CNI International News

ဒိုဟာ ၊ စက်တင်ဘာ ၁၂

ကာတာနိုင်ငံ၊ ဒိုဟာမြို့တော်ရှိ ဟားမာ့စ်ခေါင်းဆောင်များကို အစ္စရေးက ဆက်လက် တိုက်ခိုက်လာပါက စစ်ပွဲဖြစ်လာနိုင်လားဆိုကာ နိုင်ငံတကာက လေ့လာစောင့်ကြည့်နေကြသည်။

ကာတာနိုင်ငံ ဒိုဟာမြို့တော်ရှိ အဆောက်အအုံ တစ်ခုကို စက်တင်ဘာ ၉ ရက်က အစ္စရေး၏ လေကြောင်း တိုက်ခိုက်မှုကြောင့် ရာထူးနိမ့် ဟားမာ့စ်ခေါင်းဆောင် ၅ ဦးနှင့် ကာတာလုံခြုံရေး တာဝန်ရှိသူ ၁ ဦးတို့ သေဆုံး ခဲ့ကာ ကာတာက အစ္စရေး၏ ထိုလေကြောင်း တိုက်ခိုက်မှုကို ပြစ်တင်ရှုတ်ချခဲ့ကြောင်း DW သတင်း ဝက်ဘ်ဆိုက် တွင် ဖော်ပြခဲ့သည်။

ကာတာစော်ဘွား ရှိတ် တာမင် ဘင် ဟာမက် အယ် သာနီ(Sheikh Tamim bin Hamad Al Thani)က ထိုတိုက်ခိုက်မှုကို ပြစ်တင်ရှုတ်ချခဲ့ပြီး အစ္စရေးအနေဖြင့် ထိုဂယက်ရိုက်မှုများအတွက် တာဝန်ရှိသည်ဟု ပြောကြားခဲ့သည်။

ဒိုဟာမြို့ရှိ ဟားမာ့စ် ခေါင်းဆောင်တွေ နေတဲ့အဆောက်အအုံကို အစ္စရေးဗုံးကြဲလိုက်စဉ်

အစ္စရေးဝန်ကြီးချုပ် နေတန်ယာဟု( Benjamin Netanyahu)ကမူ ၂၀၂၃ ခုနှစ်၊ အောက်တိုဘာ ၇ ရက်က အစ္စရေးကို တိုက်ခိုက်ခဲ့သည့် ဟားမာ့စ်အဖွဲ၏ တိုက်ခိုက်မှုအား ကြိုးကိုင်ခဲ့သည့် ထိပ်သီး ဟားမာ့စ် ခေါင်းဆောင် များကို ပစ်မှတ်ထားခဲ့ခြင်းဖြစ်သဖြင့် ထိုတိုက်ခိုက်မှုသည် အပြည့်အဝ တရားမျှတမှုရှိကြောင်း ပြောကြားခဲ့သည်။

ဟားမာ့စ်အဖွဲ့၏ ထိပ်သီးဆွေးနွေးညှိနှိုင်းသူ ခါလီအယ်ဟေရာ(Khalil al-Hayya)၏ သားဖြစ်သူ ဟီမန် အယ် ဟေရာ (Himam al-Hayya) သေဆုံးခဲ့ကြောင်း ဟားမာ့စ်က အတည်ပြု ထုတ်ပြန်ထားသည်။

ခါလီအယ်ဟေရာ(Khalil al-Hayya)နှင့် ဟားမာ့စ်ခေါင်းဆောင် ခါလစ်မက်ရှယ်(Khaled Meshaal) တို့နှစ်ဦးလုံး အဆောက်အအုံထဲတွင် ရှိနေခဲ့သော်လည်း အေအက်ဖ်ပီ သတင်းဌာနက ၎င်းတို့ကို ဆက်သွယ်နိုင်ခြင်း မရှိသေး ပေ။

ထိုတိုက်ခိုက်မှုကြောင့် အရှေ့အလယ်ပိုင်းဒေသတွင် စစ်ပွဲသည် ပိုမိုပျံ့နှံ့လာနိုင်ကြောင်း ထင်ကြေးပေးမှုများ ထွက်ပေါ်ခဲ့သော်လည်း ကာတာနှင့် အစ္စရေးကြား တိုက်ရိုက်ပဋိပက္ခကို ဖြစ်ပွားလာနိုင်ခြေ မရှိကြောင်း ကျွမ်းကျင် သူများက လေ့လာသုံးသပ်ထားသည်။

အစ္စရေးဝန်ကြီးချုပ် နေတန်ယာဟုကို တွေ့ရစဉ်

ထိုလေကြောင်း တိုက်ခိုက်မှုသည် ဒေသတစ်ခုလုံးကို သတိပေးချက်ဖြစ်ကြောင်း ဗြိတိန်အခြေစိုက် ကျွမ်းကျင် ပညာရှင်အဖွဲ့ဖြစ်သည့် Chatham House မှ အရှေ့အလယ်ပိုင်းနှင့် မြောက်အာဖရိက စီမံကိန်းညွှန်ကြားရေးမှူး ဆာနမ်ဗာကီလ်(Sanam Vakil)က ပြောကြားခဲ့သည်။

သို့သော် အမေရိကန်နှင့် ခိုင်မာသော စီးပွားရေးနှင့်လုံခြုံရေး ပူးပေါင်းဆောင်ရွက်မှုများကြောင့် ပင်လယ်ကွေ့နိုင်ငံ များ အနေဖြင့် သတိကြီးကြီး ထားနေကြောင်း ၎င်းက သုံးသပ်ထားသည်။

ကာတာက အစ္စရေးကို စစ်ရေးအရ ပြန်လည်တုံ့ပြန် သွားဖွယ် မရှိသော်လည်း စီးပွားရေးဖိအားများ လုပ်ဆောင် နိုင်ကြောင်း နိုင်ငံခြားဆက်ဆံရေးဆိုင်ရာ ဥရောပကောင်စီမှ သုတေသီ ဟုချ်လိုဗက်(Hugh Lovatt) က ပြောကြား ခဲ့သည်။

