CNI Sport News
 ၂၀၂၄ ခုနှစ်၊ ဖေဖော်ဝါရီ ၁၇

ပြီးခဲ့တဲ့ ဇန်နဝါရီအတွက် ပရီးမီးယားလိဂ် တစ်လတာ အကောင်းဆုံးနည်းပြဆုကို လီဗာပူးလ်အသင်းနည်းပြ ကလော့ပ်က ရရှိခဲ့ပြီး အကောင်းဆုံး ကစားသမားဆုကို လီဗာပူးလ်အသင်း တောင်ပံကစားသမား ဂျိုတာက ရရှိသွားခဲ့ပါတယ်။

ဒီဇင်ဘာလ အကုန်ကမှ ဒဏ်ရာကနေ ပြန်ကောင်းမွန်လာခဲ့တဲ့ ဂျိုတာဟာ ပြီးခဲ့တဲ့လက ကစားခဲ့တဲ့ ပရီးမီးယားလိဂ်ပွဲစဉ်တွေမှာ လီဗာပူးလ်အသင်းအတွက် ၃ ဂိုးသွင်းပြီး ၂ ဂိုး ဖန်တီးနိုင်ခဲ့တာပါ။

ဂျိုတာဟာ အသင်းဖော်တိုက်စစ်မှူး ဆာလက် မပါဝင်နိုင်တဲ့အချိန်မှာ လီဗာပူးလ်အသင်းအတွက် ခြေစွမ်းပြသ နိုင်ခဲ့ပြီး အသင်းကို ပရီးမီးယားလိဂ် အမှတ်ပေးဇယား ထိပ်ဆုံးနေရာမှာ ဆက်လက် ရပ်တည်နိုင်အောင် ကူညီ ပေးခဲ့တာ ဖြစ်ပါတယ်။

အဲဒါကြောင့်လည်း ဂျိုတာဟာ ဇန်နဝါရီအတွက် ပရီးမီးယားလိဂ် အကောင်းဆုံး ကစားသမားဆုကို ရရှိခဲ့တာပါ။

ဂျိုုတာအတွက်တော့ ပရီးမီးယားလိဂ် တစ်လတာ အကောင်းဆုံး ကစားသမားဆုကို သူ့ရဲ့ ကစားသမားဘဝမှာ ပထမဆုံးအကြိမ် ရရှိခဲ့တာ ဖြစ်ပါတယ်။

လီဗာပူးလ်အသင်းဟာ ဇန်နဝါရီလမှာ ကစားခဲ့တဲ့ နယူးကာဆယ်၊ ဘုန်းမောက်နဲ့ ချယ်လ်ဆီး ပရီးမီးယားလိဂ်ပွဲစဉ် ၃ ပွဲစလုံး အနိုင်ရရှိခဲ့ပြီး တစ်ပွဲကို ၄ ဂိုးစီ သွင်းယူနိုင်ခဲ့တာပါ။ 

ကလော့ပ်ဟာ ဒီပွဲတွေမှာ လီဗာပူးလ်အသင်းကို အကောင်းဆုံး ကိုင်တွယ်နိုင်ခဲ့တဲ့အတွက် အကောင်းဆုံးနည်းပြ ဆုကို ရရှိခဲ့တာဖြစ်ပြီး ကလော့ပ်အတွက်တော့ လီဗာပူးလ်အသင်း နည်းပြဘဝမှာ ဒီဆုကို ၁၀ ကြိမ်မြောက် ရရှိခဲ့တာ ဖြစ်ပါတယ်။

အခြားဆုတွေဖြစ်တဲ့ ဇန်နဝါရီအတွက် အကောင်းဆုံး သွင်းဂိုးဆုကို မန်စီးတီးအသင်း လူငယ်ကြယ်ပွင့် အော်စကာဘော့က ရရှိခဲ့ပြီး အကောင်းဆုံး ဂိုးကာကွယ်နိုင်မှုဆုကို အဲဗာတန်အသင်းဂိုးသမား ပစ်ဖို့ဒ်က ရရှိသွားခဲ့တာပါ။ 

အော်စကာဘော့ဟာ မန်စီးတီးအသင်းက နယူးကာဆယ်အသင်းကို အနိုင်ရတဲ့ပွဲမှာ အသင်းအတွက် အဖိုးတန် အနိုင်ဂိုးနဲ့အတူ လှပတဲ့သွင်းဂိုးကြောင့် ဒီဆုကို ရရှိခဲ့တာဖြစ်ပါတယ်။

ပစ်ဖို့ဒ်ကတော့ ဖူလ်ဟမ်အသင်းနဲ့ပွဲမှာ ဖူလ်ဟမ်အသင်း ဂိုးရနိုင်မယ့် အခွင့်အရေးကို လက်စွမ်းပြ ကာကွယ်ခဲ့တာ ကြောင့် ဒီဆုကို ရရှိခဲ့တာ ဖြစ်ပါတယ်။

Source: Daily Mail

CNI Sport News

၂၀၂၄ ခုနှစ်၊ ဖေဖော်ဝါရီ ၁၇

မန်စီးတီးအသင်းနည်းပြ ဂွာဒီယိုလာက ချယ်လ်ဆီးအသင်းနဲ့ ကစားမယ့် ပရီးမီးယားလိဂ်ပွဲစဉ်ဟာ မန်စီးတီး အသင်းအတွက် ခက်ခဲမယ့် ပွဲစဉ်တစ်ပွဲလို့ ပြောလိုက်ပါတယ်။

