CNI Sport News
၂၀၂၅ ခုနှစ်၊ ဇန်နဝါရီ ၉
ဘာစီလိုနာအသင်းဟာ စပိန်စူပါဖလား ဆီမီးဖိုင်နယ်ပွဲစဉ်အဖြစ် ကစားခဲ့တဲ့ ဘီလ်ဘာအိုအသင်းနဲ့ ပွဲစဉ်မှာ ၂ ဂိုး-ဂိုးမရှိနဲ့ အနိုင်ရပြီး ဗိုလ်လုပွဲကို တက်နိုင်ခဲ့ပါတယ်။
ဘာစီလိုနာအသင်းအတွက် ဂိုးတွေကို လူငယ်ကြယ်ပွင့်တွေဖြစ်တဲ့ ဂါဗီနဲ့ ယာမဲလ်တို့က သွင်းယူခဲ့တာပါ။
စပိန်စူပါဖလားပြိုင်ပွဲမှာ ချန်ပီယံဆုကို ၁၄ ကြိမ်အထိ ရရှိထားပြီး အအောင်မြင်ဆုံး အသင်းအဖြစ် ရပ်တည်နေတဲ့ ဘာစီလိုနာအသင်းဟာ လက်ရှိချန်ပီယံ ရီးရယ်လ်နဲ့ မာယော့ကာအသင်းတို့ ပွဲစဉ်က အနိုင်ရတဲ့အသင်းနဲ့ ဗိုလ်လုပွဲ အဖြစ် ယှဉ်ပြိုင်ရမှာဖြစ်ပါတယ်။
ဒဏ်ရာကြောင့် ဘာစီလိုနာအသင်းရဲ့ နောက်ဆုံး ၂ ပွဲကို မပါဝင်နိုင်ခဲ့တဲ့ ယာမဲလ်ဟာ ဒီပွဲမှာ ပွဲထွက် လူစာရင်းထဲ ပါဝင်ခဲ့ပြီး ခြေစွမ်းပြ ဂိုးသွင်းယူနိုင်ခဲ့တာပါ။
ဘာစီလိုနာအသင်း ဂိုးသွင်းနေစဉ်
ဘာစီလိုနာအသင်းနည်းပြ ဟန်ဆီဖလစ်က စပိန်စူပါဖလား ဗိုလ်လုပွဲကို တက်နိုင်ခဲ့တဲ့အတွက် အလွန်ပျော်ရွှင် တယ်လို့ ပွဲအပြီးမှာ ပြောခဲ့ပါတယ်။
ဟန်ဆီဖလစ်က “ဒီနိုင်ပွဲဟာ ကျနော်တို့အတွက် အလွန်ကောင်းပြီး ကျနော် အလွန်ပျော်ရွှင်ပါတယ်။ ကျနော်တို့ ဗိုလ်လုပွဲကို တက်နိုင်ခဲ့ပြီး ဒါက ကျနော်တို့ရဲ့ ရည်မှန်းချက်ပါ။ ပေးဂိုးမပေးခဲ့ရတဲ့ အတွက်လည်း ပျော်ရွှင်ဖို့ ကောင်းပါတယ်။ အသင်းဟာ ဒီပွဲမှာ ကောင်းမွန်တဲ့ စွမ်းဆောင်ရည်ကို ပြသနိုင်ခဲ့ပြီး ဗိုလ်လုပွဲကို တက်ဖို့ ထိုက်တန်တယ်”လို့ ပြောခဲ့တာပါ။
ဘာစီလိုနာအသင်းဟာ စပိန်စူပါဖလား ဗိုလ်လုပွဲ တက်နိုင်ခဲ့သလို အသင်းရဲ့ ကစားသမားစာရင်းထဲ စာရင်းသွင်း နိုင်ဖို့ ခက်ခဲနေတဲ့ အော်လ်မိုနဲ့ ဗစ်တာတို့ကို ယာယီစာရင်း သွင်းခွင့်ရခဲ့လို့ သတင်းကောင်းဖြစ်ခဲ့ပါတယ်။
အဲဒါကြောင့် ဘာစီလိုနာအသင်းဟာ အော်လ်မိုနဲ့ ဗစ်တာတို့ ၂ ဦးစလုံးကို လာမယ့် စပိန်စူပါဖလား ဗိုလ်လုပွဲစဉ်မှာ အသုံးပြုလို့ ရရှိသွားခဲ့ပြီဖြစ်ပါတယ်။
Source: ESPN