Source: DW

CNI International News

ခတ္တမန္ဒူ၊ စက်တင်ဘာ ၁၂

နီပေါနိုင်ငံတွင် ယာယီဝန်ကြီးချုပ်ကို ရွေးချယ်ရေးနှင့်ပတ်သက်ပြီး နီပေါစစ်တပ်က Gen Z ဆန္ဒပြသူများနှင့် ဆွေးနွေးမှုများ ပြန်လည်စတင်ရန် စီစဉ်ထားကြောင်း နီပေါစစ်တပ် ပြောရေးဆိုခွင့်ရှိသူတစ်ဦးက ပြောကြားခဲ့ သည်ဟု ရိုက်တာမှ ဖော်ပြခဲ့သည်။

 နီပေါတွင် လူပေါင်း ၃၀ ခန့် သေဆုံးခဲ့ပြီး ဝန်ကြီးချုပ်ကို ရာထူးမှ နုတ်ထွက်စေခဲ့သည့် ဆန္ဒပြမှုများ ဖြစ်ပွားခဲ့ပြီး နောက် စက်တင်ဘာ ၁၀ ရက်၌ စစ်တပ်က လုံခြုံရေး အခြေအနေအား ဝင်ရောက်ထိန်းသိမ်းခဲ့သည်။

လက်ရှိတွင် နီပေါ ယာယီအစိုးရခေါင်းဆောင် ရာထူးနေရာအတွက် တရားရေးဝန်ကြီးဟောင်း ဆူရှီလာ ကာကီ (Sushila Karki) ကို ရွေးချယ်ဖွယ်ရှိကြောင်း သတင်းများ ထွက်ပေါ်နေသည်။

ကာကီသည် ၂၀၁၆ ခုနှစ်က တရားရေးဝန်ကြီးအဖြစ် ခန့်အပ်ခံခဲ့ရခြင်းဖြစ်ပြီး နီပေါနိုင်ငံ၏ ပထမဆုံး အမျိုးသမီး တရားရေးဝန်ကြီးအဖြစ် မှတ်တမ်းဝင်ခဲ့သူဖြစ်သည်။

“ဆူရှီလာ ကာကီက ရိုးသားပြီး ရဲရင့်တဲ့သူပါ။ သူ့ကိုရွေးချယ်တာက မှန်ကန်တဲ့ ရွေးချယ်မှုပါ။ အမှန်တရားက စကားပြောတတ်မယ်ဆိုရင် ကာကီရဲ့ အသံမျိုး ထွက်လာပါလိမ့်မယ်” ဟု နီပေါတရားရေးဝန်ကြီးဟောင်း ကာကီကို ထောက်ခံသည့် အသက် ၃၄ နှစ်အရွယ် ဆန္ဒပြသူတစ်ဦးက ပြောကြားခဲ့သည်။

တရားရေးဝန်ကြီးဟောင်း ဆူရှီလာ ကာကီကို တွေ့ရစဉ် 

အသက် ၇၃ နှစ်အရွယ် ကာကီသည် ယာယီအစိုးရအဖွဲ့ ခေါင်းဆောင်အဖြစ် တာဝန်ယူရန် သဘောတူထား သော်လည်း ၎င်းအား ရာထူးခန့်အပ်ရန်အတွက် ဖွဲ့စည်းပုံအခြေခံဥပဒေဆိုင်ရာ လုပ်ထုံးလုပ်နည်းတစ်ခုကို ရှာဖွေရလိမ့်မည်ဟု သတင်းရင်းမြစ်တစ်ခုက ပြောကြားခဲ့သည်။

သို့သော် ဆန္ဒပြသူများကြား ကာကီကို ယာယီအစိုးရအဖွဲ့ ခေါင်းဆောင်အဖြစ် ရွေးချယ်ခန့်အပ်ရေးနှင့် ပတ်သက် ပြီး သဘောထား ကွဲလွဲမှုများ ရှိနေဆဲဖြစ်ကြောင်း အခြားသတင်းရင်းမြစ်တစ်ခုက ပြောကြားခဲ့သည်။
ထိုအကြောင်းအရာနှင့် ပတ်သက်ပြီး ကာကီနှင့် နီပေါစစ်တပ်၏ ပြောရေးဆိုခွင့်ရှိသူတို့က မှတ်ချက်ပေးရန် တောင်းဆိုမှုကို ချက်ချင်းတုံ့ပြန်ခဲ့ခြင်းမရှိပေ။

လတ်တလောတွင် နီပေါနိုင်ငံ ခတ္တမန္ဒူ (Kathmandu) မြို့တော်နှင့် အနီးပတ်ဝန်းကျင် မြို့များတွင် ဈေးဆိုင်များ၊ စာသင်ကျောင်းများနှင့် ကောလိပ်များကို ပိတ်ထားဆဲဖြစ်သော်လည်း အခြေခံ ဝန်ဆောင်မှုလုပ်ငန်းများ ပြန်လည် ဖွင့်လှစ်နေပြီဖြစ်ကြောင်း သတင်းတွင် ဖော်ပြခဲ့သည်။

Source: ရိုက်တာ

CNI International News

ဝါဆော၊ စက်တင်ဘာ ၁၁

ပိုလန်က ၎င်း၏ လေပိုင်နက်အတွင်း ဝင်ရောက်လာသည့် ရုရှားဒရုန်းများကို စက်တင်ဘာ ၁၀ ရက်က ပစ်ချခဲ့ ကြောင်း ရိုက်တာမှ ဖော်ပြခဲ့သည်။

ထို့ကြောင့် ပိုလန်သည် ရုရှား-ယူကရိန်း စစ်ပွဲအတွင်း ရုရှားဒရုန်းများကို ပစ်ချခဲ့သည့် ပထမဆုံး နေတိုးအဖွဲ့ဝင် နိုင်ငံဖြစ်လာခဲ့သည်။

ယူကရိန်းကို တိုက်ခိုက်ခဲ့သည့် ရုရှား၏ အကြီးစား လေကြောင်းတိုက်ခိုက်မှုအတွင်း ပိုလန် လေပိုင်နက်အတွင်းသို့ အရာဝတ္ထု ၁၉ ခု ဝင်ရောက်လာသဖြင့် ခြိမ်းခြောက်မှုဟု ယူဆကာ ထိုအရာများအား ပစ်ချခဲ့ကြောင်း ပိုလန်က ပြောကြားခဲ့သည်။

ပိုလန်ဝန်ကြီးချုပ် ဒေါ်နယ်တာ့စ် (Donald Tusk) ကလည်း နေတိုးအဖွဲ့ သဘောတူစာချုပ်၏ အပိုဒ်ခွဲ ၄ ကို အသက်သွင်းခဲ့ကြောင်း ပြောကြားခဲ့သည်။ 

