CNI Sport News

၂၀၂၄ ခုနှစ်၊ ဖေဖော်ဝါရီ ၁

လီဗာပူးလ်အသင်းနည်းပြ ကလော့ပ်က ချယ်လ်ဆီးအသင်းကို အနိုင်ရရှိခဲ့တဲ့ ပရီးမီးယားလိဂ်ပွဲစဉ်မှာ အသင်း အတွက် ခြေစွမ်းပြသပြီး ဂိုးသွင်း၊ ဂိုးဖန်တီးနိုင်ခဲ့တဲ့ လူငယ်ကစားသမား ကော်နာဘရက်ဒလေကို ချီးကျူးသွားခဲ့ ပါတယ်။

ကလော့ပ်က “သူကအံ့သြဖွယ်ကောင်းတဲ့ ကလေးပါ။ အလွန်ကောင်းမွန်တဲ့ အဆုံးသတ်၊ ဂိုးဖန်တီးမှုတွေနဲ့ တစ်ပွဲလုံး ခြေစွမ်းပြသနိုင်ခဲ့ပါတယ်။ စတာလင်နဲ့ ရင်ဆိုင်ကစားရတာဟာ မလွယ်ကူတာကြောင့် သူ့အတွက် ကျနော် ပျော်ရွှင်မိပါတယ်။ သူဟာ အလွန်အောင်မြင်ချင်တဲ့ လူငယ်တစ်ဦးဖြစ်ပြီး ဒါက ထူးခြားတယ်လို့ ပြောရမှာပါ။ ရာသီကြိုမှာကတည်းက သူဟာ အလွန်ကောင်းမွန်စွာ အလုပ်လုပ်ခဲ့ပါတယ်”လို့ ပြောကြားခဲ့ပါတယ်။

လီဗာပူးလ်အသင်းက ချယ်လ်ဆီးအသင်းကို ၄ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အသက် ၂၀ နှစ် အရွယ်ရှိ ကော်နာဘရက်ဒလေဟာ လီဗာပူးလ်အသင်း ကစားသမားဘဝ ပထမဆုံးဂိုးကို သွင်းယူနိုင်ခဲ့သလို ဂျိုတာနဲ့ ဆိုဘော့ဇ်လိုင်း သွင်းယူတဲ့ဂိုးတွေကို ဖန်တီးနိုင်ခဲ့တာ ဖြစ်ပါတယ်။ 

ပြီးခဲ့တဲ့ရာသီက လိဂ်ဝမ်းကလပ် ဘောလ်တန်အသင်းမှာ အငှားသွားရောက်ကစားခဲ့တဲ့ ကော်နာဘရက်ဒလေဟာ အသင်းဖော်နောက်ခံလူ အာနိုးလ် မပါဝင်နိုင်တဲ့ အချိန်တွေမှာ လီဗာပူးလ်အသင်းအတွက် ခြေစွမ်းပြသနေတာ ဖြစ်ပါတယ်။

ချယ်လ်ဆီးအသင်းကို အနိုင်ရတဲ့ပွဲဟာ လီဗာပူးလ်အသင်းနည်းပြ ကလော့ပ်အတွက် ပရီးမီးယားလိဂ်နိုင်ပွဲ ၂၀၀ ပြည့် သွားခဲ့တာလည်း ဖြစ်ပါတယ်။

ကလော့ပ်ဟာ ပရီးမီးယားလိဂ်ပြိုင်ပွဲမှာ နိုင်ပွဲ ၂၀၀ အမြန်ဆုံး ရယူနိုင်တဲ့နည်းပြအဖြစ် မန်စီးတီးအသင်းနည်းပြ ဂွာဒီယိုလာရဲ့ အနောက် ဒုတိယနေရာမှာ ရပ်တည်နေပါတယ်။

ဂွာဒီယိုလာဟာ ပရီးမီးယားလိဂ်ပွဲပေါင်း ၂၆၉ ပွဲနဲ့ နိုင်ပွဲ ၂၀၀ ပြည့်ခဲ့တာဖြစ်ပြီး ကလော့ပ်က ၃၁၈ ပွဲမှာ နိုင်ပွဲ ၂၀၀ ပြည့်ခဲ့တယ်လို့ ပရီးမီးယားလိဂ်က တရားဝင် ဖော်ပြထားတာ ဖြစ်ပါတယ်။

လီဗာပူးလ်အသင်းဟာ ချယ်လ်ဆီးအသင်းကို အနိုင်ရပြီးနောက် ပရီးမီးယားလိဂ် အမှတ်ပေးဇယားကို ဆက်လက် ဦးဆောင်နေပြီး ဒုတိယနေရာက မန်စီးတီးအသင်းထက် ၁ ပွဲပို ကစားထားကာ ရမှတ် ၅ မှတ် အသာရထားတာပါ။ 

လီဗာပူးလ်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် တတိယနေရာက အာဆင်နယ်အသင်းနဲ့ ယှဉ်ပြိုင်ရ မှာဖြစ်ပါတယ်။ 

Source: Daily Mail

CNI Sport News

၂၀၂၄ ခုနှစ်၊ ဇန်နဝါရီ ၃၁

မန်စီးတီးအသင်းတိုက်စစ်မှူး အယ်လ်ဗားရက်ဇ်က အင်တာမိုင်ယာမီအသင်းခေါင်းဆောင် မက်ဆီကို အာဂျင်တီးနားအသင်းအတွက် ဆက်ပြီးကစားစေချင်တယ်လို့ ပြောလိုက်ပါတယ်။

