CNI News

၂၀၂၄ ခုနှစ်၊ ဒီဇင်ဘာ ၁၈

အာရက္ခတပ်တော်(AA)၏ အပေါ်တွင် တရုတ်၏ဖိအားသည် ကြီးကြီးမားမား မရှိနိုင်ကြောင်း ငြိမ်းချမ်းရေး လုပ်ငန်းစဥ်မှာ ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

ရခိုင်ပြည်နယ်၊ အမ်းမြို့နယ်ရှိ မြန်မာ့တပ်မတော်၏ အနောက်ပိုင်းတိုင်းစစ်ဌာနချုပ်(နပခ)ကို ထိန်းချုပ်နိုင်ရေး AA က အပြင်းအထန် ထိုးစစ်ဆင်တိုက်ခိုက်နေပြီး တစ်ဖက်မှာတော့ AA ခေါင်းဆောင်များနှင့် တရုတ်ကိုယ်စားလှယ် များ တွေ့ဆုံဆွေးနွေးမှုများ လုပ်နေကြသည်။

AA အပေါ်တွင် တရုတ်ဖိအားသည် အနည်းနှင့်အများ ရှိကောင်းရှိနိုင်သော်လည်း ကြီးကြီမားမား မရှိနိုင်ကြောင်း ငြိမ်းချမ်းရေး လုပ်ငန်းစဥ်မှာ ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

ရခိုင်ပြည်နယ်အတွင်းက လမ်းဆုံတစ်နေရာကို တွေ့ရစဉ်

၎င်းက “AA က “ဝ” တို့၊ ကိုးကန့်တို့၊ မိုင်းလားတို့နဲ့ မတူဘူး၊ သူကဒီတစ်ဖက်က တရုတ်ရှိပေမယ့် တရုတ်က လှမ်း တယ်။ သူနဲ့ နီးတဲ့နိုင်ငံတွေက အိန္ဒိယနဲ့ ဘင်္ဂလားဒေ့ရှ်ဖြစ်တယ်။ ပြီး‌တော့ သူ့အပေါ်မှာ ဖိအားကတော့ အနည်းနဲ့ အများ ရှိကောင်းရှိနိုင်ပေမယ့် ကိုးကန့်တို့၊ မိုင်းလားတို့၊ “ဝ” တို့လို သိပ်ပြီးတော့မှ ကြီးမားမယ်လို့ မထင်ဘူးပေါ့ ဗျာ၊ ဒီစစ်တွေမြို့ကတော့သူက မြို့တော်ဖြစ်တယ်၊ နောက်ပြီးတော့မှ ဒီသူ့ကိုယ်သူ ကာကွယ်ဖို့ အင်းအားက နည်း တယ်လေ၊ ဒီတော့သူ့ကို တိုက်နိုင်မလား၊ မတိုက်နိုင်ဘူးလား ကျနော်တို့ AA ကိုပဲ ပြန်မေးရမှာပေါ့ဗျာ၊ တိုက် မလား၊ မတိုက်ဘူးလား သူက သူ့ဆုံးဖြတ်ချက်က သူ့မှာပဲရှိတာကိုး၊ ဒါကိုတော့ ကျနော် မပြောနိုင်ပါဘူး၊ ကျောက်ဖြူကတော့ ဒီတရုတ်ဖက်က စီးပွားရေး လုပ်ထားတယ်၊ နောက်ပြီးမှ ပင်လယ်ရေနက်ဆိပ်ကမ်းလည်း လုပ်တယ်၊ ဒီကနေစပြီးတော့မှ တရုတ်ပြည်ကိုသူတို့ ရေနံတို့၊ ဂတ်စ်တို့ သွင်းတယ်ဆိုတော့ ဒီနေရာကိုတော့ သူတို့ အပေးအယူရှိမယ်လို့ ထင်ပါတယ်၊ နံပါတ် ၃ ကတော့ မာန်အောင်ကျွန်း၊ မာန်အောင်ကျွန်းကတော့ ရေတပ်စခန်း ကို သူ့ကို သိမ်းနိုင်ဖို့ ဆိုလို့ရှိရင်တော့ ဒါကိုတော့ ရေတပ်စခန်းကတော့ ချက်ချင်းလွယ်မယ်လို့တော့ မထင်ဘူးပေါ့၊ ဘာဖြစ်လို့လဲဆိုတော့ AA မှာက ရေတပ်မှမရှိတာ” ဟု ပြောသည်။

ရခိုင်ပြည်နယ်တွင် တိုက်ပွဲများ ပြင်းထန်နေချိန်၌ AA မှ တာဝန်ရှိသူများနှင့် တရုတ်တာဝန်ရှိသူများသည် ၂၀၂၄ ခုနှစ်၊ ဒီဇင်ဘာလ ၁ ရက်က တရုတ်နိုင်ငံ၊ ထိန်ချုံးမြို့၌ တွေ့ဆုံဆွေးနွေးခဲ့ကြသည်။ 

အဆိုပါ တွေ့ဆုံမှုတွင် ငြိမ်းချမ်းရေး တည်ဆောက်ရေးကိစ္စ၊ တိုက်ပွဲရပ်စဲရေးကိစ္စနှင့် တရုတ်စီမံကိန်းများ လုံခြုံ ရေး ကိစ္စရပ်များအား ဆွေးနွေးခဲ့ကြကြောင်း သိရသည်။

သို့သော် AA အနေဖြင့် အမ်းမြို့နယ် လေဆိပ်အနီးရှိ စစ်စခန်းများ အပါအဝင် တပ်ရင်းတပ်ခွဲ ၁၀ ခုအား တိုက်ခိုက် သိမ်းပိုက်ခဲ့ကြောင်း ၂၀၂၄ ခုနှစ်၊ ဒီဇင်ဘာ ၆ ရက်နေ့တွင် ထုတ်ပြန်ကြေညာခဲ့သည်။

ထို့ပြင် ရခိုင်ပြည်နယ် မောင်တောမြို့ရှိ နယ်ခြားစောင့်ရဲတပ်ဖွဲ့ခွဲ(နခခ)၅ ကို ပြီးခဲ့သည့် ဒီဇင်ဘာလ ၈ ရက်က တိုက်ခိုက် သိမ်းပိုက်နိုင်ခဲ့ကြောင်း၊ လက်ရှိတွင် မောင်တောမြို့တစ်ခုလုံးအား ထိန်းချုပ်နိုင်ခဲ့ပြီဖြစ်ကြောင်း AA က ၂၀၂၄ ခုနှစ်၊ ဒီဇင်ဘာလ ၁၀ ရက်၌ ထုတ်ပြန်ခဲ့သည်။

AA တပ်ဖွဲ့ကို တွေ့ရစဉ်

ဗိုလ်ချုပ်မှူးကြီး မင်းအောင်လှိုင်ကတော့ လက်နက်ကိုင်လမ်းစဥ်အား စွန့်လွှတ်ကာ လမ်းကြောင်းမှန်ပေါ် ရောက်ရှိ စေလိုကြောင်း ၂၀၂၄ ခုနှစ်၊ ဒီဇင်ဘာလ ၁၅ ရက်တွင် နှစ် ၅၀ ပြည့် ရခိုင်ပြည်နယ်နေ့ မိန့်ခွန်းတွင် ပြောကြားခဲ့ သည်။

တရုတ်အနေဖြင့် AA ကို ဖိအားပေးခြင်းထက် စေ့စပ်ညှိနှိုင်းရမည့် အနေအထားသာဖြစ်ကြောင်း စည်းလုံးညီညွတ် သော တိုင်းရင်းသားလူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုး‌ကျော်က CNI သတင်းဌာနသို့ ပြောသည်။

