CNI Sport News

၂၀၂၃ ခုနှစ်၊ သြဂုတ် ၂၆

ချယ်လ်ဆီးအသင်း တိုက်စစ်မှူး ဂျက်ဆန်ဟာ ပရီးမီးယားလိဂ်ရဲ့ အကောင်းဆုံး တိုက်စစ်မှူးတွေထဲက တစ်ဦး ဖြစ်လာနိုင်တယ်လို့ နည်းပြ ပိုချက်တီနိုက ပြောလိုက်ပါတယ်။

ပိုချက်တီနိုက “ဂျက်ဆန်ဟာ ငယ်ရွယ်တဲ့ ကစားသမားဖြစ်ပြီး မတူညီတဲ့ လိဂ်ကနေလာတာပါ။ ပရီးမီးယားလိဂ် ဟာ လိုက်လျောညီထွေဖြစ်အောင် လုပ်ဖို့အတွက် အမြဲတမ်း ခက်ခဲပါတယ်။ သူဟာ ဘောလုံးနဲ့အတူ ပြေးပြီး အသင်းဖော်တွေနဲ့ ချိတ်ဆက်မှုတွေ ပြုလုပ်တာမှာ ကောင်းမွန်ပါတယ်။ သူဟာ အချိန်ကြာတာနဲ့ အမျှ ပရီးမီးယားလိဂ်ရဲ့ အကောင်းဆုံး တိုက်စစ်မှူးတွေထဲက တစ်ဦးဖြစ်လာနိုင်ပါတယ်”လို့ Sky Sports ကို ပြောခဲ့ တာပါ။

ဂျက်ဆန်ဟာ အခုနွေရာသီ အပြောင်းအရွှေ့မှာ ဗီလာရီးရယ်လ် အသင်းကနေ ပေါင် ၃၂ သန်းနဲ့ ချယ်လ်ဆီး အသင်းထံ ပြောင်းရွှေ့လာခဲ့တာ ဖြစ်ပါတယ်။ 

ဂျက်ဆန်ဟာ ချယ်လ်ဆီးအသင်းရဲ့ ပရီးမီးယားလိဂ် ပွဲဦးထွက် ၂ ပွဲမှာ ခြေစွမ်းပြသ နိုင်ခဲ့ပေမယ့် ဂိုးပေါက် ပျောက်ဆုံး နေခဲ့တာပါ။ 

ပိုချက်တီနိုကိုတွေ့ရစဉ်

ဒါပေမယ့် လူတန်အသင်းကို ၃ ဂိုး- ဂိုးမရှိနဲ့ ဂိုးပြတ်အနိုင်ရခဲ့တဲ့ ပရီးမီးယားလိဂ် ပွဲမှာတော့ ဂျက်ဆန်ဟာ ချယ်လ်ဆီး အသင်းကစားသမားဘဝ ပထမဆုံးသွင်းဂိုးကို ရရှိသွားခဲ့ပါတယ်။

ဆီနီဂေါလက်ရွေးစင် အသင်းတိုက်စစ်မှူး ဂျက်ဆန်ကတော့ စတမ်းဖို့ဒ်ဘရစ်ချ်မှာ ဂိုးသွင်းယူနိုင်ခဲ့တာက အလွန် ကောင်းမွန်တဲ့ ခံစားချက်ဖြစ်တယ်လို့ ပြောခဲ့တာပါ။

ဂျက်ဆန်က “စတမ်းဖို့ဒ်ဘရစ်ချ် အိမ်ကွင်းမှာရှိတဲ့ ချယ်လ်ဆီးအသင်း ပရိသတ်တွေရဲ့ ရှေ့မှာ ဂိုးသွင်းယူနိုင်ခဲ့တာ က အလွန်ကောင်းမွန်တဲ့ ခံစားချက်ဖြစ်ပြီး ပျော်ရွှင်စရာလည်း ကောင်းပါတယ်။ နောက်ထပ် သွင်းဂိုးတွေ ထပ်ပြီး သွင်းယူကာ အသင်းကို အကူအညီပေးနိုင်ဖို့ မျှော်လင့်ထားပါတယ်”လို့ ပြောခဲ့ပါတယ်။

ချယ်လ်ဆီးအသင်းဟာ ရာသီသစ် ပရီးမီးယားလိဂ်ပြိုင်ပွဲ ၃ ပွဲ ကစားပြီးအချိန်မှာ ၁ ပွဲနိုင်၊ ၁ ပွဲသရေ၊ ၁ ပွဲရှုံးဆိုတဲ့ ရလဒ်ရရှိထားတာပါ။ 

လန်ဒန်ကလပ်ဟာ ကြားရက်ထဲမှာ ကာရာဘောင်းဖလား ဒုတိယအဆင့်အဖြစ် ဝင်ဘယ်လ်ဒန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ သြဂုတ် ၂၇

တောင်ပံကစားသမား ဗီနီစီးယက်စ်ဟာ ဆဲလ်တာဗီဂိုအသင်းနဲ့ စပိန်လာလီဂါပွဲစဉ်မှာ ရရှိခဲ့တဲ့ ခြေထောက်ကြွက် သား ပြဿနာကြောင့် လာမယ့် ဂီတာဖေးအသင်းနဲ့ အိမ်ကွင်းပွဲစဉ်ကို လွဲချော်မယ်လို့ နည်းပြ အန်ဆယ်လော့တီ က ပြောခဲ့ပါတယ်။

