CNI International News

ဘန်ကောက်၊ ဇွန်လ ၃

နယ်စပ်ဖြတ်ကျော် ကုန်သွယ်မှုများ ရပ်တန့်သွားမည်ဆိုပါက စီးပွားရေး ထိခိုက်စေနိုင်သည့် စိုးရိမ်မှုနှင့် ကမ္ဘောဒီးယားနိုင်ငံ၏ တောင်းဆိုချက်ကြောင့် ကမ္ဘောဒီးယားနှင့်ထိစပ်နေသော နယ်စပ်ကိုမပိတ်ရန် ထိုင်းဝန်ကြီးချုပ် ပေတုန်တန်(Paetongtarn Shinawatra ) က ထိုင်းစစ်တပ်ကို တိုက်တွန်းခဲ့ကြောင်း The Nation မှ ဖော်ပြခဲ့သည်။

ထိုင်းနှင့်ကမ္ဘောဒီးယား နယ်စပ် တစ်နေရာဖြစ်သည့် Chong Bok ဒေသတွင် နှစ်နိုင်ငံစစ်သားများကြား အပြန်အလှန် ပစ်ခတ်မှု ဖြစ်ပွားခဲ့ပြီးနောက် တင်းမာမှုများ မြင့်တက်နေချိန်၌ စစ်တပ်အနေဖြင့် ထိန်းထိန်း သိမ်းသိမ်း လုပ်ဆောင်ရန် ထိုင်းအစိုးရက တိုက်တွန်းထားသည်။

ကမ္ဘောဒီးယားတပ်ဖွဲ့အချို့သည် ထိုင်းနယ်နိမိတ်အတွင်း ဝင်ရောက်ခဲ့ပြီး လက်နက်ကြီးများကို ထိုင်းဘက်သို့ မျက်နှာမူပြီး ဖြန့်ကြက်ချခဲ့ကြောင်း ထိုင်းစစ်တပ် သတင်းရင်းမြစ်များက ပြောကြားခဲ့သည်။

ထိုင်း၏ အချုပ်အခြာ အာဏာပိုင်နယ်မြေဟု ယူဆထားသည့် နယ်မြေများအတွင်းသို့ ကမ္ဘောဒီးယားတပ်ဖွဲ့များ ကျူးကျော်ဝင်ရောက်မှုကို ထိုင်းတော်ဝင်စစ်တပ်က အစိုးရအဖွဲ့ကို အသိပေးထားသည်ဟုလည်း ဆိုသည်။

ထိုင်းဝန်ကြီးချုပ်ပေတုန်တန်နဲ့ လုံခြုံရေးအရာရှိတွေကိုတွေ့ရစဉ်

ထိုအခြေအနေကို တုံ့ပြန်သည့် အနေဖြင့် ထိုင်းစစ်တပ်သည် ကမ္ဘောဒီးယားနှင့် ထိစပ်နေသော နယ်စပ်အားလုံးကို ပိတ်ရန် အဆိုပြုခဲ့ပြီး ယခုကဲ့သို့ အရေးမယူဘဲ စောင့်ကြည့်နေခြင်းသည် ကျူးကျော်မှုကို လက်ခံသည့်သဘော သက်ရောက်သွားနိုင်ကြောင်း စစ်တပ်က သတိပေးခဲ့သည်။

သို့သော် အစိုးရအဖွဲ့ကမူ စီးပွားရေးအပေါ် သက်ရောက်မှု အလားအလာ၊ နယ်စပ်ဖြတ်ကျော် ကုန်သွယ်မှု အစရှိ သည့် အခြေအနေများကြောင့် ချက်ချင်း အရေးယူ ဆောင်ရွက်ခြင်းမပြုရန် အကြံပြုထားသည်။

ယခုပြဿနာကို သံတမန်နည်းလမ်းဖြင့် ဖြေရှင်းခြင်းသည် အရေးကြီးကြောင်း၊ အထူးသဖြင့် ဇွန်လလယ်ပိုင်းတွင် ထိုင်း-ကမ္ဘောဒီးယား နယ်စပ်ရေးရာ ပူးတွဲကော်မတီ (JBC) အစည်းအဝေး ပြုလုပ်မည်ဖြစ်ကြောင်း ပြောကြား ခဲ့သည်။

ကမ္ဘောဒီးယား ဒုတိယဝန်ကြီးချုပ်နှင့် ကာကွယ်ရေးဝန်ကြီး ဗိုလ်ချုပ်ကြီး တီးဆိုင်ဟာ (Tea Seiha) ကလည်း ထိုင်းဒုတိယဝန်ကြီးချုပ်နှင့် ကာကွယ်ရေးဝန်ကြီးဖြစ်သည့် ဖွမ်သမ် ဝီချာယာချိုင်း (Phumtham Wechayachai) ကို ဖုန်းခေါ်ပြီး နယ်စပ်ကို မပိတ်ရန် တောင်းဆိုခဲ့သည်။

ထို့ကြောင့် ပေတုန်တန်နှင့် ဖွမ်သမ်တို့က နှစ်နိုင်ငံ စစ်တပ်အချင်းချင်း တိုက်ရိုက်ဆွေးနွေးမှုများ ပြုလုပ်ရန်နှင့် နယ်စပ်ကို မပိတ်ဘဲ သံတမန်နည်းလမ်းဖြင့် ဖြေရှင်းရန် ထိုင်းစစ်တပ်ကို တိုက်တွန်းခဲ့သည်။

Source: The Nation

CNI International News

ကိယက်ဗ်၊ ဇွန်လ ၃

ယူကရိန်းသည် ရုရှားနယ်နိမိတ် အတွင်းပိုင်းရှိ လေယာဉ်အစင်း ၄၀ ကျော်ကို ဒရုန်းများဖြင့် တိုက်ခိုက်ဖျက်ဆီး နိုင်ခဲ့သည်ဟု ယူကရိန်းထောက်လှမ်းရေးအဖွဲ့က ဇွန်လ ၁ ရက်တွင် ပြောကြားခဲ့ကြောင်း အေပီမှ ဖော်ပြခဲ့သည်။

ထိုတိုက်ခိုက်မှုသည် ယူကရိန်းသမ္မတ ဇာလန်းစကီး (Volodymyr Zelenskyy) ၏ ညွှန်ကြားချက်ဖြင့် ရုရှား၏ အတွင်းပိုင်းကို နက်ရှိုင်းစွာ ဝင်ရောက် တိုက်ခိုက်မှုဖြစ်ကြောင်း အမည်မဖော်လိုသည့် ယူကရိန်းစစ်တပ် အရာရှိ တစ်ဦးက ပြောကြားခဲ့သည်။

