- By CNI
- Category: အားကစား
- Hits: 492
CNI Sport News
၂၀၂၄ ခုနှစ်၊ ဖေဖော်ဝါရီ ၈
လက်ရှိချန်ပီယံ ကာတာအသင်းဟာ အာရှဖလား ဆီမီးဖိုင်နယ်ပွဲစဉ်မှာ အီရန်အသင်းကို ၃ ဂိုး-၂ ဂိုးနဲ့ အနိုင်ရပြီး ချန်ပီယံဆုကို ကာကွယ်ဖို့အတွက် ဗိုလ်လုပွဲကို တက်နိုင်ခဲ့ပြီ ဖြစ်ပါတယ်။
ဒီပွဲမှာ အီရန်အသင်းဟာ အက်ဇ်မွန်ရဲ့သွင်းဂိုးနဲ့ ဦးဆောင်နိုင်ခဲ့ပေမယ့် ဂျာဆမ်ဂါဘာနဲ့ အဖစ်တို့က ကာတာ အသင်းအတွက် ချေပဂိုးနဲ့ ဦးဆောင်ဂိုးတွေကို ပြန်သွင်းယူနိုင်ခဲ့တာပါ။
ဒုတိယပိုင်းမှာ ဂျာဟန်ဘက်ရှ်က အီရန်အသင်းအတွက် ပင်နယ်တီကနေ ချေပဂိုး ပြန်သွင်းယူခဲ့တာကြောင့် တစ်ဖက် ၂ ဂိုးစီ သရေကျနေပြီး ပွဲက အကြိတ်အနယ်ရှိနေခဲ့တာ ဖြစ်ပါတယ်။ ဒါပေမယ့် ပွဲချိန် ၈၂ မိနစ်မှာ ကာတာအသင်းအတွက် အဖိုးတန်အနိုင်ဂိုးကို အမို့ဇ်အလီက သွင်းယူသွားခဲ့တာပါ။
အဲ့ဒါကြောင့် ကာတာအသင်းဟာ အာရှဖလားဗိုလ်လုပွဲကို တက်နိုင်ခဲ့ပြီး ဗိုလ်လုပွဲအဖြစ် ဂျော်ဒန်အသင်းနဲ့ ယှဉ်ပြိုင်ရမှာ ဖြစ်ပါတယ်။
ကာတာအသင်းဟာ ၂၀၀၀ နဲ့ ၂၀၀၄ အာရှဖလားပြိုင်ပွဲတွေမှာ ချန်ပီယံဆု ရယူနိုင်ခဲ့တဲ့ ဂျပန်အသင်း နောက်ပိုင်း အာရှဖလားပြိုင်ပွဲမှာ ချန်ပီယံဆုကို ၂ ကြိမ်ဆက် ရယူနိုင်တဲ့ ပထမဆုံးအသင်းဖြစ်လာဖို့ ပစ်မှတ်ထားနေတာပါ။
ဂျော်ဒန်အသင်း အောင်ပွဲခံနေစဉ်
အီရန်အသင်းကတော့ ၁၉၇၆ ပြိုင်ပွဲမှာ ချန်ပီယံဆုရယူပြီးနောက် ပထမဆုံးအကြိမ် အာရှဖလားပြိုင်ပွဲမှာ ဗိုလ်လုပွဲ တက်နိုင်မယ့် မျှော်လင့်ချက်ကို အဆုံးသတ်ခဲ့ရတာ ဖြစ်ပါတယ်။
ကာတာအသင်းရဲ့ စပိန်လူမျိုးနည်းပြ လိုပက်ဇ်က ချန်ပီယံဆုကို ကာကွယ်ရမယ့် နောက်ဆုံးအဆင့်ကို ဖြတ်ကျော်နိုင်ဖို့ အကောင်းဆုံး လုပ်ဆောင်သွားမယ်လို့ ပွဲအပြီးမှာ ပြောခဲ့ပါတယ်။
လိုပက်ဇ်က “ပထမဆုံးအနေနဲ့ ကာတာနိုင်ငံ၊ ကာတာပြည်သူတွေ၊ ပရိသတ်တွေနဲ့ ကစားသမားတွေအတွက် ကျနော် အလွန်ပျော်ရွှင်ပါတယ်။ ဒီပွဲက အလွန်ရှုပ်ထွေးခဲ့ပေမယ့် ပွဲကြီးပွဲကောင်း တစ်ပွဲကို ကစားခဲ့ရပါတယ်။ အခုတော့ ကျနော်တို့ဟာ ချန်ပီယံဆုကို ကာကွယ်ဖို့ နောက်ဆုံး အဆင့်တစ်ခုကို ဖြတ်ကျော်ဖို့ ကျန်ရှိနေပါသေး တယ်။ ဒီနေ့မှာ ကျနော်တို့ဟာ နိုင်ပွဲအတွက် အောင်ပွဲခံသွားမှာဖြစ်ပြီး မနက်ဖြန်မှာ ဗိုလ်လုပွဲအတွက် ပြင်ဆင် သွားမယ်”လို့ ပြောကြားခဲ့ပါတယ်။
ကာတာနဲ့ ဂျော်ဒန်အသင်းတို့ရဲ့ ၂၀၂၃ အာရှဖလားပြိုင်ပွဲဗိုလ်လုပွဲကို ဖေဖော်ဝါရီ ၁၀ ရက်မှာ ကျင်းပသွားမှာ ဖြစ်ပါတယ်။
- By CNI
- Category: အားကစား
- Hits: 375
CNI Sport News
၂၀၂၄ ခုနှစ်၊ ဖေဖော်ဝါရီ ၈
ချယ်လ်ဆီးအသင်းဟာ FA ဖလား စတုတ္တအဆင့် ပြန်ကန်ပွဲစဉ်မှာ အက်စတွန်ဗီလာအသင်းကို အနိုင်ရခဲ့ပြီးနောက် နည်းပြပိုချက်တီနိုက အသင်းဟာ စည်းလုံးမှုရှိကြောင်း ပြသနိုင်ခဲ့တယ်လို့ ပြောလိုက်ပါတယ်။
