CNI International News

ဘေဂျင်း၊ စက်တင်ဘာ ၁၉

အမေရိကန်နှင့် တရုတ်ကြား ကုန်သွယ်ရေးစစ်ပွဲ ဖြစ်ပွားနေချိန်တွင် တစ်ဖက်သတ် အနိုင်ကျင့်သည့် လုပ်ဆောင် ချက်များအား ဆန့်ကျင်ပြီး လွတ်လပ်သည့် ကုန်သွယ်ရေးကို ကာကွယ်ရန်အတွက် တောင်ကိုရီးယားအနေဖြင့် တရုတ်နှင့် ပူးပေါင်းသင့်ကြောင်း တရုတ်နိုင်ငံခြားရေးဝန်ကြီး ဝမ်ယိ (Wang Yi) က ပြောကြားခဲ့သည်ဟု South China Morning Post မှ ဖော်ပြခဲ့သည်။

"တရုတ်နဲ့ တောင်ကိုရီးယားဟာ လွတ်လပ်စွာ ကုန်သွယ်မှုကို အခြေပြုထားတဲ့ ကမ္ဘာ့ စီးပွားရေးဝါဒရဲ့ အကျိုး အမြတ်တွေကို ခံစားခွင့်ရရှိတဲ့ နိုင်ငံတွေဖြစ်ပါတယ်" ဟု ဝမ်က စက်တင်ဘာ ၁၇ ရက်တွင် ဘေဂျင်းမြို့တော်၌ တောင်ကိုရီးယား နိုင်ငံခြားရေးဝန်ကြီး ချိုဟွမ် (Cho Hyun) နှင့် ပြုလုပ်သည့် အစည်းအဝေးတွင် ပြောကြားခဲ့ သည်။

လက်ရှိ အခြေအနေအရ တစ်ဖက်သတ် အနိုင်ကျင့်နေသည့် လုပ်ဆောင်ချက်များ ရှိနေ၍ မိမိတို့ အနေဖြင့် ကုန်သွယ်ရေးတွင် ကိုယ်ကျိုးစီးပွား ကာကွယ်ရေးမူဝါဒကို ပူးပေါင်း ဆန့်ကျင်သင့်ကြောင်း၊ နိုင်ငံတကာ လွတ်လပ် သော ကုန်သွယ်ရေးစနစ်ကို ကာကွယ်သင့်ကြောင်း ဝမ်က ပြောကြားခဲ့သည်ဟု တရုတ်နိုင်ငံခြားရေးဝန်ကြီးဌာန က ထုတ်ပြန်ခဲ့သည်။

တောင်ကိုရီးယားအပေါ် ထားရှိသည့် တရုတ်၏ မူဝါဒသည် တည်ငြိမ်ပြီး တစ်သမတ်တည်း ရှိကြောင်းလည်း ၎င်းက ပြောသည်။

တရုတ်နိုင်ငံခြားရေးဝန်ကြီး ဝမ်ယိကို တွေ့ရစဉ် 

နှစ်နိုင်ငံစလုံး အနေဖြင့် ထိလွယ်ရှလွယ်ရှိသည့် အရေးကိစ္စများကို သင့်တော်သလို ကိုင်တွယ် ဖြေရှင်းနေချိန်တွင် တစ်ဖက်တွင်လည်း အပြန်အလှန် ယုံကြည်မှုနှင့် ပူးပေါင်းဆောင်ရွက်မှုတို့ကို တိုးမြှင့်ရမည်ဖြစ်ကြောင်း ဝမ်က ပြောကြားခဲ့သည်။

တောင်ကိုရီးယား နိုင်ငံခြားရေးဝန်ကြီး ချိုကလည်း မြောက်ကိုရီးယားနှင့် ဆွေးနွေးမှုများ ပြန်လည် စတင်ရေး အတွက် တရုတ်က ကူညီပေးရန် တောင်းဆိုခဲ့ပြီး ဆွေးနွေးမှုများ ပူးပေါင်းဆောင်ရွက်မှုများမှတဆင့် ကိုရီးယား ကျွန်းဆွယ်ပေါ်တွင် နျူကလီးယား ဖျက်သိမ်းရေးနှင့် ငြိမ်းချမ်းရေးကို ရှေးရှုသည့် လုပ်ငန်းစဉ်များ လိုအပ်ကြောင်း ပြောကြားခဲ့သည်။

တရုတ်သို့ ၂ ရက်ကြာ ခရီးစဉ်ဖြင့် ရောက်ရှိနေသည့် ချိုသည် ဇူလိုင်လက တောင်ကိုရီးယားဝန်ကြီးအဖြစ် တာဝန် စတင် ထမ်းဆောင်ခဲ့ပြီးနောက်ပိုင်း တရုတ်သို့ လာရောက်သော ပထမဆုံးခရီးစဉ်ဖြစ်သည်။

ချို၏ ခရီးစဉ်သည် တောင်ကိုရီးယားနိုင်ငံတွင် အောက်တိုဘာ ၃၁ ရက်မှ နိုဝင်ဘာ ၁ ရက်အထိ ပြုလုပ်မည့် အာရှ-ပစိဖိတ် စီးပွားရေး ပူးပေါင်းဆောင်ရွက်ရေးအဖွဲ့ (APEC) အစည်းအဝေးကို တက်ရောက်မည့် တရုတ်သမ္မတ ရှီကျင့်ဖျင် (Xi Jinping) ၏ ခရီးစဉ်အတွက် ကြိုတင်ပြင်ဆင်မှုအဖြစ် ရှုမြင်ခံခဲ့ရသည်။

အကယ်၍ ရှီအနေဖြင့် APEC အစည်းအဝေးကို တက်ရောက်မည်ဆိုပါက ၂၀၁၄ ခုနှစ်နောက်ပိုင်း တောင်ကိုရီးယား သို့ သွားရောက်မည့် ပထမဆုံး ခရီးစဉ် ဖြစ်လာမည်ဖြစ်သည်။

ဂျောင်းဂျူ (Gyeongju) မြို့တွင် ပြုလုပ်မည့် APEC အစည်းအဝေး၌ ရှီနှင့် အမေရိကန်သမ္မတ ဒေါ်နယ်ထရမ့် (Donald Trump) တို့ သီးခြားတွေ့ဆုံဖွယ် ရှိကြောင်းလည်း ထင်ကြေးပေးမှုများ ကျယ်ကျယ်ပြန့်ပြန့် ထွက်ပေါ်နေ သည်။

