CNI News

၂၀၂၅ ခုနှစ်၊ ဒီဇင်ဘာ ၃၀

ရွေးကောက်ပွဲအပြီး လွှတ်တော်ပေါ်လာခဲ့လျှင် နိုင်ငံရေးအရ ပြည်သူလူထုအား ဝန်ထုတ်ဝန်ပိုးဖြစ်စေသည့် ဒီမို‌ ကရေစီ နိုင်ငံရေးနှင့် သွေဖယ်နေသော ဥပဒေများကို ပြင်ဆင်ရန်လိုကြောင်း ရန်ကုန်တိုင်းဒေသကြီး၊ ဒေါပုံမြို့ နယ်မှ ဝင်ရောက်ယှဉ်ပြိုင်မည့် တစ်သီးပုဂ္ဂလ ကိုယ်စားလှယ်လောင်း ဦးကျော်ထက်က CNI သတင်းဌာနသို့ ပြောသည်။

ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကြီး ဖြစ်ပေါ်လာစေရေးအတွက် ပါတီစုံဒီမိုကရေစီ စနစ် ရှင်သန်ရေးသည် အလွန်အရေးကြီးကြောင်း ဗိုလ်ချုပ်မှူးကြီးမင်းအောင်လှိုင်က ၂၀၂၅ ခုနှစ်၊ ဒီဇင်ဘာ ၁၀ ရက်တွင် ဗိုလ်‌လောင်းသင်တန်း အမှတ်စဉ် ၂၆ သင်တန်းဆင်း ဂုဏ်ပြုစစ်ရေးပြ အခမ်းအနား၌ ပြောကြားခဲ့သည်။

ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကြီး တည်ဆောက်ရာတွင် အခြားနိုင်ငံများ၏ ပုံစံ ကို ပုံတူကူးပြီး ကျင့်သုံးခြင်းမျိုး မဟုတ်ဘဲ မိမိတို့ နိုင်ငံနှင့်ကိုက်ညီသည့် ဒီမိုကရေစီစနစ်နှင့် ဖက်ဒရယ်စနစ်ကို ဖော်ဆောင်ရန် အရေးကြီးကြောင်း ၎င်းက ပြောကြားခဲ့ခြင်းဖြစ်သည်။

ရွေးကောက်ပွဲအပြီး လွှတ်တော်ပေါ်လာခဲ့လျှင် မလိုလားအပ်သည့် ထုတ်ပြန်ချက်များနှင့် ဥပဒေများကို ပြန်လည် ပြင်ဆင်သင့်ကြောင်းအဆိုကို ဒီမိုကရေစီနိုင်ငံရေးသမားများအားလုံးက တင်လိမ့်မည်ဟု မျှော်လင့်ကြောင်း ရန် ကုန်တိုင်းဒေသကြီး၊ ဒေါပုံမြို့နယ်မှ ဝင်ရောက်ယှဉ်ပြိုင်မည့် တစ်သီးပုဂ္ဂလကိုယ်စားလှယ်လောင်း ဦးကျော်ထက် က CNI သတင်းဌာနသို့ ပြောသည်။

 ဒီမိုကရေစီ တောင်းဆိုနေကြစဉ် 

၎င်းက “ဒါရွေးကောက်ပွဲအပြီးမှာ လွှတ်တော် ပေါ်ပေါက်လာမယ်ပေါ့။ လွှတ်တော် ပေါ်ပေါက်လာခဲ့လို့ရှိရင် နိုင်ငံရေးအရ လွတ်လပ်မှုမရှိတဲ့ ဥပဒေတွေပေါ့၊ ပြင်ဖို့အတွက်လည်း ဒါတောင်းဆိုရမှာပေါ့။ ပါတီတွေကို ဒီလို ကန့်သတ်တာတွေ လွှတ်တော်ရဲ့ ဆန္ဒနဲ့အညီပေါ့။ အားလုံးကနေ တောင်းဆိုမယ်ဆိုရင်တော့ ဒါပြင်လို့ရနိုင်မယ့် အနေအထားတွေ ဖြစ်မှာပေါ့။ ဒီလက်ရှိ အစိုးရကနေပြီးတော့ပဲ အားလုံးကို ရွေးကောက်ပွဲ ကျင်းပဖို့အတွက် ခေါ်ဆောင်တဲ့ သဘောကို တွေ့ရတဲ့အတွက် သူတို့ပုံဖော်ချင်တဲ့ လမ်းကြောင်းအတိုင်း ပုံဖော်တာကို တွေ့ရတာ ပေါ့။ နိုင်ငံရေးနဲ့ ပိုပြီးနိုင်ငံရေးဆန်တဲ့ စည်းရုံးဟောပြောမှု ပုံစံတွေ၊ ဥပဒေတွေ၊ ရွေးကောက်ပွဲ ဥပဒေတွေရော ပြန်ပြင်ရဖို့ လိုမယ်။ ရွေးကောက်ပွဲ စနစ်တွေလည်း လိုအပ်ရင် ပြန်ပြင်ရဖို့လိုမယ်။ ဖွဲ့စည်းပုံအခြေခံဥပဒေထဲမှာ ဆိုရင် ပြင်ဖို့အချက်တွေ အများကြီး ရှိပြီးသားကို နိုင်ငံရေးအရ ပြည်သူလူထုကို ဝန်ထုတ်ဝန်ပိုး ဖြစ်စေတဲ့ ဒီမို‌ကရေစီ နိုင်ငံရေးနဲ့ နည်းနည်း သွေဖယ်နေတဲ့ ဥပဒေတွေဆိုရင် ပြန်ပြင်ဖို့လိုတာပေါ့။ ကြိုးနီစနစ် အကြွင်း အကျန် ဥပဒေတွေ၊ ကျနော်တို့ မလိုလားအပ်တဲ့ ထုတ်ပြန်ချက်တွေနဲ့ ဥပဒေတွေကို ပြန်လည် ပြင်ဆင်သင့် ကြောင်း အဆိုကို ကျနော် အပါအဝင်၊ ဒီမိုကရေစီ နိုင်ငံရေးသမားတွေရော၊ တိုင်းရင်းသား နိုင်ငံရေးသမားတွေရော တင်လိမ့်မယ်လို့ ကျနော်မျှော်လင့်ပါတယ်”ဟု ပြောသည်။

ပါတီစုံဒီမိုကရေစီစနစ် စတင် ကျင့်သုံးပြီးနောက်ပိုင်းတွင် အချို့နိုင်ငံရေးကိစ္စများ၌ အစိုးရနှင့် တပ်မတော်ကြား သဘောထား မတိုက်ဆိုင်မှုများရှိခဲ့ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ဒီမိုကရေစီကို ဆန့်ကျင်သည့် ဥပဒေက နိုင်ငံတိုင်းတွင်ရှိပြီး၊ နိုင်ငံတစ်ခုတွင် ဒီမိုကရေစီစံနှုန်းနှင့် ပြည့်စုံသည့် ဥပဒေများရှိရှိ ပြည်သူလူထုအတွက် အသုံးမချနိုင်ဘူးဆိုလျှင် အလကားပဲဟု ရန်ကုန်စောင့်ကြည့်အဖွဲ့တည် ထောင်သူ ဒေါက်တာညိုညိုသင်းက CNI သတင်းဌာနသို့ ပြောသည်။

