CNI Sport News

၂၀၂၃ ခုနှစ်၊ ဒီဇင်ဘာ ၂

ယူနိုက်တက်အသင်းနည်းပြ အဲရစ်တန်ဟတ်က အချက်အလက်တွေအပေါ် အခြေခံမယ်ဆိုရင် ဂိုးသမား အိုနာနာ ဟာ ပရီးမီးယားလိဂ်ရဲ့ ဒုတိယအကောင်းဆုံး ဂိုးသမားလို့ ပြောလိုက်ပါတယ်။

အဲရစ်တန်ဟတ်က “အချက်အလက်တွေကို ကြည့်မယ်ဆိုရင် အိုနာနာဟာ ပရီးမီးယားလိဂ်ရဲ့ ဒုတိယ အကောင်း ဆုံး ဂိုးသမား ဖြစ်တယ်ဆိုတာ မြင်တွေ့ရမှာပါ။ သူဟာ ပရီးမီးယားလိဂ်ရဲ့ ဂိုးကာကွယ်မှုမှာ ဒုတိယအကောင်းဆုံး ပါပဲ။ ချန်ပီယံလိဂ်မှာ သူအမှားတွေ လုပ်နေတယ်ဆိုတာ သူသိပါတယ်။ ဒါပေမယ့် ပထမ ၅ လအတွင်းမှာ သူ ကောင်းမွန်စွာ လုပ်နေတယ်ဆိုတာ ခင်ဗျားတို့လည်း မြင်တွေ့ရမှာပါ”လို့ ပြောခဲ့ပါတယ်။

အိုနာနာဟာ ဂါလာတာစာရေးအသင်းနဲ့ ယူနိုက်တက်အသင်းတို့ ၃ ဂိုးစီ သရေကျခဲ့တဲ့ ချန်ပီယံလိဂ်ပွဲစဉ်မှာ အမှား အယွင်းတွေ ပြုလုပ်မိခဲ့တာကြောင့် မန်ချက်စတာကလပ်အတွက် ချန်ပီယံလိဂ် မျှော်လင့်ချက်တွေ ထိခိုက်စေခဲ့ ပါတယ်။

ဒါပေမယ့် အိုနာနာဟာ ပရီးမီးယားလိဂ်ပြိုင်ပွဲမှာ ၅ ပွဲအထိ ပေးဂိုးမပေးရအောင် လက်စွမ်းပြသနိုင်ခဲ့တာပါ။

အချက်အလက်တွေအရ အိုနာနာဟာ ပရီးမီးယားလိဂ်ပြိုင်ပွဲမှာ ၃.၆၇ ဂိုး မပေးရအောင် ကာကွယ်နိုင်ခဲ့ပြီး ဒါဟာ လိဂ်မှာ ဒုတိယအများဆုံး ဖြစ်ပါတယ်။

လူတန်အသင်းဂိုးသမား ကာမင်စကီးက ၆.၃ ဂိုးနဲ့ ပရီးမီးယားလိဂ်မှာ ဂိုးကာကွယ်မှု အများဆုံးအဖြစ် ရပ်တည်နေ တာပါ။

ပြီးခဲ့တဲ့နွေရာသီက ပေါင် ၄၇.၂ သန်းနဲ့ အင်တာမီလန်အသင်းကနေ ရောက်ရှိလာခဲ့တဲ့ အိုနာနာဟာ ယူနိုက်တက် အသင်းကို ရောက်ရှိလာချိန်ကတည်းက အမှားအယွင်းတွေ ပြုလုပ်နေတာကြောင့် မကြာခဏဆိုသလို ဝေဖန်မှု တွေ ခံနေရတာ ဖြစ်ပါတယ်။

ယူနိုက်တက်အသင်း ပရိသတ်တွေက အိုနာနာနေရာမှာ ဘာယင်းဒယ်ကို ပွဲထွက်ဂိုးသမားအဖြစ် အသုံးပြုဖို့ တောင်းဆိုနေကြပေမယ့် နည်းပြ အဲရစ်တန်ဟတ်ကတော့ အိုနာနာကို ဆက်ပြီး ထောက်ခံပေးထားတာပါ။

ယူနိုက်တက်အသင်းဟာ ဒီနေ့ညမှာ ကစားမယ့် နယူးကာဆယ်အသင်းနဲ့ ပရီးမီးယားလိဂ်ပွဲစဉ်မှာလည်း အိုနာနာ ကိုပဲ ပွဲထွက်ဂိုးသမားအဖြစ် အသုံးပြုသွားဖို့ ရှိနေတာဖြစ်ပါတယ်။

Source: BBC

CNI Sport News
၂၀၂၃ ခုနှစ်၊ ဒီဇင်ဘာ ၂

အာဂျင်တီးနား အသင်းခေါင်းဆောင် မက်ဆီက လာမယ့်နှစ်မှာ ကျင်းပမယ့် ကိုပါအမေရိကဖလားပြိုင်ပွဲထက် ကျော်လွန်ပြီး သူ့ရဲ့နိုင်ငံတကာ အနာဂတ်ကို တွေးတောနေမှာ မဟုတ်ဘဲ ဒီပြိုင်ပွဲမှာ ချန်ပီယံဆုရဖို့သာ အာရုံစိုက်ထားတယ်လို့ ပြောလိုက်ပါတယ်။

