CNI News

၂၀၂၅ ခုနှစ်၊ ဒီဇင်ဘာ ၁၈

မြန်မာနိုင်ငံတွင် ကျင်းပမည့် ရွေးကောက်ပွဲနှင့်ပတ်သက်ပြီး ဧရာဝတီတိုင်းဒေသကြီးမှ ပြည်သူလူထု၏  စိတ်ဝင်စားမှု မည်ကဲ့သို့ ရှိသလဲဆိုသည့်အပေါ် စောင့်ကြည့်နေကြသည်။

ဧရာဝတီတိုင်းဒေသကြီးသည် လက်နက်ကိုင် ဖြေရှင်းသည့်နည်းကို မသွားဘဲ ရွေးကောက်ပွဲလုပ်ပြီး ရွေးကောက်ပွဲ နည်းအရ အစိုးရသစ်ပေါ်လာအောင် စောင့်စားသည့် နယ်တစ်နယ်ဖြစ်ကြောင်း ဧရာဝတိုင်းဒေသကြီး၊ ဒေးဒရဲ မြို့နယ်မှ ဝင်ရောက်ယှဥ်ပြိုင်မည့် တစ်သီးပုဂ္ဂလ ကိုယ်စားလှယ်လောင်း ဦးဇော်ထွန်းက CNI သတင်းဌာနသို့ ပြောသည်။

၎င်းက “ဧရာဝတီတိုင်းကတော့ သူကတော့ ငြိမ်းချမ်းတဲ့ နေရာဖြစ်တဲ့အတွက် လက်နက်ကိုင်ပြီး ဖြေရှင်းတဲ့နည်း ကို မသွားဘဲ ဧရာဝတီတိုင်း ၂၆ မြို့နယ်ကတော့ လွှတ်တော်တစ်ခု ပြန်ပေါ်ပေါက်ဖို့အတွက် ဒီမိုကရေစီနည်းအရ လွှတ်တော်တစ်ခု ပြန်ပေါ်ပေါက်မယ်။ အခုလက်ရှိ ရွေးကောက်ပွဲမှာ ဒီနိုင်ငံရေးနည်းနဲ့ လွှတ်တော်ထဲမှာပဲ အစိုးရ တစ်ရပ် ဖွဲ့စည်းပြီးတော့ ဖြေရှင်းမယ်ဆိုတဲ့ မူရှိတာပေါ့။ ဟိုဘယ်နေရာမှ လက်နက်ကိုင် ပုံစံမျိုးလည်း ဘာမှ မဖြစ်ခဲ့ဘဲနဲ့ ဒီစကစကို သူတို့ရပ်နားသွားပြီးတော့ တိုးတဲ့ဟာတွေပေါ်မှာ ဒီရွေးကောက်ပွဲ လုပ်မယ့်ရက်ကိုပဲ စောင့်ပြီးတော့ ရွေးကောက်ပွဲနည်းအရပဲ နောက်ထပ် အစိုးရသစ် ပေါ်လာအောင်လို့ စောင့်စားတဲ့ နယ်တစ်နယ် ဖြစ်တာပေါ့။ ပြည်သူလူထု အနေနဲ့ကတော့ မှတ်ပုံတင် ရှိရဲ့သားနဲ့ မဲစာရင်းထဲမှာ မပါဘူးဆိုရင်လည်း ပုံစံ ၃ နဲ့ လျှောက်တာတွေ ဘာတွေအားလုံး အကုန်လုံး တက်တက်ကြွကြွနဲ့ လုပ်ဆောင်နေတယ်ပေါ့။ ဒီနိုင်ငံရဲ့ အရွေ့ တစ်ခုကိုပေါ့။ ဒါပြည်သူလူထုနဲ့ ရပ်ကျေး ဒီလိုကော်မရှင်နဲ့ အုပ်ချုပ်ရေးမှူးတွေနဲ့ အထွေထွေ အုပ်ချုပ်ရေးမှူး ဦးစီးဌာနနှင့် ပူးပေါင်းပြီးတော့ ဆောင်ရွက်နေတယ်”ဟု ပြောသည်။

ဧရာဝတီတိုင်းဒေသကြီး အစိုးရအဖွဲ့ကို မဲပေးပုံ ပြသနေစဉ်

၂၀၂၁ ခုနှစ်၊ ဖေဖော်ဝါရီ ၁ ရက်က NLD အစိုးရသည် ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်က ဖြုတ်ချ၍ နိုင်ငံတော်အာဏာကို ရယူခဲ့သည်။

ထို့နောက် နိုင်ငံတော်အား အရေးပေါ် အခြေအနေ ကြေညာ၍ အုပ်ချုပ်လာခဲ့ရာ ယနေ့ ၂၀၂၅ ခုနှစ်အထိပင် ဖြစ်သည်။

ဧရာဝတီတိုင်းဒေသကြီးရှိ ပြည်သူလူထု အနေနှင့် ရွေးကောက်ပွဲနှင့်ပက်သက်ပြီး တော်တော်လေး စိတ်ဝင်စားမှု အားနည်းသည်ကို တွေ့ရကြောင်း ပြည်သူရှေ့ဆောင်ပါတီ(PPP)မှ ဧရာဝတီတိုင်းဒေသကြီး၏ အတွင်းရေးမှူး ဦးဇော်ဝေထက်က CNI သတင်းဌာနသို့ ပြောသည်။

၎င်းက “ပြည်သူလူထု အနေနဲ့ကတော့ ရွေးကောက်ပွဲနဲ့ ပတ်သက်လို့ စိတ်ဝင်စားမှုလို့ ပြောရင်တော့ တော်တော် လေး တချို့လည်း စိတ်ဝင်စားမှု အားနည်းတာကိုတော့ တွေ့ရတယ်။ ဒါလည်း ဘာကြောင့် အားနည်းတာလဲလို့ ပြောရရင် အရှေ့မှာ ကျနော်တို့က ရွေးကောက်ပွဲနှစ်ခု ဖြတ်သန်းခဲ့တဲ့အခါမှာ လွှတ်တော် ကိုယ်စားလှယ်လောင်း တွေက မဲဆွယ်စည်းရုံးရေးကာလမှာပဲ တွေ့ရပြီးတော့ မဲဆွယ်စည်းရုံးပြီးတော့ လွှတ်တော်ဆီ ရောက်သွားတဲ့ အခါကြလို့ရှိရင် ဒီမဲဆန္ဒရှင် ပြည်သူတွေနဲ့ ပတ်သက်ပြီးတော့မှ လုပ်ပေးနိုင်တဲ့ ပြန်ကြည့်နိုင်စွမ်း အားနည်းခဲ့ကြတယ်။ အားနည်း ခဲ့ကြတဲ့အတွက် ပြည်သူလူထုတွေကတော့ ဟိုရွေးကောက်ပွဲပြီးရင် ဒါတွေက မဟုတ်တော့ပါဘူးဆိုတဲ့ စိတ်မျိုးနဲ့ ဒီရွေးကောက်ပွဲအပေါ် လွှတ်တော် ကိုယ်စားလှယ်လောင်းတွေအပေါ် စိတ်ဝင်စားမှု အားနည်းတာမျိုးလည်း ရှိ တယ်။ အခုက မဲဆန္ဒရှင် ပြည်သူတွေ အားလုံးက စီးပွားရေး အကျပ်အတည်း၊ လူမှုရေး အကျပ်အတည်းတွေနဲ့ ရင်ဆိုင်နေကြရတဲ့ အခါကြတော့ အဲ့ဒါကြောင့် စိတ်ပါဝင်စားမှု အားနည်းတာတော့ရှိတယ်”ဟု ပြောသည်။

ဧရာဝတီတိုင်းဒေသကြီး အစိုးရအဖွဲ့ကို မဲပေးပုံ ပြသနေစဉ်

သို့သော် သွားရောက်ပြီးတော့ တွေ့ဆုံရှင်းပြသည့် အခါကျရင်တော့ စိတ်ပါဝင်စားမှု မြင့်တက်လာသည့် သူများ လည်းရှိကြောင်း၊ မိမိတို့ ပါတီအနေဖြင့် ရက် ၁၀၀ အတွင်းမှာ ကုန်စျေးနှုန်း တည်ငြိမ်အောင် ဆောင်ရွက်မည် ဖြစ် ကြောင်း ရှင်းပြသည့်အခါ စိတ်ဝင်တစား ဖြစ်လာခြင်းမျိုး ရှိကြောင်း ဦးဇော်ဝေထက်က ပြောသည်။ 

ထို့ကြောင့် မြန်မာ့တပ်မတော်က ၂၀၂၅ ခုနှစ်၊ ဒီဇင်ဘာ ၂၈ ရက်တွင် ရွေးကောက်ပွဲအပိုင်း(၁)ကိုလည်းကောင်း၊ ၂၀၂၆ ခုနှစ်၊ ဇန်နဝါရီ ၁၁ ရက်၌ ရွေးကောက်ပွဲအပိုင်း(၂)ကိုလည်းကောင်း၊ ဇန်နဝါရီလ နောက်ဆုံးပတ်မှာတော့ ရွေးကောက်ပွဲအပိုင်း(၃)ကိုလည်းကောင်း ကျင်းပမည်ဖြစ်သည်။

