CNI International News

ဘေဂျင်း၊ ဇူလိုင် ၂၀

မော်စကို၏ အိမ်နီးချင်း ယူကရိန်းအား ကျူးကျော်မှုကို တရုတ်က ဆက်လက်ထောက်ခံသည့် သင်္ကေတအဖြစ် ဇူလိုင် ၁၉ ရက်နေ့က ရေတပ်သင်္ဘောများအား ရုရှား၏ ပင်လယ်ပြင်တပ်ဖွဲ့များနှင့် ပူးတွဲစစ်ရေး လေ့ကျင့်ရန် စေလွှတ်ခဲ့သည်ဟု အေပီမှ ဖော်ပြခဲ့သည်။ 

ရုရှား-ယူကရိန်းစစ်ပွဲကြောင့် စီးပွားရေးနှင့် လူသားအရေးဆိုင်ရာ ဂယက်ရိုက်မှုများ ကြီးမားနေဆဲ အချိန်မှာပဲ  ယခုလို စစ်ရေးလေ့ကျင့်မှု ပေါ်ထွက်လာခဲ့ခြင်းဖြစ်သည်။ 

ရုရှား-ယူကရိန်းစစ်ပွဲတွင် ကြားနေမည်ဟု တရုတ်က ပြောကြားခဲ့သော်လည်း အမေရိကန်နှင့် ၎င်း၏ မဟာမိတ် များသည် ရုရှားကို ရန်စနေသည်ဟု စွပ်စွဲကာ မော်စကိုနှင့် ခိုင်မာသော စီးပွားရေး၊ သံတမန်ရေးနှင့် ကုန်သွယ် ဆက်ဆံရေးများအား ဆက်လက် ထိန်းသိမ်းထားခဲ့သည်။ 

တရုတ်-ရုရှား ပူးတွဲစစ်ရေးလေ့ကျင့်မှုတွင် သင်္ဘော ၁၀ စင်းကျော်နှင့် လေယာဉ် အစင်း ၃၀ ကျော် ပါဝင်မည်ဟု တရုတ်နိုင်ငံပိုင် ဆင်ဟွာသတင်းဌာနမှ ဖော်ပြခဲ့သည်။ 

တရုတ်ကာကွယ်ရေးဝန်ကြီး လီရှန်ဖူကို တွေ့ရစဉ်

အသေးစိတ်ကို ပြောကြားခြင်း မရှိသော်လည်း လာမည့်ရက်များတွင် ဂျပန်ပင်လယ် တစ်နေရာမှာ စစ်ရေး လေ့ကျင့်ဖွယ် ရှိသည်။ 

နိုင်ငံတကာဖိုရမ်များတွင် အမေရိကန်က ယူကရိန်းကျူးကျော်မှုအား ပြစ်တင်ရှုတ်ချသည်ကို တရုတ်က ဆန့်ကျင် ၍ ရုရှားကို ထောက်ခံပေးခဲ့သည်။ သို့သော် စစ်ပွဲ၏ မည်သည့်ဘက်ကိုမှ လက်နက် ထောက်ပံ့မည် မဟုတ်ဟု  တရုတ်က ပြောသည်။ 

ယူကရိန်းစစ်ပွဲ ဖြစ်ပွားနေချိန်တွင် နှစ်နိုင်ငံ စစ်ဖက် ဆက်ဆံရေး ရှိနေဆဲဖြစ်သည်ကို ပြသသည့်အနေဖြင့် ရုရှား ရေတပ်သင်္ဘောနှစ်စင်း တရုတ်နိုင်ငံသို့ ရောက်ရှိလာခဲ့သေးသည်။ 

ရုရှား ရေတပ် ဗိုလ်ချုပ်ကြီး နီကိုလိုင်ယဲ့မီနော့ဗ်နဲ့ ရုရှားခေါင်းဆောင် ပူတင်ကို တွေ့ရစဉ်

ရုရှားတွင် ကြေးစားစစ်သားများ အခိုက်အတန့် ပုန်ကန်နေချိန်တုန်းကလည်း တရုတ်က ရုရှားအား ထောက်ခံ ခဲ့သည်။ 

တရုတ်က စစ်ဖက် ဆက်ဆံရေးကို အဆင့်သင်တစ်ခုသို့ ရောက်ရှိအောင် ရုရှားနှင့် ပူးပေါင်းဆောင်ရွက်မှု ပုံစံ အမျိုးမျိုးကို တိုးမြှင့်သွားဖို့ မျှော်လင့်ထားကြောင်း တရုတ်ကာကွယ်ရေးဝန်ကြီး လီရှန်ဖူ(Li Shangfu)က ရုရှား ရေတပ် ဗိုလ်ချုပ်ကြီး နီကိုလိုင်ယဲ့မီနော့ဗ်(Nikolai Yevmenov)အား ပြောကြားခဲ့သည်။ 