အယ်လ်ဗားရက်ဇ်က “ဒါက မက်ဆီအပေါ်မှာပဲ မူတည်ပေမယ့် သူသာဆက်ပြီးလုပ်ချင်တယ်ဆိုရင် ဒါက အဆင်ပြေသွားမယ်လို့ ကျနော်ထင်ပါတယ်။ ကျနော်နဲ့ အာဂျင်တီးနားအသင်းဖော်တွေအားလုံးက မက်ဆီကို ဆက်ပြီးကစားစေချင်ပါတယ်” လို့ Goal နဲ့ ပြုလုပ်ခဲ့တဲ့ သီးသန့်အင်တာဗျူးမှာ ပြောခဲ့တာပါ။

အယ်လ်ဗားရက်ဇ်ဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ မက်ဆီနဲ့အတူ အာဂျင်တီးနားအသင်းရဲ့ တိုက်စစ်ကို ဦးဆောင်ကာ ၃၆ နှစ်ကာလအတွင်း ပထမဆုံးကမ္ဘာ့ဖလားချန်ပီယံဆုကို နိုင်ငံအသင်းအတွက် ရယူပေးနိုင်ခဲ့တာ ဖြစ်ပါတယ်။ သူတို့နှစ်ဦးဟာ လာမယ့် ကိုပါအမေရိကဖလားပြိုင်ပွဲမှာလည်း အာဂျင်တီးနားအသင်းတိုက်စစ်ကို ထပ်ပြီးဦးဆောင်ရမှာဖြစ်ပြီး ဒီပြိုင်ပွဲဟာ မက်ဆီအတွက် နောက်ဆုံးနိုင်ငံတကာပြိုင်ပွဲလည်း ဖြစ်သွားနိုင်တာပါ။

မက်ဆီဟာ လာမယ့် ၂၀၂၆ ကမ္ဘာ့ဖလားပြိုင်ပွဲမှာ အာဂျင်တီးနားအသင်းအတွက် ပါဝင်ကစားပေးဖို့ကို အခုအချိန် ထိ ဆုံးဖြတ်ထားခြင်းမရှိသေးဘဲ ကိုပါအမေရိကဖလားပြိုင်ပွဲကိုသာ အာရုံစိုက်ထားတယ်လို့ ပြောထားပါတယ်။ ဒါပေမယ့် အာဂျင်တီးနားအသင်းဖော်တွေအားလုံးက မက်ဆီကို ၂၀၂၆ ကမ္ဘာ့ဖလားပြိုင်ပွဲမှာ နိုင်ငံအသင်းကို ဆက်ပြီးဦးဆောင်ပေးဖို့ မျှော်လင့်နေကြတာပါ။ မက်ဆီဟာ အာဂျင်တီးနားအသင်းရဲ့ ပွဲအရေအတွက် အများဆုံး ကစားသမားဖြစ်သလို သွင်းဂိုးအများဆုံးသွင်းယူထားတဲ့ ကစားသမားအဖြစ် ရပ်တည်နေပါတယ်။

အာဂျင်တီးနားအသင်းဟာ ကိုပါအမေရိကဖလားပြိုင်ပွဲမတိုင်ခင် တရုတ်နိုင်ငံမှာ နိုင်ဂျီးရီးယား၊ အိုင်ဗရီကို့စ် အသင်းတို့နဲ့ ခြေစမ်းပွဲကစားဖို့ စီစဉ်ထားတာဖြစ်ပါတယ်။ 

Source:Goal

CNI Sport News

၂၀၂၄ ခုနှစ်၊ ဇန်နဝါရီ ၃၁

အာဆင်နယ်အသင်းနည်းပြ အာတီတာက နော်တင်ဟမ်ဖောရက်စ်အသင်းကို အနိုင်ရခဲ့တဲ့ ပရီးမီးယားလိဂ်ပွဲစဉ် အပြီးမှာ နောက်ခံလူ နှစ်ဦးဖြစ်တဲ့ ဘန်ဝှိုက်နဲ့ ဇင်ချန်ကိုတို့ အငြင်းအခုံဖြစ်တာကို သူနှစ်သက်တယ်လို့ ပြောလိုက် ပါတယ်။

အာတီတာက “ဒီလိုတွေဖြစ်တာကို ကျနော်ကတော့ နှစ်သက်ပါတယ်။ သူတို့တွေဟာ တစ်ဦးနဲ့တစ်ဦး ပိုပြီး တောင်းဆိုနေကြသလို ဂိုးပေးလိုက်ရတဲ့အတွက် စိတ်ပျက်နေပြီး ဒါကိုဖြေရှင်းဖို့ ကြိုးစားခဲ့ကြတာပါ။ အနည်း ငယ်တော့ ဒေါသ ပါသွားကြပါတယ်။ ဒါပေမယ့် ဒီအရာတွေက လုံလောက်သွားပါပြီ။ ကစားပုံလည်း ပိုမိုကောင်း မွန်ရမှာ ဖြစ်သလို ပေးဂိုးလည်း မပေးရအောင် စွမ်းဆောင်ရမှာပါ။ ကျနော်ကတော့ ကစားသမား အချင်းချင်း တွန်းအားပေးပြီး တောင်းဆိုတဲ့ အရာတွေကို နှစ်သက်တယ်”လို့ ပြောကြားခဲ့ပါတယ်။

