CNI International News

ဝါရှင်တန်၊ ဖေဖော်ဝါရီ ၂၀

ဆော်ဒီနိုင်ငံတွင် အမေရိကန်နှင့်ရုရှား ထိပ်သီးအရာရှိများ တွေ့ဆုံဆွေးနွေးမှုများ ပြုလုပ်ခဲ့ပြီးနောက် နှစ်နိုင်ငံ အကြား သံတမန်မစ်ရှင်များကို ပြန်လည်စတင်ရန် ဖေဖော်ဝါရီ ၁၈ ရက်က သဘောတူခဲ့ကြသည်ဟု အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ယူကရိန်းကို ရုရှားက ဝင်ရောက် တိုက်ခိုက်ခဲ့မှုနှင့်ပတ်သက်ပြီး ယခင် ဘိုင်ဒန်အစိုးရအဖွဲ့က နိုင်ငံအတွင်း ရုရှား၏ သံတမန်မစ်ရှင်များကို ကန့်သတ်မှုများ ပြုလုပ်ခဲ့ပြီးနောက် ယခုသဘောတူညီချက်အရ ထိုကန့်သတ်ချက်များကို ဖြေလျှော့ပေးဖွယ်ရှိနေသည်။

ပြီးခဲ့သည့်လက သမ္မတအဖြစ် တာဝန်ထမ်းဆောင်ခဲ့သည့် ဒေါ်နယ်ထရမ့် (Donald Trump) သည် ယူကရိန်းစစ်ပွဲ ကို အဆုံးသတ်ရေးနှင့်ပတ်သက်ပြီး ဆွေးနွေးညှိနှိုင်းမှုများ ပြုလုပ်ရန် ထိပ်သီးအရာရှိများကို အမိန့်ပေးခဲ့ပြီးနောက် ဆော်ဒီနိုင်ငံ၊ ရီးယာ့ဒ် (Riyadh) မြို့တော်တွင် အမေရိကန်နှင့် ရုရှားအရာရှိများ ဆွေးနွေးခဲ့ခြင်းဖြစ်သည်။

မိမိတို့၏ သက်ဆိုင်ရာ မစ်ရှင်များ လည်ပတ်မှုကို ပြန်လည်ထူထောင်ရေးအတွက် လျှင်မြန်စွာ အားထုတ်ကြိုးပမ်း ကြရန် ပထမအဆင့်အနေဖြင့် သက်ဆိုင်ရာနိုင်ငံများမှ အရာရှိများပါသည့် အဖွဲ့များဖွဲ့စည်းရန် နှစ်ဖက်စလုံးက သဘောတူခဲ့ကြသည်ဟု ရူဘီယိုက ပြောသည်။

အမေရိကန် နိုင်ငံခြားရေးဝန်ကြီး မာကို ရူဘီယိုကို တွေ့ရစဉ်

ပြီးခဲ့သည့် ဆယ်စုနှစ်အတွင်း အမေရိကန်နှင့် ရုရှားသည် အပြန်အလှန် အရေးယူ တုန့်ပြန်မှုများအဖြစ် သက်ဆိုင်ရာနိုင်ငံများရှိ သံရုံးများမှ သံတမန်များကို နှင်ထုတ်ခြင်း၊ သံရုံးဝန်ထမ်းများ ခန့်အပ်မှုကို အရေအတွက် ကန့်သတ်ခြင်းတို့ လုပ်ဆောင်ခဲ့ကြသည်။

ထို့ကြောင့် အမေရိကန်ရှိ ရုရှားသံရုံးနှင့် ရုရှားရှိ အမေရိကန်သံရုံးတို့တွင် ဝန်ထမ်း အရေအတွက်သည် အနည်းငယ် သာ ရှိခဲ့သည်။

ထိုသို့ လုပ်ဆောင်မှုများကြောင့် မော်စကို (Moscow) ရှိ မိမိတို့၏ သံတမန် လုပ်ငန်းစဉ်များအတွက် လုပ်ကိုင် နိုင်စွမ်းများ လျော့ကျခဲ့ပြီး ဝါရှင်တန် (Washington)ရှိ ရုရှားသံရုံးသည်လည်း အလားတူ အခြေအနေနှင့် ရင်ဆိုင် ခဲ့ရလိမ့်မည်ဖြစ်ကြောင်း ရူဘီယိုက ဆိုသည်။

 ရုရှားနိုင်ငံခြားရေးဝန်ကြီး လာဗရော့နှင့် အမေရိကန်နိုင်ငံခြားရေးဝန်ကြီး ရူဘီယို တွေ့ဆုံဆွေးနွေးကြစဉ်

“သံရုံးတွေရဲ့ လုပ်ငန်းတွေကို ပုံမှန်အတိုင်း ပြန်လည် လည်ပတ်စေနိုင်ဖို့အတွက် တက်ကြွပြီး အားမာန်ပြည့်ဝတဲ့ သံတမန်မစ်ရှင်တွေရှိဖို့ လိုအပ်ပါတယ်” ဟု ရူဘီယိုက ပြောကြားခဲ့သည်။

ထိုသံတမန်မစ်ရှင်များကို မည်ကဲ့သို့ ပြန်လည် ထိန်းသိမ်းမည်ဆိုသည့် အသေးစိတ် အချက်အလက်များကိုမူ လူသိရှင်ကြား ပြောဆိုသွားမည် မဟုတ်ဟုလည်း ၎င်းက ဆိုသည်။

လက်ရှိ ရုရှားတွင် အမေရိကန်၏ သံတမန်မစ်ရှင်များ လည်ပတ်နေပုံနှင့် ပတ်သက်သည့် အသေးစိတ် အချက်အလက်များအတွက် မှတ်ချက်ပေးရန် တောင်းဆိုမှုကို အမေရိကန်နိုင်ငံခြားရေးဝန်ကြီးဌာနက ချက်ချင်းတုန့်ပြန်ခဲ့ခြင်းမရှိပေ။

Source: ရိုက်တာ

CNI International News

ဘန်ကောက်၊ ဖေဖော်ဝါရီ ၂၀

မြန်မာနိုင်ငံအတွင်းရှိ ကျားဖြန့်စင်တာများမှ လူပေါင်း ၇၀၀၀ ခန့်ကို ကယ်တင်နိုင်ခဲ့သည်ဟု ထိုင်းဝန်ကြီးချုပ် ပေတုန်တန် (Paetongtarn Shinawatra) က ဖေဖော်ဝါရီ ၁၉ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

