CNI International News

ဘန်ကောက်၊ မေလ ၂၄

လာမည့် သီတင်းပတ်တွင် ပြုလုပ်မည့် အာဆီယံခေါင်းဆောင်များ အစည်းအဝေး၌ မြန်မာနှင့် နိုင်ငံတကာ ထိတွေ့ ဆက်ဆံမှု ပိုမိုမြင့်တက်စေရန် ထိုင်းကထောက်ခံပြောကြားမည်ဟု ထိုင်းနိုင်ငံခြားရေးဝန်ကြီး မာရစ် ဆန်ဂျီယမ် ပွန်ဆာ (Maris Sangiampongsa)က ပြောကြားခဲ့ကြောင်း ရိုက်တာမှ ဖော်ပြခဲ့သည်။

မြန်မာနိုင်ငံ၏ ပြည်တွင်းစစ်ကို အဆုံးသတ်စေရန် သံတမန်ရေးရာ အားထုတ်ကြိုးပမ်းမှုများအား မြှင့်တင်မည့် နိုင်ငံတကာ ပူးပေါင်းဆောင်ရွက်မှုများ ပြုလုပ်ရန် တွန်းအားပေးသည့် အနေဖြင့် မာရစ်က ထိုကဲ့သို့ ပြောကြားခဲ့ ခြင်းဖြစ်သည်။

မြန်မာနိုင်ငံတွင် ၂၀၂၁ ခုနှစ်က တပ်မတော်က အာဏာကို ရယူခဲ့ပြီးနောက် တပ်မတော်နှင့် လက်နက်ကိုင် သူပုန် များကြား တိုက်ပွဲဖြစ်ပွားခဲ့သဖြင့် လူ ၃ သန်းခွဲကျော် အိမ်ပစ်ရာပစ် ထွက်ပြေးတိမ်းရှောင်ခဲ့ရပြီး စီးပွားရေး ထိခိုက်ခဲ့သည်။

၂၀၂၁ ခုနှစ်က အာဆီယံ၏ ငြိမ်းချမ်းရေး အစီအစဉ်သည် တိုးတက်မှု အနည်းငယ်သာ ရရှိခဲ့သော်လည်း လက်ရှိ အာဆီယံဥက္ကဋ္ဌဖြစ်သည့် မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim) က ဗိုလ်ချုပ်မှူးကြီး မင်းအောင်လှိုင်နှင့် NUG တို့ဖြင့် သီးခြားဆွေးနွေးမှုများ အပါအဝင် ဆွေးနွေးညှိနှိုင်းမှုများကို ပြန်လည် လုပ်ဆောင် ခဲ့သည်။

ထိုင်းနိုင်ငံခြားရေးဝန်ကြီး မာရစ်က မြန်မာနိုင်ငံတွင် အပစ်အခတ်ရပ်စဲရေးနှင့် မတ်လအတွင်းက လှုပ်ခတ်ခဲ့သည့် ငလျင်ကြောင့် လူသားချင်းစာနာထောက်ထားမှု အကူအညီများ အဆင်ပြေချောမွေ့စေရန် လုပ်ဆောင်နေသော အန်ဝါ၏ အားထုတ်ကြိုးပမ်းမှုများကို ထောက်ခံကြောင်း အင်တာဗျူးတစ်ခုတွင် ပြောကြားခဲ့သည်။

ထိုင်းနိုင်ငံခြားရေးဝန်ကြီး မာရစ်ကို တွေ့ရစဉ် 

“အပစ်အခတ်ရပ်စဲရေးက အရေးကြီးတဲ့ ပထမခြေလှမ်းပါ။ ဒါပေမယ့် တစ်ဖက်ထဲကပဲ အပစ်ရပ်လို့ မရနိုင်ပါဘူး။ အခြေအနေတွေကို ဖိအားတွေ မဖြစ်စေဘဲ ထိရောက်တဲ့ ဆွေးနွေးမှုတွေ ပြုလုပ်ဖို့ မတူကွဲပြားတဲ့ ပြဿနာတွေကို စားပွဲပေါ်မှာ ဖြေရှင်းဖို့ လိုပါတယ်” ဟု မာရစ်က ပြောကြားခဲ့သည်။

ကွာလာလမ်ပူ (Kuala Lumpur) မြို့တော်တွင် ပြုလုပ်မည့် အစည်းအဝေးများအတွင်း ငြိမ်းချမ်းရေး အစီအစဉ် များကို ရေးဆွဲရန် လိုအပ်ကြောင်းလည်း ၎င်းက ဆိုသည်။

“မြန်မာနိုင်ငံရဲ့ ပဋိပက္ခကို မဖြေရှင်းနိုင်ဘူးဆိုရင် နိုင်ငံဖြတ်ကျော် ရာဇဝတ်မှုကိုလည်း မဖြေရှင်းနိုင်ပါဘူး။ ဒီပြဿနာ ၂ ခုက ချိတ်ဆက်နေပါတယ်” ဟု ထိုင်းနိုင်ငံခြားရေးဝန်ကြီးက ပြောသည်။

ထို့ပြင် ထိုင်းနိုင်ငံသည် မြန်မာနိုင်ငံကို ပညာရေး၊ ကျန်းမာရေး စောင့်ရှောက်မှု အပါအဝင် ရေရှည် အထောက်အပံ့ များ ပို့ပေးသွားမည်ဖြစ်ပြီး မြန်မာနှင့် ထိတွေ့ဆက်ဆံရန် နိုင်ငံတကာကို တိုက်တွန်းသွားမည်ဟုလည်း မာရစ်က ပြောကြားခဲ့သည်။

