CNI International News

ဘန်ကောက်၊ စက်တင်ဘာ ၆

ထိုင်းနိုင်ငံတွင် စက်တင်ဘာ ၅ ရက်က လွှတ်တော်တွင်း ဝန်ကြီးချုပ်သစ် မဲပေးရွေးချယ်မှု၌  ဘူဂျထိုင်းပါတီ ခေါင်းဆောင် အနူတင် ချန်ဗီရာကူလ် (Anutin Charnvirakul) သည် ဝန်ကြီးချုပ်အဖြစ် ရွေးကောက် တင်မြှောက် ခံခဲ့ရသည်ဟု ရိုက်တာမှ ဖော်ပြခဲ့သည်။

အနူတင်သည် ဝန်ကြီးချုပ်ဖြစ်ရန် လိုအပ်သော ထောက်ခံမဲ အရေအတွက်ထက် ပိုမိုများပြားသည့် ထောက်ခံမဲ များကို ရရှိခဲ့ပြီး ရှင်နာဝပ်မိသားစု၏ ဖြူထိုင်းပါတီက အဆိုပြုသည့် ချိုင်ကာဆမ် နစ်တီဆရီ (Chaikasem Nitisiri) ကို အသာအယာ အနိုင်ယူခဲ့သည်။

အနူတင်သည် ၂ နှစ်အတွင်း တတိယမြောက် ထိုင်းဝန်ကြီးချုပ် ဖြစ်လာမည်ဖြစ်ကာ ရာထူးမှ ဖယ်ရှားခံရသည့် ပေတုန်တန် ရှင်နာဝပ် (Paetongtarn Shinawatra) နေရာကို အစားထိုး တာဝန်ယူမည်ဖြစ်သည်။

အနူတင်သည် ထိုင်းနိုင်ငံ၏ ရှုပ်ထွေးပွေလီသည့် နိုင်ငံရေးလောကကို တည်ငြိမ်စွာ ဖြတ်ကျော်လာနိုင်ပြီး ၎င်း၏ ဘူဂျထိုင်းပါတီသည်လည်း အာဏာလွန်ဆွဲခဲ့သော အီလစ်များကြားထဲတွင် မဟာဗျူဟာကျသည့် ရပ်တည်ချက် အား ကိုင်ဆွဲထားနိုင်ခဲ့သည်။

ပေတုန်တန်ကို တွေ့ရစဉ် 

ဆောက်လုပ်ရေး လုပ်ငန်းရှင်သူဋ္ဌေးကြီးဖြစ်ပြီး ကွန်ဆာဗေးတစ် တစ်ဦးဖြစ်သည့် အနူတင်သည် ထောက်ခံမဲ ၆၃ ရာခိုင်နှုန်း ရရှိခဲ့ပြီး ပြိုင်ဘက်ဖြစ်သော ချိုင်ကာဆမ်ထက် ထောက်ခံမဲ အရေအတွက် ၂ ဆကျော် ရရှိကာ အနိုင်ရခဲ့ ခြင်းဖြစ်သည်။

“ကျနော် အလုပ်ကို ကြိုးကြိုးစားစား လုပ်သွားပါတယ်။ အားလပ်ရက် မယူဘဲ နေ့တိုင်း အလုပ်လုပ်ပါတယ်။ ဘာလို့လဲဆိုတော့ အချိန်သိပ် မရှိလို့ပါပဲ။ ကျနော်တို့ဟာ ပြဿနာတွေကို လျှင်မြန်စွာ ဖြေရှင်းရပါမယ်”ဟု အနူတင်က သတင်းထောက်များကို ပြောကြားခဲ့သည်။

အသက် ၅၈ နှစ် အရွယ်ရှိပြီဖြစ်သည့် အနူတင်သည် ဒုဝန်ကြီးချုပ်၊ ပြည်ထဲရေးဝန်ကြီး တာဝန်များကို ထမ်းဆောင် ခဲ့ဖူးပြီး COVID-19 ကပ်ရောဂါ ကာလကလည်း ကျန်းမာရေးဝန်ကြီးအဖြစ် တာဝန်ထမ်းဆောင်ခဲ့ဖူးသည်။

အနူတင်သည် အတိုက်အခံ ပြည်သူ့ပါတီ ပါဝင်မည် မဟုတ်သည့် အစိုးရအဖွဲ့ကို ဦးဆော်သွားမည်ဖြစ်ပြီး စားသုံးသူစျေးကွက် လျော့ကျနေသည့် နိုင်ငံ့စီးပွားရေး အခြေအနေနှင့် အိမ်ထောင်စု ကြွေးမြီပြဿနာများ မြင့်တက်နေမှုကို ကိုင်တွယ်ဖြေရှင်းရမည်ဖြစ်သည်။

Source: ရိုက်တာ

CNI International News

ဝါရှင်တန်၊ စက်တင်ဘာ ၅

ယခုသီတင်းပတ်အတွင်း အမေရိကန် စစ်တပ်သည် ကာရစ်ဘီယံဒေသတွင် မူးယစ်ဆေးဝါးများ တင်ဆောင်လာ သည်ဟု စွပ်စွဲခဲ့သည့် သင်္ဘောတစ်စင်းကို တိုက်ခိုက်ခဲ့ရာ တိုက်ခိုက်မှုကြောင့် လူ ၁၁ ဦး သေဆုံးခဲ့သည်။

ထိုတိုက်ခိုက်မှုသည် ဗင်နီဇွဲလား၏ Tren de Aragua အမည်ရှိ ဒုစရိုက်ဂိုဏ်း၏ ခြိမ်းခြောက်မှုများ တိုက်ဖျက်မည့် အမေရိကန်သမ္မတ ဒေါ်နယ်ထရမ့် (Donald Trump) ၏ အစီအမံများထဲမှ တစ်ခုဖြစ်ကြောင်း အမေရိကန်က ပြောကြားခဲ့သည်။

အိမ်ဖြူတော်ကမူ ထိုတိုက်ခိုက်မှုနှင့်ပတ်သက်ပြီး အသေးစိတ် အနည်းငယ်သာ ထုတ်ပြန်ခဲ့သော်လည်း သေဆုံးသူ ၁၁ ဦးစလုံးသည် Tren de Aragua ဒုစရိုက်ဂိုဏ်း ဝင်များဖြစ်သည်ဟု ပြောကြားခဲ့သည်။

ထို့ကြောင့် Tren de Aragua ဒုစရိုက်ဂိုဏ်းနှင့် ပတ်သက်သည့် အချက်အလက်အချို့ကို လေ့လာကြည့်ပါက အောက်ပါအတိုင်း တွေ့ရမည်ဖြစ်သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

