CNI International News

တိုင်ပေ၊ ဇူလိုင် ၂၂

ထိုင်ဝမ်အနေဖြင့် မိမိတို့ အချုပ်အခြာအာဏာကို ကာကွယ်ရမည်ဖြစ်ပြီး မိမိတို့၏ကိုယ်ပိုင် ယဉ်ကျေးမှုနှင့် သမိုင်းကြောင်းကို သိရှိနားလည်ထားကြောင်း ထိုင်ဝမ်သမ္မတ လိုင်ချင်တေ (Lai Ching-te)က ဇူလိုင် ၂၁ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။ 

လိုင်က သူသည် တရုတ်ကို ပြန်လည်သိမ်းယူရန် ထိုင်ဝမ်ကို ခြေကုပ်စခန်း တစ်ခုအဖြစ် မှားယွင်းစွာ ယူဆထား သည့် ယခင်က အယူအဆဟောင်းကို ငြင်းဆိုကြောင်း ပြောကြားခဲ့သည်။

ပြီးခဲ့သည့်မေလက သမ္မတအဖြစ် ကျမ်းသစ္စာကျိန်ဆိုခဲ့သည့် လိုင်နှင့် ၎င်း၏ အာဏာရ (DPP) ပါတီတို့က ထိုင်ဝမ် သည် တရုတ်၏ ဝိသေသလက္ခဏာများနှင့် ကွဲပြားစွာ တည်ရှိနေကြောင်း ပြောကြားခဲ့သဖြင့် တရုတ်၏ ဒေါသတကြီး ဝေဖန်မှုနှင့် ရင်ဆိုင်ခဲ့ရသည်။

တရုတ်က ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာပါက အင်အားသုံး သိမ်းယူမည် ဟု သတိပေးခဲ့ကာ မကြာသေးမီ နှစ်များအတွင်း ထိုင်ဝမ်အပေါ် စစ်ရေးနှင့် သံတမန်ရေးဖိအားများ တိုးမြှင့်ခဲ့သည်။

လိုင်သည် DPP ပါတီ၏ နှစ်ပတ်လည် ညီလာခံတွင် မိန့်ခွန်းပြောကြားခဲ့ချိန်၌ ထိုင်ဝမ်၏ ဒီမိုကရေစီအတွက် တိုက်ပွဲဝင်ခဲ့ကြသူများသည် ကမ္ဘာပေါ်မှာ ထိုင်ဝမ်၏ အနေအထားကို ကောင်းစွာ သိရှိနားလည်ထားကြကြောင်း ပြောကြားခဲ့သည်။

လိုင်ချင်တေကို တွေ့ရစဉ်

"သူတို့တွေဟာ သူတို့ရဲ့ သွေးကိုပေးဆပ်ဖို့ နောက်မတွန့်ခဲ့ကြပါဘူး။ ထိုင်ဝမ်ဟာ ပြည်မကြီးကို ပြန်လည် သိမ်းပိုက်ဖို့အတွက် ခြေကုပ်စခန်းတစ်ခု ဖြစ်တယ်ဆိုတဲ့ မှားယွင်းတဲ့ အယူအဆနဲ့ ရှင်သန်ခဲ့ကြပါတယ်။ အမျိုးသားရေးမူဝါဒမှာ ထိုင်ဝမ်ဟာ ဦးစားပေးနေရာမှာ ရှိနေပါတယ်" ဟု လိုင်က ပြောကြားခဲ့သည်။

လက်ရှိတွင် မိမိတို့၏ တာဝန်မှာ ထိုင်ဝမ်လူထုကို စည်းလုံးညီညွတ်စေရန်နှင့် တရုတ်၏ ရန်လိုမှုကို ဆန့်ကျင် ရန်နှင့် အမျိုးသားရေး အချုပ်အခြာအာဏာကို စိတ်ချသေချာစေရန် လုပ်ဆောင်ရေးဖြစ်သည်ဟု လိုင်က Hokkien ဟု လူသိများသည် ထိုင်ဝမ်ဘာသာစကားဖြင့် ပြောဆိုခဲ့သည်။

"ထိုင်ဝမ်ရဲ့ ကိုယ်ပိုင် သမိုင်းကြောင်း အစဉ်အလာနဲ့ ယဉ်ကျေးမှုကို ထိုင်ဝမ်ဒေသခံ အားလုံးက သိရှိနားလည် စေဖို့အတွက် ကျနော်တို့ အကောင်းဆုံး လုပ်ဆောင်ရပါမယ်။ ထိုင်ဝမ်မှာနေထိုင်တဲ့ လူပေါင်း ၂၃ သန်းရဲ့ အမျိုးသားရေးလက္ခဏာကို ထူထောင်ရပါမယ်" ဟု လိုင်က ပြောကြားခဲ့သည်။

ထို့ပြင် လိုင်က ထိုင်ဝမ်သည် တရုတ်၏ အစိတ်အပိုင်း ဖြစ်သည်ဆိုသည့် တရုတ်၏ ပြောကြားချက်ကို ငြင်းဆိုခဲ့ပြီး ထိုင်ဝမ်၏ အနာဂတ်ကို ထိုင်ဝမ်ဒေသခံများကသာ ဆုံးဖြတ်ပိုင်ခွင့်ရှိသည်ဟု ပြောကြားခဲ့သည်။

Source: ရိုက်တာ

CNI International News

ဂရန်း ရက်ပစ်၊ ဇူလိုင် ၂၂

အမေရိကန် သမ္မတရွေးကောက်ပွဲဝင် ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့် (Donald Trump) သည် မီချီဂန် (Michigan) ပြည်နယ်၊ ဂရန်းရက်ပစ် (Grand Rapids) မြို့တွင် ဇူလိုင် ၂၀ ရက်က ပြုလုပ်ခဲ့သည့် မဲဆွယ်စည်းရုံးပွဲ၌ ဒီမိုကရက်များကို လှောင်ပြောင်သရော်ခဲ့သည်ဟု ရိုက်တာမှ ဖော်ပြခဲ့သည်။