မက်ဆီက “ကျနော်ကောင်းမွန်တယ်လို့ ခံစားနေရပြီး ဒါကိုဆက်လုပ်နိုင်တယ်လို့ထင်ရင် အာဂျင်တီးနားအတွက် ဆက်ပြီးကစားမှာပါ။ အခုကျနော်တွေးနေတာက ကိုပါအမေရိကဖလားပြိုင်ပွဲမှာ ချန်ပီယံဆုရယူနိုင်ဖို့နဲ့ ဒီပြိုင်ပွဲမှာ ကစားနိုင်ဖို့ပါ။ ကမ္ဘာ့ဖလားမှာ ပါဝင်ကစားမလား၊ မကစားဘူးလားဆိုတာတော့ အချိန်က စကားပြောသွားပါ လိမ့် မယ်။ ကမ္ဘာ့ဖလားပြိုင်ပွဲမှာဆိုရင် ကျနော့်အသက်က ၃၉ နှစ်ရှိပါပြီ၊ ပုံမှန်ဆိုရင်တော့ ကမ္ဘာ့ဖလားမှာ ကစားနိုင်ဖို့ မရှိပါဘူး”လို့ ESPN ကို ပြောခဲ့ပါတယ်။
အသက် ၃၆ နှစ်အရွယ်ရှိ မက်ဆီက ၂၀၂၂ ကမ္ဘာ့ဖလားပြိုင်ပွဲမှာ အာဂျင်တီးနားအသင်းကို ချန်ပီယံဆုရရှိအောင် ဦးဆောင် ပေးနိုင်ခဲ့ပြီးနောက် ဒီပြိုင်ပွဲဟာ သူ့ရဲ့ နောက်ဆုံး ကမ္ဘာ့ဖလားပြိုင်ပွဲလို့ ပြောခဲ့ပါတယ်။ 

နောက်ပိုင်းမှာတော့ မက်ဆီဟာ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားနိုင်ဖို့နဲ့ ပတ်သက်ပြီး ယတိပြတ် ငြင်းဆိုထားခြင်း မရှိသေးဘဲ အာဂျင်တီးနားအသင်းနဲ့ သူ့ရဲ့ အကောင်းဆုံး အချိန်တွေကို ပျော်ရွှင်နေတယ်လို့ ပြောထားတာပါ။

မက်ဆီဟာ အာဂျင်တီးနားအသင်းနဲ့အတူ ၂၀၂၁ ကိုပါအမေရိကဖလား၊ ၂၀၂၂ Finalissima ဆုဖလားနဲ့ ၂၀၂၂ ကမ္ဘာ့ဖလား ချန်ပီယံဆုတွေကို ရရှိထားပါတယ်။

မက်ဆီဟာ ဒီချန်ပီယံဆုတွေ မရယူနိုင်ခင်မှာ အဓိကပြိုင်ပွဲတွေရဲ့ ဗိုလ်လုပွဲ ၃ ကြိမ်ဆက်တိုက် အရေးနိမ့်ခဲ့ပြီး အာဂျင်တီးနား လက်ရွေးစင် အသင်းကနေ အနားယူကြောင်း ကြေညာခဲ့ပါသေးတယ်။ 

ဒါပေမယ့် မက်ဆီဟာ သူ့ရဲ့ ဆုံးဖြတ်ချက်ကို ပြန်ပြောင်းခဲ့တာကြောင့် အခုလို အောင်မြင်မှုတွေကို ရယူနိုင်ခဲ့တာပါ။

၂၀၂၄ မှာ ကျင်းပမယ့် ကိုပါအမေရိကဖလား ပြိုင်ပွဲမှာတော့ တောင်အမေရိကဇုန်က ၁၀ သင်းနဲ့ ကွန်ကာကပ်ဖ်က ၆ သင်း ဝင်ရောက်ယှဉ်ပြိုင်မှာဖြစ်ပြီး ပြိုင်ပွဲကို ဇွန်လ ၂၀ ရက်ကနေ ဇူလိုင် ၁၄ ရက်အထိ အမေရိကန်နိုင်ငံက အိမ်ရှင်အဖြစ် ကျင်းပသွားမှာ ဖြစ်ပါတယ်။ 

Source: CNA

CNI Sport News

၂၀၂၃ ခုနှစ်၊ ဒီဇင်ဘာ ၁

အိုနာနာဟာ ယူနိုက်တက်အသင်းမှာ သူ့ရဲ့နံပတ် ၁ နေရာကို ကာကွယ်နိုင်ဖို့အတွက် အာဖရိကဖလားပြိုင်ပွဲကနေ နုတ်ထွက်ဖို့ ဆန္ဒရှိနေပါတယ်။

အိုနာနာဟာ ဒီရာသီမှာ ယူနိုက်တက်အသင်းအတွက် လက်စွမ်းတည်ငြိမ်မှုမရှိသလို ပြီးခဲ့တဲ့ ဂါလာတာစာရေး အသင်းနဲ့ ချန်ပီယံလိဂ်ပွဲမှာ သူ့ရဲ့အမှားအယွင်းတွေကြောင့် သွင်းဂိုးတွေခွင့်ပြုပေးခဲ့ရတာပါ။ အဲဒါကြောင့် ယူနိုက်တက်အသင်း ပရိသတ်တွေက အိုနာနာရဲ့ နေရာမှာ ပြီးခဲ့တဲ့နွေရာသီက ခေါ်ယူထားတဲ့ တူရကီဂိုးသမား ဘာယင်းဒယ်ကို ပွဲထွက်အသုံးပြုဖို့ တောင်းဆိုမှုတွေရှိနေတာဖြစ်ပါတယ်။

