CNI Sport News

၂၀၂၄ ခုနှစ်၊ ဇန်နဝါရီ ၁၂

ဝါရင့်ကွင်းလယ်လူ မာတစ်ဟာ လေ့ကျင့်ရေး အစီအစဉ်တွေကို ခွင့်မပြုချက်မရှိဘဲ ပျက်ကွက်ခဲ့တာကြောင့် ပြင်သစ်ကလပ် ရီးနက်စ်အသင်းက ကစားသမားရဲ့ အပြုအမူကို ဝေဖန်တဲ့ ကြေညာချက်ကို ထုတ်ပြန်ခဲ့ပါတယ်။

ရီးနက်စ်အသင်းက”ကွင်းလယ်ကစားသမား မာတစ်ဟာ မကြာသေးခင်က ရီးနက်စ်အသင်းရဲ့ လေ့ကျင့်ခန်း အစီအစဉ်ကို ပူးပေါင်းဖို့ ပျက်ကွက်ခဲ့ပါတယ်။ ဒါဟာ ၂၀၂၅ ခုနှစ်အထိ စာချုပ်သက်တမ်းရှိနေတဲ့ အတွေ့အကြုံ ရင့် ကစားသမားတစ်ဦးဆီကနေ လုံးဝ နားမလည်နိုင်စရာ အပြုအမူပါပဲ။ အသင်းအနေနဲ့ ကစားသမားရဲ့ ရှင်းပြ ချက်ကို စောင့်ဆိုင်းနေတယ်”လို့ ထုတ်ပြန်ခဲ့တာပါ။

အသက် ၃၅ နှစ်အရွယ်ရှိ မာတစ်ဟာ ပြီးခဲ့တဲ့နှစ် သြဂုတ်လကမှ ရိုးမားအသင်းကနေ ရီးနက်စ်အသင်းထံ ပြောင်းရွှေ့လာခဲ့တာဖြစ်ပြီး ဒီရာသီမှာအသင်းအတွက် ၁၉ ပွဲပါဝင်ကစားထားတာ ဖြစ်ပါတယ်။ 

ပြင်သစ်မီဒီယာတွေကတော့ ချယ်လ်ဆီးနဲ့ ယူနိုက်တက်အသင်း ကစားသမားဟောင်း မာတစ်ဟာ ရီးနက်စ်အသင်း ကနေ ထွက်ခွာဖို့ကြိုးပမ်းနေတာဖြစ်ပြီး မြို့ကနေပါ ထွက်ခွာသွားခဲ့တာလို့ ဖော်ပြခဲ့ကြတာပါ။ 

မာတစ်ကို တွေ့ရစဉ်

ရီးနက်စ်အသင်းရဲ့ ကြေညာချက် ထွက်ပေါ်လာပြီး အနည်းငယ်အကြာမှာ မာတစ်က သူ့ရဲ့ကလေးတွေအတွက် သင့်တော်မယ့်ကျောင်းကို ရှာဖွေနေတာကြောင့် လေ့ကျင့်ရေး ပျက်ကွက်ခဲ့တာလို့ ရှင်းပြခဲ့ပါတယ်။

မာတစ်ဟာ မကြာခင်မှာ ရီးနက်စ်အသင်းနဲ့ ပြန်ပူးပေါင်းပြီး လေ့ကျင့်မှုတွေ ပြုလုပ်သွားမယ်လို့ သူ့ရဲ့ ဆိုရှယ် မီဒီယာမှာ ရေးသားထားပါတယ်။ 

မာတစ်ဟာ ရီးနက်စ်အသင်းအတွက် ကစားထားတဲ့ ၁၉ ပွဲမှာ ဂိုးသွင်းယူနိုင်ခဲ့ခြင်း မရှိပေမယ့် ၃ ဂိုး ဖန်တီး ထားတာပါ။ 

ရီးနက်စ်အသင်းဟာ ဒီရာသီ ပြင်သစ်လီဂူးဝမ်းပြိုင်ပွဲမှာ အဆင့် ၁၀ နေရာ ရပ်တည်နေပြီး ဇန်နဝါရီ ၁၃ ရက်မှာ လိဂ်ပွဲစဉ်အဖြစ် နိုက်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

ရီးနက်စ်အသင်းဟာ လီဂူးဝမ်းပြိုင်ပွဲမှာ ရလဒ်တွေ မကောင်းဖြစ်နေပေမယ့် ယူရိုပါလိဂ်ပြိုင်ပွဲမှာတော့ အေစီမီလန် အသင်းနဲ့ ပလေးအော့ဖ်အဆင့် ယှဉ်ပြိုင်ရမှာဖြစ်ပြီး ဒီပွဲတွေကို ဖေဖော်ဝါရီလထဲ ကျင်းပသွားမှာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဇန်နဝါရီ ၁၂

ဘာစီလိုနာအသင်းနည်းပြ ဇာဗီက စပိန်စူပါဖလားဗိုလ်လုပွဲမှာ ရင်ဆိုင်ရမယ့် ရီးရယ်လ်အသင်းကို အနိုင်ယူ သွားမယ်လို့ အိုဆာဆူနာအသင်းကို အနိုင်ရခဲ့တဲ့ ဆီမီးဖိုင်နယ်ပွဲစဉ်အပြီးမှာ ပြောလိုက်ပါတယ်။