ဂွာဒီယိုလာက "ချယ်လ်ဆီးက ထူးခြားတဲ့အသင်းပါ။ ဒီပွဲက ဒီရာသီမကုန်ခင် ကျနော်တို့ရဲ့ အခက်ခဲဆုံး ပွဲစဉ် တစ်ပွဲပါ။ နောက်ဆုံးပွဲတွေမှာ သူတို့ရဲ့ကစားပုံဟာ အလွန်ကောင်းမွန်ခဲ့ပါတယ်။ သူတို့မှာ အရာအားလုံးရှိပါ တယ်။ သူတို့က အလွန်ကောင်းမွန်တဲ့ အသင်းပါ။ ခက်ခဲမယ့်ပွဲစဉ် ဖြစ်မှာပါ"လို့ ပွဲကြို သတင်းစာ ရှင်းလင်းပွဲမှာ ပြောခဲ့တာပါ။

မန်စီးတီးအသင်းဟာ လက်ရှိအချိန်မှာ အဓိက ကစားသမားတွေ ပြန်ပါဝင်လာတာနဲ့အတူ နောက်ဆုံးကစားခဲ့တဲ့ ပြိုင်ပွဲစုံ ၁၁ ပွဲဆက်တိုက် နိုင်ပွဲရရှိပြီး အကောင်းဆုံးပုံစံ ရရှိနေတာဖြစ်ပါတယ်။

ချယ်လ်ဆီးအသင်းကလည်း ရလဒ်ဆိုးတွေကို အဆုံးသတ်ပြီး နောက်ဆုံးကစားထားတဲ့ ၂ ပွဲဆက်တိုက် နိုင်ပွဲရယူ နိုင်ခဲ့တာပါ။

ချယ်လ်ဆီးအသင်းဟာ ဒီရာသီမှာ ရလဒ်မတည်ငြိမ်ပေမယ့် စတမ်းဖို့ဒ်ဘရစ်ချ်မှာ ကစားခဲ့တဲ့ပွဲစဉ်တုန်းက မန်စီးတီးအသင်းနဲ့ ၄ ဂိုးစီ သရေရလဒ်ထွက်ပေါ်ခဲ့တာဖြစ်ပါတယ်။

မန်စီးတီးအသင်းနည်းပြ ဂွာဒီယိုလာက ပြီးခဲ့တဲ့ နွေရာသီက အသင်းက ထွက်ခွာပြီး ချယ်လ်ဆီးအသင်းထံ ပြောင်းရွှေ့သွားခဲ့တဲ့ ကိုးလ်ပယ်လ်မာဟာ ကြယ်ပွင့် ကစားသမားဖြစ်တယ်လို့ ပြောခဲ့တာပါ။

ကိုးလ်ပယ်လ်မာဟာ ဒီရာသီမှာ ချယ်လ်ဆီးအသင်းအတွက် ပရီးမီးယားလိဂ်သွင်းဂိုး ၁၀ ဂိုးအထိ သွင်းယူထား ပါတယ်။

ဂွာဒီယိုလာက "သူဟာ ပုံမှန်ကစားခွင့်ရရင် အောင်မြင်မယ်ဆိုတာ ဟုတ်ပါတယ်။ သူ့အရည်အသွေးနဲ့ ပတ်သက် ပြီး ကျနော် သံသယမရှိပါဘူး။ သူဟာ ကြယ်ပွင့် ကစားသမားဖြစ်ပြီး ကစားချိန်မိနစ်တွေ ရရှိချင်နေတာပါ။ သူ့ရဲ့ ကောင်းမွန်တဲ့ အရည်အသွေးတွေကို ပြသဖို့ အချိန်က မေးခွန်းထုတ်စရာပါပဲ"လို့ ဆိုခဲ့ပါတယ်။

ပြီးခဲ့တဲ့ ကိုပင်ဟေဂင်အသင်းနဲ့ ချန်ပီယံလိဂ်ပွဲစဉ်မှာ ပေါင်ခြံဒဏ်ရာရရှိခဲ့တဲ့ တောင်ပံကစားသမား ဂရီလစ်ရှ်ဟာ ချယ်လ်ဆီး အသင်းနဲ့ပွဲစဉ်ကို လွဲချော်မယ်လို့ မန်စီးတီးအသင်းနည်းပြ ဂွာဒီယိုလာက အတည်ပြုသွားခဲ့တာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဖေဖော်ဝါရီ ၁၆

ဥရုဂွေးဝါရင့်တိုက်စစ်မှူး ဆွာရက်ဇ်က အင်တာမိုင်ယာမီ အသင်းဟာ သူရဲ့ ကစားသမားဘဝမှာ နောက်ဆုံး ကစားတဲ့ ကလပ်အသင်း ဖြစ်တယ်လို့ ပြောလိုက်ပါတယ်။

ဆွာရက်ဇ်က “အင်တာမိုင်ယာမီက ကျနော့်ရဲ့ နောက်ဆုံးကလပ် ဖြစ်လာပါလိမ့်မယ်၊ ကျနော့်မိသားစုက ဒါကို သိပြီးသားပါ။ ဘယ်နေ့မှာ ကစားသမားဘဝက အနားယူမယ်ဆိုတာ မသတ်မှတ်ထားရပေမယ့် ဒါက ကျနော့်ရဲ့ နောက်ဆုံးခြေလှမ်းပါ။ ဒီနောက်ဆုံး စိန်ခေါ်မှုအတွက် ကျနော် အဆင်သင့်ဖြစ်နေပါပြီ။ ရှောင်လွှဲလို့မရတဲ့ ပင်ပန်း နွမ်းနယ်မှုတွေတော့ ရှိနေတယ်”လို့ ဥရုဂွေးရေဒီယို Del Sol နဲ့ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

ဆွာရက်ဇ်ဟာ ပြီးခဲ့တဲ့ရာသီက ဂရီမီယိုအသင်းမှာ ကစားခဲ့ပြီးနောက် အင်တာမိုင်ယာမီအသင်းနဲ့ ၁ နှစ် စာချုပ် ချုပ်ဆိုခဲ့တာဖြစ်ပြီး စာချုပ်ကုန်ဆုံးချိန်မှာ နောက်ထပ် ၁ နှစ် ထပ်မံသက်တမ်း တိုးခွင့်ရှိနေတာ ဖြစ်ပါတယ်။ 

