CNI International News

ဟောင်ကောင်၊ ဖေဖော်ဝါရီ ၁၁

တရုတ်၏ နျူကလီးယား ရေငုပ်သင်္ဘောသည် တောင်တရုတ်ပင်လယ်တွင် ဘုရင်ဖြစ်လာသည်ဟု South China Morning Post မှ ဖော်ပြခဲ့သည်။

တရုတ်စစ်တပ်ကို ကမ္ဘာ့အင်အား အကြီးဆုံးစစ်တပ်အဖြစ် ထူထောင်လိုသည့် တရုတ်သမ္မတ ရှီကျင့်ဖျင် ( Xi Jinping) ၏ အစီအစဉ်များအရ တရုတ်ပြည်သူ့လွတ်မြောက်ရေးတပ်မတော်(PLA)သည် ဆယ်စုနှစ်တစ်စုနီးပါး အတွင်း စစ်အင်အားကို မြှင့်တင်ခဲ့သည်။

တရုတ်၏ လက်နက်စနစ်များကို အမျိုးအစားအလိုက် စောင့်ကြည့်သင့်သလို တရုတ်ရေတပ်၏ ရေငုပ်သင်္ဘောများ ဖွံ့ဖြိုးတိုးတက်လာမှုကိုလည်း စောင့်ကြည့်ရမည်ဖြစ်ကြောင်း ကျွမ်းကျင်သူများက ပြောကြားခဲ့သည်။

တရုတ်သည် တောင်တရုတ်ပင်လယ်ပြင်၏ ရေအောက်ဘက်တွင် လက်နက်အပြည့်အဝ တပ်ဆင်ထားသည့် ရေငုပ်သင်္ဘောများဖြင့် လှုပ်ရှားမောင်းနှင်လျက်ရှိသည်။

ထိုရေငုပ်သင်္ဘောများ၏ အထူးတာဝန်မှာ အမေရိကန် အပါအဝင် တရုတ်၏ ဖြစ်လာနိုင်ခြေရှိသည့် ရန်သူများ၏ နျူကလီးယား ရန်စမှုများကို ဖြေရှင်းရန်နှင့် တရုတ်အား ရန်စပါက နောက်ဆက်တွဲ ဆိုးကျိုးများနှင့် ရင်ဆိုင်ရမည် ကို ပြသရန်ဖြစ်သည်။

တရုတ်ရေငုပ်သင်္ဘော ဒီဇိုင်းကို တွေ့ရစဉ်

Type 094 နျူကလီးယား ပဲ့ထိန်းဒုံးကျည်တပ် ရေငုပ်သင်္ဘောသည် တရုတ်၏ ကြီးမားသည့် အောင်မြင်မှုတစ်ခု ဖြစ်ပြီး အမေရိကန်ကာကွယ်ရေးဝန်ကြီးဌာနကမူ ထိုရေငုပ်သင်္ဘောသည် တရုတ်၏ ပထမဆုံး ပင်လယ်ပြင် အခြေစိုက် နျူကလီးယား အခြိမ်းအခြောက် အဟန့်အတား (sea-based nuclear deterrent) ဖြစ်သည်ဟု သုံးနှုန်းဖော်ပြခဲ့သည်။

တရုတ်သည် JL-2 ဒုံးကျည်များနှင့် JL-3 ဒုံးကျည်များ ပစ်လွှတ်နိုင်သည့် Type 094 နျူကလီးယား ပဲ့ထိန်းဒုံးကျည် တပ် ရေငုပ်သင်္ဘော ခြောက်စင်းဖြင့် လည်ပတ်နေသည်။

ထိုဒုံးကျည်များသည် တရုတ်၏ ကမ်းရိုးတန်းမှ ပစ်လွှတ်မည်ဆိုပါက အမေရိကန်၏ နယ်နိမိတ်အထိ ရောက်ရှိနိုင် သည်ဟုဆိုသည်။

ထို့ကြောင့် အမေရိကန်နှင့် ၎င်း၏ မဟာမိတ်များက ပိုင်ဆိုင်မှု အငြင်းပွားနေသည့် တောင်တရုတ်ပင်လယ်အတွင်း ကင်းလှည့်နေသည့် ထိုရေငုပ်သင်္ဘောများကို  အနီးကပ်စောင့်ကြည့်နေသည်။

ပြီးခဲ့သည့်နှစ် ဇွန်လအတွင်းကလည်း Type 094 ဟု ယူဆရသည့် တရုတ်ရေငုပ်သင်္ဘော တစ်စင်းသည် ထိုင်ဝမ် ရေလက်ကြားတွင် ရေမျက်နှာပြင်ပေါ်သို့ ထွက်ပေါ်လာခဲ့သဖြင့် မီဒီယာများ၌ ခေါင်းကြီးပိုင်းသတင်းများ ဖြစ်ခဲ့သည်။

Source: South China Morning Post

CNI International News

ဘန်ကောက်၊ ဖေဖော်ဝါရီ ၁၀

ထိုင်းနိုင်ငံမှ ထောက်ပံ့သည့် လျှပ်စစ်ဓာတ်အားများ ဖြတ်တောက်ခံရမှုကြောင့် တာချီလိတ်လျှပ်စစ်ဓာတ်အား အာဏာပိုင်အဖွဲ့သည်  မြို့တွင်းရှိ စားသောက်ဆိုင်များနှင့် ဟိုတယ်များကို ထောက်ပံ့ပေးထားသော လျှပ်စစ် ဓာတ်အားကို ယာယီ လျှော့ချနေရကြောင်း The Nation မှ ဖော်ပြခဲ့သည်။

ပင်မ လျှပ်စစ်ဓာတ်အား ဖြန့်ဖြူးသည့်စနစ်မှ ဓာတ်အားထုတ်လွှတ်မှုသည် လျော့ကျခဲ့သဖြင့် လျှပ်စစ်ဓာတ်အား သုံးစွဲမှုကို လုံလောက်မှုရှိစေရန်အတွက် လျှပ်စစ်ဓာတ်အားများကို ယာယီလျှော့ချမည်ဟု တာချီလိတ် လျှပ်စစ် ဓာတ်အားကော်မတီက ပြောကြားခဲ့သည်။