 ပိုလန်တိုက်လေယာဉ် အုပ်စုကိုတွေ့ရစဉ်

ထိုအပိုဒ်ခွဲ ၄ ကို ဖွင့်လိုက်ခြင်းဖြင့် ပိုလန်သည် နေတိုးမဟာမိတ် နိုင်ငံများထံမှ ဆွေးနွေး တိုင်ပင်မှုများကို တောင်းဆိုနိုင်မည်ဖြစ်သည်။

"ကျနော်တို့က အကြီးစား ရန်လိုမှုကို ဖြေရှင်းနေရပါတယ်။ အဲဒီလို ရန်စမှုတွေကို တွန်းလှန်ဖို့ ကျနော်တို့ဘက်က အသင့်ပြင်ထားပါတယ်။ အခြေအနေက စိုးရိမ်ရပါတယ်။ ကျနော်တို့ဟာ ဖြစ်လာနိုင်ခြေရှိတဲ့ စိတ်မှန်းဖြစ်နိုင်ခြေ အားလုံးအတွက် ပြင်ဆင်ထားတယ် ဆိုတာကို ဘယ်သူကမှ သံသယဖြစ်မှာ မဟုတ်ပါဘူး" ဟု တာ့စ်က ပြောကြား ခဲ့သည်။

ရုရှားဒရုန်းများသည် ပိုလန်လေပိုင်နက်ထဲ ကျူးကျော် ဝင်ရောက်ခဲ့သည့် စွပ်စွဲချက်များသည် အခြေအမြစ် မရှိကြောင်းနှင့် ပိုလန်သည် ၎င်းတို့ ပစ်ချခဲ့သည့် ဒရုန်းများသည် ရုရှား၏ ဒရုန်းများ ဖြစ်သည်ဆိုသည့် သက်သေ အထောက်အထားများကို ပြသခဲ့ခြင်းမရှိကြောင်း ရုရှားသံတမန်တစ်ဦး၏ ပြောကြားချက်ကို ရုရှားနိုင်ငံပိုင် RIA သတင်းအေဂျင်စီက ဖော်ပြခဲ့သည်။

ပိုလန်နိုင်ငံအလံကို တွေ့ရစဉ် 

ဥရောပအရာရှိ အချို့ကမူ ထိုကဲ့သို့ လေပိုင်နက် ချိုးဖောက်မှုသည် ရည်ရွယ်ချက်ရှိရှိ လုပ်ဆောင်ခြင်းဖြစ်ပြီး ရုရှား၏ စစ်ရေးအရှိန်မြှင့်သည့် လက္ခဏာဖြစ်ကြောင်း ပြောကြားခဲ့သည်။

စက်တင်ဘာ ၉ ရက် ညပိုင်းက ရုရှားဒရုန်းများကို ပစ်ချခဲ့သည့် ပူးတွဲစစ်ဆင်ရေးတွင် ပိုလန်၏ F-16 တိုက်လေယာဉ်များ၊ နယ်သာလန်၏ F-15 တိုက်လေယာဉ်၊ အီတလီ၏ AWACS ထောက်လှမ်းရေး လေယာဉ်များနှင့် နေတိုးအဖွဲ့က ပူးတွဲမောင်းနှင်သည့် လေထဲတွင် ဆီဖြည့်သည့် လေယာဉ်များ ပါဝင်ခဲ့ကြောင်း သတင်းရင်းမြစ်များက ပြောကြားခဲ့သည်။

ကနဦး လေ့လာချက်များအရ ဥရောပလေပိုင်နက်ထဲသို့ ရုရှား၏ ဒရုန်းများ ဝင်ရောက်မှုသည် မတော်တဆ မဟုတ်ဘဲ ရည်ရွယ်ချက်ရှိရှိ ဝင်ရောက်ခြင်းဖြစ်ကြောင်း ဥရောပသမဂ္ဂ ထိပ်သီးသံတမန် ကာဂျာ ကဲလက်စ်က ပြောကြားခဲ့သည်။

Source: ရိုက်တာ

CNI International News

ခတ္တမန္ဒူ၊ စက်တင်ဘာ ၁၁

နီပေါနိုင်ငံတွင် ပြီးခဲ့သည့်ရက်ပိုင်းက ဆန္ဒပြမှုများ၊ ဆူပူအုံကြွမှုများ ဖြစ်ပွားခဲ့ပြီးနောက် စက်တင်ဘာ ၁၀ ရက်၌ နီပေါစစ်သားများက ခတ္တမန္ဒူ (Kathmandu) မြို့တော်၏ လမ်းများပေါ်မှာ လုံခြုံရေးယူကာ အခြေအနေကို ထိန်းသိမ်းခဲ့ကြောင်း အေပီမှ ဖော်ပြခဲ့သည်။

နီပေါတွင် သောင်းနှင့်ချီသည့် ဆန္ဒပြသူများက အစိုးရအဆောက်အအုံများကို ဝင်ရောက်စီးနင်းခြင်း၊ မီးရှို့ခြင်း၊ နိုင်ငံရေးသမားများကို တိုက်ခိုက်ခြင်းတို့ ဖြစ်ပွားပြီးနောက် တရားဥပဒေစိုးမိုးရေးအား ပြန်လည်ထိန်းသိမ်းရန် အတွက် ပြည်သူများအနေဖြင့် နေအိမ်အတွင်းမှသာ နေထိုင်ကြရန် စစ်တပ်က အမိန့်ထုတ်ထားသည်။

ထို့ပြင် ခတ္တမန္ဒူမြို့တော်၌ ကာဖျူးမိန့် ထုတ်ပြန်ထားသဖြင့် လမ်းပေါ်တွင် သွားလာနေသည့် မော်တော်ယာဉ်များ နှင့် လူများကို စစ်ဆေးမည်ဖြစ်ကြောင်း စစ်သားများက ပြောကြားခဲ့သည်။

စက်တင်ဘာ ၉ ရက်ကလည်း စစ်တပ်သည် တရားဥပဒေစိုးမိုးရေးအတွက် လုံခြုံရေးတပ်ဖွဲ့ဝင်များက တာဝန်ယူ သွားမည်ဖြစ်ကြောင်း သတိပေးခဲ့သည်။