အန်ဆယ်လော့တီက “ဗီနီစီးယက်စ်ဟာ သူ့ခြေထောက်ရဲ့ ကြွက်သားတွေ နာကျင်နေသလို ခံစားနေရပါတယ်။ ဒါက အရမ်းကြီး စိုးရိမ်ရမယ့် အရာတော့ မဟုတ်ပါဘူး။ သူဟာ ဒီပွဲမှာ ဆက်ပြီးကစားဖို့ ကြိုးစားနေခဲ့ပေမယ့် သူ့ကိုယ်သူ စိတ်ပျက်စေခဲ့တာကြောင့် ကျနော်တို့က လူစားလဲဖို့ လုပ်ဆောင်ခဲ့ရတာ”လို့ သတင်းထောက်တွေကို ပြောခဲ့တာပါ။

ဗီနီစီးယက်စ်ဟာ ရီးရယ်လ်အသင်းက ဆယ်လ်တာဗီဂို အသင်းကို ၁ ဂိုး- ဂိုးရှိနဲ့ အနိုင်ရခဲ့တဲ့ပွဲစဉ်ရဲ့ ပွဲချိန် ၁၅ မိနစ် မှာ လူစားလဲခံခဲ့ရတာ ဖြစ်ပါတယ်။ ဗီနီစီးယက်စ်ဟာ ဒဏ်ရာကြောင့် ဂီတာဖေးအသင်းနဲ့ လာလီဂါပွဲစဉ်အပြင် ဘရာဇီးလ်အသင်းရဲ့ ၂၀၂၆ ကမ္ဘာ့ဖလား ခြေစစ်ပွဲတွေဖြစ်တဲ့ ပီရူး၊ ဘိုလီဗီးယားအသင်းတို့နဲ့ ပွဲစဉ်တွေကိုလည်း လွဲချော်နိုင်ဖွယ် ရှိနေတာပါ။ 

အန်ဆယ်လော့တီကို တွေ့ရစဉ်

ရီးရယ်လ်အသင်းဟာ ရာသီအစပိုင်းမှာတင် ဂိုးသမား ကော့တွိုက်စ်နဲ့ နောက်ခံလူ မီလီတာအိုတို့ကို ဒဏ်ရာ ကြောင့် ကာလကြာရှည် ဆုံးရှုံးခဲ့ရတာ ဖြစ်ပါတယ်။

ရီးရယ်လ်အသင်းနည်းပြ အန်ဆယ်လော့တီကတော့ ဒဏ်ရာရ ကစားသမားတွေ ရှိနေပေမယ့် အသင်းလူ စာရင်း အင်အားက တောင့်တင်းပြီးသားဖြစ်တဲ့အတွက် နောက်ထပ် ကစားသမားသစ်တွေ ခေါ်ယူသွားမှာ မဟုတ်ဘူးလို့ ပြောခဲ့ပါတယ်။

အန်ဆယ်လော့တီက “ဒါက ပြီးပြည့်စုံတဲ့ လူစာရင်းပါ။ ကျနော်တို့ဟာ ကောင်းမွန်စွာ စုစည်းထားတာကြောင့် ဗီနီစီးယက်စ်၊ ကော့တွိုက်စ်၊ မီလီတာအိုတို့ မပါဘဲ အနိုင်ယူနိုင်စွမ်း ရှိပါတယ်။ သူတို့တွေဟာ ကောင်းမွန်စွာ လုပ်နိုင်တဲ့သူတွေပါ”လို့ ပြောခဲ့တာပါ။

ရီးရယ်လ်အသင်းဟာ ရာသီသစ်လာလီဂါ အဖွင့်ပွဲစဉ် ၃ ပွဲစလုံး အနိုင်ရထားပြီး စပိန်လာလီဂါ အမှတ်ပေးဇယားကို ဦးဆောင်နေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ သြဂုတ် ၂၆

အယ်လ်နာဆာအသင်းဟာ ရော်နယ်ဒိုရဲ့ ဟတ်ထရစ်ဂိုး အပါအဝင် အယ်လ်ဖာတက်ချ်အသင်းကို အဝေးကွင်းမှာ ၅ ဂိုး- ဂိုးမရှိနဲ့ ဂိုးပြတ်အနိုင်ရပြီး ရာသီသစ် ဆော်ဒီပရိုလိဂ်ပြိုင်ပွဲမှာ ပထမဆုံးနိုင်ပွဲ ရရှိသွားခဲ့ပါတယ်။

အယ်လ်နာဆာအသင်းအတွက် နောက်ထပ် သွင်းဂိုး ၂ ဂိုးကို မာနေးက သွင်းယူခဲ့ပြီး ရော်နယ်ဒိုဟာ ဟတ်ထရစ်ဂိုး အပြင် မာနေးရဲ့ သွင်းဂိုးကိုပါ ဖန်တီးပေးသွားခဲ့ပါတယ်။

