CNI News

၂၀၂၄ ခုနှစ်၊ ဒီဇင်ဘာ ၄

မြန်မာ့တပ်မတော်နှင့် တိုင်းရင်းသား လက်နက်ကိုင် နှစ်ဖက်စလုံးကို တရုတ်က ဆက်ကစားသွားနိုင်သော်လည်း စစ်တပ်ဘက်ကို ပိုပြီးယိမ်းသွားလိမ့်မည်ဟု ဆွီဒင်နိုင်ငံသား ဝါရင့်သတင်းစာဆရာ မြန်မာ့အရေး လေ့လာသူ ဘာတေးလ် လင့်တာနာက ပြောသည်။

DNA သတင်းဌာနက ဒီဇင်ဘာ ၄ ရက်နေ့တွင် ထုတ်လွှင့်ခဲ့သော ဘာတေးလ်လင့်တာနာနှင့် အင်တာဗျူး၌ ၎င်းက အထက်ပါအတိုင်း ဖြေကြားခဲ့ခြင်း ဖြစ်သည်။

ဘာတေးလ်လင့်တနာက “ တရုတ်က နှစ်ဖက်စလုံးကို ဆက်ပြီး ကစားသွားလိမ့်မယ်၊  လက်နက်ကိုင် တော်လှန် ရေး တပ်ဖွဲ့တွေဘက်ရော၊ စစ်ကောင်စီဘက်ကိုရော။ ဒါပေမယ့် စစ်ကောင်စီဘက်ကို ပိုပြီး ယိမ်းသွားလိမ့်မယ်။ တရုတ်က မြန်မာနိုင်ငံရဲ့ အစိုးရအပြောင်းအလဲကို စိတ်မဝင်စားဘူး ၊ တရုတ်အနေနဲ့ မြင်ချင်တာက အပစ်အခတ် ရပ်စဲရေး တစ်ရပ်နဲ့ ဆုပေးဒဏ်ပေးပုံစံနဲ့ သူဝင်ခြယ်လှယ်မယ့် ဆွေးနွေးပွဲတွေပေါ့”ဟု ပြောသည်။

MNDAA ခေါင်းဆောင် ဖုန်တာရွှန်းကို တွေ့ရစဉ်

နစကကို ဖြုတ်ချပြီး အာဏာရယူရန် ကြိုးပမ်းနေသည့် အတိုက်အခံ အမျိုးသားညီညွတ်ရေးအစိုးရ(NUG)သည် မြန်မာ့အခြေအနေကို ပြင်ပကမ္ဘာက သတိပြုမိအောင် လုပ်ဆောင်ခြင်းထက် ပိုပြီး မစွမ်းဆောင်နိုင်ခဲ့ကြောင်း၊ NUG ကို နစကနှင့် တရုတ်အကြား ဆက်ဆံရေးမှာ ကစားသမား တစ်ယောက်အနေဖြင့် မိမိမမြင်ကြောင်း ၎င်းက ပြောသည်။

ဘာတေးလ်လင့်တနာက “တရုတ်ဟာ မြန်မာနိုင်ငံရဲ့ ပြည်တွင်းရေးကို ပြတ်ပြတ်သားသား ဝင်ရောက်စွက်ဖက်ဖို့ နည်းလမ်းနဲ့ စိတ်ဝင်စားမှုရှိတဲ့ တစ်ခုတည်းသော ပြင်ပအင်အား ဖြစ်တယ်ဆိုတာကို မကြာသေးခင်က ဖြစ်ပေါ် တိုးထက်မှုတွေက ထပ်ပြီးပြသွားပါပြီ။ မြန်မာစစ်တပ်နဲ့ရော၊ တော်လှန်ရေး အင်အားစုတွေနဲ့ပါ သူ့လောက် ထိတွေ့ဆက်ဆံတဲ့ ပမာဏမျိုး ဘယ်သူ့မှာမှ မရှိပါဘူး”ဟု ပြောသည်။

တရုတ်သည် မြန်မာ့တပ်မတော်ကို တိုက်ခိုက်နေသည့် တအာင်းအမျိုးသားလွတ်မြောက်ရေးတပ်မတော်(TNLA)၊ မြန်မာအမျိုးသား ဒီမိုကရက်တစ် မဟာမိတ်တပ်မတော်(MNDAA)နှင့် ရင်းနှီးသော ဆက်ဆံရေးရှိကာ ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ၁၀၂၇ စစ်ဆင်ရေးမှာ အထောက်အပံ့များ ပေးခဲ့သည်။

တရုတ်ဒရုန်းစက်ရုံကို ဗိုလ်ချုပ်မှူးကြီးမင်းအောင်လှိုင် လေ့လာနေစဉ်

ထို့နောက် နစကနှင့် သံတမန် ဆက်ဆံရေး တင်းမာမှုဖြစ်ကာ ပြန်လည် ကောင်းမွန်စေရန်အတွက် တရုတ်သည် MNDAA နှင့် TNLA ကို တိုက်ပွဲများ ရပ်တန့်ရန်၊ တွေ့ဆုံဆွေးနွေးရန်၊ လားရှိုးမြို့မှ ပြန်လည် ဆုတ်ခွာရန် တိုက် တွန်းနေသကဲ့သို့ နယ်စပ်ကုန်သွယ်ရေးဂိတ်များ ပိတ်ဆို့ခြင်းဖြင့်လည်း ဖိအားပေးလျက်ရှိနေသည်။

ထို့ကြောင့် TNLA နှင့် MNDAA တို့သည် အပစ်အခတ်ရပ်စဲကြောင်း၊ တရုတ်၏ ကြားဝင်စေ့စပ်မှုဖြင့် တွေ့ဆုံ ဆွေးနွေးမည်ဖြစ်ကြောင်း အသီးသီး ထုတ်ပြန်လျက်ရှိနေသည်။

တခြား တစ်ဖက်မှာတော့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၄ ခုနှစ်၊ နိုဝင်ဘာ ၅ ရက်မှ ၁၀ ရက်နေ့အထိ တရုတ်နိုင်ငံသို့ သွားရောက်ခဲ့ပြီး တရုတ်ဝန်ကြီးချုပ် လီချန် အပါအဝင် ယူနန်ပြည်နယ် ခေါင်းဆောင် များကို တွေ့ဆုံ၍ မြန်မာ့အရေး၊ ငြိမ်းချမ်းရေး၊ ကုန်သွယ်ရေးနှင့် ရွေးကောက်ပွဲ အခြေအနေများကို ဆွေးနွေးခဲ့ သည်။

အလားတူ တရုတ်နိုင်ငံရှိ ဒရုန်းစက်ရုံများကို သွားရောက်လေ့လာခဲ့သလို ဒရုန်းများလည်း ဝယ်ယူ၍ စစ်ဆင်ရေး များမှာ တရုတ်ထုတ် ဒရုန်းများ မြန်မာ့တပ်မတော်က ပိုမို သုံးစွဲလာနေကြောင်း သိရသည်။

CNI News 

၂၀၂၄ ခုနှစ်၊ ဒီဇင်ဘာ ၄

နစကနှင့် တွေ့ဆုံဆွေးနွေးရန် အဆင့်မြင့် ကိုယ်စားလှယ်အဖွဲ့ကို စေလွှတ်သွားမည်ဟု မြန်မာအမျိုးသား ဒီမိုကရက်တစ် မဟာမိတ်တပ်မတော်(MNDAA)က ၂၀၂၄ ခုနှစ်၊ ဒီဇင်ဘာ ၃ ရက်နေ့ ညပိုင်းက ထုတ်ပြန် ကြေညာ ခဲ့သည်။

ယနေ့ (ဒီဇင်ဘာ ၃ ရက်)မှစ၍ ရောက်ရာနေရာမှ မိမိတို့တပ်များသည် ချက်ချင်း အပစ်အခတ်ရပ်စဲပြီး မြန်မာ့ တပ်မတော်ကို အစပြုထိုးစစ်ဆင် တိုက်ခိုက်မည်မဟုတ်ကြောင်း၊ တရုတ်၏ ကြားဝင်စေ့စပ်ကြိုးပမ်း ဆောင်ရွက် မှုအောက်တွင် လားရှိုး အပါအဝင် သက်ဆိုင်ရာကိစ္စရပ်များကို တွေ့ဆုံဆွေးနွေးသော နည်းလမ်းဖြင့် ဖြေရှင်းနိုင် မည်ဟု မျှော်လင့်ကြောင်း ထုတ်ပြန်ချက်တွင် ဖော်ပြထားသည်။

