CNI Sport News

၂၀၂၃ ခုနှစ်၊ ဇွန်လ ၂၃

အင်တာမိုင်ယာမီ အသင်းတိုက်စစ်မှူး မက်ဆီက ဘတ်ပီအနေနဲ့ ရီးရယ်လ် ဒါမှမဟုတ် ဘာစီလိုနာအသင်းကိုပဲ သွားသွား သူဟာ အောင်မြင်နေတဲ့ အသင်းကိုပြောင်းဖို့ ထိုက်တန်တယ်လို့ ပြောလိုက်ပါတယ်။

မက်ဆီက “ကျနော်က သူ့ကို ဘာစီလိုနာ သွားစေချင်ပေမယ့် သူက ရီးရယ်လ်သွားချင်ရင်လည်း သွားလို့ရပါတယ်။ သူက အောင်မြင်နေတဲ့ အသင်းကိုပြောင်းဖို့ ထိုက်တန်တဲ့သူ“လို့ ပြောခဲ့ပါတယ်။

ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ၂၀၂၄ မှာ ကုန်ဆုံးမှာဖြစ်ပြီး ကလပ်အသင်းကို စာချုပ် သက်တမ်းတိုးမှာ မဟုတ်ဘူးလို့ ပြောထားပေမယ့် လာမယ့်ရာသီ အကုန်ထိ ဆက်ရှိမယ်လို့ ကစားသမားက အတည်ပြု ထားပါတယ်။ 

မက်ဆီနဲ့ ဘတ်ပီကို တွေ့ရစဉ်

အဲဒါကြောင့် ဘတ်ပီဟာ ပီအက်စ်ဂျီအသင်းကနေ လာမယ့်ရာသီအကုန်မှာ အလွတ်နဲ့ ထွက်ခွာနိုင်လို့ ပြင်သစ် ကလပ်ဟာ သူ့ကို ရောင်းချဖို့ စီစဉ်နေတာပါ။

ဘတ်ပီကို ရီးရယ်လ်အသင်းက ပြီးခဲ့တဲ့ နွေရာသီက ခေါ်ယူဖို့ နီးစပ်ခဲ့ပေမယ့် ကစားသမားက ပီအက်စ်ဂျီအသင်းနဲ့ စာချုပ်သက်တမ်း တိုးခဲ့တာကြောင့် ပြင်သစ်ကလပ်မှာ ဆက်ပြီးရှိခဲ့တာ ဖြစ်ပါတယ်။ 

ဘတ်ပီဟာ အနာဂတ်မှာ ရီးရယ်လ်အသင်းထံ ပြောင်းရွှေ့ချင်တဲ့ ရည်မှန်းချက် အစီအစဉ်ရှိသလို စပိန်ကလပ် ကလည်း ကစားသမားကို လာမယ့် ရာသီအကုန်မှာ အလွတ်နဲ့ ခေါ်ယူဖို့ ပစ်မှတ်ထားနေတာပါ။

ပီအက်စ်ဂျီအသင်းမှာ အတူတွဲကစားခဲ့တဲ့ မက်ဆီကတော့ ဘတ်ပီကို အောင်မြင်မှုတွေရနိုင်တဲ့ အသင်းဖြစ်တဲ့ ရီးရယ်လ် ဒါမှမဟုတ် ဘာစီလိုနာအသင်းထံ ပြောင်းဖို့ အကြံပေးခဲ့တာ ဖြစ်ပါတယ်။ 

မက်ဆီဟာ ပီအက်စ်ဂျီအသင်းကနေ မထွက်ခွာခင် ဘတ်ပီနဲ့ နှစ်ဦးသား ဒီအကြောင်းအရာတွေကို ပြောခဲ့တာလို့ သတင်းတွေမှာ ဖော်ပြထားပါတယ်။

ပြင်သစ်အသင်းခေါင်းဆောင်ဟာ လာမယ့်ရာသီ အကုန်မှသာ သူ့ရဲ့ အနာဂတ်ကို ဆုံးဖြတ်သွားမှာဖြစ်ပြီး လာမယ့် ရာသီ ပီအက်စ်ဂျီအသင်းမှာ ပျော်ပျော်ရွှင်ရွှင်နဲ့ ကစားသွားမယ်လို့ ထုတ်ပြောထားပါတယ်။ 

ဘတ်ပီဟာ မကြာသေးခင်က ပြင်သစ်လက်ရွေးစင် အသင်းနဲ့ ယူရို ၂၀၂၄ ခြေစစ်ပွဲတွေ ပါဝင်ကစားခဲ့ပြီး လက်ရှိ အချိန်မှာ ရာသီသစ် မစတင်ခင် အားလပ်ရက် ရထားလို့ အနားယူနေပါတယ်။

Source: besoccer

CNI Sport News

၂၀၂၃ ခုနှစ်၊ ဇွန်လ ၂၂

ပီအက်စ်ဂျီကြယ်ပွင့် နေမာဟာ ကိုယ်ဝန်ရှိနေတဲ့ ချစ်သူ ဘီယန်ကာဒီကို လူသိရှင်ကြား တောင်းပန်မှုပြုလုပ်တဲ့ အချိန်မှာ အမှားပြုလုပ်ခဲ့တယ်လို့ ဝန်ခံခဲ့ပါတယ်။

နေမာနဲ့ ဘီယန်ကာဒီတို့ဟာ သူတို့နှစ်ဦးရဲ့ ပထမဆုံး ရင်သွေးလေးကို ပိုင်ဆိုင်ထားတဲ့ အကြောင်းကို ဧပြီလက ကြေညာခဲ့ပါတယ်။ 

ဘရာဇီးလ် တိုက်စစ်မှူး နေမာဟာ အရင်ချစ်သူဟောင်းဖြစ်သူ ကာရိုလီနာဒန်တက်စ်နဲ့ ၁၂ နှစ်အရွယ်ရှိ သားတစ်ဦးကိုလည်း ပိုင်ဆိုင်ထားပါတယ်။