"ဆူပူအုံကြွမှုတွေကို အခွင့်ကောင်းယူပြီး အချို့အဖွဲ့တွေက သာမန်ပြည်သူတွေနဲ့ အစိုးရရုံး အဆောက်အအုံတွေ ကို ဖျက်ဆီးတာ၊ ပစ္စည်းတွေ ဝင်ရောက် လုယက်တာနဲ့ မီးရှို့တာတွေ ပြုလုပ်နေတဲ့ ရာဇဝတ်မှုတွေကို ရပ်တန်းက ရပ်တန့်ဖို စစ်တပ်က သတိပေးပါတယ်" ဟု နီပေါစစ်တပ်၏ ထုတ်ပြန်ချက်တွင် ဖော်ပြခဲ့သည်။

 နီပေါတွင် ဆန္ဒပြသူများက မီးရှို့နေစဉ်

ဆူပူအုံကြွမှုများအတွင်း ပစ္စည်းများကို ဝင်ရောက် လုယက်သည့် သံသယရှိသူ ၂၇ ဦးကို ဖမ်းဆီးထားကြောင်း လည်း စစ်တပ်က ထုတ်ပြန်ခဲ့သည်။

စက်တင်ဘာ ၉ ရက် အစောပိုင်းက ဆန္ဒပြသူများသည် အစိုးရ အဆောက်အအုံများ၊ နိုင်ငံရေးသမားများ၏ နေအိမ်များကို မီးရှို့ခဲ့ပြီးနောက် ဝန်ကြီးချုပ် ကေပီ ရှာမာအိုလီ (KP Sharma Oli) သည် ရာထူးမှ နုတ်ထွက် ကြောင်း ကြေညာခဲ့သည်။

ထို့ပြင် စက်တင်ဘာ ၉ ရက်က ဆန္ဒပြသူများ၏ တိုက်ခိုက်မှုကြောင့် လုံခြုံရေးတပ်ဖွဲ့ဝင်များသည် ၎င်းတို့၏ စစ်ဆေးရေး ဂိတ်စခန်းများကို စွန်ခွာထွက်ပြေးခဲ့ပြီးနောက် ခတ္တမန္ဒူမြို့တော်နှင့် အခြားမြို့များရှိ အကျဉ်းထောင် များတွင် ရာနှင့်ချီသည့် အကျဉ်းသားများ ထွက်ပြေးလွတ်မြောက်ခဲ့သည်။

နီပေါနိုင်ငံတွင် လူမှုမီဒီယာ ပလက်ဖောင်း ၂၆ မျိုးကို ပိတ်ပင်လိုက်ပြီးနောက် နိုင်ငံတစ်ဝန်းရှိ လူငယ်များ ဆန္ဒပြ ခဲ့ကြပြီး လုံခြုံရေး တပ်ဖွဲ့ဝင်များနှင့် အဓိကရုဏ်း ဖြစ်ပွားခဲ့သည်။

ထို့နောက် ပိတ်ပင်ထားသည့် လူမှုမီဒီယာများကို ပြန်ဖွင့်ပေးခဲ့ကြောင်း ပြန်ကြားရေးဝန်ကြီးဌာနက ကြေညာခဲ့ သည်။

Source: အေပီ

CNI International News

ဒိုဟာ၊ စက်တင်ဘာ ၁၁

အစ္စရေးက ကာတာနိုင်ငံ၊ ဒိုဟာ (Doha) မြို့တော်ရှိ ဟားမာ့စ်ခေါင်းဆောင်ကို ၂၀၂၅ ခုနှစ်၊ စက်တင်ဘာ ၉ ရက်က ဒုံးကျည်များဖြင့် ပစ်ခတ်တိုက်ခိုက်ခဲ့သည်ဟု DW သတင်းတွင် ဖော်ပြခဲ့သည်။

ထိုတိုက်ခိုက်မှုသည် ဟားမာ့စ်အဖွဲ့၏ အပစ်အခတ်ရပ်စဲရေး ဆွေးနွေးညှိနှိုင်းသူများ အပါအဝင် ဟားမာ့စ်ထိပ်သီး ခေါင်ဆောင်များကို ပစ်မှတ်ထားကြောင်း အစ္စရေးက ပြောကြားခဲ့သည်။

ကာတာနိုင်ငံကမူ အစ္စရေး၏ တိုက်ခိုက်မှုသည် နိုင်ငံတကာဥပဒေနှင့် ကာတာ၏ အချုပ်အခြာအာဏာကို ချိုးဖောက်ခြင်းဖြစ်ကြောင်း ဝေဖန်ရှုတ်ချခဲ့သည်။

ထို့ပြင် နိုင်ငံတကာကလည်း ကာတာနိုင်ငံအတွင်းသို့ တိုက်ခိုက်ခဲ့သော အစ္စရေးကို ပြင်းထန်စွာ ဝေဖန်ရှုတ်ချခဲ့ ကြသည်။

အစ္စရေးသည် ဒိုဟာမြို့တော်ရှိ နိုင်ငံခြားသံရုံးများ၊ စာသင်ကျောင်းများ၊ စူပါမားကက်များနှင့် လူနေတိုက်ခန်း အိမ်ရာများတည်ရှိသည့် West Bay Lagoon ဒေသကို တိုက်ခိုက်ခဲ့ခြင်းဖြစ်သည်။

အစ္စရေးအရာရှိတွေကိုတွေ့ရစဉ်

ထိုတိုက်ခိုက်မှုသည် ဟားမာ့စ်အဖွဲ့၏ အပစ်အခတ်ရပ်စဲရေး ဆွေးနွေးညှိနှိုင်းသူများကို ပစ်မှတ်ထားခြင်း ဖြစ်ကြောင်း ဟားမာ့စ်အရာရှိတစ်ဦးက ပြောကြားခဲ့သည်။

ထိုတိုက်ခိုက်မှုသည် အစ္စရေးက ကာတာကို ပထမဆုံးအကြိမ် တိုက်ခိုက်ခဲ့ခြင်းလည်း ဖြစ်သည်။

ဟားမာ့စ်အဖွဲ့၏ နိုင်ငံရေး ခေါင်းဆောင်များသည် ဒိုဟာမြို့တော်တွင် လွန်ခဲ့သည့် နှစ်များကတည်းက အခြေချ နေထိုင်ခဲ့ကြသည်။

