CNI Sport News

၂၀၂၃ ခုနှစ်၊ အောက်တိုဘာ ၁၀

ပေါ်တူဂီအသင်းခေါင်းဆောင် ရော်နယ်ဒိုဟာ ဆော်ဒီပရိုလိဂ်ကလပ် အယ်လ်နာဆာအသင်းမှာ ၂၀၂၇ ခုနှစ်အထိ ဆက်ရှိမယ့်စာချုပ်ကို သက်တမ်းတိုးချင်နေတယ်လို့ သိရပါတယ်။

ရော်နယ်ဒိုဟာ အသက် ၃၈ နှစ်အရွယ်ရှိပြီဖြစ်ပေမယ့် ကစားသမားဘဝက အနားယူမယ့် အရိပ်အယောင် ပြသ ခြင်း မရှိသေးဘဲ ပေါ်တူဂီလက်ရွေးစင်အသင်းအတွက် ပါဝင်ကစားပေးနေသလို အယ်လ်နာဆာအသင်းအတွက် ၃၆ ပွဲကစားအပြီးမှာ ၃၁ ဂိုးသွင်းယူထားတာပါ။ ဘောလုံးဂျာနယ်လစ်တစ်ဦးဖြစ်တဲ့ အလီအယ်လ်ဟာဘီက ရော်နယ်ဒိုဟာ အယ်လ်နာဆာအသင်းမှာ ၂၀၂၇ ခုနှစ်အထိရှိမယ့် စာချုပ်သက်တမ်းတိုးချင်နေတဲ့အကြောင်းကို ဆော်ဒီကလပ်ထံ အကြောင်းကြားထားတယ်လို့ ပြောခဲ့ပါတယ်။

ရော်နယ်ဒိုဟာ အယ်လ်နာဆာကစားသမားအဖြစ်နဲ့ ၂၀၂၆ ကမ္ဘာ့ဖလားပြိုင်ပွဲကို ပါဝင်ချင်ပြီး ဒီပြိုင်ပွဲအပြီးမှာ ကစားသမားဘဝက အနားယူကြောင်းကြေညာဖွယ်ရှိတယ်လို့ အလီအယ်လ်ဟာဘီရဲ့ ပြောဆိုတဲ့ အထဲမှာ ပါဝင်ခဲ့တာပါ။ ရော်နယ်ဒိုအနေနဲ့ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားခဲ့မယ်ဆိုရင် သူဟာ အသက် ၄၁ နှစ် အရွယ်အထိရှိလာမှာဖြစ်ပြီး အားကစားသမားတစ်ဦးအတွက် မယုံနိုင်ဖွယ်စွမ်းဆောင်မှုတစ်ခု ဖြစ်လာမယ်လို့ သတင်းမှာ ဖော်ပြထားပါတယ်။

ရော်နယ်ဒိုဟာ လက်ရှိအချိန်မှာ ယူရို ၂၀၂၄ ခြေစစ်ပွဲကစားဖို့ ပေါ်တူဂီအသင်းနဲ့အတူ လေ့ကျင့်ပြင်ဆင်မှုတွေ ပြုလုပ်နေတာပါ။ ယူရို ၂၀၂၄ ခြေစစ်ပွဲမှာ ရာနှုန်းပြည့်နိုင်ပွဲရယူထားတဲ့ ပေါ်တူဂီအသင်းဟာ အောက်တိုဘာ ၁၃ ရက်မှာ ဆလိုဗားကီးယား၊ ၁၆ ရက်မှာ ဘောစနီးယားအသင်းတို့နဲ့ ယှဉ်ပြိုင်ရမှာဖြစ်ပြီး ရော်နယ်ဒိုဟာ ဒီ ၂ ပွဲစလုံးကို ပွဲထွက်ကစားသမားအဖြစ် ပါဝင်ခွင့်ရဖွယ်ရှိနေပါတယ်။

ရော်နယ်ဒိုဟာ ယူရို ၂၀၂၄ ခြေစစ်ပွဲမှာ ပေါ်တူဂီအသင်းအတွက် ၅ ဂိုးအထိ သွင်းယူပေးထားပြီး အသင်းခြေစစ်ပွဲ အောင်မြင်ဖို့ နီးစပ်အောင် အဓိက စွမ်းဆောင်ပေးနေတာ ဖြစ်ပါတယ်။

Source:Eurosport

CNI International News

ဝါရှင်တန်၊ အောက်တိုဘာ ၁၀

အမေရိကန်သည် ဟားမာ့စ် (Hamas) စစ်သွေးကြွများနှင့် စစ်ပွဲဖြစ်ပွားနေသည့် အစ္စရေးကို ထောက်ခံကြောင်း ပြသသည့်အနေဖြင့် အစ္စရေးနိုင်ငံအနီးသို့ စစ်သင်္ဘောများနှင့် လေယာဉ်များ စေလွှတ်သွားမည်ဖြစ်ကြောင်း အမေရိကန်ကာကွယ်ရေးဝန်ကြီး လွိုက်အော်စတင် (Lloyd Austin) က ပြောသည်ဟု ရိုက်တာမှ ဖော်ပြခဲ့သည်။ 

ဟားမာ့စ်၏ ပြင်းထန်သည့်် တိုက်ခိုက်မှုများသည် အစ္စရေးနှင့်ဆော်ဒီ ဆက်ဆံရေး ပုံမှန်ပြန်လည် ထူထောင်မှု အလားအလာကို အနှောင့်အယှက် ဖြစ်စေရန် ရည်ရွယ်ချက်ဖြင့် ပြုလုပ်ခဲ့ခြင်း ဖြစ်နိုင်သည်ဟု အမေရိကန် အစိုးရက ယူဆထားချိန်တွင် အော်စတင်၏ ပြောကြားချက်များ ထွက်ပေါ်ခဲ့ခြင်းဖြစ်သည်။ 

ဟားမာ့စ် လက်နက်ကိုင်များသည် ဆယ်စုနှစ် များစွာအတွင်း အစ္စရေးနိုင်ငံတွင် သွေးထွက်သံယို အများဆုံး တိုက်ခိုက်မှု တစ်ခုအဖြစ် အောက်တိုဘာ ၈ ရက်က အစ္စရေးနိုင်ငံ၏ မြို့များကို ဝင်ရောက် တိုက်ခိုက်ခဲ့သည်။ 

အစ္စရေးကလည်း ဟားမာ့စ်အဖွဲ့၏ တိုက်ခိုက်မှုကို တုံ့ပြန်သည့်အနေဖြင့် အောက်တိုဘာ ၈ ရက်တွင် ဂါဇာ ကမ်းမြောင် ဒေသကို လေကြောင်းတိုက်ခိုက်မှုများ ပြင်းထန်စွာ ပြုလုပ်ခဲ့သည်။

