CNI Sport News

၂၀၂၃ ခုနှစ်၊ ဇူလိုင် ၂၂

ပီအက်စ်ဂျီအသင်းဟာ အာရှကို သွားရောက်မယ့် အသင်းရဲ့ ရာသီကြိုခရီးစဉ်မှာ တိုက်စစ်မှူး ဘတ်ပီကို ချန်လှပ် ခဲ့ပြီး ကစားသမားကို ရောင်းချဖို့ ဆုံးဖြတ်လိုက်ပြီလို့ သတင်းတွေမှာ ဖော်ပြထားပါတယ်။

ဘတ်ပီဟာ ပီအက်စ်ဂျီ အသင်းကနေ ထွက်ခွာဖို့ ဆုံးဖြတ်ထားတာကြောင့် ပြင်သစ်ကလပ်ဟာ တိုက်စစ်မှူးကို အခုအပြောင်းအရွှေ့မှာ အသင်းရောင်းချမယ့် ကစားသမားစာရင်းထဲ ထည့်သွင်းခဲ့တယ်လို့ The Athletic က ဖော်ပြခဲ့တာပါ။ 

ပီအက်စ်ဂျီအသင်းဟာ ဘတ်ပီကို ခေါ်ယူမယ့် ကမ်းလှမ်းမှုတွေကို နားထောင်သွားမှာဖြစ်ပြီး အခုအပြောင်းအရွှေ့ မှာ မရောင်းချဖြစ်ခဲ့ရင် တစ်ရာသီလုံး အရန်ခုံမှာ ထားသွားဖို့အထိ ပြင်ဆင်နေတာ ဖြစ်ပါတယ်။

ပြင်သစ်ကလပ်ဟာ ဘတ်ပီကို သူတို့ဝယ်ယူခဲ့တုန်းက ပေးခဲ့ရတဲ့ ပြောင်းရွှေ့ကြေးထက် အများကြီး လျှော့ပြီး ကမ်းလှမ်းမယ့် ကမ်းလှမ်းမှုတွေကိုတောင် လက်ခံသွားနိုင်တယ်လို့ သတင်းမှာ ဖော်ပြထားတာပါ။ 

ဘတ်ပီကို တွေ့ရစဉ် 

အသက် ၂၄ နှစ်အရွယ်ရှိ ဘတ်ပီဟာ စာချုပ်ကုန်ဆုံးမယ့် လာမယ့်ရာသီအကုန်မှာ ပီအက်စ်ဂျီကနေ ထွက်ခွာဖို့ ဆုံးဖြတ်ထားတာဖြစ်လို့ အသင်းဟာ အခုအပြောင်းအရွှေ့မှာ မရောင်းချနိုင်ရင် ရာသီအကုန်မှာ အလွတ်နဲ့ ဆုံးရှုံးရတော့မှာ ဖြစ်ပါတယ်။

ပီအက်စ်ဂျီအသင်းက ဘတ်ပီဟာ ရီးရယ်လ်အသင်းထံ ပြောင်းဖို့အတွက် သဘောတူညီမှု ရရှိထားတယ်လို့ ယုံကြည်နေပြီး အသင်းအပေါ် သစ္စာဖောက်တယ်လို့ ခံစားရကာ အမြန်ဆုံး ရောင်းချနိုင်ဖို့ စီစဉ်နေတာပါ။

ဘတ်ပီဟာ ဇူလိုင် ၂၁ ရက်က လီဟာဗရီအသင်းကို အနိုင်ရခဲ့တဲ့ ခြေစမ်းပွဲမှာ ပီအက်စ်ဂျီ အသင်းအတွက် လူစားဝင် ကစားသမားအဖြစ် ပါဝင်ခဲ့ပြီး ဂိုးသွင်းယူနိုင်ခဲ့ပေမယ့် ရာသီကြိုခရီးစဉ်အတွက် လူစာရင်းမှာတော့ ချန်လှပ်ခံခဲ့ရတာ ဖြစ်ပါတယ်။

ပီအက်စ်ဂျီအသင်းဟာ အာရှခရီးစဉ်မှာ ရော်နယ်ဒိုရဲ့ အယ်လ်နာဆာ၊ ဆီရီဇိုအိုဆာကာ၊ အင်တာမီလန်၊ ဂျောင်ဘွတ်ဟွန်ဒိုင်းအသင်းတို့နဲ့ ခြေစမ်းပွဲ ယှဉ်ပြိုင်သွားမယ်လို့ သိရပါတယ်။

Source: Daily Mail

CNI Sport News

၂၀၂၃ ခုနှစ်၊ ဇူလိုင် ၂၂

အာဂျင်တီးနားအသင်းခေါင်းဆောင် မက်ဆီဟာ အင်တာမိုင်ယာမီအသင်းက ခရုဇ်အဇူလ်အသင်းကို ၂ ဂိုး- ၁ ဂိုးနဲ့ အနိုင်ရခဲ့တဲ့ လိဂ်ဖလားပွဲမှာ မေဂျာလိဂ်ကလပ်ကစားသမားဘ၀ ပွဲဦးထွက်အဖြစ် ပါဝင်ခဲ့ပြီး အနိုင်ဂိုးသွင်းယူ ပေးနိုင်ခဲ့ပါတယ်။