အစ္စရေးအရာရှိတစ်ဦးက ထိုတိုက်ခိုက်မှုသည် ကာတာတွင် နေထိုင်သည့် ဂါဇာဒေသ အကြီးအကဲနှင့် ဟားမာ့စ် အဖွဲ့၏ ဆွေးနွေးညှိနှိုင်းရေးအရာရှိ ခါလီ  အယ်ဟေယာ (Khalil al-Hayya) အပါအဝင် ဟားမာ့စ်ခေါင်းဆောင် များကို ပစ်မှတ်ထားခြင်း ဖြစ်သည်ဟု ပြောကြားခဲ့သည်။

အစ္စရေးဝန်ကြီးချုပ် နေတန်ယာဟု (Benjamin Netanyahu) ကမူ အစ္စရေး၏ ဂျေရုဆလင် (Jerusalem) မြို့တော်တွင် ဖြစ်ပွားခဲ့သည့် ပစ်ခတ်မှုကို တုံ့ပြန်သည့် အနေဖြင့် ဒိုဟာမြို့တော်ကို ဒုံးကျည်ဖြင့် တိုက်ခိုက်ခဲ့ ခြင်းဖြစ်သည်ဟု ပြောကြားခဲ့သည်။

ကာတာနိုင်ငံအတွင်း အစ္စရေးတိုက်ခိုက်မှုကို တွေ့ရစဉ်

စက်တင်ဘာ ၈ ရက်က အစ္စရေး၏ အရှေ့ဂျေရုဆလင်ရှိ ဘတ်စ်ကား မှတ်တိုင်တစ်ခုတွင် ဖြစ်ပွားခဲ့သည့် တိုက်ခိုက်မှုအတွင်း လူ ၆ ဦးထက်မနည်း သေဆုံးခဲ့သည်။

အစ္စရေးဝန်ကြီးချုပ်နှင့် ကာကွယ်ရေးဝန်ကြီးတို့သည် ဟားမာ့စ်အဖွဲ့၏ တိုက်ခိုက်မှုများကို တုံ့ပြန်သည့် အနေဖြင့် ဒိုဟာတွင် ပြုလုပ်ခဲ့သော တိုက်ခိုက်မှုသည် တရားမျှတမှုရှိသည်ဟု ယူဆကြောင်း အစ္စရေးက ထုတ်ပြန်ခဲ့သည်။

ဟားမာ့စ်အဖွဲ့ကမူ ဒိုဟာတွင် အစ္စရေး၏ လေကြောင်း တိုက်ခိုက်မှုကြောင့် ဟားမာ့စ်အဖွဲ့ဝင် ၅ ဦး သေဆုံးသွား ခဲ့သော်လည်း ထိပ်သီးခေါင်းဆောင်သည် အသက်ရှင်လျက် လွတ်မြောက်ခဲ့ကြောင်း ပြောကြားခဲ့သည်။

Source: DW

CNI International News

နယူးဒေလီ၊ စက်တင်ဘာ ၁၁

အိန္ဒိယသည် မြန်မာနိုင်ငံရှိ အင်အားကြီးသူပုန်အဖွဲ့ KIA ၏ အကူအညီဖြင့် မြန်မာနိုင်ငံမှ မြေရှားသတ္တုနမူနာများ ကို ရရှိရန် ကြိုးပမ်းနေကြောင်း ရိုက်တာမှ ဖော်ပြခဲ့သည်။

ထိုအကြောင်းအရာနှင့် နီးစပ်သည့် သတင်းရင်းမြစ် ၄ ဦး၏ ပြောကြားချက်အား ကိုးကားပြီး ရိုက်တာမှ ဖော်ပြခဲ့ ခြင်းဖြစ်သည်။ 

တရုတ်က မြေရှားသတ္တုများ တင်ပို့ရောင်းချမှုများကို တင်းကျပ်စွာ ထိန်းချုပ်ခဲ့သဖြင့် အိန္ဒိယသည် မြေရှား သတ္တုများအား အခြားနေရာမှ ရရှိရန် ကြိုးပမ်းနေခြင်း ဖြစ်သည်။

အိန္ဒိယသတ္တုတွင်းဝန်ကြီးဌာနက ကချင်လွတ်လပ်ရေးတပ်မတော်(KIA) ထိန်းချုပ်ထားသည့် မြန်မာနိုင်ငံ အရှေ့မြောက်ပိုင်းဒေသရှိ သတ္တုတွင်းများမှ နမူနာများကို စုဆောင်းရယူရန်အတွက် နိုင်ငံပိုင်နှင့် ပုဂ္ဂလိကပိုင် ကုမ္ပဏီများအား တိုက်တွန်းထားကြောင်း သတင်းရင်းမြစ် ၃ ဦးက ပြောကြားခဲ့သည်။

ဗိုလ်ချုပ်မှူးကြီးမင်းအောင်လှိုင်နဲ့ အိန္ဒိယဝန်ကြီးချုပ် မိုဒီကို တွေ့ရစဉ်

အိန္ဒိယနိုင်ငံပိုင် IREL ကုမ္ပဏီနှင့် ပုဂ္ဂလိကပိုင် Midwest Advanced Materials ကုမ္ပဏီတို့သည် မြေရှားသတ္တု သံလိုက်များ စီးပွားဖြစ် ထုတ်လုပ်ရေးအတွက် ပြီးခဲ့သည့်နှစ်က အစိုးရထံမှ ရန်ပုံငွေများ လက်ခံရရှိခဲ့သည်ဟု ဆိုသည်။

အိန္ဒိယအစိုးရက လျှပ်စစ်ကားများနှင့် အခြားခေတ်မီပစ္စည်းများ ထုတ်လုပ်ရာတွင် အသုံးပြုသည့် သံလိုက်များ အဖြစ် ပြောင်းလဲထုတ်လုပ်နိုင်မည့် မြေရှားသတ္တု နမူနာများကို ပြည်တွင်း ဓာတ်ခွဲခန်းများ၌ စမ်းသပ်ရန် မျှော်လင့်ထားသည်ဟု ဆိုသည်။

ဇူလိုင်လအတွင်းက အိန္ဒိယသတ္တုတွင်းဝန်ကြီးဌာနသည် နိုင်ငံပိုင် IREL ကုမ္ပဏီနှင့် ပုဂ္ဂလိကပိုင် Midwest Advanced Materials ကုမ္ပဏီတို့နှင့် အွန်လိုင်းမှ အစည်းအဝေး ပြုလုပ်ပြီး ထိုကဲ့သို့ တိုက်တွန်းခဲ့ခြင်းဖြစ်သည်။

