CNI News

၂၀၂၄ ခုနှစ်၊ မေလ ၂၃

စစ်ကိုင်းတိုင်းဒေသကြီး၊ ဟုမ္မလင်းမြို့သိမ်းပိုက်နိုင်ရေးအတွက် အဟန့်အတားဖြစ်နေသည့် ပရစ်ဖာနိုင်းနှင့် လွှစင်းကုန်းကျေးရွာများရှိ ရှမ်းနီအမျိုးသားများတပ်မတော်(SNA)၏ စစ်စခန်းများကို ကချင်လွတ်လပ်ရေး တပ်မတော်(KIA)နှင့် ဟုမ္မလင်း PDF ပူးပေါင်းတပ်ဖွဲ့က မေလ ၂၃ ရက်နေ့မှာ ထိုးစစ်ဆင် တိုက်ခိုက်နေ ကြောင်း သိရသည်။

ရှမ်းနီအမျိုးသားများတပ်မတော်(SNA)သည် ဟုမ္မလင်းမြို့ အပါအဝင် ဟုမ္မလင်းမြို့နယ်အတွင်းရှိ ကျေးရွာ အများစုကို တည်ငြိမ်ရေးနှင့် စစ်ပွဲဇုန် မဖြစ်ပေါ်လာစေရေးအတွက် ထိန်းချုပ်ထားသည်။

ထို့နောက် KIA-PDF ပူးပေါင်းအဖွဲ့က ဟုမ္မလင်းမြို့ အပါအဝင် ဟုမ္မလင်းမြို့နယ်ကို ထိန်းချုပ်နိုင်ရေးအတွက် SNA ကို ထိုးစစ်ဆင်တိုက်ခိုက်လာခြင်းဖြစ်သည်။

ဟုမ္မလင်းမြို့သည် စစ်ရေးအရ အလွန်အရေးပါသော ဒေသဖြစ်ပြီး ဟုမ္မလင်းမြို့ကို ထိန်းချုပ်နိုင်ပါက ရေကြောင်း-ကုန်းကြောင်းကို ထိန်းချုပ်နိုင်မည်ဖြစ်ကြောင်း၊ ထို့အပြင် နာဂဒေသနှင့် ခန္တီးဒေသကိုလည်း ထိန်းချုပ်နိုင်မည် ဖြစ်ကြောင်း၊ ထို့နောက် စစ်ကိုင်းတိုင်းဒေသကြီး အလယ်ပိုင်းမြို့များကို ဆက်လက် ထိုးစစ်ဆင်နိုင်မည်ဖြစ် ကြောင်း ဒေသတွင်း စစ်ရေးနှင့်နိုင်ငံရေး လေ့လာသုံးသပ်သူတစ်ဦးက ပြောသည်။

ဟုမ္မလင်းမြို့နယ်နဲ့ လွှစင်းကုန်းကျေးရွာကို ညွန်ပြထားစဉ်

SNA သည် ရှမ်းနီဒေသများနှင့် ဒေသတွင်းနေ ပြည်သူလူထု၏ အသက်၊ အိုးအိမ်စည်းစိမ် လုံခြုံရေး အပါအဝင် ဒေသတွင်း စစ်ပွဲကြောင့် ကြုံတွေ့လာရနိုင်သော ပျက်စီးဆုံးရှုံးမှုများ မဖြစ်ပေါ်စေရေးအတွက် ဒေသတည်ငြိမ် အေးချမ်းရေးကို ဦးစားပေး ဖော်ဆောင်လျက်ရှိနေသည်။

လက်ရှိတွင် ရွှေပြည်အေး၊ ဗန်းမောက်၊ ဟုမ္မလင်း၊ ပင်လည်ဘူး စသည့် ရှမ်းနီဒေသများ၌ KIA-PDF ပူးပေါင်း တပ်ဖွဲ့နှင့် SNA ကြား တိုက်ပွဲများ ဖြစ်ပွားကာ စစ်ရေးတင်းမာလျက်ရှိနေသည်။

ဟုမ္မလင်းမြို့နယ်အတွက် တိုက်ပွဲများ ပြင်းထန်လာပါက နေအိမ်များ မီးလောင် ဆုံးရှုံးမှုများ ဖြစ်ပေါ်လာနိုင် သလို ဒေသတွင်းနေ ပြည်သူလူထုများ နေရပ်စွန့်ခွာ ထွက်ပြေးတိမ်းရှောင်ရမှုများ ဖြစ်ပေါ်လာနိုင်ကြောင်း၊ ဒေသတွင်း စားသောက်ကုန်နှင့် လူသုံးကုန် ပစ္စည်းများ ဈေးနှုန်းကြီးမြင့်မှုဒဏ်များ ခံလာရနိုင်သလို ဆေးဝါးနှင့် လူသုံးကုန်ပစ္စည်းများ ပြတ်လပ်မှုဒဏ်များ ကြုံတွေ့လာရနိုင်ကြောင်း၊ အလုပ်အကိုင် အခွင့်အလမ်းနှင့် စီးပွား ရေး ကျပ်တည်းမှုများ ရင်ဆိုင်လာရနိုင်ကြောင်း ဟုမ္မလင်းဒေသခံများက ပြောသည်။

လက်ရှိတွင် ဟုမ္မလင်းမြို့နယ်ပြည်သူ့အုပ်ချုပ်ရေးအဖွဲ့က စစ်ကိုင်းတိုင်းဒေသကြီး၊ ဟုမ္မလင်းမြို့နယ်အတွင်းသို့ စက်သုံးဆီ သယ်ယူခွင့်မပြုကြောင်း၊ NUG စိုးမိုးထားသည့် ရေလမ်းဖြင့်ဆိုလျှင် ရွှေပြည်အေးမြို့အထိနှင့် ကုန်းလမ်းဖြင့်ဆိုလျှင် လွှစင်းကုန်းကျေးရွာအထိသာ သယ်ယူခွင့်ပြုမည်ဖြစ်ကြောင်း ယခုလအတွင်းမှာ ထုတ်ပြန်ထားသည်။

CNI News

၂၀၂၄ ခုနှစ်၊ မေလ ၂၁

ဝိုင်းမော်မြို့နယ်အတွင်းမှာ မြန်မာ့တပ်မတော်နှင့် ကချင်လွတ်လပ်ရေးတပ်မတော် (KIA)၊ ပြည်သူ့ကာကွယ်ရေး တပ်ဖွဲ့(PDF) ပူးပေါင်းတပ်ဖွဲ့တို့အကြား တိုက်ပွဲများ ဖြစ်ပွားနေခြင်းကြောင့် ကျေးရွာ ၇ ရွာခန့် ဒေသခံများသည် နေရာစွန့်ခွာ တိမ်းရှောင်နေရကြောင်း သိရသည်။

ဝိုင်းမော်မြို့နှင့် ရွှေညောင်ပင်အကြားရှိ ကျေးရွာများ ပြောင်းရွှေ့ခဲ့ကြကြောင်း၊ လက်ရှိအချိန်ထိ ပြောင်းရွှေ့နေကြ ကြောင်း ဝိုင်းမော်မြို့ခံတစ်ဦးက CNI သတင်းဌာနသို့ ပြောသည်။