ထို့နောက် ရွေးကောက်ပွဲ အပိုင်း (၁)တွင် ဧရာဝတီတိုင်းဒေသကြီး၊ ပုသိမ်မြို့နယ်ရှိ ဘောမိကျေးရွာအုပ်စုနှင့် မကျီးဇင် ကျေးရွာအုပ်စုတို့၌ ရွေးကောက်ပွဲ ကျင်းပမည် မဟုတ်ကြောင်း၊ အလားတူ အပိုင်း (၂) တွင် သာပေါင်း မြို့နယ်ရှိ ကျွန်းလျှားကြီးကျေးရွာအုပ်စုနှင့် သစ်ဖြူကျေးရွာအုပ်စုတို့၌ ရွေးကောက်ပွဲ မကျင်းပနိုင်ကြောင်း ပြည်ထောင်စုရွေးကောက်ပွဲကော်မရှင်က ထုတ်ပြန်သည်။

CNI News

၂၀၂၅ ခုနှစ်၊ ဒီဇင်ဘာ ၁၈

မြန်မာနိုင်ငံတွင် မကြာခင် ကျင်းပမည့် ရွေးကောက်ပွဲပြီးနောက်ပိုင်း အစိုးရတစ်ရပ် ပေါ်ထွက်လာချိန်၌ အမျိုးသား ဒီမိုကရေစီအဖွဲ့ချုပ်(NLD) ပါတီအနေဖြင့် ၂၀၀၈ ဖွဲ့စည်းပုံအခြေခံဥပဒေ ဘောင်ထဲကနေ နိုင်ငံရေးထဲ ပြန်လည် ဝင်ရောက် လာနိုင်သလားဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်မှုများရှိနေကြသည်။ 

ရွေးကောက်ပွဲပြီးနောက် နိုင်ငံရေး တိုးတက်ပြောင်းလဲမှု ဖြစ်ပေါ်လိုပါက NLD ပါတီအား ၂၀၀၈ ဖွဲ့စည်းပုံအခြေခံ ဥပဒေ ဘောင်ထဲသို့ ပြန်ဝင်လာအောင် လုပ်ရန်လိုအပ်သော်လည်း ယခုတစ်ကြိမ်သည် ထိုအခင်းအကျင်းမျိုး ဖြစ်ရန်မှာ အင်မတန် ခက်ခဲသွားကြောင်း နိုင်ငံရေးလေ့လာသုံးသပ်သူတစ်ဦးက CNI သတင်းဌာနသို့ ပြောသည်။

၎င်းက “နိုင်ငံရေး အပြောင်းအလဲဆိုတာက သိပ်ရှုပ်ရှုပ်ထွေးထွေး အများကြီး မဟုတ်ဘူး။ စီးပွားရေးကောင်းဖို့တို့ ဘာတွေညာတွေ အဲဒါတွေက သိပ်ပြီးတော့ အဓိကမကျဘူး။ အဓိကကျ တာက ၂၀၀၈ အခြေခံဥပဒေဘောင်ထဲကို NLD ပြန်ပြီးတော့ ပါလာနိုင်အောင်၊ ရွေးကောက်ပွဲ ပြန်ပြီးတော့ ဝင်လာ နိုင်အောင် အခင်းအကျင်းတွေ ဖန်တီးပေး မယ်၊ ဝင်လာခဲ့တယ်ဆိုရင် ရွေးကောက်ပွဲလည်း အသစ်ပြန်လုပ်ပေး လိုက်ရင် အဲဒီမှာ သေချာပေါက် NLD က ပြန် နိုင်မယ်၊ ပြန်နိုင်တဲ့အခါကြရင် ပြည်သူလူထုရဲ့ သဘောထားတွေက လည်း အစိုးရအပေါ် ယုံကြည်မှုတွေ တိုးလာ မယ်။ အစိုးရက လုပ်ရကိုင်ရတာတွေ ပိုပြီးတော့ အဆင်ပြေလာမယ်။ လက်နက်ကိုင် တိုက်ခိုက်နေတဲ့ ပဋိပက္ခတွေ ကလည်း တဖြေးဖြေးချင်းပေါ့။ ချက်ချင်းကြီး အကုန်လုံး အလင်းဝင် လာတာမျိုး မဟုတ်ရင်တောင်မှ ဖြေးဖြေးချင်း ဝင်လာတာမျိုးတွေ ဖြစ်လာနိုင်တာပေါ့” ဟု ပြောသည်။

 NLD ပါတီ ခေါင်းဆောင်တွေကို တွေ့ရစဉ်

ဦးသိန်းစိန်အစိုးရ လက်ထက်က ဒေါ်အောင်ဆန်းစုကြည်နှင့် NLD ပါတီတို့ ရွေးကောက်ပွဲဝင်နိုင်ရေး လိုအပ်သည့် ဥပဒေများကို ပယ်ဖျက်ပေးခဲ့သော်လည်း လက်ရှိနိုင်ငံရေး အခင်းအကျင်းအရ တက်လာမည့် အစိုးရအနေဖြင့် ထိုသို့ ဖြေလျှော့ပေးခဲ့သော် NLD ဘက်က လက်ခံပါဦးမလား မေးခွန်းထုတ်စရာရှိကြောင်း အထက်ပါ နိုင်ငံရေး လေ့လာသူက ပြောသည်။

လာမည့် ပါတီစုံဒီမိုကရေစီ အထွေထွေရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်(NLD) မပါဝင်သဖြင့် လက်ရှိ ဖြစ်ပွားနေသည့် လက်နက်ကိုင်ပဋိပက္ခများအပေါ် ပြောင်းလဲမှု မဖြစ်စေနိုင်ကြောင်းလည်း စစ်ရေးနှင့် နိုင်ငံရေးအကဲခတ်များက ထောက်ပြကြသည်။ 

ယခင် အငြိမ်းစား ဗိုလ်ချုပ်မှူးကြီးသန်းရွှေ လက်ထက်က ရွေးကောက်ပွဲ ကျင်းပပေးခဲ့ပြီး ဦးသိန်းစိန်ဦးဆောင် သည့် အစိုးရအဖွဲ့သို့ နိုင်ငံတော်အာဏာ လွှဲပြောင်းပေးခဲ့ရာတွင် ဒေါ်အောင်ဆန်းစုကြည်ကို ပြန်လည် လွှတ်ပေး ခဲ့သလို နိုင်ငံရေး အပြောင်းအလဲများလည်း များစွာရှိခဲ့သည်။

ထို့ပြင် တိုင်းရင်းသားလက်နက်ကိုင် အချို့နှင့် အစိုးရအကြား NCA ဆိုသည့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ်ကိုလည်း ရေးထိုးလိုက်နိုင်ခဲ့သည်။

ဒေါ်အောင်ဆန်းစုကြည်ကို တွေ့ရစဉ်

သို့သော် ရွေးကောက်ပွဲပြီးနောက် တက်လာမည့် အစိုးရလက်ထက်တွင် နဝတ၊ နအဖသာမက ဦးသိန်းစိန် လက်ထက်က အဖြစ်အပျက်များကို သင်ခန်းစာယူကာ လုပ်ဆောင်လိမ့်မည်ဟုထင်ကြောင်း တိုင်းလိုင် (ရှမ်းနီ) အမျိုးသားများဖွံ့ဖြိုးတိုးတက်ရေးပါတီ (TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

၎င်းက “ဒေါ်စု အခန်းကဏ္ဍနဲ့ ပတ်သက်ပြီးတော့မှ ကျနော် သိပ်ပြီးတော့မှ မဝေဖန်ချင်ဘူး။ ဘာလို့ဆို ဦးသိန်းစိန် လက်ထက်တုန်းကလည်း ပူးပေါင်းပါဝင်မှုနဲ့ လုပ်လိုက်တဲ့ အခါကြတော့ ဒေါ်အောင်ဆန်းစုကြည်ရဲ့ နိုင်ငံရေးပါဝါ လည်း နည်းတဲ့ပါဝါ မဟုတ်ဘူးလေ။ လက်ရှိ အစိုးရကနေပြီးတော့ လွှဲပြောင်းပေးမယ် တက်လာမယ့် အစိုးရ အပေါ်မှာလည်း အများကြီး မူတည်ပါလိမ့်မယ်။ သူ့အခန်းကဏ္ဍကတော့ သူ့ကိုလွတ်မြောက်ပြီးမှ လွှတ်ပေးလို့ နိုင်ငံရေးလောကထဲ ပြန်ဝင်ခဲ့ပြီဆိုရင် တစ်နိုင်ငံလုံးကို ပြောဆိုစည်းရုံးနိုင်မှာပဲ ဖြစ်ပါတယ်။ သူ့ရဲ့နိုင်ငံရေးပါဝါ တော်တော်ကြီးပါတယ်။ အဲဒါကလည်း ခုနကပြောသလို တက်လာတဲ့အစိုးရအပေါ် အများကြီး မူတည်ပါလိမ့် မယ်။ တက်လာတဲ့အစိုးရကတော့ အရင် နဝတ၊ နအဖ လက်ထက်က ဖြစ်သွားတဲ့ ပြဿနာတွေရော၊ နောက် ဦးသိန်းစိန် လက်ထက်တုန်းက ကိစ္စတွေရော အားလုံးကို သူသင်ခန်းစာယူပြီးတော့ လုပ်လိမ့်မယ်လို့ ထင်တယ်” ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်က မြန်မာ့တပ်မတော်သည် ဒေါ်အောင်ဆန်းစုကြည် ဦးဆောင်သော အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုများအား မဖြေရှင်းဘဲ အစိုးရဖွဲ့စည်း‌ရေး ကြိုးပမ်းသည်ဟုဆိုကာ ဖြုတ်ချခဲ့ပြီးနောက် ဒေါ်အောင်ဆန်းစုကြည်၊ ဦးဝင်းမြင့် တို့ကို ဖမ်းဆီးထိန်းသိမ်းခဲ့သည်။