Tren de Aragua ဂိုဏ်း၏ ဒေသတွင်း ပျံ့နှံ့နေသည့် ဒုစရိုက်လုပ်ငန်းများ
****************************************************************
Tren de Aragua ဂိုဏ်းသည် လွန်ခဲ့သည့် ၁၀ နှစ်ကျော်က ဗင်နီဇွဲလား၏ အလယ်ပိုင်းရှိ ဒုစရိုက်သမားများ ပြည့်နှက်နေသည့် အာရာဂွာ (Aragua) ပြည်နယ်ရှိ နာမည်ဆိုးဖြင့် ကျော်ကြားသော  အကျဉ်းထောင် တစ်ခုတွင် စတင် အခြေတည် ပေါက်ဖွားလာခဲ့ခြင်း ဖြစ်သည်။

မကြာသေးမီ နှစ်များအတွင်း ဗင်နီဇွဲလားတွင် စီးပွားရေး အကျပ်အတည်းကြောင့် ဗင်နီဇွဲလားနိုင်ငံသား ၇ ဒသမ ၇ သန်းကျော် နိုင်ငံအတွင်းမှ ထွက်ပြေးပြီး အခြားလက်တင် အမေရိကနိုင်ငံများနှင့် အမေရိကန်သို့ ရွှေ့ပြောင်း ဝင်ရောက်ခဲ့မှုနှင့်အတူ ထိုဂိုဏ်း၏ ဒုစရိုက်လုပ်ငန်းများသည် ပိုမိုကျယ်ပြန့်လာခဲ့သည်။

ဒေါ်နယ်ထရမ့် အစိုးရအဖွဲ့ကမူ အမေရိကန်၏ မြို့အချို့တွင် အကြမ်းဖက်မှုများနှင့် တရားမဝင် မူးယစ်ဆေးဝါး မှုများ၏ အဓိက အကြောင်းရင်းမှာ Tren de Aragua ဂိုဏ်းကြောင့်ဖြစ်ကြောင်း စွပ်စွဲပြစ်တင်ထားသည်။

ထိုဒုစရိုက်ဂိုဏ်း၏ အင်အားကို အတိအကျ မသိရသေးသော်လည်း ပီရူး၊ ကိုလံဘီယာ အပါအဝင် အခြားနိုင်ငံ များကမူ ဒေသတွင်း အကြမ်းဖက်မှုများသည် Tren de Aragua ဂိုဏ်းကြောင့် ဖြစ်သည်ဟု စွပ်စွဲခဲ့ကြသည်။

Tren de Aragua ဂိုဏ်းက တစ်ယောက်ကို ဖမ်းဆီးထားစဉ်

အကြမ်းဖက်အဖွဲ့အဖြစ် သတ်မှတ်ခံရခြင်း
**************************************
အမေရိကန်သမ္မတ ‌ဒေါ်နယ်ထရမ့်သည် သမ္မတတာဝန်ကို စတင်ထမ်းဆောင်သည့် ပထမဆုံးနေ့မှာပင် Tren de Aragua ဂိုဏ်းကို မက္ကဆီကို၏ မူးယစ်ဆေးဝါး ဂိုဏ်းများနှင့်အတူ ပြည်ပ အကြမ်းဖက်အဖွဲ့များ စာရင်းတွင် ထည့်သွင်းခဲ့သည်။

ယခင် အမေရိကန်သမ္မတ ဂျိုးဘိုင်ဒန် (Joe Biden) လက်ထက်ကလည်း ထိုဂိုဏ်းကို ပိတ်ဆို့မှုများ ချမှတ်ခဲ့ပြီး ဂိုဏ်းခေါင်းဆောင် ၃ ဦးကို ဖမ်းဆီးရမိပါက ဒေါ်လာ ၁၂ သန်းပေးမည်ဟု ဆုငွေထုတ်ခဲ့သည်။

ထရမ့်၏ သမ္မတ အုပ်ချုပ်ရေး အမိန့်တွင်လည်း ထိုဒုစရိုက်ဂိုဏ်းသည် ဗင်နီဇွဲလားသမ္မတ နီကိုလက်စ် မာဒူရို (Nicolas Maduro) ၏ ထိပ်သီး အရာရှိများနှင့် ပူးပေါင်းဆောင်ရွက်နေကြောင်း၊ အထူးသဖြင့် အာရာဂွာ ပြည်နယ် အုပ်ချုပ်ရေးမှူးဟောင်း တာရက်ခ် အယ် အိုင်ဆာမီ (Tareck El Aissami) နှင့် အနီးကပ် ဆောင်ရွက်နေကြောင်း စွပ်စွဲခဲ့သည်။

စစ်ရေးတိုက်ခိုက်မှုသည် တရားမျှတမှုရှိသည်ဟု ကြေညာခံရခြင်း
***********************************************************
စက်တင်ဘာ ၂ ရက်က ကာရစ်ဘီယံ ကမ်းလွန် ရေပြင်များတွင် အမေရိကန် စစ်သင်္ဘောများ၏ တိုက်ခိုက်မှု ကြောင့် ပေါက်ကွဲသွားခဲ့သည့် စပိဘုတ်ပေါ်မှ သေဆုံးသူ ၁၁ ဦး၏ အမည်များနှင့် နိုင်ငံသားများကိုမူ အမေရိကန် က ထုတ်ပြန်ခဲ့ခြင်း မရှိပေ။

ထို့ပြင် ထိုစပိဘုတ်ပေါ်တွင် မူးယစ်ဆေးဝါး ပမာဏ မည်မျှ တင်ဆောင်လာသည် ဆိုခြင်းကိုလည်း ကြေညာခဲ့ခြင်း မရှိပေ။

သို့သော်လည်း ထိုတိုက်ခိုက်မှုသည် တရားမျှတမှုရှိကြောင်းနှင့် အမေရိကန်စစ်တပ်သည် မူးယစ်ဆေးဝါး မှောင်ခို ကူးသည်ဟု သံသယရှိသည့် သင်္ဘောများကို ဆက်လက် တိုက်ခိုက်သွားမည်ဖြစ်ကြောင်း အမေရိကန် နိုင်ငံခြား ရေးဝန်ကြီး မာကို ရူဘီယို (Marco Rubio) က ကြေညာခဲ့သည်။

“သမ္မတထရမ့် လုပ်တာ မှန်တယ်။ အရေးတကြီး ဆောင်ရွက်ဖို့ လိုအပ်တဲ့ အခြေအနေကြောင့် အမေရိကန် အတွက် ခြိမ်းခြောက်မှု ဖြစ်လာနိုင်တဲ့ အရာတွေကို ချေမှုန်းရတာ ဖြစ်ပါတယ်”ဟု ရူဘီယိုက ပြောကြားခဲ့သည်။

Source: အေပီ

CNI International News

ဂျေရုဆလင်၊ စက်တင်ဘာ ၅

အစ္စရေးနိုင်ငံတွင် စစ်ဆန့်ကျင်ရေး ဆန္ဒပြသူများက ဂါဇာတွင် ဖြစ်ပွားနေသည့် စစ်ပွဲကို အဆုံးသတ်ရန်နှင့် ဟားမာ့စ်တို့ ဖမ်းဆီးထားသော ဓားစာခံများကို ပြန်လည်လွတ်မြောက်စေရန်အတွက် အပစ်အခတ်ရပ်စဲရေး သဘောတူညီမှုယူရန် တောင်းဆို ဆန္ဒပြခဲ့သည်ဟု DW သတင်းဝက်ဘ်ဆိုက်တွင် ဖော်ပြခဲ့သည်။