ထိုမဲဆွယ်စည်းရုံးပွဲသည် ပြီးခဲ့သည့် သီတင်းပတ်အတွင်းက ပင်ဆယ်ဗေးနီးယား (Pennsylvania) ပြည်နယ်၊ ဘတ်တလာ (Butler) မြို့တွင် ပြုလုပ်ခဲ့သည့် မဲဆွယ်စည်းရုံးပွဲ၌ ထရမ့် ပစ်ခတ်ခံခဲ့ရသော ဖြစ်စဉ်အပြီးတွင် ပထမဆုံးအကြိမ် ပြုလုပ်သည့် မဲဆွယ်စည်းရုံးပွဲဖြစ်သည်။

ဂရန်းရက်ပစ်မြို့တွင် ပြုလုပ်သည့် ထိုမဲဆွယ်စည်းရုံးပွဲ၌ ထရမ့်က သမ္မတဂျိုးဘိုင်ဒန် (Joe Biden) နှင့် ဒီမိုကရက်များကို လှောင်ပြောင်သရော်ခဲ့သလို အမေရိကန် အောက်လွှတ်တော်ဥက္ကဋ္ဌဟောင်း နန်စီ ပယ်လိုစီ (Nancy Pelosi) ကိုလည်း ခွေးနှင့် ခိုင်းနှိုင်းပြောဆိုခဲ့သည်။

ဘတ်တလာမြို့ မဲဆွယ်စည်းရုံးပွဲ ပစ်ခတ်ခံရမှု ဖြစ်စဉ်ကြောင့် ယခု ဂရန်းရက်ပစ်မြို့တွင် ပြုလုပ်သည့် မဲဆွယ် စည်းရုံးပွဲ၌ လုံခြုံရေးများ တင်းကျပ်စွာချထားခဲ့ပြီး မြို့တွင်းရှိ လမ်းများ၏ လမ်းထောင့်တိုင်းမှာ ရဲတပ်ဖွဲ့ဝင်များကို ဖြန့်ကြက်ချထားခဲ့သည်။

ဒေါ်နယ်ထရမ့်ကို တွေ့ရစဉ်

"သူတို့ (ဒီမိုကရက်တွေ) ရဲ့ ပြသနာက ဘယ်သူ့ကို သမ္မတရွေးကောက်ပွဲဝင် ကိုယ်စားလှယ်လောင်းအဖြစ် ရွေးရ မှန်းမသိတဲ့ ပြဿနာဖြစ်ပါတယ်။ ကျနော့်ကို  ရီပတ်ဘလစ်ကန်ပါတီ ကိုယ်စားပြုတဲ့ ကိုယ်စားလှယ်လောင်း အဖြစ် ရွေးချယ်လိုက်တဲ့အချိန်မှာ သူတို့ဟာ ဘိုင်ဒန်ကို ရွေးကောက်ပွဲက နုတ်ထွက်စေချင်နေကြပါတယ်" ဟု ထရမ့်က ပြောကြားခဲ့သည်။

ထို့ပြင် နန်စီပယ်လိုစီသည်လည်း ခွေးတစ်ကောင်ကဲ့သို့ ဘိုင်ဒန်ကို ရွေးကောက်ပွဲမှ မနုတ်ထွက်စေရန် တွန်းအားပေးနေကြောင်းနှင့် နန်စီပယ်လိုစီသည် ကြမ်းပိုးတစ်ကောင်ကဲ့သို့ တုံးအသူဖြစ်ကြောင်း ထရမ့်က ပြောကြားခဲ့သည်။

ထရမ့်၏ ခွေးနှင့်နှိုင်းသည့် ပြောကြားချက်နှင့်ပတ်သက်ပြီး နန်စီပယ်လိုစီ၏ ရုံးက မှတ်ချက်ပေးရန် ရိုက်တာသတင်းဌာန၏ တောင်းဆိုချက်ကို ချက်ချင်းတုန့်ပြန်ခဲ့ခြင်းမရှိပေ။

ထို့ပြင် ထရမ့်က ဘတ်တလာမြို့ မဲဆွယ်စည်းရုံးပွဲတွင် ပစ်ခတ်ခံရမှုနှင့်ပတ်သက်ပြီး သူသည် ဒီမိုကရေစီအတွက် ကျည်ဆန်ထိမှန် ခံခဲ့ရခြင်းဖြစ်သည်ဟုလည်း ၎င်း၏ ထောက်ခံသူများကို ဂုဏ်ယူဝံ့ကြွားစွာ ပြောကြားခဲ့သည်။

အမေရိကန်သမ္မတ ဘိုင်ဒန်သည် နိုဝင်ဘာလတွင် ပြုလုပ်မည့် ရွေးကောက်ပွဲမှ နုတ်ထွက်ရန် ဖိအားများနှင့် ရင်ဆိုင်နေရပြီးနောက် ဇူလိုင် ၂၁ ရက်နေ့မှာပဲ  သမ္မတရွေးကောက်ပွဲ ကိုယ်စားလှယ်လောင်းအဖြစ်မှ နုတ်ထွက်ကြောင်း ကြေညာခဲ့သည်။

Source: ရိုက်တာ

CNI International News

ဝါရှင်တန်၊ ဇူလိုင် ၂၂

ဘင်္ဂလားဒေ့ရှ်နိုင်ငံတွင် အစိုးရ၏ အလုပ်အကိုင် ခွဲတမ်းချသည့်အစီအစဉ်ကို ဆန့်ကျင်သော  ကျောင်းသားများ ဦးဆောင်သည့် ဆန္ဒပြမှုများနှင့် ဆူပူအုံကြွမှုများကြောင့် ဘင်္ဂလားဒေ့ရှ်သို့ ခရီးမသွားရန် အမေရိကန်နိုင်ငံခြားရေး ဝန်ကြီးဌာနက ဇူလိုင် ၂၀ ရက်တွင် အမေရိကန်နိုင်ငံသားများကို တိုက်တွန်းခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။

အမေရိကန်နိုင်ငံခြားရေးဝန်ကြီးဌာနသည် ဘင်္ဂလားဒေ့ရှ်သို့ ခရီးသွားလာမှုဆိုင်ရာ အကြံပြုချက်တွင် သတိပေး ချက်ကို အဆင့် ၄ အထိ တိုးမြှင့် ထုတ်ပြန်ထားသလို ဇူလိုင် ၁၉ ရက်ကလည်း ဘင်္ဂလားဒေ့ရှ်သို့ သွားရောက်မည့် အမေရိကန်ပြည်သူများကို ပြန်လည်စဉ်းစားရန် တိုက်တွန်းခဲ့သည်။

