CNI News
၂၀၂၄ ခုနှစ်၊ မေလ ၁၅

အာဆီယံအလှည့်ကျဥက္ကဋ္ဌ၏ လာအိုနိုင်ငံမှ မြန်မာနိုင်ငံဆိုင်ရာ အာဆီယံအထူးကိုယ်စားလှယ် H.E.Mr. Alounkeo Kittikhoun(မစ္စတာ အာလွန်ကဲအို ကစ်တီကွန်) နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ မေလ ၁၅ ရက်နေ့က နေပြည် တော်မှာ တွေ့ဆုံဆွေးနွေးခဲ့ကြသည်။

အာဆီယံအထူးကိုယ်စားလှယ်၏ မြန်မာပြည်ခရီးစဉ်မှာ အာဆီယံအတွင်းရေးမှူးချုပ် Dr. Kao Hourn လည်း ပါဝင်ခဲ့သည်။

ထိုသို့ တွေ့ဆုံစဉ် လက်ရှိမြန်မာ့နိုင်ငံရေး ဖြစ်ပေါ်တိုးတက်မှု အခြေအနေများ၊ အာဆီယံဘုံသဘောတူညီချက် ၅ ရပ် အကောင်အထည်ဖော်နေမှု အခြေအနေများ၊ ရွေးကောက်ပွဲ ကျင်းပနိုင်ရေး ပြင်ဆင်မှုအခြေအနေများ၊ ငြိမ်း ချမ်းရေး ဖော်ဆောင်နေမှု အခြေအနေများကို ဆွေးနွေးခဲ့ကြကြောင်း သိရသည်။

CNI News

၂၀၂၄ ခုနှစ်၊ မေလ ၁၅

လက်ရှိ မြန်မာ့နိုင်ငံရေး အနေအထားအရ တွေ့ဆုံဆွေးနွေးမှုမှာ အဖြေမှန်မရရှိနိုင်၍ စစ်ရေးနည်းလမ်းကို စဉ်းစားရခြင်းဖြစ်သည်ဟု ကချင်လွတ်လပ်ရေးအဖွဲ့ (KIO/KIA) မှ ပြန်ကြားရေးတာဝန်ခံ ဗိုလ်မှူးကြီးနော်ဘူက CNI သတင်းဌာနသို့ ပြောသည်။

နိုင်ငံရေးအရ ပြည်တွင်းပြဿနာကို တွေ့ဆုံဆွေးနွေးရမှာဖြစ်ကြောင်း၊ လက်ရှိ အနေအထားအရ တိုက်ခိုက် ရမည်ဖြစ်ကြောင်း ၎င်းက ပြောသည်။

ဗိုလ်မှူးကြီး နော်ဘူက “နိုင်ငံရေးဖက်က ကြည့်လို့ရှိရင် ဆွေးနွေးရမှာပဲ ပြည်တွင်းပြဿနာကို အဖြေမှန်ရှာဖို့ အတွက်ကတော့ ဆွေးနွေးရမှာ သို့သော်လည်းပဲ မင်းအောင်လှိုင်တို့ပေါ့နော်၊ မြန်မာ့တပ်မတော် သူတို့ရဲ့ ဘယ်လို ပြောမလဲ သူတို့ အမြဲတမ်းလုပ်နေတဲ့ အဲဒီပြဿနာ ပြန်ကြည့်မယ်ဆိုရင်တော့ ခုလောလောဆယ်က တွေ့ဆုံ ဆွေးနွေးလို့ အဖြေမှန် ထွက်မယ်လို့ ကျနော် မထင်ပါဘူး။ နည်းနည်းတော့ တိုက်ရမယ်ထင်တယ်၊ ဒါက ကျနော် အမြင်ပါ၊ KIO ရဲ့ သဘောထားကတော့ မဟုတ်ဘူး။ ကျနော့် အတွေ့အကြုံအရတော့ သူတို့လည်း ကျနော်တို့ တိုင်းရင်းသားတွေ လိုချင်တဲ့ နိုင်ငံရေး အခွင့်အရေးတွေကို ဘယ်တော့မှ သေသေချာချာ ထဲထဲဝင်ဝင် စဉ်းစားပြီးမှ မဆွေးနွေးဘူးလေ၊ အဲဒါကြောင့် စစ်ရေးနဲ့ ယနေ့ စဉ်းစားရမယ်လို့ ကျနော်ထင်ပါတယ်” ဟု CNI သတင်းဌာနသို့ ပြောသည်။

မြန်မာနိုင်ငံတွင် ၁၉၄၈ ခုနှစ်၊ လွတ်လပ်ရေး ရယူခဲ့ပြီးနောက်ပိုင်း တိုင်းရင်းသားများ၏ တန်းတူအခွင့်အရေး၊ ကိုယ့်ကံကြမ္မာကိုယ်ဖန်တီးခွင့် စသဖြင့် လက်နက်စွဲကိုင်တော်လှန်မှုကြောင့် ပြည်တွင်း လက်နက်ကိုင်ပဋိပက္ခ ဖြစ်ပွားခဲ့သည်။

မြန်မာနိုင်ငံဆိုင်ရာ တရုတ်အထူးကိုယ်စားလှယ်ဟောင်းနဲ့ KIA ဒုဥက္ကဋ္ဌ ဒုဗိုလ်ချုပ်ကြီးဂွမ်မော်ကိုတွေ့ရစဉ်

ထို့နောက် ၂၀၂၁ ခုနှစ်၊ ဖေဖော်ဝါရီ ၁ ရက်နေ့နောက်ပိုင်း ဖြစ်ပေါ်ပြောင်းလဲခဲ့သော နိုင်ငံရေး အခင်းအကျင်းများ အရ နယ်စပ်ဒေသတွင် သာမကဘဲ ပြည်မဒေသများအထိပါ လက်နက်ကိုင်ပဋိပက္ခများ ဖြစ်ပွားလာခဲ့သည်။

လက်ရှိတွင် KIA/KIO သည် နွေဦးတော်လှန်ရေးမှ ပေါ်ပေါက်လာသော ပြည်သူ့ကာကွယ်ရေးတပ်ဖွဲ့(PDF)များကို စစ်သင်တန်းပေးခြင်း၊ လက်နက်ခဲယမ်းများ ထောက်ပံ့ပေးခြင်း၊ စစ်ဆင်ရေးများ ပူးပေါင်းဖော်ဆောင်ခြင်းများဖြင့် မြန်မာ့တပ်မတော်ကို ဖိအားပေးလျက်ရှိသည်။

လက်နက်ကိုင်ပဋိပက္ခ ချုပ်ငြိမ်းရေးအတွက် ဖြေရှင်းနိုင်သည့် တစ်ခုတည်းသော နည်းလမ်းမှာ အခြေခံဥပဒေအရ ရပိုင်ခွင့်များ ပြဋ္ဌာန်းပေးရမှာဖြစ်ကြောင်း၊ ဖွဲ့စည်းပုံအခြေခံဥပဒေမူများကို ညှိနှိုင်းနိုင်မည့် ညီလာခံတစ်ခု လိုအပ် ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

ဗိုလ်ချုပ်ကြီးအင်ဘန်လ၊ တရုတ်အထူးကိုယ်စားလှယ်ဟောင်းနဲ့ ကုလသံတမန်ဟောင်းကို တွေ့ရစဉ်