Source: South China Morning Post

CNI International News

ကင်ရှာဆာ၊ စက်တင်ဘာ ၁၉

ကွန်ဂိုစစ်တပ်နှင့် ရဝမ်ဒါနိုင်ငံက ထောက်ပံ့ပေးထားသည့် သူပုန်များသည် ၎င်းတို့ခြေကုပ်ယူထားသော နေရာများ တွင် စစ်အင်အားများကို ဖြည့်တင်းနေပြီး နှစ်ဖက်စလုံးက ငြိမ်းချမ်းရေး သဘောတူညီချက်ကို လေးစားမှုမရှိ ကြောင်း အပြန်အလှန် စွပ်စွဲနေကြသည်ဟု ရိုက်တာမှ ဖော်ပြခဲ့သည်။

ကွန်ဂိုတွင် ဖြစ်ပွားနေသည့် ပဋိပက္ခသည် အဆုံးသတ်ပြီဖြစ်ကြောင်း အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့သည့်တိုင် လက်ရှိအခြေအနေသည် ပဋိပက္ခဖြစ်ပွားရန် တအုံနွေးနွေး အခြေအနေသို့ ရောက်ရှိနေကြောင်း ကျွမ်းကျင်သူများက ပြောကြားခဲ့သည်။

ရဝမ်ဒါနိုင်ငံ၏ ထောက်ပံ့မှုကို ရရှိထားသည်ဟု စွပ်စွဲခံထားရသည့် M23 သူပုန်များသည် ယခုနှစ် ဇန်နဝါရီနှင့် ဖေဖော်ဝါရီလများတွင် ကွန်ဂိုနိုင်ငံအရှေ့ပိုင်းရှိ အဓိက မြို့ကြီး ၂ မြို့ကို သိမ်းယူခဲ့သည်။

ထို့ကြောင့် နှစ်ပေါင်း ၂၀ အတွင်း ကွန်ဂိုအစိုးရအတွက် အကြီးမားဆုံး ခြိမ်းခြောက်မှုနှင့် ရင်ဆိုင်ခဲ့ရပြီး ဒေသတွင်း ကြီးမားသည့် စစ်ပွဲဖြစ်လာမည့် အရေးကို စိုးရိမ်မှုများ မြင့်တက်စေခဲ့သည်။

ကွန်ဂိုစစ်တပ်ကိုတွေ့ရစဉ် 

ကွန်ဂိုစစ်တပ်နှင့် M23 သူပုန်အဖွဲ့ကြား အမေရိကန်နှင့် ကာတာတို့က ဦးဆောင်ပြုလုပ်ခဲ့သည့် ငြိမ်းချမ်းရေး ဆွေးနွေးမှုများ ပြုလုပ်ခဲ့သည့်တိုင် နှစ်ဖက်အဖွဲ့ကြား ယုံကြည်မှု ခိုင်မာစွာ မတည်ဆောက်ရ သေးခင်အချိန်တွင် သဘောတူညီမှုရရှိအောင် အလောတကြီး ဆောင်ရွက်ခဲ့သဖြင့် ငြိမ်းချမ်းရေး အလားအလာသည် ထင်ထားသ လောက် အောင်မြင်မှုမရခဲ့ကြောင်း ကျွမ်းကျင်သူများက ပြောကြားခဲ့သည်။

M23 သူပုန်များက ဆွေးနွေးမှုများကို ဆက်လက် မလုပ်ဆောင်မီ အကျဉ်းသားများကို ပြန်လွှတ်ပေးရန်နှင့် ၎င်းတို့ ထိန်းချုပ်ထားသည့် နယ်မြေများတွင် အာဏာခွဲဝေအုပ်ချုပ်ရန် ဆန္ဒရှိနေကြသည်။

ကွန်ဂိုသမ္မတ ဖီးလစ် ရှီဆက်ကီဒီ (Felix Tshisekedi) ၏ အစိုးရကမူ အာဏာခွဲဝေပေးရန်နှင့် ဖမ်းဆီးထားသည့် အကျဉ်းသားများကို ပြန်လွှတ်ပေးရန် ငြင်းဆိုခဲ့သည်။

လက်ရှိတွင် သူပုန်များနှင့် ကွန်ဂိုစစ်တပ်သည် ရဝမ်ဒါ၊ ဘူရန်ဒီ နိုင်ငံများနှင့် နယ်စပ်ချင်း ထိစပ်နေသည့် ကွန်ဂို၏ အရှေ့ပိုင်းပြည်နယ်များ၌ စစ်အင်အားများကို ဖြည့်တင်းနေသည်။

ပဋိပက္ခများ ဖြစ်ပွားခဲ့ချိန်အတွင်း သူပုန်အဖွဲ့နှင့် ကွန်ဂိုစစ်တပ်သည် အရပ်သားများကို တစ်ဖက်သတ် စွပ်စွဲ သတ်ဖြတ်ခြင်း၊ ညှင်းပန်းနှိပ်စက်ခြင်းနှင့် အဓမ္မပြုကျင့်ခြင်းတို့ကို ကျူးလွန်ခဲ့ကြောင်း ကုလသမဂ္ဂနှင့် လူ့အခွင့်အရေးအဖွဲ့များက ထုတ်ပြန်ခဲ့သည်။

Source: ရိုက်တာ

CNI International News

ကွာလာလမ်ပူ၊ စက်တင်ဘာ ၁၉

အာဆီယံ နိုင်ငံခြားရေးဝန်ကြီး ၄ ဦးသည် မြန်မာနိုင်ငံသို့ သွားရောက်မည့် ခရီးစဉ်ကို ရွှေ့ဆိုင်းခဲ့ကြောင်း Nikkei Asia မှ ဖော်ပြခဲ့သည်။

အစောပိုင်းက မလေးရှား၊ ထိုင်း၊ ဖိလစ်ပိုင်နှင့် အင်ဒိုနီးရှား နိုင်ငံခြားရေးဝန်ကြီးများသည် မြန်မာနိုင်ငံ၌ ဒီဇင်ဘာလတွင် ကျင်းပမည့် ရွေးကောက်ပွဲနှင့်ပတ်သက်ပြီး မြန်မာ့တပ်မတော်၏ အစီအစဉ်များကို ဆွေးနွေးရန် အတွက် စက်တင်ဘာ ၁၉ ရက်တွင် မြန်မာနိုင်ငံသို့ သွားရောက်ရန် စီစဉ်ခဲ့ခြင်းဖြစ်သည်။