ယူနိုက်တက်အသင်းနည်းပြ အဲရစ်တန်ဟတ်ကလည်း ဘာယင်းဒယ်ဟာ မကြာခင်မှာ သူ့ရဲ့အခွင့်အရေးကို ရရှိတော့မှာဖြစ်လို့ စိတ်ရှည်ပေးဖို့ ပြောထားတာပါ။ အာဖရိကဖလားပြိုင်ပွဲဟာ လာမယ့်ဇန်နဝါရီမှာ ကျင်းပ တော့မှာဖြစ်ပြီး အိုနာနာဟာ ကင်မရွန်းအသင်းရဲ့ လူစာရင်းမှာ ပါဝင်ရဖို့ ရှိနေပါတယ်။ အိုနာနာအနေနဲ့ ဒီပြိုင်ပွဲမှာ ဝင်ရောက်ယှဉ်ပြိုင်ခဲ့မယ်ဆိုရင် ယူနိုက်တက်အသင်းရဲ့ ပွဲစဉ် ၆ ပွဲလောက်အထိ လွဲချော်ရမှာပါ။ 

ဒီအချိန်မှာ တူရကီဂိုးသမား ဘာယင်းဒယ်ဟာ ယူနိုက်တက်အသင်းရဲ့ ဂိုးပေါက်ကို တာဝန်ယူရမှာဖြစ်ပြီး သူ့အနေ နဲ့ တည်ငြိမ်တဲ့ လက်စွမ်းပြသနိုင်မယ်ဆိုရင် အိုနာနာအနေနဲ့ နေရာဆုံးရှုံးရဖွယ်ရှိနေပါတယ်။ အဲဒါကြောင့် အိုနာနာဟာ သူ့ရဲ့နေရာကို အဆုံးရှုံးမခံချင်တာကြောင့် ကင်မရွန်းအသင်းရဲ့ လူစာရင်းကနေ နုတ်ထွက်ဖို့ ဆန္ဒရှိနေတာပါ။ ယူနိုက်တက်အသင်းဟာ ရာသီအစ ပွဲပေါင်း ၂၀ ပါဝင်ကစားအပြီးမှာ ပေးဂိုး ၃၃ ဂိုးအထိ ခွင့်ပြုထားရတာဖြစ်ပါတယ်။

 ဒါဟာ ၁၉၆၂-၆၃ ရာသီက အဖွင့်ပွဲစဉ် ၂၀ မှာ ပေးဂိုး ၄၃ ဂိုးပေးရပြီးနောက်ပိုင်း ယူနိုက်တက်အသင်းရဲ့ အဆိုးရွားဆုံးစံချိန်ဖြစ်ခဲ့တာပါ။ ဒတ်ချ်လူမျိုးနည်းပြ အဲရစ်တန်ဟတ်ကတော့ ပုံစံကောင်းပျောက်ဆုံးနေတဲ့ အိုနာနာကို အပြစ်တင်ဖို့ ငြင်းဆန်ထားပါတယ်။ အိုနာနာဟာ လာမယ့်နယူးကာဆယ်အသင်းနဲ့ ပွဲစဉ်မှာ ယူနိုက်တက်အသင်းရဲ့ ပွဲထွက်လူစာရင်းမှာ ဆက်လက်ပါဝင်ရဖို့ ရှိနေပြီး ဝေဖန်မှုတွေကို သက်သေပြသနိုင်ဖို့ စိတ်အားထက်သန်နေတယ်လို့ သိရပါတယ်။

Source:Goal

CNI Sport News

၂၀၂၃ ခုနှစ်၊ ဒီဇင်ဘာ ၁

အင်တာမိုင်ယာမီအသင်းဟာ ရာသီကြိုခြေစမ်းပွဲအဖြစ် ဇန်နဝါရီ ၁၉ ရက်မှာ အယ်လ်ဆာဗေးဒိုး လက်ရွေးစင် အသင်းနဲ့ ယှဉ်ပြိုင်မယ်လို့ ကြေညာလိုက်ပါတယ်။

ဒီပွဲဟာ အင်တာမိုင်ယာမီအသင်းအတွက် ၂၀၂၄ ရာသီမတိုင်ခင် ပထမဆုံးကစားမယ့် ရာသီကြိုခြေစမ်းပွဲဖြစ်ပြီး ပရိသတ် ၄၅,၀၀၀ ဦးရေဝင်ဆံ့တဲ့ Estadio Cuscatlan အားကစားကွင်းမှာ ကျင်းပသွားမှာပါ။ ဒီခြေစမ်းပွဲဟာ အင်တာမိုင်ယာမီအသင်းအတွက် လာမယ့်ရာသီ ကွန်ကာကပ်ဖ်ချန်ပီယံလိဂ်ဖလား ပွဲဦးထွက်မတိုင်ခင် သူတို့ကို ဗဟိုအမေရိကအခြေအနေတွေရဲ့ အတွေ့အကြုံကိုပေးဖို့ ရှိနေတာဖြစ်ပါတယ်။