အာဆင်နယ်အသင်းဟာ နော်တင်ဟမ်ဖောရက်စ်အသင်းနဲ့ ကစားခဲ့တဲ့ ပွဲစဉ်မှာ ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါ တယ်။ 

ဒီပွဲမှာ အာဆင်နယ်အသင်းဟာ ဂျီးဆပ်စ်နဲ့ ဆာကာတို့ရဲ့ သွင်းဂိုးတွေနဲ့ ဦးဆောင်နိုင်ခဲ့ပေမယ့် ၈၉ မိနစ်မှာ အေဝိုနီယီက နော်တင်ဟမ်ဖောရက်စ် အသင်းအတွက် ချေပဂိုး သွင်းယူနိုင်ခဲ့တာပါ။

အာတီတာနဲ့ ဇင်ချန်ကိုကို တွေ့ရစဉ်

အာဆင်နယ်အသင်းဟာ ဒီနိုင်ပွဲကြောင့် ပရီးမီးယားလိဂ်အဆင့် ၂ နေရာကို တက်နိုင်ခဲ့ပြီး အဆင့် ၁ နေရာက လီဗာပူးလ်အသင်းနဲ့ ၂ မှတ်သာ ကွာဟတော့တာ ဖြစ်ပါတယ်။

ဒီပွဲမှာ အာဆင်နယ်အသင်းအတွက် ခြေစွမ်းပြပြီး ၁ ဂိုးသွင်း ၁ ဂိုးဖန်တီးခဲ့တဲ့ တိုက်စစ်မှူး ဂျီးဆပ်စ်ဟာ ဒူးဒဏ်ရာ ကို ခံစားနေရပေမယ့် ပါဝင်ပြီး ကစားခဲ့တယ်လို့ အာတီတာက ပြောခဲ့ပါတယ်။

အာတီတာက “ဂျီးဆပ်စ်ဟာ ဒူးမှာ ပြဿနာရှိနေခဲ့ပေမယ့် ပွဲကို ပါဝင်ကစားပြီး အသင်းကို အနိုင်ရအောင် ကူညီ ပေးချင်နေပါတယ်။ ဒီလိုမျိုး စိတ်ဓါတ်ရှိတာကြောင့်လည်း ကောင်းမွန်တဲ့ အရာတွေ ဖြစ်လာပါလိမ့်မယ်။ ကျနော် သူ့ကို အလွန်ကျေနပ်မိပါတယ်။ သူဟာ ဒဏ်ရာရှိနေပေမယ့် ခံစားချက် ကောင်းမွန်နေပြီး လေ့ကျင့်ရေးကွင်းမှာ လည်း အကောင်းဆုံး လုပ်နိုင်ခဲ့ပါတယ်။ ဒီပွဲမှာ ကစားသွားတဲ့ သူ့ရဲ့ကစားပုံနဲ့ ပတ်သက်ပြီး ကျနော့်အတွက် အံ့အားသင့်စရာမရှိဘူး”လို့ ပြောခဲ့တာပါ။

အာဆင်နယ်အသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် လီဗာပူးလ်အသင်းနဲ့ ဖေဖော်ဝါရီ ၄ ရက်မှာ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇန်နဝါရီ ၃၁

တောင်ကိုရီးယားအသင်းဟာ အာရှဖလားပြိုင်ပွဲ ၁၆ သင်းအဆင့်မှာ ဆော်ဒီအသင်းကို ပင်နယ်တီ အဆုံးအဖြတ်နဲ့ အနိုင်ရပြီး ကွာတားဖိုင်နယ်ကို တက်ရောက်သွားခဲ့ပြီ ဖြစ်ပါတယ်။

ဒီပွဲစဉ်ရဲ့ ပွဲချိန် ၄၆ မိနစ်မှာ ရာဒစ်ဖ်က ဆော်ဒီအတွက် ဦးဆောင်ဂိုး သွင်းယူနိုင်ခဲ့ပြီး နာကျင်အချိန်ပို ၉၉ မိနစ်မှာ ချိုဂဲလ်ဆောင်က တောင်ကိုရီးယားအသင်းအတွက် အဖိုးတန် ချေပဂိုး သွင်းယူနိုင်ခဲ့တာပါ။

အဲဒါကြောင့် ပွဲချိန်အတွင်း ၁ ဂိုးစီ သရေကျနေခဲ့လို့ အချိန်ပိုဆက်ကစားခဲ့ရပြီး ဂိုးမသွင်းနိုင်ခဲ့တဲ့အတွက် ပင်နယ်တီ အဆုံးအဖြတ် ခံယူခဲ့ရတာ ဖြစ်ပါတယ်။ 

ပင်နယ်တီ အဆုံးအဖြတ်မှာ တောင်ကိုရီးယားအသင်းက ၄ ဂိုး-၂ ဂိုးနဲ့ အနိုင်ရပြီး အာရှဖလားပြိုင်ပွဲ ကွာတားဖိုင်နယ်ကို တက်နိုင်ခဲ့တာပါ။

တောင်ကိုရီးယားအသင်းနည်းပြ ကလင်းစမန်းက ဆော်ဒီကို အနိုင်ရခဲ့တဲ့အတွက် ပျော်ရွှင်ပြီး ဒီနိုင်ပွဲက အသင်း အတွက် ကြီးမားတဲ့စွမ်းအင်ကို ပေးတယ်လို့ ပြောခဲ့ပါတယ်။

