CNI Sport News

၂၀၂၃ ခုနှစ်၊ ဒီဇင်ဘာ ၂၆

ပေါ်တူဂီဘောလုံးအဖွဲ့ချုပ်(FPF)ဥက္ကဋ္ဌ ဖာနန်ဒိုဂိုးမက်စ်က အသင်းခေါင်းဆောင် ရော်နယ်ဒိုဟာ နိုင်ငံအသင်းအတွက် နှစ်ပေါင်းများစွာကြာ ဆက်ပြီး ကစားနေဦးမှာ ဖြစ်တယ်လို့ ပြောလိုက်ပါတယ်။

ဖာနန်ဒိုဂိုးမက်စ်က “သေချာတာကတော့ ရော်နယ်ဒိုဟာ ကျနော်ဥက္ကဋ္ဌ ရာထူးကနေ ထွက်ခွာပြီးတဲ့အထိ သူဟာ ပေါ်တူဂီအသင်းကနေ အနားယူဦးမှာ မဟုတ်သေးပါဘူး။ သူပြသနေတဲ့ ခွန်အားတွေနဲ့ ရည်မှန်းချက်တွေအတိုင်း ဆက်ပြီးရှိနေမယ်ဆိုရင် နောက်ထပ် နှစ်ပေါင်းများစွာ နိုင်ငံအသင်းမှာ ဆက်ပြီးရှိနေမယ်လို့ ကျနော် ထင်ကြောင်း” ပြောခဲ့ပါတယ်။

ရော်နယ်ဒိုဟာ ကစားသမားဘဝ အဆုံးသတ်တော့မယ့် အသက် ၃၈ နှစ်အရွယ် ရောက်ရှိနေပြီ ဖြစ်ပေမယ့် အမြင့်ဆုံးအဆင့်မှာ အကောင်းဆုံး လုပ်ဆောင်ပြသနေတာ ဖြစ်ပါတယ်။ 

ရော်နယ်ဒိုဟာ ပေါ်တူဂီအသင်း ယူရို ၂၀၂၄ ခြေစစ်ပွဲမှာ ရာနှုန်းပြည့်နိုင်ပွဲနဲ့ ခြေစစ်ပွဲ အောင်မြင်အောင် ၁၀ ဂိုး အထိသွင်းပြီး ခြေစွမ်းပြသနိုင်ခဲ့ပါတယ်။

ရော်နယ်ဒိုနဲ့ ပေါ်တူဂီဘောလုံးအဖွဲ့ချုပ်အကြီးအကဲကို တွေ့ရစဉ်

ရော်နယ်ဒိုဟာ ပေါ်တူဂီအသင်းအတွက် ၂၀၅ ပွဲ ပါဝင်ကစားထားပြီး ၁၂၈ ဂိုးသွင်းယူကာ နိုင်ငံတကာ ဂိုးသွင်း အများဆုံး ကစားသမားအဖြစ် စံချိန်တင်ထားပါတယ်။

ရော်နယ်ဒိုဟာ လာမယ့်နွေရာသီမှာ ကျင်းပမယ့် ယူရို ၂၀၂၄ ပြိုင်ပွဲမှာ ပေါ်တူဂီအသင်းအတွက် ပါဝင် ကစားပေး မယ်လို့ အတည်ပြုထားပေမယ့် ပရိသတ်တွေကတော့ သူတို့ရဲ့ အချစ်တော်ကစားသမား နိုင်ငံတကာ ကစားသမား ဘဝကနေ မကြာခင် အနားယူမယ့် အခြေအနေကို စိုးရိမ်မှုတွေရှိနေပါတယ်။

အဲ့ဒါကြောင့် ပေါ်တူဂီဘောလုံးအဖွဲ့ချုပ် အကြီးအကဲက ရော်နယ်ဒိုနဲ့ ပတ်သက်ပြီး ပရိသတ်တွေစိုးရိမ်တာ လျော့စေမယ့် စကားပြောခဲ့တာ ဖြစ်ပါတယ်။

ရော်နယ်ဒိုဟာ ပေါ်တူဂီအသင်းနဲ့ ယူရို ၂၀၁၆ ၊ ၂၀၁၉ UEFA နေးရှင်းလိဂ်ပြိုင်ပွဲတွေမှာ ချန်ပီယံဆုရရှိထားပြီး ယူရို ၂၀၂၄ ပြိုင်ပွဲမှာ သူ့ရဲ့ လက်ရွေးစင်ကစားသမားဘဝ တတိယမြောက် ချန်ပီယံဆုဖလားကို ရယူဖို့ ပစ်မှတ်ထားနေ တာ ဖြစ်ပါတယ်။

Source: Sportskeeda

CNI Sport News

၂၀၂၃ ခုနှစ်၊ ဒီဇင်ဘာ ၂၆

စပါးအသင်းဟာ တိုက်စစ်မှူး ဟာရီကိန်းရဲ့နေရာမှာ အစားထိုးဖို့အတွက် တိုက်စစ်မှူးရှာဖွေနေပြီး ဘုန်းမောက် အသင်းတိုက်စစ်မှူး ဆိုလန်ကီကို အနီးကပ်စောင့်ကြည့်နေတယ်လို့ ဗြိတိန်မီဒီယာတွေက ဖော်ပြထားပါတယ်။