၎င်းက “ဝိုင်းမော်နဲ့ ရွှေညောင်ပင်ကြားဆိုရင် ဝိုင်းမော်ကြား ခုနက ပါကရွာ ရှိတယ်လေ၊ မုတ်လွဲရှိတယ်လေ၊ သာယာအေးလေ၊ ဟိုဖက်အတွင်းဖက်ကို ဝင်သွားရင် ခတ်ချို၊ နောင်ဟီး၊ အဲဒါတော့ ငါတို့ရှမ်းရွာတွေကြီးပါ့အေး၊ နောင်ဟီး၊ စမ်းကား၊ နောင်ဟီး၊ စမ်းကားအထိ မရောက်ဘူး။ ရွှေညောင်ပင်အထိပဲ ဆိုရင်တော့ ဟိုဖက်ကနေ ပြန်ရေလာရင် ရွှေညောင်ပင်၊ အောင်မြေ - ၁၊ အောင်မြေ - ၂၊ ခါးရှိ၊ အင်းလေး၊ ဒီဖက် ၅ ရွာလောက်တော့ ရှိတယ် ဒီကြားထဲမှာ အဲဒီ ၅ ရွာ၊ ၆ ရွာလောက်က အကုန်ပြေး၊ အကုန်ရွှေ့၊ ၇ ရွာလောက်ရှိတယ်၊ မနေ့တုန်းကလည်း ရွှေ့တယ်၊ တနေ့လည်း ပြောင်းတယ်၊ ဒီနေ့လည်း အများကြီးပဲ အခု ကားသံတွေ ဆူညံနေတာပဲ၊ ကားနဲ့ သုံးဘီးနဲ့ ဆိုင်ကယ်နဲ့ မီနီအိုးဝေနဲ့ အုတ်တင်တဲ့ကား၊ သဲကျောက်တင်တဲ့ကား အမျိုးမျိုးပါ့ ရွှေ့နေကြတာ၊ ဘယ်တွေကို ရွှေ့နေကြသလဲမသိဘူး။ အဲဒီမှာ ဂေါ်ရခါးလေးတွေ တို့အမအိမ်ရှေ့၊ တို့အိမ်ဝင်က ကျယ်တော့ ရွာလမ်းမကနေ ဟိုကားလမ်းအထိ ဆိုတော့ အစ်မတို့ရဲ့ အိမ်ရှေ့မှာ သုံးဘီးတွေနဲ့ ဘယ်သွားမလို့လဲ မသိဘူး၊ အုပ်စုလိုက်ကြီး ဘယ်ကို ရွှေ့ကြမလဲမသိဘူး။ သွားစရာနေရာလည်း မရှိဘူးလေ၊ ငါတို့လိုပါ့အေး အခု ငါတို့ဆီကိုသာ သူများ ရွှေ့ လာတာ ငါတို့က ဘယ်ကို ပြေးမလဲအေး” ဟု ပြောသည်။

 KIA-PDF ကို တွေ့ရစဉ်

ပြီးခဲ့သည့် မေလ ၁၈ ရက် နံနက်ပိုင်းက မြစ်ကြီးနားမြို့အခြေစိုက် မြောက်ပိုင်းတိုင်းစစ်ဌာနချုပ်နှင့် နန်ပေါင်လေတပ်စခန်း ရှော့တိုက်ဒုံး ပစ်ခတ်ခံခဲ့ရကြောင်း၊ ထိုပစ်ခတ်ခံရမှုတွင် ပမ္မတီးရပ်ကွက်၌ ရှော့တိုက်ဒုံး ကျရောက်ပေါက်ကွဲခြင်းကြောင့် ဆင်ဘိုနယ်မှ တိုက်ပွဲရှောင် လူငယ်အမျိုးသား ၂ ဦးနှင့် ဝပ်ရှော့ဆရာ ၁ ဦးသေဆုံးပြီး ၆ ဦး ထက်မနည်း ထိခိုက်ဒဏ်ရာရရှိခဲ့သည်။ 

ထို့နောက် ဝိုင်းမော်မြို့နယ်တွင် နှစ်ဖက်တိုက်ပွဲ ပြင်းထန်လာပြီး လက်နက်ကြီး ကျရောက်ပေါက်ကွဲမှုများကြောင့် လူသေဆုံးမှုများ ရှိခဲ့သည်။

ဝိုင်းမော်မြို့နယ် ခတ်ချိုကျေးရွာ၏ အရှေ့ဖက်တွင် လက်နက်ကြီး ကျရောက်ပေါက်ကွဲခြင်းကြောင့် မြန်မာနိုင်ငံ အောက်ပိုင်းဒေသမှ စီးပွားရှာ လုပ်ကိုင်နေသည့် မိသားစု အပါအဝင် လူ ၆ ဦး သေဆုံးကာ ၁၀ ကျော် ထိခိုက် ဒဏ်ရာရရှိခဲ့ကြောင်း ဝိုင်းမော်မြို့ခံတစ်ဦးက CNI သတင်းဌာနသို့ ပြောသည်။

ဝိုင်းမော်မြို့နယ်အတွင်းမှ ဒေသခံများ တိုက်ပွဲရှောင်ရန် ထွက်ပြေးနေကြစဉ်

၎င်းက “တနေ့တုန်းက ပစ်လိုက်တဲ့ဟာက အဲဒါက ငါတို့ ရှမ်းလယ်ထဲမှာ ခတ်ချိုရဲ့ အရှေ့ဖက်ပါ့အေး သူတို့ရွာရဲ့ အရှေ့ဖက်မှာ လယ်တွေရှိတယ်လေ၊ လယ်တွေမှာ စစ်ကိုင်းဖက် ၅/တွေ လုပ်စားစရာ ကိုင်စားစရာ မရှိလို့ အဲဒီဖက်မှာ သွားပြီးမှ ရော်ဘာခြံတို့ ငှက်ပျောခြံတို့ သွားပြီးတော့ လုပ်စားတဲ့ဟာတွေ အုတ်ဖုတ်တာတို့ ဘာတို့ အဲဒီလယ်ထဲမှာ သူတို့ သွားတောင်းပြီးမှ နေပြီးမှ မိသားစု နေထိုင်နေကြတဲ့ဟာလေးတွေ လာနေတော့ သွားပြီး တော့ လက်နက်ကြီးက သွားကျတော့ မိသားစုက ၆ ယောက်ရှိတာ၊ ၅ ယောက်ဆုံးသွားတယ်၊ နောက် ရှမ်းတရုတ် တစ်ယောက်လားမသိဘူး ငါတို့ တိုင်းလေ တစ်ယောက် ထိသွားတယ်ထင်တယ်၊ ၆ ယောက်သေတယ်တဲ့၊ ဟိုဟာ ကတော့ မိသားစုအလိုက် ဆုံးသွားတာ အဘွားကြီး တစ်ယောက်ပဲ ကျန်တယ်၊ ၅/က မိသားစုအလိုက်ကတော့” ဟု ပြောသည်။

လက်ရှိတွင် ကချင်ပြည်နယ်အတွင်းရှိ ဝိုင်းမော်၊ ဗန်းမော်၊ တာလောကြီး၊ ဆင်ဘို၊ မိုးမောက်မြို့နယ်တို့တွင် မြန်မာ့တပ်မတော်နှင့် KIA/KPDF ပူးပေါင်းတပ်တို့အကြား တိုက်ပွဲများ ဖြစ်ပွားလျက်ရှိနေသည်။

CNI News

၂၀၂၄ ခုနှစ်၊ မေလ ၂၁

မတရားမှုကို တော်လှန်ရာ၌ ရှမ်းပြည်လူထုတိုင်းတွင် တာဝန်ရှိသဖြင့် တော်လှန်ရေး ဆင်နွှဲရာတွင် ရှမ်းပြည်လူထုများ ပါဝင်ပူးပေါင်းဆင်နွှဲကြပါရန် တိုက်တွန်းသည်ဟု ရှမ်းပြည်ပြန်လည်ထူထောင်ရေးကောင်စီ (RCSS/SSA)က မေလ ၂၁ ရက်နေ့တွင် ထုတ်ပြန်ခဲ့သည်။

၆၆ နှစ်မြောက် ရှမ်းအမျိုးသားတော်လှန်ရေးနေ့ အထိမ်းအမှတ် ထုတ်ပြန်ချက်တွင် အထက်ပါအတိုင်း ၎င်းက တိုက်တွန်းထားခြင်း ဖြစ်သည်။