ပိုချက်တီနိုက “ကျနော်တို့အားလုံး အတူတကွရှိခဲ့ကြပြီး ကစားသမားတွေဟာ ပျော်ပျော်ရွှင်ရွှင် လွတ်လွတ်လပ် လပ်နဲ့ ဘောလုံးကစားတာကို ကျနော်မြင်တွေ့ခဲ့ရပါတယ်။ ဒါဟာ အရေးကြီးပြီး ကျနော်တို့အားလုံး စည်းလုံးမှုရှိခဲ့ ကြပါတယ်။ ကျနော်တို့ဟာ အချင်းချင်း တိုက်ပွဲဝင်ခဲ့ကြသလို အသင်းပရိသတ်တွေအတွက်၊ အသင်းရဲ့ တံဆိပ် အတွက်နဲ့ နည်းပြအဖွဲ့ဝင်တွေအတွက် တိုက်ပွဲဝင်ခဲ့ကြပါတယ်။ ဒါက ကျနော်တို့ လိုအပ်နေတဲ့ ချိတ်ဆက်မှုဖြစ်ပြီး အခုစိန်ခေါ်မှုက တသမတ်တည်းဖြစ်ဖို့ပါ”လို့ ပြောကြားခဲ့ပါတယ်။
ချယ်လ်ဆီးအသင်းဟာ FA ဖလား စတုတ္ထအဆင့် ပြန်ကန်ပွဲစဉ်မှာ အက်စတွန်ဗီလာအသင်းကို ၃ ဂိုး-၁ ဂိုးနဲ့ အနိုင်ရပြီး ပဉ္စမအဆင့်ကို တက်နိုင်ခဲ့ပါတယ်။
ဒီပွဲမှာ ချယ်လ်ဆီးအသင်းအတွက် ဂိုးတွေကို ဂါလက်ဂါ၊ ဂျက်ဆန်နဲ့ အန်ဇိုဖာနန်ဒက်ဇ်တို့က သွင်းယူခဲ့တာ ဖြစ်ပါတယ်။
ချယ်လ်ဆီးအသင်းနဲ့ အက်စတွန်ဗီလာ ယှဉ်ပြိုင်နေစဉ်
အက်စတွန်ဗီလာအသင်းကို အနိုင်ရခဲ့တာကြောင့် ချယ်လ်ဆီးအသင်းဟာ ရှုံးပွဲဆက်နေမှုကို ရပ်တန့်နိုင်ခဲ့သလို နည်းပြ ပိုချက်တီနို အတွက်လည်း ဖိအားအနည်းငယ် လျော့သွားခဲ့ပါတယ်။
ချယ်လ်ဆီးအသင်းဟာ FA ဖလား ပဉ္စမအဆင့်ပွဲစဉ်မှာတော့ ချန်ပီယံရှစ်ကလပ် လိဒ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။
အက်စတွန်ဗီလာ အသင်းနည်းပြ အူနှိုင်းအမ်မရီက ဒီပွဲရှုံးနိမ့်မှုကို လက်ခံကာ ယူနိုက်တက်အသင်းနဲ့ ကစားရမယ့် ပွဲစဉ်ကို အာရုံစိုက်ပြီး ပြင်ဆင်သွားရမယ်လို့ ပွဲအပြီးမှာ ပြောခဲ့ပါတယ်။
အူနှိုင်းအမ်မရီက “ချယ်လ်ဆီးအသင်းကို ဂုဏ်ပြုချင်ပါတယ်။ ကျနော်တို့ဟာ စိတ်လှုပ်ရှားနေခဲ့ပြီး သူတို့ဟာ အဆုံးသတ်ပိုင်း ကောင်းမွန်ခဲ့ပါတယ်။ ကျနော်တို့ဟာ အကောင်းဆုံး ယှဉ်ပြိုင်ခဲ့ပေမယ့် သူတို့ရဲ့ ကစားသမား တွေနဲ့ ယှဉ်ရင် စွမ်းဆောင်ရည်ပိုင်းမှာ အားနည်းခဲ့ပါတယ်။ ဒါကြောင့် ဒီပွဲရှုံးနိမ့်မှုကို လက်ခံပြီး လာမယ့် ယူနိုက်တက်နဲ့ပွဲစဉ်ကို အာရုံစိုက်သွားရမယ်”လို့ ပြောကြားခဲ့ပါတယ်။
ချယ်လ်ဆီးအသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် ပဲလေ့စ်အသင်းနဲ့ ယှဉ်ပြိုင်ရမှာဖြစ်ပြီး ပရီးမီးယားလိဂ်မှာ ရှုံးပွဲဆက်နေမှုကို ရပ်တန့်နိုင်ဖို့ မျှော်လင့်နေတာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 572
CNI Sport News
၂၀၂၄ ခုနှစ်၊ ဖေဖော်ဝါရီ ၇
မြန်မာနေရှင်နယ်လိဂ်ချန်ပီယံ ရှမ်းယူနိုက်တက်အသင်းဟာ ဧရာဝတီယူနိုက်တက်အသင်း ခေါင်းဆောင်ဟောင်း အောင်နိုင်ဝင်းကို ခေါ်ယူနိုင်ခဲ့ပြီလို့ ဖေဖော်ဝါရီ ၇ ရက်က တရားဝင် ကြေညာခဲ့ပါတယ်။
ကွင်းလယ်ကစားသမား အောင်နိုင်ဝင်းဟာ မကြာသေးခင်ကမှ ဧရာဝတီယူနိုက်တက်အသင်းနဲ့ စာချုပ်ကုန်ဆုံးပြီး နောက် ထွက်ခွာလာခဲ့တာပါ။
အဲဒါကြောင့် ချန်ပီယံဆုကို ဆက်ပြီး ထိန်းသိမ်းနိုင်ဖို့ ပြင်ဆင်နေတဲ့ ရှမ်းယူနိုက်တက်အသင်းဟာ အောင်နိုင်ဝင်းကို ခေါ်ယူခဲ့တာဖြစ်ပြီး ချုပ်ဆိုခဲ့တဲ့ စာချုပ်သက်တမ်းကိုတော့ ဖော်ပြထားခြင်း မရှိပါဘူး။