ဥရုဂွေးတိုက်စစ်မှူးဟာ အင်တာမိုင်ယာမီအသင်းမှာ ဘာစီလိုနာအသင်း ဖော်ဟောင်းတွေဖြစ်တဲ့ မက်ဆီ၊ ဘတ်စကွက်စ်၊ အယ်လ်ဘာတို့နဲ့ ပြန်လည်တွဲဖက်ပြီး ကစားနေရတာပါ။

ဆွာရက်ဇ်ဟာ အင်တာမိုင်ယာမီ အသင်းနဲ့အတူ အောင်မြင်မှုတွေ ရယူကာ သူ့ရဲ့ ကလပ်ကစားသမားဘဝကို အဆုံးသတ်ချင်နေတာ ဖြစ်ပါတယ်။

ဆွာရက်ဇ်နဲ့ မက်ဆီကို တွေ့ရစဉ်

အသက် ၃၇ နှစ်အရွယ်ရှိ ဆွာရက်ဇ်ဟာ သူ့ရဲ့ ပရော်ဖက်ရှင်နယ် ကစားသမားဘဝမှာ နေစီယွန်နယ်လ်၊ ဂရိုနင်ဂျန်၊ အေဂျက်စ်၊ လီဗာပူးလ်၊ ဘာစီလိုနာ၊ အသလက်တီကို၊ ဂရီမီယိုနဲ့ အခု အင်တာမိုင်ယာမီအသင်းတို့မှာ ကစားခဲ့တာပါ။ 

ဆွာရက်ဇ်ဟာ ဥရုဂွေး လက်ရွေးစင်အသင်းအတွက် ၂၀၀၇ ခုနှစ်ကတည်းက ပါဝင်ကစားနေပြီး အခုဆိုရင် ပွဲပေါင်း ၁၃၈ ပွဲ ပါဝင်ကစားထားကာ ၆၈ ဂိုး သွင်းယူထားတာ ဖြစ်ပါတယ်။

အင်တာမိုင်ယာမီအသင်းဟာ နယူးဝဲလ်အိုးဘွိုင်းစ်အသင်းနဲ့ ရာသီကြို ခြေစမ်းပွဲ နောက်ဆုံးပွဲစဉ်အဖြစ် ကစားခဲ့ပြီးနောက် မေဂျာလိဂ် ရာသီသစ်ပွဲစဉ်တွေကို စတင်ယှဉ်ပြိုင်ရတော့မှာပါ။

အင်တာမိုင်ယာမီအသင်းဟာ ဖေဖော်ဝါရီ ၂၁ မှာ မေဂျာလိဂ်အဖွင့်ပွဲစဉ်အဖြစ် ရီးရယ်လ်ဆော့လိတ်အသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဖေဖော်ဝါရီ ၁၆

တောင်ကိုရီးယား ဘောလုံးအဖွဲ့ချုပ်ဟာ လက်ရွေးစင်အသင်းကို ၁၂ လကြာ ကိုင်တွယ်ခဲ့တဲ့ နည်းပြ ကလင်းစမန်း ကို ရာထူးကနေ ထုတ်ပယ်လိုက်ပြီ ဖြစ်ပါတယ်။

၂၀၂၃ ခုနှစ်၊ ဖေဖော်ဝါရီမှာ တောင်ကိုရီးယားအသင်း နည်းပြအဖြစ် ခန့်အပ်ခံရတဲ့ ကလင်းစမန်းရဲ့ စာချုပ်ဟာ ၂၀၂၆ ကမ္ဘာ့ဖလားပြိုင်ပွဲအထိ ရှိနေတာပါ။ 

ဒါပေမယ့် တောင်ကိုရီးယားအသင်းဟာ ပြီးခဲ့တဲ့ အာရှဖလားပြိုင်ပွဲမှာ ဆီမီးဖိုင်နယ်အဆင့်က ထွက်ခွာခဲ့ရပြီး ၆၄ နှစ်ကြာ စောင့်ဆိုင်းခဲ့ရတဲ့ ဆုဖလားအိပ်မက်ကို အဆုံးသတ်ခဲ့ရပါတယ်။ 

ဒါအပြင် အာရှဖလားပြိုင်ပွဲမှာ အသင်းဖော် အချင်းချင်း ခိုက်ရန်ဖြစ်ပွားခဲ့တယ်လို့ သတင်းတွေ ထွက်ပေါ်ခဲ့တာပါ။ 

ဂျော်ဒန်အသင်းကို အရေးနိမ့်ခဲ့တဲ့ ဆီမီးဖိုင်နယ်ပွဲစဉ် မတိုင်ခင်မှာ အသင်းဖော် အချင်းချင်း ခိုက်ရန်ဖြစ်ပွားခဲ့တာ ကြောင့် အသင်းခေါင်းဆောင် ဆွန်ဟောင်မင်ဟာ လက်ချောင်းအဆစ် လွဲသွားခဲ့တာဖြစ်ပါတယ်။

 ကလင်စမန်းကို တွေ့ရစဉ်

ဒီဖြစ်ရပ်ဟာ အသင်းသားတွေ ညစာစားပွဲမှာဖြစ်ခဲ့တာလို့ တောင်ကိုရီးယားဘောလုံးအဖွဲ့ချုပ်က အတည်ပြုထား ခဲ့တာပါ။ 

ကလင်းစမန်းကတော့ ဂျော်ဒန်အသင်းကို အရေးနိမ့်တဲ့ ပွဲအပြီးမှာ သူဟာ တောင်ကိုရီးယားအသင်း နည်းပြရာထူး ကနေ နုတ်ထွက်ဖို့ အစီအစဉ်မရှိဘူးလို့ ပြောထားခဲ့ပါတယ်။