RCSS က “ မတရားမှုကို တော်လှန်ရာ၌ ရှမ်းပြည်လူထုတိုင်းတွင် တာဝန်ရှိသဖြင့် တော်လှန်ရေး ဆင်နွှဲရာတွင် ရှမ်းပြည်လူထုများ ပါဝင် ပူးပေါင်းဆင်နွှဲကြပါရန် တိုက်တွန်းသည်။ ပြဿနာအရပ်ရပ်ကို ဖြေရှင်းရာတွင် ရှမ်းပြည် ပြန်လည်ထူထောင်ရေးကောင်စီ(RCSS/SSA)သည် ငြိမ်းချမ်းသော တွေ့ဆုံ ဆွေးနွေးခြင်းနည်းလမ်း ဖြင့် သက်ဆိုင်ရာ အဖွဲ့အစည်းများနှင့် တွေ့ဆုံ ဖြေရှင်းသွားမည်”ဟု ထုတ်ပြန်ခဲ့သည်။

RCSS  ထုတ်ပြန်ချက်ကိုတွေ့ရစဉ်

ထို့နောက် အုပ်ချုပ်ရေးစနစ်ကို ပြုပြင်ပြောင်းလဲပြီး ဖက်ဒရယ်ဒီမိုကရေစီ ပြည်ထောင်စု ဖြစ်ပေါ်လာရေးအတွက် ရှမ်းပြည်ပြန်လည်ထူထောင်ရေးကောင်စီ(RCSS)သည် အဖက်ဖက်နှင့် တွေ့ဆုံဆွေးနွေး၍ ကြိုးပမ်းဆောင်ရွက် သွားမည်၊ တာဝန်ရှိနေသောကြောင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)အသိ သက်သေ နိုင်ငံများအနေဖြင့် ပြည်ထောင်စု မြန်မာနိုင်ငံ၏ ပြဿနာများကို ဖြေရှင်းရာတွင် ပါဝင်ကူညီဖြေရှင်း ပေးကြပါရန် တိုက်တွန်းသည်ဟု RCSS က ထုတ်ပြန်ခဲ့သည်။

RCSS သည် ရှမ်းပြည်နယ်အတွင်း စစ်မှုမထမ်း မနေရပြဋ္ဌာန်းချက် ထုတ်ပြန်ခဲ့ပြီးနောက် တပ်သားသစ် ၆၀၀၀ ကျော်ကို စစ်သင်တန်း ပေးလျက်ရှိသလို စစ်တိုက်ခြင်းမရှိဘဲ အုပ်ချုပ်ရေး နယ်မြေများချဲ့ထွင်လျက်ရှိသည်။

တခြားတစ်ဖက်မှာတော့ NCA ထိုးထားသည့်အတွက် မြန်မာ့တပ်မတော်နှင့် တွေ့ဆုံ ဆွေးနွေးလျက်ရှိသလို တခြားသော NCA ထိုးထားသည့် လက်နက်ကိုင်အဖွဲ့များနှင့် မဟာမိတ်ဖွဲ့ကာ ဦးဆောင်လျက်ရှိသည်။

ရှမ်းပြည်နယ်၊ ရပ်စောက်မြို့နယ်အတွင်းမှာ မေလ ၁၇ ရက်နေ့က ရှမ်းပြည်တိုးတက်ရေးပါတီ(SSPP/SSA)နှင့် “ဝ”ပြည်သွေးစည်းညီညွတ်ရေးတပ်မတော်(UWSA) တပ်ဖွဲ့များဖြင့် RCSS သည် တိုက်ပွဲဖြစ်ပွားခဲ့သေးသည်။

CNI News
၂၀၂၄ ခုနှစ်၊ မေလ ၂၀

ထိုင်ဝမ်ကို နိုင်ငံအဖြစ် အသိအမှတ် မပြုဘဲ တရုတ်တစ်နိုင်ငံတည်း မူဝါဒအပေါ်မှာပဲ ထောက်ခံရပ်တည် သွားမည်ဟု နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ၂၀၂၄ ခုနှစ်၊ မေလ ၂၀ ရက်နေ့ ညက သတင်းထုတ်ပြန် ပြောကြားခဲ့သည်။

ထိုင်ဝမ်တွင် သမ္မတရွေးကောက်ပွဲ ကျင်းပခဲ့ပြီးနောက် ဒုသမ္မတဖြစ်သူ လိုင်ချင်တေက ရွေးကောက်တင်မြှောက် ခံခဲ့ရ၍ မေလ ၂၀ ရက်နေ့မှာ ကျမ်းသစ္စာကျိန်ဆွဲပွဲ ကျင်းပခဲ့သည်။

အဆိုပါ အခြေအနေနှင့် ပတ်သက်ပြီး နစက-က ထိုင်ဝမ်ကို နိုင်ငံအဖြစ် အသိအမှတ် မပြုကြောင်း၊ တရုတ် တစ်နိုင်ငံတည်း မူဝါဒကိုသာ ထောက်ခံကြောင်း သတင်းထုတ်ပြန်ခဲ့သည်။

ဗိုလ်ချုပ်ဇော်မင်းထွန်းက “မြန်မာနိုင်ငံဟာ ထိုင်ဝမ်နဲ့ သံတမန် အဆက်အသွယ် မရှိသလို နိုင်ငံတစ်ခု အဖြစ် အသိအမှတ်ပြုထားခြင်း မရှိပါဘူး။ မြန်မာနိုင်ငံဟာ တရုတ်ပြည်သူ့သမ္မတနိုင်ငံ စတင်ပေါ်ပေါက်လာ ကတည်းက တရုတ်တစ်နိုင်ငံတည်း မူဝါဒအပေါ် ခိုင်မာစွာရပ်တည် ထောက်ခံရပ်တည်ခဲ့တဲ့နိုင်ငံဖြစ်ပါတယ်။ ဆက်လက်ပြီး ခိုင်မြဲစွာ ရပ်တည်သွားမှာဖြစ်ပါတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ တရုတ်အထူးကိုယ်စားလှယ် တိန့်ရှီးကျွင်းကို တွေ့ရစဉ်

မြန်မာနိုင်ငံသည် တရုတ်ပြည်သူ့သမ္မတနိုင်ငံ အဖြစ် စတင်ပေါ်ပေါက်လာခဲ့သည့် ၁၉၄၉ ခုနှစ်ကတည်းက အစောဆုံး အသိအမှတ်ပြု ထောက်ခံခဲ့သော နိုင်ငံများထဲက တစ်နိုင်ငံဖြစ်သည်။

ထို့နောက် တရုတ်နိုင်ငံအတွင်းမှာ စစ်ရှုံး၍ မြန်မာနိုင်ငံထဲသို့ ရောက်လာသော တရုတ်ဖြူ (ကူမင်တန်) တပ်ကို မြန်မာ့တပ်မတော်က စစ်ရေးကြီး ၁၁ ခုဖြင့် တိုက်ခိုက်မောင်းထုတ်ခဲ့ရသည်ဟု နစကသတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

၎င်းက “တရုတ်ပြည်သူ့သမ္မတနိုင်ငံနဲ့ မြန်မာနိုင်ငံဟာ မဟာဗျူဟာ မိတ်ဖက်နိုင်ငံတွေဖြစ်ပြီး ဆွေမျိုးပေါက်ဖော် ဆက်ဆံရေးကို အစဉ်အဆက် ထိန်းသိမ်းခဲ့တဲ့ အိမ်နီးချင်း မိတ်ဆွေကောင်း နိုင်ငံဖြစ်ပါတယ်။ ပြီးရင် တရုတ် နိုင်ငံထဲမှာ စစ်ရှုံးပြီးတော့မှ မြန်မာနိုင်ငံထဲ ကျူးကျော်ဝင်ရောက်ပြီးတော့ တရုတ်ကို ပြန်လည် တိုက်ခိုက်ဖို့ လုပ်ဆောင်ခဲ့တဲ့ ကူမင်တန် တရုတ်ဖြူတပ်တွေကို ၁၉၅၃ ခုနှစ်တုန်းက မြန်မာ့တပ်မတော်က စစ်ဆင်ရေး ၁၁ ခုနဲ့ ချေမှုန်း ခဲ့ရပါတယ်။ ရောက်နေတဲ့ တရုတ်ဖြူတပ်တွေကို ထောက်ခံအားပေးပြီး ထောက်ပံ့ပေးနေတာ ကလည်း အမေရိကန်နိုင်ငံပဲ ဖြစ်ပါတယ်”ဟု ပြောသည်။

