CNI Sport News

၂၀၂၃ ခုနှစ်၊ သြဂုတ် ၂၄

မန်စီးတီးအသင်းဟာ ကွင်းလယ်လူ ဘာနာဒိုဆေးလ်ဗားကို အသင်းမှာ ၂၀၂၆ ခုနှစ်အထိ ရှိမယ့် စာချုပ်သက်တမ်း တိုးလိုက်ပြီလို့ တရားဝင် ကြေညာခဲ့ပါတယ်။

ဘာနာဒိုဆေးလ်ဗားဟာ ပြီးခဲ့တဲ့ဘောလုံးရာသီက မန်စီးတီးအသင်း ပရီးမီးယားလိဂ်၊ FA ဖလားနဲ့ ချန်ပီယံလိဂ် ဖလား ရယူနိုင်ခဲ့တာမှာ အဓိကအခန်းကဏ္ဍကနေ ပါဝင်ခဲ့တာပါ။

ပေါ်တူဂီကစားသမားကို အခုနွေရာသီ အပြောင်းအရွှေ့မှာ ခေါ်ယူဖို့ ဘာစီလိုနာ၊ ပီအက်စ်ဂျီနဲ့ ဆော်ဒီကလပ် အယ်လ်ဟီလယ်အသင်းတို့က ချိတ်ဆက်မှုတွေ ပြုလုပ်ခဲ့တာ ဖြစ်ပါတယ်။ 

ဒါပေမယ့် ဂန်ဒိုဂန်နဲ့ မာရက်ဇ်တို့ကို ဆုံးရှုံးခဲ့တဲ့ မန်စီးတီးအသင်းဟာ ဘာနာဒိုဆေးလ်ဗားကို စာချုပ်သစ် ချုပ်ဆိုနိုင်ဖို့ ကြိုးစားခဲ့တာမှာ အောင်မြင်ခဲ့ပါတယ်။

ဆုဖလားနဲ့အတူ တွေ့ရတဲ့ ဘာနာဒိုဆေးလ်ဗားကို တွေ့ရစဉ်

မန်စီးတီးအသင်းနဲ့ ဘာနာဒိုဆေးလ်ဗားတို့ အရင်ချုပ်ဆိုထားတဲ့ စာချုပ်ဟာ ၂၀၂၅ အထိ စာချုပ်သက်တမ်းရှိနေလို့ မန်ချက်စတာကလပ်က ၁ နှစ် သက်တမ်းတိုး စာချုပ်ချုပ်ဆိုခဲ့တာ ဖြစ်ပါတယ်။
ဘာနာဒိုဆေးလ်ဗားက “မန်စီးတီးအသင်းမှာ ၆ နှစ်ကြာ မယုံနိုင်စရာကောင်းတဲ့ အရာတွေကို ဖြတ်သန်းခဲ့ရပြီး အခု ကျနော့်ရဲ့ အချိန်တွေကို ထပ်ပြီးတိုးနိုင်ခဲ့တဲ့အတွက် ဝမ်းသာပါတယ်။ ပြီးခဲ့တဲ့ရာသီက ဆုဖလား ၃ လုံး ရယူ နိုင်ခဲ့တာက အလွန်ထူးခြားပြီး ဆာလောင်မှုနဲ့ စိတ်အားထက်သန်မှုရှိတဲ့ အသင်းရဲ့ အစိတ်အပိုင်း ဖြစ်ရတာဟာ စိတ်လှုပ်ရှားစရာပါပဲ။ အောင်မြင်မှုတွေကို ဆက်ပြီးရယူချင်ပြီး လာမယ့်နှစ် အနည်းငယ်အတွင်းမှာ ပိုကောင်းတဲ့ အမှတ်တရတွေကို မျှဝေနိုင်ဖို့ မျှော်လင့်ကြောင်း”ပြောခဲ့ပါတယ်။

အသက် ၂၉ နှစ်အရွယ်ရှိ ဘာနာဒိုဆေးလ်ဗားဟာ ၂၀၁၇ ခုနှစ်က မိုနာကိုအသင်းကနေ ရောက်ရှိလာခဲ့တာဖြစ်ပြီး မန်စီးတီးအသင်းအတွက် ၃၀၈ ပွဲ ပါဝင်ကစားထားကာ ၅၅ ဂိုး သွင်းယူထားပါတယ်။

ပေါ်တူဂီကွင်းလယ်လူဟာ မန်စီးတီးအသင်းနဲ့အတူ ပရီးမီးယားလိဂ်ဖလား ၅ ကြိမ်၊ FA ဖလား ၂ ကြိမ်၊ ကာရာ ဘောင်းဖလား ၄ ကြိမ်နဲ့ ချန်ပီယံလိဂ်ဖလား ၁ ကြိမ် ရယူထားတာပါ။ 

ရာသီသစ် ပရီးမီးယားလိဂ် ၂ ပွဲ ကစားပြီးချိန်မှာ ၂ ပွဲစလုံး အနိုင်ရရှိထားတဲ့ မန်စီးတီးအသင်းဟာ ပွဲစဉ် ၃ အဖြစ် သြဂုတ် ၂၇ ရက်မှာ ရှက်ဖီးယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဩဂုတ် ၂၄