တောင်ကိုရီးယားနဲ့ဆော်ဒီ ယှဉ်ပြိုင်နေစဉ်

ကလင်းစမန်းက “ဒီနိုင်ပွဲကြောင့် အသင်းဟာပိုပြီး စိတ်ဓါတ်ခွန်အားတွေ ရရှိလာပါတယ်။ ပင်နယ်တီ အဆုံးအဖြတ် မတိုင်ခင်မှာကတည်းက ကျနော်တို့ပွဲကို အနိုင်ရယူချင်တာပါ။ ပင်နယ်တီ အဆုံးအဖြတ်မှာက ဘာမဆို ဖြစ်သွားနိုင်ပေမယ့် အနိုင်ရယူနိုင်ခဲ့ပါတယ်။ ကျနော်တို့ဟာ ပင်နယ်တီအတွက် ပြင်ဆင်ခဲ့ပြီး ဂိုးသမားက အလွန်ကောင်းမွန်တဲ့ ကာကွယ်မှု ၂ ကြိမ် ပြုလုပ်သွားခဲ့ပါတယ်။ လာမယ့် ကွာတားဖိုင်နယ်အတွက်ကိုလည်း အကောင်းဆုံး လုပ်နိုင်ဖို့ မျှော်လင့်တယ်”လို့ ပြောကြားခဲ့ပါတယ်။

ဆော်ဒီနည်းပြ မန်ချီနီကတော့ ဒီရှုံးပွဲအတွက် အလွန်စိတ်ပျက်နေပြီး တောင်ကိုရီးယားအသင်းရဲ့ ပင်နယ်တီ အနိုင်ဂိုး မကန်သွင်းခင် ဥမင်ထဲဝင်သွားခဲ့တဲ့အတွက် ပွဲအပြီးမှာ တောင်းပန်မှု ပြုလုပ်ခဲ့ပါတယ်။ 

ဒါပေမယ့် သူဟာ ဆော်ဒီနည်းပြ ရာထူးကနေ နုတ်ထွက်သွားမှာ မဟုတ်ဘူးလို့ ပွဲအပြီး သတင်းစာ ရှင်းလင်းပွဲမှာ ပြောခဲ့ပါတယ်။

ဆော်ဒီအသင်းဟာ အာရှဖလားပြိုင်ပွဲမှာ အောင်မြင်မှု ရယူနိုင်ဖို့အတွက် မန်ချီနီကို နည်းပြအဖြစ် ခန့်အပ်ခဲ့ပေမယ့် ၁၆ သင်းအဆင့်ကနေ ထွက်ခွာခဲ့ရပါတယ်။

တောင်ကိုရီးယားအသင်းဟာ အာရှဖလားပြိုင်ပွဲ ကွာတားဖိုင်နယ် ပွဲစဉ်အဖြစ် သြစတြေးလျအသင်းနဲ့ ဖေဖော်ဝါရီ ၂ ရက်မှာ ယှဉ်ပြိုင်သွားမှာ ဖြစ်ပါတယ်။

Source: AFC

CNI Sport News

၂၀၂၄ ခုနှစ်၊ ဇန်နဝါရီ ၃၀

ဝါရင့်တိုက်စစ်မှူး ဒီယေဂိုကော်စတာဟာ ဘိုတာဖိုဂိုအသင်းမှာ ၄ လကြာ ကစားခဲ့ပြီးနောက် ဘရာဇီးလ်ထိပ်သီး ကလပ် ပါးလ်မီးရက်စ်အသင်းထံ ပြောင်းရွှေ့ဖွယ် ရှိနေတယ်လို့ အပြောင်းအရွှေ့ ကျွမ်းကျင်သူ ဖာဘရီဇီယိုရိုမန်နို က ဖော်ပြထားပါတယ်။

အသက် ၃၅ နှစ်အရွယ်ရှိ ဒီယေဂိုကော်စတာဟာ ဘိုတာဖိုဂိုအသင်းက သူ့ကို စာချုပ်သက်တမ်း မတိုးခဲ့တာ ကြောင့် အသင်းလက်မဲ့ဖြစ်နေပြီး နောက်ထပ် ပြောင်းရွှေ့မယ့် အသင်းကို ရှာဖွေမှုတွေ ပြုလုပ်နေတာပါ။ 

အသလက်တီကိုနဲ့ ချယ်လ်ဆီး ကစားသမားဟောင်းဟာ ပြီးခဲ့တဲ့ရာသီက ပရီးမီးယားလိဂ်ကလပ် ဝုလ်ဗ်စ်အသင်း မှာ ကစားခဲ့ပြီး သူ့ရဲ့မွေးရပ် ဘရာဇီးလ်ကိုပြန်ကာ ဘိုတာဖိုဂိုအသင်းနဲ့ စာချုပ်ချုပ်ဆိုခဲ့တာ ဖြစ်ပါတယ်။ 

ဒီယေဂိုကော်စတာဟာ ဘိုတာဖိုဂိုအသင်းအတွက် ၁၅ ပွဲ ပါဝင်ကစားခဲ့ပြီး ၃ ဂိုးသွင်းယူနိုင်ခဲ့တာပါ။ 

ဒီယေဂိုကော်စတာကို တွေ့ရစဉ်

ဖာဘရီဇီယိုရိုမန်နိုက ဒီယေဂိုကော်စတာဟာ ပြီးခဲ့တဲ့ရာသီက ဘရာဇီးလိဂ်ချန်ပီယံ ပါးလ်မီးရက်စ်အသင်းထံ ပြောင်းရွှေ့နိုင်တယ်လို့ ဖော်ပြခဲ့ပါတယ်။ 