Source: ရိုက်တာ

CNI International News

ဒါကာ၊ မေလ ၂၄

ဘင်္ဂလားဒေ့ရှ်ယာယီအစိုးရအဖွဲ့၏ အကြီးအကဲဖြစ်သည့် မိုဟာမက် ယူနွတ် (Muhammad Yunus) က နိုင်ငံရေး ပါတီများသည် ပြုပြင်ပြောင်းလဲမှုများကို သဘောမတူပါက ရာထူးမှ နုတ်ထွက်မည်ဟု ခြိမ်းခြောက်ခဲ့ကြောင်း ရိုက်တာမှ ဖော်ပြခဲ့သည်။

ပြည်သူများသည် ယာယီအစိုးရအဖွဲ့၏ ပြုပြင်ပြောင်းလဲမှုများကို စိတ်မရှည်နိုင်တော့ဘဲ နိုင်ငံရေးအခြေအနေ သေချာရေရာမှု မရှိသည့်အချိန်တွင် ယူနွတ်က ထိုကဲ့သို့ ပြောကြားခဲ့ခြင်းဖြစ်သည်။

ပြီးခဲ့သည့်နှစ်က ဘင်္ဂလားဒေ့ရှ်တွင် ဝန်ကြီးချုပ် ရှိတ်ဟာစီနာ (Sheik Hasina) အစိုးရအဖွဲ့ကို ဖြုတ်ချခဲ့သည့် ကျောင်းသားများ ဦးဆောင်သော ဆူပူအုံကြွမှုပြီးနောက် အသက် ၈၄ နှစ်အရွယ် ငြိမ်းချမ်းရေးနိုဘယ်ဆုရှင် ယူနွတ်သည် လူဦးရေ ၁၇၃ သန်းရှိသည့် ဘင်္ဂလားဒေ့ရှ်နိုင်ငံ၏ ယာယီအစိုးရအဖွဲ့ကို ဦးဆောင်ခဲ့သည်။

လက်ရှိတွင် ယူနွတ်သည် နိုင်ငံရေးပါတီများ၏ ထောက်ခံမှုမရရှိဘဲ အလုပ်ဆက်လုပ်ရန် ခက်ခဲကြောင်း သိရှိသွားခဲ့သည်ဟု ဆန္ဒပြကျောင်းသားအများစု ပါဝင်ဖွဲ့စည်းထားသည့် အမျိုးသားနိုင်ငံသားပါတီ (NCP) အကြီးအကဲ နာဟစ် အစ္စာလာမ် (Nahid Islam) က ပြောကြားခဲ့သည်။

ယူနွတ်ကိုတွေ့ရစဉ် 

“သူ့ကိုကြည့်ရတာ စိတ်ပျက်နေပုံပါပဲ။ စနစ်ကို ပြုပြင်ပြောင်းလဲပြီး မျှတတဲ့ ရွေးကောက်ပွဲအတွက် ပြင်ဆင်မှု တွေကို မလုပ်ဆောင်နိုင်တော့ဘူးဆိုရင် သူရာထူးက ထွက်တော့မယ်လို့ ပြောပါတယ်။ မတူကွဲပြားတဲ့ နိုင်ငံရေး အင်အားစုတွေရဲ့ တောင်းဆိုမှုတွေနဲ့ ပြည်သူလူထုရဲ့ စိတ်မရှည်မှုတွေကြားမှာ သူ ချောင်ပိတ်မိနေပါတယ်”ဟု အစ္စလာမ်က မေလ ၂၂ ရက်တွင် ယူနွတ်နှင့်တွေ့ဆုံပြီးနောက် သတင်းထောက်များကို ပြောကြားခဲ့သည်။

ဘင်္ဂလားဒေ့ရှ်နိုင်ငံတွင် ၂၀၂၄ ခုနှစ်၊ သြဂုတ်လက ဝန်ကြီးချုပ် ရှိတ်ဟာဆီနာကို ဖြုတ်ချခဲ့သည့် ကျောင်းသားများ ဦးဆောင်သော တော်လှန်မှု ဖြစ်ပြီးကတည်းက နိုင်ငံရေး အကျပ်အတည်းနှင့် ရင်ဆိုင်ခဲ့ရသည်။

သို့သော် ယခုသီတင်းပတ်အတွင်း ဒါကာမြို့တော်၏ လမ်းများပေါ်တွင် ပြိုင်ဘက် နိုင်ငံရေးပါတီများက ဆန္ဒပြမှု များ ပြုလုပ်ခဲ့သဖြင့် နိုင်ငံရေး အကျပ်အတည်းသည် ပိုမို မြင့်တက်လာခဲ့သည်။

မေလ ၂၁ ရက်က ဘင်္ဂလားဒေ့ရှ်အမျိုးသားရေးပါတီ (BNP)ကို ထောက်ခံသူများသည် ဒါကာမြို့တော်၏ လမ်းများပေါ်တွင် ဆန္ဒပြခဲ့ကြပြီး ရွေးကောက်ပွဲ ပြုလုပ်မည့်နေ့ရက်ကို ကြေညာရန် တောင်းဆိုခဲ့ကြသည်။

