CNI International News

ဘန်ကောက်၊ ဩဂုတ် ၂

ထိုင်းစစ်တပ်သည် နယ်စပ်ဒေသတွင် ဖမ်းဆီးရမိခဲ့သည့် ကမ္ဘောဒီးယားစစ်သား အယောက် ၂၀ ထဲမှ ၂ ယောက်ကို ကမ္ဘောဒီးယားသို့ ပြန်လည်လွှဲပြောင်း အပ်နှံခဲ့သည်ဟု ရိုက်တာမှ ဖော်ပြခဲ့သည်။

ထိုင်းနှင့်ကမ္ဘောဒီးယား နယ်စပ်တစ်လျှောက် အပစ်အခတ်ရပ်စဲရေးကို ထိန်းသိမ်းရန်အတွက် လာမည့် သီတင်းပတ်တွင် မလေးရှားနိုင်ငံ၌ ကာကွယ်ရေးဝန်ကြီးများနှင့် စစ်ဘက်တပ်မှူးများ၏ အစည်းအဝေး မတိုင်မီ ထိုကဲ့သို့ လွှဲပြောင်းအပ်နှံခဲ့ခြင်းဖြစ်သည်။

ကမ္ဘောဒီးယားစစ်သား ၂ ဦးကို ကမ္ဘောဒီးယားသို့ ပြန်လည်လွှဲပြောင်း အပ်နှံခဲ့ပြီး ကျန်စစ်သား ၁၈ ဦးအား လူဝင်မှု ကြီးကြပ်ရေးဥပဒေ ချိုးဖောက်မှုဖြင့် လုပ်ထုံးလုပ်နည်းနှင့်အညီ စီမံဆောင်ရွက်နေကြောင်း ထိုင်းအစိုးရ ပြောရေး ဆိုခွင့်ရှိသူ ဂျီရာယူ ဟောင်ဆပ် (Jirayu Houngsub) က ပြောကြားခဲ့သည်။
 
“ကမ္ဘောဒီးယား စစ်သားတွေက ထိုင်းနယ်နိမိတ်ထဲ ကျူးကျော်ဝင်ရောက် လာတာကြောင့် စစ်တပ်က သူတို့ကို ဖမ်းပြီး ထိန်းသိမ်းခဲ့တာပါ။ သူတို့တွေကိုလည်း လူသားချင်းစာနာထောက်ထားမှုဆိုင်ရာ စည်းကမ်းတွေနဲ့ ဆက်ဆံ ပေးခဲ့ပါတယ်” ဟု ၎င်းက ဆိုသည်။

ထိုင်းက ကမ္ဘောဒီးယားကို စစ်သား ၂ ဦး လွှဲပေးနေစဉ်

ကမ္ဘောဒီးယား ကာကွယ်ရေးဝန်ကြီးဌာနကမူ ထိုင်းတွင် ဖမ်းဆီးခံထားရသည့် ကမ္ဘောဒီးယားစစ်သားများ အားလုံး ကို ပြန်လွှတ်ပေးရန် တောင်းဆိုထားသည်။

ပြီးခဲ့သည့် သီတင်းပတ်က ထိုင်းနှင့်ကမ္ဘောဒီးယားကြား အမြောက်များဖြင့် ပစ်ခတ်တိုက်ခိုက်မှု၊ တိုက်လေယာဉ် များဖြင့် လေကြောင်းတိုက်ခိုက်မှုများ အပါအဝင် တိုက်ခိုက်မှုများ ၅ ရက်ကြာ ဖြစ်ပွားခဲ့ပြီးနောက် ဇူလိုင် ၂၈ ရက် တွင် အပစ်အခတ်ရပ်စဲရေး သဘောတူညီမှု ရရှိခဲ့ခြင်းဖြစ်သည်။

ထိုတိုက်ခိုက်မှုများကြောင့် နှစ်နိုင်ငံစလုံးတွင် လူ ၄၃ ဦးထက်မနည်း သေဆုံးခဲ့ပြီး လူပေါင်း ၃၀၀,၀၀၀ ခန့် ဘေးလွတ်ရာ ထွက်ပြေးတိမ်းရှောင်ခဲ့ရသည်။

အမေရိကန်သမ္မတ ဒေါ်နယ်ထရမ့် (Donald Trump) က ထိုင်းနှင့် ကမ္ဘောဒီးယားကို အပစ်အခတ်ရပ်စဲရေး သဘောတူညီမှု မယူပါက နှစ်နိုင်ငံစလုံးအပေါ် ကုန်သွယ်ခွန် တိုးမြှင့်မှုနှင့်ပတ်သက်သည့် ဆွေးနွေးပွဲများကို ပယ်ဖျက်မည်ဖြစ်ကြောင်း ခြိမ်းခြောက်ခဲ့ပြီးနောက် အပစ်အခတ်ရပ်စဲရေး သဘောတူခဲ့ခြင်းဖြစ်သည်။

ထိုင်းနှင့်ကမ္ဘောဒီးယားကို ကုန်သွယ်ခွန် ၃၆ ရာခိုင်နှုန်း တိုးမြှင့်ကောက်ခံမည်ဟု ထရမ့်က အစောပိုင်းတွင် ကြေညာခဲ့သော်လည်း ဆွေးနွေးညှိနှိုင်းမှုများ ပြုလုပ်ပြီးနောက် ၁၉ ရာခိုင်နှုန်းစီသာ တိုးမြှင့်မည်ဖြစ်ကြောင်း အိမ်ဖြူတော်က ကြေညာခဲ့သည်။