ထို့ပြင် နိုင်ငံတော်မှ လွတ်ငြိမ်းချမ်းသာမှုများ ပေးသည့်အထဲတွင် ယခုအချိန်အထိ ဒေါ်အောင်ဆန်းစုကြည် မပါဝင်သေးသည်ကို တွေ့ရသဖြင့် ရွေးကောက်ပွဲပြီးမှ လွှတ်ပေးနိုင်ဖွယ်ရှိသကဲ့သို့ မလွတ်ပေးဘဲလည်း ထားနိုင်ကြောင်း စစ်ရေးနှင့်နိုင်ငံရေး အကဲခတ်များကြား သုံးသပ်မှုများ ရှိနေကြသည်။

CNI New

၂၀၂၅ ခုနှစ်၊ ဒီဇင်ဘာ ၁၇

ထိုင်းနိုင်ငံအတွင်းမှာရှိသည့် မြန်မာနိုင်ငံသားများအနေဖြင့် ထိုင်းနှင့် ကမ္ဘောဒီးယားကြား ဖြစ်ပွားနေသော စစ်ပွဲအတွင်း မည်သည့်ဘက်မှ မပါမိစေရန် အပြင် အိမ်ရှင်နိုင်ငံ မကြိုက်နှစ်သက်သည့် အရာများမလုပ်မိစေရန် သတိထားဖို့လိုကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူများက တိုက်တွန်းခဲ့ကြသည်။

ထိုင်းနှင့် ကမ္ဘောဒီးယားသည် ၂၀၂၅ ခုနှစ်၊ ဒီဇင်ဘာ ၈ ရက်မှစပြီး ၈၁၇ ကီလိုမီတာ အရှည်ရှိ နယ်စပ်ဒေသ တစ်လျှောက်တွင် လက်နက်ကြီးများဖြင့် အပြန်အလှန် ပစ်ခတ် တိုက်ခိုက်ခဲ့ပြီး လက်ရှိအချိန်အထိ တိုက်ခိုက်မှု များ ဆက်လက် ဖြစ်ပွားနေသည်။ 

ထိုင်းရောက် ရွှေ့ပြောင်း မြန်မာအလုပ်သမားများ အနေဖြင့် အခြားတစ်ပါးသူ နိုင်ငံ၏ ပဋိပက္ခများကြား ဝင်ရောက် စွက်ဖက်ခြင်း၊‌ ပြောဆိုရေးသားခြင်း၊ လှုံ့ဆော်ခြင်းမျိုး မလုပ်မိစေရန် များစွာအရေးကြီးသည်ဟု ရွှေ့ပြောင်း အလုပ်သမားရေး ဆောင်ရွက်ပေးနေသူ ဦးအောင်ကျော်က CNI သတင်းဌာနသို့ ပြောသည်။ 

ထိုင်းဝန်ကြီးချုပ်က လွှတ်တော် ဖျက်သိမ်းကြောင်း ကြေညာနေစဉ်

၎င်းက “ဒါက ကျနော်တို့ ပဋိပက္ခတွေ ဖြစ်ပေါ်လာတိုင်း ဖြစ်ပေါ်လာတိုင်းမှာ ဝင်ရောက် စွက်ဖက်တာတွေ၊ ပြောဆိုတာတွေ၊ ရေးသားတာတွေ၊ လှုံ့ဆော်တာတွေကို ဝင်ရောက် မလုပ်မိဖို့တော့ အရေးကြီးပါတယ်။ ဘာကြောင့်လဲ‌ဆိုရင် ပြောမယ်ဆိုရင် ကျနော်တို့ ကိုယ်တိုင် ဒီမှာနေရတာလည်း အရမ်းကြီး လုံခြုံစိတ်ချရတဲ့ အနေအထားမှာ မရှိဘူး။ ဘာကြောင့်လဲဆိုတော့ သူ့နိုင်ငံ နိုင်ငံရေး အခြေအနေကလည်း မကောင်းဘူး။ နောက် မကြာသေးခင်မှာ ထိုင်းကလည်း လွှတ်တော် ဖျက်သိမ်းထားပြီဖြစ်တဲ့ အတွက်ကြောင့် ရွေးကောက်ပွဲတွေ ဘာတွေ လုပ်ကြအုံးမယ်၊ အဲဒီမှာလည်း တစ်ခါတစ်ခါကျရင် ဟိုး လွန်ခဲ့တဲ့ ဆယ်စုနှစ်တွေတုန်းက ကျနော်တို့ ကြုံဖူးတယ်။ တချို့ တချို့သော နိုင်ငံရေးပါတီတွေက ယူနီဖောင်းတွေ ဝတ်ပေးပြီးမှ  လူမှုရေးတွေ တစ်စုံတစ်ရာ ပံ့ပိုးပြီးမှ အင်အားပြတာတွေ ဘာတွေ လုပ်ခဲ့တာတွေလည်းရှိတယ်။ အဲတော့ ကျနော် ပြောချင်တာကတော့ ထိုင်းနိုင်ငံမှာ ကိုယ်က တရားဝင်နေထိုင်ခွင့် အလုပ်လုပ်ခွင့် လက်မှတ်တွေရအောင် ယူပြီးရင် ကိုယ့်ရဲ့ လုပ်ငန်းခွင်ထဲကိုပဲ စိတ်ဝင်တစားနဲ့ အလုပ်လုပ်ကိုင်ဖို့ နောက်ပြီးရင် ကိုယ့်နိုင်ငံသား အရေးမှအပ သူများ တစ်ပါးသူနိုင်ငံရဲ့ အရေး တွေကို ဝင်ရောက် မစွက်ဖက်မိအောင် သတိထားနေထိုင်ကြဖို့ လိုအပ်တယ်လို့ ကျနော်အနေနဲ့ သုံးသပ်လိုပါ တယ်” ဟု ပြောသည်။ 

ထိုင်းရောက် မြန်မာလုပ်သားများသည် ထိုင်းနိုင်ငံမှ ချမှတ်ထားသည့် ဥပဒေများကို မချိုးဖောက်မိအောင် စနစ် တကျ လိုက်နာနေထိုင်သင့်ပြီး မိမိနေထိုင်ရာ ပတ်ဝန်းကျင်နှင့်လည်း သင့်လျော်အောင် သတိထားနေထိုင်ရန် လိုအပ်သည်ဟု ‌ရွှေ့ပြောင်းအလုပ်သမားရေး ဆောင်ရွက်ပေးနေသူ ဦးမင်းဦးက CNI သတင်းဌာနသို့‌ ပြောသည်။

ထိုင်းက နယ်စပ် လုံခြုံရေးကို တင်းကျပ် စစ်ဆေးနေစဉ်

၎င်းက “အဲဒါကတော့ သူတို့ရဲ့ ပြောရမယ် ဆိုလို့ရှိရင်တော့ဗျာ သူတို့ဥပဒေ ထိုင်းနိုင်ငံက ချမှတ်ထားတဲ့ ဥပဒေ‌ ပေါ့နော်။ အဲဒါတွေကို မချိုးဖောက်မိအောင် ကိုယ်တွေကတော့ ဥပဒေ‌အောက် ကနေပြီးတော့ပေါ့။ လေးစား လိုက်နာပြီး နေဖို့လိုတယ်။ နောက်ပြီးတော့ ကျနော်တို့ နေရာ၊ ဒေသတွေပေါ့။ အဲဒီ နေရာဒေသတွေက ကိုယ် အလုပ်လုပ်တဲ့ နေရာဒေသပေါ် မူတည်ပြီးတော့ အဲ့မှာရှိတဲ့ အလုပ်ရှင်ရော၊ အာဏာပိုင်ရော တစ်ယောက်နဲ့ တစ်ယောက်က စိတ်သဘောထားချင်း ဆိုင်ရာမှာ တချို့ သဘောကောင်းတဲ့ ထိုင်းလည်းရှိသလို သဘော မကောင်းတဲ့ လူလည်းရှိတယ်။ တချို့ကျတော့ အမြင်က အခုလောလောဆယ် ဆိုလို့ရှိရင် သူတို့ အမြင်စောင်း တာက ကမ္ဘောဒီးယားကို‌တော့ တော်တော်လေး စောင်းသွားတာပေါ့။ ကျနော်တို့ ကိုယ့်မြန်မာနိုင်ငံသားတွေ အနေနဲ့ ချစ်ချစ်ခင်ခင် စည်းစည်းလုံးလုံးနဲ့ နေဖို့လိုတယ်” ဟု ပြောသည်။      

