CNI International News
ဘန်ကောက်၊ ဇူလိုင် ၁၅
ထိုင်းနိုင်ငံတွင် ဝန်ကြီးချုပ် ပေတုန်တန်( Paetongtarn Shinawatra )သည် ရာထူးမှ ဆိုင်းငံ့ခံထားရမှုနှင့်အတူ နိုင်ငံရေးအခြေအနေသည် လမ်းဆုံလမ်းခွနေရာသို့ ရောက်ရှိနေကြောင်း The Nation မှ ဖော်ပြခဲ့သည်။
အထူးသဖြင့် ပေတုန်တန်သည် ရာထူးမှ နုတ်ထွက်မည်လော၊ ဝန်ကြီးချုပ်အသစ် အစားထိုး ခန့်အပ်မည်လော၊ သို့မဟုတ် အစိုးရနှင့် လွှတ်တော်ကို ဖျက်သိမ်းမည်လော ဆိုသည့် မရောရာသည့် အခြေအနေနှင့် ရင်ဆိုင်နေရ သည်။
အခြေခံဥပဒေဆိုင်ရာခုံရုံးက ပေတုန်တန်၏ အမှုကို ကိုင်တွယ်နေချိန်တွင် ဖြူးထိုင်းပါတီ၏ မဟာဗျူဟာပညာရှင် များသည် ဖြစ်လာနိုင်ခြေရှိသည့် ထိုအချက် ၃ ချက်အတွက် ကြိုတင်ပြင်ဆင်မှုများ ပြုလုပ်နေသည်။
မကြာသေးမီက အမျိုးသား ဖွံ့ဖြိုးတိုးတက်ရေး အုပ်ချုပ်မှု အင်စတီကျု (Nida) ၏ စစ်တမ်းသစ်တစ်ခု ထွက်ပေါ် လာမှုနှင့်အတူ ထိုင်းအစိုးရအဖွဲ့အပေါ် လူထု၏ ထောက်ခံမှုနှုန်းသည် စောင့်ကြည့်ခံနေရသည်။
"ထိုင်း၏ နိုင်ငံရေး မည်သည့်ဘက်သို့ ဦးတည်သင့်သလဲ" ဆိုသည့် ခေါင်းစဉ်ဖြင့် ဇူလိုင် ၄ ရက်မှ ၇ ရက်ကြား ကောက်ခံခဲ့သော စစ်တမ်းသည် လက်ရှိ ထိုင်းနိုင်ငံရေး အခြေအနေအပေါ် လူထု၏ သဘောထားကို ပေါ်လွင်စေခဲ့ သည်။
ပေတုန်တန် အနေဖြင့် နိုင်ငံရေး စိန်ခေါ်မှုများကို တုံ့ပြန်သင့်၊ မသင့် မေးမြန်းချိန်တွင် စစ်တမ်း၌ ပါဝင်ဖြေဆိုသူ များအနက် ၄၂ ဒသမ ၃၇ ရာခိုင်နှုန်းက ပေတုန်တန်ကို ရာထူးမှနုတ်ထွက်သင့်ပြီး ဝန်ကြီးချုပ်သစ် ခန့်အပ်ရန် ဖြေဆိုခဲ့ကြသည်။
ဝန်ကြီးချုပ်ဟောင်း သက်ဆင်၊ ဝန်ကြီးချုပ်ဟောင်း ဆရီသာနှင့် ပေတုန်တန်ကို တွေ့ရစဉ်
ထို့ပြင် ၃၉ ရာခိုင်နှုန်းကလည်း အောက်လွှတ်တော်ကို ဖျက်သိမ်းပြီး ရွေးကောက်ပွဲပြုလုပ်ရန် ဖြေဆိုခဲ့ကြသည်။
၁၅ ဒသမ ၄ ရာခိုင်နှုန်းကသာ ပေတုန်တန်ကို ဝန်ကြီးချုပ်အဖြစ် ဆက်လက် ခန့်အပ်သင့်ပြီး အုပ်ချုပ်မှုများကို ပုံမှန်အတိုင်း လုပ်ဆောင်သင့်ကြောင်း ဖြေကြားခဲ့ကြသည်။
ထို့ကြောင့် လက်ရှိတွင် ပေတုန်တန်သည် နိုင်ငံရေး လမ်းဆုံလမ်းခွ နေရာသို့ ရောက်ရှိနေသလို ထိုင်းနိုင်ငံသည် လည်း ဝန်ကြီးချုပ် ရာထူးနေရာ ဟာကွက်ဖြစ်နေသည့် ကာလအပိုင်းအခြားသို့ ဝင်ရောက်လာခဲ့သည်။
ပေတုန်တန်သည် ကမ္ဘောဒီးယား ဝန်ကြီးချုပ်ဟောင်း ဟွန်ဆန် (Hun Sen) နှင့် ဖုန်းပြောခဲ့သည့် အသံဖိုင် ပေါက်ကြားခဲ့ပြီးနောက် လွှတ်တော်အမတ်များက ပေတုန်တန်အား ကျင့်ဝတ်သိက္ခာ ချိုးဖောက်မှုဖြင့် ရာထူးမှ ဖယ်ရှားရန် အခြေခံဥပဒေဆိုင်ရာ တရားရုံးကို လျှောက်ထားခဲ့ခြင်းဖြစ်သည်။
ထို့နောက် တရားရုံးက ပေတုန်တန်ကို ဝန်ကြီးချုပ်ရာထူးမှ ဆိုင်းငံ့ခဲ့ပြီးနောက် ရက်ပေါင်း ၆၀ အတွင်း ပေတုန်တန်ကို ဝန်ကြီးချုပ်ရာထူးမှ ဖယ်ရှားရန် သင့်၊ မသင့် ဆုံးဖြတ်သွားမည်ဖြစ်သည်။
Source: The Nation