မြန်မာနိုင်ငံသို့ သွားရောက်မည့် ထိုခရီးစဉ်ကို မလေးရှားနိုင်ငံခြားရေးဝန်ကြီး မိုဟာမက် ဟက်ဆန် (Mohamad Hasan) က ဦးဆောင်မည်ဖြစ်ပြီး ထိုကိုယ်စားလှယ်အဖွဲ့တွင် ၂၀၂၆ ခုနှစ်၌ အာဆီယံ အလှည့်ကျဥက္ကဋ္ဌ နေရာကို ရယူမည့် ဖိလစ်ပိုင်မှ ကိုယ်စားလှယ်များလည်း ပါဝင်လိမ့်မည်ဟု Bernama သတင်းအေဂျင်စီက ဖော်ပြခဲ့သည်။

"အရင်ကတော့ သူတို့ (ထိုင်း၊ ဖိလစ်ပိုင်နဲ့ အင်ဒိုနီရှား) တွေက မြန်မာနိုင်ငံကို သီးခြားစီ ခွဲပြီးသွားခဲ့ကြပါတယ်။ ဒါပေမယ့် ကျနော်တို့ဟာ စည်းလုံးညီညွတ်တာကို ပြရပါမယ်။ ဖိလစ်ပိုင်ဟာ ၂၀၂၆ ခုနှစ် အာဆီယံဥက္ကဋ္ဌ နေရာကို ရယူမှာဖြစ်တာကြောင့် သူတို့ကိုလည်း ခေါ်သွားမှာပါ" ဟု မလေးရှား နိုင်ငံခြားရေးဝန်ကြီး ဟက်ဆန်က ပြောကြားခဲ့သည်။

အာဆီယံနိုင်ငံခြားရေးဝန်ကြီးများကိုတွေ့ရစဉ်

အောက်တိုဘာလတွင် ပြုလုပ်မည့် အာဆီယံအစည်းအဝေး မတိုင်မီ မြန်မာ့အရေးကို အာဆီယံခေါင်းဆောင်များ က အာရုံစိုက် လာစေရန်အတွက် မြန်မာနိုင်ငံသို့ သွားရောက်ရန် စီစဉ်ခဲ့ခြင်းဖြစ်သည်ဟု ဟက်ဆန်က ပြီးခဲ့သည့် လတွင် ပြောကြားခဲ့သည်။

သို့သော် ထိုခရီးစဉ်ကို အောက်တိုဘာလ မတိုင်မီအထိ ရွှေ့ဆိုင်းမည်ဖြစ်ကြောင်း ဟက်ဆန်က ပြောကြားခဲ့ပြီး ခရီးစဉ် ရွှေ့ဆိုင်းရသည့် အသေးစိတ် အချက်အလက်ကိုမူ ထုတ်ပြန်ခဲ့ခြင်း မရှိကြောင်း Nikkei Asia သတင်းတွင် ဖော်ပြခဲ့သည်။

ပြီးခဲ့သည့်လက ပြုလုပ်ခဲ့သည့် အာဆီယံ အစည်းအဝေးတွင်မူ မြန်မာနိုင်ငံတွင် ရွေးကောက်ပွဲသည် ဦးစားပေးကိစ္စ မဟုတ်ကြောင်း၊ တပ်မတော်အနေဖြင့် ငြိမ်းချမ်းရေး၊ အပစ်အခတ်ရပ်စဲရေး၊ သက်ဆိုင်ရာ အဖွဲ့အစည်းများ အားလုံး ပါဝင်သည့် ဆွေးနွေးညှိနှိုင်းရေးနှင့် အာဆီယံ၏ ဘုံသဘောတူညီချက် ၅ ချက်ကို အကောင်အထည် ဖော်ရေးတို့ကို ဦးစားပေး လုပ်ဆောင်ရန် တိုက်တွန်းခဲ့သည်။

Source: Nikkei Asia

CNI International News

ကိုပင်ဟေဂင်၊ စက်တင်ဘာ ၁၈

ဒိန်းမတ်နိုင်ငံသည် နှစ်အတန်ကြာ စစ်ရေးအသုံးစရိတ်ကို လျှော့ချခဲ့ပြီးနောက် ယခုအခါတွင် ဥရောပကို ခြိမ်း ခြောက်နေသည့် ရုရှား၏ ခြိမ်းခြောက်မှုအား တန်ပြန်ရန်အတွက် ပတ်မှတ်တိကျသည့် တာဝေးပစ် လက်နက်များ ကို ဝယ်ယူသွားမည်ဖြစ်ကြောင်း ဒိန်းမတ်ဝန်ကြီးချုပ် မက်တီ ဖရက်ဒရစ်ဆန် (Mette Frederiksen) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ရုရှားသည် နော်ဒစ်နိုင်ငံဖြစ်သည့် ဒိန်းမတ်အတွက် ချက်ချင်း တိုက်ခိုက်လာမည့် အန္တရာယ် မရှိသည့်တိုင် ဒိန်းမတ်က တာဝေးပစ် လက်နက်များကို ဝယ်ယူရန် ပြင်ဆင်နေခြင်းဖြစ်သည်။

၂၀၂၂ ခုနှစ်က ယူကရိန်းကို ရုရှားက ဝင်ရောက် တိုက်ခိုက်ခဲ့ပြီးနောက် ဒိန်းမတ်အစိုးရသည် ၎င်းတို့စစ်တပ်၏ အားနည်းချက်များကို ပြုပြင်ရန်အတွက် ယခုနှစ်မှစပြီး စစ်အသုံးစရိတ်ကို တိုးမြှင့်ခဲ့သည်။

"လာမယ့်နှစ်တွေမှာ ရုရှားက ဥရောပနဲ့ ဒိန်းမတ်နိုင်ငံအတွက် ခြိမ်းခြောက်မှုတစ်ခု ဖြစ်လာလိမ့်မယ်ဆိုတာ သံသယ ဖြစ်စရာတောင် မလိုပါဘူး" ဟု ဖရက်ဒရစ်ဆင်က စက်တင်ဘာ ၁၇ ရက်တွင် ပြောကြားခဲ့ပြီး ရုရှားသည် ဒိန်းမတ်ကို ချက်ချင်းတိုက်ခိုက်လာမည့် အန္တရာယ်မရှိသေးကြောင်း ထပ်လောင်း ပြောကြားခဲ့သည်။