ထိုင်းနိုင်ငံတွင် မြန်မာနိုင်ငံသားများ တရားဝင် ၆ သန်းရှိသလို တရားမဝင် ၄ သန်းရှိကြောင်း လူဝင်မှုကြီးကြပ်ရေး စာရင်းများနှင့် အလုပ်သမားအရေး ဆောင်ရွက်သူများထံမှ သိရသည်။

CNI News

၂၀၂၅ ခုနှစ်၊ ဒီဇင်ဘာ ၁၇

တိုင်းရင်းသားလက်နက်ကိုင်အဖွဲ့များ မရှိသည့်အချိန်မှသာ တပ်မတော်အနေဖြင့် လွှတ်တော်ထဲ ပါဝင်နေမှုကို အဆင့်ဆင့် လျှော့ချသွားမည်ဟု ဗိုလ်ချုပ်မှူးကြီးမင်းအောင်လှိုင်က ပြောဆိုမှုသည် အကြောင်းပြချက် မခိုင်လုံ ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO-NCA/S)မှဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

 “မိမိတို့နိုင်ငံတွင် ဒီမိုကရေစီစနစ်များ ထွန်းကားပြီး တိုင်းရင်းသား လက်နက်ကိုင်အဖွဲ့များ မရှိသည့် အချိန်တွင် တပ်မတော်အနေဖြင့် လွှတ်တော်တွင် ပါဝင်နေမှုကို အဆင့်ဆင့်လျှော့ချသွားနိုင်မည်”ဟု ၂၀၂၅ ခုနှစ်၊ ဒီဇင်ဘာ ၆ ရက်က ပြင်ဦးလွင်တပ်နယ်ရှိ အရာရှိ၊ စစ်သည်၊ မိသားစုများ၊ ဗိုလ်လောင်းများအား တွေ့ဆုံစဉ် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။

ထိုစကားသည် သွယ်ဝိုက်သော နည်းလမ်းဖြင့် လွှတ်တော်နိုင်ငံရေး၌ တပ်မတော်က အမြဲတမ်းပါမည်ဟု ပြောခြင်း နှင့်တူကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO-NCA/S)မှဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “အဲဒါကတော့ သွယ်ဝိုက်တဲ့နည်းနဲ့ လွှတ်တော်နိုင်ငံရေးမှာ တပ်က အမြဲတမ်း ပါမယ်လို့ ပြောတာနဲ့ အတူ တူပါပဲ။ အကြောင်းပြချက်က မခိုင်လုံဘူးလေ။ နောက်ပြီးတော့ လက်နက်ကိုင် မရှိမှလို့ ပြောတဲ့ဟာက တစ်ခါတ လေ လက်နက်ကိုင်အားလုံးက လက်မှတ်ထိုးချင်ပါပြီလို့ ပြောတာတောင်မှ တချို့ကို သူကပဲ ချန်ထားခဲ့တာပါ။ တမင်တကာ ချန်ထားခဲ့တာရှိခဲ့တော့။ အဲဒီလို ချန်ထားနေသမျှတော့ ဘယ်လိုလုပ်ကုန်မလဲ လက်နက်ကိုင် က တော့။ အဲဒါကြောင့် ဒါကတော့ negative နည်းနဲ့ ပြောလိုက်တဲ့ သဘောပါပဲ” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နှင့် ဗိုလ်မှူးကြီးခွန်ဥက္ကာ(ခေါင်းပေါင်းအနီ)ကို တွေ့ရစဉ်

တပ်မတော် အနေဖြင့် နိုင်ငံတော်၏ အမျိုးသားနိုင်ငံရေး ဦးဆောင်မှု အခန်းကဏ္ဍတွင် ခေတ်အဆက်ဆက် သမိုင်း ကြောင်းများအရ ပါဝင်ခဲ့ရကြောင်း၊ သမိုင်းကြောင်းအရ၊ ဖြစ်ပေါ်နေသည့် အခြေအနေများအရ တပ်မတော် အနေ ဖြင့် နိုင်ငံရေး ဦးဆောင်မှု အခန်းကဏ္ဍတွင် ဆက်လက် ပါဝင်နေရဦးမည်ဟုလည်း ဗိုလ်ချုပ်မှူးကြီး မင်းအောင် လှိုင်က ပြောကြားခဲ့သည်။

မြန်မာနိုင်ငံတွင် တပ်မတော်သည် တိုင်းဒေသကြီးနှင့်ပြည်နယ် လွှတ်တော်အသီးသီး အပါအဝင် ပြည်သူ့ လွှတ် တော်၊ အမျိုးသားလွှတ်တော်တို့မှာ တပ်မတော်သား ကိုယ်စားလှယ် ၂၅ ရာခိုင်နှုန်း ရွေးကောက်ပွဲ ဝင်စရာမလိုဘဲ ၂၀၀၈ ဖွဲ့စည်းပုံအခြေခံဥပဒေကနေ ရရှိထားသည်။

အဆိုပါ ကိုယ်စားလှယ် ရာခိုင်နှုန်းကို လွှတ်တော်ကနေ ထွက်ခွာပေးရန် သို့မဟုတ် အဆင့်တစ်ခု လျှော့ချပေးရန် တိုင်းရင်းသား လက်နက်ကိုင် အဖွဲ့အစည်းများ၊ နိုင်ငံရေးပါတီများက တောင်းဆိုထားကြသည်။

တပ်မတော်သားများ လွှတ်တော်ထဲ ပါဝင်မှုကို အမှန်တကယ် လျှော့ချလိုစိတ်ရှိပါက အစိုးရနှင့် နိုင်ငံတော်၏ အမြင့်ဆုံး အာဏာအား ရွေးကောက်ခံ အရပ်သားအစိုးရ ခေါင်းဆောင်ပိုင်းများက ပိုင်ဆိုင်၍ ထိန်းချုပ်ခြင်း ပေါ်လစီဖြင့် သွားမည်ဆိုပါက ဖြစ်နိုင်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။ 

လက်နက်ကိုင်များ၊ တပ်မတော်-အစိုးရ ခေါင်းဆောင်များကို တွေ့ရစဉ်

၎င်းက “Civilian Supremacy (အစိုးရနှင့် နိုင်ငံတော်၏ အမြင့်ဆုံး အာဏာကို စစ်တပ်မဟုတ်ဘဲ အရပ်သား ခေါင်းဆောင်များကသာ ပိုင်ဆိုင်ပြီး ထိန်းချုပ်ခြင်း)‌ပေါ့။ ဒီမိုကရေစီရဲ့ အနှစ်သာရဖြစ်တဲ့ အရပ်ဘက် အုပ်ချုပ်ရေး အရပ်သားတွေ အစိုးရအောက်မှာ လက်နက်ကိုင်တွေ ရှိရမယ်ဆိုရင်တော့ Civilian Supremacy ကို လိုက်နာမယ် ဆိုရင်တော့ လက်နက်ကိုင်တပ်ဖွဲ့တွေ အားလုံးက အရပ်သားဖြစ်တဲ့ ကာကွယ်ရေးဝန်ကြီး အောက်မှာ ရှိရမယ်။ အဲဒီ ကာကွယ်ရေးဝန်ကြီးအောက်မှာမှ တပ်ကိုအုပ်ချုပ်တဲ့ တပ်ဗိုလ်တပ်မှူးတွေက ရှိတာကို။ သူတို့က နိုင်ငံရေး ကို တိုက်ရိုက်မပါဘဲနဲ့ တပ်ကနားပြီးတော့ အရပ်သားဖြစ်တော့မှ ကာကွယ်ရေးဝန်ကြီး လုပ်ရင်လည်း လုပ်ပေါ့လေ နိုင်ငံရေးပါတီကနေ။ မလုပ်နိုင်ဘူးဆိုရင် အရပ်ဘက် Civilian Supremacy အရ ကာကွယ်ရေးဝန်ကြီးက အရပ် သား ဖြစ်ရမယ်၊ အရပ်သား ကာကွယ်ရေးဝန်ကြီးအောက်မှာ လက်နက်ကိုင် တပ်ဖွဲ့တွေ ရှိမယ်ဆိုရင်တော့ လွှတ်တော်နိုင်ငံရေးမှာ ဆက်ပါဖို့ မလိုတော့ဘူးပေါ့။ Professional army ဖြစ်သွားမှာပေါ့နော်။ တခြား အိန္ဒိယ army တို့လို၊ နီပေါတို့ ဘင်္ဂလားဒေ့ရှ် army တို့လို Professional army ဖြစ်သွားရင်တော့ Civilian Supremacy ကို လိုက်နာတဲ့အတွက် ပါဖို့မလိုတော့ဘူးပေါ့။ အဲဒီပေါ်လစီကို အဓိက ပြောရမှာဖြစ်ပါတယ်” ဟု ပြောသည်။

Civilian Supremacy policy ဆိုသည်မှာ နိုင်ငံရေး ဆုံးဖြတ်ချက်များ ချမှတ်ရာတွင်လည်းကောင်း၊ အစိုးရ အဖွဲ့အစည်းများ လည်ပတ်ရာတွင် လည်းကောင်း ရွေးကောက်ခံ အရပ်သား အစိုးရက အဆုံးအဖြတ်ပေးသော အခန်းကဏ္ဍမှ ပါဝင်ခြင်းဖြစ်ပြီး နိုင်ငံတော်၏ ကာကွယ်ရေး သို့မဟုတ် လုံခြုံရေးဆိုင်ရာ ကိစ္စများ၌ စစ်တပ်သည် အရပ်သားအစိုးရ၏ ဦးဆောင်မှုနှင့် ကြီးကြပ်မှုအောက်မှာ ရှိနေရမည် ဖြစ်သည်။