လူအများအပြားဟာ နေမာရဲ့ အချစ်ရေးကို အာရုံစူးစိုက်မှုတွေရှိနေတဲ့ အချိန်မှာ ဘရာဇီးလ်ကစားသမားဟာ အဆင်မပြေမှုတွေရှိနေတဲ့ အချစ်ရေးကို ဖွင့်ဟခဲ့တာပါ။

နေမာက “ကျနော် အမှားလုပ်ခဲ့မိပါတယ်။ သူမဟာ ကျနော့်ဘေးမှာရှိခဲ့တဲ့ အိပ်မက်မက်ခဲ့တဲ့ အမျိုးသမီး၊ ကျနော့် ကလေးရဲ့ အမေပါ။ သူမကို ကျနော့်ရဲ့ အသုံးမကျတဲ့ အရာတွေ၊ အမှားတွေအတွက် တောင်းပန်ခဲ့ပြီးပါပြီ။ ဒါပေမယ့် လူသိရှင်ကြား ထပ်ပြီး အတည်ပြုဖို့ လိုတယ်လို့ ခံစားရပါတယ်။ ကိုယ်ရေးကိုယ်တာ ကိစ္စဟာ လူသိ ရှင်ကြားဖြစ်ခဲ့ရင် တောင်းပန်မှုကို လူသိရှင်ကြား ထုတ်ပြန်သင့်ပါတယ်။ ကျနော်တို့ နှစ်ဦးကြားမှာ အဆင်ပြေပါ့ မလားဆိုတာ မသိပေမယ့် ကျနော်ကြိုးစား ကြည့်ချင်ပါတယ်”လို့ အင်စတာဂရမ်မှာ ရေးသားခဲ့ပါတယ်

နေမာနဲ့ ချစ်သူ ဘီယန်ကာဒီကို တွေ့ရစဉ်

နေမာဟာ အခုနွေရာသီမှာ ကွင်းအတွင်းရော၊ ကွင်းပြင်ပ ကိစ္စရပ်တွေဟာ ခေါင်းကြီးပိုင်း သတင်းတွေလို ဖော်ပြ ခံနေရပြီး ပီအက်စ်ဂျီမှာ ဘယ်လောက်ကြာကြာ ဆက်ရှိမလဲဆိုတာကိုလည်း မေးခွန်းထုတ်တာ ခံနေရပါတယ်။

နေမာဟာ အခုနွေရာသီမှာ ပီအက်စ်ဂျီကနေ ထွက်ခွာနိုင်တယ်လို့ သတင်းတွေ ထွက်ပေါ်နေပြီး အသင်းဟောင်း ဘာစီလိုနာ အပါအဝင် အသင်းကြီး တချို့ရဲ့ ချိတ်ဆက်မှုတွေကို ခံနေရပါတယ်။

ကမ္ဘာ့ဈေး အကြီးဆုံး ကစားသမားအဖြစ် ယူရိုသန်း ၂၀၀ ကျော်နဲ့ ပီအက်စ်ဂျီ အသင်းထံ ရောက်ရှိလာခဲ့တဲ့ နေမာနဲ့ ပြင်သစ်ကလပ်တို့ ချုပ်ဆိုထားတဲ့ စာချုပ်ဟာ ၂၀၂၅ မှာ ကုန်ဆုံးမှာ ဖြစ်ပါတယ်။

နေမာဟာ ပြီးခဲ့တဲ့ရာသီမှာ ရရှိခဲ့တဲ့ ခြေကျင်းဝတ်ဒဏ်ရာကြောင့် ရာသီအကုန်ထိ အနားယူခဲ့ရပြီး အခုအချိန်မှာ ဒဏ်ရာကနေ ပြန်လည် သက်သာနေပြီလည်း ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဇွန်လ ၂၂

ဆော်ဒီလိဂ်ဟာ အခုနွေရာသီ အပြောင်းအရွှေ့မှာ ပရီးမီးယားလိဂ် ကစားသမား အများအပြားကို ခေါ်ယူဖို့ ကြိုးစားနေတာကြောင့် ဂယ်ရီနဗီးလ်က အင်္ဂလန်ထိပ်တန်းလိဂ် အနေနဲ့ ဒီအပြောင်းအရွှေ့တွေကို ရပ်တန့်ဖို့ ပြောလိုက်ပါတယ်။

ဂယ်ရီနဗီးလ်က “ပွဲရဲ့တည်ငြိမ်မှုတွေကို မပျက်ဆီးစေဖို့အတွက် ပရီးမီးယားလိဂ်က ဆော်ဒီ အပြောင်းအရွှေ့တွေ ကို ချက်ချင်း ရပ်တန့်သင့်နေပါပြီ။ အပြောင်းအရွှေ့တွေ ပြုလုပ်ချိန်မှာလည်း သင့်လျော်မှု ရှိ/မရှိ စစ်ဆေးရပါမယ်။ အခုအချိန်မှာ ချယ်လ်ဆီးအသင်းရဲ့ ပိုင်ဆိုင်မှုတွေကို ခင်ဗျားတို့ မကြည့်ရှုမချင်း ဒီအပြောင်းအရွှေ့တွေကို ရပ် တန့်သင့်ပါတယ်။ ဒါတွေက ဘောလုံးကို တဖြည်းဖြည်း ယိုယွင်းသွားစေမယ့် ကိစ္စရပ်တွေပါ”လို့ BBC Sport ကို ပြောသွားပါတယ်။ 

ရော်နယ်ဒို၊ ဘန်ဇီမာနဲ့ ကန်တီတို့ဟာ သူတို့ကစားသမားဘဝ အဆုံးသတ်ဖို့ နီးကပ်လာတဲ့ အချိန်မှာ ဆော်ဒီလိဂ် ကို ပြောင်းရွှေ့လာခဲ့ကြပြီး မက်ဆီကလည်း မေဂျာလိဂ် မပြောင်းရွှေ့ခင် ဆော်ဒီလိဂ်ကို ရောက်ရှိလာမယ်လို့ ထင်ကြေး ပေးခံခဲ့ရတာ ဖြစ်ပါတယ်။ 