ဒိန်းမတ် ဝန်ကြီးချုပ်နဲ့ ယူကရိန်းသမ္မတ ဇာလန်းစကီးကို တွေ့ရစဉ်

လက်နက် ဝယ်ယူမှုများအနက် ရန်သူ့နယ်မြေများအတွင်းရှိ ပစ်မှတ်များကို ပစ်ခတ်နိုင်မည့် ဒုံးကျည်များနှင့် ဒရုန်းများပါဝင်ကြောင်း ဒိန်းမတ်ကာကွယ်ရေးဝန်ကြီး ထရိုယယ်လ် လန်း ပေါ်လ်ဆင် (Troels Lund Poulsen) က ပြောကြားခဲ့သည်။

မည်သည့် လက်နက် အမျိုးအစားများ ဝယ်ယူမည်ဆိုခြင်းနှင့် ငွေကြေး မည်မျှ သုံးစွဲမည်ဆိုခြင်းကိုမူ ၎င်းက ပြောကြားခဲ့ခြင်း မရှိပေ။

နေတိုးအဖွဲ့ဝင် နိုင်ငံဖြစ်သည့် ဒိန်းမတ်သည် ဥရောပလုပ် လေကြောင်းကာကွယ်ရေးစနစ်များ ဝယ်ယူရေးအတွက် ဒေါ်လာ ၉ ဒသမ ၂၀ ဘီလျံ အသုံးပြုသွားမည်ဟု ပြီးခဲ့သည့် သီတင်းပတ်က ကြေညာခဲ့သည်။

ထိုပမာဏသည် ဒိန်းမတ်နိုင်ငံအတွက် ငွေကုန်ကြေးကျ အများဆုံး လက်နက်ဝယ်ယူမှု ဖြစ်လာမည်ဖြစ်သည်။

"မြေပြင်အခြေစိုက် လေကြောင်းကာကွယ်ရေး စနစ်နဲ့အတူ လေကြောင်း ကာကွယ်ရေးကဏ္ဍကို ပေါင်းစပ်ပြီး တန်ပြန် တိုက်ခိုက်နိုင်စွမ်း ဒါမှမဟုတ် တာဝေးတိုက်ခိုက် နိုင်စွမ်းတွေဟာ အရေးကြီးတယ်ဆိုတဲ့ အချက်ကို ယူကရိန်းစစ်ပွဲက ပြသခဲ့ပါတယ်" ဟု ပေါ်လ်ဆန်က ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ စက်တင်ဘာ ၁၈

နေတိုးအဖွဲ့ဝင် နိုင်ငံများအားလုံး အနေဖြင့် ရုရှားထံမှ ရေနံများနှင့် ဓာတ်ငွေ့များကို ဝယ်ယူမှု ရပ်တန့်ခဲ့မည်ဆို ပါက ရုရှားကို ပိတ်ဆို့မှုများ ချမှတ်သွားမည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့သည်ဟု DW သတင်းဝက်ဘ်ဆိုက်တွင် ဖော်ပြခဲ့သည်။

ထရမ့်သည် ထိုအကြောင်းအရာနှင့် ပတ်သက်ပြီး နေတိုးမဟာမိတ်များထံ ရေးသား ပေးပို့ခဲ့သည့်စာကို ပြီးခဲ့သည့် သီတင်းပတ်က Truth Social လူမှုမီဒီယာတွင် တင်ခဲ့သည်။

နေတိုးအဖွဲ့ဝင် နိုင်ငံများသည် ရုရှားထံမှ ရေနံနှင့် ဓာတ်ငွေ့များ ဆက်လက် ဝယ်ယူနေခြင်းအားဖြင့် ယူကရိန်းတွင် စစ်ပွဲဆင်နွှဲနေသော ရုရှားနှင့် ဆက်ဆံမှုများ ပြုလုပ်ရာတွင် အသာစီးမရဘဲ အလျှော့ပေးရမည့် အနေအထားသို့ ရောက်ရှိသွားစေနိုင်သည်ဟု ထရမ့်က ပြောကြားခဲ့သည်။

ရုရှားသမ္မတ ပူတင်ကို တွေ့ရစဉ်

ထို့ပြင် နေတိုးအဖွဲ့ဝင် နိုင်ငံအားလုံး အနေဖြင့် ရုရှားရေနံများကို ဝယ်ယူမှု ရပ်တန့်ခဲ့မည်ဆိုပါက ရုရှားအပေါ် အကြီးစား ပိတ်ဆို့မှုများ ချမှတ်ရန် အသင့်ရှိကြောင်း ထရမ့်က ပြောကြားခဲ့သည်။

သို့သော် နေတိုးအဖွဲ့၏ ဥရောပနိုင်ငံများက ထရမ့်၏ ပြောကြားချက်များကို အလုံးစုံ လက်ခံဖွယ် မရှိကြောင်း ကျွမ်းကျင်သူများက ပြောကြားခဲ့သည်။

အထူးသဖြင့် ဟန်ဂေရီနှင့် ဆလိုဗက်ကီးယားသည် ရုရှားထံမှ စွမ်းအင်များကို မှီခိုနေရသဖြင့် ထိုနိုင်ငံများကို စည်းရုံးသိမ်းသွင်းရန် ဥရောပသမဂ္ဂ အရာရှိများသည် အခက်အခဲနှင့် ရင်ဆိုင်နေရသည်။

ဟန်ဂေရီနှင့် ဆလိုဗက်ကီးယားသည် ထရမ့်နှင့်သာမက ရုရှားသမ္မတ ပူတင်နှင့်ပါ ရင်းနှီးသည့် ဆက်ဆံရေး ရှိနေသဖြင့် ရုရှားထံမှ ရေနံများ ဝယ်ယူမှုကို ရပ်တန့်ဖွယ်မရှိကြောင်း ကျွမ်းကျင်သူများက ပြောကြားခဲ့သည်။