ဇာလန်းစကီးကလည်း မွန်းလွဲပိုင်းတွင် ပြောကြားခဲ့သည့် မိန့်ခွန်းအတွင်း ထိုစစ်ဆင်ရေးအတွက် ဒရုန်းအစင်းရေ ၁၁၇ စင်းကို အသုံးပြုခဲ့ကြောင်း ပြောကြားခဲ့သည်။

ထိုစစ်ဆင်ရေးကို ရုရှား၏ ထောက်လှမ်းရေးအဖွဲ့ဖြစ်သည့် FSB ၏ ဌာနချုပ်အနီးတွင် ပြုလုပ်ခဲ့ခြင်းဖြစ်သည်ဟု ဇာလန်းစကီးက ပြောသည်။

စစ်ဆင်ရေးအတွင်း ကင်မရာများ တပ်ဆင်ထားသည့် ဒရုန်းများကို ရွှေ့ပြောင်းနိုင်သည့် သစ်သားအိမ်များအတွင်း ထားရှိခဲ့ပြီး ရုရှားသို့ လျှို့ဝှက်တင်သွင်းခဲ့ခြင်းဖြစ်ကာ လုပ်ငန်းစဉ်များသည် အလွန်ရှုပ်ထွေးခဲ့ကြောင်း စစ်တပ် သတင်းအရင်းအမြစ်တစ်ခုက ပြောကြားခဲ့သည်။

ယူကရိန်းသမ္မတ ဇာလန်းစကီးကို တွေ့ရစဉ်

ထို့နောက် မှန်ကန်သည့် အချိန်နှင့် မှန်ကန်သည့် အကွာအဝေးသို့ ရောက်ရှိချိန်တွင် ထရပ်ကားများပေါ်၌  တင်ထားသော သစ်သားအိမ်များ၏ ခေါင်မိုးများကို အဝေးထိန်း စနစ်ဖြင့်ဖွင့်ပြီး အိမ်များအတွင်းရှိ ဒရုန်းများအား လွှတ်တင်ကာ ရုရှားဗုံးကြဲလေယာဉ်များထံ ပျံသန်းသွား၍ တိုက်ခိုက်ဖျက်ဆီးခဲ့ခြင်း ဖြစ်သည်ဟု ထိုသတင်းရင်း မြစ်က ပြောကြားခဲ့သည်။

ထိုဒရုန်းများသည် ဇွန်လ ၁ ရက် မွန်းလွဲပိုင်းက ရုရှား၏ စစ်လေယာဉ်ကွင်းတစ်ခုရှိ  A-50၊ Tu-95 နှင့် Tu-22M တို့ အပါအဝင် လေယာဉ် ၄၁ စင်းကို ဖျက်ဆီးနိုင်ခဲ့သည်ဟု ဆိုသည်။

ရုရှားသည် ယခင်က ယူကရိန်းကို ဒုံးကျည်များဖြင့် တိုက်ခိုက်ရန် Tupolev Tu-95 နှင့် Tu-22 ဗုံးကြဲလေယာဉ် များအား အသုံးပြုခဲ့သည်။

Web ဟု အမည်ပေးထားသော ထိုစစ်ဆင်ရေးအတွင်း ရုရှား၏ ဒုံးကျည်များ တင်ဆောင်နိုင်သည့် လေယာဉ်အုပ်စု ၏ ၃၄ ရာခိုင်နှုန်းကို ဖျက်ဆီးနိုင်ခဲ့ပြီး ဆုံးရှုံးနစ်နာမှု တန်ဖိုးသည် ဒေါ်လာ ၇ ဘီလျံခန့်ရှိကြောင်း ယူကရိန်း ထောက်လှမ်းရေးအဖွဲ့က ပြောကြားခဲ့သည်။

ရုရှားကာကွယ်ရေးဝန်ကြီးဌာနကလည်း ယူကရိန်းနယ်စပ်နှင့် ကီလိုမီတာ ၄၀၀၀ (မိုင် ၂၅၀၀) အကွာရှိ အိရ်ကုစ် (Irkutsk) ဒေသရှိ လေတပ်စခန်း တိုက်ခိုက်ခံရပြီး လေယာဉ်များ ပျက်စီးခဲ့ကြောင်း အတည်ပြုခဲ့သည်။

Source: အေပီ

CNI News

၂၀၂၅ ခုနှစ်၊ ဇွန်လ ၂

မြန်မာနိုင်ငံတွင် ၂၀၂၅ ခုနှစ်အတွင်း ရွေးကောက်ပွဲ ကျင်းပနိုင်ရေးအတွက် မြန်မာ့တပ်မတော် အနေဖြင့် နယ်မြေ စိုးမိုးရေးများကို အဓိကလုပ်ဆောင်လာနိုင်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

ယခု မြန်မာ့နိုင်ငံရေး အခင်းအကျင်းတွင် တပ်မတော်ဘက်မှ ဆုံးရှုံးလိုက်ရမှုများသည် တစ်ခါမှ မကြုံဖူးသည့် အခင်းအကျင်း ဖြစ်သောကြောင့် လက်ရှိတွင် ပြန်လည်ပြင်ဆင်မှုများ လုပ်ဆောင်နေကြောင်း၊ ထို့ကြောင့် စစ်‌ရေး အခင်းအကျင်းမှာ ပိုမိုဖြစ်ပေါ်လာနိုင်ပြီး တပ်မ‌တော်ဘက်မှ ပြင်းထန်သည့် တုံ့ပြန်မှုများကို မြင်တွေ့ရနိုင်ဖွယ် ရှိကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “ထုံးစံကတော့ ပါသွားတဲ့ နယ်မြေကို ပြန်တိုက်မှာပေါ့။ ဒါကတော့ ကန့်သတ်ချက်တွေတော့ အများကြီးရှိ တာပေါ့။ ရိက္ခာထောက်ပံ့ရေး အနေအထား၊ လက်နက်ခဲယမ်း သုံးစွဲနိုင်မှုအနေအထား ဒါတွေက ရှိသေးတဲ့ အခါကြ တော့ တစ်နိုင်ငံလုံးအတွက် အရေးကြီးတဲ့ ဒီမိုကရေစီ ပြန်လည် ပေါ်ပေါက်ဖို့အတွက် ရွေးကောက်ပွဲကိုအဓိက လုပ်ဖို့အတွက် အဲဒီအတွက် လုံခြုံရေးပေါ့ နယ်မြေစိုးမိုးရေးကို အဓိကထားမှာပေါ့။ အဲဒါပြီးမှပဲ စစ်ဆင်ရေးလာမှာ ပေါ့နော်။ စစ်ရေး အခင်းအကျင်းက ပိုပြီးတော့ ဖြစ်လာနိုင်တာပေါ့။ အခုက ခံလိုက်ရတဲ့ အပိုင်းကလည်း ခံလိုက်ရ ပြီးပြီလေ။ ခံလိုက်ရတဲ့အပိုင်းကလည်း တပ်မတော်မှာ တစ်ခါမှာ မကြုံဖူးတဲ့ ရှက်ဖွယ်လိလိ။ ဒါကလည်း ဖွဲ့စည်းပုံ မှားတာတို့ ဘာတို့ပေါ့။ နောက်ပြီး ကိုယ့်ကိုယ်ကို အထင်ကြီးပြီး ပြင်ဆင်မထားမိတာတွေရောပေါ့။ ဒါတွေ အားလုံး ကို လက်ရှိ တာဝန်ယူထားတဲ့လူတွေ တော်တော်များများက ပြင်ဆင်ပြီးပြီ။ အခု technology ပိုင်းအရ ဒရုန်းပညာ အငိုက်ခံလိုက်ရတာ။ ဒါတွေက ပြင်ဆင်ပြီးပြီဆိုတဲ့ အခါကြတော့ အရင်တုန်းက ကျရှုံးခဲ့မှုပေါ့။ ပြီးခဲ့တဲ့ တစ်နှစ်၊ နှစ်နှစ်အတွင်းက ဖြစ်ခဲ့တဲ့ဟာတွေကို အဖက်ဆယ်ဖို့ လုပ်လာမှာပဲ။ တစ်ဖက်ကလည်း လက်ရှိ ချမှတ်ထားတဲ့ ပြည်သူ့စစ်မှုထမ်းဥပဒေအရ မှန်တယ်၊ မှားတယ်ဆိုတာထက် လူအင်အားကလည်း ရလာမှာပဲ။ ရလာပြီဆိုရင် ပြန်ပြီးတော့ ပြင်းထန်တဲ့လက်ရှိအစိုးရရဲ့ တပ်မတော်ရဲ့ တုံ့ပြန်မှုကို တွေ့ရမှာပေါ့” ဟု ပြောသည်။