ဂယ်ရီနဗီးလ်ကိုတွေ့ရစဉ်

ဝုလ်ဗ် အသင်းခေါင်းဆောင် ရူဘင်နာဗတ်စ်၊ ချယ်လ်ဆီးအသင်းက ကူလီဘာလီ၊ ဇီယက်ချ်နဲ့ မန်ဒီတို့ကလည်း ဆော်ဒီလိဂ်ကို ပြောင်းရွှေ့ခဲ့ကြပါတယ်။

ဆော်ဒီလိဂ်ဟာ ကမ္ဘာ့ထိပ်တန်းလိဂ် ၅ လိဂ်ထဲကို ဝင်ရောက်နိုင်ဖို့ ရည်မှန်းထားပြီး နာမည်ကျော် ကစားသမား တွေကို ထပ်ပြီးခေါ်ယူနိုင်ဖို့ ပစ်မှတ်ထား ကြိုးပမ်းနေတာ ဖြစ်ပါတယ်။

ပြီးခဲ့တဲ့ ဇွန်လက နယူးကာဆယ်အသင်းကို ပိုင်ဆိုင်တဲ့ ဆော်ဒီ အများပိုင် ရင်းနှီးမြှုပ်နှံမှု ရန်ပုံငွေအဖွဲ့(PIF)က ရော်နယ်ဒိုကို ခေါ်ယူထားတဲ့ အယ်လ်နာဆာအသင်း အပါအဝင် နိုင်ငံအတွင်းက ထိပ်တန်းလိဂ် ၄ သင်းကို ပိုင်ဆိုင်ထားတယ်လို့ အတည်ပြုထားပါတယ်။

PIF ဟာ ချယ်လ်ဆီးအသင်းရဲ့ ပုဂ္ဂလိက အစုရှယ်ယာရှင် ကုမ္ပဏီ Clearlake Capital မှာ အစုရှယ်ယာ ပိုင်ဆိုင် လားဆိုတာ မသေချာမှုတွေ ရှိပေမယ့် တိုက်ရိုက် ပါဝင်နေတယ်ဆိုတဲ့ သတင်းတွေကိုတော့ ကလပ် သတင်း ရင်းမြစ်တွေက ငြင်းဆိုထားပါတယ်။ 

ယူအီးအက်ဖ်အေ အကြီးအကဲ ဆက်ဖာရင်ကလည်း ဆော်ဒီအနေနဲ့ သူတို့ရဲ့ အကယ်ဒမီတွေမှာ ရင်းနှီးမြှုပ်နှံပြီး သူတို့ရဲ့ ကစားသမားတွေကိုသာ ပြုစုပျိုးထောင်သင့်တယ်လို့ မကြာသေးခင်က ပြောထားတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇွန်လ ၂၂

ကစားသမားဘဝက အနားယူသွားပြီဖြစ်တဲ့ ဂါရတ်ဘေးလ်က မေဂျာလိဂ် အသင်းတွေဟာ အရှုံးကို လက်ခံတာ ကြောင့် မက်ဆီအနေနဲ့ ဖိအားနည်းပြီး ပျော်ပျော်ရွှင်ရွှင်နဲ့ ကစားရမယ်လို့ ပြောလိုက်ပါတယ်။

ဂါရတ်ဘေးလ်က “မေဂျာလိဂ်မှာက အေးအေးဆေးဆေးပါပဲ။ ရီးရယ်လ်မှာ ရှုံးပွဲကြုံတွေ့ရင်တော့ ကမ္ဘာကြီး ပျက် သွားသလိုပါပဲ။ ခင်ဗျားအနေနဲ့ ဝေဖန်ခံရမယ်၊ အဲ့ဒါကြောင့် စိတ်ဓါတ်လည်းကျပြီး အိမ်ပြန်ရောက်ရင်တောင် ခင်ဗျား ပျော်ရွှင်မှာ မဟုတ်ပါဘူး။ အမေရိကန်မှာတော့ သူတို့ဟာ ရှုံးတာကို လက်ခံပါတယ်။ သူတို့မှာ ဘာ အကျိုး ဆက်မှ မရှိပါဘူး၊ တန်းလည်း ဆင်းစရာ မရှိပါဘူး။ တစ်ပွဲရှုံးပြီဆိုရင် နောက်တစ်ပွဲကို ဆက်သွားမှာပါ။ သူတို့ဟာ အရှုံးကိုလက်ခံသလို ပွဲတစ်ပွဲအနိုင်ရပြီဆိုရင် ချန်ပီယံဆုရသလို အောင်ပွဲခံကြပါတယ်။ မက်ဆီ မေဂျာလိဂ်မှာ သေချာပေါက် ပျော်ရွှင်မှာပါ”လို့ ပြောပါတယ်။

ဂါရတ်ဘေးလ်ဟာ မေဂျာလိဂ်ကလပ် လော့စ်အိန်ဂျလိစ် အသင်းမှာ ၂၀၂၂ က လအနည်းငယ်ကြာ ကစားခဲ့ပြီး မေဂျာလိဂ်ဖလားရယူနိုင်အောင် စွမ်းဆာင်ပေးခဲ့ပါတယ်။ 

လော့စ်အိန်ဂျလိစ်အသင်းက ဖီလာဒဲလ်ဖီးယားအသင်းကို အနိုင်ရခဲ့တဲ့ ဗိုလ်လုပွဲစဉ်ရဲ့ နောက်ဆုံးမိနစ်မှာ ဂါရတ်ဘေးလ်ဟာ အဖိုးတန် ချေပဂိုး သွင်းယူပေးပြီး အသင်းနဲ့အတူ ဆုဖလားရယူကာ အောင်ပွဲခံနိုင်ခဲ့ပါတယ်။