မြန်မာ့လက်ရွေးစင် ကွင်းလယ်လူ အောင်နိုင်ဝင်းဟာ ဧရာဝတီယူနိုက်တက် အသင်းအပြင် မြန်မာနေရှင်နယ်လိဂ် ကလပ် ရတနာပုံအသင်းမှာလည်း ကစားခဲ့ပါတယ်။
မြန်မာအသင်းကိုယ်စားပြု ကစားနေတဲ့ အောင်နိုင်ဝင်းကို တွေ့ရစဉ်
အောင်နိုင်ဝင်းက ရှမ်းယူနိုက်တက်ကို ပြောင်းရွှေ့လာခဲ့တာဟာ မိမိကိုယ်ကို စိန်ခေါ်ခဲ့တာဖြစ်ပြီး ပွဲကစားခွင့်ရနိုင် ဖို့ အကောင်းဆုံး ကြိုးစားသွားမယ်လို့ ရှမ်းယူနိုက်တက်အသင်းပိုင် မီဒီယာကို ပြောခဲ့ပါတယ်။
အောင်နိုင်ဝင်းက "ကျနော့်ကို ကျနော် စိန်ခေါ်လိုက်တာပါ။ ရှမ်းအသင်းဆိုတာ ကျနော်တို့ မရောက်ခင်ကတည်းက ရှုံးပွဲမရှိ အနေအထားနဲ့ချန်ပီယံ ဖြစ်ထားတာပါ။ ပြည်တွင်းမှာ တန်းဆုံးသွားပါပြီ။ ဒီထပ်ကောင်းစရာ မရှိတော့ပါ ဘူး။ ရှေ့က ညီအစ်ကိုတွေ၊ စီနီယာတွေ လုပ်ထားတဲ့မှတ်တမ်းကို ကျနော်တို့က ဆက်ထိန်းသိမ်းဖို့ပဲ ကြိုးစားရမှာ။ အဲ့လို လုပ်နိုင်မယ်ထင်လို့လည်း အသင်းပြောင်းလာတာပါ။ ပြီးတော့ ကစားခွင့် ရဖို့ဆိုတာလည်း အများကြီး လုပ်ရ မှာပါ။ အလယ်တန်းမှာ လူကောင်းတွေချည်းပဲ။ ကစားကွက်နဲ့ အံဝင်တဲ့သူ ကစားခွင့်ရမယ်လို့ ထင်ပါတယ်။ အကောင်းဆုံး ကြိုးစားမှာပါ"လို့ ပြောခဲ့တာပါ။
ရှမ်းယူနိုက်တက်အသင်းဟာ ဒီရာသီမှာ နည်းပြချုပ်အဖြစ် ဦးမျိုးလှိုင်ဝင်းကို ခန့်အပ်ထားပြီး ကစားသမားသစ်တွေ အဖြစ် အောင်နိုင်ဝင်း အပါအဝင် ခွန်ကျော်ဇင်ဟိန်း၊ သက်ဟိန်းစိုး၊ အောင်မင်းစိုး၊ သက်ဝေမိုး၊ ကောင်းမြတ်သူနဲ့ စအောင်ပြည့်ကို တို့ကို ခေါ်ယူထားပါတယ်။
ဒါအပြင် နောက်ထပ် ကစားသမားသစ်တွေ အားဖြည့်သွားမယ်လို့ ရှမ်းယူနိုက်တက်အသင်းက ပြောထားတာ ဖြစ်ပါတယ်။
- By CNI
- Category: အားကစား
- Hits: 485
CNI Sport News
၂၀၂၄ ခုနှစ်၊ ဖေဖော်ဝါရီ ၇
အီဂျစ်အသင်းဟာ ထုတ်ပယ်လိုက်တဲ့ နည်းပြ ရူအီဗစ်တိုးရီးယားရဲ့နေရာမှာ နိုင်ငံအသင်းရဲ့ စံချိန်တင်ဂိုးသွင်းရှင် ဟိုဆမ်ဟာဆန်ကို နည်းပြသစ်အဖြစ် ခန့်အပ်လိုက်ပါတယ်။
အီဂျစ်ဘောလုံးအဖွဲ့ချုပ်(EFA)ဟာ ဟိုဆမ်ဟာဆန်ကို နည်းပြသစ်အဖြစ် ခန့်အပ်ကြောင်း ကြေညာခဲ့သလို သူ့ရဲ့ အမွှာ ညီအစ်ကိုဖြစ်တဲ့ အီဘရာဟင်ဟာဆန်ကိုလည်း အသင်းရဲ့ ဒါရိုက်တာအဖြစ် ခန့်အပ်ခဲ့တာပါ။
အီဂျစ်ဘောလုံးအဖွဲ့ချုပ်ဟာ အစောပိုင်းက နိုင်ငံခြားသားနည်းပြတစ်ဦးကို နည်းပြသစ်အဖြစ် ခန့်အပ်ဖို့ စဉ်းစားခဲ့ ပေမယ့် နောက်ပိုင်းမှာတော့ ဟိုဆမ်ဟာဆန်ကို နည်းပြသစ်အဖြစ် အလျင်အမြန်ခန့်အပ်ခဲ့တာ ဖြစ်ပါတယ်။
အီဂျစ်အသင်းဟာ ကျင်းပနေတဲ့ အာဖရိကဖလားပြိုင်ပွဲမှာ ၁၆ သင်းအဆင့်ကနေ ထွက်ခွာခဲ့ရပြီးနောက် နည်းပြ ဖြစ်သူ ရူအီဗစ်တိုးရီးယားကို ရာထူးကနေ ထုတ်ပယ်ခဲ့တာပါ။
ဟိုဆမ်ဟာဆန်ကို တွေ့ရစဉ်
အီဂျစ်အသင်းအတွက် ၆၈ ဂိုး သွင်းယူထားပြီး နိုင်ငံအသင်းရဲ့ဂိုးသွင်း အများဆုံး ကစားသမားအဖြစ် ရပ်တည်နေ တဲ့ ဟိုဆမ်ဟာဆန်ဟာ နိုင်ငံအသင်းကို ကိုင်တွယ်ချင်တဲ့ သူ့ရဲ့ဆန္ဒကို မကြာခဏဆိုသလို ပြောခဲ့တာ ဖြစ်ပါ တယ်။