ဒါပေမယ့် ဖေဖော်ဝါရီ ၁၅ ရက်မှာ ခေါင်းဆောင်ပိုင်း အပြောင်းအလဲလုပ်ဖို့ လိုအပ်တယ်ဆိုပြီး တောင်ကိုရီးယား ဘောလုံးအဖွဲ့ချုပ်ဟာ ကလင်းစမန်းကို နည်းပြရာထူးက ထုတ်ပယ်ဖို့ ဆုံးဖြတ်ခဲ့တာပါ။ 

ကလင်းစမန်းဟာ တောင်ကိုရီးယားအသင်း နည်းပြရာထူးကို ရယူပြီးကတည်းက ပရိသတ်တွေရဲ့ နှစ်သက်ခြင်းကို မခံခဲ့ရတာဖြစ်ပါတယ်။

ကလင်းစမန်းဟာ တောင်ကိုရီးယားအသင်းကို မကိုင်တွယ်ခင် နိုင်ငံအသင်းတွေဖြစ်တဲ့ ဂျာမနီနဲ့ အမေရိကန်တို့ကို ကိုင်တွယ်ခဲ့ပြီး ဂျာမနီအသင်းကို ၂၀၀၆ ကမ္ဘာ့ဖလားပြိုင်ပွဲမှာ တတိယနဲ့ အမေရိကန်အသင်းကို ၂၀၁၄ ကမ္ဘာ့ဖလားပြိုင်ပွဲမှာ ၁၆ သင်းအဆင့် ရောက်ရှိအောင် ပို့ဆောင်ပေးနိုင်ခဲ့တာပါ။

တောင်ကိုရီးယားအသင်းဟာ မတ်လထဲမှာ ၂၀၂၆ ကမ္ဘာ့ဖလားခြေစစ်ပွဲ(အာရှဇုန်)ပွဲစဉ် ယှဉ်ပြိုင်ဖို့ ရှိနေတာ ကြောင့် နည်းပြသစ် အမြန်ဆုံး ခန့်အပ်နိုင်ဖို့ ပြင်ဆင်နေပြီး ကစားသမားဟောင်း ဟောင်မြန်ဘိုကို ယာယီနည်းပြ အဖြစ် ခန့်အပ်ဖို့ စဉ်းစားနေတယ်လို့ Yonhap News TV က ဖော်ပြထားတာဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဖေဖော်ဝါရီ ၁၆

ပေါ်တူဂီလူမျိုးနည်းပြ မော်ရင်ဟိုက ရိုးမားအသင်းအတွက် အရာအားလုံးပေးခဲ့ပေမယ့် ထုတ်ပယ်ခံရတဲ့အတွက် နာကျင်ခဲ့ရတယ်လို့ Rio Ferdinand's FIVE show နဲ့ ပြုလုပ်ခဲ့တဲ့ အင်တာဗျူးမှာ ဝန်ခံခဲ့ပါတယ်။

မော်ရင်ဟိုက “ရိုးမားက ထုတ်ပယ်ခံရတာဟာ ကျနော့်ကို နာကျင်စေခဲ့ပါတယ်။ အရာအားလုံးကိုရော ကျနော့် နှလုံးသားကိုပါ ပေးခဲ့တာပါ။ ကျနော်ဟာ ရိုးမားအသင်းကို ကိုင်တွယ်ဖို့အတွက် အလွန်ကောင်းမွန်တဲ့ အခွင့်အရေး တွေကို ငြင်းပယ်ခဲ့ပါတယ်။ ပထမတစ်ခုက ပေါ်တူဂီလက်ရွေးစင်အသင်းဖြစ်ပြီး ခက်ခက်ခဲခဲ ငြင်းပယ်ခဲ့ရပါတယ်။ ပြီးတော့ ဆော်ဒီရဲ့ ကြီးမားတဲ့ကမ်းလှမ်းမှုကို ငြင်းပယ်ခဲ့ရတာဖြစ်တယ်”လို့ ပြောကြားခဲ့ပါတယ်။

မော်ရင်ဟိုဟာ ရိုးမားအသင်းကို ၂၀၂၁ ခုနှစ်က စတင်ကိုင်တွယ်ခဲ့တာဖြစ်ပြီး ပွဲဦးထွက်ရာသီမှာ ယူရိုပါကွန်းဖရန့်စ် လိဂ် ရယူပေးနိုင်ခဲ့တာ ဖြစ်ပါတယ်။ 

မော်ရင်ဟိုဟာ ဒုတိယရာသီမှာ ရိုးမားအသင်းကို ယူရိုပါလိဂ်ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့ပေမယ့် ဒီရာသီအစပိုင်းမှာ အသင်းရဲ့ ရလဒ်တွေ ဆိုးရွားနေတာကြောင့် ပိုင်ရှင်ဖြစ်သူတွေရဲ့ ထုတ်ပယ်ခြင်းကို ခံခဲ့ရတာပါ။ 

မော်ရင်ဟိုဟာ ရိုးမားအသင်းမှာ ပရိသတ်တွေရဲ့ ချစ်ခင်မှုကို ရရှိခဲ့ပြီး ထုတ်ပယ်ခံရချိန်မှာ ပရိသတ်တွေရဲ့ နှုတ်ဆက်မှုကြောင့် မျက်ရည်ကျခဲ့တာ ဖြစ်ပါတယ်။

မော်ရင်ဟိုကို တွေ့ရစဉ်

မော်ရင်ဟိုဟာ ရိုးမားအသင်းကို ကိုင်တွယ်ချိန်မှာ ပေါ်တူဂီအသင်းနဲ့ ဆော်ဒီကလပ်အသင်းတွေရဲ့ ကမ်းလှမ်းမှုကို ရခဲ့ပေမယ့် ဒီကမ်းလှမ်းမှုတွေကို ငြင်းပယ်ပြီး အီတလီကလပ်မှာပဲ ဆက်ပြီးရှိခဲ့တာပါ။ 