ဘိုင်ဒန်နဲ့ နေတန်ယာဟုကို တွေ့ရစဉ်

အဆိုပါ တိုက်ခိုက်မှုများကြောင့် နှစ်ဖက်စလုံးတွင် သေဆုံးသူ ရာနှင့်ချီရှိခဲ့သည်။

ထိုပဋိပက္ခသည် အရှေ့အလယ်ပိုင်းဒေသတွင် အကြီးဆုံး စစ်ပွဲအသစ်တစ်ခု စတင်ပေါ်ပေါက် လာနိုင်မည့် အခြေအနေကို ခြိမ်းခြောက်နေသည်။

သေဆုံးသူများထဲတွင် အမေရိကန်နိုင်ငံသား ၃ ဦးထက်မနည်း ပါဝင်သည်ဟု CNN သတင်းဌာနက အောက်တိုဘာ ၈ ရက်တွင် ဖော်ပြခဲ့သည်။

အမေရိကန်ကာကွယ်ရေးဝန်ကြီး လွိုက်အော်စတင်က  USS Gerald R.Ford Carrier လေယာဉ်တင်သင်္ဘော ဦးဆောင်သည့် တိုက်ခိုက်ရေး စစ်သင်္ဘောအုပ်စုကို မြေထဲပင်လယ် အရှေ့ပိုင်းမှ အစ္စရေးနိုင်ငံအနီးသို့ သွားရောက် ရန် အမိန့်ထုတ်ပြန်ခဲ့သည်။

အစ္စရေးစစ်တပ်ကိုတွေ့ရစဉ်

ထိုစစ်သင်္ဘောအုပ်စုတွင် ပဲ့ထိန်းစနစ်တိုက် ခရုဇာ စစ်သင်္ဘောကြီး တစ်စင်း (guided missile cruiser) နှင့် ပဲ့ထိန်းစနစ်တပ် ဖျက်သင်္ဘော လေးစင်း (guided missile destroyer) ပါဝင်သည်။ 

အမေရိကန်သည် ထိုဒေသတွင် အမေရိကန်လေတပ်မှ F-35 ၊ F-15 ၊ F-16 နှင့် A-10 တိုက်လေယာဉ်များကို တိုးမြှင့် ဖြန့်ကြက်ချထားရန် အစီအစဉ်များကိုလည်း လုပ်ဆောင်ခဲ့သည်ဟု အော်စတင်က ပြောကြားခဲ့သည်။ 

ထို့ပြင် အမေရိကန်သည် အစ္စရေးကို လက်နက်ခဲယမ်းများလည်း ထောက်ပံ့ပေးသွားမည်ဟု ၎င်းက ဆိုသည်။

အမေရိကန်သမ္မတ ဂျိုးဘိုင်ဒန် (Joe Biden) နှင့် အစ္စရေးဝန်ကြီးချုပ် ဘင်ဂျမင်နေတန်ယာဟု (Benjamin Netanyahu) တို့သည် အောက်တိုဘာ ၈ ရက်က ဖုန်းဆက်သွယ်၍ ဆွေးနွေးခဲ့ကြသည်။

ထို့နောက် အစ္စရေးတပ်ဖွဲ့များအတွက် နောက်ထပ် ကူညီထောက်ပံ့မှုများကို ပို့ဆောင်ထားကြောင်းနှင့် လာမည့် ရက်ပိုင်းအတွင်း နောက်ထပ် ကူညီထောက်ပံ့မှုများ ဆက်လက် ပို့ဆောင်ပေးမည်ဖြစ်ကြောင်း ဘိုင်ဒန်က နေတန်ယာဟုကို ပြောကြားခဲ့သည်။

ထို့ပြင် အမေရိကန် ဒုသမ္မတ ကာမယ်လာ ဟားရစ် (Kamala Harris) နှင့် အစ္စရေးသမ္မတ အိုင်းဆက် ဟာဇော့ (Issac Herzog) ၊ အမေရိကန်ကာကွယ်ရေးဝန်ကြီး အော်စတင်နှင့် အစ္စရေး ကာကွယ်ရေးဝန်ကြီး ယိုအက်ဗ် ဂဲလန့် (Yoav Gallant) တို့သည်လည်း အစ္စရေးအား အမေရိကန်၏ ကူညီထောက်ပံ့မှုများနှင့်ပတ်သက်ပြီး တယ်လီဖုန်းဖြင့်် ဆက်သွယ် ဆွေးနွေးခဲ့ကြသည်။

Source: ရိုက်တာ

CNI International News

ဘန်ကောက်ပို့စ်၊ အောက်တိုဘာ ၁၀

ထိုင်းနိုင်ငံတွင် ဒိန်းမတ်နိုင်ငံဆိုင်ရာ ထိုင်းသံအမတ်ဟောင်း ဝီချစ် ဝီချစ်မန်(Vichit Vichitmarn) ဓားထိုး အသတ်ခံ ခဲ့ရမှု၌ လူသတ်မှုဖြင့် ဖမ်းဆီးရန် အလိုရှိနေသည့်် မြန်မာလူငယ်တစ်ဦးသည် အောက်တိုဘာ ၉ ရက်က ချင်းရိုင် (Chiang Rai)မှ နယ်စပ်ကိုဖြတ်ပြီး မြန်မာနိုင်ငံအတွင်းသို့ ထွက်ပြေး ဝင်ရောက်ခဲ့သည်ဟု ဘန်ကောက်ပို့စ်မှ  ဖော်ပြခဲ့သည်။ 

ထိုလူသတ်မှု မတိုင်မီ၊ လူသတ်မှု အချိန်အတွင်းနှင့် လူသတ်မှုအပြီး ဖြစ်စဉ် အသေးစိတ် အချက်အလက်များကို ရဲတပ်ဖွဲ့က အောက်တိုဘာ ၉ ရက်တွင် ထုတ်ပြန်ခဲ့သည်။

ယခုအချိန်အထိ ထိုလူသတ်မှုတွင် တစ်ဦးတည်းသော သံသယရှိသူမှာ အသက် ၁၉ နှစ်အရွယ် မြန်မာနိုင်ငံသား စိုင်းမြတ်မိုး (Sai Myat Moe) ဖြစ်ကြောင်း ဘန်ကောက်မြို့တော် ရဲတပ်ဖွဲ့အကြီးအကဲ ရဲချုပ် အက်တာပို အနူစစ် (Attapol Anusit) က ပြောကြားခဲ့သည်။

အသက် ၆၃ နှစ်အရွယ် သံအမတ်ဟောင်း ဝီချစ် ဝီချစ်မန် (Vichit Chitvimarn) ၏ ရုပ်အလောင်းကို ဘန်ကောက် မြို့တော် ချတ်တူချက် (Chatuchak) ခရိုင်ရှိ သုံးထပ်တိုက်၏ ဒုတိယထပ်မှ အိမ်သာထဲတွင် တွေ့ရှိခဲ့ခြင်း ဖြစ် သည်။