 ဒီမိုကရေစီ တောင်းဆိုနေကြစဉ် 

၎င်းက “ဒီမိုကရေစီကို ဆန့်ကျင်တဲ့ ဥပဒေက နိုင်ငံတိုင်းမှာ ရှိတာနော်။ ဒီနိုင်ငံမှာလည်း ရှိတာပဲ။ ဒါပေမယ့် အသုံး ချတဲ့ သူတွေပေါ်မှာ အများကြီး မူတည်တယ်။ ဘယ်လောက်ပဲ ဒီမိုကရေစီစံနှုန်းနဲ့မညီတဲ့ ဥပဒေတွေ ဖြစ်နေပါစေ ပေါ့နော်။ အဲ့ဒီထဲမှာ ထွက်ပေါက်ဆိုတာရှိတယ်။ အဲ့ဒီ ထွက်ပေါက်တွေကို ဥပဒေကို အသုံးချသူတွေက ပြည်သူ လူထု အကျိုးပြုဖို့ အတွက်ကို ရည်ရွယ်ပြီးတော့ အသုံးချနိုင်စွမ်းရှိရင် ရှိသလို အဲ့ဒီဥပဒေက ပြည်သူလူထုကို ဖိနှိမ့်တဲ့ဥပဒေ။ ဘယ်လောက်ပဲ ဒီမိုကရေစီဆန်တဲ့ဥပဒေ ပြဋ္ဌာန်းထား ပြဋ္ဌာန်းထား၊ ဥပဒေကို ကိုင်တွယ် အသုံးချ တဲ့သူတွေက ဒီမိုကရေစီ ယဥ်ကျေးမှုကို အားမပေးဘူး။ ဒီမိုကရေစီရဲ့ အနှစ်သာရကို နားလည် သဘောပေါက်မှု မရှိဘူးဆိုလို့ရှိရင် ဘယ်လောက်ပဲ နိုင်ငံတစ်ခုမှာ ဒီမိုကရေစီစံနှုန်းနဲ့ ပြည့်စုံတဲ့ဥပဒေတွေရှိရှိ အဲ့ဒီဥပဒေတွေကို ပြည်သူလူထုအတွက် အသုံးမချနိုင်ဘူးဆိုရင် အလကားပဲ။ ဒီမိုကရေစီဆန်တဲ့ ဥပဒေမရှိတိုင်းလည်း နိုင်ငံအတွက် ကောင်းတယ်လို့ ပြောလို့မရသလို ဒီမိုကရေစီမဆန်တဲ့  ဥပဒေတွေရှိနေလို့ အဲ့ဒီနိုင်ငံအတွက် မကောင်းဘူးလို့ လည်း ၁၀၀ ရာခိုင်နှုန်း ပြောလို့မရဘူး။ ဥပမာ တစ်ခုအနေနဲ့ ပြောရမယ်ဆိုရင် အသင်းအဖွဲ့တွေကို မှတ်ပုံတင် ခြင်းဆိုင်ရာဥပ‌ဒေ အဲ့ဒီဥပဒေက ဒီမိုကရေစီ စံနှုန်းနဲ့ဆန့်ကျင်တာ”ဟု ပြောသည်။

မြန်မာနိုင်ငံအား ဒီမိုကရေစီနှင့် ဖက်ဒရယ်စနစ်ကို အခြေခံကာ သွားမည်ဟု လက်ရှိ နိုင်ငံအုပ်ချုပ်နေသည့် အကြီးအကဲများက ပြောဆိုထားသော်လည်း တပ်မတော်နှင့် ကျောချင်းကပ် ရင်ချင်းအပ် မလုပ်နိုင်လျှင် ထိုအစိုးရသစ် နောက်နေ့ပြုတ်ကျမည်ဟု ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP) ဥက္ကဋ္ဌ ဦးခင်ရီက မဲဆွယ် စည်းရုံးစဉ်အတွင်း ပြောကြားသွားခဲ့သည်။

CNI News

၂၀၂၅ ခုနှစ်၊ ဒီဇင်ဘာ ၃၀

လက်ရှိ မြန်မာနိုင်ငံ၏ ယာယီသမ္မတဖြစ်သူ ဗိုလ်ချုပ်မှူးကြီး မင်းအောင်လှိုင်အား ရွေးကောက်ပွဲအပြီး လွှတ်တော်ပေါ်လာသည့်အခါတွင် သမ္မတရာထူးအတွက် ဘယ်လိုအမည်စာရင်း တင်သွင်းလာနိုင်သလဲ ဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်မှုများ ရှိနေကြသည်။

မြန်မာနိုင်ငံတွင် ပြီးခဲ့သည့် ၂၀၁၀၊ ၂၀၁၅၊ ၂၀၂၀ ခုနှစ်များတွင် ပြုလုပ်ခဲ့သည့် ပါတီစုံဒီမိုကရေစီ အထွေထွေရွေးကောက်ပွဲများအရ သမ္မတနေရာအတွက် ပြည်သူ့လွှတ်တော်၊ အမျိုးသားလွှတ်တော်နှင့် တပ်မတော်တို့မှ လူပုဂ္ဂိုလ် ၃ ဦးအား အမည်စာရင်း တင်သွင်းရခြင်းဖြစ်သည်။

ထို ၃ ဦးကို လွှတ်တော်မှ အဆုံးအဖြတ် ပေးရခြင်းဖြစ်ကာ ယခင် ရွေးကောက်ပွဲ အခင်းအကျင်းများအရ ပြည်သူ့လွှတ်တော်မှ အမည်စာရင်း တင်သွင်းသည့် ပုဂ္ဂိုလ်သည် သမ္မတ အဖြစ်များကြောင်း NCA ထိုးထားသည့် ပအိုးဝ်အမျိုးသား လွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

 ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ထို့ကြောင့် ပြည်သူ့လွှတ်တော်မှ အမတ်အများစုက ဗိုလ်ချုပ်မှူးကြီး မင်းအောင်လှိုင်အား သမ္မတ ရာထူးအတွက် အတည်ပြု စာရင်းတင်လိမ့်မည်ဟု ထင်ကြောင်း ၎င်းက ပြောသည်။

ဗိုလ်မှူးကြီးခွန်ဥက္ကာက “အမျိုးသားလွှတ်တော်က တင်တာက ဒုသမ္မတ တိုင်းရင်းသားသမ္မတ ဖြစ်တာ များတယ်။ တပ်မတော်က တင်တဲ့လူက ဒုတိယသမ္မတ ဖြစ်တာများတယ်။ ဗမာပြည်ရဲ့ တန်းစီဇယား ကိုကြည့်ရင် အဲဒီလိုဖြစ်တယ်။ ဒါကြောင့် နာမည်စာရင်း ၃ ယောက် ၃ ဌာနက တင်တယ်ဆိုပေမယ့် အဆုံးအဖြတ်လုပ်ရင် ပြည်သူ့လွှတ်တော်က နာမည်စာရင်းပေးတဲ့ ပုဂ္ဂိုလ်က ပိုပြီးတော့ သမ္မတကြီး ဖြစ်ဖို့များတယ်။ တပ်က နာမည် စာရင်းတင်ရင်ကြ ဒုသမ္မတ (၁) ပေါ့။ အမျိုးသားလွှတ်တော်က တင်ရင် တော့ တိုင်းရင်းသားခေါင်းဆောင်တွေ ဥပမာ စိုင်းမောက်ခမ်းတို့၊ ဟင်နရီဗန်ထီးယူတို့ အဲဒီလိုတွေ ဖြစ် တယ်။ ဒါကတော့ အမျိုးသားလွှတ်တော်။ အဲဒီအစဉ်အလာရှိတော့ လွှတ်တော်ပေါ်လို့ အမည်စာရင်း တင်သွင်းရင် ဘယ်နေရာက ဘယ်သူ့ကို တင်တယ်ဆိုတာ ကြည့်ရမှာဖြစ်တယ်။ တပ်မတော်က တင်တဲ့ ဟာကတော့ ဒုတိယသမ္မတပဲ ဒါကအစဉ်အလာက အဲဒီလိုဖြစ်နေတာ။ ဒါကြောင့် တပ်မတော်က ဘယ်သူ့ကို တင်မလဲ၊ ဗိုလ်ချုပ်မှူးကြီး မင်းအောင်လှိုင်ကို တင်မလား‌တော့ ကျနော်တို့ မပြောနိုင်ဘူး။ ဒါပေမယ့် တင်ရင်လည်း ဒုသမ္မတပဲ။ အဲဒါကတော့ မူလ သူ့ရဲ့ process က အဲဒီလိုသွားတာ။ ကျနော် ထင်တာတော့ ပြည်သူ့လွှတ်တော်က တင်လိမ့်မယ်လို့ ထင်တယ်။ ပြည်သူ့လွှတ်တော် အမတ်အများစုက ၂၅ ရာခိုင်နှုန်းက တပ်မတော်သားကိုယ်စားလှယ် ရှိပြီးသား၊ နောက်ထပ် ပြည်သူ့လွှတ်တော်မှာ မဲများတဲ့ပါတီက ပြည်သူ့လွှတ်တော် လူဦးရေနဲ့ ပေါင်းပြီးတော့ တင်ရင် အများစုနဲ့တင်ရင် တင်တဲ့ ပုဂ္ဂိုလ်က အလားအလာရှိတယ် သမ္မတ” ဟု ပြောသည်။