စက်တင်ဘာ ၃ ရက်က ဆန္ဒပြမှုတွင် ဆန္ဒပြသူများသည် ဂျေရုဆလင် (Jerusalem) မြို့တော်ရှိ အမျိုးသား စာကြည့်တိုက် ခေါင်မိုးပေါ်သို့ တွယ်တက်ခဲ့ကြသည်။

ဆန္ဒပြသူများက အမျိုးသားစာကြည်တို့၏ မျက်နှာစာတွင် အစ္စရေးဝန်ကြီးချုပ် နေတန်ယာဟု (Benjamin Netanyahu) ၏ ဓာတ်ပုံများနှင့်အတူ "ခင်ဗျားက ဓားစာခံတွေကို လျစ်လျှူရှုပြီး သူတို့ကို သတ်နေတယ်" ဆိုသည့် စာသားကိုပါ ရေးသားဖော်ပြခဲ့သည်။

နေတန်ယာဟု၏ နေအိမ်အနီး အပါအဝင် ဂျေရုဆလင်မြို့၏ နေရာအနှံ့တွင် ဆန္ဒပြသူများက အမှိုက်ပုံများကို မီးရှို့ခဲ့ကြပြီး အစ္စရေးမီဒီယာအချို့ကမူ ကားများလည်း မီးရှို့ဖျက်ဆီးခံရကြောင်း ဖော်ပြခဲ့သည်။

 ဂါဇာဒေသ အတွင်း နေထိုင်မှုကို တွေ့ရစဉ်

ထို့ပြင် ဆန္ဒပြသူများသည် အစ္စရေးလွှတ်တော်ဖြစ်သော Knesset အဆောက်အအုံသို့ သွားရောက်သည့် လမ်းများ ကိုလည်း ပိတ်ဆို့ထားခဲ့သည်။

အစ္စရေးစစ်တပ်က ဂါဇာကမ်းမြောင်ဒေသ၏ အကြီးဆုံး နယ်နိမိတ်ဖြစ်သော ဂါဇာစီးတီးမြို့ကို ထိန်းချုပ်ရန် အတွက် သောင်းနှင့်ချီသည့် အရန်တပ်ဖွဲ့ဝင်များကို စစ်စည်းရုံးမှု စတင်ခဲ့ပြီးနောက် ထိုဆန္ဒပြမှုများ ဖြစ်ပွားခဲ့ခြင်း ဖြစ်သည်။

စစ်ပွဲဆန့်ကျင်သူများနှင့် နေတန်ယာဟု၏ လက်ယာယိမ်း ညွန့်ပေါင်းအစိုးရကို ဆန့်ကျင်သည့် အတိုက်အခံများ ကလည်း စစ်ပွဲသည် အစ္စရေးစစ်သားများ၏ အသက်အန္တရာယ်ကိုသာမက ဟားမာ့စ်တို့ ဖမ်းဆီးထားသော ဓားစာခံများ၏ အသက်အန္တရာယ်ကိုပါ စိုးရိမ်နေရကြောင်း ပြောကြားခဲ့သည်။

ဂါဇာတွင် ဟားမာ့စ်တို့ ဖမ်းဆီးထားသည့် ဓားစာခံ ၄၈ ဦး ကျန်ရှိနေသေးပြီး ထိုဓားစာခံများအနက် ၂၀ ခန့်သာ အသက်ရှင်လျက် ကျန်ရှိတော့သည်ဟု အစ္စရေးက ယူဆထားသည်။

ထို့ပြင် ပြီးခဲ့သည့် သီတင်းပတ်က ကာတာနှင့် အီဂျစ် စေ့စပ်ညှိနှိုင်းသူများ၏ အဆိုပြုချက်ဖြင့် သဘောတူညီမှု ရရှိခဲ့သည့် ဟားမာ့စ်အဖွဲ့နှင့် အပစ်အခတ်ရပ်စဲရေး သဘောတူညီချက်ကို လက်မှတ် ရေးထိုးရန် ငြင်းဆိုခဲ့သော အစ္စရေးဝန်ကြီးချုပ် နေတန်ယာဟုကိုလည်း ဆန္ဒပြသူများက ဒေါသထွက်နေကြသည်။

Source: DW

CNI International News

ဟောင်ကောင်၊ စက်တင်ဘာ ၅

မြောက်ကိုရီးယားခေါင်းဆောင် ကင်ဂျုံအန် (Kim Jong-un)သည် သမီးဖြစ်သူ ကင်မ်ဂျူအဲ (Kim Ju-ae)အား တရုတ်နိုင်ငံ၊ ဘေဂျင်းမြို့တော်ရှိ စစ်ရေးပြ အခမ်းအနားသို့ ခေါ်ဆောင်လာခဲ့သည့် ဓာတ်ပုံများသည် ကမ္ဘာ့မီဒီယာ များ၏ အာရုံကို ဆွဲဆောင်သွားခဲ့ကြောင်း South China Morning Post မှ ဖော်ပြခဲ့သည်။

ဆယ်ကျော်သက် အရွယ်ဖြစ်သည့် ဂျူအဲကို ပထမဆုံး အကြိမ်အဖြစ် ပြည်ပခရီးစဉ်တွင် ခေါ်ဆောင်လာခဲ့ ခြင်းသည် မြောက်ကိုရီးယား ခေါင်းဆောင်ရာထူးကို ဆက်ခံသူအဖြစ် ရွေးချယ်သည့် လက္ခဏာဖြစ်သည်ဟုလည်း ကျွမ်းကျင်သူများက သုံးသပ်ခဲ့သည်။

မြောက်ကိုရီးယားအရေးလေ့လာသူများကတော့ ကင်မ်နှင့် ဂျူအဲတို့၏ ပြည်ပခရီးစဉ်ကို ကင်မ်၏ ဖခင် ကင်မ်ဂျုံ အီလ် (Kim Jong-il) နှင့် အဖိုးဖြစ်သူ ကင်မ်အီဆွန်း (Kim Il-sung) တို့၏ ပြည်ပခရီးစဉ်နှင့် နှိုင်းယှဉ်ခဲ့ကြသည်။

ကင်မ်ဂျုံအီသည် အသက် ၁၇ နှစ်အရွယ်တွင် ၎င်း၏ဖခင်ဖြစ်သူ ကင်မ်အီဆွန်းနှင့်အတူ ၁၉၅၉ ခုနှစ်က ရုရှားနိုင်ငံ မော်စကိုမြို့တော်သို့ လိုက်ပါလာခဲ့သလို ၁၉၈၃ ခုနှစ်ကလည်း ကင်မ်အီဆွန်း၏ ဘေဂျင်းခရီးစဉ် အပါအဝင် တရုတ်သို့ သွားရောက်သည့် ခရီးစဉ်များကို ကင်မ်ဂျုံအီက လိုက်ပါခဲ့ဖူးသည်။