ထို့ကြောင့် ကော်မတီသည် လျှပ်စစ်ဓာတ်အားများကို အများအပြား အသုံးပြုလေ့ရှိသည့် စားသောက်ဆိုင်များနှင့် ဟိုတယ်များအတွက် လျှပ်စစ်ဓာတ်အားဖြန့်ဖြူးမှုကို ယာယီလျှော့ချပေးမည်ဖြစ်ပြီး မကြာမီ အချိန်အတွင်း လျှပ်စစ်ဓာတ်အားများကို ပုံမှန်အနေအထားအတိုင်း ပြန်လည်ထောက်ပံ့ပေးမည်ဟု ကြေညာခဲ့သည်။

မည်သို့ပင်ဆိုစေ ပညာရေး၊ ကျန်းမာရေး၊ ဘာသာရေး၊ အစိုးရဌာနများ၊ ကုန်ထုတ်လုပ်ရေးစက်ရုံများ၊ ဘဏ်များ၊ အင်တာနက် ဝန်ဆောင်မှုကုမ္ပဏီများကိုမူ ပုံမှန်အတိုင်း လျှပ်စစ်ဓာတ်အားများ ထောက်ပံ့ပေးမည်ဟု ကော်မတီ က ကြေညာခဲ့သည်။

 တာချီလိတ်မြို့ရှိ ဟိုတယ်ကို တွေ့ရစဉ်

လျှပ်စစ်ဓာတ်အားများ အလေအလွင့် မဖြစ်စေရန်အတွက် မရှိမဖြစ် လိုအပ်သည့် လျှပ်စစ်ဓာတ်အား ပမာဏကို သာ အသုံးပြုခြင်းအားဖြင့် အကူအညီ ပေးသွားမည်ဟုလည်း ကော်မတီက ကြေညာခဲ့သည်။

တာချီလိတ်မြို့တွင် လျှပ်စစ်ဓာတ်အားများ ပြတ်တောက်မှုနှင့်ပတ်သက်ပြီး ထိုကော်မတီ၏ မှတ်ချက်ကို တောင်းခံရန် ဆက်သွယ်ခဲ့သော်လည်း တုန့်ပြန်ခြင်းမရှိသေးပေ။

ဒေသခံမီဒီယာများ၏ ထုတ်ပြန်ချက်အရ ထိုင်းဘက်မှ လျှပ်စစ်ဓာတ်အားများ ဖြတ်တောက်လိုက်ချိန်တွင် တာချီလိတ်မြို့သည် လာအိုနိုင်ငံထံမှ လျှပ်စစ်ဓာတ်အားများကို ဝယ်ယူနေကြောင်း ဖော်ပြခဲ့သည်။

ထိုင်း-မြန်မာ နယ်စပ်ဒေသတွင် ကျားဖြန့်လုပ်ငန်းများကို တိုက်ဖျက်ရန်အတွက် မြန်မာနိုင်ငံ၏ နယ်စပ်ဒေသ ၅ နေရာကို လျှပ်စစ်ဓာတ်အားနှင့် အင်တာနက်လိုင်းများ ထောက်ပံ့မှုကို ဖြတ်တောက်ခြင်းဖြစ်ကြောင်း ထိုင်း ဝန်ကြီးချုပ် ပေတုန်တန် ရှင်နာဝပ်(Paetongtarn Shinawatra) က ပြောကြားခဲ့သည်။

လျှပ်စစ်ဓာတ်အားများ ဖြတ်တောက်ခံရသည့် မြန်မာနယ်စပ်မြို့များထဲတွင် မြဝတီ၊ ဘုရားသုံးဆူ၊ မိုင်းတုံနှင့် တာချီလိတ်မြို့များ ပါဝင်ခဲ့သည်။

Source: The Nation

CNI News

၂၀၂၅ ခုနှစ်၊ ဖေဖော်ဝါရီ ၁၀

တအာင်းအမျိုးသားလွတ်မြောက်ရေးတပ်မတော်(TNLA)သည် ရှမ်းပြည်နယ်မြောက်ပိုင်းတွင် ဒီမိုကရေစီ မဆန်သော ကိစ္စရပ်များကို လုပ်နေသည်ဟု ရှမ်းပြည်ပူးပေါင်းဆောင်ရွက်ရေးကော်မတီ(SSJAC)က ၂၀၂၅ ခုနှစ်၊ ဖေဖော်ဝါရီ ၁၀ ရက်တွင် ထုတ်ပြန် ပြောကြားခဲ့သည်။

၂၀၂၅ ခုနှစ်၊ ဖေဖော်ဝါရီ ၇ ရက်မှစ၍ TNLA သည် သီပေါမြို့အဝင် မုခ်ဦးတွင် ရေးဆွဲထုဆစ်ထားသော ရှမ်းပြည် ကိုယ်စားပြု အမှတ်သရုပ်အား ပလောင်လူမျိုးအမှတ်သရုပ်ဖြင့် အစားထိုးပြောင်းလဲ လုပ်ဆောင်လျက်ရှိနေသည် ကိုတွေ့ရှိရသလို ၂၀၂၃ ခုနှစ်၊ ဩဂုတ် ၇ ရက်တွင်လည်း မူဆယ်မြို့နယ်၊ စယ်လန့်ရွာရှိ ရှမ်းလူမျိုးတို့၏ အထွဋ် အမြတ် အခေါင်အချုပ်ဖြစ်သော စဝ်ဆေခန်ဖ၏ နန်းမြို့ရိုးဟောင်းကို ဘူဒိုဇာဖြင့် ဖျက်ဆီးခဲ့ကြောင်း SSJAC က ထုတ်ပြန်ခဲ့သည်။ 