တိုက်စစ်မှူး ဘန်ဇီမာဟာ ဆော်ဒီပရိုလိဂ်ကလပ် အယ်လ်အစ်တီဟတ်အသင်းမှာ နည်းပြဖြစ်သူ နူနိုဆန်တိုနဲ့ အဆင်မပြေမှုတွေဖြစ်နေတယ်လို့ သတင်းတွေထွက်ပေါ်နေပေမယ့် အသင်းမှာ ပျော်ရွှင်နေကြောင်း တုံ့ပြန် သွားခဲ့ပါတယ်။

ဆော်ဒီသတင်းစာတစ်စောင်က ဘန်ဇီမာဟာ သူ့ရဲ့နည်းဗျူဟာနဲ့ ကိုက်ညီမှုမရှိဘူးဆိုပြီး နည်းပြ နူနိုဆန်တိုက အယ်လ်အစ်တီဟတ်အသင်းဘုတ်အဖွဲ့ထံ အကြောင်းကြားထားတယ်လို့ ဖော်ပြထားတာပါ။ ဒါ့အပြင် နူနိုဆန်တို ဟာ ဘန်ဇီမာကို ခေါ်ယူပေးဖို့ အသင်းထံ တောင်းဆိုခဲ့ခြင်းမရှိတာကြောင့် သူတို့နှစ်ဦးကြား အဝတ်လဲခန်းထဲမှာ တင်းမာမှုတွေဖြစ်နေတယ်လို့ ဆော်ဒီသတင်းစာက ရေးသားထားတာဖြစ်ပါတယ်။ 

ဘန်ဇီမာကလည်း အယ်လ်အစ်တီဟတ်အသင်းမှာ အသင်းခေါင်းဆောင်ရာထူးရယူဖို့ တောင်းဆိုထားတာကို နည်းပြက ငြင်းပယ်ခဲ့လို့ စိတ်ပျက်နေပြီး ဆော်ဒီကလပ်ကနေ ပြန်ထွက်ခွာဖို့တောင် စဉ်းစားနေတယ်လို့ သတင်း တွေထွက်ပေါ်ခဲ့တာပါ။ ဒီလိုထင်ကြေးတွေထွက်ပေါ်နေပေမယ့် အယ်လ်အစ်တီဟတ်အသင်းရဲ့ တွစ်တာမှာ တင်ထားတဲ့ ဗွီဒီယိုဖိုင်မှာ ဘန်ဇီမာဟာ ပြုံးရွှင်နေတာကို တွေ့ခဲ့ရတာဖြစ်ပါတယ်။ 

ဘန်ဇီမာဟာ ပြီးခဲ့တဲ့ ဇွန်လကမှ ရီးရယ်လ်အသင်းကနေ ထွက်ခွာပြီး အယ်လ်အစ်တီဟတ်အသင်းနဲ့ ယူရိုသန်း ၆၀၀ တန်ကြေးရှိ ၂ နှစ်ခွဲစာချုပ်ချုပ်ဆိုခဲ့တာပါ။ ဘန်ဇီမာဟာ အယ်လ်အစ်တီဟတ်အသင်းအတွက် ၆ ပွဲကစား အပြီးမှာ ၃ ဂိုးသွင်းယူထားပေမယ့် ဆော်ဒီပရိုလိဂ်ပွဲစဉ်မှာတော့ ဂိုးဖန်တီးမှုသာ ပြုလုပ်ထားပြီး ဂိုးသွင်းယူနိုင်ခြင်း မရှိသေးတာဖြစ်ပါတယ်။

အယ်လ်အစ်တီဟတ်အသင်းဟာ ဆော်ဒီပရိုလိဂ် ၂ ပွဲကစားအပြီးမှာ ၂ ပွဲစလုံးအနိုင်ရရှိကာ အမှတ်ပေးဇယား ထိပ်ဆုံးနေရာမှာ ဦးဆောင်နေတာပါ။ ဆော်ဒီပရိုလိဂ်ပြိုင်ပွဲရဲ့ လက်ရှိချန်ပီယံ အယ်လ်အစ်တီဟတ်အသင်းဟာ သြဂုတ် ၂၄ ရက်မှာ အမှတ်ပေးပွဲစဉ်အဖြစ် အယ်လ်ရီယက်ဒ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

 CNI Sport News

၂၀၂၃ ခုနှစ်၊ သြဂုတ် ၂၃

တိုက်စစ်မှူး လူကာကူဟာ ချယ်လ်ဆီး ယူ-၂၁ အသင်းနဲ့ လေ့ကျင့်မှုတွေ ပြုလုပ်နေပြီး နည်းပြသစ် ပိုချက်တီနိုနဲ့ လည်း စကားပြောဆိုခြင်း မရှိသေးဘူးလို့ ဗြိတိန်မီဒီယာတွေက ဖော်ပြထားပါတယ်။