ဇာဗီက “ကျနော်တို့ ပြီးခဲ့တဲ့နှစ်က ဗိုလ်လုပွဲမှာ ရီးရယ်လ်ကို ၃ ဂိုး-၁ ဂိုးနဲ့ အနိုင်ရရှိခဲ့ပါတယ်။ ဒီရာသီ လာလီဂါမှာ ကျနော်တို့ ရီးရယ်လ်ကို အရေးနိမ့်ခဲ့ပေမယ့် ပွဲချိန်အများစုကို အသာစီးနဲ့ ကစားနိုင်ခဲ့တယ်လို့ ထင်ပါတယ်။ ရီးရယ်လ်အသင်းဟာ မနှစ်ကထက်ပိုပြီးကောင်းပေမယ့် ကျနော်တို့ သူတို့ကို အသာစီးနဲ့ ကစားနိုင်ဖို့ ကြိုးစား သွားမှာဖြစ်ပြီး အနိုင်ယူမယ်လို့ထင်ပါတယ်။ ကျနော်တို့ဟာ ဗိုလ်လုပွဲအတွက် အဆင်သင့်ပါပဲ”လို့ ပြောခဲ့တာပါ။

ဘာစီလိုနာအသင်းဟာ စပိန်စူပါဖလားဆီမီးဖိုင်နယ်ပွဲစဉ်မှာ အိုဆာဆူနာအသင်းကို ၂ ဂိုး- ဂိုးမရှိနဲ့ အနိုင်ရခဲ့တာ ဖြစ်ပြီး ဂိုးတွေကို လီဝန်ဒေါစကီးနဲ့ ယာမဲလ်တို့က သွင်းယူခဲ့တာဖြစ်ပါတယ်။ ပြီးခဲ့တဲ့ စပိန်စူပါဖလား ဆီမီးဖိုင်နယ် ပွဲစဉ်တစ်ပွဲမှာ ရီးရယ်လ်အသင်းက အသလက်တီကိုအသင်းကို အချိန်ပိုမှာ ၅ ဂိုး- ၃ ဂိုးနဲ့အနိုင်ရခဲ့တာကြောင့် စပိန် စူပါဖလားဗိုလ်လုပွဲအဖြစ် ရီးရယ်လ်နဲ့ ဘာစီလိုနာအသင်းတို့ ယှဉ်ပြိုင်ရမှာပါ။ ဒီရာသီ လာလီဂါမှာ ဒီနှစ်သင်း တွေ့ဆုံခဲ့တုန်းကရီးရယ်လ်အသင်းက ၂ ဂိုး-၁ ဂိုးနဲ့ အနိုင်ရခဲ့တာဖြစ်ပါတယ်။

ဘာစီလိုနာအသင်းဟာ အိုဆာဆူနာအသင်းကို အနိုင်ရခဲ့တာကြောင့် ၂၀၂၄ ခုနှစ်ထဲမှာ ပြိုင်ပွဲစုံ ၃ ပွဲဆက် နိုင်ပွဲရယူနိုင်ခဲ့တာပါ။ ဘာစီလိုနာအသင်းကွင်းလယ်လူ ဒီဂျောင်က အသင်းဟာ နိုင်ပွဲဆက်နေပေမယ့် ဒီထက် ပိုပြီးတိုးတက်ဖို့ လိုအပ်တယ်လို့ ပြောခဲ့ပါတယ်။

ဒီဂျောင်က “ကျနော်တို့ ဒီထက်ပိုပြီးတိုးတက်ဖို့လိုပေမယ့် တိုးတက်အောင်လုပ်ဆောင်နေပါတယ်။ ကျနော်တို့ဟာ အခုပွဲအနည်းငယ်ကိုဆက်တိုက်နိုင်ပွဲရယူထားပေမယ့် အိုဆာဆူနာနဲ့ ဒုတိယပိုင်းမှာတော့ အတော်လေး ကောင်းမွန်ခဲ့ပါတယ်။ ရီးရယ်လ်နဲ့ပွဲဟာ ကစားသမားတိုင်းအတွက်ကောင်းမွန်တဲ့ပွဲပါ။ ကျနော်တို့ဟာ ဒီပွဲမှာ ကောင်းမွန်တဲ့ပုံစံ၊ ယုံကြည်မှုအပြည့်နဲ့ ယှဉ်ပြိုင်သွားမှာပါ” လို့ ပြောခဲ့တာပါ။

ရီးရယ်လ်နဲ့ ဘာစီလိုနာအသင်းတို့ရဲ့ စပိန်စူပါဖလားဗိုလ်လုပွဲကို ဇန်နဝါရီ ၁၄ ရက်မှာ ယှဉ်ပြိုင်သွားမှာ ဖြစ်ပါ တယ်။

Source:ESPN

CNI Sport News

၂၀၂၄ ခုနှစ်၊ ဇန်နဝါရီ ၁၂

ယူနိုက်တက်အသင်းကနေ အငှားနဲ့ ပြောင်းရွှေ့လာခဲ့တဲ့ ဆန်ချိုက ဒေါ့မွန်အသင်းထံ ပြန်ရောက်ရှိလာခဲ့တဲ့အတွက် ဝမ်းမြောက်မိပြီး အိမ်ကိုပြန်ရောက်သလို ခံစားရတယ်လို့ ပြောလိုက်ပါတယ်။

ဆန်ချိုက “ဒေါ့မွန်ကို ပြန်လာရတာ အလွန်ကောင်းမွန်ပြီး ကျနော့်အတွက် အိမ်လိုပါပဲ။ ဒါက ပရော်ဖက်ရှင်နယ် ဘောလုံးသမား တစ်ဦးအနေနဲ့ ကျနော့်ရဲ့ ကစားသမားဘဝကို စတင်ခဲ့တဲ့နေရာပါ။ ကျနော့်ရဲ့ အသင်းဖော်တွေက ကျနော်ဒီမှာ ပြန်စတင်နိုင်ဖို့အတွက် လွယ်ကူအောင် လုပ်ပေးမယ်လို့ ထင်ပါတယ်။ ကျနော့်ရဲ့ မျက်နှာပေါ်မှာ အပြုံးတွေနဲ့ ဘောလုံးကစားမှာဖြစ်ပြီး ဂိုးတွေသွင်းယူမယ်၊ ဖန်တီးမှုတွေပြုလုပ်ပြီး အသင်းကို ချန်ပီယံလိဂ်ဝင်ခွင့် ရအောင် ကူညီပေးသွားမယ်”လို့ ပြောခဲ့ပါတယ်။