မက်ဆီဟာ ဒီပွဲမှာ အင်တာမိုင်ယာမီအသင်းရဲ့ ပွဲထွက်လူစာရင်းမှာ မပါဝင်ခဲ့ပေမယ့် ပွဲချိန် ၅၄ မိနစ်မှာ လူစားဝင် ကစားသမားအဖြစ် ပါဝင်ခဲ့တာပါ။ မက်ဆီဟာ လူစားဝင်ရောက်လာချိန်မှာ အင်တာမိုင်ယာမီအသင်းရဲ့ အသင်း ခေါင်းဆောင် လက်ပတ်ကို ဝတ်ဆင်ခွင့်ရခဲ့ပါတယ်။ မက္ကဆီကိုကလပ် ခရုဇ်အဇူလ်နဲ့ အင်တာမိုင်ယာမီ အသင်း တို့ဟာ ပွဲချိန် မိနစ် ၉၀ ပြည့်တဲ့အချိန်ထိ ၁ ဂိုးစီသရေကျနေခဲ့ပေမယ့် နာကျင်အချိန်ပို ၄ မိနစ်မှာ အမေရိကန် ကလပ်ဟာ ပြစ်ဒဏ်ဘောကန်သွင်းခွင့်ရခဲ့တာပါ။

ဒီပြစ်ဒဏ်ဘောကို မက်ဆီက လှပတဲ့ကန်သွင်းချက်နဲ့ အဖိုးတန်အနိုင်ဂိုး သွင်းယူပေးနိုင်ခဲ့တာ ဖြစ်ပါတယ်။ မက်ဆီရဲ့ အနိုင်ဂိုးကြောင့် အင်တာမိုင်ယာမီအသင်းဟာ ၅ ပွဲဆက်တိုက်နိုင်ပွဲပျောက်ဆုံးခဲ့တဲ့ ရလဒ်ဆိုးနေမှုကို ဒီပွဲမှာ အဆုံးသတ်နိုင်ခဲ့တာပါ။ အသက် ၃၆ နှစ်အရွယ်ရှိ မက်ဆီဟာ ဒီပွဲအနိုင်ရဖို့က အသင်းအတွက် အလွန် အရေးကြီးတယ်လို့ ပွဲအပြီးမှာ ပြောခဲ့ပါတယ်။

မက်ဆီက “ကျနော် ဂိုးသွင်းရမယ်ဆိုတာကို သိပါတယ်။ ဒါက ဒီပွဲရဲ့နောက်ဆုံးကစားနည်းပါ။ ဒီပွဲအနိုင်ရဖို့က ကျနော်တို့အတွက် အလွန်အရေးကြီးပါတယ်။ ဒါက ပြိုင်ပွဲအသစ်တစ်ခုဖြစ်ပြီး ကျနော်တို့ကို ယုံကြည်မှုအပြည့်နဲ့ ရှေ့ဆက်သွားစေမှာဖြစ်တယ်” လို့ Apple TV ကို ပြောခဲ့တာပါ။

ပွဲအပြီးမှာ အင်တာမိုင်ယာမီအသင်း ပူးတွဲပိုင်ရှင် ဒေးဗစ်ဘက်ခမ်းဟာ မက်ဆီနဲ့အတူ အောင်ပွဲခံနေခဲ့တာဖြစ်ပြီး အာဂျင်တီးနားအသင်းခေါင်းဆောင်ကိုလည်း ချီးကျူးသွားခဲ့ပါတယ်။

ဒေးဗစ်ဘက်ခမ်းက “ပြစ်ဒဏ်ဘောကန်သွင်းမှာကို မြင်ထဲက ဒါက အဆုံးသတ်နိုင်မယ့် နည်းလမ်းလို့ ကျနော် ထင်ခဲ့တာပါ။ ဒါက ဒီနိုင်ငံအတွက်ရော လိဂ်အတွက်ရော အကောင်းမွန်ဆုံးအခိုက်အတန့်ပါပဲ။ လီယိုလုပ်ပြနိုင်ခဲ့တဲ့ အရာကိုကွင်းထဲမှာ လူတိုင်းမြင်တွေ့ခဲ့ရတာက အိပ်မက်တစ်ခုပါပဲ”လို့ ပြောခဲ့ပါတယ်။

အင်တာမိုင်ယာမီအသင်းဟာ ဇူလိုင် ၂၆ ရက်မှာ လိဂ်ဖလားပွဲစဉ်အဖြစ် မေဂျာလိဂ်ကလပ် အတ္တလန္တာ ယူနိုက် တက်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Foxsports

CNI Sport News

၂၀၂၃ ခုနှစ်၊ ဇူလိုင် ၂၁ 

အီတလီနဲ့ ပီအက်စ်ဂျီအသင်း ဂိုးသမား ဒွန်နာရမ်မာနဲ့ သူ့ရဲ့လက်တွဲဖော်တို့ဟာ ပဲရစ်ရှိ သူတို့ရဲ့ နေအိမ်မှာ လုယက် တိုက်ခိုက်ခံခဲ့ရတယ်လို့ သတင်းတွေမှာ ဖော်ပြထားပါတယ်။

လူအများအပြားဟာ သူတို့စုံတွဲကို ပစ်မှတ်ထားခဲ့တာဖြစ်ပြီး နေအိမ်မှာ ချည်နှောင်ထားခြင်း ခံခဲ့ရတယ်လို့ ရဲသတင်းရင်းမြစ်တွေက ပြင်သစ်မီဒီယာတွေကို ပြောခဲ့တာပါ။

သူတို့နှစ်ဦးဟာ နောက်ပိုင်းမှာ အိမ်နဲ့ အနီးနားမှာရှိတဲ့ ဟိုတယ်ကို ထွက်ပြေး လွတ်မြောက် သွားခဲ့တယ်လို့ ပြောထားပါတယ်။ 