မက်ဆီနဲ့ ဂါရတ်ဘေးလ်ကိုတွေ့ရစဉ်

လက်ရှိအချိန်မှာ ဂါရတ်ဘေးလ်ရဲ့ ပြိုင်ဘက်ဟောင်း တစ်ဦးဖြစ်တဲ့ မက်ဆီဟာ မေဂျာလိဂ် အင်တာမိုင်ယာမီ အသင်းထံ ပြောင်းရွှေ့လာခဲ့တာဖြစ်ပြီး ဇူလိုင်လ ၂၁ ရက်မှာ ပွဲဦးထွက်အဖြစ် ပါဝင်ကစားဖို့ ရှိနေပါတယ်။ 

မေဂျာလိဂ်ဟာ မက်ဆီ ပြောင်းရွှေ့လာမှုနဲ့အတူ သူတို့ရဲ့ တိုးတက်မှုတွေကို အမေရိကန်နဲ့ ကမ္ဘာတစ်ဝှမ်း သိရှိအောင် လုပ်ဆောင်ဖို့ ရည်ရွယ်ထားတာပါ။ 

ဂါရတ်ဘေးလ်ကတော့ မကြာခင်မှာ မေဂျာလိဂ် ပွဲဦးထွက်အဖြစ် ကစားတော့မယ့် မက်ဆီကို ဒါနဲ့ ပတ်သက်ပြီး သိရှိသင့်တဲ့ အကြောင်းအရာတွေကို ပြောပြခဲ့တာ ဖြစ်ပါတယ်။ 

မက်ဆီဟာ အင်တာမိုင်ယာမီ အသင်းနဲ့ ၂ နှစ်ခွဲ စာချုပ်ချုပ်ဆိုခဲ့တာဖြစ်ပြီး တစ်နှစ်ကို ယူရိုသန်း ၅၀ ကနေ ၆၀ ကြားရရှိမယ်လို့ သတင်းတွေမှာ ဖော်ပြထားပါတယ်။ 

ဒေးဗစ်ဘက်ခမ်း ပူးတွဲပိုင်ဆိုင်တဲ့ အင်တာမိုင်ယာမီအသင်းဟာ အခုနှစ်ရာသီ မေဂျာလိဂ်ပြိုင်ပွဲ အရှေ့ပိုင်းဇုန်မှာ ရမှတ် ၁၅ မှတ်နဲ့ နောက်ဆုံးနေရာမှာ ရပ်တည်နေပြီး နောက်ဆုံးကစားခဲ့တဲ့ ပွဲတွေမှာ ရလဒ်တွေဆိုးခဲ့တာကြောင့် နည်းပြ ဗီးလ်နဗီးလ်ကို ရာထူးကနေ ထုတ်ပယ်ခဲ့တာလည်း ဖြစ်ပါတယ်။

CNI Sport News

၂၀၂၃ ခုနှစ်၊ ဇွန်လ ၂၁

မက်ဆီဟာ မေဂျာလိဂ်ကလပ် အင်တာမိုင်ယာမီ အသင်းရဲ့ ပွဲဦးထွက်အဖြစ် ဇူလိုင် ၂၁ ရက်မှာ မက္ကဆီကိုကလပ် ခရုပ်ဇ်အဇူလ်အသင်းနဲ့ ကစားမယ့် လိဂ်ဖလားပွဲမှာ ပါဝင်ကစားမယ်လို့ အသင်းရဲ့ ပိုင်ရှင်တစ်ဦးဖြစ်တဲ့ ဂျော့ချ်မတ်စ်က ပြောပါတယ်။

မက်ဆီနဲ့ အင်တာမိုင်ယာမီ အသင်းတို့ဟာ အပြောင်းအရွှေ့အတွက် သဘောတူညီမှု ရရှိထားပြီး စာရွက်စာတမ်းနဲ့ ဗီဇာ ကိစ္စရပ်တွေကို အပြီးသတ် လုပ်ဆောင်နေပါတယ်။

အသက် ၃၅ နှစ်အရွယ်ရှိ ကစားသမားဟာ တစ်နှစ်ကို အမေရိကန်ဒေါ်လာ သန်း ၅၀ ကနေ ၆၀ တန်ကြေးရှိ ၂ နှစ်ခွဲ စာချုပ်ချုပ်ဆိုမှာဖြစ်ပြီး ၂၀၂၆ အထိ သက်တမ်းတိုးဖို့အတွက် ရွေးချယ်ခွင့် ပါဝင်ပါတယ်။

ဘောလွန်းဒီအောဆုကို ၇ ကြိမ် ရရှိထားတဲ့ မက်ဆီဟာ အမေရိကန်မှာ ဘောလုံးကို ကြီးမားတဲ့ တိုးတက်မှုကို ရရှိစေမယ်လို့ ကတိပြုထားပါတယ်။

မက်ဆီကို တွေ့ရစဉ်

မေဂျာလိဂ်ဟာ ကမ္ဘာ့အကောင်းဆုံး လိဂ်တွေထဲက တစ်ခုဖြစ်လာဖို့ မျှော်မှန်းထားတာကြောင့် မက်ဆီ ရောက်ရှိ လာတာဟာ အမေရိကန် ဘောလုံးသမိုင်းကို ပိုပြီးတိုးတက်မှုတွေ ရရှိစေမယ်လို့ ယုံကြည်နေကြပါတယ်။

အင်တာမိုင်ယာမီ အသင်းထံ မက်ဆီ ရောက်ရှိလာမယ်ဆိုတဲ့ သတင်းတွေကြောင့် လက်မှတ်ခ ဈေးနှုန်းတွေ မြှင့် တက်ခဲ့ပြီး အသင်းရဲ့ အင်စတာဂရမ် အကောင့်ကလည်း  Follower  ၁ သန်းကနေ ၈ သန်းအထိ တိုးလာခဲ့ပါ တယ်။

