CNI Sport News

၂၀၂၃ ခုနှစ်၊ ဇူလိုင် ၁၈

ဘရာဇီးလ် တောင်ပံကစားသမား ဝီလီယံဟာ ပရီးမီးယားလိဂ်ကလပ် ဖူလ်ဟမ်အသင်းထံ ပြန်လည်ရောက်ရှိ လာခဲ့ပြီး ၁ နှစ် စာချူပ်ချုပ်ဆိုခဲ့ပါတယ်။

အသက် ၃၄ နှစ်အရွယ်ရှိ ဝီလီယံနဲ့ ဖူလ်ဟမ်အသင်းတို့ အရင်ချုပ်ဆိုထားတဲ့ စာချုပ်ဟာ အခုနွေရာသီ အစော ပိုင်းက စာချုပ်ကုန်ဆုံးသွားခဲ့တာပါ။
 
အစောပိုင်းက ဝီလီယံဟာ နော်တင်ဟမ်ဖောရက်စ် အသင်းထံ ပြောင်းရွှေ့ဖို့ နီးစပ်ခဲ့တာဖြစ်ပေမယ့် နောက်ဆုံးမှာ တော့ ဖူလ်ဟမ်အသင်းထံ ပြန်လည် ရောက်ရှိလာခဲ့တာ ဖြစ်ပါတယ်။ 

ဝီလီယံနဲ့ ဖူလ်ဟမ်အသင်းတို့ ချုပ်ဆိုထားတဲ့ စာချုပ်ထဲမှာ နောက်ထပ် တစ်နှစ်သက်တမ်း တိုးခွင့် ပါဝင်နေတယ် လို့ သိရပါတယ်။

ဝီလီယံကို တွေ့ရစဉ်

ဝီလီယံက “ကျနော် အလွန်ပျော်ရွှင်ပါတယ်။ ပြီးခဲ့တဲ့ရာသီက ကျနော့်ရဲ့ အသင်းဖော်တွေ အားလုံးနဲ့ အတူလုပ်ခဲ့တဲ့ အလုပ်ကို ဆက်ပြီးလုပ်ရမှာဖြစ်လို့ ပျော်ပါတယ်။ ကျနော်တို့ဟာ ရာသီသစ်မှာ ပိုပြီးကောင်းအောင် လုပ်နိုင်မယ့် အသင်းတစ်သင်းလို့ ထင်ပါတယ်။ အဲဒါကြောင့်လည်း ဒီအံ့သြစရာကောင်းတဲ့ စွန့်စားခန်းကို ပျော်ပျော်ရွှင်ရွှင်နဲ့ ဆက်သွားမှာပါ”လို့ ပြောခဲ့ပါတယ်။

ချယ်လ်ဆီးနဲ့ အာဆင်နယ် ကစားသမားဟောင်းဟာ ၂၀၂၂ ခုနှစ်၊ သြဂုတ်လက ကိုရင်သီယန် အသင်းကနေ ထွက်ခွာခဲ့ပြီးနောက် ဖူလ်ဟမ်အသင်းထံ ပြောင်းရွှေ့လာခဲ့တာပါ။

ဝီလီယံဟာ ပြီးခဲ့တဲ့ရာသီက ဖူလ်ဟမ်အသင်းအတွက် ပြိုင်ပွဲစုံပွဲပေါင်း ၃၀ ပါဝင်ကစားပြီး ၅ ဂိုးသွင်းယူကာ ၆ ဂိုး ဖန်တီးနိုင်ခဲ့တာ ဖြစ်ပါတယ်။ 

ဘရာဇီးလ် ကစားသမားဟာ မနှစ်ကရာသီက ဖူလ်ဟမ်အသင်းကို ပရီးမီးယားလိဂ်ပြိုင်ပွဲမှာ အဆင့် ၁၀ နေရာ ရပ်တည်နိုင်အောင် ကူညီပေးနိုင်ခဲ့တာပါ။

ဖူလ်ဟမ်အသင်းဟာ ရာသီကြို ခြေစမ်းပွဲအဖြစ် ဘရန်ဖို့ဒ်၊ အက်စတွန်ဗီလာ၊ ချယ်လ်ဆီး၊ ဟော်ဖန်ဟိမ်း အသင်း တို့နဲ့ ယှဉ်ပြိုင်မှာဖြစ်ပြီး သြဂုတ်လ ၁၂ ရက်မှာ ပရီးမီးယားလိဂ် အဖွင့်ပွဲစဉ်အဖြစ် အဲဗာတန်အသင်းနဲ့ ယှဉ်ပြိုင်မှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၁၈

ဂါဘွန်လက်ရွေးစင် အူဘာမီယန်းဟာ  မာဆေးလ်အသင်းထံ ပြောင်းရွှေ့ဖို့ သဘောတူညီမှု ရရှိခဲ့တာကြောင့် ချယ်လ်ဆီးအသင်းကနေ ထွက်ခွာဖို့ နီးစပ်နေပြီလို့ ပြင်သစ်သတင်းတွေမှာ ဖော်ပြထားပါတယ်။

အာဆင်နယ်အသင်း ခေါင်းဆောင်ဟောင်းဟာ ပြီးခဲ့တဲ့နှစ် စက်တင်ဘာလက ဘာစီလိုနာအသင်းကနေ ပေါင် ၁၂ သန်းနဲ့ ပြောင်းရွှေ့လာပြီးကတည်းက ချယ်လ်ဆီးအသင်းမှာ ဆိုးရွားတဲ့ အချိန်တွေနဲ့ ရင်ဆိုင်ခဲ့ရပါတယ်။ 