Source: ရိုက်တာ

CNI International News

ကိယက်ဗ်၊ သြဂုတ် ၁

ယူကရိန်းတွင် ရုရှား၏ တိုက်ခိုက်မှုများ ဆက်လက်ဖြစ်ပွားနေပြီး အစိုးရအနေဖြင့် ပြည်ပနိုင်ငံများ၏ ပြုပြင် ပြောင်းလဲရေး တောင်းဆိုမှုများကို အကောင်အထည် ဖော်နိုင်ခဲ့ခြင်းမရှိပါက လာမည့်နှစ်၌ ဘတ်ဂျက်ကွာဟမှု မြင့်တက်လာမည့် အခြေအနေနှင့် ရင်ဆိုင်ရနိုင်ခြေရှိသည်ဟု ကျွမ်းကျင်သူများက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ယူကရိန်း၏ အခွန်မှရသည့် ဝင်ငွေအများစုကို စစ်တပ်အတွက် အသုံးပြုနေရပြီး လူမှုရေးနှင့် လူသားချင်း စာနာ ထောက်ထားမှုဆိုင်ရာ လိုအပ်ချက်များကို ဖြည့်ဆည်းပေးနိုင်ရန်အတွက် ပြည်ပနိုင်ငံများ၏ အထောက်အပံ့များ အပေါ် မှီခိုနေရသည်။

ရုရှား၏ ကျူးကျော်တိုက်ခိုက်မှု စတင်ခဲ့သည့် ၂၀၂၂ ခုနှစ်၊ ဖေဖော်ဝါရီလ ကတည်းက ယူကရိန်းသည် ပြည်ပနိုင်ငံ များမှ ဒေါ်လာ ၁၃၉ ဘီလျံတန်ဖိုးရှိ အကူအညီ အထောက်အပံ့များကို လက်ခံရရှိခဲ့သည်ဟု အစိုးရ၏ မှတ်တမ်း များတွင် ဖော်ပြထားသည်။

၂၀၂၆ ခုနှစ်တွင် ယူကရိန်း၏ ဘတ်ဂျက် လိုအပ်ချက်ဖြစ်သည့် ဒေါ်လာ ၆၅ ဘီလျံအနက် ၃ ပုံ ၁ ပုံကိုသာ ရရှိခဲ့ပြီး ၂၀၂၇ ခုနှစ်တွင် ဘတ်ဂျက်လိုအပ်မှု ကွာဟချက် ပိုမိုမြင့်တက်လာနိုင်ခြေရှိကြောင်း ယူကရိန်း ဗဟိုဘဏ် အုပ်ချုပ်ရေးမှူး အန်ဒရီ ပိုင်ရှနီယီ ( Andriy Pyshnyi ) က ပြောကြားခဲ့သည်။

ယူကရိန်းစစ်ပွဲအတွင်း အပျက်အစီးကိုတွေ့ရစဉ်

ကိယက်ဗ် (Kyiv) မြို့တော်၏ စီးပွားရေး လေ့လာမှုစင်တာ၏ စစ်တမ်းတွင် ယူကရိန်းသည် ၂၀၂၆ ခုနှစ်၌ ပြည်တွင်းဘတ်ဂျက် ဒေါ်လာ ၃၉ ဘီလျံနှင့် ပြည်ပအကူအညီ ဒေါ်လာ ၅၈ ဘီလျံ လိုအပ်လိမ့်မည်ဟု ဖော်ပြထားသည်။

ထိုစစ်တမ်းအရ ယူကရိန်းသည် လက်ရှိတွင် ဒေါ်လာ ၁၀ ဘီလျံမှ ၁၅ ဘီလျံကြား အရေးပေါ် လိုအပ်နေသည်ကို ပြသရာရောက်ခဲ့သည်။

မည်သို့ပင်ဆိုစေ ဘတ်ဂျက်ကွာဟမှုကို ဖြေရှင်းရန် ဆွေးနွေးမှုများတွင် အခက်အခဲများနှင့် ရင်ဆိုင်နေရသလို ယူကရိန်း အစိုးရသည် ငွေကြေး ထုတ်ချေးပေးသည့် ပြည်ပနိုင်ငံများ၏ ပြုပြင်ပြောင်းလဲရေး တောင်းဆိုချက် အချို့ကို အကောင်အထည် ဖော်နိုင်ခဲ့ခြင်း မရှိပေ။

ယူကရိန်းအစိုးရသည် ပြည်ပနိုင်ငံများ၏ တောင်းဆိုထားသည့်အတိုင်း တရားသူကြီးများနှင့် အခြားထိပ်သီး အရာရှိများ အစားထိုး ခန့်အပ်နိုင်ခဲ့ခြင်း မရှိပေ။

ထို့ပြင် ယူကရိန်းသမ္မတ ဇာလန်းစကီးသည် (Volodymyr Zelenskiy) မကြာသေးမီက အဂတိလိုက်စားမှု တိုက်ဖျက်ရေး အေဂျင်စီ ၂ ခုကို သမ္မတ၏ ထိန်းချုပ်မှုအောက်တွင် ထားရှိခဲ့သဖြင့် ယူကရိန်းကို အကူအညီ ပေးနေသည့် အနောက်နိုင်ငံများက ဇာလန်းစကီးကို ဝေဖန်ခဲ့ကြသည်။