ထို့ကြောင့် အိန္ဒိယအစိုးရသည် ပြည်ပမှ အစိုးရမဟုတ်သည့် အခြားအဖွဲ့အစည်း တစ်ခုနှင့် ထိတွေ့ဆက်ဆံနေ သော အချက်ကို ထင်ရှားပေါ်လွင်စေခဲ့ကြောင်း သတင်းရင်းမြစ်များက ပြောကြားခဲ့သည်။

 မြန်မာနိုင်ငံက မြေရှားသတ္တုများကို ထုတ်ပိုးထားစဉ်

KIA သည် အိန္ဒိယ ကျွမ်းကျင်သူများအတွက် သတ္တုနမူနာများကို စတင် စုဆောင်းပေးနေကြောင်း KIA ၏ အရာရှိ တစ်ဦးဖြစ်သည့် စတုတ္ထမြောက် သတင်းရင်းမြစ် ၁ ဦးက ပြောကြားခဲ့သည်။

KIA သည် အိန္ဒိယသို့ မြေရှားသတ္တု အများအပြား တင်ပို့ရောင်းချရန် ဖြစ်နိုင်မည်ဆိုပါက မြေရှား နမူနာများကို လေ့လာခွင့်ပေးရန် သဘောတူခဲ့သည်ဟုလည်း အမည်မဖော်လိုသည့် KIA အရာရှိတစ်ဦးက ပြောကြားခဲ့သည်။

အိန္ဒိယနှင့် KIA တို့၏ ထိတွေ့ဆက်ဆံမှု အသေးစိတ်ကို ရိုက်တာသတင်းဌာနက ပထမဆုံးအကြိမ် သတင်း ထုတ်ပြန်ခဲ့ခြင်းဖြစ်သည်။

ထိုအကြောင်းအရာနှင့် ပတ်သက်ပြီး ရိုက်တာသတင်းဌာန၏ မှတ်ချက် တောင်းခံမှုကို အိန္ဒိယနိုင်ငံခြားရေးနှင့် သတ္တုတွင်းဝန်ကြီးဌာနများက တုံ့ပြန်ခဲ့ခြင်းမရှိပေ။

ထို့ပြင် KIA အဖွဲ့ကလည်း ရိုက်တာသတင်းဌာန၏ ဖုန်းခေါ်ဆိုမှုများနှင့် မက်ဆေ့ချ် ပေးပို့မှုများကို တုံ့ပြန်ခဲ့ခြင်း မရှိပေ။

ထို့အတူ IREL နှင့် Midwest ကုမ္ပဏီတို့ကလည်း မှတ်ချက်ပေးရန် တောင်းဆိုချက်များကို ဖြေကြားခဲ့ခြင်းမရှိပေ။

Source: ရိုက်တာ

CNI International News

ဘန်ကောက်၊ စက်တင်ဘာ ၁၀

ထိုင်းနိုင်ငံတွင် စက်တင်ဘာ ၅ ရက်က လွှတ်တော်တွင်း အထူးအစည်းအဝေး၌ ဘူဂျထိုင်းပါတီ ခေါင်းဆောင် အနူတင် ချန်ဗီရာကူလ် (Anutin Charnivirakul) ကို ဝန်ကြီးချုပ်အဖြစ် မဲပေးရွေးချယ်ခဲ့ပြီးနောက် စက်တင်ဘာ ၇ ရက်မှာပဲ ထိုင်းဘုရင်က အနူတင်ကို ဝန်ကြီးချုပ်အဖြစ် အတည်ပြု ခန့်အပ်ခဲ့သည်။

ထိုင်းဝန်ကြီးချုပ်သစ် အနူတင် (အသက် ၅၈ နှစ်)သည် ထိုင်းနိုင်ငံ၏ အကြီးဆုံး ဆောက်လုပ်ရေး လုပ်ငန်းများထဲ တွင် တစ်ခု အပါအဝင်ဖြစ်သည့် Sino-Thai ကုမ္ပဏီကို အမွေဆက်ခံသူဖြစ်သည်။

သူသည် ၁၉၉၀ ပြည့်နှစ် ကာလများအတွင်း နိုင်ငံရေးလောကသို့ မဝင်မီ ထိုကုမ္ပဏီ၏ ဥက္ကဋ္ဌအဖြစ် တာဝန်ယူခဲ့ဖူး သူ ဖြစ်သည်။

ထို့နောက် အနူတင်သည် နိုင်ငံရေးလောကထဲသို့ ဝင်ရောက်လာခဲ့ပြီး ဒုတိယဝန်ကြီးချုပ်အဖြစ် ၆ နှစ်၊ ၂၀၁၉ ခုနှစ် မှ ၂၀၂၃ ခုနှစ်အထိ ကျန်းမာရေးဝန်ကြီး၊ ယခုနှစ် မတိုင်မီအထိ ပြည်ထဲရေးဝန်ကြီးရာထူး အပါအဝင် ထိပ်သီး ရာထူးနေရာများတွင် တာဝန်ထမ်းဆောင်ခဲ့ဖူးသည်။

အနူတင် ကျန်းမာရေးဝန်ကြီးအဖြစ် တာဝန်ထမ်းဆောင်ချိန်က COVID-19 ကပ်ရောဂါ ဖြစ်ပွားချိန်နှင့် တိုက်ဆိုင်ခဲ့ သည်။

ဝန်ကြီးချုပ်ရာထူးက ဖယ်ရှားခံရတဲ့ ပေတုန်တန်ကို တွေ့ရစဉ် 

ထို့ပြင် သူသည် ထိုင်းနိုင်ငံတွင် ဆေးခြောက်ကို တရားဝင် အသုံးပြုခွင့်ရရေးအတွက် ဦးဆောင် ကြိုးပမ်းခဲ့ပြီး ၂၀၂၂ ခုနှစ်၌ ထိုင်းသည် အာရှမှာ ဆေးခြောက်ကို တရးဝင် အသုံးပြုခွင့်ရခဲ့သည့် ပထမဆုံးအာရှနိုင်ငံ ဖြစ်လာခဲ့သည်။

ထို့ကြောင့် မီဒီယာများက အနူတင်ကို ဆေးခြောက်ဘုရင် (cannabis king) ဟု အမည်ပြောင်ပေးခဲ့ကြသည်။

