CNI Sport News
၂၀၂၅ ခုနှစ်၊ ဧပြီ ၂
အင်္ဂလန်အသင်းခေါင်းဆောင် ဟာရီကိန်းဟာ နွေရာသီမှာ ပရီးမီးယားလိဂ်ထံ ပြန်လာမယ့်အလားအလာကို ပယ်ချခဲ့ပြီး ဘိုင်ယန်မြူးနစ်အသင်းမှာ အလွန်ပျော်ရွှင်တယ်လို့ ပြောခဲ့ပါတယ်။
ဟာရီကိန်းက “ကျနော်ဟာ ရှေ့ဖြစ်လာမယ့်အရာတွေအတွက် အဝေးကြီးတွေးရတာကို နှစ်သက်တဲ့သူ မဟုတ်ဘူး ဆိုတာ ကစားသမားဘဝတစ်လျှောက်လုံးပြောခဲ့ပါတယ်။ ကျနော်ဟာ ဘိုင်ယန်မြူးနစ်အသင်းမှာ အလွန်ပျော်ရွှင် နေပါတယ်။ ကျနော်ဟာ အကောင်းဆုံးအခြေအနေမှာရှိနေတယ်လို့ ခံစားရပြီး အမြင့်ဆုံး အဆင့်မှာပဲ ကစားချင် ပါတယ်။ ဘောလုံးဟာ အချိန်တိုအတွင်း အများကြီးပြောင်းလဲသွားနိုင်ပေမယ့် ကျနော်ရဲ့အာရုံစူးစိုက်မှုက ဒီမှာပဲ ရှိပါတယ်။ အခြားလိဂ်နဲ့ အခြားအသင်းတွေအကြောင်းမတွေးပါဘူး” လို့ ESPN နဲ့ သီးသန့်အင်တာဗျူးမှာ ပြောခဲ့တာပါ။
စပါးအသင်းမှာ ၁၀ နှစ်ကြာရှိခဲ့တဲ့ ဟာရီကိန်းဟာ ၂၀၂၃ ခုနှစ်မှာ ဘိုင်ယန်မြူးနစ်အသင်းထံ ပြောင်းရွှေ့ဖို့ ပရီးမီးယားလိဂ်ကနေ ထွက်ခွာခဲ့တာဖြစ်ပါတယ်။
ဟာရီကိန်းဟာ ဘိုင်ယန်မြူးနစ်အသင်းကို ရောက်ရှိလာချိန် ကတည်းက အကောင်းဆုံးစွမ်းဆောင်ရည်တွေပြသနေပြီး ပြိုင်ပွဲစုံ ၈၃ ပွဲပါဝင်ကစားထားတာမှာ ၇၇ ဂိုးသွင်းယူ ထားတာပါ။
ဂျာမနီမှာ မိသားစုနဲ့အတူ အခြေချနေထိုင်နေတဲ့ ဟာရီကိန်းဟာ ပရီးမီးယားလိဂ်ထံ ပြန်လာဖွယ် ရှိတယ်လို့ သတင်းတွေထွက်ခဲ့ပါတယ်။
ဒါပေမယ့် ဘိုင်ယန်မြူးနစ်အသင်းနဲ့ ၂၀၂၇ ခုနှစ် နွေရာသီအထိ စာချုပ်ရှိနေတဲ့ ဟာရီကိန်းက သူဟာ ဂျာမန် ကလပ်မှာ အလွန်ပျော်ရွှင်နေတယ်လို့ ပြောခဲ့တာပါ။
အသက် ၃၁ နှစ်အရွယ်ရှိ ဟာရီကိန်းဟာ ဒီရာသီမှာ ဘိုင်ယန်မြူးနစ်အသင်းနဲ့ ဆုဖလားရယူပြီး ဆုဖလားမရရှိသေးတဲ့ အိပ်မက်ဆိုးတွေကို အဆုံးသတ်နိုင်ဖို့ အခွင့်အရေးကောင်းတွေရှိနေပါတယ်။
ဘိုင်ယန်မြူးနစ်အသင်းဟာ ဘွန်ဒက်လီဂါပြိုင်ပွဲမှာ အမှတ်ပေး ဇယားအဆင့် ၂ နေရာက လေဗာကူဆင်အသင်းကို ၆ မှတ်ဖြတ်ပြီးဦးဆောင်ထားသလို ချန်ပီယံလိဂ်ပြိုင်ပွဲမှာ ကွာတားဖိုင်နယ်အဆင့်ကို ရောက်ရှိနေတာပါ။
ဘိုင်ယန်မြူးနစ်အသင်းဟာ ဧပြီ ၄ ရက်မှာ ဘွန်ဒက်လီဂါပွဲစဉ်အဖြစ် အော့စ်ဘတ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source:ESPN