တရုတ်ခရီးစဉ်မှာ ကင်မ်ဂျူအဲကို တွေ့ရစဉ်

“ပြည်ပနိုင်ငံမှာ ကင်မ်ဂျူအဲရဲ့ လူထုမြင်ကွင်း ထွက်ပေါ်လာတဲ့ ဖြစ်ရပ်ကို သုံးသပ်ရမယ်ဆိုရင် သူဟာ အနာဂတ် မှာ မြောက်ကိုရီးယား ခေါင်းဆောင်နေရာကို ဆက်ခံရမယ့်သူဆိုတဲ့ အချက်ကို ငြင်းပယ်လို့ ရမှာမဟုတ်ပါဘူး” ဟု တောင်ကိုရီးယား၏ ပြန်လည်ပေါင်းစည်းရေးဝန်ကြီးဌာန လက်ထောက်ဝန်ကြီး ကင်မ်ဟောင်ဆွတ် (Kim Hyung-seok ) က ပြောကြားခဲ့သည်။

“ဒါပေမယ့် သမီးဖြစ်သူ ဂျူအဲကို ခေါ်လာတာဟာ ကင်မ်အစိုးရအဖွဲ့ရဲ့ မကောင်းတဲ့ပုံရိပ်ကို ဖုံးဖိချင်တဲ့ မဟာဗျူဟာလည်း ဖြစ်နိုင်ပါတယ်”ဟု ၎င်းက ပြောကြားခဲ့သည်။

ကင်မ်ဂျူအဲ၏ အမည်ကို ၂၀၁၃ ခုနှစ်တွင် ပြင်ပကမ္ဘာက ပထမဆုံးအကြိမ် ကြားသိခဲ့ခြင်းဖြစ်သည်။

၂၀၁၃ ခုနှစ်က မြောက်ကိုရီးယားသို့ သွားရောက်ခဲ့သည့် အမေရိကန် ဘတ်စကက် ဘောသမားဟောင်း ဒန်းနစ် ရော့မန်း (Dennis Rodman) က သူသည် ကင်မ်၏ မွေးကင်းစ သမီးဖြစ်သော ဂျူအဲကို တွေ့ခဲ့ဖူးကြောင်း ပြောကြားခဲ့ပြီး ထိုသတင်းသည် ပျံ့သွားခဲ့သည်။

ထို့ကြောင့် ၂၀၁၃ ခုနှစ်မှ ယခု ၂၀၂၅ ခုနှစ်ကို တွက်ကြည့်ရမည်ဆိုပါက ဂျူအဲ၏ အသက်သည် ၁၂ နှစ်အရွယ် ရှိပြီဟု ယူဆရကြောင်း ကိုရီးယားအရေး ကျွမ်းကျင်သူများက ပြောကြားခဲ့သည်။

Source: South China Morning Post

CNI International News

ဂျာကာတာ၊ စက်တင်ဘာ ၅

အင်ဒိုနီရှားနိုင်ငံတွင် ကျောင်းသားများဦးဆောင်သည့် ဆန္ဒပြသူများက စက်တင်ဘာ ၄ ရက်တွင် ဂျာကာတာ (Jakarta) မြို့တော်ရှိ လွှတ်တော် အဆောက်အအုံရှေ့တွင် စုရုံးဆန္ဒပြခဲ့ကြောင်း ရိုက်တာမှ ဖော်ပြခဲ့သည်။

ပြီးခဲ့သည့် သီတင်းပတ်က ကမ္ဘာ့ တတိယအကြီးဆုံး ဒီမိုကရေစီနိုင်ငံဖြစ်သည့် အင်ဒိုနီးရှားတွင် ဆန္ဒပြမှုများ စတင်ဖြစ်ပွားခဲ့ကာ ရဲတပ်ဖွဲ့နှင့် ဆန္ဒပြမှုများကြား အထိကရုဏ်းများ ဖြစ်ပွားခဲ့သည်။

BEM SI ဟု လူသိများသည် ကျောင်းသားအဖွဲ့အစည်းများ စုပေါင်းထားသည့် ညွန့်ပေါင်းအဖွဲ့ကမူ ပြည်သူများ အနေဖြင့် ငြိမ်းချမ်းစွာ ဆန္ဒထုတ်ဖော်မှုတွင် ပူးပေါင်းပါဝင်ကြရန် တိုက်တွန်းထားသည်။

“ပြည်သူတွေကြားမှာ တည်ငြိမ်မှု ပျက်ယွင်းစေတာက လမ်းပေါ်က ဆန္ဒပြမှုတွေကြောင့် မဟုတ်ပါဘူး။ အဂတိ လိုက်စားမှုတွေ၊ နိုင်ငံရေးသဘော သက်ဝင်နေတဲ့ ဥပဒေတွေ၊ ပုံဖျက်ထားတဲ့ သမိုင်းကြောင်းနဲ့ ပြည်သူတွေကို မျက်ကွယ်ပြုထားတဲ့ အစိုးရရဲ့မူဝါဒတွေကြောင့် ဖြစ်ပါတယ်” ဟု BEM SI အဖွဲ့က ပြောကြားခဲ့သည်။

အင်ဒိုနီးရှား ဆန္ဒပြ ကျောင်းသား/သူတွေကို တွေ့ရစဉ်

ပြီးခဲ့သည့် သီတင်းပတ်က ဆန္ဒပြမှုတွင် ရဲကားတစ်စီးက အသက် ၂၁ နှစ်အရွယ် ဆိုင်ကယ် ယာဉ်မောင်းတစ်ဦးကို ဝင်တိုက်ခဲ့သဖြင့် ဆိုင်ကယ်သမား သေဆုံးပြီးနောက် ဆန္ဒပြမှုများသည် ဆူပူအုံကြွမှုအဖြစ် ပြောင်းလဲသွားခဲ့သည်။

ထိုဆိုင်ကယ် ယာဉ်မောင်း သေဆုံးခဲ့သည့် ဖြစ်စဉ်နှင့်ပတ်သက်ပြီး ဘင်္ဂလားဒေ့ရှ်အစိုးရက ရဲတပ်ဖွဲ့အရာရှိ တစ်ဦးကို ကျင့်ဝတ်သိက္ခာ ချိုးဖောက်မှုဖြင့် ပြစ်မှုထင်ရှားတွေ့ရှိပြီး ရာထူးမှ ထုတ်ပယ်ခဲ့သည်။

လက်ရှိ အချိန်အထိ အင်ဒိုနီးရှားနိုင်ငံတစ်ဝန်း ဆန္ဒပြမှုများအတွင်း လူပေါင်း ၃၀၀၀ ကျော် ဖမ်းဆီးခံခဲ့ရကြောင်း လူ့အခွင့်အရေးစောင့်ကြည့်ရေးအဖွဲ့က ထုတ်ပြန်ခဲ့သည်။