SSJAC က “ ရှမ်းလူမျိုးတို့ အမြတ်တနိုး ထိန်းသိမ်းထားရှိသော စဝ်ဆေခန်ဖ၏ နန်းမြို့ရိုး‌ဟောင်းကို ဖျက်ဆီး သည့်အချိန်တွင် လူမျိုးရေးပဋိပက္ခ မဖြစ်ပွားစေရေး ရည်သန်၍ စစ်ရေးနည်းလမ်းအစား ငြိမ်းချမ်းစွာဖြင့် ဆွေးနွေး ဖြေရှင်းသည့် နည်းလမ်းကို ရှမ်းအဖွဲ့အစည်း အသီးသီးက ဆောင်ရွက်ခဲ့သည်”ဟု ပြောသည်။

ယခု TNLA က လုပ်ဆောင်နေသည့် သီပေါမြို့အဝင်မုခ်ဦးရှိ ရှမ်းပြည်ကိုယ်စားပြု အမှတ်သရုပ်အား ပလောင် လူမျိုး အမှတ်သရုပ်ဖြင့် အစားထိုးပြောင်းလဲ လုပ်ဆောင်ခြင်း အပါအဝင် ယခင်နှစ်များတွင်လည်း ကွတ်ခိုင်မြို့ နယ် မိုင်းယုဒေသ၊ နမ္မတူမြို့နယ် မိုင်းရင်ဒေသ စသည့် နယ်မြေဒေသများတွင် အလားတူ ကိစ္စရပ်များ ပြုလုပ်ခဲ့ သည့်အပြင် ရှမ်းပြည်မြောက်ပိုင်းတွင် ဒီမိုကရေစီ မဆန်သော အခြားကိစ္စရပ်များကို ပြုလုပ်နေသည်မှာ ဒေသခံ ပြည်သူတို့၏ ဆန္ဒသဘောထားကို မထီမဲ့မြင်ပြုခြင်း လုပ်နေသည်ဟု SSJAC က ထုတ်ပြန်ခဲ့သည်။

TNLA က သီပေါမြို့အဝင် မုခ်ဦးကို ပလောင်သရုပ်ဖော်မှုကို လုပ်ထားစဉ်

ထို့ပြင် အချုပ်အခြာအာဏာပိုင် ပြည်သူတို့ကို လေးစားသမှုမရှိခြင်း၊ မိမိအစုအဖွဲ့လိုဘ တစ်ခုတည်းကိုသာ ဦးတည် ဆောင်ရွက်ခြင်း၊ ဒီမိုကရေစီ၏ အနှစ်သာရများ၊ လက်ရှိ တော်လှန်ရေး၏ ဦးတည်ချက်များနှင့် ဆန့်ကျင် ကွဲလွဲနေခြင်း၊ တိုင်းရင်းသားလူမျိုးအချင်းချင်း ပဋိပက္ခမဖြစ်ပွားဘဲ ငြိမ်းချမ်းစွာ အတူတကွ ယှဉ်တွဲ နေထိုင်နိုင်ရေး ကို ဆန့်ကျင်ရာ ရောက်ခြင်းတို့ကြောင့် TNLA ၏ လုပ်ရပ်ကို ပြင်းပြင်းထန်ထန် ကန့်ကွက်ရှုတ်ချသည်ဟု SSJAC က ထုတ်ပြန်ခဲ့သည်။

TNLA သည် ၂၀၂၃ ခုနှစ်၊ အောက်တိုဘာ ၂၇ ရက်က MNDAA၊ AA၊ BPLA၊ BNRA၊ KNDF၊ PDF၊ PLA၊ DPLA တို့ဖြင့် ပူးပေါင်း၍ ၁၀၂၇ စစ်ဆင်ရေးကို ဖော်ဆောင်၍ ရှမ်းပြည်နယ်မြောက်ပိုင်းအတွင်းရှိ နမ့်ခမ်း၊ နမ္မတူ၊ နမ့်ဆန်၊ မန်တုံ၊ မိုင်းငေါ့၊ ကွတ်ခိုင်၊ သီပေါ၊ နောင်ချို၊ ကျောက်မဲ၊ မိုးကုတ်၊ မိုးမိတ် တို့ကို တိုက်ခိုက်သိမ်းပိုက်ထားသည်။

SSJAC သည် ရှမ်းပါတီများ၊ ရှမ်းလက်နက်ကိုင်များ၊ ရှမ်းအရပ်ဖက်အဖွဲ့အစည်းများ ပူးပေါင်း၍ ဖွဲ့စည်းထားသော ကော်မတီဖြစ်သည်။

CNI International News

ပြုံယမ်း၊ ဖေဖော်ဝါရီ ၁၀

မြောက်ကိုရီးယားခေါင်းဆောင် ကင်မ်ဂျုံအန်(Kim Jong Un)က နျူကလီးယား တပ်ဖွဲ့အင်အားကို ပိုမိုမြှင့်တင် သွားမည်ဟု ဖေဖော်ဝါရီ ၈ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထို့ပြင် ကင်မ်က ဒေသတွင်း တင်းမာမှုများကို ပိုမိုမြင့်တက်စေသည့်အတွက် အမေရိကန်၊ ဂျပန်နှင့် တောင်ကိုရီးယားတို့၏ သုံးပွင့်ဆိုင် စစ်ရေးပူးပေါင်း ဆောင်ရွက်မှုများကိုလည်း ဝေဖန်ခဲ့သည်။

အမေရိကန်၏ နျူကလီးယား မဟာဗျူဟာမြောက် ပစ္စည်းများ ဖြန့်ကြက်ချထားမှု၊ ဂျပန်နှင့် တောင်ကိုရီးယား တို့နှင့်အတူ စစ်ရေးလေ့ကျင့်မှုများနှင့် စစ်ဘက်ဆိုင်ရာ ပူးပေါင်းဆောင်ရွက်မှုများသည် ဒေသတွင်းစစ်ရေး ဟန်ချက်ညီမှုကို ထိခိုက်စေကာ လုံခြုံရေးအတွက် အလွန်ကြီးမားသည့် စိန်ခေါ်မှုကို ဖြစ်ပေါ်စေသည်ဟု ကင်မ်က ပြောကြားခဲ့ကြောင်း KCNA သတင်းတွင် ဖော်ပြထားသည်။