အင်တာမီလန်နဲ့ အယ်လ်ဟီလယ် အသင်းတွေထံ ပြောင်းရွှေ့ဖို့ အဆင်မပြေခဲ့တဲ့ လူကာကူဟာ ချယ်လ်ဆီးအသင်း မှာ သူ့အနာဂတ်နဲ့ ပတ်သက်ပြီး ရွေးချယ်စရာမရှိဘူးလို့ The Telegraph ရဲ့ဖော်ပြချက်အရ သိရတာပါ။ 

လူကာကူဟာ ဂျူဗင်တပ်စ်အသင်းထံ ပြောင်းရွှေ့ဖို့ ပုဂ္ဂိုလ်ရေးဆိုင်ရာ သဘောတူညီမှု ရရှိထားပေမယ့် ချယ်လ်ဆီး နဲ့ အီတလီကလပ်တို့ဟာ ပြောင်းရွှေ့ကြေး သဘောတူညီမှု မရသေးတာကြောင့် အပြောင်းအရွှေ့ဖြစ်ဖို့ ခက်ခဲနေ တာ ဖြစ်ပါတယ်။

လူကာကူကို တွေ့ရစဉ်

ဘယ်လ်ဂျီယံ တိုက်စစ်မှူးဟာ ချယ်လ်ဆီး ပထမအသင်းနဲ့ လေ့ကျင့်မှု မပြုလုပ်ဘဲ ယူ-၂၁ အသင်းနဲ့သာ လေ့ကျင့် မှုတွေ ပြုလုပ်နေပြီး နည်းပြသစ် ပိုချက်တီနိုနဲ့ စကားပြောဆိုဖူးခြင်း မရှိဘူးလို့ သိရပါတယ်။ 

ဂျူဗင်တပ်စ်အသင်း ပရိသတ်တွေဟာ အခုနွေရာသီ အပြောင်းအရွှေ့မှာ လူကာကူကို အသင်းက ခေါ်ယူမယ့် အစီအစဉ်ကို ကန့်ကွက်ထားသလို အင်တာမီလန်နဲ့ ချယ်လ်ဆီးအသင်း ပရိသတ်တွေကလည်း လူကာကူကို အသင်းမှာ ပြန်ပြီးမမြင်တွေ့ချင်နေကြတာ ဖြစ်ပါတယ်။

ယူနိုက်တက် တိုက်စစ်မှူးဟောင်း ဒွိုက်ယောခ့်က အသင်းအနေနဲ့ တိုက်စစ်မှူးဟောင်း လူကာကူကို ပြန်လည် ခေါ်ယူဖို့ မကြာသေးခင်က တိုက်တွန်းထားပါတယ်။ 

လူကာကူဟာ ထိပ်တန်း ၆ သင်းမှာ ကစားနိုင်တဲ့ လုံလောက်တဲ့ အရည်အသွေးရှိပြီး ဂိုးသွင်းစွမ်းရည်မှာလည်း ကောင်းမွန်တဲ့ မှတ်တမ်းတွေ ပိုင်ဆိုင်ထားတာကြောင့် ယူနိုက်တက်အနေနဲ့ ပြန်လည်ခေါ်ယူသင့်တယ်လို့ ဒွိုက်ယော့ခ်က ပြောခဲ့တာ ဖြစ်ပါတယ်။ 

နွေရာသီ အပြောင်းအရွှေ့ ဈေးကွက်ဟာ စက်တင်ဘာ ၁ ရက်မှာ ပိတ်မှာဖြစ်တာကြောင့် ချယ်လ်ဆီးအသင်း အနေနဲ့ လူကာကူကို အမြန်ဆုံး ရောင်းချနိုင်မယ့် နည်းလမ်းကို ရှာဖွေနေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ သြဂုတ် ၂၃

ဆော်ဒီပရိုလိဂ်ကလပ် အယ်လ်အီတီဖတ်အသင်းက ယူနိုက်တက်တိုက်စစ်မှူး ဂရင်းဝုဒ်ကို ခေါ်ယူဖို့ စဉ်းစားနေ တယ်လို့ သတင်းတွေ ထွက်ပေါ်ခဲ့တာကို နည်းပြဖြစ်သူ စတီဗင်ဂျရတ်က ငြင်းဆန်သွားခဲ့ပါတယ်။

လီဗာပူးလ်ဂန္ထဝင် ကစားသမားဟောင်းက ဂရင်းဝုဒ်နဲ့ အယ်လ်အီတီဖတ်အသင်းရဲ့ ထင်ကြေးတွေဟာ သတင်း အတုအယောင်တွေသာ ဖြစ်တယ်လို့ သူ့ရဲ့ဆိုရှယ်မီဒီယာမှာ ပြောခဲ့တာကို သတင်းတွေမှာ ဖော်ပြထားတာပါ။

ဂရင်းဝုဒ်ဟာ ယူနိုက်တက်အသင်းရဲ့ ကလပ်အတွင်းပိုင်း စုံစမ်းစစ်ဆေးမှုတွေ ခံယူအပြီးမှာ အသင်းကနေ ထွက်ခွာဖို့ သဘောတူညီမှု ရရှိထားတာ ဖြစ်ပါတယ်။
ဆော်ဒီကလပ် အသင်းတွေဟာ အခုနွေရာသီ အပြောင်းအရွှေ့မှာ ငွေကြေး အများအပြားသုံးစွဲပြီး ဘန်ဇီမာ၊ မာနေး၊ နေမာတို့ အပါအဝင် နာမည်ကြီး ကစားသမား အများအပြားကို ခေါ်ယူထားတာပါ။ 