ထို့နောက် မိမိတို့အနေဖြင့်လည်း တရုတ်၏ ကြားဝင်စေ့စပ် ကြိုးပမ်းဆောင်ရွက်ပေးမှုအတိုင်း တက်တက်ကြွကြွ ပူးပေါင်းဆောင်ရွက်သွားပါမည်ဟု MNDAA က ထုတ်ပြန်ခဲ့သည်။

MNDAA က “ တွေ့ဆုံ ဆွေးနွေးရာတွင် MNTJP/MNDAA မှ အဆင့်မြင့် ကိုယ်စားလှယ်အဖွဲ့ကို စေလွှတ်မည်ဖြစ် ပြီး နှစ်ဦးနှစ်ဖက်ကြားရှိ ပဋိပက္ခများနှင့် အမြင်သဘောထား ကွဲလွဲမှုများကို နိုင်ငံရေး နည်းလမ်းဖြင့် ဖြေရှင်းသွား နိုင်လိမ့်မည်ဟု မျှော်လင့်ပါသည်”ဟု ပြောသည်။

MNDAA ရဲ့ ထုတ်ပြန်ချက်ကို တွေ့ရစဉ်

ထို့ကြောင့် နစကမှ မြန်မာနိုင်ငံ နေရာအနှံ့တွင် ဖော်ဆောင်နေသော ဝေဟင်နှင့် မြေပြင်ထိုးစစ်ဆင် တိုက်ခိုက်နေ မှုများကို ရပ်ဆိုင်းပေးရမည်ဖြစ်ကြောင်း၊ MNDAA အနေဖြင့် နိုင်ငံရေးနည်းလမ်းကို အားပေး ထောက်ခံသော်လည်း မိမိကိုယ်ကို ခုခံကာကွယ်ခွင့်အား ယခင်နည်းတူ ဆက်လက်စွဲကိုင်သွားပါမည်ဟု ထုတ်ပြန်ခဲ့သည်။

မြန်မာ့တပ်မတော်နှင့် MNDAA-TNLA-AA ကြား ဖြစ်ပွားနေသော တိုက်ပွဲများ ရပ်တန့်ရေးအတွက် တရုတ်က ကြားဝင်စေ့စပ်မှုဖြင့် တရုတ်နိုင်ငံ၊ ကူမင်းမြို့၊ ဟိုင်ဂင်ဟိုတယ်မှာ ဟိုင်ဂင်ဆွေးနွေးပွဲစတင်ခဲ့ကြသည်။

၂၀၂၃ ခုနှစ်၊ ဒီဇင်ဘာ ၂၃ ရက်နေ့က တစ်ကြိမ်၊ ၂၀၂၄ ခုနှစ်၊ မတ်လ ၁ ရက်မှ ၃ ရက်အထိ တစ်ကြိမ် တွေ့ဆုံ ဆွေးနွေး၍ နှစ်ဖက် အပစ်အခတ်ရပ်စဲရေး သဘောတူညီခဲ့ကြသည်။

ထို့နောက် နှစ်ဖက် အပစ်ရပ်စဲမှု ပြန်လည် ပျက်ပြယ်သွားပြီးနောက် ၂၀၂၄ ခုနှစ်၊ ဇူလိုင်လမှာ လုပ်မည့် ၆ ကြိမ် မြောက် ဆွေးနွေးပွဲလည်း ပျက်သွားရာ ယနေ့အချိန်ထိ ပြန်လည် မဆွေးနွေးနိုင်ဘဲ ဖြစ်နေသည်။ 

CNI News

၂၀၂၄ ခုနှစ်၊ ဒီဇင်ဘာ ၄

ကိုးကန့်တပ် MNDAA သည် ဒီဇင်ဘာ ၃ ရက်နေ့မှစတင်ကာ တစ်ဖက်သတ် အပစ်ခတ်ရပ်စဲကြောင်း ကြေညာခဲ့ သည့်အတွက် နစကကိုလည်း အပစ်အခတ်ရပ်စဲရန် တရုတ်မှ ပြောသင့်ကြောင်း စစ်ရေးနှင့် နိုင်ငံရေး လေ့လာ သုံးသပ်သူများက CNI သတင်းဌာနသို့ ပြောသည်။

တရုတ်၏ ကြားဝင်စေ့စပ်မှုအောက်တွင် ‌နိုင်ငံရေးအရ တွေ့ဆုံဆွေးနွေးမှာဖြစ်ကြောင်း၊ ဒီဇင်ဘာ ၃ ရက်နေ့က စတင်ကာ တစ်ဖက်သတ် အပစ်အခတ်ရပ်စဲမည်ဟု ကိုးကန့်တပ်(MNDAA)က ထုတ်ပြန် ကြေညာခဲ့သည်။

ထို့အပြင် မြန်မာ့တပ်မတော်ကို အစပြု တိုက်ခိုက်မှာ မဟုတ်သလို၊ တပ်မတော်ဘက်ကလည်း ဝေဟင်နှင့်  မြေပြင်ထိုးစစ်များအား ရပ်စဲပေးရမည်ဟု MNDAA က တောင်းဆိုထားသည်။

ထိုသို့ တောင်းဆိုခြင်းသည် နှစ်ဦးနှစ်ဖက် မျှမျှတတ ဖြစ်စေရေး တရုတ်အနေဖြင့် နစကဘက်ကိုလည်း အပစ်အခတ်ရပ်စဲရန် ဖိအားပေးပြောဆိုခိုင်းသည့် သဘောဖြစ်ကြောင်း မြန်မာ-တရုတ်အရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

ကိုးကန့်တပ်ဖွဲ့က ရမခတိုင်းကို သိမ်းပိုက်ထားစဉ်

၎င်းက “တရုတ်နိုင်ငံခြားရေးဝန်ကြီးက ပြောထားတာရှိတယ် အပစ်ခတ်ရပ်စဲရေးနဲ့ တွေ့ဆုံဆွေးနွေးရေး လုပ်တဲ့အခါ ဘက်ပေါင်းစုံကို သူတို့ တရားမျှတစွာ ဆက်ဆံပါ့မယ်ဆိုပြီး ပြောထားတာလေ။ အဲဒီတော့ ကိုးကန့်ကလည်း သူ့ကို အပစ်ခတ်ရပ်စဲ ခိုင်းရင် စကစကလည်း အပစ်ခတ်ရပ်စဲရမယ်။ ဒါမှ တရားမှာပေါ့။ ကိုယ်က အပစ်ခတ်ရပ်စဲပြီး သူက အပစ်ခတ် မရပ်စဲရင် ခေါင်းငုံ့ပေးသလိုဖြစ်မှာပေါ့။ နှစ်ဖက်မျှမျှတတ ဖြစ်ဖို့အတွက် သူက တရုတ်ကိုလည်း ဈေးစစ်တဲ့ သဘောပေါ့ဗျာ။ ငါ့ကိုပဲ မပြောနဲ့ စစ်ကောင်စီကိုလည်း ပြောဦးဆိုပြီးတော့။ အဲဒါကြောင့် မို့လို့လည်း တရုတ်က စကစကို အလိုလိုက်ပြီး ဆက်ဆံနေရတာ။ သူ့အတွက်တော့ ဖိအားတွေ များလာတာပေါ့။ တစ်ဖက်က အပစ်ခတ် ရပ်စဲ တယ်ဆိုတာက အားလုံးက တရုတ်ရဲ့ ဖိအားကို ခံရတဲ့ အဖွဲ့အစည်းဖြစ်တာကို။  အဲဒီတော့ တရုတ်က ဒီဘက်ကို ဖိအားပေးရင်လည်း MNDAA လိုပေါ့ ဟိုဘက်လည်း ဖိအားပေးဆိုပြီး ပြောလာရင်တော့ တဖြေးဖြေး သူ့‌အပေါ်လည်း ဖိအားတွေ များလာမှာပဲ” ဟု ပြောသည်။