ဗိုလ်ချုပ်မှူးကြီး မင်းအောင်လှိုင်သည် ဒီဇင်ဘာ ၂၈ ရက်က ပြုလုပ်သည့် ရွေးကောက်ပွဲ အပိုင်း (၁) ၌ နေပြည်တော်တွင် ဆန္ဒမဲလာပေးစဉ် သတင်းဌာနများက ရွေးကောက်ပွဲအပြီး သမ္မတ လုပ်၊ မလုပ် မေးမြန်းခဲ့ကြသည်။

ထိုမေးမြန်းမှုအပေါ် မိမိသည် ကာကွယ်ရေးဦးစီးချုပ် နိုင်ငံ့ဝန်ထမ်း တစ်ယောက်ဖြစ်ပြီး နိုင်ငံရေး ပါတီ ခေါင်းဆောင် မဟုတ်သည့်အတွက် သမ္မတ လုပ်ချင်ပါသည်ဟု သွားပြော၍ မရကြောင်း၊ လွှတ်တော် ခေါ်သည့်အခါမှသာ သမ္မတရွေးချယ်ရေး လုပ်ငန်းစဉ်များကို ပြုလုပ်မည်ဖြစ်ပြီး ထိုအချိန်မှသာ ပြောဖို့ သင့်ကြောင်း ဗိုလ်ချုပ်မှူးကြီး မင်းအောင်လှိုင်က ပြန်လည်ဖြေကြားခဲ့ခြင်းဖြစ်သည်။

ယာယီသမ္မတ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

သမ္မတဖြစ်ရေးသည် ၎င်း၏ ပုဂ္ဂိုလ်ရေး ရည်မှန်းချက် ဖြစ်သောကြောင့် မဖြစ်မနေ လုပ်ဆောင်လာနိုင်ပြီး မည်သည့်ပုံစံဖြင့် ကြိုးစားလုပ်ဆောင်လာမည်ကိုမူ စောင့်ကြည့်ရမည်ဖြစ်ကြောင်း တရုတ်-မြန်မာအရေး လေ့လာစောင့်ကြည့်သူ ဒေါက်တာလှကျော်ဇောက CNI သတင်းဌာနသို့ ပြောသည်။

၎င်းက “တစ်ခုကတော့ သူ့အနေနဲ့ သိပ်မသေချာသေးလို့ မပြောသေးတာလည်း ဖြစ်ချင်ဖြစ်မယ်။ သို့မဟုတ် ကတော့ ဘယ်လိုပဲဖြစ်ဖြစ် ငါသမ္မတလုပ်မှာပဲ အဲဒီကြမှ ကောက်ပြောမယ်ဆိုပြီးတော့ အဲဒီလိုစိတ်နဲ့ ပြောတာလည်း ဖြစ်ချင်ဖြစ်မှာပေါ့။ ဒီလူက သူ့စကားတွေက သိပ်ဟိုဒင်းပြုရတာမှ မဟုတ်ဘဲ။ ၂၀၂၀ ရွေးကောက်ပွဲတုန်းကလည်း ပြည်သူတွေ စိတ်ကြိုက်ရွေးတဲ့လူကို ဘာဖြစ်တယ်၊ ညာဖြစ်တယ် ပြောခဲ့ဖူးသေးတာပဲ။ ပြီးတော့ အာဏာသိမ်းတာပဲ။ အခုဒီမှာလည်း ပြီးမှကြည့်ပါမယ် ဆိုပေမယ့် သူကောက်လုပ်ချင်လည်း လုပ်မှာပဲ။ သူ့စကားလည်း သိပ်ယုံလို့မရဘူး။ နောက်တစ်ခု ကလည်း သူသမ္မတဖြစ်ရေးက သူ့ရဲ့ပုဂ္ဂိုလ်ရေး ရည်မှန်းချက်ပဲ ဖြစ်တာကို။ အဲဒီတော့ ဒါကတော့ သူမဖြစ်မနေ လုပ်မှာပဲ။ ဘယ်လို နည်းနာနဲ့ လုပ်မလဲ၊ အားလုံး အမြင်ကောင်းအောင် သူဘယ်လို ကြိုးစားမလဲဆိုတာတော့ စောင့်ကြည့်ရ လိမ့်မယ်ထင်တယ်” ဟု ပြောသည်။

ပါတီစုံဒီမိုကရေစီ အထွေထွေရွေးကောက်ပွဲ အပိုင်း (၁) ကို ဒီဇင်ဘာ ၂၈ ရက်တွင် ကျင်းပခဲ့ပြီး ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီသည် တစ်နိုင်ငံလုံး အတိုင်းအတာအရ ကြိုတင်မဲအားသာမှု ဖြင့် အများဆုံး အနိုင်ရရှိနေခြင်းဖြစ်သည်။

လက်ရှိတွင် ရွေးကောက်ပွဲ အပိုင်းအားလုံး မပြီးစီးသေးသော်လည်း ရွေးကောက်ပွဲပြီးနောက် ပေါ်ထွက် လာမည့် အစိုးရသစ်၏ မူဝါဒများသည် အပြောင်းအလဲ မဖြစ်နိုင်ဘဲ လက်ရှိ တပ်မတော်ကာကွယ်ရေး ဦးစီးချုပ် သွားနေသည့် လမ်းကြောင်းအတိုင်းပဲ ဖြစ်နိုင်ကြောင်းလည်း စစ်ရေးနှင့်နိုင်ငံရေး အကဲခတ်များ က ထောက်ပြကြသည်။

CNI News

၂၀၂၅ ခုနစ်၊ ဒီဇင်ဘာ ၂၉

မြန်မာနိုင်ငံတွင် ၂၀၀၈ ဖွဲ့စည်းပုံအခြေခံဥပဒေ၊ ပုဒ်မ ၂၆၁ အရ တိုင်းဒေသကြီးနှင့် ပြည်နယ်ဝန်ကြီးချုပ်များကို သမ္မတက တိုက်ရိုက်ခန့်အပ်ခွင့်ရှိသည့် အခြေအနေအား ဒီမိုကရေစီနှင့်ဖက်ဒရယ်ကို အခြေခံသော ပြည်ထောင်စု တည်ဆောက်ရေးအတွက် ဘယ်လိုဖြေလျှော့သင့်လဲဆိုသည့်အပေါ် နိုင်ငံရေးပါတီများက ထောက်ပြကြသည်။