၎င်းက “ဒီလက်နက်ကိုင်ပဋိပက္ခ ချုပ်ငြိမ်းဖို့အတွက် ဖြေရှင်းနိုင်တဲ့ တစ်ခုတည်းသော နည်းလမ်းသည် အခြေခံ ဥပဒေအရ ရပိုင်ခွင့်၊ တာဝန်၊ ခံစားပိုင်ခွင့် စသည်ဖြင့်ပေါ့ဗျာ၊ ဒါတွေကို ကျနော်တို့ ပြဋ္ဌာန်းပေးရမှာ ဖြစ်တယ်၊ မြန်မာ့တပ်မတော်ရဲ့ အနေအထားကိုလည်းပဲ စုစုစည်းစည်းနဲ့ ပဋိပက္ခနည်းတဲ့ဟာဖြင့် စုစည်းနိုင်ဖို့ကလည်း အခြေခံဥပဒေပဲရှိတယ်၊ အခြေခံဥပဒေအရပဲ ထွက်ပေါက် တစ်လမ်းပဲရှိတယ်လို့ ကျနော်တို့ သုံးသပ်တယ်၊ အဲဒီလို ဖြစ်ဖို့အတွက် အသွင်မတူတဲ့ လက်နက်ကိုင် အဖွဲ့အစည်းအားလုံး နိုင်ငံရေးအားဖြင့် သဘောထား မတိုက်ဆိုင်တဲ့ အားလုံးပေါ့ဗျာ၊ ညှိနှိုင်းနိုင်တဲ့ နေရာတစ်ခုကတော့ လိုတယ်၊ အဲဒါကတော့ အခြေခံမူတွေကို ညှိနှိုင်းနိုင်မယ့် ညီလာခံကြီးတစ်ခု အဲဒီညီလာခံကြီးတစ်ခုကို နစကဖက်က ဖွင့်ပေးမှာလား၊ လက်နက်ကိုင်အဖွဲ့အစည်းတွေ ပါလာအောင် နိုင်ငံပတ်လည်မှာရှိတဲ့ ကျနော်တို့ရဲ့ အိမ်နီးနားချင်းနိုင်ငံတွေ ဖက်ကရော အဲဒီဖက်ကို အားပေးမှာ လားဆိုတဲ့ အနေအထားကတော့ လာမယ့် ကာလမှာပဲ သုံးသပ်ရမှာဖြစ်တော့ အဲဒီတစ်ခုကို ကျနော်တို့ မြင်တယ် ဗျ၊ ညှိနှိုင်းမှုကနေသွားမယ့် အခြေခံမူပေါ့ဗျာ၊ အဲဒီနည်းပဲ ကျနော်တို့ လိုပါတယ်” ဟု ပြောသည်။

မြန်မာနိုင်ငံမှာ ပြည်တွင်း လက်နက်ကိုင်ပဋိပက္ခ ဖြစ်ပွားလာခဲ့သည်မှာ နှစ်ပေါင်း ၇၀ ကျော်ကြာမြင့်ခဲ့ပြီ ဖြစ်သော်လည်း လက်ရှိအချိန်ထိ ဖြေရှင်းနိုင်ခြင်း မရှိသေးပေ။

လက်ရှိ ပဋိပက္ခအတွင်း ပါဝင်ပတ်သက်နေကြသော လက်နက်ကိုင်အဖွဲ့အစည်းများမှာ တစ်ဖက်နှင့် တစ်ဖက် အပြုတ်တိုက်ရေး ကြွေးကြော် လှုပ်ရှားလျက်ရှိနေသလို တိုင်းရင်းသားလက်နက်ကိုင် အဖွဲ့အစည်းအချို့၊ နိုင်ငံရေး ပါတီအချို့မှာ နိုင်ငံရေးနည်းလမ်းဖြင့် ဖြေရှင်းနိုင်ရေး ကြိုးပမ်းလျက်ရှိနေသည်။

CNI News

၂၀၂၄ ခုနှစ်၊ မေလ ၁၄

တရုတ်၏ ကြားဝင်စေ့စပ်မှုကြောင့် ပေါ်ပေါက်လာသော ဟိုင်ဂင်သဘောတူညီချက် တွေ့ဆုံဆွေးနွေးမှု မကြာခင် ပြန်လည်စတင်မည်ဖြစ်၍ ထိုတွေ့ဆုံဆွေးနွေးမှုနောက်ပိုင်းမှာ မြန်မာ့တပ်မတော်နှင့် အာရက္ခတပ်တော် (AA) တို့ကြား အပစ်ရပ်လာနိုင်သလားဆိုကာ ငြိမ်းချမ်းရေးလုပ်ငန်းစဉ်မှာ ပါဝင်နေကြသူများက သုံးသပ်လျက်ရှိနေ သည်။ 

မြောက်ပိုင်းမဟာမိတ်သုံးဖွဲ့(TNLA-AA-MNDAA)တို့နှင့် နစက၏ ငြိမ်းချမ်းရေးအဖွဲ့ကြား တရုတ်၏ ကြားဝင် စေ့စပ်မှုကြောင့် ပေါ်ပေါက်လာသော ဟိုင်ဂင်သဘောတူညီချက် တွေ့ဆုံဆွေးနွေးပွဲကို မကြာမီရက်ပိုင်းအတွင်းမှာ ကျင်းပကြမည်ဖြစ်သည်။

ထို့တွေ့ဆုံဆွေးနွေးမှု နောက်ပိုင်းတွင် ရခိုင်ပြည်နယ်မှာ ဖြစ်ပွားနေသော မြန်မာ့တပ်မတော်နှင့် အာရက္ခတပ်တော် (AA) တို့ကြား အပစ်အခတ်ရပ်စဲလာနိုင်သည်ဟု နီးစပ်သူများထံမှ သိရသည်။

နယ်စပ်ကုန်သွယ်ရေးကိစ္စကို အဓိကထား ဆွေးနွေးမည်ဟု ယူဆကြောင်း၊ AA နှင့် မြန်မာ့တပ်မတော်တို့ အပစ်ရပ် ရေးကိစ္စ ပါဝင်ခြင်း ရှိ/မရှိ မသိနိုင်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာ လှကျော်ဇောက CNI သတင်းဌာနသို့ ပြောသည်။

AA-TNLA-MNDAA ခေါင်းဆောင်များကို တွေ့ရစဉ်

၎င်းက “ကျမသိတာတော့ သူတို့ နယ်စပ်ကုန်သွယ်ရေး ကိစ္စတွေပဲနဲ့ တူတယ်၊ ကြည့်ရတာ၊ အဲဒီဟာတွေ ပြန်ဖွင့်ဖို့ ကိစ္စပဲ လုံးပန်းနေပုံရတယ်ဗျ၊ AA ကိစ္စ ပါမပါတော့ မသိဘူး။ ရပ်ဖို့လိုရင်လည်း ရပ်လိမ့်မယ်ထင်တယ်၊ AA က အခု သူတိုက်နေတာလည်း နည်းနည်း ရက်ကြာနေပြီ ဖြစ်တာကို၊ နောက်အခု ကျမကြားသလိုဆိုရင် ရိုဟင်ဂျာတွေ နေတဲ့ဒေသနဲ့ ရခိုင်တွေနေတဲ့ဒေသကြား ပဋိက္ခတွေ ထပ်တိုးလာမှာလည်း ပူပန်ရသေးတာကို၊ အဲဒါတွေ ဖြေရှင်းဖို့ ရှိတော့ ရပ်ချင်လည်း ရပ်လိမ့်မယ်ထင်တယ်၊ ဒါပေမဲ့ သူတို့ရထားတဲ့ နေရာတွေလည်း နည်းတာ မဟုတ်ဘူးလေ၊ ပြန်ပေးတာအထိတော့ မဖြစ်ပါဘူးနဲ့ တူပါတယ်” ဟု ပြောသည်။

လက်ရှိတွင် AA ၏ စစ်ရေးရည်မှန်းချက် အစိတ်အပိုင်းတစ်ခုအထိ အောင်မြင်ထားပြီး ဖြစ်ကြောင်း၊ မိမိရရှိထား သည့် နယ်မြေကို တည်ငြိမ်ရေး လုပ်ဆောင်ရန် လိုအပ်ကြောင်း ဒေါက်တာလှကျော်ဇောက ထောက်ပြသည်။