ဒီယေဂိုကော်စတာနဲ့ ပါးလ်မီးရက်စ် အသင်းတို့ဟာ တိုက်ရိုက် အဆက်အသွယ်ရှိနေပြီး အပြောင်းအရွှေ့အတွက် ဆွေးနွေးမှုတွေ ပြုလုပ်နေတယ်လို့ ဖာဘရီဇီယိုရိုမန်နိုက ရေးသားထားတာပါ။

ဒီယေဂိုကော်စတာဟာ ဥရောပကလပ် အသင်းတွေနဲ့ အောင်မြင်မှုရခဲ့ပေမယ့် ဘရာဇီးလ်ကလပ် အသင်းတွေမှာ အနည်းငယ် ရုန်းကန်နေရတယ်လို့ သိရပါတယ်။ 

စပိန်တိုက်စစ်မှူးဟောင်းဟာ ၂၀၂၂ ခုနှစ်က ဝုလ်ဗ်စ်အသင်းထံ မပြောင်းရွှေ့ခင် ဘရာဇီးလ်ကလပ် အသလက်တီ ကို မင်နဲရိုးအသင်းမှာ ကစားခဲ့တာပါ။ 

ဒီယေဂိုကော်စတာဟာ မင်နဲရိုးအသင်းမှာ ၅ ဂိုးသာ သွင်းယူနိုင်ခဲ့သလို ဘိုတာဖိုဂို အသင်းမှာလည်း ၃ ဂိုးသာ သွင်းယူနိုင်ခဲ့တာ ဖြစ်ပါတယ်။

ဒီယေဂိုကော်စတာဟာ အသလက်တီကိုအသင်းမှာ ကစားခဲ့ချိန်က လာလီဂါ၊ ကိုပါဒယ်ရေး၊ ယူရိုပါလိဂ်နဲ့ ဥရောပ စူပါဖလားတို့ကို ရယူနိုင်ခဲ့ပြီး ချယ်လ်ဆီးအသင်းအတွက် ကစားချိန်မှာ ပရီးမီးယားလိဂ် ၂ ကြိမ်နဲ့ လိဂ်ဖလားတို့ကို ရယူနိုင်ခဲ့တာပါ။

ဒီယေဂိုကော်စတာဟာ စပိန်အသင်းအတွက် ၂၄ ပွဲ ပါဝင်ကစားခဲ့ပြီး ၁၀ ဂိုးသွင်းယူကာ ၂၀၁၈ ခုနှစ်က နောက်ဆုံး ပါဝင်ကစားခဲ့တာ ဖြစ်ပါတယ်။

Source: the Sun

CNI Sport News

၂၀၂၄ ခုနှစ်၊  ဇန်နဝါရီ ၃၀

အယ်လ်အစ်တီဟတ်အသင်း တိုက်စစ်မှူး ဘန်ဇီမာဟာ ဆော်ဒီပရိုလိဂ်ကလပ် အသင်းတစ်သင်းဖြစ်တဲ့ အယ်လ်နာဆာအသင်းနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်နေတယ်လို့ L’Équipe က ဖော်ပြထား ပါတယ်။

ဒီအပြောင်းအရွှေ့သာဖြစ်ခဲ့ရင် ဘန်ဇီမာဟာ ရီးရယ်လ်အသင်းဖော်ဟောင်း စီရော်နယ်ဒိုနဲ့ တစ်သင်းထဲ အတူတွဲပြီး ပြန်ကစားရတော့မှာပါ။ 

ပြင်သစ်တိုက်စစ်မှူးဟောင်း ဘန်ဇီမာဟာ အယ်လ်အစ်တီဟတ်အသင်းမှာ မပျော်ရွှင်တော့တာကြောင့် အခု ဇန်နဝါရီ အပြောင်းအရွှေ့မှာ ထွက်ခွာဖို့ ကြိုးစားနေတာ ဖြစ်ပါတယ်။ 

ဆော်ဒီကလပ်နည်းပြ ဂယ်လာဒိုဟာ ဘန်ဇီမာကို အသင်းရဲ့ စခန်းသွင်း လေ့ကျင့်နေတဲ့ လူစာရင်းကနေ ချန်လှပ်ခဲ့ ပြီးနောက် အယ်လ်အစ်တီဟတ်အသင်းဟာ ပြင်သစ်တိုက်စစ်မှူးဟောင်းကို ယာယီထွက်ခွာခွင့်ပေးဖို့ စီစဉ်နေ တာပါ။

ဒါပေမယ့် အယ်လ်အစ်တီဟတ်အသင်းဟာ ပိုင်ရှင်တူ PIF လက်အောက်မှာရှိတဲ့ ဆော်ဒီကလပ်အသင်းတွေထံသာ အငှားချချင်တာကြောင့် ဘန်ဇီမာဟာ အယ်လ်နာဆာ၊ အယ်လ်ဟီလယ်အသင်းတွေနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်လို့ရတာ ဖြစ်ပါတယ်။ 