အနူတင်သည် လစ်ဘရယ်နိုင်ငံရေး ခံယူချက်ကြောင့် သာမက ဘုရင်စနစ်ကို ခိုင်မာစွာ ထောက်ခံသူ၊ ကွန်ဆာဗေး တစ် ဘူဂျထိုင်းပါတီ၏ ခေါင်းဆောင်အဖြစ်လည်း လူသိများခဲ့သည်။

အနူတင်သည် ဝန်ကြီးချုပ်ရာထူး ခန့်အပ်ခံခဲ့ရပြီးနောက် နိုင်ငံအတွင်း စားဝတ်နေရေး ကုန်ကျစရိတ် မြင့်တက်မှု၊ ကမ္ဘောဒီးယားနှင့် နယ်စပ်ဒေသတင်းမာမှု၊ မူးယစ်ဆေးဝါးနှင့် လူမှောင်ခိုကူးမှု၊ ကျားဖြန့်ဂိုဏ်းများ အပါအဝင် ထိုင်းနိုင်ငံ၏ ချမ်းသာကြွယ်ဝမှုကို ခြိမ်းခြောက်နေသည့် အရေးကိစ္စများကို ဦးစားပေး ဖြေရှင်းသွားမည်ဟု ပြောကြားခဲ့သည်။

"လူနည်းစု အစိုးရဖြစ်တာကြောင့် လူများစု အစိုးရလိုမျိုး လုပ်ငန်းတာဝန်တွေကို အဆင်ပြေချောမွေ့စွာ လုပ် ဆောင်ဖို့ ခက်ခဲပါတယ်။ အထူးသဖြင့် လွှတ်တော်မှာပေါ့။ အဲဒါကြောင့် အောက်လွှတ်တော် ကိုယ်စားလှယ် တွေ အနေနဲ့ သဘောထားချင်း မတိုက်ဆိုင်မှုတွေကို ဘေးချိတ်ပြီး ပြည်သူ့အကျိုးကို ရှေ့တန်းတင်ဖို့ ကျနော် မေတ္တာရပ်ခံပါတယ်" ဟု အနူတင်က ပြောကြားခဲ့သည်။

ကမ္ဘောဒီးယားဝန်ကြီးချုပ် ဟွန်မာနက် (Hun Manet) ကလည်း အနူတင်၏ အောင်ပွဲကို ဂုဏ်ပြုကြောင်းနှင့် နှစ်နိုင်ငံကြား ငြိမ်းချမ်းရေး၊ ပူးပေါင်းဆောင်ရွက်ရေး၊ ယုံကြည်မှု ပြန်လည်တည်ဆောက်ရေးတို့ကို ပြန်လည် ထိန်းသိမ်းရန် မျှော်လင့်ထားကြောင်း ပြောကြားခဲ့သည်။

Source: DW

CNI International News

တဲလ် အဗစ်၊ စက်တင်ဘာ ၁၀

အစ္စရေးစစ်တပ်က ဂါဇာကမ်းမြောင်ဒေသ မြောက်ပိုင်းကို စစ်ဆင်ရေး ချဲ့ထွင်ရန် စီစဉ်ထားသဖြင့် ဂါဇာစီးတီး မြို့တွင် နေထိုင်သူ အားလုံးကို နေရာ ရွှေ့ပြောင်းကြရန်  စက်တင်ဘာ ၁၀ ရက်က တိုက်တွန်းခဲ့ကြောင်း အေပီမှ ဖော်ပြခဲ့သည်။

ထိုကြေညာချက်သည် လက်ရှိ တိုက်ခိုက်မှုများ ဆက်လက် ဖြစ်ပွားနေချိန်တွင် ဂါဇာစီးတီးမြို့ခံ အားလုံးကို ရွှေ့ပြောင်းရန် ပထမဆုံး သတိပေးချက် တစ်ခုဖြစ်ခဲ့သည်။

အစ္စရေးသည် ဂါဇာရှိ ဟားမာ့စ်အဖွဲ့ အသုံးပြုနေသည့် အထပ်မြင့် အဆောက်အအုံ ၃၀ ကို ဖျက်ဆီးခဲ့ကြောင်း အစ္စရေးကာကွယ်ရေးဝန်ကြီး အစ္စရေးကက်ဇ် (Israel Katz) က စက်တင်ဘာ ၉ ရက်တွင် ပြောကြားခဲ့သည်။

လက်ရှိ အချိန်အထိ အစ္စရေးသည် ဟားမာ့စ်တို့ အသုံးပြုခဲ့သည့် အထပ်မြင့် အဆောက်အအုံ ၅၀ ထက်မနည်းကို ဖျက်ဆီးခဲ့ပြီး ဖြစ်သည်ဟု အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) က စက်တင်ဘာ ၈ ရက်တွင် ပြောကြားခဲ့သည်။

ကက်ဇ် ပြောခဲ့သည့် အထပ်မြင့် အဆောက်အအုံများနှင့် နေတန်ယာဟု ပြောခဲ့သည့် အထပ်မြင့် အဆောက်အအုံ များသည် တူညီမှု ရှိ၊ မရှိ ရှင်းလင်းစွာ မသိရသေးပေ။

ပြီးခဲ့သည့် ရက်များအတွင်း အစ္စရေးသည် ဂါဇာစီးတီးမြို့ရှိ အထပ်မြင့် အဆောက်အအုံ အများအပြားကို ဖျက်ဆီး ခဲ့သည်။

ဟားမာ့စ်အဖွဲ့သည် ထိုအထပ်မြင့် အဆောက်အအုံများတွင် ထောက်လှမ်းရေး ကိရိယာများ တပ်ဆင်ခဲ့ကြောင်း အစ္စရေးက စွပ်စွဲခဲ့သည်။

လက်ရှိတွင် ဂါဇာစီးတီးမြို့တွင် ပါလက်စတိုင်း ၁ သန်းခန့် နေထိုင်လျက်ရှိပြီး ၎င်းတို့အနက် မြို့ခံအနည်းငယ်သာ နေရာရွှေ့ပြောင်းသွားခဲ့သည်။