 ABSDF နဲ့ KIA ပူးပေါင်းတပ်ဖွဲ့ကိုတွေ့ရစဉ်

နစကဥက္ကဋ္ဌ အနေဖြင့် လာမည့် ၂၀၂၅ ခုနှစ်၊ ဒီဇင်ဘာလနှင့် ၂၀၂၆ ခုနှစ်၊ ဇန်နဝါရီလတို့တွင် ရွေးကောက်ပွဲ ကျင်းပသွားမည်ဟု နိုင်ငံတကာကို အသိပေး ကတိပြုပြောကြားထားသည်။

ထို့ပြင် မေလ ၂၄ ရက်က ရှမ်းပြည်နယ်(အရှေ့ပိုင်း) ကျိုင်းတုံမြို့ရှိ တြိဂံဒေသတိုင်းစစ်ဌာနချုပ်မှ စစ်ဦးစီး၊ စစ်ရေးနှင့် စစ်ထောက်ဆိုင်ရာ ဆောင်ရွက်မှုများကို သွားရောက်စစ်ဆေးခဲ့ရာတွင်လည်း တပ်များအလိုက် မိမိတို့ တာဝန်ယူထားရသည့် နယ်မြေအတွင်း စစ်ဆင်ရေး၊ လုံခြုံရေး၊ နယ်မြေစိုးမိုးရေး လုပ်ငန်းများအား အောင်မြင် အောင် လုပ်ဆောင်နိုင်ရန်လိုကြောင်း ပြောကြားခဲ့သည်။

ဒေသတွင်းလုံခြုံရေး၊ နိုင်ငံတော် လုံခြုံရေးနှင့်ပတ်သက်လာပါက အစဉ်အမြဲ ဂရုပြုနေရန်နှင့် အလေးအနက်ထား ဆောင်ရွက်သွားရန် လိုကြောင်းလည်း ပြောကြားခဲ့သည်။

၂၀၂၁ ခုနှစ်နောက်ပိုင်း ဖြစ်ပေါ်လာသည့် မြန်မာ့နိုင်ငံရေး အခင်းအကျင်းတွင် တိုင်းရင်းသားလက်နက်ကိုင် တော်လှန်ရေး အဖွဲ့အစည်းများနှင့် မြန်မာ့တပ်မတော်တို့အကြား တိုက်ပွဲများ ဖြစ်ပွားနေသည်မှာ ၄ နှစ်ကျော် ရှိလာပြီဖြစ်သည်။

‌ထို့ကြောင့် ဒေသတစ်ခု၏ ငြိမ်းချမ်းရေး၊ တည်ငြိမ်ရေးဆိုသည်မှာ မြန်မာနိုင်ငံ၏ သမိုင်းကြောင်းများအရ ရေရှည် တည်တံ့ခိုင်မြဲရန်မှာ အခက်အခဲရှိကြောင်း၊ ပြည်ထောင်စုတွင် ငြိမ်းချမ်းရေးရှိမှသာ အားလုံးအဆင်ပြေမည့် လမ်းကြောင်းတစ်ခုကို သွားနိုင်မည်ဖြစ်ကြောင်း 7 EAOs Alliance မှ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “ကျနော်တို့ ပြောပြောနေကြ ပြည်ထောင်စုငြိမ်းချမ်းရေးရှိမှပဲ တစ်နိုင်ငံလုံး ပစ်ခတ်တိုက်ခိုက်မှုတွေ ရပ်စဲ နိုင်ပြီးတော့ အားလုံးအတွက် အဆင်ပြေမယ့် လမ်းကြောင်းတစ်ခုကို သွားနိုင်မှာဖြစ်ပါတယ်။ ဒေသတစ်ခုရဲ့ ငြိမ်းချမ်းရေး၊ ဒေသတစ်ခုရဲ့ တည်ငြိမ်ရေး ဆိုတာကတော့ နိုင်ငံရဲ့ သမိုင်းကြောင်း အခြေအနေအရ ရေရှည် တည်တံ့ခိုင်မြဲဖို့ အခက်အခဲရှိပါတယ်။ ဒါကြောင့်မို့လို့ စစ်ရေးအရပဲပြောပြော၊ နိုင်ငံရေးအရပဲပြောပြော ဒီ ၂ ခုက ဒွန်တွဲနေတာ ဖြစ်တဲ့အတွက်ကြောင့်မို့လို့ ကျနော်တို့အနေနဲ့ ပြည်ထောင်စုရဲ့ ငြိမ်းချမ်းရေးကို တည်ဆောက်နိုင် မှာသာလျှင် ဒေသတစ်ခုချင်းစီပဲဖြစ်ဖြစ် ၊ ပြည်နယ်တစ်ခုချင်းစီပဲဖြစ်ဖြစ် အဲဒီမှာရှိနေတဲ့ ပြည်သူလူထုတွေရဲ့ လုံခြုံရေး၊ တည်ငြိမ်အေးချမ်းရေး၊ တရားဥပဒေ စိုးမိုးရေး၊ အဲဒါတွေကို ရေရှည်အကောင်အထည်ဖော် ဆောင်ရွက် နိုင်မယ့် လက်တွေ့ကြတဲ့ နည်းလမ်းဖြစ်မယ်လို့ ယုံကြည်ပါတယ်” ဟု ပြောသည်။
လက်ရှိတွင် လက်နက်ကိုင်ပဋိပက္ခသည် မြန်မာနိုင်ငံတစ်ဝန်း ဖြစ်ပွားနေခြင်းဖြစ်ကာ လူပေါင်း ၃ သန်းကျော် နေရပ်စွန့်ခွာ ထွက်ပြေး တိမ်းရှောင်နေရသလို နေအိမ်ပေါင်း သောင်းချီ မီးလောင် ပျက်စီးဆုံးရှုံးလျက်ရှိသည်။
အလားတူ မြန်မာ့တပ်မတော်သည် စစ်စခန်းပေါင်း ရာချီ လက်လွှတ်ထားရသလို မြို့ပေါင်း ၉၀ ကျော်ကိုလည်း လက်လွှတ်ထားရသည်။ 