ဟန်ဂေရီခေါင်းဆောင်ကို တွေ့ရစဉ်

"ဥရောပသမဂ္ဂဟာ ရုရှားဆီက ရေနံဝယ်ယူမှုကို သိသိသာသာ လျှော့ချခဲ့ပြီးပါပြီ။ ထရမ့် အနေနဲ့ ဥရောပသမဂ္ဂကို ရုရှားဆီက ရေနံဝယ်ယူမှုတွေ အလုံးစုံ ရပ်တန့်စေချင်တယ်ဆိုရင် မဟာမိတ်နိုင်ငံတွေအတွက် ကောင်းမွန်တဲ့ အစီအစဉ်တွေကို ချပြပေးစေချင်ပါတယ်။ အခုထိတော့ သူ့ဘက်က အစီအစဉ်တစ်ခုကိုမှ မမြင်ရ
သေးပါဘူး" ဟု ဥရောပပြုပြင်ပြောင်းလဲရေးစင်တာ၏ လက်ထောက်ညွှန်ကြားရေးမှူး အီယန် ဘွန်း (Ian Bond) က ပြောကြားခဲ့ သည်။

ထို့ပြင် နေတိုးအဖွဲ့ဝင် နိုင်ငံဖြစ်သည့် တူရကီနိုင်ငံသည်လည်း ရုရှားထံမှ ရေနံဝယ်ယူမှုကို ရပ်တန့်မည့် အရိပ် လက္ခဏာမရှိကြောင်း ကျွမ်းကျင်သူများက ပြောကြားခဲ့သည်။

၂၀၂၃ ခုနှစ်ကစပြီး တူရကီသည် တရုတ်နှင့် အိန္ဒိယပြီးလျှင် ရုရှားထံမှ ရေနံများကို တတိယအများဆုံး ဝယ်ယူ သည့် နိုင်ငံဖြစ်လာကြောင်း စွမ်းအင်နှင့် သန့်ရှင်းသည့် လေထုသုတေသနစင်တာ၏ ထုတ်ပြန်ချက်တွင် ဖော်ပြခဲ့ သည်။

Source: DW

CNI International News

ဟောင်ကောင်၊ စက်တင်ဘာ ၁၈

တရုတ်နိုင်ငံတွင် ပြုလုပ်ခဲ့သည့် ၂၀၁၅ ခုနှစ် စစ်ရေးပြ အခမ်းအနားနှင့် ၂၀၁၉ ခုနှစ် စစ်ရေးပြ အခမ်းအနားများ တွင် စစ်တပ်၏ ထိပ်သီးအရာရှိများက အဓိကအခန်းကဏ္ဍမှ ပါဝင်ခဲ့သော်လည်း ယခုလအစောပိုင်း၌ ပြုလုပ်ခဲ့ သည့် စစ်ရေးပြ အခမ်းအနားတွင်မူ ဗိုလ်ချုပ်ကြီးနှင့် ဗိုလ်ချုပ်အဆင့် အရာရှိများ ပါဝင်ခဲ့ခြင်းမရှိဘဲ ပျောက်ကွယ် နေကြောင်း South China Morning Post မှ ဖော်ပြခဲ့သည်။

တရုတ်တွင် ၂၀၁၅ ခုနှစ်က ပထမဆုံးအကြိမ် ပြုလုပ်ခဲ့သည့် အောင်ပွဲနေ့ စစ်ရေးပြ အခမ်းအနားတွင်မူ စစ် ဗိုလ်ချုပ်ပေါင်း ၅၀ ကျော်သည်  စစ်သားများနှင့်အတူ ဘေဂျင်းမြို့တော် အလယ်ပိုင်းရှိ ချန်အန်း ရိပ်သာလမ်း (Changan Avenue) တစ်လျှောက် ချီတက်ခဲ့ကြသည်။

ထိုစစ်ရေးပြ အခမ်းအနားအတွင်း စစ်ဗိုလ်ချုပ်များသည် တီအန်မင် (Tiananmen) ရင်ပြင်ရှေ့မှ ဖြတ်ပြီး လမ်းလျှောက် ချီတက်ရင်း သမ္မတရှီကျင့်ဖျင် (Xi Jinping) နှင့် အခြားခေါင်းဆောင်များကို အလေးပြုခဲ့ကြသည်။

တရုတ်စစ်ရေးပြ အခမ်းအနား တီယန်မင်ရင်ပြင်မှာ လုပ်နေစဉ်

၂၀၁၉ ခုနှစ်က ပြုလုပ်ခဲ့သည့် အမျိုးသားနေ့ စစ်ရေးပြ အခမ်းအနားတွင်လည်း တရုတ် စစ်ဗိုလ်ချုပ်များသည် လမ်းလျှောက် ချီတက်မှုတွင် ပါဝင်ခဲ့ကြပြီး လေ့လာသူများသည် တရုတ်ပြည်သူ့လွတ်မြောက်ရေးတပ်မတော် (PLA) ၏ မျိုးဆက်သစ် စစ်ဗိုလ်ချုပ်များကို လေ့လာခွင့်ရခဲ့ကြသည်။

ထိုစစ်ရေးပြ အခမ်းအနားတွင် ဗိုလ်ချုပ်ကြီး (General)အဆင့် ၄ ဦး၊ ဒုတိယဗိုလ်ချုပ်ကြီး (Lieutenant General) အဆင့် ၂ ဦးနှင့် ဗိုလ်ချုပ် (Major General)အဆင့် ၈၃ ဦး စုစုပေါင်း စစ်ဗိုလ်ချုပ် ၈၉ ဦး ပါဝင်ကြောင်း ကြေညာခဲ့ သည်။

ထို စစ်ဗိုလ်ချုပ်များအနက် တရုတ်၏ စစ်ဌာနချုပ် ၅ ခု (အရှေ့၊ အနောက်၊ တောင်၊ မြောက်၊ ဗဟို) မှ တပ်မှူးများ လည်း ပါဝင်ခဲ့သည်။

သို့သော် ယခုနှစ် စက်တင်ဘာ ၃ ရက်တွင် ပြုလုပ်ခဲ့သည့် အောင်ပွဲနေ့ စစ်ရေးပြ အခမ်းအနားတွင်မူ ဗိုလ်ချုပ်ကြီး (General)အဆင့် ထိပ်သီးအရာရှိများကို မြင်တွေ့ခဲ့ရခြင်း မရှိကြောင်း South China Morning Post မှ ဖော်ပြခဲ့ သည်။

 တရုတ်သမ္မတ ရှီကျင့်ဖျင်ကို တွေ့ရစဉ် 

ဗိုလ်ချုပ်ကြီး (General) အဆင့် အရာရှိများအစား ဗိုလ်မှူးကြီး (colonel) များက စစ်ရေးပြ အခမ်းအနားတွင် လမ်းလျှောက် ချီတက်ခြင်း၊ မော်တော်ယာဉ် တန်းများပေါ်တွင် လိုက်ပါခြင်းတို့ကို တွေ့ခဲ့ရကာ အစီအစဉ် ကြေညာသူကလည်း ထိုအရာရှိများကို မည်သူမည်ဝါဖြစ်ကြောင်း ကြေညာခဲ့ခြင်းမရှိပေ။