အင်တာမိုင်ယာမီအသင်းဟာ ပြီးခဲ့တဲ့ရာသီက လိဂ်ဖလားရယူနိုင်ခဲ့တာကြောင့် ဒီပြိုင်ပွဲကို ဝင်ရောက်ယှဉ်ပြိုင်ခွင့် ရရှိခဲ့တာပါ။ မေဂျာလိဂ်ပြိုင်ပွဲမှာ ပလေးအောဖ့်အဆင့်ဝင်ခွင့်မရခဲ့တဲ့ အင်တာမိုင်ယာမီအသင်းဟာ ပြီးခဲ့တဲ့လက တရုတ်နိုင်ငံကိုသွားရောက်ပြီး ခြေစမ်းပွဲကစားဖို့ စီစဉ်ခဲ့ပေမယ့် နောက်ပိုင်းမှာ ဖျက်သိမ်းခဲ့တာဖြစ်ပါတယ်။ မကြာသေးခင်က အင်တာမိုင်ယာမီအသင်းဟာ ဆော်ဒီမှာ အယ်လ်နာဆာ၊ အယ်လ်ဟီလယ်အသင်းတို့နဲ့ ခြေစမ်းပွဲကစားဖို့ ရှိနေတယ်လို့ သတင်းတွေထွက်ခဲ့တာပါ။

ဒါပေမယ့် အင်တာမိုင်ယာမီအသင်းက ထွက်ပေါ်နေတဲ့ သတင်းတွေဟာ အမှားတွေသာ ဖြစ်တယ်လို့ ကြေညာ ချက်ထုတ်ပြန်ပြီး ဖြေရှင်းခဲ့ရတာဖြစ်ပါတယ်။ အယ်လ်ဆာဗေးဒိုးအသင်းဟာ ဖီဖာရဲ့ ကမ္ဘာ့အဆင့် သတ်မှတ်ချက် ၇၈ နေရာမှာရှိနေပြီး ကွန်ကာကပ်ဖ်ဇုန်မှာတော့ နံပတ် ၈ နေရာရပ်တည်နေတာပါ။ အင်တာမိုင်ယာမီအသင်းရဲ့ ခြေစမ်းခရီးစဉ်မှာ အသင်းခေါင်းဆောင် မက်ဆီ၊ ဘက်စ်ကွက်စ်နဲ့ အယ်လ်ဘာတို့ကိုပါ ပါဝင်လာဖို့ ရှိနေပါတယ်။

မက်ဆီကတော့ အင်တာမိုင်ယာမီအသင်းနဲ့အတူ လာမယ့်ရာသီမှာ ဆုဖလားအားလုံးရယူနိုင်ဖို့ ရည်မှန်းထား တယ်လို့ ပြောထားတာဖြစ်ပါတယ်။

Source:Besoccer

CNI Sport News

၂၀၂၃ ခုနှစ်၊ ဒီဇင်ဘာ ၁

ဆာဗက်တေအသင်းနဲ့ ၁ ဂိုးစီ သရေကျခဲ့တဲ့ ယူရိုပါလိဂ် အုပ်စုပွဲစဉ်အပြီးမှာ နည်းပြ မော်ရင်ဟိုဟာ ရိုးမားအသင်း ကစားသမားတွေကို ဝေဖန်သွားပါတယ်။

မော်ရင်ဟိုက “ကျနော်တို့ဟာ အရေးပါတဲ့ အခွင့်အရေးတွေ ရခဲ့ပေမယ့် ဒီပွဲနဲ့ ပတ်သက်ပြီး အဓိပ္ပါယ် ဖွင့်ဆိုရမယ် ဆိုရင် ကျနော်တို့ရဲ့ စိတ်နေ သဘောထားတွေဟာ အပေါ်ယံသာ ရှိခဲ့တာပါ။ သူတို့ကိုယ်သူတို့ သက်သေ ပြသနိုင် မယ့် အခွင့်အရေးတွေကို လွဲချော်ခဲ့တဲ့ ကစားသမားတွေရှိပါတယ်။ ဥပမာပြောရရင် အူရာပါ။ ကစားသမားတွေဟာ ပျင်းရိနေတဲ့ ပုံစံတွေနဲ့ ယူရိုပါလိဂ်ကို လာရောက်နေကြပြီး ပွဲကိုလည်း တိုးတက်အောင် မလုပ်နိုင်ကြဘူး”လို့ Sky Sports Italia ကို ပြောခဲ့ပါတယ်။

ရိုးမားအသင်းဟာ ဒီပွဲရဲ့ ပထမပိုင်းမှာ လူကာကူရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် ဒုတိယပိုင်းမှာ ပြန်ပေးခဲ့ရတဲ့ ချေပဂိုးကြောင့် ဆာဗက်တေအသင်းနဲ့ ၁ ဂိုးစီ သရေကျခဲ့တာ ဖြစ်ပါတယ်။

ရိုးမားအသင်းဟာ ဒီပွဲမှာ သရေကျခဲ့တာကြောင့် ယူရိုပါလိဂ် ၁၆ သင်းအဆင့်ကို အုပ်စုပထမနဲ့ တက်ရောက်နိုင် မယ့် မျှော်လင့်ချက်ကို ထိခိုက်စေခဲ့ပါတယ်။