ဟိုတယ် ဝန်ထမ်းတွေဟာ ဒေသခံရဲတွေကို အကြောင်းကြားခဲ့ပြီး တုန်လှုပ်နေတဲ့ ဒွန်နာရမ်မာတို့ စုံတွဲကို ဆေးရုံသို့ ပို့ဆောင်ခဲ့တယ်လို့ သိရပါတယ်။

အတည်မပြုနိုင်တဲ့ သတင်းတွေအရ လုယက်တိုက်ခိုက်တဲ့ သူတွေဟာ ငွေကြေး အများအပြားယူပြီး ထွက်ခွာ သွားခဲ့တယ်လို့ ဖော်ပြထားပြီး သတင်းအချို့မှာတော့ ယူရို ၅၀၀,၀၀၀ ဝန်းကျင် ပါသွားခဲ့တယ်လို့ ဖော်ပြထား တာပါ။ 
ပြင်သစ်အထူးရဲတပ်ဖွဲ့ကတော့ လက်ရှိအချိန်မှာ လက်နက်ကိုင် လုယက်မှုနဲ့ ဖောက်ထွင်းမှုအတွက် စုံစမ်း စစ်ဆေးမှုကို စတင်နေပြီ ဖြစ်ပါတယ်။

ဒွန်နာရမ်မာနဲ့ ချစ်သူကိုတွေ့ရစဉ်

အီတလီလက်ရွေးစင် ဂိုးသမားဟာ ၂၀၂၁ ခုနှစ်က အေစီမီလန်အသင်းကနေ ပီအက်စ်ဂျီအသင်းထံ ရောက်ရှိလာခဲ့ တာဖြစ်ပြီး နိုင်ငံအသင်းကို ယူရို ၂၀၂၀ ပြိုင်ပွဲမှာ ချန်ပီယံဆု ရယူနိုင်အောင် လက်စွမ်း ပြသနိုင်ခဲ့တာပါ။ 

ဒွန်နာရမ်မာဟာ ပီအက်စ်ဂျီအသင်းအတွက် ၇၂ ပွဲ ပါဝင်ကစားထားပြီး လီဂူးဝမ်းဖလား ၂ ကြိမ် အပါအဝင် ဆုဖလား အောင်မြင်မှုတွေကို ရယူပေးထားနိုင်ခဲ့တာ ဖြစ်ပါတယ်။

ဒါပေမယ့် ဒွန်နာရမ်မာဟာ အခုနွေရာသီ အပြောင်းအရွှေ့မှာ ပီအက်စ်ဂျီအသင်းကနေ ထွက်ခွာသွားနိုင်တယ်လို့ သတင်းတွေလည်း ထွက်ပေါ်နေတာပါ။ 

အသက် ၂၄ နှစ်အရွယ်ရှိ ဒွန်နာရမ်မာနဲ့ ပြင်သစ်ကလပ်တို့ ချုပ်ဆိုထားတဲ့ စာချုပ်ဟာ ၂၀၂၆ ခုနှစ်အထိ သက်တမ်း ကျန်ရှိနေသေးပေမယ့် စီးရီးအေကလပ် ဂျူဗင်တပ်စ်အသင်းရဲ့ ခေါ်ယူဖို့ ချိတ်ဆက်မှု ပြုလုပ်ခြင်းကို ခံနေရတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၂၁

ရီးရယ်လ်အသင်းနည်းပြ အန်ဆယ်လော့တီက ဘရာဇီးလ် လက်ရွေးစင် အသင်းအကြောင်းကို ပြောမှာမဟုတ်ဘဲ စာချုပ်ရှိနေတဲ့ စပိန်ထိပ်သီး ကလပ်အတွက်သာ အာရုံစိုက်မယ်လို့ ပြောခဲ့ပါတယ်။

အန်ဆယ်လော့တီက “ကျနော် ဘရာဇီးလ်အကြောင်းကို ဘယ်တော့မှ ပြောမှာမဟုတ်ပါဘူး။ ကျနော်က ရီးရယ်လ် အသင်းရဲ့ နည်းပြဖြစ်ပြီး ဒီမှာဆက်ရှိမှာပါ။ ဒီကိစ္စကို ကျနော် ဆက်မပြောတော့ပါဘူး။ ကျနော့်မှာ စာချုပ်ရှိပြီး စာချုပ်အတိုင်းပဲ သွားမှာပါ။ လာမယ့်နှစ်မှာတော့ ဘာတွေဖြစ်မလဲဆိုတာ မြင်တွေ့ရမှာပါ”လို့ သတင်းထောက် တွေကို ပြောခဲ့တာပါ။ 

ဘရာဇီးလ်ဘောလုံးအဖွဲ့ချုပ်ဟာ အန်ဆယ်လော့တီကို ရီးရယ်လ်အသင်းနဲ့ စာချုပ်ကုန်ဆုံးမယ့် ၂၀၂၄ ခုနှစ်မှာ လက်ရွေးစင် အသင်းနည်းပြသစ်အဖြစ် ခန့်အပ်မယ်လို့ အတည်ပြုထားပါတယ်။ 

ရီးရဲလ်အသင်းကို တွေ့ရစဉ်

အီတလီလူမျိုးနည်းပြဟာ ဘရာဇီးလ်အသင်းကို ၂၀၂၄ ကိုပါအမေရိက ဖလားပြိုင်ပွဲမှာ စတင်ကိုင်တွယ်ရမယ်လို့ သတင်းတွေ ထွက်ပေါ်နေခဲ့ပေမယ့် သူကတော့ ဒါကို အခုအချိန်ထိ အတည်ပြုခြင်း မရှိသေးပါဘူး။