တစ်နည်းအားဖြင့် နိုင်ငံရေးအာဏာကို သေနတ်ဖြင့် ကိုင်ဆောင်သူများထက် မဲဆန္ဒရှင်များ၏ ဆန္ဒဖြင့် ရွေးချယ်ခံ ရသူများကသာ ထိန်းချုပ်ခွင့် ရှိသည်ဟူသော မူဖြစ်ပြီး ပေါ်လစီအား ခေတ်မီ ဒီမိုကရေစီ နိုင်ငံတိုင်းနီးပါး၌ အခြေခံ အုတ်မြစ်တစ်ခုဖြစ်ကြောင်း သိရသည်။

CNI News 
၂၀၂၅ ခုနှစ်၊ ဒီဇင်ဘာ ၁၆

နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ထံသို့ မြန်မာနိုင်ငံ ဆိုင်ရာ ပါကစ္စတန်သံအမတ်ကြီး H.E.Mr. Tariq Karim(မစ္စတာ တာရိခ် ကာရီးမ်)က သံအမတ် ခန့်အပ်လွှာကို ပေးအပ်ခဲ့သည်။

အဆိုပါ သံအမတ်ခန့်လွှာကို ၂၀၂၅ ခုနှစ်၊ ဒီဇင်ဘာ ၁၆ ရက်က နေပြည်တော်ရှိ သံတမန်ဆောင် ဧည့်ခန်းမ၌ ပေး အပ်ခဲ့ခြင်း ဖြစ်သည်။

ထို့နောက် ကုန်သွယ်ရေးကဏ္ဍ၊ စီးပွားရေးကဏ္ဍ၊ ကာကွယ်ရေးကဏ္ဍ၊ ကျန်းမာရေးကဏ္ဍ၊ နိုင်ငံရေးဆိုင်ရာကဏ္ဍ များတွင် ပူးပေါင်း ဆောင်ရွက်မှုများ မြှင့်တင်ရေးဆိုင်ရာကိစ္စရပ်များကို ဆွေးနွေးခဲ့ကြသည်။

အလားတူ ဘာသာရေးဆိုင်ရာနှင့် ခရီးသွားကဏ္ဍများတွင် ပူး‌ပေါင်းဆောင်ရွက်မှုများ မြှင့်တင်ရေးဆိုင်ရာကိစ္စရပ် များ၊ နိုင်ငံခြားရေးဝန်ကြီးဌာန အချင်းချင်း ပူးပေါင်းဆောင်ရွက်မှုများ မြှင့်တင်ဆောင်ရွက်သွားမည့် အခြေအနေ များ၊ မြန်မာနိုင်ငံ၌ မကြာမီ ကျင်းပမည့် ပါတီစုံဒီမိုကရေစီ အထွေထွေရွေးကောက်ပွဲသို့ ပါကစ္စတန်နိုင်ငံမှ ရွေးကောက်ပွဲစောင့်ကြည့်လေ့လာရေးအဖွဲ့များ စေလွှတ်ပေးသွားမည့် အခြေအနေများကိုလည်း ဆွေးနွေးခဲ့ကြသည်။

Mr. Tariq Karim(မစ္စတာ တာရိခ် ကာရီးမ်)သည် မြန်မာနိုင်ငံဆိုင်ရာ ပါကစ္စတန်သံအမတ်ကြီးအဖြစ် ယခင် သံအမတ်ကြီး H.E. Mr.Imran Haider ၏ နေရာမှာ အစားထိုး တာဝန်ယူခဲ့ခြင်း ဖြစ်သည်။

CNI News

၂၀၂၅ ခုနှစ်၊ ဒီဇင်ဘာ ၁၆

စစ်ကိုင်းတိုင်းဒေသကြီးအထက်ပိုင်း၊ ဟုမ္မလင်းမြို့နယ်၊ ထိန်ကုန်းကျေးရွာတွင် ဥရုချောင်းကြီးဒေသလုံးဆိုင်ရာ တိုင်းလျမ်(သျှမ်းနီ)ရိုးရာကောက်ဦးဆွမ်းကပ်လှူပူဇော်ပွဲနှင့် နှစ်သစ်ကူး အထိမ်းအမှတ်ပွဲတော်အား ၂၀၂၅ ခုနှစ်၊ ဒီဇင်ဘာ ၁၆ ရက်မှ ၁၈ ရက်ထိ ကျင်းပလျက်ရှိသည်။

အဆိုပါ ရှမ်းနီရိုးရာ ကောက်သစ်စားပွဲကို ထိန်ကုန်းကျေးရွာအုပ်စု ၁၉ အုပ်စု ပူးပေါင်း၍ ကျင်းပခဲ့ခြင်း ဖြစ်သည်။

ရှမ်းနီတိုင်းရင်းသားများသည် မြန်မာနိုင်ငံ၏ စစ်ကိုင်းတိုင်းဒေသကြီးနှင့် ကချင်ပြည်နယ်အတွင်းမှာ စုစည်းနေထိုင် ကြပြီး ၁၉၄၈ ခုနှစ်၊ ဇန်နဝါရီ ၄ ရက်နေ့ မြန်မာနိုင်ငံ လွတ်လပ်ရေးရပြီးနောက်ပိုင်း ရှမ်းနီနယ်မြေများ ၂ ပိုင်းခွဲခံ လိုက်ရသည့်အတွက် တစ်စုတစ်စည်းတည်း မရှိတော့ဘဲ ဖြစ်ပေါ်ခဲ့သည်။

ထို့နောက် ရှမ်းနီတိုင်းရင်းသားများသည် ရှမ်းပြည်နယ်ရရှိရေး တောင်းဆိုနေကြသော လူမျိုးဖြစ်သည်။

CNI News

၂၀၂၅ ခုနှစ်၊ ဒီဇင်ဘာ ၁၆

မြန်မာနိုင်ငံရေးတွင် ပါဝင် ပတ်သက်နေသူများ အနေဖြင့် နိုင်ငံရေးမူဝါဒများကို လက်လွတ်စပယ် မပြောသင့်ဘူး ဟု ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၂၀၂၅ ခုနှစ်၊ နိုဝင်ဘာ ၂၃ ရက်က ပြုလုပ်ခဲ့သော ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)၏ ဗဟို အလုပ်အမှုဆောင်များနှင့် သာကေတမြို့နယ် ပါတီဝန်းရံသူ မိတ်ဆွေများ တွေ့ဆုံပွဲတွင် ရုပ်ရှင်သရုပ်ဆောင် ဦးနေအောင်က တိုင်းပြည်ကို မငြိမ်အောင်လုပ်သည့် သူအားလုံးကို သတ်ရန် မီဒီယာတစ်ခုနှင့် အင်တာဗျူးလုပ်စဉ် ပြောကြားခဲ့သည်။

ထို့နောက် နိုင်ငံရေးလောကတွင် နိုင်ငံရေး မူဝါဒနှင့်ပတ်သက်ပြီး အရေးကြီးသည့် အရာများကို လက်လွတ်စပယ် မပြောသင့်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