ပြီးခဲ့သည့် လေးကြိမ်မြောက် ဟိုင်ဂင်ဆွေးနွေးပွဲကို တရုတ်နိုင်ငံ၊ ယူနန်ပြည်နယ်၊ ကူမင်းမြို့မှာ မတ်လ ၁ ရက်မှ ၃ ရက်နေ့အထိ ပြုလုပ်ခဲ့ပြီး မြန်မာ့တပ်မတော်နှင့် မြောက်ပိုင်းမဟာမိတ်(TNLA-AA-MNDAA)တို့အကြား အပစ် အခတ်ရပ်စဲရေး သဘောတူညီခဲ့ကြသည်။

ထိုအပစ်အခတ်ရပ်စဲရေးတွင် ရခိုင်ပြည်နယ် မပါကြောင်း မတ်လ ၄ ရက်နေ့မှာ AA က သတင်းစာ ရှင်းလင်းပွဲ လုပ်ခဲ့ပြီး AA ၏ ဒုတိယစစ်ဦးစီးချုပ် ဒေါက်တာညိုထွန်းအောင်က ပြောကြားခဲ့သည်။

သို့သော် ယခုလအတွင်း ဟိုင်ဂင်တွေ့ဆုံဆွေးနွေးမှုကို ပြန်လည် စတင်ကြမည်ဖြစ်သလို AA နှင့် မြန်မာ့တပ်မ တော်ကြား ရခိုင်ပြည်နယ်မှာ အပစ်အခတ်ရပ်စဲရေး သဘောတူညီမှုရလိမ့်မည်ဟု နီးစပ်သူများက ပြောသည်။

AA သည် ရခိုင်ပြည်နယ်အတွင်းရှိ ပေါက်တော၊ ကျောက်တော်၊ မြေပုံ၊ မြောက်ဦး၊ တောင်ပြိုလက်ဝဲ၊ မင်းပြား၊ ပုဏ္ဏားကျွန်း၊ ရမ်းဗြဲ အပါအဝင် ချင်းပြည်နယ်အတွင်းရှိ ပလက်ဝ၊ ဆမီးတို့ကို သိမ်းပိုက်ထားသည်။

ရခိုင်ပြည်နယ်အတွင်းက စစ်ပွဲကြောင့် ပျက်စီးနေမှုကိုတွေ့ရစဉ်

မိမိတို့ မြို့နယ်မှာ တိုက်ပွဲများ ရပ်ဆိုင်းသွားကြောင်း၊ သို့သော်လည်း ယခင်တိုက်ပွဲများကြောင့် မိမိတို့ နေအိမ်များ ပျက်စီးခဲ့သည့်အတွက် နေရပ်ပြန်ရန် အခက်အခဲရှိနေကြောင်း မြောက်ဦးတိုက်ပွဲရှောင်တစ်ဦးက CNI သတင်းဌာန သို့ ပြောသည်။

၎င်းက “ဒီဖက်ခြမ်းမှာတော့ တိုက်ပွဲက မရှိသလောက်ဖြစ်သွားပြီ။ ဒါပေမဲ့ နေရပ် ပြန်မယ့်သူတွေက သူတို့ အခက်အခဲ ရှိနေကြတယ်၊ သူတို့အိုးတွေ အိမ်တွေ ပျက်စီးတဲ့ဟာတွေ ရှိတယ်လေ၊ အဲဒါကြ‌တော့ သူတို့လည်း မပြန်ဖြစ်ဘူး၊ အဲဒီလို၊ ဟိုကလည်း ထောက်ပံ့ငွေတွေ လာမလား၊ လာမလားနဲ့ မျှော်နေတာ လာလည်း မလာဘူး။ အဲဒါကြောင့်၊ တိုက်ပွဲကတော့ မဖြစ်လေကောင်းလေပဲ၊ ပြည်သူတွေလည်း စီးပွားရေးလည်း အလုပ်လုပ်လို့ မရဘူး။ လမ်းပန်းဆက်သွယ်ရေးလည်း ပိတ်တယ်၊ တိုက်ပွဲတွေ မရှိလေ ကောင်းလေပါပဲ” ဟု ပြောသည်။

လက်ရှိတွင် စစ်တွေ၊ အမ်း၊ ကျောက်ဖြူမြို့နယ်တို့တွင် မြန်မာ့တပ်မတော်နှင့် ရက္ခိုင့်တပ်တော် (AA) တို့အကြား တိုက်ပွဲများ ဖြစ်ပွားလျက်ရှိနေသည်။

ထို့အတူ AA အနေဖြင့် ၎င်းတို့၏ နိုင်ငံရေးရည်မှန်းချက်ဖြစ်သည့် ကွန်ဖက်ဒရေးရှင်း(ကွန်ဖက်ဒရိတ်)ကို ရရှိရန် လုပ်ဆောင် သွားမည်ဖြစ်ကြောင်း ပြောဆိုထားသလို ၎င်းတို့ သိမ်းပိုက်ထားသော နယ်မြေများကိုလည်း အုပ်ချုပ် ရေး၊ ဥပဒေပြုရေး၊ တရားစီရင်ရေးများကို ဖော်ဆောင်လာနိုင်ကြောင်း ထောက်ပြကြသည်။

CNI News
၂၀၂၃ ခုနှစ်၊ မေလ ၁၃

ကချင်လွတ်လပ်ရေးတပ်မတော်(KIA) စစ်ဦးစီးချုပ် ဒုတိယဗိုလ်ချုပ်ကြီး ခေါင်လွမ်းသည် နားမကျင်ဖြစ်ကာ ယနေ့ (မေလ ၁၃ ရက်) ညနေပိုင်းက ကွယ်လွန်သွားပြီဖြစ်ကြောင်း နီးစပ်သူများထံမှ သိရသည်။

ဒုတိယဗိုလ်ချုပ်ကြီး ခေါင်လွမ်းသည် အသက် ၆၂ နှစ်အရွယ်ရှိပြီဖြစ်ပြီး ယနေ့ ညနေ ၆ နာရီတွင် အသည်းရောဂါဖြင့် ကွယ်လွန်သွားခဲ့ခြင်းဖြစ်သည်ဟု နီးစပ်သူများက ပြောသည်။

၎င်းသည် ၁၉၈၈ ခုနှစ်နောက်ပိုင်းတွင် KIA သို့ဝင်ရောက်ခဲ့ပြီး တာဝန်အဆင့်ဆင့်ကို ထမ်းဆောင်ရင် ၂၀၂၃ ခုနှစ်၊ နှစ်ဆန်းပိုင်းမှာပဲ KIA ဒုစစ်ဦးစီးချုပ် ရာထူးမှ စစ်ဦးစီးချုပ်ရာထူးသို့ တိုးမြှင့်ခံခဲ့ရသူဖြစ်သည်။

CNI News

၂၀၂၄ ခုနှစ်၊ မေလ ၁၃

နာဂလူငယ်များကို ကချင်လွတ်လပ်ရေးတပ်မတော် (KIA) ဖမ်းဆီးမှုမှာ အညွန့်ချိုးသလို ဖြစ်နေကြောင်း နာဂလူငယ်များက ပြောသည်။

KIA သည် နာဂလူငယ်များကို ရှင်ဗွေယန်နှင့် တနိုင်းလမ်းကြောင်းများတွင် ဖမ်းဆီးမှု လုပ်ဆောင်နေကြောင်း၊ ခရီးသွားလာမှု၌ အခက်အခဲဖြစ်နေကြောင်း နာဂလူငယ်တစ်ဦးက CNI သတင်းဌာနသို့ ပြောသည်။