 ထိုင်း-မြန်မာ နယ်စပ်ဂိတ်ကို တွေ့ရစဉ်

သေဆုံးသူသည် စက်တင်ဘာ ၉ ရက်က ထိုအိမ်သို့ ပြောင်းရွှေ့လာခဲ့ပြီး တစ်ဦးတည်း နေထိုင်ခဲ့ခြင်းဖြစ်သည်။

ထိုင်းသံအမတ်ဟောင်း သေဆုံးမှုဖြင့် သံသယရှိသူသည် စက်တင်ဘာ ၁၉ ရက်ကတည်းက သေဆုံးသူအတွက် အလုပ်လုပ်ကိုင် ပေးခဲ့သူဖြစ်သည်ဟု သတင်းများ ထွက်ပေါ်ခဲ့သည်။ 

သံသယရှိသူသည် ဆေးသုတ်သမား တစ်ဦးဖြစ်သည်ဟု ရဲချုပ် အက်တာပိုက ပြောသည်။ 

သေဆုံးသွားသည့် ထိုင်းသံအမတ်ဟောင်း နေအိမ်ကို ထိုင်းရဲတပ်ဖွဲ့က စစ်ဆေးနေစဉ်

CCTV မှတ်တမ်းများတွင် သံသယရှိသူသည် သေဆုံးသူ၏ နေအိမ်သို့ စက်တင်ဘာ ၂၅ ရက်တွင် ရောက်ရှိလာခဲ့ သည်ကို မြင်တွေ့ရသည်။ ဝီချစ်ကလည်း သံသယရှိသူကို ဂိတ်တံခါးဖွင့်ပြီး အိမ်ထဲဝင်ခွင့် ပေးခဲ့သည်ကို မြင်တွေ့ရ သည်။

သုံးရက်အကြာတွင် သံသယရှိသူသည် သေဆူံးသူကို ပထမထပ်တွင် ဓားဖြင့် တိုက်ခိုက်ခဲ့ဖွယ်ရှိကြောင်း၊ ထို့နောက် သေဆုံးသူသည် ဒုတိယထပ်သို့ လွတ်မြောက်ရန် ထွက်ပြေး သွားဖွယ်ရှိကြောင်း၊ ဒုတိယထပ် အိမ်သာ ထဲတွင် သံသယရှိသူက သေဆုံးသူကို ATM ကဒ် password ပေးရန် ခြိမ်းခြောက်ခဲ့ကြောင်း၊ သံသယရှိသူသည် သေဆုံးသူကို ဓားဖြင့် အသေတိုက်ခိုက်ခဲ့ပြီး တန်ဖိုးရှိသည့် ပစ္စည်းများကို ခိုးယူထွက်ပြေး သွားဖွယ်ရှိကြောင်း ရဲတပ်ဖွဲ့က ပြောကြားခဲ့သည်။

သေဆုံးသူ ဝီချစ်၏ မိုဘိုင်းဖုန်းများနှင့် တက်ဘလက် ကွန်ပြူတာများသည်  ထိုအိမ်မှ ပျောက်ဆုံးနေပြီး လက် ဖာရို(Lat Phro) ခရိုင်ရှိ ATM မှ ဝီချစ်၏ အကောင့်ထဲမှ ငွေကြေးများလည်း ထုတ်ယူခံထားရသည်ဟု ရဲတပ်ဖွဲ့က ပြောကြားခဲ့သည်။

ထို့နောက် သံသရှိသူသည် မိုချစ် (Mo Chit) ဘတ်စ်ကားမှတ်တိုင်မှ မြန်မာနယ်စပ်ရှိ ချင်းရိုင်ပြည်နယ်သို့ ထွက်ခွာ သွားခဲ့သည်ဟု ရဲတပ်ဖွဲ့က ပြောကြားခဲ့သည်။

ထိုသံသယရှိသူသည် စက်တင်ဘာ ၂၉ ရက်နေ့ နံနက် ၇ နာရီ ၂၂ မိနစ်တွင် မယ်ဆိုင် (Mae Sai)မှ တဆင့် မြန်မာ နိုင်ငံထဲသို့ ဝင်ရောက် ထွက်ပြေးသွားခဲ့သည့် သတင်းကို ရရှိခဲ့သည်ဟု ရဲချုပ် အက်တာပိုက ပြောကြားခဲ့သည်။

Source: ဘန်ကောက်ပို့စ်

CNI International News

ကဘူး၊ အောက်တိုဘာ ၉

အာဖဂန်နစ္စတန်နိုင်ငံ အနောက်ပိုင်းတွင် အောက်တိုဘာ ၈ ရက်က လှုပ်ခတ်ခဲ့သည့် အင်အားပြင်း ငလျင်ကြောင့် သေဆုံးသူ ၂၀၀၀ ကျော်အထိ မြင့်တက်လာခဲ့သည်ဟု တာလီဘန်ထိပ်သီး အရာရှိတစ်ဦးက အောက်တိုဘာ ၉ ရက်တွင် ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ရစ်ချ်တာစကေး ၆ ဒသမ ၃ ပြင်းအားရှိသည့် ထိုငလျင်သည် အာဖဂန်နစ္စတန်တွင် ဆယ်စုနှစ် နှစ်စုအတွင်း လူသေဆုံးမှုအများဆုံး ငလျင်များထဲ၌ တစ်ခု အပါအဝင် ဖြစ်ခဲ့သည်။ 

ဟီရတ် (Herat) ပြည်နယ်တွင် လှုပ်ခတ်ခဲ့သည့် ထိုငလျင်ကြောင့်လည်း ပျောက်ဆုံးသူများရှိနေသည်။

ထို့နောက် အပျက်အစီးများအောက် ပိတ်မိနေသူများကို ကယ်ထုတ်ရန် ရှာဖွေကယ်ဆယ်ရေး လုပ်ငန်းများအား လုပ်ဆောင်နေကြောင်း ကာတာအခြေစိုက် တာလီဘန်အဖွဲ့၏ ပြောရေးဆိုခွင့်ရှိသူ ဆူဟေး ရှာဟင်း (Suhail Shaheen) က အယ်လ်ဂျာဇီးယားကို ပြောကြားခဲ့သည်။

အာဖဂန် သတင်းပြန်ကြားရေးနှင့် ယဉ်ကျေးမှုဝန်ကြီး ဌာန၏ ပြောရေးဆိုခွင့်ရှိသူ အဗ္ဗဒူ ဝါဟစ် ရာယန်ကို တွေ့ရစဉ်

ငလျင်ဒဏ်သင့်ခဲ့သည့် ဒေသများအတွက် ယာယီရွက်ဖျင်တဲများ၊ ဆေးဝါးများနှင့် အစားအစာများ အရေးတကြီး လိုအပ်နေပြီး ဒုက္ခရောက်နေသူများကို ကူညီပေးရန် ဒေသခံစီးပွားရေး လုပ်ငန်းရှင်များနှင့် NGO အဖွဲ့များကို အကူအညီ တောင်းခံထားသည်ဟု ရှာဟင်းက ပြောသည်။ 