စတီဗင်ဂျရတ်ရဲ့ အယ်လ်အီတီဖတ်အသင်းဟာ လီဗာပူးလ်အသင်း ခေါင်းဆောင်ဟောင်း ဟန်ဒါဆန်ကို ခေါ်ယူနိုင် ခဲ့ပြီး ဂရင်းဝုဒ်ကို ခေါ်ယူဖွယ်ရှိတယ်လို့ သတင်းတွေ ထွက်ပေါ်ခဲ့တာ ဖြစ်ပါတယ်။ 

ဂရင်းဝုဒ်နဲ့ စတီဗင်ဂျရတ်ကို တွေ့ရစဉ်

ဒါပေမယ့် ဂရင်းဝုဒ်ရဲ့ လက်ရှိ အခြေအနေတွေကြောင့် ဆော်ဒီပရိုလိဂ် ကလပ်ဟာ လက်မှတ်ထိုး ခေါ်ယူနိုင်ဖို့ အတွက် တုံ့ဆိုင်းနေတာလို့ ယူဆရပါတယ်။ 

ယူနိုက်တက်အသင်း နည်းပြဟောင်း မော်ရင်ဟို ကိုင်တွယ်နေတဲ့ ရိုးမားအသင်းကလည်း ဂရင်းဝုဒ်ကို ခေါ်ယူဖို့ စိတ်ဝင်စားခြင်း မရှိတော့ဘူးလို့ သတင်းတွေ ထွက်ပေါ်နေတာ ဖြစ်ပါတယ်။ 

ဒါပေမယ့် ဘက်ဆီးတပ်စ်နဲ့ ဂါလာတာစာရေး အသင်းတို့ အပါအဝင် တူရကီကလပ် အများအပြားကတော့ ဂရင်းဝုဒ်ကို အငှားနဲ့ ခေါ်ယူဖို့ စဉ်းစားနေတာပါ။

ယူနိုက်တက်အသင်းနဲ့ ဂရင်းဝုဒ်တို့ ချုပ်ဆိုထားတဲ့ စာချုပ်ဟာ ၂၀၂၅ ခုနှစ်အထိ သက်တမ်းရှိနေတဲ့အတွက် မန်ချက်စတာ ကလပ်ဘက်က အပြီးသတ် ရောင်းချမလား၊ အငှားချမလားဆိုတာ ဆုံးဖြတ်ချက် ချရမှာ ဖြစ်ပါတယ်။ 

ယူနိုက်တက်အသင်းဟာ အကယ်ဒမီထွက် ဂရင်းဝုဒ်ကို အသင်းမှာ ဆက်ကစားခွင့် မပေးတော့ဘဲ ထွက်ခွာခွင့် ပေးတဲ့အပေါ် ပရိသတ် အများအပြားက ဝေဖန်မှုတွေ ပြုလုပ်နေကြတယ်လို့ သိရပါတယ်။

Source: Daily Mail

CNI Sport News

၂၀၂၃ ခုနှစ်၊ ဩဂုတ် ၂၃

ယူနိုက်တက်အသင်းကွင်းလယ်လူ မေဆန်မောင့်ဟာ စပါးအသင်းနဲ့ ပွဲစဉ်မှာ ရရှိခဲ့တဲ့ဒဏ်ရာကြောင့် လာမယ့် စက်တင်ဘာလအထိ အနားယူရမယ်လို့ အသင်းဘက်က ထုတ်ပြန်ခဲ့ပါတယ်။

အခု နွေရာသီအပြောင်းအရွှေ့မှာ ချယ်လ်ဆီးအသင်းကနေ ကနဦးပြောင်းရွှေ့ကြေး ပေါင် ၅၅ သန်းနဲ့ ပြောင်းရွှေ့ လာခဲ့တဲ့ မေဆန်မောင့်ဟာ ယူနိုက်တက်အသင်းရဲ့ ပရီးမီးယားလိဂ်အဖွင့်ပွဲစဉ် ၂ ပွဲစလုံးမှာ ပါဝင်ကစားခဲ့တာပါ။ မေဆန်မောင့်ဟာ လာမယ့်လ နိုင်ငံတကာပွဲစဉ်အပြီးအထိ အနားယူရဖွယ်ရှိနေတာကြောင့် ယူနိုက်တက်အသင်းရဲ့ ပရီးမီးယားလိဂ်ပွဲစဉ်တွေဖြစ်တဲ့ နော်တင်ဟမ်ဖောရက်စ်၊ အာဆင်နယ်အသင်းတို့နဲ့ ပွဲစဉ်တွေကို ပါဝင်နိုင်တော့မှာ မဟုတ်ပါဘူး။ 