“မြောက်ကိုရီးယားအနေနဲ့ ဒေသတွင်း အခြေအနေတွေမှာ မလိုလားအပ်တဲ့ တင်းမာမှုတွေ မမြင့်တက်စေချင် ပါဘူး။ ဒါပေမဲ့ ဒေသတွင်း စစ်ဘက်ဆိုင်ရာ ဟန်ချက်ညီမှုရှိစေဖို့အတွက် လိုအပ်တဲ့ စီမံချက်တွေကို လုပ်ဆောင်သွားမှာပဲ ဖြစ်ပါတယ်”ဟု ကင်မ်က ပြောကြားခဲ့သည်။

ကင်မ်သည် ဖေဖော်ဝါရီ ၉ ရက်တွင် ကျရောက်သည့် မြောက်ကိုရီးယားစစ်တပ် ထူထောင်သည့်နေ့ကို ဂုဏ်ပြုရန် အတွက် ကာကွယ်ရေးဝန်ကြီးဌာနဆီ သွားရောက်ချိန်၌ ယခုကဲ့သို့ ပြောကြားခဲ့ခြင်းဖြစ်သည်။

အမေရိကန်သမ္မတ ဒေါ်နယ်ထရမ့်(Donald Trump)က ဖေဖော်ဝါရီ ၈ ရက်တွင် ဂျပန်ဝန်ကြီးချုပ် ရှီဂီရူအီရှီဘာ (Shigeru Ishiba) နှင့် အစည်းအဝေး ပြုလုပ်ခဲ့သည်။

 မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

ထို့နောက် ထရမ့်က သူသည် မြောက်ကိုရီးယားနှင့် ဆက်ဆံရေးများ ပြုလုပ်သွားမည်ဟု ပြောကြားခဲ့သည်။

သို့သော် ကင်မ်ကမူ မြောက်ကိုရီးယား၏ နျူကလီးယား အင်အားစုများကို မြှင့်တင်သွားမည့် မူဝါဒကိုမူ ပြောင်းလဲ သွားမည် မဟုတ်ကြောင်း ပြောကြားခဲ့သည်။

မြောက်ကိုရီးယား စစ်တပ်နှင့် ပြည်သူများသည် မြောက်ကိုရီးယားနှင့် ရုရှားနိုင်ငံကြား ပြီးပြည့်စုံသော မဟာဗျူဟာမြောက် မိတ်ဖက်ဆက်ဆံရေးအရ ရုရှားစစ်တပ်နှင့် ရုရှားပြည်သူ များ၏ အချုပ်အခြာအာဏာ၊ လုံခြုံရေးနှင့် နယ်မြေတည်တံ့ခိုင်မြဲမှုတို့နှင့်ပတ်သက်ပြီး ခုခံကာကွယ်မှုများကို အားပေးကူညီသွားမည်ဟု ကင်မ်က ပြောကြားခဲ့သည်။

မြောက်ကိုရီးယားသည် ရုရှားသို့ စစ်သားအင်အား အများအပြား စေလွှတ်ရန် ပြင်ဆင်နေသည်ဟု သံသယရှိ ကြောင်း တောင်ကိုရီးယားက လွန်ခဲ့သည့်လတွင် ပြောကြားခဲ့သည်။

မြောက်ကိုရီးယားသည် သုံးနှစ်ကြာ ဖြစ်ပွားနေသော ယူကရိန်း-ရုရှား စစ်ပွဲအတွက် စေလွှတ်ထားသော စစ်သား ၁၁,၀၀၀ အပြင် နောက်ထပ် စစ်သားများကို စေလွှတ်သွားရန် ပြင်ဆင်နေသည်ဟု တောင်ကိုရီးယားက ယူဆထား သည်။

Source: ရိုက်တာ

CNI International News

ဝါရှင်တန်၊ ဖေဖော်ဝါရီ ၁၀

တောင်အာဖရိကတွင် နေထိုင်သည့် လူဖြူလူနည်းစုများသည် ဖိနှိပ်ခံနေရသဖြင့် ထိုလူဖြူများကို ဒုက္ခသည်များ အဖြစ် အမေရိကန်သို့ ရွှေ့ပြောင်းနေရာချထားပေးမည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့ကြောင်း အေပီမှ ဖော်ပြခဲ့သည်။

သို့သော် အနောက်အာဖရိကတွင် နေထိုင်သည့် လူဖြူများကို ကိုယ်စားပြုသည် အဖွဲ့များကမူ ထရမ့်၏ အစီအစဉ်ကို ကျေးဇူးတင်ကြောင်း၊ သို့သော် ထိုသို့ လုပ်ဆောင်ရန် မလိုအပ်ကြောင်း ပြောကြားခဲ့ကြသည်။

ဖေဖော်ဝါရီ ၇ ရက်က ထရမ့် လက်မှတ်ရေးထိုးခဲ့သည့် သမ္မတအုပ်ချုပ်ရေးအမိန့်ထဲတွင် ထိုအစီအစဉ် အကြောင်း ကို အသေးစိတ် ဖော်ပြထားပြီး တောင်အာဖရိက၌ လူဖြူများအပေါ် လူ့အခွင့်အရေး ချိုးဖောက်မှုများရှိနေသဖြင့် တောင်အာဖရိကကို အပြစ်ပေးသည့် အနေဖြင့် အမေရိကန်၏ ကူညီထောက်ပံ့မှုများ အားလုံးကို ရပ်တန့်လိုက် ကြောင်း ဖော်ပြခဲ့သည်။

တောင်အာဖရိကအစိုးရသည် လူဖြူအာဖရိကန် လယ်သမားများကို အကြမ်းဖက် တိုက်ခိုက်ခွင့်ပြုထားကြောင်း ထရမ့်အစိုးရအဖွဲ့က စွပ်စွဲခဲ့ပြီး တောင်အာဖရိကအစိုးရကမူ ထိုစွပ်စွဲချက်ကို ငြင်းဆိုခဲ့သည်။