အယ်လ်နာဆာအသင်းဟာ ရာသီသစ် ဆော်ဒီပရိုလိဂ် အဖွင့်ပွဲစဉ် ၂ ပွဲစလုံးမှာ အရေးနိမ့် ထားခဲ့တာကြောင့် ဒီပွဲမှာ အနိုင်ရဖို့ လိုအပ်ခဲ့လို့ အဓိက ကစားသမား အစုံအလင်နဲ့ ပွဲထွက်ခဲ့ပြီး ဂိုးပြတ် နိုင်ပွဲရရှိသွားခဲ့တာ ဖြစ်ပါတယ်။

ရော်နယ်ဒိုဟာ ဒီပွဲမှာ သွင်းယူခဲ့တဲ့ ဟတ်ထရစ်ကြောင့် ကစားသမားဘဝမှာ ဟတ်ထရစ် ရယူနိုင်ခဲ့တဲ့ အရေ အတွက် ၆၃ ကြိမ်အထိ ရှိလာခဲ့သလို လိဂ်ပြိုင်ပွဲမှာ ၂၁ ရာသီဆက်တိုက် ဂိုးသွင်းနိုင်တဲ့ မှတ်တမ်းကောင်းကိုလည်း ဆက်ပြီး ထိန်းသိမ်းနိုင်ခဲ့တာပါ။ 

ရော်နယ်ဒိုနဲ့ မာနေးကို တွေ့ရစဉ်

အယ်လ်နာဆာအသင်းဟာ ဒီပွဲမတိုင်ခင် ကြားရက်က ကစားခဲ့တဲ့ အာရှချန်ပီယံလိဂ် ပြိုင်ပွဲမှာလည်း နိုင်ပွဲရယူခဲ့ ပြီး အုပ်စုအဆင့် ယှဉ်ပြိုင်ခွင့် ရရှိခဲ့တာ ဖြစ်ပါတယ်။

ရော်နယ်ဒိုရဲ့ ဦးဆောင်မှုနဲ့အတူ အယ်လ်နာဆာအသင်းဟာ ဆော်ဒီပရိုလိဂ် ပြိုင်ပွဲ မစတင်ခင်က အာရပ်ကလပ် ချန်ပီယံများဖလားပြိုင်ပွဲမှာ ချန်ပီယံဆု ရယူထားနိုင်ခဲ့တာပါ။ 

ရော်နယ်ဒိုဟာ ပြီးခဲ့တဲ့ရာသီက အယ်လ်နာဆာအသင်းနဲ့ ဆုဖလားအောင်မြင်မှု မရယူနိုင်ခဲ့တာကြောင့် အခုရာသီ သစ်မှာတော့ ရယူနိုင်တဲ့ ဆုဖလားအားလုံးကို ရယူသွားဖို့ ပစ်မှတ်ထားနေတာ ဖြစ်ပါတယ်။ 

အခုဆိုရင် ရော်နယ်ဒိုဟာ အခုရာသီသစ်မှာ အယ်လ်နာဆာအသင်းအတွက် ၉ ပွဲ ပါဝင်ကစားထားပြီး ၉ ဂိုး သွင်းယူထားပါတယ်။

အယ်လ်နာဆာအသင်းဟာ သြဂုတ် ၂၉ ရက်မှာ ဆော်ဒီပရိုလိဂ်ပွဲစဉ်အဖြစ် အယ်လ်ရှာဘတ်အသင်းနဲ့ အိမ်ကွင်းမှာ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

 ၂၀၂၃ ခုနှစ်၊ သြဂုတ် ၂၆

ဟာမိုဆိုနဲ့ စပိန်အမျိုးသမီးအသင်း ကစားသမားတွေဟာ ရူဘီယာလက်စ်ကို စပိန်ဘောလုံးအဖွဲ့ချုပ် အကြီးအကဲ ရာထူးကနေ မထုတ်ပယ်မချင်း နိုင်ငံအတွက် ကိုယ်စားပြုပြီး ကစားပေးတော့မှာ မဟုတ်ဘူးလို့ ပြောလိုက်ပါ တယ်။

ရူဘီယာလက်စ်ဟာ စပိန်အသင်းက အင်္ဂလန်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ အမျိုးသမီးကမ္ဘာ့ဖလားပြိုင်ပွဲ ဗိုလ်လုပွဲအပြီးမှာ ကွင်းလယ်လူ ဟာမိုဆိုရဲ့ နှုတ်ခမ်းကို ခွင့်ပြုချက်မရှိဘဲ နမ်းခဲ့တဲ့အတွက် ပြင်းပြင်းထန်ထန် ဝေဖန်မှုတွေ ခံခဲ့ရတာပါ။

ဒါပေမယ့် ရူဘီယာလက်စ်က သူဟာ စပိန်ဘောလုံးအဖွဲ့ချုပ်ဥက္ကဋ္ဌ ရာထူးကနေ နုတ်ထွက်သွားမှာ မဟုတ်ဘူးလို့ ပြောသွားခဲ့တာ ဖြစ်ပါတယ်။

ရူဘီယာလက်စ်ဟာ စပိန်ဘောလုံးအဖွဲ့ချုပ်ဥက္ကဋ္ဌ ရာထူးကနေ နုတ်ထွက်မယ်လို့ အားလုံးက မျှော်လင့်ခဲ့ကြပေ မယ့် သူကတော့ ငြင်းဆန်သွားခဲ့ပါတယ်။