ဆန်ချိုဟာ အသင်းဟောင်း ဒေါ့မွန်အသင်းထံ အခုရာသီအကုန်ထိ ၆ လ အငှားစာချုပ်နဲ့ ပြောင်းရွှေ့ခဲ့တာဖြစ်ပြီး အပြီးသတ် ဝယ်ယူခွင့် မပါဝင်တာကြောင့် အငှားစာချုပ် ကုန်ဆုံးချိန်မှာ ယူနိုက်တက်အသင်းထံ ပြန်လာရမှာ ဖြစ်ပါတယ်။ 

ဆန်ချိုဟာ ယူနိုက်တက်အသင်းမှာ နည်းပြ အဲရစ်တန်ဟတ်နဲ့ အဆင်မပြေဖြစ်ခဲ့သလို ကစားခဲ့တဲ့ ၈၂ ပွဲမှာ ၁၂ ဂိုး သွင်းပြီး ၆ ဂိုးဖန်တီးကာ ခြေစွမ်းပြသနိုင်ဖို့ ရုန်းကန်ခဲ့ရတာပါ။ အဲ့ဒါကြောင့်လည်း ဆန်ချိုဟာ အခုအပြောင်း အရွှေ့မှာ ယူနိုက်တက်အသင်းကနေ ထွက်ခွာပြီး အသင်းဟောင်း ဒေါ့မွန်အသင်းထံ အငှားနဲ့ ပြောင်းရွှေ့ဖို့ ဆုံးဖြတ်ခဲ့တာ ဖြစ်ပါတယ်။

 ဆန်ချိုကို ယူနိုက်တက်အသင်းမှာ တွေ့ရစဉ်

ဒေါ့မွန်အသင်းဟာ ဆန်ချိုအတွက် ယူနိုက်တက်အသင်းကို အငှားကြေး ပေါင် ၃ သန်း ပေးချေခဲ့ရတာဖြစ်ပြီး ကစားသမားရဲ့ ပွဲအရေအတွက်၊ ချန်ပီယံလိဂ် အောင်မြင်မှုနဲ့ ချန်ပီယံလိဂ်ဝင်ခွင့်အပေါ် မူတည်ပြီး နောက်ထပ် ပေါင် ၃.၄ သန်း ထပ်ပြီးပေးချေရမှာပါ။ 

ဒေါ့မွန်အသင်းမှာ ကျောနံပါတ် ၁၀ ဝတ်ဆင်မယ့် ဆန်ချိုဟာ အသင်းဖော်တွေနဲ့ ပူးပေါင်းပြီး လေ့ကျင့်ခန်း အစီအစဉ်တွေမှာ ပါဝင်နေပြီလည်း ဖြစ်ပါတယ်။ 

ဒေါ့မွန်အသင်းဟာ ဇန်နဝါရီ ၁၃ ရက်မှာ ဒမ်စတက်အသင်းနဲ့ ဘွန်ဒစ်လီဂါပွဲစဉ် ယှဉ်ပြိုင်ဖို့ ရှိနေပြီး ဒီပွဲမှာ ဆန်ချို ဟာ ဒေါ့မွန်အသင်းအတွက် ပါဝင်လာနိုင်ဖွယ်ရှိနေတာပါ။ 

ဒေ့ါမွန်အသင်းဟာ ဒီရာသီ ဘွန်ဒစ်လီဂါပွဲစဉ် ၁၆ ပွဲ ကစားအပြီးမှာ ရမှတ် ၂၇ မှတ်နဲ့ အဆင့် ၅ နေရာမှာ ရပ်တည် နေပြီး အဆင့် ၄ နေရာက လိုက်ပ်ဇစ်အသင်းနဲ့ ၆ မှတ်ကွာဟနေတာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ဇန်နဝါရီ ၁၀

ပီအက်စ်ဂျီအသင်းဥက္ကဋ္ဌ အယ်လ်ခီလိုင်ဖီက တိုက်စစ်မှူး ဘတ်ပီကို အသင်းမှာဆက်ရှိစေချင်ပြီး ပီအက်စ်ဂျီက သူ့အတွက်အကောင်းဆုံးကလပ်လို့ ပြောလိုက်ပါတယ်။

အယ်လ်ခီလိုင်ဖီက “ဘတ်ပီကို ဒီမှာဆက်ရှိစေချင်တာနဲ့ ပတ်သက်ပြီး ကျနော်ဖုံးကွယ်ထားမှာမဟုတ်ပါဘူး။ ဘတ်ပီဟာ ကမ္ဘာပေါ်မှာအကောင်းဆုံးကစားသမားဖြစ်ပြီး သူ့အတွက် အကောင်းဆုံးကလပ်က ပီအက်စ်ဂျီပါ။ ကျနော်နဲ့ ဘတ်ပီကြားမှာ လူကြီးလူကောင်းဆန်တဲ့ သဘောတူညီမှုရှိထားပြီး ငွေကြေးနဲ့ အသေးစိတ် အချက် အလက်တွေကို မှတ်ချက်ပေးမှာမဟုတ်ပါဘူး။ သူဟာ ပီအက်စ်ဂျီမှာ ပျော်ရွှင်နေပြီး သူ့ကို ကျနော်ယုံကြည်မှု ရှိတယ်” လို့ RMC Sport ကိုပြောခဲ့တာပါ။

ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့စာချုပ်ဟာ ဇွန်လအကုန်မှာ ကုန်ဆုံးတော့မှာဖြစ်လို့ သူဟာ အခု အပြောင်းအရွှေ့မှာ အခြားကလပ်အသင်းတွေနဲ့ ဆွေးနွေးမှုတွေပြုလုပ်လို့ရပြီဖြစ်ပါတယ်။ မကြာသေးခင်က ရီးရယ်လ်နဲ့ ဘတ်ပီတို့ဟာ အပြောင်းအရွှေ့အတွက် သဘောတူညီမှုရရှိထားတယ်ဆိုတဲ့ သတင်းတွေထွက်ပေါ် လာခဲ့တာကို ကစားသမားရဲ့အဖွဲ့အစည်းက ငြင်းဆန်ထားတာပါ။ ပီအက်စ်ဂျီအသင်းကတော့ ဘတ်ပီကို စာချုပ် သစ်ချုပ်ပြီး အသင်းမှာဆက်ထိန်းသိမ်းနိုင်အောင် ကြိုးစားနေတာဖြစ်ပါတယ်။

ဘတ်ပီဟာ ပီအက်စ်ဂျီအသင်းနဲ့စာချုပ်ကုန်ဆုံးဖို့နီးစပ်လာပေမယ့် အနာဂတ်နဲ့ ပတ်သက်ပြီး ဆုံးဖြတ်ရခြင်း မရှိဘူးလို့ ပြောထားတာပါ။ လက်ရှိအချိန်မှာ အသက် ၂၅ နှစ်အရွယ်ရှိ တိုက်စစ်မှူးကို ခေါ်ယူဖို့ ရီးရယ်လ်အပြင် လီဗာပူးလ်အသင်းကလည်း စိတ်ဝင်စားနေတာဖြစ်ပါတယ်။ ဘတ်ပီဟာ ဒီရာသီအစပိုင်းမှာ ပီအက်စ်ဂျီအသင်းနဲ့ တင်းမာမှုတွေရှိခဲ့ပေမယ့် အခုအချိန်မှာ အကောင်းဆုံးပုံစံ ပြသနေပြီး ၂၄ ပွဲကစားထားတာမှာ ၂၅ ဂိုးသွင်းယူ ထားတာပါ။

ပီအက်စ်ဂျီအသင်းဟာ ဒီရာသီ ပြင်သစ်လီဂူးဝမ်းပြိုင်ပွဲမှာ အဆင့် ၁ နေရာဦးဆောင်နေသလို ချန်ပီယံလိဂ်ပြိုင်ပွဲ မှာလည်း ၁၆ သင်းအဆင့်တက်ရောက်ထားပါတယ်။ ပီအက်စ်ဂျီအသင်းဟာ ဇန်နဝါရီ ၁၄ ရက်မှာ ပြင်သစ် လီဂူးဝမ်းပွဲစဉ်အဖြစ် လန်းစ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Besoccer

CNI Sport News

၂၀၂၄ ခုနှစ်၊ ဇန်နဝါရီ ၁၀ 

ယူနိုက်တက်အသင်းရဲ့ ပူးတွဲပိုင်ရှင်သစ် ဆာဂျင်ရက်ကလစ်ဖ်ဟာ အသင်းရဲ့ ရှယ်ယာ ၂၅ ရာခိုင်နှုန်းကို ဝယ်ယူပြီး နောက် ပထမဆုံးပွဲစဉ်အဖြစ် ယူနိုက်တက်နဲ့ စပါးအသင်းပွဲစဉ်ကို တက်ရောက်ကြည့်ရှုမယ်လို့ ဗြိတိန်မီဒီယာ တွေက ဖော်ပြထားပါတယ်။

ဗြိတိန်ဘီလျံနာ ဆာဂျင်ရက်ကလစ်ဖ်ရဲ့ INEOS ဟာ ယူနိုက်တက်အသင်းရဲ့ အစုရှယ်ယာ ၂၅ ရာခိုင်နှုန်းကို ပေါင် ၁.၃ ဘီလီယံနဲ့ ဝယ်ယူဖို့ သဘောတူညီမှု ရရှိခဲ့တာပါ။ 

INEOS ဟာ ဒီအစုရှယ်ယာကို ဝယ်ယူပြီးနောက်မှာ ယူနိုက်တက်အသင်းရဲ့ အားကစားဆိုင်ရာ ကိစ္စရပ်တွေကို တာဝန်ယူဖို့ လုပ်ဆောင်နေတာ ဖြစ်ပါတယ်။ 

ဆာဂျင်ရက်ကလစ်ဖ်ဟာ ပြီးခဲ့တဲ့ ရက်သတ္တပတ်က ယူနိုက်တက်အသင်းနည်းပြ အဲရစ်တန်ဟတ်နဲ့ နာရီပေါင်း များစွာကြာ ဆွေးနွေးမှုတွေ ပြုလုပ်ခဲ့တာ အပါအဝင် ကလပ်ရဲ့ အဆင့်တိုင်းမှာရှိတဲ့ ဝန်ထမ်းတွေနဲ့လည်း တွေ့ဆုံခဲ့တာပါ။

ဆာဂျင်ရက်ကလစ်ဖ်ဟာ ယူနိုက်တက်အသင်းရဲ့ အစုရှယ်ယာကို ဝယ်ယူပြီးနောက် အသင်းကစားခဲ့တဲ့ ဗီလာ၊ နော်တင်ဟမ်ဖောရက်စ်နဲ့ ဝီဂန်အသင်းတို့ရဲ့ပွဲတွေကို တက်ရောက်ကြည့်ရှုခြင်း မရှိခဲ့ပါဘူး။ 