အသက် ၅၇ နှစ်အရွယ်ရှိ ဟိုဆမ်ဟာဆန်ဟာ ကစားသမားဘဝမှာ အောင်မြင်မှု အများအပြား ရခဲ့ပေမယ့် နည်းပြ ဘဝမှာတော့ အောင်မြင်မှု ရယူနိုင်ခဲ့ခြင်း မရှိသေးပါဘူး။
ဟိုဆမ်ဟာဆန်ဟာ အီဂျစ်အသင်းနဲ့အတူ အာဖရိကဖလား ၃ ကြိမ်အထိ ရယူနိုင်ခဲ့ပြီး အာရပ်နိုင်ငံများ ၁ ကြိမ် ရယူနိုင်ခဲ့တာပါ။
ဟိုဆမ်ဟာဆန်ဟာ အီဂျစ်အသင်းကို ဇွန်လထဲမှာကစားမယ့် ဘာကီနာဖာဆို၊ ဂီနီဘစ်ဆောအသင်းတို့နဲ့ ၂၀၂၆ ကမ္ဘာ့ဖလားခြေစစ်ပွဲ(အာဖရိကဇုန်)ပွဲစဉ်တွေမှာ စတင်ကိုင်တွယ်ရမှာ ဖြစ်ပါတယ်။
အီဂျစ်အသင်းဟာ ခြေစစ်ပွဲ ၂ ပွဲကစားအပြီးမှာ ၂ ပွဲစလုံး အနိုင်ရထားပါတယ်။
Source: CNA
- By CNI
- Category: အားကစား
- Hits: 548
CNI Sport News
၂၀၂၄ ခုနှစ်၊ ဖေဖော်ဝါရီ ၇
ရှုံးပွဲဆက်နေမှုကြောင့် ဖိအားတွေနဲ့ ရင်ဆိုင်နေရတဲ့ နည်းပြ ပိုချက်တီနိုက သူဟာ ချယ်လ်ဆီးအသင်း ပိုင်ရှင်တွေဆီကနေ ကောင်းမွန်တဲ့စာကို ရရှိခဲ့တယ်လို့ ပြောလိုက်ပါတယ်။
ပိုချက်တီနိုက”ကျနော်တို့အားလုံး ဒီထဲမှာအတူရှိနေကြပြီး ဒါက အရေးကြီးပါတယ်။ ကျနော်ဟာ ပိုင်ရှင် တွေဆီကနေ အလွန်ကောင်းမွန်တဲ့စာကို ရရှိခဲ့ပါတယ်။ ကျနော်ဟာ အသင်းပိုင်ရှင်တွေနဲ့ရော အားကစား ဒါရိုက်တာနဲ့ပါ နေ့တိုင်းအဆက်အသွယ်ရှိနေပါတယ်”လို့ ပြောခဲ့တာပါ။
ချယ်လ်ဆီးအသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ ဝုလ်ဗ်စ်အသင်းကို ၄ ဂိုး-၂ ဂိုးနဲ့ အရေးနိမ့် ခဲ့ပြီးနောက် အမှတ်ပေးဇယားအဆင့် ၁၁ နေရာကို ကျဆင်းသွားခဲ့ပါတယ်။ တောဒ့်ဘိုလီဦးဆောင်တဲ့ ချယ်လ်ဆီး အသင်းပိုင်ရှင်တွေဟာ အသင်းကို ၂၀၂၂ ခုနှစ်၊မေလမှာ စတင်တာဝန်ယူပြီးကတည်းက ပြောင်းရွှေ့ကြေး ပေါင် ၁ ဘီလီယံကျော်သုံးစွဲပြီး ကစားသမားသစ်တွေ ခေါ်ယူပေးခဲ့တာပါ။ ဒါပေမယ့် ချယ်လ်ဆီးအသင်းဟာ ဒီရာသီ ပရီးမီးယားလိဂ်ပွဲပေါင်း ၂၃ ပွဲ ကစားအပြီးမှာ နိုင်ပွဲ ၉ ပွဲသာရယူနိုင်ခဲ့တာ ဖြစ်ပါတယ်။
ချယ်လ်ဆီးအသင်းဟာ ပရီးမီးယားလိဂ်ပြိုင်ပွဲမှာ ၂ ပွဲဆက်တိုက်အရေးနိမ့်ပြီးနောက် နည်းပြပိုချက်တီနိုဟာ ရာထူးကနေ ထုတ်ပယ်ခံရမယ့် ဖိအားတွေနဲ့ ရင်ဆိုင်လာခဲ့ရတာပါ။ လန်ဒန်ကလပ်ဟာ ပြီးခဲ့တဲ့ရာသီက ပရီးမီးယားလိဂ်ပြိုင်ပွဲမှာ အဆင့် ၁၂ နေရာနဲ့ ရာသီအဆုံးသတ်ခဲ့သလို ဒီရာသီမှာလည်း ရလဒ်ဆိုးတွေကြောင့် အသင်းပရိသတ်တွေဟာ စိတ်ပျက်နေတာဖြစ်ပါတယ်။ ပိုချက်တီနိုကတော့ ပရိသတ်တွေအနေနဲ့ သူတို့ကို ယုံကြည်ဖို့ ပြောခဲ့ပါတယ်။
ပိုချက်တီနိုက “ပရိသတ်တွေဟာ ကျနော်တို့ကို ယုံကြည်မှုရှိဖို့လိုအပ်ပါတယ်။ ကျနော်တို့ဟာ ပရိသတ်တွေနဲ့ ကောင်းမွန်တဲ့ အချိတ်အဆက်တွေကို ဖန်တီးနိုင်ဖို့လိုအပ်ပါတယ်။ စတမ်းဖို့ဒ်ဘရစ်ချ်ကိုသွားတဲ့အချိန်မှာ ပရိသတ်တွေအနေနဲ့ ကွဲပြားခြားနားတဲ့ချယ်လ်ဆီး၊မတူညီတဲ့ ပရောဂျက်နဲ့ ကွဲပြားတဲ့အရာအားလုံးကို နားလည်ဖို့ လိုအပ်ပါတယ်။ ကစားသမားတွေဟာ အကောင်းဆုံးစွမ်းဆောင်ရည်တွေနဲ့ ပွဲကိုအနိုင်ရချင်ကြတယ်ဆိုတာ ပရိသတ်တွေကို ကျနော်ကတိပေးပါတယ်” လို့ ပြောခဲ့တာပါ။