အဆိုပါ လူပေါင်း ၇၀၀၀ ခန့်သည် ထိုင်းနိုင်ငံသို့ လွှဲပြောင်းပို့ဆောင်ခံရရန် စောင့်ဆိုင်းနေကြောင်း၊ အစိုးရအဖွဲ့ သည် ထိုပြဿနာကို အမြန်ဆုံးဖြေရှင်းရန် လုပ်ဆောင်နေကြောင်းလည်း ၎င်းက ပြောသည်။

ထိုင်းရဲတပ်ဖွဲ့က ၎င်းတို့သည် ကျားဖြန့်စင်တာ ကွန်ရက်တစ်ခုမှ ကယ်တင်နိုင်ခဲ့သည့် နိုင်ငံခြားသား ၁၀,၀၀၀ ခန့်ကို လက်ခံရန် ပြင်ဆင်နေကြောင်း ပြောကြားခဲ့ပြီးနောက် ပေတုန်တန်၏ ပြောကြားချက် ထွက်ပေါ်လာခြင်း ဖြစ်သည်။

ထိုင်းနှင့် နယ်စပ်ချင်း ထိစပ်နေသည့် မြန်မာ၊ ကမ္ဘောဒီးယားနှင့် လာအိုနိုင်ငံတို့တွင် မကြာသေးမီ နှစ်များအတွင်း က အွန်လိုင်းလောင်းကစား လုပ်ငန်းများနှင့် ကျားဖြန့်လုပ်ငန်းများ များပြားတွင်ကျယ်လာခဲ့သည်။

“ဒါက တော်တော်များတဲ့ ပမာဏပါ။ အဲဒီမှာ လူတွေထောင်ချီရှိနေပြီး သူတို့ကို ကယ်ထုတ်ခဲ့ရပါတယ်။ အထူး သဖြင့် ထိုင်းကတဆင့် ကယ်ရတာပေါ့” ဟု ကုလသမဂ္ဂ၏ မူးယစ်ဆေးဝါးနှင့် ရာဇဝတ်မှုဆိုင်ရာ ရုံး (UNODC) ၏ ကိုယ်စားလှယ် ဂျရမီး ဒေါက်ဂလပ်စ် (Jeremy Douglas) က ပြောကြားခဲ့သည်။

 မြန်မာဘက်က ကျားဖြန့်စင်တာမှာ အလုပ်လုပ်နေကြတဲ့ နိုင်ငံခြားသားတွေကို တွေ့ရစဉ်

နိုင်ငံခြားသားများကို ပြန်လွှတ်ပေးမည့် မြန်မာနယ်စပ် မြဝတီမြို့သည် ဒေသတွင်း ကျားဖြန့်လုပ်ငန်းများ အများအပြား လုပ်ကိုင်သည့် နေရာများထဲတွင် တစ်ခု အပါအဝင်ဖြစ်ကြောင်း ဒေါက်ဂလပ်စ်က ပြောသည်။

ကျားဖြန့်လုပ်ငန်းများတွင် အာရှ၊ အာဖရိကနှင့် အရှေ့အလယ်ပိုင်းဒေသမှ လူအများအပြား လိမ်ညာခေါ်ဆောင်ခံ ခဲ့ရမှုနှင့်အတူ ထိုကျားဖြန့် လုပ်ငန်းများကို တိုက်ဖျက်သည့် စစ်ဆင်ရေးများသည် ကမ္ဘာ့အဆင့်အထိ မြင့်တက်လာ ခဲ့သည်။

ကျားဖြန့်လုပ်ငန်းများသည် အရှေ့အာရှနှင့် အရှေ့တောင်အာရှ နိုင်ငံများကို အဓိက ပစ်မှတ်ထားပြီး ၂၀၂၃ ခုနှစ် အတွင်း ဘဏ္ဍာရေးအရ ဆုံးရှုံးနစ်နာမှု တန်ဖိုးသည် ဒေါ်လာ ၁၈ ဘီလျံမှ ၃၇ ဘီလျံကြား ရှိနိုင်သည်ဟု ကုလသမဂ္ဂက ခန့်မှန်းထားသည်။

မြန်မာနိုင်ငံရှိ ကျားဖြန့်လုပ်ငန်းများတွင် လူပေါင်း ၁၂၀,၀၀၀ ထက်မနည်း ထိန်းသိမ်းခံထားရကာ ကမ္ဘောဒီးယား တွင် လူပေါင်း ၁၀၀,၀၀၀ ခန့် ထိန်းသိမ်းခံရပြီး အတင်းအဓမ္မ အလုပ်စေခိုင်း ခံခဲ့ရဖွယ်ရှိကြောင်း ကုလသမဂ္ဂက ခန့်မှန်းထားသည်။

Source: ရိုက်တာ

CNI International News

နယူးဒေလီ၊ ဖေဖော်ဝါရီ ၁၉

နာဂအမျိုးသားနိုင်ငံရေးအဖွဲ့များ (NNPGs) ၏ လုပ်ငန်းကော်မတီ (WC)သည် ကော်မတီအစည်းအဝေး ဆော်ဩသူ အန် ကစ်တိုဗီ ဇီမိုမီ (N Kitovi Zhimomi) ၏ ဦးဆောင်မှုနှင့်အတူ Agreed Position သဘောတူညီ ချက်နှင့် Framework Agreement သဘောတူညီချက်အကြား နှိုင်းယှဉ်ခဲ့သည့် NSCN-IM ၏ သတင်းနှင့်ပြန်ကြား ရေးဝန်ကြီးဌာန(MIP) မှတ်ချက်စကားကို တုန့်ပြန်သည့် ကြေညာချက် ထုတ်ပြန်ခဲ့သည်ဟု Mokokchung Times မှ ဖော်ပြခဲ့သည်။

NSCN-IM ၏ မှတ်ချက်စကားများကြောင့် သံသယများကို ရှင်းသွားစေရန် မဖြစ်မနေလိုအပ်ကြောင်း နာဂနိုင်ငံရေး ဆွေးနွေးညှိနှိုင်းမှုများတွင် မည်သို့ မှားယွင်းနေသည်ဆိုသည့် အချက်ကို လူထုက သိရှိနားလည်စေရန် လုပ်ဆောင် ဖို့လိုကြောင်း WC NNPGs က ပြောကြားခဲ့သည်။