ထို့ပြင် တရုတ်၏ ကြားဝင်စေ့စပ်ဖိအားပေးမှုများကြောင့် မြောက်ပိုင်းလက်နက်ကိုင်အဖွဲ့အချို့နှင့် တွေ့ဆုံ ဆွေးနွေး ညှိနှိုင်းမှုများကို လုပ်ဆောင်လာနိုင်ခြင်းဖြစ်ကာ အဓိကကျသည့် နယ်မြေဖြစ်သည့် လားရှိုးကိုလည်း အုပ်ချုပ်မှု ပြန်လည်ရရှိထားနေခြင်းဖြစ်သည်။

CNI International News

ဝါရှင်တန်၊ ဇွန်လ ၂

ဟားမာ့စ်အဖွဲ့က ဂါဇာတွင် အစ္စရေးနှင့် ယာယီအပစ်အခတ်ရပ်စဲမှု ပြုလုပ်ရန် အမေရိကန်မှ ထောက်ခံပေး ထားသည့် အဆိုပြုချက်ကို ပြင်ဆင်မှုများ ပြုလုပ်ရန် ကြိုးပမ်းနေကြောင်း မေလ ၃၁ ရက်၌ ပြောခဲ့သည်ဟု ရိုက်တာမှ ဖော်ပြခဲ့သည်။

သို့သော် အမေရိကန်သမ္မတ ဒေါ်နယ်ထရမ့် (Donald Trump) ၏ အထူးသံတမန် စတိဗ် ဝစ်ကော့ဖ် (Steve Witkoff) ကမူ အပစ်အခတ်ရပ်စဲရေး အဆိုပြုချက်ကို ပြင်ဆင်လိုသည့် ဟားမာ့စ်အဖွဲ့၏ တောင်းဆိုမှုကို လုံးဝ လက်မခံနိုင်ကြောင်း ပြောဆိုခဲ့သည်။

အစ္စရေးဝန်ကြီးချုပ် ဘင်ဂျမင်နေတန်ယာဟု (Benjamin Netanyahu) ကလည်း ဟားမာ့စ်အဖွဲ့သည် အပစ်အခတ်ရပ်စဲရေး အဆိုပြုချက်ကို ဆက်လက် ငြင်းဆိုနေသဖြင့် အစ္စရေးသည် ဂါဇာတွင် ဓားစာခံများ ပြန်လည် လွတ်မြောက်ရန်နှင့် ဟားမာ့စ်အဖွဲ့ကို အမြစ်ပြတ်ချေမှုန်းရန် စစ်ဆင်ရေးအား ဆက်လက် ဆင်နွှဲသွား မည်ဟု မေလ ၃၁ ရက်က ပြောကြားခဲ့သည်။

အမေရိကန်က ထောက်ခံထားသည့် ရက်ပေါင်း ၆၀ ကြာ အပစ်အခတ်ရပ်စဲရေး အဆိုပြုချက်တွင် ဂါဇာ၌  ဖမ်းဆီး ခံထားရဆဲဖြစ်သော ဓားစာခံ ၅၈ ဦးအနက် ၂၈ ဦးနှင့် အစ္စရေး အကျဉ်းထောင်များထဲမှာ အကျဉ်းချခံထားရသည့် ပါလက်စတိုင်း  ၁၂၀၀ ကျော်ကို လဲလှယ်ရန် အဆိုပြုထားသည်။

အထူးသံတမန် စတိဗ် ဝစ်ကော့ဖ်ကို တွေ့ရစဉ်

ဟားမာ့စ်အဖွဲ့ကမူ ၎င်းတို့ ဖမ်းဆီးထားသည် ဓားစာခံများအနက် သက်ရှိထင်ရှားရှိနေသည့် ဓားစာခံ ၁၀ ဦးနှင့် သေဆုံးသွားသော ဓားစာခံ ၁၈ ဦး၏ ရုပ်အလောင်းများကို ပြန်လည်လွှဲပြောင်း ပေးအပ်ရန် ဆန္ဒရှိကြောင်းနှင့် အပြန်အလှန်အနေဖြင့် အစ္စရေး အကျဉ်းထောင်အတွင်းမှ အကျည်းသားများကို ပြန်လွှတ်ပေးရန် တောင်းဆိုခဲ့ သည်။

ထို့ပြင် စစ်ပွဲကို အဆုံးသတ်ရန်နှင့် ဂါဇာမှ အစ္စရေးစစ်သားများ ရုပ်သိမ်းရန်လည်း ထပ်မံတောင်းဆိုခဲ့ပြီး ထိုတောင်းဆိုချက်များကို အစ္စရေးက ငြင်းဆိုခဲ့သည်။

အစ္စရေးက ဟားမာ့စ်အဖွဲ့ကို အလုံးစုံ လက်နက်ဖျက်သိမ်းရန်၊ အုပ်ချုပ်ရေးအဖွဲ့ကိုလည်း ဖျက်သိမ်းရန်နှင့် ဓားစာခံ ၅၈ ဦးစလုံးကို  ပြန်လည်လွှဲပြောင်းပေးအပ်ရန် တောင်းဆိုခဲ့သည်။

စစ်ပွဲအတွင်းက ဂါဇာဒေသကိုတွေ့ရစဉ်

အိမ်ဖြူတော်ကမူ အစ္စရေးသည် ယာယီအပစ်အခတ်ရပ်စဲရေး သဘောတူညီချက်တွင် ပါရှိသည့် သတ်မှတ်ချက် များကို သဘောတူကြောင်း မေလ ၂၉ ရက်က ထုတ်ပြန်ခဲ့ပြီးနောက် အပစ်အခတ်ရပ်စဲရေး သဘောတူညီချက် ရရှိရန် နီးစပ်နေပြီဟု ယူဆရကြောင်း ထရမ့်က မေလ ၃၀ ရက်က ပြောကြားခဲ့သည်။