နစကအနေဖြင့် တွေ့ဆုံဆွေးနွေးမည်ဆိုပါက MNDAA ဘက်မှ အဆင်မြင့်ကိုယ်စားလှယ်အဖွဲ့များ စေလွှတ်ပြီး နှစ်ဖက် ပဋိပက္ခအမြင် ကွဲလွဲမှုများအား နိုင်ငံရေးနည်းအရ ဖြေရှင်းရန် မျှော်လင့်ထားကြောင်း၊ သို့သော် မိမိကိုယ်ကို ခုခံကာကွယ်ခွင့်ကိုမူ ကိုင်စွဲထားမည်ဟု ထုတ်ပြန်ချက်တွင် ဖော်ပြထားသည်။

ရှမ်းပြည်နယ်မြောက်ပိုင်းတွင် နစကဘက်မှ ဆုံးရှုံးထားသည့် နယ်မြေ အများအပြားရှိသည့်အတွက် ထိုးစစ်ဆင် နေမှုများအား ရပ်တန့်ပေးရန် တောင်းဆိုခြင်းက လိုက်လျောနိုင်ဖွယ် မရှိနိုင်ကြောင်းလည်း စစ်ရေးနှင့် နိုင်ငံရေး လေ့လာသုံးသပ်သူများက ထောက်ပြကြသည်။

ထို့အပြင် MNDAA ၏ ထုတ်ပြန်ချက်သည် ထူးခြားသည့် အချက်အလက်အသစ်များ မပါဝင်ဘဲ ယခင် ထုတ်ပြန် ချက်များ အတိုင်းသာဖြစ်ကြောင်း၊ ထိုသို့ ထုတ်လာခြင်းသည်လည်း နစကဘက်မှ ထိုးစစ်ဆင်မှုများကို မရပ်တန့် သေးသည့်အတွက် ဖြစ်နိုင်ကြောင်း  ငြိမ်းချမ်းရေးလုပ်ငန်းစဉ်မှာ ပါဝင်နေသူ ဦးခွန်းဆိုင်က CNI သတင်း ဌာနသို့ ပြောသည်။

လားရှိုးမြို့ကို ကိုးကန့်တပ်ဖွဲ့က ထိန်းချုပ်ထားစဉ်

၎င်းက “ဘာမှ အသစ်ဖြစ်ပုံမရဘူး။ သို့သော်လည်း SAC ဘက်က မရပ်သေးလို့လည်း ဖြစ်နိုင်ပါတယ်။ အဲဒါကြောင့် ထပ်ထုတ်တာ။ သို့သော်လည်း ဒီကိစ္စနဲ့ ပတ်သက်ရင် ထင်တာကတော့ ဒါကို တရုတ်က ကြားဝင်ပြီးတော့မှ မပြော လို့ရှိရင် မပြီးဘူးပေါ့။ MNDAA ဘက်က ကြေညာချက်ထုတ်၊ TNLA ဘက်က ကြေညာချက်ထုတ်ရုံနဲ့ မပြီးဘူး။ ကြားဝင်လုပ်ရမယ့် တရုတ်ဘက်ကလည်း ဒါကို SAC ကို ပြောရမှာဖြစ်ပါတယ်။ ကျနော်ထင်တယ် တရုတ်က လည်း ပြောပြီးပါပြီ။ သို့သော်လည်း SAC ဘက်က တုန့်ပြန်မှုကို စောင့်နေတယ်လို့ ထင်ပါတယ်။ ဘယ်နည်းနဲ့မဆို ဒီကိစ္စကိုတော့ သူတို့တွေ့ဆုံမှ ပြောနိုင်လိမ့်မယ် ထင်ပါတယ်။ ဒီလိုမတွေ့ဆုံခင်မှာ ပြောတယ်ဆိုရင် SAC ဘက်က မတွေ့ချင်တာလည်း မတွေ့ဖို့လည်း ဖြစ်နိုင်တယ်။ ကျနော်ကတော့ အဲဒီလိုမျိုး ဖြစ်မယ်လို့တော့ မမျှော်လင့်ဘူး ပေါ့” ဟု ပြောသည်။

MNDAA ဘက်မှ ယခုကဲ့သို့ ထုတ်ပြန်ချက် မထွက်ခင် TNLA ဘက်မှ ဦးစွာ ထုတ်ပြန်ခဲ့ခြင်းဖြစ်ပြီး နှစ်ဖွဲ့၏ ထုတ်ပြန်ချက်တွင် မိမိကိုယ်ကို ခုခံကာကွယ်ခွင့်ကို ကိုင်စွဲထားမည်ဆိုသည့်အချက် တူညီစွာ ပါဝင်နေသည်။

ထို့ကြောင့် နစကဘက်မှ ထိုးစစ်ဆင် တိုက်ခိုက်မှုများ ပြုလုပ်ပါက ၎င်းတို့ဘက်မှလည်း ပြန်လည် ခုခံတိုက်ခိုက် သွားမည်ဖြစ်ကြောင်း အဓိပ္ပါယ်မှတ်ယူနိုင်သည်။

တရုတ်နိုင်ငံအနေဖြင့် ရှမ်းမြောက်ဒေသ တိုက်ပွဲများ ရပ်စဲရန် သက်ဆိုင်ရာ အဖွဲ့အစည်းများအား  ဖိအားပေး တိုက်တွန်းနေသလို MNDAA နှင့် တအောင်းတပ်ဖွဲ့(TNLA)ကလည်း နိုင်ငံရေးဆွေးနွေးရန် တရုတ်နိုင်ငံ၏ ကြားဝင်စေ့စပ်မှုကို လက်ခံကြောင်း ပြောကြားထားသည်။

TNLA နှင့် MNDAA ဦးဆောင်၍ AA၊ PDFs များပူးပေါင်း၍ ၂၀၂၃ ခုနှစ်၊ အောက်တိုဘာ ၂၇ ရက်က ၁၀၂၇ စစ်ဆင် ရေးကို ရှမ်းပြည်နယ်မြောက်ပိုင်းမှာ ဖော်ဆောင်ခဲ့သလို ၂၀၂၄ ခုနှစ်၊ ဇွန်လမှာ ဒုတိယအကြိမ် ၁၀၂၇ စစ်ဆင်ရေး ကို ရှမ်းပြည်နယ်မြောက်ပိုင်းနှင့် မန္တလေးတိုင်းဒေသကြီးအတွင်းမှာ ဖော်ဆောင်ခဲ့သည်။

အဆိုပါ ၁၀၂၇ စစ်ဆင်ရေးအတွင်းမှာ နစကသည် မိုးကုတ်၊ မိုးမိတ်၊ သပိတ်ကျင်း၊ စဉ့်ကူး၊ မတ္တရာ၊ လားရှိုး၊ ကျောက်မဲ၊ နောင်ချို၊ သီပေါ၊ ကွတ်ခိုင်၊ သိန္နီ၊ နမ့်ခမ်း၊ နမ္မတူ၊ မိုင်းငေါ့၊ မန်တုံ၊ နမ့်ဆန်၊ ချင်းရွှေဟော်၊ ဖောင်းဆိုင်၊ ကုန်ကြမ်း၊ လောက်ကိုင်၊ မုံးကိုး စသည့် မြို့နယ်များကို လက်လွှတ် ဆုံးရှုံးခဲ့ရသည်။

CNI News

၂၀၂၄ ခုနှစ်၊ ဒီဇင်ဘာ ၄

ရှမ်းပြည်နယ်မြောက်ပိုင်း၊ လားရှိုးမြို့မှာ မြန်မာနိုင်ငံတော်အလံကို မြန်မာအမျိုးသားဒီမိုကရက်တစ် မဟာမိတ်တပ် မတော်(MNDAA)က ၂၀၂၄ ခုနှစ်၊ ဒီဇင်ဘာ ၄ ရက်နေ့မှာ ပြန်လည်လွှင့်ထူလိုက်သည်ကို တွေ့ရသည်။