ဘန်ဇီမာနဲ့ ရော်နယ်ဒိုကို တွေ့ရစဉ်

ဘန်ဇီမာနဲ့ ရော်နယ်ဒိုတို့ဟာ ရီးရယ်လ်အသင်းမှာ ၂၀၀၈ ကနေ ၂၀၁၈ ခုနှစ်အထိ ၉ နှစ်ကြာ အတူတွဲကစားခဲ့ပြီး ချန်ပီယံလိဂ်ဖလား ၄ ကြိမ် အပါအဝင် ဆုဖလားအောင်မြင်မှုအများ အပြားရယူနိုင်ခဲ့တာပါ။

ဘန်ဇီမာဟာ မကြာသေးခင်က ယူနိုက်တက်အသင်းနဲ့ အပြောင်းအရွှေ့အတွက် ချိတ်ဆက်မှုတွေရှိခဲ့ပါတယ်။

ဒါပေမယ့် ယူနိုက်တက်အသင်းဟာ ဘဏ္ဍာရေးစည်းမျဉ်း ချိုးဖောက်မှုဖြစ်မှာကို စိုးရိမ်တဲ့အတွက် ဇန်နဝါရီ အပြောင်းအရွှေ့မှာ ကစားသမားသစ် ခေါ်ယူမှာ မဟုတ်ဘူးလို့ ရှင်းရှင်းလင်းလင်း ပြောထားတာပါ။ 

ဘန်ဇီမာဟာ အသင်းဟောင်း လိုင်ယွန်အသင်းထံ ပြန်သွားနိုင်တယ်လို့ သတင်းတွေ ထွက်ခဲ့ပေမယ့် လက်ရှိအချိန် မှာ ဆော်ဒီကလပ်တွေနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်နေတာ ဖြစ်ပါတယ်။

အသက် ၃၆ နှစ်အရွယ်ရှိ ဘန်ဇီမာဟာ အယ်လ်အစ်တီဟတ် အသင်းအတွက် ၂၄ ပွဲ ပါဝင်ကစားထားပြီး ၁၅ ဂိုး သွင်းယူထားတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇန်နဝါရီ ၃၀

ဘာစီလိုနာနည်းပြ ဇာဗီ နေရာကို ဆက်ခံဖို့အတွက် ချိတ်ဆက်မှုတွေ ပြုလုပ်နေတယ်ဆိုပြီး ထွက်ပေါ်လာတဲ့ သတင်းတွေဟာ လုံးဝမမှန်ဘူးလို့ အာဆင်နယ်အသင်းနည်းပြ အာတီတာက ပြောကြားလိုက်ပါတယ်။

အာတီတာက “ထွက်ပေါ်နေတဲ့ သတင်းတွေဟာ လုံးဝ အတုအယောင်တွေပါ။ ဒါတွေက ကျနော့်ကို စိတ်ပျက်စေ ပါတယ်။ ဒီလိုသတင်းတွေ ထွက်လာတာကို ကျနော် မယုံနိုင်ခဲ့သလို တိကျတဲ့ သတင်းရင်းမြစ်လည်း မရှိပါဘူး။ ကျနော်ဟာ မှန်ကန်တဲ့လူတွေနဲ့ နေရာမှန်ကို ရောက်ရှိနေပြီး ဒါက တကယ်ကို ကောင်းမွန်တယ်လို့ ခံစားရပါ တယ်။ ကျနော်ဟာ ကလပ်အသင်းနဲ့ လုပ်စရာတွေ အများကြီး ကျန်ရှိနေသေးပြီး အာဆင်နယ် ဘုတ်အဖွဲ့နဲ့လည်း ခိုင်မာတဲ့ ဆက်ဆံရေးရှိပါတယ်”လို့ ပြောကြားခဲ့ပါတယ်။

ဘာစီလိုနာအသင်းနည်းပြ ဇာဗီဟာ ဒီရာသီအကုန်မှာ အသင်းကနေ ထွက်ခွာတော့မယ်လို့ ကြေညာခဲ့ပြီးနောက် မှာ စပိန်သတင်းစာ SPORT က အာတီတာဟာ ဘာစီလိုနာအသင်းကို ကိုင်တွယ်ဖို့အတွက် အာဆင်နယ်အသင်း ကနေ ထွက်ခွာဖို့ စဉ်းစားနေတယ်လို့ ဖော်ပြခဲ့ပါတယ်။ 

ဘာစီလိုနာအသင်းနည်းပြ ဇာဗီနဲ့ အာဆင်နယ်အသင်းနည်းပြ အာတီတာကို တွေ့ရစဉ်

ဘာစီလိုနာလူငယ် စီမံကိန်းကနေ ထွက်ပေါ်လာခဲ့တဲ့ အာတီတာဟာ ဘာစီလိုနာအသင်းကြီးအတွက် မကစားခဲ့ရ ဘဲ ဘီအသင်းအတွက်သာ ကစားခဲ့ပြီး အသင်းပြောင်းရွှေ့ခဲ့တာပါ။

အာတီတာဟာ ကစားသမားဘဝက အနားယူပြီးနောက် မန်စီးတီးအသင်းမှာ ဂွာဒီယိုလာရဲ့ လက်ထောက်နည်းပြ အဖြစ် ဆောင်ရွက်ကာ ၂၀၁၉ ခုနှစ်၊ ဒီဇင်ဘာလမှာ အာဆင်နယ်အသင်းကို ကိုင်တွယ်ခဲ့တာ ဖြစ်ပါတယ်။ 

အာဆင်နယ်အသင်းနဲ့ အာတီတာတို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ် နွေရာသီအထိ သက်တမ်းရှိနေတာပါ။ 