အန်ဆယ်လော့တီဟာ လက်ရှိအချိန်မှာ ရီးရယ်လ်အသင်းကို ရာသီသစ်အတွက် ပြင်ဆင်ဖို့ အာရုံစိုက်နေပြီး အသင်းဟာ ခြေစမ်းပွဲကစားဖို့ အမေရိကန်နိုင်ငံကို ရောက်ရှိနေတာပါ။ 

လော့စ်အိန်ဂျလိစ်မှာ သတင်းထောက်တွေနဲ့ တွေ့ဆုံခဲ့ချိန် ပီအက်စ်ဂျီ အသင်းတိုက်စစ်မှူး ဘတ်ပီကို ခေါ်ယူနိုင် မယ့် အခြေအနေတွေနဲ့ ပတ်သက်ပြီး အန်ဆယ်လော့တီကို မေးမြန်းခဲ့ကြပါတယ်။

အန်ဆယ်လော့တီက “ဘတ်ပီဟာ ရီးရယ်လ်အသင်းမှာ မရှိတဲ့ ကစားသမားတစ်ဦးပါ။ ဒီမှာမရှိတဲ့ ကစားသမား တွေအကြောင်း ပြောရတာ ကျနော့်အတွက် အဆင်မပြေဘူး”လို့ ပြန်လည် ဖြေခဲ့ပါတယ်။

ရီးရယ်လ်အသင်းဟာ အမေရိကန်ခရီးစဉ်မှာ ခြေစမ်းပွဲ ၄ ပွဲ ကစားသွားမှာဖြစ်ပြီး ဇူလိုင် ၂၃ ရက်မှာ အေစီမီလန်၊ ၂၆ ရက်မှာ ယူနိုက်တက်၊ ၂၉ ရက်မှာ ဘာစီလိုနာနဲ့ သြဂုတ်လ ၂ ရက်မှာ ဂျူဗင်တပ်စ်အသင်းတို့နဲ့ ယှဉ်ပြိုင်သွားမှာ ဖြစ်ပါတယ်။

Source: besoccer

CNI Sport News

၂၀၂၃ ခုနှစ်၊ ဇူလိုင် ၂၁

ပီအက်စ်ဂျီအသင်းဟာ တိုက်စစ်မှူး ဘတ်ပီကို အသင်းမှာ ဆက်ရှိနိုင်အောင် ထိန်းသိမ်းဖို့အတွက် ယူရို ၁ ဘီလီယံ တန်ကြေးရှိတဲ့ စာချုပ်သစ် ကမ်းလှမ်းခဲ့တယ်လို့ သိရပါတယ်။

Defensa Central က ပီအက်စ်ဂျီအသင်းဟာ ယူရို ၁ ဘီလီယံတန်ကြေးရှိ ၁၀ နှစ်စာချုပ်နဲ့ ဘတ်ပီကို မယုံနိုင် လောက်စရာ ကမ်းလှမ်းမှု ပြုလုပ်ခဲ့တယ်လို့ ဖော်ပြခဲ့ပါတယ်။

ပီအက်စ်ဂျီအသင်းဟာ ဘတ်ပီကို ဒီစာချုပ် ချုပ်ဆိုနိုင်ခဲ့မယ်ဆိုရင် ကစားသမားဟာ အသက် ၃၄ နှစ်အရွယ်ထိ ပြင်သစ်ကလပ်မှာ ဆက်ပြီးရှိနေတော့မှာပါ။ 

ဒါ့အပြင် ဒီစာချုပ်ဟာ သမိုင်းတစ်လျှောက် အကျိုးအမြတ် အများအပြား ရရှိမယ့် စာချုပ်ဖြစ်လာမယ်လို့ သိရပါတယ်။

ဒါပေမယ့် ဘတ်ပီဟာ ရီးရယ်လ်အသင်းမှာ ကစားချင်နေတာကြောင့် ဒီကမ်းလှမ်းမှု ပမာဏဟာ သူ့ကို အသင်းမှာ ဆက်ရှိအောင် ဆွဲဆောင်နိုင်ဖို့ ခက်ခဲနိုင်တယ်လို့ သုံးသပ်မှုတွေလည်း ရှိနေကြတာပါ။ 

ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ လာမယ့် ရာသီအကုန်မှာ ကုန်ဆုံးမှာဖြစ်ပြီး စာချုပ် သက်တမ်းတိုးမှာ မဟုတ်တော့ဘူးလို့ အသင်းကို အကြောင်းကြားထားပြီး ဖြစ်ပါတယ်။

ပြင်သစ်အသင်းခေါင်းဆောင်ဟာ လာမယ့်ရာသီ အကုန်မှာ ပီအက်စ်ဂျီကနေ အလွတ်နဲ့ ထွက်ခွာဖို့ စီစဉ် ထားတာ ပါ။

အသင်းဖော်တွေနဲ့ လေ့ကျင့်ခန်းဆင်းနေတဲ့ ဘတ်ပီ

ပီအက်စ်ဂျီ အသင်းဘက်ကတော့ ဘတ်ပီအနေနဲ့ စာချုပ်သစ် မချုပ်ရင် အခုနွေရာသီ အပြောင်းအရွှေ့မှာ ရောင်းချ မယ်လို့ မကြာသေးခင်က အသင်းဥက္ကဋ္ဌ အယ်လ်ခီလိုင်ဖီက သတိပေးထားတာ ဖြစ်ပါတယ်။ 