ရူဘီယာလက်စ်က ဗိုလ်လုပွဲအပြီးမှာ ဖြစ်ပျက်ခဲ့တဲ့အရာက သဘောတူညီမှုနဲ့ နမ်းခဲ့တာသာ ဖြစ်တယ်လို့ ပြောခဲ့ပါ တယ်။ ဟာမိုဆိုကတော့ သူမဟာ ဒီလိုမျိုးနမ်းဖို့ကို ဘယ်တုန်းကမှ သဘောတူညီခဲ့ခြင်း မရှိဘူးလို့ ပြန်လည် တုံ့ပြန်ခဲ့တာပါ။

ရူဘီယာလက်စ်ကိုတွေ့ရစဉ်

ဟာမိုဆိုနဲ့ ကမ္ဘာ့ဖလား ချန်ပီယံဆုရယူခဲ့တဲ့ အသင်းဖော်တွေ အပါအဝင် ကစားသမား ၅၆ ဦးဟာ ရူဘီယာလက်စ် ကို ထုတ်ပယ်ဖို့တောင်းဆိုတဲ့ ပူးတွဲကြေညာချက်ကို လက်မှတ်ရေးထိုးခဲ့ပါတယ်။

ရူဘီယာလက်စ်ကိုသာ မထုတ်ပယ်ဘူးဆိုရင် သူတို့ဟာ နိုင်ငံအသင်းအတွက် ပြန်ကစားပေးတော့မှာ မဟုတ်ဘူး လို့ အခိုင်အမာ ပြောခဲ့ကြတာပါ။

ဖီဖာကတော့ ရူဘီယာလက်စ်ကို စည်းကမ်းပိုင်းဆိုင်ရာ အရေးယူမှုတွေ ပြုလုပ်ဖို့ လုပ်ဆောင်နေသလို စပိန်အစိုးရ ကလည်း ဆိုင်းငံ့ဖို့အတွက် တရားစွဲဆိုမှုတွေ ပြုလုပ်ဖို့ စတင်နေပြီလို့ သတင်းတွေမှာ ဖော်ပြထားပါတယ်။

စပိန်ဂိုးသမားဟောင်းတွေဖြစ်တဲ့ ကာဆီးလက်စ်နဲ့ ဒီဂီယာတို့ဟာ ရာထူးက နုတ်ထွက်ဖို့ ငြင်းဆန်ခဲ့တဲ့ စပိန်ဘောလုံးအဖွဲ့ချုပ် အကြီးအကဲကို ပြစ်တင်ဝေဖန်ခဲ့ကြတာပါ။

စပိန်အမျိုးသား လက်ရွေးစင် ကစားသမား ဘော်ဂျာကလည်း ရူဘီယာလက်စ်ရဲ့ ကိစ္စမပြေလည်မချင်း နိုင်ငံအသင်းအတွက် ကစားဖို့ ငြင်းဆန်သွားလိမ့်မယ်လို့ ပြောထားပါတယ်။

Source: Metro

CNI Sport News

၂၀၂၃ ခုနှစ်၊ သြဂုတ် ၂၅

အာဂျင်တီးနား လက်ရွေးစင် တောင်ပံကစားသမား ဒီမာရီယာက ဆော်ဒီကလပ်တွေရဲ့ ရူးသွပ်စရာကောင်းတဲ့ လုပ်အားခတွေနဲ့ ကမ်းလှမ်းမှု ရခဲ့ပေမယ့် ဘင်ဖီကာအသင်းထံ ပြန်သွားဖို့ကိုသာ ရွေးချယ်ခဲ့တယ်လို့ ပြောခဲ့ပါ တယ်။

ဒီမာရီယာက “ဆော်ဒီကလပ်တွေရဲ့ ကမ်းလှမ်းမှု အများအပြား ကျနော်ရရှိခဲ့ပါတယ်။ သူတို့ကမ်းလှမ်းတဲ့ လုပ်ခ လစာ ပမာဏတွေက ရူးသွပ်လောက်စရာ ကောင်းပေမယ့် ကျနော့်နှလုံးသားက ရွေးချယ်တဲ့ ဘင်ဖီကာအသင်းထံ ပြန်လာခဲ့ပါတယ်”လို့ D Sports Radio ကို ပြောခဲ့ပါတယ်။

ဒီမာရီယာဟာ ပြီးခဲ့တဲ့ ရာသီအကုန်မှာ ဂျူဗင်တပ်စ်အသင်းနဲ့ စာချုပ်သက်တမ်း ကုန်ဆုံးပြီးနောက် ဆော်ဒီကလပ် အသင်းတွေ အပါအဝင် မေဂျာလိဂ်ကလပ်တွေရဲ့ ကမ်းလှမ်းမှုကို ရရှိခဲ့ပါတယ်။ 

ဒါပေမယ့် ဒီမာရီယာဟာ ၂၀၀၇ ကနေ ၂၀၁၀ အထိ ကစားခဲ့တဲ့ အသင်းဟောင်း ဘင်ဖီကာအသင်းထံ ပြန်ဖို့ ဆုံးဖြတ်ခဲ့ပါတယ်။