မိမိတို့ အနေဖြင့် ၂၀၁၇ ခုနှစ်တွင် လက်မှတ်ရေးထိုးခဲ့သည့် Agreed Position နှင့် ၂၀၁၅ ခုနှစ်၊ ဩဂုတ် ၃ ရက်က လက်မှတ်ရေးထိုးခဲ့သည့် Framework Agreement သဘောတူညီချက်များကို နှိုင်းယှဉ်လိုခြင်း မရှိကြောင်း၊ အိန္ဒိယ-နာဂ နိုင်ငံရေးပဋိပက္ခသည် ဆယ်စုနှစ် ၆ စုခန့် ကြာမြင့်သည့် ပြဿနာဖြစ်ကြောင်း၊ ထိုသို့ လုပ်ဆောင် ခြင်းသည် ၁၉၅၅ ခုနှစ်မတိုင်မီ အသက်စွန့်ပေးခဲ့သည့် နာဂလူမျိုးထောင်ချီကို သစ္စဖောက်ခြင်းဖြစ်ကြောင်း WC NNPGs က ထုတ်ပြန်ခဲ့သည်။

NNPGs အဖွဲ့ဝင်များကိုတွေ့ရစဉ်

 Framework Agreement သဘောတူညီချက်တွင် ကြီးမားသည့် သမိုင်းဝင် အဖြစ်အပျက်များကို ချန်လှပ်ထား ခဲ့ကြောင်း၊ ၂၀၁၅ ခုနှစ်မှ စတင် ရေတွက်လျှင် ၆၄ နှစ်ဖြစ်သည့် ၁၉၅၁ ခုနှစ်က လက်မှတ် ရေးထိုးခဲ့သည့် လူထုဆန္ဒခံယူပွဲကို မေ့လျော့ထားခဲ့ကြောင်း ထုတ်ပြန်ချက်တွင် ဖော်ပြခဲ့သည်။

 Framework Agreement သဘောတူညီချက်တွင် ၁၉၄၇ ခုနှစ်၊ ဩဂုတ် ၁၄ ရက် သို့မဟုတ် ၂၀၁၅ ခုနှစ်၊ ဩဂုတ် ၃ ရက်မှ စတင်ရေတွက်လျှင်(၆၇)နှစ်အလိုက နာဂလူမျိုးများ ငြိမ်းချမ်းရေး ကြေညာခဲ့သည့် ဖြစ်စဉ်ကို မေ့လျော့ ထားခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။

ထို့ပြင် ၂၀၁၅ ခုနှစ်မှ စတင်ရေတွက်လျှင် (၈၆)နှစ်အလို သို့မဟုတ် ၁၉၂၉ ခုနှစ်က နာဂလူမျိုးများက ဆိုင်မွန် ကော်မရှင် (Simon Commission) ကို နားလည်မှု စာချွန်လွှာ တင်သွင်းခဲ့သည့် အချက်ကိုလည်း အလုံးစုံ လျစ်လျှူရှုခဲ့ပြီး ယင်းသည် အလုံးစုံ သစ္စာဖောက်မှုဖြစ်သည်ဟု ထုတ်ပြန်ချက်တွင် ဖော်ပြခဲ့သည်။

Framework Agreement သဘောတူညီချက်တွင် NSCN-IM က ၎င်းတို့သည် အိန္ဒိယစနစ်၏ ရှုပ်ထွေးပွေလီမှုများ ကို နားလည်ပြီး အသိအမှတ်ပြုကြောင်း ပြောကြားခဲ့မှုကိုလည်း NNPGs က ဝေဖန်ခဲ့သည်။

 NSCN-IM ခေါင်းဆောင် ဗွီဗားကိုတွေ့ရစဉ်

ထိုအဓိပ္ပာယ်အရ ယခင်က အိန္ဒိယအစိုးရထံမှ တောင်းဆိုထားသည့် နာဂလူမျိုးများ၏ တောင်းဆိုချက်များသည် မဖြစ်နိုင်သည့် အချက်ကို NSCN-IM က လက်ခံသည့်သဘော သက်ရောက်နေကြောင်းလည်း NNPGs က ပြောကြားခဲ့သည်။

ထို့ပြင် NNPGs က NSCN-IM ၏ နာဂသမိုင်းကြောင်းအား နားလည်မှုအပေါ် မေးခွန်းထုတ်ခဲ့ပြီး အထူးသဖြင့် မဏိပူရပြည်နယ် အပြင်ဘက်တွင် ရုန်းကန်နေရသည့် နာဂလူမျိုးများ၏ အခက်အခဲကို ကောင်းစွာနားလည်မှု ရှိ/မရှိကိုလည်း မေးခွန်းထုတ်ခဲ့သည်။

"နာဂတောင်တန်းဒေသရဲ့ အခြားနေရာတွေမှာ နေထိုင်နေတဲ့ နာဂတွေ၊ နာဂလန်းပြည်နယ်မှာ နေထိုင်နေတဲ့ နာဂလူမျိုးတွေရဲ့ အခက်အခဲတွေကို နားမလည်တဲ့ အခြား နာဂခေါင်းဆောင်တွေ၊ အထူးသဖြင့် မဏိပူရ ပြည်နယ်ထဲက နာဂခေါင်းဆောင်တွေကို အပြစ်မတင်ချင်ပါဘူး" ဟု NNPGs က ပြောကြားခဲ့သည်။

Source: Mokokchung Times

CNI International News

ပဲရစ်၊ ဖေဖော်ဝါရီ ၁၉

ယူကရိန်းကို လုံခြုံရေး အာမခံချက်များပေးရန် အသင့်ရှိကြောင်း ဥရောပခေါင်းဆောင်များက ဖေဖော်ဝါရီ ၁၇ ရက် တွင် ပြင်သစ်နိုင်ငံ၊ ပဲရစ် (Paris) မြို့တော်တွင် ပြုလုပ်သည့် အစည်းအဝေး၌ သဘောတူညီခဲ့ကြကြောင်း ရိုက်တာမှ ဖော်ပြခဲ့သည်။