အောက်တိုဘာ ၈ ရက်တွင် ဟီရတ်ပြည်နယ်၌ ကယ်ဆယ်ရေးသမားသည် ကျောက်တုံးကျောက်ခဲများနှင့် အပျက်အစီးများအောက်မှာ ပိတ်မိနေသည့် သေဆုံးသူများကို ဆွဲထုတ်ရန်နှင့် အသက်ရှင်လျက် ပိတ်မိနေသူများ ကို ကယ်ထုတ်ရန် ကြိုးပမ်းလျက်ရှိသည်။ 

"လက်ရှိအချိန်အထိ ရရှိတဲ့သတင်းတွေအရ သေဆုံးသူ ၂၀၆၀ ရှိပြီး ၁၂၄၀ လောက် ဒဏ်ရာရခဲ့ပါတယ်။ အိမ်ခြေ ၁၃၂၀ လောက်က လုံးဝပြိုကျ ပျက်စီးသွားခဲ့ပါတယ်" ဟု အာဖဂန် သတင်းပြန်ကြားရေးနှင့် ယဉ်ကျေးမှုဝန်ကြီး ဌာန၏ ပြောရေးဆိုခွင့်ရှိသူ အဗ္ဗဒူ ဝါဟစ် ရာယန် (Abdul Wahid Rayan) က ပြောကြားခဲ့သည်။

အာဖဂန်နစ္စတန်မှာ ငလျင်ကြောင့် နေအိမ်များ ပြိုကျသွားစဉ်

ငလျင်ကြောင့် ကျေးရွာ ခြောက်ရွာခန့် ပျက်စီးခဲ့ပြီး ရာနှင့်ချီသည့် အရပ်သားများသည် အပျက်အစီးများအောက် တွင် ပိမိခဲ့ကာ အရေးတကြီး အကူအညီ လိုအပ်နေသည်ဟု ရာယန်က ပြောကြားခဲ့သည်။ 

ဟီရတ်ပြည်နယ် ဟီရတ်မြို့၏ အနောက်မြောက်ဘက် ကီလိုမီတာ ၄၀ (၂၄ မိုင်) အကွာတွင် အဆိုပါငလျင် လှုပ်ခတ်ခဲ့ပြီးနောက် နောက်ဆက်တွဲ ငလျင်ငယ်များ ထပ်မံလှုပ်ခတ်ခဲ့သည်။ 

ငလျင်ဒဏ်ကို အိမ်နီးချင်း ဘက်ဂျစ် (Badghis) ပြည်နယ်နှင့် ဖာရာ (Farah) ပြည်နယ်တို့တွင်လည်း ခံစားခဲ့ရ ကြောင်း သိရသည်။

၂၀၂၂ ခုနှစ်၊ ဇွန်လကလည်း အာဖဂန်နစ္စတန်နိုင်ငံ အရှေ့ပိုင်းရှိ တောင်တန်းဒေသတွင် အင်အားပြင်း ငလျင် လှုပ်ခတ်ခဲ့သဖြင့် လူပေါင်း ၁၀၀၀ ထက်မနည်း သေဆုံးခဲ့ကာ လူပေါင်း ၁၅၀၀ ခန့် ဒဏ်ရာရရှိခဲ့သည်။

Source: အယ်လ်ဂျာဇီးယား

CNI International News

ဝါရှင်တန်၊ အောက်တိုဘာ ၉

ဟားမာ့စ်က အစ္စရေးကို တိုက်ခိုက်ခဲ့ပြီးနောက် အကျဉ်းသား လဲလှယ်ရေးအတွက် အီရန်နှင့် သဘောတူညီမှု ပြုလုပ်ခဲ့သည့် အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့ကို သမ္မတဟောင်း ဒေါ်နယ်ထရမ့် (Donald Trump) အပါအဝင် ရီပတ်ဘလစ်ကန် အမတ်များက အပြစ်တင်ခဲ့သည်ဟု အေပီမှ ဖော်ပြခဲ့သည်။ 

ဂျူး အားလပ်ရက် ကာလအတွင်း အောက်တိုဘာ ၇ ရက်တွင် ဟားမာ့စ် လက်နက်ကိုင်အဖွဲ့က အစ္စရေးကို တိုက်ခိုက်ခဲ့သည့် ဖြစ်စဉ်သည် အမေရိကန်၏ သမ္မတရွေးကောက်ပွဲမတိုင်မီ ရွေးကောက်ပွဲ ဝင်ရောက်ယှဉ်ပြိုင် မည့် ကိုယ်စားလှယ်လောင်းများအတွက် နိုင်ငံခြားရေးမူဝါဒဆိုင်ရာ အငြင်းပွားဖွယ် ကိစ္စတစ်ရပ် ဖြစ်လာနိုင်သည်။

ထရမ့်နှင့် အခြား ရီပတ်ဘလစ်ကန်များသည် ယူကရိန်းစစ်ပွဲအတွင်း အမေရိကန်က ဆက်လက် ပါဝင်ပတ်သက် နေသည့် အခြေအနေကို မေးခွန်းထုတ်နေကြပြီး အမေရိကန် ဒုသမ္မတ မိုက်ပန့်စ် (Mike Pence) ကမူ ယူကရိန်းကို စစ်ရေးအရ ကူညီထောက်ပံ့ခြင်းသည် အမေရိကန်၏ အမျိုးသား အကျိုးစီးပွားများအတွက် အရေးကြီးကြောင်း ပြောကြားခဲ့သည်။

ဘိုင်ဒန်ကို တွေ့ရစဉ်

အစ္စရေး နယ်နိမိတ်အတွင်းသို့ ဟားမာ့စ် အကြမ်းဖက်သမားများ၏ ဝင်ရောက် ကျူးကျော်မှု၊ အစ္စရေးစစ်သား များနှင့် ပြည်သူများကို သတ်ဖြတ်မှုသည် လုံးဝနှိမ်နင်းပစ်ရမည့် ရက်စက်ကြမ်းကြုတ်သည့် လုပ်ရပ်များဖြစ်သည် ဟု ထရမ့်က အိုင်အိုဝါ ပြည်နယ် (Iowa) ဝါတာလူး(Waterloo) မြို့တွင် ပြောကြားခဲ့သည်။

ထို့ပြင် အမေရိကန်နှင့် အီရန်အကြား အကျဉ်းသား လဲလှယ်ရေးအတွက် စက်တင်ဘာလက သဘောတူညီမှု ပြုလုပ်ခဲ့ခြင်းကိုလည်း ထရမ့်က ဝေဖန်ခဲ့သည်။ 

ဘိုင်ဒန်အစိုးရအဖွဲ့နှင့် အီရန်အကြား သဘောတူညီချက်၏ တစ်စိတ်တစ်ပိုင်း အနေနှင့် အမေရိကန်သည် ယခင်က ပိတ်ဆို့ခဲ့သည့် အီရန်၏ ဒေါ်လာ ၆ ဘီလျံကို ပြန်ဖွင့်ပေးခဲ့ရသည်။