လားရှိုးမြို့နှင့် အရှေ့မြောက်ပိုင်းတိုင်းစစ်ဌာနချုပ်(ရမခ)ကို MNDAA က ၁၀၂၇ ဒုတိယလှိုင်းမှာ တိုက်ခိုက်သိမ်း ပိုက်ခဲ့ပြီး နိုင်ငံတော်အလံများကို ဖြုတ်သိမ်းခဲ့သည်။

အလားတူ MNDAA တပ်ဖွဲ့သည် နိုင်ငံတော်အလံကို ခွေးတစ်ကောင်ပေါ်မှာ လွှမ်းခြုံ၍လည်း လှောင်ပြောင် သရော်ခဲ့သေးသည်။

သို့သော် ယခုအခါမှာတော့ နိုင်ငံတော်အလံကို MNDAA က လားရှိုးမြို့အတွင်းမှာ ပြန်လည်လွှင့်ထူလာသည်ကို တွေ့ရသည်။

ယနေ့(ဒီဇင်ဘာ ၃ ရက်)မှစ၍ ရောက်ရာနေရာမှ မိမိတို့တပ်များသည် ချက်ချင်း အပစ်အခတ်ရပ်စဲပြီး မြန်မာ့တပ် မတော်ကို အစပြုထိုးစစ်ဆင် တိုက်ခိုက်မည်မဟုတ်ကြောင်း၊ တရုတ်ပြည်သူ့သမ္မတနိုင်ငံ ကြားဝင်စေ့စပ်ကြိုးပမ်း ဆောင်ရွက်မှုအောက်တွင် လားရှိုး အပါအဝင် သက်ဆိုင်ရာကိစ္စရပ်များကို တွေ့ဆုံ ဆွေးနွေးသော နည်းလမ်းဖြင့် ဖြေရှင်းနိုင်မည်ဟု မျှော်လင့်ပါကြောင်း ၂၀၂၄ ခုနှစ်၊ ဒီဇင်ဘာ ၃ ရက်တွင် MNDAA က ထုတ်ပြန်ခဲ့သည်။

CNI News
၂၀၂၄ ခုနှစ်၊ ဒီဇင်ဘာ ၃

မြန်မာနိုင်ငံတွင် ကျင်းပမည့် ရွေးကောက်ပွဲကို လေ့လာနိုင်ဖို့ ရုရှားနိုင်ငံကို ဖိတ်ခေါ်သွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဒူးမားလွှတ်တော်ဒုဥက္ကဋ္ဌ H. E. Mr. Sholban Kara-Ool ကို တွေ့ဆုံ၍ ပြောကြားခဲ့သည်။

၂၀၂၄ ခုနှစ်၊ ဒီဇင်ဘာ ၃ ရက်က ဒူးမားလွှတ်တော်ဒုဥက္ကဋ္ဌ H. E. Mr. Sholban Kara-Ool ဦးဆောင်သည့် ကိုယ်စားလှယ်အဖွဲ့ကို နစကဥက္ကဋ္ဌက နေပြည်တော်မှာ လက်ခံတွေ့ဆုံစဉ် အထက်ပါအတိုင်း ပြောကြားခဲ့ခြင်း ဖြစ်သည်။

နစကဥက္ကဋ္ဌက မြန်မာနိုင်ငံ၌ လွှတ်လပ်၍ တရားမျှတသည့် ရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိမှုနှင့် ရွေးကောက်ပွဲ ကျင်းပချိန်တွင် ရုရှားနိုင်ငံမှ လေ့လာရေးအဖွဲ့များ ဖိတ်ခေါ်သွားမည့် အခြေအနေများကို ရှင်းပြခဲ့သည်။

ရွေးကောက်ပွဲကို ၂၀၂၅ ခုနှစ်တွင် ကျင်းပသွားမည်ဖြစ်ပြီး နိုင်ငံတကာမှ လေ့လာရေးအဖွဲ့များကို ဖိတ်ခေါ်၍ လေ့လာခွင့်ပြုသွားမည်ဖြစ်ကြောင်း၊ ရွေးကောက်ပွဲကို လုံခြုံရေးအရ အပိုင်းလိုက် ကျင်းပသွားရန်လည်း ရှိ‌ ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့နောက် မြန်မာနိုင်ငံ၏ နိုင်ငံရေးဖြစ်ပေါ် ပြောင်းလဲမှုများအပေါ် နိုင်ငံတကာမျက်နှာစာတွင် ရုရှားနိုင်ငံအနေဖြင့် ခိုင်ခိုင်မာမာ ရပ်တည်ပေးလျက်ရှိမှုနှင့် မြန်မာနိုင်ငံအနေဖြင့်လည်း ရုရှားနိုင်ငံ၏ နိုင်ငံရေးဖြစ်ပေါ်ပြောင်းလဲမှုများ အပေါ် ခိုင်ခိုင်မာမာ ရပ်တည်ပေးလျက်ရှိမှု အခြေအနေများကိုလည်း ဆွေးနွေးခဲ့သည်။

အလားတူ ခရီးသွားလုပ်ငန်းများ၊ အပြန်အလှန် ကုန်သွယ်မှု လုပ်ငန်းများ တိုးတက်စေရေး ဆက်လက် တိုးချဲ့ ဆောင်ရွက်သွားမည့် အခြေအနေများ၊ ကုန်ထုတ်လုပ်မှု လုပ်ငန်းများ၊ စိုက်ပျဒိးရေးလုပ်ငန်းများတွင် နည်းပညာ ပူးပေါင်းဆောင်ရွက်မှုများ တိုးမြှင့်ဆောင်ရွက်နိုင်သည့် အခြေအနေများ၊ စိုက်ပျိုးရေး လုပ်ငန်းများအတွက် လိုအပ် သည့် ဓာတ်မြေဩဇာများ ထုတ်လုပ်နိုင်ရေးနှင့် စက်မှုလုပ်ငန်းများ တိုးတက်စေရေး ပူးပေါင်းဆောင်ရွက်နိုင်သည့် အခြေအနေများကိုလည်း ဆွေးနွေးခဲ့ကြကြောင်း သိရသည်။

CNI News

၂၀၂၄ ခုနှစ်၊ ဒီဇင်ဘာ ၃

တရုတ်-မြန်မာ ပူးပေါင်းတည်ထောင်ရန် ပြင်ဆင်နေသည့် လုံခြုံရေးကုမ္ပဏီသည် အသွင်ပြောင်းထားသော လက်နက်ကိုင် အင်အားစုများ ဖြစ်နိုင်သည်ဟု မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

မြန်မာနိုင်ငံရှိ တရုတ်ရင်းနှီးမြှုပ်နှံမှုများနှင့် စီမံကိန်းများအား ကာကွယ်ရန် နှစ်နိုင်ငံလုံခြုံရေးကုမ္ပဏီ တည်ထောင် ရေး တရုတ်အစိုးရ အဆိုပြု ဆွေးနွေးလျက်ရှိသည်။

ထို့ကြောင့် နစက-က တရုတ်-မြန်မာ နှစ်နိုင်ငံ လုံခြုံရေးကုမ္ပဏီ တည်ထောင်ရေး လုပ်ငန်းကော်မတီကို ၂၀၂၄ ခုနှစ်၊ အောက်တိုဘာ ၂၂ ရက်တွင် ဖွဲ့စည်း၍ ပြင်ဆင် လေ့လာလျက်ရှိနေသည်။ 