ဒီမာရီယာကို တွေ့ရစဉ်

ဆော်ဒီကလပ်တွေဟာ နွေရာသီ အပြောင်းအရွှေ့မှာ နာမည်ကျော် ကစားသမား အများအပြားကို မက်လောက် စရာ လုပ်ခလစာတွေပေးပြီး နိုင်ငံအတွင်း ခေါ်ယူနေတာ ဖြစ်ပါတယ်။

အသက် ၃၅ နှစ်အရွယ်ရှိ ကစားသမားဟာ ဥရောပ ကစားသမားဘဝအစကို ဘင်ဖီကာအသင်းကနေ စတင်ခဲ့ပြီး ရီးရယ်လ်၊ ယူနိုက်တက်၊ ပီအက်စ်ဂျီနဲ့ ဂျူဗင်တပ်စ် အသင်းတွေမှာ ကစားခဲ့တာပါ။ 

ဒီမာရီယာဟာ အခုရာသီမှာ ဘင်ဖီကာအသင်းအတွက် ၃ ပွဲ ပါဝင်ကစားထားပြီး၂ ဂိုးသွင်းယူကာ အသင်းနဲ့အတူ ပေါ်တူဂီစူပါဖလား ရယူထားတာ ဖြစ်ပါတယ်။

ဒီမာရီယာဟာ အာဂျင်တီးနား လက်ရွေးစင် အသင်းနဲ့အတူ ၂၀၂၂ ကမ္ဘာ့ဖလား၊ ၂၀၂၁ ကိုပါအမေရိကဖလား ရယူ နိုင်ခဲ့ပြီး ကစားသမားဘဝမှာ ဆုဖလားအောင်မြင်မှု အများအပြား ရယူထားနိုင်ခဲ့ပါတယ်။

Source: Daily Mail

  CNI Sport News

၂၀၂၃ ခုနှစ်၊ သြဂုတ် ၂၆

ယူနိုက်တက်အသင်း ဘယ်နောက်ခံလူ လုပ်ခ်ရှောဟာ ကြွက်သားဒဏ်ရာကြောင့် ကာလကြာရှည် အနားယူရဖွယ် ရှိနေတယ်လို့ ဗြိတိန်မီဒီယာတွေက ဖော်ပြထားပါတယ်။

ယူနိုက်တက်အသင်းဟာ လုပ်ခ်ရှော အနားယူရမယ့် ကာလကို အကဲဖြတ်နေပေမယ့် ရက်သတ္တပတ် ပေါင်းများစွာ အနားယူရမယ်လို့ ထုတ်ပြန်ထားပါတယ်။

လုပ်ခ်ရှောဟာ နည်းပြ အဲရစ်တန်ဟတ်လက်ထက်မှာ အဓိက ကစားသမားအဖြစ် ခြေစွမ်းပြသနေပြီး မနှစ်က ရာသီက ပွဲပေါင်း ၄၇ ပွဲ ပါဝင်ကစားခဲ့သလို အခုရာသီ ပရီးမီးယားလိဂ် ၂ ပွဲစလုံး ပွဲထွက် ကစားသမားအဖြစ် ပါဝင်ခဲ့တာ ဖြစ်ပါတယ်။

ယူနိုက်တက်အသင်းရဲ့ ဘယ်နောက်ခံလူ တစ်ဦးဖြစ်တဲ့ မာလာစီယာကလည်း ဒဏ်ရာကြောင့် အနားယူနေရတဲ့ အတွက် လာမယ့် ပရီးမီးယားလိဂ် ပွဲစဉ်တွေမှာ ညာနောက်ခံလူ ဒါလော့ကို ဘယ်နောက်ခံ နေရာမှာထားပြီး အသုံးပြုဖွယ် ရှိနေပါတယ်။

 လုပ်ခ်ရှောကို တွေ့ရစဉ် 

လုပ်ခ်ရှောဟာ ဒဏ်ရာကြောင့် ယူနိုက်တက်အသင်းရဲ့ လာမယ့် ပရီးမီးယားလိဂ်ပွဲစဉ် ၂ ပွဲဖြစ်တဲ့ နော်တင်ဟမ် ဖောရက်စ်၊ အာဆင်နယ် အသင်းတို့နဲ့ ပွဲတွေမှာ ပါဝင်နိုင်တော့မှာ မဟုတ်ပါဘူး။

ဒါ့အပြင် လုပ်ခ်ရှောဟာ ယူကရိန်းနဲ့ ယူရို ၂၀၂၄ ခြေစစ်ပွဲ၊ စကော့တလန်နဲ့ ခြေစမ်းပွဲကစားမယ့် အင်္ဂလန်အသင်းရဲ့ ပွဲစဉ်တွေကိုလည်း လွဲချော်သွားပြီ ဖြစ်ပါတယ်။ 

ယူနိုက်တက်အသင်းဟာ လုပ်ခ်ရှောမတိုင်ခင် ကွင်းလယ်ကစားသမား မေဆန်မောင့်နဲ့ တိုက်စစ်မှူးသစ် ဟော့ဂျ်လန်း တို့ကိုလည်း ဒဏ်ရာကြောင့် ဆုံးရှုံးထားရပါတယ်။ 

မေဆန်မောင့်ဟာ စပါးအသင်းနဲ့ပွဲစဉ်မှာ ရရှိခဲ့တဲ့ အသေးစား ဒဏ်ရာကြောင့် ၆ ပတ်ကြာအထိ အနားယူရဖွယ် ရှိတယ်လို့ သတင်းတွေမှာ ဖော်ပြထားပါတယ်။