၂၀၂၄ ခုနှစ်၊ မေလ ၂၀ ရက်နေ့က ထိုင်ဝမ်သမ္မတသစ် လိုင်ချင်တေ ကျမ်းသစ္စာကျိန်ဆိုပွဲ ကျင်းပနေစဉ်  

ထိုစဉ်အချိန်က တရုတ်ဖြူ(ကူမင်တန်)တပ်ဖွဲ့များကို ထောက်ခံ အားပေး၍ ထောက်ပံ့ပေးခဲ့သည်မှာ အမေရိကန် နိုင်ငံဖြစ်သည်ဟုလည်း နစက-က ပြောသည်။

လက်ရှိတွင် ထိုင်ဝမ်ကို တရုတ်က မိမိပိုင်နယ်မြေဖြစ်ပြီး လိုအပ်ပါက စစ်ရေးအရတိုက်ခိုက် သိမ်းပိုက်သွားမည် ဟု ပြောကြားထားသည်။

ထို့နောက် ထိုင်ဝမ်းကျွန်းအနီးမှာ တရုတ်စစ်တပ်က တိုက်လေယာဉ်များ ပျံသန်းခြင်း၊ စစ်သင်္ဘောများ စေလွှတ် ၍ ဖြတ်သန်းမောင်းနှင်ခြင်း၊ စစ်ရေးလေ့ကျင့်ခြင်း စသည့် ဖိအားပေးမှုများ ပြုလုပ်လျက်ရှိသည်။

CNI News

၂၀၂၄ ခုနှစ်၊ မေလ ၂၀

ညီအကိုအချင်းချင်း တိုက်ခိုက်ပြီး ချင်းပြည်ကို တည်ထောင်၍မရကြောင်း ဇိုမီးတော်လှန်ရေးတပ်မတော်-အရှေ့ပိုင်းတိုင်း (ZRA-Eastern Command)မှ အရှေ့ပိုင်းဒါရိုက်တာ ပူဇိုထန်က CNI သတင်းဌာနသို့ ပြောသည်။

လက်ရှိတွင် မိမိတို့ ZRA ကို ချင်းအမျိုးသားတပ်ဦး (CNF/CNA) နှင့် ပူးပေါင်းတပ်ဖွဲ့များက အင်အားအလုံး အရင်းဖြင့် လာရောက်တိုက်ခိုက်ခြင်းကြောင့် တပ်ဆုတ်ထားကြောင်း၊ ယခုကဲ့သို့ လာရောက်တိုက်ခိုက် သော်လည်း မိမိတို့ ZRA က တပ်ပျက်သွားမှာ မဟုတ်ကြောင်း ၎င်းက ပြောသည်။

ZRA-EC မှ အရှေ့ပိုင်းဒါရိုက်တာ ပူဇိုထန်က “ကျနော်တို့ အခုတော့ မဆီမဆိုင်ဘဲလေ သူတို့က ရန်သူလိုမှတ်ပြီး တော့ လာလုပ်တာပါ၊ ကျနော်တို့မှာတော့ ပုံမှန် ကိုယ့်ဒေသ ကိုယ့်ဒေသခံ လက်နက်ကိုင်တွေနဲ့ လှုပ်ရှားနေတဲ့ အချိန်မှာ သူတို့က အလုံးအရင်းနဲ့ လာတိုက်တော့ ကျနော်တို့လည်း နည်းနည်း တပ်ဆုတ်တာပေါ့၊ နည်းနည်းဆုတ် သွားတာပေါ့၊ ဒါပေမဲ့ ကျနော်တို့မှာ ကျနော်တို့ရဲ့ နိုင်ငံရေး ခံယူချက်တော့ ဘာမှမပြောင်းလဲပါဘူး။ သူတို့မှာ မှားယွင်းတဲ့ သတင်းပေးမှုကြောင့်ပေါ့နော် အဲဒါမျိုး ရန်သူလိုမှတ်ပြီးတော့ လုပ်တာတော့ သိပ်မတရားဘူးလေ၊ ရေရှည်မှာ သမိုင်းဝင်ဖြစ်သွားမယ်၊ သူတို့ကြောင့် ကျနော်တို့ တပ်ပျက်မှာလည်း မဟုတ်ဘူး။ ဆိုတော့ ရှေ့အလား အလာမှာတော့ နိုင်ငံရေးကို နိုင်ငံရေးနဲ့ လုပ်မယ်၊ စစ်ရေးကို စစ်ရေးနဲ့ လုပ်မယ်ဆိုတော့ ကောင်းတာပေါ့။ မဆီမဆိုင်ဘဲနဲ့ ကျနော်တို့ အချင်းချင်းတိုက်လို့ ဘာမှအကျိုးလည်း မရှိဘူး။ သေတာပဲ ရှိတယ်၊ ပျက်ဆီးတာပဲ ရှိတယ်၊ အဲဒါမျိုး သူတို့ ခေါင်းဆောင်ပိုင်းမှာ သိရင်ကောင်းတာပေါ့၊ ဒါပေမဲ့ သူတို့လုပ်ပုံ လုပ်နည်းကတော့ ရေရှည် ခံမယ့် ပုံစံတော့ မဟုတ်ဘူးဗျ၊ နောက်ကျရင် သူတို့ အမှားကို သိပါလိမ့်မယ်၊ အချင်းချင်းတိုက်တော့ ဘာရမှာလဲ၊ မဟုတ်မမှန် သတင်းထုတ်လွှင့်တာကို ယုံပြီးတော့ ကိုယ့်ညီကို မောင်နှမ အချင်းချင်း ချတာတော့ သိပ်အကျိုးမရှိ ဘူးဆိုတာ သူတို့ သိစေချင်တယ်၊ နိုင်ငံရေးဆိုတာ အချင်းချင်း သတ်ဖြတ်ပြီးတော့ တည်ထောင်မယ်၊ ချင်းပြည်ရဲ့ နိုင်ငံရေးကို ငါတို့ဦးဆောင်မယ်ဆိုတဲ့ စနစ်ရှိရင်တော့ ကျနော်တို့ ညီကိုအချင်းချင်း ကြားမှာတော့ ဆက်ဆံရေး တော့ ပျက်သွားမှာပဲ၊ ကောင်းတဲ့ အလားအလာတော့ မရှိဘူးပေါ့နော်၊ အဲဒီအတိုင်းဆိုရင်တော့ မရဘူးပေါ့” ဟု ပြောသည်။

CNF တပ်ဖွဲ့ကို တွေ့ရစဉ်

၂၀၂၄ ခုနှစ်၊ မေလ ၁၉ ရက်နေ့က ချင်းပြည်နယ်အတွင်းရှိ တွန်းဇံမြို့နှင့် ကျီခါးမြို့ကို CNA နှင့် ပူးပေါင်းတပ်ဖွဲ့က သိမ်းပိုက်လိုက်ကြောင်း၊ ထိုမြို့နယ်များအတွင်းရှိ ZRA စစ်စခန်းများကို တိုက်ခိုက်သိမ်းပိုက်ခဲ့ကြောင်း ချင်း ဒေသတွင်း သတင်းဌာနများ၏ ဖော်ပြချက်အရ သိရသည်။

အဆိုပါ တွန်းဇံမြို့နှင့် ကျီခါးမြို့ကို CNA ပူးပေါင်းတပ်ဖွဲ့က သိမ်းပိုက်လိုက်သည်ဆိုသည့် ကိစ္စနှင့် ပတ်သက်၍ အကြောင်းစုံသိရှိနိုင်ရေး CNF မှ ပြန်ကြားရေးတာဝန်ခံ ဆလိုင်းထက်နီထံ CNI က ဖုန်းဆက်သွယ်ခဲ့သော်လည်း ဆက်သွယ်၍ မရသေးပေ။

