CNI Sport News

၂၀၂၃ ခုနှစ်၊ ဩဂုတ် ၉

ဘိုင်ယန်မြူးနစ်အသင်းရဲ့ အဓိကဂိုးသမား နူအာဟာ ရက်သတ္တပတ် အနည်းငယ်ထပ်ပြီး အနားယူရမှာဖြစ်လို့ နည်းပြ တူချယ်လ်ဟာ ချယ်လ်ဆီးအသင်းမှာ လက်တွဲခဲ့တဲ့ ဂိုးသမား ကီပါကို အသင်းထံ ခေါ်ယူချင်နေ ပါတယ်။

ဂျာမန်ချန်ပီယံအသင်းဟာ ဂိုးသမား ရွေးချယ်ဖို့အတွက် အခက်အခဲဖြစ်နေပြီး လက်ရှိအသင်းမှာ အယ်လ်ရစ်ရှ် တစ်ဦးတည်းသာ ကြံ့ခိုင်မှု အပြည့်အဝ ရှိနေတာပါ။ 
ဆွစ်ဇာလန်ဂိုးသမား ဆွန်မားဟာ အသင်းမှာ ပွဲထွက်ခွင့်ရဖို့ မသေချာတာကြောင့် အခုအပြောင်းအရွှေ့မှာ အင်တာမီလန်အသင်းထံ ပြောင်းရွှေ့သွားခဲ့တာ ဖြစ်ပါတယ်။

ဂျာမန်ဂိုးသမား နူအာကတော့ ပြီးခဲ့တဲ့ ဒီဇင်ဘာလက စကိတ်စီးခရီးတစ်ခုမှာ ခြေထောက်ကျိုးသွားခဲ့လို့ အနားယူနေရပြီး ပွဲကစားနိုင်ဖို့ မသေချာသေးပါဘူး။

အဲ့ဒါကြောင့် ဘိုင်ယန်မြူးနစ်အသင်းဟာ ဂိုးသမားအသစ် တစ်ဦးကို ရှာဖွေနေပြီး နည်းပြ တူချယ်လ်က ကီပါကို ချယ်လ်ဆီးအသင်းကနေ ခေါ်ယူပေးဖို့ တောင်းဆိုထားတာပါ။

 နူအာကိုတွေ့ရစဉ်

ဘိုင်ယန်မြူးနစ်အသင်းဟာ ကီပါရဲ့ အပြောင်းအရွှေ့အတွက် ကစားသမားရဲ့ ကိုယ်စားလှယ်တွေ၊ ပရီးမီးယားလိဂ် ကလပ်အသင်းနဲ့ ဆွေးနွေးမှုတွေ စတင်နေပြီဖြစ်တယ်လို့ Sport-1 က ဖော်ပြထားပါတယ်။ 

တူချယ်လ်ဟာ ချယ်လ်ဆီးအသင်းကို ကိုင်တွယ်ခဲ့ချိန်က မန်ဒီကို ပိုပြီးအသုံးပြုခဲ့ပေမယ့် အခုအချိန်မှာတော့ ကီပါကို သူ့ရဲ့ အသင်းထံ ခေါ်ယူချင်နေတာပါ။

ဘိုင်ယန်မြူးနစ်အသင်းဟာ ကီပါကို အပြီးသတ် ဝယ်ယူခွင့် အပါအဝင် ကနဦးအငှားနဲ့ ခေါ်ယူချင်နေတာ ဖြစ်ပါ တယ်။ ချယ်လ်ဆီးအသင်းဟာ အခုအပြောင်းအရွှေ့မှာ ဘရိုက်တန် အသင်းဂိုးသမား ရောဘတ်ဆန်းချက်ဇ်ကို ပေါင် ၂၅ သန်းနဲ့ ခေါ်ယူထားတာကြောင့် ကီပါဟာ ပွဲထွက်နေရာအတွက် အပြိုင်အဆိုင်ကြိုးစားရမှာပါ။ 

စပိန်ဂိုးသမားနဲ့ ချယ်လ်ဆီးအသင်းတို့ ချုပ်ဆိုထားတဲ့စာချုပ်ဟာ ၂ နှစ် ကျန်ရှိနေပါသေးတယ်။

၂၀၁၈ ခုနှစ်က ဘီလ်ဘာအို အသင်းကနေ ကလပ်စံချိန်တင် ပြောင်းရွှေ့ကြေး ပေါင် ၇၁ သန်းနဲ့ ချယ်လ်ဆီး အသင်းကို ရောက်ရှိလာခဲ့တဲ့ ကီပါဟာ အသင်းနဲ့အတူ ချန်ပီယံလိဂ်၊ ယူရိုပါလိဂ်၊ ကလပ်ကမ္ဘာ့ဖလားနဲ့ ဥရောပ စူပါဖလားတို့ကို ရယူနိုင်ခဲ့ပါတယ်။

Source: Goal

CNI Sport News

၂၀၂၃ ခုနှစ်၊ သြဂုတ် ၉

၂၀၂၃-၂၄ ရာသီသစ် မစတင်ခင်မှာ လီဗာပူးလ်အသင်းရဲ့ အလားအလာနဲ့ ပတ်သက်ပြီး သံသယရှိနေတာကို နားလည်တယ်လို့ အသင်းခေါင်းဆောင် ဗန်ဒိုက်က ပြောလိုက်ပါတယ်။