အတ္တလန်တ္တာ အသင်းကနေ ရောက်ရှိလာတဲ့ တိုက်စစ်မှူး ဟော့ဂျ်လန်းဟာ ယူနိုက်တက်အတွက် တစ်ပွဲမှ ပါဝင် ကစားရခြင်း မရှိသေးဘဲ ဒဏ်ရာကြောင့် အနားယူနေရပြီး နိုင်ငံတကာ ပွဲစဉ်မတိုင်ခင် ပါဝင်ကစားပေးနိုင်ဖို့ မျှော်လင့်နေပါတယ်။ 

ယူနိုက်တက်အသင်းဟာ နွေရာသီ အပြောင်းအရွှေ့ မပိတ်ခင်မှာ ကွင်းလယ် ကစားသမားနဲ့ တိုက်စစ်မှူးတစ်ဦး ခေါ်ယူနိုင်ဖို့ လုပ်ဆောင်နေပါတယ်။

Source: Goal

CNI Sport News

၂၀၂၃ ခုနှစ်၊ ဩဂုတ် ၂၅

လီဗာပူးလ်အသင်းဟာ ဆော်ဒီပရိုလိဂ်ကလပ်တွေရဲ့ ချိတ်ဆက်မှုတွေခံနေရတဲ့ တိုက်စစ်မှူး ဆာလတ်ကို ရောင်းချသွားဖို့ အစီအစဉ်မရှိဘူးလို့ အခိုင်အမာပြောလိုက်ပါတယ်။

ဆော်ဒီပရိုလိဂ်လက်ရှိချန်ပီယံ အယ်လ်အစ်တီဟတ်အသင်းဟာ ဆာလတ်ကို ခေါ်ယူဖို့ စိတ်ဝင်စားနေတယ်လို့ သတင်းတွေဆက်တိုက်ဆိုသလို ထွက်ပေါ်နေတာပါ။ လီဗာပူးလ်အသင်းကတော့ ဆာလတ်ကို ပြီးခဲ့တဲ့နှစ်ကမှ ၃ နှစ်စာချုပ်သစ်ချုပ်ဆိုထားသလို နွေရာသီအပြောင်းအရွှေ့ကလည်း စက်တင်ဘာ ၁ ရက်ကျရင် ပိတ်မှာဖြစ်လို့ ရောင်းချသွားဖို့ အစီအစဉ်မရှိတာဖြစ်ပါတယ်။

ဆာလတ်ရဲ့ အေးဂျင့်က ဆော်ဒီအပြောင်းအရွှေ့နဲ့ ပတ်သက်တဲ့သတင်းတွေကို အရင်ကတည်းက ငြင်းဆန်ခဲ့ တာပါ။ ဆာလတ်အနေနဲ့ လီဗာပူးလ်အသင်းကနေ ထွက်ခွာဖို့ စဉ်းစားခဲ့မယ်ဆိုရင် ပြီးခဲ့တဲ့နှစ်က အသင်းနဲ့ စာချုပ်သက်တမ်းတိုးဖို့ မဟုတ်ဘူးလို့ အေးဂျင့်ဖြစ်သူ ရာမီက သူ့ရဲ့ ဆိုရှယ်မီဒီယာမှာ သြဂုတ် ၇ ရက်က ရေးသား ခဲ့တာဖြစ်ပါတယ်။ ဒါပေမယ့် အယ်လ်အစ်တီဟတ်အသင်းရဲ့ ကမ်းလှမ်းမှုအသစ်ကို ဆာလတ်ရဲ့အေးဂျင့်တွေက တုံ့ပြန်ခြင်းမရှိသေးပါဘူး။

စပါးအသင်းနည်းပြဟောင်း နူနိုဆန်တိုကိုင်တွယ်နေတဲ့ အယ်လ်အစ်တီဟတ်အသင်းဟာ အခုနွေရာသီ အပြောင်း အရွှေ့မှာ ဘောလွန်းဒီအောဆုရှင် ဘန်ဇီမာ၊ကန်တီ၊ ဖာဘင်ဟိုနဲ့ ဂျိုတာတို့ကို ခေါ်ယူထားတာဖြစ်ပါတယ်။ အယ်လ်အစ်တီဟတ်အသင်းဟာ ဆော်ဒီလိဂ်မှာ ချန်ပီယံဆုကို ဆက်လက်ထိန်းသိမ်းဖို့နဲ့ အာရှ ချန်ပီယံလိဂ် ပြိုင်ပွဲယှဉ်ပြိုင်ဖို့ ရှိနေတာကြောင့် ဆာလတ်ကို ခေါ်ယူနိုင်ဖို့ ကြိုးစားလာခဲ့တာပါ။