စပါးအသင်းဟာ ဘိုင်ယန်မြူးနစ်အသင်းထံ ပေါင်သန်း ၁၀၀ နဲ့ ပြောင်းရွှေ့ခဲ့တဲ့ ဟာရီကိန်းရဲ့နေရာမှာ အစားထိုး ဖို့အတွက် တိုက်စစ်မှူးတစ်ဦးခေါ်ယူထားခြင်းမရှိသေးတာပါ။ ဒါပေမယ့် စပါးအသင်းရဲ့ အခြားကစားသမားတွေ ဟာ နည်းပြပိုစတီကိုဂလူးလက်အောက်မှာ အလွန်ကောင်းမွန်တဲ့ စွမ်းဆောင်ရည်တွေကို ပြသထားတာ ဖြစ်ပါ တယ်။ ဒီလိုကောင်းမွန်တဲ့ စွမ်းဆောင်ရည်တွေကို ပြသနေပေမယ့် စပါးအသင်းကတော့ တိုက်စစ်မှူးတစ်ဦး ခေါ်ယူဖို့ လိုအပ်တယ်ဆိုတာကို သိရှိတာကြောင့် ဘုန်းမောက်အသင်းတိုက်စစ်မှူး ဆိုလန်ကီက သူတို့ရဲ့ ပစ်မှတ် ဖြစ်လာခဲ့တာပါ။

ဆိုလန်ကီဟာ ဖူလ်ဟမ်အသင်းနဲ့ ပွဲစဉ်မတိုင်ခင် နောက်ဆုံးကစားခဲ့တဲ့ နော်တင်ဟမ်ဖောရက်စ်အသင်းနဲ့ ပွဲမှာ ဘုန်းမောက်အသင်းအတွက် ဟက်ထရစ်ဂိုးသွင်းယူခဲ့ပြီး ဒီရာသီ ပရီးမီးယားလိဂ်သွင်းဂိုး ၁၁ ဂိုးအထိ ရှိလာခဲ့ ပါတယ်။ စပါးအသင်းဟာ ဘရိုက်တန်အသင်းတိုက်စစ်မှူး အီဗန်ဖာဂူဆန်ကို ခေါ်ယူဖို့လည်း စိတ်ဝင်စား နေပေမယ့် ဆိုလန်ကီကိုသာ အဓိကပစ်မှတ်အဖြစ် သတ်မှတ်ခဲ့တာပါ။ အဲဒါကြောင့် စပါးအသင်းဟာ ဆိုလန်ကီရဲ့ ခြေစွမ်းကို အခုတစ်ရာသီလုံးစောင့်ကြည့်နေတာဖြစ်ပါတယ်။

ဒီရာသီမှာ အကောင်းဆုံးပုံစံပြသနေတဲ့ ဆိုလန်ကီကို ခေါ်ယူဖို့ အာဆင်နယ်အသင်းကလည်း စိတ်ဝင်စား နေတာပါ။ ဆိုလန်ကီဟာ ချယ်လ်ဆီးနဲ့ လီဗာပူးလ်အသင်းတို့မှာ ခြေစွမ်းပြသနိုင်ဖို့ ရုန်းကန်ခဲ့ရသလို  ဘုန်းမောက် အသင်းမှာလည်း သူ့ရဲ့ အကောင်းဆုံးခြေစွမ်းကို ပြသနိုင်ဖို့ အချိန်ယူခဲ့ရတာဖြစ်ပါတယ်။ ဆိုလန်ကီဟာ ဘုန်းမောက်အသင်းနဲ့ ပထမရာသီမှာ ၄ ဂိုးသာသွင်းယူနိုင်ခဲ့ပေမယ့် ချန်ပီယံရှစ်မှာ ကစားခဲ့တဲ့ ၂ ရာသီမှာ ၄၅ ဂိုး အထိ သွင်းယူနိုင်ခဲ့တာပါ။

အသက် ၂၆ နှစ်အရွယ်ရှိ ဆိုလန်ကီဟာ ဘုန်းမောက်အသင်းအတွက် ကစားထားတဲ့ ၁၉၄ ပွဲမှာ ၆၈ ဂိုးသွင်းယူ ထားနိုင်တာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဒီဇင်ဘာ ၂၆

ယူနိုက်တက်အသင်းနည်းပြ အဲရစ်တန်ဟတ်က ဗီလာအသင်းနဲ့ ကစားမယ့် ပရီးမီးယားလိဂ် Boxing Day ပွဲစဉ်မှာ နိုင်ပွဲရအောင်ယူပြီး သူတို့ရဲ့ ဒီရာသီကို ကယ်တင်ဖို့ ကစားသမားတွေကို တိုက်တွန်းလိုက်ပါတယ်။