၎င်းက “အမ်း၊ တောင်ကုတ်၊ ဂွ ဒါကတော့ ရခိုင်ပြည်ရဲ့ ထွက်ပေါက်ပေါ့‌နော်၊ ကုန်းလမ်းအားဖြင့် ထွက်ပေါက်ဖြစ် တယ်၊ ဒီထွက်ပေါက်တွေမှာ အမ်းဆိုတော့လည်း အနောက်ပိုင်းတိုင်းစစ်ဌာနချုပ် သူ့ကိုလည်း သိမ်းပိုက်ပြီးသွားပြီ၊ တောင်ကုတ်လည်း ပြီးသွားပြီ၊ အခုကတော့ ဂွကို ထိုးစစ်ဆင်နေတယ်ပေါ့၊ ဒါလည်းမကြာခင် ရက်ပိုင်းမှာပဲ ပြီးသွားလိမ့်မယ်လို့ ကျနော်တို့ကတော့ မျှော်လင့်တယ်၊ ပြီးလည်းပြီးသွားမှာပါ၊ ဘာဖြစ်လို့လဲဆိုတော့ လူထုအား ပြည်သူ့အားက ပါတယ်လေ။ ရခိုင်ပြည်ရဲ့ တည်နေရာပေါ့နော်၊ ပထဝီ အနေအထားအရဆိုရင် အဲလို ဖိအားပေး လို့တော့ ရနိုင်လိမ့်မယ် မထင်ပါဘူး။ ရခိုင်ပြည် အနေအထားအရတော့ ကြားမှာ မြန်မာပြည်မကြီး တစ်ခုလုံးက ကြားမှာ ခံနေတယ်ပေါ့လေ၊ အဲတာလေးတစ်ခုရှိတယ်။ နောက် ရခိုင်အနေနဲ့ဆိုရင် သူတို့နဲ့ ဆက်ဆံနေတာက အိန္ဒိယတို့၊ ဘင်္ဂလားဒေ့ရှ်တို့ရှိမယ်၊ အဲတာကြောင့် ဖိအားဆိုတဲ့ဟာမျိုးထက် ကုန်းလမ်းမှာကတော့ သူတို့စေ့စပ် ညှိနှိုင်းရမယ်ဆိုတဲ့ အနေအထားမျိုးပဲ ပြောချင်တယ်။ ဘာဖြစ်လို့လဲဆိုတော့ တရုတ်ရဲ့ တကယ့်ကို မဟာဗျူဟာ ကျတဲ့ သမုဒ္ဒရာ ၂ စင်း အိမ်မက်ရယ်၊ သူ့ရဲ့ ရင်းနှီးမြှုပ်နှံမှုက ရခိုင်တွေ နယ်နိမိတ်ထဲမှာပဲရှိတယ်၊ အဲတာကြောင့် သူတို့ကတော့ ဖိအားဆိုတာထက် ညှိနှိုင်းပြီးတော့ ဘယ်လိုအပေးအယူ လုပ်ကြမလဲဆိုတဲ့ ဟာမျိုးပဲ ဖြစ်လိမ့်မယ် လို့ ထင်ပါတယ်” ဟု ပြောသည်။

ရခိုင်ပြည်နယ်တွင် AA နှင့် မြန်မာ့တပ်မတော်တို့ကြား တိုက်ပွဲများ ပြင်းထန်စွာ ဖြစ်ပွားနေပြီး နေရပ်စွန့်ခွာ ထွက်ပြေးတိမ်းရှောင်နေကြရသူ အများအပြားလည်း ရှိလာနေသည်။

ထို့အပြင် လူနေအိမ်များ အပါအဝင် စာသင်ကျောင်းများ၊ ဘုန်းကြီးကျောင်းများ၊ ဘာသာရေးကျောင်းများ၊ ဈေး များ၊ လမ်းတံတားများ ပျက်စီးဆုံးရှုံးနေရသလို စားနပ်ရိက္ခာ၊ ဆေးဝါး၊ စက်သုံးဆီ ပြတ်လပ်မှုများဖြင့်လည်း ရင်ဆိုင်နေကြရသည်။

ထို့ပြင် ကုလသမဂ္ဂ ဖွံ့ဖြိုးရေးအစီအစဥ်(UNDP)က ရခိုင်ပြည်နယ်တွင် လူဦးရေ ၂ သန်းခန့် အငတ်ဘေး ကျရောက် နိုင်မည့်အန္တရာယ် ရင်ဆိုင်ရနိုင်ပြီး လာမည့် နှစ်ဆန်းတွင် ပြည်နယ်တွင်း စားနပ်ရိက္ခာ ထုတ်လုပ်နိုင်မှုသည် လူဦးရေ လိုအပ်ချက်၏ ၂၀ ရာခိုင်နှုန်းအတွက်သာ ဖူလုံနိုင်မည်ဟု ခန့်မှန်းထားသည်။

CNI News

၂၀၂၄ ခုနှစ်၊ ဒီဇင်ဘာ ၁၇

အာရက္ခတပ်တော်သည် စစ်တွေမြို့နှင့် ကျောက်ဖြူကို စစ်မဲ့ဇုန်အနေဖြင့် ချန်ထားနိုင်ကြောင်း ပအိုဝ်း အမျိုးသား လွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာကို CNI သတင်းဌာနသို့ ပြောသည်။

ပြီးခဲ့သည့် ဒီဇင်ဘာ ၁ ရက်နေ့က AA ခေါင်းဆောင်ပိုင်းများအား တရုတ်ဘက်မှ ခေါ်တွေ့ခဲ့ကြောင်း ၎င်းက ပြောသည်။

ဥက္ကဋ္ဌ ဗိုလ်မှူးကြီးခွန်ဥက္ကာ က “ကျောက်ဖြူလို ပြဿနာရှိတဲ့ စီးပွားရေးအချက်အခြာကျတဲ့နေရာမျိုး၊ စစ်တွေလို ပြည်နယ်ရဲ့ လက်ရှိ အုပ်ချုပ်ရေးမြို့တော်ြဖစ်နေတော့ ဒီနေရာတွေနဲ့ပတ်သက်ပြီးတော့ စစ်မဲ့ဇုန်များထားမလား သို့တည်းမဟုတ် ဆက်လက်ပြီးတော့ပဲ တိုက်မလား တရုတ်နဲ့တိုင်ပင်ပြီး အကြံဉာဏ်ယူတယ်လို့ပဲ ကျနော် ယူဆတယ်။ ဒီနေရာ ၂ နေရာကို စစ်မဲ့ဇုန်ချန်ပြီးတော့ ကျန်တဲ့နေရာတွေ အရေးပါတဲ့ စစ်ဌာနချုပ်တွေကို ထိန်းသိမ်းခြင်းအားဖြင့် နိုင်ငံရေး ဆွေးနွေးပွဲတွေမှာ ပိုပြီးတော့ ကိုယ်လိုချင်တဲ့ နိုင်ငံရေးရလဒ်တွေ ရနိုင်မယ် လို့လည်း အဲဒီလိုလည်း ဖြစ်နိုင်ပါတယ်။ ကျနော်ထင်တာကတော့ စစ်မဲ့ဇုန်တွေအနေနဲ့ချန်နိုင်ပါတယ်” ဟု ပြောသည်။

စစ်တွေမြို့အဝင်ဆိုင်းဘုတ်

တရုတ်သည် ဒီဇင်ဘာ ၁ ရက်နေ့တွင် AAနှင့်တွေ့ဆုံခဲ့ပြီး ၃ ရက်နေ့တွင် UWSA တို့နှင့်လည်းကောင်း၊ ၅ ရက်နေ့တွင် ပလောင်တို့နှင့်လည်းကောင်း၊ ၈ ရက်နှင့် ၉ ရက်နေ့တို့တွင် KIA တို့ဖြင့် တွေ့ဆုံခဲ့ပြီး ၁၅ ရက်နေ့တွင် MNDAA နှင့် နစကမှ ဒုတိယဗိုလ်ချုပ်ကြီး ကိုကိုဦး ဦးဆောင်သည့် အဖွဲ့တို့ဖြင့် တွေ့ဆုံခဲ့ကြကြောင်း သိရသည်။ 