ဗန်ဒိုက်က “ပရိသတ်တွေရဲ့ အဆိုးမြင်နေတဲ့အပေါ် သေချာပေါက် နားလည်နိုင်ပေမယ့် ကျနော်ကတော့ အရမ်းကြီး အဆိုးမြင်နေတဲ့သူ မဟုတ်ပါဘူး။ အားလုံးသိတဲ့အတိုင်းပဲ ကျနော်တို့အသင်းမှာ ကစားသမားတွေ အများကြီး ထွက်ခွာသွားကြပါတယ်။ အသင်းခေါင်းဆောင်ရော၊ ဒုအသင်းခေါင်းဆောင်ပါ ထွက်ခွာသွားခဲ့သလို ကစားသမားသစ် ခေါ်ယူမှု ၂ ဦးပဲ ရှိပါသေးတယ်။ ကျနော်တို့ရဲ့ ကစားပုံတွေက ကောင်းပေမယ့် ခံစစ်ပိုင်းကတော့ ဂိုးတွေခွင့်ပြုနေရလို့ မကောင်းပါဘူး။ အဲ့ဒါကြောင့် လူတချို့ရဲ့ သံသယဖြစ်တာကို ကျနော်နားလည်နိုင်ပါတယ်”လို့ ပြောပါတယ်။

လီဗာပူးလ်အသင်းဟာ အခုရာသီသစ် မစတင်ခင်မှာ ဟန်ဒါဆန်၊ ဖာဘင်ဟို၊ မီလ်နာ၊ ဖာမီနို၊ ကီတာနဲ့ ချိန်ဘာလိန် တို့ ထွက်ခွာသွားခဲ့ပေမယ့် မက်အယ်လစ္စတာနဲ့ ဆာဘော့ဇ်လိုင်းတို့ကိုသာ ခေါ်ယူထားတာ ဖြစ်ပါတယ်။

အန်ဖီးလ်ကလပ်ဟာ ကွင်းလယ်ပိုင်း လိုအပ်ချက်တွေအတွက် ဆောက်သမ်တန်အသင်းက လာဗီးယားကို ခေါ်ယူဖို့ ၃ ကြိမ်အထိ ကမ်းလှမ်းခဲ့ပေမယ့် ချန်ပီယံရှစ်ကလပ်က ပယ်ချခဲ့တာပါ။ လီဗာပူးလ်အသင်းဟာ အပြောင်းအရွှေ့ မပိတ်ခင်မှာ လာဗီးယားအတွက် နောက်ထပ်ကမ်းလှမ်းမှု ပြုလုပ်သွားဖို့ ရှိနေတာဖြစ်ပါတယ်။

အသက် ၃၂ နှစ်အရွယ်ရှိ ဗန်ဒိုက်က လီဗာပူးလ် ကစားသမားတွေဟာ ဒီရာသီမှာ ဆုဖလားတွေ ရယူနိုင်ဖို့အတွက် စိတ်ပိုင်းဖြတ်ထားတယ်လို့လည်း ပြောခဲ့ပါတယ်။

ဗန်ဒိုက်က “ကျနော်တို့ အနားမှာရှိတဲ့ အသင်းတွေကို ကြည့်လိုက်မယ်ဆိုရင် အလွန်ခက်ခဲမှာ ဖြစ်ပေမယ့် ကျနော် တို့ဟာ ချန်ပီယံဆုအတွက် စိန်ခေါ်မှုတွေကို ထပ်ပြီး ပြုလုပ်ချင်ပါတယ်။ ဒီလိုလုပ်နိုင်ဖို့ အတွက်လည်း ကျနော်တို့ ဟာ ယုံကြည်မှု အပြည့်ရှိရမှာပါ။ ဒါက အလွန်ကောင်းမွန်တဲ့ စိန်ခေါ်မှုဖြစ်တဲ့အတွက် ကျနော် စိတ်လှုပ်ရှားနေပါ တယ်”လို့ ပြောခဲ့တာပါ။

လီဗာပူးလ်အသင်းဟာ ပရီးမီးယားလိဂ် အဖွင့်ပွဲစဉ်အဖြစ် ချယ်လ်ဆီးအသင်းနဲ့ သြဂုတ် ၁၃ ရက် စတမ်းဖို့ဒ် ဘရစ်ချ်မှာ ယှဉ်ပြိုင်သွားမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ သြဂုတ် ၉

အာဆင်နယ်အသင်းဟာ စပိန်လက်ရွေးစင်ဂိုးသမား ဒေးဗစ်ရာယာကို ခေါ်ယူဖို့ ဘရန်ဖို့ဒ်အသင်းနဲ့ ပြောင်းရွှေ့ ကြေး သဘောတူညီမှု ရရှိသွားပြီ ဖြစ်ပါတယ်။

ဘရန်ဖို့ဒ်အသင်းဟာ ဒေးဗစ်ရာယာအတွက် ပေါင်သန်း ၄၀ တန်ကြေး သတ်မှတ်ထားပေမယ့် အခုအချိန်မှာ နှစ်သင်းကြား ပေါင်သန်း ၃၀၊ အပိုဆုကြေးတွေနဲ့ သဘောတူညီမှု ရရှိခဲ့တာပါ။ 