ဆာဂျင်ရက်ကလစ်ဖ်နဲ့ အဲရစ်တန်ဟတ်ကို တွေ့ရစဉ်

INEOS ရဲ့ အားကစားဒါရိုက်တာ ဆာဒေ့ဗ်ကတော့ ဒီ ၃ ပွဲစလုံးကို ကြည့်ရှုခဲ့ပြီး အမှုဆောင်ချုပ် ဘလန့်စ်ကိုလည်း ဗီလာနဲ့ ဝီဂန်အသင်းတို့ရဲ့ ပွဲတွေမှာ တွေ့ခဲ့ရပါတယ်။ 

ယူနိုက်တက်အသင်းရဲ့ အမာခံပရိသတ်ဖြစ်တဲ့ ဆာဂျင်ရက်ကလစ်ဖ်ကို ဒီပွဲတွေမှာ မတွေ့ရပေမယ့် စပါးအသင်းနဲ အိုးထရက်ဖို့ဒ်မှာ ကစားမယ့် ပွဲစဉ်မှာ ပထမဆုံးအကြိမ် မြင်တွေ့ရမယ်လို့ Daily Mail က ဖော်ပြထားတာပါ။

ယူနိုက်တက်အသင်းရဲ့ ပိုင်ရှင်တွေထဲက တစ်ဦးဖြစ်တဲ့ အေဗရန်ဂလေဇာဟာ ပြီးခဲ့တဲ့နှစ်က နယူးကာဆယ် အသင်းကို အနိုင်ရခဲ့တဲ့ ကာရာဘောင်းလိဂ်ဖလား ဗိုလ်လုပွဲစဉ်ကို တက်ရောက်ကြည့်ရှု ပြီးနောက်ပိုင်း အသင်းရဲ့ ပွဲတွေနဲ့ဝေးကွာနေတာ ဖြစ်ပါတယ်။ 

ဂျိုရယ်လ်ဂလေဇာကိုလည်း လွန်ခဲ့တဲ့ ၅ နှစ်က ဘာစီလိုနာအသင်းနဲ့ ချန်ပီယံလိဂ်ပွဲစဉ် နောက်ပိုင်း အိုးထရက်ဖို့ဒ် မှာ မြင်တွေ့ရခြင်း မရှိတော့တာပါ။ 

ဆာဂျင်ရက်ကလစ်ဖ်ကတော့ စပါးအသင်းနဲ့ ပွဲစဉ်ကစတင်ပြီး ယူနိုက်တက်အသင်းရဲ့ ပွဲစဉ်တွေကို မကြာခဏ တက်ရောက် ကြည့်ရှုနိုင်ဖို့ ပြင်ဆင်ထားပြီး ဆာဒေ့ဗ်နဲ့ ဘလန့်စ်တို့ကတော့ အမြဲတမ်းကြည့်ရှုနေမှာ ဖြစ်ပါတယ်။ 

INEOS ရဲ့ ပေါင် ၁.၃ ဘီလီယံ အရောင်းအဝယ်ကို ဂလေဇာမိသားစုဘက်က မီးစိမ်းပြထားပေမယ့် ပရီးမီးယားလိဂ် ရဲ့ အတည်ပြုချက်ကို ရရှိဖို့ စောင့်ဆိုင်းနေရဆဲ ဖြစ်တယ်လို့ သတင်းမှာ ဖော်ပြထားပါတယ်။

Source: Metro

CNI Sport News

၂၀၂၄ ခုနှစ်၊ ဇန်နဝါရီ ၁၀

စပါးအသင်းဟာ လိုက်ပ်ဇစ်အသင်း တိုက်စစ်မှူး တီမိုဝါနာကို အခုရာသီအကုန်ထိ အငှားစာချုပ်နဲ့ ခေါ်ယူလိုက်ပြီ လို့ ကြေညာလိုက်ပါတယ်။

စပါးအသင်းဟာ တီမိုဝါနာရဲ့ အငှားစာချုပ် ကုန်ဆုံးချိန်မှာ ပေါင် ၁၄.၅ သန်းနဲ့ အပြီးသတ် ဝယ်ယူခွင့်လည်း ရှိနေ ပါတယ်။

လန်ဒန်ကလပ်ဟာ အသင်းခေါင်းဆောင် ဆွန်ဟောင်မင်ကို အာရှဖလားပြိုင်ပွဲအတွက် တောင်ကိုရီးယားအသင်း ထံ စေလွှတ်ထားရသလို မက်ဒီဆင်ကလည်း ဒဏ်ရာကြောင့် အနားယူနေရတဲ့အတွက် တိုက်စစ်ပိုင်းကို အားဖြည့်ဖို့ တီမိုဝါနာကို ခေါ်ယူခဲ့တာ ဖြစ်ပါတယ်။

စပါးအသင်းဟာ တီမိုဝါနာအတွက် ရာသီအကုန်ထိ လုပ်ခလစာပေါင် ၄.၅ သန်းကို ပေးချေဖို့ လိုက်ပ်ဇစ်အသင်းနဲ့ သဘောတူညီထားပါတယ်။

တီမိုဝါနာဟာ ချယ်လ်ဆီးအသင်းမှာ ကစားခဲ့တာကြောင့် ပရီးမီးယားလိဂ်ပြိုင်ပွဲမှာ အတွေ့အကြုံရှိတဲ့သူဖြစ်ပြီး ချယ်လ်ဆီးအသင်းနဲ့အတူ ချန်ပီယံလိဂ်၊ ဥရောပစူပါဖလားနဲ့ ကလပ်ကမ္ဘာ့ဖလားတို့ကို ရယူနိုင်ခဲ့ပါတယ်။ 

တီမိုဝါနာကို တွေ့ရစဉ်

ဒါပေမယ့် တီမိုဝါနာဟာ ၂၀၂၂ ခုနှစ်မှာ အသင်းဟောင်း လိုက်ပ်ဇစ်အသင်းထံ ပြန်ပြောင်းရွှေ့ခဲ့ပြီး ဒီရာသီမှာ ပွဲကစားခွင့်ရဖို့ ခက်ခဲနေတာကြောင့် စပါးအသင်းထံ အငှားနဲ့ ထွက်ခွာခဲ့တာပါ။ 