ချယ်လ်ဆီးအသင်းဟာ ပြီးခဲ့တဲ့ ဇန်နဝါရီလ အပြောင်းအရွှေ့က ကစားသမားသစ် အများအပြား ခေါ်ယူခဲ့ပြီးနောက် အူဘာမီယန်းဟာ ချန်ပီယံလိဂ်ပြိုင်ပွဲဝင် အသင်းလူစာရင်းကနေ ချန်လှပ်ခြင်း ခံခဲ့ရတာ ဖြစ်ပါတယ်။

အူဘာမီယန်းဟာ ပြီးခဲ့တဲ့ရာသီက ချယ်လ်ဆီး အသင်းအတွက် ပြိုင်ပွဲစုံ ၂၁ ပွဲသာ ပါဝင်ကစားခဲ့ရပြီး ၃ ဂိုးသာ သွင်းယူ နိုင်ခဲ့တာကြောင့် လန်ဒန်ကလပ်ဟာ သူ့ကို အခုနွေရာသီ အပြောင်းအရွှေ့မှာ ရောင်းချဖို့ စီစဉ်နေတာပါ။ 

အူဘာမီယန်းဟာ အခုအပြောင်းအရွှေ့မှာ ကစားသမား အများအပြားကို ခေါ်ယူဖို့ ကြိုးစားနေတဲ့ ဆော်ဒီလိဂ်ဟာ သူသွားဖို့ ဖြစ်နိုင်ဖွယ် အရှိဆုံးနေရာလို့ သတ်မှတ်ခြင်း ခံထားရတာ ဖြစ်ပါတယ်။

အူဘာမီယန်းကိုတွေ့ရစဉ်

ဒါပေမယ့် RMC Sport က အူဘာမီယန်းဟာ မာဆေးလ်အသင်းနဲ့ ၂ နှစ် စာချုပ်ချုပ်ဆိုဖို့ သဘောတူညီမှုရခဲ့ပြီး စာချုပ်ကုန်ဆုံးချိန်မှာ နောက်ထပ် တစ်နှစ် သက်တမ်းတိုးဖို့ ရွေးချယ်ခွင့် ပါဝင်တယ်လို့ ဖော်ပြခဲ့တာပါ။

မာဆေးလ်အသင်းဟာ အူဘာမီယန်းကို အလွတ်ပြောင်းရွှေ့ကြေးနဲ့ စတမ်းဖို့ဒ်ဘရစ်ချ်ကနေ ထွက်ခွာခွင့် ပေးဖို့ အတွက်  ချယ်လ်ဆီးအသင်းနဲ့ ဆွေးနွေးမှုတွေ ပြုလုပ်နေတာပါ။ အူဘာမီယန်းနဲ့ ချယ်လ်ဆီးအသင်းတို့ ချုပ်ဆို ထားတဲ့ စာချုပ်ဟာ တစ်နှစ်ကျန်ရှိနေသေးတာ ဖြစ်ပါတယ်။

မာဆေးလ်အသင်းဟာ ပြီးခဲ့တဲ့ရာသီက ပြင်သစ်လီဂူးဝမ်းပြိုင်ပွဲမှာ တတိယနေရာ ရရှိခဲ့တာကြောင့် ချန်ပီယံလိဂ် ခြေစစ်ပွဲ ယှဉ်ပြိုင်ရမှာဖြစ်ပြီး ကျော်ဖြတ်နိုင်ခဲ့ရင် ချန်ပီယံလိဂ် အုပ်စုအဆင့် ဝင်ရောက်ယှဉ်ပြိုင်လို့ ရမှာဖြစ်ပါ တယ်။ 

Source: Metro

CNI Sport News

၂၀၂၃ ခုနှစ်၊ ဇူလိုင် ၁၈

ပီအက်စ်ဂျီအသင်းဟာ စပါးအသင်းတိုက်စစ်မှူး ဟာရီကိန်းကို ခေါ်ယူဖို့ ချဉ်းကပ်မှုတွေ ပြုလုပ်နေပေမယ့် ကစားသမားကတော့ ပြင်သစ်ကလပ်ထံ ပြောင်းဖို့ စိတ်မဝင်စားဘူးလို့ နိုင်ငံတကာအားကစား သတင်း အများအပြားရဲ့ ဖော်ပြချက်အရသိရပါတယ်။

Daily Telegraph က ဟာရီကိန်းဟာ ပီအက်စ်ဂျီအသင်းထံ ပြောင်းဖို့ စိတ်မဝင်စားဘဲ စပါးအသင်းကနေ ထွက်ခွာ ခဲ့မယ်ဆိုရင် ဘိုင်ယန်မြူးနစ်အသင်းသာ သူ့အတွက်တစ်ခုတည်းသော ရွေးချယ်စရာအသင်းအဖြစ် ရှိနေတယ်လို့ ဖော်ပြခဲ့တာပါ။ ဘိုင်ယန်မြူးနစ်အသင်းဟာ အခု နွေရာသီအပြောင်းအရွှေ့မှာ ဟာရီကိန်းကို ခေါ်ယူဖို့ ကမ်းလှမ်းမှု ၂ ကြိမ်ပြုလုပ်ခဲ့တာကို စပါးအသင်းက ပယ်ချခဲ့တာဖြစ်ပါတယ်။