လီဗာပူးလ်အသင်းဟာ အခုနွေရာသီအပြောင်းအရွှေ့မှာ အဓိက ကစားသမားအများအပြားကို လက်လွှတ် ခဲ့ရပြီးနောက် ဆာလတ်ကိုပါ ထပ်ပြီးအဆုံးရှုံးမခံနိုင်တော့တာကြောင့် ကမ်းလှမ်းမှုတွေကို ပယ်ချသွားဖို့ စီစဉ်ထားတာဖြစ်ပါတယ်။ ဆာလတ်ဟာ အခုနှစ်ပရီးမီးယားလိဂ်အဖွင့်ပွဲစဉ် ၂ ပွဲစလုံး လီဗာပူးလ်အသင်းရဲ့ ပွဲထွက်လူစာရင်းမှာ ပါဝင်ခဲ့ပြီး ဘုန်းမောက်အသင်းနဲ့ ပွဲစဉ်မှာ အသင်းအတွက် တစ်ဂိုးသွင်းယူထားပါတယ်။

Source:BBC

CNI Sport News

၂၀၂၃ ခုနှစ်၊ သြဂုတ် ၂၅

စပိန်ဘောလုံးအဖွဲ့ချုပ် အကြီးအကဲ ရူဘီယာလက်စ်ဟာ အမျိုးသမီးကမ္ဘာ့ဖလား ဗိုလ်လုပွဲအပြီးမှာ စပိန်ကစား သမား ဟာမိုဆိုရဲ့ နှုတ်ခမ်းကို နမ်းခဲ့တဲ့အပေါ် အားလုံးရဲ့ ဝိုင်းဝန်းရှုတ်ချခြင်း ခံခဲ့ရအပြီးမှာ ရာထူးကနေ နုတ်ထွက် ခဲ့တယ်လို့ ပြည်ပမီဒီယာများက ဖော်ပြခဲ့ပါတယ်။

အသက် ၄၆ နှစ်အရွယ်ရှိ ရူဘီယာလက်စ်ဟာ သြဂုတ် ၂၅ ရက်မှာ စပိန်ဘောလုံးအဖွဲ့ချုပ်ဥက္ကဋ္ဌ ရာထူးကနေ နုတ်ထွက်ကြောင်း တင်သွင်းသွားမှာလို့ သိရတာပါ။

ရူဘီယာလက်စ်ဟာ စပိန်အသင်းက အင်္ဂလန်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ အမျိုးသမီးကမ္ဘာ့ဖလား ဗိုလ်လုပွဲအပြီးမှာ ကွင်းလယ်ကစားသမား ဟာမိုဆိုကို ခွင့်ပြုချက် မတောင်းခံဘဲ နှုတ်ခမ်းကို အနမ်းပေးခဲ့တာ ဖြစ်ပါတယ်။ 

ရူဘီယာလက်စ်ဟာ ဒီဖြစ်ရပ်နဲ့ ပတ်သက်ပြီး ပြန်တောင်းပန်ခဲ့ပေမယ့် ဝေဖန်မှုတွေ အပြင်းအထန် ခံခဲ့ရပါတယ်။

စပိန်ဝန်ကြီးချုပ် ပတ်ဒရိုဆန်းချက်ဇ်၊ စပိန်အမျိုးသမီးလိဂ်နဲ့ အမျိုးသား လာလီဂါကလပ် အများအပြားနဲ့ အခြား သူတွေရဲ့ ဝေဖန်မှုတွေကြောင့် ရူဘီယာလက်စ်ဟာ ရာထူးက နုတ်ထွက်ဖို့အတွက် ဖိအားတွေအောက် ရောက်ခဲ့ တာ ဖြစ်ပါတယ်။

စပိန်ကစားသမားကို နမ်းနေတဲ့ ရူဘီယာလက်စ်ကိုတွေ့ရစဉ်

ကမ္ဘာ့ဘောလုံးအဖွဲ့ချုပ်(ဖီဖာ)က ရူဘီယာလက်စ်ကို စည်းကမ်းပိုင်းဆိုင်ရာ အရေးယူမှုတွေ ပြုလုပ်ခဲ့ပါတယ်။

စပိန်ကြယ်ပွင့် ဟာမိုဆိုရဲ့ အဖွဲ့အစည်းကလည်း ရူဘီယာလက်စ်ကို အရေးယူဖို့ တောင်းဆိုထားတဲ့ ကြေညာချက် ကို ထုတ်ပြန်ထားပါတယ်။ 

ရူဘီယာလက်စ်ဟာ ၂၀၁၈ ခုနှစ်၊ မေလက စပိန်ဘောလုံးအဖွဲ့ချုပ်ဥက္ကဋ္ဌ ရာထူးကို ရယူခဲ့ပြီးနောက်မှာ အငြင်းပွား စရာတွေ အများကြီး လုပ်ဆောင်ခဲ့တယ်လို့ သတင်းမှာ ဖော်ပြထားတာပါ။

ရူဘီယာလက်စ်ဟာ ၂၀၁၈ ကမ္ဘာ့ဖလားပြိုင်ပွဲစတင်ဖို့ ၂ ရက်အလိုမှာ နည်းပြ လိုပီတီဂွီကို ရာထူးက ထုတ်ပယ် ခဲ့ပြီး စပိန်စူပါဖလားပြိုင်ပွဲကို ဆော်ဒီနိုင်ငံထံ ပြောင်းရွှေ့ပြီး ကျင်းပခဲ့ပါတယ်။ 

ဒါ့အပြင် စပိန်ဘောလုံးအဖွဲ့ချုပ် အကြီးအကဲဟာ စပိန်အမျိုးသမီးအသင်းနဲ့ အဆင်မပြေဖြစ်ခဲ့တဲ့ နည်းပြ ဂျော့ချ်ဗီးလ်ဒါကို ထောက်ခံမှုပေးခဲ့တယ်လို့ သိရပါတယ်။