တိုင်းဒေသကြီးနှင့် ပြည်နယ်ဝန်ကြီးချုပ်အား သမ္မတကခန့်ပြီး လွှတ်တော်က အတည်ပြုမည်ဆိုလျှင် ထိုအခြေအ နေသည် ဗဟိုချုပ်ကိုင်မှုဟု မွန်ညီညွတ်ရေးပါတီ(MUP)မှ ပြောရေးဆိုခွင့်ရှိသူ နိုင်သန်းရွှေက CNI သတင်းဌာနသို့ ပြောသည်။

၎င်းက “ပြောတော့ ပြောထားတာပဲလေ ပြင်ဖို့တော့ဒါ။ ဒါပေမယ့် ပြင်တာက လွှတ်တော်ထဲမှာရောက်မှ အဲ့ဒါက ပြင်လို့ရမယ်လေ။ တကယ့် လက်တွေ့ကြတော့ လွှတ်တော်ထဲမှာ အဆိုတင်သွင်းတာတို့၊ ပြင်ဆင်တဲ့ Process အတိုင်းတော့ သူသွားမှ ပြင်လို့ရမယ်။ သမ္မတအဆင့် တိုက်ရိုက် ခန့်ရတာက သူက တကယ့် ဟိုချုပ်ကိုင်မှု များ သွားတာပေါ့။ တကယ်လို့များ ဝန်ကြီးချုပ်တွေကိုပြင်မယ် လွှတ်တော်ကနေပြီးတော့ ရွေးချယ်ခွင့်ရှိမယ်ဆိုရင် ဒါက ဒီဖက်ဒရယ်နဲ့ ပိုနီးစပ်တယ်ပေါ့။ တကယ့်လို့ သမ္မတကပဲ ခန့်ပြီးတော့ လွှတ်တော်ကပဲ အတည်ပြုမယ်ဆို လို့ရှိရင် ဒါကတော့ ချုပ်ကိုင်မှုပေါ့နော်။ ဒီဖက်ဒရယ်လစ်ဇင်က ပိုများလာတာပေါ့။ အဲ့ဒါက အာဏာရတဲ့ သမ္မတ ကြီးရဲ့ မူဝါဒပေါ်မှာ မူတည်တယ်။ ၂၆၁၊ ၂၆၂ ရဲ့သူက သမ္မတကြီးက သူရွေးမယ်၊ သူခန့်အပ်လိုက်မယ်၊ နောက် လွှတ်တော်က အတည်ပြုပေးမယ်ပေါ့။ တကယ်လို့ သမ္မတကြီးက သဘောထား ပြေလည်လို့ ခင်ဗျားတို့ လွှတ် တော်က ခင်ဗျားတို့ဟာ ရွေးပြီးတော့ ကျနော် ခန့်အပ်ပေးမယ်။ ဒါပေမယ့် သမ္မတကြီးရဲ့ ခွင့်ပြုချက်ပဲ သူခွင့်ပြု မလား မခွင့်ပြုဘူးလား အဲ့တာပေါ်မှာ မူတည်တာပေါ့။ ဟိုလွှတ်တော်ထဲမှာ ဘယ်လိုပြင်ဆင်မလဲ ဘယ်လိုပေးနိုင် မလဲ။ နောက်ပြီးတော့ ဒီတိုင်း သမ္မတကြီးက ပေးလိုက်မယ် ဆိုလို့ရှိရင်လည်း ဒါအခက်အခဲတော့ ရှိမယ်ပေါ့”ဟု ပြောသည်။

NSPNC ကိုယ်စားလှယ်အဖွဲ့ကို တွေ့ရစဉ်

တိုင်းဒေသကြီးနှင့် ပြည်နယ်ဝန်ကြီးချုပ်ကို သမ္မတက တိုက်ရိုက် ခန့်အပ်ခွင့်ရှိသော ပုဒ်မ ၂၆၁ အား တိုင်းရင်းသား လူမျိုးစု ပါတီများနှင့် နိုင်ငံရေးသမားများက ပြင်ဆင်ရန် ထောက်ပြလျက်ရှိသည်။

ထို့ကြောင့် USDP ဦးဆောင်သည့် ဦးသိန်းစိန် အစိုးရလက်ထက်တွင် NLD ပါတီက ပုဒ်မ ၂၆၁ ပြင်ဆင်ရန် သဘောတူ ဆွေးနွေးခဲ့ပြီး တပ်မတော်နှင့် USDP ပါတီက ကန့်ကွက်ခဲ့သည်။

ထို့နောက်  NLD ဦးဆောင်သည့် ဒေါ်အောင်ဆန်းစုကြည် အစိုးရလက်ထက်တွင် USDP နှင့် တပ်မတော်က ပုဒ်မ ၂၆၁ ပြင်ဆင်ရန် သဘောတူ ဆွေးနွေးခဲ့ပြီး NLD က ကန့်ကွက်ခဲ့သည်။

တိုင်းဒေသကြီးနှင့်ပြည်နယ် ဝန်ကြီးချုပ်အား နိုင်ငံတော်သမ္မတက တိုက်ရိုက်ရွေးပြီး ခန့်အပ်ခြင်းက ဒီမိုကရေစီနှင့် ဖက်ဒရယ်ဆန်သည်ဟု ပြောရန်ခက်ခဲကြောင်း ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

၎င်းက “ဖက်ဒရယ်ဆိုတာကတော့ လွတ်လပ်မှုနဲ့ ဆိုင်တာပေါ့။ ကိုယ်ပိုင်အုပ်ချုပ် ကိုယ်ပိုင်ပြဋ္ဌာန်းပိုင်ခွင့်ပေါ့။ ကိုယ့်ပြည်နယ်လူထုရဲ့ ရွေးကောက်ခံတဲ့ ကိုယ်စားလှယ်တွေ အများစုက တင်မြှောက်တဲ့ ပုဂ္ဂိုလ်ကို ပြည်နယ် တစ်ခု ဒေသတစ်ခုရဲ့ ဝန်ကြီးချုပ် ဆိုတာမျိုးက ဒီမိုကရေစီ ကျင့်စဥ်အရတော့ လက်ခံကြမှာ။ အဲ့ဒီ ဝန်ကြီးချုပ် ဆိုတဲ့ ဥစ္စာကို လူထုက တိုက်ရိုက်မြှောက်တာ မဟုတ်ရင်တောင်မှ လူထုတင်မြှောက်တဲ့ ကိုယ်စားလှယ် တွေက ရွေးပေးတယ်ပေါ့ဗျာ။ အဲ့ဒီပုဂ္ဂိုလ်ကို အမြင့်ဆုံးပုဂ္ဂိုလ်က အတည်ပြုတာတို့ သဘောတူတာတို့ပေါ့ဗျာ။ ဒုတိယတဆင့် လုပ်တာက ပိုပြီးတော့ ဖက်ဒရယ်ဆန်တာပေါ့။ ပြည်နယ်တစ်ခုရဲ့ လူထုက တိုက်ရိုက် မဲပေးပိုင်ခွင့် ပေးပြီးမှ ပြည်နယ်ဝန်ကြီးချုပ်၊ တိုင်းဝန်ကြီးချုပ် ရွေးတာကိုတော့ အမှန်ဆုံး။ တိုက်ရိုက် ဒီမိုကရေစီပေါ့ဗျာ။ အဲ့ဒီ လို မလုပ်နိုင်ရင် ခုနက လွှတ်တော်တွေပေါ့၊ အဲ့ဒီလွှတ်တော်တွေကနေ လွှတ်တော် ကိုယ်စားပြုတဲ့ ပုဂ္ဂိုလ်တွေ ကိုယ်စားလှယ် အမတ်တွေက အတည်ပြုတဲ့ ပုဂ္ဂိုလ်ကို နိုင်ငံတော်သမ္မတကြီးက အတည်ပြု ပေးတာကတော့ ပိုပြီးတော့ ဖက်ဒရယ်ဆန်တာပေါ့။ သမ္မတကြီးက တိုက်ရိုက်ရွေးပြီး ခန့်တာမျိုးကျရင်တော့ ဒီမိုကရေစီဆန်တယ် ဖက်ဒရယ်ဆန်တယ် ပြောဖို့ခက်တာပေါ့”ဟု ပြောသည်။