၎င်းက “ရှေ့တန်းမှာ သွားခိုင်းတယ်ဆိုတာတော့ မျက်နှာကို ကြည့်လိုက်ရင်တော့ နာဂ မျက်နှာပေါက်ပဲ၊ နာမည် ကြည့်လိုက်‌တော့ ကချင်နာမည်၊ တနိုင်း၊ ရှင်ဗွေယန်က နာဂလူငယ် တော်တော်များများ ရှိတာကိုး၊ နန်းယွန်း၊ ပန်ဆောင်၊ ဒုံဟီးက များနေတာကိုး အဲဒီဟာတွေက ဘယ်ရောက်သွားပြီလဲပေါ့၊ ကျနော်တို့ မမြင်ရတဲ့ဟာ အများ ကြီး ရှိတယ်၊ အဲဒီအခါကြတော့ အခုထိ မလုံလောက်နိုင်ဘူး။ နာဂလူငယ်တွေကို အညွ့န်ချိုးသလို ဖမ်းဆီးနေတုန်း ပဲဆိုတာ ဘာကြောင့်မို့ ဒီလောက်အထိ လုပ်နေသလဲဆိုတာ ကျနော်တို့က ဘယ်လောက်အထိ ခက်ခဲနေသလဲ ကချင်ပြည်နယ်မှာ မြစ်ကြီးနားမှာ ကျောင်းသွားကျောင်းလာချင်တယ်၊ ဒီလမ်းမကြီးပဲ သွားလာတဲ့အခါကြတော့ အခုကြတော့ မသွားရဲ မလာရဲ အဲဒီလိုမျိုးတွေ ဖြစ်ကုန်တဲ့အခါကြတော့ အလုပ်အကိုင်က အစစအရာရာ ကျပ်တည်းကုန်တာပေါ့” ဟု ပြောသည်။

KIA တပ်ဖွဲ့ကို တွေ့ရစဉ်

ပြီးခဲ့သည့် ဧပြီဒုတိယပတ်က ရှင်ဗွေယန်မြို့နယ်တွင်းရှိ ကျေးရွာအချို့မှာ KIA သည် တစ်အိမ်တက်ဆင်း လူငယ်များကို ဖမ်းဆီးမှု ပြုလုပ်ခဲ့ပြီးနောက် လူငယ်အများအပြား ထွက်ပြေးတိမ်းရှောင်ကြရသည်။

နာဂလူငယ်များကို KIA ဖမ်းဆီးနေသည်ဟု ပြောဆိုမှုနှင့် ပတ်သက်၍ မိမိအနေဖြင့် မကြားမိကြောင်း၊ ၎င်းကိစ္စ အပေါ် မှတ်ချက်မပေးလိုကြောင်း KIA ၏ ပြန်ကြားရေးတာဝန်ခံ ဗိုလ်မှူးကြီး နော်ဘူက CNI သတင်းဌာနသို့ ပြောသည်။

၎င်းက “အဲဒါနဲ့ ပတ်သက်လို့ ကြားတောင်မကြားဘူး။ ကျနော်တော့ အဲဒါလည်း ရှေ့တန်းမှာ ဖြစ်တဲ့ ဖြစ်စဉ်တွေ ဖြစ်မှာပါ၊ ဒါတော့ ကျနော်တို့ မကြားတာ နေမှာပါ၊ မဟုတ်ဘူးလို့ ကျနော်ပြောတာတော့ မဟုတ်ဘူး။ ကျနော်တို့ မကြားလို့ပါ၊ ဘာမှ မှတ်ချက်ပေးစရာ မရှိဘူး” ဟု ပြောသည်။

KIA အနေဖြင့် လူ ၃၀၀၀ ဖမ်းဆီးမည်ဟု သတင်းထွက်ပေါ်နေကြောင်း၊ ၎င်းဖမ်းဆီးမှုတွင် နာဂလူများကို ဖမ်းဆီးခြင်းလား သို့မဟုတ် ကချင်နှင့် အခြားသော လူမျိုးစုများပါ ဖမ်းဆီးခြင်းလားဆိုသည်မှာ မသိရှိကြောင်း နာဂလူငယ်တစ်ဦးက ပြောသည်။

KIA မှာ စစ်သင်တန်းတက်နေတဲ့ လူငယ်တွေကိုတွေ့ရစဉ်

၎င်းက “သူတို့က တစ်ချိန်ချိန်ကြရင် နာဂလူငယ်တွေကို စုဆောင်းပြီးတော့ နာဂဒေသကို လွမ်းမိုးခိုင်းဖို့ သက်သက်လား၊ နန်းယွန်း၊ ပန်ဆောင်ကို သူတို့က မတရားအုပ်ဖို့လား၊ အသုံးချဖို့လား၊ ဒါမှ မဟုတ်၊ ကချင် ပြည်နယ်မှာရှိတဲ့ နာဂဒေသမှာရှိတဲ့ တစ်ချိန်တုန်းကလည်း NSCN-K နဲ့ နယ်မြေဒေသ ခွဲခြားမှု အတိအကျ မရှိတဲ့အခါကြတော့ ကချင်ပြည်နယ်မှာကလည်း နာဂဒေသလို့ ပြောတယ်၊ နာဂဒေသလည်း ကချင်ပြည်နယ် လို့လည်း ပြောတယ်၊ သူတို့က ရှင်းရှင်းလင်းလင်း မရှိဘူး။ ဘာကို ဆိုလိုသလဲ ဘာကို လုပ်နေသလဲ နာဂပြည်သူ လူထုကတော့ ကိုယ့်ဒေသကတော့ ကိုယ့်ဒေသပဲ အရှင်းအလင်း မရှိခဲ့တာ၊ ဒါပေမဲ့လည်း သူတို့က ဒီဟာကို ဖမ်းဆီးနေတဲ့ဟာက ဘယ်ကို အသုံးချဖို့လဲ၊ ကချင်ပြည်နယ်မှာက အသုံးချဖို့လား၊ ဘာကို ခေါင်းစဉ် သတ်မှတ် တာလဲ၊ ဘာကြောင့်ဆိုတာလည်း သူတို့ဖက်က ချပြတာ မရှိဘူး။ သတင်းရယူဖို့ဆို ဝေလာဝေးပေါ့၊ နာဂဒေသမှာ ဘာသတင်းထောက်လည်း မရှိဘူး။ ဘာအဆက်အသွယ်မှ မရှိဘူး။ အဲဒါကြောင့် လျှောက်လုပ်နေသလားပေါ့” ဟု ပြောသည်။

၂၀၂၃ ခုနှစ်အတွင်း နာဂလူငယ်များ ဖမ်းဆီးခံရမှု ၅၀၀ နှင့် ၇၀၀ အကြားရှိနေကြောင်း အချို့မှာ ပြန်လည် လွတ်မြောက်မှုရှိကာ ရှင်ဗွေယန်၊ နန်းယွန်း၊ ပန်ဆောင်၊ လဟယ်၊ ဒုံဟီး နှင့် စစ်ကိုင်းတိုင်းဒေသကြီး၊ ခန္တီးမြို့နယ်၊ နန်စီပွန်ဒေသတွင် KIA မှ ဖမ်းဆီးမှု လုပ်ဆောင်နေကြောင်း သိရသည်။

CNI News
၂၀၂၄ ခုနှစ်၊ မေလ ၁၀

CB ဘဏ်ဥက္ကဋ္ဌ ဦးခင်မောင်အေးကို နစကမှ ဖမ်းဆီးထားသည်ဟု ရေးသားထုတ်ဖော်နေကြသော်လည်း သတင်းအမှားသာဖြစ်ပြီး ဖမ်းဆီးခံရခြင်းမရှိကြောင်း နီးစပ်သူများထံမှ သိရသည်။