အင်တာမိုင်ယာမီ အသင်းဟာ အခုနှစ်ရာသီ မေဂျာလိဂ်ပြိုင်ပွဲရဲ့ အရှေ့ပိုင်းဇုန်မှာ ရလဒ်တွေ ဆိုးနေပြီး အမှတ်ပေး ဇယား အောက်ဆုံးဖြစ်တဲ့ အဆင့် ၁၅ နေရာမှာ ရပ်တည်နေပါတယ်။ 

အင်တာမိုင်ယာမီ အသင်းဟာ ပလေးအော့ဖ်အဆင့် ယှဉ်ပြိုင်ဖို့ နောက်ဆုံး အခွင့်အရေးဖြစ်တဲ့ အဆင့် ၉ နေရာက မွန်ထရီရယ်လ်အသင်းနဲ့ ၇ မှတ် ကွာဟနေပါတယ်။ 

အဲဒါကြောင့် အင်တာမိုင်ယာမီ အသင်းအနေနဲ့ နောက်ပိုင်း ပွဲတွေမှာ ရလဒ်ကောင်းတွေ ရယူနိုင်ဖို့ လိုအပ်နေ ပါတယ်။

လိဂ်ဖလား ပြိုင်ပွဲဟာ မေဂျာလိဂ်နဲ့ မက္ကဆီကိုလိဂ်က အသင်းတွေ ယှဉ်ပြိုင်တာဖြစ်ပြီး ဒီပြိုင်ပွဲကို နှစ်စဉ်နှစ်တိုင်း ကျင်းပနေတာ ဖြစ်ပါတယ်။

CNI Sport News

၂၀၂၃ ခုနှစ်၊ ဇွန်လ ၂၁

စပါးတိုက်စစ်မှူး ဟာရီကိန်းဟာ ယူနိုက်တက်အသင်းက သူ့ကို ခေါ်ယူဖို့ စိတ်ဝင်စားတာကို ပြန်အသက်သွင်းပြီး ကမ်းလှမ်းမှုတွေ စတင်ဖို့ မျှော်လင့်နေတယ်လို့ သတင်းတွေမှာ ဖော်ပြထားပါတယ်။

ယူနိုက်တက်နည်းပြ အဲရစ်တန်ဟတ်က အခုနွေရာသီ အပြောင်းအရွှေ့မှာ ဟာရီကိန်းကို ခေါ်ယူဖို့ အဓိက ပစ်မှတ် အဖြစ် သတ်မှတ်ထားသလို နောက်ခံလူ လုပ်ခ်ရှောကလည်း အင်္ဂလန် လက်ရွေးစင်အသင်းနဲ့ စခန်းဝင်ချိန်မှာ လက်ရွေးစင် အသင်းဖော်ကို အသင်းထံ ပြောင်းရွှေ့လာနိုင်အောင် ကြိုးစားခဲ့သေးပါတယ်။ 

ဒါပေမယ့် ယူနိုက်တက်အသင်းကတော့ အခုနွေရာသီမှာ ဟာရီကိန်းကို ခေါ်ယူနိုင်ဖို့အတွက် စိတ်ဝင်စားနေတာကို အဆုံးသတ်လိုက်ပြီလို့ ယူဆရပါတယ်။

ယူနိုက်တက်အသင်းဟာ အင်္ဂလန် အသင်းခေါင်းဆောင်ကို ခေါ်ယူချင်ပေမယ့် ကစားသမားရဲ့ ပြောင်းရွှေ့ကြေး ဟာ များပြားလွန်းတာကြောင့် ခေါ်ယူမယ့် အစီအစဉ်ကို အဆုံးသတ်ခဲ့ပါတယ်။ 

ဟာရီကိန်းကတော့ အိုးထရက်ဖို့ဒ်ထံ ပြောင်းရွှေ့ချင်တဲ့ သူ့ရဲ့ မျှော်လင့်ချက်ကို မစွန့်လွှတ်သေးဘဲ ယူနိုက်တက် အသင်းက သူ့ကို ခေါ်ယူဖို့အတွက် အဖွင့်ကမ်းလှမ်းမှု ပြုလုပ်တာကို လိုချင်နေတယ်လို့ သိရပါတယ်။

ဟာရီကိန်းကို တွေ့ရစဉ်

စပါးအသင်းဟာ သူတို့ရဲ့ စံချိန်တင် ဂိုးသွင်းရှင်အတွက် ပေါင်သန်း ၁၀၀ ပြောင်းရွှေ့ကြေး သတ်မှတ်ထားပေမယ့် ယူနိုက်တက်အသင်းက ကစားသမားဟာ မကြာခင်မှာ အသက် ၃၀ ပြည့်တော့မှာဖြစ်သလို လာမယ့် ရာသီအကုန် မှာ စာချုပ်ကုန်ဆုံးမှာဖြစ်လို့ ဒီပမာဏကို ပေးချေဖို့ ဆန္ဒမရှိပါဘူး။

ယူနိုက်တက်အသင်းဟာ တိုက်စစ်မှူးသစ် တစ်ဦးကို မဖြစ်မနေ ခေါ်ယူချင်နေတာကြောင့် ပေါင်သန်း ၈၀ နဲ့ နီးစပ် တဲ့ ပြောင်းရွှေ့ကြေးက မန်ချက်စတာကလပ်ကို ခေါ်ယူနိုင်ဖို့ ဆွဲဆောင်နိုင်မှာ ဖြစ်ပါတယ်။

စပါးအသင်း အကြီးအကဲ လီဗိုင်းက ဟာရီကိန်းကို မြောက်လန်ဒန်မှာ ဆက်ပြီး ထိန်းသိမ်းချင်နေသလို လာမယ့် ၁၂ လ အတွင်းမှာ စာချုပ်သစ် ချုပ်ဆိုနိုင်ဖို့ မျှော်လင့်နေပါတယ်။