စပါးအသင်းကတော့ ဟာရီကိန်းကို အသင်းမှာ ဆက်နေနိုင်အောင် ဆွဲဆောင်ဖို့ ကြိုးစားနေပြီး တစ်ပတ်လုပ်ခ ပေါင် ၄၀၀,၀၀၀(လေးသိန်း) နဲ့ စာချုပ်သစ်ချုပ်ဖို့ ကမ်းလှမ်းထားတာပါ။ စပါးအသင်းဉက္ကဋ္ဌ လီဗိုင်းဟာ စာချုပ် သက်တမ်းတစ်နှစ်သာ ကျန်ရှိတော့တဲ့ ဟာရီကိန်းအတွက် ပေါင်သန်း ၁၀၀ ကျော်ဈေးသတ်မှတ်ထားတာ ဖြစ်ပါတယ်။ 

ဘိုင်ယန်မြူးနစ်အသင်းဟာ လက်ရှိအချိန်မှာ တိုက်စစ်မှူးသစ် ရှာဖွေနေပြီး ဟာရီကိန်းကို ခေါ်ယူနိုင်ဖို့ အပြင်းအထန်ကြိုးစားနေတာကြောင့် ကစားသမားရဲ့ ပြောင်းရွှေ့ကြေးဟာ ပိုပြီးတိုးလာနိုင်ဖွယ်ရှိနေတာပါ။ ဟာရီကိန်းဟာ ဘိုင်ယန်မြူးနစ်အသင်းထံ ပြောင်းရွှေ့ချင်တယ်လို့ သူတို့ကို ပြောထားပြီး ကစားသမားဘက်က စကားတည်ရင် စာချူပ်ချုပ်ဆိုသွားမယ်လို့ ဂျာမနီကလပ်ရဲ့ ဘုတ်အဖွဲ့ဝင် အူလီဟိုးနက်စ်က မကြာသေးခင်က ပြောထားတာဖြစ်ပါတယ်။ 
အင်္ဂလန်အသင်းခေါင်းဆောင် ဟာရီကိန်းဟာ ဘိုင်ယန်မြူးနစ်နည်းပြ တူချယ်လ်နဲ့ ဆွေးနွေးမှုတွေပြုလုပ်ခဲ့ပြီး ဂျာမနီကလပ်ထံ ပြောင်းရွှေ့ဖို့ ပုဂ္ဂိုလ်ရေးအရ သဘောတူညီမှု ရရှိထားတယ်လို့ သတင်းတွေ ထွက်ပေါ်ခဲ့တာပါ။ ဟာရီကိန်းဟာ လက်ရှိအချိန်မှာတော့ စပါးအသင်းနဲ့အတူ ရာသီကြိုခြေစမ်းပွဲယှဉ်ပြိုင်ဖို့ သြစတြေးလျကို ရောက်ရှိနေပြီး အသင်းနဲ့အတူ ရာသီသစ်အတွက် ပြင်ဆင်နေတာဖြစ်ပါတယ်။ 

ပီအက်စ်ဂျီအသင်းဟာ စပါးအသင်းတိုက်စစ်မှူး ဟာရီကိန်းကို ခေါ်ယူဖို့ အဆင်မပြေရင် ဂျူဗင်တပ်စ် အသင်း တိုက်စစ်မှူး ဗလာဟိုဗစ်ကို ခေါ်ယူဖို့ ကြိုးစားသွားမယ်လို့ သိရပါတယ်။ 

Source:Goal

CNI Sport News

၂၀၂၃ ခုနှစ်၊ ဇူလိုင် ၁၈

ပေါ်တူဂီ အသင်းခေါင်းဆောင် ရော်နယ်ဒိုက ဥရောပဘောလုံးလောကကို ပြန်မလာတော့ဘူးလို့ အနာဂတ်နဲ့ ပတ်သက်ပြီး အခိုင်အမာ ပြောလိုက်ပါတယ်။

ရော်နယ်ဒိုက “ဘယ်ဥရောပကလပ်ကိုမှ ပြန်မလာတော့တာ ၁၀၀ ရာခိုင်နှုန်း သေချာပါတယ်။ ကျနော်ဟာ ဆော်ဒီကို လမ်းဖွင့်ပေးခဲ့ပြီး အခုဆိုရင် ကစားသမားတွေ အားလုံးက ဒီကိုရောက်ရှိလာပါပြီ။ ကျနော်ဥရောပ ဘောလုံးလောကကို ပြန်မလာတော့ပါဘူး။ တံခါးက လုံးဝကို ပိတ်သွားပါပြီ။ ကျနော် အသက် ၃၈ နှစ်ရှိပါပြီ၊ ဥရောပ ဘောလုံးလောကမှာလည်း အရည်အသွေးတွေ အများကြီးဆုံးရှုံးခဲ့ပါတယ်။ ကျနော့်အတွက်ကတော့ အရည်အသွေး အများအပြားရှိပြီး အခြားအားလုံးထက် မြင့်မားတဲ့ တစ်ခုတည်းသောလိဂ်က ပရီးမီးယားလိဂ်ပါ။ ကျနော် ဆော်ဒီမှာပဲ ကစားချင်ပါတယ်”လို့ ပြောခဲ့တာပါ။

ပြီးခဲ့တဲ့နှစ်ရာသီက ယူနိုက်တက်အသင်းနဲ့ စာချုပ်ဖျက်သိမ်းပြီး ဆော်ဒီလိဂ်ကလပ် အယ်လ်နာဆာအသင်းထံ ပြောင်းရွှေ့ခဲ့တဲ့ ရော်နယ်ဒိုကို ခေါ်ယူဖို့ ဥရောပကလပ်အသင်းတွေက ချိတ်ဆက်နေတယ်လို့ သတင်းတွေ ထွက် ပေါ်နေပါတယ်။ 