ဆူပူအုံကြွမှုများ၊ ပစ္စည်းများကို ဝင်ရောက် လုယက်သည့် ဖြစ်စဉ်များအတွင်း သေဆုံးသူ ၁၀ ဦးရှိပြီး ၁၀၀၀ ကျော် ဒဏ်ရာ ရရှိခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။

“အင်ဒိုနီးရှား အာဏာပိုင်တွေ အနေနဲ့ အစိုးရမူဝါဒတွေနဲ့ ပတ်သက်တဲ့ ဆန္ဒပြမှုတွေကို အင်အား အလွန်အကျွံ သုံးပြီး မဖြိုခွဲသင့်ပါဘူး”ဟု လူ့အခွင့်အရေးစောင့်ကြည့်ရေးအဖွဲ့၏ အာရှရေးရာ လက်ထောက်ညွှန်ကြားရေးမှူး မီနာစီ ဂန်ဂူလီ (Meenakshi Ganguly) က ပြောကြားခဲ့သည်။

Source: ရိုက်တာ

CNI International News

ဘေဂျင်း၊ စက်တင်ဘာ ၄

တရုတ်နိုင်ငံ ဘေဂျင်းမြို့တော်တွင် ဒုတိယကမ္ဘာစစ် ပြီးဆုံးသည့် နှစ်ပေါင်း ၈၀ ပြည့် အထိမ်းအမှတ်အဖြစ် စက်တင်ဘာ ၃၀ ရက်က တီအန်မင်ရင်ပြင် (Tiananmen Square)၌ ပြုလုပ်သည့် စစ်ရေးပြ အခမ်းအနားကို နိုင်ငံပေါင်း ၂၀ ကျော်မှ ကမ္ဘာ့ခေါင်းဆောင်များ တက်ရောက်ခဲ့သည်ဟု South China Morning Post မှ ဖော်ပြခဲ့သည်။

ထိုစစ်ရေးပြ အခမ်းအနားသည် ဘေဂျင်းတွင် ပြုလုပ်သည့် ဒုတိယအကြိမ်မြောက် စစ်ရေးပြ အခမ်းအနားဖြစ်ပြီး ပထမအကြိမ်က စစ်ရေးပြ အခမ်းနားကို ၂၀၁၅ ခုနှစ်က ပြုလုပ်ခဲ့သည်။

ဒေသစံတော်ချိန် နံနက် ၉ နာရီမှ စတင်ပြီး မိနစ် ၉၀ နီးပါးကြာ ပြုလုပ်ခဲ့သည့် စစ်ရေးပြ အခမ်းအနားသည် တရုတ်၏ စစ်အင်အား ကြီးမားလာမှုကို ပြသသော အခမ်းအနားအဖြစ် ရှုမြင်ခံခဲ့ရသည်။

ထို့ပြင် တရုတ်သည် ၎င်း၏ ကမ္ဘာလုံးဆိုင်ရာ ခေါင်းဆောင်မှုကဏ္ဍကို ပိုမိုခိုင်မာစေရန်နှင့် သံတမန်ရေး ဩဇာ အာဏာ မြင့်တက်လာမှုကို ပြသသည့် အားထုတ်ကြိုးပမ်းမှု အဖြစ်လည်း ကျွမ်းကျင်သူများ ယူဆခဲ့သည်။

ထိုစစ်ရေးပြ အခမ်းအနားတွင် သတိပြုရမည့် အချက် ၅ ချက်ရှိခဲ့ပြီး ထိုအချက်များကို ဖော်ပြပေးသွားမည် ဖြစ်သည်။

နံပါတ်(၁) ရှီ၊ ပူတင်နှင့် ကင်မ်ဂျုံအန်
*********************************
ထိုစစ်ရေးပြ အခမ်းအနားကို ကမ္ဘာ့ခေါင်းဆောင်ပေါင်း ၂၀ ခန့် တက်ရောက်ခဲ့သော်လည်း တရုတ်သမ္မတ ရှီကျင့်ဖျင် (Xi Jinping)၊ ရုရှားသမ္မတ ဗလာဒီမာ ပူတင် (Vladimir Putin) နှင့် မြောက်ကိုရီးယားခေါင်းဆောင် ကင်မ်ဂျုံအန် (Kim Jong-un) ကိုသာ မီဒီယာများက ဦးစားပေး ဖော်ပြခဲ့ကြသည်။

၎င်းတို့ ၃ ဦးသည် ကော်ဇောနီပေါ်တွင် လမ်းလျှောက်ရင်း တစ်ယောက်နှင့်တစ်ယောက် ရင်းနှီးစွာ စကားပြောပြီး လက်ဆွဲ နှုတ်ဆက်နေပုံများသည် အနောက်နိုင်ငံများကို ဖီဆန်သည့် အမှာစကားတစ်ခု ဖြစ်သည်ဟု ကျွမ်းကျင် သူများက သုံးသပ်ခဲ့ကြသည်။

တရုတ်စစ်တပ် လက်နက်သစ်ကိုတွေ့ရစဉ်

နံပါတ်(၂) ဘယ်သူတွေ မတက်ရောက်ခဲ့သလဲ
*****************************************
တရုတ်၏ စစ်ရေးပြ အခမ်းအနားကို အမေရိကန်၊ အနောက်ဥရောပ၊ ဂျပန်၊ အိန္ဒိယနှင့် တောင်ကိုရီးယားနိုင်ငံများမှ ခေါင်းဆောင်များ တက်ရောက်ခဲ့ခြင်း မရှိပေ။

နံပါတ်(၃) ရှီက ဘာတွေ သတင်းစကား ပါးခဲ့သလဲ
********************************************
စစ်ရေးပြ အခမ်းအနား၏ အဖွင့်မိန့်ခွန်းတွင် ရှီက ကမ္ဘာကြီးသည် ငြိမ်းချမ်းရေးနှင့် စစ်ပွဲကို ရွေးချယ်ရမည့် အခြေ အနေနှင့် ရင်ဆိုင်နေရကြောင်း၊ တရုတ်သည် မည်သည့် ပုံစံမျိုးနှင့်မဆို မည်သည့်အခါမျှ ခြိမ်းခြောက်ခံရမည့် မဟာနိုင်ငံ တစ်ခုဖြစ်ကြောင်း ပြောကြားခဲ့သည်။

ထိုမှတ်ချက် စကားများသည် အမေရိကန်နှင့် ၎င်း၏ မဟာမိတ်များကို ရည်ညွှန်းခဲ့ခြင်း ဖြစ်နိုင်သည်ဟု ကျွမ်းကျင် သူများက ပြောကြားခဲ့သည်။