ရိုးမားအသင်း ကစားသမားတွေကိုတွေ့ရစဉ်

ရိုးမားအသင်းဟာ ဒီပွဲရလဒ်ကြောင့် အုပ်စုတွင်းမှာ ၅ ပွဲ ကစားအပြီး ရမှတ် ၁၀ မှတ်နဲ့ ဒုတိယနေရာမှာ ရပ်တည်နေပါတယ်။

ရိုးမားအသင်းဟာ အုပ်စုထိပ်ဆုံးနေရာက ဆလားဗီးယားအသင်းနဲ့ ၂ မှတ် ကွာဟနေပေမယ့် နောက်ဆုံးပွဲစဉ်မှာ ဆလားဗီးယားအသင်း အနိုင်ရခဲ့ရင် ပလေးအော့ဖ်အဆင့် ယှဉ်ပြိုင်ရတော့မှာ ဖြစ်ပါတယ်။ 

အဲ့ဒါကြောင့် နည်းပြ မော်ရင်ဟိုဟာ ရိုးမားအသင်း ကစားသမားတွေရဲ့ စွမ်းဆောင်ရည်တွေနဲ့ စိတ်နေ သဘော ထားတွေကို ဝေဖန်မှုပြုလုပ်ခဲ့ပါတယ်။

မော်ရင်ဟိုဟာ ရိုးမားအသင်းကို ပထမဆုံး ကိုင်တွယ်ခဲ့တဲ့ ရာသီမှာ ယူရိုပါကွန်းဖရန့်လိဂ် ရယူပေးနိုင်ခဲ့ပြီး မနှစ်က ရာသီက ယူရိုပါလိဂ်ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့ပါတယ်။

မော်ရင်ဟိုဟာ ဒီရာသီအကုန်မှာ ရိုးမားအသင်းကနေ ထွက်ခွာဖွယ်ရှိနေတာကြောင့် အသင်းကို နောက်ထပ် ဥရောပဆုဖလား ရယူပေးနိုင်ဖို့ ပစ်မှတ်ထားနေပါတယ်။

ရိုးမားအသင်းဟာ ဒီရာသီ စီးရီးအေပြိုင်ပွဲမှာ အဆင့် ၅ နေရာ ရပ်တည်နေပြီး ဒီတစ်ပတ် လိဂ်ပွဲစဉ်အဖြစ် ဆက်ဆူအိုလိုအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဒီဇင်ဘာ ၁

လီဗာပူးလ်အသင်းဟာ LASK အသင်းကို ၄ ဂိုး- ဂိုးမရှိနဲ့ ဂိုးပြတ်အနိုင်ရပြီး ယူရိုပါလိဂ်ပြိုင်ပွဲရဲ့ ၁၆ သင်းအဆင့်ကို အုပ်စုပထမနဲ့ တက်ရောက်နိုင်ခဲ့ပြီ ဖြစ်ပါတယ်။

ဒီပွဲမှာ လီဗာပူးလ်အသင်းအတွက် ဂိုးတွေကို ဂတ်ပိုက ၂ ဂိုး၊ ဆာလက်နဲ့ ဒီယက်ဇ်တို့က ၁ ဂိုးစီသွင်းယူခဲ့တာပါ။ 

လီဗာပူးလ်အသင်းရဲ့ အုပ်စုတွင်း ပွဲစဉ်တစ်ပွဲဖြစ်တဲ့ တူးလူးစ်အသင်းနဲ့ ယူနီယံ SG အသင်းတို့ပွဲဟာ ဂိုးမရှိ သရေ ကျခဲ့တာကြောင့် လီဗာပူးလ်အသင်းဟာ ပလေးအော့ဖ်ပွဲစဉ်တွေကို ရှောင်နိုင်ခဲ့ပြီး ၁၆ သင်းအဆင့်ကို တိုက်ရိုက် ယှဉ်ပြိုင်ခွင့်ရရှိမှာ ဖြစ်ပါတယ်။ 

လီဗာပူးလ်အသင်းဟာ အုပ်စုတွင်း ၅ ပွဲ ကစားအပြီးမှာ ရမှတ် ၁၂ မှတ်ရယူနိုင်ခဲ့ပါတယ်။

လီဗာပူးလ်အသင်းနည်းပြ ကလော့ပ်က LASK အသင်းကို အနိုင်ရပြီး နောက်တစ်ဆင့် တက်နိုင်ခဲ့တဲ့အတွက် ကျေနပ်တယ်လို့ ပွဲအပြီးမှာ ပြောခဲ့ပါတယ်။

လီဗာပူးလ်အသင်း နည်းပြ ကလော့ပ်ကိုတွေ့ရစဉ်

ကလော့ပ်က “ဒီနေ့အုပ်စုတွင်းမှာ ထိပ်တန်းရလဒ် ၂ ခုပါ။ ပြီးခဲ့တဲ့ နောက်ဆုံးပွဲစဉ်မှာ တူးလူးစ်အသင်းကို အရေး နိမ့်ခဲ့ပေမယ့် ကျနော်တို့ရဲ့ ရလဒ်နဲ့ သူတို့ရဲ့ ရလဒ်ကြောင့် ကျနော်တို့ဟာ အုပ်စုတွင်း ထိပ်ဆုံးနေရာမှာ ရှိနေခဲ့ပါ တယ်။ ဒါက ပြောင်းလဲသွားမှာ မဟုတ်ပါဘူး။ ပွဲထဲမှာ အပေါင်းလက္ခဏာဆောင်တဲ့ အရာတွေနဲ့ ကောင်းမွန်တဲ့ အရာတွေ အများကြီးပါပဲ။ ကျနော်တို့လိုချင်တဲ့ ပေးဂိုးမပေးရတာ၊ ထိပ်တန်းရလဒ်နဲ့အတူ အလွန်ကောင်းမွန်တဲ့ စွမ်းဆောင်ရည်ပါ”လို့ ပြောခဲ့ပါတယ်။