မြန်မာနိုင်ငံတွင် တိုင်းဒေသကြီးနှင့် ပြည်နယ် ၁၄ ခုရှိပြီး ဝန်ကြီးချုပ် ၁၄ ဦးကို သမ္မတက တိုက်ရိုက် ရွေးချယ် ခန့်အပ်ခွင့်ရှိကြောင်း ၂၀၀၈ ဖွဲ့စည်းပုံအခြေခံဥပဒေ ပုဒ်မ ၂၆၁ ၌ ပြဋ္ဌာန်းထားသည်။

နိုင်ငံရေးပါတီများအစုအဖွဲ့၏ အလုပ်အဖွဲ့ကို တွေ့ရစဉ်

ထိုပြဋ္ဌာန်းချက်သည် တိုင်းရင်းသားလူမျိုးစု ပါတီများနှင့် လူမျိုးစုများ လိုချင်သည့် သက်ဆိုင်ရာ ဒေသတွင် မဲအများဆုံး အနိုင်ရသည့် ပါတီမှ ဝန်ကြီးချုပ် ခန့်အပ်ခွင့်ရှိသော အခြေအနေဖြင့် ဆန့်ကျင်နေသလို တန်းတူ ရေးနှင့် ဖက်ဒရယ်ပြည်ထောင်စု တည်ဆောက်ရေးကိုလည်း အာမခံချက် မရှိဘဲဖြစ်နေသည်။

ပုဒ်မ ၂၆၁ ပြင်ဆင်ရေး ဆွေးနွေးမှုသည် လျှို့ဝှက်ဖြစ်၍ ထုတ်ပြောရန် မရှိကြောင်း၊ လွှတ်တော်ပေါ်ပေါက်လာမှ ဖွဲ့စည်းပုံပြင်ဆင်ရေး လုပ်ငန်းစဥ်များ စတင်၍ ရမည်ဖြစ်ပြီး သမ္မတက မည်သို့ စဥ်းစား ဆုံးဖြတ်မလဲဆိုသည့် အပေါ်တွင် မူတည်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်း ဌာနသို့ ပြောသည်။

၎င်းက “အဲဒါတွေကလေ တချို့ဟာတွေက ကျနော်တို့က ယေဘူယျပဲ ပြောလို့ရတယ်။ ဘာလို့လဲဆိုတော့ သဘောတူထားတဲ့ အချက်တွေက လျှို့ဝှက်ပေါ့နော်။ လုပ်ထားတာဆိုတော့ အသေးစိတ်ကိုတော့ ကျနော်တို့ ထုတ်ပြောလို့ မရဘူးပေါ့နော်။ အဲ့ဒါကတော့ လွှတ်တော် ပေါ်ပေါက်လာပြီးမှ ဖွဲ့စည်းပုံပြင်ဆင်ရေး လုပ်ငန်းစဥ် တွေ စလို့ရမှာ အခုလောလောဆယ်မှာကတော့ လက်ရှိ တည်ဆဲဥပဒေအတိုင်းပဲ ကျင့်သုံးမယ်လို့ပဲ မြင်တယ်။ ဘာလို့ဆို သမ္မတကပဲ ခန့်မှာပဲ အခုလောလောဆယ်မှာတော့။ သမ္မတက ဘယ်လိုစဥ်းစား ဆုံးဖြတ်မလဲဆိုတဲ့ အပေါ်မှာ မူတည်တယ်”ဟု ပြောသည်။

တိုင်းဒေသကြီးနှင့် ပြည်နယ်ဝန်ကြီးချုပ်များ ခန့်အပ်ခွင့် ပြဋ္ဌာန်းချက်ဖြစ်သည့် ပုဒ်မ ၂၆၁ ပြင်ဆင်ရေး တပ်မတော် ၏ အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်‌မှု ညှိနှိုင်းရေးကော်မတီ(NSPNC)နှင့် နိုင်ငံရေးပါတီ များ အစုအဖွဲ့၏ အလုပ်အဖွဲ့များကြား တွေ့ဆုံ ဆွေးနွေးထားကြသည်။

သို့သော် တပ်မတော်သည် ပုဒ်မ ၂၆၁ ကို ပြင်ဆင်ရန် သဘောတူ/မတူ ရှင်းရှင်းလင်းလင်း မသိရဘဲ နှစ်ဖက် စလုံးက လျှို့ဝှက်ထားကြသည်။ 

ပုဒ်မ ၂၆၁ ပြင်ဆင်ရေး တပ်မတော်ဘက်က သဘောတူသည်ဟု အာမခံချက် မပေးကြောင်း၊ ထို့ကြောင့် တပ်မတော် ကျင်းပပေးသည့် ရွေးကောက်ပွဲကနေ တဆင့် ပေါ်ပေါက်လာမည့် အစိုးရသစ်သည် ဖက်ဒရယ် ပြည်ထောင်စုကို တကယ် လိုလားပါက ပုဒ်မ ၂၆၁ ကို မပြင်ဆင်သည့်တိုင် ပြည်နယ်များတွင် ဝန်ကြီးချုပ်အား ခန့်အပ်ခွင့်ကို ဖြေလျှော့ပေးသင့်ကြောင်း တပ်မတော်နှင့်နိုင်ငံရေးပါတီများဖြင့် နီးစပ်သူများက ပြောသည်။

CNI News

၂၀၂၅ ခုနှစ်၊ ဒီဇင်ဘာ ၂၉

မွန်၊ ရခိုင်နှင့် ကရင်ပြည်နယ်တို့၌ ရွေးကောက်ပွဲအပိုင်း(၁) မဲရလဒ်များတွင် တိုင်းရင်းသားပါတီများ အား‌ကောင်းမှု ရှိ သကဲ့သို့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက အားကောင်းသည့် နေရာများလည်း ရှိနေကြောင်း သက်ဆိုင်ရာ ပါတီတာဝန်ရှိသူများက CNI သတင်းဌာနသို့ ပြောသည်။

မြို့နယ် ၃ ခု၌ ရွေးကောက်ပွဲ ပြုလုပ်ခဲ့သည့် ရခိုင်ပြည်နယ်တွင် စစ်တွေမြို့မှာ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီက ဦးဆောင်နေပြီး မာန်အောင်မြို့မှာတော့ ရခိုင့်ဦးဆောင်ပါတီ (AFP)မှ ဦးဆောင်နေကြောင်း AFP ပါတီဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