အာတီတာဟာ အာဆင်နယ်အသင်းကို ၂၀၂၀ ခုနှစ်က FA ဖလားရယူပေးနိုင်ခဲ့ပြီး မနှစ်ကရာသီ ပရီးမီးယားလိဂ် ပြိုင်ပွဲမှာ ဒုတိယနေရာရရှိအောင် ကိုင်တွယ်ပေးထားပါတယ်။

အာဆင်နယ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ထိပ်ဆုံးနေရာက လီဗာပူးလ်အသင်းနဲ့ ၅ မှတ်အကွာ တတိယနေရာမှာ ရပ်တည်နေပြီး ချန်ပီယံလိဂ်ပြိုင်ပွဲမှာ ၁၆ သင်းအဆင့်ကို ရောက်ရှိနေတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇန်နဝါရီ ၃၀

အာဖရိကဖလားပြိုင်ပွဲရဲ့ လက်ရှိချန်ပီယံ ဆီနီဂေါအသင်းဟာ ၁၆ သင်းအဆင့်မှာ အိမ်ရှင် အိုင်ဗရီကို့စ်အသင်းကို ပင်နယ်တီ အဆုံးအဖြတ်နဲ့ အရေးနိမ့်ပြီး ပြိုင်ပွဲကနေ ထွက်ခွာခဲ့ရပြီ ဖြစ်ပါတယ်။

ဒီပွဲရဲ့ ပွဲချိန်အတွင်းမှာ ၁ ဂိုးစီ သရေကျခဲ့တာကြောင့် အချိန်ပို ဆက်လက် ယှဉ်ပြိုင်ခဲ့ရပြီး ဂိုးမသွင်းနိုင်ခဲ့တဲ့ အတွက် ပင်နယ်တီ အဆုံးအဖြတ် ခံယူခဲ့ရတာပါ။ 

ပင်နယ်တီမှာ အိုင်ဗရီကို့စ်အသင်းက ၅ ဂိုးစလုံး ဂိုးဝင်ခဲ့ပြီး ဆီနီဂေါအသင်းဘက်က ၄ ဂိုးဝင်ခဲ့ကာ ၁ ဂိုး လွဲချော်ခဲ့ တာကြောင့် အိုင်ဗရီကို့စ်အသင်းက ၅ ဂိုး- ၄ ဂိုးနဲ့ အနိုင်ရရှိပြီး အာဖရိကဖလားပြိုင်ပွဲရဲ့ ကွာတားဖိုင်နယ်အဆင့်ကို တက်ရောက်နိုင်ခဲ့ပါတယ်။ 

အိုင်ဗရီကို့စ်အသင်းဟာ အုပ်စုတွင်းကနေ ထွက်ခွာဖို့ နီးစပ်ခဲ့ပေမယ့် အကောင်းဆုံးအုပ်စု တတိယရရှိခဲ့ တာကြောင့် ၁၆ သင်းအဆင့် တက်နိုင်ခဲ့ပြီး အခုဆိုရင် ကွာတားဖိုင်နယ်အထိပါ ရောက်ရှိခဲ့တာပါ။ 

 အိုင်ဗရီကို့စ်အသင်းကို တွေ့ရစဉ်

အာဖရိကဖလားချန်ပီယံဆုကို ၂ ကြိမ် ရရှိထားတဲ့ အိုင်ဗရီကို့စ်အသင်းဟာ ကွာတားဖိုင်နယ်မှာ ဘာကီနာဖာဆိုနဲ့ မာလီအသင်းတို့ပွဲစဉ်က အနိုင်ရတဲ့ အသင်းနဲ့ ယှဉ်ပြိုင်ရမှာဖြစ်ပါတယ်။ 

အိုင်ဗရီကို့စ်အသင်း တိုက်စစ်မှူး ဟော်လာက “ဒါက စိတ်လှုပ်ရှားစရာ ကောင်းပါတယ်။ ပြီးခဲ့တဲ့ရက်ပိုင်းတွေက ကျနော်တို့အတွက် ခက်ခဲခဲ့ပါတယ်။ ကျနော်တို့ဟာ တံခါးတွေဖွင့်ထားပြီး ကိုယ့်ကိုယ်ကို အခွင့်အရေးပေးပါတယ်။ အခုအချိန်မှာတော့ ကျနော်တို့ဟာ အုပ်စုအဆင့်မှာ ဖြစ်ပျက်ခဲ့တာတွေကို မေ့လို့ရပါပြီ”လို့ ပွဲအပြီး အင်တာဗျူးမှာ ပြောသွားခဲ့ပါတယ်။

လက်ရှိအချိန်မှာ အာဖရိကဖလားပြိုင်ပွဲရဲ့ ကွာတားဖိုင်နယ်ကို အိုင်ဗရီကို့စ်အသင်းအပြင် နိုင်ဂျီးရီးယား၊ အန်ဂိုလာ၊ ကွန်ဂို၊ ဂီနီနဲ့ ကိတ်ဗာဒီအသင်းတို့ တက်ရောက်ထားပါတယ်။ 

ကွာတားဖိုင်နယ် ပွဲစဉ်တွေအဖြစ် နိုင်ဂျီးရီးယားနဲ့ အန်ဂိုလာ၊ ကွန်ဂိုနဲ့ ဂီနီတို့ တွေ့ဆုံရမှာဖြစ်ပြီး အိုင်ဗရီကို့စ်နဲ့ ကိတ်ဗာဒီ အသင်းတို့ကတော့ လက်ကျန်ပွဲစဉ် ၂ ပွဲက အနိုင်ရတဲ့ အသင်းနဲ့ ယှဉ်ပြိုင်ရမှာပါ။