ဒါပေမယ့် ရော်နယ်ဒိုကတော့ ဆော်ဒီလိဂ်မှာပဲ ပျော်ရွှင်နေပြီး ဒီလိဂ်ဟာ လာမယ့်နှစ် အနည်းငယ်အတွင်း ထိပ်တန်းလိဂ် အချို့ကို ကျော်ဖြတ်နိုင်မယ်လို့ ယုံကြည်မှုရှိနေတာပါ။

ရော်နယ်ဒိုကိုတွေ့ရစဉ်

ဆော်ဒီလိဂ်ဟာ ရော်နယ်ဒိုကို ခေါ်ယူပြီးနောက် ဘန်ဇီမာ၊ ကန်တီ၊ ရူဘင်နာဗတ်စ်၊ ဖာမီနို၊ ကူလီဘာလီတို့အပြင် နောက်ထပ် နာမည်ကြီး ကစားသမား အများအပြားကို ခေါ်ယူနိုင်ဖို့ ပစ်မှတ်ထားနေတာ ဖြစ်ပါတယ်။ 

ဆော်ဒီလိဂ်ဟာ ကစားသမားတွေအပြင် စတီဗင်ဂျရတ်၊ ရော်ဘီဖောင်လာတို့လို နာမည်ကျော် နည်းပြတွေကို လည်း နည်းပြသစ်အဖြစ် ခန့်အပ်ထားတာပါ။

ရော်နယ်ဒိုရဲ့ အဓိကပြိုင်ဘက်ကြီးဖြစ်တဲ့ မက်ဆီဟာ ပြီးခဲ့တဲ့ရက်ကမှ မေဂျာလိဂ်ကလပ် အင်တာမိုင်ယာမီ အသင်းထံ တရားဝင် ပြောင်းရွှေ့ခဲ့တာ ဖြစ်ပါတယ်။ 

အဲဒါကြောင့် ပေါ်တူဂီ ကစားသမားအနေနဲ့ မေဂျာလိဂ်ပြိုင်ပွဲကို ပြောင်းရွှေ့နိုင်ဖွယ်ရှိလားလို့ မေးမြန်းခြင်း ခံခဲ့ရပါတယ်။

ရော်နယ်ဒိုက “ဆော်ဒီလိဂ်က အမေရိကန်လိဂ်ထက် အများကြီး ပိုကောင်းတယ်လို့ ထင်ပါတယ်။ ကျနော့်အသင်း က အယ်လ်နာဆာပါ။ ကျနော်ဘယ်သွားသွား စိတ်ဝင်စားမှုကို ဖြစ်ပေါ်စေပြီး ဒီလိုဖြစ်မယ်ဆိုတာလည်း သိပါ တယ်။ လာမယ့်ရာသီမှာ ကြယ်ပွင့် ကစားသမား အများအပြား ဆော်ဒီကို လာမယ်ဆိုတာ သေချာပါတယ်”လို့ ပြောခဲ့ပါတယ်။

Source: Daily Mail

CNI Sport News

၂၀၂၃ ခုနှစ်၊ ဇူလိုင် ၁၇

စပါးအသင်း တိုက်စစ်မှူး ဆွန်ဟောင်မင်ဟာ ဆော်ဒီလိဂ်ကို ပြောင်းဖို့အတွက် ကောင်းမွန်တဲ့ အခွင့်အရေးတွေ ရခဲ့ပေမယ့် ငြင်းပယ်ခဲ့တယ်လို့ ဝန်ခံခဲ့ပါတယ်။

ဆွန်ဟောင်မင်က “ကျနော် ဆော်ဒီကို သွားချင်တယ်ဆိုရင် ဒီနေရာမှာတောင် ရှိမှာမဟုတ်ပါဘူး။ ကျနော်ဟာ ဘောလုံး ကစားရတာကို နှစ်သက်ပါတယ်။ ငွေကြေးက အရေးကြီးတဲ့ အရာဖြစ်ပေမယ့် ကျနော့်ရဲ့ အိပ်မက်က ပရီးမီးယားလိဂ်မှာ ကစားဖို့ပါ။ အခုအချိန်မှာ လူအများစုက ဆော်ဒီကို သွားနေကြပြီး ဒါက တကယ်ကို စိတ်ဝင် စားဖို့ ကောင်းပါတယ်။ ဒါပေမယ့် ပရီးမီးယားလိဂ်မှာ ကစားချင်သေးတဲ့အတွက် ရာသီသစ်ကို စောင့်မျှော်နေပါ တယ်”လို့ အသင်းရဲ့ ရာသီကြိုခရီးစဉ်မှာ ပြောခဲ့တာပါ။

ဆော်ဒီလိဂ်ဟာ အခုနွေရာသီ အပြောင်းအရွှေ့မှာ ထိပ်တန်း ကစားသမား အများအပြားကို နိုင်ငံအတွင်း ခေါ်ဆောင်နိုင်ဖို့ လုပ်ဆောင်နေပြီး ဘန်ဇီမာ၊ ကန်တီ၊ ကူလီဘာလီ၊ ရူဘင်နာဗတ်စ် အစရှိတဲ့ ကစားသမား အများအပြားကို ခေါ်ယူနိုင်ခဲ့ပါတယ်။ 

ဆွန်ဟောင်မင်ကလည်း ဆော်ဒီလိဂ်မှာ ကစားနိုင်မယ့် အခွင့်အရေးရခဲ့ပြီး စပါးအသင်းမှာ ရရှိနေတဲ့ လုပ်ခလစာ ထက် အများကြီးပိုပြီးရရှိမယ့် ကမ်းလှမ်းမှုတွေ ရရှိခဲ့ပေမယ့် ပရီးမီးယားလိဂ်မှာပဲ ဆက်နေဖို့ ရွေးချယ်ခဲ့တာပါ။