တီမိုဝါနာဟာ ယူရို ၂၀၂၄ ပြိုင်ပွဲဝင်မယ့် ဂျာမနီအသင်းမှာ ပါဝင်ကစားချင်တာကြောင့် ပုံမှန်ကစားခွင့်ရဖို့ လိုအပ်နေတာ ဖြစ်ပါတယ်။

တီမိုဝါနာက “ကျနော် စပါးအသင်းနည်းပြနဲ့ စကားပြောခဲ့ပြီး ဒါဟာ အလွန်ကောင်းမွန်တဲ့ စကားပြောမှု ဖြစ်ခဲ့ပါ တယ်။ စပါးအသင်းရဲ့ ကစားတဲ့ပုံစံဟာ ကျနော်နဲ့ ပြီးပြည့်စုံတယ်လို့ ထင်ပါတယ်။ ကျနော် စပါးအသင်းမှာ အကောင်းဆုံး ကစားသမားဖြစ်လာနိုင်ဖို့ မျှော်လင့်ပါတယ်။ ကျနော့်ရဲ့ ရည်ရွယ်ချက်ကတော့ ဒီလိဂ်မှာ အနိုင်ရဖို့နဲ့ ဆုဖလားတွေအတွက် တိုက်ပွဲဝင်ဖို့ပါ”လို့ ပြောခဲ့ပါတယ်။

တီမိုဝါနာဟာ ဒီတစ်ပတ်ကစားမယ့် ယူနိုက်တက်နဲ့ စပါးအသင်းတို့ရဲ့ ပရီးမီးယားလိဂ်ပွဲစဉ်မှာ စပါးအသင်း ကစားသမားဘဝ ပွဲဦးထွက်အဖြစ် ပါဝင်ဖို့ ရှိနေပါတယ်။ 

စပါးအသင်းဟာ ပရီးမီးယားလိဂ်အဆင့် ၅ နေရာမှာ ရပ်တည်နေပြီး အဆင့် ၁ နေရာက လီဗာပူးလ်အသင်းနဲ့ ၆ မှတ်ကွာဟနေတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇန်နဝါရီ ၁၀

ချယ်လ်ဆီးအသင်းနည်းပြ ပိုချက်တီနိုက ကာရာဘောင်းလိဂ်ဖလားဆီမီးဖိုင်နယ် ပထမအကျော့ပွဲစဉ်မှာ မယ်ဒယ်ဘရော့အသင်းကို အရေးနိမ့်ခဲ့ပေမယ့် ဒုတိယအကျော့ကစားဖို့ ရှိသေးတာကြောင့် ဗိုလ်လုပွဲတက်ဖို့ အခွင့်အရေးရှိတယ်လို့ ပြောလိုက်ပါတယ်။

ပိုချက်တီနိုက “ပထမပိုင်းမှာပြုလုပ်ခဲ့တဲ့ အမှားအယွင်းတွေကြောင့် ကျနော်တို့ အပြစ်ပေးခံခဲ့ရတာပါ။ ကျနော်တို့ ဂိုးရနိုင်မယ့်အခွင့်အရေးအများအပြားရှိခဲ့ပေမယ့် ဂိုးမသွင်းနိုင်ခဲ့ပါဘူး။ ဒီရလဒ်ကို ကျနော်စိတ်ပျက်မိပါတယ်။ ကျနော်တို့ စတမ်းဖိုဒ့်ဘရစ်ချ်မှာ နောက်ထပ်မိနစ် ၉၀ ကစားဖို့ရှိပါသေးတယ်။ ကျနော်တို့ အပြုသဘောဆောင်ဖို့ လိုပြီး ဒုတိယအကျော့ပွဲကို အနိုင်ရကာ ဗိုလ်လုပွဲကို တက်ဖို့ အခွင့်အရေးရှိတယ်” လို့ Sky Sports ကို ပြောခဲ့တာ ပါ။

ကာရာဘောင်းဖလားဆီမီးဖိုင်နယ်ပထမအကျော့ ပွဲစဉ်အဖြစ်ကစားခဲ့တဲ့ မယ်ဒယ်ဘရော့နဲ့ ချယ်လ်ဆီးအသင်း တို့ပွဲမှာ မယ်ဒယ်ဘရော့အသင်းက ၁ ဂိုး-ဂိုးမရှိနဲ့ အနိုင်ရရှိခဲ့တာဖြစ်ပါတယ်။ ချယ်လ်ဆီးအသင်းဟာ ဒီပွဲမှာ မယ်ဒယ်ဘရော့အသင်းကို ဘောလုံးပိုင်ဆိုင်မှု ၇၂ ရာခိုင်နှုန်းအထိရှိခဲ့ပြီး ဂိုးပေါက်ကန်သွင်းမှု ၁၈ ကြိမ်နဲ့ ဂိုးပေါက် တည့်မှု ၅ ကြိမ်ရှိခဲ့ပေမယ့် ဂိုးမသွင်းယူနိုင်ခဲ့တာပါ။ မယ်ဒယ်ဘရော့အသင်းကတော့ ဂိုးပေါက်ကန်သွင်းမှု ၆ ကြိမ် နဲ့ ဂိုးပေါက်တည့်မှု ၂ ကြိမ်သာရှိခဲ့ပေမယ့် ဂိုးရယူနိုင်ခဲ့တာဖြစ်ပါတယ်။