ရူဘီယာလက်စ်ဟာ စပိန်အမျိုးသမီးအသင်းကို ပထမဆုံးအကြိမ် ကမ္ဘာ့ဖလား ချန်ပီယံဆုရရှိအောင် ဦးဆောင် နိုင်ခဲ့ပေမယ့် မလုပ်သင့်တဲ့ အပြုအမူတွေကြောင့် နာမည်ပျက်ခဲ့ရတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဩဂုတ် ၂၄

ဘောလုံးပွဲဝေဖန်သုံးသပ်သူအဖြစ် ဆောင်ရွက်နေတဲ့ မီကာရစ်ချတ်က ယူနိုက်တက်အသင်းခေါင်းဆောင် ဘရူနိုဖာနန်ဒက်စ်ကို ဝေဖန်လိုက်ပြီး သူဟာအသင်းဖော်တွေကို စိတ်အနှောက်အယှက်ဖြစ်စေတယ်လို့ ပြောခဲ့ပါတယ်။

မီကာရစ်ချတ်က “ဘရူနိုရဲ့ပုံစံတွေက အရှက်ရစရာကြီးပါ။ ဘရူနိုက သူ့အသင်းကို အကောင်းဆုံးပုံစံနဲ့ ကစား စေချင်နေတာကြောင့် စိတ်ပျက်နေတယ်ဆိုတာ ကျနော်နားလည်ပါတယ်။ ပယ်လီစထရီပြေးနေတဲ့အချိန်မှာ ဘရူနိုက သူ့ကိုမမြင်တဲ့အတွက် သူက တခြားနေရာကို ပြေးခဲ့ပါတယ်။ အဲဒီအချိန်မှာ ဘရူနိုက ဒေါသထွက် နေခဲ့တာပါ။ ဒါက အချိန်တိုင်းကိုဖြစ်နေပါတယ်။ ကျနော်ကတော့ ဘရူနိုရဲ့ ကွင်းထဲမှာ ပြုလုပ်ခဲ့တဲ့ ခန္ဓာကိုယ် လှုပ်ရှားမှုပုံစံတွေဟာ အသင်းဖော်တွေကို စိတ်အနှောက်အယှက်ဖြစ်စေတယ်လို့ ထင်ပါတယ်။ ဒါကိုကြည့်နေရ တာလည်း မကောင်းဘူး” လို့ ပြောခဲ့တာပါ။

ဘရူနိုဖာနန်ဒက်စ်ဟာ အခုနှစ်ဘောလုံးရာသီမှာ ယူနိုက်တက်အသင်းရဲ့ တရားဝင်အသင်းခေါင်းဆောင်အဖြစ် ခန့်အပ်ခံထားရတာပါ။ ပေါ်တူဂီကစားသမားဟာ စပါးအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့တဲ့ ပရီးမီးယားလိဂ် ပွဲစဉ်အပြီးမှာ သူ့ရဲ့စွမ်းဆောင်ရည်တွေနဲ့ ကွင်းအတွင်းအပြုအမူတွေကြောင့် ဝေဖန်မှုတွေ ခံနေရတာဖြစ်ပါတယ်။ ဘောလုံးပွဲဝေဖန်သုံးသပ်သူတစ်ဦးဖြစ်တဲ့ ခရစ်ဆက်တန်က ဘရူနိုဖာနန်ဒက်စ်ဟာ ယူနိုက်တက်အသင်းရဲ့ အသင်းခေါင်းဆောင်မဖြစ်သင့်ဘူးလို့ မကြာသေးခင်က ဝေဖန်ခဲ့တာပါ။

အခုအချိန်မှာလည်း ဘောလုံးပွဲဝေဖန်သုံးသပ်သူအဖြစ် ဆောင်ရွက်နေတဲ့ မန်စီးတီးအသင်းနောက်ခံလူဟောင်း မီကာရစ်ချတ်က လူငယ်ကစားသမား ပယ်လီစထရီအပေါ် သူ့ရဲ့ ပြုမူပုံစံတွေကို ဝေဖန်မှုပြုလုပ်သွားခဲ့တာဖြစ်ပါ တယ်။ ဘရူနိုဖာနန်ဒက်စ်ဟာ အရင်ကလည်း ဒိုင်လူကြီးတွေအပေါ် ဖိအားပေးမှုနဲ့ ကွင်းအတွင်းပြုမူပုံစံတွေ ကြောင့် မကြာခဏဆိုသလို ဝေဖန်ခြင်းခံနေရတာပါ။

စပါးအသင်းကို အရေးနိမ့်ပြီးနောက် ပရီးမီးယားလိဂ်ရာသီသစ် ၂ ပွဲမှာ ၁ ပွဲသာ အနိုင်ရထားတဲ့ ယူနိုက်တက် အသင်းဟာ သြဂုတ် ၂၆ ရက်မှာ ပွဲစဉ် ၃ အဖြစ် နော်တင်ဟမ်ဖောရက်စ်အသင်းကို အိမ်ကွင်းမှာ ယှဉ်ပြိုင် ရမှာဖြစ်ပါတယ်။

Source:Metro