ဆွန်ဟောင်မင်ကို တွေ့ရစဉ်

၂၀၁၅ ခုနှစ်က လေဗာကူဆင်ကနေ ရောက်ရှိလာခဲ့တဲ့ ဆွန်ဟောင်မင်ဟာ စပါးအသင်းအတွက် ၃၇၂ ပွဲ ပါဝင် ကစားပြီး ၁၄၅ ဂိုး သွင်းယူကာ အသင်းပရိသတ်တွေ နှစ်သက်တဲ့ ကစားသမားတစ်ဦးအဖြစ် ရှိနေခဲ့ပါတယ်။ 

တောင်ကိုရီးယား အသင်းခေါင်းဆောင်ဟာ ၂၀၂၁-၂၂ ရာသီက ပရီးမီးယားလိဂ်ပြိုင်ပွဲမှာ ရွှေဖိနပ်ဆု ရယူနိုင်ခဲ့ပေ မယ့် မနှစ်က ရာသီမှာတော့ ပုံစံကောင်းတွေ ပျောက်ဆုံးခဲ့ပြီး အသင်းကလည်း ဥရောပဝင်ခွင့် ဆုံးရှုံးခဲ့ရတာပါ။

ဆွန်ဟောင်မင်ဟာ ပြီးခဲ့တဲ့ရာသီက ခြေစွမ်း မပြသနိုင်ခဲ့ပေမယ့် နည်းပြသစ် ပိုစတီကိုဂလူး လက်အောက်မှာ ပရီးမီးယားလိဂ်ရဲ့ အကောင်းဆုံး ကစားသမားတွေထဲက တစ်ဦးအဖြစ် ရှိနေကြောင်းကို ပြသဖို့ စိတ်ပိုင်းဖြတ်ထား တယ်လို့ ပြောခဲ့ပါတယ်။

ဆွန်ဟောင်မင်က “ပြီးခဲ့တဲ့ရာသီက ကျနော်ဟာ ရုပ်ပိုင်းဆိုင်ရာကို ခံစားခဲ့ရပြီး ရာသီသစ်မှာ ကျနော်ဟာ အားလုံး သိတဲ့ ဆွန်ဖြစ်ကြောင်းကို သက်သေပြ သွားချင်ပါတယ်”လို့ ပြောခဲ့ပါတယ်။

Source: Daily Mail

CNI Sport News

၂၀၂၃ ခုနှစ်၊ ဇူလိုင် ၁၇

ဝက်စ်ဟမ်းကွင်းလယ်လူ ဒီကလန်ရိုက်စ်ကို စံချိန်တင် ပြောင်းရွှေ့ကြေးနဲ့ ခေါ်ယူခဲ့တဲ့ အာဆင်နယ်အသင်းဟာ ၂၀၂၃-၂၄ ရာသီသစ် ပရီးမီးယားလိဂ်ဖလားကို ရယူနိုင်တယ်လို့ နည်းပြဟောင်း အာဆင်ဝင်းဂါးက ယုံကြည်နေပါတယ်။

အာဆင်ဝင်းဂါးက “ဒီကလန်ရိုက်စ်ကို ခေါ်ယူနိုင်ခဲ့တာက ကောင်းမွန်တဲ့ ရင်းနှီးမြှုပ်နှံမှုတစ်ခုလို့ ကျနော်ထင်ပါ တယ်။ အာဆင်နယ်အသင်းဟာ မနှစ်က ရာသီကထက် ပိုပြီးဖိအားပေးတာ ခံရမှာဖြစ်ပေမယ့် သူတို့ဟာ အများ ကြီး သင်ယူပြီးသွားပါပြီ။ အဲဒါကြောင့် အခုအချိန်မှာသူတို့ဟာ ဖိအားတွေကို ကိုင်တွယ်ဖြေရှင်းနိုင်တယ်ဆိုတဲ့ အကြောင်းကို ပြသနိုင်ပါတယ်။ ချန်ပီယံဆုကို ကျနော်တို့ ရယူနိုင်မယ်ဆိုတာ ယုံကြည်ပါတယ်။ ဒါက ရိုးရှင်းပါ တယ်”လို့ Eurosport ကို ပြောခဲ့ပါတယ်။

အာဆင်နယ်အသင်းဟာ ပြီးခဲ့တဲ့ရာသီက ပရီးမီးယားလိဂ်ဖလားကို ရယူနိုင်ဖို့ နီးစပ်ခဲ့ပေမယ့် အဆုံးသတ်မှာတော့ လက်လွှတ်ခဲ့ရတာကြောင့် ရာသီသစ်မှာ ဒီဆုဖလားကို စိန်ခေါ်နိုင်ဖို့ အဓိက ပစ်မှတ်ထား နေခဲ့ပါတယ်။

လန်ဒန်ကလပ်ဟာ အဓိက ကစားသမားတွေဖြစ်တဲ့ ဟာဗတ်ဇ်၊ တင်ဘာနဲ့ ဒီကလန်ရိုက်စ်တို့ကို ခေါ်ယူပြီး အသင်း ကို ပြန်လည် ပြင်ဆင်ခဲ့ပါတယ်။ 

အာဆင်ဝင်းဂါးကို ပရီးမီးယားလိဂ်ဖလားနဲ့အတူတွေ့ရစဉ် 

အာဆင်နယ်အသင်းဟာ ဒီကလန်ရိုက်စ်ကို ကလပ်စံချိန်တင်နဲ့ ဗြိတိန်စံချိန်တင် ပြောင်းရွှေ့ကြေး ပေါင် ၁၀၅ သန်း ပေးပြီး ခေါ်ယူကာ အသင်းမှာ ကာလကြာရှည်ရှိမယ့် စာချုပ် ချုပ်ဆိုခဲ့ပါတယ်။ 