တောင်အာဖရိကန် လူဖြူများ၏ အများစုသည် ဒတ်ချ်လူမျိုးများမှ ဆင်းသက်လာသူများဖြစ်ပြီး လွန်ခဲ့သည့် နှစ်ပေါင်း ၃၀၀ ကျော်က တောင်အာဖရိကကို ပထမဆုံးရောက်ရှိခဲ့သော ပြင်သစ်နှင့် ဂျာမန် ကိုလိုနီများမှ ဆင်းသက်လာသူများလည်း ပါဝင်သည်။

တောင်အာဖရိကန်လူဖြူများကိုတွေ့ရစဉ်

တောင်အာဖရိက၏ လူဦးရေ ၆၂ သန်းအနက် ၇ ရာခိုင်နှုန်းခန့်သည် လူဖြူ အာဖရိကန်များဖြစ်သည်။

လူဖြူ အာဖရိကန်များကို ကိုယ်စားပြုသည့် အထင်ကရ အဖွဲ့အစည်း ၂ ခုကမူ အမေရိကန်သို့ နေရာရွှေ့ပြောင်း ပေးမည့် ထရမ့်၏ ကမ်းလှမ်းချက်ကို စိတ်ဝင်စားမှုမရှိကြောင်း ပြောကြားခဲ့သည်။

“ကျနော်တို့ အဖွဲ့ဝင်တွေက ဒီမှာပဲ အလုပ်လုပ်ပြီး ဒီမှာပဲနေချင်တာပါ။ သူတို့က ဒီမှာပဲ ဆက်နေကြမှာပါ”ဟု လူဖြူအာဖရိကန် ၂ သန်းခန့်ကို ကိုယ်စားပြုသည့် ကုန်သွယ်ရေးသမဂ္ဂဖြစ်သော Solidarity ၏ အလုပ်အမှုဆောင် ချုပ် ဒရစ် ဟာမန်း (Dirk Hermann) က ပြောကြားခဲ့သည်။

ထို့ပြင် နောက်ထပ် လူဖြူအာဖရိကန် အဖွဲ့အစည်းဖြစ်သည့်  AfriForum ၏ စီအီးအို ကယ်လိုင်း ကရီယယ် (Kallie Kriel) ကလည်း ၎င်းတို့အနေဖြင့် မည်သည့်နေရာကိုမှ ပြောင်းရွှေ့သွားမည် မဟုတ်ကြောင်း ပြောကြားခဲ့သည်။

Source: အေပီ

CNI International News

ဘန်ကောက်၊ ဖေဖော်ဝါရီ ၁၀

တရုတ်ဝန်ကြီးချုပ် လီချင်(Li Qiang)က ယခုနှစ်တွင် ထိုင်းနိုင်ငံသို့ လာရောက်ရန် ထိုင်းအစိုးရ၏ ဖိတ်ကြားချက် ကို သဘောတူလက်ခံခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

တရုတ်နှင့်ထိုင်းနိုင်ငံတို့သည် လျှပ်စစ်မော်တော်ယာဉ်များနှင့် AI နည်းပညာကဲ့သို့ အနာဂတ်စက်မှုလုပ်ငန်းများ တွင် ပူးပေါင်းဆောင်ရွက်မှုကို ပိုမိုအားကောင်း ခိုင်မာစေရန် ရည်ရွယ်ထားချိန်၌ တရုတ်ဝန်ကြီးချုပ်က ဖိတ်ကြား ချက်ကို လက်ခံခဲ့ခြင်း ဖြစ်သည်။

တရုတ်နှင့် ထိုင်းနိုင်ငံကြား သံတမန်ဆက်ဆံရေး နှစ် ၅၀ ပြည့် အထိမ်းအမှတ်အဖြစ် ထိုင်းဝန်ကြီးချုပ် ပေတုန်တန်(Paetongtarn Shinawatra)က ဖေဖော်ဝါရီ ၈ ရက်တွင်  တရုတ်နိုင်ငံသို့ တရားဝင် ခရီးစဉ် သွားရောက်ခဲ့သည်။

ပေတုန်တန်၏ ခရီးစဉ်တွင် ပြီးပြည့်စုံသော မဟာဗျူဟာမြောက် မိတ်ဖက်ပူးပေါင်းဆောင်ရွက်မှုကို မြှင့်တင်ရန် ရည်ရွယ်ထားသလို ကဏ္ဍမျိုးစုံ၌ ပူးပေါင်းဆောင်ရွက်မှုအား တိုးချဲ့ရန်နှင့် လာမည့် နှစ်ပေါင်း ၅၀ တွင် အပြန်အလှန် တိုးတက်မှုနှင့် ပူးပေါင်းဆောင်ရွက်မှု အခြေအနေအား သတ်မှတ်မှုများကို အာရုံစိုက်ထားသည်။

တရုတ်နိုင်ငံတွင် ပေတုန်တန်သည် သမ္မတ ရှီကျင့်ဖျင် ( Xi Jinping) ၊ ဝန်ကြီးချုပ်လီနှင့် အမျိုးသားပြည်သူ့ လွှတ်တော်၏ အမြဲတမ်းကော်မတီဥက္ကဋ္ဌ ကျောင်းလီကျီ (Zhao Leji) တို့နှင့် တွေ့ဆုံခဲ့သည်။

၎င်းတို့အကြား ဆွေးနွေးခဲ့သည့် အကြောင်းအရာများမှာ များပြားစုံလင်လှပြီး စီးပွားရေး ပူးပေါင်းဆောင်ရွက်မှုမှ အစ နည်းပညာ စွန့်ဦးတီထွင်မှုအလယ် သဘာဝပတ်ဝန်းကျင်နှင့် လုံခြုံရေးကိစ္စရပ်များအဆုံး ကဏ္ဍပေါင်းစုံကို ဆွေးနွေးခဲ့ကြသည်။