ဦးခင်မောင်အေးကို နစက-က ဖမ်းဆီးထားပြီး နေပြည်တော်မှာ စစ်ဆေးနေကြောင်း သတင်းများ ထွက်ပေါ် လာသလို တချို့သော သတင်းဌာနများတွင် ဖော်ပြလျက်ရှိသည်။

လက်ရှိတွင် ဦးခင်မောင်အေးသည် ဘန်ကောက်မြို့မှာ ရှိနေပြီး ကျန်းမာရေးအရ ဆေးစစ်နေသည်မှာ တစ်ပတ် လောက်ရှိပြီဟု နီးစပ်သူတစ်ဦးက CNI သတင်းဌာနသို့ ပြောသည်။

၂၀၂၄ ခုနှစ်၊ မေလ ၁၀ ရက်နေ့က CB ဘဏ်ဥက္ကဋ္ဌ ဦးခင်မောင်အေးတို့ ဇနီးမောင်နှံနဲ့ KBZ နာယကကြီးဦးအောင်ကိုဝင်းတို့ ဇနီးမောင်နှံကို တွေ့ရစဉ် (Sai Moe San)

ထို့အပြင် ယနေ့ (မေလ ၁၀ ရက်) ကျရောက်သည့် KBZ ဘဏ် နာယကကြီး ဦးအောင်ကိုဝင်း၏ ဇနီးဖြစ်သူ ဒေါ်နန်းသန်းထွေ၏  မွေးနေ့ ညစာ စားပွဲကို CB ဘဏ် ဥက္ကဋ္ဌ ဦးခင်မောင်အေးနှင့် ဇနီးလည်း တက်ရောက် ခဲ့ကြောင်း နီးစပ်သူတစ်ဦးက လူမှုကွန်ရက်စာမျက်နှာမှာ တင်ထားသည်။

Sai Moe San က “ယနေ့(၁၀.၅.၂၀၂၄) ရက်နေ့တွင် ကျရောက်သော KBZ နာယကကြီးဦးအောင်ကိုဝင်း၏ ချစ်ဇနီး ဆရာမကြီး ဒေါ်နန်းသန်းထွေးရဲ့ မွေးနေ့မင်္ဂလာညစာစားပွဲသို့ ကျနော့်ကျေးဇူးရှင်ဆရာ CB Bank ဥက္ကဋ္ဌကြီး ဦးခင်မောင်အေးတို့ ဇနီးမောင်နှံနှင့်အတူ တက်ရောက်ခွင့်ရတဲ့အတွက် ကျေးဇူးအထူးပါခင်ဗျ၊ ဆရာမကြီး ကိုယ်စိတ်နှစ်ပါး ကျန်းမာရွှင်လန်းစွာဖြင့ ်သက်တော်ရာကျော်ရှည်ပါစေ”ဟု သူ၏ လူမှုကွန်ရက် စာမျက်နှာမှာ ရေးသားဖော်ပြခဲ့သည်။

CNI News

၂၀၂၄ ခုနှစ်၊ မေလ ၁၀

တိုင်းရင်းသား လက်နက်ကိုင် အဖွဲ့အစည်း (EAO) များ၏ နယ်မြေထိန်းချုပ်မှု ဘယ်လို ဖြစ်ပေါ်နေသလဲဆိုသည့် အ‌ပေါ် နိုင်ငံရေးနှင့် စစ်ရေးအကဲခတ်များကြား လေ့လာသုံးသပ်၍ မေးခွန်းထုတ်မှုများ ရှိနေကြသည်။

ညီနောင်မဟာမိတ်သုံးဖွဲ့(TNLA-MNDAA-AA)၏ ၁၀၂၇ စစ်ဆင်ရေးနောက်ပိုင်း ရှမ်းပြည်နယ်မြောက်ပိုင်းမှ မြို့နယ် အချို့မှာ EAO အဖွဲ့အစည်း အချင်းချင်းအကြား နယ်မြေအငြင်းပွားမှုများ ကျယ်ကျယ်ပြန့်ပြန့် ဖြစ်ပေါ်လာခဲ့သည်။

လက်ရှိ ရှမ်းပြည်နယ်မြောက်ပိုင်းမှာ လက်နက်ကိုင်တိုက်ခိုက်ပြီး ရယူထားသည့် နယ်မြေအချို့ကို ပိုင်ဆိုင်သည်ဟု ယူဆနေကြောင်း၊ ခိုင်မာသည့် ဘုံအစိုးရမရှိဘဲ တိုင်းပြည်မှာ ငြိမ်းချမ်းရေး မရရှိနိုင်ကြောင်း နိုင်ငံရေးသမားတစ်ဦးက သုံးသပ်သည်။

TNLA တပ်ဖွဲ့ကို တွေ့ရစဉ်

၎င်းက “အဲဒါတွေကတော့ ဘယ်တော့မှ ဖက်ဒရယ်စနစ်လုပ်လို့ မရဘူး။ ခိုင်မာသော ဘုံအစိုးရမရှိဘဲနဲ့ တိုင်းပြည် ရဲ့ ငြိမ်းချမ်းရေးက မရှိနိုင်ဘူးဆိုတာ လက်တွေ့ လက်ညိုးထိုးပြလို့ ရတာပေါ့နော်၊ အဲဒီတော့ ငါလူတွေ အသေခံရ လို့ ဒီနယ်မြေကို ငါရထိုက်တယ်ဆိုတဲ့ TNLA ရဲ့ ယူဆမှုက နမ့်ခမ်းကို သူရယူတယ် အဲဒီလိုပဲ ယူဆတယ်၊ ဒါသိပ် မှားတာပေါ့နော်၊ သိန္ဒီစော်ဘွားကြီး လွတ်လပ်ရေးရပြီးခါစ သတ်မှတ်ပေးတဲ့ကချင် ရှမ်းပြည်မြောက်ပိုင်း ကချင် လူနည်းစု ကိုယ်ပိုင်အုပ်ချုပ်ရေး ဒေသဆိုပြီးတော့ တရားဝင် သတ်မှတ်ပေးထားတဲ့ အထဲမှာ နမ့်ခမ်းမပါဘူး။ မူဆယ်နဲ့ နမ့်ခမ်း ပါတယ်၊ ပလောင်မပါဘူး။ ပလောင်ကို အစကတည်းက ပေးမထားဘူး။ သူက ပလောင် တောင်တန်းမှာ နမ့်ဆန်စော်ဘွားကြီးရဲ ကွပ်ကဲမှုအောက်မှာ ပလောင်တောင်တန်းက အစကတည်းက ရှိထားပြီး သား။ မိုးကုတ်၊ ဖောင်းဆိုင် အခုကျနော်တို့ ပြည်သူ့လွှတ်တော်ဥက္ကဋ္ဌကြီးဖြစ်တဲ့ ကာ/လုံ အဖွဲ့ဝင်ဖြစ်တဲ့ ဦးတီခွန်မြတ်က ဖောင်းဆိုင်စော်ဘွားရဲ့သား သူက ဖောင်းဆိုင်ပြည်သူ့စစ်ခေါင်းဆောင် သူလည်း ကချင်ပဲ၊ အဲဒါကို ကချင်ကနေပြီးတော့ တစ်ခါ MNDAA ကိုးကန့်ကနေပြီးတော့ မောင်းထုတ်တာ ကိုးကန့်က အဲဒီနေရာနဲ့ မဆိုင်ဘူး။ ကိုးကန့်က သံလွင်မြစ်ရဲ့ အရှေ့ဖက်ပဲ ဖြစ်တယ်၊ ဒါမျိုးတွေပေါ့နော်၊ သမိုင်းအစဉ်အလာမရှိဘဲနဲ့ လာလုပ်နေတာ၊ ဒါတွေက အထောက်အထားလည်း မရှိဘူး။ သူတို့ အချင်းချင်းတော့ ကျနော်ထင်တယ်လေ ဒါက ဘာပြသလဲဆို တော့ ဒီလူဒီလူတွေရဲ့ စနစ်က မအောင်မြင်ဘူး။ ခိုင်မာတဲ့ ဘုံအစိုးရတစ်ခု ပြန်ဖြစ်လာမှပဲ အားလုံးက မြန်မာပြည် က အင်္ဂလိပ်လက်အောက်ကနေ ငြိမ်သလို ငြိမ်သွားလိမ့်မယ်လို့ ကျနော်ထင်တယ်” ဟု ပြောသည်။