ချင်းပြည်နယ်တွင် ဇိုမီးတော်လှန်ရေးတပ်မတော်/အရှေ့ပိုင်းတိုင်း(ZRA)နှင့် ချင်းအမျိုးသားတပ်ဦး (CNF/CNA) တို့အကြား မကြာခဏ တိုက်ပွဲများ ဖြစ်ပွားလေ့ရှိသည်။

CNF ဦးဆောင်သည့် ပူးပေါင်းတပ်ဖွဲ့သည် ကုန်သွယ်ရေးလမ်းကြောင်းနှင့် အခွန်ကောက်ခံမှုများ ကျယ်ကျယ် ပြန့်ပြန့် ထိန်းချုပ်နိုင်ရေးအတွက် ZRA တပ်ဖွဲ့ကို တိုက်ခိုက်နေခြင်းဖြစ်သည်ဟု CNF နှင့်နီးစပ်သူ ချင်း တိုင်းရင်းသားတစ်ဦးက ပြောသည်။

ချင်းမျိုးနွယ်စု လက်နက်ကိုင်တပ်ဖွဲ့အချင်းချင်း တိုက်ခိုက်နေသမျှ စည်းလုံညီညွတ်သော ချင်းပြည်ကို တည်ဆောက်နိုင်မှာ မဟုတ်ကြောင်း၊ မျိုးနွယ်စု အချင်းချင်းအကြား အမုန်းတရားဖြင့် သွားနေမှာဖြစ်ကြောင်း ZRA-EC မှ အရှေ့ပိုင်းဒါရိုက်တာ ပူဇိုထန်က ပြောသည်။

ZRA တပ်ဖွဲ့ကို တွေ့ရစဉ်

၎င်းက “ကျနော်ပြောချင်တာက အချင်းချင်းတိုက်လို့ နိုင်ငံရေး မတည်ဆောက်နိုင်ပါဘူး။ စည်းလုံးညီညွတ်တဲ့ ချင်းပြည်ကို ကျနော်တို့ တည်ဆောက်နိုင်မှာ မဟုတ်ဘူး။ ညှိမှ ရမယ်လေ၊ သူတို့က ZRA ခေါင်းဆောင်ပိုင်းတွေနဲ့ ညှိလည်း မညှိဘူး။ မင်းတို့ကောင်တွေဆိုပြီးမှ အထင်သေးပြီး လျှောက်လုပ်တဲ့အခါကြတော့ မဟုတ်တာတွေ ဖြစ်ကုန်တာပေါ့လေ၊ အချင်းချင်းညှိပြီးတော့လေ ဘာပဲဖြစ်ဖြစ် အခုမဖြစ်နိုင်ရင်‌တောင် ဖုန်းနဲ့ ဆက်သွယ်ပြီးတော့ လုပ်ရင်တော့ အကောင်းဆုံးပဲလေ၊ ဒါမျိုးမလုပ်ဘဲနဲ့ ဒီအတိုင်း ဆက်သွားရင်တော့ ကျနော်တို့က ညီကိုမောင်နှမ ကြားထဲမှာ ရာသက်ပန် အမုန်းတရားနဲ့ ဆက်သွားမယ်ဆိုတာတော့ သေချာတာပေါ့” ဟု ပြောသည်။

ZRA သည် မြန်မာနိုင်ငံအတွင်းရှိ ချင်းပြည်နယ် တွန်းဇံမြို့နယ်၊ တီးတိန်မြို့နယ်၊ စစ်ကိုင်းတိုင်း ဒေသကြီးအတွင်းရှိ ကလေးမြို့နယ်၊ တမူးမြို့နယ်၊ ကဘော်ချိုင့်ဝှမ်းဒေသ၊ မြန်မာ-အိန္ဒိယနယ်စပ် စသည့် နေရာဒေသများတွင် လှုပ်ရှားလျက်ရှိသည်။

CNF သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားသော ချင်းလက်နက်ကိုင်တပ်ဖွဲ့ဖြစ်ပြီး ထန်တလန်မြို့နယ်တွင် ဌာနချုပ်ထားရှိကာ ဟားခါး၊ တီးတိန်၊ မတူပီတို့တွင် လှုပ်ရှားလျက်ရှိသည်။

CNI News

၂၀၂၄ ခုနှစ်၊ မေလ ၁၈

ရှမ်းပြည်နယ်၊ ရပ်စောက်မြို့နယ်၊ ကျိုင်းခမ်းအုပ်စုအတွင်းမှာ ရှမ်းပြည်ပြန်လည်ထူထောင်ရေးကောင်စီ(RCSS) နှင့် ရှမ်းပြည်တိုးတက်ရေးပါတီ(SSPP)၊ “ဝ”ပြည်သွေးစည်းညီညွတ်ရေးတပ်မတော်(UWSA) ပူးပေါင်းတပ်ဖွဲ့ ကြား ၂၀၂၄ ခုနှစ်၊ မေလ ၁၇ ရက်နေ့က တိုက်ပွဲဖြစ်ပွားခဲ့ကြောင်း Tai Freedom မှ ဖော်ပြခဲ့သည်။

Tai Freedom သည် RCSS ထူထောင်ထားသော သတင်းပြန်ကြားရေးဌာနဖြစ်သည်။

မေလ ၁၇ ရက်နေ့ နံနက် ၈ နာရီခွဲက SSPP-UWSA တပ်ဖွဲ့တို့သည် ရပ်စောက်မြို့နယ်၊ ကျိုင်းခမ်းကျေးရွာအုပ် စု၊ နားစံကျေးရွာမြောက်ဘက်တွင် လှုပ်ရှားလျက်ရှိသော RCSS တပ်ဖွဲ့ကို ထိုးစစ်ဆင်တိုက်ခိုက်လာခြင်းကြောင့် မိနစ် ၂၀ ခန့် တိုက်ပွဲဖြစ်ပွားခဲ့ကြောင်း သိရသည်။

ထို့နောက် UWSA က သံလွင်မြစ် အနောက်ခြမ်းကို စစ်အင်အားဖြည့်တွင်းလျက်ရှိသလို မြန်မာ့တပ်မတော်က အင်အား ၃၅၀ ခန့်ပါသော စစ်ကြောင်းကလည်း RCSS ထံ ထိုးဆင်စစ်နေသည့်အတွက် စစ်ရေးတင်းမာလျက်ရှိ သည်ဟု Tai Freedom က ဖော်ပြထားသည်။

လတ်တလောတွင် RCSS က နားစံကျေးရွာအနီးကနေ တပ်ဆုတ်ပေးခဲ့ကြောင်း ထုတ်ပြန်ခဲ့သည်။

အဆိုပါ တိုက်ပွဲအတွင်း မြန်မာ့တပ်မတော်က SSPP-UWSA ဘက်ကနေ ကူညီတိုက်ခိုက်ပေးနေခြင်းမှာ မဖြစ်နိုင်ကြောင်း၊ SSPP ၏ ဒုဥက္ကဋ္ဌဖြစ်သူ ဒုတိယဗိုလ်ချုပ်ကြီး စဝ်ခွန်ဆိုင်က နိုင်ငံရေးအရ တွေ့ဆုံဆွေးနွေး၍ မရတော့ခြင်းကြောင့် မြန်မာ့တပ်မတော်ကို စစ်တိုက်ရတော့မည်ဟု မကြာသေးခင်က ပြောကြားထားကြောင်း စစ်ရေးအကဲခတ်တစ်ဦးက ထောက်ပြသည်။

RCSS နှင့် SSPP သည် ၂၀၂၃ ခုနှစ်၊ နိုဝင်ဘာ ၉ ရက်နေ့က နှစ်ဖက်အပစ်အခတ်ရပ်စဲကြောင်း ထုတ်ပြန် ကြေညာခဲ့သည်။

RCSS သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးထားသည့် အဖွဲ့ဖြစ်ပြီး SSPP-UWSA ကတော့ NCA ထိုးထားခြင်း မရှိသေးပေ။