သို့သော် တစ်ချိန်တည်းမှာပင် ငြိမ်းချမ်းရေး သဘောတူညီချက်မရှိဘဲ ယူကရိန်း-ရုရှား စစ်ပွဲကို အပစ်အခတ် ရပ်စဲရန် လုပ်ဆောင်မှုသည် အန္တရာယ်များလိမ့်မည်ဟုလည်း ဥရောပသမဂ္ဂအရာရှိတစ်ဦးက ပြောကြားခဲ့သည်။

“အမေရိကန်ရဲ့ ထောက်ခံမှု အတိုင်းအတာအပေါ်မူတည်ပြီး တစ်နိုင်ငံချင်းစီရဲ့ ပုံစံအရည်အသွေးတွေကို လေ့လာ ပြီး ယူကရိန်းကို ကျနော်တို့က လုံခြုံရေး အာမခံချက်တွေပေးဖို့ အသင့်ပါပဲ” ဟု ပဲရစ်အစည်းအဝေးပွဲ၏ ရလဒ်ကို ဥရောပအရာရှိတစ်ဦးက အကျဉ်းချုံးပြောကြားခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ဥရောပမဟာမိတ်များနှင့် ယူကရိန်းကို ချန်လှပ်ပြီး ရုရှားနှင့် ဆွေးနွေးမှုများပြုလုပ်ရန် စီစဉ်ခဲ့ပြီးနောက် ပြင်သစ်သမ္မတ မက်ခရွန် (Emmanuel Macron) က ထိုအစည်းအဝေးကို ခေါ်ယူခဲ့ခြင်းဖြစ်သည်။

အမေရိကန်နှင့် ရုရှား ကိုယ်စားလှယ်များသည် ဖေဖော်ဝါရီ ၁၈ ရက်တွင် ဆော်ဒီနိုင်ငံ၌ ဆွေးနွေးမှုများ ပြုလုပ်မည် ဖြစ်သည်။

ပြင်သစ်သမ္မတ မက်ခရွန်နဲ့ နေတိုးအတွင်းရေးမှူးချုပ်ကို တွေ့ရစဉ်

ပဲရစ်မြို့တွင် ပြုလုပ်ခဲ့သည့် အစည်းအဝေးကို တက်ရောက်သည့် ဥရောပခေါင်းဆောင်များထဲ၌ မက်ခရွန်၊ ဗြိတိန် ဝန်ကြီးချုပ် ကီယာ စတာမာ (Keir Starmer) ၊ ဂျာမနီဝန်ကြီးချုပ် အိုလက်ဖ် ရှောဇ် (Olaf Scholz) ၊ အီတလီ ဝန်ကြီးချုပ် ဂျော်ဂျီယာ မယ်လိုနီ (Giorgia Meloni) ၊ ပိုလန်ဝန်ကြီးချုပ် ဒေါ်နယ် တပ်စ် (Donald Tusk) နှင့် စပိန်ဝန်ကြီးချုပ် ပီဒရို ဆန်းချက် (Pedro Sanchez) တို့ ပါဝင်ခဲ့သည်။

ထို့ပြင် နယ်သာလန်ဝန်ကြီးချုပ် ဒစ် ချော့ဖ် (Dick Schoof) ၊ ဒိန်းမတ်ဝန်ကြီးချုပ် မက်တီ ဖရက်ဒရစ်ဆန် (Mette Frederiksen) ၊ နေတိုးအကြီးအကဲ မာ့ခ် ရူတီ (Mark Rutte) ၊ ဥရောပကောင်စီ အကြီးအကဲ အန်တိုနီယို ကော်စတာ (Antonio Costa) နှင့် ဥရောပသမဂ္ဂ အကြီးအကဲ အာဆူလာ ဗွန်ဒါလီယန် (Ursula von der Leyen) တို့လည်း အစည်းအဝေးကို တက်ရောက်ခဲ့သည်။

“သမ္မတထရမ့်ဟာ အင်အားပြပြီး ငြိမ်းချမ်းရေးကို ချဉ်းကပ်လုပ်ဆောင်မယ်ဆိုတာ ကျနော်တို့ သဘောတူညီခဲ့ ကြပါတယ်” ဟု အမည်မဖော်လိုသည့် ဥရောပသမဂ္ဂ အရာရှိတစ်ဦးက ပြောကြားခဲ့သည်။

“တစ်ချိန်တည်းမှာပဲ ငြိမ်းချမ်းရေး သဘောတူညီမှုမရဘဲ အပစ်အခတ်ရပ်စဲရေးကို ပြုလုပ်မယ်ဆိုရင် အန္တရာယ် ကြီးမားလိမ့်မယ်လို့ ကျနော်တို့ ယုံကြည်ထားပါတယ်”ဟု အဆိုပါ အရာရှိက ထပ်လောင်းပြောကြားခဲ့သည်။

Source: ရိုက်တာ

CNI International News

ဆိုးလ်၊ ဖေဖော်ဝါရီ ၁၈

တောင်ကိုရီးယားနိုင်ငံတွင် သမ္မတယွန်းဆော့ရွဲ(Yoon Suk-yeol) ၏ အောင်မြင်ခဲ့ခြင်း မရှိသည့် စစ်အုပ်ချုပ်ရေး အမိန့် ကြေညာမှု၌ သမ္မတကတော် ကင်မ် ကေဝန် ဟီး (Kim Keon-hee) လည်း ပါဝင်ပတ်သက်ဖွယ်ရှိနေကြောင်း စွပ်စွဲမှုများ ထွက်ပေါ်နေသည်ဟု South China morning Post မှ ဖော်ပြခဲ့သည်။

ယွန်းနှင့်ကင်မ်တို့သည် ရွေးကောက်ပွဲ ကြားဝင်စွက်ဖက်မှု စွဲချက်များကို ဖုံးကွယ်ရန်အတွက် စစ်အုပ်ချုပ်ရေးအမိန့် ကို ကြေညာရန် စီစဉ်ခဲ့သည်ဟု အတိုက်အခံများက စွပ်စွဲနေကြသည်။