တရုတ်၏ နိုင်ငံရေးသိပ္ပံပညာရှင် တစ်ဦးကမူ ထိုကဲ့သို့ အပြောင်းအလဲများသည် PLA ၏ အဂတိလိုက်စားမှု တိုက်ဖျက်ရေး၏ ရလဒ်တစ်ခု ဖြစ်နိုင်ကြောင်း ပြောကြားခဲ့သည်။

"မကြာသေးခင်က တရုတ်ရဲ့ အဂတိလိုက်စားမှု တိုက်ဖျက်ရေး လုပ်ငန်းစဉ်ဟာ စစ်တပ်အပေါ်ကို သက်ရောက်မှု အရမ်း ရှိခဲ့ပါတယ်။ စုံစမ်းစစ်ဆေးခံနေရတဲ့ ဗိုလ်ချုပ်ကြီးတွေနဲ့ ဆက်နွှယ်နေတယ်လို့ ယူဆရတဲ့ ဗိုလ်ချုပ်တွေ အများကြီး ရှိနိုင်ပါတယ်။ တရုတ်ကလည်း အဲဒီစစ်ရေးပြ အခမ်းအနားကို ဗိုလ်ချုပ်တွေကို ဦးဆောင်ခိုင်းဖို့ တွန့်ဆုတ်ခဲ့တာလည်း ဖြစ်နိုင်ပါတယ်" ဟု အမည်မဖော်လိုသည့် နိုင်ရေးသိပ္ပံပညာရှင်တစ်ဦးက ပြောကြားခဲ့ သည်။

Source: South China Morning Post

CNI International News

ဂျာကာတာ၊ စက်တင်ဘာ ၁၈

အင်ဒိုနီးရှားနိုင်ငံတွင် စစ်ဥပဒေကို ပြင်ဆင်ရေးနှင့်ပတ်သက်ပြီး ဆန့်ကျင်ကွက်မှုများကို အခြေခံဥပဒေဆိုင်ရာ တရားရုံးက စီရင်ချက် ချမှတ်သွားမည်ဖြစ်ကြောင်း ရိုက်တာမှ ဖော်ပြခဲ့သည်။

အဆိုပါစစ်ဥပဒေ ပြင်ဆင်မှုအရ စစ်တပ်သည် အရပ်ဘက်ရေးရာ ကိစ္စရပ်များကို ဝင်ရောက် ကိုင်တွယ်ဖြေရှင်းခွင့် ရရှိမည်ဖြစ်သဖြင့် နိုင်ငံတစ်ဝန်း ဆန့်ကျင်ဆန္ဒပြမှုများ ဖြစ်ပွားခဲ့သည်။

ထိုဥပဒေပြင်ဆင်ရေး အဆိုပြုချက်ကို ပြည်သူလူထုအား သင့်တော်သည့် ညှိနှိုင်းတိုင်ပင်မှုများ ပြုလုပ်ခဲ့ခြင်းမရှိဘဲ မတ်လက လွှတ်တော်တွင် အတင်းအကျပ် တင်သွင်းခဲ့ခြင်းဖြစ်ကြောင်း တရားလိုများက တရားရုံးကို ဆန့်ကျင် ကန့်ကွက်စာ ၅ ခု တင်သွင်းခဲ့သည်။

ဤဥပဒေသည် သမ္မတ ပရာဘိုဝို (Prabowo Subianto) လက်ထက်တွင် အရပ်သားများ၏ လူနေမှုဘဝ၌  စစ်တပ်က ပါဝင်ပတ်သက်မှု ပိုမိုချဲ့ထွင်လာသည့် လုပ်ဆောင်ချက် ဖြစ်လာမည်ကို စိုးရိမ်မှုများ မြင့်တက်လာခဲ့ သည်။

ပရာဘိုဝိုသည် သမ္မတအဖြစ် ၁၁ လကြာ တာဝန်ထမ်းဆောင်ခဲ့ပြီးနောက် ၎င်း၏ ရည်မှန်းချက်များကို အကောင် အထည်ဖော်ရန် စစ်တပ်၏ လုပ်ပိုင်ခွင့်အား တိုးမြှင့်ပေးနေသည့် လုပ်ဆောင်ချက်သည် ၁၉၆၆ ခုနှစ်မှ ၁၉၉၈ ခုနှစ် အထိရှိခဲ့သော အာဏာရှင်အုပ်ချုပ်မှုပုံစံသို့ ရောက်ရှိသွားမည်ကို လူထုက ထိတ်လန့်နေကြသည်။

အင်ဒိုနီးရှားသမ္မတ ဘရာဘိုဝိုကို တွေ့ရစဉ်

ပရာဘိုဝိုသည် လမ်းများပေါ်တွင် ဆန္ဒပြမှုများ၊ စာသင်ကျောင်းများတွင် အခမဲ့ နေ့လယ်စာကျွေးသည့် အစီအစဉ် များ၊ အစားအစာ လုံခြုံရေး၊ ဆေးဝါး ထုတ်လုပ်ရေးနှင့် ဆီအုန်း စိုက်ခင်းများကို နိုင်ငံပိုင်ကုမ္ပဏီအတွက် သိမ်းယူ ခြင်းတို့ အပါအဝင် အရပ်ဘက်ကိစ္စများအတွက် စစ်တပ်ကို တာဝန်ပေးခဲ့ပြီး အဓိက ရာထူးနေရာများကိုလည်း အငြိမ်းစား ဗိုလ်ချုပ်ကြီးများကို ခန့်အပ်ခဲ့သည်။

အင်ဒိုနီးရှားတွင် လွှတ်တော်အမတ်များ၏ ခံစားခွင့်များ၊ နိုင်ငံ့ဘဏ္ဍာများကို ရဲတပ်ဖွဲ့အတွက် ဦးစားပေး သုံးစွဲမှု များနှင့် အင်ဒိုနီးရှားနိုင်ငံကို စစ်တပ်ပုံစံသွင်းနေသည့် သဘောထားရေးရာ အယူအဆများကြောင့် ဆန္ဒပြမှုများ ဖြစ်ပွားခဲ့ပြီးနောက် အခြေခံဥပဒေဆိုင်ရာတရားရုံးက စစ်ဥပဒေပြင်ဆင်ရေးကို စီရင်ချက်ချမည့် ကြေညာချက် ထွက်ပေါ်လာခြင်းဖြစ်သည်။