ယူနွတ်၏ ကြားဖြတ်အစိုးရအဖွဲ့သည် ရွေးကောက်ပွဲ ပြုလုပ်မည့်နေ့ကို မကြေညာရသေးသော်လည်း ယူနွတ်က ရွေးကောက်ပွဲအား ၂၀၂၆ ခုနှစ်၊ ဇွန်လထက် နောက်မကျဘဲ ပြုလုပ်ပေးမည်ဟု ကတိပြုခဲ့သည်။

Source: ရိုက်တာ

CNI International News

နယူးဒေလီ၊ မေလ ၂၄

အိန္ဒိယအစိုးရနှင့် တူရကီနိုင်ငံ၏ လေကြောင်းဝန်ဆောင်မှုပေးသည့် Celebi  ကုမ္ပဏီကြား တရားရေးဆိုင်ရာ အမှုအခင်းများ ဖြစ်ပွားမှုသည် စာချုပ်များကို ဖျက်သိမ်းရန် အမျိုးသားလုံခြုံရေးအကြောင်းပြချက်ကို အသုံးပြု သည့် အခြေအနေအား မီးမောင်းထိုးပြသရာ ရောက်ခဲ့ကြောင်း Nikkei Asia မှ ဖော်ပြခဲ့သည်။

ယခုလ အစောပိုင်းက ဖြစ်ပွားခဲ့သည့် အိန္ဒိယနှင့် ပါကစ္စတန် တိုက်ခိုက်မှုများအတွင်း တူရကီက ပါကစ္စတန်ဘက်မှ ထောက်ခံမှုကြောင့် အိန္ဒိယတွင် တူရကီကုန်ပစ္စည်းများကို အသုံးမပြုဘဲ သပိတ်မှောက်နေချိန်၌  ထိုအမှုအခင်း များ ဖြစ်ပွားခဲ့ခြင်းဖြစ်သည်။

အိန္ဒိယအစိုးရသည် ပြီးခဲ့သည့် သီတင်းပတ်က Celebi  ကုမ္ပဏီကို ခွင့်ပြုပေးထားသည့် လျှို့ဝှက် အချက်အလက် များ အသုံးပြုခွင့်ကို ပြန်လည်ရုပ်သိမ်းခဲ့သည်။

မေလ ၂၂ ရက်က ဒေလီအထက်တရားရုံးတွင် ပြုလုပ်သည့် ကြားနာစစ်ဆေးမှု၌ အိန္ဒိယအစိုးရဘက်က ထိုကဲ့သို့ ရုပ်သိမ်းရခြင်းအတွက် ကျိုးကြောင်းခိုင်လုံသော အကြောင်းပြချက်ကို ပေးခဲ့ခြင်းမရှိပေ။

အိန္ဒိယအစိုးရဘက်က ရှေ့နေတစ်ဦးကမူ အမျိုးသားလုံခြုံရေးကိစ္စ အပါအဝင် မခန့်မှန်းနိုင်သည့် အခြေအနေ ကြောင့် ကြိုတင်အသိပေးရန် မဖြစ်နိုင်ကြောင်း ပြောကြားခဲ့သည်။

 Celebi  ကုမ္ပဏီရဲ့ လေကြောင်းလိုင်းကိုတွေ့ရစဉ်

အိန္ဒိယနှင့် ပါကစ္စတန်တို့ တိုက်ပွဲဖြစ်ပွားခဲ့ချိန်အတွင်း တူရကီသည် ပါကစ္စတန်ကို စစ်ဘက်သုံး ဒရုန်းများနှင့် စစ်မှုထမ်းများ ထောက်ပံ့ကူညီခဲ့ကြောင်း သတင်းများ ထွက်ပေါ်ခဲ့သည်။

ထို့နောက် မေလ ၁၅ ရက်တွင် အိန္ဒိယ၏ ပြည်သူ့လေကြောင်းလုံခြုံရေးဗျူရို (BCAS) က Celebi  ကုမ္ပဏီအား ခွင့်ပြုပေးထားသည့် လျှို့ဝှက် အချက်အလက်များ အသုံးပြုခွင့်ကို ပြန်လည် ရုပ်သိမ်းခဲ့ခြင်းဖြစ်သည်။

Celebi  ကုမ္ပဏီကတော့ အိန္ဒိယအစိုးရသည် ပွင့်လင်းမြင်သာမှုမရှိဘဲ လျှို့ဝှက် အချက်အလက်များ အသုံးပြုခွင့် ကို ပြန်လည်ရုပ်သိမ်းခဲ့ခြင်းဖြစ်ကြောင်း ဒေလီနှင့်ဘုံဘေ အထက်တရားရုံးများတွင် အသနားခံစာတင်ခဲ့သည်။

အိန္ဒိယအစိုးရ၏ ဆုံးဖြတ်ချက်ကြောင့် အလုပ်အကိုင်ပေါင်း ၃၈၀၀ နီးပါး ထိခိုက်ခဲ့ပြီး ရင်းနှီးမြှုပ်နှံသူများ၏ ယုံကြည်မှုကို ကျဆင်းစေခဲ့ကြောင်း Celebi  ကုမ္ပဏီက ပြောကြားခဲ့သည်။

အိန္ဒိယအစိုးရကမူ အမျိုးသားလုံခြုံရေး အခြေအနေကို ထည့်သွင်းစဉ်းစားသည့် အနေဖြင့် ကြိုတင်အသိပေးခြင်း မပြုဘဲ ထိုကဲ့သို့ ဆုံးဖြတ်ခဲ့ခြင်း ဖြစ်သည်ဟု တရားရုံးတွင် တုံ့ပြန်ခဲ့သည်။