 ဦးနေအောင်နဲ့ USDP ဥက္ကဋ္ဌ ဦးခင်ရီကို တွေ့ရစဉ်

၎င်းက “ကျနော်တို့ တကယ့် အရေးကြီးတဲ့ နိုင်ငံရေးမူဝါဒတွေနဲ့ ပတ်သက်ရင်တော့ လက်လွတ်စပယ်တွေ မပြော သင့်ဘူးလို့မြင်တယ်၊ တစ်ဘက်က ကျနော်တို့ အရင့်အရင်ကလည်းပဲ အကြမ်းဖက် အဖွဲ့အစည်းလို့ ကြေညာလိုက် ဆွေး နွေးလို့ အဆင်ပြေသွားရင် ပြန်ပြီးပယ်ဖျက်ပေးလိုက် အစရှိသဖြင့် ဒါပစ်လိုက် ဆွေးနွေးလိုက်ဆိုတဲ့ ဖြစ်စဉ် တွေက ကျနော်တို့ တလျှောက်လုံးလည်း ရှိခဲ့တယ်။ နိုင်ငံတွင်းမှာ ဖြစ်နေတဲ့ကိစ္စက မိသားစုတွင်း ပြဿနာပဲ အဲတော့ တစ်ယောက်ကို တစ်ယောက် အပြတ်ချေမှုန်းပစ်မယ်၊ သတ်ပစ်မယ်၊ ဖျက်ဆီးပစ်မယ်ဆိုတဲ့ကိစ္စက အနှစ် ၇၀ ကျော် ၈၀ နီးပါး ဖြစ်လာခဲ့ပြီ။ သို့သော် ဒါဟာ ကျနော်တို့ အကုန်လုံး ပြန်ပြီးတော့ စုစည်းရမယ်ဆိုတဲ့ အမြင်ကို တော့ မျက်ခြေပြက်လို့မရဘူး။ ပြဿနာက နိုင်ငံရေး ဖြေရှင်းမှုတွေ မအောင်မြင်လို့ ဒီလက်နက်ကိုင်ပဋိပက္ခက အနှစ် ၇၀ ကျော် ၈၀ ဖြစ်လာတာ ၁၉၆၂ ကတည်းကသာ ပြုပြင်ပြောင်းလဲမှုတွေ အောင်မြင်ခဲ့မယ်ဆိုရင် အာဏာ သိမ်းတဲ့ ပုံစံမျိုးနဲ့ မဖြေရှင်းဘဲနဲ့ နိုင်ငံရေးအရ ဖြေရှင်းနိုင်ခဲ့မယ်ဆိုရင် တချို့အကျိုးဆက်တွေက ဆက်မဖြစ်ဘူး။ ဟိုစစ်ရေးသပ်သပ်နဲ့ ဖြေရှင်းတာက ဘက်အသီးသီးပေါ့၊ လက်နက်ကိုင်နည်းနဲ့ ဖြေရှင်းတယ်ဆိုတဲ့ ကိစ္စဟာ တစ်ယောက်ကို တစ်ယောက် ပြုတ်သွားတဲ့အထိ ခြေမှုန်းနိုင်ခဲ့တဲ့အထိ မဖြစ်ခဲ့ဘူးဆိုတာ နှစ် ၇၀ ကျော် ၈၀ အတွေ့အကြုံတွေအရ အားလုံးခံစားခဲ့ပြီးသား ဖြစ်ပါတယ်”ဟု ပြောသည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)သည် တပ်မတော်မှလာသည့် သူများနှင့် ဖွဲ့စည်းထားသော ပါတီဖြစ်ပြီး ၎င်းသည်လည်း စစ်သားသားသမီး ဖြစ်သည့်အတွက် စစ်တပ်ကျေးဇူး ရှိ၍ USDP ပါတီကို ဝန်းရံနေ ခြင်း ဖြစ်သည်ဟု ရုပ်ရှင်သရုပ်ဆောင် ဦးနေအောင်က ပြောကြားခဲ့သည်။

၎င်းက “နိုင်ငံရေး အခင်းအကျင်းက တိုင်းပြည်ကို မငြိမ်အောင်လုပ်တဲ့ကောင် အကုန်သတ် သိဖို့။ တပ်မတော် မကာကွယ်ရင် အခုဆိုလူတွေ ဘဝပျက်ကုန်ပြီ။ ဒီပြည်ထောင်စုကြံ့ခိုင်ရေးနှင့်ဖွံ့ဖြိုးရေးအသင်းကို ချစ်တာ သူများ ဝတ်ခိုင်းလို့ မဟုတ်ဘူး၊ ချစ်လို့ဝတ်တာ။ ပြည်ခိုင်ဖြိုးသည် We Come From the military တပ်မတော်ကလာတဲ့ အဖွဲ့အစည်းများက လူတွေချည်းပဲ တပ်မတော် မကာကွယ်ရင် အခုဆိုလူတွေ ဘဝပျက်ကုန်ပြီ။ ဒါမပြောတော့ဘူး လေ၊ ကျနော်တို့လည်း စစ်သားသားသမီးလေ ယူနီဖောင်းမြင်ရင် ချစ်တယ်လေ၊ သေပေါ့ ဆဲတဲ့ကောင် သေကြ ပေါ့”ဟု ပြောသည်။ 

ဦးခင်ရီနဲ့ ဗိုလ်ချုပ်မှူးကြီးမင်း‌အောင်လှိုင်ကို တွေ့ရစဉ် 

ရုပ်ရှင်သရုပ်ဆောင် ဦးနေအောင်ကို USDP ပါတီ၏ ရန်ကုန်တိုင်းဒေသကြီးအတွင်းက မဲဆွယ်စည်းရုံးပွဲများ၊ ဆိုင်းဘုတ်တင်ပွဲများနှင့် USDP ကလုပ်သည့် အခမ်းအနားများတွင် မကြာခဏ မြင်တွေ့လာရသည်။

၂၀၂၁ ခုနှစ်၊ ဖေဖော်ဝါရီ ၁ ရက်က NLD အစိုးရသည် ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်က ဖြုတ်ချ၍ နိုင်ငံတော်အာဏာကို ရယူခဲ့သည်။

ထို့နောက် နိုင်ငံတော်အား အရေးပေါ် အခြေအနေ ကြေညာ၍ အုပ်ချုပ်လာခဲ့ရာ ယနေ့ ၂၀၂၅ ခုနှစ်အထိပင် ဖြစ်သည်။

ထို့ကြောင့် မြန်မာ့တပ်မတော်က ၂၀၂၅ ခုနှစ်၊ ဒီဇင်ဘာ ၂၈ ရက်တွင် ရွေးကောက်ပွဲ အပိုင်း(၁)ကိုလည်းကောင်း၊ ၂၀၂၆ ခုနှစ်၊ ဇန်နဝါရီ ၁၁ ရက်၌ ရွေးကောက်ပွဲ အပိုင်း(၂)ကိုလည်းကောင်း၊ ဇန်နဝါရီလ နောက်ဆုံးပတ်မှာတော့ ရွေးကောက်ပွဲအပိုင်း(၃)ကိုလည်းကောင်း ကျင်းပမည်ဖြစ်သည်။

အဆိုပါ ရွေးကောက်ပွဲတွင် အနိုင်ရရှိသည့် နိုင်ငံရေးပါတီကို နိုင်ငံတော်အာဏာ လွှဲပြောင်းပေးမည်ဖြစ်ပြီး တပ်မတော်က ကာကွယ်ရေးတာဝန်ကိုသာ ထမ်းဆောင်မည်ဟု ဗိုလ်ချုပ်မှူးကြီးမင်းအောင်လှိုင်က ပြောသည်။

CNI News

၂၀၂၅ ခုနှစ်၊ ဒီဇင်ဘာ ၁၆

လက်ရှိအချိန်တွင် ထိုင်းနိုင်ငံရှိ ကမ္ဘာဒီးယား ရွှေ့ပြောင်းလုပ်သားများ မရှိတော့သည့်အတွက်ကြောင့် ထိုင်းနိုင်ငံ ရောက် မြန်မာ‌ရွှေ့ပြောင်း အလုပ်သမားများကို အားထားနေရသည့် အခြေအနေဖြစ်နေသည်ဟု  ရွှေ့ပြောင်း အလုပ်သမားအရေး‌ ဆောင်ရွက်ပေးနေသူ ဦးအောင်ကျော်မှ CNI သတင်းဌာနသို့ ပြောသည်။ 

ထိုင်းအလုပ်သမားဝန်ကြီးဌာနက မြန်မာ၊ ဗီယက်နမ်၊ လာအို နိုင်ငံ ၃ နိုင်ငံမှ အထောက်အထားမဲ့ နိုင်ငံခြားသား ရွှေ့ပြောင်း အလုပ်သမားများအတွက် ပန်းရောင်ကဒ် အထောက်အထားသစ်လုပ်ရန် နာမည်စာရင်း တင်သွင်း သည့် လုပ်ငန်းစဥ်ကို ဒီဇင်ဘာ ၁၂ ရက်မှ ၂၆ ရက်နေ့အထိ ပြုလုပ်ရန် ခွင့်ပြုထားသည်။

အဆိုပါ အထောက်အထားမဲ့ ရွှေ့ပြောင်း အလုပ်သမားများအတွက် ပန်းရောင်ကဒ်သစ်သည် Work permit နှင့် ဗီဇာရပြီးလျှင် တစ်နှစ် နေထိုင် အလုပ်လုပ်ခွင့် ရရှိမှာဖြစ်ပြီး ထိုပန်းရောင်ကဒ် ပြုလုပ်ရန်အတွက် ကုန်ကျစရိတ် သည် အနည်းဆုံး ဘတ် ၅၀၀၀ မှ ဘတ် ၈၀၀၀ အထိရှိကြောင်း သိရသည်။   

ထိုင်းနှင့် ကမ္ဘောဒီးယားအကြား စစ်ရေးပဋိပက္ခများကြားတွင် ထိုင်းနိုင်ငံ၏ ကုန်ထုတ်လုပ်မှုစွမ်းအား မနှောင့်နှေး စေရန် ထိုင်းအစိုးရမှ မြန်မာရွှေ့ပြောင်းများကို အားထားရသည့် အခြေအနေရှိသည်ဟု ရွှေ့ပြောင်းအလုပ်သမား ရေး ဆောင်ရွက်ပေးနေသည့် ဦးအောင်ကျော်မှ CNI သတင်း ဌာနသို့ ပြောသည်။  

