CNI Sport News
၂၀၂၅ ခုနှစ်၊ ဧပြီ ၂
ရီးရယ်လ်အသင်းဟာ ဆိုစီဒက်အသင်းကို အချိန်ပိုမှာအနိုင်ရပြီး စပိန်ကိုပါဒယ်ရေးဖလားဗိုလ်လုပွဲကို တက်နိုင်ခဲ့ပေမယ့် နည်းပြအန်ဆယ်လော့တီက သူ့ရဲ့အသင်းဟာ အမှားတွေအများကြီးလုပ်ခဲ့တယ်လို့ ဝန်ခံခဲ့ပါတယ်။
အန်ဆယ်လော့တီက “ကောင်းတဲ့အရာတွေအများကြီး၊သွင်းဂိုးတွေအများအပြားနဲ့ ဖျော်ဖြေတဲ့ပွဲဖြစ်ခဲ့ပါတယ်။ ကျနော်တို့ရဲ့ရည်မှန်းချက်အောင်မြင်ခဲ့ပြီး နောက်ထပ်ဗိုလ်လုပွဲကို ရောက်ရှိခဲ့တာပါ။ ကျနော်တို့ဟာ ကောင်းတဲ့ အရာတွေအများကြီးလုပ်ခဲ့သလို အမှားတွေလည်းအများကြီးပြုလုပ်ခဲ့ပါတယ်။ ဒါပေမယ့် အဆုံးမှာ ကျနော်တို့ လုပ်နိုင်ခဲ့ပြီး ဘယ်တော့မှအရှုံးပေးသွားမှာမဟုတ်ဘူး”လို့ ပြောခဲ့တာပါ။
ရီးရယ်လ်အသင်းဟာ ကိုပါဒယ်ရေးဖလားဆီမီးဖိုင်နယ်ဒုတိယအကျော့ပွဲစဉ်မှာ ဆိုစီဒက်အသင်းကို ၄ ဂိုး-၃ ဂိုးနဲ့ အရေးနိမ့်ခဲ့တာဖြစ်ပါတယ်။
ပထမအကျော့ပွဲစဉ်မှာ ရီးရယ်လ်အသင်းဟာ ၁ ဂိုး-ဂိုးမရှိနဲ့ အနိုင်ရထားတဲ့အတွက် နှစ်ကျော့ပေါင်းရလဒ် ၄ ဂိုးစီသရေကျနေခဲ့တာပါ။
အဲဒါကြောင့် အချိန်ပိုဆက်ယှဉ်ပြိုင်ခဲ့ရပြီး ၁၁၅ မိနစ်မှာ နောက်ခံလူ ရူဒီဂါက ရီးရယ်လ်အသင်းအတွက် အဖိုးတန်သွင်းဂိုးသွင်းယူခဲ့တာဖြစ်ပါတယ်။
ရီးရယ်လ်အသင်းဟာ ဒီသွင်းဂိုးကြောင့် ဆိုစီဒက်အသင်းကို ၅ ဂိုး-၄ ဂိုးနဲ့ အနိုင်ရပြီး ကိုပါဒယ်ရေးဖလားဗိုလ်လုပွဲကို တက်နိုင်ခဲ့တာပါ။
ဒီပွဲမှာ ရီးရယ်လ်အသင်းအတွက် ချေပဂိုးတစ်ဂိုးသွင်းယူနိုင်ခဲ့တဲ့ ကွင်းလယ်လူ ချူအာမန်နီက အသင်းရဲ့ စွမ်းဆောင်ရည်ကြောင့် မပျော်ရွှင်နိုင်ခဲ့ဘဲ ဒီထက်ပိုပြီးကောင်းအောင်လုပ်သင့်တယ်လို့ ပြောခဲ့ပါတယ်။
ဒီရာသီမှာ ဆုဖလား ၂ လုံးရယူထားပြီးဖြစ်တဲ့ ရီးရယ်လ်အသင်းဟာ ကိုပါဒယ်ရေးဖလား ဗိုလ်လုပွဲတက်နိုင်ခဲ့တဲ့အတွက် တစ်ရာသီအတွင်း ဆုဖလား ၆ လုံးရယူနိုင်မယ့် မျှော်လင့်ချက်တွေ ရှင်သန်နေတာပါ။
ရီးရယ်လ်အသင်းဟာ လာမယ့် ဧပြီ ၅ ရက်မှာ လာလီဂါပွဲစဉ်အဖြစ် ဗလင်စီယာအသင်းကို အိမ်ကွင်းလက်ခံ ယှဉ်ပြိုင်ရမှာဖြစ်ပါတယ်။
Source:ESPN