ပြည်ပအင်အားစုများ ပြည်တွင်းသို့ ဝင်ရောက်လာလျှင် ပိုမိုရှုပ်ထွေးသွားနိုင်ပြီး ဝင်‌ရောက်လာမည့် တပ်ဖွဲ့များ သည်လည်း အသွင်ပြောင်းထားသည့် လက်နက်ကိုင် အင်အားစုများ ဖြစ်နိုင်ကြောင်း မြန်မာ့နိုင်ငံရေး လေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “ပိုရှုပ်ထွေးလာမှာလို့ ကျနော်တော့ ပြောချင်ပါတယ်၊ ဆိုလိုတာက ဘယ်က လက်နက်ကိုင်မှန်းမသိ၊ ဘယ်လို ယူနီဖောင်းမှန်း မသိပြီးတော့၊ ဘယ်လို လက်နက်ကိုင်ထားတဲ့ အင်အားစုမှန်းမသိတဲ့ အင်အားစု‌တွေ ဗမာပြည်ထဲ ရောက်နေတဲ့ကိစ္စ ဖြစ်တဲ့အတွက် လူထုအနေနဲ့ကတော့ ဒီကိစ္စနဲ့ပတ်သက်လို့ ကျနော်တို့ လက်ခံ နိုင်စရာ အကြောင်းမရှိပါဘူး၊ ရှုပ်ထွေးမှုတွေတော့ ပိုဖြစ်လာမှာပါ။ ပုံစံကွဲပြားတယ်ဆိုတာကတော့ သူကတော့ ဗမာပြည်က အခြေအနေနဲ့ အခြားတိုင်းပြည်က အခြေအနေတွေအပေါ်မှာ ကွဲပြားတဲ့ပုံစံနဲ့တော့ ဖြစ်လာမှာပေါ့ ဗျာ။ သို့သော်ငြားလည်း မလွှဲမရှောင်သာ ဖြစ်လာမယ့်ကိစ္စတော့ ဗမာပြည်က ပြည်တွင်းစစ် ဖြစ်နေပြီးတော့ သူ့ လုံခြုံရေးနဲ့ပတ်သက်တဲ့ တရုတ်အကျိုးစီးပွားတွေကို ခြိမ်းခြောက်ခံနေရတဲ့ အခြေအနေ၊ နောက် စစ်ကောင်စီရဲ့ လုံခြုံရေးတပ်ဖွဲ့တွေကလည်း တာဝန်မယူနိုင်တဲ့ အခြေအနေမှာ ဗမာပြည်ကို ဝင်ရောက်ဖို့ သဘောတူလိုက်တဲ့၊ ဝင်ရောက်လာမဲ့ လုံခြုံရေး အင်အားစုတွေဆိုတာ အသွင်ပြောင်းထားတဲ့ လက်နက်ကိုင် အင်အားစုပဲဖြစ်ဖို့ များ တယ်၊ သေချာတယ်လို့ ယူဆတဲ့အတွက် ကျနော်တို့ ဝိုင်းဝန်းဆန့်ကျင် ကန့်ကွက်ရမှာ ဖြစ်တယ်လို့ ယူဆပါတယ်” ဟု ပြောသည်။

ရခိုင်ပြည်နယ် ကျောက်ဖြူမြို့နယ် မဒေးကျွန်းရှိ ရွှေသဘာဝဓာတ်‌ငွေ့ပိုက်လိုင်းစီမံကိန်းလုပ်ငန်းခွင် ကိုတွေ့ရစဥ်

တရုတ်ပုဂ္ဂလိက လုံခြုံရေးကုမ္ပဏီများသည် ပိုးလမ်းမစီမံကိန်း တစ်လျှောက်တွင်ရှိသည့် တရုတ်စီမံကိန်းများအား ကာကွယ်စောင့်ရှောက်ရန် အဓိက ရည်ရွယ်ထားသော်လည်း လက်နက်ကိုင် တော်လှန်ရေး အင်အားစုများကို မြန်မာ့တပ်မတော်မှ တိုက်ခိုက်ချေမှုန်းရာတွင် ပါဝင်လာနိုင်ကြောင်း အမေရိကန် အခြေစိုက် The Eurasia က ဒီဇင်ဘာ ၂ ရက်နေ့ ဆောင်းပါးတစ်ပုဒ်တွင် ရေးသားဖော်ပြခဲ့သည်။

ထို့ပြင် မြန်မာနိုင်ငံထဲသို့ တရုတ်လုံခြုံ‌‌ရေးကုမ္ပဏီများ ဝင်ရောက်လာမှုကြောင့် ပြည်တွင်းစစ် ပိုမိုပြင်းထန်လာ နိုင်ပြီး သံတမန်ရေးအရ တင်းမာမှုများလည်း ပေါ်ပေါက်လာနိုင်သည်ဟု မြန်မာ့အရေး လေ့လာသူများက ပြောဆို ကြောင်း South China Morning Post က နိုဝင်ဘာ ၂၈ ရက်နေ့တွင် ဖော်ပြခဲ့သည်။

တရုတ်-မြန်မာ ပူးပေါင်း လုံခြုံရေးကုမ္ပဏီ တည်ထောင်လာပါက လုံခြုံရေးတပ်ဖွဲ့များ လုံခြုံမှုရယူထားသည့် သတ်မှတ်ဧရိယာအတွင်း မလိုလားသည့် အင်အားစုများက နှောင့်ယှက်ဖျက်စီးပါက ပြန်လည်တုန့်ပြန်နိုင်သော သတ်မှတ် စည်းမျဥ်းစည်းကမ်းများ ပါလာနိုင်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

Private Security Companies PSCs တပ်ဖွဲ့များကို တွေ့ရစဥ် 

၎င်းက “ပထမတစ်ချက်က အဲဒီကုမ္ပဏီလုပ်ငန်းတွေနဲ့ ပတ်သက်လို့ နှစ်နိုင်ငံအစိုးရဘက်က လုံခြုံမှုကို တာဝန်ယူ ပေးကြရမှာ၊ အဲသလို လုံခြုံမှုယူပေးနိုင်တဲ့ အနေအထား ရာခိုင်နှုန်း တစ်စုံတစ်ခုထိ လိုအပ်ပြီလို့ နှစ်ဖက်က သတ်မှတ်တဲ့အခါမှာ သူ့ရဲ့အကျိုးစီးပွား လုံခြုံမှုအတွက် ဥပဒေပါ ခွင့်ပြုချက်အတိုင်းပဲ လုပ်ကြရတဲ့ အနေအထား ရှိတယ်။ အဲတော့ သူ့အကျိုးစီးပွားကို မထိခိုက်သမျှ ကာလပတ်လုံး သူတို့သည် သူတို့သတ်မှတ်တဲ့ ဧရိယာအတွင်း မှာပဲ ရှိနိုင်ပါတယ်။ BRI လမ်းက ရှည်လျားတာကိုးဗျ၊ BRI လမ်းတစ်လျှောက်ကလည်း စစ်ဖြစ်နေတာကိုး အဲလို စစ်ဖြစ်တဲ့အခါမှာ BRI လမ်းတစ်လျှောက်မှာ ဖြစ်နေတာကိုက နှစ်နိုင်ငံအကျိုးစီးပွားအတွက် နှစ်နိုင်ငံပူးပေါင်း ဆောင်ရွက်မှ ဖြစ်မယ်ဆိုတဲ့ လိုအပ်ချက်တွေက ဖြစ်လာနိုင်တာလို့ သုံးသပ်လို့ရတယ်။ ကန့်သတ် စည်းမျဥ်း စည်းကမ်းတွေ အားလုံးရှိနိုင်တယ်၊ ဥပမာ သတ်မှတ်တဲ့ဧရိယာ သူ့ရဲ့လုံခြုံမှုယူထားတဲ့ ဥစ္စာကို ခုနက အကြမ်းဖက် တဲ့ မလိုလားတဲ့ အင်အားစုတွေက နှောင့်ယှက်ဖျက်စီး ပစ်လို့ရှိရင် လုံခြုံရေး အဖွဲ့အစည်းများက ပြန်လည်တုန့်ပြန် နိုင်တဲ့ သတ်မှတ်စည်းမျဥ်းစည်းကမ်းတစ်ခု အဲဒီဥစ္စာကို ကျော်လွန်ရင် အဲဒီ လုံခြုံရေးအဖွဲ့အစည်းတွေ ရှိတဲ့ဧရိယာ တစ်လျှောက်လုံးနဲ့ပတ်သက်တဲ့ နိုင်ငံအတွင်းက လုံခြုံရေးအဖွဲ့အစည်းတွေက ဘာပူးပေါင်းဆောင်ရွက် ရမယ်ဆို တဲ့ စည်းကမ်းသတ်မှတ်ချက်တစ်ခု ပါလာနိုင်တယ်” ဟု ပြောသည်။