ပန်းရောင်ကဒ် ကိုင်ထားတဲ့ ရွှေ့ပြောင်းများကိုတွေ့ရစဉ် 

၎င်းက “အဲလို သုံးသပ်မယ်ဆို သုံးသပ်လို့ရပါတယ် ခင်ဗျ။ ဘာလို့ဆို ကျနော် ခုနက ပြောခဲ့သလိုပဲ နိုင်ငံခြားသား အလုပ်သမား မြန်မာ၊ ကမ္ဘောဒီးယား၊ လာအို၊ ဗီယက်နမ်ဆိုပေမယ့် တကယ်တမ်းကျတော့ လူဦး‌ရေ သန်းနဲ့ချီပြီး ရှိနေတာ မြန်မာဖြစ်နေပါတယ်။ အဲတော့ အခု ကမ္ဘောဒီးယား ဒုတိယနေရာမှာ ရောက်ရှိနေပါတယ်။ ဒုတိယ နေရာမှာ ရောက်ရှိနေတဲ့ လုပ်သားတွေအားလုံးကို သူတို့က ပဋိပက္ခအသွင်ကြောင့် အားလုံးပစ်ပယ်လိုက်ပြီ ဖြစ်တဲ့ အတွက်ကြောင့် မြန်မာကိုပဲ အဓိက ဦးစားပေးမှာ ဖြစ်ပါတယ်။ အိမ်နီးနားချင်းနို င်ငံဖြစ်တဲ့ ကမ္ဘောဒီးယားနဲ့ သူတို့ နဲ့ကလည်း ပဋိပက္ခ အခြေအနေ ဆောင်နေတော့ လုပ်သားဦးရေက ကမ္ဘောဒီးယားတွေကလည်း အလုံးအရင်း နဲ့ အိမ်ကို ပြန်သွားကြပြီ အဲတော့ လစ်လပ်နေတဲ့ နေရာတွေမှာ သူ့ရဲ့ကုန်ထုတ်လုပ်မှု စွမ်းအားတွေ မြှင့်တင်နိုင်ဖို့ အတွက် ကျနော်တို့ ကျန်နေခဲ့တဲ့ နိုင်ငံသား သုံးမျိုးပေါ့။ အရင်တုန်းက သူတို့ထုတ်ပြန်ရင် လေးမျိုးကြေညာတယ် မြန်မာ၊ ကမ္ဘောဒီးယား၊ လာအို၊ ဗီယက်နမ်လို့ သူက သုံးတာ။ ဒီတစ်ခါတော့ မြန်မာရယ်၊ လာအိုရယ်၊ ဗီယက်နမ် ရယ်ကို ထိုင်းနိုင်ငံထဲမှာ အကြောင်းကြောင်းကြောင့် ရောက်ရှိနေပြီး အထောက်အထား မရှိတာသော်လည်း ကောင်း၊ စာရွက်စာတမ်း ဗီဇာတွေ သက်တမ်းတိုးမရလို့ ရပ်တန့်နေတာ သော်လည်းကောင်း၊ အဲလို ပုဂ္ဂိုလ်တွေ အားလုံးကို အထောက်အထားသစ်တွေ ပြန်လည် ပြုလုပ်ပေးမယ်ဆိုပြီးမှ ဒီဇင်ဘာ ၁၂ ကနေ ၂၆ အထိ ၁၅ ရက် အတွင်းမှာ ပြုလုပ်ဖို့ စာရင်းတင်သွင်းဖို့ကို ကြေညာလိုက်တာ ဖြစ်ပါတယ်” ဟု ပြောသည်။

ထိုင်းနိုင်ငံအတွင်းရှိ တရားမဝင် အထောက်အထားမဲ့ မြန်မာရွှေ့ပြောင်း အလုပ်သမားများအနေဖြင့် ပန်းရောင် ကဒ်(ဘတ်) အထောက်အထားသစ်ကို  လုပ်ဆောင်ထားသင့်ကြောင်း၊ ထိုင်းတွင် လုပ်သား လိုအပ်ချက်များ ကြောင့် မြန်မာကို ဦးစားပေးသည့် အခြေအနေဟု ရွှေ့ပြောင်းအလုပ်သမားရေး ဆောင်ရွက်ပေးနေသည့် ဦးမင်းဦး မှ CNI သတင်းဌာနသို့ ပြောသည်။ 

ပန်းရောင်ကဒ် ကိုင်ထားတဲ့ ရွှေ့ပြောင်းများကိုတွေ့ရစဉ် 

၎င်းက “တရားမဝင် အထောက်အထား ပျောက်နေတဲ့လူတွေ ဒါမှမဟုတ် မရှိတဲ့လူတွေကတော့ လုပ်ထားသင့် တာပေါ့။ ဒါက သက်တမ်း သူသတ်မှတ်ထားတဲ့ ကာလ ကျော်သွားပြီဆိုလို့ရှိရင် လုပ်လို့မရတော့ဘူးလေ၊ အဲတော့ တရားမဝင် ကိုယ့်မှာ အထောက်အထား ဘာမှမရှိဘူးဆိုရင် တရားမဝင် ဖြစ်သွားပြီပေါ့။ အဲတော့ လုပ်ထားတာ ကတော့ ကိုယ့်အတွက် အကောင်းဆုံးပေါ့။ ဒါကို ဗီဇာနဲ့ပြောမယ်ဆို work permit ပေါ့ဗျာ၊ အလုပ်လုပ်ခွင့် တစ်နှစ် ရမှာပေါ့။ လက်ရှိကတော့ သူက ပြောရရင်တော့ဗျာ ထိုင်းအစိုးရက သူတို့က လုပ်သားလိုတယ်ပေါ့၊ နောက် ကမ္ဘောဒီးယားနဲ့ အခု ပြဿနာတက်တဲ့ အခါကျ‌တော့ အဲဒီထွက်သွားတဲ့ လူတွေနေရာမှာ အစားထိုးဖို့လိုတယ်။ နောက် အရင်ထဲကလည်း ဒီ လုပ်သား လိုအပ်ချက်တွေရှိလို့လည်း သူတို့က အသစ်ခေါ်ဖို့ကတော့ ပထမ သူတို့ စဥ်းစားတာတော့ MOU တို့ ဘာတို့နဲ့ အဲလိုပေါ့။ အဲ့တာ ကျန်တဲ့နိုင်ငံတွေနဲ့ နိုင်ငံတွေကနေ ‌ခေါ်မယ်ဆိုလို့ရှိရင် ဘယ်လိုခေါ်မလဲ အဆင့်အဆင့်တွေ ဖြတ်ရမှာဆိုတော့ သိပ်အဆင်မပြေနေဘူးပေါ့။ အဲဒါကြောင့်မို့လို့ ဒီအထောက်အထား မရှိတဲ့သူတွေ အမှန်တော့ ဒါက ကျန်ခဲ့တဲ့အခေါက်က ခေါ်လိုက်ပြီးသားပဲ။ ကျန်ခဲ့တဲ့လက ပေါ့၊ သို့သော် ဒီ Work Permit ကို အွန်လိုင်းကနေတဆင့် လျှောက်လို့ရအောင်၊ အဲ့ဒါလုပ်တဲ့စနစ်က စလုပ်တာ ဖြစ်တဲ့ အတွက်ကြောင့် အဲ့မှာ ပြဿနာတက်တယ်။ ပြဿနာတက်တော့ သူတို့က ရပ်လိုက်ရတယ်၊ ရပ်ပြီးတော့မှ အခုတစ်ခါ ဒါကိုပြန်ပြီးတော့ သူတို့လုပ်ပြီးတော့ ပြန်ဖွင့်ပေးတာ‌ပေါ့။ ၁၂ ကနေ ၂၆ ရက်နေ့အထိ အဲ့အတော အတွင်းမှာ လုပ်ရမှာ” ပြောသည်။ 

ထိုင်းနိုင်ငံတွင် မြန်မာနိုင်ငံသား ရွှေ့ပြောင်း တရားဝင် ၆ သန်းရှိသလို တရားမဝင် ၄ သန်းရှိကြောင်း လူဝင်မှု ကြီးကြပ်ရေး စာရင်းများနှင့် အထောက်အထားများအရ သိရသည်။

CNI News

၂၀၂၅ ခုနှစ်၊ ဒီဇင်ဘာ ၁၆

မြန်မာနိုင်ငံ နယ်စပ်ဒေသများ၌ မြင်တွေ့နေရသည့် ကျားဖြန့်ပြဿနာများ ဖြေရှင်းနိုင်ရေးအတွက် ဖက်ဒရယ် နိုင်ငံကို အမြန်ဆုံး တည်ဆောက်နိုင်ရေး ဝိုင်းဝန်းကြိုးပမ်းရန်လိုကြောင်း စစ်ရေးနှင့်နိုင်ငံရေး အကဲခတ်များက CNI သတင်းဌာနသို့ ပြောသည်။

မြန်မာနိုင်ငံတွင် မူးယစ်ဆေးဝါး အမျိုးမျိုး အပါအဝင် ကျားဖြန့်ဆိုသော အွန်လိုင်းငွေလိမ်ဂိုဏ်းများ ပိုမိုများပြား လာနေခြင်းသည် ၁၉၄၇ ခုနှစ်က သဘောတူညီခဲ့ကြသည့် ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးကို မလုပ်ဆောင် နိုင်ခဲ့သည့် အကျိုးတစ်ခုဖြစ်ကြောင်း ငြိမ်းချမ်းရေးလုပ်ငန်းစဉ်မှာ ပါဝင်လုပ်ဆောင်နေသူ ဦးခွန်းဆိုင် က CNI သတင်းဌာနသို့ ပြောသည်။