အသက် ၂၄ နှစ်အရွယ်ရှိ ကစားသမားဟာ ယူကရိန်းအသင်းနဲ့ စက်တင်ဘာ ၉ ရက်မှာကစားမယ့် ယူရို ၂၀၂၄ ခြေစစ်ပွဲမှာလည်း အင်္ဂလန်လက်ရွေးစင်အသင်းအတွက် ပါဝင်နိုင်တော့မှာမဟုတ်ဘူးလို့ သိရပါတယ်။ 

မေဆန်မောင့်ဟာ ယူနိုက်တက်အသင်းရဲ့ ပရီးမီးယားလိဂ်အဖွင့်ပွဲစဉ် ၂ ပွဲစလုံးမှာ ခြေစွမ်းပြသနိုင်ဖို့ ရုန်းကန် နေခဲ့ရလို့ ပရိသတ်တွေရဲ့ ဝေဖန်မှုတွေလည်း ခံနေရတာပါ။ 

ယူနိုက်တက်အသင်းနည်းပြ အဲရစ်တန်ဟတ်ကတော့ ကွင်းလယ်ပိုင်းမှာ ရွေးချယ်စရာတွေ အကန့်အသတ်သာ ရှိတဲ့အတွက် မေဆန်မောင့်ရဲ့ ဒဏ်ရာဟာ သူ့အတွက် သတင်းဆိုးဖြစ်ခဲ့ပါတယ်။ ယူနိုက်တက်အသင်းဟာ နွေရာသီအပြောင်းအရွှေ့မပိတ်ခင်မှာ ကွင်းလယ်ပိုင်းအတွက် ကစားသမားသစ်တွေ ဖြည့်တင်းဖို့ လုပ်ဆောင်နေပြီး ပီအက်စ်ဂျီအသင်းက ဗာရက်တီနဲ့ ဖီအိုရင်တီးနားအသင်းက အမ်မရာဘတ်တို့ကို ဦးစားပေးပစ်မှတ်တွေအဖြစ် သတ်မှတ်ထားတယ်လို့ ဗြိတိန်သတင်းတွေမှာ ဖော်ပြထားပါတယ်။

ပရီးမီးယားလိဂ် ၂ ပွဲကစားပြီးအချိန်မှာ ၁ ပွဲနိုင် ၁ ပွဲရှုံးနိမ့်ထားတဲ့ ယူနိုက်တက်အသင်းဟာ နော်တင်ဟမ် ဖောရက်စ်အသင်းကို အိမ်ကွင်းမှာ ကစားတဲ့ပွဲမှာ နိုင်ပွဲပြန်လည်ရယူနိုင်ဖို့ မျှော်လင့်နေတာဖြစ်ပါတယ်။ 

Source:BBC

CNI Sport News

၂၀၂၃ ခုနှစ်၊ သြဂုတ် ၂၃

အယ်လ်နာဆာ အသင်းခေါင်းဆောင် ရော်နယ်ဒိုဟာ ရှာဘတ်အယ်လ်အာလီအသင်းနဲ့ ကစားခဲ့တဲ့ အာရှ ချန်ပီယံလိဂ် ပလေးအော့ဖ် အဆင့်ပွဲစဉ်မှာ ပင်နယ်တီရရှိမယ့် အခွင့်အရေး ၃ ကြိမ် ငြင်းပယ်ခံရပြီးနောက် ဒိုင်လူကြီးနဲ့ ထိပ်တိုက်တွေ့ပြီး ဒေါသပေါက်ကွဲနေခဲ့တာ ဖြစ်ပါတယ်။

ရော်နယ်ဒိုရဲ့ အယ်လ်နာဆာအသင်းဟာ အာရှချန်ပီယံလိဂ် ပလေးအော့ဖ် အဆင့်ဖြစ်တဲ့ ရှာဘတ်အယ်လ်အာလီ အသင်းနဲ့ ပွဲမှာ နောက်ကျ သွင်းဂိုးတွေကြောင့် ၄ ဂိုး- ၂ ဂိုးနဲ့ အနိုင်ရပြီး အုပ်စုအဆင့်ကို ယှဉ်ပြိုင်ခွင့် ရရှိသွားခဲ့ပါတယ်။ 

ဒါပေမယ့် ရော်နယ်ဒိုဟာ ပထမပိုင်းမှာ ပင်နယ်တီ အခွင့်အရေး ၃ ကြိမ် မရတဲ့အတွက် ဒေါသထွက်နေခဲ့တာ ဖြစ်ပါတယ်။ 

ပေါ်တူဂီတိုက်စစ်မှူးဟာ ဒိုင်လူကြီးကို ဒေါသတကြီးနဲ့ ရှင်းပြနေခဲ့ပြီး အိပ်ရာကနေ ထတော့လို့ အော်ဟစ်ခဲ့တာပါ။

ဒါ့အပြင် ရော်နယ်ဒိုဟာ ကွင်းဘေးစည်းမှာ သူနဲ့ ဆယ်လ်ဖီရိုက်ဖို့ ကြိုးစားနေတဲ့ အမျိုးသားတစ်ဦးကိုလည်း တွန်းထုတ်ပြီး ဥမင်ထဲ ဝင်ရောက်သွားခဲ့ပါတယ်။ 