မြန်မာနိုင်ငံသို့ ဝင်ရောက်လာမည့် လုံခြုံရေးတပ်ဖွဲ့များသည် လက်ရှိမြန်မာနိုင်ငံအတွင်း အခြေအနေအရ လက်နက်ကိုင်ဆောင်ထားနိုင်ကြောင်း၊ လူဦးရေ အနည်းစုဖြင့် လုံခြုံရေး တာဝန်ယူရမည် ဖြစ်သောကြောင့် နည်းပညာမြင့် လက်နက်များလည်း တပ်ဆင်ထားနိုင်ကြောင်း နိုင်ငံရေးလေ့လာသုံးသပ်သူများက ထောက်ပြ သည်။

တရုတ်နိုင်ငံအနေဖြင့် ပဋိပက္ခဖြစ်ပွားနေသည့် အာရှအလယ်ပိုင်း၊ အရှေ့အလယ်ပိုင်းနှင့် အာဖရိကတို့တွင် ၎င်းတို့၏အကျိုးစီးပွား၊ စီမံကိန်းနှင့် ဝန်ထမ်းများအား ကာကွယ်ရန် စစ်သားဟောင်းများဖြင့် ဖွဲ့ထားလေ့ရှိသည့် Private Security Companies PSCs ဟုခေါ်သော ပုဂ္ဂလိက လုံခြုံရေးကုမ္ပဏီများကို အသုံးပြုလျက်ရှိသည်။

CNI News

၂၀၂၄ ခုနှစ်၊ ဒီဇင်ဘာ ၃

ထိုင်းငါးဖမ်းစက်လှေကို မြန်မာ့ရေပိုင်နက်အတွင်းမှာ ဖမ်းဆီးခဲ့ခြင်းဖြစ်ပြီး လူသေဆုံးမှုလည်း မရှိခဲ့ကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ၂၀၂၄ ခုနှစ်၊ ဒီဇင်ဘာ ၂ ရက်က ထုတ်ပြန် ပြော ကြားခဲ့သည်။

အဆိုပါ ထိုင်းငါးဖမ်း စက်လှေကို မြန်မာနိုင်ငံ၊ ကော့သောင်းမြို့ မြန်မာ့ရေပိုင်နက်အတွင်းမှာ နိုဝင်ဘာ ၃၀ ရက်နေ့ က မြန်မာ့စစ်ရေယာဉ်တစ်စင်းက စစ်ဆေးတွေ့ရှိကာ ဖမ်းဆီးခဲ့ခြင်းဖြစ်ကြောင်း၊ ထိုစက်လှေအတွင်းမှာ မြန်မာ နိုင်ငံသား ကျား ၂၇ ဦးနှင့် ထိုင်းနိုင်ငံသား ကျား ၄ ဦးတို့ကို ဖမ်းဆီးရမိခဲ့သည်ဟု ၎င်းက ပြောသည်။

ဗိုလ်ချုပ်ဇော်မင်းထွန်းက “မြန်မာ့တပ်မတော်(ရေ)က ထိုင်းနိုင်ငံ ရေပိုင်နက်ထဲ ဝင်ရောက်ပြီးဖမ်းဆီးခဲ့တာ မဟုတ် ပါဘူး။ မြန်မာနိုင်ငံ ရေပိုင်နက်အတွင်းမှာ ဝင်ရောက်ပြီး ငါးဖမ်းနေတဲ့ ထိုင်းငါးဖမ်းစက်လှေတွေကို လုပ်ထုံး လုပ်နည်းနဲ့အညီ ဖမ်းဆီးခဲ့တာဖြစ် ကြောင်း ပြောချင်ပါတယ်။ ထိခိုက်သေဆုံးမှုများ မရှိခဲ့ပါဘူး”ဟု ပြောသည်။

လက်ရှိတွင် ထိုင်းငါးဖမ်းစက်လှေပေါ်ကနေ ဖမ်းဆီးထားသူများကို စစ်‌ဆေးနေသလို ထိုင်းအစိုးရဘက်ကိုလည်း တရားဝင် အသိပေး အကြောင်းကြားထားကြောင်း နစက-က သတင်းထုတ်ပြန်ခဲ့သည်။

ထိုင်းဝန်ကြီးချုပ်ပေတုန်တန်ကို တွေ့ရစဉ် 

အဆိုပါ ငါးဖမ်းစက်လှေသည် ထိုင်းနိုင်ငံ၊ ရနောင်းမြို့မှာ နေထိုင်သည့် ထိုင်းနိုင်ငံသား တစ်ဦးပိုင်ဆိုင်ကြောင်း၊ နိုဝင်ဘာ ၂၉ ရက်နေ့ ညနေ ၃ နာရီက ထွက်ခွာလာပြီး မြန်မာ့ရေပိုင်နက်အတွင်းသို့ ည ၉ နာရီမှာ ရောက်ရှိ၍ ငါးဖမ်းဆီးခဲ့ကြောင်း စစ်ဆေးတွေ့ရှိသည်ဟု ဗိုလ်ချုပ်ဇော်မင်းထွန်းက ပြောသည်။

ထို့နောက် ထိုင်းငါးဖမ်းစက်လှေတွင် လုပ်ကိုင်ကြသူများအနက် ထိုင်းလူမျိုး တစ်ဦးလျှင် တစ်လ လုပ်ခလစာ ထိုင်းဘတ်ငွေ ၁၅၀၀၀ ရပြီး မြန်မာနိုင်ငံသား တစ်ဦးလျှင် တစ်လလုပ်ခလစာ ထိုင်းဘတ်ငွေ ၁၂၀၀၀ ရရှိကြောင်း သိရသည်။

ထိုင်းသတင်းမီဒီယာများကတော့ ထိုင်းငါးဖမ်းစက်လှေ ဖမ်းဆီးခံရမှုတွင် တစ်ဦးသေဆုံးခဲ့ကြောင်း၊ ထိုင်းပိုင်နက် အတွင်း ဖမ်းဆီးခံရခြင်းဖြစ်ကြောင်း ဖော်ပြလျက်ရှိသည်။

ထိုဖြစ်စဉ်နှင့်ပတ်သက်ပြီး ထိုင်းဝန်ကြီးချုပ် ပေတုန်တန်ကလည်း ကန့်ကွက်ကြောင်း ထုတ်ဖော် ပြောကြားလျက် ရှိသည်ဟု ဖော်ပြထားကြသည်။

CNI News

၂၀၂၄ ခုနှစ်၊ ဒီဇင်ဘာ ၂

ချင်းပြည်နယ်၊ ပလက်ဝမြို့နယ်တွင် အာရက္ခတပ်တော်(AA)နှင့် မြန်မာ့တပ်မတော်တို့ကြား တိုက်ပွဲဖြစ်ပွားမှု ရပ်တန့်နေသော်လည်း ပလက်ဝဒေသခံများအနေဖြင့် ကုန်ဈေးနှုန်း ကြီးမြင့်မှုနှင့် အလုပ်အကိုင် အခွင့်အလမ်း မရှိသည့်အတွက် ပလက်ဝမြို့ကို စွန့်ခွာလာကြသည်ဟု သိရသည်။

ပြီးခဲ့သည့် ဇန်နဝါရီလမှစတင်၍ ပလက်ဝဒေသခံများက တိုက်ပွဲတိမ်းရှောင်မှုများ ရှိခဲ့သော်လည်း လက်ရှိတွင် နေထိုင်စားသောက်ရေး အခက်အခဲကြောင့် ပို၍ စွန့်ခွာလာကြခြင်း ဖြစ်သည်။

အဆိုပါ နေရပ်စွန့်ခွာလာသူများသည် အိန္ဒိယနယ်စပ်သို့ ဝင်ရောက်မှု များပြားကြောင်း၊ တောင်ယာလုပ်ငန်း လုပ်ကိုင်၍ ရသည့် ကျေးရွာများသို့လည်း တိမ်းရှောင်မှုများရှိကြောင်း သိရသည်။

ထို့အပြင် အလုပ်အကိုင် အခွင့်အလမ်း ပေါများသည့် ရန်ကုန်သို့လည်း ထောင်နှင့်ချီ၍ ရောက်ရှိနေကြကြောင်း ပလက်ဝဒေသခံ ဦးကျော်ခင်က CNI သတင်းဌာနသို့ ပြောသည်။

