CNI International News
ဝါရှင်တန်၊ ဇူလိုင် ၁၅
အမေရိကန်သည် ယူကရိန်းကို Patriot လေကြောင်းကာကွယ်ရေး ဒုံးကျည်များ ပေးပို့သွားမည်ဖြစ်ပြီး ကုန်ကျ စရိတ်ကို နေတိုးမှ ကျခံပေးရမည်ဟု အမေရိကန်သမ္မတ ဒေါ်နယ်ထရမ့် (Donald Trump)က ဇူလိုင် ၁၃ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။
ထို့နောက် ရုရှားသမ္မတ ပူတင် (Vladimir Putin) ကိုလည်း စိတ်ပျက်ကြောင်း ၎င်းက ပြောကြားခဲ့သည်။
ယူကရိန်းကို လက်နက်များ ပေးပို့ရေးနှင့်ပတ်သက်ပြီး နေတိုးအဖွဲ့နှင့် သဘောတူညီချက် ရရှိခဲ့ကြောင်း ထရမ့်က ဇူလိုင် ၁၀ ရက်တွင် ပြောကြားခဲ့ပြီး နေတိုးအဖွဲ့သည် ထိုလက်နက်များအတွက် ကုန်ကျစရိတ်ကို ကျခံရမည် ဖြစ်သည်။
ယူကရိန်းကို Patriot စနစ်များ သို့မဟုတ် ဒုံးကျည်များ မည်မျှပေးသွားမည် ဆိုခြင်းကိုမူ ထရမ့်က မပြောခဲ့ သော်လည်း အမေရိကန်သည် ထိုဒုံးကျည်များ ထောက်ပံ့မှုအတွက် ကုန်ကျစရိတ်ကို ပေးမည်မဟုတ်ကြောင်း ပြောကြားခဲ့သည်။
“ဒုံးကျည်တွေ ဘယ်လောက် ပေးရမလဲဆိုတာ ကျနော် သဘောမတူရသေးပါဘူး။ ဒါပေမယ့် သူတို့ဟာ ကာကွယ်ရေးအတွက် လိုအပ်နေတာကြောင့် ဒုံးကျည်အချို့ကို ပေးသွားမှာပါ။ ဒါပေမယ့် အဲဒီဒုံးကျည်တွေရဲ့ ကုန်ကျစရိတ်တွေကိုတော့ ဥရောပသမဂ္ဂက ပေးချေရပါလိမ့်မယ်။ ကျနော်တို့ဘက်က ငွေကြေးပေးချေမှာ မဟုတ်ပါဘူး။ ဒုံးကျည်တွေကိုတော့ ပေးမှာပါ”ဟု ထရမ့်က Joint Base Andrews လေတပ်စခန်းတွင် သတင်းထောက်များကို ပြောကြားခဲ့သည်။
ယူကရိန်းသမ္မတနဲ့ Patriot လေကြောင်းကာကွယ်ရေး ဒုံးကျည်များကို တွေ့ရစဉ်
“ကျနော်တို့က သူတို့ အရေးတကြီး လိုအပ်နေတဲ့ Patriots တွေကို ပေးပို့သွားမှာပါ။ ဘာလို့လဲဆိုတော့ ပူတင်က လူတွေအများကြီးကို အံ့အားသင့်စေခဲ့လို့ပါပဲ။ သူက စကားပြောတာတော့ ကောင်းပါတယ်။ ဒါပေမယ့် လူတိုင်းကို ဗုံးလိုက်ကြဲနေပါတယ်။ ပြဿနာက အဲဒါပါပဲ။ ကျနော် အဲဒါကို မကြိုက်ပါဘူး” ဟု ထရမ့်က ထပ်လောင်း ပြောဆိုခဲ့သည်။
ယခုလ အစောပိုင်းကလည်း ထရမ့်သည် ပူတင်နှင့် ဖုန်းပြောခဲ့သည်။
ထို့နောက် ပူတင်သည် အရှေ့ဥရောပတွင် သုံးနှစ်ကြာ ဖြစ်ပွားနေသည့် စစ်ပွဲကို အဆုံးသတ်ရန် သိသာသည့် အားထုတ်ကြိုးပမ်းမှုများ လုပ်ဆောင်ခြင်းမရှိကြောင်း ပြောကြားခဲ့သည်။
အမေရိကန်ကာကွယ်ရေးဝန်ကြီးဌာနသည် အမေရိကန်၏ စစ်လက်နက်ပစ္စည်းများ လျော့ကျလာမည့် အရေးကို စိုးရိမ်သဖြင့် ယူကရိန်းကို လေကြောင်းကာကွယ်ရေး ဒုံးကျည်များနှင့် လက်နက်ခဲယမ်းအချို့ ထောက်ပံ့မှုကို ပြီးခဲ့သည့်သီတင်းပတ်က ရပ်ဆိုင်းခဲ့သည်။
ထိုအချိန်က အိမ်ဖြူတော်ကလည်း ကာကွယ်ရေးဝန်ကြီးဌာန၏ ဆုံးဖြတ်ချက်ကို အတည်ပြုခဲ့ပြီး ကမ္ဘာတစ်ဝန်းရှိ နိုင်ငံများအား အမေရိကန်စစ်တပ်၏ ထောက်ပံ့မှုများကို သုံးသပ်ခဲ့ပြီးနောက် ထိုကဲ့သို့ ဆုံးဖြတ်ခဲ့ခြင်းဖြစ်သည်ဟု ပြောကြားခဲ့သည်။
Source: ရိုက်တာ