Source: ရိုက်တာ

CNI International News

ကွာလာလမ်ပူ၊ သြဂုတ် ၁

မလေးရှားနိုင်ငံတွင် အောက်တိုဘာလအတွင်း ပြုလုပ်မည့် အာဆီယံအစည်းအဝေးကို အမေရိကန်သမ္မတ ဒေါ်နယ်ထရမ့် (Donald Trump) တက်ရောက်လိမ့်မည်ဟု မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim) က ပြောကြားခဲ့သည်ဟု South China Morning Post မှ ဖော်ပြခဲ့သည်။

ထို့ကြောင့် ထိုအာဆီယံ အစည်းအဝေးသည် ထရမ့် ဒုတိယသက်တမ်း အာဏာရလာပြီးနောက်ပိုင်း ၎င်း၏ ပထမဆုံး အာဆီယံအစည်းအဝေး တက်ရောက်သည့် ခရီးစဉ်ဖြစ်လာမည်ဖြစ်သည်။

ထရမ့်ကလည်း ဇူလိုင် ၂၈ ရက် နံနက်ပိုင်းက အန်ဝါနှင့် ဖုန်းဆက်သွယ် ပြောဆိုခဲ့ချိန်တွင် အာဆီယံ အစည်းအဝေး ကို တက်မည့်အကြောင်း အတည်ပြုခဲ့သည်ဟု ဆိုသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ထိုဖုန်းပြောဆိုမှုအတွင်း ထရမ့်က ကမ္ဘောဒီးယားနှင့် ထိုင်းကြား နယ်စပ်ဒေသ ပြဿနာနှင့်ပတ်သက်ပြီး အပစ်အခတ်ရပ်စဲရာတွင် မလေးရှား၏ ကြားဝင်စေ့စပ်ပေးမှုကို ဂုဏ်ပြုခဲ့သည်ဟုလည်း အန်ဝါက ပြောကြားခဲ့သည်။

ထရမ့်နှင့် အန်ဝါတို့သည် အမေရိကန်၏ ကုန်သွယ်ခွန် ကောက်ခံသည့် ကိစ္စ အပြင် ကုန်သွယ်ရေး လွတ်လပ်ခွင့်တို့ နှင့်ပတ်သက်ပြီးလည်း ဆွေးနွေးခဲ့ကြသည်ဟု အန်ဝါက ပြောသည်။

“ကျနော်တို့ ဆွေးနွေးမှုတွေ ပြုလုပ်ပြီးတဲ့ အချိန်မှာတော့ သူ (ထရမ့်) က မလေးရှားနိုင်ငံအပေါ် ကုန်သွယ်ခွန် ကောက်ခံမှုနဲ့ ပတ်သက်တဲ့ ကြေညာချက်ကို သြဂုတ် ၁ ရက်နေ့မှာ ထုတ်ပြန်သွားမယ်လို့ ပြောပါတယ်။ အဲဒီ ကုန်သွယ်ခွန် ကြေညာချက်ဟာ မလေးရှားနိုင်ငံရဲ့ စီးပွားရေးအပေါ် ဝန်ထုပ်ဝန်ပိုး ဖြစ်စေမှာ မဟုတ်ဘူးလို့လည်း သူက ကတိပေးခဲ့ပါတယ်” ဟု အန်ဝါက လွှတ်တော်တွင် ပြောကြားခဲ့သည်။

တစ်ချိန်က G-20 ခေါင်းဆောင်များကို တွေ့ရစဉ်

အောက်တိုဘာ ၂၆ ရက်မှ ၂၈ ရက်အထိ ပြုလုပ်မည့် အစည်းအဝေးသည် အာဆီယံအဖွဲ့၏ အကြီးဆုံး အစည်းအဝေးများထဲတွင် တစ်ခု အပါအဝင် ဖြစ်လာလိမ့်မည်ဟု ယူဆခံထားရသည်။

အမေရိကန်အပြင် တရုတ်၊ ဂျပန်၊ တောင်ကိုရီးယားနှင့် အန္ဒိယနိုင်ငံများမှ ထိပ်သီးအရာရှိများနှင့် အာဆီယံအဖွဲ့ဝင် နိုင်ငံ့ခေါင်းဆောင်များလည်း တက်ရောက်ဖွယ်ရှိသည်။

ဇူလိုင်လ အစောပိုင်းက အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) ၏ မလေးရှား ခရီးစဉ်အတွင်း ထရမ့်သည် အာဆီယံအစည်းအဝေးကို တက်ရောက်ဖွယ်ရှိကြောင်း အရိပ်အမြွက် ပြောကြား ခဲ့သည်။

ထရမ့်သည် တောင်အာဖရိကတွင် ပြုလုပ်မည့် စက်မှုထိပ်သီးနိုင်ငံ ၂၀ (G-20) အစည်းအဝေးကို တက်ရောက်မည် မဟုတ်ကြောင်း ဇူလိုင် ၂၉ ရက်က ပြောကြားခဲ့ပြီးနောက် အာဆီယံအစည်းအဝေးကို တက်မည်ဟု အတည်ပြုခဲ့ ခြင်းဖြစ်သည်။

Source: South China Morning Post

CNI International News

ဆစ်ဒနီ၊ ဩဂုတ် ၁

ဩစတြေးလျလွှတ်တော်က ကျောင်းသားချေးငွေများအနက် ကြွေးမြီ ၂၀ ရာခိုင်နှုန်း လျှော့ချသည့် ဥပဒေသစ်ကို ဇူလိုင် ၃၁ ရက်က အတည်ပြုခဲ့သည်ဟု ရိုက်တာမှ ဖော်ပြခဲ့သည်။

