CNI Sport News
၂၀၂၄ ခုနှစ်၊ ဒီဇင်ဘာ ၁၈
အင်္ဂလန်အသင်းခေါင်းဆောင် ဟာရီကိန်းဟာ လိုက်ပ်ဇစ်အသင်းနဲ့ ကစားမယ့် ၂၀၂၄ ခုနှစ်အတွက် နောက်ဆုံး ပွဲစဉ်မှာ ဘိုင်ယန်မြူးနစ်အသင်းအတွက် ပြန်ပါဝင်ကစားပေးနိုင်ဖို့ မျှော်လင့်နေပါတယ်။
ဟာရီကိန်းဟာ နိုဝင်ဘာကုန်ပိုင်းက ဒေါ့မွန်အသင်းနဲ့ သရေကျခဲ့တဲ့ ဘွန်ဒက်လီဂါပွဲစဉ်မှာ ပေါင်ဒဏ်ရာ ရရှိပြီး ကတည်းက ဘိုင်ယန်မြူးနစ်အသင်းနောက်ဆုံးကစားခဲ့တဲ့ ပြိုင်ပွဲစုံ ၄ ပွဲစလုံးပါဝင်နိုင်ခဲ့ခြင်းမရှိတာပါ။ ဟာရီကိန်း ဟာ လက်ရှိအချိန်မှာ ကြံ့ခိုင်မှုပြည့်ဝနေပြီဖြစ်တဲ့အတွက် အင်္ဂါနေ့ ပြုလုပ်ခဲ့တဲ့ ဘိုင်ယန်မြူးနစ်အသင်းရဲ့ လေ့ကျင့် ခန်းအစီအစဉ်မှာ ပြန်လည်ပါဝင်ခဲ့ပါတယ်။
အဲဒါကြောင့် ဟာရီကိန်းဟာ လိုက်ပ်ဇစ်အသင်းနဲ့ ယှဉ်ပြိုင်မယ့် ဘွန်ဒက်လီဂါပွဲစဉ်မှာ ဘိုင်ယန်မြူးနစ် အသင်း အတွက် ကြံ့ခိုင်မှုအပြည့်နဲ့ ပါဝင်နိုင်မယ်လို့ ယုံကြည်မှုရှိနေတာပါ။ ပြီးခဲ့တဲ့ ရှက်တာဒိုးနက်နဲ့ မိန့်ဇ်အသင်းတို့ ပွဲတွေမှာ ဘိုင်ယန်မြူးနစ်အသင်းအတွက် မပါဝင်နိုင်ခဲ့တဲ့ နောက်ခံလူ အယ်လ်ဖွန်ဆိုဒေးဗီးစ်လည်း အသင်းရဲ့ လေ့ကျင့်ခန်းအစီအစဉ်တွေမှာ ပြန်လည်ပါဝင်နေခဲ့ပြီဖြစ်ပါတယ်။ ပယ်လ်ဟင်ညာနဲ့ ဂနာဘရီတို့လည်း ပထမဆုံး အကြိမ် ဘောလုံးနဲ့လေ့ကျင့်မှုတွေပြီးမြောက်ခဲ့တယ်လို့ Sky က ဖော်ပြခဲ့တာပါ။
အသက် ၃၁ နှစ်အရွယ်ရှိ ဟာရီကိန်းဟာ ဒီရာသီမှာ ဘိုင်ယန်မြူးနစ်အသင်းအတွက် ဘွန်ဒက်လီဂါပွဲစဉ် ၁၂ ပွဲ ပါဝင်ကစားထားပြီး ၁၄ ဂိုးသွင်းယူကာ ဂိုးဖန်တီးမှု ၅ ကြိမ်ပြုလုပ်ထားပါတယ်။ ဘိုင်ယန်မြူးနစ်အသင်းဟာ ပြီးခဲ့တဲ့ ဘွန်ဒက်လီဂါပွဲစဉ်မှာ မိန့်ဇ်အသင်းကို ၂ ဂိုး-၁ ဂိုးနဲ့ အရေးနိမ့်ပြီးနောက် ဒီရာသီ အမှတ်ပေးလိဂ်ပြိုင်ပွဲမှာ ပထမဆုံးရှုံးပွဲ ကြုံတွေ့ခဲ့ရတာပါ။
ဘိုင်ယန်မြူးနစ်အသင်းဟာ ဒီပွဲရှုံးနိမ့်ခဲ့ပေမယ့် ဘွန်ဒက်လီဂါပွဲစဉ် ၁၄ ပွဲကစားအပြီးမှာ ရမှတ် ၃၃ မှတ်နဲ့ အမှတ်ပေးဇယားထိပ်ဆုံးနေရာမှာ ဆက်လက်ရပ်တည်နေပြီး အဆင့် ၂ နေရာက လေဗာကူဆင်အသင်းကို ၄ မှတ် အသာရနေတာဖြစ်ပါတယ်။
Source:Goal