၎င်းတို့ ဇနီးမောင်နှံသည် ၂၀၂၂ ခုနှစ် ဒေသန္တရ လွှတ်တော်ကြားဖြတ်ရွေးကောက်ပွဲအတွက် ဝင်ရောက်ယှဉ်ပြိုင် မည့် ကိုယ်စားလှယ်လောင်းများ အမည်စာရင်း တင်သွင်းရေး လုပ်ငန်းစဉ်ကို ကြားဝင်စွက်ဖက်ခဲ့ကြောင်း အတိုက်အခံ ကိုရီးယားဒီမိုကရက်တစ်ပါတီ (DPK) က ဖေဖော်ဝါရီ ၁၆ ရက်တွင် စွပ်စွဲခဲ့သည်။

ထို့ကြောင့် စစ်အုပ်ချုပ်ရေးအမိန့် ထုတ်ပြန်ကြေညာမှုတွင် ကင်မ်လည်း ပါဝင်ပတ်သက် နေနိုင်သဖြင့် အထူးစုံစမ်းစစ်ဆေးမှု ပြုလုပ်ရန် DPK က တောင်းဆိုနေသည်။

သို့သော် အာဏာရ ပြည်သူ့အင်အားပါတီ (PPP) ကမူ ထိုစွပ်စွဲချက်များကို ငြင်းဆိုခဲ့ပြီး အတိုက်အခံများ၏ စွပ်စွဲချက်များသည် မဟုတ်မှန်ကြောင်းနှင့် တည်ငြိမ်မှု ပျက်ယွင်းစေရန် ကြိုးပမ်းနေခြင်းဖြစ်ကြောင်း တုန့်ပြန်ခဲ့သည်။

သမ္မတယွန်းဆော့ရွဲနဲ့ ဇနီးကို တွေ့ရစဉ်

မကြာသေးမီက အမျိုးသားထောက်လှမ်းရေးဌာန အကြီးအကဲ ချိုတေးယုံ (Cho Tae-yong) ၏ ထုတ်ဖော် ပြောဆိုမှုများအရ ကင်မ်သည် နိုင်ငံရေးအရှုပ်တော်ပုံထဲတွင် ပါဝင်လာခဲ့ခြင်းဖြစ်သည်။

ကင်မ်သည် စစ်အုပ်ချုပ်ရေးအမိန့် မကြေညာမီက ၎င်းအား မက်ဆေ့ချ် ၂ စောင်ပို့ခဲ့ပြီး ထိုမက်ဆေ့ချ်များကို နောက်တစ်ရက်တွင် စာပြန်ခဲ့ကြောင်း ချိုက ပြီးခဲ့သည့် သီတင်းပတ်အတွင်းက အခြေခံဥပဒေဆိုင်ရာခုံရုံးတွင် ပြုလုပ်သည့် ကြားနာစစ်ဆေးမှု၌ ပြောကြားခဲ့သည်။

သမ္မတကတော်က ထိုကဲ့သို့ မက်ဆေ့ချ်များကို အရင်က ပို့လေ့ပို့ထ မရှိကြောင်းနှင့် ထိုမက်ဆေ့ချ်များထဲတွင် ရေးသားထားသည့် အကြောင်းအရာများကိုမူ မမှတ်မိတော့ကြောင်း ချိုက ပြောကြားခဲ့သည်။

ကင်မ်သည် ယခုစွပ်စွဲချက်များ မတိုင်မီ ယခင်ကလည်း အဂတိလိုက်စားမှု၊ စတော့ရှယ်ယာစျေးများကို ကြိုးကိုင် ချယ်လှယ်မှုများဖြင့် စွပ်စွဲခံထားရသည်။

Source: South China Morning Post

CNI International News

ဘန်ကောက်၊ ဖေဖော်ဝါရီ ၁၈

ထိုင်ဝမ်ပြည်ထဲရေးဝန်ကြီးဌာနသည် ထိုင်းနိုင်ငံကို ခရီးသွားများအတွက် အန္တရာယ်များသည့် အရှေ့တောင်အာရှ ၅ နိုင်ငံစာရင်းတွင်  ထည့်သွင်းသတ်မှတ်ခဲ့ကြောင်း The Nation မှ ဖော်ပြခဲ့သည်။

ထိုင်ဝမ်မှ ထိုင်း၊ ဗီယက်နမ်၊ မြန်မာ၊ ကမ္ဘောဒီးယားနှင့် လာအို နိုင်ငံများသည် အန္တရာယ်များသည့် နိုင်ငံများအဖြစ် သတ်မှတ်ထားပြီး ထိုနိုင်ငံများသို့ ခရီးသွားမည့် ခရီးသည်များ၏ လေယာဉ် လက်မှတ်များပေါ်တွင် သတိပေး ချက်များကို မြင်တွေ့ရမည်ဖြစ်သည်။

ခရီးသွားလာရေးအတွက် လုံခြုံရေး အက်ပလီကေးရှင်းများကို ဒေါင်းလုပ်ဆွဲသွားရန်လည်း အကြံပြုထားကြောင်း Taiwan News မှ ဖေဖော်ဝါရီ ၁၄ ရက်တွင် ဖော်ပြခဲ့သည်။

“ပြီးခဲ့တဲ့ နှစ်အနည်းငယ်က ကမ္ဘောဒီးယား ဒါမှမဟုတ် မြန်မာနိုင်ငံတွေမှာရှိတဲ့ ကျားဖြန့်စင်တာတွေမှာ အလုပ်လုပ်ဖို့ ထိုင်ဝမ်ဒေသခံတွေ လိမ်ညာခေါ်ယူခံခဲ့ရတဲ့ ဖြစ်စဉ်တွေ ရှိခဲ့ပါတယ်” ဟု ထိုင်ဝမ် ပြည်ထဲရေး ဝန်ကြီးဌာနက ပြောကြားခဲ့သည်။

ပြီးခဲ့သည့် သီတင်းပတ်တွင် မြန်မာနိုင်ငံသည် ကျားဖြန့်စင်တာတစ်ခုမှ ပြည်ပနိုင်ငံသား ၂၆၀ ကို ပြန်လွှတ်ပေး ခဲ့ပြီး ၎င်းတို့အနက် ထိုင်ဝမ်ဒေသခံ ၇ ဦး ပါဝင်ခဲ့သည်။ ၎င်းတို့သည် ထိုင်ဝမ်သို့ မပြန်မီ ထိုင်းရဲတပ်ဖွဲ့၏ စစ်ဆေးမေးမြန်းမှုကို ခံခဲ့ရသည်။