ထို့ပြင် ဘင်္ဂလားဒေ့ရှ်နိုင်ငံအတွင်းရှိ အရေးပေါ် တာဝန်ထမ်းဆောင်စရာမလိုသည့် အမေရိကန်အစိုးရ အရာရှိများ နှင့် ၎င်းတို့၏ မိသားစုဝင်များကို ဘင်္ဂလားဒေ့ရှ်မှ မိမိသဘောဆန္ဒအလျောက် ထွက်ခွာနိုင်ကြောင်း အမေရိကန် နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

ဘင်္ဂလားဒေ့ရှ် စစ်သားတွေကိုတွေ့ရစဉ်

ဘင်္ဂလားဒေ့ရှ်တွင် အစိုးရ၏ အလုပ်အကိုင်များ ခွဲတမ်းချသည့်စနစ်အရ လစာကောင်းသည့် အစိုးရရာထူးနေရာ စုစုပေါင်း၏ ၃၀ ရာခိုင်နှုန်းကို ၁၉၇၁ ခုနှစ်က ပါကစ္စတန်လက်အောက်မှ လွတ်လပ်ရေးရယူသည့် စစ်ပွဲအတွင်း ပါဝင်တိုက်ခိုက်ခဲ့သော စစ်မှုထမ်းဟောင်းများ၏ သားသမီးများအတွက် ခွဲတမ်းချပေးထားသည်။

ထိုအစီအစဉ်ကြောင့် နိုင်ငံတစ်ဝန်းရှိ ကျောင်းသားများက ဆန့်ကျင်ဆန္ဒပြခဲ့ကြခြင်း ဖြစ်သည်။

ရဲတပ်ဖွဲ့က ဆန္ဒပြသူများကို ပစ်ခတ်နှိမ်နင်းမှုများ ပြုလုပ်ခဲ့ပြီး စစ်တပ်ကလည်း ကာဖျူး(ညမထွက်ရအမိန့်) ထုတ်ပြန်ခဲ့ကာ စစ်သားများကို နိုင်ငံတစ်ဝန်းတွင် ဖြန့်ကြက်ချထားခဲ့ကာ တည်ငြိမ်မှု ပြန်လည်ရရှိစေရန် ကြိုးပမ်းခဲ့သည်။

ဒါကာ (Dhaka) မြို့တော်နှင့် ဘင်္ဂလားဒေ့ရှ်နိုင်ငံ တစ်ဝန်းတွင် ဆူပူအုံကြွမှုများဖြစ်ပွားပြီး လူသေဆုံးမှုများရှိနေ သည့် အခြေအနေကြောင့် ပြည်သူများအနေဖြင့် ဘင်္ဂလားဒေ့ရှ်သို့ မသွားသင့်ကြောင်း အမေရိကန်နိုင်ငံခြားရေး ဝန်ကြီးဌာန၏ ထုတ်ပြန်ချက်၌ ဖော်ပြခဲ့သည်။

ဘင်္ဂလားဒေ့ရှ် အဓိရုဏ်းကိုတွေ့ရစဉ်

လုံခြုံရေးအခြေအနေကြောင့် ဘင်္ဂလားဒေ့ရှ်နိုင်ငံအတွင်းရှိ ကောင်စစ်ဝန်ရုံးဝန်ဆောင်မှု လုပ်ငန်းစဉ်များသည် နှောင့်နှေးကြန့်ကြာနိုင်ကြောင်းလည်း ထုတ်ပြန်ချက်တွင် ဖော်ပြခဲ့သည်။

ဘင်္ဂလားဒေ့ရှ် အာဏာပိုင်များအနေဖြင့် ငြိမ်းချမ်းစွာ ဆန္ဒပြခွင့်ကို ထိန်းသိမ်းရန်နှင့် မကြာသေးမီ ရက်များအတွင်း ဖြစ်ပွားခဲ့သည့် ဆူပူအုံကြွမှုများအတွက် စိုးရိမ်ကြောင်း အမေရိကန်နှင့် ကနေဒါတို့က ပြောကြားခဲ့သည်။

ဘင်္ဂလားဒေ့ရှ်နိုင်ငံအတွင်း ပြီးခဲ့သည့် သီတင်းတစ်ပတ်က ဆန္ဒပြသူများနှင့် ရဲတပ်ဖွဲ့အကြား ခိုက်ရန်ဖြစ်ပွားမှု အပြင်းထန်ဆုံး အခြေအနေအထိ ရောက်ရှိခဲ့ပြီး သေဆုံးသူ ၁၅၀ ကျော်အထိ ရှိခဲ့သည်ဟု အေအက်ဖ်ပီ သတင်းဌာနက ဖော်ပြခဲ့သည်။

Source: ဘန်ကောက်ပို့စ်

CNI International News

ဝါရှင်တန်၊ ဇူလိုင် ၂၀

ပြီးခဲ့သည့် သီတင်းပတ်က လုပ်ကြံသတ်ဖြတ်သည့် အားထုတ်ကြိုးပမ်းမှုမှ အသက်ရှင် လွတ်မြောက်ခဲ့သော အမေရိကန်သမ္မတဟောင်း ဒေါ်နယ်ထရမ့် (Donald Trump) က နိုဝင်ဘာလတွင် ပြုလုပ်မည့် သမ္မတ ရွေးကောက်ပွဲ၌ နောက်တစ်ကြိမ် အနိုင်ရခဲ့မည်ဆိုပါက ကမ္ဘာပေါ်မှာ ဖြစ်ပွားနေသည့် ပဋိပက္ခများ အဆုံသတ် သွားလိမ့်မည်ဟု ပြောကြားခဲ့ကြောင်း NDTV မှ ဖော်ပြခဲ့သည်။