အဲရစ်တန်ဟတ်က “ယူနိုက်တက်ရဲ့ စံနှုန်းက ဘာလဲဆိုတာကို ကျနော်တို့သိပြီး အသင်းလိုက်နိုင်ပွဲရယူအောင် လုပ်ရပါမယ်။ ကျနော်တာဝန်ယူရမှာဖြစ်သလို ကစားသမားတွေကလည်း တာဝန်ယူရမှာပါ။ အဲဒါကြောင့် တစ်ဦးချင်းစီက ရာနှုန်းပြည့်ပံ့ပိုးပေးရမှာဖြစ်ပြီး ကျနော်တို့မှာ တာဝန်ရှိပါတယ်။ ကစားသမားတွေအနေနဲ့ ပွဲတိုင်းမှာ ဒီထက်ပိုကောင်းတဲ့အရာတွေကို ပြုလုပ်ရပါမယ်” လို့ ပြောခဲ့တာပါ။

ယူနိုက်တက်အသင်းဟာ နောက်ဆုံးကစားခဲ့တဲ့ ပြိုင်ပွဲစုံ ၄ ပွဲမှာ သွင်းဂိုးမရယူနိုင်ခဲ့သလို ဒီရာသီ ကစားပြီးတဲ့ ၂၆ ပွဲမှာ ၁၃ ပွဲအထိ ရှုံးပွဲကြုံတွေ့ထားတာဖြစ်ပါတယ်။ ယူနိုက်တက်အသင်းဟာ ဒီဇင်ဘာ ၂၇ ရက်မနက်ပိုင်းမှာ ဒီရာသီပုံစံကောင်းတွေရရှိနေတဲ့ အက်စတွန်ဗီလာအသင်းနဲ့ ယှဉ်ပြိုင်ရမှာဖြစ်တဲ့အတွက် ရုန်းကန်ရနိုင်တယ်လို့ သုံးသပ်မှုတွေရှိနေကြတာပါ။ ယူနိုက်တက်အသင်းရဲ့ အစုရှယ်ယာ ၂၅ ရာခိုင်နှုန်းကို ဗြိတိန်ဘီလျံနာ ဆာဂျင်ရက် ကလစ်ဖ်က ပေါင် ၁.၃ ဘီလီယံဝယ်ယူဖို့ သဘောတူညီမှုရရှိခဲ့ပြီးနောက်မှာ အဲရစ်တန်ဟတ်အနေနဲ့ ရလဒ်ကောင်း တွေရယူနိုင်ဖို့ လိုအပ်နေပြီဖြစ်ပါတယ်။

ရက်ကလစ်ဖ်ပိုင်ဆိုင်တဲ့ INEOS ဟာ ဖေဖော်ဝါရီလအထိ ယူနိုက်တက်အသင်းရဲ့ ဘောလုံးနဲ့ သက်ဆိုင်တဲ့အရာ တွေကို အပြည့်အဝထိန်းချုပ်နိုင်ဦးမှာမဟုတ်ပေမယ့် အိုးထရက်ဖို့ဒ်ရဲ့ အဓိက ဆုံးဖြတ်ချက်တွေကို လွှမ်းမိုးနိုင်ဖို့ ရှိနေတာပါ။ အဲဒါကြောင့် လာမယ့်ပွဲတွေမှာ ယူနိုက်တက်အသင်း ရလဒ်တွေဆိုးခဲ့ရင် အဲရစ်တန်ဟတ်ဟာ နည်းပြ ရာထူးကနေ ထုတ်ပယ်ခံရဖို့ ရှိနေတာဖြစ်ပါတယ်။ ဒတ်ချ်လူမျိုးနည်းပြကတော့ ရာထူးက ထုတ်ပယ်မခံရဖို့ အတွက် ရလဒ်ကောင်းတွေရယူနိုင်ဖို့အသင်းကို တိုက်တွန်းနေတာပါ။

ပြီးခဲ့တဲ့ ဝက်စ်ဟမ်းအသင်းနဲ့ ပွဲစဉ်မှာ မပါဝင်နိုင်ခဲ့တဲ့ နောက်ခံလူ ဗာရန်းဟာ အက်စတွန်ဗီလာအသင်းနဲ့ ပွဲမှာ ယူနိုက်တက်အသင်းအတွက် ပါဝင်နိုင်ဖွယ်ရှိနေပြီး ဒဏ်ရာကြောင့် ကာလရှည်ကြာ အနားယူနေရတဲ့ အာမတ် လည်း ပါဝင်လာနိုင်တယ်လို့ နည်းပြ အဲရစ်တန်ဟတ်က ပြောထားခဲ့တာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဒီဇင်ဘာ ၂၆

အင်္ဂလန်အသင်း တောင်ပံကစားသမား ဆာကာက အာဆင်နယ်အသင်းအတွက် ပရီးမီးယားလိဂ်ဆုဖလား အကြောင်းပြောဖို့ စောလွန်းသေးတယ်လို့ ပြောလိုက်ပါတယ်။

ဆာကာက “ဆုဖလားအကြောင်းကို မပြောနိုင်သေးဘူးလို့ ကျနော်ထင်ပါတယ်။ ဒါနဲ့ ပတ်သက်ပြီး ဆွေးနွေးမှုတွေ ဟာ စောလွန်းသေးပါတယ်။ ကျနော်တို့ အမှတ်တွေ ရယူရပါမယ်။ ခရစ္စမတ်မှာ အမှတ်ပေးဇယား ထိပ်ဆုံးနေရာ ရပ်တည်နိုင်ခဲ့တာက အလွန်ကောင်းပေမယ့် ဆုဖလားအကြောင်းပြောဖို့က စောလွန်းပါသေးတယ်”လို့ ပြောပါ တယ်။