လက်ရှိတွင် တရုတ်နိုင်ငံမှာ သင်္ဘော အရေအတွက်အားဖြင့် ကမ္ဘာ့အကြီးဆုံး ရေတပ်ကို ပိုင်ဆိုင်ထားပြီး အရွယ် အစားနှင့် နည်းပညာစွမ်းရည်တွင်ပါ ရုရှားရေတပ်ထက် သာလွန်နေသည်။

Source: AP

CNI International News

နိုင်ရိုဘီ၊ ဇူလိုင် ၂၀

ကင်ညာနိုင်ငံတွင် လူနေမှုစရိတ် ကြီးမြင့်မှုနှင့် အခွန်များ တိုးမြင့်လာမှုကြောင့် ၃ ရက်တိုက် ဆန္ဒပြပွဲ ဖြစ်ပွားလာ ခဲ့ရာ ဇူလိုင် ၁၉ ရက်နေ့၌ မြို့တော် နိုင်ရိုဘီ၏ ခီဘာရာရပ်ကွက်မှာ ဆန္ဒပြသူ ၁၀၀ ခန့်က ရဲများကို ခဲများဖြင့် ပစ်ပေါက်ခဲ့၍ နှစ်ဖက် ပဋိပက္ခဖြစ်ပွားခဲ့ကြောင်း အယ်ဂျာဇီးလ်ယားမှ ဖော်ပြခဲ့သည်။ 

ခီဘာရာတွင် ဆန္ဒပြသူများက ကားဘီးတာယာများကို မီးရှို့ခဲ့ကြရာ ရဲများက မျက်ရည်ယိုဗုံးများဖြင့် ပစ်ခတ် လူစုခွဲခဲ့သည်။ 

ခီဘာရာမှာ ဝါရင့်အတိုက်အခံခေါင်းဆောင် ရိုင်လာအိုဒင်ဂါ(Raila Odinga)၏ အမာခံနယ်မြေ ဖြစ်သကဲ့သို့ ၁၉၉၃ မှ ၂၀၀၃ အထိ ပါလီမန်တွင် ခီဘာရာဒေသကို ကိုယ်စားပြုခဲ့သည်။

ခီဘာရာဒေသသည် ရဲများနှင့် ရုန်းရင်းဆန်ခတ် ပဋိပက္ခများ မကြာခဏ ဖြစ်ပွားရာ နေရာဖြစ်သည်။ သို့သော် မြို့တော်၏ အခြားနေရာများမှာတော့ တည်ငြိမ်အေးချမ်းကြောင်း သိရသည်။

ဆန္ဒပြသူများနဲ့ ကင်ညာရဲတပ်ဖွဲ့ ရုန်းရင်ဆန်ခတ်ဖြစ်နေစဉ်

အာဏာပိုင်များကမူ ဇူလိုင် ၁၉ ရက်နေ့တွင် ကျောင်းများပိတ်မည်ဟု ကြေညာခဲ့သည်။ ထို့နောက် မြို့လယ်ခေါင် တွင် လုပ်ငန်းများ၊ ဆိုင်များ ပိတ်သိမ်းထားသောကြောင့် လူသူရှင်းလင်းနေသည်။ 

မြို့တော်အတွင်း ဆန္ဒပြမှုများ အဖြစ်များသည့် နေရာများတွင် အစိုးရက တပ်ဖွဲ့များကို ဖြန့်ချထားသည်။ သို့သော် လည်း မြို့တော်နေ လူအများစုသည် အိမ်အပြင်မထွက်ဘဲ အခြေအနေကို စောင့်ကြည့်နေကြသည်။ 

နိုင်ငံအနောက်ပိုင်း ဒေသတွင် ရဲက ဆန္ဒပြသူဟု ယူဆရသူများကို ဖမ်းဆီးခဲ့ သည်ဟု The Nation သတင်းစာက ဖော်ပြခဲ့သည်။ အလားတူ တန်ဇန်နီးယား နယ်စပ်အနီး မီဂိုရီတွင် ဆန္ဒပြသူ ၃ ယောက် ဆေးရုံတင်လိုက်ရသည်ဟု  Kenya Television Network သတင်းတွင် ဖော်ပြထားသည်။ 