ရခိုင်ပြည်နယ်တွင် နစကနှင့် AA တို့အကြား တိုက်ပွဲမှာ ပိုမိုပြင်းထန်လာနေပြီး AA ဘက်မှ သိမ်းပိုက်ထားသည့် နယ်မြေများမှာ စုစုပေါင်း ၁၃ မြို့နယ်အထိ ရှိလာပြီဖြစ်ကာ လက်ရှိတွင် အမ်းနှင့် ဂွမြို့ကို သိမ်းပိုက်နိုင်ရေး အပြင်းအထန် ထိုးစစ်ဆင် တိုက်ခိုက်လျက်ရှိသည်။

အောင်ပွဲများဆက်တိုက်ဆင်နွှဲနေသည့် AA ၏ နိုင်ငံရေးရည်မှန်းချက်အရသော်လည်းကောင်း၊ တရုတ်နှင့် ပတ်သက်ဆက်နွယ်နေသည့် နက်ရှိုင်းသောအခြေအနေများအပေါ်တွင်လည်းကောင် မူတည်ကာ လေ့လာ စောင့်ကြည့်ရမည့် အခင်းအကျင်းဖြစ်ကြောင်း 7 EAO Alliance မှ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က CNI သတင်းဌာနသို့ပြောသည်။

ကျောက်ဖြူမြို့အဝင်ဆိုင်းဘုတ်

“AA နဲ့ တရုတ်နဲ့ ဘယ်လောက်အထိ နက်နက်ရှိုင်းရှိုင်း ပတ်သက်ဆက်နွယ်မှုရှိသလဲဆိုတဲ့ အပေါ်မှာ အခြေခံ မယ်ထင်ပါတယ်။ တွေ့ဆုံမှုတွေ ရှိခဲ့တယ်ဆိုတာကိုလည်း သိပါတယ်။ တရုတ်ဆိုတာက မြန်မာပြည်မှာ ဖြစ်နေတဲ့ စစ်ရေးပဋိပက္ခတွေကို ချုပ်ငြိမ်းစေချင်တယ်။ တွေ့ဆုံစကားပြောစေချင်တယ်။ တည်တည်ငြိမ်ငြိမ်လေး လုပ်စေ ချင်တယ်။ တရုတ်နည်း တရုတ်ဟန်ပေါ့။ AA ဘက်ဆိုရင်လည်းပဲ အားကောင်းမောင်းသန်နဲ့ တစ်မြို့ပြီး တစ်မြို့ သိမ်းပိုက်နိုင်တဲ့အခြေအနေ ရှိတယ်။ ရခိုင်သမိုင်းတလျှောက်မှာဆိုရင်လည်း တော်တော်လေး စည်းစည်းလုံးလုံးနဲ့ ပြည်သူတွေရဲ့ နှလုံးသည်းအိမ်ကို ထိန်းချုပ်ပြီးတော့ ရပ်တည်လှုပ်ရှားနေတဲ့ အဖွဲ့အစည်းလည်းဖြစ်တယ်။ ဆိုတော့က ပြောတာတွေလည်းကြားဖူးမှာပါ။ သူတို့တွေအနေနဲ့ ရခိုင်ဒေသမှာ ရခိုင်လူမျိုးတွေရဲ့ လွတ်လပ်စွာ ကိုယ်ပိုင်စီမံအုပ်ချုပ်နိုင်တဲ့ confederation ထက် မလျော့အောင် သူ့ရဲ့ရည်မှန်းချက်ပေါ့” ဟု ၎င်းက ပြောသည်။

လက်ရှိဖြစ်ပွားနေသည့် မြန်မာနိုင်ငံတစ်ဝှမ်း ဖြစ်ပွားနေသည့် တိုင်းရင်းသားလက်နက်ကိုင်အဖွဲ့များနှင့် တိုက်ပွဲ များအတွင်း တပ်မတော်အနေဖြင့် အားရစရာမရှိကြောင်းလည်း စစ်ရေးနှင့် နိုင်ငံရေးအကဲခတ်သူများက ထောက်ပြကြသည်။

ထို့အပြင် နစကဥက္ကဋ္ဌမှ လက်နက်ကိုင်နည်းလမ်းဖြင့် မိမိတို့လိုလားချက်ကို တောင်းဆို၍မရဘဲ နိုင်ငံရေး စားပွဲဝိုင်း သို့ရောက်လာပြီး ငြိမ်းချမ်းစွာ ဖြေရှင်းသောနည်းဖြင့်သာ ပဋိပက္ခများကို ပြေလည်စေမည်ဟု ဒီဇင်ဘာ ၁၅ ရက်နေ့ က ကျရောက်သည့် နှစ် ၅၀ ပြည့် ရခိုင်ပြည်နယ်နေ့ အခမ်းအနားသို့ သဝဏ်လွှာပေးပို့ခဲ့ပြီး ပြောဆိုထားသည်။

CNI News

၂၀၂၄ ခုနှစ်၊ ဒီဇင်ဘာ ၁၇

မြန်မာနိုင်ငံတွင် ဖြစ်ပွားနေသော လက်နက်ကိုင်ပဋိပက္ခများနှင့် နိုင်ငံရေး အကျပ်အတည်းများကို ကျော်လွှားနိုင် ရေး ထိုင်းနိုင်ငံတွင် ဆွေးနွေးကြမည်ဖြစ်သည့်အတွက် အဖြေရှာနိုင်မလားဆိုသည့်အပေါ် ပြည်တွင်း/ပြည်ပက အလေးထား စောင့်ကြည့်နေကြသည်။

၂၀၂၄ ခုနှစ်၊ ဒီဇင်ဘာ ၁၉ ရက်နှင့် ၂၀ ရက်များတွင် ထိုင်းနိုင်ငံ၌ မြန်မာ့အရေး ဆွေးနွေးမည့် အစည်းအဝေး ၂ ခုကို ကျင်းပသွားမည်ဖြစ်သည်။ 

ထိုင်းတွင် ကျင်းပမည့် ဆွေးနွေးပွဲများသည် အကောင်းဘက်သို့ တော်တော်များများ ရောက်သွားလိမ့်မည် ဖြစ် ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “ဒီနယ်နိမိတ် ထိစပ်နေတဲ့ နိုင်ငံတွေကြားထဲမှာက ဒီလုံခြုံရေးဆိုင်ရာ ကိစ္စရပ်ပေါ့၊ ကျနော်တို့က ဒီခပ်ရှင်း ရှင်း ပြောရင်တော့ Regional Security (‌ဒေသလုံခြုံရေး) ဖြစ်သွားတာပေါ့နော် ဒေသတွင်း တကယ်တမ်းက နှစ်နိုင်ငံကြားထဲက ဖြစ်နေတဲ့ ကိစ္စရပ်လို့ဆိုပေမယ့် ဒီနှစ်နိုင်ငံကြားထဲက လုံခြုံရေးဆိုင်ရာ ကိစ္စရပ်တွေ၊ မတည် မငြိမ် ဖြစ်မှုတွေက ဒေသတွင်းမှာ လုံခြုံရေးကို သွားထိခိုက်နိုင်တာကိုး၊ အဲဒါကြောင့်မို့လို့ ဒါနဲ့ပတ်သက်ပြီးတော့ လုပ်တယ်ဆိုတဲ့ ဆွေးနွေးပွဲကတော့ ကျနော်တို့ အတွက်ကတော့ ဘယ်လိုပဲပြောပြော ဒါကြိုဆိုရမှာဖြစ်တယ်၊ ဒီပေါ်ကနေပြီးတော့ အဖြေတွေဘယ်လို ထုတ်ကြမလဲ၊ ဒီထက်ပိုကောင်းတဲ့ အခြေအနေ‌ ရောက်အောင် ဘယ်လို လုပ်ကြမလဲပေါ့၊ ဒါကတော့ ဆွေးနွေးပွဲတွေ လုပ်ရင်းကနေပြီးတော့ ကျနော်တို့ အဖြေရှာသွားနိုင်မယ်လို့ပဲ မျှော်လင့်ထားပါတယ်၊ မြန်မာနဲ့ထိုင်းကြားမှာ ခုလို မြန်မာ့အရေးနဲ့ ပတ်သက်ပြီးတော့ စုစုစည်းစည်း လုပ်နိုင်မယ် ဆိုရင်တော့ ကျနော်တို့က ဒီထက်ပိုကောင်းတဲ့ ရလဒ်တစ်ခုပေါ့နော်၊ မျှော်လင့်ချက်တစ်ခု ဘာတွေဖြစ်လာနိုင်လဲ၊ အဲတော့ သေချာတာကတော့ အကောင်းဘက်ကို တော်တော်များများ ရောက်သွားလိမ့်မယ်လို့ ကျနော်တော့ မျှော်လင့်နိုင်ပါတယ်” ဟု ပြောသည်။ 