ဂါဇာစီးတီးမြို့မှ ဒေသခံများ ရွှေ့ပြောင်းရေးသည် မလွှဲသာမရှောင်သာ အခြေအနေဖြစ်ပြီး ပါလက်စတိုင်း မိသားစု များအနေဖြင့် လူသားချင်း စာနာထောက်ထားမှု အကူအညီများကို ရယူရန် ဂါဇာတောင်ပိုင်းသို့ သွားရောက်ကြရန် အစ္စရေးစစ်တပ်၏ ပြောရေးဆိုခွင့်ရှိသူ ဗိုလ်မှူးကြီး အဗီချေး အန်ဒရာအီက ပြီးခဲ့သည့် သီတင်းပတ်အတွင်း ပြောကြားခဲ့သည်။

Source: အေပီ

CNI International News

ဝါရှင်တန်၊ စက်တင်ဘာ ၁၀

အမေရိကန်သမ္မတ ဒေါ်နယ်ထရမ့်က အီလီနွိုက်စ် (Illinois) ပြည်နယ်၊ ချီကာဂို (Chicago) မြို့တွင် တရားမဝင် ရွှေ့ပြောင်းများကို နှိမ်နင်းမှုအား စတင်ခဲ့ကြောင်း South China Morning Post မှ ဖော်ပြခဲ့သည်။

ဒီမိုကရက်များ အုပ်ချုပ်သည့် မြို့များတွင် ရာဇဝတ်မှုများနှင့် ဆူပူမှုများ ဖြစ်ပွားနေကြောင်း အိမ်ဖြူတော်က ပြောကြားခဲ့ပြီး ထိုမြို့များတွင် ဖက်ဒရယ်အေးဂျင့်များသည် ရွှေ့ပြောင်းများအား နှိမ်နင်းမှုကို အရှိန်မြှင့် လုပ်ဆောင်နေသည်။

Operation Midway Blitz အမည်ရှိ စစ်ဆင်ရေးကို အီလီနွိုက်ပြည်နယ်၏ ချီကာဂိုမြို့နှင့် အခြား နေရာများတွင် စတင်ခဲ့ပြီး တရားမဝင် ရွှေ့ပြောင်းများ၏ ရာဇဝတ်မှုများကို ပစ်မှတ်ထားနေကြောင်း အမိမြေလုံခြုံရေးဝန်ကြီးဌာန (DHS)က စက်တင်ဘာ ၈ ရက်၌ ထုတ်ပြန်ခဲ့သည်။

ဒီမိုကရက်တစ်ဦးဖြစ်သည့် အီလီနွိုက်စ်ပြည်နယ် အုပ်ချုပ်ရေးမှူး ဂျေဘီ ပရစ်ဇ်ကာ (JB Pritzker) သည် တရား ဥပဒေချိုးဖောက်သူများကို အကာအကွယ် ဖြစ်စေနိုင်သည့် မူဝါဒများ ချမှတ်ခဲ့ကြောင်း DHS က ဝေဖန်ပြစ်တင်ခဲ့ သည်။

ဖက်ဒရယ်အစိုးရ၏ လုပ်ဆောင်ချက်အရ အိမ်ဖြူတော်နှင့် ဒီမိုကရက်တစ် မြို့တော်ဝန်များ၊ ပြည်နယ် အုပ်ချုပ်ရးမှူးများအကြား နိုင်ငံတော်အဆင့် ထိပ်တိုက်တွေ့မှုသည် ပိုမိုပြင်းထန်လာသည့် အခြေအနေကို ဖော်ပြရာ ရောက်ခဲ့သည်။

ချီကာဂိုမြို့ရှိ ထရမ့်တာဝါရှေ့မှာ ဆန္ဒပြနေစဉ်

ထရမ့်၏ လုပ်ဆောင်ချက်များသည် ဖက်ဒရယ်အဆင့် မဟုတ်ဘဲ ပြည်နယ်အဆင့်နှင့် မြို့အဆင့် တရားဥပဒေ စိုးမိုးရေး လုပ်ငန်းစဉ်ကို ကြားဝင်စွက်ဖက်နေခြင်းဖြစ်ကြောင်း ဒီမိုကရက်တစ် မြို့တော်ဝန်များနှင့် ပြည်နယ် အုပ်ချုပ်ရေးမှူများက ဝေဖန်ခဲ့ကြသည်။

ချီကာဂိုတွင် ရွှေ့ပြောင်းများအား စတင်နှိမ်နင်းသည့် ထရမ့်၏ လုပ်ဆောင်ချက်ကို ပြည်နယ်အုပ်ချုပ်ရေးမှူး ပရစ်ဇ်ကာက ဝေဖန်ခဲ့ပြီး ထရမ့်သည် အမေရိကန်၏ တတိယအကြီးဆုံး မြို့ဖြစ်သည့် ချီကာဂိုတွင် မလိုအပ်ဘဲ အကြောက်တရားများကို ရိုက်သွင်းနေခြင်းဖြစ်ကြောင်း စွပ်စွဲခဲ့သည်။

“နောက်တစ်ကြိမ် ထပ်လုပ်ပြန်ပြီ။ ဒါက ရာဇဝတ်မှုကို တိုက်ဖျက်တာ မဟုတ်ပါဘူး။ ပြည်သူ့လုံခြုံရေးအတွက် ကျနော်တို့နဲ့ ပူးပေါင်းဆောင်ရွက်ရမယ့်အစား ထရမ့်အစိုးရက အီလီနွိုက်စ်ပြည်နယ်မှာ နေတဲ့သူတွေကို ထိတ်လန့် တုန်လှုပ်အောင် လုပ်ဆောင်နေတာ ဖြစ်ပါတယ်”ဟု ပရစ်ဇ်ကာက ပြောကြားခဲ့သည်။

အမေရိကန် လူဝင်မှုနှင့် အကောက်ခွန် အာဏာပိုင်အဖွဲ့(ICE) သည် စက်တင်ဘာ ၈ ရက်တွင် ICE အမှတ်တံဆိပ် ပါသည့် ကား ၁ စီးသည် ချီကာဂိုမြို့ရှိ အထင်ကရ အဆောက်အအုံများဖြစ်သည့် Chicago Board of Trade အဆောက်အအုံနှင့် Willis Tower တို့ကို နောက်ခံထားပြီး ရိုက်ကူးထားသော ဓာတ်ပုံကို လူမှုမီဒီယာတွင် တင်ခဲ့သည်။

သို့သော် ၎င်းတို့၏ စစ်ဆင်ရေးနှင့်ပတ်သက်ပြီး အသေးစိတ် အချက်အလက်များ ရေးသားဖော်ပြခဲ့ခြင်း မရှိပေ။

Source: South China Morning Post