ယနေ့ခေတ် ကမ္ဘာကြီးသည် တတိယကမ္ဘာစစ် ဖြစ်ပွားမည့် အခြေအနေသို့ နီးကပ်စွာ ရောက်ရှိနေကြောင်း၊ သူသာ သမ္မတ ဖြစ်လာခဲ့မည်ဆိုပါက အစ္စရေး-ဟားမာ့စ်စစ်ပွဲ၊ ရုရှား-ယူကရိန်းစစ်ပွဲ အပါအဝင် နိုင်ငံတကာ ပဋိပက္ခ အားလုံးကို အဆုံးသတ် ပေးနိုင်လိမ့်မည်ဟု ၎င်းက ပြောကြားခဲ့သည်။

ထရမ့်သည် ဇူလိုင် ၁၆ ရက်က ရီပတ်ဘလစ်ကန် အမျိုးသားညီလာခံကို တက်ရောက်ခဲ့ပြီးနောက် ရီပတ်ဘလစ်ကန်ပါတီအား ကိုယ်စားပြုပြီး ရွေးကောက်ပွဲ ဝင်ရောက်ယှဉ်ပြိုင်မည့် ကိုယ်စားလှယ်လောင်းအဖြစ် အမည်စာရင်း တင်သွင်းခံရမှုကို တရားဝင် လက်ခံခဲ့သည်။

ယူကရိန်းနဲ့ရုရှားစစ်ပွဲကိုတွေ့ရစဉ်

“ကျနော်တို့ ကမ္ဘာကြီးက တတိယကမ္ဘာစစ်ဖြစ်ဖို့ နီးစပ်နေပါပြီ။ အဲဒီစစ်ပွဲဟာ တခြား ဘယ်စစ်ပွဲနဲ့မှ တူမှာမဟုတ် ပါဘူး။ ကျနော် သမ္မတဖြစ်လာရင် အခုအစိုးရက ဖန်တီးခဲ့တဲ့ နိုင်ငံတကာ ပဋိပက္ခတွေ အားလုံးကို အဆုံးသတ် သွားမှာပါ” ဟု ထရမ့်က ပြောကြားခဲ့သည်။

ထို့ပြင် ထရမ့်က  သူသမ္မတ ဖြစ်နေချိန်တွင် အစ္စရေး-ဟားမာ့စ်စစ်ပွဲနှင့် ရုရှား-ယူကရိန်းစစ်ပွဲများ ဖြစ်လာလိမ့်မည် မဟုတ်ကြောင်းလည်း ပြောကြားခဲ့သည်။

ရီပတ်ဘလစ်ကန်ပါတီ ညီလာခံ၏ နောက်ဆုံးနေ့တွင် ပြောကြားသော မိန့်ခွန်း၌ ထရမ့်က အထက်ပါအတိုင်း ပြောကြားခဲ့ခြင်းဖြစ်ပြီး ဇူလိုင် ၁၃ ရက် လုပ်ကြံခံရမှုဖြစ်ပွားပြီးနောက် ပထမဆုံးပြောကြားသော မိန့်ခွန်းတွင် ထရမ့်က သမ္မတဂျိုးဘိုင်ဒန် (Joe Biden) ကို ထိုးနှက်တိုက်ခိုက်ခဲ့သည်။

ဒေါ်နယ်ထရမ့်ကို တွေ့ရစဉ်

ဂျိုးဘိုင်ဒန် လက်ထက်တွင် ကမ္ဘာ၏ ကြောက်မက်ဖွယ်ကောင်းသော ရုပ်ပုံကို ပုံဖော်ရန်ကြိုးစားခဲ့ပြီး ကမ္ဘာသည် တတိယကမ္ဘာစစ် ဖြစ်လုနီးပါး အနေအထားကို ရောက်နေသည်ဟု ထရန့်က ပြောကြားခဲ့ကာ နိုင်ငံတကာ စင်မြင့် ထက်တွင် အမေရိကန်၏ ဂုဏ်သိက္ခာကို ပြန်တင်ပေးသွားမည်ဟု ကတိပြုခဲ့သည်။

“ကျနော်တို့ဟာ တစ်ကမ္ဘာလုံးမှာ ငြိမ်းချမ်းရေး၊ တည်ငြိမ်ရေး၊ ဟန်ချက်ညီရေးတို့ကို ပြန်လည်ဖော်ဆောင်သွားမှာ ဖြစ်ပါတယ်” ဟု ထရမ့်က ပြောကြားခဲ့သော်လည်း မည်ကဲ့သို့ ဆောင်ရွက်သွားမည် ဆိုခြင်းနှင့်ပတ်သက်ပြီး အသေးစိတ်များကို ပြောကြားခဲ့ခြင်းမရှိပေ။

ထရမ့်သည် ဇူလိုင် ၁၃ ရက်က ပင်ဆယ်လ်ဗေးနီးယား (Pennsylvania) ပြည်နယ်၊ ဘတ်တလာ (Butler) မြို့တွင် ပြုလုပ်ခဲ့သည့် မဲဆွယ်စည်းရုံးပွဲ တစ်ခုတွင် သေနတ်ဖြင့် ပစ်ခတ်ခံခဲ့ရသော်လည်း နားရွက်၌ ဒဏ်ရာရရှိခဲ့ပြီး အသက်ရှင် လွတ်မြောက်ခဲ့သည်။

Source: NDTV

CNI International News

ပြုံယမ်း၊ ဇူလိုင် ၂၀

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် ပြုံယမ်း (Pyongyang) မြို့တော်သို့ ရောက်ရှိ လာသည့် ရုရှားဒုတိယကာကွယ်ရေးဝန်ကြီး အလက်ဇီ ကရီဗိုရုချ်ကို (Alexey Krivoruchko) ဦးဆောင်သည့် ကိုယ်စားလှယ်အဖွဲ့နှင့် တွေ့ဆုံခဲ့ကြောင်း တာ့စ်သတင်းဌာနမှ ဖော်ပြခဲ့သည်။

ကင်မ်သည် ရုရှားနှင့် မြောက်ကိုရီးယားအကြား စစ်ဘက်ဆိုင်ရာ ပူးပေါင်းဆောင်ရွက်မှုများ၏ အရေးကြီးပုံနှင့် နှစ်နိုင်ငံ လုံခြုံရေး အကျိုးစီးပွားများကို အထောက်အကူဖြစ်စေရန် ကရီဗိုရုချ်နှင့် ပြုလုပ်သည့် အစည်းအဝေးတွင် ပြောကြားခဲ့သည်ဟု မြောက်ကိုရီးယားနိုင်ငံပိုင် KCNA မှ ဖော်ပြခဲ့သည်။