ထိုင်းဝန်ကြီးချုပ် ပေတုန်တန်နဲ့ တရုတ်ဝန်ကြီးချုပ် လီချင်ကိုတွေ့ရစဉ်

အဓိက ဆွေးနွေးသည့် အကြောင်းအရာတစ်ခုမှာ ထိုင်းနိုင်ငံတွင် နာခွန်း ရတ်ချာစီမာ (Nakhon Ratchasima) ပြည်နယ်နှင့် Nong Khai (နွန်ခိုင်း) မြို့တို့ကို ဆက်သွယ်မည့် အမြန်ရထားလမ်းစီမံကိန်း၏ ဒုတိယအဆင့်ကို ဆက်လက် ဖော်ဆောင်ရန် ဖြစ်သည်။

၃၅၇ ကီလိုမီတာ ရှည်လျားသည့် ထိုအမြန်ရထားလမ်းသည် လာအိုနှင့် တရုတ်နိုင်ငံများသို့ နယ်စပ်ဖြတ်ကျော် သွားလာမှုများအတွက် ပိုမိုအဆင်ပြေ ချောမွေ့စေမည်ဖြစ်သည်။

ထိုရထားလမ်းစီမံကိန်းသည် ၂၀၃၂ ခုနှစ်တွင် အပြီးသတ်လိမ့်မည်ဟု မျှော်မှန်းထားရပြီး ဒေသတွင်း ကုန်သွယ်ရေး လမ်းကြောင်း တစ်အခုအဖြစ် အလားအလာရှိနေသဖြင့် စီးပွားရေး အကျိုးအမြတ်များစွာ ရရှိမည်ဖြစ်သည်။

ထိုင်းနိုင်ငံသည် တရုတ်၏ နယ်မြေတည်တံ့ခိုင်မြဲမှုကို ထောက်ခံထားပြီး ထိုင်ဝမ်အရေးတွင် တရုတ်တစ်နိုင်ငံ တည်း မူဝါဒကို ထောက်ခံကြောင်း ထိုင်းအစိုးရက ထပ်လောင်း အတည်ပြုခဲ့သည်။

Source: ဘန်ကောက်ပို့စ်

CNI International News

ဝါရှင်တန်၊ ဖေဖော်ဝါရီ ၈

အမေရိကန်အစိုးရက ပြည်ပအကူအညီများကို လျှော့ချဖြတ်တောက်နေသဖြင့် ရုရှားနှင့် ဘယ်လာရုစ်နိုင်ငံများ တွင် အာဏာပိုင်များ၏ ထိန်းချုပ်မှုများနှင့် ရင်ဆိုင်နေရသည့် လူ့အခွင့်အရေးအဖွဲ့များ၊ တက်ကြွလှုပ်ရှားသူများနှင့် လွတ်လပ်သည့် မီဒီယာများအတွက် စိန်ခေါ်မှုများနှင့် ရင်ဆိုင်လာရကြောင်း အေပီမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ပြည်ပနိုင်ငံများနှင့် အဖွဲ့အစည်းများအား ထောက်ပံ့ပေးနေသည့် အမေရိကန်၏ အကူအညီများကို ရက်ပေါင်း ၉၀ ဆိုင်းငံ့ရန် ဆုံးဖြတ်ခဲ့ခြင်းဖြစ်သည်။

ထိုအကူအညီများကို USAID နှင့် အမေရိကန်အစိုးရက ရန်ပုံငွေ ထောက်ပံ့ပေးထားသည့် အခြားအဖွဲ့အစည်းများ က ထောက်ပံ့ပေးခဲ့ခြင်းဖြစ်ပြီး ပြည်ပနိုင်ငံများရှိ လူ့အခွင့်အရေး တက်ကြွလှုပ်ရှားသူများနှင့် လွတ်လပ်သည့် မီဒီယာများအတွက် အဓိက ထောက်ပံ့ငွေ အရင်းအမြစ်ဖြစ်ခဲ့သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

“အခုအခါမှာတော့ တော်တော်ဆိုးပါတယ်။ ဒီလိုအခြေအနေမျိုးသာ မရောက်ခဲ့ဘူးဆိုရင် ကမ္ဘာတစ်ဝန်းက အဖွဲ့အစည်းတွေဟာ အခုထက်ပိုပြီး ကောင်းမွန်တဲ့ အရာတွေကို အများကြီးလုပ်နိုင်ပါလိမ့်မယ်”ဟု ရုရှားနိုင်ငံမှ အမည်မဖော်လိုသည့် တက်ကြွလှုပ်ရှားသူတစ်ဦးက အေပီသတင်းဌာနကို ပြောကြားခဲ့သည်။

ထရမ့်၏ ဆုံးဖြတ်ချက်ကို ရုရှားနှင့် ဘယ်လာရုစ်နိုင်ငံတို့ရှိ လူ့အခွင့်အရေးအဖွဲ့များနှင့် လွတ်လပ်သည့် မီဒီယာ အဖွဲ့များက အလွန်ဆိုးရွားသော ဆုံးဖြတ်ချက်ဖြစ်သည်ဟုဆိုကာ ဝေဖန်နေကြသည်။

ရုရှားနိုင်ငံသားများ ဖွဲ့စည်းထားသည့် လူ့အခွင့်အရေးအဖွဲ့အချို့သည် ထောက်ပံ့ငွေများ ဖြတ်တောက်ခံခဲ့ရသဖြင့် ၎င်းတို့၏ အသုံးစရိတ်များကို လျှော့ချပြီး လုပ်စရာရှိသော အစီအစဉ်များကိုလည်း ဆိုင်းငံ့ထားကာ လုပ်ငန်းစဉ် များကို ဆက်လက် လည်ပတ်နေရသည်။

အစိုးရကို ဆန္ဒပြနေကြစဉ်

၎င်းတို့သည် ပုဂ္ဂလိကကဏ္ဍမှ အလှူငွေများအား လက်ခံရရှိထားသဖြင့် ထရမ့်၏ အကူအညီများ ဆိုင်းငံ့မှုသည် ၎င်းတို့အဖွဲ့အပေါ် အနည်းငယ် သက်ရောက်မှုရှိခဲ့ကြောင်း OVD-Info အဖွဲ့၏ ပြောရေးဆိုခွင့်ရှိသူ ဒီမီထရီ အန်နီစီမော့ဗ် (Dmitry Anisimov) က ပြောကြားခဲ့သည်။