ထိုင်း-မြန်မာ-အိန္ဒိယမှ နိုင်ငံခြားရေးဝန်ကြီးများကို တွေ့ရစဉ်

ထိုင်းနိုင်ငံတွင် ကျင်းပမည့် အစည်းအဝေးသို့ နစက၏ နိုင်ငံခြားရေးဝန်ကြီး ဦးသန်းဆွေ ဦးဆောင်သည့် ကိုယ်စားလှယ်အဖွဲ့ တက်ရောက်မည်ဖြစ်သည်။

ထို့နောက် ဒီဇင်ဘာ ၁၉ ရက်တွင် နယ်စပ်ဖြတ်ကျော် နယ်စပ်ဒေသလုံခြုံရေးနှင့် နယ်စပ်ဖြတ်ကျော် ရာဇဝတ်မှု များနှင့်ပတ်သက်ပြီး ဆွေးနွေးကြမည်ဖြစ်သလို ဒီဇင်ဘာ ၂၀ ရက်မှာတော့ နိုင်ငံခြားရေးဝန်ကြီးများ အစည်းအ ဝေးကို ကျင်းပမည်ဖြစ်သည်။

ထိုအစည်းအဝေး ၂ ခုကို တရုတ်၊ အိန္ဒိယ၊ ဘင်္ဂလားဒေ့ရှ်၊ လာအိုနိုင်ငံများမှ ဝန်ကြီးနှင့်ဒုတိယဝန်ကြီးအဆင့်များ တက်ရောက်ကြမည်ဖြစ်သည်။

အဆိုပါ ဆွေးနွေးပွဲတွင် ထိုင်း-မြန်မာနယ်နိမိတ်၌ ဖြစ်ပေါ်နေသော ပြဿနာများ၊ ထိုင်း-မြန်မာ နယ်စပ်အတွင်း တွင် ဖြစ်ပေါ်နေသော ကိစ္စရပ်များအား ဖြေရှင်းရန် မလွယ်ကူနိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ထိုင်းဝန်ကြီးချုပ် ပေတုန်တန်နဲ့ နစကဥက္ကဋ္ဌကို တရုတ်နိုင်ငံမှာ တွေ့ရစဉ်

၎င်းက “ထိုင်းက ဗမာပြည်နဲ့ပတ်သက်ပြီးတော့ ပြဿနာသစ်တစ်ရပ် ထပ်တိုးလာတာပေါ့ဗျာ၊ အဲတာတော့ ထိုင်း နယ်နိမိတ်မှာ “ဝ” တပ်ဖွဲ့က ကျူးကျော်ပြီးတော့ စစ်စခန်းတွေ ဆောက်ထားတာ ပြန်ဆုတ်ပေးဖို့အတွက် တောင်း ဆိုတဲ့ ကိစ္စတွေဖြစ်လာတာပေါ့၊ နောက်ပြီးတော့ ခါတိုင်းဖြေရှင်းနေရတဲ့ ထိုင်းနယ်စပ်က ပြဿနာတွေပေါ့ဗျာ၊ အဲတာကြောင့် အဲတာတွေနဲ့ ပတ်သက်ပြီးတော့ စစ်ကောင်စီရဲ့ အာဏာပိုင် အဖွဲ့အစည်းတွေနဲ့ တွေ့ဆုံဆွေးနွေး တာ ပြုလုပ်လိမ့်မယ့် သဘောရှိပါတယ်၊ ဒါပေမယ့် အဲတာတွေ ပြဿနာတွေက ဖြေရှင်းဖို့တော့ သိပ်‌တော့မလွယ် ကူပါဘူးဗျ၊ လွယ်ကူမယ်လို့ မထင်ပါဘူး၊ ထိုင်း-မြန်မာ နယ်စပ်အတွင်းမှာ ဖြစ်နေတဲ့ ပြဿနာတွေက လူကုန်ကူးမှု ပြဿနာတွေ၊ မူးယစ်ဆေးဝါး ပြဿနာတွေ၊ နောက်တစ်ခုက အဲတာတွေက တစ်ဖက်ကလည်း ဖမ်းဆီးတာ၊ အရေးယူတာတွေ ရှိနေပေမယ့် တစ်ဖက်ကလည်း ပြည်တွင်းမှာ ရပ်တည်ဖို့အတွက် အခက်အခဲရှိနေတဲ့ အင်အား စုတွေ အနေနဲ့ကတော့လည်း ထွက်ပေါက်ရှာနေတဲ့ အချိန်ဆိုတော့ ဒီကိစ္စတွေက ဖြေရှင်းဖို့ခက်ပါတယ်” ဟု ပြော သည်။ 

မြန်မာနိုင်ငံတွင် တပ်မတော်က အာဏာရယူခဲ့သည့် ၂၀၂၁ ခုနှစ်နောက်ပိုင်း ဖြစ်ပွားခဲ့သည့် အကျပ်အတည်အား အဖြေရှာရန်အတွက် အလွတ်သဘော ဆွေးနွေးပွဲများကို လက်ခံ ကျင်းပပေးမည်ဟု ထိုင်းနိုင်ငံက အောက်တိုဘာ လကတည်းက ကမ်းလှမ်းခဲ့ပြီးနောက် ယခုကဲ့သို့ အစည်းအဝေးများ ပေါ်ပေါက်လာ ခြင်းဖြစ်သည်။

အလားတူ တရုတ်နိုင်ငံ၊ ကူမင်းမြို့မှာ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ထိုင်းဝန်ကြီးချုပ် ပေတုန်တန်တို့ ၂၀၂၄ ခုနှစ်၊ နိုဝင်ဘာ ၇ ရက်က တွေ့ဆုံ၍ မြန်မာ့အရေး ဆွေးနွေးခဲ့ကြသလို မြန်မာ့ငြိမ်းချမ်းရေး လုပ်ငန်းစဉ်ကို ကူညီပေးသွားမည်ဖြစ်ကြောင်း ပြောကြားခဲ့သည်။

CNI News
၂၀၂၄ ခုနှစ်၊ ဒီဇင်ဘာ ၁၆

ထိုင်းနိုင်ငံမှာ ယခုလအတွင်း ကျင်းပမည့် မြန်မာ့အရေး ဆွေးနွေးပွဲ ၂ ခုကို နစကမှ နိုင်ငံခြားရေးဝန်ကြီး ဦးသန်းဆွေ တက်ရောက်မည်ဖြစ်ကြောင်း နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်း က ၂၀၂၄ ခုနှစ်၊ ဒီဇင်ဘာ ၁၆ ရက်တွင် ပြောသည်။

ဒီဇင်ဘာ ၁၉ ရက်နှင့် ၂၀ ရက်နေ့များတွင် ထိုင်းနိုင်ငံမှာ မြန်မာ့အရေး ဆွေးနွေးပွဲ ၂ ခုကို ထိုင်းက ဦးဆောင် ကျင်းပသွားမည်ဖြစ်သည်။

ဗိုလ်ချုပ်ဇော်မင်းထွန်းက “ဒီလ ၁၉ ရက်နေ့မှာ ပြုလုပ်မယ့် မြန်မာနိုင်ငံနဲ့ အိမ်နီးနားချင်းနိုင်ငံများ အစည်းအဝေး ကိုတော့ မြန်မာနိုင်ငံက နိုင်ငံခြားရေးဝန်ကြီး ဦးသန်းဆွေ ဦးစီးပြီး တက်ရောက်သွားမှာဖြစ်ပါတယ်”ဟု ပြော သည်။