ရုရှားသမ္မတ ဗလာဒီမာပူတင် (Vladimir Putin) သည် ၎င်း၏ နွေးထွေးသည့် နှုတ်ဆက် အမှာစကားကို ကိုယ်စားလှယ်အဖွဲ့နှင့်အတူ အမှာစကားပါးခဲ့ပြီး ကင်မ်ကလည်း ပူတင်၏ နှုတ်ဆက်စကားအတွက် ကျေးဇူးတင် ကြောင်း ပြန်လည် အမှာစကားပါးခဲ့သည်ဟု ဆိုသည်။

ယူကရိန်းတွင် ရုရှား၏ အထူးစစ်ဆင်ရေး ဆင်နွှဲနေချိန်၌ ရုရှားနှင့် စည်းလုံးညီညွတ်စွာရှိကြောင်း၊ ရုရှားစစ်တပ် သည် မိမိ၏ အချုပ်အခြာအာဏာနှင့် နိုင်ငံ့လုံခြုံရေးအတွက် တရားမျှတသည့် စစ်ပွဲကို ဆင်နွှဲနေသော အချက်ကို ထောက်ခံကြောင်း ကင်မ်က ပြောကြားခဲ့သည်။

ကင်မ်ဂျုံအန်နဲ့ပူတင်ကို တွေ့ရစဉ်

ထို့ပြင် ဇွန်လအတွင်းက ပူတင်နှင့် ပြုလုပ်ခဲ့သည့် အစည်းအဝေး၏ အရေးကြီးပုံကို ကင်မ်က အလေးထား ပြောဆို ခဲ့ပြီး နှစ်နိုင်ငံ စစ်တပ်များအကြား ရှည်လျားသည့် သမိုင်းကြောင်း အစဉ်အလာနှင့် စစ်ရေးဆက်ဆံမှုများ ရှိခဲ့သည် ဟု ပြောကြားခဲ့သည်။

ထို့ပြင် မြောက်ကိုရီးယား-ရုရှား ဆက်ဆံရေးသည် နိုင်ငံတကာ တရားမျှတမှု၊ ကမ္ဘာလုံးဆိုင်ရာ ငြိမ်းချမ်းရေးနှင့် ဒေသတွင် တည်ငြိမ်ရေးကို ကာကွယ်ရာ၌ အရေးကြီးသည့် အခန်းကဏ္ဍမှ ပါဝင်နေကြောင်း ကင်မ်က ပြောကြားခဲ့ သည်။

ပူတင်သည် ဇွန်လ ၁၈ ရက်နှင့် ၁၉ ရက်တွင် ပြုံယမ်းမြို့တော်သို့ လာရောက်ခဲ့ပြီး နှစ်နိုင်ငံအကြား ပြည့်စုံ ကျယ်ပြန့်သည် မဟာဗျူဟာမြောက် မိတ်ဖက်ဆက်ဆံရေး စာချုပ်ချုပ်ဆိုခဲ့ကာ ဆေးဝါး၊ ဆေးပညာ၊ သိပ္ပံပညာ နှင့် ဆောက်လုပ်ရေး ကဏ္ဍများတွင် ပူးပေါင်းဆောင်ရွက်ရေး သဘောတူညီမှု ရရှိခဲ့သည်။

Source: တာ့စ်

CNI International News

ကိယက်ဗ်၊ ဇူလိုင် ၁၉

ယူကရိန်းတွင် AI နည်းပညာစနစ်များ တပ်ဆင်ထားသည့် တိုက်ပွဲဝင်ဒရုန်းများကို ကုမ္ပဏီအချို့က တီထွင်နေပြီး စစ်မြေပြင်၌ ရုရှားတပ်ဖွဲ့များအပေါ် နည်းပညာအသာစီးရရှိစေရန် ကြိုးပမ်းလုပ်ဆောင်နေသည်ဟု ရိုက်တာမှ ဖော်ပြခဲ့သည်။

AI စနစ်များ တပ်ဆင်သည့် ဒရုန်းများသည် ရှေ့တန်းစစ်မျက်နှာပြင်တွင် ရုရှား၏ ဒရုန်းဖျက်စနစ်များကို ကျော်လွှားနိုင်စေရန်နှင့် ထိုကဲ့သို့ မောင်းသူမဲ့လေယာဉ် (UAV) များကို အများအပြား ထုတ်လုပ်နိုင်ရန် ယူကရိန်းက မျှော်လင့်ထားသည်။

ယူကရိန်းတွင် ထုတ်လုပ်နေသည့် AI ဒရုန်းများသည် ပစ်မှတ်များကို ခွဲခြားခြင်း၊ မြေပြင်အနေအထားကို ခြေရာခံ ခြင်းနှင့် ပိုမိုရှုပ်ထွေးသော ပရိုဂရမ်များဖြင့် စစ်မြေပြင်၌ ယူကရိန်းတပ်ဖွဲ့များအတွက် ကြီးမားစွာ အထောက်အကူ ပြုစေမည်ဖြစ်သည်။

နည်းပညာမြင့် ဒရုန်းများကို တပ်ဆင်နေစဉ်

ယူကရိန်း၏ စတင်အခြေတည်စ ကုမ္ပဏီတစ်ခုဖြစ်သည့် Swarmer ကုမ္ပဏီသည် ဒရုန်းများကို ကွန်ရက်တစ်ခု အတွင်း ချိတ်ဆက်ပေးသော  ဆော့ဖ်ဝဲကို တီထွင်နေပြီး လူသားများကို ထိန်းချုပ်မောင်းနှင်ရ လွယ်ကူစေသည့် စနစ်များနှင့် တိုက်ခိုက်မှုစနစ်များကို လုပ်ဆောင်လျက်ရှိသည်။