အာဆင်နယ်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ လီဗာပူးလ်အသင်းနဲ့ ၁ ဂိုးစီ သရေကျ ခဲ့ပြီးနောက် ခရစ္စမတ်နေ့မှာ ပရီးမီးယားလိဂ် အမှတ်ပေးဇယားကို ၂ နှစ်ဆက်တိုက် ဦးဆောင်နိုင်ခဲ့တာ ဖြစ်ပါ တယ်။

အာဆင်နယ်အသင်းဟာ ဒီရာသီမှာ ပြသနေတဲ့ စွမ်းဆောင်ရည်တွေကြောင့် ပရီးမီးယားလိဂ် ဆုဖလားကို ရယူဖို့ ရေပန်းစားနေတဲ့ အသင်းအဖြစ် သတ်မှတ်ခြင်း ခံခဲ့ရတာပါ။ 

အာဆင်နယ်နဲ့ လီဗာပူးလ်ယှဉ်ပြိုင်နေစဉ်

ပရီးမီးယားလိဂ် ပြိုင်ပွဲပြီးဆုံးဖို့ အဝေးကြီး ကျန်ရှိနေသေးတာကြောင့် ဆာကာက ဒါကိုစဉ်းစားဖို့ စောလွန်း သေးတယ်လို့ ထင်မြင်နေတာ ဖြစ်ပါတယ်။ 

ဒါ့အပြင် ဆာကာက ပြီးခဲ့တဲ့ လီဗာပူးလ် အသင်းနဲ့ပွဲစဉ်မှာ အာဆင်နယ်အသင်းအတွက် ခြေစွမ်းပြသနိုင်ခဲ့တဲ့ ကွင်းလယ်လူ ဒီကလန်ရိုက်စ်ကို ချီးကျူးမှု ပြုလုပ်ခဲ့တာပါ။ 

ဒီကလန်ရိုက်စ်ဟာ ပြီးခဲ့တဲ့နွေရာသီက ဝက်စ်ဟမ်းအသင်းကနေ ရောက်ရှိလာပြီးကတည်းက အာဆင်နယ်အသင်း အတွက် ခြေစွမ်းပြသနေတာ ဖြစ်ပါတယ်။

ဆာကာက “သူက အသင်းအတွက် အများကြီး ယူဆောင်လာပြီး ကျနော်တို့ကို ပိုပြီးကောင်းမွန်အောင် လုပ်ပေးခဲ့ ပါတယ်။ တိုက်စစ် ကစားသမား တစ်ဦးအနေနဲ့ ဒီကလန်ရိုက်စ်လို လူတွေနဲ့ ကစားရတာဟာ အလွန်ကောင်းပါ တယ်။ သူဟာ ဒီရာသီမှာ အလွန်တည်ငြိမ်ပြီး ထိပ်တန်းအဆင့် စွမ်းဆောင်ရည်တွေကို ပြသနေတာ”လို့ ပြောခဲ့ပါ တယ်။

အာဆင်နယ်အသင်းဟာ ပရီးမီးယားလိဂ်ပွဲစဉ် ၁၉ အဖြစ် ဒီဇင်ဘာ ၂၉ ရက်မှာ ဝက်စ်ဟမ်းအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Sportskeeda

CNI Sport News
၂၀၂၃ ခုနှစ်၊ ဒီဇင်ဘာ ၂၄

ချယ်လ်ဆီးအသင်းဟာ ပရဟိတအသင်း မဟုတ်ဘူးလို့ ပုံမှန်ကစားခွင့်မရလို့ စိတ်ပျက်နေကြတဲ့ အသင်း ကစားသမားတွေကို နည်းပြ ပိုချက်တီနိုက သတိပေးလိုက်ပါတယ်။

ပိုချက်တီနိုက “ကစားသမားတွေအနေနဲ့ ကွင်းထဲကို ရောက်ပြီဆိုတာနဲ့ ထိထိရောက်ရောက် လုပ်ပြနိုင်ဖို့ လိုပါ တယ်။ သူတို့ကွင်းထဲရောက်ပြီး ကောင်းမွန်စွာ စွမ်းဆောင်နိုင်တာပဲဖြစ်ဖြစ် ကောင်းမွန်စွာ မစွမ်းဆောင်နိုင်တာပဲ ဖြစ်ဖြစ် ပြဿနာမရှိဘူးဆိုပြီး ပြောလို့မရပါဘူး။ သူတို့တွေဟာ ၆ လလောက် အနားယူနေရတာပါ။ ကစားသမား တွေအနေနဲ့ ဒါဟာ ပရဟိတလုပ်လို့ရတဲ့ အရာမဟုတ်ဘူးဆိုတာ နားလည်ဖို့ လိုပါတယ်။ ကျနော်တို့ဟာ အနိုင်ရဖို့ လိုပါတယ်”လို့ ပြောခဲ့ပါတယ်။