ထို့ပြင် အစ္စရေးစစ်တပ်ကလည်း ဂါဇာရှိ ဟားမာ့စ်အဖွဲ့ခေါင်းဆောင် မိုဟာမက် ဆင်ဝါ (Mohammad Sinwar ) ကို မေလ ၁၃ ရက်က ချေမှုန်းနိုင်ခဲ့ကြောင်း မေလ ၃၁ ရက်က ပြောကြားခဲ့သည်။

ဟားမာ့စ်အဖွဲ့ကမူ ဆင်ဝါ၏ သေဆုံးမှုကို အတည်ပြုခြင်း၊ ငြင်းဆိုခြင်းမရှိခဲ့ပေ။

Source: ရိုက်တာ

CNI International News

မော်စကို၊ ဇွန်လ ၂

ရုရှားသည် ယူကရိန်းနှင့် ငြိမ်းချမ်းရေး ဆွေးနွေးမှုများအတွက် တောင်းဆိုချက်များကို အလျှော့မပေးဘဲ ယူကရိန်း အား ဒုံးကျည်များ၊ ဒရုန်းများဖြင့် ဆက်လက် တိုက်ခိုက်နေခြင်းသည် ရုရှားသမ္မတ ပူတင် (Vladimir Putin) ၏ တင်းမာသည့် သဘောထားကို ပြသရာရောက်နေကြောင်း အေပီမှ ဖော်ပြခဲ့သည်။

လက်ရှိ အခြေအနေများအရ ပူတင်သည် ၎င်း၏ တောင်းဆိုချက်များ၊ သတ်မှတ်ချက်များကို ယူကရိန်းဘက်က လက်မခံမချင်း ယူကရိန်းအား ဆက်လက် တိုက်ခိုက်မည်ဆိုသည့် သဘောထားကို ကမ္ဘာကသိအောင် ပြသနေ ခြင်းဖြစ်သည်ဟုလည်း ကျွမ်းကျင်သူများက သုံးသပ်ခဲ့သည်။

တစ်ချိန်တည်းမှာပင် ပူတင်သည် အမေရိကန်သမ္မတ ဒေါ်နယ်ထရမ့် (Donald Trump) နှင့် ထိပ်တိုက်မတွေ့ဘဲ ထရမ့်၏ သံတမန်အားထုတ်မှုများကို ချီးကျူးခဲ့ကာ ရုရှားဘက်မှ ငြိမ်းချမ်းရေး ဆွေးနွေးမှုများအတွက် လမ်းဖွင့် ထားကြောင်း ကြေညာခဲ့သည်။

၃ နှစ်ကြာ ဖြစ်ပွားနေသည့် ရုရှား-ယူကရိန်းစစ်ပွဲကို ၂၄ နာရီအတွင်း အဆုံးသတ်ပေးမည်ဟု ကတိပေးခဲ့ဖူးသော ထရမ့်သည် ရုရှားကို ဖယ်ကြဉ်ထားသည့် အမေရိကန်၏ မူဝါဒကို အဆုံးသတ်ခဲ့ပြီး ပူတင်၊ ယူကရိန်းသမ္မတ ဇာလန်းစကီး ( Volodymyr Zelenskyy) တို့နှင့် သီးခြားစီ ဆွေးနွေးမှုများ ပြုလုပ်ခဲ့သည်။

ယူကရိန်းနဲ့ရုရှား ငြိမ်းချမ်းရေးဆွေးနွေးနေစဉ်

တစ်ချိန်တည်းမှာပင် ထရမ့်က ပူတင်သည် မိမိကို လာစနေကြောင်း သတိပေးခဲ့သလို အမေရိကန်၏ ငြိမ်းချမ်းရေး အဆိုပြုချက်များ အောင်မြင်ခြင်းမရှိပါက ရုရှားကို ပိတ်ဆို့မှုများ လုပ်မည်ဟု ခြိမ်းခြောက်ခဲ့သည်။

မကြာသေးမီ ရက်ပိုင်းကလည်း ထရမ့်သည် ပူတင်ကို စိတ်ရှည်သည်းခံမှု ကုန်ဆုံးကြောင်း ပြသသည့် အနေဖြင့် ပူတင်သည် ယူကရိန်းကို လေကြောင်းတိုက်ခိုက်မှုများ အရှိန်မြှင့်တင်နေသဖြင့် ရူးသွပ်သွားပြီဖြစ်ကြောင်း ပြောကြားခဲ့သည်။

မော်စကိုအခြေစိုက် ကျွမ်းကျင်သူ တစ်ဦးဖြစ်သည့် ဖယိုဒေါ် လူဂျာနော့ဗ် (Fyodor Lukyanov) ကမူ ပူတင်သည် ထရမ့်နှင့် စိတ်ဓာတ်စစ်ဆင်ရေး ဆင်နွှဲနေကြောင်း ပူတင်နှင့် ထရမ့်တို့သည် တစ်ယောက်အကြောင်းကို တစ်ယောက်က ကောင်းစွာ သိထားသူများဖြစ်ကြောင်း ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

အမေရိကန်သည် ပဋိပက္ခအပေါ် စိတ်ဝင်စားမှုနည်းပါးပြီး အမြန်ဖြေရှင်းရန်သာ ဆန္ဒရှိနေသည်ဟု ပူတင်က ယူဆထားကြောင်း လူဂျာနော့ဗ်က ပြောသည်။

သို့သော် ရုရှားအတွက်မူ ထိုပဋိပက္ခသည် အလွန်အရေးကြီးသဖြင့် ထိုကိစ္စကို စိတ်ဝင်စားမှု နည်းပါးသည့် အမေရိကန်ဘက်မှ နောက်ဆုံးတွင် အလျှော့ပေးရလိမ့်မည်ဟု ပူတင်က တွေးထင်ထားကြောင်း ၎င်းက သုံးသပ်ခဲ့သည်။

ယူကရိန်း၏ ဥရောပမဟာမိတ်များကမူ အပစ်အခတ်ရပ်စဲရေးကို လက်ခံရန် ရုရှားကို ဖိအားပေးသည့် အနေဖြင့် ပိတ်ဆို့မှုများကို တိုးမြှင့်ချမှတ်ရန် ထရမ့်ကို တိုက်တွန်းလျက်ရှိသည်။