ထိုအစည်းအဝေး ၂ ခုကို တရုတ်၊ လာအို၊ ထိုင်း၊ အိန္ဒိယ၊ ဘင်္ဂလားဒေ့ရှ် နိုင်ငံများကလည်း တက်ရောက်မည် ဖြစ်သည်။

ဗိုလ်ချုပ်ဇော်မင်းထွန်းက “အဓိကတော့ နယ်စပ်ရေးရာ ကိစ္စတွေ၊ နယ်စပ်ဖြတ်ကျော် မှုကင်း ကိစ္စတွေနဲ့ ပတ်သက် ပြီး ဆွေးနွေးသွားမှာ ဖြစ်ပါတယ်။ နယ်စပ်တည်ငြိမ်ရေး၊ နယ်စပ်ဒေသ မှုကင်းများ ပူးပေါင်းတိုက်ဖျက် နိုင်ရေး အတွက် ဆောင်ရွက်သွားမှာဖြစ်ပါတယ်”ဟု ပြောသည်။

မြန်မာနိုင်ငံတွင် နိုင်ငံရေးနှင့် စစ်ရေး အကျပ်အတည်းဖြစ်ကာ နိုင်ငံတစ်ဝန်း စစ်ပွဲများ ကျယ်ကျယ်ပြန့်ပြန့် ဖြစ်ပွား နေခြင်းကြောင့် အိမ်နီးချင်းနိုင်ငံများလည်း အခက်အခဲတွေ့နေကြရသည်။

ထို့ကြောင့် မြန်မာ့အကျပ်အတည်း ကျော်လွှားနိုင်ရေးအတွက် အိမ်နီးချင်းနိုင်ငံများက ဒီဇင်ဘာ ၁၉ ရက်နှင့် ၂၀ ရက်နေ့များတွင် အစည်းအဝေး ၂ ခု ကျင်းပ၍ အဖြေရှာကြမည်ဖြစ်သည်။

အလားတူ ထိုင်းဝန်ကြီးချုပ် ပေတုန်တန်နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ ၂၀၂၄ ခုနှစ်၊ နိုဝင်ဘာ ၇ ရက်နေ့က တရုတ်နိုင်ငံ၊ ကူမင်းမြို့မှာ တွေ့ဆုံ၍ မြန်မာ့အရေးကို ဆွေးနွေးခဲ့ကြသေးသည်။

CNI News

၂၀၂၄ ခုနှစ်၊ ဒီဇင်ဘာ ၁၆

မြန်မာနိုင်ငံတစ်ဝှမ်း ဖြစ်ပွားနေသည့် တိုင်းရင်းသားလက်နက်ကိုင်အဖွဲ့များနှင့် တိုက်ပွဲများအတွင်း တပ်မတော် အနေဖြင့် အားရစရာမရှိကြောင်း၊ စစ်ရေးပိုင်းတွင် မည်ကဲ့သို့ မဟာဗျူဟာချထားသည်ကို မှန်းရခက်ကြောင်း စစ်ရေးနှင့် နိုင်ငံရေးလေ့လာသူများက CNI သတင်းဌာနသို့ ပြောသည်။

နိုင်ငံတစ်နိုင်ငံ၏ ခေါင်းကြီးပိုင်းကို တာဝန်ယူထားသည့် တပ်မတော် တစ်ရပ်အနေဖြင့် လက်ရှိဖြစ်ပွားနေသော တိုက်ပွဲများတွင် အားရစရာ မကောင်းဘူးဟု မြင်ကြောင်း၊ မည်သည့်အပိုင်းကို ဦးတည်သွားနေသည်ကို ပြောရ ခက်ကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြော သည်။

၎င်းက “‌တိုက်ပွဲပိုင်း တချို့နေရာတွေတော့ အားရစရာမရှိဘူးပေါ့။ နိုင်ငံတစ်နိုင်ငံရဲ့ ခေါင်းကြီးပိုင်း တာဝန်ယူ ထားရတဲ့ တပ်မတော် တစ်ရပ်အနေနဲ့က အားရစရာ မကောင်းဘူးလို့ ရှုမြင်တယ်။ သို့သော်လည်း နိုင်ငံတစ်ခုလုံး စာရဲ့ ကြုံနေရတဲ့ စစ်ပွဲမျိုးနဲ့ ယှဉ်ပြန်ရင်လည်း အဖြေထုတ်ပေးဖို့က စောနေသေးတယ်။ အဲဒါက နစကအနေနဲ့ စစ်ရေးပိုင်းမှာ ဘယ်လိုမဟာဗျူဟာ ချထားလဲ၊ ဘယ်လိုပုံစံနဲ့ ဆက်သွားမလဲ။ ဒါကြတော့လည်း ကျနော်တို့ နည်းနည်း မှန်းရခက်နေတယ်။ ခက်နေတယ်ဆိုတာက ဘယ်လိုအပိုင်းကို သူဦးတည်သွားလဲဆိုတာ ပြောဖို့ လုံလောက်တဲ့ ဒေတာမရှိဘူး။ စောင့်ကြည့်ပြီးတော့မှ ထပ်အဖြေထုတ်ရမယ့် အပိုင်းတော့ ရှိလိမ့်မယ်။ လောလော ဆယ် မြေပြင် အခြေအနေကိုကြည့်ရင် ရခိုင်စစ်မျက်နှာသည် စစ်ရေးပိုင်းအရ အသာစီးမရတဲ့ အနေအထားလို့ပဲ သုံးသပ်လို့ ရတယ်။ သို့သော်လည်း နောင်တစ်ချိန်မှာ ဘယ်လိုဖြစ်လာမလဲ စောင့်ကြည့်ရမယ့် သဘောရှိပါတယ်” ဟု ပြောသည်။

AA ခေါင်းဆောင် ဗိုလ်ချုပ်ထွန်းမြတ်နိုင်ကို တွေ့ရစဉ်

မျက်မှောက်ခေတ် ကမ္ဘာတစ်လွှား ဖြစ်ပွားနေသည့် စစ်ပွဲများနှင့် လက်နက် ကိုင်ပဋိပက္ခများကို လေ့လာဆန်းစစ် ကြည့်ပါက လေကြောင်းနှင့် အာဏာသစွမ်းအားဟာ စစ်ပွဲအောင်နိုင်ရေး အတွက် အဓိကအရေးပါသည့် အခန်း ကဏ္ဍက ပါဝင်နေသည်ကို တွေ့ရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၄ ခုနှစ်၊ ဒီဇင်ဘာ ၁၅ ရက်က တပ်တော်ဝင် အခမ်းအနားမှာ ပြောကြားခဲ့သည်။

ထို့နောက် မြန်မာ့တပ်မတော်သည် လက်နက်ကိုင် အင်အားစုများနှင့် နိုင်ငံတစ်ဝန်းဖြစ်ပွားနေသော တိုက်ပွဲများ တွင် လေကြောင်းတိုက်ခိုက်မှုကို အဓိက အားထားလျက်ရှိသည်။

လက်ရှိတွင် အမ်းနှင့် ဂွမြို့ကို သိမ်းပိုက်နိုင်ရေး အပြင်းအထန် ထိုးစစ်ဆင် တိုက်ခိုက်နေပြီး မြန်မာ့တပ်မတော် ဘက်မှလည်း စွမ်းဆောင်ရည် ကျဆင်းလာသည်ကို သက်သေပြနေကြောင်း NCA ထိုးထားသည့် ပအိုဝ်း အမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာကို CNI သတင်းဌာနသို့ ပြောသည်။