အာဆင်နယ် ဂန္ထဝင်နည်းပြဟောင်း အာဆင်ဝင်းဂါးက ကစားသမားသစ်တွေဟာ ဒီရာသီအသင်းကို ပရီးမီးယား လိဂ် ရယူပေးနိုင်အောင် ကူညီပေးနိုင်မယ်လို့ ယုံကြည်နေတာ ဖြစ်ပါတယ်။

အာဆင်နယ်အသင်းဟာ အာဆင်ဝင်းဂါးလက်ထက် ၂၀၀၃-၀၄ ရာသီက ရှုံးပွဲမရှိ စံချိန်နဲ့ ပရီးမီးယားလိဂ်ဖလားကို ရယူပြီးကတည်းက အမှတ်ပေးဖလားနဲ့ ဝေးကွာခဲ့တာပါ။ 

ပြီးခဲ့တဲ့ရာသီက ဒီဆုဖလားကို ပြန်လည်ရယူနိုင်ဖို့ အကောင်းဆုံး အခြေအနေမှာရှိခဲ့ပေမယ့် နောက်ပိုင်းပွဲတွေမှာ ရလဒ်တွေ ဆိုးခဲ့တာကြောင့် မန်စီးတီးအသင်းထံ ပရီးမီးယားလိဂ်ဖလားကို လွှဲပြောင်းပေးခဲ့ရတာ ဖြစ်ပါတယ်။

အာဆင်နယ်အသင်းဟာ လက်ရှိအချိန်မှာ ကစားသမား ၂၇ ဦးနဲ့ ရာသီကြို ခြေစမ်းပွဲယှဉ်ပြိုင်ဖို့ အမေရိကန်ကို သွားရောက်ခဲ့ပြီး ဇူလိုင် ၁၉ ရက်မှာ မေဂျာလိဂ် အောလ်စတားအသင်းနဲ့ စတင်ယှဉ်ပြိုင်မှာပါ။ 

ဒီပွဲပြီးရင်တော့ အာဆင်နယ်အသင်းဟာ ယူနိုက်တက်၊ ဘာစီလိုနာ၊ မိုနာကိုအသင်းတို့နဲ့ ဆက်လက် ယှဉ်ပြိုင်သွား မှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဇူလိုင် ၁၇

စပိန်တင်းနစ်သမား အယ်လ်ကာရတ်ဇ်ဟာ ဝင်ဘယ်လ်ဒန်အိုးပန်းဗိုလ်လုပွဲမှာ နာမည်ကျော်တင်းနစ်သမား ဂျိုကိုဗစ်ကို အနိုင်ရပြီး ချန်ပီယံဆုကို ရရှိသွားခဲ့ပါတယ်။

အသက် ၂၀ အရွယ်ရှိ အယ်လ်ကာရတ်ဇ်ဟာ ဂျိုကိုဗစ်ကို ၁-၆၊ ၇-၆၊ ၆-၁၊ ၃-၆၊ ၆-၄ နဲ့ အနိုင်ရရှိခဲ့တာပါ။ အယ်လ်ကာရတ်ဇ်ဟာ တင်းနစ်ကစားသမားဘဝ ပထမဆုံးဝင်ဘယ်လ်ဒန်အိုးပန်းချန်ပီယံဆုကို ရယူနိုင်ခဲ့တာ ဖြစ်သလို ဂျိုကိုဗစ်ကို (၈) ကြိမ်မြောက် ဝင်ဘယ်လ်ဒန်အိုးပန်းနဲ့ ၂၄ ကြိမ်မြောက် ဂရမ်းဆလမ်းချန်ပီယံဆု မရရှိ အောင် လုပ်ဆောင်နိုင်ခဲ့တာဖြစ်ပါတယ်။

အယ်လ်ကာရတ်ဇ်က “ကျနော်တင်းနစ်စပြီးကစားကတည်းက ဂျိုကိုဗစ်ကို အနိုင်ယူတာနဲ့ ဝင်ဘယ်လ်ဒန် ချန်ပီယံ ဆုကို ရယူဖို့က အိပ်မက်မက်ခဲ့တဲ့အရာပါပဲ။ ဒါက ကျနော့်ဘဝရဲ့ အပျော်ရွှင်ဆုံးအခိုက်အတန့်ပါပဲ။ ဒါက အချိန် အကြာကြီး ပြောင်းလဲသွားမှာမဟုတ်ဘူးလို့ ထင်ကြောင်း” ပြောခဲ့တာပါ။

ပြီးခဲ့တဲ့နှစ်က အမေရိကန်အိုးပန်းပြိုင်ပွဲမှာ ချန်ပီယံဆုရယူနိုင်ခဲ့တဲ့ အယ်လ်ကာရတ်ဇ်ဟာ ဂျိုကိုဗစ်၊ ဖက်ဒဲရားနဲ့ နာဒယ်လ်တို့နောက်ပိုင်း အမျိုးသားပြိုင်ပွဲမှာ အောင်မြင်မှုအများဆုံးရယူနိုင်တဲ့သူဖြစ်လာမယ်လို့ သုံးသပ်ခြင်း ခံထားရပါတယ်။ အယ်လ်ကာရတ်ဇ်ဟာ ဒီနိုင်ပွဲကြောင့် ကမ္ဘာ့အဆင့် ၁ နေရာမှာ ပြန်လည်ရပ်တည်နိုင်ခဲ့တာ ဖြစ်ပါတယ်။