ရှမ်းပြည်နယ်မြောက်ပိုင်း၊ ကွတ်ခိုင်မြို့တွင် ကချင်အမျိုးသားတော်လှန်ရေးနေ့ ကျင်းပရန် ပြင်ဆင်နေချိန် တအာင်းအမျိုးသားလွတ်မြောက်ရေးတပ်မတော်(TNLA)မှ တားဆီးကန့်ကွက်ခဲ့သလို ကွတ်ခိုင်မြို့ရှိ KIA ၏ ဆက်ဆံရေးရုံးကို ဖယ်ရှားခိုင်းသည့် ဖြစ်စဉ်များ ရှိခဲ့သည်။

ထို့အတူ မူဆယ်ခရိုင်၊ မုံးကိုးမြို့ရှိ KIA ရုံးကို မြန်မာအမျိုးသား ဒီမိုကရက်တစ်မဟာမိတ် တပ်မတော်(MNDAA)က ချိတ်ပိတ်သည့် ဖြစ်စဉ်များလည်း ရှိခဲ့သလို ကွတ်ခိုင်မြို့နယ်အတွင်းမှာ MNDAA နှင့် TNLA ကြား နယ်မြေအငြင်း ပွား၍ ပစ်ခတ်မှုများလည်း ဖြစ်ပေါ်ခဲ့သည်။

အလားတူ ရှမ်းပြည်နယ်မြောက်ပိုင်း၊ နမ့်ခမ်းမြို့နယ်တွင် ရှမ်းပြည်တိုးတက်ရေးပါတီ(SSPP)နှင့် TNLA ကြား နယ် မြေအငြင်းပွားနေသလို အုပ်ချုပ်ရေးအားပြိုင်လျက်ရှိသည်။

အဆိုပါ နယ်မြေအငြင်းပွားမှု ပြဿနာများမှာ ယခင်ကတည်းက ဖြစ်ပေါ်လာခြင်းဖြစ်သည်ဟု မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

MNDAA တပ်ဖွဲ့ကို တွေ့ရစဉ်

၎င်းက “အဲဒါကတော့ ဖြစ်မှာပဲလေ၊ ဘာဖြစ်လို့လဲဆိုတော့ ဒီလောက် နှစ်ပေါင်း ၆၂ ခုနှစ်ကနေစပြီးတော့ ဒီဖက်မှာ လုံးဝကို တိုင်းရင်းသားတွေကို လှည့်မကြည့်ခဲ့တာလေ၊ မင်းတို့လည်း နေသာသလိုနေ ငါတို့လည်း နေသာသလိုနေ မယ်၊ မင်းတို့ ဘာမှ သိပ်ပြန်မပြောနဲ့ ဒါပဲ၊ ခိုင်းတာလုပ် ပြောတာနားထောင်၊ အဲဒီအဆင့်က တက်မှ မလာတာ။ နှစ်ပေါင်းများစွာ၊ အဲဒီပြဿနာတွေက နည်းတဲ့ပြဿနာတွေ မဟုတ်ဘူးလေ၊ ဒီကြားထဲမှာ ကူမင်တန်ပြဿနာတွေ နောက်တစ်ခါ အမေရိကန် CIA ပြဿနာတွေ၊ နောက်တစ်ခါ တရုတ်ပြန်ကနေ ၈၈ နောက်ပိုင်းမှာ လုံးဝ ဝင်ရောက် လာပြီးတော့ ဗမာပြည်ကို ပြန်ပြီးတော့ သူ့ပိုင်နက်နယ်မြေသဘော ကြိုးစားတဲ့ဟာတွေ အဲဒီဟာတွေ နောက် ဗမာအစိုးရကနေပြီးတော့ စစ်အာဏာရှင်ကနေပြီးတော့ NLD ကို ဝိုင်းတိုက် ချေမှုန်းဖို့အတွက် တိုင်းရင်းသားတွေ ကို မင်းတို့ လုပ်ချင်ရာလုပ်ဆိုပြီး လွတ်ပေးထားပြီးတော့ အဲဒီလိုပဲ သူတို့လည်း ပျော်သလို နေခဲ့တာပဲ၊ နှစ်ပေါင်း များစွာ ပျော်သလိုနေခဲ့တာပဲ၊ အဲဒါတွေ အခုစုပြုံရှင်းဖို့ကတော့ လွယ်တော့ မလွယ်ဘူးထင်တယ်နော်၊ အဲဒီဟာက အခု သေနတ်တွေလည်း ကိုင်ထားပြီဆိုတော့ သေနတ်ကိုင်ထားတဲ့ လူအချင်းချင်းကတော့ တစ်ယောက်နဲ့ တစ်ယောက် မလေးစားလည်းဘဲ မလေးစားရင် သေမှာပဲလေ အဲဒီတော့ မလေးစားချင်လည်း နေကြပေါ့၊ အဲဒါပဲ ရှိတာပဲ” ဟု ပြောသည်။

ရှမ်းပြည်နယ်မြောက်ပိုင်းတွင် SSPP နှင့် TNLA အကြားတွင် သော်လည်းကောင်း၊ SSPP နှင့် MNDAA အကြားတွင် သော်လည်းကောင်း၊ TNLA နှင့် KIA အကြားတွင် သော်လည်းကောင်း၊ KIA နှင့် MNDAA အကြားတွင် သော်လည်း ကောင်း၊ MNDAA နှင့် TNLA အကြားတွင် သော်လည်းကောင်း နယ်မြေအငြင်းပွားမှုများနှင့် အုပ်ချုပ်ရေးအားပြိုင် မှုများ ဖြစ်ပေါ်နေသည်။

ရှမ်းပြည်နယ်‌မြောက်ပိုင်းတွင်း မြန်မာ့တပ်မတော်၊ SSPP၊ KIA၊ TNLA၊ MNDAA၊ သျှမ်းပြည် ပြန်လည်ထူထောင်ရေး ကောင်စီ (RCSS) အပါအဝင် ပြည်သူ့စစ်များလည်း လှုပ်ရှားလျက်ရှိနေသည်။

CNI News
၂၀၂၄ ခုနှစ်၊ မေလ ၁၀

အိန္ဒိယအခြေစိုက် ဇိုမီးတော်လှန်ရေးအစည်းအရုံး/ဇိုမီးတော်လှန်ရေးတပ်မတော်(ZRO/ZRA)နှင့် ချင်းပြည်နယ် အတွင်း ဝင်ရောက်လာသော ဇိုမီးနိုင်ငံရေးဆိုင်ရာ ပူးပေါင်းဆောင်ရွက်ရေးကော်မတီ/ဇိုမီးတော်လှန်ရေးတပ်မ တော်-အရှေ့ပိုင်းတိုင်း(ZPCC/ZRA-Eastern command)တို့သည် မြန်မာ-အိန္ဒိယ-ဘင်္ဂလားဒေ့ရှ် (၃)နိုင်ငံရှိ ဇိုမီးမျိုးနွယ်စုများကို စုစည်းပြီး ဇိုမီးနိုင်ငံထူထောင်ရေး ရည်မှန်းလုပ်ဆောင်နေသည်ဟု ချင်းအမျိုးသားတပ်ဦး (CNF)က မေလ ၉ ရက်နေ့တွင် စွပ်စွဲထုတ်ပြန်ခဲ့သည်။