မော်ရင်ဟိုဟာ ရိုးမားအသင်းနဲ့ စာချုပ်သစ်ချုပ်ဆိုဖို့ အစီအစဉ်ရှိခဲ့ပေမယ့် ထုတ်ပယ်ခြင်းကို ခံခဲ့ရတာဖြစ်ပါတယ်။ 

ပေါ်တူဂီလူမျိုးနည်းပြဟာ လက်ရှိအချိန်မှာ ထိပ်တန်းအသင်းကြီးအချို့ အပါအဝင် ချိတ်ဆက်မှု အများအပြား ရရှိထားပေမယ့် နောက်ထပ် ကိုင်တွယ်မယ့်အသင်းကို မဆုံးဖြတ်ရသေးတာပါ။

ရိုးမားအသင်းကတော့ မော်ရင်ဟိုရဲ့ နေရာမှာ အစားထိုး တာဝန်ယူခဲ့တဲ့ ဒီရော့စီ လက်ထက်မှာ ရလဒ်ကောင်းတွေ ရရှိနေပြီး ဒီရော့စီ ကိုင်တွယ်ထားတဲ့ ၅ ပွဲမှာ ၃ ပွဲနိုင် ၂ ပွဲသရေနဲ့ ၁ ပွဲရှုံးနိမ့်ထားပါတယ်။ 

ရိုးမားအသင်းဟာ ဒီရာသီ စီးရီးအေပြိုင်ပွဲမှာ အဆင့် ၆ နေရာ ရပ်တည်နေပြီး ယူရိုပါလိဂ် ပလေးအော့ဖ်အဆင့် ပထမအကျော့ပွဲစဉ်မှာ ဖီယင်နုအသင်းနဲ့ ၁ ဂိုးစီ သရေကျခဲ့တာ ဖြစ်ပါတယ်။

Source: Daily Mail

CNI Sport News

 ၂၀၂၄ ခုနှစ်၊ ဖေဖော်ဝါရီ ၁၆

ပြင်သစ်တိုက်စစ်မှူး ဘတ်ပီဟာ ရာသီအကုန်မှာ အသင်းကနေ ထွက်ခွာမယ်ဆိုပြီး ပီအက်စ်ဂျီအသင်းကို ပြောခဲ့တယ်လို့ အားကစားသတင်းတွေ အများအပြားက ဖော်ပြထားပါတယ်။

အသက် ၂၅ နှစ်အရွယ်ရှိ ဘတ်ပီနဲ့ ပီအက်ဂျီအသင်းတို့ ချုပ်ဆိုထားတဲ့ စာချုပ်ဟာ ဒီရာသီအကုန်မှာ ကုန်ဆုံးမှာ ဖြစ်ပြီး ကစားသမားဟာ ရီးရယ်လ်အသင်းထံ ပြောင်းရွှေ့ဖို့ ချိတ်ဆက်မှုတွေ ပြုလုပ်နေတာပါ။

ဘတ်ပီဟာ ပြီးခဲ့တဲ့နွေရာသီက သူ့ရဲ့ စာချုပ်ကို နောက်ထပ် တစ်နှစ်ထပ်ပြီး သက်တမ်းတိုးမှာ မဟုတ်ဘူးလို့ ပြောခဲ့တဲ့အတွက် ပီအက်စ်ဂျီအသင်းနဲ့ အဆင်မပြေမှုတွေရှိခဲ့တာ ဖြစ်ပါတယ်။ 

အဲဒါကြောင့် ဘတ်ပီဟာ ပီအက်စ်ဂျီအသင်းကြီး လူစာရင်းကနေ ထုတ်ပယ်ခံခဲ့ရသလို အသင်းရဲ့ ရာသီအကြို အာရှခရီးစဉ် လူစာရင်းကနေလည်း ချန်လှပ်ခံခဲ့ရပါတယ်။

နောက်ဆုံးမှာ ဘတ်ပီနဲ့ ပီအက်စ်ဂျီအသင်း တာဝန်ရှိသူတွေဟာ ဆွေးနွေးမှုတွေ ပြုလုပ်ပြီး ကစားသမားကို အသင်းလူစာရင်းထဲ ပြန်လည်ထည့်သွင်းခဲ့တာပါ။ 

ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ခြေစွမ်းပြသနေတာကြောင့် စာချုပ်သစ်ချုပ်ဆိုပြီး အသင်းမှာ ဆက်ထိန်းဖို့ ပြင်သစ်ကလပ်က ကြိုးစားခဲ့ပေမယ့် ကစားသမားကတော့ အသင်းကထွက်ခွာဖို့ ဆုံးဖြတ်ခဲ့တာ ဖြစ်ပါတယ်။ 

ဘတ်ပီကို တွေ့ရစဉ်

ဘတ်ပီဟာ လာမယ့်လ အနည်းငယ်အတွင်းမှာ ပီအက်စ်ဂျီအသင်းကနေ ထွက်ခွာမယ့်အကြောင်းကို တရားဝင် ကြေညာဖွယ် ရှိနေပါတယ်။

ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ပွဲပေါင်း ၃၀ ပါဝင် ကစားထားပြီး ၃၁ ဂိုး သွင်းယူကာ ၇ ဂိုး ဖန်တီးထားတာပါ။ 

အသက် ၂၅ နှစ်အရွယ်ရှိ ဘတ်ပီဟာ မိုနာကိုအသင်းကနေ ရောက်ရှိလာခဲ့တဲ့ ၂၀၁၇ ကတည်းက ပီအက်စ်ဂျီ အသင်းအတွက် ၂၉၀ ပွဲ ပါဝင်ကစားထားပြီး ၂၄၃ ဂိုး သွင်းယူကာ ၉၃ ဂိုး ဖန်တီးထားတာ ဖြစ်ပါတယ်။ 