OVD-Info သည် ရုရှားတွင် နိုင်ငံရေးသမားများ ဖမ်းဆီးခံရမှုကို စစ်တမ်းကောက်ယူပြီး တရားရေးဆိုင်ရာ အကူအညီပေးနေသည့် လူ့အခွင့်အရေးအဖွဲ့ဖြစ်သည်။

သို့သော် ၎င်းတို့ အဖွဲ့အစည်းအား ကူညီထောက်ပံ့ပေးနေသည့် အဖွဲ့များသည် အမေရိကန်၏ ထောက်ပံ့ငွေ ဆိုင်းငံ့မှုဒဏ်ကို သိသိသာသာ ခံစားခဲ့ရကြောင်း ဒီမီထရီ အန်နီစီမော့ဗ်က ဆိုသည်။

ရုရှားအစိုးရကို ဆန့်ကျင်သည့် ပြည်ပြေးမီဒီယာတစ်ခု၏ အမည်မဖော်လိုသည့် အယ်ဒီတာတစ်ဦးကမူ အွန်လိုင်းမှ အလှူငွေ တောင်းခံမှုသည် ခိုင်လုံသည့် ဝင်ငွေ အရင်းအမြစ်များထဲမှ တစ်ခုအပါအဝင် ဖြစ်လာခဲ့ကြောင်း ပြောကြားခဲ့သည်။

Source: အေပီ

CNI International News

ဝါရှင်တန်၊ ဖေဖော်ဝါရီ ၈

အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့သည် အမေရိကန်၏ နိုင်ငံတကာ ဖွံ့ဖြိုးတိုးတက်ရေး အေဂျင်စီဖြစ်သည့် USAID ၏ ဝန်ထမ်းအရေအတွက်ကို ၃၀၀ အောက်သာ ထားရှိရန် စီစဉ်နေကြောင်း ရိုက်တာမှ ဖော်ပြခဲ့သည်။

ထိုဝန်ထမ်းအင်အားအရ ကမ္ဘာတစ်ဝန်း ဝန်ထမ်းအင်အား ၁၀,၀၀၀ ကျော်ရှိသည့် USAID ၏ ဝန်ထမ်း အရေအတွက်သည် သိသိသာသာ ကျဆင်းသွားမည်ဖြစ်ကြောင်း သတင်းရင်းမြစ်များက ဖေဖော်ဝါရီ ၆ ရက်တွင် ပြောကြားခဲ့သည်။

အမေရိကန်၏ အဓိက လူသားချင်းစာနာထောက်ထားမှုဆိုင်ရာ အကူအညီပေးရေးအေဂျင်စီဖြစ်သည့် USAID သည် ထရမ့်၏ မဟာမိတ်ဖြစ်သော စီးပွားရေးလုပ်ငန်းရှင် အီလွန်မာ့စ် (Elon Musk) ဦးဆောင်သည့် အစိုးရအဖွဲ့ ပြန်လည်ဖွဲ့စည်းရေး အစီအစဉ်၏ ပစ်မှတ်တစ်ခု ဖြစ်လာခဲ့သည်။

ဒေါ်နယ်ထရမ့်နဲ့ အီလွန်မာ့စ်ကို တွေ့ရစဉ်

ထိုအစီအစဉ်အရ USAID ၏ ဝန်ထမ်း အရေအတွက်ကို ၂၉၄ ဦးသာ ခန့်ထားတော့မည်ဖြစ်ပြီး USAID ၏ အာဖရိက ဗျူရိုအတွက် ဝန်ထမ်း ၁၂ ဦးနှင့် အာရှဗျူရိုအတွက် ၈ ဦးသာ ထားရှိတော့မည်ဖြစ်ကြောင်း သတင်းရင်းမြစ်များက ပြောသည်။

ထိုအစီအစဉ်သည် အလွန်ဆိုးရွားပြီး သောင်းနှင့်ချီသည့် ဝန်ထမ်းများသည် အလုပ်အကိုင်များ ဆုံးရှုံးလိမ့်မည် ဖြစ်ကာ ကမ္ဘာတစ်ဝန်း သန်းနှင့်ချီသည့် လူများကို ကူညီကယ်ဆယ်ပေးနေသော USAID ကို အဆုံးသတ်စေလိမ့် မည်ဖြစ်ကြောင်း USAID အကြီးအကဲအဖြစ် ၆ နှစ်ကျော်ကြာ တာဝန်ထမ်းဆောင်ခဲ့သည့် ဂျေ ဘရိုင်ယန် အက်ဝုဒ် (J. Brian Atwood) က ပြောကြားခဲ့သည်။

“ဒီအစီအစဉ်ကြောင့် လူပေါင်းများစွာ အသက်ရှင်ရပ်တည်ဖို့ ခက်ခဲလာပါလိမ့်မယ်”ဟု လက်ရှိတွင် ဘရောင်း တက္ကသိုလ် (Brown University's) ၏ ဝတ်ဆန် အင်စတီကျု(Watson Institute) တွင် ပညာရှင်တစ်ဦးအဖြစ် ဆောင်ရွက်နေသည့် အက်ဝုဒ်က ပြောကြားခဲ့သည်။

USAID ကို ကာကွယ်ဖို့တောင်းဆိုနေကြစဉ်

ထိုအကြောင်းအရာနှင့်ပတ်သက်ပြီး အမေရိကန်နိုင်ငံခြားရေးဝန်ကြီးဌာနကို ရိုက်တာသတင်းဌာနက မှတ်ချက် ပေးရန် တောင်းဆိုခဲ့သော်လည်း တုန့်ပြန်ခဲ့ခြင်းမရှိပေ။

လက်ရှိတွင် USAID တွင် ကမ္ဘာတစ်ဝန်း ဝန်ထမ်း ၁၀,၀၀၀ ကျော်ခန့်ထားပြီး ၎င်းတို့အနက် ၃ ပုံ ၂ ပုံမှာ အမေရိကန်အပြင်ဘက် ပြည်ပနိုင်ငံများတွင် ရှိနေကြောင်း လွှတ်တော်ဆိုင်ရာ သုတေသန ဌာန (CRS) က ပြောကြားခဲ့သည်။