#RCSS #SSPP #UWSA #ရှမ်းပြည်နယ် #ရပ်စောက်မြို့ #နိုင်ငံရေး #CNImyanmar #cninews

CNI News

၂၀၂၄ ခုနှစ်၊ မေလ ၁၇

ရခိုင်ပြည်နယ်အတွင်းက ဘင်္ဂါလီအရေးနှင့် ပတ်သက်၍ နစကနှင့် အာရက္ခတပ်တော် (AA) တို့ ဘယ်လို ကိုင်တွယ် ဖြေရှင်းမလဲဆိုသည့်အပေါ်  ရခိုင်နိုင်ငံရေးသမားများနှင့် ပြည်တွင်း နိုင်ငံရေးအသိုင်းအဝိုင်းကြား သုံးသပ်လျက်ရှိ နေသည်။

ယခုနှစ် အစောပိုင်းကာလမှ စတင်ကာ ဘင်္ဂါလီအရေး ကျယ်ကျယ်ပြန့်ပြန့် ဖြစ်ပေါ်လာခဲ့ပြီး လူမျိုးရေးပဋိပက္ခ ဦးတည်မှာကို စိုးရိမ်မှုများလည်း ရှိနေကြသည်။

အဆိုပါ ကိစ္စမှာ လွတ်လပ်ရေး ရပြီးကတည်းက ဖြစ်ပေါ်လာခဲ့ခြင်းဖြစ်ကြောင်း၊ ပဋိပက္ခဖြေရှင်းနိုင်ရေးမှာ နစက နှင့် AA အပေါ်တွင် မူတည်မည်ဖြစ်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

ဗိုလ်ချုပ်ဇော်မင်းထွန်းကို တွေ့ရစဉ်

၎င်းက “ဘူးသီးတောင်၊ မောင်တောဘက်မှာ စစ်ရေးအရ တိုက်ပွဲဝင်နေတဲ့ AA တို့ကလည်း ဘင်္ဂါလီတွေကို စည်းရုံးနေတဲ့ သဘောရှိပါတယ်။ နောက် နစကဘက်ကလည်းပဲ ကိုယ့်ရပ်ရွာ၊ ကိုယ့်ဒေသကို ကိုယ်တို့ကိုယ်တိုင် ကာကွယ်ဖို့အတွက် စစ်သင်တန်းပေးနေတယ် ရပ်ရွာကာကွယ်ရေးအတွက် စစ်မှုထမ်းဆိုတဲ့ဖက်ကို ရောက်ပုံ မပေါက်ဘူး။ အဲဒီလိုမျိုး ပြည်သူ့စစ်အနေနဲ့ သင်တန်းပေးနေတဲ့ပုံ ပေါက်ပါတယ်။ အဲဒီနှစ်ခုတော့ အားပြိုင်နေကြ တာပေါ့၊ တကယ်လို့ စစ်မှုထမ်းဥပဒေအရ ဆိုရင်တော့ဖြင့် နိုင်ငံသားပေးရတော့မှာပေါ့၊ ဧည့် (ဧည့်နိုင်ငံသား) သို့မဟုတ် ပြုနိုင်ငံသား (နိုင်ငံသားခွင့်ပြုရသူ) တစ်ခုခုပေးမှပဲ ပြည်သူ့စစ်မှုထမ်းဥပဒေအရ တစ်နှစ်သာ စစ်မှုထမ်းအောင် ဆင့်ခေါ်ပိုင်ခွင့် ဥပဒေအရ ရှိတာကို စစ်မှုထမ်းခွင့် ပေးမယ်ဆိုရင် ဧည့် သို့မဟုတ် ပြု နိုင်ငံသား ကဖြင့် ဥပဒေအရ ပေးကိုပေးရတော့မှာ အဲဒီလိုဆိုရင် ဖြစ်လာနိုင်တဲ့ အနာဂတ်ရဲ့ ရခိုင်ဒေသအနေအထား မြန်မာ နိုင်ငံရဲ့ အနေအထားကိုလည်းပဲ နစကလည်း တွက်မှာပေါ့၊ ULA/AA ဖက်ကလည်း တွက်မှာပေါ့၊ ရခိုင်လူထုဖက်က လည်း တွက်မှာပေါ့၊ အဲဒီလို အားပြိုင်မှုကတော့ ရှိနေပါတယ်၊ အထူးသဖြင့် ရခိုင်ပြည်နယ်မြောက်ပိုင်း မောင်တော ရဲ့ မြောက်ပိုင်းမှာကြတော့ ဘင်္ဂါလီတွေက များပါတယ်။ ဘူးသီးတောင် ဘက်ခြမ်းမှာလည်း တော်တော်များပါ တယ်။ အဲဒီဒေသ တည်ငြိမ်အေးချမ်းမှုကတော့ဖြင့် နစကနဲ့ ULA/AA ဖက်က ဘယ်လို ညှိနှိုင်းကြမှာလဲ ဘယ်လို ရှေ့ဆက်ပြီးတော့ တစ်ဖက်နဲ့ တစ်ဖက် တိုက်ကြခိုက်ကြ မြေပြင်အပိုင်ရရှိရေးကို တိုက်ပွဲဝင်ကြမှာလဲဆိုတဲ့ဟာနဲ့ ဆိုင်မယ်ထင်ပါတယ်” ဟု ပြောသည်။

ရခိုင်ပြည်နယ်မှာ ၂၀၁၇ ခုနှစ်က တပ်မတော်၏ နယ်မြေရှင်းလင်းမှု နောက်ပိုင်း ဘင်္ဂလားဒေ့ရှ်ကို ရောက်ရှိသွား သော ဘင်္ဂါလီများမှာ လဝက စာရင်းများအရ ၇ သိန်းခွဲ နေရပ်စွန့်ခွာခဲ့ကြောင်း၊ လက်ရှိ နိုင်ငံတကာ အဖွဲ့အစည်း များ၏ စာရင်းတွင် ၁.၂ သန်းအထက်ရှိသည်ဟု ဖော်ပြထားကြောင်း ၎င်းက ပြောသည်။

အဆိုပါဖြစ်စဉ်နှင့် ပတ်သက်၍ မြန်မာ့တပ်မတော်ကို နိုင်ငံတကာက ပိတ်ဆို့ အရေးယူမှုများ ပြုလုပ်ခဲ့သလို ICJ မှာလည်း တရားဆွဲဆိုမှုများ ပြုလုပ်ခဲ့သည်။

ရခိုင်ပြည်နယ်မြောက်ပိုင်းကို ရယူလိုသော အုပ်စုက အစဉ်အဆက် ကြိုးပမ်းခဲ့ကြကြောင်း၊ ယခုကိစ္စမှာလည်း နိုင်ငံရေး အခင်းအကျင်းအရ ဖြစ်ပွားလာခဲ့ခြင်းဖြစ်ကြောင်း ရခိုင်အမျိုးသားပါတီ (ANP) မှ မူဝါဒရေးရာဦးဆောင် ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

၎င်းက “ဒီကိစ္စက အခုမှ ဖြစ်လာတဲ့ ကိစ္စမဟုတ်ပါဘူးခင်ဗျ၊ အင်္ဂလိပ်အဆုတ် ဂျပန်အတက်မှာ ၁၉၄၂ ခုနှစ် ကတည်းက အဲဒီရခိုင်မြောက်ပိုင်းကို လိုချင်တဲ့ လူတွေရဲ့ ဦးဆောင်မှုနဲ့ မလိုလားအပ်တဲ့ ပြဿနာတွေ ကြီးကြီး ကျယ်ကျယ် လူမျိုးသုန်း သတ်တာတွေတောင် ဖြစ်ခဲ့သေးတာပဲ၊ ၁၉၄၂ ခုနှစ်မှာ သူတို့ရဲ့ လိုအပ်ဆန္ဒက ရှင်းနေ တယ်၊ အဲဒီနေရာကို သူတို့ တစ်ခုခု အကောင်အထည်ဖော်ချင်တဲ့ဆန္ဒက စဉ်ဆက်မပျက် လှုပ်ရှားလာတဲ့ သမိုင်း အထောက်အထားတွေ ရှိနေတယ်၊ အဲဒါကြောင့် အခုမှ နိုင်ငံရေး အခြေအနေအရ ပေါက်ပေါ်လာတဲ့ ပြဿနာ မဟုတ်ပါဘူး။ ၁၉၄၂ ခုနှစ်ကတည်းက စတင်ခဲ့တဲ့ တစိုက်မတ်မတ် ကြိုးစားလာတဲ့ နောက်ဆက်တွဲ ပြဿနာ အခုထပ်ပြီး ပေါ်ပေါက်လာတယ်လို့ပဲ ကျနော်တို့က အဲဒီလိုပဲ သုံးသပ်ပါတယ်” ဟု ပြောသည်။  