Source: အေပီ

CNI International News

ဘန်ကောက်၊ ဇွန်လ ၂

ထိုင်းဝန်ကြီးချုပ် ပေတုန်တန်(Paetongtarn Shinawatra) က အစိုးရအဖွဲ့အပေါ် ဖခင်ဖြစ်သူ ဝန်ကြီးချုပ်ဟောင်း သက်ဆင်(Thaksin Shinawatra) က ထိန်းချုပ်ထားခြင်း မရှိကြောင်း မေလ ၃၁ ရက်က အတည်ပြု ပြောကြားခဲ့ ကြောင်း The Nation မှ ဖော်ပြခဲ့သည်။

အစိုးရအဖွဲ့ ပြင်ဆင်ဖွဲ့စည်းဖွယ်ရှိသည့် ထင်ကြေး ပေးမှုများနှင့်ပတ်သက်ပြီး သက်ဆင်သည် ပြည်ထဲရေးဝန်ကြီး ဌာနကို ဖြူးထိုင်းပါတီ၏ လက်အောက်တွင် ဆက်လက် ထားရှိသင့်ကြောင်း အကြံပြုခဲ့သည်ဟု သတင်းများ ထွက်ပေါ်ခဲ့ပြီးနောက် ပေတုန်တန်က အစိုးရအဖွဲ့ ပြင်ဆင်ဖွဲ့စည်းရေးကိစ္စသည် ၎င်းအပေါ်တွင်သာ မူတည် ကြောင်း ပြောကြားခဲ့သည်။

လက်ရှိ ထွက်ပေါ်နေသည့် ကောလဟလများနှင့်ပတ်သက်ပြီး ဝန်ကြီးများကို စိတ်ကသိကအောက် မဖြစ်စေလို ကြောင်းနှင့် အားငယ်စိတ် မဝင်စေလိုကြောင်း ပေတုန်တန်က ပြောကြားခဲ့သည်။

လွန်ခဲ့သည့် ၂ နှစ်အတွင်း ပြည်ထဲရေးဝန်ကြီးဌာန၏ စွမ်းဆောင်ရည်သည် အရည်အချင်း ပြည့်မီခဲ့ခြင်း ရှိ/မရှိ မေးမြန်းခံရချိန်တွင် ပေတုန်တန်က သက်ဆင်၏ မှတ်ချက်စကားများသည် ၎င်း၏ ပုဂ္ဂိုလ်ရေး အမြင်သာဖြစ်ပြီး မိမိအနေဖြင့် ထိုကိစ္စကို လေ့လာသုံးသပ်ရခြင်း မရှိသေးကြောင်း ဖြေကြားခဲ့သည်။

ပြည်ထဲရေးဝန်ကြီး အနူတင် ချန်ဗီရာကူလ် (Anutin Charnvirakul) ၏ စွမ်းဆောင်ရည်နှင့်ပတ်သက်ပြီး အနူတင် သည် အမြဲတမ်း တက်ကြွမှုရှိပြီး နားလည်ရ လွယ်ကူသူဖြစ်ကြောင်း၊ ဝန်ကြီးဌာနတိုင်းသည် လုပ်နိုင်သည့် အရာ များနှင့် မလုပ်နိုင်သည့် အရာများဟူ၍ ကန့်သတ်ချက်များရှိကြောင်း ပေတုန်တန်က ပြောကြားခဲ့သည်။

ပေတုန်တန်နဲ့ အစိုးရအဖွဲ့ကိုတွေ့ရစဉ်

အနာဂတ်တွင် ဝန်ကြီးဌာနများကို ပြန်လည်ဖွဲ့စည်းနိုင်ခြေ ရှိ/မရှိ မေးမြန်းခံရချိန်တွင် ပေတုန်တန်က အရာ အားလုံးသည် ပုံသေမရှိကြောင်း၊ အစိုးရအဖွဲ့သည် စတင်ဖွဲ့စည်းချိန်က ပုံစံအတိုင်း အင်အားခိုင်မာနေဆဲ ဖြစ်ကြောင်း ဖြေကြားခဲ့သည်။

အသုံးစရိတ် ဥပဒေမူကြမ်းကို ထောက်ခံမဲ ပေးခဲ့ကြသူ အားလုံးကိုလည်း ကျေးဇူးတင်ကြောင်း ပေတုန်တန်က ပြောကြားခဲ့သည်။

အစိုးရ၏ အသုံးစရိတ်မူကြမ်းကို လွှတ်တော်တွင် မဲခွဲဆုံးဖြတ်ခဲ့ရာတွင် ထောက်ခံမဲ ၃၂၂ မဲ၊ ကန့်ကွက်မဲ ၁၅၈ မဲနှင့် ပယ်မဲ ၂ မဲရှိခဲ့သဖြင့် ထိုမူကြမ်းကို အောင်မြင်စွာ အတည်ပြုနိုင်ခဲ့သည်။

အစိုးရ၏ ဒစ်ဂျစ်တယ် ထောက်ပံ့ငွေ အစီအစဉ်နှင့်ပတ်သက်ပြီး ဘူဂျထိုင်းပါတီ၏ ရပ်တည်ချက်သည် အစိုးရ အဖွဲ့နှင့် ကွဲလွဲမှု ရှိ/မရှိ မေးမြန်းခံရချိန်တွင်လည်း ပေတုန်တန်က ဘူဂျထိုင်းပါတီသည် အစိုးရ၏ ဒစ်ဂျစ်တယ် ထောက်ပံ့ငွေ အစီအစဉ်ကို အလုံးစုံ ကန့်ကွက်ခဲ့ခြင်း မရှိကြောင်း၊ ထောက်ပံ့ငွေ ပမာဏကို တိုးမြှင့်ပေးရန်သာ တိုက်တွန်းခဲ့ခြင်းဖြစ်ကြောင်း ဖြေကြားခဲ့သည်။

Source: The Nation

CNI International News

စင်္ကာပူ၊ ဇွန်လ ၂

အမေရိကန်သည် အာရှ-ပစိဖိတ်ဒေသတွင် တည်ငြိမ်မှုပျက်ယွင်းအောင်  လုပ်ဆောင်နေကြောင်း ယခုနှစ် ရှန်ဂရီလာ ဆွေးနွေးပွဲကို တက်ရောက်လာသည့် တရုတ်ကိုယ်စားလှယ်အဖွဲ့အား ဦးဆောင်သည့် တရုတ်ပြည်သူ့ လွတ်မြောက်ရေးတပ်မတော်(PLA)၏ ဗိုလ်ချုပ်တစ်ဦးက စွပ်စွဲခဲ့သည်ဟု South China Morning Post မှ ဖော်ပြခဲ့သည်။