ရော်နယ်ဒိုကို တွေ့ရစဉ်

ဒါပေမယ့် ပွဲအပြီးမှာတော့ အယ်လ်နာဆာအသင်းဟာ ရှာဘတ်အယ်လ်အာလီအသင်းကို အနိုင်ရခဲ့တာကြောင့် ရော်နယ်ဒိုဟာ အသင်းဖော်တွေနဲ့အတူ အောင်ပွဲခံနေခဲ့တာပါ။ 

ရော်နယ်ဒိုဟာ ကစားသမားဘဝ ပထမဆုံးအကြိမ် အာရှချန်ပီယံလိဂ်ပြိုင်ပွဲကို ဝင်ရောက် ယှဉ်ပြိုင်ခွင့် ရခဲ့တာ လည်း ဖြစ်ပါတယ်။

အယ်လ်နာဆာအသင်းဟာ ဆော်ဒီပရိုလိဂ် ကလပ်တွေဖြစ်တဲ့ အယ်လ်အီတီဟတ်၊ အယ်လ်ဟီလယ်အသင်းတို့နဲ့ အာရှချန်ပီယံလိဂ်အုပ်စုအဆင့်ကို ယှဉ်ပြိုင်ခွင့် ရရှိခဲ့တာပါ။ 

အယ်လ်နာဆာအသင်းဟာ ရာသီအစမှာ အာရပ်ကလပ် ချန်ပီယံများဖလားပြိုင်ပွဲမှာ ချန်ပီယံဆု ရယူနိုင်ခဲ့ပေမယ့် ဆော်ဒီပရိုလိဂ်ပွဲဦးထွက် ၂ ပွဲစလုံး ရှုံးပွဲကြုံတွေ့ခဲ့ရပြီး ရလဒ်တွေဆိုးနေခဲ့တာ ဖြစ်ပါတယ်။

အယ်လ်နာဆာအသင်းဟာ သြဂုတ် ၂၅ ရက်မှာ ဆော်ဒီပရိုလိဂ် ပွဲစဉ်အဖြစ် အယ်လ်ဖာတက်ချ်အသင်းနဲ့ ယှဉ်ပြိုင်ရမှာဖြစ်ပြီး နိုင်ပွဲပြန်လည်ရယူနိုင်ဖို့ လိုအပ်နေပြီလည်း ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဩဂုတ် ၂၂

စပိန်ဝါရင့်နောက်ခံလူဟောင်း ရာမို့စ်ဟာ အခုနွေရာသီအပြောင်းအရွှေ့မှာ တူရကီကလပ် ဘက်ဆီးတပ်စ် အသင်း ထံ ပြောင်းရွှေ့ဖို့ နီးစပ်နေပြီလို့ Foot Mercato ဂျာနယ်လစ် ဆန်တီအူနာရဲ့ ပြောကြားချက်ကို ကိုးကားပြီး သတင်းတွေမှာ ဖော်ပြထားပါတယ်။

ရာမို့စ်ဟာ ပီအက်စ်ဂျီအသင်းနဲ့ (၂)နှစ်သက်တမ်းရှိစာချုပ်ကုန်ဆုံးပြီးနောက် လက်ရှိအချိန်မှာ အသင်းလက်မဲ့ ဖြစ်နေတာပါ။ ရာမို့စ်ကို ခေါ်ယူဖို့ တူရကီထိပ်တန်းကလပ် ဂါလာတာစာရေးအသင်းကလည်း စိတ်ဝင်စားခဲ့ပေမယ့် ဒီပြိုင်ဆိုင်မှုမှာ ဘက်ဆီးတပ်စ်အသင်းက အနိုင်ရခဲ့တာဖြစ်ပါတယ်။ အသက် ၃၇ နှစ်အရွယ်ရှိ ကစားသမားဟာ အပြောင်းအရွှေ့အပြီးမသတ်ခင် တူရကီကလပ်ရဲ့ နောက်ဆုံးကမ်းလှမ်းမှုကို စောင့်ဆိုင်းနေတာပါ။

ရာမို့စ်ဟာ ပီအက်စ်ဂျီအသင်းကနေ ထွက်ခွာပြီးနောက် မေဂျာလိဂ်ကလပ် လော့စ်အိန်ဂျလိစ်အသင်းထံ ပြောင်းရွှေ့ဖို့အတွက် ချိတ်ဆက်မှုတွေပြုလုပ်ခဲ့ပေမယ့် သဘောတူညီမှုကို အကောင်အထည်မဖော်နိုင်တာကြောင့် အပြောင်းအရွှေ့ဖြစ်မလာခဲ့ပါဘူး။ ရီးရယ်လ်ကစားသမားဟောင်းဟာ စပိန်ကလပ်တွေထံ ပြန်ဖွယ်ရှိတယ်လို့ သတင်းတွေထွက်ပေါ်ခဲ့သလို ဆော်ဒီကလပ်တွေရဲ့ ချိတ်ဆက်မှုတွေလည်း ခံခဲ့ရတာဖြစ်ပါတယ်။