ပြင်သစ်ကလပ်အတွက် ပွဲပေါင်း ၂၆၀ ပါဝင်ကစားထားပြီး ၂၁၂ ဂိုးသွင်းယူကာ ၉၈ ဂိုးဖန်တီးထားတဲ့ ဘတ်ပီဟာ အသင်းနဲ့အတူ ရာသီသစ်အတွက် လေ့ကျင့်မှုတွေ ပြုလုပ်နေပြီလည်း ဖြစ်ပါတယ်။

အသက် ၂၄ နှစ်အရွယ်ရှိ ဘတ်ပီဟာ ပီအက်စ်ဂျီအသင်းနဲ့ ပြည်တွင်းဖလား အားလုံးကို ရယူထားနိုင်ခဲ့ပြီး ချန်ပီယံလိဂ်ဖလား မရယူနိုင်သေးတာကြောင့် ဒီဆုဖလားကို ရယူနိုင်ဖို့အတွက် ရီးရယ်လ်အသင်းထံ ပြောင်းရွှေ့ ချင်နေတာ ဖြစ်ပါတယ်။ 

စပိန်ကလပ်ကလည်း ပြင်သစ်တိုက်စစ်မှူးကို ခေါ်ယူချင်နေပေမယ့် လာမယ့်ရာသီအကုန်မှ အလွတ် ပြောင်းရွှေ့ကြေးနဲ့ ခေါ်ယူဖို့ ရည်ရွယ်ထားပုံရပါတယ်။

ပီအက်စ်ဂျီအသင်းဟာ ရာသီကြို ခြေစမ်းပွဲအဖြစ် လီဟာဗေး၊ အယ်လ်နာဆာ၊ ဆီရီဇိုအိုဆာကာ၊ အင်တာမီလန် တို့နဲ့ ယှဉ်ပြိုင်သွားမှာဖြစ်ပြီး ဒီပွဲတွေမှာ ဘတ်ပီဟာ အသင်းအတွက် ပါဝင်ကစားသွားမယ်လို့ သိရပါတယ်။

Source: Goal

CNI Sport News

၂၀၂၃ ခုနှစ်၊ ဇူလိုင် ၂၁

ယူနိုက်တက်အသင်းဟာ ဂိုးသမား အိုနာနာကို ပေါင် ၄၇.၂ သန်းနဲ့ အင်တာမီလန် အသင်းကနေ အပြီးသတ် ခေါ်ယူပြီး ၅ နှစ် စာချုပ်ချုပ်ဆိုနိုင်ခဲ့ပြီလို့ ကြေညာခဲ့ပါတယ်။

မန်ချက်စတာကလပ်ဟာ အသက် ၂၇ နှစ်အရွယ်ရှိ ကင်မရွန်း ဂိုးသမားအတွက် အင်တာမီလန် အသင်းကို ကနဦး ပြောင်းရွှေ့ကြေး ပေါင် ၄၃.၈ သန်း ပေးချေရမှာဖြစ်ပြီး ကစားသမားရဲ့ စွမ်းဆောင်ရည်တွေအပေါ် မူတည်ကာ ပေါင် ၃.၄ သန်းထပ်ပြီး ပေးချေရမှာ ဖြစ်ပါတယ်။

အိုနာနာဟာ ယူနိုက်တက်အသင်းမှာ ၁၂ နှစ်ကြာကစားပြီး စာချုပ်ကုန်ဆုံးလို့ ထွက်ခွာသွားခဲ့တဲ့ ဂိုးသမား ဒီဂီယာရဲ့ နေရာမှာ နံပါတ်တစ် ဂိုးသမားအဖြစ် တာဝန်ယူရတော့မှာ ဖြစ်ပါတယ်။

အိုနာနာက “ယူနိုက်တက်အသင်းထံ ပြောင်းရွှေ့ရတာက မယုံနိုင်လောက်စရာကောင်းတဲ့ ဂုဏ်ယူစရာပါပဲ။ ဒီလို အခိုက်အတန့်မျိုးကို ရောက်ဖို့အတွက် အလုပ်ကို ကြိုးကြိုးစားစား လုပ်ခဲ့ရတာဖြစ်ပြီး လမ်းခရီးတစ်လျှောက် အတားအဆီး အများအပြားကို ကျော်ဖြတ်ခဲ့ရတာပါ။ ယူနိုက်တက်အသင်းမှာ မယုံနိုင်စရာ ဂိုးသမားတွေရဲ့ ရှည်လျားတဲ့ သမိုင်းကြောင်းတွေ ရှိပါတယ်။ အဲဒါကြောင့် ကျနော်လည်း ကိုယ်ပိုင်အမွေအနှစ်ကို ဖန်တီးနိုင်ဖို့ အရာအားလုံးကို ပေးသွားမယ်”လို့ ပြောခဲ့ပါတယ်။

အိုနာနာဟာ ယူနိုက်တက်နည်းပြ အဲရစ်တန်ဟတ်နဲ့ အေဂျတ်စ်အသင်းမှာ အတူလက်တွဲခဲ့ဖူးပြီး အမှတ်ပေးဖလား ၃ ကြိမ် အပါအဝင် ဆုဖလားအောင်မြင်မှုတွေ ရယူနိုင်ခဲ့တာပါ။ 

အိုနာနာနဲ့ ယူနိုက်တက်တာ၀န်ရှိသူတွေကိုတွေ့ရစဉ်

ဒါပေမယ့် ကင်မရွန်းဂိုးသမားဟာ တားမြစ်ဆေး သုံးစွဲခဲ့တယ်ဆိုပြီး ၉ လကြာ ပွဲပယ်ပြစ်ဒဏ် ချမှတ်ခံရပြီးနောက် ၂၀၂၂ ခုနှစ်မှာ အင်တာမီလန်အသင်းထံ အလွတ်ပြောင်းရွှေ့ကြေးနဲ့ ပြောင်းရွှေ့ခဲ့တာ ဖြစ်ပါတယ်။