"လူသားပိုင်းလော့တွေနဲ့ ဒရုန်းကို ထိန်းချုပ်မောင်းနှင်ဖို့ ကြိုးစာချိန်မှာ အဲဒါက အလုပ်ဖြစ်မှာ မဟုတ်ပါဘူး။ ဒရုန်း ၁၀ စင်း ဒါမှမဟုတ် အစင်း ၂၀ လောက်ရှိတဲ့ ဒရုန်း အုပ်စုကြီးကို ဒရုန်းမှာတပ်ထားတဲ့ ကင်မရာအမြင်နဲ့ ထိန်းချုပ် မောင်းနှင်ဖို့ဆိုတာ မဖြစ်နိုင်ပါဘူး" ဟု Swarmer ကုမ္ပဏီ စီအီးအို ဆာဟိုင်း ကူပရီယန်ကို (Serhiy Kupriienko) က ပြောကြားခဲ့သည်။

၂၀၂၂ ခုနှစ်က ယူကရိန်းကို ရုရှားက စတင်ဝင်ရောက် တိုက်ခိုက်ခဲ့ချိန်ကစပြီး လုပ်ငန်းများ စတင်လည်ပတ်ခဲ့သည့် နည်းပညာကုမ္ပဏီ ၂၀၀ ကျော်အနက် Swarmer ကုမ္ပဏီသည် တစ်ခုအပါအဝင် ဖြစ်ခဲ့သည်။

ပစ်မှတ်ထိကျတဲ့ ဒရုန်းကိုတွေ့ရစဉ်

IT နည်းပညာ ကျွမ်းကျင်သည့် အရပ်သားများသည် ဒရုန်းများနှင့် အခြားစစ်မြေပြင်သုံး ပစ္စည်းများကို ထုတ်လုပ်ခဲ့ ကြပြီး မိမိတို့ထက် အင်အားကြီးသည့် ရုရှားစစ်တပ်ကို ခုခံတိုက်ခိုက်နေသော ယူကရိန်းတပ်ဖွဲ့များအား တစ်ဖက်တစ်လမ်းမှ အကူအညီပေးခဲ့ကြသည်။

လူသားများဖြင့် ထိန်းချုပ်မောင်းနှင်သည့် ဒရုန်းစစ်ဆင်ရေးများတွင် ဒရုန်း ၅ စင်းကျော်လာပါက ထိန်းချုပ် မောင်းနှင်ရ ခက်ခဲလာမည်ဖြစ်ပြီး AI နည်းပညာဖြင့်ဆိုပါက ဒရုန်းပေါင်း ရာချီ ပျံသန်းမောင်းနှင် နိုင်လိမ့်မည်ဟု ကူပရီယန်ကိုက ပြောကြားခဲ့သည်။

ယူကရိန်း၏ တာဝေးပျံသန်းနိုင်သည့် ဒရုန်းအချို့ကို AI စနစ်များ တပ်ဆင်ပြီး ရုရှားနိုင်ငံအတွင်းရှိ စစ်ဘက် အဆောက်အအုံများ ရေနံစက်ရုံများအား တိုက်ခိုက်မှုများ ပြုလုပ်ခဲ့သည့် ဖြစ်စဉ်များလည်းရှိခဲ့သည်။

Source: ရိုက်တာ

CNI International News

တိုင်ပေ၊ ဇူလိုင် ၁၉

ထိုင်ဝမ်အနေဖြင့် အမေရိကန်၏ အကာအကွယ်ပေးမှုအတွက် အဖိုးအခပေးသင့်ကြောင်း အမေရိကန်သမ္မတ ရွေးကောက်ပွဲဝင် ကိုယ်စားလှယ်လောင်း ဒေါ်နယ်ထရမ့် (Donald Trump) က ပြောကြားခဲ့သည်။

ထို့နောက် ထိုင်ဝမ်က ၎င်း၏ ကာကွယ်ရေးကဏ္ဍကို မြှင့်တင်ပြီး အမေရိကန်နှင့် ပူးပေါင်းဆောင်ရွက်သွားမည်ဟု ဇူလိုင် ၁၈ ရက်တွင် ထုတ်ပြန်ခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သည် ထိုင်ဝမ်နှင့် တရားဝင် သံတမန်ဆက်ဆံရေးများ မရှိသည့်တိုင် ထိုင်ဝမ်ကို ထောက်ခံပေးသည့် အင်အားကြီးနိုင်ငံဖြစ်ပြီး ထိုင်ဝမ်အတွက် လက်နက်များ ထောက်ပံ့ပေးလျက်ရှိကာ ထိုင်ဝမ်၏ ကာကွယ်ရေး ကဏ္ဍအတွက် ဥပဒေများ ထုတ်ပြန်ထားသည်။

ထိုင်ဝမ်အစိုးရသည် ရေငုပ်သင်္ဘောများ ထုတ်လုပ်မှု အပါအဝင် ကာကွယ်ရေးကဏ္ဍ အဆင့်မြှင့်တင် မွမ်းမံမှုကို ဦးစားပေးကိစ္စအဖြစ် သတ်မှတ်လုပ်ဆောင်နေပြီး ထိုင်ဝမ်ကျွန်း၏ လုံခြုံရေးကို ကိုယ်တိုင် ကာကွယ်သွားမည်ဟု ပြောကြားခဲ့သည်။

ယခုနှစ်အတွက် ကာကွယ်ရေး အသုံးစရိတ်သည် ထိုင်ဝမ်၏ ဂျီဒီပီ စုစုပေါင်း၏ ၂ ဒသမ ၅ ရာခိုင်နှုန်း ကြေညာခဲ့ သဖြင့် သမိုင်းတစ်လျှောက် အများဆုံး ကာကွယ်ရေးအသုံးစရိတ် ဖြစ်ခဲ့သည်။

ဒေါ်နယ်ထရမ့်ကို တွေ့ရစဉ်

ထိုင်ဝမ်နှင့် အမေရိကန်သည် ဒီမိုကရေစီ၊ လွတ်လပ်ခွင့်၊ လူ့အခွင့်အရေးများတွင် တူညီသည့် စံတန်ဖိုးများထားရှိ ပြီး နှစ်ဦးနှစ်ဖက် အကျိုးရှိစေသည့် စီးပွားရေး ဆက်ဆံမှုများရှိကြောင်း ထိုင်ဝမ် နိုင်ငံခြားရေးဝန်ကြီးဌာန၏ မြောက်အမေရိကဌာန လက်ထောက်အကြီးအကဲ ကူယု ချီဂို (Kuoyu Chigo) က ပြောကြားခဲ့သည်။