LASK အသင်းနဲ့ပွဲမှာ လီဗာပူးလ်အသင်းအတွက် ၂ ဂိုး သွင်းယူပေးခဲ့တဲ့ ဂတ်ပိုက သူတို့ဟာ ယှဉ်ပြိုင်နေတဲ့ ပြိုင်ပွဲတိုင်းမှာ ဆုဖလားရယူနိုင်ဖို့ ဆုံးဖြတ်ထားတယ်လို့ ပြောခဲ့ပါတယ်။

ဂတ်ပိုက “ကျနော်တို့ဟာ ဒီရာသီအတွက် ကြီးမားတဲ့ ရည်မှန်းချက်တွေ ရှိနေတာကြောင့် ဆက်ပြီးသွားနေရမှာပါ။ ကျနော်တို့ရဲ့ ဒီအုပ်စုထဲမှာ အရည်အသွေးရှိတဲ့ အသင်းတွေ ပါဝင်နေတာကြောင့် ကျနော်တို့ဟာ ပွဲအများအပြားကို အနိုင်ရယူနိုင်တယ်လို့ ထင်ကြောင်း”TNT Sports ကိုပြောခဲ့ပါတယ်။

ပရီးမီးယားလိဂ်ပြိုင်ပွဲမှာ အဆင့် ၃ နေရာ ရပ်တည်နေတဲ့ လီဗာပူးလ်အသင်းဟာ ဒီတစ်ပတ်လိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဒီဇင်ဘာ ၃၀

ရီးရယ်လ်အသင်းနည်းပြ အန်ဆယ်လော့တီဟာ နာပိုလီအသင်းကို အနိုင်ရရှိခဲ့တဲ့ ချန်ပီယံလိဂ်ပွဲစဉ်မှာ အသင်းအတွက် ခြေစွမ်းပြ ဂိုးသွင်းယူနိုင်ခဲ့တဲ့ ဘယ်လင်ဂမ်ကို ဂန္ထဝင်ဘောလုံးသမားကြီး ဇီဒန်းနဲ့ နှိုင်းယှဉ် သွားခဲ့ပါတယ်။

အန်ဆယ်လော့တီက “ကွဲပြားခြားနားတဲ့ မျိုးဆက်နှစ်ခုကို နှိုင်းယှဉ်ဖို့က ခက်ခဲပါတယ်။ ကျနော်မြင်တွေ့တာက ဘယ်လင်ဂမ်ဟာ ဂိုးဧရိယာထဲရောက်သွားနိုင်တဲ့ စွမ်းဆောင်ရည်ပါ။ ဇီဒန်းက ဒီလိုမျိုးမလုပ်နိုင်ပါဘူး။ ဇီဒန်းရဲ့ တစ်ဦးချင်းအရည်အသွေးတွေက ဘယ်လင်ဂမ်မှာ မရှိပါဘူး။ ဒါပေမယ့် အခုက မော်ဒန်ဘောလုံးပါ။ မော်ဒန် ဘောလုံးလောကမှာ ကွင်းထဲမှာရှိတဲ့ နေရာအများအပြားကို လွှမ်းမိုးမှုရှိနိုင်တဲ့ ဘယ်လင်ဂမ်လို ရုပ်ပိုင်းဆိုင်ရာ ကောင်းမွန်တဲ့ ကစားသမားမျိုးလိုအပ်ပါတယ်”လို့ ပြောခဲ့တာပါ။

ပြီးခဲ့တဲ့ နွေရာသီက ဒေါ့မွန်အသင်းကနေ ရောက်ရှိလာခဲ့တဲ့ ဘယ်လင်ဂမ်ဟာ ရီးရယ်လ်အသင်းအတွက် ခြေစွမ်း ပြသနေတာဖြစ်ပြီး ပါဝင်ကစားထားတဲ့ ၁၆ ပွဲမှာ ၁၅ ဂိုးအထိ သွင်းယူထားတာဖြစ်ပါတယ်။ ဘယ်လင်ဂမ်ဟာ နာပိုလီအသင်းကို အနိုင်ရတဲ့ပွဲစဉ်မှာ ရီးရယ်လ်အသင်းအတွက် ၁ ဂိုးသွင်းယူနိုင်တဲ့အပြင် အသင်းဖော် ဟိုဆေးလူသွင်းယူခဲ့တဲ့ဂိုးကိုလည်း ဖန်တီးပေးနိုင်ခဲ့တာပါ။ ဘယ်လင်ဂမ်ဟာ အသက် ၂၁ နှစ်မပြည့်ခင်မှာ ချန်ပီယံလိဂ်သွင်းဂိုး ၁၀ ဂိုးပြည့်တဲ့ ၄ ဦးမြောက်ကစားသမားအဖြစ်လည်း မှတ်တမ်းဝင်ခဲ့ပါတယ်။

