CNI Sport News
၂၀၂၅ ခုနှစ်၊ ဧပြီ ၂
မေဂျာလိဂ်ဟာ အာဂျင်တီးနားအသင်းခေါင်းဆောင် မက်ဆီရဲ့သက်တော်စောင့်ဖြစ်တဲ့ ချူကို-ကို အင်တာမိုင်ယာမီ အသင်းပွဲစဉ်တွေမှာ ကွင်းဘေးစည်းဝင်ရောက်ပြီး သူ့ရဲ့ကစားသမားကို ကာကွယ်ခွင့်ပိတ်ပင်ခဲ့ပါတယ်။
ချူကိုဟာ မက်ဆီရဲ့သက်တော်စောင့်အဖြစ် စတင်တာဝန်ယူချိန်ကတည်း သူ့ရဲ့ကစားသမားဆီကို ဦးတည်လာတဲ့ ကွင်းအတွင်းကျူးကျော်ဝင်ရောက်လာသူတွေကို ရပ်တန့်ဖို့အတွက် လူအုပ်ကြီးကို အနီးကပ်ကြည့်ရှုနေခဲ့တာပါ။
ဒီရုပ်သံတွေဟာ ဆိုရှယ်မီဒီယာပေါ်မှာ ပျံ့နှံ့ခဲ့ပြီးနောက် ချူကိုဟာ ချီးကျူးမှုတွေကို ရရှိခဲ့ပါတယ်။
အခုအချိန် မှာတော့ မေဂျာလိဂ်က ပွဲကစားမယ့်နေ့ရဲ့လုံခြုံရေးကို အပြည့်အဝထိန်းချုပ်ဖို့ ဆုံးဖြတ်ခဲ့တာပါ။
အဲဒါကြောင့် ချူကိုဟာ အဝတ်လဲခန်းထဲနဲ့ ကစားသမားတွေကွင်းအပြင်ကို ပြန်ထွက်ခွာတဲ့နေရာတွေမှာသာ မက်ဆီနဲ့ အနီးကပ်ရှိလို့ရတော့မှာဖြစ်ပါတယ်။
ချူကိုကတော့ မေဂျာလိဂ်ရဲ့ဒီဆုံးဖြတ်ချက်ကို စိတ်ပျက်မိတယ်လို့ စပိန်မီဒီယာတစ်ခုနဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ချူကိုက "သူတို့က ကျနော့်ကို ကွင်းအတွင်းဘယ်နေရာမှာမှ ရှိဖို့ခွင့်မပြုတော့ပါဘူး။ ကျနော်ဟာ ဥရောပမှာ ၇ နှစ် ကြာရှိခဲ့ပြီး လီဂူး-၁ နဲ့ ချန်ပီယံလိဂ်ပြိုင်ပွဲတွေမှာ အလုပ်လုပ်ခဲ့ပေမယ့် ကွင်းထဲကို လူ ၆ ဦးသာ ကျူးကျော်ခဲ့ပါ တယ်။ ကျနော်အမေရိကန်ကို ရောက်ပြီး လ ၂၀ ပဲရှိသေးချိန်မှာ ကွင်းအတွင်းဝင်ရောက်သူ ၁၆ ဦးကြုံတွေ့ ပြီးပါပြီ။ ဒီမှာ ကြီးမားတဲ့ပြဿနာရှိပြီး မက်ဆီကို ကူညီခွင့်ပြုပါ" လို့ ပြောခဲ့ပါတယ်။
မက်ဆီဟာ ဒဏ်ရာကြောင့် ဒီရာသီမှာ အင်တာမိုင်ယာမီအသင်းအတွက် ၆ ပွဲသာပါဝင်ကစားရသေးပေမယ့် ၅ ဂိုး သွင်းပြီး ဂိုးဖန်တီးမှု ၂ ကြိမ်ပြုလုပ်ထားတာဖြစ်ပါတယ်။
Source:ESPN