AA က ဘင်္ဂါလီများကို တိုက်ပွဲလွတ်ရာခေါ်ဆောင်နေစဉ်

လူမျိုးရေးပဋိပက္ခတိုင်းတွင် တပ်မတော်၊ အစိုးရ၊ လုံခြုံရေးတပ်ဖွဲ့ဝင်များက စတင်ခဲ့ခြင်း မဟုတ်ကြောင်း၊ လူမျိုး အချင်းချင်းမှ စခဲ့ခြင်းဖြစ်ကြောင်း နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက CNI သတင်းဌာနသို့ ပြောသည်။

၎င်းက “အဲဒီမှာဖြစ်နေတဲ့ လူမျိုးရေးပဋိပက္ခတိုင်းမှာ အစိုးရ၊ လုံခြုံရေးအဖွဲ့အစည်း၊ တပ်မတော်၊ အစိုးရဝန်ထမ်း များက စခဲ့တာ မဟုတ်ဘူး။ လူမျိုးအချင်းချင်းကပဲ စခဲ့တာဖြစ်တယ်၊ အဲဒီမီးကို ငြိမ်းသတ်ရတာက တပ်မတော်၊ လုံခြုံရေးတပ်ဖွဲ့ဝင်၊ အစိုးရတွေဖြစ်တယ်၊ ဒါကြောင့်မို့လို့ ကျနော်ပြောချင်တာက အစိုးရအနေနဲ့ရော လုံခြုံရေး အဖွဲ့အစည်းအနေနဲ့ရော ဘယ်တော့မှ အလုပ်ရှုပ်ခံပြီး လူမျိုးရေးပဋိပက္ခဖြစ်အောင် ဘယ်တော့မှ မလုပ်ဘူး။ လူမျိုးရေးပဋိပက္ခဖြစ်လာရင် ရှင်းလိုက်ရတဲ့ ပြဿနာ နည်းတာမဟုတ်ဘူး။ ခေါင်းခံရတဲ့ ပြဿနာ နည်းတာ မဟုတ်ဘူး။ တာဝန်ယူမှု၊ တာဝန်ခံမှု နည်းတာ မဟုတ်ဘူး။ ခုချိန်မှာတော့ AA အနေနဲ့ လူမျိုးရေး ပဋိက္ခအသွင် ဆောင်အောင် လုပ်နေတာ တွေ့ရပါတယ်” ဟု ပြောသည်။

လက်ရှိ ရခိုင်ပြည်နယ်တွင် AA ကို ဘင်္ဂါလီများက ဆန့်ကျင် ဆန္ဒမှုများ ပေါ်ပေါက်နေသလို မြန်မာ့တပ်မတော် သည် ဘင်္ဂါလီလူမျိုးများကို အသုံးချနေသည်ဟုလည်း AA ဘက် စွပ်စွဲလျက်ရှိနေသည်။

CNI News

၂၀၂၄ ခုနှစ်၊ မေလ ၁၆

ကယား(ကရင်နီ) ပြည်နယ်၊ လွိုင်ကော်မြို့က တိုက်ပွဲရှောင်အများစု လုံခြုံရေး အနေအထားအရ နေရပ်မပြန်နိုင် သေးကြောင်း လွိုင်ကော်တိုက်ပွဲရှောင်တစ်ဦးက CNI သတင်းဌာနသို့ ပြောသည်။

တိုက်ပွဲရှောင် ၈၀ ရာခိုင်နှုန်း နေရပ်ပြန်ရန် မဖြစ်နိုင်တော့ကြောင်း၊ မိမိတို့ နေအိမ်၊ ဆိုင်ကယ်များမှာလည်း မီးလောင်ပျက်စီးသွားပြီဖြစ်ကြောင်း ၎င်းက ပြောသည်။

လွိုင်ကော်တိုက်ပွဲရှောင်တစ်ဦး “ဝင်လို့က မဖြစ်နိုင်ဘူး။ ဒီလိုပုံစံ ခဏခဏ တိုက်ပွဲတွေ ဖြစ်နေတာကို၊ လွိုင်ကော် ဝင်ဖို့ကတော့ ကျနော့် အမြင်နဲ့က လုံးလုံး စိတ်မချရဘူး။ စိတ်မချရဘူးဆိုတော့ ကျနော်တို့လည်း ဝင်ဖို့ အဆင် မပြေဘူး။ မြို့လယ်က ရပ်ကွက်တွေမှာက ဘယ်သူမှ ပြန်လာကြတာ မတွေ့ဘူးလေ၊ တစ်ဖက်ဖက် အပြတ် အသတ် အနိုင်ရလို့ ပြန်ခွင့်ရှိရင်တောင် ဘယ်လိုပြန်မှာလဲ၊ မီးလောင်ပြင်ကြီး ဖြစ်နေပြီလေ၊ ဘယ်လိုပြန်လာရမလဲ အိမ်တွေမှ မရှိတော့တာလေ၊ အကုန်လုံး မီးရှို့ထားတာကြီးကို၊ မီးလောင်ပြင်လို ဖြစ်နေတော့၊ မြို့ရဲ့အစွန်အဖျား နေရာတော့ တချို့လည်း ပြန်ကြတယ်၊ တချို့လည်း ပြန်ပြီး ပြန်လာကြတယ်၊ တိုက်ပွဲတွေ ဖြစ်နေတော့” ဟု CNI သတင်းဌာနသို့ ပြောသည်။

KNDF တပ်ဖွဲ့ကိုတွေ့ရစဉ်

တိုက်ပွဲများငြိမ်ပြီး မိမိတို့ နေရပ်ပြန်မည်ဆိုပါကလည်း မိုင်းများ ရှင်းလင်းထားခြင်း မရှိကြောင်း၊ ထို့အတူ မိုင်းကြောင့် အရပ်သားထိခိုက်မှုကို မည်သူမျှ တာဝန်ယူမှာ မဟုတ်ကြောင်း ၎င်းက ဆက်လက် ပြောသည်။

ပြီးခဲ့သည့် ၂၀၂၃ ခုနှစ်၊ နိုဝင်ဘာ ၁၁ ရက်နေ့က ကရင်နီတပ်ပေါင်းစုက ၁၁၁၁ စစ်ဆင်ရေးကို စတင်ဆင်နွှဲခဲ့ပြီး လွိုင်ကော်မြို့တွင် တိုက်ပွဲများ အပြင်းအထန် ဖြစ်ပွားခဲ့၍ မြို့ခံများမှာလည်း ဘေးလွတ်ရာသို့ ထွက်ပြေး တိမ်းရှောင်ခဲ့ကြသည်။

ထိုစစ်ဆင်ရေးတွင် ကရင်နီတပ်မတော် (KA)၊ ကရင်နီအမျိုးသားများကာကွယ်ရေးတပ် (KNDF)၊ ကရင်နီပြည် လူမျိုးပေါင်းစုံ ပြည်သူ့လွတ်မြောက်ရေးတပ်ဦး (KNPLF)၊ ဒီးမော့ဆိုပြည်သူ့ကာကွယ်ရေးတပ် (DMO-PDF)၊ လွိုင်ကော်ပြည်သူ့ကာကွယ်ရေးတပ် (Loikaw-PDF)၊ မိုးဗြဲပြည်သူ့ကာကွယ်ရေးတပ်၊ ဖယ်ခုံ PDF တပ်ရင်း (၁၀၀၆)၊ မြို့ပြပြောက်ကျားတပ် (URF) နှင့် ရှမ်းတောင် PDF တို့ ပါဝင်ကြောင်း သိရသည်။