အန်ဆယ်လော့တီက “ဘယ်လင်ဂမ်ဟာ နေ့တိုင်း၊ ပွဲတိုင်းကို အံ့အားသင့်စေတဲ့သူပါ။ သူဟာ ဘောလုံးအတွက် လက်ဆောင်ပါပဲ၊ သူ့ရဲ့နည်းပြတွေ၊ အသင်းဖော်တွေနဲ့ ပရိသတ်တွေက သူ့ကို အလွန်ဝမ်းသာနေကြပါတယ်။ ဘယ်လင်ဂမ်ဟာ ငယ်ရွယ်ပေမယ့် အလွန်ပရော်ဖက်ရှင်နယ်ဆန်တဲ့သူဖြစ်ပြီး အဝတ်လဲခန်းထဲမှာလည်း လိုက်လျောညီထွေနေတတ်တဲ့သူပါ”လို့ ပြောခဲ့ပါတယ်။

ရီးရယ်လ်အသင်းဟာ ချန်ပီယံလိဂ်အုပ်စုပွဲစဉ် ၅ ပွဲကစားအပြီးမှာ ၅ ပွဲစလုံးအနိုင်ရရှိကာ အုပ်စုပထမနဲ့ ၁၆ သင်း အဆင့်ကို ရောက်ရှိခဲ့တာပါ။ ရီးရယ်လ်အသင်းဟာ ဒီတစ်ပတ်စပိန်လာလီဂါ ပွဲစဉ်အဖြစ် ဂရန်နာဒါအသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၃ ခုနှစ်၊ ဒီဇင်ဘာ ၃၀

ယူနိုက်တက်အသင်းကနေ အငှားနဲ့ သွားရောက်ကစားပြီး ဂီတာဖေးအသင်းမှာ ခြေစွမ်းပြသနေတဲ့ တိုက်စစ်မှူး ဂရင်းဝုဒ်ကို ခေါ်ယူဖို့ လာလီဂါထိပ်သီး ၂ သင်းက စိတ်ဝင်စားနေတယ်လို့ The Sun က ဖော်ပြထားပါတယ်။

ဗလင်စီယာနဲ့ ဆိုစီဒက်အသင်းတို့ဟာ လာမယ့်နွေရာသီအပြောင်းအရွှေ့မှာ ခေါ်ယူနိုင်ဖို့အတွက် ဂရင်းဝုဒ်ရဲ့ အခြေအနေကို စောင့်ကြည့်နေတာပါ။ ဂရင်းဝုဒ်နဲ့ ဂီတာဖေးအသင်းတို့ ချုပ်ဆိုထားတဲ့ အငှားစာချုပ်ဟာ အခုရာသီအကုန်မှာ ကုန်ဆုံးတော့မှာဖြစ်ပြီး ယူနိုက်တက်အသင်းထံ ပြန်လာဖို့က ဖြစ်နိုင်ဖွယ်မရှိဘူးလို့ သတင်းတွေမှာ ဖော်ပြထားပါတယ်။ ဂီတာဖေးအသင်းကလည်း လက်ရှိအချိန်မှာ ဂရင်းဝုဒ်ရဲ့ အပြောင်းအရွှေ့နဲ့ ပတ်သက်ပြီး ယူနိုက်တက်အသင်းနဲ့ ဆွေးနွေးမှုတွေပြုလုပ်ဖို့ စီစဉ်နေတာပါ။

အသက် ၂၂ နှစ်အရွယ်ရှိ ကစားသမားဟာ မိသားစုနဲ့အတူ စပိန်မှာ ပျော်ရွှင်နေတာကြောင့် ဂီတာဖေးအသင်းထံ အပြီးသတ်ပြောင်းရွှေ့ဖို့အပါအဝင် အခြားရွေးချယ်စရာတွေကို ရှာဖွေနေတာဖြစ်ပါတယ်။ ဂရင်းဝုဒ်ဟာ ဂီတာဖေး အသင်းအတွက် ၁၁ ပွဲပါဝင်ကစားထားပြီး ၄ ဂိုးသွင်းယူကာ ၃ ဂိုးဖန်တီးမှုပြုလုပ်ထားပြီး ခြေစွမ်းပြသနေတာပါ။ အဲဒါကြောင့် ပရီးမီးယားလိဂ်ကလပ်အသင်းတွေရဲ့ ကင်းထောက်တွေဟာ ဂရင်းဝုဒ်ရဲ့ ပွဲတွေကို စောင့်ကြည့် နေတယ်လို့ မကြာသေးခင်က သတင်းတွေမှာ ဖော်ပြထားတာဖြစ်ပါတယ်။

ဂရင်းဝုဒ်နဲ့ ယူနိုက်တက်အသင်းတို့ရဲ့ စာချုပ်ဟာ ၂၀၂၅ ခုနှစ်အထိ သက်တမ်းရှိနေတာကြောင့် မန်ချက်စတာ ကလပ်ဟာ အခုရာသီအကုန်မှာ ကစားသမားရဲ့ အနာဂတ်နဲ့ ပတ်သက်ပြီး ဆုံးဖြတ်ချက်ချရဖွယ်ရှိနေတာပါ။ ယူနိုက်တက်အသင်းဟာ ဂရင်းဝုဒ်ကို ကလပ်အသင်းတွေထံ အငှားချ ဒါမှမဟုတ် အပြီးသတ်ရောင်းချဖို့ လုပ်ဆောင်ရတော့မှာဖြစ်ပါတယ်။ 