၎င်းက “အကြမ်းဖျင်း စစ်တွေမှာ ပြည်ခိုင်ဖြိုး ဦးဆောင်တယ်။ မာန်အောင်မှာကြတော့ အန်ကယ်ထင်တယ် အန်ကယ်တို့ ပါတီက ဦးဆောင်နေပါတယ်။ ကျောက်ဖြူမှာကြတော့ အမျိုးသားနဲ့ ပြည်သူ့ဘက်မှာ အန်ကယ်တို့ ဦးဆောင်တယ်လို့ ပြောတယ်။ ဒါပေမယ့် ပြည်ခိုင်ဖြိုးမှာ ကြိုတင်မဲတွေ အများကြီး ရထားတာရှိတယ်။ အဲဒါလေး တစ်ခုကတော့ အန်ကယ်တို့ စစ်တွေလိုပေါ့ ရွေးကောက်ပွဲရလဒ်ကို change လုပ်နိုင်တယ်” ဟု ပြောသည်။

ရွေးကောက်ပွဲ မဲပေးနေစဉ် 

ကရင်ပြည်နယ်တွင်လည်း မြို့နယ် ၃ ခု၌ ရွေးကောက်ပွဲ ကျင်းပခဲ့ရာ USDP ပါတီ၊ ကရင်အမျိုးသား ဒီမိုကရက် တစ်ပါတီ၊ ဖလုံစဝေါ် ဒီမိုကရက်တစ်ပါတီတို့ အကြိတ်အနယ် ရှိသော်လည်း USPD မှ မဲအများဆုံး အနိုင်ရရှိနေကာ ကရင်အမျိုးသားဒီမိုကရက်တစ်ပါတီ(KNDP)သည် ဒုတိယနေရာတွင် ရှိနေကြောင်း KNDP ပါတီဥက္ကဋ္ဌ ဦးမန်းအောင် ပြည်စိုးက CNI သတင်းဌာနသို့ ပြောသည်။

ထိုရလဒ် ဖြစ်လာမည်ကိုလည်း ကြိုတင် တွက်ဆထားပြီးသားဖြစ်ကြောင်းလည်း ၎င်းက ပြောသည်။

ဦးမန်းအောင်ပြည်စိုးက “ရလဒ်က ဒီလိုပဲဖြစ်လိမ့်မယ်လို့တော့ ကြိုတော့ တွက်ထားတယ်။ ဘာလို့ဆို ကျနော်တို့ ပါတီတွေကလည်း ပါတီငယ်တွေလည်း ဖြစ်တယ်။ နောက်ပြီးတော့ စည်းရုံးရေး အင်အားကလည်း အချိန်ကလည်း နည်းတဲ့အတွက် စည်းရုံးရေးကလည်း ဒီလောက် မဆင်းနိုင်ဘူးပေါ့လေ။ အဲဒီတော့ အဲဒီပါတီကြီးနဲ့ ယှဉ်တဲ့အခါကြ တော့ သိပ်မျှော်လင့်ချက်တော့ နည်းတယ်ပေါ့။ ပါတီကြီးဆိုတဲ့ နေရာမှာ ကျနော်တို့ ပြည်နယ်မှာ PPP လည်း လာ တယ်၊ ကျားဖြူပါတီလည်း လာတယ်။ သူတို့လည်း တစ်ပြည်လုံး အတိုင်းအတာ လွှမ်းခြုံတယ် ပါတီကြီးပဲလေ။ ဒါပေမယ့် သူတို့က မဲ မရကြဘူး။ မရကြဘူးဆိုတာ ဆယ်ဂဏန်း၊ ခုဂဏန်းလောက်ပဲ ရတာတွေ့ရတယ်။ အဲဒီလို အပိုင်းလေးတွေတော့ ရှိတယ်။ ကျနော်တို့ ကရင်ပြည်နယ်မှာကတော့ ကရင်ပါတီဖြစ်တဲ့ ကရင်အမျိုးသား ဒီမိုကရက်တစ်ပါတီ နဲ့ ဖလုံစဝေါ်ပါတီရယ်၊ ကြံ့ခိုင်ဖွံ့ဖြိုးရေးပါတီရယ် ၃ ပါတီကတော့ အကြိတ်အနယ်ဆိုတဲ့ သဘောလေး ရှိတယ်။ သို့သော် တကယ်တမ်း ချုံ့လိုက်တဲ့ အခါကြတော့ ကြံ့ခိုင်ဖွံ့ဖြိုးရေးပါတီက နည်းနည်း အနိုင်ရသွားတယ်လို့ ပြောလို့ရတာပေါ့” ဟု ပြောသည်။

ရွေးကောက်ပွဲ မဲပေးနေစဉ် 

မြို့နယ် ၅ ခု ပါဝင်ခဲ့သည့် မွန်ပြည်နယ်တွင်မူ ချောင်းဆုံမြို့နယ်ရှိ ပြည်သူ့လွှတ်တော်နှင့် အမျိုးသားလွှတ်တော် နေရာတို့တွင် မွန်ညီညွတ်ရေးပါတီ(MUP) အနိုင်ရရှိနေပြီး ကျန်မြို့များ၏ မဲရလဒ်များကိုမူ မသိရှိရသေးကြောင်း ပါတီ၏ ပြောရေးဆိုခွင့်ရှိသူ နိုင်သန်းရွှေက CNI သတင်းဌာနသို့ ပြောသည်။

ထိုသို့ ကျင်းပဖြစ်သည့် မြို့နယ် ၅ ခု၌ အချို့ကျေးရွာများတွင် မဲရုံမဖွင့်နိုင်သည့်အတွက် မွန်ညီညွတ်ရေးပါတီ အားသာရမည့် နေရာတွင် အားမသာသည့်သဘော ဖြစ်သွားကြောင်း ၎င်းက ပြောသည်။

ပြောရေးဆိုခွင့်ရှိသူ နိုင်သန်းရွှေ “အပိုင်း (၁) ကတော့ ကျနော်တို့ ချောင်းဆုံက မဲဆန္ဒနယ်အားလုံး ပါတယ်ပေါ့ နော်။ ချောင်းဆုံရယ်၊ မော်လမြိုင်ရယ်၊ မဲရုံတွေ၊ ရပ်ကျေးတွေ အကုန်လုံး ပါတယ်။ ဒါပေမယ့် ကျိုက်မရောမှာ ကြတော့ ရွာတွေအထိကို မဲရုံမဖွင့်နိုင်ဘူး။ မဲရုံမဖွင့်နိုင်တော့ ဘယ်လိုပြောရမလဲ ကျနော်တို့ အားသာတဲ့နေရာမှာ အားပြတ်သွားတာပေါ့ ကျိုက်မရောတို့လိုမျိုးပေါ့” ဟု ပြောသည်။

၂၀၂၅ ခုနှစ်၊ ဒီဇင်ဘာ ၂၈ ရက်က ကျင်းပပြုလုပ်ခဲ့သည့် ပါတီစုံဒီမိုကရေစီ အထွေထွေရွေးကောက်ပွဲ အပိုင်း (၁) ကို မြို့နယ်ပေါင်း ၁၀၂ မြို့နယ်တွင် ကျင်းပခဲ့ခြင်းဖြစ်ပြီး မွန်၊ ရခိုင်နှင့် ကရင်ပြည်နယ်တို့တွင် မဲလာပေးကြမှုအပေါ် အားရမှုရှိကြောင်းလည်း သက်ဆိုင်ရာ ပါတီတာဝန်ရှိသူများက CNI သတင်းဌာနသို့ ပြောသည်။