ပြင်သစ်တိုက်စစ်မှူးဟာ ပီအက်စ်ဂျီအသင်းနဲ့အတူ လီဂူးဝမ်းဆုဖလား ၅ ကြိမ် အပါအဝင် ဆုဖလားပေါင်း ၁၃ လုံး ရယူနိုင်ခဲ့တာပါ။

ပီအက်စ်ဂျီအသင်းဟာ ဒီရာသီ လီဂူးဝမ်းပြိုင်ပွဲမှာ ဒုတိယနေရာက နိုက်စ်အသင်းကို ၁၁ မှတ်အသာရပြီး အမှတ်ပေးဇယား ထိပ်ဆုံးနေရာမှာ ဦးဆောင်နေသလို ပြင်သစ်ဖလားပြိုင်ပွဲမှာလည်း ကွာတားဖိုင်နယ်ကို ရောက်ရှိနေပါတယ်။ 

ဒါအပြင် ပြင်သစ်ကလပ်ဟာ ချန်ပီယံလိဂ် ၁၆ သင်းအဆင့် ပထမအကျော့ ပွဲစဉ်မှာလည်း ဆိုစီဒက်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာကြောင့် ဒီရာသီဆုဖလား ၃ လုံးရယူနိုင်မယ့် လမ်းကြောင်းပေါ်မှာ ရှိနေတာပါ။

ဘတ်ပီကတော့ ပီအက်စ်ဂျီအသင်း ကစားသမားဘဝ နောက်ဆုံးရာသီမှာ အသင်းကို ဆုဖလားအောင်မြင်မှုတွေ ရယူပေးပြီး နှုတ်ဆက်နိုင်ဖို့ မျှော်လင့်နေတာ ဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ရာသီသစ်မစတင်ခင် ပြင်ဆင်မှုတွေ ပြုလုပ်နေတဲ့ မြန်မာနေရှင်နယ်လိဂ်ကလပ် ရခိုင်ယူနိုက်တက်အသင်းဟာ မြန်မာ့လက်ရွေးစင် ကစားသမားဟောင်း ကြည်လင်းကို ခေါ်ယူခဲ့ပြီလို့ ကြေညာခဲ့ပါတယ်။

ရန်ကုန်ယူနိုက်တက်အသင်းနဲ့အတူ မြန်မာနေရှင်နယ်လိဂ်ဖလား ၃ ကြိမ် ရယူနိုင်ခဲ့တဲ့ ကြည်လင်းဟာ ၂၀၂၀ ခုနှစ် ဘောလုံးရာသီအပြီးမှာ ကစားသမားဘဝက အနားယူခဲ့တာပါ။

ကြည်လင်းဟာ မကြာသေးခင်က အပျော်တမ်းပြိုင်ပွဲကနေ မြန်မာနေရှင်နယ်လိဂ်-၂ ကို တန်းတက်ဖို့ ယှဉ်ပြိုင်ခဲ့တဲ့ ရန်ကုန်ဂလက်ဇီအသင်းမှာ ပါဝင်ကစားခဲ့ပြီး ခြေစွမ်းပြသနိုင်ခဲ့တာ ဖြစ်ပါတယ်။ 

ကြည်လင်းဟာ အခုအချိန်မှာတော့ ရခိုင်ယူနိုက်တက်အသင်းနဲ့ ဖေဖော်ဝါရီ ၁၅ ရက်က စာချုပ်ချုပ်ခဲ့ပြီး အသင်းရဲ့ လေ့ကျင့်ခန်း အစီအစဉ်တွေမှာ ပါဝင်နေပြီဖြစ်ပါတယ်။

ကြည်လင်း၊ ကျော်ကိုကို၊ ကောင်းစည်သူတို့ကို တွေ့ရစဉ်

ရခိုင်ယူနိုက်တက်အသင်းဟာ မကြာသေးခင်ကလည်း ကြည်လင်းရဲ့ ရန်ကုန်ယူနိုက်တက်အသင်းဖော်ဟောင်း ကျော်ကိုကို ကိုခေါ်ယူထားတာ ဖြစ်ပါတယ်။ 

ဒါအပြင် ရခိုင်ယူနိုက်တက်အသင်းဟာ တိုက်စစ်မှူး ကောင်းစည်သူကိုလည်း ၁ နှစ် စာချုပ်ချုပ်ဆိုခဲ့တယ်လို့ ကြေညာခဲ့တာပါ။

ကောင်းစည်သူဟာ ပြီးခဲ့တဲ့ရာသီရဲ့ ရာသီဝက်မှာ ရခိုင်ယူနိုက်တက်အသင်းကို ရောက်ရှိလာခဲ့ပြီး ခြေစွမ်းပြနိုင်ခဲ့ တာကြောင့် နောက်ထပ် စာချုပ်သစ် ချုပ်ဆိုနိုင်ခဲ့တာ ဖြစ်ပါတယ်။

ရခိုင်ယူနိုက်တက်အသင်းဟာ ဒီရာသီမှာ နာမည်ကြီး ပြည်တွင်း ကစားသမားတွေ အပါအဝင် နိုင်ငံခြားသား နည်းပြနဲ့ နိုင်ငံခြား ကစားသမားတွေကိုလည်း ခေါ်ယူထားတာပါ။ 

ပြီးခဲ့တဲ့ရာသီက မြန်မာနေရှင်နယ်လိဂ်ပြိုင်ပွဲမှာ အဆင့် ၈ နေရာနဲ့သာ ရာသီအဆုံးသတ်နိုင်ခဲ့တဲ့ ရခိုင်ယူနိုက်တက် အသင်းဟာ ဒီရာသီ ထိပ်တန်းအဆင့်မှာ ရပ်တည်နိုင်ဖို့ ပစ်မှတ်ထားနေတာ ဖြစ်ပါတယ်။

CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ကမ္ဘာ့နံပါတ် ၁ တင်းနစ်ကစားသမားဟောင်း ရာဖေးလ်နာဒယ်လ်က အခုနှစ်ထဲ ကျင်းပမယ့် ပြင်သစ်အိုးပန်းနဲ့ အိုလံပစ်ပြိုင်ပွဲမှာ ပါဝင်ယှဉ်ပြိုင်ဖို့ ရည်မှန်းထားတယ်လို့ ဖေဖော်ဝါရီ ၁၄ ရက်က ပြောလိုက်ပါတယ်။

ရာဖေးလ်နာဒယ်လ်က “ကျနော် ဘယ်ပြိုင်ပွဲတွေကစားဖို့ ကျန်ရှိနေသေးလဲဆိုတာ မသိပေမယ့် ပြင်သစ်အိုးပန်း ကတော့ ကျနော်ရည်မှန်းထားတဲ့ ပြိုင်ပွဲတွေထဲက တစ်ခုဖြစ်ပါတယ်။ ပြီးတော့ အိုလံပစ်ပြိုင်ပွဲမှာလည်း ကျနော် ပါဝင်ကစားချင်ပါတယ်။ ဒါတွေက ကျနော် အခုအတည်ပြုလို့ရတဲ့ အရာမဟုတ်ပေမယ့် ကျနော် ပါဝင်ယှဉ်ပြိုင် နိုင်မယ်ဆိုတာ မျှော်လင့်ပါတယ်”လို့ စပိန်ရုပ်သံ La Sexta နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

အသက် ၃၇ နှစ်အရွယ်ရှိ စပိန်တင်းနစ်သမား ရာဖေးလ်နာဒယ်လ်ဟာ ပြင်သစ်အိုးပန်း ချန်ပီယံဆုကို စံချိန်တင် ၁၄ ကြိမ် ရရှိထားတာ အပါအဝင် ဂရမ်းဆလမ်း တစ်ဦးချင်း ချန်ပီယံဆု ၂၂ ကြိမ်အထိ ရရှိထားတာ ဖြစ်ပါတယ်။ 

ဒါပေမယ့် ရာဖေးလ်နာဒယ်လ်ဟာ နောက်ပိုင်းနှစ်တွေမှာ ဒဏ်ရာတွေကြောင့် ရုန်းကန်ခဲ့ရပြီး လာမယ့်အပတ်မှာ ကျင်းပမယ့် ကာတာအိုးပန်းပြိုင်ပွဲကနေလည်း နုတ်ထွက်ထားခဲ့တာပါ။

ရာဖေးလ်နာဒယ်လ်ဟာ ပြီးခဲ့တဲ့လက ဘရစ်စဘိန်းပြိုင်ပွဲမှာရရှိခဲ့တဲ့ ကြွက်သားစုတ်ပြဲ ဒဏ်ရာကနေ ပြန်ကောင်းမွန်လာခြင်း မရှိသေးတဲ့အတွက် တင်းနစ်ပြိုင်ပွဲတွေကို ပြန်လည်ယှဉ်မပြိုင်သေးဖို့ ဆုံးဖြတ်ခဲ့ပါတယ်။

ရာဖေးလ်နာဒယ်လ်ကို တွေ့ရစဉ်

စပိန်တင်းနစ်သမားဟာ ပြီးခဲ့တဲ့လက ဆော်ဒီတင်းနစ်အဖွဲ့ချုပ်ရဲ့ သံတမန်အဖြစ် ခန့်အပ်ခံခဲ့ရပါတယ်။ 

ရာဖေးလ်နာဒယ်လ်ဟာ ဆော်ဒီနိုင်ငံရဲ့ တင်းနစ်အားကစားနည်းကို တိုးတက်အောင် ကူညီပေးဖို့၊ မျိုးဆက်သစ် တင်းနစ်ကစားသမားတွေ ထွက်ပေါ်လာဖို့နဲ့ နိုင်ငံအတွင်းမှာ သူ့ရဲ့အကယ်ဒမီကို ဖန်တီးဖို့ စီစဉ်ထားတာပါ။

ရာဖေးလ်နာဒယ်လ်က “ကျနော့်ရဲ့ ကတိကဝတ်က တင်းနစ်ကို မြှင့်တင်ပေးဖို့နဲ့ ရည်မှန်းချက်တွေကို အောင်မြင် အောင် ကြိုးစားဖို့ပါ။ ဆော်ဒီက သူ့ရဲ့ပုံရိပ်ကို ဆေးကြောဖို့ ကျနော့်ကို မလိုအပ်ဘူးလို့ ထင်ပါတယ်။ ဒါကလည်း ကျနော့် ရည်မှန်းချက် မဟုတ်ပါဘူး။ လူတွေက မေးခွန်းတွေမမေးဘဲ သူတို့ရဲ့ ထင်မြင်ယူဆချက်တွေကို ပေးကြ ပါတယ်”လို့ ပြောခဲ့ပါတယ်။

ဆော်ဒီနိုင်ငံဟာ ဘောလုံး၊ စက်ဘီးနဲ့ ဂေါက်သီးရိုက် အားကစားပြိုင်ပွဲတွေ အပါအဝင် ကမ္ဘာလုံးဆိုင်ရာ အားကစားကဏ္ဍတွေမှာ ဘီလီယံနဲ့ချီပြီး ရင်းနှီးမြှုပ်နှံကာ လူ့အခွင့်အရေး ချိုးဖောက်မှုတွေကို အာရုံလွှဲစေဖို့ ကြိုးပမ်းနေတယ်ဆိုပြီး ဝေဖန်မှုတွေ ပြင်းပြင်းထန်ထန် ခံနေရတာဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဖေဖော်ဝါရီ ၁၅