ဘက်ဆီးတပ်စ်အသင်းဟာ မကြာသေးခင်ကမှ လီဗာပူးလ်အသင်းကစားသမားဟောင်း ချိန်ဘာလိန်ကို ခေါ်ယူ ထားပြီး ရာမို့စ်ကိုပါ ထပ်မံခေါ်ယူကာ အသင်းလူစာရင်းအင်အားကို တောင့်တင်းအောင် လုပ်ဆောင်နေတာပါ။ ဘက်ဆီးတပ်စ်အသင်းဟာ သြဂုတ် ၂၄ ရက်မှာ ယူရိုပါကွန်းဖရန့်စ်လိဂ်ပွဲစဉ်အဖြစ် ဒိုင်နမိုကိဗ်အသင်းနဲ့ ယှဉ်ပြိုင် ရမှာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဩဂုတ် ၂၂

ပြင်သစ်ဘောလုံးအဖွဲ့ချုပ်ဟာ ဂန္ထဝင်တိုက်စစ်မှူးကြီး အွန်နရီကို ပြင်သစ်ယူ-၂၁ နည်းပြသစ်အဖြစ် ၂ နှစ် စာချုပ်ချုပ်ဆိုကာ ခန့်အပ်လိုက်ပြီဖြစ်ပါတယ်။

ပြင်သစ်လက်ရွေးစင်အသင်းကို ၁၉၉၈ ကမ္ဘာ့ဖလားပြိုင်ပွဲမှာ ချန်ပီယံဆုရရှိအောင် စွမ်းဆောင်ပေးနိုင်ခဲ့တဲ့ အွန်နရီဟာ ရီပိုလီရဲ့နေရာမှာ အစားထိုးဝင်ရောက်ပြီး ပြင်သစ် ယူ-၂၁ နည်းပြသစ်အဖြစ် တာဝန်ယူရမှာပါ။ အသက် ၄၆ နှစ်အရွယ်ရှိ အွန်နရီဟာ ဘယ်လ်ဂျီယံလက်ရွေးစင်အသင်းမှာ လက်ထောက်နည်းပြအဖြစ် နှစ်ကြိမ် တာဝန်ယူခဲ့သလို မိုနာကိုနဲ့ မွန်ထရီရယ်အင်ပတ်အသင်းတွေကို နည်းပြအဖြစ် ကိုင်တွယ်ခဲ့တာဖြစ်ပါတယ်။

အွန်နရီဟာ ပြင်သစ်ဘောလုံးအဖွဲ့ချုပ်ရဲ့ အဓိကရည်မှန်းချက်ဖြစ်တဲ့ ၂၀၂၄ ပဲရစ်အိုလံပစ်ပြိုင်ပွဲမှာ ယူ-၂၃ အသင်း ကို ဦးဆောင်ရမှာဖြစ်သလို ၂၀၂၅ ဥရောပချန်ပီယံရှစ်ပြိုင်ပွဲ ယှဉ်ပြိုင်ခွင့်ရဖို့အတွက် ခြေစစ်ပွဲအောင်မြင်အောင် ယူ-၂၁ အသင်းကို ကိုင်တွယ်ရမှာပါ။ အော်ဇေးယူ-၁၉ နဲ့ အန်းဂါးစ်နည်းပြဟောင်း ဘာတီကလီဟာ လက်ထောက် နည်းပြအဖြစ် အွန်နရီရဲ့ နည်းပြအဖွဲ့ဝင်ထဲမှာ ပါဝင်ရမှာဖြစ်ပါတယ်။

အွန်နရီဟာ ပြင်သစ်လက်ရွေးစင်အသင်းအတွက် ၁၂၃ ပွဲပါဝင်ကစားခဲ့ပြီး ၅၁ ဂိုးသွင်းယူကာ ယူရို ၂၀၀၀ ပြိုင်ပွဲ မှာလည်း နိုင်ငံအသင်းနဲ့အတူ ချန်ပီယံဆုကို ရယူနိုင်ခဲ့တာပါ။ အာဆင်နယ်ကစားသမားဟောင်းဟာ ၂၀၂၁ ခုနှစ်၊ မေလက ရောဘတ်တိုမာတီနက်ဇ်ရဲ့ လက်အောက်မှာဘယ်လ်ဂျီယံလက်ရွေးစင်အသင်းရဲ့ လက်ထောက် နည်းပြ အဖြစ် ဒုတိယအကြိမ်တာဝန်ယူပြီးနောက် နည်းပြသစ် တီဒတ်စ်ကိုလက်ထက်မှာတော့ ကမ်းလှမ်းခြင်း မခံရလို့ ထွက်ခွာလာခဲ့တာဖြစ်ပါတယ်။

အွန်နရီဟာ ပြင်သစ်ယူ-၂၁ အသင်းကို စက်တင်ဘာ ၇ ရက် ဒိန်းမတ်နဲ့ ခြေစမ်းပွဲ၊ စက်တင်ဘာ ၁၁ ရက် ဆလိုဗေးနီးယားနဲ့ ဥရောပယူ-၂၁ ခြေစစ်ပွဲတွေမှာ စတင်ကိုင်တွယ်ရတော့မှာဖြစ်ပြီး သြဂုတ် ၃၁ ရက်မှာ သူ့ရဲ့ ပထမဆုံးလူစာရင်းကို ထုတ်ပြန်ဖွယ်ရှိနေတာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၂၂