ဒါအပြင် စပါးအသင်းဟာ တိုက်စစ်မှူး ဟာရီကိန်းကို ပြိုင်ဘက်အသင်းထံ တိုက်ရိုက် မရောင်းချချင်တာလည်း ဖြစ်ပါတယ်။ 

ဟာရီကိန်းကို ခေါ်ယူဖို့ ရီးရယ်လ်နဲ့ ပီအက်စ်ဂျီတို့ကလည်း စိတ်ဝင်စားနေပေမယ့် ကစားသမားက အင်္ဂလန်မှာ ဆက်ပြီး ရှိချင်နေတာပါ။

ဟာရီကိန်းဟာ စပါးအသင်းအတွက် ပွဲပေါင်း ၄၃၅ ပွဲမှာ ၂၈၀ ဂိုး သွင်းယူပြီး ၆၄ ဂိုး ဖန်တီးထားပေမယ့် စိန်ခေါ်မှု အသစ်တွေကို ရှာဖွေဖို့ စိတ်အား ထက်သန်နေပါတယ်။ 

ပရီးမီးယားလိဂ် ဂိုးသွင်း အများဆုံး ကစားသမားစာရင်းမှာ ဟာရီကိန်းဟာ ၂၁၃ ဂိုးနဲ့ ဒုတိယနေရာမှာ ရပ်တည်နေပါတယ်။ သူ့ရဲ့အထက်မှာ အလန်ရှီးယားက ၂၆၀ ဂိုးနဲ့ ရပ်တည်နေတာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ ဇွန်လ ၂၁

ပေါ်တူဂီအသင်းခေါင်းဆောင် ရော်နယ်ဒိုဟာ အိုက်စလန်အသင်းနဲ့ ကစားခဲ့တဲ့ ယူရို ၂၀၂၄ ခြေစစ်ပွဲ မစတင်ခင် ဂင်းနစ်ကမ္ဘာ့စံချိန်တင် ဂုဏ်ပြုမှတ်တမ်းကို လက်ခံရရှိခဲ့ပါတယ်။

ရော်နယ်ဒိုဟာ အိုက်စလန်အသင်းနဲ့ ပွဲမှာ လက်ရွေးစင်ကစားသမားဘဝ ပွဲပေါင်း ၂၀၀ ပြည့်ခဲ့တာဖြစ်ပြီး နိုင်ငံတကာပွဲအများဆုံး အမျိုးသားကစားသမားအဖြစ် စံချိန်သစ်တင်နိုင်ခဲ့တာပါ။ အဲဒါကြောင့်လည်း ဂင်းနစ် စံချိန်ပြုစုရေးအဖွဲ့အစည်းက ရော်နယ်ဒိုကို ဂုဏ်ပြုမှတ်တမ်းပေးခဲ့တာဖြစ်ပါတယ်။ ပေါ်တူဂီအသင်းခေါင်းဆောင် ဟာ ၂၀၀၃ သြဂုတ်လက ကာဇက်စတန်နဲ့ ကစားခဲ့တဲ့ပွဲမှာ လက်ရွေးစင်ကစားသမားဘဝ ပွဲဦးထွက်အဖြစ် ပါဝင်ခဲ့တာပါ။

ဒီပွဲမှာ ပေါ်တူဂီအသင်းဟာ အိုက်စလန်အသင်းကို ၁ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ရော်နယ်ဒိုက ပွဲချိန် ၈၉ မိနစ်မှာ အနိုင်ဂိုးသွင်းယူပေးခဲ့တာဖြစ်ပါတယ်။ အစောပိုင်းက လူကျွံဘောအဖြစ် သတ်မှတ်ခဲ့ပေမယ့် နောက်ပိုင်းမှာ VAR က သွင်းဂိုးကို ခွင့်ပြုပေးခဲ့လို့ ရော်နယ်ဒိုဟာ သူ့ရဲ့ အမှတ်တရပွဲမှာ ပေါ်တူဂီအတွက် အနိုင်ဂိုးကိုပါ သွင်းယူပေးနိုင်ခဲ့တာပါ။ ရော်နယ်ဒိုဟာ ဒီဂိုးကြောင့် နိုင်ငံတကာသွင်းဂိုး ၁၂၃ ဂိုးနဲ့ သူ့ရဲ့စံချိန်ကို ဆက်ပြီးထပ်တိုးနိုင်ခဲ့တာဖြစ်ပါတယ်။

ရော်နယ်ဒိုက “ကျနော့်အတွက်တော့ ဒါဟာ မယုံနိုင်စရာအောင်မြင်မှုတစ်ခုပါပဲ။ ဒါဟာ အံ့သြစရာ ကောင်းပါ တယ်။ အနိုင်ဂိုးကို သွင်းယူနိုင်ခဲ့တာက ပိုပြီးတော့တောင် ထူးခြားပါတယ်။ ကျနော်တို့ ကောင်းမွန်စွာ မကစားနိုင် ခဲ့ပေမယ့် တစ်ခါတစ်ရံမှာ ဘောလုံးက ဒီလိုပါပဲ။ ဒါပေမယ့် ကျနော်တို့ ဂိုးသွင်းနိုင်ခဲ့ပြီး ကျနော့်အမြင်မှာတော့ ဒါက ကျနော်တို့နဲ့ ထိုက်တန်ပါတယ်။ ပွဲပေါင်း ၂၀၀ ပြည့်ခဲ့လို့လည်း အလွန်ပျော်ရွှင်ပါတယ်” လို့ ပွဲအပြီးမှာ ပြောခဲ့တာပါ။

အသက် ၃၈ နှစ်အရွယ်ရှိ ရော်နယ်ဒိုဟာ ပေါ်တူဂီအသင်းကို ယူရို ၂၀၁၆ ၊ ၂၀၁၉ နေးရှင်းလိဂ်ဖလားတို့ကို ရယူနိုင် အောင် ကူညီပေးနိုင်ခဲ့တာဖြစ်ပါတယ်။ ရော်နယ်ဒိုဟာ လက်ရှိ ယူရို ၂၀၂၄ ခြေစစ်ပွဲမှာ ပေါ်တူဂီလက်ရွေးစင် အသင်းအတွက် ၄ ပွဲပါဝင်ကစားအပြီးမှာ ၅ ဂိုးသွင်းယူနိုင်ခဲ့တာပါ။ 