၂၀၂၃ ခုနှစ် ဘဏ္ဍာနှစ်တွင် USAID သည် ဒေါ်လာ ၄၀ ဘီလျံကျော်ကို စီမံခန့်ခွဲခဲ့ကြောင်း နောက်ဆုံးရရှိသည့် သတင်းအချက်အလက်များ၌ ဖော်ပြထားသည်။

Source: ရိုက်တာ

CNI International News

ဘန်ကောက်၊ ဖေဖော်ဝါရီ ၈

ထိုင်းနိုင်ငံသည် ကျားဖြန့်လုပ်ငန်းများ လုပ်ကိုင်နေသည့် မြန်မာနယ်စပ်ဒေသများသို့ လျှပ်စစ်ဓာတ်အားနှင့် အင်တာနက်လိုင်းများ ဖြတ်တောက်ခဲ့သဖြင့် ထိုလုပ်ဆောင်ချက်သည် ထိုင်းနိုင်ငံအတွက် ကြီးမားသည့် စိန်ခေါ်မှုတစ်ခုအဖြစ် ရှုမြင်နိုင်သည်ဟု The Nation မှ ဖော်ပြခဲ့သည်။

ထိုကဲ့သို့ မြန်မာနယ်စပ်ဒေသ ၅ ခုသို့ စွမ်းအင်ဖြတ်တောက်မှုသည် ကနဦးတွင် အောင်မြင်မှုများ ရရှိသည်ကို မြင်တွေ့ရသည်။

မြဝတီမြို့တွင် သိုလှောင်ထားသည့် လောင်စာများကို ချက်ချင်း ထုတ်သုံးနေရကာ ရွှေကုက္ကိုလ်တွင်လည်း လျှပ်စစ်ဓာတ်အားသုံးစွဲမှု ၄ဝ ရာခိုင်နှုန်း ကျဆင်းသွားခဲ့သည်။

လျှပ်စစ်ဓာတ်အားလိုင်း ဖြတ်တောက်ခံရသည့် နေရာဒေသများအနက် မြဝတီ၊ ဘုရားသုံးဆူနှင့် တာချီလိတ်မြို့ များ ပါဝင်သည်။

မြန်မာဘက်ကို ထိုင်းက လျှပ်စစ်မီးဖြတ်တောက်လိုက်စဉ်

ထိုင်းစစ်တပ်အကြီးအကဲ ဗိုလ်ချုပ်ကြီး ပန်နာ ကလောဘလူတပ် (Pana Klaewblaudtuk) ကလည်း ထိုင်း-မြန်မာ နယ်စပ်ဒေသ တစ်လျှောက်ရှိ အခြေအနေကို အနီးကပ်စောင့်ကြည့်ရန် စစ်သားများကို အမိန့်ပေးထားသည်။

တရုတ်၏ ပြည်သူ့လုံခြုံရေး ဒုဝန်ကြီး လျူကျုံယိ (Zhongyi) သည် ထိုင်းအေဂျင်စီများကို အကူအညီပေးရန် ထိုင်းသို့ လာရောက်ခဲ့ပြီးနောက် ဒေသတွင်း ကျားဖြန့်ဂိုဏ်းများ၏ ဖိအားများ မြင့်တက်လာခဲ့သည်။

ထိုသို့ ကျားဖြန့်ဂိုဏ်းများ ဖိအားမြင့်တက် နေချိန်တွင် နယ်စပ်ဒေသ အခြေအနေကို အနီးကပ် စောင့်ကြည့်ရန် ထိုင်းကာကွယ်ရေးဝန်ကြီး ဖွမ်သမ် ဝီချာယာချိုင်း (Phumtham Wechayachai) က အမိန့်ထုတ်ပြန်ခဲ့ခြင်းဖြစ် သည်။

မြန်မာနယ်စပ်ဒေသများကို စွမ်းအင်များ ဖြတ်တောက်မှုအပြင် တရုတ်ကိုယ်စားလှယ်အဖွဲ့က ကျားဖြန့်ဂိုဏ်း ခေါင်းဆောင်များကို ဖမ်းဆီးရန် ထိုင်းနိုင်ငံကို တိုက်တွန်းခဲ့သည်။

ထိုင်းက မြန်မာဘက်ကို လောင်စာဆီသွင်းခွင့်ပိတ်လိုက်စဉ်

ထို့ပြင် ထိုကဲ့သို့ ရာဇဝတ်လုပ်ငန်းများကို တိုက်ဖျက်ရန် ထိုင်း-တရုတ် ပူးပေါင်းဆောင်ရွက်ရေးစင်တာ ထူထောင် ရန်လည်း တရုတ်ကိုယ်စားလှယ်အဖွဲ့က အဆိုပြုခဲ့သည်။

ထို့ပြင် မြန်မာနိုင်ငံအတွင်းရှိ ကျားဖြန့်လုပ်ငန်းများတွင် ထိန်းသိမ်းခံထားရပြီး အတင်းအဓမ္မ အလုပ်စေခိုင်း ခံနေရ သည့် တရုတ်နိုင်ငံသားများ၏ တည်နေရာကို ရှာဖွေပြီး အမြန်ဆုံး ကယ်တင်ပေးရန်လည်း တရုတ်က ထိုင်းကို တိုက်တွန်းထားသည်။

ထိုင်းအရာရှိများကမူ ကျားဖြန့်ဂိုဏ်းများကို နောက်ကွယ်မှ ကြိုးကိုင်နေသူများသည် ထိုင်းဘက်က လျှပ်စစ် ဓာတ်အားများ ဖြတ်တောက်ထားချိန်တွင် မီးစက်များကို ယာယီအသုံးပြုဖွယ်ရှိနေပြီး လျှပ်စစ်ဓာတ်အားလိုင်း များအား လာအို သို့မဟုတ် တရုတ်ထံမှ ရယူရန် ကြိုးပမ်းလိမ့်မည်ဟု ယူဆထားကြသည်။

Source: The Nation