၎င်းက “မူအားဖြင့်ကြည့်ရင်တော့ ၁၀ စုနှစ် တစ်ခုကာလက မြန်မာ့တပ်မတော်ဆိုတာက အင်အားကြီးခဲ့ပြီးတော့ တိုင်းရင်းသားနယ်မြေ၊ တိုင်းရင်းသားဒေသတွေမှာ အပေါ်စီးရခဲ့ဖူးပါတယ်။ အခုတစ်ခါ ထို့အတူပဲ သူက အင်အားစု ချို့ယွင်းပြီးတော့ တိုင်းရင်းသားတပ်တွေက တစ်ဖန်ပြန်ပြီး စစ်ရေးအရ အပေါ်စီး အသာစီး ပြန်ရတဲ့သဘောပေါ့ လေ။ AA က ရခိုင်ပြည်နယ်ထဲမှာ စစ်ရေးအရ အသာစီးရနေတာတွေက တစ်ဖက်က AA ရဲ့ စွမ်းဆောင်မှုပါသလိုပဲ တစ်ဖက်က လက်ရှိ တပ်မတော်ရဲ့ စွမ်းဆောင်ရည် ကျဆင်းလာတာကိုလည်း သက်သေပြနေတဲ့ သဘောလို့ သုံးသပ်မိပါတယ်” ဟု ပြောသည်။

တပ်မတော် လေကြောင်းကို တွေ့ရစဉ်

လက်ရှိတွင် ရှမ်းပြည်နယ်မြောက်ပိုင်း၌ ပြင်းထန်ခဲ့သည့် တိုက်ပွဲများမှာ တရုတ်၏ ကြားဝင်စေ့စပ်မှုကြောင့် တအာင်းတပ်ဖွဲ့(TNLA)ဘက်မှ ဦးစွာ တွေ့ဆုံဆွေးနွေးရန် အသင့်ရှိကြောင်း ထုတ်ဖော် ပြောဆိုခဲ့သည်။

ထို့နောက် ကိုးကန့်တပ်ဘက်မှ အပစ်ရပ်ကြောင်း ကြေညာခဲ့ပြီး ဒီဇင်ဘာ ၁၅ ရက်တွင် တရုတ်နိုင်ငံ၊ ကူမင်းမြို့၌ နစကဘက်မှ ဒုတိယဗိုလ်ချုပ်ကြီး ကိုကိုဦး ဦးဆောင်သည့် ကိုယ်စားလှယ်အဖွဲ့နှင့် ကိုးကန့်တပ်တို့ ဆွေးနွေးမှု စတင်နေကြောင်း သိရသည်။

ထို့ပြင် ဒီဇင်ဘာ ၉ ရက်နေ့ကလည်း KIO နှင့် တရုတ်ပြည်သူ့အတိုင်အပင်ခံ ကွန်ဖရန့်အဖွဲ့ဝင်တို့ တွေ့ဆုံဆွေးနွေး ခဲ့ကြကြောင်းလည်း သိရသည်။

သို့သော် ရခိုင်ပြည်နယ်တွင်မူ နစကနှင့် AA တို့အကြား တိုက်ပွဲမှာ ပိုမိုပြင်းထန်လာနေပြီး AA ဘက်မှ သိမ်းပိုက် ထားသည့် နယ်မြေများမှာ စုစုပေါင်း ၁၃ မြို့နယ်အထိ ရှိလာပြီဖြစ်သည်။

လက်နက်ကိုင်နည်းလမ်းဖြင့် မိမိတို့လိုလားချက်ကို တောင်းဆို၍မရဘဲ နိုင်ငံရေးစားပွဲဝိုင်း သို့ ရောက်လာပြီး ငြိမ်းချမ်းစွာ ဖြေရှင်းသောနည်းဖြင့် ပဋိပက္ခများကို ပြေလည်စေမည်ဟု ဒီဇင်ဘာ ၁၅ ရက်နေ့က ကျရောက်သည့် နှစ် ၅၀ ပြည့် ရခိုင်ပြည်နယ်နေ့ အခမ်းအနားသို့ နစကဥက္ကဋ္ဌမှ သဝဏ်လွှာ ပေးပို့ခဲ့ပြီး ပြောဆိုထားသည်။

CNI News

၂၀၂၄ ခုနှစ်၊ ဒီဇင်ဘာ ၁၆

စစ်ကိုင်းတိုင်းဒေသကြီး၊ ဟုမ္မလင်းနှင့် ကချင်ပြည်နယ်အစပ် တိုက်ပွဲများတွင် ကချင်လွတ်လပ်ရေးတပ်မတော်(KI A)၊ ကချင်ပြည်သူ့ကာကွယ်ရေးတပ်ဖွဲ့(KPDF)တို့နှင့်ပူးပေါင်း၍ တိုက်ပွဲဝင်ပြီး ပြန်လာခဲ့ကြသည့် နာဂပြည်သူ့ ကာကွယ်ရေးတပ်ဖွဲ့(NPDF)များကို တွေ့ရသည်။

အဆိုပါ NPDF ရဲဘော်များသည် ပါဟုတ်ကြီး၊ ပန်ချယ်၊ ရွှေတွင်းလမ်းဆုံ၊ ရာလားတီး စသည့် တိုက်ပွဲများတွင် KIA-KPDF များဖြင့် ပူးပေါင်း၍ မြန်မာ့တပ်မတော်၊ ရှမ်းနီအမျိုးသားများတပ်မတော်(SNA)တို့ကို တိုက်ခိုက်ခဲ့သည်။

ထို့နောက် ဒီဇင်ဘာ ၁၅ ရက်တွင် ရှေ့တန်းမှ ပြန်လာသည့် NPDF အမှတ်(၁) တပ်ရင်းမှ ရဲဘော်များကို ကြိုဆိုခဲ့ ကြသည်ကို တွေ့ရသည်။

အဆိုပါတိုက်ပွဲအတွင်း ကျဆုံးခဲ့သော ရဲဘော်များလည်း ရှိကြောင်း ဒေသခံများက ပြောသည်။

လက်ရှိ မြန်မာနိုင်ငံအတွင်းမှာ နာဂလက်နက်ကိုင်များအနေဖြင့် နာဂအမျိုးသားဆိုရှယ်လစ်ကောင်စီ-ကပ္ပလန်/ယုံးအောင်(NSCN-K/YA)၊ နာဂအမျိုးသားဆိုရှယ်လစ်ကောင်စီ-ကပ္ပလန်/အန်းမိုင်(NSCN-K/AM)၊ အရှေ့နာဂအမျိုးသားများကာကွယ်ရေးတပ်မတော်(ENDA/ENNA)၊ နာဂပြည်သူ့ကာကွယ်ရေးတပ်ဖွဲ့(NPDF)၊ နာဂအမျိုးသားဆိုရှယ်လစ်ကောင်စီ-အိုက်ဇက်ချီရှီဆူ/ဗွီဗား(NSCN-IM)၊ နာဂအမျိုးသားဆိုရှယ်လစ်ကောင်စီ-ကပ္ပလန်/ဟာရှီရန်ဆန်း(NSCN) စသည့် အဖွဲ့များ ရှိကြသည်။

CNI News

၂၀၂၄ ခုနှစ်၊ ဒီဇင်ဘာ ၁၆

မြန်မာ့တပ်မတော်မှ စစ်ရုံးအရာရှိကြီးများ ဦးဆောင်သည့် ကိုယ်စားလှယ်အဖွဲ့နှင့် မြန်မာအမျိုးသားဒီမိုကရက်တစ် မဟာမိတ်တပ်မတော်(MNDAA) တို့ တွေ့ဆုံဆွေးနွေးမှုတွင် လားရှိုးမြို့ကနေ ဆုတ်ခွာရေး မဆုတ်ခွာ‌ရေးကိစ္စမှာ တင်းမာနိုင်ကြောင်း နိုင်ငံရေးလေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

မြန်မာ့တပ်မတော်နှင့် MNDAA တို့သည် ၂၀၂၄ ခုနှစ်၊ ဒီဇင်ဘာ ၁၅ ရက်တွင် တရုတ်နိုင်ငံ၊ ကူမင်းမြို့၌ တွေ့ဆုံ ဆွေးနွေးခဲ့ကြောင်း သိရသည်။