ပေါ်တူဂီအသင်းဟာ ယူရို ၂၀၂၄ ခြေစစ်ပွဲ ၄ ပွဲ ကစားအပြီးမှာ ၄ ပွဲစလုံးအနိုင်ရကာ ရမှတ် ၁၂ မှတ်နဲ့ အုပ်စုတွင်း ကို ဦးဆောင်နေတာဖြစ်ပါတယ်။ ပေါ်တူဂီအသင်းဟာ လာမယ့် စက်တင်ဘာလမှာ ဆလိုဗားကီးယား၊ လူဇင်ဘတ် တို့နဲ့ ခြေစစ်ပွဲ ဆက်လက်ယှဉ်ပြိုင်ရမှာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဇွန်လ ၂၀

ရိန်းဂျားစ်နဲ့ အက်စတွန်ဗီလာ အသင်းနည်းပြဟောင်း စတီဗင်ဂျရတ်ဟာ ဆော်ဒီပရိုလိဂ်မှာ နည်းပြအဖြစ် လုပ်ကိုင်ဖို့ ကမ်းလှမ်းမှုကို လက်မခံဖို့ ဆုံးဖြတ်ခဲ့တယ်လို့ ပြောပါတယ်။

စတီဗင်ဂျရတ်က “ဆော်ဒီမှာ လုပ်ဖို့အတွက် ဖြစ်နိုင်ဖွယ်ရှိတဲ့ ကမ်းလှမ်းမှုတွေကို ကြည့်နိုင်အောင် ကျနော့်ကို လာရောက်ဖို့ ဖိတ်ခေါ်ခဲ့ပါတယ်။ ပြီးခဲ့တဲ့ ရက်အနည်းငယ်က ဒါနဲ့ပတ်သက်ပြီး ကျနော် ခွဲခြမ်းစိတ်ဖြာ ပြီးသွားပါ ပြီ။ ဒါပေမယ့် ကျနော် ဒီကမ်းလှမ်းမှုတွေကို လက်ခံမှာ မဟုတ်ပါဘူး”လို့ Channel 4 ကို ပြောခဲ့ပါတယ်။

အသက် ၄၃ နှစ်အရွယ်ရှိ စတီဗင်ဂျရတ်ဟာ ပြီးခဲ့တဲ့နှစ် အောက်တိုဘာလက အက်စတွန်ဗီလာ အသင်းကနေ ထုတ်ပယ် ခံရပြီးကတည်းက နည်းပြ အလုပ်အကိုင် မရရှိသေးပါဘူး။ 

လီဗာပူးလ်နဲ့ အင်္ဂလန် အသင်းခေါင်းဆောင်ဟောင်းဟာ အခုလ အစောပိုင်းက ဆော်ဒီကို ရောက်ရှိနေတဲ့ ပုံတွေ ထွက်ပေါ်လာခဲ့ပြီး အယ်လ်အက်တီဖတ်အသင်းကို ကိုင်တွယ်မယ်လို့ သတင်းတွေ ထွက်ပေါ်ခဲ့တာ ဖြစ်ပါတယ်။

စတီဗင်ဂျရတ်ဟာ အက်စတွန်ဗီလာအသင်းကို ကိုင်တွယ်ခဲ့ချိန် ၁၁ လအတွင်းမှာ ပွဲပေါင်း ၄၀ ကိုင်တွယ်ခဲ့ပြီး ၁၃ ပွဲသာ အနိုင်ရရှိအောင် လမ်းညွှန်ပေးနိုင်ခဲ့တာပါ။ 

စတီဗင်ဂျရတ်ကို တွေ့ရစဉ်

၂၀၁၆ မှာ ကစားသမားဘဝကို အဆုံးသတ်ခဲ့တဲ့ စတီဗင်ဂျရတ် ဟာ နည်းပြဘဝ ပထမဆုံး ခြေလှမ်းအဖြစ် ၂၀၁၈ မှာ ရိန်းဂျားစ်အသင်းကို စတင်ကိုင်တွယ်ခဲ့ပြီး ကလပ်အသင်းကို နှစ်ပေါင်း ၁၀ နှစ်အကြာမှ ပထမဆုံးအကြိမ် စကော့တလန် ပရီမီးယားရှစ်ဖလား ရရှိအောင် ဦးဆောင် နိုင်ခဲ့ပါတယ်။

ဇွန်လ အစောပိုင်းက ရီးရယ်လ်အသင်းက ထွက်ခွာပြီး အယ်လ်အီးတီဟတ်ကို ပြောင်းခဲ့တဲ့ ဘန်ဇီမာဟာ ဆော်ဒီ လိဂ်ကို ရောက်ရှိလာတဲ့ နောက်ဆုံး ပုံရိပ်မြှင့် ကစားသမားလည်း ဖြစ်ခဲ့ပါတယ်။ 

ဘန်ဇီမာ မတိုင်ခင်က ဆော်ဒီလိဂ်ကလပ် အယ်လ်နာဆာအသင်းဟာ ရော်နယ်ဒိုကို ခေါ်ယူခဲ့တာ ဖြစ်ပါတယ်။

လက်ရှိအချိန်မှာ ဆော်ဒီလိဂ်ဟာ ပရီးမီးယားလိဂ်ရှိ နာမည်ကြီး ကစားသမား အများအပြားကို အခုနွေရာသီ အပြောင်းအရွှေ့မှာ ခေါ်ယူဖို့ ချိတ်ဆက်မှုတွေ ပြုလုပ်နေပါတယ်။