ထိုင်းခရီးသွားကိုတွေ့ရစဉ်

“အမျိုးသား လူဝင်မှုအေဂျင်စီနဲ့ လေကြောင်းရဲတပ်ဖွဲ့ဗျူရိုတို့ဟာ ထိုင်ဝမ်ခရီးသွားတွေကို ပြည်ပက ကျားဖြန့် စင်တာတွေဆီ မသွားဖို့အတွက် လေဆိပ်တွေမှာ လုံခြုံရေး လုပ်ထုံးလုပ်နည်းတွေကို အရှိန်မြှင့်တင်သွားမှာပါ” ဟု ထိုင်ဝမ်ပြည်ထဲရေးဝန်ကြီးဌာနက ထုတ်ပြန်ခဲ့သည်။

လေကြောင်းလိုင်းများကိုလည်း ထိုအားထုတ် ကြိုးပမ်းမှုတွင် ပူးပေါင်းပါဝင်ရန် တိုက်တွန်းသွားမည်ဖြစ်ပြီး အီလက်ထရောနစ် လက်မှတ်များပေါ်၌ သတိပေးချက်များ ဖော်ပြရန် ညွှန်ကြားထားသည်။

ထို့ပြင် ၂၀၂၂ ခုနှစ်ကတည်းက ထိုင်ဝမ်နိုင်ငံခြားရေးဝန်ကြီးဌာန၏ ခရီးသွားလာမှုဆိုင်ရာ လုံခြုံရေးလမ်းညွှန်ချက် များ ပါရှိသည့် အက်ပလီကေးရှင်း တစ်ခုကိုလည်း ဒေါင်းလုပ်ဆွဲရန် အာဏာပိုင်များက ခရီးသွားများကို အကြံပြု ထားသည်။

Source: The Nation

CNI International News

လန်ဒန်၊ ဖေဖော်ဝါရီ ၁၈

ယူကရိန်းသို့ စစ်သားများစေလွှတ်ပြီး ဖြန့်ကြက်ချထားရန် အသင့်ပြင်ထားကြောင်း ဗြိတိန်ဝန်ကြီးချုပ် ကီယာ စတာမာ (Keir Starmer) က ပြောကြားခဲ့သည်ဟု South China Morning Post မှ ဖော်ပြခဲ့သည်။

ယူကရိန်း ပဋိပက္ခနှင့်ပတ်သက်ပြီး အမေရိကန်၏ အံ့အားသင့်ဖွယ် မူဝါဒ အပြောင်းအလဲကို ဖြေရှင်းရန်အတွက် စတာမာသည် ဖေဖော်ဝါရီ ၁၇ ရက်က ပြင်သစ်နိုင်ငံ၊ ပဲရစ်  (Paris) မြို့တော်တွင် ဥရောပခေါင်းဆောင်များနှင့် မတွေ့ဆုံမီ နာရီပိုင်းအလို၌ ထိုကဲ့သို့ ပြောကြားခဲ့ခြင်းဖြစ်သည်။

အမေရိကန်နှင့် ရုရှားအကြား ဆွေးနွေးညှိနှိုင်းမည့် အစီအစဉ်သည် မရေရာသည့် အခြေအနေများနှင့် ရင်ဆိုင် နေရချိန်တွင် ဥရောပနိုင်ငံများ အနေဖြင့် မိမိတို့၏ စုပေါင်းလုံခြုံရေးအတွက် လုပ်စရာရှိတာများကို ပိုမို လုပ်ဆောင်သင့်ကြောင်း ပြင်သစ်နိုင်ငံက သတိပေးခဲ့သည်။

၃ နှစ်ကြာ ဖြစ်ပွားနေသည့် ရုရှား-ယူကရိန်း စစ်ပွဲကို အဆုံးသတ်ရန် ဆွေးနွေးညှိနှိုင်းမှုများတွင် ဥရောပကို ချောင်ထိုးထားမည့် အခြေအနေအပေါ် စိုးရိမ်မှုများ မြင့်တက်နေခြင်းနှင့်အတူ ဗြိတိန်ဝန်ကြီးချုပ် စတာမာက အခြေအနေအရ လိုအပ်လာပါက ဗြိတိန်စစ်သားများကို ယူကရိန်းသို့ စေလွှတ်သွားမည်ဟု ပြောကြားခဲ့သည်။

“ယူကရိန်းရဲ့ လုံခြုံရေးကို အာမခံချက်ရှိစေဖို့ ဘယ်လိုအခန်းကဏ္ဍကမဆို ကူညီပေးတာဟာ ကျနော်တို့ ဥရောပတိုက်ရဲ့ လုံခြုံရေးအတွက်လည်း အာမခံချက် ရရှိစေမှာပါ။ ဗြိတိန်ရဲ့ လုံခြုံရေးအတွက်လည်း ပါတာပေါ့” ဟု စတာမာက ဖေဖော်ဝါရီ ၁၆ ရက်တွင် ပြောကြားခဲ့သည်။

ယူကရိန်းစစ်မြေပြင်ကို တွေ့ရစဉ်

စတာမာ၏ မှတ်ချက်များအရ သူသည် ယူကရိန်းသို့ ဗြိတိန် ငြိမ်းချမ်းရေး ထိန်းသိမ်းရေးတပ်ဖွဲ့ဝင်များ စေလွှတ်ရန် စဉ်းစားနေသည့် အချက်ကို ပထမဆုံးအကြိမ်အဖြစ် လူသိရှင်ကြား ထုတ်ဖော်ပြောဆိုလိုက်ခြင်းဖြစ်သည်။

ယခင်ကလည်း ယူကရိန်း-ရုရှား ငြိမ်းချမ်းရေး ဆွေးနွေးမှုများတွင် ဗြိတိန်က တစ်ဖက်တစ်လမ်းမှ ပါဝင်ကူညီပေး ရန် ဆန္ဒရှိနေသည်ဟု စတာမာက ပြောကြားခဲ့သည်။

စတာမာသည် ပဲရစ်မြို့တော်တွင် ဂျာမနီ၊ အီတလီ၊ ပိုလန်၊ စပိန်၊ နယ်သာလန်နှင့် ဒိန်းမတ်နိုင်ငံများမှ ခေါင်းဆောင် များနှင့် အစည်းအဝေး ပြုလုပ်ရန် စီစဉ်ထားသည်။