“အဲဒါကြောင့် ထိုင်ဝမ်ဟာ အမေရိကန်ရဲ့ ပါတီတွေ၊ အစိုးရထောက်ပံ့မှုတွေကို ကာလကြာရှည်ရရှိခဲ့တာ ဖြစ်ပါ တယ်။ အနာဂတ်မှာလည်း ကျနော်တို့ဟာ အမေရိကန်နဲ့ အခြား စိတ်သဘောထားချင်းတူညီတဲ့ နိုင်ငံတွေနဲ့ ပူးပေါင်း ဆောင်ရွက်မှုကို မြှင့်တင်ပြီး ထိုင်ဝမ်ရေလက်ကြား တည်ငြိမ်ရေးနဲ့ ငြိမ်းချမ်းရေးကို ထိန်းသိမ်းသွားမှာပါ” ဟု ချီဂိုက ပြောကြားခဲ့သည်။

ဇူလိုင် ၁၇ ရက်တွင် ထရမ့်၏ အမျိုးသားလုံခြုံရေးဆိုင်ရာ ထိပ်သီးအကြံပေးပုဂ္ဂိုလ်က ထိုင်ဝမ်အနေဖြင့် တရုတ်၏ ရန်လိုမှုများကို ရင်ဆိုင်ရာတွင် ကာကွယ်ရေးအသုံးစရိတ်ကို မြှင့်တင်ရန် လိုအပ်ကြောင်း ပြောကြားခဲ့သည်။

ဇူလိုင် ၁၇ ရက် နှောင်းပိုင်းမှာပင် ထိုင်ဝမ်အာဏာရပါတီက ထရမ့်၏ မှတ်ချက် စကားများနှင့်ပတ်သက်ပြီး တုန့်ပြန်ခဲ့ရာတွင် ထိုင်ဝမ်အနေဖြင့် ဂျပန်၊ တောင်ကိုရီးယားနှင့် ဥရောပသမဂ္ဂတို့ကဲ့သို့ မိမိ၏ လုံခြုံရေးကို မိမိကိုယ်တိုင် ကာကွယ်ရန် ဆုံးဖြတ်ထားကြောင်း ပြောကြားခဲ့သည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာပါက အင်အားသုံး သိမ်းယူ သွားမည်ဟု ပြောကြားခဲ့ကာ ထိုင်ဝမ်ကမူ တရုတ်၏ ကြေညာချက်များကို ငြင်းဆိုခဲ့သည်။

Source: ရိုက်တာ

CNI International News

ဆိုးလ်၊ ဇူလိုင် ၁၉

တောင်ကိုရီးယားသမ္မတ ယွန်းဆော့ရွဲ(Yoon Suk Yeol)သည် ဇူလိုင် ၁၈ ရက်က မြောက်ကိုရီးယား သံတမန် ဟောင်းတစ်ဦးကို ဒုဝန်ကြီးရာထူးနေရာ ခန့်အပ်ခဲ့သည်။

ထိုဖြစ်စဉ်သည် မြောက်ကိုရီးယားမှ ထွက်ပြေးပြီး တောင်ကိုရီးယားတွင် နေထိုင်ခဲ့သည့် ထောင်နှင့်ချီသည့် မြောက်ကိုရီးယား နိုင်ငံသားများအနက် ရာထူးအမြင့်ဆုံး ရာထူးခန့်အပ်မှုဖြစ်သည်ဟု အေပီမှ ဖော်ပြခဲ့သည်။

တေးယုံဟို (Tae Yongho) သည် လန်ဒန်မြို့ရှိ မြောက်ကိုရီးယားသံရုံး ဝန်ကြီးတစ်ဦးဖြစ်ပြီး ၂၀၁၆ ခုနှစ်တွင် တောင်ကိုရီးယားဘက်သို့ ဘက်ပြောင်းခိုလှုံခဲ့သူဖြစ်သည်။

သူသည် မကြာသေးမီ နှစ်များအတွင်း တောင်ကိုရီးယားတွင် အခြေချနေထိုင်သည့် ရာထူးအမြင့်ဆုံး မြောက်ကိုရီးယား ပြည်ပြေးတစ်ဦးဖြစ်သည်။

ယွန်းဆော့ရွဲကိုတွေ့ရစဉ်

တေးက သူသည် မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) ၏ အရာရှိများကို ကွက်မျက်မှု များ၊ နျူကလီးယား ရည်မှန်းချက်အပေါ် စိတ်ပျက်ခဲ့ကြောင်း၊ ၎င်း၏ ကလေးများကို မြောက်ကိုရီးယားတွင် ဆင်းဆင်းရဲရဲဖြင့် မနေစေချင်သည့်အတွက် တောင်ကိုရီးယားသို့ ဘက်ပြောင်း ခိုလှုံခဲ့ခြင်းဖြစ်ကြောင်း ပြောကြား ခဲ့သည်။

မြောက်ကိုရီးယားကမူ တေးကို “လူဖျင်း၊လူညံ့” တစ်ဦးဖြစ်ကြောင်း ပြောကြားခဲ့ပြီး အစိုးရ၏ ဘဏ္ဍာငွေများကို အလွဲသုံးစားလုပ်ကာ ရာဇဝတ်မှုများ ကျူးလွန်နေသည်ဟု စွပ်စွဲခဲ့သည်။

တောင်ကိုရီးယားသမ္မတ ယွန်းသည် တေးကို ငြိမ်းချမ်းစွာ ပြန်လည်ပေါင်းစည်းရေး အကြံပေးကောင်စီတွင် အတွင်းရေးမှူးချုပ်အဖြစ် ခန့်အပ်ခဲ့ပြီး ထိုကောင်စီသည် ကိုရီးယားနှစ်နိုင်ငံ ငြိမ်းချမ်းစွာ ပြန်လည်ပေါင်းစည်းရေး အတွက် သမ္မတကို မူဝါဒရေးရာ အကြံပေးရသည့် ကောင်စီဖြစ်သည်။

တေးကို ရာထူးခန့်အပ်မှုသည် မြောက်ကိုရီးယား ပြည်ပြေးတစ်ဦးကို တောင်ကိုရီးယားတွင် ဒုဝန်ကြီးအဆင့် ရာထူးနေရာ ခန့်အပ်မှုဖြစ်သည်။