ချယ်လ်ဆီးအသင်းဟာ ဖေဖော်ဝါရီ ၈ ရက်မနက်ပိုင်းမှာ FA ဖလားစတုတ္ထအဆင့်ပြန်ကန်ပွဲစဉ်အဖြစ် အက်စတွန် ဗီလာအသင်းနဲ့ ယှဉ်ပြိုင်ရမှာဖြစ်ပါတယ်။
Source:BBC
- By CNI
- Category: အားကစား
- Hits: 531
CNI Sport News
၂၀၂၄ ခုနှစ်၊ ဖေဖော်ဝါရီ ၇
ဂျော်ဒန်အသင်းကို အရေးနိမ့်ပြီး အာရှဖလားပြိုင်ပွဲကနေ တောင်ကိုရီးယားအသင်း ထွက်ခွာခဲ့ရပြီးနောက် အသင်းခေါင်းဆောင် ဆွန်ဟောင်မင်က တောင်ကိုရီးယားအသင်း ပရိသတ်တွေကို တောင်းပန်ခဲ့ပါတယ်။
ဆွန်ဟောင်မင်က "ကျနော် ဘာပြောရမလဲ မသိတော့ပါဘူး။ အလွန်ဝမ်းနည်းမိပါတယ်။ ကစားသမားတွေက အကောင်းဆုံးလုပ်ခဲ့ပေမယ့် အမှားအယွင်းတွေနဲ့အတူ ပွဲက အဆုံးသတ်သွားတဲ့အတွက် ကျနော်ဝမ်းနည်းမိ ပါတယ်။ ပရိသတ်တွေက ကျနော်တို့ကို အကောင်းဆုံး အားပေးခဲ့ပေမယ့် သူတို့မျှော်လင့်သလို မစွမ်းဆောင်နိုင်ခဲ့ တဲ့အတွက် တောင်းပန်ပါတယ်။ အနာဂတ်မှာ လက်ရွေးစင်အသင်း အများကြီး တိုးတက်နိုင်ဖို့အတွက် ကျနော် ပိုပြီးကြိုးစားသွားမယ်"လို့ ပြောကြားခဲ့ပါတယ်။
တောင်ကိုရီးယားအသင်းဟာ အာရှဖလားပြိုင်ပွဲ ဆီမီးဖိုင်နယ်ပွဲစဉ်မှာ ဂျော်ဒန်အသင်းကို ၂ ဂိုး-ဂိုးမရှိနဲ့ အရေးနိမ့်ခဲ့ တာ ဖြစ်ပါတယ်။
တောင်ကိုရီးယားအသင်းဟာ ဒီပွဲမှာ ဘောလုံးပိုင်ဆိုင်မှု ၇၀ ရာခိုင်နှုန်းအထိ ရှိခဲ့ပေမယ့် ဂိုးပေါက်တည့်မှု ၁ ကြိမ်မှ မရှိခဲ့ပါဘူး။
ဂျော်ဒန်အသင်း ဗိုလ်လုပွဲတက်သွားလို့ အောင်ပွဲခံနေကြစဉ်
ဂျော်ဒန်အသင်းဟာ ဂိုးပေါက်ကန်သွင်းမှု ၁၇ ကြိမ်နဲ့ ဂိုးပေါက်တည့်မှု ၇ ကြိမ်အထိရှိခဲ့တာ ဖြစ်ပါတယ်။
တောင်ကိုရီးယားအသင်းနည်းပြ ကလင်းစမန်းက ဒီပွဲရှုံးနိမ့်ခဲ့တဲ့အတွက် အလွန်စိတ်ပျက်ပေမယ့် နည်းပြရာထူး က နုတ်ထွက်သွားမှာ မဟုတ်ဘူးလို့ ပြောခဲ့ပါတယ်။
ကလင်းစမန်းက "ကျနော် ရာထူးကနုတ်ထွက်ဖို့ အစီအစဉ်မရှိပါဘူး။ ကျနော်ဒီပြိုင်ပွဲနဲ့ ပတ်သက်ပြီး သုံးသပ်မှုတွေ ပြုလုပ်သွားမှာပါ။ ပြီးရင် တောင်ကိုရီးယားကို ပြန်သွားပြီး အဖွဲ့ချုပ်၊ အသင်းတို့နဲ့ ဒီပြိုင်ပွဲမှာ ကောင်းတဲ့အရာ တွေ၊ ဆိုးတဲ့အရာတွေကို ဆွေးနွေးသွားမယ်"လို့ ပြောကြားခဲ့ပါတယ်။
ဂျော်ဒန်အသင်းကတော့ သူတို့ရဲ့သမိုင်းမှာ အာရှဖလားပြိုင်ပွဲရဲ့ ဗိုလ်လုပွဲကို ပထမဆုံးအကြိမ် တက်နိုင်ခဲ့တာ ဖြစ်ပါတယ်။
Source: Metro
- By CNI
- Category: အားကစား
- Hits: 625
CNI Sport News
၂၀၂၄ ခုနှစ်၊ ဖေဖော်ဝါရီ ၆
အင်္ဂလန်အသင်းဟာ ယူရို ၂၀၂၄ ပြိုင်ပွဲ မတိုင်ခင် ပြင်ဆင်မှု အစိတ်အပိုင်းအဖြစ် ဘော့စနီးယား၊ အိုက်စလန် အသင်းတို့နဲ့ ခြေစမ်းပွဲ ယှဉ်ပြိုင်မယ်လို့ ကြေညာခဲ့ပါတယ်။