ရှီ၊ ပူတင်နှင့် ကင်မ်တို့၏ ဓာတ်ပုံများအရ တရုတ်သည် ၎င်း၏ မိတ်ဆွေများနှင့်အတူ ရပ်တည်ရန် တွန့်ဆုတ်နေ မည် မဟုတ်ဘဲ၊ ၎င်း၏ မိတ်ဆွေများသည် နိုင်ငံတကာတွင် ဝေဖန်ရှုတ်ချ ခံနေရသည့်တိုင် ထိုမိတ်ဆွေများကို ထောက်ခံသွားမည့် သဘောထားကို ပြသခြင်းဖြစ်ကြောင်း အတ္တလန္တိတ်ကောင်စီ၏ Global China Hub မှ ကျွမ်းကျင်သူ ဝမ်တီဆောင်း (Wen-ti Sung) က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) ကလည်း ထိုစစ်ရေးပြ အခမ်းအနားနှင့်ပတ်သက်ပြီး ၎င်း၏ မှတ်ချက်စကားကို Truth Social လူမှုမီဒီယာတွင် ရေးသားခဲ့သည်။

“သူတို့က အမေရိကန်ကို ဆန့်ကျင်နေပေမယ့်လည်း ဗလာဒီမာပူတင်နဲ့ ကင်မ်ဂျုံအန်ကို ကျနော်က အလေးထား ပါတယ်လို့ ပြောပါရစေ” ဟု ထရမ့်က ထေ့ငေါ့သည့် ပုံစံဖြင့် ရေးသားခဲ့သည်။

နံပါတ်(၄) စစ်အင်အားပြသမှု
**************************
ထိုစစ်ရေးပြ အခမ်းအနားအတွင်း တရုတ်သည် တင့်ကားများနှင့် ဒရုန်းများမှအစ တာဝေးပစ် ဒုံးကျည်များနှင့် နျူကလီးယားထိပ်ဖူး တပ်ဆင်နိုင်သည့် ဒုံးကျည်များ၊ တိုက်လေယာဉ်များ၊ ကိုယ်ပျောက် လေယာဉ်များအဆုံး နောက်ဆုံးပေါ် စစ်လက်နက်ပစ္စည်းများကို ထုတ်ဖော်ပြသခဲ့သည်။

နံပါတ်(၅) ထိုင်ဝမ်အရေး
**********************
ရှီ၏ မိန့်ခွန်းထဲတွင် “တရုတ်နိုင်ငံ၏ အမျိုးသားပြန်လည် အားသစ်လောင်းမှု”ဆိုသည့် စကားလုံးကို ထည့်သွင်း ပြောကြားခဲ့သည်။

ထိုစကားလုံးသည် ထိုင်ဝမ်ကို တရုတ်၏ တရားဝင် နယ်နိမိတ်ဖြစ်စေရန် တရုတ်၏ အနာဂတ်အတွက် ရှီ၏ ကြီးမားသည့် နှစ်ရှည်စီမံကိန်းကို ဖော်ပြသည့် စကားလုံးဖြစ်သည်။

ထိုင်ဝမ်သမ္မတ လိုင်ချင်တေး (Lai Ching-te)က တရုတ်၏ စစ်ရေးပြ အခမ်းအနားကို လျစ်လျူရှုခဲ့ပြီး ထိုင်ဝမ် ဒေသခံများသည် ငြိမ်းချမ်းရေးကို မြတ်နိုးကြောင်း၊ ထိုင်ဝမ်သည် သေနတ်ပြောင်းဝမှလာသည့်  ငြိမ်းချမ်းရေးကို အထိမ်းအမှတ် ပြုလုပ်မည် မဟုတ်ကြောင်း ပြောကြားခဲ့သည်။

Source: South China Morning Post

CNI International News

ဝါရှင်တန်၊ စက်တင်ဘာ ၄

တရားမဝင် မူးယစ်ဆေးဝါးများ သယ်ဆောင်လာသည်ဟု ယူဆရသည့် ဗင်နီဇွဲလားမှ ထွက်ခွာလာသော  သင်္ဘော တစ်စင်းကို အမေရိကန်စစ်တပ်က စက်တင်ဘာ ၂ ရက်တွင် တိုက်ခိုက်ခဲ့သဖြင့် လူ ၁၁ ဦးသေဆုံးခဲ့သည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထိုဖြစ်စဉ်သည် ကာရစ်ဘီယံတောင်ပိုင်း ရေပြင်များသို့ အမေရိကန် စစ်သင်္ဘောများ ဖြန့်ကြက်ချထားပြီး နောက်ပိုင်း ပထမဆုံး စစ်ဆင်ရေးတစ်ခု ဖြစ်ခဲ့သည်။

“ကျနော်တို့က နောက်ဆုံး မိနစ်အချိန်မှာပဲ သင်္ဘောတစ်စင်းကို ပစ်ခဲ့ပါတယ်။ မူးယစ်ဆေးဝါးတွေ သယ်ဆောင် လာတဲ့ သင်္ဘောပါ။ သင်္ဘောပေါ်မှာ မူးယစ်ဆေးဝါးတွေ အများကြီး ပါပါတယ်” ဟု ထရမ့်က အိမ်ဖြူတော်တွင် သတင်းထောက်များကို ပြောကြားခဲ့သည်။

“ဒါပေမယ့် ပြဿနာက မပြီးသေးပါဘူး။ ကျနော်တို့ နိုင်ငံထဲကို မူးယစ်ဆေးဝါးတွေ အများကြီး ဝင်ရောက်ခဲ့ ပြီးပါပြီ။ ဟိုးအရင်ကတည်းကပါ။ အဲဒီ မူးယစ်ဆေးဝါးတွေက ဗင်နီဇွဲလားနိုင်ငံက ထွက်လာတာ ဖြစ်ပါတယ်” ဟု ထရမ့်က ပြောကြားခဲ့သည်။

ထရမ့်သည် နောက်ပိုင်းတွင် ၎င်း၏ Truth Social လူမှုမီဒီယာတွင် ပင်လယ်ပြင်၌ စပိဘုတ်တစ်စင်းကို ဒရုန်း တစ်စင်းဖြင့် တိုက်ခိုက်နေသည့် ဗွီဒီယိုနှင့် စပိတ်ဘုတ် မီးလောင် ပေါက်ကွဲသွားသော ဗွီဒီယိုမှတ်တမ်းများကို တင်ခဲ့သည်။

ထရမ့် ထုတ်ပြန်တဲ့ ဗွီဒီယိုထဲက တိုက်ခိုက်ခံရတယ်ဆိုတဲ့ သင်္ဘောကို တွေ့ရစဉ်

“ဒီတိုက်ခိုက်မှုမှာ အကြမ်းဖက်သမား ၁၁ ယောက် သေဆုံးသွားပါတယ်။ ကျနော်တို့ အမေရိကန်တပ်ဖွဲ့တွေ ဘက်က ထိခိုက်ဒဏ်ရာ မရခဲ့ပါဘူး”ဟု ထရမ့်က ပြောကြားခဲ့သည်။