နွေရာသီအပြောင်းအရွှေ့က ချယ်လ်ဆီးအသင်း ခေါ်ယူခဲ့တဲ့ တိုက်စစ်ကစားသမား အန်ကွန်ကူနဲ့ ကွင်းလယ်ကစား သမား လာဗီးယားတို့ဟာ ကာလရှည်ကြာ အနားယူတာကနေ အခုဆိုရင် ကြံ့ခိုင်မှုအပြည့်အဝ ပြန်လည်ရရှိနေပြီ ဖြစ်ပါတယ်။ 

အန်ကွန်ကူဟာ ဒဏ်ရာက ပြန်လည် သက်သာလာပေမယ့် ချယ်လ်ဆီးအသင်းအတွက် ပွဲဦးထွက်အဖြစ် ပါဝင် ကစားခွင့်ရဖို့ကို နယူးကာဆယ်အသင်းနဲ့ ကစားခဲ့တဲ့ ကာရာဘောင်းဖလား ကွာတားဖိုင်နယ်အထိ စောင့်ဆိုင်းခဲ့ရတာပါ။

ချယ်လ်ဆီးအသင်းရဲ့ လူစာရင်းမှာရှိတဲ့ ကစားသမား အများအပြားဟာ ပွဲကစားခွင့် ပိုပြီးရရှိချင်နေတဲ့ အကြောင်း ကို အေးဂျင့်တွေ၊ မီဒီယာတွေကနေ ဖော်ပြနေတာ ဖြစ်ပါတယ်။ 

အဲ့ဒါကြောင့် နည်းပြပိုချက်တီနိုက ကစားသမားတိုင်းကို ကစားခွင့်ပေးရအောင် ချယ်လ်ဆီးအသင်းဟာ ပရဟိတပွဲ တွေ ကစားနေတဲ့ အသင်း မဟုတ်ဘူးလို့ တုန့်ပြန်ခဲ့တာပါ။ 

ချယ်လ်ဆီးအသင်းဟာ ပြီးခဲ့တဲ့ အပြောင်းအရွှေ့တွေမှာ ငွေကြေး အများအပြားသုံးစွဲပြီး ကစားသမားသစ်တွေ အားဖြည့်ခဲ့ပေမယ့် ရလဒ်တွေ ဆိုးရွားနေခဲ့တာ ဖြစ်ပါတယ်။

ချယ်လ်ဆီးအသင်းဟာ ဒီနေ့မှာ ပရီးမီးယားလိဂ်ပွဲစဉ်အဖြစ် ဝုလ်ဗ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဒီဇင်ဘာ ၂၄

အင်တာမိုင်ယာမီအသင်းထံ ပြောင်းရွှေ့ခဲ့တဲ့ ဥရုဂွေးဝါရင့် တိုက်စစ်မှူး ဆွာရက်စ်က အသင်းနဲ့အတူ ဆုဖလား အိပ်မက်တွေကို အကောင်အထည် ဖော်သွားမယ်လို့ ပြောလိုက်ပါတယ်။

ဆွာရက်ဇ်က “အင်တာမိုင်ယာမီအသင်းနဲ့ စိန်ခေါ်မှုအသစ်တွေ ရင်ဆိုင်ဖို့ အလွန်ပျော်ရွှင်ပြီး စိတ်လှုပ်ရှား နေပါ တယ်။ ကျနော် အသင်းနဲ့အတူ ပွဲစတင်နိုင်ဖို့ကို မစောင့်ဆိုင်းနိုင်တော့ပါဘူး။ အင်တာမိုင်ယာမီအသင်းနဲ့ နောက်ထပ် ဆုဖလား အများအပြားရယူချင်တဲ့ အိပ်မက်တွေ အကောင်အထည်ဖော်ဖို့ အဆင်သင့် ဖြစ်နေပါပြီ”လို့ အသင်းဝက်ဘ်ဆိုက်ကို ပြောခဲ့ပါတယ်။

အသက် ၃၆ နှစ်အရွယ်ရှိ ဆွာရက်ဇ်ဟာ ဘရာဇီးလ်ကလပ် ဂရီမီယိုအသင်းကနေ ထွက်ခွာပြီးနောက် အင်တာမိုင် ယာမီ အသင်းနဲ့ ၁ နှစ် စာချုပ်ချုပ်ဆိုကာ စာချုပ်ကုန်ဆုံးချိန်မှာ နောက်ထပ် ၁ နှစ် သက်တမ်းတိုးခွင့် ရှိနေတာ ဖြစ်ပါတယ်။

ဆွာရက်ဇ်ဟာ အင်တာမိုင်ယာမီအသင်းမှာ ဘာစီလိုနာ အသင်းဖော်ဟောင်းတွေဖြစ်တဲ့ မက်ဆီ၊ ဘတ်စ်ကွက်စ်၊ အယ်လ်ဘာတို့နဲ့အတူ ပြန်လည်တွဲဖက်ပြီး ကစားရတော့မှာပါ။

ဥရုဂွေးတိုက်စစ်မှူးဟာ ပြီးခဲ့တဲ့ရာသီက ဂရီမီယိုအသင်းအတွက် ၂၉ ဂိုး သွင်းယူနိုင်ခဲ့ပြီး ဘရာဇီးလ်လိဂ်ရဲ့ အကောင်းဆုံး ကစားသမားဆုကို ရယူနိုင်ခဲ့တာ ဖြစ်ပါတယ်။