၁၉၉၃ ခုနှစ်တွင် ဖွဲ့စည်းခဲ့သည့် ZRO/ZRA သည် အိန္ဒိယအစိုးရကို ဆန့်ကျင်တော်လှန်နေသည့် Zomi လူမျိုးစု အမည်ခံ လက်နက်ကိုင် အဖွဲ့အစည်းဖြစ်ပြီး ၂၀၀၅ ခုနှစ်တွင် အိန္ဒိယဗဟိုအစိုးရနှင့် သဘောတူညီချက်အရ နယ်ခြားစောင့်တပ်အဖြစ် ရပ်တည်ကာ အိန္ဒိယနိုင်ငံ၊ မဏိပူရ်ပြည်နယ်၌ အခြေစိုက်ခဲ့ကြသည်ဟု CNF က ထုတ်ပြန်ခဲ့သည်။

ထို့နောက် အိန္ဒိယအစိုးရကို ဆန့်ကျင်နေသည့် ZRO/ZRA သည် ၂၀၁၃ ခုနှစ်တွင် ZPCC/ZRA(Eastern Command) နာမည်ဖြင့် မြန်မာနိုင်ငံ၊ ချင်းပြည်နယ်အတွင်းသို့ ဝင်ရောက်လှုပ်ရှားလာခဲ့ကြကြောင်း၊ အိန္ဒိယ နိုင်ငံ၊ မဏိပူရ်ပြည်နယ် အခြေစိုက် ZRO/ZRA ၏ နိုင်ငံရေး ရည်မှန်းချက်သည် ဇိုမီးလူမျိုးစု အမည်ခံပြီး မဏိပူရ် ပြည်နယ်အတွင်း နိုင်ငံရေးအရ တခြားမျိုးနွယ်စုများအပေါ် Paite မျိုးနွယ်စု လွှမ်းမိုးသော မဏိပူရ်ပြည်နယ် အခွင့်အရေးဖြစ်သည်ဟု CNF က စွပ်စွဲခဲ့သည်။

CNF က “ မြန်မာနိုင်ငံအတွင်း ချင်းလဲန်း(ချင်းပြည်နယ်)တွင် လှုပ်ရှားနေသည့် ZPCC/ZRA(Eastern Comman d)၏ နိုင်ငံရေး ရည်မှန်းချက်သည် ချင်းလဲန်းအတွင်း တီးတိန်၊ တွန်းဇံမြို့နယ် နှစ်ခုနှင့် စစ်ကိုင်းတိုင်းရှိ ကလေး- ကဘော်ဒေသတို့ကို စုစည်းပြီး သီးသန့် ဇိုမီးပြည်နယ်ရရှိရေးဖြစ်သည်။ အိန္ဒိယအခြေစိုက် ZRO/ZRA နှင့် ချင်းလဲန်းအတွင်း ဝင်ရောက်လာသော ZPCC/ZRA(Eastern Command)တို့၏ အန္ဓိမနိုင်ငံရေး ရည်မှန်းချက် သည် မြန်မာ၊ အိန္ဒိယ၊ ဘင်္ဂလားဒေ့ရှ် ၃ နိုင်ငံရှိ ဇိုမီးမျိုးနွယ်စုများကို စုစည်းပြီး ဇိုမီးနိုင်ငံထူထောင်ရေးဖြစ်သည်” ဟု ထုတ်ပြန် စွပ်စွဲခဲ့သည်။

CNF ထုတ်ပြန်ချက်ကိုတွေ့ရစဉ်

ZRO/ZRA(ZPCC/ZRA)သည် အဖွဲ့အစည်းရပ်တည်ရေးအတွက် အိန္ဒိယ- မြန်မာနယ်စပ် ချင်းပြည်နယ်အတွင်း က တွန်းဇံမြို့နယ် Phoisat, Suang hoih, Seimei, Mualpi ရွာ သစ်တောကြိုးဝိုင်းတွင် ဒေသအခြေစိုက် မြန်မာ့တပ်မတော်ထံ အခွန်ဆောင်ပြီး ဧကပေါင်းများစွာသော ဘိန်းခင်းပိုင်ဆိုင်ထားသည့်အပြင် ဒေသခံ ပြည်သူများကိုလည်း ဘိန်းစိုက်ပျိုးခွင့်ပြုပြီး အခွန်ကောက်ကြကြောင်း၊ နယ်စပ်ဂိတ်များနှင့် တီးတိန်နှင့် တွန်းဇံ မြို့နယ်အတွင်း မြန်မာ့တပ်မတော်မှ ဆောင်ရွက်နေသည့် တင်ဒါမှလည်း အခွန်ကောက်ခံကြသည်ဟုလည်း CNF က စွပ်စွဲ ထုတ်ပြန်ခဲ့သည်။

CNF နှင့်နီးစပ်သူတစ်ဦးကတော့ ZRA ကို CNF က တိုက်ခိုက်နေခြင်းမှာ နယ်စပ်ကုန်သွယ်ရေး လမ်းကြောင်းကို ထိန်းချုပ်လိုခြင်းနှင့် အခွန်ကောက်ခံနိုင်ရေးအတွက် ဖြစ်သည်ဟု ပြောသည်။

၎င်းက “အခု CNF က ချင်းပြည်နယ်အတွင်းမှာ လွှမ်းမိုးနိုင်ဖို့ လုပ်နေတာ၊ ZRA ကို သူတို့ သွားတိုက်တာက လည်း တကယ်တော့ ကုန်သွယ်ရေးလမ်းကြောင်း ထိန်းချင်လို့ပါ။ အခုတောင် ချင်းပြည်နယ်မှာ ကုန်စည်တွေ ကို ၂ ရာခိုင်နှုန်းကောက်နေပြီ။ CNF ကို ဟားခါးနဲ့ ထန်ထလန်က လူတွေ ကြိုက်ရင်ကြိုက်လိမ့်မယ်။ ဒါပေမဲ့ တခြားဒေသက ချင်းလူမျိုးတွေက မကြိုက်ဘူး။ ပွင့်ပွင့်လင်းလင်း ပြောရရင် နယ်စပ်က လူတွေက CNF ထက် စကစကိုတောင် ပိုလွှမ်းနေကြတယ်။ စကစ နယ်စပ်ကို ထိန်းထားတုန်းက ဘာပဲဖြစ်ဖြစ် လုပ်ကိုင်စားသောက် လို့ရတယ်။ အခု CNF က နယ်စပ်ဂိတ်ကို တိုက်လိုက်လို့ အိန္ဒိယဘက်ကလည်း ပိတ်လိုက်တော့ ဘာမှလုပ်ကိုင် စားသောက်လို့မရတော့ဘဲ ကုန်စည်တွေ ပျက်ပြီး အခက်အခဲတွေဖြစ်လာတယ်”ဟု ပြောသည်။

လက်ရှိတွင် ZRA နှင့် CNF ကြား တီးတိန်မြို့နယ်အတွင်းမှာ တိုက်ပွဲများ ဖြစ်ပွားနေသလို နယ်စပ်ဂိတ်အနီးမှာ လည်း တိုက်ပွဲများ ဖြစ်ပွားနေသည်။

 CNF တပ်ဖွဲ့ကို တွေ့ရစဉ်

ထို့နောက် ချင်းလက်နက်ကိုင် ၆ ဖွဲ့ကလည်း CNF ကို တီးတိန်နှင့် တွန်းဇံမြို့နယ်အတွင်းမှာ စစ်ရေးလှုပ်ရှားမှု မလုပ်ရန် ပူးတွဲထုတ်ပြန် သတိပေးထားသည်။