ထိုအစည်းအဝေးသို့ ဥရောပသမဂ္ဂ၏ အဖွဲ့ဝင်နိုင်ငံများကို ကိုယ်စားပြုသည့် ဥရောပကောင်စီ အကြီးအကဲ အန်တိုနီယို ကော်စတာ (Antonio Costa) ၊ ဥရောပသမဂ္ဂအကြီးအကဲ အာဆူလာ ဗွန်ဒါလီယန် (Ursula von der Leyen) နှင့် နေတိုးအတွင်းရေးမှူးချုပ် မာ့ခ် ရူတီ (Mark Rutte) တို့လည်း တက်ရောက်မည်ဖြစ်သည်။

Source: South China Morning Post

CNI International News

နယူးဒေလီ၊ ဖေဖော်ဝါရီ ၁၈

နာဂလက်နက်ကိုင်နှင့်အိန္ဒိယအစိုးရကြား ရပ်တန့်နေသော ငြိမ်းချမ်းရေးဆွေးနွေးမှုများ ပြန်လည်စတင်ရန် လွှတ်တော်အမတ် ၂၁ ဦးက တိုက်တွန်းခဲ့ကြောင်း Mokokchung Times သတင်းဝက်ဘ်ဆိုက်မှ ဖော်ပြခဲ့သည်။

နာဂငြိမ်းချမ်းရေး ပြန်စဖို့အတွက် အိန္ဒိယပြည်ထဲရေးဝန်ကြီး အမစ်ရှား (Amit Shah) ကို နားလည်မှု စာချွန်လွှာ တစ်ခု တင်သွင်းခဲ့သည့် လွှတ်တော်ကိုယ်စားလှယ် ၂၁ ဦးကို အလွန်ကျေးဇူးတင်ကြောင်း ကမ္ဘာလုံးဆိုင်ရာ နာဂဖိုရမ်(GNF)က ပြောကြားခဲ့သည်။ 

ထိုနားလည်မှု စာချွန်လွှာတွင် အိန္ဒိယ-နာဂ ငြိမ်းချမ်းရေးလုပ်ငန်းစဉ်ကို လျှင်မြန်စွာ လုပ်ဆောင်ရန် အိန္ဒိယ အစိုးရကို တိုက်တွန်းခဲ့ခြင်းဖြစ်ကြောင်း၊ ထိုလုပ်ဆောင်ချက်သည် ရှားပါးသည့် နိုင်ငံရေးရဲစွမ်းသတ္တိနှင့် ကိုယ်ချင်းစာတရားကို ပြသသည့် လုပ်ဆောင်ချက်ဖြစ်ကြောင်း GNF က ပြောကြားခဲ့သည်။

 NSCN-IM တပ်ဖွဲ့ကို တွေ့ရစဉ် 

“လွှတ်တော်ကိုယ်စားလှယ်တွေရဲ့ ကြားဝင်လုပ်ဆောင်မှုဟာ အိန္ဒိယနိုင်ငံတစ်ဝန်းက နိုင်ငံရေးသမားတွေနဲ့ ကျွမ်းကျင်သူတွေကြားမှာ အင်တိုက်အားတိုက် လုပ်ဆောင်ဖို့လိုအပ်တဲ့ ငြိမ်းချမ်းရေးသဘောတူညီချက်အတွက် ရေရှည်မျက်ကွယ်ပြုခံခဲ့ရတဲ့ ဆွေးနွေးညှိနှိုင်းမှုလုပ်ငန်းစဉ်ကို ပေါ်လွင်စေခဲ့ပါတယ်”ဟု GNF က ထုတ်ပြန်ခဲ့သည်။

ထို့ပြင် အဓိပ္ပာယ်ပြည့်ဝပြီး ရေရှည်တည်တံ့ခိုင်မြဲသည့် ကြေညာချက်တစ်ခု မရမချင်း ဆွေးနွေးညှိနှိုင်းရေး လုပ်ငန်းစဉ်ကို ဆက်လက် ထောက်ခံအားပေးရန်လည်း GNF က တိုက်တွန်းခဲ့သည်။

ထို့နောက် နှစ်ဦးနှစ်ဖက် ပြေလည်မှု ရရှိခြင်းသည် နာဂလူမျိုးများအတွက် သာမကဘဲ နိုင်ငံတကာတွင် အိန္ဒိယ၏ ဒီမိုကရေစီ တည်တံ့ခိုင်မြဲမှုနှင့် တရားမျှတမှုတို့ကိုလည်း အထောက်အကူ ဖြစ်စေလိမ့်မည်ဟု ထုတ်ပြန်ချက်တွင် ဖော်ပြခဲ့သည်။

အိန္ဒိယ-နာဂ ငြိမ်းချမ်းရေး ဆွေးနွေးညှိနှိုင်းမှုကို ရည်ရွယ်ချက်ရှိရှိ မျက်ကွယ်ပြုခံထားရသည့် အကြောင်းကို အလေးထားဖော်ပြခြင်းသည် အိန္ဒိယဆန့်ကျင်သည့် လုပ်ဆောင်ချက် မဟုတ်ကြောင်းနှင့် အစိုးရသည် ဆွေးနွေးညှိနှိုင်းရေး လုပ်ငန်းစဉ်တွင် စံနှုန်း ၂ မျိုးဖြင့် ကိုင်တွယ်ဆောင်ရွက်နေသည်ဟု GNF က စွပ်စွဲခဲ့သည်။

နာဂပြည်နယ်ဝန်ကြီးချုပ် အာရ်အန် ရာဗီနဲ့ အိန္ဒိယဝန်ကြီးချုပ် မိုဒီကို တွေ့ရစဉ်

အစိုးရသည် ဆွေးနွေးရေး လုပ်ငန်းစဉ်ကို လမ်းလွဲစေရန် ကြိုးပမ်းနေပြီး နာဂလူမျိုးများအပေါ် အပြစ်ပုံချ နေသည့်တိုင် အခြေအနေ အရပ်ရပ်ကို နှစ်ဖက်စလုံးရှိ အတွင်းစည်းမှ လူများနှင့် လေ့လာသူများက သိရှိ နားလည်ထားသည်ဟု ထုတ်ပြန်ချက်တွင် ဖော်ပြခဲ့သည်။

ကြီးမားသည့် အောင်မြင်မှုအဖြစ် ဂုဏ်ပြုခံခဲ့ရသည့် NSCN-IM နှင့် အစိုးရအကြား လက်မှတ်ရေးထိုးခဲ့သည့် ၂၀၁၅ ခုနှစ် မူဘောင်သဘောတူညီချက် (FA) အား ဝန်ကြီးချုပ်မိုဒီ အစိုးရအဖွဲ့၏ ကိုင်တွယ်ဆောင်ရွက်ပုံကိုလည်း GNF က ဝေဖန်ခဲ့သည်။

“မိုဒီအစိုးရအဖွဲ့ဟာ အဲဒီသဘောတူညီချက် လက်မှတ်ရေးထိုးခဲ့မှုအပေါ် နောင်တရနေပုံပေါ်ပါတယ်”ဟု GNF က ပြောကြားခဲ့သည်။

ထိုသဘောတူညီချက် လက်မှတ်ရေးထိုးပြီးနောက် ၂ နှစ်အကြာတွင် ထိုအချိန်က နာဂပြည်နယ်ဝန်ကြီးချုပ် အာရ်အန် ရာဗီ (RN Ravi) က အခြားနာဂအုပ်စုများနှင့် ရပ်တည်ချက် သဘောတူညီမှု (AP) လက်မှတ်ရေးထိုး ခဲ့မှုကို ထောက်ပြခဲ့သည်။

AP သဘောတူညီချက်သည် FA သဘောတူညီချက်နှင့် ဆန့်ကျင်ဘက် ဖြစ်နေသဖြင့် ဆယ်စုနှစ် တစ်စုကြာ မျှော်လင့်ခဲ့ရသည့် ဆွေးနွေးညှိနှိုင်းမှုများ ရပ်တန့်ခဲ့ရကြောင်း GNF က ပြောကြားခဲ့သည်။

Source: Mokokchung Times

CNI International News

ဘေကျင်း၊ ဖေဖော်ဝါရီ ၁၇

အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့က ပြည်ပအကူအညီပေးရေး အေဂျင်စီဖြစ် သည့် USAID ကို ရုတ်တရက် ပိတ်ချလိုက်ခြင်းသည် ကမ္ဘာ့တောင်ခြမ်းတွင် တရုတ်၏ အာဏာအပျော့ ပိုမိုခိုင်မာ အားကောင်းလာစေရန် အခွင့်အလမ်းများ ပေါ်ပေါက်စေခဲ့ကြောင်း တရုတ်အရာရှိများက ပြောကြားနေကြသည်ဟု South China Morning Post မှ ဖော်ပြခဲ့သည်။

သို့သော် အချို့ကလည်း တရုတ်၏ ဩဇာလွှမ်းမိုးမှုကို လိုအပ်သည်ထက်ပိုပြီး မခန့်မှန်းသင့်ကြောင်းလည်း သတိ ပေးနေကြသည်။

ထရမ့်သည် ကမ္ဘာလုံးဆိုင်ရာ လူသားချင်း စာနာထောက်ထားမှုဆိုင်ရာ အကူအညီပေးရေးနှင့် ဘေးအန္တရာယ် ကယ်ဆယ်ရေးအတွက် အဓိကအေဂျင်စီဖြစ်သည့် အမေရိကန်နိုင်ငံတကာ ဖွံ့ဖြိုးတိုးတက်ရေးအေဂျင်စီ (USAID) ကို လုပ်ငန်းလည်ပတ်မှုများ ရပ်နားကြောင်း ယခုလ အစောပိုင်းက ကြေညာခဲ့သည်။

ဘီလျံနာ တစ်ဦးဖြစ်သည့် အီလွန်မာ့စ် (Elon Musk) ၏ အစိုးရအသုံးစရိတ် လျှော့ချရေးအစီအစဉ်ကြောင့် USAID အေဂျင်စီသည် ပိတ်သွားခဲ့ကာ ရာနှင့်ချီသည့် ဝါရင့်ဝန်ထမ်းများကိုလည်း လစာနှင့် ခွင့်ပေးခဲ့သည်။

USAID အား ပိတ်ဆို့မှုကို ဖက်ဒရယ်တရားသူကြီးတစ်ဦးက ယာယီဆိုင်းငံ့ခဲ့သော်လည်း ရေရှည်တွင် မရေရာသည့် အခြေအနေများကို ပေါ်ပေါက်စေခဲ့သည်။

တရုတ်အစိုးရကမူ USAID နှင့်ပတ်သက်ပြီး မှတ်ချက် မပေးခဲ့သော်လည်း တရုတ်၏ ပြည်ပထောက်ပံ့ရေး၊ ကုန်သွယ်ရေး၊ စီးပွားရေးများနှင့်ဆက်နွှယ်သည့် ဗဟိုအစိုးရအေဂျင်စီများထဲမှ အရာရှိအချို့ကမူ ထိုအခြေအနေ သည် တရုတ်အစိုးရအတွက် ပြည်ပတွင် ဩဇာလွှမ်းမိုးမှုကို မြှင့်တင်နိုင်မည့် အခွင့်အလမ်း တစ်ခုဖြစ်ကြောင်း ပြောကြားခဲ့သည်။

“USAID ဆိုင်းငံ့သွားတာဟာ တရုတ်အစိုးရအတွက် ဖွံ့ဖြိုးဆဲနိုင်ငံတွေမှာ တရုတ်ရဲ့ ပုံရိပ်ကို မြှင့်တင်ဖို့နဲ့ တရုတ်ရဲ့ ခြေကုပ် ရယူနိုင်မယ့်နေရာကို ထူထောင်ဖို့အတွက် အကျိုးရှိစေခဲ့ပါတယ်”ဟု အမည်မဖော်လိုသည့် တရုတ် စီးပွားရေးအရာရှိတစ်ဦးက ပြောကြားခဲ့သည်။

တရုတ်၏ အကူအညီပေးရေး အရာရှိတစ်ဦးကလည်း USAID မရှိတော့ပါက တရုတ်အစိုးရသည် ၎င်း၏ ဩဇာ လွှမ်းမိုးမှုကို တည်ဆောက်ရန် အခွင့်အလမ်းတစ်ခု ပေါ်ပေါက်လာစေလိမ့်မည်ဟုလည်း ပြောကြားခဲ့သည်။

Source: South China Morning Post