စပိဘုတ်ပေါ်တွင် လိုက်ပါလာသည့် သင်္ဘောသားများသည် ဗင်နီဇွဲလား၏ Tren de Aragua လူဆိုးဂိုဏ်းဝင်များ ဖြစ်ကြောင်း အမေရိကန်စစ်တပ်က စုံစမ်းဖော်ထုတ်နိုင်ခဲ့သည်ဟု ဆိုသည်။

Tren de Aragua အဖွဲ့သည် အမေရိကန်တွင် အကြမ်းဖက်အဖွဲ့ သတ်မှတ်ခံထားရပြီး ထိုအဖွဲ့ကို ဗင်နီဇွဲလား သမ္မတ မာဒူရို (Nicolas Maduro) က ထိန်းချုပ်ထားကြောင်း ထရမ့်က ပြောကြားခဲ့သည်။

ဗင်နီဇွဲလားနိုင်ငံ၏ ဆက်သွယ်ရေးဝန်ကြီး ဖရက်ဒီ နာနက်ဇ် (Freddy Nanez) ကမူ လူမှုမီဒီယာပေါ်တွင် ထရမ့် တင်ထားသည့် ဗွီဒီယိုသည် AI ဖြင့် ဖန်တီးထားသော ဗွီဒီယိုဖြစ်ကြောင်း ပြောကြားခဲ့သည်။

Source: ရိုက်တာ

CNI International News

ဘေဂျင်း၊ စက်တင်ဘာ ၄

အနာဂတ်ခေါင်းဆောင်အဖြစ် ရှေ့ပြေးနေသူ ဆယ်ကျော်သက်အရွယ် သမီးဖြစ်သူကို မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un)က တရုတ်နိုင်ငံ ဘေဂျင်းမြို့တော်သို့ ခေါ်ဆောင်လာခဲ့ပြီး ပွဲထုတ် ခဲ့သည်ဟု ရိုက်တာမှ ဖော်ပြခဲ့သည်။

ထိုခရီးစဉ်သည် ကင်မ်၏ သမီးဖြစ်သူအတွက် ပထမဆုံး ပြည်ပခရီးစဉ်တွင် လူထုရှေ့မှောက်သို့ ထွက်ပေါ်လာ ခဲ့ခြင်းဖြစ်ကြောင်း ရိုက်တာမှ ဖော်ပြခဲ့သည်။

ထို့ကြောင့် မြောက်ကိုရီးယား ခေါင်းဆောင် ကင်မ်၏ သမီးဖြစ်သူသည် သားစဉ်မြေးဆက် အုပ်ချုပ်လာခဲ့သည့် မြောက်ကိုရီးယား မိသားစု၏ အရိုက်အရာကို ဆက်ဆံရဖွယ်ရှိကြောင်း ထင်ကြေးပေးမှုများ ထွက်ပေါ်လာခဲ့သည်။

မြောက်ကိုရီးယားသည် ကင်မ်၏ သမီးဖြစ်သူ၏ အမည်နှင့် အသက်တို့ကို မည်သည့် အခါကမျှ ထုတ်ပြန်ခဲ့ခြင်း မရှိသော်လည်း တောင်ကိုရီးယား ထောက်လှမ်းရေး အရာရှိများကမူ ကင်မ်၏ သမီး၏အမည်မှာ ကင်မ်ဂျူအဲ (Kim Ju Ae) ဖြစ်ကြောင်း အမေရိကန် ဘတ်စ်ကက်ဘော ကစားသမား ဒန်းနစ် ရော့မန်း (Dennis Rodman)၏ ပြော ကြားချက်ကို ကိုးကားဖော်ပြခဲ့သည်။

ရော့မန်းသည် ၂၀၁၃ ခုနှစ်က ကင်မ်၏ မိသားစုနှင့်အတူ နေထိုင်ခဲ့ဖူးပြီး ထိုအချိန်က ကလေးအရွယ်သာ ရှိသေး သည့် ကင်မ်၏ သမီးကို ချီခဲ့ဖူးသည်ဟု ဆိုသည်။

မြောက်ကိုရီးယားခေါင်းဆောင် ကင်မ် စီးနင်းလိုက်ပါလာသည့် ရထားသည် ဘေဂျင်းမြို့တော်သို့ ရောက်ရှိချိန်တွင် ကင်မ်ဂျူအဲသည် ဖခင်ဖြစ်သူ၏ နောက်မှကပ်ပြီး ရထားပေါ်မှ ဆင်းလာသည်ကို မြင်တွေ့ရသည်။

ကင်မ်ဂျုံအန် တရုတ်နိုင်ငံကို ရောက်လာစဉ် သမီးဖြစ်သူကို နောက်မှာတွေ့ရစဉ်

“အခုချိန်အထိတော့ ဂျူအဲဟာ မြောက်ကိုရီးယား ခေါင်းဆောင်သစ်ဖြစ်ဖို့ ရေပန်းစားနေတဲ့သူပါ။ သူဟာ လက်တွေ့ကျတဲ့ လုပ်ငန်းစဉ်တွေကို အတွေ့အကြုံ ရယူနေတာကြောင့် မြောက်ကိုရီးယား ခေါင်းဆောင်သစ် ဖြစ်လာလိမ့်မယ် ထင်ကြေး ပေးခံထားရပါတယ်”ဟု အမေရိကန်အခြေစိုက် Stimson Center မှ မြောက်ကိုရီးယားအရေး ကျွမ်းကျင်သူ မိုက်ကယ် မက်ဒန် (Michael Madden) က ပြောကြားခဲ့သည်။

ယခု ခရီးစဉ်သည် ဂျူအဲအတွက် ဖခင်ဖြစ်သူ ကင်မ်နှင့် မြောက်ကိုရီးယား နိုင်ငံပြင်ပကို ပထမဆုံးအကြိမ် လိုက်ပါ လာခြင်းဖြစ်ပြီး ထိုအတွေ့အကြုံကို ဖခင်ဖြစ်သူ ကင်မ်နှင့် အဒေါ်ဖြစ်သူ ကင်မ်ယိုဂျုံ (Kim Yo Jong) တို့ တစ်ခါမှ မရခဲ့ဖူးကြောင်း မက်ဒန်က ပြောကြားခဲ့သည်။

ကင်မ်သည့ ဆယ်ကျော်သက် ဘဝက ၎င်း၏ ဖခင် ကင်မ်ဂျုံအီ (Kim Jong Il) နှင့် ပြည်ပခရီးစဉ် မလိုက်ခဲ့ရဖူးဘဲ ကင်မ်ယိုဂျုံသည်လည်း ဆယ်ကျော်သက်ဘဝက ပြည်ပခရီးစဉ်တွင် ပါဝင်ခဲ့ဖူးခြင်း မရှိပေ။

ကင်မ်၏ ဖခင်ဖြစ်သူ ကင်မ်ဂျုံအီသည် မြောက်ကိုရီးယားနိုင်ငံကို ထူထောင်ခဲ့သည့် ၎င်း၏ ဖခင် ကင်အီဆွန်း (Kim Il Sung) နှင့်အတူ ပြည်ပခရီးစဉ်များတွင် လိုက်ပါခွင့်ရခဲ့သည်။