ယူနိုက်တက်ကနေ ထွက်ခွာခဲ့ပြီဖြစ်တဲ့ တိုက်စစ်မှူး ဂရင်းဝုဒ်ကို ခေါ်ယူဖို့ အသင်းအများအပြားက မန်ချက်စတာကလပ်ထံ ဆက်သွယ်မှုတွေပြုလုပ်ခဲ့တယ်လို့ ဗြိတိန်မီဒီယာတွေက ဖော်ပြခဲ့ပါတယ်။

၅ လကြာစုံစမ်းစစ်ဆေးမှုတွေပြုလုပ်အပြီးမှာ ဂရင်းဝုဒ်ဟာ ပြင်းထန်တဲ့ ပြစ်မှုကျူးလွန်ထားခြင်းမရှိဘူးလို့ ယူနိုက်တက်အသင်းဘက်က တွေ့ရှိခဲ့ပေမယ့် ကစားသမားဘဝကို တခြားအသင်းမှာ ဆက်သွားတာက အကောင်းဆုံးဖြစ်လိမ့်မယ်လို့ နှစ်ဖက်စလုံးက ဆုံးဖြတ်ချက်ချခဲ့တာပါ။ အဲဒါကြောင့် ယူနိုက်တက်အတွက် ကစားမှာမဟုတ်တော့တဲ့ ဂရင်းဝုဒ်ကို ခေါ်ယူဖို့အတွက် အသင်းအများအပြားက ဆက်သွယ်မှုတွေ ပြုလုပ် ခဲ့ကြတာဖြစ်ပါတယ်။

ဂရင်းဝုဒ်ဟာ အင်္ဂလန်ကလပ်တွေထံ ပြောင်းရွှေ့ဖွယ်မရှိဘဲ သူ့ကို ခေါ်ယူဖို့ စိတ်ဝင်စားနေတဲ့ တူရကီ၊ အီတလီနဲ့ အခြားနိုင်ငံက ကလပ်အသင်းတွေထံ ပြောင်းရွှေ့ဖွယ်ရှိနေတာပါ။ အင်္ဂလန်တိုက်စစ်မှူးကို ခေါ်ယူဖို့ စိတ်ဝင်စားတဲ့ အသင်းတွေထဲမှာ ယူနိုက်တက်အသင်းနည်းပြဟောင်း မော်ရင်ဟိုကိုင်တွယ်နေတဲ့ ရိုးမားအသင်းလည်း ပါဝင် နေတာဖြစ်ပါတယ်။ 

ဂရင်းဝုဒ်ဟာ ယူနိုက်တက်အသင်းကနေ အငှား ဒါမှမဟုတ် အပြီးသတ်ထွက်ခွာမှာဖြစ်ပြီး တစ်ပတ်လုပ်ခပေါင် ၇၅,၀၀၀ နဲ့ ၂၀၂၅ ခုနှစ်နွေရာသီအထိရှိတဲ့ စာချုပ်ကို ဖျက်သိမ်းသွားမှာပါ။ ယူနိုက်တက်အသင်းဟာ အစောပိုင်းက ဂရင်းဝုဒ်ကို အသင်းလူစာရင်းထဲ ပြန်လည်ထည့်သွင်းဖို့ စီစဉ်ထားပေမယ့် ကန့်ကွက်မှုတွေကြောင့် အသင်းကနေ ထွက်ခွာခွင့်ပြုဖို့ ဆုံးဖြတ်ခဲ့တာဖြစ်ပါတယ်။ 

ဂရင်းဝုဒ်ကလည်း ဒီဆုံးဖြတ်ချက်ဟာ ယူနိုက်တက်၊သူ့မိသားစုနဲ့ သူကိုယ်တိုင်ပူးပေါင်းဆောင်ရွက်ခဲ့တဲ့ လုပ်ငန်း စဉ်ဖြစ်ပြီး အသင်းကနေ ထွက်ခွာတာဟာ သူ့အတွက် အကောင်းဆုံး ဆုံးဖြတ်ချက်ဖြစ်တယ်လို့ ပြောထားတာပါ။ အသက် ၂၁ နှစ်အရွယ်ရှိကစားသမားဟာ ယူနိုက်တက်ကနေ ထွက်ခွာခဲ့ပေမယ့် အသင်းဟာ သူ့ရဲ့ ဘဝ အစိတ်အပိုင်းထဲမှာ အမြဲတမ်းရှိနေမှာဖြစ်ပြီး အသင်းကို ကျေးဇူးတင်တယ်လို့ ထုတ်ပြန်ချက်ထဲမှာ ရေးသား ထားခဲ့ပါတယ်။

၂၀၁၈-၁၉ ဘောလုံးရာသီမှာ ယူနိုက်တက်အသင်းကြီးအတွက် စတင်ပွဲထွက်ခွင့်ရခဲ့တဲ့ ဂရင်းဝုဒ်ဟာ အသင်း အတွက် ၁၂၉ ပွဲ ပါဝင်ကစားခဲ့ပြီး ၃၉ ဂိုးသွင်းယူနိုင်ခဲ့ပါတယ်။

Source:DailyMail