ကမ္ဘာကျော် ဘောလုံးသမားကြီး ဒေးဗစ်ဘက်ခမ်း ပူးတွဲပိုင်ဆိုင်တဲ့ အင်တာမိုင်ယာမီအသင်းဟာ ဆုဖလား အောင်မြင်မှုတွေ ရယူနိုင်ဖို့အတွက် ပြီးခဲ့တဲ့ရာသီက မက်ဆီ၊ ဘတ်စ်ကွက်စ်နဲ့ အယ်လ်ဘာတို့ကို ခေါ်ယူခဲ့ပြီး အသင်းသမိုင်းတစ်လျှောက် ပထမဆုံးဆုဖလားဖြစ်တဲ့ လိဂ်ဖလားကို ရယူနိုင်ခဲ့တာပါ။

မေဂျာလိဂ်ကလပ်ဟာ၂၀၂၄ ခုနှစ်ရာသီမှာ ပိုပြီးအောင်မြင်မှုတွေ ရယူနိုင်ဖို့အတွက် ဆွာရက်ဇ်ကို စတင်ပြီး အားဖြည့်ခဲ့တာ ဖြစ်ပါတယ်။

အင်တာမိုင်ယာမီအသင်းဟာ မေဂျာလိဂ် ရာသီသစ် မစတင်ခင် ရာသီကြိုခြေစမ်းပွဲတွေကို ဇန်နဝါရီ ၁၉ ရက်မှာ စတင် ယှဉ်ပြိုင်သွားဖို့ စီစဉ်ထားတာပါ။

အင်တာမိုင်ယာမီ အသင်းဟာ ရာသီကြို ခြေစမ်းပွဲတွေအဖြစ် အယ်လ်ဆာဗေးဒိုး၊ အယ်လ်ဟီလယ်၊ အယ်လ်နာ ဆာ၊ ဟောင်ကောင်လိဂ်၊ ဗစ်ဆဲလ်ကိုဘီ၊ နယူးဝဲလ်အိုးဘွိုင်းစ်အသင်းတို့နဲ့ ယှဉ်ပြိုင်ကစားသွားမှာ ဖြစ်ပါတယ်။

Source: BBC

CNI Sport News
၂၀၂၃ ခုနှစ်၊ ဒီဇင်ဘာ ၂၃

အာဆင်နယ်အသင်းအနေနဲ့ ပရီးမီးယားလိဂ်ပြိုင်ပွဲမှာ ချန်ပီယံဆုကို စိန်ခေါ်ချင်တယ်ဆိုရင် အန်ဖီးလ်ကွင်းမှာ နိုင်ပွဲပျောက်ဆုံးနေတာကို အဆုံးသတ်ဖို့ နည်းပြ အာတီတာက ပြောလိုက်ပါတယ်။

အာတီတာက “ကျနော်တို့ အိုးထရက်ဖို့ဒ်နဲ့ စတမ်းဖို့ဒ်ဘရစ်ချ်မှာ အနိုင်ရလဒ်ရရှိအောင် လုပ်ဆောင်နိုင်ခဲ့ပါတယ်။ အန်ဖီးလ်ကွင်းက နောက်ထပ်စိန်ခေါ်မှုပါ။ အဲ့ဒီနေရာသွားပြီး အနိုင်ရလဒ် ရယူသွားမှာပါ။ ထိပ်ဆုံးနေရာမှာ ရပ်တည်ချင်တယ်ဆိုရင် ဒီလိုနေရာတွေကို သွားရောက်ပြီး အသာစီးကစားရအောင် ပြုလုပ်ရမှာဖြစ်ပါတယ်။ ဒီလိုဖြစ်ဖို့ ကျနော်တို့ ကြိုးစားသွားမှာပါ”လို့ ပြောပါတယ်။

အာဆင်နယ်အသင်းဟာ အန်ဖီးလ်ကွင်းမှာ လီဗာပူးလ်အသင်းကို နောက်ဆုံး အနိုင်ယူခဲ့တာကတော့ ၂၀၁၂ ခုနှစ်၊ စက်တင်ဘာလကဖြစ်ပြီး ၂ ဂိုး- ဂိုးမရှိနဲ့ အနိုင်ရခဲ့တာ ဖြစ်ပါတယ်။ 

ဒီနောက်ပိုင်းမှာ အာဆင်နယ်အသင်းဟာ လီဗာပူးလ်အသင်းရဲ့ အိမ်ကွင်းမှာ အမြင့်ဆုံး သရေရလဒ်သာ ရယူနိုင်ခဲ့ တာပါ။ 

ပြီးခဲ့တဲ့ရာသီက အာဆင်နယ်အသင်းဟာ လီဗာပူးလ်အသင်းကို အန်ဖီးလ်ကွင်းမှာ ၂ ဂိုး- ဂိုးမရှိနဲ့ ဦးဆောင် နိုင်ခဲ့ပေမယ့် ချေပဂိုးတွေ ပြန်ပေးခဲ့ရတာကြောင့် နိုင်ပွဲရမယ့် မျှော်လင့်ချက်ကို အဆုံးသတ်ခဲ့ရတာ ဖြစ်ပါတယ်။