ဂီတာဖေးအသင်းကတော့ ဒီတစ်ပတ် စပိန်လာလီဂါပွဲစဉ်အဖြစ် လက်စ်ပါးမက်စ်အသင်းနဲ့ ယှဉ်ပြိုင်ရမှာဖြစ်ပြီး အမှတ်ပေးဇယားအဆင့် ၈ နေရာကနေအပေါ်ကို တက်လှမ်းနိုင်ဖို့ ပစ်မှတ်ထားနေပါတယ်။ 

Source:Goal

Sport News

၂၀၂၃ ခုနှစ်၊ နိုဝင်ဘာ ၃၀

အာဆင်နယ်အသင်းဟာ ချန်ပီယံလိဂ်ပြိုင်ပွဲမှာ ၁၆ သင်းအဆင့်တက်ရောက်နိုင်ခဲ့ပြီးနောက် နည်းပြ အာတီတာက တစ်ဦးနဲ့တစ်ဦး ဒီထက်ပိုပြီးတောင်းဆိုရမယ်လို့ ပြောလိုက်ပါတယ်။

အာတီတာက “ကျနော်တို့ဟာ ၁၆ သင်းအဆင့်ကို တက်ရောက်နိုင်ခဲ့ပြီး ဒါကိုလှပအောင်လုပ်နိုင်ခဲ့ပါတယ်။ ကျနော်တို့ဟာ ပထမပိုင်းမှာ ၅ ဂိုးသွင်းယူပြီးနောက် ဒုတိယပိုင်းမှာ မတူညီတဲ့ အပြုအမူတွေရှိခဲ့ပေမယ့် ကျနော် တို့ အလွန်အာရုံစိုက်ခဲ့ပါတယ်။ ကျနော်တို့ဟာ အခုထက်ပိုပြီး တစ်ဦးနဲ့တစ်ဦးတောင်းဆိုမှုတွေ ပြုလုပ်ရမှာပါ” လို့ ပြောခဲ့တာပါ။

အာဆင်နယ်အသင်းဟာ လန်းစ်အသင်းကို ၆ ဂိုး- ဂိုးမရှိနဲ့ ဂိုးပြတ်အနိုင်ရပြီးနောက် ချန်ပီယံလိဂ်ပွဲစဉ်ကစားဖို့ ၁ ပွဲ ကျန်ရှိနေသေးပေမယ့် ဒုတိယနေရာက PSV အသင်းကို ၄ မှတ်အထိဖြတ်ထားနိုင်ခဲ့တာကြောင့် အုပ်စုပထမနဲ့ ၁၆ သင်းအဆင့် တက်နိုင်ခဲ့တာဖြစ်ပါတယ်။ အာဆင်နယ်အသင်းဟာ ချန်ပီယံလိဂ်ပြိုင်ပွဲရဲ့ ၁၆ သင်းအဆင့်ကို ၂၀၁၇ ခုနှစ်နောက်ပိုင်း ပထမဆုံးအကြိမ် ရောက်ရှိခဲ့တာပါ။ 

လန်းစ်အသင်းနဲ့ပွဲမှာ ၁ ဂိုးသွင်းပြီး ၁ ဂိုးဖန်တီးမှုပြုလုပ်ကာ ဒီရာသီပြိုင်ပွဲစုံဂိုးဖန်တီးမှု ၁၀ ဂိုးအထိရှိ သွားခဲ့ပြီ ဖြစ်တဲ့ ဆာကာက သူတို့ဟာ အုပ်စုထိပ်ဆုံးနဲ့ နောက်တစ်ဆင့်တက်နိုင်ခဲ့လို့ ဂုဏ်ယူမိတယ်လို့ ပြောခဲ့ပါတယ်။

ဆာကာက “အားလုံးအလွန်ပျော်ရွှင်နေကြပါတယ်။ ကျနော်တို့ဟာ ဝေးကွာနေတဲ့ ချန်ပီယံလိဂ်ပြိုင်ပွဲကို ပထမဆုံး အကြိမ်ပြန်လည်ယှဉ်ပြိုင်အပြီးမှာ နောက်တစ်ဆင့်တက်နိုင်ခဲ့ပါတယ်။ အုပ်စုပထမရအောင် လုပ်ခဲ့ပြီးပြီ ဖြစ်လို့ ကျနော်တို့အတွက် ဂုဏ်ယူစရာပါပဲ။ နည်းပြကတော့ အနည်းငယ်ပျော်ရွှင်ပြီးရင် ဝုလ်ဗ်စ်နဲ့ ကစားမယ့်ပွဲကို အာရုံ စိုက်ဖို့ ကျနော်တို့ကို သတိပေးထားပါတယ်”လို့ ပြောခဲ့တာပါ။

အာဆင်နယ်အသင်းဟာ ဒီရာသီမှာ ရလဒ်ကောင်းတွေရရှိနေပြီး ပရီးမီးယားလိဂ်ပြိုင်ပွဲမှာလည်း အမှတ်ပေးဇယား ထိပ်ဆုံးနေရာမှာ ဦးဆောင်နေတာဖြစ်ပါတယ်။ 

Source:Metro