ထိုဥပဒေသည် လူပေါင်း ၃ သန်း၏ ကြွေးမြီ ဒေါ်လာ ၁၀ ဒသမ ၃၁ ဘီလျံကို ဖယ်ရှားနိုင်လိမ့်မည် ဖြစ်သည်။

အဆိုပါ ဥပဒေသည် မေလက ပြန်လည်ရွေးကောက်ခံခဲ့ရသည့် ဩစတြေးလျဝန်ကြီးချုပ် အန်သိုနီ (Anthony Albanese) ဦးဆောင်သော လေဘာပါတီ၏ မဲဆွယ် ကတိဝတ်တစ်ခု ဖြစ်သည်။

“ကျနော်တို့ အရင်ဆုံး ကျောင်းသားတွေတင်နေတဲ့ အကြွေးတွေကို လျှော့ချပစ်ဖို့ ကတိပေးခဲ့ပါတယ်။ အဲဒီ ကတိအတိုင်း အကောင်အထည် ဖော်လိုက်တာ ဖြစ်ပါတယ်။ ပညာရေးကြောင့် ကြွေးမြီတွေ အများကြီး တင်နေ တာမျိုး မဖြစ်သင့်ပါဘူး”ဟု အန်သိုနီက ပြောကြားခဲ့သည်။

ဩစတြေးလျဝန်ကြီးချုပ် အန်သိုနီကို တွေ့ရစဉ်

ထိုဥပဒေသစ်သည် လူငယ်များအပေါ် ကျရောက်နေသည့် ဖိအားများကို လျော့ပါးစေလိမ့်မည်ဖြစ်ကြောင်း ပညာရေးဝန်ကြီး ဂျေဆန် ကလဲရ် (Jason Clare) က ပြောကြားခဲ့သည်။

လူငယ်အများစုသည် ထိုဥပဒေ ထုတ်ပြန်မည်ဆိုသည့် ကတိကြောင့် လေဘာပါတီကို မဲပေးခဲ့ကြခြင်းဖြစ်ပြီး လက်ရှိတွင် မိမိတို့၏ ကတိစကားကို တည်အောင် လုပ်ဆောင်ခဲ့ကြောင်း ၎င်းက ဆိုသည်။

မေလက ပြုလုပ်ခဲ့သည့် ရွေးကောက်ပွဲတွင် ပါဝင်မဲပေးခဲ့သူ ၁၈ သန်းအနက် ၄၃ ရာခိုင်နှုန်းမှာ ၁၉၈၁ ခုနှစ်မှ ၁၉၉၆ ခုနှစ်ကြား မွေးသည့် Generation Y များနှင့် ၁၉၉၇ ခုနှစ်မှ ၂၀၁၂ ခုနှစ်ကြား မွေးသည့် Generation Z မျိုးဆက် လူငယ်များဖြစ်သည်။

လေဘာပါတီသည် မျိုးဆက်သစ် လူငယ်များ၏ အရွေ့ကို အာရုံစိုက်ပြီး ပါတီ၏ မူဝါဒများအား ထိန်းညှိကာ ချဉ်းကပ် လုပ်ဆောင်လျက်ရှိသည်။

ကျောင်းသားများ၏ ကြွေးမြီများကို လျှော့ချခြင်းသည် မတူညီသည့် မျိုးဆက်များကြား မမျှတမှုကို လျှော့ချရန်နှင့် ကျောင်းသားများ၏ စားဝတ်နေရေး ကုန်ကျစရိတ် မြင့်တက်နေခြင်းအား လျှော့ချရာတွင် အထောက်အကူပေးရာ ရောက်ကြောင်း လေဘာပါတီက ပြောကြားခဲ့သည်။

ကြွေးမြီ ၂၀ ရာခိုင်နှုန်း လျှော့ချပေးခြင်းသည် ကျောင်းသားများအတွက် စုစုပေါင်း ဒေါ်လာ ၁၀ ဒသမ ၃၁ ဘီလျံကို သက်သာစေလိမ့်မည်ဟု အစိုးရအဖွဲ့က ရှင်းပြခဲ့သည်။

ဥပမာအားဖြင့် ကျောင်းသားချေးငွေအဖြစ် အကြွေး ၁၇,၀၀၀ ကျော် ပြန်လည်ပေးဆပ်ရမည့် ကျောင်းသား တစ်ဦးသည် ကြွေးမြီ ၂၀ ရာခိုင်နှုန်း လျော့ချသည့် ဥပဒေကြောင့် ဒေါ်လာ ၃၅၀၀ ကျော် ကင်းလွတ်ခွင့်ရသွားပြီး ဒေါ်လာ ၁၃,၅၀၀ သာ ပြန်လည်ပေးဆပ်ရတော့မည်ဖြစ်သည်။

Source: ရိုက်တာ

CNI International News

တိုရွန်တို၊ ဩဂုတ် ၁

ကနေဒါနိုင်ငံသည် စက်တင်ဘာလတွင် ပါလက်စတိုင်းကို နိုင်ငံအဖြစ် အသိအမှတ်ပြုမည်ဟု ကနေဒါဝန်ကြီးချုပ် မာ့ခ် ကာနေး (Mark Carney)က ဇူလိုင် ၃၀ ရက်တွင် ကြေညာခဲ့ကြောင်း အေပီမှ ဖော်ပြခဲ့သည်။

ထိုကြေညာချက်သည် ဂါဇာအပေါ်ထားရှိသည့် အစ္စရေး၏ မူဝါဒများကို ဆန့်ကျင်သော ကမ္ဘာလုံးဆိုင်ရာ အပြောင်းအလဲ တစ်ခု၏ အစိတ်အပိုင်း ဖြစ်လာခဲ့သည်။

ကာနေးသည် အစိုးရအဖွဲ့ အစည်းအဝေး ခေါ်ယူခဲ့ပြီးနောက် ပါလက်စတိုင်း နယ်နိမိတ်နှင့်ပတ်သက်ပြီး ဆွေးနွေး ခဲ့ခြင်းဖြစ်သည်။

သူသည် ပါလက်စတိုင်းကို နိုင်ငံအဖြစ် အသိအမှတ်ပြုမည်ဟု ဇူလိုင် ၂၉ ရက်က ကြေညာခဲ့သည့် ဗြိတိန် ဝန်ကြီးချုပ် ကီယာ စတာမာ (Keir Starmer) နှင့် တွေ့ဆုံခဲ့ပြီးနောက် အစိုးရအဖွဲ့ အစည်းအဝေး ခေါ်ယူကာ ထိုကဲ့သို့ ကြေညာခဲ့ခြင်းဖြစ်သည်။

ဂါဇာကမ်းမြောင်ဒေသတွင် လူသားချင်း စာနာထောက်ထားမှုဆိုင်ရာ ကပ်ဘေးသည် လက်မခံနိုင်တော့သည့် အခြေအနေသို့ ရောက်ရှိလာကြောင်း ကမ္ဘာ့ခေါင်းဆောင်များက အလေးထား ပြောဆိုလာကြသည်။

“ကနေဒါနိုင်ငံဟာ စက်တင်ဘာလမှာ ပြုလုပ်မယ့် အကြိမ် ၈၀ မြောက် ကုလသမဂ္ဂ အထွေထွေညီလာခံမှာ ပါလက်စတိုင်းကို နိုင်ငံအဖြစ် အသိအမှတ်ပြုဖို့ ရည်ရွယ်ထားပါတယ်” ဟု ကာနေးက ပြောကြားခဲ့သည်။

 အစ္စရေးဝန်ကြီးချုပ် နေတန်ယာဟုကို တွေ့ရစဉ်

ပြီးခဲ့သည့် သီတင်းပတ်ကလည်း ပြင်သစ်သမ္မတ မက်ခရွန် (Emmanuel Macron)က စက်တင်ဘာလတွင် ပြုလုပ်မည့် ကုလသမဂ္ဂအထွေထွေ ညီလာခံ၌ ပါလက်စတိုင်းကို နိုင်ငံအဖြစ် အသိအမှတ်ပြုမည်ဟု ကြေညာခဲ့ သည်။

အစ္စရေးဝန်ကြီးချုပ် နေတန်ယာဟု (Benjamin Netanyahu) ၏ အစိုးရအဖွဲ့ကမူ အမျိုးသားရေးနှင့် လုံခြုံရေး အခြေအနေများကြောင့် အစ္စရေးနှင့် ပါလက်စတိုင်း နှစ်နိုင်ငံ အတူယှဉ်တွဲ နေထိုင်ရေး မူဝါဒကို ငြင်းပယ်ထား သည်။

လက်ရှိတွင် ဥရောပနိုင်ငံ အချို့ အပါအဝင် နိုင်ငံပေါင်း ၁၄၀ ကျော်က ပါလက်စတိုင်းကို နိုင်ငံအဖြစ် အသိအမှတ် ပြုထားသည်။

Source: အေပီ

CNI International News

ဝါရှင်တန်၊ ဇူလိုင် ၃၁

အမေရိကန်အောက်လွှတ်တော်သည် တရားရေးဝန်ကြီးဌာန (DOJ) ၏ China Initiative အမည်ရှိ အစီအစဉ်ကို ပြန်လည်အသက်သွင်းရန် အဆိုပြုခဲ့ကြောင်း Asia  Times မှဖော်ပြခဲ့သည်။

ထိုအစီအစဉ်သည် တရုတ်နှင့်ဆက်နွှယ်သည့် စီးပွားရေးဆိုင်ရာ သူလျှိုလုပ်ခြင်း၊ အသိဉာဏ်ပစ္စည်း ခိုးယူမှုတို့ကို ဟန့်တားရန် ရည်ရွယ်ထားသော အစီအစဉ်ဖြစ်သည်။

၂၀၂၆ ခုနှစ် ဘဏ္ဍာနှစ် ကုန်သွယ်ရေး၊ တရားရေး၊ သိပ္ပံနှင့် ဆက်စပ်အေဂျင်စီများ (CJS) အသုံးစရိတ် လျာထားငွေ ဥပဒေမူကြမ်းဟု အမည်တပ်ထားသည့် ထိုအဆိုပြုချက်သည် အမေရိကန်တွင် သုတေသန၊ ပညာရေးနှင့် စက်မှု လုပ်ငန်းများ၌ တရုတ်၏ သံသယဖြစ်ဖွယ် လွှမ်းမိုးမှုကို တန်ပြန်ရန် ရွယ်ခြင်းဖြစ်သည်ဟု ဆိုသည်။

ထိုဥပဒေမူကြမ်း၏ အကျဉ်းချုပ် ဖော်ပြချက်အရ အမေရိကန်၏ ယှဉ်ပြိုင်မှု တစ်ပန်းသာသည့် အခြေအနေကို ထိန်းသိမ်းရန်နှင့် တရုတ်ကို တန်ပြန်ရန် China Initiative အစီအစဉ်ကို ပြန်လည် အသက်သွင်းလိမ့်မည်ဟု ဖော်ပြထားသည်။

ဇူလိုင် ၂၃ ရက်က တရုတ်၏ ပညာသင်ဆုရ ကျောင်းသားများ၊ ပညာရှင်များနှင့် ဆက်စပ် အဖွဲ့အစည်းများက လွှတ်တော်ကို စာတစ်စောင်ပေးပို့ခဲ့ပြီး ထိုအစီအစဉ်ကို ပြန်လည် အသက်သွင်းမည့် လှုပ်ရှားချက်ကို ရှုတ်ချခဲ့ သည်။

တရုတ်သူလျှိုလုပ်မှုကို ပြသထားစဉ် 

ထိုအစီအစဉ်ကြောင့် အမေရိကန်ရှိ အာရှကျောင်းသားများနှင့် သိပ္ပံပညာရှင်များသည် လူမျိုးရေး ခွဲခြားခံခဲ့ရ သည်ဟု ၎င်းတို့က ပြောကြားခဲ့သည်။

“China Initiative အစီအစဉ်က အာရှနွယ်ဖွား အမေရိကန်ကျောင်းသားတွေနဲ့ သိပ္ပံပညာရှင်တွေကို ဖိနှိပ်ခံရမယ့် အရေးကို စိုးရိမ်စေခဲ့ပါတယ်။ ဖက်ဒရယ် ထောက်ပံ့ကြေး လျှောက်တာတွေ၊ သုတေသနပြုလုပ်တာတွေ၊ မိသားစုနဲ့ အတူ ခရီးသွားတာတွေလိုမျိုး သာမန် လှုပ်ရှားမှုတွေကိုတောင် လုပ်ခွင့်တားမြစ်ခံခဲ့ရပါတယ်” ဟု တရုတ် ကျောင်းသားများ၏ ပေးစာတွင် ဖော်ပြခဲ့သည်။

ထိုပေးစာကို အာရှနွယ်ဖွား အမေရိကန်ကျောင်းသားများ ဖိုရမ်၏ ဝက်ဘ်ဆိုက်တွင် တင်ပြထားသည်။

အမေရိကန်အခြေစိုက် တရုတ်သုတေသနပညာရှင်များ ပါဝင်သည့် သူလျှိုမှုများ၊ ခိုးယူမှုများကို တရားစီရင်နိုင်ရန် China Initiative အစီအစဉ်ကို ၂၀၁၈ ခုနှစ်က တရားရေးဝန်ကြီးဌာနက ပထမဆုံး စတင် အကောင်အထည် ဖော်ခဲ့ခြင်းဖြစ်ပြီး ၂၀၂၂ ခုနှစ်တွင် ထိုအစီအစဉ်ကို ဖျက်သိမ်းခဲ့သည်။

Source: Asia Times

CNI International News

ဘန်ကောက်၊ ဇူလိုင် ၃၁

မကြာသေးမီက ထိုင်းနှင့်ကမ္ဘောဒီးယား နယ်စပ်တွင် ဖြစ်ပွားခဲ့သည့် တိုက်ခိုက်မှုများအတွင်း ကမ္ဘောဒီးယား၏ လက်ရွေးစင် သက်တော်စောင့်ဌာနချုပ် (BHQ)မှ စစ်သားများသည် ထိုင်းတပ်ဖွဲ့များကို အရေးနိမ့်ခဲ့ကြောင်း The Nation မှ ဖော်ပြခဲ့သည်။

ဇူလိုင် ၂၈ ရက် ညသန်းခေါင်မတိုင်ခင် ကမ္ဘောဒီးယားဝန်ကြီးချုပ်ဟောင်း ဟွန်ဆန် (Hun Sen) က  BHQ တပ်ဖွဲ့ ဝင်များကို ထိုင်းစစ်သားများနှင့်တိုက်ခိုက်ရန် အမိန့်ပေးခဲ့သည်ဟု ဆိုသည်။

ထိုလက်ရွေးစင် စစ်သားများသည် လော့ဘူရီ (Lopburi) ပြည်နယ်တွင် အထိုင်ချထားသည့် ထိုင်း၏ အမှတ် ၃၁ ခြေလျင်တပ်ရင်း၊ ဘုရင့်အစောင့်တပ်ဖွဲ့တို့နှင့် ရင်ဆိုင်တွေ့ခဲ့သည်။

လေ့ကျင့်မှုများ အပြည့်အဝရှိခဲ့သည့် ထိုင်းစစ်သားများက လျှင်မြန်စွာ နေရာယူ၍ ကျူးကျော်ဝင်ရောက်လာသော ကမ္ဘောဒီးယား လက်ရွေးစင် စစ်သားများကို တွန်းလှန်တိုက်ခိုက်ခဲ့ပြီး တာကဝိုင် (Ta Kwai) ဒေသကို ထိန်းချုပ် နိုင်ခဲ့သည်။

၂၀၁၁ ခုနှစ်ကလည်း ကမ္ဘောဒီးယား လက်ရွေးစင် စစ်သားများသည် ကမ္ဘောဒီးယား၏ အမှတ် ၇၀ ခြေလျင် တပ်မဟာနှင့်အတူ Preah Vihear ပြည်နယ်သို့ ဖြန့်ကြက်ချခဲ့ဖူးသည်။