အာတီတာဟာ အာဆင်နယ်အသင်းကို သူကိုင်တွယ်နေတဲ့ အချိန်အတွင်းမှာ ယူနိုက်တက်၊ စပါးနဲ့ ချယ်လ်ဆီး အသင်းတွေကို သူတို့ရဲ့အိမ်ကွင်းတွေမှာ နိုင်ပွဲရယူနိုင်ခဲ့သလို မန်စီးတီးအသင်းကို ဒီရာသီ အမ်းမရိတ်စ်ကွင်းမှာ နိုင်ပွဲရယူနိုင်ခဲ့တာပါ။ 

အဲ့ဒါကြောင့် အာတီတာက အန်ဖီးလ်ကွင်းမှာ ကာလရှည်ကြာ နိုင်ပွဲပျောက်ဆုံးနေတာကို ဒီတစ်ကြိမ်တွေ့ဆုံမှုမှာ အာဆင်နယ်အသင်း အဆုံးသတ်ဖို့ ပစ်မှတ်ထားနေပါတယ်။

အာဆင်နယ်အသင်းဟာ လီဗာပူးလ်အသင်းနဲ့ပွဲမှာ ရလဒ်ကောင်းရယူနိုင်ရင် ခရစ္စမတ်ကာလမှာ ပရီးမီးယားလိဂ် အမှတ်ပေးဇယားကို ဦးဆောင်နိုင်မှာပါ။

လီဗာပူးလ်အသင်းနည်းပြ ကလော့ပ်ကတော့ အာဆင်နယ်အသင်းနဲ့ ပွဲမှာ အန်ဖီးလ်ရဲ့ ပုံစံအစစ်အမှန်ကို လိုချင်တယ်လို့ ပြောထားခဲ့ပါတယ်။

Source: ESPN

CNI Sport News
၂၀၂၃ ခုနှစ်၊ ဒီဇင်ဘာ ၂၃

မန်စီးတီးအသင်းဟာ ဖီဖာကလပ် ကမ္ဘာ့ဖလားပြိုင်ပွဲ ဗိုလ်လုပွဲအဖြစ် ဖလူမီနက်စ်အသင်းနဲ့ ကစားခဲ့တာမှာ ၄ ဂိုး- ဂိုးမရှိနဲ့ ဂိုးပြတ်အနိုင်ရပြီး ဒီပြိုင်ပွဲမှာ ချန်ပီယံဆုကို ပထမဆုံးအကြိမ် ရရှိသွားခဲ့ပါတယ်။

ဒီပွဲမှာ မန်စီးတီးအသင်းအတွက် ဂိုးတွေကို အယ်လ်ဗားရက်ဇ်က ၂ ဂိုး၊ ဖိုဒန်နဲ့ ဖလူမီနက်စ် အသင်းကစားသမား နီနိုက ကိုယ့်ဂိုးကိုယ် သွင်းယူပေးခဲ့တာပါ။

မန်စီးတီးအသင်းဟာ ချန်ပီယံဆု ရယူနိုင်ခဲ့တာကြောင့် ယူနိုက်တက်၊ လီဗာပူးလ်၊ ချယ်လ်ဆီးအသင်းတို့နဲ့အတူ ကလပ်ကမ္ဘာ့ဖလားပြိုင်ပွဲမှာ ချန်ပီယံဆုရယူနိုင်တဲ့ ၄ သင်းမြောက် အင်္ဂလိပ်ကလပ်အသင်း ဖြစ်လာခဲ့ပါတယ်။ 

ဒါ့အပြင် မန်စီးတီးအသင်းဟာ တစ်နှစ်အတွင်း အဓိကဆုဖလား ၅ ခု ရယူနိုင်တဲ့ ပထမဆုံး အင်္ဂလိပ်အသင်းအဖြစ် မှတ်တမ်းတင်နိုင်ခဲ့တာပါ။

မန်စီးတီးအသင်းနည်းပြ ဂွာဒီယိုလာအတွက်လည်း မတူညီတဲ့ ကလပ်အသင်း ၃ သင်းနဲ့ ကလပ်ကမ္ဘာ့ဖလားပြိုင်ပွဲ မှာ ချန်ပီယံဆုရယူနိုင်ခဲ့တဲ့ ပထမဆုံးနည်းပြ ဖြစ်လာခဲ့ပါတယ်။ 

ဂွာဒီယိုလာဟာ မန်စီးတီးအသင်းကို ရောက်ရှိလာပြီးကတည်းက အသင်းရယူနိုင်တဲ့ ဆုဖလားအားလုံးကို ရယူပေးနိုင်ခဲ့တာပါ။ စပိန်လူမျိုးနည်းပြဟာ မန်စီးတီးအသင်းကို အဓိကဆုဖလား ၁၄ ခုအထိ ရယူပေးပြီး အသင်းကို အောင်မြင်မှုတွေရရှိအောင် ကိုင်တွယ်ပေးထားတာ ဖြစ်ပါတယ်။