ထိုစစ်ဥပေဒ ပြင်ဆင်ရေး အဆိုပြုချက်သည် ပွင့်လင်းမြင်သာမှု အားနည်းပြီး လွှတ်တော်သည် ပြည်သူလူထုကို ကျော်ပြီး သမ္မတဘက်သို့လိုက်ကာ အဆိုပြုချက်ကို အတည်မပြုမီ ထိုအဆိုပြုချက်အား ဖျက်သိမ်းပေးရန် တရားရုံးသို့ တင်သွင်းသည့် အသနားခံစာများတွင် ဖော်ပြထားသည်။

"အဲဒီစစ်ဥပဒေ ပြင်ဆင်ရေး အဆိုပြုချက်က ဥပဒေပြုရေးဆိုင်ရာ လုပ်ငန်းစဉ်နဲ့ ညီညွတ်မှု မရှိတာကြောင့် တရားရုံးအနေနဲ့ စစ်ဥပဒေကို ရုပ်သိမ်းပေးလိမ့်မယ်လို့ ကျနော်တို့ မျှော်လင့်ပါတယ်" ဟု တရားရုံးကို အသနားခံစာ တင်သွင်းသူ တစ်ဦးဖြစ်သည့် အာဒီ မန်တို အဒီပူထရာ (Ardi Manto Adiputra) က ရိုက်တာ သတင်းဌာနသို့ ပြောကြားခဲ့သည်။

Source: ရိုက်တာ

CNI International News

ကာရာကက်စ်၊ စက်တင်ဘာ ၁၇

အမေရိကန်နှင့် ဗင်နီဇွဲလားကြား မကြာသေးမီက ဖြစ်ပွားခဲ့သည့် အဖြစ်အပျက်များသည် နှစ်နိုင်ငံတင်းမာမှု ကြောင့် မဟုတ်ဘဲ အမေရိကန်၏ ရန်စမှုကြောင့်သာဖြစ်သည်ဟု ဗင်နီဇွဲလားသမ္မတ မာဒူရိုက စက်တင်ဘာ ၁၅ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့သည် မူးယစ်ဆေးဝါး မှောင်ခိုကူးသူများကို နှိမ်နင်းရန်ဆိုသည့် ကြေညာချက်ဖြင့် ကာရစ်ဘီယံ ဒေသတောင်ပိုင်းတွင် အမေရိကန်၏စစ်အင်အားကို ဖြန့်ကြက်ခဲ့သည်။

ယခုလအတွင်း အမေရိကန်စစ်တပ်သည် ဗင်နီဇွဲလားနိုင်ငံမှ ထွက်ခွာလာသည့် သင်္ဘောတစ်စင်းကို တိုက်ခိုက် နှစ်မြှုပ်ပြီး လူ ၁၁ ဦးကို ချေမှုန်းခဲ့သည်။

ထရမ့်အစိုးရအဖွဲ့ကမူ ထိုသင်္ဘောသည် တရားမဝင် မူးယစ်ဆေးဝါးများကို သယ်ဆောင်လာသဖြင့် တိုက်ခိုက် ခဲ့ခြင်းဖြစ်ကြောင်း ပြောကြားခဲ့သည်။

မာဒူရိုကမူ အမေရိကန်အစိုးရသည် ဗင်နီဇွဲလားနိုင်ငံအပေါ် ရာဇဝတ်မှုမြောက်သော တိုက်ခိုက်မှုကို တရားမျှတ သည့် ပုံစံဖြစ်အောင် ကြိုးပမ်းနေကြောင်း ဗင်နီဇွဲလားထိပ်သီး စစ်ခေါင်းဆောင်များနှင့် အရာရှိများ တက်ရောက် ခဲ့သည့် သတင်းစာ ရှင်းလင်းပွဲတွင် ပြောကြားခဲ့သည်။

"ဒါတွေက တင်းမာမှုကြောင့် မဟုတ်ပါဘူး။ ရန်စမှုကြောင့် ဖြစ်ခဲ့ရတာပါ။ သူတို့က ကျနော်တို့ကို ရာဇဝတ်သား တွေကို ဆက်ဆံတဲ့ အချိန်မျိုး၊ နိုင်ငံရေးဖိနှိပ်မှုတွေ ပြုလုပ်တဲ့အချိန်မျိုး၊ သံတမန် ဖိအားပေးတဲ့ အချိန်မျိုးနဲ့ စစ်ရေးအရ ရန်စတဲ့ အပြုအမူတွေ ပြုလုပ်နေတဲ့ အချိန်မျိုးတွေမှာ တရားမျှတမှု ရှိသယောင်နဲ့ ပုံဖော်နေတာ ဖြစ်ပါတယ်" ဟု မာဒူရိုက ပြောကြားခဲ့သည်။

ဗင်နီဇွဲလားသမ္မတ မာဒူရိုကို တွေ့ရစဉ်

ထို့ပြင် ဗင်နီဇွဲလားနှင့် အမေရိကန်အစိုးရကြား ဆက်သွယ်ရေး လမ်းကြောင်းများ ထိခိုက်ခဲ့သော်လည်း အမေရိကန်မှ ဗင်နီဇွဲလားနိုင်ငံသားများကို ပြန်လည်ပို့ဆောင်ရေးအတွက် အခြေခံ ထိတွေ့ဆက်ဆံမှု ဆက်ရှိ နေဆဲဖြစ်သည်ဟု မာဒူရိုက ပြောကြားခဲ့သည်။

"အမေရိကန်အစိုးရနဲ့ ဆက်သွယ်ရေး လမ်းကြောင်းတွေက မရှိတော့ပါဘူး။ အကြမ်းဖက် ခြိမ်းခြောက်မှုတွေကို အကြောင်းပြပြီး အမေရိကန်ဘက်က ဗင်နီဇွဲလားနဲ့ ဆက်ဆံရေးတွေကို စွန့်လွှတ်ခဲ့တာ ဖြစ်ပါတယ်" ဟု ၎င်းက ပြောကြားခဲ့သည်။