ပလက်ဝဒေသခံ တိုက်ပွဲရှောင်များကို တွေ့ရစဉ်

၎င်းက “ဘယ်ကိုတိမ်းရှောင်လဲဆိုတော့ တချို့က အိန္ဒိယနယ်စပ် အိန္ဒိယနိုင်ငံထဲကို ဝင်သွားတယ်။ တချို့ကျတော့ ရွာတွေမှာ၊ သူတို့ ဘေးလွတ်ရာလို့ ယူဆတဲ့နေရာမှာ၊ တောရွာတွေမှာ သူတို့နေတယ်။ တချို့ကျတော့ ရန်ကုန်မှာ အခု တော်တော်များများ ရောက်နေပြီ။ ရန်ကုန်မှာ လူဦးရေ ထောင်ချီနဲ့ကို ရောက်နေပြီ။ ပလက်ဝမြို့ပေါ်မှာ၊ ဆမီး မြို့ပေါ်မှာလည်း ထိုနည်းတူလည်းကောင်းပဲ။ ဟိုမှာ ဘာဝင်ငွေမှလည်းမရှိ။ ဘာဝင်ငွေရမယ့် လမ်းကြောင်းလည်း မရှိဘူးဆိုလို့ရှိရင် စားတာတစ်ခုတည်းနဲ့ဆိုရင် ဘယ်လိုမှ အဆင်ပြေ မနေဘူးပေါ့။ အဲဒီလိုမျိုးတော့ ရှိတယ်။ သူတို့ က လုပ်ကိုင်စားသောက်လို့ ရတဲ့အခြေအနေ ရှိမှသာလျှင် သူတို့ အဲဒီမှာ ဆက်ပြီးတော့ နေလို့ရမယ်။ မဟုတ်ဘူး ဆိုလို့ရှိရင် ဘာမှတော့ တိုက်ပွဲတော့ မဖြစ်တော့ဘူး ထားပါတော့၊ ဆန်တွေလည်း ဝယ်ဖို့ရှိတယ် ထားအုံးတော့ ဝင်ငွေလမ်းကြောင်းက ရဖို့မရှိဘူးဆိုရင် အဲဒီမှာ တအားခက်သွားမယ်” ဟု ပြောသည်။

ပလက်ဝမြို့နယ်သည် ရခိုင်ပြည်နယ်မှ ကုန်စည်ကို အဓိက အားထားနေရသည့် မြို့နယ်တစ်ခုဖြစ်ပြီး လက်ရှိ တိုက်ပွဲများကြောင့် ရခိုင်ပြည်နယ်မှ ကုန်စည်ဝင်ရောက်ရန် အခက်အခဲ ဖြစ်နေသည့်အပြင် ပခုက္ကူမြို့နယ်မှ တဆင့် ဝင်ရောက်သော ကုန်စည်လမ်းကြောင်းသည်လည်း တိုက်ပွဲကြောင့် အဆင်မပြေကြောင်း သိရသည်။

ထို့ပြင် ပလက်ဝဒေသခံ အများစုသည် အစိုးရဝန်ထမ်းများဖြစ်ပြီး လက်ရှိတွင် အစိုးရယန္တရားများ ရပ်တန့်နေခြင်း ကြောင့် ယင်းဝန်ထမ်းများသည် အခက်အခဲ ပို၍ ကြုံတွေ့နေရကြောင်း၊ တခြားသော လုပ်ငန်းများ လုပ်ကိုင်ရန် အတွက်လည်း မိုင်းအန္တရာယ်ကြောင့် အဆင်မပြေကြောင်း သိရသည်။

တိုက်ပွဲရှောင်တစ်ဦးကို တွေ့ရစဉ်

ပလက်ဝဒေသခံတစ်ဦးက “ပလက်ဝမှာ နဂိုကတည်းက မြို့ပေါ်မှာနေတဲ့ လူထုအများစုက အစိုးရဝန်ထမ်းတွေ ဖြစ်နေတယ်။ တချို့ NGO ဝန်ထမ်းတွေ ဖြစ်နေတယ်။ ဘာသာရေး ခေါင်းဆောင်တွေ ဖြစ်နေတယ်။ အဲဒီလူတွေက အများစုပေါ့လေ။ အခု အစိုးရယန္တရား ပျက်စီးသွားပြီဆိုတဲ့ အခါကျတော့ အစိုးရဝန်ထမ်း မိသားစုဝင်တွေက ရပ်တည်ဖို့ တအားခက်သွားတာ မြို့ပေါ်လူထုက။ တောရွာတွေမှာကျတော့ တပိုင်တနိုင် တောင်ယာတွေ လုပ် တယ်၊ ပြီးရင် ကိုင်းတွေ သွားတယ်၊ ကိုင်းတွေခုတ်တယ် ဘာညာပေါ့။ သူတို့က စိုက်ခင်းတွေ လုပ်တယ်ပေါ့။ အဲဒီ လိုမျိုးနဲ့ အသက်မွေးဝမ်းကျောင်း ပြုကြတာ ပလက်ဝက။ စက်ရုံ၊ အလုပ်ရုံတွေ မရှိဘူး။ စက်ရုံအလုပ်ရုံလေးတွေ အစိုးရယန္တရား လည်ပတ်တဲ့အခါကျတော့ စည်ပင်တို့ ဘာတို့ ခေါ်တဲ့ဟာရှိတယ်။ စည်ပင်ရဲ့ လုပ်ငန်းတွေမှာ ကန်ထရိုက် ယူပြီးတော့ လုပ်သားတွေပေါ့ အဲဒီလိုနဲ့ ဝင်ငွေရှာတဲ့သူတွေ ရှိတယ်။ ကုမ္ပဏီတွေ ထောင်ပြီးတော့ ကန်ထရိုက်နဲ့ လမ်းတံတားခင်းတာတွေ အဲဒီလိုနဲ့ပဲ အသက်မွေးဝမ်းကျောင်း ပြုတာများတယ်” ဟု ပြောသည်။

ပလက်ဝမြို့နယ်တွင် လူဦးရေ ၁ သိန်းကျော် ရှိသည့်အနက် တိုက်ပွဲများကြောင့် နေရပ်စွန့်ခွာ တိမ်းရှောင် ထွက်ပြေး ကြရခြင်းကြောင့် လက်ရှိတွင် ပလက်ဝဒေသ၌ လူဦးရေ ထက်ဝက်ခန့်သာ ကျန်ရှိနိုင်ကြောင်း တိုက်ပွဲရှောင်အရေး ကူညီသူများထံမှ သိရသည်။

CNI News

၂၀၂၄ ခုနှစ်၊ ဒီဇင်ဘာ ၂

နိုင်ငံတကာ ရာဇဝတ်တရားရုံး(ICC)၏ ရှေ့နေချုပ် ကာရင်အေအေခန်(Karim Khan)က နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ပေးရန် လျှောက်ထားချက်သည် မြန်မာနိုင်ငံအပေါ် သက်ရောက်မှု မရှိနိုင်ဟု မြန်မာ့အရေး လေ့လာသူများက CNI သတင်းဌာနသို့ ပြောသည်။

ဘင်္ဂါလီများအပေါ် ကျုးလွန်သည့် ရာဇဝတ်မှုများအတွက် တာဝန်ရှိသည်ဟူသော စွပ်စွဲချက်ဖြင့် နစကဥက္ကဋ္ဌ  ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ပေးရန် ICC ၏ ရှေ့နေချုပ် ကာရင်အေအေခန်(Karim Khan)က နိုဝင်ဘာ ၂၇ ရက်နေ့မှာ လျှောက်ထားခဲ့သည်။

မြန်မာနိုင်ငံအနေဖြင့် ICC ၏ အဖွဲ့ဝင်နိုင်ငံလည်း မဟုတ်သလို လက်မှတ်လည်း မထိုးထားသောကြောင့် ICC ၏ လုပ်ဆောင်ချက်များသည် သက်ရောက်မှုရှိမှာ မဟုတ်ကြောင်း သေနင်္ဂဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