ဂွာဒီယိုလာက “လှပတဲ့နေ့ တစ်နေ့ပါပဲ။ ကျနော်တို့ ဆုဖလားအားလုံး ရယူနိုင်ခဲ့ပြီး အလုပ်ပြီးဆုံးသွားပြီလို့ ခံစားရပါတယ်။ အခုခရစ္စမတ် အချိန်ရောက်ပါပြီ။ ကျနော်တို့ နောက်ထပ် စာအုပ်တစ်အုပ်ဝယ်ပြီး အစကနေ ပြန်ရေးရတော့မှာပါ။ ဒီနှစ်ကတော့ မယုံနိုင်စရာကောင်းတဲ့ နှစ်တစ်နှစ်ပါပဲ”လို့ ပြောခဲ့ပါတယ်။

ဒီပြိုင်ပွဲရဲ့ Golden Ball ဆုကို မန်စီးတီးအသင်း ကွင်းလယ်လူ ရိုဒရီ၊ Silver Ball ဆုကို မန်စီးတီး အသင်း နောက်ခံလူ ဝေါလ်ကာနဲ့ Bronze Ball ဆုကို ဖလူမီနက်စ်အသင်း တောင်ပံကစားသမား အေရီးယက်စ်က ရရှိခဲ့တာဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဒီဇင်ဘာ ၂၂

စပိန်ကစားသမားဟောင်း ဖာဘရီဂတ်စ်ဟာ နည်းပြလိုင်စင် သက်တမ်း ကုန်သွားတာကြောင့် စီးရီးဘီကလပ် ကိုမိုအသင်းရဲ့ ယာယီနည်းပြရာထူးကနေ နုတ်ထွက်ခဲ့ပါတယ်။

အသက် ၃၆ နှစ်အရွယ်ရှိ ဖာဘရီဂတ်စ်ဟာ နည်းပြအဖြစ် လုပ်ကိုင်ဖို့ အရည်အချင်းတွေ မပြည့်သေးသလို အီတလီဘောလုံးအဖွဲ့ချုပ်က ယာယီခွင့်ပြုပေးထားတဲ့ နည်းပြလုပ်ကိုင်ခွင့် သက်တမ်းဟာ အခုလာမယ့် တနင်္ဂနွေနေ့မှာ သက်တမ်းကုန်ဆုံးတော့မှာပါ။ 
ဖာဘရီဂတ်စ်ဟာ ယာယီနည်းပြရာထူးကနေ နုတ်ထွက်ခဲ့ပေမယ့် ကိုမိုအသင်းရဲ့ နည်းပြအဖွဲ့ဝင်အဖြစ် ဆက်ပြီး ရှိနေဦးမယ်လို့ သိရပါတယ်။ 

ဘာစီလိုနာ ကစားသမားဟောင်းဟာ နိုဝင်ဘာ ၁၃ ရက်က ကိုမိုအသင်းကို ယာယီနည်းပြအဖြစ် စတင် ကိုင်တွယ်ခဲ့ပြီး သူကိုင်တွယ်ခဲ့တဲ့ ၅ ပွဲမှာ အသင်းဟာ ၃ ပွဲအထိ အနိုင်ရလဒ် ရယူနိုင်ခဲ့တာပါ။

ရောဘတ်စ်ကို တွေ့ရစဉ်

ဒီရလဒ်တွေကြောင့်လည်း ကိုမိုအသင်းဟာ စီးရီးဘီ အမှတ်ပေးဇယားအဆင့် ၃ နေရာမှာ ရပ်တည်နေတာ ဖြစ်ပါတယ်။

ကိုမိုအသင်းရဲ့ အသင်းပိုင်ရှင် အစုအဖွဲ့မှာလည်း ပါဝင်နေတဲ့ ဖာဘရီဂတ်စ်ဟာ လာမယ့်လ အနည်းငယ်အတွင်းမှာ UEFA ရဲ့ နည်းပြလက်မှတ်ကို ရယူဖို့ လုပ်ဆောင်သွားဖို့ ရှိနေတာပါ။ 

ကိုမိုအသင်းဟာ ပဲလေ့စ်အသင်းမှာ လက်ထောက်နည်းပြအဖြစ် ဆောင်ရွက်ခဲ့တဲ့ ရောဘတ်စ်ကို ဖာဘရီဂတ်စ်ရဲ့ နေရာမှာ ယာယီနည်းပြအဖြစ် အစားထိုး ခန့်အပ်ခဲ့ပါတယ်။

ရောဘတ်စ်ဟာ ဝေးလ်စ်လက်ရွေးစင် အသင်းမှာလည်း ကိုးလ်မန်း၊ ရိုင်ယန်ဂစ်တို့ရဲ့ လက်ထောက်နည်းပြတွေ အဖြစ် ဆောင်ရွက်ခဲ့ဖူးပါတယ်။

ရောဘတ်စ်ဟာ ကိုမိုအသင်းမှာ ယာယီနည်းပြအပြင် ကလပ်ရဲ့ ဖွံ့ဖြိုးတိုးတက်ရေး အကြီးအကဲအဖြစ်လည်း ဆောင်ရွက်ရမှာ ဖြစ်ပါတယ်။

ကိုမိုအသင်းဟာ ဒီနေ့မှာ စီးရီးဘီပွဲစဉ်အဖြစ် ပါလာမိုအသင်းနဲ့ ယှဉ်ပြိုင်ရမယ်လို့ သတင်းမှာ ဖော်ပြထားပါတယ်။

Source: ESPN