ဒီပွဲမှာ အဝေးကွင်းကို လိုက်ပါအားပေးခဲ့တဲ့ ချယ်လ်ဆီးအသင်းပရိသတ်တွေဟာ အသင်းရဲ့ရှုံးနိမ့်မှုကြောင့် ပွဲအပြီးမှာဒေါသတကြီးတုန့်ပြန်ခဲ့တာပါ။ ပိုချက်တီနိုကတော့ စွမ်းဆောင်ရည်နဲ့ အကဲဖြတ်ပြီး တစ်ပွဲလုံးကို ခြုံကြည့်မယ်ဆိုရင် ချယ်လ်ဆီးအသင်းဟာ ပိုကောင်းတဲ့အသင်းဖြစ်ခဲ့တယ်လို့ ပြောခဲ့ပါတယ်။ မယ်ဒယ်ဘရော့ အသင်းနည်းပြ မိုက်ကယ်ကာရစ်က သူတို့ဟာ ဒုတိယအကျော့ပွဲအတွက် အဆင်သင့်ဖြစ်နေပြီလို့ ပြောခဲ့တာပါ။

မိုက်ကယ်ကာရစ်က “ဒုတိယအကျော့က လုံးဝကွဲပြားမှာဖြစ်ပြီး ဒါက စိန်ခေါ်မှုအသစ်ပါ။ ဒီအတွက်လည်း ကျနော်တို့အဆင်သင့်ဖြစ်နေပြီး ဒီပွဲကိုစောင့်မျှော်ကာ စိန်ခေါ်မှုတွေကို လက်ခံသွားမှာပါ” လို့ ပြောခဲ့ပါတယ်။

ချယ်လ်ဆီးနဲ့ မယ်ဒယ်ဘရော့အသင်းတို့ရဲ့ ဆီမီးဖိုင်နယ်ဒုတိယအကျော့ပွဲစဉ်ကို ဇန်နဝါရီ ၂၃ ရက်မှာ ယှဉ်ပြိုင်သွားမှာဖြစ်ပါတယ်။

Source:DailyMail

CNI Sport News

၂၀၂၄ ခုနှစ်၊ ဇန်နဝါရီ ၉

အာဆင်နယ်အသင်းဟာ အဲဗာတန်အသင်းကွင်းလယ်လူ အိုနာနာကို အခုအပြောင်းအရွှေ့မှာ ခေါ်ယူဖို့ ဆွေးနွေး မှုတွေ စတင်ပြုလုပ်နေတယ်လို့ ဘယ်လ်ဂျီယံသတင်းတွေမှာ ဖော်ပြထားပါတယ်။

စပိန်လူမျိုးနည်းပြ အာတီတာဟာ အခုအပြောင်းအရွှေ့ မကုန်ခင်မှာ အာဆင်နယ်အသင်းရဲ့ ကွင်းလယ်ပိုင်းကို အားဖြည့်နိုင်ဖို့ လုပ်ဆောင်နေပြီး အက်စတွန်ဗီလာအသင်း ကွင်းလယ်လူ ဒေါက်ကလပ်စ်လူးဝစ်ဇ်ကို အဓိက ပစ်မှတ်အဖြစ် သတ်မှတ်ခဲ့တာပါ။

ဒါပေမယ့် အက်စတွန်ဗီလာအသင်းဟာ စာချုပ်သက်တမ်း ၂ နှစ် ကျန်ရှိနေပြီး ပုံစံကောင်းတွေ ပြသနေတဲ့ ဒေါက်ကလပ်စ်လူးဝစ်ဇ်အတွက် မြင့်မားတဲ့ပြောင်းရွှေ့ကြေး တောင်းဆိုဖို့ရှိနေတာ ဖြစ်ပါတယ်။ 

အဲ့ဒါကြောင့် အာဆင်နယ်အသင်းဟာ အဲဗာတန်အသင်းကွင်းလယ်လူ အိုနာနာကို ခေါ်ယူဖို့ ကြိုးစားလာခဲ့တာပါ။

အာဆင်နယ်အသင်းဟာ ဘယ်လ်ဂျီယံကစားသမားရဲ့ အပြောင်းအရွှေ့အတွက် အဲဗာတန်အသင်းနဲ့ ဆွေးနွေးမှု ပြုလုပ်နေပြီး အိုနာနာကလည်း လန်ဒန်ကလပ်ထံ ပြောင်းရွှေ့ချင်နေတာ ဖြစ်ပါတယ်။ 

အဲ့ဒါကြောင့် အာဆင်နယ်နဲ့ အဲဗာတန်အသင်းတို့ဟာ အပြောင်းအရွှေ့ အမြန်ဆုံးဖြစ်ဖို့ သဘောတူညီမှု ရရှိနိုင် တာပါ။ 

အိုနာနာကို တွေ့ရစဉ်

အဲဗာတန်အသင်းဟာ အိုနာနာအတွက် ပြောင်းရွှေ့ကြေးပေါင်သန်း ၅၀ သတ်မှတ်ထားပြီး ယူနိုက်တက်အသင်း ကလည်း ပြီးခဲ့တဲ့နွေရာသီ အပြောင်းအရွှေ့က သူ့ကိုခေါ်ယူဖို့ စိတ်ဝင်စားခဲ့တာ ဖြစ်ပါတယ်။

အိုနာနာဟာ ၂၀၂၂ ခုနှစ်၊ သြဂုတ်လက လိုင်လီအသင်းကနေ ပေါင် ၃၃ သန်းနဲ့ အဲဗာတန်အသင်းထံ ပြောင်းရွှေ့ လာခဲ့တာ ဖြစ်ပြီး ပွဲပေါင်း ၅၃ ပွဲပါဝင်ကစားထားကာ ၃ ဂိုးသွင်းယူထားတာပါ။