လက်ရှိတွင် တောင်ကိုရီးယား၌ မြောက်ကိုရီးယား ပြည်ပြေး ၃၄,၀၀၀ ခန့် နေထိုင်လျက်ရှိကြောင်း ပြန်လည် ပေါင်းစည်းရေးဝန်ကြီးဌာနက ထုတ်ပြန်ခဲ့သည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

တေးသည် ၂၀၂၀ ပြည့်နှစ်က တောင်ကိုရီးယားလွှတ်တော်တွင် ရွေးကောက်ခံခဲ့ရသည်။

ထို့နောက် တောင်ကိုရီးယား၌ လွှတ်တော်အမတ်များအဖြစ် တာဝန်ထမ်းဆောင်နေသည့် အခြားမြောက်ကိုရီးယား ပြည်ပြေးများလည်း ရှိခဲ့သည်။

တေးသည် မြောက်ကိုရီးယားတွင် နေထိုင်ခဲ့သည့် အတွေ့အကြုံများနှင့် တောင်ကိုရီးယားလွှတ်တော်တွင် တာဝန် ထမ်းဆောင်ခဲ့ဖူးသည့် အတွေ့အကြုံများကြောင့် ၎င်းကို ပြန်လည်ပေါင်းစည်းရေး အကြံပေးကောင်စီ၌  ခန့်အပ်မှု သည် မှန်ကန်ကြောင်း တောင်ကိုရီးယားသမ္မတရုံးက ထုတ်ပြန်ခဲ့သည်။

တောင်ကိုရီးယားတွင် နေထိုင်လျက်ရှိသည့် မြောက်ကိုရီးယား ပြည်ပြေးအများစုသည် ၁၉၉၀ ပြည့်နှစ် အလယ်ပိုင်းက အငတ်ဘေးကြောင့် ထွက်ပြေးတိမ်းရှောင် လာကြသူများဖြစ်သည်။

Source: အေပီ

CNI International News

ဘန်ကောက်၊ ဇူလိုင် ၁၈

ထိုင်းနိုင်ငံ၏ ဖွဲ့စည်းပုံအခြေခံဥပဒေဆိုင်ရာ ခုံရုံးက အတိုက်အခံ Move Forward(MFP) ပါတီ၏ စုံစမ်းစစ်ဆေးရန် တောင်းဆိုချက်ကို ငြင်းဆိုခဲ့ပြီး MFP ဖျက်သိမ်းရေးကိစ္စကို သြဂုတ် ၇ ရက်တွင် စီရင်ချက်ချသွားမည်ဟု Thai PBS World မှ ဖော်ပြခဲ့သည်။

တော်ဝင်အသရေဖျက်မှုဆိုင်ရာ ဥပဒေများကို ပြင်ဆင်မည်ဆိုသည့် MFP ပါတီ၏ လှုပ်ရှားမှုကြောင့် ထိုင်းရွေးကောက်ပွဲကော်မရှင်က MFP ပါတီကို ဖျက်သိမ်းရန်နှင့် နိုင်ငံရေးလောကမှ ၁၀ နှစ်ကြာ ပိတ်ပင်ရန် ဖွဲ့စည်းပုံအခြေခံဥပဒေဆိုင်ရာခုံရုံးကို တိုင်ကြားခဲ့ခြင်းဖြစ်သည်။

လက်ရှိတွင် ထိုအမှုကို စီရင်ချက်ချရန် လိုအပ်သည့် သက်သေ အထောက်အထားများ အလုံအလောက် ရှိနေပြီဖြစ်ကြောင်း တရားရုံးက ပြောကြားခဲ့သည်။

မည်သို့ပင်ဆိုစေ MFP နှင့် ရွေးကောက်ပွဲကော်မရှင်တို့အား ဇူလိုင် ၂၄ ရက် မတုင်မီ အချိန်အထိ လျှောက်လှဲချက် များ တင်သွင်းခွင့် ပြုသွားမည်ဖြစ်ကြောင်း၊ သြဂုတ် ၇ ရက် မွန်းလွဲ ၃ နာရီတွင် နောက်ဆုံး စီရင်ချက်ကို ချမှတ် မည်ဖြစ်ကြောင်း တရားရုံးက ထုတ်ပြန်ခဲ့သည်။

MFP ပါတီကိုတွေ့ရစဉ်

ပါတီဖျက်သိမ်းရေးအတွက် ရွေးကောက်ပွဲကော်မရှင်၏ အားထုတ်ကြိုးပမ်းမှုသည် အလျင်စလိုနိုင်ကြောင်း၊ ရွေးကောက်ပွဲကော်မရှင်၏ ကြိုးပမ်းမှုသည် တရားမဝင်ကြောင်း တင်ပြရန် အခွင့်အရေးပင် မပေးကြောင်း MFP ပါတီက ပြောကြားခဲ့သည်။

ထို့ပြင် ရွေးကောက်ပွဲကော်မရှင်သည် ဇန်နဝါရီ ၃၁ ရက်က တရားရုံး၏ စီရင်ချက်ချမှတ်မှုကို ရည်ညွှန်းပြီး ပါတီ ဖျက်သိမ်းရေးကိုသာ တောင်းဆိုနေကြောင်း  MFP ပါတီက ပြောကြားခဲ့သည်။

ဇန်နဝါရီ ၃၁ ရက်က ဖွဲ့စည်းပုံအခြေခံဥပဒေဆိုင်ရာ ခုံရုံးက  MFP ပါတီနှင့် ပါတီခေါင်းဆောင်ဟောင်း ပီတာ လင်မ်ဂျာရွန်ရတ် ( Pita Limjaroenrat) တို့အား တော်ဝင် အသရေဖျက်မှု ဥပဒေအား ပြုပြင်ပြောင်းလဲမည့် လှုပ်ရှားမှုများအားလုံးကို ရပ်တန့်ရန် အမိန့်ချမှတ်ခဲ့သည်။

ထိုလှုပ်ရှားမှုများသည် စည်းမျဉ်းခံ ဘုရင်စနစ်ကို ဖြုတ်ချမည့် လုပ်ရပ်များအဖြစ် သတ်မှတ်နိုင်ကြောင်း တရားရုံးက ပြောကြားခဲ့သည်။

Source: Thai PBS World