အိုနာနာဟာ ပြီးခဲ့တဲ့ရာသီက အင်တာမီလန်အသင်းကို ချန်ပီယံလိဂ် ဗိုလ်လုပွဲ ရောက်ရှိအောင် ပို့ဆောင်ပေး နိုင်ခဲ့ပါတယ်။

အိုနာနာက “အဲရစ်တန်ဟတ်နဲ့ ပြန်ပြီး အလုပ်လုပ်ခွင့်ရမယ့် အခွင့်အရေးအတွက် ကျနော်စိတ်လှုပ်ရှားမိပါတယ်။ သူဟာ ယူနိုက်တက်အသင်းကို ထိပ်တန်းအသင်းကြီး ပြန်ဖြစ်အောင် ပို့ဆောင်ဖို့ စိတ်ပိုင်းဖြတ်ထားတယ်ဆိုတာကို ကျနော်သိပါတယ်။ အဲ့ဒါကြောင့် ဒီအောင်မြင်မှုမှာ အစိတ်အပိုင်းအဖြစ် ပါဝင်နိုင်ဖို့ ကျနော် မစောင့်ဆိုင်း နိုင်တော့ ဘူး”လို့ ပြောပါတယ်။

အိုနာနာဟာ ယူနိုက်တက်အသင်းမှာ ကျောနံပါတ် ၂၄ ဂျာစီ ဝတ်ဆင်သွားမှာဖြစ်ပြီး အသင်းသစ်နဲ့အတူ ရာသီကြို ခရီးစဉ်ကို ပူးပေါင်းဖို့အတွက် အမေရိကန်နိုင်ငံကို ထွက်ခွာသွားပြီလည်း ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇူလိုင် ၂၁

ပီအက်စ်ဂျီအသင်း အားပေးတဲ့ ပရိသတ်တွေက ထွက်ခွာဖို့ တောင်းဆိုနေပေမယ့် အသင်းမှာ ဆက်ရှိဖို့ မျှော်လင့်တယ်လို့ တိုက်စစ်မှူး နေမာက ပြောလိုက်ပါတယ်။

နေမာက “ဒီ ရာသီမှာ ပီအက်စ်ဂျီအသင်းအတွက် ကစားနိုင်ဖို့ ကျနော်မျှော်လင့်ပါတယ်။ ပီအက်စ်ဂျီနဲ့ စာချုပ် ရှိနေပြီး ဘယ်သူမှလည်း ကျနော့်ကို ဘာမှမပြောသေးပါဘူး။ ပရိသတ်တွေနဲ့ ကစားသမားတွေကြားမှာ ချစ်ခြင်း မေတ္တာတွေ အများကြီးမရှိရင်တောင် ကျနော်က အေးအေးဆေးဆေးပါပဲ။ ချစ်ခြင်းမေတ္တာတွေရှိရှိ၊ မရှိရှိ ကျနော် ဒီမှာရှိနေမှာပါ”လို့ CazeTV နဲ့ အင်တာဗျူးမှာ ပြောခဲ့တာပါ။

၂၀၁၇ ခုနှစ်က ပေါင်သန်း ၁၉၀ နဲ့ ဘာစီလိုနာအသင်းကနေ ရောက်ရှိလာပြီး ဈေးအကြီးဆုံးကစားသမားအဖြစ် ရှိနေခဲ့တဲ့ နေမာဟာ ပီအက်စ်ဂျီအသင်းကို ချန်ပီယံလိဂ်ဖလားရယူနိုင်အောင် လုပ်ဆောင်ပေးနိုင်ခြင်း မရှိသေး ပါဘူး။ အဲဒါကြောင့် ပီအက်စ်ဂျီအသင်း အမာခံပရိသတ်တွေဟာ ပြီးခဲ့တဲ့ရာသီက နေမာရဲ့ အိမ်အပြင်ဘက်မှာ စုဝေးပြီး ကစားသမားကို အသင်းကနေ ထွက်ခွာဖို့ အော်ဟစ်ခဲ့ကြတာ ဖြစ်ပါတယ်။

နေမာဟာ ပီအက်စ်ဂျီအသင်းကို ရောက်ရှိလာကတည်းက ဒဏ်ရာ မကြာခဏကြုံတွေ့နေရပြီး မနှစ်က ရာသီ တုန်းကလည်း ဒဏ်ရာကြောင့် ရာသီအကုန်ထိ အနားယူခဲ့ရတာပါ။ နေမာဟာ လက်ရှိအချိန်မှာ ဒဏ်ရာကနေ ပြန်သက်သာလာပြီးနောက် လေ့ကျင့်ရေးပြုလုပ်ဖို့ ပြန်လည်ရောက်ရှိလာခဲ့ကာ ကွင်းထဲကို အမြန်ဆုံးပြန်ဝင်နိုင်ဖို့ မျှော်လင့်နေတာဖြစ်ပါတယ်။

နေမာက “နာကျင်ပြီး ခက်ခဲပေမယ့် အကောင်းဆုံးပြန်လာနိုင်ဖို့ ကြိုးစားနေပါတယ်။ အနိုင်ရယူတာက ရည်မှန်း ချက်တွေရဲ့ အစိတ်အပိုင်းဖြစ်ပေမယ့် ကောင်းမွန်စွာ ပြန်ကစားနိုင်ဖို့က ကျနော့်အတွက် ပထမဆုံး အရေးကြီးတဲ့ အရာပါ”လို့ ပြောခဲ့ပါတယ်။

နေမာနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ်အထိ သက်တမ်းရှိနေတာဖြစ်ပြီး စာချုပ် ကုန်ဆုံးချိန်မှာ နောက်ထပ်တစ်နှစ်သက်တမ်းတိုးဖို့အတွက် ရွေးချယ်ခွင့်ရှိတယ်လို့ သိရပါတယ်။

Source:DailyMail

CNI Sport News

၂၀၂၃ ခုနှစ်၊ ဇူလိုင် ၂၀

လီဗာပူးလ်အသင်းနည်းပြ ကလော့ပ်က အသင်းခေါင်းဆောင် ဟန်ဒါဆန်ကို ဆော်ဒီပရိုလိဂ်ကလပ် အယ်လ်အီတီ ဖတ်အသင်းထံ ရောင်းချမယ့် ဆုံးဖြတ်ချက်ကို ချမှတ်ခဲ့တယ်လို့ ပြောပါတယ်။

ကလော့ပ်က “နောက်ဆုံးမှာ ဆုံးဖြတ်ချက်တွေ အားလုံးကို ကျနော်ပဲ ချမှတ်ခဲ့တာပါ။ ကျနော်ဟာ ကစားသမား တွေ အားလုံးကို အများကြီး လေးစားမှုရှိတာကြောင့် ကစားသမားတွေနဲ့ သဘောတူညီမှုရယူပြီး ဆုံးဖြတ်ချက် ချတာ များပါတယ်။ အခုအပြောင်းအရွှေ့ ကိစ္စမှာလည်း ဒီလိုပဲဖြစ်တာကြောင့် အားလုံးအဆင်ပြေပါတယ်”လို့ ပြောပါတယ်။

လီဗာပူးလ်အသင်းခေါင်းဆောင် ဟန်ဒါဆန်ဟာ ကစားသမားဟောင်း စတီဗင်ဂျရတ် ကိုင်တွယ်နေတဲ့ အယ်လ်အီ တီဖတ် အသင်းထံ ပေါင် ၁၂ သန်းနဲ့ ပြောင်းရွှေ့တော့မှာဖြစ်ပြီး အပြောင်းအရွှေ့ကို အပြီးသတ်ဖို့ လုပ်ဆောင်နေ ပါတယ်။

၂၀၁၅ ခုနှစ်ကတည်းက လီဗာပူးလ် အသင်းခေါင်းဆောင်အဖြစ် တာဝန်ယူခဲ့တဲ့ ဟန်ဒါဆန်ဟာ အယ်လ်အီတီဖတ် အသင်းမှာ တစ်ပတ်လုပ်ခ ပေါင် ၃၅၀,၀၀၀ ရရှိမယ်လို့ သိရပါတယ်။

လီဗာပူးလ်အသင်းနဲ့ ၂ နှစ် စာချုပ် ကျန်ရှိနေသေးတဲ့ ဟန်ဒါဆန်ဟာ အသင်းအတွက် ပွဲပေါင်း ၄၉၂ ပွဲ ပါဝင် ကစား ခဲ့ပြီး ၃၃ ဂိုး သွင်းယူကာ ၅၇ ဂိုး ဖန်တီးမှု ပြုလုပ်ခဲ့တာပါ။ 

အသက် ၃၃ နှစ်အရွယ်ရှိ ကစားသမားဟာ လီဗာပူးလ်အသင်းကို ပရီးမီးယားလိဂ်၊ ချန်ပီယံလိဂ်၊ ဖီဖာကလပ် ကမ္ဘာ့ ဖလား၊ ဥရောပစူပါဖလား အပါအဝင် ဆုဖလားအားလုံးကို ရယူနိုင်အောင် ဦးဆောင်ပေးနိုင်ခဲ့တာ ဖြစ်ပါတယ်။

ဟန်ဒါဆန်ကို တွေ့ရစဉ်

ဒါပေမယ့် အခုနွေရာသီ အပြောင်းအရွှေ့မှာ အယ်လ်အီတီဖတ်ရဲ့ ကမ်းလှမ်းမှုကြောင့် လီဗာပူးလ်အသင်းကနေ ထွက်ခွာဖို့ ဆုံးဖြတ်ခဲ့တာပါ။ 

ဟန်ဒါဆန်အပြင် လီဗာပူးလ်အသင်းရဲ့ နောက်ထပ် ကွင်းလယ်လူ တစ်ဦးဖြစ်တဲ့ ဖာဘင်ဟိုကတော့ ဆော်ဒီလိဂ် ကလပ် အယ်လ်အီတီဟတ် အသင်းထံ ပြောင်းရွှေ့ဖို့ သဘောတူညီမှု ရရှိထားတာ ဖြစ်ပါတယ်။

အဲဒါကြောင့် လီဗာပူးလ်အသင်းဟာ အခုနွေရာသီ အပြောင်းအရွှေ့မှာ ဟန်ဒါဆန်နဲ့ ဖာဘင်ဟိုတို့ နှစ်ဦးစလုံးကို ဆုံးရှုံးရတော့မှာပါ။

ပြီးခဲ့တဲ့ရာသီက ဆုဖလားအောင်မြင်မှုနဲ့ ဝေးကွာခဲ့တဲ့ လီဗာပူးလ်အသင်းဟာ အခုနွေရာသီ အပြောင်းအရွှေ့မှာ မက်အယ်လစ္စတာနဲ့ ဆာဘော့ဇ်လိုင်းတို့ကို ခေါ်ယူထားပြီး နောက်ထပ် ကစားသမားတွေကို ထပ်ပြီးခေါ်ယူနိုင်ဖို့ ကြိုးစားနေတာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ ဇူလိုင် ၂၀

ယူနိုက်တက်ကွင်းလယ်လူ ဗန်ဒီဘိခ်ဟာ ဒဏ်ရာကြောင့် ၆ လကြာ အနားယူပြီး ပြန်ကစားတဲ့ပွဲမှာ ဂိုးသွင်းနိုင်ခဲ့ ပေမယ့် အခုနွေရာသီ အပြောင်းအရွှေ့မှာ အသင်းက ထွက်ခွာသွားနိုင်တယ်လို့ ပြောခဲ့ပါတယ်။

ဗန်ဒီဘိခ်က “အခုအချိန်မှာ ကျနော့်အနာဂတ်က ဘယ်မှာလဲဆိုတာ ပြောဖို့ခက်ပါတယ်။ ကျနော်ဒီမှာ ဆက်ရှိနိုင် ပေမယ့် ထွက်ခွာသွားဖို့ကလည်း ဖြစ်နိုင်ဖွယ်ရှိနေပါတယ်။ အဲဒါကြောင့် အရာအားလုံးကို ဖွင့်ထားပါတယ်။ ကြံ့ခိုင် မှု အကောင်းဆုံး အနေအထားဖြစ်အောင် အာရုံစိုက်ပြီး တွန်းအားပေး လုပ်ဆောင်နေပါတယ်။ ကျနော်ဟာ ကလပ် အများအပြားနဲ့ ချိတ်ဆက်ခဲ့ဖူးပေမယ့် ဒါကို အာရုံစိုက်နေတာတော့ မဟုတ်ပါဘူး။ ဒီအင်္ကျီကို ဝတ်ဆင်ရတာ ဂုဏ် ယူပေမယ့် ဘာဖြစ်မလဲဆိုတာ ဆက်ပြီးကြည့်ကြတာပေါ့”လို့ ပြောပါတယ်။

ဗန်ဒီဘိခ်ဟာ ပြီးခဲ့တဲ့ ဇန်နဝါရီလက ဘုန်းမောက် အသင်းနဲ့ပွဲမှာ ဆိုးရွားတဲ့ ဒူးဒဏ်ရာ ရရှိပြီးနောက် ရာသီအကုန် ထိ အနားယူခဲ့ရကာ လိုင်ယွန်အသင်းနဲ့ကစားခဲ့တဲ့ ခြေစမ်းပွဲမှာ ပထမဆုံးပွဲစဉ်အဖြစ် ပါဝင်ကစားနိုင်ခဲ့တာ ဖြစ်ပါ တယ်။

ဗန်ဒီဘိခ်ဟာ ယူနိုက်တက်အသင်းက လိုင်ယွန်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ခြေစမ်းပွဲမှာ အသင်းအတွက် အနိုင်ဂိုးကို သွင်းယူပေးနိုင်ခဲ့တာပါ။

ဗန်ဒီဘိခ်ကို တွေ့ရစဉ်

အသက် ၂၆ နှစ်အရွယ်ရှိ ဗန်ဒီဘိခ်ဟာ အခုနွေရာသီ အပြောင်းအရွှေ့မှာ ယူနိုက်တက်အသင်း ရောင်းချမယ့် ကစား သမားတွေထဲမှာ ပါဝင်နေပြီး အေဂျတ်စ် ကွင်းလယ်လူဟောင်းကို ပေါင်သန်း ၂၀ ဝန်းကျင်ရရှိရင် ရောင်းချသွားဖို့ ရှိနေပါတယ်။

ယူနိုက်တက်အသင်းကို ၂၀၂၀ ခုနှစ်က အေဂျတ်စ်အသင်းကနေ ရောက်ရှိလာခဲ့တဲ့ ဗန်ဒီဘိခ်ဟာ သူ့ရဲ့ ကစား သမားဘဝကို ပြန်လည် အသက်သွင်းချင်နေတာကြောင့် အသင်းက ထွက်ခွာဖို့ အစီအစဉ်ရှိနေတာ ဖြစ်ပါတယ်။

ဗန်ဒီဘိခ်ဟာ ယူနိုက်တက်အသင်းမှာ ကစားခဲ့တဲ့ ပြီးခဲ့တဲ့ ၃ ရာသီအတွင်း ပွဲပေါင်း ၆၀ သာ ပါဝင်ကစားခဲ့ရပြီး ၂ ဂိုး သွင်းယူနိုင်ခဲ့တာပါ။ နယ်သာလန် လက်ရွေးစင် ကစားသမားဟာ ရာသီကြို ခရီးစဉ်အဖြစ် အမေရိကန်နိုင်ငံကို ထွက်ခွာခဲ့တဲ့ ယူနိုက်တက်အသင်းရဲ့ ကစားသမား ၃၁ ဦးစာရင်းမှာ ပါဝင်ခဲ့တာ ဖြစ်ပါတယ်။ 

ယူနိုက်တက်အသင်းဟာ အမေရိကန်ခရီးစဉ်မှာ အာဆင်နယ်၊ ရက်စ်ဟမ်း၊ ရီးရယ်လ်၊ ဒေါ့မွန်အသင်းတို့နဲ့ ယှဉ်ပြိုင် မှာဖြစ်ပြီး ဇူလိုင် ၂၃ ရက်တွင် အာဆင်နယ်အသင်းနဲ့ စတင်ယှဉ်ပြိုင်မှာ ဖြစ်ပါတယ်။

Source: Daily Mail