အာဆင်နယ်အသင်းဟာ နောက်ဆုံး ကစားခဲ့တဲ့ လီဗာပူးလ်အသင်းနဲ့ FA ဖလားပွဲစဉ်မှာ အရေးနိမ့်ပြီးနောက် တိုက်စစ်မှူးခေါ်ယူဖို့ ဖိအားပေးခြင်းခံနေရတာ ဖြစ်ပါတယ်။ 

ဒါပေမယ့် အာဆင်နယ်အသင်းဟာ အခုအပြောင်းအရွှေ့မှာ တိုက်စစ်မှူးခေါ်ယူဖို့ လက်တွေ့မကျဘူးလို့ နည်းပြ အာတီတာက ပြောထားတာပါ။

အာဆင်နယ်အသင်းဟာ ဒီတစ်ပတ် ပရီးမီးယားလိဂ်ပွဲကစားဖို့ မရှိဘဲ ဒူဘိုင်းကို သွားရောက်ပြီး စခန်းသွင်း လေ့ကျင့်မှု ပြုလုပ်နေတဲ့အချိန်မှာ အဲဗာတန်အသင်း ကွင်းလယ်လူ အိုနာနာရဲ့ အပြောင်းအရွှေ့ကို အပြီးသတ် လုပ်ဆောင်ဖို့ ရှိနေတာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ ဇန်နဝါရီ ၉

ပေါ်တူဂီလူမျိုးနည်းပြမော်ရင်ဟိုဟာ အခုရာသီအကုန်မှာ ကုန်ဆုံးတော့မယ့် ရိုးမားအသင်းနည်းပြအနာဂတ်ကို စဉ်းစားမှုတွေပြုလုပ်နေတယ်လို့ Foot Mercato က ဖော်ပြထားပါတယ်။

အသက် ၆၀ နှစ်အရွယ်ရှိ မော်ရင်ဟိုနဲ့ ရိုးမားအသင်းတို့ချုပ်ဆိုထားတဲ့ စာချုပ်ဟာ နောက်ဆုံးနှစ်ထဲကို ရောက်ရှိ နေပြီး ဇွန်လမှာ ကုန်ဆုံးတော့မှာပါ။ လက်ရှိအချိန်မှာ မော်ရင်ဟိုနဲ့ ရိုးမားအသင်းတာဝန်ရှိသူတွေဟာ စာချုပ်သစ် အတွက် ဆွေးနွေးညှိနှိုင်းမှုတွေပြုလုပ်ရခြင်းမရှိသေးတာကြောင့် ပေါ်တူဂီလူမျိုးနည်းပြဟာ အီတလီကလပ်ကနေ ထွက်ခွာသွားနိုင်တာဖြစ်ပါတယ်။ မော်ရင်ဟိုဟာ သူ့ကိုခေါ်ယူဖို့ ဆော်ဒီကလပ်တွေနဲ့ အခြားအသင်းတွေက စိတ်ဝင်စားနေတာကြောင့် အနာဂတ်ကို စဉ်းစားမှုတွေပြုလုပ်နေတာပါ။

မော်ရင်ဟိုဟာ ပြီးခဲ့တဲ့လက သတင်းထောက်တွေနဲ့တွေ့ဆုံချိန် ရိုးမားအသင်းမှာဆက်ပြီးရှိချင်တယ်လို့ ပြောထား ပေမယ့် သူ့ရဲ့စိတ်ပြောင်းလဲသွားပုံရပြီး စာချုပ်သက်တမ်းကုန်ဆုံးချိန်မှာ အီတလီကနေ ထွက်ခွာဖွယ်ရှိနေတာပါ။ ရိုးမားအသင်းဟာ မော်ရင်ဟိုထွက်ခွာသွားချိန်မှာ အစားထိုးဖို့အတွက် မွန်ဇာအသင်းနည်းပြ ပယ်လာဒီနို၊ အတ္တလန္တာအသင်းနည်းပြ ဂတ်စပါရီနီ၊ မာဆေးလ်အသင်းနည်းပြဟောင်း တူဒါနဲ့ စပါးအသင်းနည်းပြဟောင်း ကွန်တီတို့ကို ပစ်မှတ်ထားနေပါတယ်။

မော်ရင်ဟိုဟာ ရိုးမားအသင်းနောက်ဆုံးကစားခဲ့တဲ့ အတ္တလန္တာအသင်းနဲ့ ၁ ဂိုးစီသရေကျတဲ့ပွဲစဉ်မှာ ကွင်းလယ်ဒိုင် လူကြီးကို ဝေဖန်မှုတွေပြုလုပ်ခဲ့တာကြောင့် ၂ ဝါ ၁ နီနဲ့ထုတ်ပယ်ခံခဲ့ရတာပါ။ ရိုးမားအသင်းဟာ နောက်ဆုံး ကစားခဲ့တဲ့ စီးရီးအေပွဲစဉ် ၅ ပွဲမှာ ၁ ပွဲသာအနိုင်ရပြီး ရလဒ်တွေအနည်းငယ်ပြန်ဆိုးကာ အဆင့် ၈ နေရာကို ရောက်ရှိသွားခဲ့တာဖြစ်ပါတယ်။ ရိုးမားအသင်းဟာ ဒီရာသီမှာ ကိုပါအီတာလီယာဖလား ကွာတားဖိုင်နယ်အဆင့်ကို ရောက်ရှိနေသလို ယူရိုပါလိဂ်ပြိုင်ပွဲမှာလည်း နောက်တစ်ဆင့်တက်ဖို့ ပလေးအောဖ့်ပွဲစဉ် ယှဉ်ပြိုင်ရဖို့ ရှိနေတာပါ။

ရိုးမားအသင်းဟာ ဒီတစ်ပတ်စီးရီးအေပွဲစဉ်အဖြစ် ဇန်နဝါရီ ၁၄ ရက်မှာ အေစီမီလန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:DailyMail