ကွာတားဖိုင်နယ် ပွဲစဉ်တွေကို ဖေဖော်ဝါရီ ၂ ရက်နဲ့ ၃ ရက်နေ့မှာ ကျင်းပသွားမှာဖြစ်ပြီး ဆီမီးဖိုင်နယ်ပွဲစဉ်ကို ဖေဖော်ဝါရီ ၇ ရက်၊ တတိယနေရာလုပွဲကို ဖေဖော်ဝါရီ ၁၀ ရက်နဲ့ ဗိုလ်လုပွဲကို ဖေဖော်ဝါရီ ၁၁ ရက်မှာ ကျင်းပ သွားမှာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဇန်နဝါရီ ၂၉

ပီအက်စ်ဂျီအသင်းနည်းပြ လူးဝစ်အင်းနရစ်က ဘရက်စ်အသင်းနဲ့ သရေကျခဲ့တဲ့ ပြင်သစ်လီဂူးဝမ်းပွဲစဉ်မှာ သူတို့ရှုံးနိမ့်သွားနိုင်တယ်လို့ ပြောခဲ့ပါတယ်။

လူးဝစ်အင်းနရစ်က “ ဒီပွဲမှာ ကျနော်တို့ပွဲကိုထိန်းချုပ်မှုဆုံးရှုံးသွားခဲ့ပါတယ်။ ကျနော်တို့ဟာ ဒီပွဲမှာ မတူညီတဲ့ အပိုင်း ၂ ခုရှိခဲ့ပါတယ်။ ပထမပိုင်းမှာ အလွန်ကောင်းမွန်ခဲ့ပြီး ဒီရာသီရဲ့ အကောင်းဆုံးတွေထဲက တစ်ခု ဖြစ်နိုင်ပါတယ်။ ဒုတိယပိုင်းကတော့ ဒီရာသီရဲ့ အဆိုးရွားဆုံးတွေထဲက တစ်ခုဖြစ်ခဲ့ပါတယ်။ ဒီပွဲမှာ ကျနော်တို့ ရှုံးနိမ့်သွားနိုင်ပါတယ်”လို့ပြောခဲ့တာပါ။

ပီအက်စ်ဂျီနဲ့ ဘရက်စ်အသင်းတို့ရဲ့ ပွဲစဉ်ဟာ တစ်ဖက် ၂ ဂိုးစီ သရေရလဒ်နဲ့ ပြီးဆုံးခဲ့ပြီး ဒီပွဲမှာ ပီအက်စ်ဂျီ အသင်းက အဆန်စီယို၊ မူအာနီတို့ရဲ့ သွင်းဂိုးတွေနဲ့ ဦးဆောင်နိုင်ခဲ့ပေမယ့် ဒုတိယပိုင်းမှာ ကာမာရာနဲ့ ပါရဲရားတို့က ဘရက်စ်အသင်းအတွက် ချေပဂိုးသွင်းယူခဲ့တာဖြစ်ပါတယ်။

ပီအက်စ်ဂျီအသင်း

ပီအက်စ်ဂျီအသင်းဟာ ဒီပွဲမှာ သရေကျခဲ့ပေမယ့် ပြင်သစ်လီဂူးဝမ်းအမှတ်ပေးဇယားကို ဆက်လက် ဦးဆောင်နေပြီး ဒုတိယနေရာက နိုက်စ်အသင်းကို ၆ မှတ်ဖြတ်ထားတာပါ။

ပီအက်စ်ဂျီအသင်းဟာ ဖေဖော်ဝါရီလထဲမှာ ဘရက်စ်အသင်းနဲ့ ပြင်သစ်ဖလား ၁၆ သင်းအဆင့် ပွဲစဉ် ယှဉ်ပြိုင်ရမှာဖြစ်တာကြောင့် ဒီလိုမျိုးထပ်ပြီးမဖြစ်ဖို့ မျှော်လင့်တယ်လို့ နည်းပြ လူးဝစ်အင်းနရစ်က ထပ်ပြီးပြောခဲ့ပါတယ်။

လူးဝစ်အင်းနရစ်က “ဒီပွဲက လာမယ့်ဖလားပွဲမှာ ဘယ်လောက်အထိခက်ခဲမလဲဆိုတာကို ပြသလိုက်တာပါ။ ဒါကို ကျနော်ဒေါသထွက်မိပါတယ်။ အဲ့ဒါကြောင့်လာမယ့်ပွဲစဉ်မှာ ပြီးခဲ့တဲ့ ၂ ကြိမ်ကဖြစ်ပျက်ခဲ့သလို ထပ်ပြီးမဖြစ်ဖို့ ကျနော်မျှော်လင့်ပါတယ်။ ဘရက်စ်ဟာ ပြင်သစ်လိဂ်ရဲ့အကောင်းဆုံးအသင်းတွေထဲက တစ်သင်းဆိုတာ သံသယမရှိပါဘူး”လို့ ပြောခဲ့ပါတယ်။

ပီအက်စ်ဂျီအသင်းဟာ ဒီအပတ်လီဂူးဝမ်းပွဲစဉ်အဖြစ် စထရာဘောင်းအသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN