CNI International News

လန်ဒန်၊ စက်တင်ဘာ ၁၅

လန်ဒန်မြို့လယ်ပိုင်းတွင် စက်တင်ဘာ ၁၃ ရက်က ရွှေ့ပြောင်းနေထိုင်သူများကို ဆန့်ကျင်သည့် ဆန္ဒပြမှုဖြစ်ပွား ခဲ့ပြီး လူပေါင်းတစ်သိန်းကျော် ပါဝင်ဆန္ဒပြခဲ့ကြောင်း ရိုက်တာမှ ဖော်ပြခဲ့သည်။

ဆန္ဒထုတ်ဖော်သူများက အင်္ဂလန်နှင့် ဗြိတိန်အလံများကို ကိုင်ဆောင်ခဲ့ကြပြီး ရဲတပ်ဖွဲ့နှင့် အဓိကရုဏ်း ဖြစ်ပွားခဲ့ သည်။

ထိုဆန္ဒပြမှုသည် လတ်တလော နှစ်များအတွင်း ဗြိတိန်၏ အကြီးဆုံး လက်ယာယိမ်း ဆန္ဒပြမှုများတွင် တစ်ခု အပါအဝင် ဖြစ်လာခဲ့သည်။

ရွှေ့ပြောင်း နေထိုင်သူများ ဆန့်ကျင်သည့် တက်ကြွလှုပ်ရှားသူ တွမ်မီရော်ဘင်ဆန် (Tommy Robinson) က ဦးဆောင်စီစဉ်သော  "Unite the Kingdom" ချီတက်မှုတွင် လူ ၁၁၀,၀၀၀ ဝန်းကျင် ပါဝင်ခဲ့သည်။

ထိုဆန္ဒပြသူများကို တုံ့ပြန်သည့် တန်ပြန်သပိတ်ဖြစ်သော "Stand Up to Racism" ဆန္ဒပြမှုတွင် လူ ၅၀၀၀ ဝန်းကျင် ပါဝင်ခဲ့သည်ဟု လန်ဒန်ရဲတပ်ဖွဲ့က ပြောကြားခဲ့သည်။

ရုန်းရင်းဆန်ခတ်ဖြစ်မှုကို ရှောင်လွှဲနိုင်ရန်အတွက် ရဲတပ်ဖွဲ့က ထိုဆန္ဒပြအဖွဲ့ ၂ ဖွဲ့ကို သီးခြားခွဲထားခဲ့သည်။

ရွှေ့ပြောင်းများကို ဗြိတိန်မှာ ဆန္ဒပြနေကြစဉ်

ရဲတပ်ဖွဲ့က ဆန္ဒပြသူများကို တားမြစ်ရန် ကြိုးပမ်းချိန်တွင် အကြမ်းဖက်မှုများနှင့် ကြုံတွေ့ခဲ့သည်ဟု ဆိုသည်။

ရဲအရာရှိများသည် ကန်ကျောက် ထိုးနှက် ခံရသည့်အပြင် လူအများက ၎င်းတို့ကို ပုလင်းဘူခွံများ၊ အချက်ပြ မီးကျည်များနှင့် အခြားအရာဝတ္ထုများဖြင့် ပစ်ပေါက်မှုများရှိခဲ့သည်။

ရဲအရာရှိ ၂၆ ဦး ထိခိုက်ဒဏ်ရာ ရရှိခဲ့ပြီး ၎င်းတို့ထဲမှာ လေးဦးသည် ဒဏ်ရာ အပြင်းအထန်ရခဲ့ကာ လူ ၂၅ ဦးကို ဖမ်းဆီးခဲ့သည်။

"အကြမ်းဖက်မှု ဖြစ်စဉ်ထဲမှာ ပါဝင်သူတွေကို ဖော်ထုတ်နိုင်ဖို့ လုပ်ဆောင်နေပြီး အဲဒီလူတွေအနေနဲ့ လာမယ့် ရက်ပိုင်း ဒါမှမဟုတ် သီတင်းပတ်တွေ အတွင်းမှာပဲ ပြင်းပြင်းထန်ထန် အရေးယူခံရမှာပါ" ဟု လက်ထောက် ကော်မရှင်နာ မက်တွစ်(Matt Twist)က ပြောကြားခဲ့သည်။

"ဒီနေ့ဟာ ဗြိတိန်မှာ ယဉ်ကျေးမှု တော်လှန်ရေး အစပျိုးခြင်း ဖြစ်ပါတယ်။ ဒါက ကျနော်တို့ရဲ့ အခိုက်အတန့် ပါပဲ"ဟု ရော်ဘင်ဆန်က ၎င်းကို ထောက်ခံသူများအား ပြောကြားသည့် မိန့်ခွန်းတွင် ဆိုသည်။

ရော်ဘင်ဆန်နှင့် အခြားလက်ယာယိမ်း လှုပ်ရှားသူများကို ထောက်ခံသည့် အမေရိကန် ဘီလျံနာ အီလွန်မာ့စ် ကလည်း ဗြိတိန်တွင် အစိုးရအပြောင်းအလဲ တစ်ရပ်ကို တောင်းဆိုခဲ့သည်။

Source: ရိုက်တာ

CNI International News

အင်ဖာ၊ စက်တင်ဘာ ၁၅

United Naga Council (UNC) သည် အိန္ဒိယဝန်ကြီးချုပ် မိုဒီ (Narendra Modi) ၏ မဏိပူရ ပြည်နယ်ခရီးစဉ်တွင် အမှာစာတစ်ခုကို တင်သွင်းခဲ့ပြီး ရပ်တန့်နေသော နာဂငြိမ်းချမ်းရေး လုပ်ငန်းစဉ်ကို ဆက်လက် အကောင်အထည် ဖော်ရန် တောင်းဆိုခဲ့သည်ဟု Northeast Live သတင်း ဝက်ဘ်ဆိုက်တွင် ဖော်ပြခဲ့သည်။

ထိုအမှာစာထဲတွင် လွတ်လပ်စွာ လှုပ်ရှားသွားလာရေး အစီအစဉ် (FMR) ကို ပယ်ဖျက်မှု၊ အိန္ဒိယ-မြန်မာ နယ်စပ် စည်းရိုး ဆောက်လုပ်နေမှုနှင့် နာဂငြိမ်းချမ်းရေး လုပ်ငန်းစဉ် အပြီးသတ် လုပ်ဆောင်မှုကို ဆိုင်းငံ့ထားမှု အစရှိသည့် အဓိကအချက် ၃ ချက်ကို အာရုံစိုက် လုပ်ဆောင်ရန် တောင်းဆိုခဲ့သည်။

အိန္ဒိယဝန်ကြီးချုပ်၏ ခရီးစဉ်ကို ငြိမ်းချမ်းရေး ပြန်လည်ထိန်းသိမ်းမည့် မြင့်မြတ်သော မစ်ရှင်တစ်ခုအဖြစ် ကြိုဆိုခဲ့ ပြီး နာဂလူမျိုးများသည် မဏိပူရတွင် လက်ရှိဖြစ်ပွားနေသည့် လူမျိုးရေးပဋိပက္ခ၌ ပါဝင်ခြင်းမရှိကြောင်း UNC က ပြောကြားခဲ့သည်။

အိန္ဒိယဝန်ကြီးချုပ် မိုဒီနဲ့ နာဂလက်နက်ကိုင် ငြိမ်းချမ်းရေးရယူကြစဉ်

နာဂလူမျိုးများသည် ကြားနေရပ်တည်ချက်ကို ထိန်းသိမ်းထားပြီး ဒေသတွင်း ပုံမှန် အခြေအနေကို ပြန်လည် ထိန်းသိမ်းရာတွင် အထောက်အကူ ဖြစ်စေရန် ပဋိပက္ခဖြစ်နေသည့် အသိုင်းအဝိုင်းများနှင့် ထိတွေ့ဆက်ဆံမှုများ ပြုလုပ်ရာ၌ အဓိကအခန်းကဏ္ဍမှ ပါဝင်ဆောင်ရွက်နေသည်ဟု UNC က ပြောကြားခဲ့သည်။

အိန္ဒိယ-မြန်မာ နယ်စပ်ခြံစည်းရိုး တည်ဆောက်ရေး စီမံကိန်း၊ FMR ကို ဖျက်သိမ်းမည့် အစိုးရ၏ အစီအစဉ်တို့နှင့် ပတ်သက်ပြီး အလွန်စိုးရိမ်ကြောင်း အမှာစာထဲတွင် UNC က ဖော်ပြထားသည်။

ထိုမူဝါဒများသည် နာဂလူမျိုးများ၏ ဘိုးဘေးဘီဘင် ပိုင်ဆိုင်ခဲ့သည့် နယ်နိမိတ်၊ လူမျိုး ဖြစ်တည်မှုနှင့် နယ်စပ် ဖြတ်ကျော် ဆက်ဆံရေးရှိသည့် အစဉ်အလာများအတွက် ကြီးမားသည့် ခြိမ်းခြောက်မှု ဖြစ်နေကြောင်း UNC က ပြောကြားခဲ့သည်။

အိန္ဒိယအစိုးရ၏ ထိုမူဝါဒများကို ဆန့်ကျင်သည့် ဆန္ဒပြမှုများ၊ မေတ္တာရပ်ခံမှုများနှင့် ဆွေးနွေးမှုများ ရှိခဲ့သည့်တိုင် အစိုးရဘက်မှ အဓိပ္ပာယ်ပြည့်ဝသည့် တုံ့ပြန်မှုမျိုး မရှိခဲ့ကြောင်းလည်း UNC က ပြောကြားခဲ့သည်။

အိန္ဒိယဝန်ကြီးချုပ် မိုဒီကို တွေ့ရစဉ် 

ထို့ကြောင့် UNC သည် မဏိပူရပြည်နယ်၏ နာဂဒေသများတွင် စက်တင်ဘာ ၈ ရက်မှစပြီး အကန့်အသတ်မရှိ ကုန်သွယ်ရေးပိတ်ပင်မှု ပြုလုပ်ခဲ့သည်။

သို့သော် ထိုအရေးကိစ္စနှင့်ပတ်သက်ပြီး UNC၊ မဏိပူရအစိုးရနှင့် အိန္ဒိယ ပြည်ထဲရေးဝန်ကြီးဌာနတို့ ပါဝင်သည့် သုံးပွင့်ဆိုင် ဆွေးနွေးမှုကို ဆက်လက် ပြုလုပ်ရန် စက်တင်ဘာ ၁၀ ရက်တွင် မဏိပူရပြည်နယ်အစိုးရက အာမခံခဲ့ သည်။

ထို့ပြင် မိုဒီ၏ မဏိပူရပြည်နယ် ခရီးစဉ်ကို လေးစားခြင်းအားဖြင့် UNC သည် စက်တင်ဘာ ၁၁ ရက် ဒေသ စံတော်ချိန် ညနေ ၆ နာရီမှစပြီး ကုန်သွယ်ရေး ပိတ်ဆို့မှုကို ယာယီဆိုင်းငံ့ပေးခဲ့သည်။

လက်ရှိတွင် UNC သည် နယ်စပ်စည်းရိုးကိစ္စ၊ FMR ဖျက်သိမ်းရေးကိစ္စတို့နှင့် ပတ်သက်ပြီး ဝန်ကြီးချုပ်မိုဒီ၏ ပုဂ္ဂိုလ်ရေးအရ ကြားဝင်ဆောင်ရွက်မှုကို ရရှိရန် ကြိုးပမ်းနေသည်ဟု သတင်းတွင် ဖော်ပြခဲ့သည်။

Source: Northeast Live

CNI International News

ဘေဂျင်း၊ စက်တင်ဘာ ၁၃

တရုတ်၏ နောက်ဆုံးပေါ် လေယာဉ်တင်သင်္ဘောဖြစ်သည့် Fujian အမည်ရှိ လေယာဉ်တင်သင်္ဘောသည် ထိုင်ဝမ်ရေလက်ကြားကို ဖြတ်သန်းပြီး သုတေသနစမ်းသပ်ချက်များနှင့် လေ့ကျင့်မှုများ ပြုလုပ်ရန်အတွက် တောင်တရုတ်ပင်လယ်အတွင်းသို့ မောင်းနှင်ဝင်ရောက်သွားခဲ့ကြောင်း South China Morning Post မှ ဖော်ပြခဲ့သည်။

"ဒေသဖြတ်ကျော် စမ်းသပ်မှုတွေနဲ့ လေ့ကျင့်မှုတွေ ပြုလုပ်တာဟာ ပုံမှန်ပြုလုပ်နေကျ မစ်ရှင်တစ်ခု ဖြစ်ပါတယ်။ ဒီမစ်ရှင်ဟာ ဘယ်သူ့ကိုမှ ပစ်မှတ်ထားခြင်း မဟုတ်ပါဘူး" ဟု တရုတ် ပြည်သူ့လွတ်မြောက်ရေးတပ်မတော် - ရေ (PLA Navy) ၏ ပြောရေးဆိုခွင့်ရှိသူ ဗိုလ်မှူးကြီး လန်ကော်ဝေ (Leng Guowei) က စက်တင်ဘာ ၁၁ ရက်တွင် ပြောကြားခဲ့ကြောင်း နိုင်ငံပိုင် ဆင်ဟွာသတင်း အေဂျင်စီက ထုတ်ပြန်ခဲ့သည်။

ထိုလေယာဉ်တင် သင်္ဘောသည် စက်တင်ဘာ ၁၀ ရက်က ရှန်ဟိုင်းသင်္ဘောကျင်းမှ ထွက်ခွာသွားခဲ့ပြီးနောက် တောင်ဘက်သို့ ဦးတည် မောင်းနှင်သွားသည့် ဓာတ်ပုံများနှင့် ဗွီဒီယိုများသည် လူမှုမီဒီယာများပေါ်တွင် ထွက်ပေါ်ခဲ့သည်။

 တရုတ်လေယာဉ်တင်သင်္ဘောကို တွေ့ရစဉ် 

ဂျပန်၏ ပင်လယ်ပြင် ကာကွယ်ရေးတပ်ဖွဲ့ (ဂျပန်ရေတပ်) က စက်တင်ဘာ ၁၁ ရက် မွန်းလွဲပိုင်းတွင် ဂျပန်၏ ဆန်ကာကူ (Senkakus) ကျွန်းစု (တရုတ်အခေါ် တောင်ယူ -Diaoyu ကျွန်းစု) ၏ အနောက်မြောက်ဘက် ကီလိုမီတာ ၂၀၀ အကွာတွင် တရုတ်၏ Fujian လေယာဉ်တင်သင်္ဘောကို ထောက်လှမ်းတွေ့ရှိခဲ့သည်ဟု ဆိုသည်။

Fujian လေယာဉ်တင်သင်္ဘောကို ဖျက်သင်္ဘော ၂ စင်းက ခြုံရံလိုက်ပါလာမှုကို ဂျပန်စစ်တပ်က ပထမဆုံးအကြိမ် တွေ့ရှိခဲ့ခြင်းဖြစ်သည်။

Fujian သည် တရုတ်၏ တတိယမြောက် လေယာဉ်တင် သင်္ဘောဖြစ်ပြီး တရုတ်၏ ပထမဆုံး လျှပ်စစ်သံလိုက် ကိရိယာများ တပ်ဆင်ထားသည့် လေယာဉ်တင်သင်္ဘောဖြစ်သည်။

ထို့ပြင် အမေရိကန်၏ USS Gerald R. Ford လေယာဉ်တင် သင်္ဘောပြီးနောက် Fujian လေယာဉ်တင် သင်္ဘော သည် ကမ္ဘာပေါ်တွင် ဒုတိယမြောက် လျှပ်စစ်သံလိုက် ကိရိယာများ တပ်ဆင်ထားသည့် လေယာဉ်တင် သင်္ဘော ဖြစ်သည်။

Fujian လေယာဉ်တင် သင်္ဘောသည် J-35A ကိုယ်ပျောက် တိုက်လေယာဉ်များ၊ J-15T တိုက်လေယာဉ်များ၊ J-15DT အီလက်ထရောနစ် စစ်ဆင်ရေး လေယာဉ်များနှင့်  KJ-600 ကြိုတင် သတိပေးရေး လေယာဉ်များကို တင်ဆောင်ဖွယ်ရှိသည်။

Source: South China Morning Post

CNI International News

ဘရက်စီလီယာ၊ စက်တင်ဘာ

ဘရာဇီးလ်တရားရုံးချုပ်က သမ္မတဟောင်း ဂျိုင်ယာ ဘော်ဆိုနာရို( Jair Bolsonaro)ကို အာဏာသိမ်းရန် ကြံစည်မှုဖြင့် ထောင်ဒဏ် ၂၇ နှစ်နှင့် ၃ လ မှတ်ခဲ့ကြောင်း ရိုက်တာမှ ဖော်ပြခဲ့သည်။

အာဏာသိမ်းရန် ကြိုးပမ်းမှုနှင့် ဆက်နွှယ်သည့် စွဲချက်များအတွက် စီရင်ချက်ချရန် မဲခွဲဆုံးဖြတ်ခဲ့ပြီးနောက် ယခုကဲ့သို့ ပြစ်ဒဏ်ချမှတ်ခဲ့ခြင်းဖြစ်သည်။

၂၀၂၂ ခုနှစ်၊ အောက်တိုဘာလက ရွေးကောက်ပွဲတွင် သမ္မတ လူလာ ဒါဆေးလ်ဗား(Luiz Inacio Lula da Silva)ကို ရှုံးနိမ့်ခဲ့ပြီးနောက် လူလာကို ဖြုတ်ချရန် ကြိုးပမ်းကြံစည်ခဲ့သည့်အတွက် ဘော်ဆိုနာရိုအား စီရင်ချက်ချရန် တရား သူကြီးများက မဲခွဲဆုံးဖြတ်ရာ ထောက်ခံမဲ ၄ မဲ ၊ ကန့်ကွက်မဲ ၁ မဲဖြင့် အတည်ပြုခဲ့သည်။

ထိုပြစ်ဒဏ်ကြောင့် အသက် ၇၀ အရွယ် လက်ယာယိမ်းခေါင်းဆောင် ဘော်ဆိုနာရိုသည် ၎င်း၏ လက်ကျန် နေ့ရက်များကို ထောင်ထဲတွင် ကုန်ဆုံးရဖွယ်ရှိနေသည်။

ဘော်ဆိုနာရို လက်ထက်တွင် တာဝန်ထမ်းဆောင်ခဲ့သော ဝန်ကြီးများနှင့် စစ်တပ် အကြီးအကဲများ အပါအဝင် ၇ ဦးလည်း ပြစ်ဒဏ်များ ချခံခဲ့ရသည်။

လက်ရှိတွင် နေအိမ် အကျယ်ချုပ်ဖြင့် နေထိုင်နေရသည့် ဘော်ဆိုနာရိုသည် လူလာကို ဖြုတ်ချရန် ကြံစည်မှု အပါအဝင် စွဲချက် ၅ ခုဖြင့် ပြစ်မှုထင်ရှား တွေ့ရှိခဲ့ပြီးနောက် ထောင်ဒဏ်နှစ် ၄၀ အထိ ကျခံရနိုင်သည်။

ဘရာဇီးလ်တရားသူကြီးတွေကို တွေ့ရစဉ် 

ဘော်ဆိုနာရို၏ ဥပဒေရေးရာအဖွဲ့က ပြစ်ဒဏ်သည် အလွန်အမင်း ပြင်းထန်သည်ဟုဆိုကာ အယူခံဝင်သွားမည်ဟု ပြောကြားခဲ့သည်။

ဘော်ဆိုနာရို တရားစွဲခံထားရသည့် ကိစ္စနှင့်ပတ်သက်ပြီး အပြစ်ပေးသည့် အနေဖြင့် ၎င်း၏မဟာမိတ်ဖြစ်သော အမေရိကန်သမ္မတ ဒေါ်နယ်ထရန့် (Donald Trump)က ဘရာဇီးလ်ကို သွင်းကုန်စည်းကြပ်ခွန်များစွာ ချမှတ်ခဲ့ သည်။

အမေရိကန်နိုင်ငံခြားရေးဝန်ကြီး မာကိုရူဘီယို (Marco Rubio) က အမေရိကန်အနေဖြင့် လိုအပ်သည့် အလျောက် တုံ့ပြန်သွားရလိမ့်မည်ဟု ပြောကြားခဲ့သည်။

ဘရာဇီးလ် နိုင်ငံခြားရေးဝန်ကြီးဌာနကမူ ရူဘီယို၏ ခြိမ်းခြောက် ပြောဆိုမှုများကို ကြောက်နေမည် မဟုတ်ဟု တုံ့ပြန်ခဲ့သည်။

Source: ရိုက်တာ

CNI International News

ဘာလင်၊ စက်တင်ဘာ ၁၃

ဂျာမနီစစ်တပ်၏ ကြည်းတပ်အင်အားကို ၂ ဆကျော် မြှင့်တင်ရမည်ဖြစ်ပြီး လက်ရှိ စစ်မှုထမ်း ၆၂,၀၀၀ ရှိနေသည့် ကြည်းတပ်တွင် နောက်ထပ် စစ်သားအင်အား ၁၀၀,၀၀၀ ကို ထပ်မံစုဆောင်းရန် လိုအပ်သည်ဟု ဂျာမနီ ကြည်းတပ်၏ စစ်ဦးစီးချုပ် အယ်လ်ဖွန်စ် မာ့စ် (Alfons Mais) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ရုရှား၏ ခြိမ်းခြောက်မှု မြင့်တက်နေသည့်အတွက် ကြိုတင်ပြင်ဆင်မှုများကို မြှင့်တင်နေသည့် နေတိုးအဖွဲ့၏ သတ်မှတ်စစ်အင်အားကို ပြည့်မီစေရန် ကြည်းတပ်အင်အားကို မြှင့်တင်‌ရေး မာ့စ်က ပြောကြားခဲ့ခြင်းဖြစ်သည်။

" ၂၀၂၉ ခုနှစ်ရောက်ရင် စစ်ပွဲအတွက် အသင့်ဖြစ်စေဖို့နဲ့ ၂၀၃၅ ခုနှစ်မတိုင်ခင် နေတိုးအဖွဲ့ကို ကတိပေးထားတဲ့ ဂျာမနီရဲ့ စစ်အင်အားကို မြှင့်တင်ဖို့အတွက် ကြည်းတပ်အင်အား မြှင့်တင်မှုဟာ မရှိမဖြစ် အရေးကြီးလာပါတယ်" ဟု မာ့စ်က ဂျာမနီစစ်တပ်၏ စစ်ဆေးရေးအရာရှိချုပ် ကာစတန် ဘရောင်ယာ (Carsten Breuer) ကို အစီအရင်ခံ တင်ပြခဲ့သည်။

အရန်တပ်ဖွဲ့အင်အား ၃၇,၀၀၀ အပါအဝင် လက်ရှိ အတည်ပြုထားသည့် စစ်မှုထမ်း အင်အားဖြင့် ထိုရည်မှန်း ချက်များကို ပြည့်မှီအောင် အကောင်အထည်ဖော်ရန် မဖြစ်နိုင်ကြောင်းလည်း မာ့စ်က ပြောသည်။

ဂျာမနီသည် အရှေ့ဥရောပရှိ မဟာမိတ်များကို ကာကွယ်ရေး ကတိကဝတ်များ တိုးမြှင့်ထားပြီး လစ်သူယေးနီး ယားတွင် စစ်သားအင်အား ၅၀၀၀ ရှိသည့် ဂျာမနီတပ်မဟာတစ်ခု ထူထောင်ရေးနှင့် ဘော်လ်တစ်ဒေသတွင် ရေအောက် အဖျက်အမှောင့်များအား တန်ပြန်ရန် ရေတပ်ကင်းလှည့်မှုများ ဖြန့်ကြက်ချထားရေး အစီအစဉ်များ ပါဝင်သည်။

ဂျာမနီစစ်သားတွေကို တွေ့ရစဉ်

၂၀၂၀ ခုနှစ်တွင် တန်းပြည့်စစ်မှု ထမ်းအရေအတွက် ၄၅,၀၀၀ ခန့် တိုးမြှင့်ရန် မာ့စ်က တိုက်တွန်းခဲ့သည်။

၂၀၂၉ ခုနှစ်တွင် ရုရှားက အနောက်နိုင်ငံ မဟာမိတ်များကို အကြီးစား တိုက်ခိုက်နိုင်စွမ်း ရှိလာလိမ့်မည်ဟု အမေရိကန်ဦးဆောင်သည့် နေတိုးအဖွဲ့က ခန့်မှန်းထားသည်။

ရုရှားကမူ နေတိုးအဖွဲ့နှင့် နေတိုးအဖွဲ့ဝင် နိုင်ငံများကို စစ်ပွဲဆင်နွှဲရန် ရည်ရွယ်ချက်မရှိကြောင်း ထပ်တလဲလဲ ငြင်းဆိုခဲ့သည်။

ဇွန်လက သဘောတူခဲ့သော နေတိုးအဖွဲ့၏ သတ်မှတ်ချက်များကို ပြည့်မီစေရန်နှင့် ယူကရိန်းတွင် ဆင်နွှဲနေသည့် ရုရှား၏ စစ်ပွဲပုံစံအတိုင်း ဖြစ်လာနိုင်ခြေရှိသည့် ပဋိပက္ခအတွက် အရန်တပ်များ ထူထောင်ရန် ၂၀၃၅ ခုနှစ်မတိုင်မီ နောက်ထပ် တန်းပြည့်စစ်မှုထမ်း ၄၅,၀၀၀ ကို စုဆောင်းရန်လိုအပ်သည်ဟု မာ့စ်က ပြောကြားခဲ့သည်။

ထိုအကြောင်းအရာနှင့် ပတ်သက်ပြီး ဘာလင်ရှိ ဂျာမနီကာကွယ်ရေးဝန်ကြီးဌာနက မှတ်ချက်ပေးရန် တောင်းဆို ချက်ကို ဖြေကြားရန် ငြင်းဆိုခဲ့သည်။

Source: ရိုက်တာ

CNI International News

ဂျေရုဆလင်၊ စက်တင်ဘာ ၁၃

ပါလက်စတိုင်းနိုင်ငံ ရှိလာလိမ့်မည် မဟုတ်ကြောင်း အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) က စက်တင်ဘာ ၁၁ ရက်တွင် ပြောကြားခဲ့သည်ဟု DW သတင်းဝက်ဘ်ဆိုက်၌ ဖော်ပြခဲ့သည်။

နေတန်ယာဟုသည် ဂျော်ဒန်မြစ် အနောက်ဘက်ကမ်းဒေသ (West Bank) ရှိ Maale Adumim ဂျူးလူနေ ရပ်ကွက်သို့ သွားရောက်သည့် ခရီးစဉ်အတွင်း ထိုကဲ့သို့ ပြောကြားခဲ့ခြင်းဖြစ်သည်။

အနောက်ဘက်ကမ်းဒေသတွင် ဂျူးရပ်ကွက်များကို ချဲ့ထွင်မည့် အငြင်းပွားဖွယ် အစီအစဉ်များ၏ တစ်စိတ် တစ်ပိုင်း အနေဖြင့် ထောင်နှင့်ချီသည့် လူနေအိမ်များကို ဆောက်လုပ်ရန် အဆိုပြုချက်အား နေတန်ယာဟုက တရားဝင် လက်မှတ်ရေးထိုးခဲ့သည်။

"ပါလက်စတိုင်း နိုင်ငံရှိလာမှာ မဟုတ်ဘူးဆိုတဲ့ ကျနော်တို့ရဲ့ ကတိစကားကို ကျနော်တို့ ဖြည့်ဆည်းနေပါတယ်။ ဒီနေရာကို ကျနော်တို့ ပိုင်တာပါ။ ကျနော်တို့ရဲ့ အမွေအနှစ်တွေ၊ ကျနော်တို့ရဲ့ မြေနဲ့ ကျနော်တို့ရဲ့ လုံခြုံရေးကို ကာကွယ်သွားမှာပါ" ဟု နေတန်ယာဟုက ပြောကြားခဲ့သည်။

ပါလက်စတိုင်းနယ်မြေကို ပြသထားစဉ်

အစ္စရေး၏ ဂျူးရပ်ကွက် ထူထောင်မှု အစီအစဉ်တွင် ၁၂ စတုရန်း ကီလိုမီတာ အကျယ်ရှိ မြေနေရာ၌ လူနေအိမ် အသစ် ၃၄၀၀ ခန့်ကို တည်ဆောက်သွားမည်ဖြစ်သည်။

ထိုရပ်ကွက်သည် အနောက်ဘက်ကမ်းဒေသကို ဖြတ်ပြီး တည်ဆောက်မည်ဖြစ်ကာ အနောက်ဘက်ကမ်းဒေသနှင့် အရှေ့ဂျေရုဆလင်နှင့် အဆက်ဖြတ်ထားမည်ဖြစ်သည်။

ပါလက်စတိုင်းများကမူ အရှေ့ဂျေရုဆလင်ကို အနာဂတ် ပါလက်စတိုင်းနိုင်ငံ၏ မြို့တော်အဖြစ် သတ်မှတ်ထား သည်။

နိုင်ငံတကာ အသိုင်းအဝိုင်းကလည်း အစ္စရေးနှင့် ပါလက်စတိုင်း ၂ နိုင်ငံ အတူယှဉ်တွဲ နေထိုင်ရေးမူကို ထောက်ခံ ထားသည်။

အစ္စရေးသည် ၁၉၆၇ ခုနှစ်က အနောက်ဘက်ကမ်းဒေသကို သိမ်းပိုက်ခဲ့ပြီးနောက် ဂျူးရပ်ကွက်များ ထူထောင်ခဲ့ ပြီး ထိုကဲ့သို့ ဂျူးရပ်ကွက်များ ထူထောင်မှုသည် နိုင်ငံတကာဥပဒေအရ တရားမဝင်ကြောင်း သတင်းတွင် ဖော်ပြခဲ့ သည်။

Source: DW

CNI International News

၂၀၂၅ ခုနှစ်၊ စက်တင်ဘာ ၁၂

အိန္ဒိယနှင့် မြန်မာကြား ကာကွယ်ရေး ပူးပေါင်းဆောင်ရွက်မှုများနှင့် စစ်တပ်အချင်းချင်း ဆက်ဆံရေးများကို တိုးမြှင့်ရေးတွင် နည်းလမ်းများကို ရှာဖွေရန် အိန္ဒိယကြည်းတပ်၏ စစ်ဦးစီးချုပ် Upendra Dwivedi နှင့် မြန်မာ့ တပ်မတော်၏ အမှတ် (၁) စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီးကိုကိုဦးတို့ တွေ့ဆုံခဲ့ကြသည်ဟု The Tribune India သတင်းဝက်ဘ်ဆိုက်တွင် ဖော်ပြခဲ့သည်။

အဆိုပါ တွေ့ဆုံ ဆွေးနွေးမှုသည် အိန္ဒိယနိုင်ငံ၊ နယူးဒေလီမြို့မှာ ၂၀၂၅ ခုနှစ်၊ စက်တင်ဘာ ၁၀ ရက်နေ့က ဖြစ်သည်။

၎င်းတို့ နှစ်ဦးကြား ဆွေးနွေးမှုများသည် မဟာဗျူဟာမြောက် ဆက်ဆံရေးကို တိုးမြှင့်ရေး၊ ပူးတွဲစစ်ရေး လေ့ကျင့် မှုကို ချဲ့ထွင်ရေး၊ ဒေသတွင်းတွင် လက်ရှိ ပထဝီမဟာဗျူဟာ အခင်းအကျင်းကို စိစစ်သုံးသပ်ရေးတို့ကို အာရုံစိုက် ဆွေးနွေးခဲ့သည်ဟု ဆိုသည်။

ထို့ပြင် ဒေသတွင်း ငြိမ်းချမ်းရေးနှင့် တည်ငြိမ်ရေးကို မြှင့်တင်ရန်အတွက် နှစ်နိုင်ငံကြား မျှဝေထမ်းဆောင်မည့် သန္နိဋ္ဌာန်ကိုလည်း ထပ်လောင်း အတည်ပြုခဲ့ကြသည်ဟု ဆိုသည်။

“မြန်မာ့တပ်မတော်ရဲ့ အမှတ် (၁)  စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီး ဦးကိုကိုဦးနဲ့ ဗိုလ်ချုပ်ကြီး Upendra Dwivedi တို့ တွေ့ဆုံခဲ့ကြပါတယ်။ သူတို့တွေဟာ ကာကွယ်ရေး ပူးပေါင်းဆောင်ရွက်မှုကို မြှင့်တင်ဖို့ ၊ စစ်တပ်အချင်းချင်း ဆက်ဆံရေးကို ချဲ့ထွင်ဖို့နဲ့ ဒေသတွင်း လက်ရှိ ပထဝီမဟာဗျူဟာ အခင်းအကျင်းကို သုံးသပ်ဖို့ အဓိက ဆွေးနွေးခဲ့ကြပြီး ဒေသတွင်း ငြိမ်းချမ်းရေးနဲ့ တည်ငြိမ်ရေးအတွက် အပြန်အလှန်ထားရှိတဲ့ သန္နိဋ္ဌာန်တွေကို ထပ်လောင်း အတည်ပြုခဲ့ပါတယ်”ဟု အိန္ဒိယကြည်းတပ်က X လူမှုမီဒီယာတွင် ရေးသားခဲ့သည်။

စက်တင်ဘာ ၉ ရက်တွင် အိန္ဒိယနိုင်ငံ၊ နယူးဒေလီမြို့တော်၌ ကျင်းပခဲ့သည့် အိန္ဒိယ-မြန်မာ စစ်တပ်အရာရှိများ ဆွေးနွေးမှုများအပြီးတွင် ယခုအစည်းအဝေး ပေါ်ပေါက်လာခဲ့ခြင်းဖြစ်သည်။

ဒုတိယဗိုလ်ချုပ်ကြီး ဦးကိုကိုဦး ဦးဆောင်သည့် မြန်မာကိုယ်စားလှယ်အဖွဲ့သည် နှစ်နိုင်ငံစစ်တပ်ကြား ဘုံရည် မှန်းချက် တစ်ခုအတွက် သတင်းအချက်အလက်များ ဖလှယ်မှုကို တိုးမြှင့်ရေး၊ ကာကွယ်ရေး ဆက်ဆံမှုများကို မြှင့်တင်ရေး၊ ကာကွယ်ရေး မိတ်ဖက်ဆက်ဆံရေးကို ချဲ့ထွင်ရေးတို့ကို ဆွေးနွေးခဲ့ကြသည်။

ထို့ပြင် ဒေသတွင်း လုံခြုံရေးကို ရည်ရွယ်ပြီး အိန္ဒိယ-မြန်မာ ဆက်ဆံရေးအား ခိုင်မာစွာ မြှင့်တင်ရန် ဆက်လက်ပြီး အားထုတ်ကြိုးပမ်းသွားမည်ဟု သဘောတူခဲ့ကြသည်။

ဩဂုတ် ၂၂ ရက်ကလည်း အိန္ဒိယဗိုလ်ချုပ်ကြီး Upendra Dwivedi သည် မြန်မာနိုင်ငံဆိုင်ရာ အိန္ဒိယသံအမတ်ကြီး   Abhay Thakur နှင့် တွေ့ဆုံခဲ့သည်။

နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် အိန္ဒိယ ဝန်ကြီးချုပ် မိုဒီတို့ တရုတ်နိုင်ငံ၊ တီယန်ကျင်းမြို့မှာ ၂၀၂၅ ခုနှစ်၊ ဩဂုတ် ၃၁ ရက် တွေ့ဆုံ ဆွေးနွေးခဲ့ပြီးနောက် အိန္ဒိယစစ်ဦးစီးချုပ်နှင့် ဒုတိယဗိုလ်ချုပ်ကြီး ကိုကိုဦးတို့ တွေ့ဆုံဆွေးနွေးမှု ပေါ်ပေါက်လာခြင်း ဖြစ်သည်။

ဒုတိယဗိုလ်ချုပ်ကြီးကိုကိုဦးသည် အနောက်မြောက်တိုင်းစစ်ဌာနချုပ် (စစ်ကိုင်းတိုင်းဒေသကြီး၊ မကွေးတိုင်း ဒေသကြီး မြောက်ပိုင်း၊ ချင်းပြည်နယ်)၊ မြောက်ပိုင်းတိုင်းစစ်ဌာနချုပ်(ကချင်ပြည်နယ်)၊ အလယ်ပိုင်းတိုင်းစစ်ဌာန ချုပ် (မန္တလေးတိုင်း ဒေသကြီ၊ မကွေးတိုင်းတောင်ပိုင်း)စသည့် စစ်တိုင်း ၃ တိုင်းကို ကိုင်တွယ်သော ကစထ(၁)မှူး ဖြစ်သည်။

ကစထ(၁)၏ လက်အောက်ခံ တိုင်းဒေသကြီးနှင့် ပြည်နယ်များမှာ ကချင်ပြည်နယ်၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်နှင့် မန္တလေးတိုင်းဒေသကြီးတို့ ဖြစ်သည်။

အိန္ဒိယနိုင်ငံသည် မြန်မာနိုင်ငံ၏ စစ်ကိုင်းတိုင်းဒေသကြီး၊ ချင်းပြည်နယ်၊ ကချင်ပြည်နယ်တို့ဖြင့် ထိစပ်လျက်ရှိပြီး အိန္ဒိယကို တိုက်ခိုက်နေသော နာဂ၊ ကသည်း လက်နက်ကိုင်များ အခြေပြု လှုပ်ရှားနေသော နယ်မြေများဖြစ် သည်။

Source: The Tribune India

CNI International News

ဘေကျင်း၊ စက်တင်ဘာ ၁၂

တရုတ်သည် စက်တင်ဘာ ၃ ရက်က ပြုလုပ်ခဲ့သည့် စစ်ရေးပြ အခမ်းအနားအတွင်း နောက်ဆုံးပေါ် စစ်လက်နက် ပစ္စည်းများကို ထုတ်ဖော်ပြသခဲ့ရာ ထိုလက်နက်များအနက် Jinglei-1 (JL-1) အမည်ရှိ တာဝေးပစ်ဒုံးကျည်လည်း ပါဝင်ခဲ့သည်ဟု South China Morning Post မှ ဖော်ပြခဲ့သည်။

JL-1 ဒုံးကျည်သည် နျူကလီးယား ထိပ်ဖူးတပ်ဆင်နိုင်သည့် ဝေဟင်မှပစ်လွှတ်သည့် ပဲ့ထိန်းဒုံးကျည် (ALBM) အမျိုးအစားဖြစ်သည်။

ထိုဒုံးကျည်ကို မြေပြင်အခြေစိုက် ပစ်လွှတ်ရသည့် တိုက်ချင်းပစ် ပဲ့ထိန်းဒုံးကျည် (ICBM) များ၊ ရေငုပ်သင်္ဘောမှ ပစ်လွှတ်ရသည့် ပဲ့ထိန်းဒုံးကျည် (SLBM) များနှင့်အတူ ပထမဆုံးအကြိမ်အဖြစ် လူသိရှင်ကြား ချပြခဲ့ခြင်းဖြစ် သည်။

ထို့ကြောင့် တရုတ်သည် မြေပြင်၊ ရေပြင်နှင့် ဝေဟင်တို့မှ နျူကလီးယား ထိပ်ဖူးတပ်ဆင်နိုင်သည့် ဒုံးကျည် အမျိုးအစားများကို ပြသခြင်းဖြင့် တရုတ်၏ နျူကလီးယား အဟန့်အတားကို ပိုမိုခိုင်မာ ပေါ်လွင်စေခဲ့ကြောင်း ကျွမ်းကျင်သူများက ပြောကြားခဲ့သည်။

JL-1 ဒုံးကျည်သည် အသံထက်မြန်သည့် အလျှင်နှုန်းဖြင့် ကီလိုမီတာ ၈၀၀၀ (မိုင် ၅၀၀၀) အကွာအဝေးအထိ ပျံသန်းနိုင်ကာ ကြားဖြတ်ပစ်ချရန် ခက်ခဲ့ကြောင်း တရုတ်နိုင်ငံပိုင် မီဒီယာက ဖော်ပြခဲ့သည်။

JL-1 ဒုံးကျည်ကို တွေ့ရစဉ်

JL-1 ဒုံးကျည်ကို လေထဲတွင် ဆီဖြည့်နိုင်သည့် H-6N မဟာဗျူဟာမြောက် ဗုံးကြဲလေယာဉ်ဖြင့် တင်ဆောင်နိုင် သဖြင့် ထိုလေယာဉ်နှင့် စစ်ဆင်ရေး ပြုလုပ်နိုင်သည့် အကွာအဝေးကို ပိုမိုချဲ့ထွင်နိုင်ကြောင်း ကျွမ်းကျင်သူများက ပြောကြားခဲ့သည်။

တရုတ်သည် H-6 ဗုံးကြဲလယောဉ်ကို ၂၀၁၉ ခုနှစ်က အဆင့်မြှင့်တင် မွမ်းမံမှုများ ပြုလုပ်ခဲ့သဖြင့်  ALBM အမျိုးအစား ဒုံးကျည်များကို သယ်ဆောင် နိုင်လိမ့်မည်ဖြစ်ကြောင်း မဟာဗျူဟာနှင့် နိုင်ငံတကာလေ့လာရေး စင်တာ (CSIS) ၏ နျူကလီးယားရေးရာ လက်ထောက်ညွှန်ကြားရေးမှူး ဂျိုးဆက် ရော့ဂျာက ပြောကြားခဲ့သည်။

"ပဋိပက္ခတစ်ခု ဖြစ်လာမယ်ဆိုရင် JL-1 ALBM ဒုံးကျည်ကို H-6N ဗုံးကြဲလေယာဉ်တွေပေါ်ကို တင်နိုင်မှာ ဖြစ်ပါ တယ်။ လေထဲ ရောက်သွားမယ်ဆိုရင်တော့ တရုတ်ဟာ ကြိုတင်လက်ဦးမှု ရယူတိုက်ခိုက်ဖို့ JL-1 ဒုံးကျည်နဲ့ လေကြောင်း တိုက်ခိုက်နိုင်ပါလိမ့်မယ်" ဟု ရော့ဂျာက ပြောကြားခဲ့သည်။

JL-1 ALBM ဒုံးကျည်သည် တရုတ်၏ ဗုံးကြဲလေယာဉ် တပ်ဖွဲ့များအတွက် ကာလကြာရှည် အသုံးပြုဖွယ်ရှိသည့် လက်နက် ဖြစ်လာလိမ့်မည်ဟုလည်း ၎င်းက ပြောကြားခဲ့သည်။

Source: South China Morning Post

CNI International News

စတော့ဟုမ်း၊ စက်တင်ဘာ ၁၂

ပြီးခဲ့သည့်နှစ်အတွင်း ကမ္ဘာတစ်ဝန်းတွင် ဒီမိုကရေစီစနစ်သည် ဆက်လက်ပြီး အားပျော့နေကြောင်း လေ့လာ တွေ့ရှိခဲ့သည်ဟု DW သတင်းဝက်ဘ်ဆိုက်တွင် ဖော်ပြခဲ့သည်။

စတော့ဟုမ်းအခြေစိုက် ဒီမိုကရေစီနှင့် ရွေးကောက်ပွဲဆိုင်ရာ ကူညီထောက်ပံ့ရေး နိုင်ငံတကာ အင်စတီကျု (IDEA) က ထုတ်ပြန်ခဲ့သည့် "၂၀၂၅ ခုနှစ် ကမ္ဘာလုံးဆိုင်ရာ ဒီမိုကရေစီ အခြေအနေ" အမည်ရှိ လေ့လာချက်တွင်၂၀၂၄ ခုနှစ်အတွင်း နိုင်ငံပေါင်း ၁၇၃ နိုင်ငံ၏ ဒီမိုကရေစီ စွမ်းဆောင်ရည်များကို လေ့လာခဲ့သည်။

ထိုလေ့လာချက်တွင် ပါဝင်သည့် နိုင်ငံ စုစုပေါင်း၏ ထက်ဝက်ကျော်ဖြစ်သော နိုင်ငံပေါင်း ၉၄ နိုင်ငံ၌ ၂၀၁၉ ခုနှစ်မှ ၂၀၂၄ ခုနှစ်ကြား အဓိကကျသည့် ဒီမိုကရေစီ ညွှန်းကိန်းများထဲမှ ညွှန်းကိန်းတစ်ခု လျော့ကျခဲ့သည်ကို တွေ့ရှိခဲ့ရ သည်။

နှိုင်းယှဉ်ချက်အရ လေ့လာမှုတွင် ပါဝင်သည့် နိုင်ငံစုစုပေါင်း၏ ၃ ပုံ ၁ ပုံခန့်သာ ဒီမိုကရေစီ စွမ်းဆောင်ရည်များ မြင့်တက်ခဲ့သည်ကို တွေ့ရှိခဲ့သည်။

"လက်ရှိ ကမ္ဘာပေါ်မှာ ဒီမိုကရေစီစနစ်ရဲ့ အခြေအနေက စိုးရိမ်နေရပါတယ်" ဟု IDEZ အတွင်းရေးမှူးချုပ် ကီဗင် ကာဆက် ဇမ်မိုရာ (Kevin Casas-Zamora) က ပြောကြားခဲ့သည်။

သတင်းထောက် ၂ ဦးကိုတွေ့ရစဉ်

အာဖရိကနိုင်ငံများသည် ကမ္ဘာပေါ်တွင် ဒီမိုကရေစီစနစ် ကျဆင်းမှု စုစုပေါင်း၏ ၃၃ ရာခိုင်နှုန်းရှိခဲ့ပြီး ဥရောပနိုင်ငံ များက ၂၅ ရာခိုင်နှုန်းဖြင့် ဒုတိယနေရာ၌ ရှိနေကြောင်း လေ့လာချက်မှာ ဖော်ပြခဲ့သည်။

အနောက်အာရှသည် ဒီမိုကရေစီ စွမ်းဆောင်ရည် အနိမ့်ကျဆုံးဒေသဖြစ်ခဲ့သည်။

ထို့ပြင် ကမ္ဘာ့တိုက်ကြီး ၇ တိုက်တွင်ရှိသည့် နိုင်ငံပေါင်း ၄၃ နိုင်ငံတွင် စာနယ်ဇင်း လွတ်လပ်ခွင့်များ ကျဆင်းခဲ့ပြီး ထို ၄၃ နိုင်ငံအနက် အာဖရိကနိုင်ငံ ၁၅ နိုင်ငံနှင့် ဥရောပနိုင်ငံ ၁၅ နိုင်ငံ ပါဝင်ခဲ့သည်။

"ဒီမိုကရေစီရဲ့ ကျန်းမာရေးကို ပြသတဲ့ အဓိကညွှန်းကိန်းတွေထဲက တစ်ခုဖြစ်တဲ့ စာနယ်ဇင်း လွတ်လပ်ခွင့်ဟာ အခုလို အခြေအနေမျိုးအထိ ဆိုးရွားနေတာကို တစ်ခါမှ မမြင်ခဲ့ဖူးပါဘူး" ဟု ဇမ်မိုရာက ပြောကြားခဲ့သည်။

စာနယ်ဇင်း လွတ်လပ်ခွင့် အဆိုးရွားဆုံး နိုင်ငံများစာရင်းတွင် အာဖဂန်နစ္စတန်၊ ဘာကီနာဖာဆို၊ မြန်မာနှင့် တောင်ကိုရီးယားနိုင်ငံတို့ ပါဝင်ခဲ့သည်။

Source: DW