လက်ရှိ တစ်နိုင်ငံလုံး မဲရလဒ် အခြေအနေများအရ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသည် တစ်နိုင်ငံလုံး အတိုင်းအတာအရ မဲအများဆုံး အနိုင်ရရှိနေသည့် အနေအထား ဖြစ်နေကြောင်းလည်း သိရသည်။

CNI News

၂၀၂‌၅ ခုနှစ်၊ ဒီဇင်ဘာ ၂၉

မြန်မာနိုင်ငံတွင် ဖြစ်ပေါ်နေသော လက်နက်ကိုင် ပဋိပက္ခနှင့် နိုင်ငံရေး အကျပ်အတည်းကို ဖြေရှင်းနိုင် ရေးအတွက် ရွေးကောက်ပွဲအလွန်၌ နိုင်ငံရေး ဆွေးနွေးမှုတစ်ရပ် ဖြစ်ပေါ်လာနိုင်သည်ဟု ပအိုဝ်း အမျိုး သား လွတ်မြောက်ရေး အဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။ 

လက်ရှိတွင် မြန်မာနိုင်ငံ၌ ၂၀၂၅ ခုနှစ်၊ ဒီဇင်ဘာ ၂၈ ရက်က ရွေးကောက်ပွဲ အပိုင်း(၁)ကို စတင် ကျင်းပခဲ့ ပြီး ၂၀၂၆ ခုနှစ်၊ ဇန်နဝါရီ ၁၁ ရက်တွင် ရွေးကောက်ပွဲ အပိုင်း(၂)ကိုလည်းကောင်း၊ ဇန်နဝါရီ ၂၅ ရက်၌ ရွေးကောက်ပွဲ အပိုင်း(၃)ကိုလည်းကောင်း ကျင်းပမည်ဖြစ်သည်။ 

ထို့နောက် ရွေးကောက်ပွဲအနိုင်ရသည့် နိုင်ငံရေးပါတီအား နိုင်ငံတော်အာဏာကို လွှဲပြောင်းပေးမည် ဖြစ်ပြီး တပ်မ‌တော်က ကာကွယ်ရေးတာဝန်ကိုသာ ပြန်လည် ထမ်းဆောင်တော့မည်ဟု ဗိုလ်ချုပ်မှူးကြီး မင်းအောင်လှိုင်က ပြောထားသည်။

ရွေးကောက်ပွဲအလွန် ပေါ်ပေါက်လာမည့် လွှတ်တော်က ချမှတ်သည့်ဥပဒေများ၊ နိုင်ငံတော်အစိုးရမှ အကောင်အထည်ဖော်မည့် ဥပဒေများအပေါ် မူတည်၍ နိုင်ငံရေးအရ ညှိနှိုင်းဆွေးနွေး အဖြေရှာသည့်  အခြေအနေတစ်ရပ် ဖြစ်ပေါ်လာနိုင်သည်ဟု NCA ထိုးထားသည့် ပအိုဝ်းအမျိုးသားလွတ်မြောက်ရေး အဖွဲ့ချုပ်(PNLO- NCA/S) မှဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။ 

နိုင်ငံရေးပါတီနဲ့ လက်နက်ကိုင် ခေါင်းဆောင်တွေကို တွေ့ရစဉ်

၎င်းက “ဘာပဲဖြစ်ဖြစ်တော့ ရွေးကောက်ပွဲပြီးလို့ ပေါ်လာတဲ့ အခင်းအကျင်းပေါ့။ နေပြည်တော်ဘက်က ဖန်တီးလာမယ့် အခင်းအကျင်းရယ်၊ လက်ရှိ ပြင်ပမှာ စုဖွဲ့နေတဲ့ အခင်းအကျင်းတွေရယ်၊ NUG ရဲ့ position ရယ်။ အားလုံးကို ကြည့်လိုက်ရင်တော့ ရွေးကောက်ပွဲပြီးလို့ ပေါ်လာမယ့် လွှတ်တော်က ချမှတ် တဲ့ ဥပဒေတွေ အစိုးရက အကောင်အထည်ဖော်မယ့် ဥပဒေတွေပေါ်မှာ မူတည်ပြီးတော့ Dialogue အခြေအနေပေါ့။ ပတ်ဝန်းကျင်တစ်ခု ဖြစ်လာနိုင်တယ်။ Dialogue ယဉ်ကျေးမှု တစ်ခု ဖြစ်လာနိုင်တယ် လို့ ယူဆတယ်ဗျ။ ဦးသိန်းစိန်ခေတ်မှာ ကျနော်တို့ Dialogue ယဉ်ကျေးမှု စပြီးတော့ တွေ့ရ တာကို။ နောက် ဒေါ်စု လက်ထက်ကို ကျနော်တို့ သယ်လာတယ်၊ ၁၀ နှစ်ကျော်လောက် ကျနော်တို့ Dialogue ယဉ်ကျေးမှုကို ရကြတာကို။ အဲဒီမှာ Dialogue ယဉ်ကျေးမှုထဲမှာမှ Peace Architecture လို့ခေါ်တဲ့ ငြိမ်းချမ်းရေးကို တည်ဆောက်မယ့် ဗိသုကာတွေ  ပေါ်လာကြတာပေါ့။ ဆွေးနွေးပွဲတွေ အားလုံးမှာ Peace ကို ဦးတည်တဲ့ အခါကျတော့ Peace Architecture တွေ ပေါ်လာတာပေါ့။ ဒါကြောင့် အခု ကျနော် တွက်တာတော့ နိုင်ငံ‌ရေး အခင်းအကျင်းအသစ်မှာ Policy အသစ်တွေ၊ မူဝါဒအသစ်တွေ လူကတော့ လူဟောင်းဖြစ်ချင်ဖြစ်မှာပေါ့။ ဒါပေမယ့် Policy အသစ်တွေ မူဝါဒ‌ အသစ်တွေကို မိတ်ဆက် လို့ ရသွားပြီပေါ့။ ရသွားတဲ့အချိန်မှာ စောင့်ကြည့်ရမယ့် သဘောတော့ရှိတယ်ဗျ။ ဒါကြောင့် ၂၀၂၆ နှစ်ဝက်လောက်ထိ ကျနော်တို့ စောင့်ကြည့်နိုင်တယ်ဆိုရင်တော့  ပြောလို့ရပြီဗျ။ ဘယ်လို ဖြစ်လာနိုင်လဲ ဆိုတာလေ အခုတော့ နည်းနည်းစောသေးတယ်” ဟု ပြောသည်။ 

ရွေးကောက်ပွဲအလွန် တက်လာမည့် အစိုးရသည် ပျော့ပြောင်းညင်သာ ပြတ်သားရန် လိုအပ်ပြီး ရေရှည် တည်တံ့သည့် ငြိမ်းချမ်းရေးကို ထဲထဲဝင်ဝင်လုပ်ရန် လိုအပ်သည်ဟု နိုင်ငံရေးပါတီများနှင့် နိုင်ငံရေး လေ့လာသူများက ထောက်ပြကြသည်။ 

ရွေးကောက်ပွဲအလွန် ဖြစ်ပေါ်လာမည့် နိုင်ငံရေး အခင်းအကျင်းတွင် ငြိမ်းချမ်းရေးကိုသာ ဦးစားပေး ဆောင်ရွက်သင့်ကြောင်း၊ ငြိမ်းချမ်းရေး မရသရွေ့ တိုင်းပြည်ကို မည်ကဲ့သို့ ဖွံ့ဖြိုးတိုးတက်အောင် လုပ်ဆောင်သည်ဖြစ်စေ အဆင်ပြေနိုင်မှာ မဟုတ်ဘူးဟု ကရင်ပြည်သူ့ပါတီ(KPP)မှဥက္ကဋ္ဌ ဒေါ်နန့်ခင်အေးဦးက CNI သတင်းဌာနသို့ ပြောသည်။ 