Source: Nikkei Asia

CNI International News

ဂျေရုဆလင်၊ မေလ ၂၃

ဂါဇာကမ်းမြောင်ဒေသတွင် ပြုလုပ်နေသည့် ထိုးစစ်ကို အဆုံးသတ်ပြီးချိန်၌ ဂါဇာဒေသအား အစ္စရေးက ထိန်းချုပ်သွားမည်ဟု အစ္စရေးဝန်ကြီးချုပ် ဘင်ဂျာမင် နေတန်ယာဟု ( Benjamin Netanyahu) က ပြောကြား ခဲ့ကြောင်း DW သတင်းဝက်ဘ်ဆိုက်မှ ဖော်ပြခဲ့သည်။

ဂါဇာတွင် ဖမ်းဆီးခံထားရသည့် ဓားစာခံများ လွတ်မြောက်ရေးနှင့်ပတ်သက်ပြီး ယာယီအပစ်အခတ်ရပ်စဲရေး သဘောတူညီချက်ကို အကောင်အထည်ဖော်ရန် ပြင်ဆင်နေသည်ဟုလည်း ၎င်းက ဆိုသည်။

ဂါဇာဒေသကို တွေ့ရစဉ်

ထိုအချိန်အတောအတွင်း နယ်စည်းမခြား ဆရာဝန်များအဖွဲ့က ဂါဇာကမ်းမြောင် ဒေသအတွင်းသို့ တင်သွင်းခွင့် ပြုထားသည့် အကူအညီပမာဏသည် လုံလောက်မှုမရှိကြောင်း၊ ဂါဇာကို ပိတ်ဆို့ထားမှုကို အနည်းငယ်သာ ပြန်ဖွင့် ပေးသော ဟန်ပြလုပ်ဆောင်ချက်သာဖြစ်ကြောင်း ပြောကြားခဲ့သည်။

Source: DW

CNI International News

ကွာလာလမ်ပူ၊ မေလ ၂၃

မလေးရှားနိုင်ငံတွင် ပြုလုပ်မည့် အာဆီယံ အစည်းအဝေးအတွင်း အမေရိကန်၏ ကုန်သွယ်ခွန် တိုးမြှင့်ကောက်ခံ မှုနှင့် မြန်မာ့အရေးတို့ကို အဓိကဆွေးနွေးမည်ဖြစ်ကြောင်း မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim) က ပြောကြားခဲ့သည်ဟု  South China Morning Post မှ ဖော်ပြခဲ့သည်။

မလေးရှားသည် မေလ ၂၆ ရက်၌ အာဆီယံ အစည်းအဝေးကို အိမ်ရှင်အဖြစ် လက်ခံကျင်းပမည်ဖြစ်သည်။

ထိုအစည်းအဝေးတွင် ကုန်သွယ်ခွန်များ၊ ကုန်သွယ်ရေး အနှောင့်အယှက်များအပြင် မြန်မာနိုင်ငံ၏ လက်နက်ကိုင် ပဋိပက္ခနှင့် မကြာသေးမီက လှုပ်ခတ်ခဲ့သည့် ငလျင်ကြောင့် ပြန်လည်ထူထောင်ရေး လုပ်ငန်းစဉ်များ အကြောင်း ကို ဆွေးနွေးသွားမည်ဖြစ်သည်။

“ကျနော်တို့ဟာ အမေရိကန်အပေါ် ကုန်သွယ်ရေးနဲ့ ရင်းနှီးမြှုပ်နှံမှုကဏ္ဍတွေမှာ မီခိုနေရပါတယ်။ ဒါပေမယ့် သူတစ်ပါးရဲ့ သဘောထားကို ထည့်မတွက်ဘဲ တစ်ဖက်သတ် လုပ်ဆောင်တာကိုတော့ ကျနော် လက်မခံနိုင်ပါဘူး” ဟု အန်ဝါက ပြောကြားခဲ့သည်။

ထို့ပြင် အာဆီယံသည် တရုတ်၊ အိန္ဒိယ၊ ပါကစ္စတန်နှင့် ဥရောပသမဂ္ဂကဲ့သို့ မိတ်ဖက် အသစ်များနှင့်လည်း ဆွေးနွေးမှုများ ပြုလုပ်ရမည်ဟု ၎င်းက ပြောသည်။

မလေးရှားဝန်ကြီးချုပ် အန်ဝါကိုတွေ့ရစဉ်

မလေးရှားနိုင်ငံ၏ မြို့တော် ကွာလာလမ်ပူ (Kuala Lumpur) တွင် ပြုလုပ်မည့် အာဆီယံ အစည်းအဝေးကို တက်ရောက်ရန်အတွက် တရုတ်ဝန်ကြီးချုပ် လီချင် ( Li Qiang ) သည် မေလ ၂၅ ရက်တွင် မလေးရှားသို့ ရောက်ရှိမည်ဖြစ်သည်။

ထို့နောက် အာဆီယံနှင့် ပင်လယ်ကွေ့နိုင်ငံများမှ ထိပ်သီးခေါင်းဆောင်များဖြင့် သီးခြား အစည်းအဝေးများ ပြုလုပ်မည်ဖြစ်သည်။

အာဆီယံတွင် စားသုံးသူစျေးကွက် သန်း ၆၇၀ ရှိပြီး အာဆီယံ၏ စီးပွားရေးသည် ဒေါ်လာ ၃ ဒသမ ၈ ထရီလျံရှိကာ ကမ္ဘာ့ပဉ္စမမြောက် စီးပွားရေး အင်အားအကြီးဆုံး ဖြစ်နေသည့် အနေအထားဖြင့် အမေရိကန်၏ ကုန်သွယ်ခွန် ကောက်ခံမှုအပေါ် စည်းလုံးညီညွတ်စွာ ချဉ်းကပ် လုပ်ဆောင်လျက်ရှိသည်။

ထို့ပြင် မြန်မာနိုင်ငံတွင် လူပေါင်းများစွာ သေဆုံးခဲ့သည့် ၄ နှစ်ကြာ ဖြစ်ပွားနေသည့် လက်နက်ကိုင်ပဋိပက္ခကို အဆုံးသတ်ရန် လုပ်ငန်းစဉ်များကိုလည်း လုပ်ဆောင်သွားမည်ဖြစ်ကြောင်း အန်ဝါက ပြောသည်။

ပြီးခဲ့သည့်လက အန်ဝါသည် ထိုင်းနိုင်ငံ၊ ဘန်ကောက်မြို့တော်တွင် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် နှင့် တွေ့ဆုံခဲ့ပြီး အပစ်အခတ်ရပ်စဲရေးကာလကို သက်တမ်းတိုးရန်နှင့် မတ်လ ၂၈ ရက်က လှုပ်ခတ်ခဲ့သည့် ငလျင် ကြောင့် ထိခိုက်ပျက်စီးခဲ့သော မြန်မာနိုင်ငံကို အကူအညီများ ပေးပို့ခွင့်ပြုရန် ဆွေးနွေးခဲ့ကြသည်။

“ကျ‌နော်တို့ဟာ ထူးခြားတဲ့ တိုးတက်မှုတွေ လုပ်ဆောင်ခဲ့ပါတယ်။ ဒါဟာ ကောင်းမွန်တဲ့ နိဒါန်းဖြစ်ပါတယ်” ဟု အန်ဝါက မေလ ၂၁ ရက်တွင် ပြောကြားခဲ့သည်။

Source: South China Morning Post

CNI International News

ပြုံယမ်း၊ မေလ ၂၃

မြောက်ကိုရီးယားတွင် မေလ ၂၁ ရက်က ဖျက်သင်္ဘောအသစ်တစ်စင်းကို ရေချသည့် အခမ်းအနားအတွင်း မတော်တဆဖြစ်ပြီး သင်္ဘောပြုတ်ကျခဲ့သဖြင့် ထိုမတော်တဆမှုသည် သည်းမခံနိုင်သည့် ရာဇဝတ်မှု လုပ်ရပ် ဖြစ်ကြောင်း မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un)က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ကြောင့် တန် ၅၀၀၀ အလေးချိန်ရှိ ထိုဖျက်သင်္ဘောကို ရေချပွဲ အခမ်းအနားသည် အောင်မြင်ခြင်းမရှိခဲ့ပေ။

ထိုမတော်တဆ ဖြစ်ရပ်သည် နိုင်ငံ့ဂုဏ်သိက္ခာကို အမည်းစက် ထင်စေသည့် ပေါ့လျော့မှုကြောင့် ဖြစ်ပွားခဲ့ခြင်းဖြစ်သည်ဟု ကင်မ်က ပြောကြားခဲ့သည်။

ထို့ပြင် ကင်မ်သည် ဇွန်လတွင် ပြုလုပ်မည့် အာဏာရအလုပ်သမားပါတီ အစည်းအဝေးမတိုင်မီ ထိုသင်္ဘောကို အပြီးသတ် ပြန်လည်ပြုပြင်ရန် အမိန့်ပေးခဲ့သည်ဟုလည်း နိုင်ငံပိုင် KCNA သတင်းအေဂျင်စီက မေလ ၂၁ ရက်တွင် ထုတ်ပြန်ခဲ့သည်။

ထိုဖျက်သင်္ဘောကို ကမ်းပေါ်မှ ရေထဲသို့ ချရန်ပြင်ဆင်ချိန်တွင် သင်္ဘောသည် ဟန်ချက်မညီဘဲ သင်္ဘောဝမ်းဗိုက်က လျောကျသွားခဲ့ခြင်းဖြစ်ကာ သင်္ဘောဝမ်းဗိုက်၏နေရာအချို့ ပေါက်သွားခဲ့ကြောင်း KCNA က ထုတ်ပြန်ခဲ့သည်။

ဖျက်သင်္ဘောရေချဖို့ပြင်ဆင်နေစဉ်

သို့သော် ချောင်ဂျင် (Chongjin) ဆိပ်ကမ်းတွင် ဖြစ်ပွားခဲ့သည့် ထိုမတော်တဆမှု၌ သင်္ဘော၏ ထိခိုက်ပျက်စီးမှု အတိုင်းအတာနှင့် ဒဏ်ရာရရှိသူ ရှိ၊မရှိကို အသေးစိတ် ထုတ်ပြန်ခဲ့ခြင်းမရှိပေ။

မြောက်ကိုရီးယားသည် အရွယ်အစား အလွန်ကြီးမားသည့် သင်္ဘောများနှင့် အကျွမ်းတဝင်မရှိဘဲ နည်းပညာနှင့် ငွေကြေးပိုင်းတွင် စိန်ခေါ်မှုများနှင့် ရင်ဆိုင်နေရဖွယ်ရှိကြောင်း စစ်ရေးကျွမ်းကျင်သူများက သုံးသပ်ခဲ့သည်။

မြောက်ကိုရီးယားသည် စစ်ရေးနှင့်ဆက်နွှယ်သော အောင်မြင်မှုမရှိသည့် ဖြစ်ရပ်များကို ဝန်ခံလေ့မရှိကြောင်း၊ ယခု အခါတွင် သင်္ဘောရေချမှု အောင်မြင်ခြင်းမရှိသည့် အကြောင်းအရာကို ထုတ်ဖော်ကြေညာခြင်းသည် ရေတပ်၏ ခေတ်မီ စီမံကိန်းများကို ကင်မ်က အလေးထား လုပ်ဆောင်နေသည့် အချက်ကို ပြသရန် ရည်ရွယ်ခြင်းဖြစ်နိုင် ကြောင်း ကျွမ်းကျင်သူများက ပြောကြားခဲ့သည်။

ယခု ရေချခဲ့သည့် ဖျက်သင်္ဘောသည် မေလ ၂၅ ရက်က ထုတ်ဖော်ပြသခဲ့သော မြောက်ကိုရီးယား၏ ပထမဆုံး ဖျက်သင်္ဘောနှင့် အမျိုးအစား အတူတူဖြစ်နိုင်ကြောင်း ကျွမ်းကျင်သူများက ပြောကြားခဲ့သည်။

ဧပြီ ၂၅ ရက်က ထုတ်ဖော်ပြသခဲ့သည့် Choe Hyon အမည်ရှိ ဖျက်သင်္ဘောသည် မြောက်ကိုရီးယား၏ အကြီး မားဆုံးနှင့် ခေတ်အမီဆုံး ဖျက်သင်္ဘောဖြစ်သလို ထိုသင်္ဘောကို ရုရှား၏ အကူအညီဖြင့် တည်ဆောက်ခဲ့ခြင်း ဖြစ်နိုင်ကြောင်း တောင်ကိုရီးယားက ပြောကြားခဲ့သည်။

Source: ရိုက်တာ

CNI International News

အစ္စလာမ်မာဘက်၊ မေလ ၂၂

အိန္ဒိယနှင့် ပါကစ္စတန်ကြား ပစ်ခတ်တိုက်ခိုက်မှုများ အဆုံးသတ်ခဲ့ပြီးနောက် ရက်ပိုင်းအကြာတွင် တရုတ်နှင့် ကုန်သွယ်မှုအပြင် ရင်းနှီးမြှုပ်နှံမှုများကို မြှင့်တင်ရန် သဘောတူခဲ့ကြောင်း ပါကစ္စတန်က မေလ ၂၁ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

အိန္ဒိယနှင့် ပါကစ္စတန်တို့သည် နှစ်ပေါင်း ၃၀ နီးပါးအတွင်း အဆိုးရွားဆုံး တိုက်ခိုက်မှုအဖြစ် ၄ ရက်ဆက်တိုက် အပြန်အလှန် တိုက်ခိုက်မှုများ ဖြစ်ပွားခဲ့ပြီးနောက် မေလ ၁၀ ရက်တွင် အပစ်အခတ်ရပ်စဲရေး သဘောတူညီချက် ရရှိခဲ့ခြင်းဖြစ်သည်။

ဧပြီ ၂၂ ရက်က အိန္ဒိယဘက်ခြမ်းရှိ ကက်ရှ်မီးယားဒေသတွင် လူ ၂၆ ဦး သေဆုံးခဲ့သည့် စစ်သွေးကြွများ၏ တိုက်ခိုက်မှုနှင့်ပတ်သက်ပြီး အိန္ဒိယနှင့်ပါကစ္စတန်ကြား တင်းမာမှုများ မြင့်တက်ခဲ့သည်။

ထိုတိုက်ခိုက်မှုတွင် အိန္ဒိယက ပါကစ္စတန်ကို အပြစ်တင်ခဲ့သော်လည်း ပါကစ္စတန်မှ ထိုတိုက်ခိုက်မှုနှင့် ပတ်သက်ခြင်း မရှိကြောင်း ငြင်းဆိုခဲ့သည်။

မေလ ၂၂ ရက်တွင်မူ ပါကစ္စတန်နိုင်ငံခြားရေးဝန်ကြီး အစ်ဟက် ဒါး ( Ishaq Dar) သည် ဘေဂျင်းတွင် တရုတ်နိုင်ငံခြားရေးဝန်ကြီး ဝမ်ယိ (Wang Yi) နှင့် တွေးဆုံခဲ့သည်။

ပါကစ္စတန်၊ အာဖဂန်နစ္စတန်၊ တရုတ် နိုင်ငံခြားရေးဝန်ကြီးတို့ကို တွေ့ရစဉ်

ဝမ်က တရုတ်သည် မတူကွဲပြားမှုများကို ဆွေးနွေးမှုများဖြင့် ဖြေရှင်းပြီး အပစ်အခတ်ရပ်စဲရေး သဘောတူညီချက် ရရှိအောင် စွမ်းဆောင်နိုင်ခဲ့သည့် အိန္ဒိယနှင့် ပါကစ္စတန်၏ အားထုတ်ကြိုးပမ်းမှုများကို ကြိုဆိုကြောင်းနှင့် ထောက်ခံကြောင်း မေလ ၂၂ ရက်က ပြောကြားခဲ့သည်။

တရုတ်သည် ပါကစ္စတန်၏ အချုပ်အခြာအာဏာနှင့် နယ်မြေတည်တံ့ ခိုင်မြဲရေးတို့ကို ကာကွယ်မှုတွင် ထောက်ခံပေးသွားမည်ဖြစ်ကြောင်း ဝမ်က ဒါးကို ပြောကြားခဲ့သည်ဟု တရုတ်နိုင်ငံခြားရေးဝန်ကြီးဌာနမှ ထုတ်ပြန်ခဲ့သည်။

နှစ်နိုင်ငံကြား နီးကပ်သည့် ဆက်ဆံရေးကို ထိန်းသိမ်းရေး၊ ကုန်သွယ်မှု၊ ရင်းနှီးမြှုပ်နှံမှု၊ စိုက်ပျိုးရေး၊ စက်မှုနှင့် အခြားကဏ္ဍများတွင်လည်း ပူးပေါင်းဆောင်ရွက်မှုများကို မြှင့်တင်ရန် သဘောတူညီခဲ့သည်ဟု ပါကစ္စတန် နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

ဒါးနှင့် ဝမ်ယိတို့သည် ဘေဂျင်းတွင် အာဖဂန်နစ္စတန် နိုင်ငံခြားရေးဝန်ကြီး အမီယာခန်း မွတ်တာကီနှင့်လည်း သီးခြား အစည်းအဝေး ပြုလုပ်ခဲ့ကြသည်ဟု ပါကစ္စတန်နိုင်ငံခြားရေးဝန်ကြီးဌာနက ပြောကြားခဲ့သည်။

Source: ရိုက်တာ

CNI International News

ဘာလင်၊ မေလ ၂၂

အမေရိကန်သမ္မတ ဒေါ်နယ်ထရမ့် (Donald Trump) သည် ရုရှားသမ္မတ ပူတင် (Vladimir Putin) အပေါ် ဩဇာလွှမ်းမိုးမှုရှိသည်ဟု လွှဲမှားစွာ ယူဆခဲ့ကြောင်း ဂျာမနီကာကွယ်ရေးဝန်ကြီး ဘိုးရစ် ပစ္စတိုးရီးယပ်စ် (Boris Pistorius) က မေလ ၂၀ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ယူကရိန်းငြိမ်းချမ်းရေး ဆွေးနွေးပွဲနှင့်ပတ်သက်ပြီး ထရမ့်နှင့် ပူတင်တို့ကြား မေလ ၂၀ ရက်က ဖုန်းဆက်သွယ် ပြောဆိုခဲ့သော်လည်း တိုးတက်မှုမရှိခဲ့ဘဲ ဥရောပက ရုရှားကို ပိတ်ဆို့မှုအသစ်များ ကြေညာခဲ့သည်။

“သူ (ထရမ့်) ဟာ သူ့ရဲ့ ဆွေးနွေးညှိနှိုင်းမှု အနေအထားကို မှားယွင်း တွက်ချက်ခဲ့တယ်လို့ ကျနော် သံသယရှိပါတယ်" ဟု ပစ္စတိုးရီးယပ်စ်က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ ရုရှားသမ္မတ ပူတင်ကို တွေ့ရစဉ်

ပူတင်သည် ထရမ့်၏ ရက်ပေါင်း ၃၀ ကြာ ခြွင်းချက်မရှိ အပစ်အခတ်ရပ်စဲရေးကို လက်မခံခဲ့သဖြင့် ထရမ့်သည် ထိုအစီအစဉ်ကို စွန့်လွှတ်ခဲ့ရသည်။

လက်ရှိတွင် ဥရောပသမဂ္ဂသည် ယူကရိန်း စစ်ပွဲနှင့်ပတ်သက်ပြီး ရုရှားအပေါ် ပိတ်ဆို့မှုအသစ်များ ပြုလုပ်ရန် ပြင်ဆင်နေသည်။

သံတမန်နည်းလမ်းများဖြင့် ဆက်လက် လုပ်ဆောင်နေချိန်တွင် အမေရိကန် အနေဖြင့် ဥရောပ၏ ပိတ်ဆို့မှု အစီအစဉ်ကို ပူးပေါင်းရန် ရှိ/မရှိကို စောင့်ကြည့်ရမည်ဖြစ်ကြောင်း ပစ္စတိုးရီးယပ်စ်က ပြောကြားခဲ့သည်။

Source: ရိုက်တာ

CNI International News

နယူးဒေလီ၊ မေလ ၂၂

အိန္ဒိယသည် အာမေးနီးယားနိုင်ငံကို လက်နက်များရောင်းချမှုကို တိုးမြှင့်နေသည်ဟု South China Morning Post မှ ဖော်ပြခဲ့သည်။

ထိုလုပ်ဆောင်မှုသည် တူရကီ၊ အဇာဘိုင်ဂျန်နှင့် ပါကစ္စတန်ကြား မဟာဗျူဟာမြောက် မိတ်ဖက်ဆက်ဆံရေး တိုးမြင့်လာမှုကို တန်ပြန်သည့် အားထုတ်ကြိုးပမ်းမှုဖြစ်သည်။

တူရကီနှင့် အဇာဘိုင်ဂျန်တို့သည် မကြာသေးမီက အိန္ဒိယနှင့်ပါကစ္စတန်ကြား ဖြစ်ပွားခဲ့သည့် နယ်စပ်ဖြတ်ကျော် တိုက်ခိုက်မှုများတွင် ပါကစ္စတန်ဘက်မှ ထောက်ခံခဲ့ကြသဖြင့် ထို ၃ နိုင်ငံသည် အိန္ဒိယ၏ ဒေသတွင်း အကျိုး စီးပွားများအတွက် စိန်ခေါ်မှုဖြစ်လာခဲ့သည်။

ယခင်က ရုရှားထံမှ လက်နက်များ ဝယ်ယူခဲ့သည့် အဇာဘိုင်ဂျန်သည် ၂၀၂၀ ပြည့်နှစ်မှစပြီး အိန္ဒိယနှင့် ကာကွယ်ရေး ဆက်ဆံမှုများ တိုးမြင့်လာခဲ့ပြီး ရုရှားထံမှ လက်နက်မှီခိုမှုကို လျှော့ချလာခဲ့သည်။

ထိုအပြောင်းအလဲသည် ယူကရိန်း-ရုရှား စစ်ပွဲနှင့် အခြားဒေသတွင်း ပဋိပက္ခများကြောင့် မဟာမိတ်နိုင်ငံများကြား အာရုံစိုက်မှု မြင့်တက်လာခဲ့သည့် ယူရေရှားဒေသတစ်ဝန်း ပထဝီနိုင်ငံရေး ပြိုင်ဆိုင်မှု ပိုမိုပြင်းထန်လာသည့် အခြေအနေကို ပြသရာရောက်ကြောင်း အိန္ဒိယကျွမ်းကျင်သူများက ပြောကြားခဲ့သည်။

တူရကီနှင့် အဇာဘိုင်ဂျန်သည် ပါကစ္စတန်အတွင်း လေကြောင်းတိုက်ခိုက်ခဲ့သည့် အိန္ဒိယ၏ Operation Sindoor (ဆင်ဒူစစ်ဆင်ရေး)စစ်ဆင်ရေးတွင် ပါကစ္စတန်ဘက်မှ ထောက်ခံကြောင်း ပြောကြားခဲ့သည်။

အာမေးနီးယားစစ်သားကိုတွေ့ရစဉ်

အိန္ဒိယသည် ဧပြီလအတွင်းက အိန္ဒိယဘက်ခြမ်းရှိ ကက်ရှ်မီးယားဒေသတွင် လူ ၂၆ ဦး သေဆုံးခဲ့သည့် စစ်သွေးကြွ များ၏ တိုက်ခိုက်မှုနှင့်ပတ်သက်ပြီး ပါကစ္စတန်ကို အပြစ်တင်ခဲ့သလို ပါကစ္စတန်သည် ထိုစစ်သွေးကြွများကို ထောက်ပံ့ပေးထားကြောင်း စွပ်စွဲခဲ့သည်။

ထို့နောက် ပါကစ္စတန်နယ်စပ်ရှိ သံသယဖြစ်ဖွယ် စစ်သွေးကြွစခန်း ၉ ခုကို လေကြောင်း တိုက်ခိုက်ခဲ့ကာ နှစ်နိုင်ငံ နယ်စပ်တစ်လျှောက် အပြန်အလှန် ပစ်ခတ်မှုများ ဖြစ်ပွားခဲ့သည်။

“အိန္ဒိယဟာ တူရကီ၊ အဇာဘိုင်ဂျန်နိုင်ငံတွေနဲ့ ဆက်ဆံရေး သိပ်အဆင်မပြေပါဘူး။ အဲဒါကြောင့် အာမေးနီးယား ကို လက်နက်ရောင်းချမှုဟာ အဲဒီနိုင်ငံတွေနဲ့ ဆက်ဆံရေးအပေါ် သက်ရောက်မှု မရှိနိုင်ပါဘူး။ အထူးသဖြင့် အဲဒီ နှစ်နိုင်ငံစလုံးက Operation Sindoor စစ်ဆင်ရေးမှာ ပါကစ္စတန်ဘက်က ပွင့်ပွင့်လင်းလင်း ရပ်တည်ခဲ့ကြလို့ပါပဲ” ဟု နယူးဒေလီအခြေစိုက် လုံခြုံရေး ကျွမ်းကျင်ပညာရှင်များအဖွဲ့ဖြစ်သည့် Indic Researchers Forum ၏ အကြံပေးပုဂ္ဂိုလ် ရာဂျန် ကိုချာ (Rajan Kochar) က ပြောကြားခဲ့သည်။

၂၀၂၂ ခုနှစ်က ချုပ်ဆိုခဲ့သည့် စာချုပ်အရ အိန္ဒိယသည် အာမေးနီးယားနိုင်ငံကို မြေပြင်မှ ဝေဟင်ပစ် Akash-1S ဒုံးကျည်စနစ်များ၏ ဒုတိယအသုတ်ကို ပေးပို့ရန် စီစဉ်နေပြီး ဟောင်ဝဇ္ဇာအမြောက်များ၊ Pinaka အတွဲလိုက် ဒုံးပစ် စနစ်များကိုလည်း ပေးပို့ရန် ပြင်ဆင်နေသည်။

Source: South China Morning Post