လွိုင်ကော်မြို့တိုက်ပွဲကြောင့် ဘေးလွှတ်ရာ တိမ်းရှောင်ခဲ့သည်မှာ ၆ လဝန်းကျင်သို့ ရောက်ရှိလာပြီဖြစ်ကြောင်း၊ လက်ရှိအချိန်ထိ နေရပ်ပြန်၍ မရသေးကြောင်း လွိုင်ကော်မြို့ခံတစ်ဦးက CNI သတင်းဌာနသို့ ပြောသည်။

တိုက်ပွဲရှောင်များကို တွေ့ရစဉ်

၎င်းက “ပွင့်ပွင့်လင်းလင်းပြောရရင် ကျနော်တို့က လွိုင်ကော်မြို့မှာ မရှိဘူးဗျ။ လွိုင်ကော်မြို့က ထွက်ခွာလာတာ ၆ လလောက်ရှိသွားပြီဗျ၊ ကျနော်တို့ တခြားမြို့မှာ ရှောင်နေရတယ်ဗျ၊ ပြန်လို့မရသေးဘူးဗျ၊ ဝင်လို့ မရသေးဘူးဗျ၊ ကျနော်တို့က ဒီလိုပဲပေါ့၊ စစ်ရှောင်တွေ သီးသန့်နေတဲ့နေရာမှာ ကျနော်တို့လည်း လိုက်နေရတာပေါ့၊ ကျနော်တို့က တော့ ပွင့်ပွင့်လင်းလင်းပြောရရင် လွိုင်ကော်မြို့ အခြေအနေက အခုထိ မသိရသေးဘူးဗျ၊ ကျနော်တို့လည်း ထွက်လာတာ ၆ လဝန်းကျင်ရှိသွားပြီဆိုတော့လေ” ဟု ပြောသည်။

လက်ရှိအချိန်ထိ လွိုင်ကော်မြို့ကို တစ်ဖက်နှင့်တစ်ဖက် အပြတ်အသတ် တိုက်ခိုက်သိမ်းပိုက်နိုင်ခြင်း မရှိသေးဘဲ မကြာခဏ တိုက်ပွဲများသာ ဖြစ်ပွားလျက်ရှိနေကြောင်း ဒေသခံများ၏ ပြောပြချက်အရ သိရသည်။

နှစ်ဖက်တိုက်ပွဲကြောင့် လွိုင်ကော်မြို့ခံပြည်သူ ၄၀,၀၀၀ နီးပါးသည် နီးစပ်ရာ ရှမ်းပြည်နယ်တောင်ပိုင်း ပင်လောင်း၊ ဆီဆိုင်၊ ညောင်ရွှေ၊ တောင်ကြီး စသဖြင့် ဒေသများသို့ ပြောင်းရွေ့ခဲ့ကြရကြောင်း သိရသည်။

CNI News

၂၀၂၄ ခုနှစ်၊ မေလ ၁၆

စစ်ကိုင်းတိုင်းဒေသကြီး၊ ဟုမ္မလင်းမြို့နယ်အတွင်း စက်သုံးဆီ သယ်ယူရောင်းချသူများကို အမျိုးသားညီညွတ် ရေးအစိုးရ(NUG) စိုးမိုးထားသည့် နယ်မြေများမှာဘဲ သယ်ယူရောင်းချခွင့်ပြုမည်ဟု ဟုမ္မလင်းမြို့နယ် ပြည်သူ့ အုပ်ချုပ်ရေးအဖွဲ့က မေလ ၁၄ ရက်နေ့ ရက်စွဲဖြင့် ထုတ်ပြန်ခဲ့သည်။

စစ်ကိုင်းတိုင်းဒေသကြီး၊ မုံရွာမြို့နယ်၊ ကျွန်းလှမြို့နယ်၊ အခြားမြို့နယ်များမှ သယ်ဆောင်လာသော စက်သုံးဆီ များကို ဟုမ္မလင်းမြို့နယ်အတွင်း NUG စိုးမိုးထားသော နယ်မြေများတွင်သာ သယ်ယူရောင်းချခွင့်ပြုပါမည်ဟု ဟုမ္မလင်းမြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ခဲ့သည်။

ထို့နောက် ဟုမ္မလင်းမြို့နယ် NUG စိုးမိုးထားသော နယ်မြေပြင်ပသို့ စက်သုံးဆီများကို သယ်ယူရောင်းချခွင့် လုံးဝ(လုံးဝ)ခွင့်မပြုကြောင်း၊ သယ်ယူရောင်းချခွင့်ရှိသော ဂိတ်ဆုံးနယ်မြေများမှာ ချင်းတွင်းမြစ်ကြောင်းအတိုင်း ဆိုလျှင် ရွှေပြည်အေးမြို့အထိ ကုန်းလမ်းကြောင်းဆိုပါက အောင်ပင်ကျေးရွာအထိသာ သယ်ယူရောင်းချခွင့်ပြု မည်ဟု ဖော်ပြထားသည်။

ကန့်သတ်ထားသော နယ်မြေပြင်ပသို့ သယ်ယူရောင်းဝယ်ဖောက်ကားပါက ပြင်းထန်စွာအရေးယူ ဆောင်ရွက် သွားမည်ဟု ဟုမ္မလင်းမြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ခဲ့သည်။

 PDF ရဲ့ထုတ်ပြန်ချက်ကို တွေ့ရစဉ်

နိုင်ငံရေးသမားတစ်ဦးက “ ဟုမ္မလင်း PDF ရဲ့ ထုတ်ပြန်ချက်ကို လေ့လာကြည့်ရင် သူတို့ စစ်တပ်၊ SNA ကို ဖြတ်လေးဖြတ် လုပ်တဲ့ပုံပဲ။ ပြီးရင် ရွှေတူးတဲ့ လုပ်ငန်းတွေလည်း ထိခိုက်နိုင်တယ်၊ ဒေသခံတွေ အနေနဲ့လည်း သွားရေးလာရေးနဲ့ စိုက်ပျိုးရေး လုပ်ငန်းတွေမှာ ထိခိုက်သွားနိုင်တယ်”ဟု ပြောသည်။

စစ်ကိုင်းတိုင်းဒေသကြီး၊ ဟုမ္မလင်းမြို့နယ်အတွင်းမှာ KIA-PDF ပူးပေါင်းတပ်ဖွဲ့များနှင့် မြန်မာ့တပ်မတော်၊ ရှမ်းနီ အမျိုးသားများတပ်မတော်(SNA)တို့ကြား တိုက်ပွဲများ ဖြစ်ပွားလျက်ရှိနေသည်။

KIA-PDF သည် ဟုမ္မလင်းမြို့ကို သိမ်းပိုက်၍ ထိန်းချုပ်ရန် အကောင်အထည်ဖော်လျက်ရှိနေကြောင်း ဒေသခံ များက ပြောသည်။

ဟုမ္မလင်းမြို့ကို KIA-PDF က ထိန်းချုပ်နိုင်ခဲ့ပါက နာဂဒေသများကိုလည်း ထိန်းချုပ်နိုင်မည်ဖြစ်သလို တမူးခရိုင် အတွင်းမှာလည်း စစ်ရေး လှုပ်ရှားမှုများ ကျယ်ကျယ်ပြန့်ပြန့် လှုပ်ရှားနိုင်မည်ဖြစ်ကြောင်း၊ ထို့အပြင် KIA-PDF စစ်ရေး လှုပ်ရှားမှု အရှိန်မြှင့်တင်နိုင်ရန်အတွက် လိုအပ်သော လက်နက်ခဲယမ်းနှင့် လူအင်အားများကိုလည်း  ကချင်ပြည်နယ်အတွင်းကနေ အတားအဆီးမရှိ သယ်ယူဖြည့်ဆည်းနိုင်မည်ဟု ဟုမ္မလင်းမြို့နယ်နေ စစ်ရေး အကဲခတ်တစ်ဦးက ပြောသည်။