USDP ပါတီဥက္ကဋ္ဌ ဦးခင်ရီနဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “ဒီဘက်ကတော့ အဲဒါတွေ လုပ်မယ်လို့တော့ ပြောနေတာပဲပေါ့နော်။ အခုလက်ရှိ အစိုးရအဖွဲ့ အစည်း အနေနဲ့က‌တော့ ငြိမ်းချမ်းရေးအတွက်ကို သူတို့ ဆက်လုပ်ဖို့ဆိုတာတော့ ရည်စူးထားတာပေါ့ နော်။ ဒါပေမယ့် တစ်ဖက်က response ကတော့ ဘယ်လောက် အားရမလဲဆိုတာတော့ မပြောနိုင်ဘူး ပေါ့လေ။ အခုလက်ရှိ အခြေအနေအရ ဆိုရင်တော့ သိပ်အားရစရာ မရှိဘူးပေါ့။ ဒါပေမယ့် ကျမတို့ ဖြစ်ပေါ်လာမယ့် အစိုးရတာဝန်ကတော့ ဒါကြိုးစားရမှာပဲ ငြိမ်းချမ်းမှု မရမချင်းတော့ ဘယ်လောက်ပဲ ဖွံ့ဖြိုးအောင်လုပ်လုပ် အဆင်မပြေဘူး။ အဲ‌ဒါတွေကတော့ ဘယ်လိုမှ မဖြစ်နိုင်ဘူး။ ငြိမ်းချမ်းရေး ရအောင် ကြိုးစားရမယ်လို့ ကျမ ယူဆပါတယ်။ တစ်ပြိုင်နက်ထဲပေါ့နော် ငြိမ်းချမ်းရေးရအောင်တော့ ကြိုးစားကြရ လိမ့်မယ်။ဘယ်လောက် ပါလာမလဲဆိုတာကတော့ ဖြစ်ပေါ်လာမယ့် အစိုးရအပေါ်မှာ တစ်ဖက်က အဖွဲ့ တွေကလည်း ဘယ်လောက် ယုံကြည်မှု ရှိသလဲဆိုတဲ့အပေါ်မှာ မူတည်မယ်လို့ ထင်ပါတယ်။ ဒါက မြန်မြန်ကြီး တော့ မဖြစ်နိုင်ဘူးလို့ ကျမ ထင်တယ်။ တဖြည်းဖြည်းပဲ တည်‌ဆောက်ရမှာ‌ပဲ အဲဒါတော့လေ” ဟု ပြော သည်။ 

နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ရွေးကောက်ပွဲတွင် အနိုင်ရသည့် နိုင်ငံရေးပါတီအား နိုင်ငံတော်အာဏာ လွှဲပြောင်းပေးမည်ဖြစ်ကြောင်း ပြောကြားထားသည်။ 

လာမည့် ရွေးကောက်ပွဲတွင် ပြည်‌ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) က အများဆုံး အနိုင်ရ ကာ အစိုးရဖွဲ့စည်းမည်ဖြစ်ပြီး အစိုးရအဖွဲ့ကိုတော့ တပ်မတော်က ဦးဆောင်ဖွဲ့စည်းလာနိုင်ကြောင်း စစ်ရေးနှင့်နိုင်ငံရေးအကဲခတ်များ ထောက်ပြကြသည်။ 

CNI News

၂၀၂၅ ခုနှစ်၊ ဒီဇင်ဘာ ၂၈

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်က ရွေးကောက်ပွဲအပိုင်း(၁)ကို ကျင်းပနေရာ ကရင်ပြည်နယ်၊ မြဝတီမြို့ပေါ်၌ ဒရုန်း တိုက်ခိုက်မှုကြောင့် ပေါက်ကွဲမှုများ ဖြစ်ပေါ်ခဲ့သော်လည်း ပြည်သူလူထုသည် ရွေးကောက်ပွဲ နေ့မှာ မဲလာရောက် ပေးခဲ့ကြသည်။

ဒီဇင်ဘာ ၂၇ ရက်က ‌ရွေးကောက်ပွဲ ဆန့်ကျင်သည့်အနေဖြင့်  မြဝတီမြို့ပေါ်ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP) ရုံး အပါအဝင် အနီးအနားရှိ အဆောက်အအုံများ ဒရုန်းဗုံးချ တိုက်ခိုက်ခံခဲ့ရသည်။

အဆိုပါ တိုက်ခိုက်မှုကို မည်သည့် လူပုဂ္ဂိုလ် သို့မဟုတ် အဖွဲ့အစည်းက လုပ်ဆောင်သည်ကိုတော့ မသိရသေးပေ။

CNI News

၂၀၂၅ ခုနှစ်၊ ဒီဇင်ဘာ ၂၈

ယနေ့ (ဒီဇင်ဘာ ၂၈ ရက်) ကျင်းပသည့် ရွေးကောက်ပွဲအပိုင်း(၁)တွင် ရန်ကုန်တိုင်းဒေသကြီး၊ ကမာရွတ်မြို့နယ် အမှတ်(၃)ရပ်ကွက်ရှိ မဲရုံအမှတ် ၄ တွင် မဲပေးပိုင်ခွင့်ရှိသူ ၂၀၇၁ ဦးအနက် ညနေ ၃ နာရီကျော်၌ ၄၅၀ ဝန်းကျင် မဲ လာပေးခဲ့ကြောင်း သိရသည်။ 

CNI News

၂၀၂၅ ခုနှစ်၊ ဒီဇင်ဘာ ၂၈

ရန်ကုန်တိုင်းဒေသကြီး ကမာရွတ်မြို့နယ်၊ အမှတ် (၃) ရပ်ကွက်၊ အ.ထ.က (၅) ကမာရွတ် မဲရုံအမှတ် (၁) တွင် မဲပေးပိုင်ခွင့်ရှိသူ ၁၂၆၆ ဦးအနက် ၁၀၀ ကျော် လာရောက် မဲပေးထားသည်ဟု သိရသည်။

၂၀၂၅ ခုနှစ်၊ ဒီဇင်ဘာ ၂၈ ရက်တွင် ရွေးကောက်ပွဲအပိုင်း (၁) ကို စတင် ကျင်းပနေခြင်းဖြစ်သည်။

CNI News

၂၀၂၅ ခုနှစ်၊ ဒီဇင်ဘာ ၂၈

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်က စတင် ကျင်းပခဲ့သည့် ရွေးကောက်ပွဲအပိုင်း(၁)ကို နိုင်ငံတကာ သံတမန် ၁၃၉ ဦး လာရောက်စောင့်ကြည့် လေ့လာနေသည်ဟု နိုင်ငံတော်ကာကွယ်ရေးနှင့်လုံခြုံရေးကောင်စီ၏ သတင်းထုတ်ပြန်ရေးအဖွဲ့မှ ထုတ်ပြန်ခဲ့သည်။

မြန်မာနိုင်ငံတွင် ကျင်းပနေသည့် ရွေးကောက်ပွဲကို တရုတ်၊ အိန္ဒိယ၊ ရုရှား၊ ဗီယက်နမ်၊ ကမ္ဘောဒီးယား၊ ဘယ်လာရုစ် အပါအဝင် နိုင်ငံတကာမှ သံတမန်များ လာရောက်စောင့်ကြည့် လေ့လာနေကြသည်။