အမေရိကန်ကာကွယ်ရေးဝန်ကြီး ပိဟက်ဆက်(Pete Hegseth) သည် စင်္ကာပူနိုင်ငံတွင် ပြုလုပ်သည့် ရှန်ဂရီလာ အစည်းအဝေး၌ ဒေသတွင်း တရုတ်၏ ရန်လိုမှုများကို ပူးပေါင်းဟန့်တားရန် တိုက်တွန်းခဲ့ပြီးနောက် တရုတ် ဗိုလ်ချုပ်တစ်ဦးက ထိုကဲ့သို့ တုံ့ပြန်ခဲ့ခြင်း ဖြစ်သည်။

အာရှ၏ အထင်ကရ လုံခြုံရေးညီလာခံဖြစ်သည့် ရှန်ဂရီလာအစည်းအဝေး၏ ဆွေးနွေးပွဲတစ်ခုတွင် တရုတ် အမျိုးသား ကာကွယ်ရေးတက္ကသိုလ်၏ ဒုဥက္ကဋ္ဌဖြစ်သည့် ဟူကန်ဖန်း (Hu Gangfeng) က မေလ ၃၁ ရက်က အစည်းအဝေး၌ တရုတ်ကို ဆန့်ကျင်သည့် အခြေအမြစ်မရှိသော စွပ်စွဲပြောဆိုမှုများ ပါဝင်ခဲ့ကြောင်း ပြောကြားခဲ့ သည်။

အမေရိကန်ကာကွယ်ရေးဝန်ကြီး ပိဟက်ဆက်ကို တွေ့ရစဉ်

တရုတ်သည် တောင်တရုတ်ပင်လယ်အတွင်း စစ်အင်အား ထူထောင်နေချိန်တွင် အိမ်နီးချင်းနိုင်ငံများကို နှောင့်ယှက်နေသဖြင့် ဒေသတွင်း တည်ငြိမ်မှု ပျက်ယွင်းအောင် လုပ်ဆောင်နေကြောင်း အမေရိကန်ကာကွယ်ရေး ဝန်ကြီးက ပြောကြားခဲ့ပြီးနောက် ဟူက ထိုကဲ့သို့ တုံ့ပြန်ခဲ့ခြင်းဖြစ်သည်။

တရုတ်သည် ထိုင်ဝမ်ကို အင်အားသုံးပြီး သိမ်းယူမည့် အန္တရာယ်သည် ဖြစ်အံ့ဆဲဆဲဖြစ်နိုင်ကြောင်း ဟက်ဆက်က မေလ ၃၁ ရက်နံနက်ပိုင်းတွင် ဆွေးနွေးပွဲ၌ ပြောကြားခဲ့သည်။

ဟူကမူ ဟက်ဆက်၏ ပြောကြားချက်များသည် အာရှ-ပစိဖိတ်ဒေသ တည်ငြိမ်မှုကို ပျက်ယွင်းစေပြီး သွေးထိုး လှုံ့ဆော်မှု၊ သဘောထား ကွဲလွဲမှုနှင့် ပြဿနာများကို ဖြစ်ပွားစေရန် ရည်ရွယ်ပြီး လုပ်ကြံစွပ်စွဲခြင်းဖြစ်ကြောင်း ပြောကြားခဲ့သည်။

“တချို့နိုင်ငံတွေက တစ်ဖက်သတ် ထိပ်တိုက်တွေ့မှုကိုပဲ အာရုံစိုက်ထားပြီး ဒေသတွင်း သူတို့ရဲ့ စစ်အင်အားကို တိုးမြှင့်နေပါတယ်။ ဗိုလ်ကျ စိုးမိုးရေးအတွက် အာရှ-ပစိဖိတ် ရေပြင်တွေကို အသုံးပြုနေတာကို တရုတ်က ဆန့်ကျင်ကန့်ကွက်ပါတယ်”ဟု ဟူက ပြောကြားခဲ့သည်။

Source: South China Morning Post

CNI International News

ပြုံယမ်း၊ မေလ ၃၁

မြောက်ကိုရီးယားခေါင်းဆောင် ကင်မ်ဂျုံအန်သည် မေလ ၂၇ ရက်က ပါတီအစည်းအဝေးတစ်ခုကို ပြုလုပ်ခဲ့ပြီး စစ်အင်အားတိုးချဲ့မှုကို အလေးထား ပြောဆိုခဲ့သည်ဟု ရိုက်တာမှ ဖော်ပြခဲ့သည်။

ထို့နောက် မေလ ၂၈ ရက်က အမြောက်ပစ် စစ်ရေးလေ့ကျင့်မှုကို လေ့လာကြည့်ရှုခဲ့သည်။

မေလ ၂၈ ရက် မြောက်ကိုရီးယားနိုင်ငံပိုင် KCNA သတင်းအေဂျင်စီ၏ ထုတ်ပြန်ချက်အရ ကင်မ်သည် ကိုရီးယား အလုပ်သမားပါတီ၏ (၈)ကြိမ်မြောက် ဗဟိုစစ်ကော်မရှင် အစည်းအဝေးတွင် ပါတီ၏ သက်ဆိုင်ရာ အဖွဲ့အစည်း များအနေဖြင့် စစ်အင်အား တည်ဆောက်မှုနှင့် စစ်ရေးလှုပ်ရှားမှုများ၌ ပြဿနာများကို ဖြေရှင်းရာတွင် ခိုင်မာသည့် ခေါင်းဆောင်မှု နေရာမှ ပါဝင်သင့်ကြောင်း တိုက်တွန်းခဲ့သည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

အင်အားကြီး စစ်တပ်ကို တည်ထောင်ရန် အမှန်တကယ် ဖြစ်ပွားနေသည့် စစ်ပွဲ အခြေအနေနှင့် အနီးစပ်ဆုံး တူညီမှုရှိသော စစ်ရေးလေ့ကျင့်မှုများအား မကြာခဏ လုပ်ဆောင်ခြင်းသည် အလွန်အရေးကြီးကြောင်းလည်း ကင်မ်က ပြောကြားခဲ့သည်။

ကင်မ်သည် မကြာသေးမီ သီတင်းပတ်များအတွင်းကလည်း စစ်တပ်ကို အင်အားတိုးမြှင့်ရန် အာရုံစိုက် လုပ်ဆောင်ခဲ့သည်။ 

မေလ ၁ လထဲမှာပင် ကင်မ်သည် တင့်ကားစက်ရုံ၊ လက်နက်ခဲယမ်း စက်ရုံများကို သွားရောက်ကြည့်ရှုခဲ့ပြီး တာတိုပစ် ဒုံးပျံစမ်းသပ်မှု၊ လေကြော င်းစစ်ရေးလေ့ကျင့်မှုတို့ကို ကြီးကြပ်ခဲ့သည်။