၎င်းက “ရိုးရိုးကြည့်လိုက်ရင်တော့ အကြမ်းမျင်း မြင်သာတာကို ကြည့်မယ်ဆိုရင် ပထမဆုံးကတော့ ဘိန်း၊ ဘိန်း ကုန်ကူးပြီးတော့မှ အင်အားစုတာပေါ့။ နောက်ကြ ဘိန်းတင်မကဘူး heroin လုပ်ပြီးတော့မှ အင်အားစုတာပေါ့။ နောက်ဆုံးကြတော့ ရာဘတွေ ဘာတွေပေါ်လာပြီးတော့မှ အဲဒီကနေ အင်အားစုတာပေါ့။ နောက်ဆုံးအခု ပေါ်လာ တဲ့ ကျားဖြန့်တွေဟာ နောက်ဆုံးပေါ်ပေါ့။ ဒီတော့ ကျ‌နော်တို့ရဲ့ နိုင်ငံရေးအရ သဘောတူညီချက် မူလ သဘော တူညီချက်တွေကို ပြန်ပြီး အကောင်အထည် မဖော်နိုင်သမျှ ဒီလိုအကျိုးဆက်တွေက ဆက်ဖြစ်နေမှာပဲ။ ဘိန်းက သိပ်ဆိုးတယ်၊ ဘိန်းထက် ပိုဆိုးတာက heroin ဖြစ်တယ်၊ heroin ထက် ပိုဆိုးတာက ရာဘ၊ ရာဘထက် ပိုဆိုးတာ က အခုကျားဖြန့် ဖြစ်တယ်။ ဒါကို ဒီတိုင်းပဲ လွှတ်ထားမယ်ဆိုရင် ကျားဖြန့်ထက် ပိုဆိုးတဲ့ အရေးအခင်း ထပ်ပေါ် လာ နိုင်တယ်။ ဒါကြောင့် အဲဒီအခြေအနေ မရောက်ခင် ကျနော်တို့ ၁၉၄၇ က ကျနော်တို့ သဘောတူထားပြီးတဲ့ ဖက်ဒရေးရှင်း၊ ဖက်ဒရယ်နိုင်ငံကို အမြန်ဆုံး တည်ဆောက်နိုင်အောင် ဝိုင်းဝန်းကြိုးပမ်းဖို့ လိုပါတယ်” ဟု ပြော သည်။

ကရင်နယ်ခြားစောင့်တပ်(BGF)၏ အထွေထွေအတွင်းရေးမှူး စောချစ်သူနဲ့ ဗိုလ်ချုပ်မှူးကြီးမင်းအောင်လှိုင် ကို တွေ့ရစဉ်

မြန်မာနိုင်ငံမြောက်ပိုင်းတွင် တရုတ်၏ ကျောထောက်နောက်ခံ ပြုမှုကြောင့် ကျားဖြန့်နှိမ်နင်းရေးဟုဆိုကာ ပေါ်ထွက်လာသည့် ၁၀၂၇ စစ်ဆင်ရေးပြီးနောက် ၂၀၂၅ ခုနှစ် အစတွင် ကရင်ပြည်နယ်မှ ကရင်နယ်ခြားစောင့်တပ် (BGF)၊ ဒီမိုကရေစီအကျိုးပြု ကရင်တပ်မတော် (DKBA)တို့နှင့် တပ်မတော် ပူးပေါင်းကာ မြဝတီမြို့နယ်ထဲက ရွှေကုက္ကိုအခြေစိုက် ကျားဖြန့်လုပ်ငန်းများကို စီးနင်းခဲ့ကြသည်။

ဇန်နဝါရီ ၃၀ ရက်ကနေ နိုဝင်ဘာ ၁၁ ရက်အထိ မြန်မာနိုင်ငံကို တရားမဝင် ရောက်လာသည့် နိုင်ငံခြားသား ၁၀,၈၁၅ ဦးကို ဖော်ထုတ်ပြီး ၉,၅၃၆ ဦးကို ထိုင်းနိုင်ငံကနေ နေရပ်ပြန်ပို့ထားကြောင်းလည်း သိရသည်။

ထို့ပြင် မကြာသေးမီက သောင်ရင်းမြစ်ကမ်းဘေး မယ်ထော်သလေးကျေးရွာ အနီးမှာ တည်ရှိသည့် KK Park ကို အောက်တိုဘာ ၁၉ ရက်ညပိုင်းမှာ တပ်မတော်က အင်အားအလုံးအရင်းဖြင့် ဝင်ရောက်စီးနင်းခဲ့ပြီး အဆောက်အဦ ထဲက အလုပ်သမားများအား ဖမ်းဆီးသကဲ့သို့ ပစ္စည်းများကိုလည်း သိမ်းဆည်းခဲ့သည်။

KK Park သည် KNU ၏ Mulaei(မုလအိ) ကုမ္ပဏီနှင့် ထိုင်းကုမ္ပဏီတို့ ပူးပေါင်းပြီး မြေငှားရမ်း လုပ်ကိုင်သည်ဟု စွပ်စွဲထားသော်လည်း KNU ကတော့ စွပ်စွဲချက်အားလုံးကို ငြင်းဆိုထားသည်။

ကျားဖြန့်နှိမ်နင်းရေး ထိုင်းဘက်ကနေ တရုတ်ပြည်ထဲရေးဝန်ကြီးလေ့လာနေစဉ်

ကရင်ပြည်နယ် တည်ငြိမ်အေးချမ်းမှု ပျက်ယွင်းအောင် လုပ်ဆောင်နေသူများသည် ကရင်ပြည်နယ်အတွင်းရှိ လက်နက်ကိုင် အဖွဲ့အစည်းများပင်ဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က‌ ၂၀၂၅ ခုနှစ်၊ နိုဝင်ဘာ ၁၅ ရက် နေ့က ကရင်ပြည်နယ်၊ ဘားအံမြို့ရှိ ပြည်နယ်အဆင့် ဌာနဆိုင်ရာ တာဝန်ရှိသူများနှင့် ရပ်မိရပ်ဖများအား တွေ့ဆုံ စဉ် ပြောကြားခဲ့သည်။

ယခုကဲ့သို့ ကျားဖြန့်လုပ်ငန်းများ မြန်မာနိုင်ငံ နယ်စပ်ဒေသများ၌ အင်အား ကြီးထွားလာခြင်းသည် နိုင်ငံမတည်ငြိမ် မှုနှင့် ဥပဒေစိုးမိုးရေး မရှိသည့်အတွက်ဖြစ်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

၎င်းက “နောက်ပြီးတော့ တည်ငြိမ်အေးချမ်းမှု မရှိဘူးပေါ့။ နိုင်ငံရေး မတည်ငြိမ်ဘူးပေါ့ အရေးကြီးဆုံးက။ နိုင်ငံ‌ရေး တည်ငြိမ်မှု မရှိခြင်းကလည်း rule of law လို့ခေါ်တဲ့ ဥပဒေစိုးမိုးရေးမရှိဘူး။ rule of law မရှိတဲ့အပေါ်မှာ မသမာမှု တွေ၊ မတရားလုပ်တဲ့ အမှုတွေ၊ မူးယစ်အမှုတွေ အဲဒီလိုလုပ်ချင်တဲ့လူတွေ အတွက်က အခွင့်ကောင်း အခါကောင်း ဖြစ်သွားတာပေါ့။ သက်ဆိုင်ရာ အုပ်ချုပ်တဲ့လူတွေက ကြပ်ကြပ်မတ်မတ် အချိန်ပေးပြီးတော့ မကာကွယ် မစောင့် ရှောက်နိုင်တဲ့ အခါကြတော့ ပြည်သူလူထုက အဲဒီဒဏ်ကို ခံရတယ်။ ဒီလိုအချောင်သမား၊ ဒီလုပ်ငန်းမျိုးမှာ ကျွမ်းကျင်တဲ့ လူတွေပေါ့။ ဒီလုပ်ငန်းမျိုးမှာ ဝင်ငွေရှာနေတဲ့ လူတွေကြတော့ တိုင်းပြည်မတည်ငြိမ်လေ တောမီး လောင် တောကြောင် လက်ခမောင်းခတ်ဆိုသလို ဖြစ်လာတဲ့ သဘောပါပဲ။ အဲဒါကြောင့် တည်ငြိမ်အေးချမ်းတဲ့ တိုင်းပြည်ထူထောင်ဖို့အတွက်လည်း ခေါင်းဆောင်တွေရဲ့ အမျှော်အမြင်နဲ့ သဘောထားကြီးမှုနဲ့ ဉာဏ်ပညာနဲ့ အားလုံး သက်ဆိုင်ပါတယ်လို့ နိဂုံးချုပ် ပြောချင်ပါတယ်”ဟု ပြောသည်။

၂၀၂၅ ခုနှစ်၊ နိုဝင်ဘာလလယ် ရောက်ချိန်တွင် ကျားဖြန့်နှိမ်နင်းရေး အရွေ့များ ပိုမြင်သာလာကြောင်း၊ ထိုင်းနိုင်ငံ ကလည်း ဘန်ကောက်မြို့မှာ ဖမ်းမိထားသည့် ကျားဖြန့်ဂိုဏ်းခေါင်းဆောင် ရှီကျီကျန်းကို တရုတ်ထံ လွှဲပြောင်း ပေးခဲ့သည်။