ယခုလအတွင်း ဗင်နီဇွဲလားမှ ထွက်ခွာလာသည့် သင်္ဘောတစ်စင်းကို တိုက်ခိုက်မှုနှင့် ပတ်သက်ပြီး တရားမျှတမှု ရှိကြောင်း ခိုင်လုံသည့် အချက်အလက်များကို တင်ပြရန် အမေရိကန်လွှတ်တော်က တောင်းဆိုထားသည့်တိုင် ထရမ့်အစိုးရအဖွဲ့သည် ထိုတိုက်ခိုက်မှုနှင့်ပတ်သက်ပြီး အချက်အလက် အနည်းငယ်သာ ထုတ်ပြန်ခဲ့သည်။

တိုက်ခိုက်ခံခဲ့ရသည့် ထိုသင်္ဘောပေါ်တွင် ဗင်နီဇွဲလားနိုင်ငံ၏ Tren de Aragua ဒုစရိုက်ဂိုဏ်းဝင်များ ပါဝင်ခဲ့ သည်ဆိုသည့် အမေရိကန်၏ ပြောကြားချက်ကို ဗင်နီဇွဲလားက ငြင်းဆိုခဲ့သည်။

ထို့ပြင် အမေရိကန်သည် ၎င်းအား ရာထူးမှ ဖြုတ်ချရန် မျှော်လင့်နေသည်ဟုလည်း မာဒူရိုက ပြောကြားခဲ့သည်။

Source: ရိုက်တာ

CNI International News

တိုင်ပေ၊ စက်တင်ဘာ ၁၇

ထိုင်ဝမ်ကမ်းခြေစောင့်တပ်ဖွဲ့သည် တရုတ်၏ grey-zone(မီးခိုးရောင်ဇုန်) နည်းဗျူဟာတွင် ပစ်မှတ်တစ်ခုဖြစ်သည့် ရေအောက်ဆက်သွယ်ရေး ကေဘယ်ကြိုးများ လုံခြုံရေးအတွက် ပင်လယ်ရေကြောင်း ကင်းလှည့်မှုများကို အရှိန် မြှင့် ပြုလုပ်နေသည်ဟု ရိုက်တာမှ ဖော်ပြခဲ့သည်။

grey-zone နည်းဗျူဟာဆိုသည်မှာ အင်ပြည့်အားပြည့် စစ်ပွဲဆင်နွှဲခြင်း မဟုတ်ဘဲ ပြိုင်ဘက်ကို ဆိုက်ဘာ တိုက်ခိုက်မှုများ၊ သတင်းအမှား ဖြန့်မှုများ၊ စီးပွားရေးနှင့် နိုင်ငံရေးဖိအားများ၊ လေကြောင်းနှင့် ရေကြောင်းတွင် နှောင့်ယှက်မှုများ အပါအဝင် စစ်ကစားခြင်း၊ စစ်မြှူခြင်းတို့ ပြုလုပ်သည့် ဗျူဟာတစ်ခုဖြစ်သည်။

ယခုနှစ်အတွင်း တရုတ်သင်္ဘော ကပ္ပတိန်တစ်ဦးသည် ထိုင်ဝမ်၏ ရေအောက်ဆက်သွယ်ရေး ကေဘယ်ကြိုးကို ရည်ရွယ်ချက်ရှိရှိ ဖြတ်တောက်ခဲ့ကြောင်း ပြစ်မှုထင်ရှားစီရင်ခံခဲ့ရသည့် သတင်းသည် နိုင်ငံတကာမီဒီယာများတွင် ခေါင်းကြီးပိုင်းသတင်းဖြစ်ခဲ့သည်။

ထို့ကြောင့် ထိုင်ဝမ်ကမ်းခြေစောင့်တပ်ဖွဲ့က ထိုင်ဝမ်၏ ရေအောက်ကေဘယ်ကြိုးများ လုံခြုံရေးအတွက် ကင်းလှည့်မှုများကို တိုးမြှင့်နေကြောင်း ထိုင်ဝမ်ကမ်းခြေစောင့်တပ်ဖွဲ့၏ ကပ္ပတိန်တစ်ဦးဖြစ်သည့် ဂျူအန် ချောင်ချင်း (Juan Chung-ching) က ပြောကြားခဲ့သည်။

 ထိုင်ဝမ်နဲ့ တရုတ် ရေတပ်လုံခြုံရေး ကင်းလှည့်မှု သရုပ်ဖော်ပြထားစဉ်

ဂျူအန်သည်လည်း ၎င်း၏ ကမ်းခြေစောင့်တပ်ဖွဲ့ သင်္ဘောနှင့်အတူ TP3 အမည်ရှိ ရေအောက် ဆက်သွယ်ရေး ကေဘယ်ကြိုး တည်ရှိနေသည့် နေရာအနီးတွင် ကင်းလှည့်လျက်ရှိသည်။

TP3 ကေဘယ်ကြိုးသည် ထိုင်ဝမ်၏ ပြည်တွင်းနှင့် ကမ္ဘာလုံးဆိုင်ရာ အင်တာနက်လိုင်းများကို ချိတ်ဆက်ထား သည့် ရေအောက်ကေဘယ်ကြိုး ၂၄ ကြိုးတွင် တစ်ခုအပါအဝင် ဖြစ်သည်။

တရုတ်၏ grey-zone နည်းဗျူဟာကို တန်ပြန်ရန် ယခုကဲ့သို့ ကင်းလှည့်သည့် မစ်ရှင်များသည် ထိုင်ဝမ်၏ ဦးစားပေးကိစ္စ တစ်ခုဖြစ်လာခဲ့သည်ဟု ဂျူအန်က ပြောကြားခဲ့သည်။

"သူတို့ရဲ့ ကျူးကျော်ဝင်ရောက်မှုတွေက ထိုင်ဝမ် လူ့အဖွဲ့အစည်းရဲ့ ငြိမ်းချမ်းရေးနဲ့ တည်ငြိမ်ရေးကို ဆိုးရွားစွာ လျော့ပါးစေခဲ့ပါတယ်။ ကျနော်တို့က ဒီနေရာမှာ ကင်းလှည့်မှုတွေကို တိုးမြှင့်ပြီး နှောင့်ယှက်ဖျက်ဆီးမှုတွေ လုပ်မယ့် သင်္ဘောတွေကို စောင့်ကြည့်နေပါတယ်" ဟု ဂျူအန်က ပြောကြားခဲ့သည်။

Source: ရိုက်တာ