Source: BBC

CNI Sport News

၂၀၂၃ ခုနှစ်၊ ဇွန်လ ၂၀

ကော့တွိုက်စ်ဟာ သူလက်ရွေးစင်အသင်းကနေ ထွက်ခွာခဲ့တာမှာ အသင်းခေါင်းဆောင်လက်ပတ်ကြောင့်ဆိုပြီး မှတ်ချက်ပေးခဲ့တဲ့ နည်းပြ တီဒတ်စ်ကို ကို ပြစ်တင်ဝေဖန်မှုတွေ ပြုလုပ်သွားခဲ့ပါတယ်။

ကော့တွိုက်စ်က “နည်းပြရဲ့ သတင်းစာရှင်းလင်းပွဲကို ကြားခဲ့ရတဲ့အချိန်မှာ ကျနော်အံ့အားသင့်သွားခဲ့ရပါတယ်။ အဝတ်စားလဲခန်းထဲမှာဖြစ်ခဲ့တဲ့ အခြေအနေတွေကို နည်းပြတစ်ဦးနဲ့ စကားပြောတာက ပထမဆုံးအကြိမ် မဟုတ် သလို နောက်ဆုံးအကြိမ်လည်း မဟုတ်ပါဘူး။ ဒါပေမယ့် လူသိရှင်ကြားပြောဖို့ ဆုံးဖြတ်တာက ပထမဆုံး အကြိမ် ပါ။ ကျနော်ဒါကို အလွန်စိတ်ပျက်မိပါတယ်။ နည်းပြရဲ့ အကဲဖြတ်မှုတွေဟာ လက်တွေနဲ့ မကိုက်ညီပါဘူး။ လက်ရွေးစင်အသင်းခေါင်းဆောင်ကို ဆုံးဖြတ်တာဟာ သူ့ဆုံးဖြတ်ချက်နဲ့သူ ဖြစ်သင့်ပါတယ်။ ဒါကို ကျနော်သူ့ကို ပြောပြဖို့ ကြိုးစားပါတယ်။ ကျနော်ဘာကိုမှ မတောင်းဆိုပါဘူး။ ကျနော့်မှာ ဒူးဒဏ်ရာရနေလို့ လေ့ကျင့်ရေး စခန်းကနေ ထွက်ခွာဖို့ ဆုံးဖြတ်ခဲ့တာ” လို့ အင်စတာဂရမ်မှာ ရေးသားခဲ့တာပါ။

ဘယ်လ်ဂျီယံအသင်းဟာ သြစတြီးယားအသင်းနဲ့ ကစားခဲ့တဲ့ ယူရို ၂၀၂၄ ခြေစစ်ပွဲမှာ အသင်းခေါင်းဆောင်အဖြစ် နည်းပြ တီဒတ်စ်ကိုက လူကာကူကို ရွေးချယ်ခဲ့တာမှာ ပြဿနာတွေ စတင်ခဲ့တာဖြစ်ပါတယ်။ ဒါကြောင့် ကော့တွိုက်စ်ဟာ အသင်းရဲ့ လေ့ကျင့်ရေးအစီအစဉ်ကို လာရောက်ခဲ့ခြင်းမရှိဘူးလို့ သတင်းတွေ ထွက်ပေါ် လာခဲ့တာပါ။

ဘယ်လ်ဂျီယံနည်းပြ တီဒတ်စ်ကိုဟာ သြစတြီးယားအသင်းနဲ့ပွဲမှာ လူကာကူ၊ အက်စတိုနီးယားနဲ့ပွဲမှာ ကော့တွိုက်စ်ကို အသင်းခေါင်းဆောင်အဖြစ် ခန့်အပ်ဖို့ ဆုံးဖြတ်ခဲ့ပေမယ့် ဂိုးသမားဟာ သြစတြီးယားနဲ့ ပွဲအပြီးမှာ သူ့ကို အိမ်ပြန်မယ်လို့ ပြောခဲ့ကြောင်း သတင်းစာရှင်းလင်းပွဲမှာ ပြောခဲ့ပါတယ်။

တီဒတ်စ်ကိုက “ကျနော်ဆုံးဖြတ်ခဲ့တဲ့အရာအတွက် လူတိုင်းအဆင်ပြေခဲ့ပေမယ့် ပွဲအပြီးမှာ ကော့တွိုက်စ်က ရုတ်တရက် ကျနော်နဲ့စကားပြောဖို့ လုပ်ခဲ့ပါတယ်။ သူဟာ စိတ်ပျက်နေတာကြောင့် အိမ်ပြန်တော့မယ်လို့ ကျနော်ကိုပြောခဲ့ပါတယ်။ ကျနော်ဟာ အစကတည်းက သူနဲ့ထိုက်တန်တဲ့အရာကို ပြသဖို့ ကြိုးစားခဲ့ပါတယ်။ ကျနော့်အမြင်မှာ သူက ကမ္ဘာ့အကောင်းဆုံးဂိုးသမားဖြစ်ပေမယ့် သူလုပ်ခဲ့တဲ့အရာအတွက် ကျနော် အံ့သြမိခဲ့ တယ်။ ဒဏ်ရာလို့ပြောချင်ပေမယ့် လိမ်လို့တော့မရပါဘူး” လို့ ပြောခဲ့ပါတယ်။

ကော့တွိုက်စ်ဟာ ဒီလိုလုပ်ဆောင်ခဲ့တဲ့အရာကြောင့် လက်ရွေးစင်ကစားသမားဘဝ အနာဂတ်ကိုပါ ထိခိုက်လာနိုင် တယ်လို့ သုံးသပ်မှုတွေရှိခဲ့ပါတယ်။ အသက် ၃၁ နှစ်အရွယ်ရှိ ကော့တွိုက်စ်ဟာ ဘယ်လ်ဂျီယံလက်ရွေးစင်အတွက် ၂၀၁၁ မှာ ပွဲထွက်ခွင့်ရခဲ့တာဖြစ်ပြီး ပွဲပေါင်း ၁၀၂ ပွဲ ပါဝင်ကစားထားတာဖြစ်ပါတယ်။

Source:Goal