CNI International News

ပြုံယမ်း၊ ဇူလိုင် ၁၅

မြောက်ကိုရီးယားသည် ယူကရိန်းကို စစ်ပွဲဆင်နွှဲနေသည့် ရုရှားကို ခြွင်းချက်မရှိ ထောက်ခံသွားမည်ဟု မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) က ပြောကြားခဲ့သည်ဟု DW သတင်း ဝက်ဘ်ဆိုက်က ဖော်ပြခဲ့သည်။

ကင်မ်သည် မြောက်ကိုရီးယားနိုင်ငံ၊ အရှေ့ပိုင်း၊ ဝန်ဆန် (Wonsan) ဆိပ်ကမ်းမြို့တွင် ဇူလိုင် ၁၂ ရက်က ရုရှား နိုင်ငံခြားရေးဝန်ကြီး ဆာဂျေ လာဗရော့ဗ် (Sergey Lavrov)နှင့် အစည်းအဝေး ပြုလုပ်ချိန်၌ ထိုကဲ့သို့ ပြောကြားခဲ့ ခြင်းဖြစ်သည်ဟု နိုင်ငံပိုင် KCNA သတင်းအေဂျင်စီက ထုတ်ပြန်ခဲ့သည်။

မိမိတို့သည် မဟာဗျူဟာမြောက် အရေးကိစ္စများတွင် တူညီသည့် အမြင်ရှိပြီး မြောက်ကိုရီးယားသည် ရုရှား ခေါင်းဆောင်များ လုပ်ဆောင်သော အစီအမံများ အားလုံးကို အားပေးပြီး ခြွင်းချက်မရှိ ထောက်ခံရန် အသင့်ရှိ ကြောင်း ကင်မ်က ပြောကြားခဲ့သည်။

ထို့ပြင် ကင်မ်နှင့် လာဗရော့ဗ်တို့သည် နွေးထွေးသည့် ရဲဘော်ရဲဘက် စိတ်ဓာတ် အပြည့်ရှိသော ယုံကြည်ချက်နှင့် အတူ အတွေးအမြင်များကို ဖလှယ်ခဲ့ကြသည်ဟုလည်း ထုတ်ပြန်ချက်တွင် ဖော်ပြခဲ့သည်။

 မြောက်ကိုရီးယား‌ခေါင်းဆောင် ကင်မ်ဂျုံအန်နဲ့ ရုရှားနိုင်ငံခြားရေးဝန်ကြီး လာဗရော့ဗ်ကို တွေ့ရစဉ် 

မြောက်ကိုရီးယားသည် ရုရှား၏ ကာ့စ် (Kursk ) ဒေသကို ဝင်ရောက် တိုက်ခိုက်နေသည့် ယူကရိန်းတပ်ဖွဲ့များကို မောင်းထုတ်နေသော ရုရှားအား ကူညီရန် စစ်လက်နက်ပစ္စည်းများ ထောက်ပံ့ခဲ့သလို စစ်သားများ စေလွှတ်ကာ စစ်ကူပေးခဲ့သည်။

ပြီးခဲ့သည့်လက ရုရှားလုံခြုံရေးကောင်စီ အကြီးအကဲဖြစ်ပြီး ကာကွယ်ရေးဝန်ကြီးဟောင်းဖြစ်သည့် ဆာဂျေ ရွှိုက်ဂူ (Sergei Shoigu) သည် မြောက်ကိုရီးယားသို့ သွားရောက်ခဲ့ပြီးနောက် ကင်မ်သည် ကာ့စ်ဒေသသို့ မြောက်ကိုရီးယား စစ်အင်ဂျင်နီယာများနှင့် လုပ်သားပေါင်း ၆၀၀၀ ကို ပို့ဆောင်ပေးရန် သဘောတူခဲ့သည်ဟု ပြောကြားခဲ့သည်။

တောင်ကိုရီးယား အမျိုးသားထောက်လှမ်းရေးအဖွဲ့ (NIS) ကလည်း ရွှိုက်ဂူ၏ ပြောကြားချက်ကို အတည်ပြုခဲ့ပြီး မြောက်ကိုရီးယားသည် ရုရှားအား လက်နက်ကြီး ကျည်များနှင့် ဒုံးကျည် အစင်းရေ ၁၀ သန်းကျော်အထိ ထောက်ပံ့ပေးခဲ့ကြောင်း၊ ရုရှားထံမှ စီးပွားရေး ပူးပေါင်းဆောင်ရွက်မှုနှင့် စစ်လက်နက်နည်းပညာများ ပြန်လည် ရရှိခဲ့သည်ဟု ထုတ်ပြန်ခဲ့သည်။

ဇွန်လ ကုန်ပိုင်းကလည်း ကင်မ်သည် ရုရှားဘက်မှ ကူညီတိုက်ခိုက်ရင်း ကျဆုံးသွားခဲ့သည့် မြောက်ကိုရီးယား စစ်သားများကို ဂုဏ်ပြုနေသည့် ဓာတ်ပုံများအား KCNA က ထုတ်ပြန်ခဲ့သည်။

Source: DW