အဆိုပါ တွေ့ဆုံပွဲတွင် လားရှိုးကိစ္စသည် အကြိတ်အနယ် ဖြစ်လာနိုင်ပြီး တရုတ်၏ သဘောထားကိုလည်း MNDAA ဘက်မှ ထည့်သွင်းစဥ်းစားနိုင်ကြောင်း နိုင်ငံရေးလေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “စစ်တပ်နဲ့ဆွေးနွေးတာကတော့ တင်းတင်းမာမာ ဖြစ်မယ်လို့မထင်ဘူး၊ ဘာလို့လဲဆိုတော့ တရုတ်က စစ်တပ်ဘက်က ရပ်နေတဲ့အခါကျတော့ တင်းတင်းမာမာဖြစ်စရာ သိပ်တော့အကြောင်း မရှိပါဘူး။ ကျနော် အဲ့လိုမျိုး မြင်ပါတယ်။ သိပ်ကြီးလည်း ဖြစ်စရာတော့ မရှိပါဘူး။ တစ်ခုပဲ လားရှိုးကိစ္စကတော့၊ လားရှိုးကိစ္စကပဲ တစ်ခုအကြိတ်အနယ် ဖြစ်နိုင်တယ်၊ ကျန်တာတွေကတော့ မဖြစ်နိုင်ပါဘူးနော်။ MNDAA ကလည်းပဲ သူတို့လိုအပ် တဲ့ဟာတွေ တိုက်ခိုက်ရယူထားပြီ၊ စစ်တပ်ကလည်း ဒီအပေါ်မှာ နားလည်မှုရှိတယ်။ ဒါအခု ဖြစ်နေတာက လားရှိုး ကိစ္စမှာ‌တော့ နှစ်ဖက်စလုံး တစ်ဖက်နဲ့တစ်ဖက် ရပ်တည်ထားတာတွေ မတူဘူးပေါ့၊ အဲတာတော့ မြင်တယ်ပေါ့ နော်၊ အဲတာတော့ ဘယ်လိုဖြစ်လာမလဲ မပြောနိုင်ဘူးပေါ့၊ ဘာလို့ဆို ဒီကောင်က အင်အားကြီးနိုင်ငံတွေ နောက် ကနေ ပါနေတော့ အင်အားကြီးနိုင်ငံရဲ့ သဘောထားကိုလည်းပဲ ထည့်စဥ်းစားရမှာ ဆိုတော့လေ ခန့်မှန်းလို့မရဘူး ပေါ့နော် အဲတာတော့၊ ထင်မြင်ယူဆချက်ကတော့ တပ်ကတော့ ပြန်တောင်းမှာပေါ့ အဲဒီပေါ်မှာ MNDAA က ဘယ်လို တုန့်ပြန်မလဲဆိုတာ ခန့်မှန်းရခက်တယ်၊ တော်တော်ခန့်မှန်းရခက်တယ်၊ ဘာလို့ဆို သူကလည်း သူ့စိတ်နဲ့ သူ လုပ်လို့ရတဲ့ဟာတွေပဲ အများကြီးရှိတယ်လေ၊ အဲတာမျိုးရှိတဲ့ အခါကျတော့ အဲတာတော့ ခန့်မှန်းရခက်တယ်၊ တပ်ကတော့ ပြန်တောင်းမှာပဲနော်၊ ၁၀၀ ရာခိုင်နှုန်း သေချာတယ် ပြန်တောင်းမှာနော်” ဟု ပြောသည်။

MNDAA နဲ့ UWSA ခေါင်းဆောင်များကို တွေ့စဉ်

မြန်မာ့တပ်မတော်နှင့် MNDAA တို့ ဆွေးနွေးနေချိန်တွင်ပဲ လက်နက်ကိုင်လမ်းစဥ်အား စွန့်လွှတ်ကာ လမ်းကြောင်းမှန်ပေါ် ရောက်ရှိစေလိုကြောင်း ၂၀၂၄ ခုနှစ်၊ ဒီဇင်ဘာလ ၁၅ ရက်တွင် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။ 

MNDAA သည် လားရှိုးမြို့အား ၁၀၂၇ စစ်ဆင်ရေးအတွင်းတွင် တိုက်ခိုက် သိမ်းပိုက်ထားပြီး ကိုးကန့်တပ်များ လားရှိုးမြို့မှ မဆုတ်ခွာသ၍ ကိုးကန့်ဒေသအား ပိတ်ဆို့ထားမှုများ ရုပ်သိမ်းမှာ မဟုတ်သည့်အပြင် ပိုမို ပြင်းထန်သည့် အရေးယူမှုများ ဆက်လက် လုပ်ဆောင်သွားမည်ဟု ၂၀၂၄ ခုနှစ်၊ သြဂုတ်လ ၂၇ ရက်တွင် “ဝ” တပ်ဖွဲ့ UWSA မှ ဒုဥက္ကဋ္ဌ ဦးကျောက်ကော်အန်း ဦးဆောင်သည့် ကိုယ်စားလှယ်အဖွဲ့နှင့် တွေ့ဆုံစဥ် တရုတ် အထူးကိုယ်စားလှယ် တိန့်ရှီးကျွင်းက ပြောကြားခဲ့သည်။

ကိုးကန့်တပ် MNDAA လုပ်သမျှသည် တရုတ်၏ပုံရိပ်ကို ထိခိုက်နိုင်သောကြောင့် တရုတ်အနေဖြင့်လည်း သူ၏ဂုဏ်သိက္ခာ မကျစေရန် ကြိုးစားသွားမှာဖြစ်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

တရုတ်အထူးကိုယ်စားလှယ် တိန့်ရှီးကျွင်းနဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “ကိုးကန့်တပ်က ၁၀၂၇ ပထမလှိုင်း၊ ဒုတိယလှိုင်းနောက်ဆုံး လားရှိုးထိ သူတို့သိမ်းမိတာပေါ့၊ MNDAA သည် လူဦးရေ ဘယ်လောက်ရှိသလဲ၊ သူ့ရဲ့နောက်ခံသည်ဘာလဲ၊ ဒါကအရေးကြီးတယ်။ MNDAA ဆိုတာက ကျနော်တို့ သိသလောက် ကိုးကန့်လို့ အမည်တွင်တာပေါ့ဗျာ။ ကိုးကန့်ဆိုတာမျိုးက ဟန်လူမျိုးတွေဖြစ်တယ်၊ ဟန် သည် တရုတ်ပြည်ရဲ့ ၈၅ ရာခိုင်နှုန်းလောက်ရှိတဲ့ လူမျိုးကြီးဖြစ်တယ်၊ အဲတော့ ကိုးကန့်ဆိုတာမျိုးက ဗမာလူထု ကြည့်တဲ့အခါမှာ တရုတ်ဆိုတာမျိုးကမြင်တယ်၊ အဲတော့ ကိုးကန့်လုပ်သမျှသည် တရုတ်ရဲ့ပုံရိပ်ကို ထိခိုက်တာပေါ့၊ အဲတော့ ကမ္ဘာ့ဦးဆောင်မှုမှာပါတဲ့ နိုင်ငံကြီးတစ်ခုအနေနဲ့ ကိုးကန့်ကြောင့် တရုတ်ရဲ့သိက္ခာ၊ ဂုဏ်သိက္ခာမကျဖို့ သူ ကြိုးစားမှာပေါ့၊ မြန်မာနိုင်ငံနယ်ထဲမှာရှိတဲ့ ကိုးကန့်ရဲ့လှုပ်ရှားမှုတိုင်းသည် တရုတ်ရဲ့ ပုံရိပ်ကို ရိုက်ချိုးနိုင်တာမျိုး မဖြစ်ဖို့ တရုတ်က တားမှာပေါ့ဗျာ။ အဲတာကြောင့် ဖွဲ့စည်းပုံအခြေခံ ဥပဒေအရ မြန်မာနိုင်ငံသည် ဘယ်လောက်ထိ ကိုယ်ပိုင်အုပ်ချုပ်၊ ကိုယ်ပိုင်ပြဋ္ဌာန်းပိုင်ခွင့်ဆိုတဲ့ တိုင်းရင်းသား တောင်းဆိုတာကို ပေးပြီးပြီလဲ၊ ဒါကိုတရုတ်ဘက်က သုံးသပ်မှာပေါ့ဗျာ၊ ကချင်ကိုဘယ်လောက်ပေးပြီးပြီလဲ၊ ဘာကြောင့် လက်နက်ကိုင်တာလဲ၊ လက်နက်ကိုင် ပဋိပက္ခ ချုပ်ငြိမ်းဖို့အတွက် ကချင်ကို ဘယ်လောက်ပေးရမလဲ၊ ရခိုင်ကို ဘယ်‌လောက်‌‌ပေးရမှာလဲ၊ ကိုးကန့်ကို ဘယ်လောက်ပေးရမှာလဲ၊ ဒါလေးတွေက မြန်မာနိုင်ငံ ပြန်ဖွဲ့တည်ဖို့အတွက် အရေးကြီးတဲ့နိုင်ငံရေး ရည်မှန်းချက် ဖြစ်တာပေါ့၊ ဒါတရုတ်ဘက်ကလည်း စဥ်းစားရမှာပေါ့၊ မြန်မာအစိုးရဘက်ကလည်း စဥ်းစားမယ်လို့ ထင်တယ်၊ ကိုးကန့်ဘက်ကလည်း စဥ်းစားရမှာပေါ့” ဟု ပြောသည်။