Source: ရိုက်တာ

CNI International News

ဘန်ကောက်၊ ဩဂုတ် ၄

ထိုင်း၏ အာဏာရပါတီဖြစ်သည့် ဖြူးထိုင်းပါတီမှ ယာယီဝန်ကြီးချုပ် ဖွမ်သမ် ဝီချာယာချိုင်း (Phumtham Wechayachai) က ရွေးကောက်ပွဲ ကျင်းပရန်အတွက် လွှတ်တော်ကို ဖျက်သိမ်းရန် ဘုရင့်ထံမှ ခွင့်ပြုချက်ရရှိဖို့ အဆိုပြုထားကြောင်း Nikkei Asia မှ ဖော်ပြခဲ့သည်။

အောက်လွှတ်တော်ရှိ အတိုက်အခံ အင်အားစုမှ အစိုးရသစ်ဖွဲ့စည်းရန် အခြားပါတီတစ်ခုကို ထောက်ခံသွားမည်ဟု ပြောကြားခဲ့ပြီးနောက် စက်တင်ဘာ ၂ ရက်တွင် ဖွမ်သမ်က လွှတ်တော်ဖျက်သိမ်းရေးအတွက် ဘုရင့်ထံ အဆိုပြု တင်သွင်းခဲ့ခြင်း ဖြစ်သည်။

ပြီးခဲ့သည့် သီတင်းပတ်က အခြေခံဥပဒေဆိုင်ရာ တရားရုံးက ဖြူးထိုင်းပါတီ၏ ဝန်ကြီးချုပ် ပေတုန်တန် (Paetongtarn Shinawatra) ကို ကျင့်ဝတ်သိက္ခာ ချိုးဖောက်မှုဖြင့် ဝန်ကြီးချုပ်ရာထူးမှ ဖယ်ရှားခဲ့ပြီးနောက် ဖြူထိုင်းပါတီသည် ရွေးကောက်ပွဲ အသစ်တစ်ခု ပြုလုပ်ရန် ပြင်ဆင်နေခြင်းဖြစ်သည်။

ဘူဂျထိုင်းပါတီ၏ ခေါင်းဆောင် အနူတင် ချန်ဗီယာကူလ်ကို တွေ့ရစဉ်

ပြီးခဲ့သည် ရက်ပိုင်းက အောက်လွှတ်တော်၏ နေရာ ၃ ပုံ ၁ ပုံကို ထိန်းချုပ်ထားသည့် အတိုက်အခံ ပြည်သူ့ပါတီ ကမူ လွှတ်တော်ကို မဖျက်သိမ်းဘဲ နောက်ထပ် အစိုးရသစ်ဖွဲ့စည်းရန်နှင့် ထိုအစိုးရအဖွဲ့သစ်ကို ဘူဂျထိုင်းပါတီ၏ ခေါင်းဆောင် အနူတင် ချန်ဗီယာကူလ် (Anutin Charnvirakul) အား ဝန်ကြီးချုပ်အဖြစ် အဆိုပြုရန် ထောက်ခံ ကြောင်း ကြေညာခဲ့သည်။

ထို့ကြောင့် လွှတ်တော်ကို ဖျက်သိမ်းပြီး ရွေးကောက်ပွဲ ပြုလုပ်ရန် ကြိုးပမ်းနေသည့် ဖြူးထိုင်းပါတီနှင့် လွှတ်တော် ကို မဖျက်သိမ်းဘဲ ဝန်ကြီးချုပ်သစ် ရွေးချယ်ကာ အစိုးရသစ်ဖွဲ့ရန် ကြိုးပမ်းနေသော အတိုက်အခံအင်အားစုများ ကြား ပွတ်တိုက်မှုများ ဖြစ်ပွားနေသည်။

ပေတုန်တန် ထုတ်ပယ်ခံရပြီးနောက် ၎င်း၏ ဖြူးထိုင်းပါတီသည် ညွန့်ပေါင်းအစိုးရအဖွဲ့သစ်ဖွဲ့ရန် ခက်ခဲလာခဲ့ သဖြင့် လွှတ်တော်ကို ဖျက်သိမ်းပြီး ရွေးကောက်ပွဲအသစ် ပြုလုပ်ရန် စီစဉ်ခဲ့ခြင်းဖြစ်သည်။

ပေတုန်တန်ကို တွေ့ရစဉ်

ပေတုန်တန် ရှင်နာဝပ်သည် ရှင်နာဝပ် မိသားစု၏ ထောက်ခံမှုကို ရရှိခဲ့ပြီး ရာထူးမှ ဖယ်ရှားခံရသည့် ဆဋ္ဌမမြောက် ဝန်ကြီးချုပ် ဖြစ်လာခဲ့မှုနှင့်အတူ ထိုင်းနိုင်ငံ၏ ပြိုင်ဘက် အီလစ်များကြား နှစ်ပေါင်း ၂၀ ကြာ အာဏာလွန်ဆွဲမှု အခြေအနေကို ပေါ်လွင်စေခဲ့သည်။

ရာထူးမှ ဖယ်ရှားခံခဲ့ရသည့် ရှင်နာဝပ် မိသားစုဝင်များနှင့် ရှင်နာဝပ် မိသားစုက ထောက်ခံခဲ့သည့် ဝန်ကြီးချုပ် ၆ ဦး ရှိခဲ့သည်။

ထိုကဲ့သို့ ဝန်ကြီးချုပ်ရာထူးမှ ဖြုတ်ချ သို့မဟုတ် ဖယ်ရှားခံရသူများမှာ သက်ဆင် ရှင်နာဝပ် (Thaksin Shinawatra)၊ ဆမ်မက် ဆန်ဒါရာဗီဂျ် (Samak Sundaravej)၊ ဆွမ်ချိုင်း ဝေါင်ဆာဝတ် (Somchai Wongsawat)၊ ယင်းလပ် ရှင်နာဝပ် (Yingluck Shinawatra)၊ ဆရီသာ သာဗီဆင် (Srettha Thavisin) နှင့် ယခု ပေတုန်တန်တို့ ဖြစ်သည်။

လက်ရှိတွင် ယာယီအစိုးရအဖွဲ့က လွှတ်တော်ကို ဖျက်သိမ်းပိုင်ခွင့် ရှိ၊မရှိ အငြင်းအခုံများ ဖြစ်ပွားနေသော်လည်း ထိုင်း၏ အခြေခံဥပဒေအရ ဘုရင်က လွှတ်တော်ဖျက်သိမ်းရေး အဆိုပြုချက်ကို အတည်ပြုခဲ့မည်ဆိုပါက ရွေးကောက်ပွဲကို ၄၅ ရက်မှ ရက်ပေါင်း ၆၀ ကြား ပြုလုပ်ရမည်ဖြစ်သည်။

Source: Nikkei Asia