CNI Sport News
၂၀၂၅ ခုနှစ်၊ ဖေဖော်ဝါရီ ၂၆
အယ်လ်နာဆာအသင်းခေါင်းဆောင် ရော်နယ်ဒိုက အယ်လ်ဝီဒါအသင်းနဲ့ ကစားခဲ့တဲ့ ဆော်ဒီပရိုလိဂ်ပွဲစဉ်မှာ ယာဉ်ကြောပိတ်ဆို့မှုကြောင့် ပွဲကစားဖို့နှောင့်နှေးခဲ့တဲ့အတွက် တောင်းပန်ကြောင်း ပြောခဲ့ပါတယ်။
ရော်နယ်ဒိုက “ဒီပွဲက ခက်ခဲတဲ့ပွဲပါ။ ယာဉ်ကြောပိတ်ဆို့မှုကြောင့် လမ်းတွေပိတ်ခဲ့တဲ့အတွက် ဘတ်စ်ကားနဲ့ ၃ နာရီကြာ ခရီးသွားခဲ့ရလို့ ပထမပိုင်းက ခက်ခဲခဲ့ပါတယ်။ ပွဲစတင်တာ နောက်ကျခဲ့တဲ့အတွက် အယ်လ်နာဆာ အသင်း ကိုယ်စား ကျနော် တောင်းပန်ချင်ပါတယ်။ ဒါက ထပ်ပြီး မဖြစ်သင့်ပါဘူး။ တောင်းပန်ပါတယ်။ ကျနော် တို့ဟာ ပွဲအစပိုင်း မကောင်းခဲ့ပေမယ့် ဒုတိယပိုင်းမှာတော့ အနည်းငယ် ပိုကောင်းခဲ့ပါတယ်။ နိုင်ပွဲအတွက် ကျနော်တို့ ပျော်ရွှင်တယ်”လို့ SSC Sports ကိုပြောခဲ့တာပါ။
အယ်လ်နာဆာအသင်းက အယ်လ်ဝီဒါအသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ဒီပွဲစဉ်မှာ အယ်လ်နာဆာအသင်းဟာ ပွဲစတင်မယ့်အချိန်ကို ကျော်လွန်ပြီး ၉ မိနစ်အကြာမှ အသင်းဘတ်စ်ကား ရောက်ရှိခဲ့တဲ့အတွက် ပွဲကို တစ်နာရီ ကြာ နှောင့်နှေးမှု ဖြစ်စေခဲ့ပါတယ်။
အဲဒါကြောင့်လည်း ရော်နယ်ဒိုက ပွဲကိုနှောင့်နှေးမှု ဖြစ်စေခဲ့တဲ့အတွက် တောင်းပန်ကြောင်း ပြောခဲ့တာပါ။
ရော်နယ်ဒိုကို တွေ့ရစဉ်
ရော်နယ်ဒိုဟာ ဒီပွဲစဉ်မှာ အယ်လ်နာဆာအသင်းအတွက် ၁ ဂိုး သွင်းယူခဲ့သလို အသင်းဖော်မာနေးကို ပင်နယ်တီ ပေးကန်ခဲ့ပါတယ်။
ရော်နယ်ဒိုဟာ ဒီပွဲမှာ သွင်းယူတဲ့ဂိုးကြောင့် ပရော်ဖက်ရှင်နယ် ကစားသမားဘဝ သွင်းဂိုး ၉၂၅ ဂိုးအထိ ရှိလာခဲ့ပြီ ဖြစ်ပါတယ်။
အယ်လ်နာဆာအသင်းဟာ ပြီးခဲ့တဲ့ ဆော်ဒီပရိုလိဂ်ပွဲစဉ်မှာ အယ်လ်အက်တီဖတ်အသင်းကို အရေးနိမ့်ခဲ့ပြီးနောက် ဒီပွဲမှာ နိုင်ပွဲပြန်ရအောင် ကြိုးစားခဲ့ကြတဲ့ အသင်းဖော်တွေကို ရော်နယ်ဒိုက ချီးကျူးမှုပြုလုပ်ခဲ့တာပါ။
အယ်လ်နာဆာအသင်းဟာ ဒီနိုင်ပွဲကြောင့် ဆော်ဒီပရိုလိဂ်ပွဲစဉ် ၂၂ ပွဲ ကစားအပြီးမှာ ရမှတ် ၄၇ မှတ်နဲ့ အမှတ်ပေး ဇယားအဆင့် ၃ နေရာမှာ ရပ်တည်နေပါတယ်။
အယ်လ်နာဆာအသင်းဟာ လာမယ့် ဆော်ဒီပရိုလိဂ်ပွဲစဉ်အဖြစ် အယ်လ်အိုရိုဘာအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