စပိန်ဂိုးသမားဟာ အာဆင်နယ်အသင်းထံ ပြောင်းရွှေ့ချင်တဲ့ သူ့ရဲ့ဆန္ဒကို အသိပေးထားပြီး ဖြစ်သလို လန်ဒန် ကလပ်နဲ့ ပုဂ္ဂိုလ်ရေးဆိုင်ရာ သဘောတူညီမှု ရရှိထားပါတယ်။ 

ဒေးဗစ်ရာယာဟာ မကြာခင်မှာ အာဆင်နယ်အသင်းနဲ့ ဆေးစစ်မှုတွေ ပြုလုပ်တော့မှာဖြစ်ပြီး ပရီးမီးယားလိဂ် အဖွင့်ပွဲစဉ်ဖြစ်တဲ့ နော်တင်ဟမ်ဖောရက်စ်အသင်းနဲ့ ပွဲမှာပါဝင်နိုင်ဖို့ မျှော်လင့်နေတာပါ။ 

ဒေးဗစ်ရာယာကိုတွေ့ရစဉ်

ဘရန်ဖို့ဒ် ဂိုးသမားဟာ အာဆင်နယ်အသင်းရဲ့ နံပတ်တစ် ဂိုးသမားနေရာအတွက် အင်္ဂလန်ဂိုးသမား ရမ်စဒေးလ် ကို စိန်ခေါ်ဖို့ အဆင်သင့် ဖြစ်နေတယ်လို့ သတင်းမှာ ဖော်ပြထားပါတယ်။ 

ဒေးဗစ်ရာယာကို ခေါ်ယူဖို့ ဘိုင်ယန်မြူးနစ်အသင်းက စိတ်ဝင်စားခဲ့ပေမယ့် ကစားသမားက အာဆင်နယ်အသင်း ထံ လာဖို့ကို ရွေးချယ်ခဲ့တာပါ။ 

အာဆင်နယ်အသင်းနည်းပြ အာတီတာက အသင်းမှာရှိတဲ့ နေရာအားလုံးအတွက် ပြိုင်ဆိုင်မှုရှိဖို့ လိုအပ်တယ်လို့ မန်စီးတီးအသင်းကို အနိုင်ရခဲ့တဲ့ ကွန်မြူနတီဒိုင်း ပွဲစဉ်အပြီးမှာ ပြောခဲ့ပါတယ်။
အာတီတာက “ဒီနေရာမှာ ပြိုင်ဆိုင်မှုတွေက အမြဲတမ်း ရှိနေရာမှာပါ၊ ဘယ်သူ့နေရာပဲ ဖြစ်ဖြစ်ပါ။ ကျနော်တို့ အနေနဲ့ ဒီလိုမခံစားရဘူးဆိုရင် ကစားသမားတိုင်းရဲ့ အကောင်းဆုံးကို ရမှာမဟုတ်ပါဘူး။ ဒီလိုမျိုးခံစားနေရမှ အသင်းအနေနဲ့ ပိုပြီးတော့ ကောင်းမွန်လာမှာပါ”လို့ ပြောခဲ့တာပါ။

အသက် ၂၇ နှစ်အရွယ်ရှိ ဒေးဗစ်ရာယာဟာ ဘရန်ဖို့ဒ်အသင်းကို ၂၀၁၉ ခုနှစ်ကတည်းက ရောက်ရှိလာခဲ့တာဖြစ်ပြီး ပရီးမီးယားလိဂ် တန်းတက်နိုင်အောင် လက်စွမ်းပြသနိုင်ခဲ့တာ ဖြစ်ပါတယ်။ ဒေးဗစ်ရာယာဟာ စပိန်လက်ရွေးစင် အသင်းအတွက် ၂ ပွဲ ပါဝင်ကစားထားပါတယ်။

Source: Metro

CNI Sport News

၂၀၂၃ ခုနှစ်၊ သြဂုတ် ၈

ချယ်လ်ဆီးအသင်းရဲ့ ရှေ့တန်ကစားသမား အန်ကွန်ကူဟာ ဒူးဒဏ်ရာကြောင့် ရက်သတ္တပတ် အနည်းငယ် အနား ယူရမှာဖြစ်လို့ ရာသီအစ ပွဲစဉ်တွေကို ပါဝင်နိုင်ဖွယ် မရှိဘူးလို့ သိရပါတယ်။

အန်ကွန်ကူဟာ ချယ်လ်ဆီးအသင်းရဲ့ ရာသီကြို ခြေစမ်းပွဲ နောက်ဆုံးပွဲစဉ်ဖြစ်တဲ့ ဒေါ့မွန်အသင်းနဲ့ပွဲမှာ ရရှိခဲ့တဲ့ ဒဏ်ရာကြောင့် ပွဲချိန် ၂၂ မိနစ်မှာ လူစားလဲခံခဲ့ရတာပါ။ 

အခုအပြောင်းအရွှေ့ကမှ လိုက်ပ်ဇစ် အသင်းကနေ ပေါင် ၅၈ သန်းနဲ့ ရောက်ရှိလာခဲ့တဲ့ အန်ကွန်ကူဟာ ဘယ် ဘက် ဒူးဒဏ်ရာကြောင့် ရက်သတ္တပတ် အနည်းငယ်အကြာထိ အနားယူရတော့မှာ ဖြစ်ပါတယ်။

အဲ့ဒါကြောင့် အသက် ၂၅ နှစ်အရွယ်ရှိ ကစားသမားဟာ သြဂုတ် ၁၃ ရက်မှာ ကစားမယ့် လီဗာပူးလ်အသင်းနဲ့ ပရီးမီးယားလိဂ် အဖွင့်ပွဲစဉ်ကို သေချာပေါက် ပါဝင်နိုင်တော့မှာ မဟုတ်ပါဘူး။ 

အန်ကွန်ကူဟာ ရာသီကြို ခြေစမ်းပွဲတွေမှာ ချယ်လ်ဆီး အသင်းအတွက် ခြေစွမ်းပြသ နိုင်ခဲ့တာကြောင့် ကစား သမား အနားယူရမယ့် သတင်းဟာ နည်းပြ ပိုချက်တီနိုအတွက် ကြီးမားတဲ့ ထိုးနှက်ချက် ဖြစ်လာခဲ့ပါတယ်။

အန်ကွန်ကူကို တွေ့ရစဉ်

ချယ်လ်ဆီးအသင်းဟာ တိုက်စစ်ပိုင်းအတွက် ပဲလေ့စ်အသင်းက အိုလီဆီကို ချိတ်ဆက်နေသလို ပီအက်စ်ဂျီ အသင်းကနေ ထွက်ခွာချင်နေတဲ့ နေမာနဲ့လည်း သတင်းတွေ ထွက်ပေါ်နေခဲ့တာပါ။ 

လန်ဒန်ကလပ်ဟာ ပြီးခဲ့တဲ့ရာသီက ပရီးမီးယားလိဂ်ပြိုင်ပွဲမှာ အဆင့် ၁၂ နေရာနဲ့ ရာသီအဆုံးသတ်ခဲ့သလို ရဂိုး ကလည်း ၃၈ ဂိုးသာရခဲ့လို့ တိုက်စစ်ပိုင်း လိုအပ်ချက်တွေကို အားဖြည့်ပြီး ထိပ်ဆုံး ၄ သင်းထဲ ပြန်ဝင်ရောက်နိုင်ဖို့ နည်းပြ ပိုချက်တီနိုက ကြိုးစားနေတာ ဖြစ်ပါတယ်။

ချယ်လ်ဆီးအသင်းဟာ အခုအပြောင်းအရွှေ့မှာ တိုက်စစ်မှူး ဂျက်ဆန်ကို ဗီလာရီးရယ်လ် အသင်းကနေ ခေါ်ယူ ထားပေမယ့် အပြောင်းအရွှေ့ မပိတ်ခင်မှာ နောက်ထပ် တိုက်စစ်မှူးတစ်ဦးကို ခေါ်ယူနိုင်ဖို့ ဈေးကွက်ထဲမှာ ရှာဖွေ နေတာပါ။ 

ချယ်လ်ဆီးအသင်းဟာ တိုက်စစ်မှူး ရှာဖွေနေသလို အန်ကွန်ကူ အမြန်ဆုံး ပြန်လာနိုင်ဖို့လည်း မျှော်လင့်နေတယ် လို့ သတင်းမှာ ဖော်ပြထားပါတယ်။

Source: Goal 

CNI Sport News

၂၀၂၃ ခုနှစ်၊ သြဂုတ် ၈

ဟာရီကိန်းက ဘိုင်ယန်မြူးနစ် အသင်းအနေနဲ့ အခုရက်သတ္တပတ်အကုန်မှာ အပြောင်းအရွှေ့အတွက် သဘောတူညီမှု မရခဲ့ရင် စပါးအသင်းမှာပဲ ဆက်ရှိတော့မယ်လို့ အပြောင်းအရွှေ့ နောက်ဆုံးရက် သတ်မှတ်ပေး ခဲ့ပါတယ်။

စပါးအသင်းဟာ တိုက်စစ်မှူး ဟာရီကိန်းအတွက် ဘိုင်ယန်မြူးနစ်အသင်းရဲ့ ပေါင် ၈၆ သန်းနဲ့ နောက်ဆုံး ကမ်းလှမ်းမှု အပါအဝင် ကမ်းလှမ်းမှု အများအပြားကို ပယ်ချခဲ့တာပါ။ 

လန်ဒန်ကလပ်ဟာ လာမယ့်နှစ် နွေရာသီမှာ အလွတ်နဲ့ ထွက်ခွာခွင့်ပြုရမယ့် တိုက်စစ်မှူးအတွက် ပြောင်းရွှေ့ ကြေး ပေါင်သန်း ၁၀၀ လိုချင်နေတာ ဖြစ်ပါတယ်။

ဘိုင်ယန်မြူးနစ် အသင်းအနေနဲ့ စပါးအသင်း တောင်းဆိုတဲ့ မြင့်မားတဲ့ ပမာဏကို ပေးချေနိုင်ဖို့ မသေချာပေမယ့် နောက်ထပ် ကမ်းလှမ်းမှုအသစ် ပြုလုပ်ဖို့ ပြင်ဆင်နေတာပါ။

ဒါပေမယ့် အင်္ဂလန်အသင်း ခေါင်းဆောင်ကတော့ ပရီးမီးယားလိဂ် ရာသီသစ် စတင်ပြီးတာနဲ့ စပါးအသင်းကနေ ထွက်ခွာမှာ မဟုတ်ဘူးလို့ ဆုံးဖြတ်ခဲ့ကြောင်း The Telegraph က ဖော်ပြထားပါတယ်။ 

ဟာရီကိန်းကိုတွေ့ရစဉ်

စပါးအသင်းဟာ သြဂုတ် ၁၃ ရက်မှာ ပရီးမီးယားလိဂ် အဖွင့်ပွဲစဉ်အဖြစ် ဘရန်ဖို့ဒ်အသင်းနဲ့ ယှဉ်ပြိုင်မှာဖြစ်ပြီး ဘိုင်ယန်မြူးနစ်အသင်းကတော့ သြဂုတ် ၁၂ ရက်မှာ ဂျာမန်စူပါဖလားပွဲစဉ်အဖြစ် လိုက်ပ်ဇစ်အသင်းနဲ့ ယှဉ်ပြိုင် ရမှာပါ။

စပါးအသင်းဟာ တစ်ပတ်လုပ်ခပေါင် ၄ သိန်းနဲ့ ဟာရီကိန်းကို စာချုပ်သစ် ကမ်းလှမ်းထားပေမယ့် ကစားသမား ကတော့ စာချုပ်သစ်နဲ့ ပတ်သက်ပြီး ဘာအရိပ်အယောင်မှ ပြသထားခြင်း မရှိပါဘူး။ 

စပါးအသင်းဟာ လာမယ့် ရက်ပိုင်းအတွင်းမှာ အာဂျင်တီးနား ရှေ့တန်းကစားသမား အလီဂျိုနဲ့ ဝုလ်ဖ်ဘတ် ဗဟို နောက်ခံလူ ဗန်ဒီဗန်တို့ကို ခေါ်ယူနိုင်ကြောင်း ကြေညာဖို့ စီစဉ်ထားတယ်လို့ သတင်းမှာ ဖော်ပြထားပါတယ်။ 

ဘိုင်ယန်မြူးနစ်အသင်းဟာ ပြီးခဲ့တဲ့နှစ် နွေရာသီက ဘာစီလိုနာအသင်းထံ ပြောင်းရွှေ့သွားခဲ့တဲ့ တိုက်စစ်မှူး လီဝန်ဒေါစကီး နေရာမှာ အစားထိုးဖို့ ဟာရီကိန်းကို အဓိကပစ်မှတ်အဖြစ် သတ်မှတ်ထားတာပါ။

ဒါပေမယ့် အပြောင်းအရွှေ့ အဆင်မပြေခဲ့ရင် နောက်ထပ် တိုက်စစ် ကစားသမားတွေကို ရှာဖွေသွားမှာဖြစ်ပြီး ဂျူဗင်တပ်စ်တိုက်စစ်မှူး ဗလာဟိုဗစ်ကို စိတ်ဝင်စားနေတယ်လို့ သိရပါတယ်။

Source: Metro

CNI Sport News

၂၀၂၃ ခုနှစ်၊ ဩဂုတ် ၈

တိုက်စစ်မှူး နေမာဟာ အခု နွေရာသီအပြောင်းအရွှေ့မှာ ပီအက်စ်ဂျီအသင်းကနေ ထွက်ခွာချင်တယ်လို့ အသင်း အကြီးအကဲတွေကို ပြောခဲ့ကြောင်း သတင်းတွေမှာ ဖော်ပြထားပါတယ်။

ပီအက်စ်ဂျီအသင်းမှာ တစ်နှစ်လုပ်ခပေါင် ၂၅ သန်းနဲ့ ၂၀၂၇ ခုနှစ်အထိ စာချုပ်ရှိနေတဲ့ နေမာဟာ အသင်းဟောင်း ဘာစီလိုနာအသင်းထံ ပြန်သွားဖို့ ဆုံးဖြတ်ထားတာပါ။ အသက် ၃၁ နှစ်အရွယ်ရှိ နေမာဟာ နည်းပြသစ် အင်းနရစ် ရဲ့ ဒီရာသီ ပီအက်စ်ဂျီအသင်းမှာ အဓိက ကစားသမားအဖြစ် အသုံးပြုခံရဖွယ်မရှိတာကြောင့် အသင်းဘက်က လည်း သူ့ကို ရောင်းချဖို့ လမ်းဖွင့်ထားတာဖြစ်ပါတယ်။ 

ပီအက်စ်ဂျီအသင်းဥက္ကဋ္ဌ အယ်လ်ခီလိုင်ဖီဟာ နေမာ အသင်းကနေ ထွက်ခွာချင်နေတဲ့ ဆန္ဒကို သိရှိတယ်လို့ ပြင်သစ်သတင်းတွေမှာ ဖော်ပြထားပါတယ်။ ပီအက်စ်ဂျီအသင်းပရိသတ်တချို့ဟာ ပြီးခဲ့တဲ့မေလက နေမာရဲ့ ပဲရစ်အိမ်အပြင်ဘက်မှာ စုဝေးကာ ကစားသမားကို အသင်းကနေ ထွက်ခွာဖို့ ပြောခဲ့တာပါ။ နေမာဟာ ဒီလို အကြောင်းအရာတွေကြောင့် ပြင်သစ်ကလပ်မှာ မပျော်ရွှင်တော့ဘဲ အသင်းက ထွက်ခွာဖို့ ဆုံးဖြတ်ခဲ့တာ ဖြစ်ပါတယ်။ 
ပီအက်စ်ဂျီအသင်းဟာ နေမာရဲ့ တောင်းဆိုမှုအပြင် ဘတ်ပီရဲ့ အခြေအနေကိုလည်း ကိုင်တွယ်ဖြေရှင်းရဖို့ ရှိနေ တာပါ။ နေမာဟာ အသင်းဟောင်း ဘာစီလိုနာအသင်းထံ ပြန်ချင်နေပေမယ့် စပိန်ကလပ်ကတော့ ဘဏ္ဍာရေး အခြေအနေတွေကြောင့် သူ့ကို ခေါ်ယူနိုင်ဖွယ်မရှိပါဘူး။ ဘာစီလိုနာအသင်းနည်းပြ ဇာဗီကိုယ်တိုင်က အခု အပြောင်းအရွှေ့မှာ နေမာကို သူတို့ခေါ်ယူမှာမဟုတ်ဘူးလို့ အစောပိုင်းက ပြောထားတာပါ။ ဘရာဇီးလ် လက်ရွေးစင်ကစားသမားကို ခေါ်ယူဖို့ ချယ်လ်ဆီးအသင်းက စိတ်ဝင်စားနေပါတယ်။

၂၀၁၇ ခုနှစ်က ကမ္ဘာ့စံချိန်တင် ပြောင်းရွှေ့ကြေး ပေါင်သန်း ၂၀၀ နဲ့ ဘာစီလိုနာအသင်းကနေ ရောက်ရှိလာခဲ့တဲ့ နေမာဟာ ပီအက်စ်ဂျီအသင်းအတွက် ၁၇၃ ပွဲ ပါဝင်ကစားပြီး ၁၁၈ ဂိုးသွင်းယူကာ ပြင်သစ်လီဂူးဝမ်းဖလား ၅ ကြိမ် အပါအဝင် ပြည်တွင်းဖလားအများအပြားရယူနိုင်ခဲ့ပါတယ်။

Source:Skysports.com

CNI Sport News

၂၀၂၃ ခုနှစ်၊ ဩဂုတ် ၇

ဘတ်ပီဟာ ပီအက်စ်ဂျီအသင်းရဲ့ အသင်းကြီး ကစားသမားတွေနဲ့ လေ့ကျင့်မှု မပြုလုပ်ဘဲ ရောင်းချမယ့် ကစား သမား တွေနဲ့အတူ လေ့ကျင့်မှု ပြုလုပ်နေတာကြောင့် ပြင်သစ်လီဂူးဝမ်း အဖွင့်ပွဲစဉ်ကို ပါဝင်နိုင်ဖွယ် မရှိဘူးလို့ သတင်းတွေမှာ ဖော်ပြထားပါတယ်။

ပီအက်စ်ဂျီအသင်းဟာ တိုက်စစ်မှူး ဘတ်ပီကို အရောင်းစာရင်း တင်ထားပြီး ကလပ်အသင်းရဲ့ ရာသီကြို ခြေစမ်းပွဲ ခရီးစဉ် လူစာရင်းကနေ ချန်လှပ်ခဲ့တာပါ။

ဒါ့အပြင် ပြင်သစ်ကလပ်ဟာ ဘတ်ပီကို ပထမအသင်းနဲ့ လေ့ကျင့်မှုတွေပြုလုပ်ဖို့ ပိတ်ပင်ထားတာကြောင့် ဘတ်ပီ ဟာ အသင်းကြီး ကစားသမားတွေနဲ့ လေ့ကျင့်မှုတွေ ပြုလုပ်မှာ မဟုတ်ဘူးလို့ RMC Sport က ဖော်ပြခဲ့ပါတယ်။

အဲ့ဒါကြောင့်လည်း ဘတ်ပီဟာ ပီအက်စ်ဂျီအသင်းရဲ့ လီဂူးဝမ်း အဖွင့်ပွဲစဉ်ဖြစ်တဲ့ လောရီးယန့်ပွဲမှာ ပါဝင်နိုင်မှာ မဟုတ်ဘူးလို့ ပြင်သစ်သတင်းတွေက ဖော်ပြထားတာပါ။

ဘတ်ပီ လေ့ကျင့်ခန်းဆင်းနေစဉ်

လက်ရှိအချိန်မှာ ဘတ်ပီနဲ့ ပီအက်စ်ဂျီ အသင်းတို့ဟာ စာချုပ်ကိစ္စအတွက် အငြင်းပွားမှုတွေ ဖြစ်ပေါ်နေပြီး ကစားသမားဟာ လာမယ့်ပွဲတွေမှာလည်း အသင်းအတွက် ပါဝင်ပေးနိုင်ဖို့ မသေချာပါဘူး။

ပြင်သစ်အသင်း ခေါင်းဆောင်ဟာ စာချုပ်ကုန်ဆုံးတဲ့ အချိန်အထိ ပီအက်စ်ဂျီအသင်းမှာ ဆက်ရှိကာ လာမယ့် နွေရာသီမှာ အလွတ်ပြောင်းရွှေ့ကြေးနဲ့ ထွက်ခွာဖို့ ပြင်ဆင်နေတာ ဖြစ်ပါတယ်။

ပီအက်စ်ဂျီအသင်းဟာ ဘတ်ပီကို အလွတ်နဲ့ မဆုံးရှုံးချင်တာကြောင့် အခုအပြောင်းအရွှေ့မှာ ဒီအခြေအနေကို ဖြေရှင်းဖို့ စိတ်အားထက်သန်နေတာပါ။

ပီအက်စ်ဂျီအသင်းဟာ ဘတ်ပီကို ကမ္ဘာ့စံချိန်တင် ပြောင်းရွှေ့ကြေးနဲ့ အယ်လ်ဟီလယ်အသင်းရဲ့ ကမ်းလှမ်းမှုကို လက်ခံခဲ့ပေမယ့် ကစားသမားဘက်က ဆော်ဒီကလပ်ရဲ့ ကိုယ်စားလှယ်တွေနဲ့ တွေ့ဆုံဖို့ ငြင်းဆန်ခဲ့တာ ဖြစ်ပါ တယ်။

ဒါ့အပြင် ပြင်သစ်ကလပ်ဟာ ဘတ်ပီကို ပရီးမီးယားလိဂ် ကလပ်အသင်းတွေထံ အငှားချပြီး အငှားကြေးရယူဖို့ စဉ်းစားမှုတွေ ရှိလည်း ရှိနေတာပါ။

ပီအက်စ်ဂျီအသင်းရဲ့ စံချိန်တင် ဂိုးသွင်းရှင်ဖြစ်တဲ့ ဘတ်ပီဟာ စာချုပ်ကုန်ဆုံးချိန်မှာ စပိန်ကလပ် ရီးရယ်လ် အသင်းထံ ပြောင်းရွှေ့ချင်တဲ့ သူ့ရဲ့ ဆန္ဒကို ရှင်းရှင်းလင်းလင်း ပြောထားတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဩဂုတ် ၇

အင်တာမိုင်ယာမီအသင်းက ဒါးလက်စ်အသင်းကို အနိုင်ရပြီး လိဂ်ဖလားကွာတားဖိုင်နယ်ရောက်ရှိခဲ့တဲ့ ၁၆ သင်း အဆင့်ပွဲစဉ်မှာ မက်ဆီဟာ အသင်းအတွက်၂ ဂိုးသွင်းယူခဲ့ပါတယ်။

သြဂုတ် ၇ ရက်က ကစားခဲ့တဲ့ ဒီပွဲမှာ ဒါးလက်စ်နဲ့ အင်တာမိုင်ယာမီအသင်းတို့ဟာ ပွဲချိန်အတွင်း တစ်ဖက် ၄ ဂိုး စီသရေကျခဲ့တာကြောင့် ပင်နယ်တီအဆုံးအဖြတ်ခံယူခဲ့တာမှာ အင်တာမိုင်ယာမီအသင်းက ၅ ဂိုး- ၃ ဂိုးနဲ့ အနိုင်ရ ခဲ့တာပါ။ ဒီပွဲမှာ မက်ဆီဟာ အင်တာမိုင်ယာမီအသင်းအတွက် ဦးဆောင်ဂိုးသွင်းယူနိုင်ခဲ့သလို အသင်းအတွက် ချေပဂိုးဖြစ်စေမယ့် သွင်းဂိုးကို ပြစ်ဒဏ်ဘောကနေ တိုက်ရိုက်ကန်သွင်းခဲ့တာ ဖြစ်ပါတယ်။

မက်ဆီမရောက်ခင်က ၁၁ ပွဲဆက်နိုင်ပွဲပျောက်ဆုံးခဲ့တဲ့ အင်တာမိုင်ယာမီအသင်းဟာ အခုအချိန်မှာ ၄ ပွဲဆက် နိုင်ပွဲရယူနိုင်ခဲ့ပြီး အသင်းကလည်း လိဂ်ဖလားပြိုင်ပွဲမှာ ကွာတားဖိုင်နယ်ကို ရောက်ရှိသွားခဲ့တာပါ။ အသက် ၃၆ နှစ်အရွယ်ရှိ မက်ဆီဟာ အင်တာမိုင်ယာမီအသင်းအတွက် ၄ ပွဲပါဝင်ကစားအပြီးမှာ ၇ ဂိုးအထိသွင်းယူထားသလို ၁ ဂိုးဖန်တီးမှုပြုလုပ်ထားတာဖြစ်ပါတယ်။

အင်တာမိုင်ယာမီအသင်းနည်းပြ မာတီနိုက အသင်းဟာ လိုချင်တဲ့အဆင့်ကို ရောက်ရှိဖို့ အဝေးကြီး ကျန်ရှိ နေသေးပေမယ့် နိုင်ပွဲရယူနိုင်ခဲ့တဲ့အတွက် ကျေနပ်တယ်လို့ ပြောခဲ့ပါတယ်။

မာတီနိုက “ကျနော်တို့ဟာ ၄ ဂိုး-၂ ဂိုးနဲ့ အရေးနိမ့်နေခဲ့ပေမယ့် ပြန်လာနိုင်ခဲ့ပါတယ်။ ဒီရလဒ်အတွက်တော့ ကျနော်အလွန်ပျော်ရွှင်ပါတယ်။ ဒီလိုပွဲတွေက ကျနော်တို့ကို ဆက်ပြီးတိုးတက်အောင်လုပ်နိုင်ပြီး အမှားတွေကို ပြင်ဆင်နိုင်ဖို့အတွက်လည်း အကူအညီပေးပါတယ်။ ကျနော်တို့လိုချင်တဲ့အဆင့်ကို ရောက်ရှိဖို့ အဝေးကြီး ကျန်ရှိ သေးပေမယ့် နိုင်ပွဲရယူနိုင်ခဲ့လို့ ကျေနပ်ပါတယ်” လို့ ပြောခဲ့ပါတယ်။

အင်တာမိုင်ယာမီအသင်းဟာ လိဂ်ဖလားပြိုင်ပွဲကွာတားဖိုင်နယ်အဆင့်မှာ ဟူစတန်ဒိုင်နမိုနဲ့ ချားလော့အသင်းတို့ ပွဲစဉ်က အနိုင်ရတဲ့အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊  သြဂုတ် ၇

ဆော်ဒီပရိုလိဂ်ကလပ် အယ်လ်အီတီဟတ် အသင်းဟာ ဆာလတ်ကို ခေါ်ယူဖို့ ပေါင်သန်း ၆၀ နဲ့ လီဗာပူးလ်အသင်း ထံ ကမ်းလှမ်းမယ်လို့ ဆော်ဒီသတင်းတွေမှာ ဖော်ပြထားပါတယ်။

ပြီးခဲ့တဲ့ရာသီက ဆော်ဒီပရိုလိဂ်ပြိုင်ပွဲမှာ ချန်ပီယံဖြစ်ခဲ့တဲ့ အယ်လ်အီတီဟတ်အသင်းဟာ အခုအပြောင်းအရွှေ့မှာ ကန်တီ၊ ဘန်ဇီမာနဲ့ ဖာဘင်ဟိုတို့ကို ခေါ်ယူထားပြီး အသင်းလူစာရင်းကို အင်အားတောင့်တင်းအောင် ဖြည့်တင်း ထားတာပါ။ 

ဆော်ဒီရုပ်မြင်သံကြားတစ်ခုက အယ်လ်အီတီဟတ်အသင်းဟာ ဆာလတ်ရဲ့ ကိုယ်စားလှယ်တွေနဲ့ အပြောင်းအရွှေ့ အတွက် ဆွေးနွေးခဲ့တယ်လို့ ဖော်ပြခဲ့ပါတယ်။

ဆော်ဒီကလပ်ဟာ အီဂျစ်လက်ရွေးစင် တိုက်စစ်မှူးကို ၂ နှစ်စာချုပ် ပေါင် ၁၅၅ သန်းနဲ့ ကမ်းလှမ်းဖို့ ရှိနေပြီး လီဗာပူးလ် အသင်းကိုလည်း ဆာလတ်ရဲ့ အပြောင်းအရွှေ့အတွက် ပေါင်သန်း ၆၀ နဲ့ ကမ်းလှမ်းဖို့ ပြင်ဆင်နေ တယ်လို့ သိရပါတယ်။ 

ကစားသမားနဲ့ နီးစပ်သူတစ်ဦးက ဒါဟာ အမှန်ဖြစ်ပြီး ဆာလတ်နဲ့ အယ်လ်အီတီဟတ်တို့ဟာ ဆွေးနွေးညှိနှိုင်းမှု တွေ ပြုလုပ်နေတယ်လို့ ပြောခဲ့တာပါ။

လီဗာပူးလ်အသင်း တိုက်စစ်မှူး ဆာလတ်ကိုတွေ့ရစဉ်

အသက် ၃၁ နှစ်အရွယ်ရှိ ဆာလတ်ဟာ ပြီးခဲ့တဲ့နှစ် ဇူလိုင်လကမှ လီဗာပူးလ်အသင်းနဲ့ ၃ နှစ် စာချုပ် ချုပ်ဆိုခဲ့တာ ဖြစ်ပြီး အသင်းမှာ တစ်ပတ်လုပ်ခပေါင် ၃၅၀,၀၀၀ ဝန်းကျင် ရရှိနေတာ ဖြစ်ပါတယ်။ 

လီဗာပူးလ်အသင်းဟာ အခုအပြောင်းအရွှေ့မှာ ဟန်ဒါဆန်နဲ့ ဖာဘင်ဟိုတို့အပြင် အဓိက ကစားသမား အများ အပြားကို ဆုံးရှုံးထားလို့ ဆာလတ်ကို ထပ်ပြီး အဆုံးရှုံးခံနိုင်ဖွယ် မရှိဘူးလို့ သတင်းမှာ ဖော်ပြထားတာပါ။

၂၀၁၇ ခုနှစ်က ရိုးမားအသင်းကနေ ရောက်ရှိလာခဲ့တဲ့ ဆာလတ်ဟာ လီဗာပူးလ်အသင်းအတွက် ပွဲပေါင်း ၃၀၅ ပွဲ ပါဝင် ကစားထားပြီး ၁၈၆ ဂိုးသွင်းယူကာ ချန်ပီယံလိဂ်၊ ပရီးမီးယားလိဂ် အပါအဝင် ဆုဖလား အောင်မြင်မှု အများ အပြား ရယူထားနိုင်ခဲ့ပါတယ်။ 

ပြီးခဲ့တဲ့နှစ်က ဆုဖလားလက်မဲ့ ဖြစ်ခဲ့သလို ချန်ပီယံလိဂ် ဝင်ခွင့်နဲ့လည်း လွဲချော်ခဲ့တဲ့ လီဗာပူးလ်အသင်းဟာ ရာသီ သစ် ပရီးမီးယားလိဂ် အဖွင့်ပွဲစဉ်အဖြစ် ချယ်လ်ဆီးအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Metro