CNI Sport News
၂၀၂၅ ခုနှစ်၊ ဇန်နဝါရီ ၁၁
မန်စီးတီးအသင်းဟာ ဥဇဘတ်ကစ္စတန်နောက်ခံလူ ခူဆာနော့ဗ်ရဲ့ အပြောင်းအရွှေ့အတွက် လန်းစ်အသင်းနဲ့ သဘောတူညီမှု ရရှိခဲ့တာကြောင့် ခေါ်ယူနိုင်ဖို့ နီးစပ်နေပြီဖြစ်ပါတယ်။
မန်စီးတီးအသင်းဟာ အသက် ၂၀ နှစ်အရွယ်ရှိ ခူဆာနော့ဗ်ကို ခေါ်ယူဖို့အတွက် လန်းစ်အသင်းကို ယူရိုသန်း ၄၀ ပေးချေဖို့ သဘောတူညီမှုရရှိခဲ့တာပါ။
ခူဆာနော့ဗ်ရဲ့ ကိုယ်စားလှယ်တွေဟာ နောက်ဆုံး အသေးစိတ် အချက်အလက်တွေကို ဆွေးနွေးဖို့ မန်ချက်စတာ မှာရှိနေခဲ့ပြီး ဒီရက်သတ္တပတ်ထဲမှာ ဆေးစစ်မှု ပြုလုပ်သွားဖို့ ရှိနေတာဖြစ်ပါတယ်။
အပြောင်းအရွှေ့ အပြီးသတ်နိုင်ခဲ့ရင် ခူဆာနော့ဗ်ဟာ ဇန်နဝါရီအပြောင်းအရွှေ့မှာ မန်စီးတီးအသင်းရဲ့ ပထမဆုံး ခေါ်ယူတဲ့သူဖြစ်လာမှာပါ။
မန်စီးတီးအသင်းဟာ အဓိက နောက်ခံလူတွေဖြစ်တဲ့ ရူဘင်ဒီယက်ဇ်နဲ့ ဂျွန်စတုန်းစ်တို့ရဲ့ ဒဏ်ရာတွေကြောင့် ခူဆာနော့ဗ်ကို ခေါ်ယူဖို့ လုပ်ဆောင်လာခဲ့တာဖြစ်ပါတယ်။
မန်စီးတီးအသင်းဟာ ဒီရာသီမှာ ခံစစ်ပိုင်း ကစားသမားတွေရဲ့ ဒဏ်ရာတွေကြောင့် ရမှတ်တွေ အများကြီး ဆုံးရှုံးနေခဲ့ရတာပါ။
အိုမာမာမော့ရှ်ကို တွေ့ရစဉ်
လန်းစ်အသင်းဟာ ပြီးခဲ့တဲ့ ၂၀၂၃ ခုနှစ်၊ ဇူလိုင်ကမှ ခူဆာနော့ဗ်ကို ယူရို ၁ သိန်းဝန်းကျင်နဲ့ ခေါ်ယူခဲ့ပေမယ့် အခု မန်စီးတီးအသင်းဆီကနေ ပြောင်းရွှေ့ကြေး အများအပြားရရှိတော့မှာ ဖြစ်ပါတယ်။
မန်စီးတီးအသင်းဟာ အသက် ၁၈ နှစ်အရွယ်ရှိ ဘရာဇီးလ်နောက်ခံလူ ဗစ်တာရိုက်စ်ကို ခေါ်ယူဖို့လည်း စိတ်ဝင် စားနေတယ်လို့ ESPN က ဖော်ပြထားတာပါ။
မန်စီးတီးအသင်းဟာ ဗစ်တာရိုက်စ်ကို ခေါ်ယူဖို့ ပါလ်မီးရက်စ်အသင်းကို ဆက်သွယ်မှုတွေ ပြုလုပ်ထားပြီး ဘရာဇီးလ် ကလပ်ကတော့ သူ့ရဲ့ကစားသမားကို နွေရာသီအထိ သူတို့နဲ့အတူ ဆက်ပြီးရှိနေစေချင်နေတာ ဖြစ်ပါတယ်။
မန်စီးတီးအသင်းဟာ ဖရန့်ဖတ်အသင်း တိုက်စစ်မှူး အိုမာမာမော့ရှ်ကို ဇန်နဝါရီအပြောင်းအရွှေ့မှာ ခေါ်ယူနိုင်ဖို့ ပစ်မှတ်ထားနေတာပါ။
အီဂျစ်တိုက်စစ်မှူး အိုမာမာမော့ရှ်ဟာ ဒီရာသီမှာ ဖရန့်ဖတ်အသင်းအတွက် ၂၄ ပွဲ ပါဝင်ကစားထားပြီး ၁၈ ဂိုး သွင်းယူကာ ခြေစွမ်းပြသနေတာဖြစ်ပါတယ်။
Source: ESPN