ထိုသို့ ပြန်ဖွင့်ပေးခဲ့သည့် ဒေါ်လာများကို အသုံးပြုပြီး အီရန်သည် ဟားမာ့စ်အဖွဲ့၏ တိုက်ခိုက်မှုများအတွက် ငွေကြေး ထောက်ပံ့ပေးခဲ့သည်ဟု ထရမ့်နှင့် အခြား ရီပတ်ဘလစ်ကန်များက ပြောကြားခဲ့သည်။

မိုက်ပန့်စ်ကိုတွေ့ရစဉ်

"အမေရိကန် အခွန်ထမ်းပြည်သူတွေရဲ့ ဒေါ်လာတွေဟာ အခုဖြစ်ပွားနေတဲ့ တိုက်ခိုက်မှုတွေကို ငွေကြေးထောက်ပံ့ ပေးရာ ရောက်နေပါတယ်" ဟု ထရမ့်က ပြောသည်။

ထို့နောက် ဘိုင်ဒန်အစိုးရအဖွဲ့ လက်ထက်တွင် အမေရိကန်သည် ကမ္ဘာ့အဆင့်၌ အားနည်းလာပြီး ထိရောက်မှု လျော့နည်း လာသည်ဟု ဆိုသည်။

ထို့ပြင် ရီပတ်ဘလစ်ကန် အမတ်အများစုကလည်း အီရန်၏ ငွေကြေးများကို ပြန်လည်လွှဲပြောင်းခွင့် ပြုခဲ့သည့် ဘိုင်ဒန်အစိုးရအဖွဲ့၏ လုပ်ဆောင်ချက်ကို ဝေဖန်ခဲ့ကြသည်။

ဟားမာ့စ်အဖွဲ့သည် ဆွန်နီမွတ်ဆလင် (Sunni Muslim) အုပ်စုဖြစ်သော်လည်း ရှီးယိုက် မွတ်ဆလင် (Shiite Muslim) များ ကြီးစိုးထားသည့် အီရန်နှင့် နီးစပ်သည့် ဆက်ဆံရေးရှိပြီး အစ္စရေးကို ၎င်းတို့၏ ဘုံရန်သူအဖြစ် သတ်မှတ်ထားသည်။

Source: အေပီ

CNI International News

ဂျေရုဆလင်၊ အောက်တိုဘာ ၉

ဂါဇာကမ်းမြောင်ဒေသရှိ ဟားမာ့စ် (Hamas) လက်နက်ကိုင်အဖွဲ့သည် အစ္စရေးနိုင်ငံအတွင်းရှိ မြို့များကို ဝင်ရောက် တိုက်ခိုက်ခဲ့ပြီးနောက် တစ်ရက်အကြာဖြစ်သည့် အောက်တိုဘာ ၈ ရက်နေ့တွင် အစ္စရေးသည် ဂါဇာကမ်းမြောင်ဒေသကို လေကြောင်းမှ ပြင်းထန်စွာ တိုက်ခိုက်ခဲ့သည်ဟု ရိုက်တာမှ ဖော်ပြခဲ့သည်။

ဟားမာ့စ် လက်နက်ကိုင်များ၏ တိုက်ခိုက်မှုများကြောင့် လူပေါင်းရာချီ သေဆုံးခဲ့ပြီး အရေအတွက် မသိရသည့် လူအများအပြား ပြန်ပေးဆွဲ ဖမ်းဆီးခံခဲ့ရကာ အရှေ့အလယ်ပိုင်းဒေသတွင် အကြီးစားစစ်ပွဲတစ်ခု ဖြစ်ပွားလာမည့် အခြေအနေသို့ ရောက်ရှိခဲ့သည်။ 

ပဋိပက္ခများသည် ဂါဇာဒေသထက် ကျော်လွန်ပြီး အခြားနေရာ ဒေသများသို့ ပျံ့နှံ့ခဲ့သည့် လက္ခဏာတစ်ခုအဖြစ် အစ္စရေးတပ်ဖွဲ့များနှင့် လက်ဘနွန်နိုင်ငံရှိ အီရန်၏ ကျောထောက်နောက်ခံကို ရရှိထားသည့် ဟစ်ဇ်ဘိုလာ (Hezbollah) လက်နက်ကိုင်အဖွဲ့တို့အကြား အမြောက်များဖြင့် အပြန်အလှန် ပစ်ခတ်တိုက်ခိုက်မှု ဖြစ်ပွားခဲ့သည်။

ဂါဇာဒေသကို အစ္စရေးတပ်ဖွဲ့က ပြန်လည်ထိန်းချုပ်ထားစဉ်

အောက်တိုဘာ ၈ ရက်နေ့ ညအချိန်တွင် အစ္စရေး၏ လေကြောင်း တိုက်ခိုက်မှုများကြောင့် ဂါဇာဒေသရှိ ဟားမာ့စ် အရာရှိများ၏ အိမ်များ၊ ဗလီများ၊ မြေအောက်လှိုဏ်ခေါင်းများနှင့် လူနေအိမ်များ ပြိုကျပျက်စီးခဲ့ပြီး ကလေးငယ် ၂၀ ခန့် အပါအဝင် လူပေါင်း ၃၀၀ ကျော် သေဆုံးခဲ့သည်။

အစ္စရေးဝန်ကြီးချုပ် ဘင်ဂျမင်နေတန်ယာဟု (Benjamin Netanyahu) ကတော့ ဟားမာ့စ်အဖွဲ့အား ပြင်းထန်စွာ လက်စားချေ တိုက်ခိုက်သွားမည်ဟု ပြောကြားခဲ့သည်။

ဟားမာ့စ်အဖွဲ့သည် အစ္စရေးကို ဒုံးကျည် အများအပြားဖြင့် ပစ်ခတ်တိုက်ခိုက်ခဲ့ပြီး လုံခြုံရေး အတားအဆီးများကို ချိုးဖျက်ကာ အစ္စရေး၏ မြို့များအတွင်းသို့ လက်နက်ကိုင်များ စေလွှတ်ခဲ့သည်။

ထို့နောက် ၂၄ နာရီအကြာ အစ္စရေးနိုင်ငံ တောင်ပိုင်းတွင် ဟားမာ့စ်လက်နက်ကိုင်များနှင့် အစ္စရေး တပ်ဖွဲ့များ အကြား တိုက်ပွဲများ ဆက်လက် ဖြစ်ပွားနေသည်။ 

ဟားမာ့စ်အဖွဲ့၏ တိုက်ခိုက်မှုများကို ဟန့်တားရန် ပျက်ကွက်မှုကြောင့် မေးခွန်းများနှင့် ရင်ဆိုင်နေရသည့် အစ္စရေး စစ်တပ်ကမူ ဟားမာ့စ်လက်နက်ကိုင်များ ထိုးဖောက် ဝင်ရောက်လာသည့် နေရာဒေသအများစုကို ပြန်လည် ထိန်းချုပ်နိုင်ခဲ့ကြောင်း သို့သော် အချို့နေရာများတွင် တိုက်ပွဲများ ဆက်လက် ဖြစ်ပွားနေဆဲဖြစ်ကြောင်း ထုတ်ပြန် ခဲ့သည်။