CNF ကတော့ ZRA နှင့် တီးတိန်အခြေစိုက် ခလရ ၂၆၈ တို့ ၂၀၂၂ ခုနှစ်၊ ဇန်နဝါရီ ၁၀ ရက်က တွေ့ဆုံဆွေးနွေး ခဲ့ပြီးနောက် (၁) Zogam Charter ရေးဆွဲနိုင်ရေးအတွက် SAC မှ ဦးဆောင်ပေးရမည်၊ (၂) Zomi state တည် ထောင်နိုင်ရေးအတွက် SAC မှ ဦးဆောင်ပေးရမည်၊ (၃) ZRA အား နယ်ခြားစောင့်တပ်ဖွဲ့(BGF)အဖြစ် အသိ အမှတ်ပြုရမည်၊ (၄) ZPCC/ZRA ကို တီးတိန်နှင့် တွန်းဇံတွင် လွတ်လပ်စွာ လှုပ်ရှားခွင့်ပြုရမည်၊(၅) တီးတိန်နှင့် တွန်းဇံမြို့နယ်ရှိ PDF, CDF တို့ကို ZPCC/ZRA က အမြစ်ပြတ် ရှင်းလင်းပြီး ကလေး၊ ကဘော်၊ တမူးရှိ အဖွဲ့အစည်းများကိုလည်း တိုက်ထုတ်ရမည်၊ (၆) ZPCC/ZRA က CDM ပြုလုပ်သူများအား ဖမ်းဆီးရမည်၊ (၇) ZPCC/ZRA က CNF,CDF,PDA တို့ကို ပြည်သူများ အမြင်မှားအောင် ဇာတ်လမ်းအမျိုးမျိုးဆင် နာမည်ဖျက်ပြီး ရန်သူလို သဘောထားတိုက်ခိုက်ရမည် စသည့် အချက်များကို သဘောတူညီခဲ့ကြသည်ဟု ထုတ်ပြန် စွပ်စွဲထား သည်။

ZRA ကတော့ မြန်မာ့တပ်မတော်နှင့် ပူးပေါင်း ဆောင်ရွက်ခြင်းမရှိသလို တစ်စုံတစ်ရာ သဘောတူညီမှု ရယူထားခြင်း မရှိကြောင်း ပြောသည်။

CNI News

၂၀၂၄ ခုနှစ်၊ မေလ ၉

နစက အနေဖြင့် ပါတီစုံဒီမိုကရေစီအထွေထွေရွေးကောက်ပွဲကို မဖြစ်မနေ ကျင်းပသွားမည်ဟု နစကသတင်း ထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ၂၀၂၄ ခုနှစ်၊ မေလ ၈ ရက်နေ့ ညတွင် သတင်းထုတ် ပြန် ပြောကြားသွားခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ကမ္ဘောဒီယားနိုင်ငံ အထက်လွှတ်တော်ဥက္ကဋ္ဌ မစ္စတာဟွန်ဆန် တို့ Video Conferencing ဖြင့် တွေ့ဆုံ ဆွေးနွေးခဲ့သော အခြေအနေနှင့်ပတ်သက်ပြီး ထုတ်ပြန်စဉ် ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

ဗိုလ်ချုပ်ဇော်မင်းထွန်းက “နိုင်ငံတော်အစိုးရအနေနဲ့ကတော့ ကျနော်တို့အနေနဲ့ကတော့ ပါတီစုံဒီမိုကရေစီစနစ် အာမခံပြီ ဖြစ်တယ်။ပြီးရင် ကျနော်တို့ ဒီမိုကရေစီနဲ့ဖက်ဒရယ်စနစ်ကို အခြေခံတဲ့ ပြည်ထောင်စုစနစ်ကို အာမခံ ပြီဖြစ်တယ်။ ဒါကြောင့်မလို့ ကျနော်တို့အနေနဲ့က ပါတီစုံဒီမိုကရေစီအထွေထွေရွေးကောက်ပွဲကို မဖြစ်မနေ ဆောင်ရွက်မှာဖြစ်တယ်။ ဆောင်ရွက်ဖို့အတွက်လည်း ကြိုတင်ပြင်ဆင်မှုများ လုပ်ဆောင်လျက်ရှိတယ်၊ ပြီးရင် ကျနော်တို့အနေနဲ့ Rod Map ပေါ့ ရှေ့လုပ်ငန်းစဉ် ၅ ရပ်ချမှတ်ပြီဖြစ်တယ်။ ဒီရှေ့လုပ်ငန်းစဉ်တွေအတိုင်း မဖြစ်မနေ ဆောင်ရွက်သွားမယ်လို့လည်း သံဓိဋ္ဌာန်ချထားပြီဖြစ်တယ်”ဟု ပြောသည်။

ရွေးကောက်ပွဲ မဲစာရင်းစစ်နေကြစဉ်

နစက၏ ရှေ့လုပ်ငန်းစဉ် ၅ ရပ်တွင် အထွေထွေရွေးကောက်ပွဲ ကျင်းပသွားရန်ဆိုသော အချက်ပါဝင်သည်။

သို့သော် မည်သည့် အချိန်ကာလတွင် ရွေးကောက်ပွဲကို ကျင်းပသွားမည်ကိုတော့ နစကဘက်က တိတိကျကျ ပြောကြားထားခြင်း မရှိသေးပေ။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ ၂၀၂၄ ခုနှစ်အတွင်းမှာ နိုင်ငံတဝှမ်း လူဦးရေ သန်းခေါင် စာရင်း ကောက်မည်ဖြစ်ကြောင်း၊ သန်းခေါင်စာရင်း ကောက်၍ပြီးပါက ရွေးကောက်ပွဲကျင်းပပေးသွားမည်ဖြစ် ကြောင်း၊ ရွေးကောက်ပွဲတွင် အနိုင်ရသည့် နိုင်ငံရေးပါတီကို အာဏာလွှဲပြောင်းပေးမည်ဖြစ်ကြောင်း ပြောကြား ထားသည်။

နိုင်ငံရေးပါတီများနဲ့ UEC တွေ့ဆုံစဉ်

နစကသည် မြန်မာနိုင်ငံအတွင်း ဖြစ်ပွားနေသော လက်နက်ကိုင် ပဋိပက္ခများ ချုပ်ငြိမ်း သို့မဟုတ် အရှိန်လျှော့ချ နိုင်ရေး ဆောင်ရွက်ရန် လိုအပ်နေသလို တည်ငြိမ်အေးချမ်းရေးနှင့် တရားဥပဒေစိုးမိုးမှု ရှိရေး လုပ်ဆောင်ရန် လိုအပ်ပြီးမှသာ ရွေးကောက်ပွဲကို ကျင်းပနိုင်မည်ဖြစ်၍ အနည်းဆုံး ၂၀၂၅ ခုနှစ်လောက်မှသာလျှင် ကျင်းပနိုင် ခြေရှိသည်ဟု နိုင်ငံရေးပါတီများက သုံးသပ်လျက်ရှိသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့က အမျိုးသားဒီမိုကရေစီအဖွဲ့ချုပ်(NLD)အစိုးရသည် ၂၀၂၀ အထွေထွေရွေး ကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်မှ ဖြုတ်ချ၍ အာဏာရယူခဲ့သည်။

ထို့နောက် မြန်မာ့တပ်မတော်သည် နိုင်ငံတော်စီမံအုပ်ချုပ်ရေးကောင်စီ(နစက)နှင့် အိမ်စောင့်အစိုးရကိုဖွဲ့စည်း၍ ဥပဒေပြုရေး၊ အုပ်ချုပ်ရေး၊ တရားစီရင်ရေးတို့ကို ဆောင်ရွက်လျက်ရှိပြီး ရွေးကောက်ပွဲ ပြန်လည်ကျင်းပသွားရန် ပြင်ဆင်လျက်ရှိနေသည်။