နိုင်ငံတကာ ရာဇဝတ်တရားရုံး ICC ၏ရှေ့နေချုပ် Karim Khan ကိုတွေ့ရစဥ်

၎င်းက “မြန်မာပြည် နံပါတ် ၁ က ICC နိုင်ငံမဟုတ်ဘူး၊ သူက ICC နဲ့ပတ်သက်တဲ့ လက်မှတ်လည်း ထိုးမထားဘူး၊ အဲတော့ အဲတာကို နည်းနည်းပြန်ကြည့် လိုက်တဲ့အခါမှာ အာဆီယံ ဒေသတွင်းမှာလည်း ICC လက်မှတ်ထိုးတာဆို လို့ ကမ္ဘောဒီးယားနဲ့ တီမောလက်စတီ ၂ နိုင်ငံပဲ ရှိတယ်၊ ပြန်လေ့လာလိုက်တဲ့ အခါကျတော့။ အဲတော့ အဲဒီနိုင်ငံ တွေကလည်း သူတို့မှာရှိခဲ့တဲ့ ဖြတ်သန်းခဲ့တဲ့ နိုင်ငံရေး သမိုင်းကြောင်းတွေအရ လိုအပ်လို့သာ ထိုးထားကြတာ၊ ဒါပေမယ့် အဲဒီနိုင်ငံတွေ အနေနဲ့လည်း ဒါနဲ့ပတ်သက်တဲ့ ထူးခြားတဲ့လှုပ်ရှားမှုအပိုင်း သူတို့မှာလည်း မရှိကြဘူး။ အထူးသဖြင့်ပေါ့ သမိုင်းကြောင်းမတူတဲ့ နိုင်ငံတွေ ဖြတ်သန်းခဲ့ရတဲ့  အနေအထား မတူတဲ့နိုင်ငံတွေ ကြားထဲမှာ ဒီ ICC ရဲ့လုပ်ငန်းစဥ်က တချို့နိုင်ငံတွေအတွက် အဆင်ပြေကောင်း ပြေလိမ့်မယ်၊ ဒါပေမယ့် နိုင်ငံတိုင်းအတွက် အဆင်ပြေဖို့ မဖြစ်နိုင်ဘူး။ မြန်မာနိုင်ငံလိုမျိုး သမိုင်းကြောင်း နည်းနည်းလေး ရှုပ်ထွေးတယ်၊ ပြီးတော့ မြေပြင် အခြေအနေမှာလည်း တော်တော်လေး ရှုပ်ထွေးမှုတွေများတဲ့ နိုင်ငံတွေမှာလည်း တော်တော်လေး ရှုပ်ထွေးမှုတွေ များတဲ့ နိုင်ငံတွေ အတွက်ကတော့ ICC နဲ့ပတ်သက်တဲ့ ကိစ္စရပ်က ကိုယ့်ဘက်ကတော့ အလုပ်ရှုပ်တာ သီးသန့် တစ်ခုလောက်ပဲ ဖြစ်လိမ့်မယ်။ အဲတော့ မြန်မာနိုင်ငံအနေနဲ့ လက်မှတ်လည်း ထိုးမထားဘူး၊ အဖွဲ့ဝင်အနေနဲ့လည်း ဖြစ်မထားတဲ့အတွက်ကြောင့် သူ့ဘာသူ ဘယ်လိုပဲ အပြင်က သူတို့ ဘယ်လိုပဲ လုပ်ဆောင်ချက်တွေ လုပ်နေပါစေ ဘာသက်ရောက်မှုမှတော့ မြန်မာနိုင်ငံပေါ်မှာ ဖြစ်လာမှာမဟုတ်ပါဘူး” ဟု ပြောသည်။

မြန်မာနိုင်ငံသည် ICC အဖွဲ့ဝင်နိုင်ငံ မဟုတ်သကဲ့သို့ ICC ၏ ပြောကြားချက်များအပေါ် မည်သည့်အခါကမှ အသိအမှတ်ပြုခြင်း မရှိကြောင်း၊ မြန်မာနိုင်ငံအနေဖြင့် ဒေသတွင်းအပြင် ကမ္ဘာ့နိုင်ငံများနှင့် ဆက်ဆံရေးတွင် လွတ်လပ်၍ တက်ကြွပြီး ဘက်မလိုက်သော နိုင်ငံခြားရေးမူဝါဒကို ကျင့်သုံးလျက်ရှိကာ နိုင်ငံများအကြား ငြိမ်းချမ်းစွာ အတူယှဥ်တွဲ နေထိုင်ရေးမူကို ကျင့်သုံးလျက်ရှိကြောင်း နစက-က ပြောကြားခဲ့သည်။

နစကအနေဖြင့် နိုင်ငံရေးအရ ဂုဏ်သိက္ခာ ထိခိုက်ရုံသာရှိပြီး ထိုလျှောက်ထားချက်သည် ထိရောက်မှု မရှိနိုင် ကြောင်း တရုတ်-မြန်မာအရေး လေ့လာသုံးသပ်သူ ‌ဒေါက်တာလှကျော်ဇောက CNI သတင်းဌာနသို့ ပြော သည်။ 

ဗိုလ်ချုပ်မှူးကြီး မင်းအောင်လှိုင်ကို တွေ့ရစဥ်

၎င်းက “မရှိနိုင်ပါဘူးဗျ၊ ဒီ ICC က ထုတ်တာလည်းပဲ များလည်းများလှနေပါပြီ။ နိုင်ငံရေးအရ ဂုဏ်သိက္ခာအရ မင်းအောင်လှိုင် ပဲ့သွားတာကလွဲလို့ တကယ့်တကယ်ဘာမှ မထိရောက်ပါဘူး၊ ပြည်သူလူထုဘက်ကတော့ အားတက်စရာ‌ပေါ့ဗျာ၊ ကိုယ့်ကိုနှိပ်စက်ချင်တိုင်း နှိပ်စက်နေတဲ့ စစ်အာဏာရှင် တစ်ယောက်ကို ICC က ဖမ်းဝရမ်း ထုတ်ဖို့ လျှောက်ထားလိုက်တယ်ဆိုတော့ ဝါဒဖြန့်ချီရေးအတွက်တော့ စိတ်အားတက်စရာ ဖြစ်ပေမယ့် တကယ့် အခိုင်အမာတွေကျတော့ ဘာမှဒီလောက်ထူးခြားတာ မဟုတ်ပါဘူး။ ခင်ဗျား ICC ထုတ်ဖူးပေါင်းလည်း များနေပြီပဲ၊ ဘာမှ သိပ်ထူးထူးခြားခြား ဖြေရှင်းနိုင်တာမှ မဟုတ်ပဲ၊ ပြည်သူလူထုတွက်ကတော့ အားတက်စရာပေါ့ဗျာ၊ ဒီလောက်ပါပဲ။ မထိရောက်ပါဘူး” ဟု ပြောသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကို ICC က ဖမ်းဝရမ်းထုတ်ရန် ICC ရှေ့နေချုပ်၏ လျှောက်ထား ချက်ကို ကြိုဆိုကြောင်း အမျိုးသားညီညွတ်ရေးအစိုးရ(NUG)၊ ကရင်အမျိုးသားအစည်းအရုံး (KNU)၊ ကရင်နီ အမျိုးသားတိုးတက်ရေးပါတီ (KNPP) နှင့် ချင်းအမျိုးသားတပ်ဦး (CNF) တို့က နိုဝင်ဘာလ ၃၀ ရက်တွင် ကြေညာချက် ထုတ်ပြန်ထားသည်။

တရုတ်နိုင်ငံကတော့ နိုင်ငံတကာရာဇဝတ်မှုတရားရုံး(ICC) အနေဖြင့် ၎င်း၏ ဥပဒေများအရ အဖွဲ့ဝင်နိုင်ငံ မဟုတ်သော နိုင်ငံတစ်ခုမှ နိုင်ငံသားများက အခြားအဖွဲ့ဝင်နိုင်ငံ မဟုတ်သော ပိုင်နက်တစ်ခုအ‌ပေါ် ကျူးလွန် သည့် လုပ်ရပ်အတွက် တရားစီရင်ပိုင်ခွင့်မရှိဟု တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်း က နိုဝင်ဘာ ၂၈ ရက် ပုံမှန်သတင်းစာ ရှင်းလင်းပွဲအတွင်း ပြောကြားခဲ့သည်။