အစ္စရေးနိုင်ငံသားတွေကိုတွေ တွေ့ရစဉ်

ထို့ပြင် ပါလက်စတိုင်း ၂ ဒသမ ၃ သန်းခန့် နေထိုင်သည့် ဂါဇာဒေသ အနီးတစ်ဝိုက်ရှိ ဒေသများတွင်  သောင်းနှင့်ချီ သည့် စစ်သားများကို ဖြန့်ကြက်ချထားပြီး ရှေ့တန်းစစ်မြေပြင် အနီးတစ်ဝိုက်တွင် နေထိုင်သည့် အစ္စရေးနိုင်ငံသား များ အားလုံးကို ကယ်ထုတ်ရန် စီစဉ်နေကြောင်း ပြောကြားခဲ့သည်။

"ကျနော်တို့တွေဟာ ဟားမာ့စ်အဖွဲ့ကို ဆက်လက် တိုက်ခိုက်သွားမှာပါ။ ဒီတိုက်ပွဲဟာ ရှည်လျားပါလိမ့်မယ်"ဟု အစ္စရေး စစ်တပ်၏ ပြောရေးဆိုခွင့်ရှိသူက သတင်းထောက်များကို ပြောကြားခဲ့သည်။

ဂါဇာဒေသတွင်မူ ဟားမာ့စ်အဖွဲ့၏ ပြောရေးဆိုခွင့်ရှိသူ အဗ္ဗဒယ် လာတစ်ဖ် အယ် ကာနျူအာ (Abdel-Latif al-Aanoua)ကတော့ မိမိတို့သည် ပါလက်စတိုင်းများကို ကာကွယ်သည့်အနေဖြင့် အစ္စရေးကို တိုက်ခိုက်ခြင်းဖြစ်ပြီး ရှေ့တန်းစစ်မြေပြင်များတွင် စစ်ဆင်ရေးများ ဆက်လက် လုပ်ဆောင်မည်ဖြစ်ကာ ဒုံးကျည်များဖြင့် ဆက်လက် ပစ်ခတ်တိုက်ခိုက်သွားမည်ဟု ပြောကြားခဲ့သည်။ 

လွန်ခဲ့သည့် နှစ်ပေါင်း ၅၀ က ဖြစ်ပွားခဲ့သည့် အီဂျစ်နှင့် ဆီးရီးယားက အစ္စရေးကို ရုတ်တရက် တိုက်ခိုက်ခဲ့သည့် ယွန်ကစ်ပူး (Yom Kipppur) စစ်ပွဲအပြီးတွင် ယခုဖြစ်ပွားနေသည့် ဟားမာ့စ်-အစ္စရေး ပဋိပက္ခသည် အကြီးဆုံးနှင့် လူသေဆုံးမှုအများဆုံး ကျူးကျော်တိုက်ခိုက်မှု ဖြစ်သည်။

Source: ရိုက်တာ

CNI International News

ဘန်ကောက်၊ အောက်တိုဘာ ၉

ထိုင်းနိုင်ငံ၊ ဘန်ကောက်မြို့တော်ရှိ နေအိမ်တစ်လုံးအတွင်းရှိ အိမ်သာထဲတွင် ဒိန်းမတ်နိုင်ငံဆိုင်ရာ သံအမတ် ဟောင်း တစ်ဦးသည် ဆိုးရွားစွာ ဓားဖြင့် အထိုးခံခဲ့ရပြီးနောက် သေဆုံးနေသည်ကို တွေ့ရှိခဲ့သည်ဟု ရဲတပ်ဖွဲ့က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

အောက်တိုဘာ ၈ ရက်နေ့ နံနက်ပိုင်းက တွေ့ရှိခဲ့သည့် ထိုရုပ်အလောင်းကို စစ်ဆေးခဲ့သည့် မှုခင်းဆေးပညာအရ သေဆုံးသူသည် ရင်ဘတ်ကို ဓားဖြင့် သုံးချက် အထိုးခံခဲ့ရကြောင်း သိရှိခဲ့ရသည်ဟု ရဲတပ်ဖွဲ့ ဒုတိယမဟာမင်းကြီး နိုပါစီ ပွန်ဆာဝတ် (Noppasilp Poonsawat) က ထိုအမှုကို ကိုင်တွယ်နေသည့် သုစိဿန် (Suthisan) ရဲစခန်းမှ ရဲတပ်ဖွဲ့နှင့် အစည်းအဝေး ပြုလုပ်ခဲ့ပြီးနောက် ပြောကြားခဲ့သည်။

အသက် ၆၃ နှစ်အရွယ် သံအမတ်ဟောင်း ဝီချစ် ချစ်ဝီမန် (Vichit Chitvimarn)၏ ရုပ်အလောင်းကို ဘန်ကောက် မြို့တော် ချတ်တူချက်(Chatuchak)ခရိုင်ရှိ သုံးထပ်တိုက်၏ ဒုတိယထပ်မှ အိမ်သာထဲတွင် တွေ့ရှိခဲ့ခြင်း ဖြစ်သည်။

အဆိုပါ သုံးထပ်တိုက်၏ ပထမထပ်ရှိ မီးဖိုခန်းထဲမှ မီးဖိုချောင်သုံး ဓား ၅ ချောင်း ထည့်ထားသည့်သစ်သား သေတ္တာတစ်လုံးကို စစ်ဆေးရာတွင် ထိုဓားများထဲမှ နှစ်ချောင်းတွင် သေဆုံးသူ၏ သွေးများကို တွေ့ရှိခဲ့သည်ဟု ရဲတပ်ဖွဲ့က ပြောကြားခဲ့သည်။

ဒိန်းမတ်နိုင်ငံဆိုင်ရာ ထိုင်းသံအမတ်ဟောင်း ဝီချစ် ချစ်ဝီမန်ကို တွေ့ရစဉ်

ထို့ပြင် ပထမထပ်နှင့်ဒုတိယထပ်ကို ရှာဖွေခဲ့ပြီးနောက် အိမ်အတွင်းရှိ ပစ္စည်းများကို ခိုးယူလို သူတစ်ဦးက ထိုလူသတ်မှုကို ကျူးလွန်ခဲ့ခြင်း ဖြစ်နိုင်သည်ဟု ရဲတပ်ဖွဲ့က ယူဆခဲ့သည်။

ထိုအိမ်အတွင်းရှိ လုံခြုံရေး ကင်မရာများကိုလည်း ရဲတပ်ဖွဲ့က စစ်ဆေးနေကြောင်း မစ္စတာ နိုပါစီက ပြောကြားခဲ့ သည်။

