ်လန်းဆီကနေ နောက်ထပ် သွင်းဂိုးတွေ အများကြီး ထပ်ပြီးရရှိဦးမယ်လို့ ပြောခဲ့ပါတယ်။

အဲရစ်တန်ဟတ်က “သူက တိုက်ခိုက်ရေး သမားဖြစ်ပြီး ဂိုးရှေ့မှာ အလွန်ကောင်းမွန်တဲ့ စွမ်းဆောင်ရည်ရှိပါတယ်။ သူဟာ ဂိုးမသွင်းနိုင်လို့ စိတ်ဓါတ်ကျနေမယ့်သူ မဟုတ်ပါဘူး။ သူ့မှာ ယုံကြည်မှုတွေ အများကြီးရှိနေပြီး သူဒီထက် ပိုပြီး ဂိုးတွေအများကြီး သွင်းယူနိုင်မယ်ဆိုတာ ကျနော်ယုံကြည်တယ်”လို့ ပြောခဲ့တာပါ။

ယူနိုက်တက်အသင်းဟာ ဒီနိုင်ပွဲကြောင့် နောက်ဆုံး ကစားခဲ့တဲ့ ပရီးမီးယားလိဂ် ၄ ပွဲစလုံး အနိုင်ရခဲ့ပြီး အမှတ်ပေး ဇယားအဆင့် ၆ နေရာမှာ ရပ်တည်နေကာ အဆင့် ၄ နေရာက ဗီလာအသင်းနဲ့ ၅ မှတ်ကွာဟနေပါတယ်။ 

ယူနိုက်တက်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Daily Mail

CNI Sport News
၂၀၂၄ ခုနှစ်၊ ဖေဖော်ဝါရီ ၁၈ 

ယူနိုက်တက်အသင်းနည်းပြ အဲရစ်တန်ဟတ်က လူတန်အသင်းနဲ့ ကစားမယ့် ပရီးမီးယားလိဂ်ပွဲစဉ်မှာ အသင်း အနေနဲ့ အကောင်းဆုံး ဘောလုံးကစားဖို့ လိုတယ်လို့ ပြောခဲ့ပါတယ်။

အဲရစ်တန်ဟတ်က “ယူနိုက်တက်ဟာ ဘယ်ပြိုင်ဘက်ကိုမှ လျှော့တွက်ရမယ့် အနေအထားမှာ မရှိပါဘူး။ ရာသီ တစ်လျှောက်လုံး သူတို့ရဲ့ စွမ်းဆောင်ရည်ဟာ အလွန်ကောင်းမွန်တာကို ကျနော်တို့ မြင်တွေ့ခဲ့ရပါတယ်။ ပြီးခဲ့တဲ့ ရက်သတ္တပတ်မှာဆိုရင် လူတန်အသင်းဟာ အလွန်တိုးတက်လာခဲ့ပါတယ်။ ကျနော်တို့ဟာ ပြိုင်ဘက်တိုင်းကို လေးစားသလို လူတန်ကိုလည်း လေးစားပါတယ်။ ဒီပွဲမှာ ကျနော်တို့ အကောင်းဆုံး ဘောလုံးကစားဖို့လိုပါ တယ်”လို့ ပြောခဲ့တာပါ။ 

လူတန်အသင်းဟာ နောက်ဆုံးကစားခဲ့တဲ့ ၅ ပွဲမှာ ၁ ပွဲသာ အရေးနိမ့်ခဲ့ပြီး ၃ ပွဲနိုင် ၁ ပွဲသရေနဲ့ ရလဒ်ကောင်းတွေ ကို ပိုင်ဆိုင်နေတာပါ။ 

ယူနိုက်တက်အသင်းကလည်း နောက်ဆုံးကစားခဲ့တဲ့ ၅ ပွဲမှာ ၄ ပွဲအထိ အနိုင်ရပြီး ၁ ပွဲသရေကျကာ သူတို့ရဲ့ အကောင်းဆုံးပုံစံကို ပြန်လည်ရှာဖွေနိုင်ခဲ့တာ ဖြစ်ပါတယ်။ 

တန်းဆင်းဇုန်ကနေ လွတ်မြောက်ဖို့ ကြိုးစားနေတဲ့ လူတန်အသင်းဟာ နောက်ပိုင်းပွဲတွေမှာ ကစားအား အလွန် ကောင်းလာပြီး သူတို့အိမ်ကွင်းမှာ ကစားတဲ့ပွဲတွေမှာ ရလဒ်ကောင်းတွေ ရယူနေတာပါ။

အဲဒါကြောင့် ယူနိုက်တက်အသင်းအနေနဲ့ ဒီပွဲကို သတိထားရမယ်လို့ သုံးသပ်မှုတွေ ရှိနေကြတာဖြစ်ပြီး နည်းပြ အဲရစ်တန်ဟတ်ကတော့ သူတို့အကောင်းဆုံး ဘောလုံးကစားဖို့ လိုတယ်လို့ ပြောခဲ့ပါတယ်။ 

ယူနိုက်တက်အသင်းဟာ ဒီရာသီ လူတန်အသင်းကို အိမ်ကွင်းမှာ ကစားခဲ့တဲ့ပွဲစဉ်မှာ ၁ ဂိုး- ဂိုးမရှိနဲ့ အနိုင်ရရှိခဲ့ တာပါ။ 

ယူနိုက်တက်အသင်းနည်းပြ အဲရစ်တန်ဟတ်က ပြီးခဲ့တဲ့ ဗီလာအသင်းနဲ့ပွဲမှာ ဒဏ်ရာရရှိခဲ့တဲ့ နောက်ခံလူ လုပ်ခ်ရှောဟာ ဒီပွဲပါဝင်နိုင်ဖို့ မသေချာပေမယ့် စောင့်ကြည့်ရဦးမယ်လို့ ပြောခဲ့ပါတယ်။

ဒါအပြင် နောက်ခံလူ ဝမ်ဘစ်ဆာကာဟာ လေ့ကျင့်ရေးကွင်းမှာ ဒဏ်ရာထပ်ပြီး ရရှိခဲ့တာကြောင့် ရက်သတ္တပတ် အနည်းငယ်ကြာ အနားယူရဦးမှာဖြစ်ပြီး နောက်ခံလူ မာလာစီယာနဲ့ ကွင်းလယ်လူ မေဆန်မောင့်တို့လည်း ရက်သတ္တပတ် အနည်းငယ်ထပ်ပြီး အနားယူရဦးမယ်လို့ နည်းပြ အဲရစ်တန်ဟတ်က အတည်ပြုခဲ့တာ ဖြစ်ပါတယ်။

Source: BBC