ကမ္ဘောဒီးယားဝန်ကြီးချုပ်ဟောင်း ဟွန်ဆန်ကို တွေ့ရစဉ်

သို့သော် ၎င်းတို့ ဝင်ရောက်လာမှုကို ထိုင်းနိုင်ငံ၏ ၁၅၅ မမ အမြောက်များ၏ သာလွန်ပစ်အားဖြင့် ဟန့်တားနိုင် ခဲ့ဖူးသည်ဟု The National က ‌ဖော်ပြခဲ့သည်။

နောက်ဆုံး ထိတွေ့တိုက်ပွဲများသည် မေလ ၂၈ ရက်နောက်ပိုင်း ဖြစ်ပွားခဲ့ခြင်းဖြစ်ပြီး ကမ္ဘောဒီးယားဝန်ကြီးချုပ် ဟွန်မာနက် (Hun Manet) က Preah Vihear နှင့် Oddar Meanchey ပြည်နယ်များသို့ စစ်သား ၁၀,၀၀၀ ကျော် စေလွှတ်ခဲ့သည်။

BHQ ၏ တပ်မှူး ဗိုလ်ချုပ်ကြီး Hing Bun Hieng သည် ၎င်း၏ တပ်ဖွဲ့ဝင်အနည်းငယ်ကို Preah Vihear ပြည်နယ်ကို စေလွတ်ခဲ့ပြီး ကမ္ဘောဒီးယား၏ Kandal ပြည်နယ် Ta Khmau မြို့သို့ BHQ စစ်သားအများစုကို စေလွှတ်ခဲ့သည်။

သို့သော် BHQ စစ်သားများသည် ကောင်းမွန်စွာ လက်နက်တပ်ဆင် ထားခဲ့သည့်တိုင် ထိုင်း၏ လက်ရွေးစင် စစ်သားများနှင့် ရင်ဆိုင်ရချိန်တွင် ၎င်းတို့၏ ရည်မှန်းချက်ကို အကောင်အထည်ဖော်ခွင့် မရခဲ့ဘဲ အရေးနိမ့်ခဲ့ သည်ဟု The Nation မှ ရေးသားဖော်ပြခဲ့သည်။

Source: The Nation

CNI International News

ဘေဂျင်း၊ ဇူလိုင် ၃၁

တရုတ်ကွန်မြူနစ်ပါတီသည် လာမည့် အောက်တိုဘာလတွင် နှစ်စဉ်ပြုလုပ်နေကျ သီးသန့် ဆွေးနွေးပွဲကို ပြုလုပ်ရန် စီစဉ်ထားကြောင်း South China Morning Post မှ ဖော်ပြခဲ့သည်။

ထိုဆွေးနွေးပွဲတွင် တရုတ်နိုင်ငံ၏ စီးပွားရေး၊ နိုင်ငံရေး၊ လူမှုရေး ရည်မှန်းချက်များအတွက် နောက်ထပ် ၅ နှစ်စာ အစီအစဉ်ကို ရေးဆွဲသွားမည်ဟု ဆိုသည်။

ကွန်မြူနစ်ပါတီ၏ ဗဟိုကော်မတီဝင် ၃၇၀ ဦးကျော် တက်ရောက်မည့် ဆွေးနွေးပွဲ ပြုလုပ်မည့်အကြောင်းကို ဇူလိုင် ၃၀ ရက်က ပေါ်လစ်ဗျူရို၏ အစည်းအဝေးအပြီးတွင် ကြေညာခဲ့ခြင်းဖြစ်သည်။

ထိုဆွေးနွေးပွဲကို ဘေဂျင်းမြို့တော်တွင် ပြုလုပ်သွားမည်ဟုလည်း နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့ သည်။

တရုတ်သမ္မတ ရှီကျင့်ဖျင်ကိုတွေ့ရစဉ်

ဆွေးနွေးပွဲ ကျင်းပမည့် ရက်အတိအကျကို လူသိရှင်ကြား ကြေညာခြင်း မရှိသေးသော်လည်း ယခင်နှစ်များ၏ လုပ်ထုံးလုပ်နည်းများအရ အောက်တိုဘာလ၏ ဒုတိယလဝက်အတွင်း ၄ ရက်ကြာ ပြုလုပ်သွားဖွယ်ရှိသည်။

ထို့ကြောင့် ထိုဆွေးနွေးပွဲသည် တောင်ကိုရီးယားနိုင်ငံ ဆိုးလ်မြို့တော်၌ အောက်တိုဘာ ၃၁ ရက်တွင် ပြုလုပ်မည့် အာရှ-ပစိဖိတ် စီးပွားရေး ပူးပေါင်းဆောင်ရွက်ရေး (Apec-အေပက်စ်) အစည်းအဝေးထက် စော၍ပြုလုပ်လိမ့်မည် ဖြစ်သည်။

အေပက်စ်(Apec) အစည်းအဝေးတွင် အမေရိကန်သမ္မတ ဒေါ်နယ်ထရမ့် (Donald Trump) နှင့် တရုတ်သမ္မတ ရှီကျင့်ဖျင် (Xi Jinping) တို့ တွေ့ဆုံနိုင်ခြေ ရှိသည်ဟုလည်း သတင်းများ ထွက်ပေါ်နေသည်။

ဒုတိကကမ္ဘာစစ် ပြီးဆုံးသည့် အထိမ်းအမှတ်အဖြစ် ဘေဂျင်းတွင် စစ်ရေးပြ အခမ်းအနား မပြုလုပ်မီ ၁ လကျော် စောပြီး ထိုသီးသန့်ဆွေးနွေးပွဲကို ပြုလုပ်ရန် စီစဉ်ခဲ့ခြင်းလည်းဖြစ်သည်။