ဘိုင်ယန်မြူးနစ်အသင်းဟာ ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်မှာ လာဇီယိုအသင်းကို အရေးနိမ့်ခဲ့ ပေမယ့် နည်းပြ တူချယ်လ်က ဘိုင်ယန်မြူးနစ်အနာဂတ်အပေါ် စိုးရိမ်မှုမရှိဘူးလို့ ပြောခဲ့ပါတယ်။

တူချယ်လ်က “ကျနော့်အနာဂတ် ဒါမှမဟုတ် ဖြစ်နိုင်ဖွယ်ရှိတဲ့ ထုတ်ပယ်ခံရမှုအတွက် စိုးရိမ်မှုမရှိပါဘူး။ ကျနော် တို့ ဒီပွဲမှာ ရှုံးနိမ့်ခဲ့ပေမယ့် အရာအားလုံးကို လုပ်ခဲ့ပါတယ်။ ပထမပိုင်းမှာ ကျနော်တို့ဟာ ပွဲကိုထိန်းချုပ်နိုင်ခဲ့ ပေမယ့် ဒုတိယပိုင်းမှာတော့ စွမ်းဆောင်ရည်ဟာ သိသိသာသာကို ကျဆင်းသွားခဲ့ပါတယ်။ ကျနော်တို့ဟာ တစ်ဦး ချင်း အမှား အများအပြားကို လုပ်ခဲ့ပြီးတော့ အာရုံစူးစိုက်မှုတွေလည်း ဆုံးရှုံးခဲ့ပါတယ်။ ဒါပေမယ့် နောက်တစ်ဆင့် တက်နိုင်ဖို့အတွက် ကျနော်တို့လက်ထဲမှာ အခွင့်အရေး ရှိပါသေးတယ်”လို့ ပြောကြားခဲ့ပါတယ်။

ဘိုင်ယန်မြူးနစ်အသင်းဟာ ဒီပွဲမှာ လာဇီယိုအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တာဖြစ်ပြီး လာဇီယိုအသင်း အတွက် ဂိုးကို တိုက်စစ်မှူး အင်မိုဘီလီက ပွဲချိန် ၆၉ မိနစ်မှာ ပင်နယ်တီကနေ သွင်းယူခဲ့တာ ဖြစ်ပါတယ်။ 

ဘိုင်ယန်မြူးနစ်အသင်းဟာ ပင်နယ်တီအပြင် နောက်ခံလူ အူပါမီကာနိုပါ ထုတ်ပယ်ခံခဲ့ရလို့ လာဇီယိုအသင်းကို ချေပဂိုး သွင်းယူနိုင်ဖို့ ခက်ခဲသွားခဲ့ပြီး ရှုံးပွဲနဲ့ ကြုံတွေ့ခဲ့ရတာပါ။ 

 ဟာရီကိန်းကို တွေ့ရစဉ်

ဂျာမန်ချန်ပီယံအသင်းဟာ လာဇီယိုအသင်းနဲ့ပွဲမှာ ဂိုးပေါက်ကန်သွင်းမှု ၁၇ ကြိမ်အထိရှိခဲ့ပေမယ့် ဂိုးပေါက်တည့်မှု ၁ ကြိမ်မှ မရှိတဲ့အထိ အခြေအနေ ဆိုးရွားခဲ့တာ ဖြစ်ပါတယ်။

ဘိုင်ယန်မြူးနစ်အသင်းဟာ ပြီးခဲ့တဲ့ ဘွန်ဒစ်လီဂါပွဲစဉ်မှာ လေဗာကူဆင်အသင်းကို ဂိုးပြတ်အရေးနိမ့်ပြီး အခု လာဇီယိုအသင်းကိုပါ ထပ်ပြီး အရေးနိမ့်ခဲ့တာကြောင့် နည်းပြ တူချယ်လ်အတွက် ဖိအားတွေပိုပြီးများလာခဲ့တာပါ။ 

ဘိုင်ယန်မြူးနစ်အသင်း တိုက်စစ်မှူး ဟာရီကိန်းကတော့ ရှုံးပွဲဆက်နေတာကြောင့် သူတို့အတွက် ခက်ခဲတဲ့ ရက်သတ္တပတ် ဖြစ်ခဲ့တယ်လို့ ပွဲအပြီးမှာ ဝန်ခံခဲ့ပါတယ်။

ဟာရီကိန်းက “တကယ်ကိုခက်ခဲတဲ့ ရက်သတ္တပတ် ဖြစ်ခဲ့ပါတယ်။ ဒုတိယပိုင်းကတော့ စိတ်ပျက်ဖို့ ကောင်းခဲ့ပါ တယ်။ စွမ်းအင်တွေရော ယုံကြည်မှုတွေရော နည်းပါးခဲ့ပါတယ်။ ဒါပေမယ့်လည်း ကျနော်တို့ဟာ ဒီပြိုင်ပွဲမှာ ရှိနေတုန်းဖြစ်ပြီး မြူးနစ်မှာ အကောင်းဆုံး လုပ်ပြနိုင်ဖို့ ကြိုးစားသွားမှာပါ”လို့ ပြောကြားခဲ့ပါတယ်။

ဘိုင်ယန်မြူးနစ်အသင်းဟာ ဖေဖော်ဝါရီ ၁၈ ရက်မှာ ဘွန်ဒစ်လီဂါပွဲစဉ်အဖြစ် ဘိုချန်အသင်းနဲ့ ယှဉ်ပြိုင်ရမှာဖြစ်ပြီး ရှုံးပွဲဆက်နေတာကို ရပ်တန့်ဖို့လိုအပ်နေပြီ ဖြစ်ပါတယ်။

Source: ESPN