လက်ရှိတွင် MNDAA သည် ရှမ်းပြည်နယ်မြောက်ပိုင်းတွင် မြန်မာ့တပ်မတော်၏ အ‌ရှေ့မြောက်တိုင်းစစ်ဌာနချုပ် (ရမခ) နှင့် လားရှိုးမြို့ အပါအဝင် တရုတ်-မြန်မာနယ်စပ် ကုန်သွယ်ရေးဂိတ်များဖြစ်သည့် ချင်းရွှေဟော်၊ လောက် ကိုင်၊ ကြူကုတ်၊ မုံးကိုး၊ သိန္နီ စသည့်မြို့များအား တိုက်ခိုက်သိမ်းပိုက်ထားသည်။

CNI News

၂၀၂၄ ခုနှစ်၊ ဒီဇင်ဘာ ၁၆

မျက်မှောက်ခေတ် ကမ္ဘာတစ်လွှား ဖြစ်ပွားနေသည့် စစ်ပွဲများနှင့် လက်နက်ကိုင် ပဋိပက္ခများကို လေ့လာဆန်းစစ် ကြည့်ပါက လေကြောင်းနှင့် အာကာသစွမ်းအားသည် စစ်ပွဲအောင်နိုင်ရေးအတွက် အဓိက အရေးပါသည်ဟု နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၄ ခုနှစ်၊ ဒီဇင်ဘာ ၁၅ ရက်က တပ်မတော်(လေ)၏ ဖွဲ့စည်းတည်ထောင်မှု(၇၇)နှစ်မြောက် နှစ်ပတ်လည်နေ့ အခမ်းအနားနှင့် လေယာဉ်၊ ရဟတ်ယာဉ်များ တပ်တော်ဝင် အခမ်းအနားမှာ ၎င်းက ပြောကြားခဲ့ခြင်းဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ မျက်မှောက်ခေတ် ကမ္ဘာတစ်လွှား ဖြစ်ပွားနေသည့် စစ်ပွဲများနှင့် လက်နက် ကိုင်ပဋိပက္ခများကို လေ့လာဆန်းစစ်ကြည့်ပါက လေကြောင်းနှင့် အာဏာသစွမ်းအားဟာ စစ်ပွဲအောင်နိုင်ရေး အတွက် အဓိကအရေးပါသည့် အခန်းကဏ္ဍက ပါဝင်နေသည်ကို တွေ့ရမည်”ဟု ပြောသည်။

လေကြောင်းစွမ်းအား သာလွန်ကောင်းမွန်ရန် ရန်သူအပေါ် လွှမ်းမိုးထိန်းချုပ်ချေမှုန်းနိုင်ပြီး မိမိတပ်ဖွဲ့များ၏ စိတ်ဓာတ်များနှင့် တိုက်စွမ်းရည် ပိုမိုအားကောင်းတိုးတက်စေကြောင်း သိသာထင်ရှားစွာ တွေ့မြင်နေရကြောင်း၊ ထို့ကြောင့် တပ်မတော်(လေ) အနေဖြင့် ဖြစ်ပေါ်တိုးတက်နေသည့် အခြေအနေများကို မျက်ခြည်မပြတ် လေ့လာ သုံးသပ်ဆန်းစစ်ပြီး လိုက်လျောညီထွေစွာ ပြောင်းလဲတိုးတက် ဆောင်ရွက်နေရမည်ဟု ၎င်းက ပြောသည်။

တပ်မတော်(လေ)ထုတ် MTX-1B နဲ့အတူ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

မြန်မာ့တပ်မတော်သည် တပ်မတော်(လေ)ထုတ် MTX-1A နှင့် MTX-1B ကင်းထောက် လေယာဉ်များကို တပ်တော်ဝင် အခမ်းအနားမှာ ထုတ်ဖော် ပြသသွားသည်ကို တွေ့ရသည်။

လက်ရှိ မြန်မာနိုင်ငံတစ်ဝန်း ဖြစ်ပွားနေသော တပ်မတော်နှင့် လက်နက်ကိုင်အဖွဲ့များကြား စစ်ပွဲများတွင် မြန်မာ့တပ်မတော်သည် လေကြောင်းကို အဓိကအားထား၍ တိုက်ခိုက်လျက်ရှိနေသည်။

သို့သော်လည်း နယ်မြေလက်လွတ် ဆုံးရှုံးရမှုများနှင့် တပ်မတော်စစ်စခန်းများ လက်လွတ်ဆုံးရှုံးရမှုများ ရှိနေသည်။

မြန်မာ့တပ်မတော်သည် လေကြောင်းကို အဓိက အားပြုတိုက်ခိုက်နေသလို လက်နက်ကိုင်အင်အားစုများကတော့ ဒရုန်းကို အဓိက အားပြု၍ လေကြောင်းတိုက်ခိုက်မှုကို လုပ်နေသည်ကို တွေ့ရသည်။

CNI News

၂၀၂၄ ခုနှစ်၊ ဒီဇင်ဘာ ၁၆

ထိုင်းနိုင်ငံခြားရေးဝန်ကြီး မာရစ် ဆန်ဂျီယာပွန်ဆာသည် ဒီဇင်ဘာ ၁၉ ရက်တွင် မြန်မာနိုင်ငံသို့ လာရောက်မည် ဖြစ်ကြောင်း ဘန်ကောက်ပို့စ်က ရေးသားထားသည်။

မာရစ်သည် မြန်မာက ဖမ်းဆီးထားသည့် ထိုင်းငါးဖမ်းသင်္ဘောသားများ လွတ်မြောက်ရေးအတွက် ဆွေးနွေး ညှိနှိုင်းရန် လာရောက်မည်ဖြစ်သည်။

မြန်မာ့တပ်မတော်(ရေ)က ကော့သောင်းမြို့နယ်အတွင်းရှိ ရေပိုက်နက်အတွင်းမှာ ထိုင်းငါးဖမ်းစက်လှေနှင့် ထိုင်း ငါးဖမ်းသင်္ဘောသားများကို နိုဝင်ဘာလကုန်ပိုင်းက ဖမ်းဆီးခဲ့ပြီး စစ်ဆေးလျက်ရှိနေသည်။

အလားတူ ထိုင်းဘက်ကလည်း မြန်မာငါးဖမ်းသင်္ဘောနှင့် မြန်မာ ၆ ဦးကို ဒီဇင်ဘာ ၁၃ ရက်နေ့ ည ၉ နာရီက ဖမ်းဆီးခဲ့သည်။

အဆိုပါ ကိစ္စရပ်များ ဖြစ်ပွားနေသကဲ့သို့ ထိုင်းနိုင်ငံမှာ မြန်မာ့အရေး အဖြေရှာမည် အာဆီယံနိုင်ငံခြားရေးဝန်ကြီး များ အစည်းအဝေး ကျင်းပရန်လည်း ရှိသည်။