ဝီချစ်သည် ပုံမှန်အားဖြင့် တစ်ဦးတည်း နေထိုင်လေ့ရှိသော်လည်း သူ မသေဆုံးမီအချိန်က အသက် ၁၇ နှစ်အရွယ် သူ့မွေးစားသားနှင့်အတူ နေထိုင်ခဲ့ကြောင်း မျက်မြင်များက ရဲတပ်ဖွဲ့ကို ပြောကြားခဲ့သည်။ 

ထိုဆယ်ကျော်သက် လူငယ်ကို စစ်ဆေးမေးမြန်းရန်အတွက် ရဲတပ်ဖွဲ့က ဖမ်းဆီးထိန်းသိမ်းထားသည်။

မစ္စတာ ဝီချစ်သည် နိုင်ငံခြားရေးဝန်ကြီးဌာန၏ အရာရှိတစ်ဦးအဖြစ် တာဝန်ထမ်းဆောင်ခဲ့ပြီး ၂၀၂၀ ပြည့်နှစ်၊ စက်တင်ဘာ ၃၀ ရက်တွင် အငြိမ်းစားယူခဲ့ခြင်း ဖြစ်သည်။

ထို့ပြင် သူသည် ထိုင်း နိုင်ငံတကာ ပူးပေါင်းဆောင်ရွက်ရေး အေဂျင်စီ၏ လက်ထောက်ညွှန်ကြားရေးမှူးချုပ်ရာထူး၊ တရုတ်နိုင်ငံ ခွေးမင် (Kunming) မြို့တွင် ကောင်စစ်ဝန်ချုပ်ရာထူး၊ ဂျပန်နိုင်ငံ အိုဆာကာ (Osaka) မြို့တွင် ကောင်စစ်ဝင်ချုပ် ရာထူးနှင့် ဒိန်းမတ်နိုင်ငံဆိုင်ရာ ထိုင်းသံအမတ် ရာထူးနေရာများတွင် တာဝန်ထမ်းဆောင်ခဲ့သူ ဖြစ်သည်။

Source: ဘန်ကောက်ပို့စ်

CNI Internatioanl News

ဒါကာ၊ အောက်တိုဘာ ၇

ဘင်္ဂလားဒေ့ရှ်နိုင်ငံသည် ၎င်း၏ ပထမဆုံ နျူကလီးယား ဓာတ်အားပေး စက်ရုံအတွက် ရုရှားထံမှ ယူရေနီယံ လောင်စာများကို ပထမဆုံးအကြိမ် လက်ခံရရှိခဲ့သည်ဟု အယ်လ်ဂျာဇီးယာမှ ဖော်ပြခဲ့သည်။

ထို့ကြောင့် ဘင်္ဂလားဒေ့ရှ်သည် ကမ္ဘာပေါ်တွင် နျူကလီးယား စွမ်းအင်ထုတ်လုပ်မည့် ၃၃ နိုင်ငံမြောက် ဖြစ်လာ မည် ဖြစ်သည်။

တောင်အာရှနိုင်ငံဖြစ်သည့် ဘင်္ဂလားဒေ့ရှ်သည် ရုရှားနိုင်ငံပိုင် အဏုမြူ ကုမ္ပဏီ Rosatom နှင့်ပူးပေါင်းပြီး နျူကလီးယား ဓာတ်အားပေးစက်ရုံ နှစ်ခုအနက် ပထမဆုံး စက်ရုံတစ်ခုကို တည်ဆောက်နေသည်။

IAEA ၏ အကြီးအကဲ ရာဖေးလ် ဂရော့စီကို တွေ့ရစဉ်

ထိုစက်ရုံ တည်ဆောက်ရေးအတွက် လိုအပ်သည့် ငွေကြေး ၁၂ ဒသမ ၆၅ ဘီလျံထဲမှ ၉၀ ရာခိုင်နှုန်းကို ရုရှားထံမှ ချေးငွေရယူပြီး တည်ဆောက်ခြင်း ဖြစ်သည်။

ရုရှားကို ပြန်လည် အကြွေးဆပ်ရမည့် ကာလသည် ၂၈ နှစ်ဖြစ်ပြီး အကြွေးဆပ်ချိန်ကို ၁၀ နှစ်ကြာ ဆိုင်းငံ့နိုင်သည့် သဘောတူညီချက် ရရှိထားသည်။

"ဒီနေ့ကတော့ ဘင်္ဂလားဒေ့ရှ် ပြည်သူတွေအတွက် ဂုဏ်ယူပျော်ရွှင်ရမယ့်နေ့ ဖြစ်ပါတယ်"ဟု ဘင်္ဂလားဒေ့ရှ် ဝန်ကြီးချုပ် ရှိတ်ဟာစီနာ (Sheikh Hasina) က အောက်တိုဘာ ၅ ရက်တွင် ရုရှားသမ္မတ ဗလာဒီမာပူတင် (Vladimir Putin) နှင့် ဗွီဒီယို ဆက်သွယ်မှုမှတဆင့် ပြုလုပ်သည့် ညီလာခံတွင် ပြောကြားခဲ့သည်။

ဟာစီနာနှင့် ဗွီဒီယို ဆက်သွယ်မှုမှ တဆင့် ပြုလုပ်သည့် ညီလာခံတွင် ပူတင်က ဘင်္ဂလားဒေ့ရှ်၏ နျူကလီးယား စွမ်းအင်စက်ရုံ တည်ဆောက်ရေး စီမံကိန်းကို ကြီးကြပ်ပေးခဲ့သည့် နိုင်ငံတကာ အဏုမြူစွမ်းအင် အေဂျင်စီ (IAEA) ကို ကျေးဇူးတင်ကြောင်း ပြောကြားခဲ့သည်။

ဘင်္ဂလားဒေ့ရှ်က နျူကလီးယား စက်ရုံကိုတွေ့ရစဉ်

IAEA ၏ အကြီးအကဲ ရာဖေးလ် ဂရော့စီ (Rafael Grossi) ကလည်း ဘင်္ဂလားဒေ့ရှ်၏ နျူကလီးယား စွမ်းအင် စက်ရုံ တည်ဆောက်ရေး စီမံကိန်းကို ဂုဏ်ပြုကြောင်း လူမှုမီဒီယာတွင် ရေးသားဖော်ပြခဲ့သည်။

"ဘင်္ဂလားဒေ့ရှ်ဟာ နျူကလီးယားစွမ်းအင် ဖွံ့ဖြိုးတိုးတက်ရေးကဏ္ဍမှာ အသစ်ထွက်ပေါ်လာတဲ့ နိုင်ငံတွေထဲက အောင်မြင်မှုရရှိတဲ့ နိုင်ငံအဖြစ် ရပ်တည်နေပြီး IAEA ရဲ့ လမ်းညွှန်မှုအောက်မှာ နျူကလီးယားစီမံကိန်းကို တိုးတက်အောင် လုပ်ဆောင်နေပါတယ်" ဟု ဂရော့စီက ပြောကြားခဲ့သည်။