အင်္ဂလန်အသင်းဟာ ဇွန် ၃ ရက်မှာ ဘော့စနီးယားနဲ့ စိန့်ဂျိမ်းစ်ပါ့ခ်ကွင်း၊ ၇ ရက်မှာ အိုက်စလန်အသင်းနဲ့ ဝင်ဘာလေကွင်းမှာ ယှဉ်ပြိုင်သွားမှာပါ။
အင်္ဂလန်အသင်းဟာ ဒီ ၂ ပွဲ ကစားပြီးရင် ယူရို ၂၀၂၄ ပြိုင်ပွဲ အုပ်စုအဖွင့်ပွဲစဉ်အဖြစ် ဇွန်လ ၁၆ ရက်မှာ ဆားဘီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။
အင်္ဂလန်အသင်းဟာ ဒီခြေစမ်းပွဲ ၂ ပွဲမတိုင်ခင် မတ်လ ၂၃ ရက်မှာ ဘရာဇီးလ်၊ ၂၆ ရက်မှာ ဘယ်လ်ဂျီယံအသင်း တို့နဲ့ ခြေစမ်းပွဲကစားဖို့လည်း စီစဉ်ထားတာပါ။
ဘော့စနီးယားနဲ့ အိုက်စလန်အသင်းတို့ဟာ ယူရို ၂၀၂၄ ပြိုင်ပွဲ ယှဉ်ပြိုင်ခွင့်ရဖို့ ခြေစစ်ပွဲ မအောင်မြင်သေးပေမယ့် မတ်လထဲမှာ ကစားမယ့် ပလေးအော့ဖ် အဆင့်တွေကနေ ဒီပြိုင်ပွဲ ယှဉ်ပြိုင်ခွင့်ရအောင် ကြိုးပမ်းရမှာ ဖြစ်ပါတယ်။
ယူရို ၂၀၂၄ ပြိုင်ပွဲ ဆုဖလားကိုတွေ့ရစဉ်
ဘော့စနီးယားအသင်းဟာ ပလေးအော့ဖ် ဆီမီးဖိုင်နယ်အဖြစ် ယူကရိန်းအသင်းနဲ့ ယှဉ်ပြိုင်ရမှာဖြစ်ပြီး အိုက်စလန် အသင်းက အစ္စရေးအသင်းနဲ့ ယှဉ်ပြိုင်ရမှာပါ။
ဒီပွဲစဉ် ၂ ပွဲမှာ အနိုင်ရတဲ့ အသင်းဟာ ဗိုလ်လုပွဲယှဉ်ပြိုင်ပြီး ဝင်ခွင့် ၁ နေရာကို ရရှိမှာဖြစ်ပါတယ်။
အင်္ဂလန်အသင်းကတော့ ယူရို ၂၀၂၄ ပြိုင်ပွဲမှာ ချန်ပီယံဆု ရယူနိုင်ဖို့ ရည်မှန်းထားတာပါ။ အင်္ဂလန်အသင်းဟာ ပြီးခဲ့တဲ့ ယူရို ၂၀၂၀ ပြိုင်ပွဲဗိုလ်လုပွဲမှာ အီတလီအသင်းကို ပင်နယ်တီ အဆုံးအဖြတ်မှာ အရေးနိမ့်ပြီး ဒုတိယသာ ရရှိခဲ့တာကြောင့် ဒီတစ်ကြိမ်ပြိုင်ပွဲမှာ ချန်ပီယံဆုရယူနိုင်ဖို့ မျှော်လင့်နေတာ ဖြစ်ပါတယ်။
အင်္ဂလန်အသင်းဟာ ယူရို ၂၀၂၄ ပြိုင်ပွဲမှာ ဆားဘီးယား၊ ဒိန်းမတ်၊ ဆလိုဗေးနီးယားအသင်းတို့နဲ့ တစ်အုပ်စုတည်း ကျရောက်နေတာပါ။
ဂျာမနီနိုင်ငံက အိမ်ရှင်အဖြစ် ကျင်းပမယ့် ယူရို ၂၀၂၄ ပြိုင်ပွဲကို ဇွန်လ ၁၄ ရက်ကနေ ဇူလိုင် ၁၄ ရက်အထိ ကျင်းပသွားမှာ ဖြစ်ပါတယ်။
Source: BBC
- By CNI
- Category: အားကစား
- Hits: 545
CNI Sport News
၂၀၂၄ ခုနှစ်၊ ဖေဖော်ဝါရီ ၆
ဟောင်ကောင်မှာကစားခဲ့တဲ့ ခြေစမ်းပွဲမှာ မပါဝင်နိုင်ခဲ့တာကြောင့် ပရိသတ်တွေရဲ့ စိတ်ပျက်မှုကို ကြုံတွေ့ခဲ့ရတဲ့ မက်ဆီက တိုကျိုခြေစမ်းပွဲမှာ အင်တာမိုင်ယာမီအသင်းနဲ့အတူ ပါဝင်ကစားနိုင်ဖို့ မျှော်လင့်တယ်လို့ ပြောခဲ့ပါ တယ်။
မက်ဆီက “ဒီခြေစမ်းပွဲမှာ ပါဝင်နိုင်မလားဆိုတာ သေချာမသိသေးပေမယ့် ကျနော်ဟာ ပြီးခဲ့တဲ့ရက် အနည်းငယ် ကထက် အများကြီးပိုကောင်းနေတယ်လို့ ခံစားနေရပါတယ်။ လေ့ကျင့်ရေးမှာ ဘယ်လိုဖြစ်လာမလဲ ဆိုတာကို စောင့်ကြည့်ရမှာဖြစ်ပြီး ဒီပွဲကို ကျနော်တကယ် ကစားချင်ပါတယ်”လို့ သတင်းစာရှင်းလင်းပွဲမှာ ပြောခဲ့တာပါ။
ပြီးခဲ့တဲ့ ဟောင်ကောင်ခြေစမ်းပွဲမှာ အင်တာမိုင်ယာမီအသင်းဟာ မက်ဆီကို အသုံးမပြုခဲ့တာကြောင့် ပရိသတ် တွေရဲ့ လှောင်ပြောင်မှုကို ခံခဲ့ရသလို သူတို့ရဲ့ လက်မှတ်ခတွေကို ပြန်အမ်းပေးဖို့ အော်ဟစ်မှုတွေ ပြုလုပ်တာ လည်းခံခဲ့ရတာဖြစ်ပါတယ်။ မက်ဆီက သူ့ရဲ့ ကြွက်သားတွေရောင်ရမ်းနေတာကြောင့် ဒီပွဲကို မကစားနိုင်ခဲ့တဲ့ အတွက် အလွန်စိတ်ပျက်မိတယ်လို့ မီဒီယာသမားတွေနဲ့ တွေ့ဆုံချိန်ပြောခဲ့တာပါ။