စက်တင်ဘာ ၃ ရက်၌ ဘေဂျင်းမြို့တော်၏ တီအန်မင် ရင်ပြင် (Tiananmen Square) တွင် ပြုလုပ်မည့် စစ်ရေးပြ အခမ်းအနားကို ရုရှားသမ္မတ ပူတင် (Vladimir Putin) အပါအဝင် ကမ္ဘာ့ခေါင်းဆောင်များ တက်ရောက်မည် ဖြစ်သည်။

Source: South China Morning Post

CNI International News

ဖနွမ်ပင်၊ ဇူလိုင် ၃၀

ထိုင်းနှင့်ကမ္ဘောဒီးယားကြား ဇူလိုင် ၂၄ ရက်မှ ဇူလိုင် ၂၈ ရက်အထိ နယ်စပ်ဒေသတွင် ၅ ရက်ကြာ ပစ်ခတ် တိုက်ခိုက်မှုများ ဖြစ်ပွားခဲ့ပြီးနောက် ဇူလိုင် ၂၈ ရက် ညသန်းခေါင်၌ အပစ်အခတ်ရပ်စဲရေး သဘောတူညီမှု စတင် အသက်ဝင်ခဲ့ကာ တိုက်ခိုက်မှုများ ရပ်တန့်သွားခဲ့သည်။

စစ်အင်အားချင်း ယှဉ်ပါက ကမ္ဘောဒီးယားဘက်မှ အားနည်းနေသည့်တိုင် အဘယ်ကြောင့် စစ်ဘောင်ကို ချဲ့ခဲ့ သနည်း ဆိုခြင်းကို မေးခွန်းများ ထွက်ပေါ်နေသည်။

The Nation သတင်းစာတွင်မူ ထိုမေးခွန်းနှင့်ဆက်စပ်သည့် မေးခွန်းများကို လေ့လာသုံးသပ် ဖော်ပြထားသည်။

မေးခွန်း ။        ။ ကမ္ဘောဒီးယားက တိုက်ပွဲကို မြေပြင်နှင့် ရေပြင် နယ်စပ်ဒေသအားလုံး နီးပါးအထိ ပါဝင်စေရန် အဘယ်ကြောင့် စစ်ဘောင်ချဲ့ခဲ့သနည်း။

အဖြေ   ။        ။ ကမ္ဘောဒီးယားသည် ၎င်းပိုင်ဆိုင်ကြောင်း ကြေညာထားသည့် နယ်နိမိတ် အားလုံးတွင် တိုက်ခိုက် မှုများနှင့် တင်းမာမှုများ အရှိန်မြှင်တင်ရန် ရည်ရွယ်ခဲ့ပုံပေါ်သည်။

ထိုအချိန်မျိုးတွင် နိုင်ငံတကာ အသိုင်းအဝိုင်းက နယ်စပ်ပဋိပက္ခကို ပိုမိုအာရုံစိုက် လာလိမ့်မည်ဟု ကမ္ဘောဒီးယား က ယူဆခဲ့သည်။

မလေးရှား၊ ကမ္ဘောဒီးယား၊ ထိုင်း ဝန်ကြီးချုပ်များကိုတွေ့ရစဉ်

မေးခွန်း ။        ။ ကမ္ဘောဒီးယားက ထိုင်းထက် စစ်သားအင်အား၊ လက်နက်အင်အား နည်းပါးနေသည့်တိုင် ပဋိပက္ခကို အဘယ်ကြောင့် အရှိန်မြှင့်ခဲ့သနည်း။

အဖြေ  ။         ။ ကမ္ဘောဒီးယား၏ ရည်ရွယ်ချက်မှာ ကုလသမဂ္ဂလုံခြုံရေးကောင်စီ၏ အာရုံကို ရယူလိုခြင်းဖြစ်ပြီး ကုလသမဂ္ဂက ကြားဝင်ပြီး ကြေညာချက် ထုတ်ပြန်ခြင်း၊ လေ့လာသူများ စေလွှတ်ခြင်းတို့ လုပ်ဆောင်လိမ့်မည်ဟု မျှော်လင့်ခဲ့ဖွယ်ရှိသည်။ 

ဆွေးနွေးမှုများ ပြုလုပ်နိုင်မည်ဆိုပါက ကမ္ဘောဒီးယားသည် နယ်နိမိတ် အငြင်းပွားမှုကို စားပွဲဝိုင်းပေါ်တွင် တင်ပြီး ဖြေရှင်းရန် ရည်ရွယ်ခဲ့သည်။

မေးခွန်း ။       ။ ကမ္ဘောဒီးယား၏ မဟာဗျူဟာမြောက် အစီအစဉ်က ဘာလဲ။

အဖြေ   ။       ။ နယ်စပ်ပဋိပက္ခတွင် ထိုင်းသည် ခံစစ်ထက်၊ ထိုးစစ်ကို ပိုမိုအသုံးပြုခဲ့သည်ဟု ကမ္ဘောဒီးယားက စွပ်စွဲမည်ဖြစ်ပြီး ထိုင်းနိုင်ငံကို အရင် ရန်စ ကျူးကျော်သူအဖြစ် ပုံဖော်ကာ ကမ္ဘောဒီးယားဘက်မှ သံတမန်ရေး အသာစီးရယူရန် စီစဉ်ခဲ့ခြင်းဖြစ်နိုင်သည်။

Source: The Nation