အယ်လ်ကာရတ်ဇ်က “ဒါက ကျနော့်အတွက် အိပ်မက်တစ်ခုအမှန်တကယ်ဖြစ်လာသလို၊ ဝင်ဘယ်လ်ဒန် ချန်ပီယံဖြစ်ဖို့က တကယ်လိုချင်ခဲ့တဲ့အရာပါ။ ကျနော် အခုမြက်ခင်းပြင်ကို ချစ်မိတယ်လို့ ခံစားနေရပါတယ်။ ကျနော်မြက်ခင်းပြင်မှာ ပြိုင်ပွဲ ၄ ခုပဲ ကစားခဲ့ဖူးပြီး Queen’s ပြိုင်ပွဲမှာ ချန်ပီယံဖြစ်ခဲ့ပါတယ်။ အချိန်တိုအတွင်း ဒီလိုမျိုးအဆင့်အတန်းမှာ ကစားနိုင်ဖို့ကို မမျှော်လင့်ခဲ့ပါဘူး” လို့ ပြောခဲ့ပါတယ်။

အသက် ၂၀ အရွယ်ရှိ အယ်လ်ကာရတ်ဇ်ဟာ တစ်ဦးချင်းအဆင့်ပြိုင်ပွဲမှာ ဂရမ်းဆလမ်းချန်ပီယံဆု ၂ ကြိမ် အပါ အဝင် ဆုဖလားပေါင်း ၁၂ ခု ရယူထားတယ်လို့ သိရပါတယ်။ 

Source:BBC

CNI Sport News

၂၀၂၃ ခုနှစ်၊ ဇူလိုင် ၁၇

မေဂျာလိဂ်ကလပ် အင်တာမိုင်ယာမီအသင်းဟာ အာဂျင်တီးနား အသင်းခေါင်းဆောင် မက်ဆီကို အသင်းရဲ့ ကစားသမားသစ်အဖြစ်  DRV PNK အားကစားကွင်းကြီးထဲမှာ တရားဝင် မိတ်ဆက်သွားခဲ့ပါတယ်။

လေပြင်းတိုက်ခတ်ပြီး မိုးရွာခဲ့တာကြောင့် ပွဲကိုကျင်းပဖို့ နှောင့်နှေးခဲ့ရပေမယ့် ပရိသတ်တွေဟာ အားကစားကွင်း အပြည့် ဝင်ရောက်ပြီး မက်ဆီရဲ့ မိတ်ဆက်ပွဲကို ကြည့်ရှုခဲ့ပါတယ်။ 

အင်တာမိုင်ယာမီ အသင်းဟာ ဘောလွန်းဒီအော ၇ ကြိမ်ရ ကစားသမားရဲ့ မိတ်ဆက်ပွဲကို အကြီးအကျယ် ပြုလုပ် ခဲ့ပြီး ဖျော်ဖြေမှုတွေပါ ထည့်သွင်းခဲ့တာ ဖြစ်ပါတယ်။

အဲဒါကြောင့် မက်ဆီဟာ မေဂျာလိဂ် သမိုင်းတစ်လျှောက် အကြီးမားဆုံး ခေါ်ယူမှုအဖြစ် ဖော်ပြခံခဲ့ရတာပါ။

မက်ဆီက “ကျနော့်မိသားစုနဲ့အတူ ဒီမြို့ကို လာဖို့ရွေးချယ်ရတာကို အလွန်ပျော်ရွှင်ပါတယ်။ ကောင်းမွန်တဲ့ အရာ တွေကို ဖြတ်သန်းရမှာ ဖြစ်သလို ကြီးကျယ်တဲ့ အရာတွေလည်း ဖြစ်ပေါ်လာမှာပါ။ ဒီနေ့အတွက် အားလုံးကို ကျေးဇူးတင်ပါတယ်။ လေ့ကျင့်ဖို့နဲ့ ပြိုင်ပွဲဝင်ဖို့အတွက် ကျနော် မစောင့်ဆိုင်း နိုင်တော့ပါဘူး။ ဆုဖလား အောင်မြင် မှုတွေ ရယူချင်ပြီး အင်တာမိုင်ယာမီကိုလည်း တိုးတက်မှုတွေရအောင် ကူညီပေးချင်ပါတယ်”လို့ ပရိသတ်တွေကို ပြောခဲ့ပါတယ်။

မက်ဆီကို မိတ်ဆက်ပွဲလုပ်နေစဉ်

ပီအက်စ်ဂျီအသင်းနဲ့ စာချုပ်ကုန်ဆုံးပြီးနောက် ထွက်ခွာလာခဲ့တဲ့ မက်ဆီဟာ အင်တာမိုင်ယာမီ အသင်းနဲ့ ၂၀၂၅ ခုနှစ်အထိ စာချုပ်ချုပ်ဆိုခဲ့တာဖြစ်ပြီး ဇူလိုင် ၂၁ ရက်မှာ ကစားမယ့် ခရုဇ်အဇူလ်နဲ့ လိဂ်ဖလားပွဲမှာ ပွဲဦးထွက် အဖြစ် စတင် ပါဝင်တော့မှာ ဖြစ်ပါတယ်။

အင်တာမိုင်ယာမီအသင်း ပူးတွဲပိုင်ရှင် ဒေးဗစ်ဘက်ခမ်းက မက်ဆီရဲ့ ကစားသမားဘဝ နောက်ထပ် အဆင့်အတွက် သူတို့အသင်းကို ရွေးချယ်ခဲ့တဲ့အပေါ် အလွန်ဂုဏ်ယူတယ်လို့ ပြောခဲ့တာပါ။