မက်ဆီက “ကျနော်ဒီပွဲကို ပါဝင်ချင်ခဲ့ပေမယ့် ဒဏ်ရာကမသက်သာသလိုခံစားနေခဲ့ရပါတယ်။ အဲဒါကြောင့် ကျနော့်အတွက် ကစားနိုင်ဖို့က အလွန်ခက်ခဲခဲ့ပါတယ်။ လူတွေက ကျနော်ပါဝင်ကစားတာကို ကြည့်ဖို့ စောင့်ဆိုင်းနေတယ်ဆိုတာ နားလည်ပါတယ်။ အဲဒါကြောင့် ဟောင်ကောင်မှာ ကစားခွင့်ရဖို့ နောက်ထပ် အခွင့်အရေးတွေရလာဖို့ ကျနော်မျှော်လင့်တယ်”လို့ ပြောခဲ့ပါတယ်။
အင်တာမိုင်ယာမီအသင်းဟာ တိုကျိုခြေစမ်းပွဲအဖြစ် ဂျေလိဂ်ချန်ပီယံ ဗစ်ဆဲလ်ကိုဘီအသင်းနဲ့ ဖေဖော်ဝါရီ ၇ ရက်မှာယှဉ်ပြိုင်သွားမှာဖြစ်ပါတယ်။
Source:ChannelNewsAsia
- By CNI
- Category: အားကစား
- Hits: 433
CNI Sport News
၂၀၂၄ ခုနှစ်၊ ဖေဖော်ဝါရီ ၆
ဝက်စ်ဟမ်းအသင်းကို အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ဒူးအရွတ်ဒဏ်ရာ ရရှိသွားခဲ့တဲ့ နောက်ခံလူ လီဆန်ဒရိုမာတီနက်ဇ်ဟာ ၈ ပတ်ကြာ အနားယူရမယ်လို့ ယူနိုက်တက်အသင်းက ထုတ်ပြန်ခဲ့ပါတယ်။
အဲဒါကြောင့် လီဆန်ဒရိုမာတီနက်ဇ်ဟာ အစောဆုံး ဧပြီလအထိ အနားယူရတော့မှာပါ။
ဝက်စ်ဟမ်းအသင်းကို ၃ ဂိုး- ဂိုးမရှိနဲ့ အနိုင်ရတဲ့ပွဲမှာ ယူနိုက်တက်အသင်း နောက်ခံလူ လီဆန်ဒရိုမာတီနက်ဇ်ဟာ ဝက်စ်ဟမ်းအသင်း နောက်ခံလူ ကူဖယ်လ်ဘောလုံး မရယူနိုင်အောင် ကာဖို့ကြိုးစားခဲ့တာမှာ ဒဏ်ရာရရှိသွားခဲ့တာ ဖြစ်ပါတယ်။
အာဂျင်တီးနား နောက်ခံလူဟာ ဆေးကုသမှုခံယူပြီးနောက် ဆက်ကစားဖို့ ကြိုးစားခဲ့သေးပေမယ့် အဆင်မပြေ တော့တာကြောင့် ဗာရန်းနဲ့ လူစားလဲခဲ့ရတာပါ။
အသက် ၂၆ နှစ်အရွယ်ရှိ လီဆန်ဒရိုမာတီနက်ဇ်ဟာ ခြေထောက်ဒဏ်ရာကြောင့် ၃ လကျော်ကြာ အနားယူခဲ့ရ ပြီးနောက် ယူနိုက်တက်အသင်းအတွက် ပွဲအနည်းငယ်သာ ပြန်ကစားခဲ့ရသေးပေမယ့် နောက်ထပ် ဒဏ်ရာရရှိသွား ခဲ့တာ ဖြစ်ပါတယ်။
လီဆန်ဒရိုမာတီနက်ဇ် ဒဏ်ရာရသွားလို့ ယူနိုက်တက်ကစားသမားတွေ ကူညီနေကြစဉ်
ဝက်စ်ဟမ်းအသင်းနဲ့ပွဲမှာ ဒဏ်ရာရရှိခဲ့တဲ့ လီဆန်ဒရိုမာတီနက်ဇ်ရဲ့ ဒဏ်ရာကို ခွဲစိတ်ကုသဖို့ မလိုဘူးလို့ ယူနိုက်တက်အသင်းရဲ့ ထုတ်ပြန်ချက်မှာ ဖော်ပြထားတာပါ။
လီဆန်ဒရိုမာတီနက်ဇ်ကတော့ သူမကြာခင် ပြန်လာပြီး အသင်းနဲ့အတူတူ တိုက်ပွဲဝင်သွားမယ်လို့ ပြောထားပါ တယ်။
၂၀၂၂ ခုနှစ်က အေဂျက်စ်အသင်းကနေ ရောက်ရှိလာပြီးကတည်းက ယူနိုက်တက်အသင်းမှာ အဓိက ကစားသမား အဖြစ် ပါဝင်ခဲ့တဲ့ လီဆန်ဒရိုမာတီနက်ဇ်ဟာ ဒီရာသီမှာ ဒဏ်ရာကြောင့် အသင်းရဲ့ ပွဲစဉ် ၂၂ ပွဲကို လွဲချော်ထားခဲ့ တာပါ။
ယူနိုက်တက်အသင်း အတွက်တော့ ရလဒ်ကောင်းတွေရရှိနေတဲ့ အချိန်မှာ အာဂျင်တီးနား ကစားသမားကို ၈ ပတ် ကြာ လက်လွှတ်ရမှာဖြစ်လို့ စိတ်ပျက်စရာ ဖြစ်ခဲ့ရပါတယ်။
