CNI Sport News
၂၀၂၅ ခုနှစ်၊ ဇန်နဝါရီ ၁၄
ယူနိုက်တက်အသင်း တိုက်စစ်မှူးဟောင်း ဂရင်းဝုဒ်က သွင်းဂိုးတွေက မာဆေးလ်အသင်းမှာ သူ့ရဲ့ဦးစားပေး မဟုတ်ဘဲ ပွဲတိုင်းကို အနိုင်ယူချင်တယ်လို့ ပြောခဲ့ပါတယ်။
ဂရင်းဝုဒ်က “သွင်းဂိုးတွေနဲ့ အသင်းကို ပံ့ပိုးပေးနိုင်လို့ ကျနော် အလွန်ပျော်ရွှင်ပါတယ်။ ဒါပေမယ့် ဂိုးမသွင်းနိုင်ရင် လည်း ကျနော် ဝမ်းနည်းနေမှာ မဟုတ်ပါဘူး။ ကျနော်တို့ နိုင်ပွဲရယူနိုင်သရွေ့ ဂရုစိုက်မှာ မဟုတ်ပါဘူး။ ကျနော် ပွဲတိုင်းကို အနိုင်ယူချင်တယ်”လို့ သတင်းထောက်တွေကို ပြောခဲ့တာပါ။
ပြီးခဲ့တဲ့ရာသီက အငှားကစားခဲ့တဲ့ ဂီတာဖေးအသင်းမှာ ခြေစွမ်းပြသနိုင်ခဲ့တဲ့ ဂရင်းဝုဒ်ကို မာဆေးလ်အသင်းဟာ ပြီးခဲ့တဲ့နွေရာသီက ယူနိုက်တက်အသင်းကနေ ပေါင် ၂၃ သန်းနဲ့ အပြီးသတ်ခေါ်ယူခဲ့တာ ဖြစ်ပါတယ်။
အသက် ၂၃ နှစ်အရွယ်ရှိ ဂရင်းဝုဒ်ဟာ မာဆေးလ်အသင်းမှာ ခြေစွမ်းပြသနေပြီး ပြိုင်ပွဲစုံ ၁၂ ဂိုးအထိ သွင်းယူ ထားတာပါ။
ဂရင်းဝုဒ်ဟာ ဒီဇင်ဘာအတွက် ပြင်သစ်လီဂူး-၁ ရဲ့ တစ်လတာ အကောင်းဆုံး ကစားသမားဆုကို ရရှိထားတာ ဖြစ်ပါတယ်။
ဂရင်းဝုဒ်ကို တွေ့ရစဉ်
ဂရင်းဝုဒ်ဟာ ပြီးခဲ့တဲ့ မာဆေးလ်အသင်းက ရန်းစ်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ပွဲမှာ ၁ ဂိုးသွင်းပြီး ဂိုးဖန်တီးမှု ၁ ကြိမ် ပြုလုပ်နိုင်ခဲ့တာပါ။
ဒါပေမယ့် ဂရင်းဝုဒ်ဟာ သွင်းဂိုးတွေ သွင်းယူနိုင်တာထက် မာဆေးလ်အသင်းနဲ့ ဆုဖလား အောင်မြင်မှုတွေကို ပိုပြီးရယူချင်နေတာ ဖြစ်ပါတယ်။
မာဆေးလ်အသင်းဟာ ဒီရာသီ ပြင်သစ်လီဂူး-၁ ပြိုင်ပွဲမှာ ၁၇ ပွဲ ကစားထားပြီး ရမှတ် ၃၆ မှတ်နဲ့ အမှတ်ပေးဇယား အဆင့် ၂ နေရာမှာ ရပ်တည်နေကာ အဆင့် ၁ နေရာက ပီအက်စ်ဂျီအသင်းနဲ့ ၇ မှတ်ကွာဟနေတာပါ။
ဂရင်းဝုဒ်ဟာ ပြင်သစ်လီဂူး-၁ ပြိုင်ပွဲမှာ ၁၁ ဂိုး သွင်းယူထားတာကြောင့် ဂိုးသွင်း အများဆုံးစာရင်းမှာ လိုင်လီအသင်း တိုက်စစ်မှူး ဂျိုနသန်ဒေးဗစ်နဲ့အတူ ထိပ်ဆုံးနေရာ ရပ်တည်နေတာ ဖြစ်ပါတယ်။
Source: Goal