ဒေးဗစ်ဘက်ခမ်းက “လွန်ခဲ့တဲ့ ၁၀ နှစ်က မေဂျာလိဂ်မှာ အသင်းသစ်ကို တည်ဆောက်ဖို့ ကျနော်ခရီးစဉ် စတင်ခဲ့ တာပါ။ ဖလော်ရီဒါနဲ့ မိုင်ယာမီမြို့ကြီးမှာ ကမ္ဘာ့အကောင်းဆုံး ကစားသမားတွေကို ခေါ်ဆောင်နိုင်ဖို့ အိပ်မက်ကို အမြဲတမ်း ပြောခဲ့ပါတယ်။ ဒီနေ့တော့ အလွန်စိတ်လှုပ်ရှားနေပြီး မက်ဆီကို အင်တာမိုင်ယာမီအသင်းမှာ ကြိုဆိုဖို့ က တကယ့်အိပ်မက်ပါပဲ။ ကျနော်တို့အသင်းကို ရွေးချယ်ခဲ့တဲ့အတွက်လည်း အလွန်ဂုဏ်ယူမိပါတယ်”လို့ ပြောခဲ့ ပါတယ်။

အင်တာမိုင်ယာမီ အသင်းဟာ ဘာစီလိုနာ ကစားသမားဟောင်း ဘတ်စ်ကွက်ကိုလည်း ကစားသမားသစ်အဖြစ် မိတ်ဆက်ခဲ့ပြီး ၂၀၂၅ ခုနှစ်အထိ စာချုပ်ချုပ်ဆိုခဲ့တာ ဖြစ်ပါတယ်။ 

Source: CNA/Daily Mail

CNI Sport News

၂၀၂၃ ခုနှစ်၊ ဇူလိုင် ၁၅

တူရကီကလပ် ဂါလာတာစာရေးအသင်းဟာ ဘရာဇီးလ် ကွင်းလယ်ကစားသမား ဖရက်ကို ခေါ်ယူဖို့ ကမ်းလှမ်းမှု ပြုလုပ်ခဲ့တာကို ယူနိုက်တက်အသင်းက ပယ်ချခဲ့တယ်လို့ သိရပါတယ်။

ယူနိုက်တက်အသင်းဟာ မေဆန်မောင့်ကို ခေါ်ယူခဲ့ပြီးနောက် ဖရက်ဟာ အသင်းကနေ ထွက်ခွာရဖွယ်ရှိနေ တာပါ။ 

ဘရာဇီးလ်ကစားသမားဟာ အခုအပြောင်းအရွှေ့မှာ ယူနိုက်တက်အသင်း ရောင်းချမယ့် ကစားသမားစာရင်းထဲ ပါဝင်နေပြီး မန်ချက်စတာကလပ်က ပြောင်းရွှေ့ကြေး သတ်မှတ်ထားပါတယ်။ 

ယူနိုက်တက်အသင်းဟာ ဖရက်အတွက် ပေါင်သန်း ၂၀ သတ်မှတ်ထားပြီး ဂါလာတာစာရေးရဲ့ ကမ်းလှမ်းမှုဟာ ဒီပမာဏထက် နည်းပါးတာကြောင့် ပယ်ချခဲ့တာပါ။

တူရကီကလပ်ဟာ ဖရက်ကို ခေါ်ယူဖို့ စိတ်ဝင်စားနေပေမယ့် ဒုတိယအကြိမ် ထပ်မံကမ်းလှမ်းမှု ပြုလုပ်မလား ဆိုတာတော့ မသေချာသေးပါဘူး။ 

ယူနိုက်တက် ကစားသမားတွေနဲ့ အောင်ပွဲခံနေတဲ့ ဖရက်ကိုတွေ့ရစဉ်

ပရီးမီးယားလိဂ်ကလပ် ဖူလ်ဟမ်အသင်းကလည်း ဖရက်ကို ခေါ်ယူဖို့ စိတ်ဝင်စားနေပြီး အနောက်လန်ဒန် အသင်းက ယူနိုက်တက်အသင်း သတ်မှတ်ထားတဲ့ ပြောင်းရွှေ့ကြေးကို ပေးချေနိုင်ဖို့ ဖြစ်နိုင်ဖွယ် အရှိဆုံးအသင်း လို့ သတင်းမှာ ဖော်ပြထားပါတယ်။

အသက် ၃၀ အရွယ်ရှိ ဖရက်ကို ခေါ်ယူဖို့ ဆော်ဒီကလပ် အသင်းတွေကလည်း စိတ်ဝင်စားနေပေမယ့် ဒီလိဂ်မှာ ရှိတဲ့ ဘယ်အသင်းကမှ တရားဝင် ကမ်းလှမ်းမှု ပြုလုပ်ရခြင်း မရှိသေးပါဘူး။

ဖရက်ဟာ ၅ နှစ်ကြာရှိခဲ့တဲ့ ယူနိုက်တက် ကစားသမားဘဝကို အဆုံးသတ်ဖို့အတွက် မကြာသေးခင်က အေဂျင်စီ ကို ပြောင်းလဲခဲ့တာကြောင့် မန်ချက်စတာ ကလပ်ကနေ ထွက်ခွာဖို့က သေချာမှုရှိနေတာ ဖြစ်ပါတယ်။

ဖရက်ဟာ ယူနိုက်တက် အသင်းအတွက် ပွဲပေါင်း ၂၁၃ ပွဲ ပါဝင်ကစားခဲ့ပြီး ၁၄ ဂိုးသွင်းယူကာ ပြီးခဲ့တဲ့ရာသီက ကာရာဘောင်းဖလား ရယူနိုင်ခဲ့တဲ့ အောင်မြင်မှုရှိထားတာ ဖြစ်ပါတယ်။

Source: Goal