ယူနိုက်တက်အသင်းဟာ လက်ရှိအချိန်မှာ နောက်ဆုံးကစားခဲ့တဲ့ ပရီးမီးယားလိဂ် ၂ ပွဲဆက်တိုက် အနိုင်ရပြီး အဆင့် ၆ နေရာမှာ ရပ်တည်နေတာပါ။
ယူနိုက်တက်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် အက်စတွန်ဗီလာအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: BBC
- By CNI
- Category: အားကစား
- Hits: 458
CNI Sport News
၂၀၂၄ ခုနှစ်၊ ဖေဖော်ဝါရီ ၆
မန်စီးတီးအသင်းနည်းပြ ဂွာဒီယိုလာက ဘရန်ဖို့ဒ်အသင်းကို အနိုင်ရခဲ့တဲ့ပွဲစဉ်မှာ အသင်းအတွက် ဟက်ထရစ် ဂိုးသွင်းယူနိုင်ခဲ့တဲ့ ဖိုဒန်ကို ထူးခြားတဲ့ကစားသမားလို့ ပြောခဲ့ပါတယ်။
ဂွာဒီယိုလာက “ဒီနေ့ ဖိုဒန်ရဲ့ စွမ်းဆောင်ရည်ကို ကျနော်တို့ လိုအပ်ပါတယ်။ ဖိုဒန်ဟာ အသင်းအတွက် သွင်းဂိုး တွေရော ဂိုးဖန်တီးမှုတွေပါ ပြုလုပ်ပေးနေပါတယ်။ သူဟာ တကယ်ကို ထူးခြားတဲ့ကစားသမားပါ။ သူဟာ လူငယ် ဖြစ်ပေမယ့် မန်စီးတီးအတွက် ပွဲပေါင်း ၂၅၀ ပါဝင် ကစားပေးပြီးပါပြီ။ ဒါက သူစပြီး ပါဝင်ကစားကတည်းက သူ့ရဲ့ သက်ရောက်မှုကို ပြသနေတာပါ”လို့ ပြောကြားခဲ့ပါတယ်။
မန်စီးတီးအသင်းက ဘရန်ဖို့ဒ်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ဖိုဒန်ဟာ အသင်း အတွက် ၃ ဂိုးစလုံး သွင်းယူပေးနိုင်ခဲ့တာ ဖြစ်ပါတယ်။
ဒီပွဲမှာ မော်ပေးက ဘရန်ဖို့ဒ်အသင်းအတွက် ဦးဆောင်ဂိုး စပြီး သွင်းယူနိုင်ခဲ့ပေမယ့် ဖိုဒန်က မန်စီးတီးအသင်း အတွက် ချေပဂိုးနဲ့ အနိုင်ဂိုးတွေကို သွင်းယူပေးခဲ့တာပါ။
မန်စီးတီးနဲ့ ဘရန်ဖို့ဒ် ယှဉ်ပြိုင်နေစဉ်
ဘရန်ဖို့ဒ်အသင်းနဲ့ပွဲက ဟက်ထရစ်ဟာ ဖိုဒန်အတွက် သူ့ရဲ့ ကစားသမားဘဝ ပရီးမီးယားလိဂ်ပြိုင်ပွဲမှာ ဒုတိယမြောက် ဟက်ထရစ် ရယူနိုင်ခဲ့တာဖြစ်ပါတယ်။
ပထမဆုံး ဟက်ထရစ်ကိုတော့ မြို့ခံပြိုင်ဘက် ယူနိုက်တက်အသင်းကို အနိုင်ရတဲ့ပွဲမှာ ရယူနိုင်ခဲ့တာပါ။
အသက် ၂၃ နှစ် အရွယ်သာရှိသေးတဲ့ မန်စီးတီးအသင်း အကယ်ဒမီထွက် ဖိုဒန်ဟာ ဒီရာသီမှာ အသင်းအတွက် ၃၃ ပွဲ ပါဝင်ကစားထားပြီး ၁၄ ဂိုးအထိ သွင်းယူနိုင်ခဲ့တာ ဖြစ်ပါတယ်။
မန်စီးတီးအသင်းဟာ ဘရန်ဖို့ဒ်အသင်းကို အနိုင်ရခဲ့တာကြောင့် ထိပ်ဆုံးနေရာက လီဗာပူးလ်အသင်းနဲ့ ၂ မှတ် အကွာ အဆင့် ၂ နေရာကို ပြန်တက်လှမ်းနိုင်ခဲ့တာပါ။
မန်စီးတီးအသင်းဟာ လက်ကျန် ၁ ပွဲ ကစားဖို့ ကျန်ရှိနေသေးတာကြောင့် ဒီပွဲမှာသာ အနိုင်ရလဒ် ရယူနိုင်ရင် ပရီးမီးယားလိဂ် အမှတ်ပေးဇယားကို ဦးဆောင်နိုင်မှာ ဖြစ်ပါတယ်။
ဘရန်ဖို့ဒ်အသင်းနဲ့ပွဲစဉ်မှာ မန်စီးတီးအသင်းရဲ့ အဓိက ကစားသမားတွေဖြစ်တဲ့ ဒီဘရိုင်းနဲ့ ဟာလန်းတို့ဟာ ၅ လ ကျော်အကြာမှ ပထမဆုံးအကြိမ်အသင်းရဲ့ ပွဲထွက်လူစာရင်းမှာ အတူတွဲပါဝင်ခဲ့ရတာပါ။
သူတို့နှစ်ဦးဟာ ဒီပွဲမှာ သွင်းဂိုး ၁ ဂိုးစီ ဖန်တီးမှု ပြုလုပ်ပေးနိုင်ခဲ့ပါတယ်။ မန်စီးတီးအသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် အဲဗာတန်အသင်းနဲ့ ယှဉ်ပြိုင်ရမှာဖြစ်ပါတယ်။
Source: ESPN
Page 162 of 374
Connect with us