ထို့ပြင် မကြာသေးမီက စစ်သင်္ဘောတစ်စင်း ရေချသည့် အခမ်းအနားတွင် မတော်တဆဖြစ်ခဲ့ပြီး သင်္ဘောထိခိုက် သွားသည့် ဖြစ်ရပ်ကိုလည်း ကင်မ်က ရာဇဝတ်မှုအဖြစ် ရှုတ်ချပြောဆိုခဲ့သည်။

Source: ရိုက်တာ

အီရန် နျူသဘောတူညီမှု မရလျှင် အစ္စရေးကတိုက်နိုင်ဟု ဆော်ဒီ ပြော 

CNI International News

ရီးယာ့ဒ်၊ မေလ ၃၁

အီရန်အနေဖြင့် အမေရိကန်သမ္မတ ဒေါ်နယ်ထရမ့် (Donald Trump) ကမ်းလှမ်းသည့် နျူကလီးယား သဘောတူ ညီချက် ဆွေးနွေးညှိနှိုင်းမှုကို လက်ခံပြီး သဘောတူ စာချုပ်ချုပ်ဆိုရန် ဆော်ဒီကာကွယ်ရေးဝန်ကြီး ခါလစ် ဘင် ဆယ်လ်မန် အယ်ဆွတ် (Khalid bin Salman Al Saud) က အီရန်အရာရှိများကို ပြီးခဲ့သည့်လက တိုက်တွန်းခဲ့ သည်ဟု ရိုက်တာမှ ဖော်ပြခဲ့သည်။

သဘောတူညီမှု ရယူမည်ဆိုပါက အီရန်၏ နျူကလီးယား စီမံကိန်းကို ဆန့်ကျင်နေသည့် အစ္စရေးနှင့်  အီရန်ကြား စစ်ပွဲဖြစ်ပွားနိုင်သည့် အန္တရာယ်ကိုလည်း ရှောင်လွှဲနိုင်လိမ့်မည်ဟု အယ်ဆွတ်က ပြောကြားခဲ့သည်။

အရှေ့အလယ်ပိုင်းဒေသတွင် တည်ငြိမ်မှု ပိုမိုပျက်ယွင်းလာချိန်တွင် ဆော်ဒီ၏ အသက် ၈၉ နှစ်အရွယ် ဘုရင် ဆယ်လ်မန် ဘင် အဗ္ဗဒူလာဇစ် (Salman bin Abdulaziz) သည် သားဖြစ်သူ အယ်ဆွတ်ကို အီရန်သို့ စေလွှတ်ကာ အီရန်၏ အမြင့်ဆုံးခေါင်းဆောင် အယာတိုလာ အလီ ခါမေနီ (Ayatollah Ali Khamenei) ကို ထိုကဲ့သို့ အမှာ စကား ပေးပို့ခဲ့ခြင်းဖြစ်ကြောင်း ပင်လယ်ကွေ့ သတင်းရင်းမြစ်နှင့် အီရန်အရာရှိနှစ်ဦးက ပြောကြားခဲ့သည်။

ပုံစာ- သမ္မတ ဒေါ်နယ်ထရမ့်နဲ့ ဆော်ဒီမင်းသားကို တွေ့ရစဉ်

ဧပြီ ၁၇ ရက်က တီဟီရန် (Tehran) မြို့တော်ရှိ သမ္မတအိမ်တော်တွင် ပြုလုပ်သည့် တံခါးပိတ် ဆွေးနွေးပွဲ၌ ဆော်ဒီအိမ်ရှေ့မင်းသား အယ်ဆွတ်နှင့်အတူ အီရန်သမ္မတ မာဆွတ် ပီဇက်ကီယန် (Masoud Pezeshkian)၊ အီရန်စစ်ဦးစီးချုပ် မိုဟာမက် ဘာဂီရီ (Mohammad Bagheri) နှင့် အီရန်နိုင်ငံခြားရေးဝန်ကြီး အာဘက်စ် အာရက်ချီ (Abbas Araqchi) တို့ ပါဝင်ကြောင်း သတင်းရင်းမြစ်များက ပြောသည်။

ထိုအချိန်က အသက် ၃၇ နှစ်အရွယ် ဆော်ဒီအိမ်ရှေ့စံ အယ်ဆွတ်၏ အီရန်ခရီးစဉ်တွင် ဆော်ဒီဘုရင် ဆယ်လ်မန် ၏ အမှာစကားပေးပို့မှုကို မီဒီယာများက ဖော်ပြခဲ့ခြင်းမရှိဘဲ ယခုအချိန်မှ ထိုအကြောင်းအရာများ ပေါ်ပေါက်လာ ခဲ့ခြင်းဖြစ်သည်။

ထရမ့်၏ ပထမသက်တမ်း ကာလက အမေရိကန်နိုင်ငံဆိုင်ရာ ဆော်ဒီသံအမတ် တာဝန်ကို ထမ်းဆောင်ခဲ့သည့် မင်းသားအယ်ဆွတ်က ထရမ့်သည် အီရန်နျူကလီးယား ဆွေးနွေးမှုများအပေါ် စိတ်မရှည်တော့ကြောင်း အီရန် အရာရှိများကို သတိပေးခဲ့သည်ဟု သတင်းရင်းမြစ် ၄ ခုက ထုတ်ပြန်ခဲ့သည်။

ပုံစာ- သမ္မတ ဒေါ်နယ်ထရမ့်၊ ဆော်ဒီမင်းသားနဲ့ ဆီးရီးယားသူပုန်ကနေ သမ္မတဖြစ်လာသူကိုတွေ့ရစဉ်

ထရမ့်သည် ပြီးခဲ့သည့် သီတင်းပတ် အစောပိုင်းက အီရန်၏ နျူကလီးယားစီမံကိန်းကို ထိန်းချုပ်ရန်အတွက် အီရန်နှင့် တိုက်ရိုက်ဆွေးနွေးမှုများ ပြုလုပ်နေကြောင်း ကြေညာခဲ့သည်။

သဘောတူညီမှု ရရှိခဲ့မည်ဆိုပါက အမေရိကန်သည် အီရန်အပေါ် ချမှတ်ထားသည့် ပိတ်ဆို့မှုများကို ရုပ်သိမ်း ပေးမည်ဟု ဆိုသည်။

ဆော်ဒီမင်းသား အယ်ဆွတ်ကလည်း ထရမ့်၏ အဖွဲ့သည် သဘောတူညီမှု အလျင်အမြန် ရရှိလိုကြောင်း၊ သံတမန် အားထုတ်ကြိုးပမ်းမှုသည့် မကြာမီ အဆုံးသတ်ဖွယ်ရှိနေကြောင်း အီရန်ထိပ်သီး အရာရှိများကို ပြောကြားခဲ့သည် ဟု သတင်းရင်းမြစ်များက ဖော်ပြခဲ့သည်။

Source: ရိုက်တာ