ဘင်္ဂလားဒေ့ရှ်နိုင်ငံက တည်ဆောက်မည့် နျူကလီးယား ဓာတ်အားပေး စက်ရုံနှစ်ခုအနက် ပထမဆုံးတစ်ခုသည် စုစုပေါင်း လျှပ်စစ်ဓာတ်အား ၂၄၀၀ မဂ္ဂါဝပ် ထုတ်လုပ်မည်ဖြစ်ကာ လာမည့်နှစ် ဇူလိုင်လအတွင်း စတင် လည်ပတ် ရန် စီစဉ်ထားသည်။

Source: အယ်လ်ဂျာဇီးယား

CNI International News

မော်စကို ၊ အောက်တိုဘာ ၇

အနောက်နိုင်ငံများ၏ စစ်ရေးနှင့် ဘဏ္ဍာရေး အကူအညီများ ရပ်တန့်သွားမည်ဆိုပါက ယူကရိန်းသည် သီတင်း တစ်ပတ်ထက်ကျော်ပြီး တောင့်ခံနိုင်လိမ့်မည် မဟုတ်ကြောင်း ရုရှားသမ္မတ ဗလာဒီမာ ပူတင် (Vladimir Putin) က ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ယူကရိန်းအတွက် အမေရိကန်၏ အထောက်အပံ့များ ရပ်တန့်သွားပါက ထိုထောက်ပံ့ရေး ဟာကွက်ကို အစားထိုး ဖြည့်ဆည်း ပေးနိုင်မည် မဟုတ်ကြောင်း ဥရောပသမဂ္ဂ အရာရှိတစ်ဦးက ပြောကြားခဲ့သည့် နေ့မှာပင် ပူတင်၏ ပြောကြားချက် ထွက်ပေါ်လာခြင်း ဖြစ်သည်။

အမေရိကန် အစိုးရအဖွဲ့အတွင်း ဖြစ်ပွားနေသည့် နိုင်ငံရေး ပြဿနာများ မြင့်တက်လာမှုသည် ယူကရိန်းအတွက် အရေးတကြီး လိုအပ်နေသည့် စစ်ရေးနှင့် လူသားချင်းစာနာ ထောက်ထားမှုဆိုင်ရာ အကူအညီများကို ထိခိုက် စေနိုင်ကြောင်း ပူတင်က ပြောသည်။

အမေရိကန်သမ္မတဂျိုးဘိုင်ဒန် (Joe Biden) ကလည်း ယူကရိန်းအတွက် အမေရိကန်၏ အကူအညီများသည် လမ်းလွဲသွားစေမည့် အခြေအနေကို စိုးရိမ်ကြောင်း ယခုသီတင်းပတ်အတွင်း ဝန်ခံပြောကြားခဲ့သည်။

ဇာလန်းစကီးနဲ့ ဘိုင်ဒန်ကိုတွေ့ရစဉ်

ယူကရိန်းသည် လစဉ်လတိုင်း ဒေါ်လာ ဘီလျံချီ ရရှိနေသည့်် လှူဒါန်းမှုများကြောင့် အသက်ရှူ ချောင်နေခဲ့ခြင်း ဖြစ်သည်ဟု ပင်လယ်နက် အပန်းဖြေစခန်း မြို့ဖြစ်သည့် ဆိုချီ (Sochi) မြို့တွင် ပြုလုပ်ခဲ့သည့် မော်စကိုအခြေစိုက် ဗယ်လ်ဒါအီ ဆွေးနွေးရေး ကလပ် (Valdai Discussion Club) ၏ အစည်းအဝေး၌ ပူတင်က ပြောကြားခဲ့သည်။

"အဲဒီလှူဒါန်းမှုတွေသာ ရပ်သွားမယ်ဆိုရင် ယူကရိန်းဟာ တစ်ပတ်အတွင်း အကုန်သေဆုံး သွားပါလိမ့်မယ်။ အဲဒီ လိုပဲ ကာကွယ်ရေးစနစ်ဟာလည်း ရပ်တန့်သွားပါလိမ့်မယ်။ မနက်ဖြန်မှာ အထောက်အပံ့တွေ ရပ်သွားမယ်လို့ တွေးကြည့်လိုက်ပါ။ အဲဒါဆိုရင် ယူကရိန်းမှာ လက်နက်ခဲယမ်း ပစ္စည်းတွေဟာ တစ်ပတ်အတွင်း ပြတ်တောက် သွားပါလိမ့်မယ်"ဟု ပူတင်က ပြောသည်။

ဇွန်လအတွင်းက စတင်ခဲ့သည့်် ယူကရိန်း၏ တန်ပြန်ထိုးစစ်အတွင်း ယူကရိန်းစစ်သား ၉၀,၀၀၀ ကျော် သေဆုံးခဲ့ သည်ဟုလည်း ပူတင်က ပြောသည်။

အောက်တိုဘာ ၅ ရက်က စပိန်နိုင်ငံတွင် ပြုလုပ်ခဲ့သည့် ဥရောပနိုင်ငံရေး အသိုင်းအဝိုင်း (EPC) ၏ အစည်းအဝေး ၌ ဥရောပသမဂ္ဂ နိုင်ငံခြားရေးမူဝါဒ အကြီးအကဲ ဂျိုးဆက် ဘော်ရဲလ် (Josep Borrell) က ဥရောပသမဂ္ဂသည် ယူကရိန်း၏ အဓိက အလှူရှင်ဖြစ်သည့် အမေရိကန်၏ နေရာကို အစားထိုး ဝင်ရောက်နိုင်လိမ့်မည် မဟုတ် ကြောင်း ပြောကြားခဲ့သည်။

"အမေရိကန်က ထောက်ပံ့ မပေးနိုင်တော့ရင် ဥရောပက အဲဒီနေရာကို အစားထိုး ဝင်ရောက်နိုင်ပါ့မလား။ သေချာ တာကတော့ ဥရောပဟာ အမေရိကန်ရဲ့ နေရာကို အစားထိုး ဝင်ရောက်ပြီး ထောက်ပံ့ မပေးနိုင်ပါဘူး" ဟု ဘော်ရဲလ်က ပြောကြားခဲ့သည်။

ဥရောပသမဂ္ဂနှင့် အမေရိကန်သည် ရုရှားကို တိုက်ခိုက်နေသည့် ယူကရိန်းအား ဘဏ္ဍာရေးနှင့် စစ်ရေး အကူအညီ များ ပေးနေသည့် နေတိုးအဖွဲ့ဝင်များ ဖြစ်သည်။

သို့သော် အမေရိကန်လွှတ်တော်တွင် မကြာသေးမီက သဘောတူညီခဲ့သည့် ကာလတို ဘတ်ဂျက် သဘောတူညီမှု တွင် ယူကရိန်းအတွက် စစ်ရေး အကူအညီများကို ထည့်သွင်းခဲ့ခြင်း မရှိပေ။

Source: အယ်လ်ဂျာဇီးယား