သမ္မတ ဝီလျံရူတိုကိုတွေ့ရစဉ်

ယခုလ အစောပိုင်းက အကြမ်းဖက်မှုအဖြစ် ပြောင်းလဲသွားသည့် ဆန္ဒပြမှုများတွင် ရဲတပ်ဖွဲ့က မျက်ရည်ယို ဗုံးများ ဖြင့် လူစုခွဲခဲ့သည့်အပြင် အချို့နေရာများ၌ ကျည်အစစ်ဖြင့် ပစ်ခတ်သောကြောင့် အနည်းဆုံး လူ ၁၅ ဦး သေဆုံးပြီး ရာပေါင်းများစွာ အဖမ်းခံခဲ့ရသည်။ 

ပြီးခဲ့သည့်နှစ် သြဂုတ်လက ရွေးကောက်တင်မြှောက် ခံခဲ့ရသည့် သမ္မတ ဝီလျံရူတို (William Ruto)၏ အစိုးရက ပြီးခဲ့သည့် ဇွန်လက အခွန်အခများကို တိုးမြှင့်ပြဋ္ဌာန်းလိုက်သည်။ 

ဆင်းရဲသားများ၏ အကျိုးစီးပွားကို ဦးထိပ်ထားမည်ဟု ကတိရှိခဲ့သော်လည်း သူ့အစိုးရ လက်ထက်တွင် အခြေခံ ကုန်စည်ဈေးနှုန်းများ မြင့်တက်လာခဲ့သောကြောင့် အတိုက်အခံပါတီက ဆန္ဒပြကြရန် တိုက်တွန်းလာခဲ့သည့် အခြေအနေဖြင့် ရင်ဆိုင်နေရသည်။

Source:  အယ်ဂျာဇီးလ်ယား

CNI International News

ဘန်ကောက်၊ ဇူလိုင် ၂၀

ဇူလိုင် ၁၉ ရက်နေ့က အောက်နှင့်အထက် ပူးတွဲလွှတ်တော်က ဝန်ကြီးချုပ်နေရာအတွက် Move Forward ပါတီ ခေါင်းဆောင် ပီတာလင်ဂျာရိုရတ်အား ထပ်မံအဆိုပြုမှုကို ပယ်ချဖို့ မဲပေးခဲ့ကြသည်။ 

လွှတ်တော် လုပ်ထုံးလုပ်နည်းအရ ပိတ်ပင်ထားကြောင်း လွှတ်တော်ဥက္ကဋ္ဌ  ဝမ်မူဟာမတ်နော်မာသာ(Wan Muhamad Noor Matha)က ပြောသည်။ 

ညနေ ၅ နာရီ ၁၀ မိနစ်ခန့်တွင် အမတ် ၇၁၅ ယောက်တို့က အင်တာနတ်မှတဆင့် မဲပေးခဲ့ကြပြီးနောက် မစ္စတာ ဝမ်က ယခုကဲ့သို့  ကြေညာလိုက်ခြင်း ဖြစ်သည်။ 

နံနက် ၉ နာရီခွဲအချိန်တွင် ဖွင့်လှစ်ခဲ့သည့် အစည်းအဝေးပြီးနောက် အချိန်အကြာကြီး ငြင်းခုန်ကြပြီးမှ လွှတ်တော် ဥက္ကဋ္ဌက မဲပေးခွင့် ပြုခဲ့ခြင်းဖြစ်သည်။ 

ပူးတွဲလွှတ်တော်တွင် ရွေးကောက်ခံ မဟုတ်သော အထက်အမတ် အများစုဖြစ်သည့် အမတ် ၃၉၄ ယောက်တို့က မစ္စတာပီတာအား ထပ်မံအဆိုပြုမှုကို ဆန့်ကျင်မဲ ပေးခဲ့ကြပြီး ၃၁၂ ယောက်တို့က ထောက်ခံမဲ ပေးခဲ့ကြသည်။ 

ထို့နောက် (၈)ယောက်က မဲမပေးဘဲနေခဲ့ပြီး တစ်ယောက်ကလည်း မဲပေးပိုင်ခွင့်ကို အသုံးမချခဲ့ဟု ဆိုပါသည်။ 

မစ္စတာဝမ်က အများစုမဲဖြင့် ပယ်ချခြင်းဖြစ်သည်ဟု ပြောသည်။ 

ပူးတွဲလွှတ်တော်တွင် မဲအားလုံး၏ ထက်ဝက်ကို ၃၇၄ မဲဟု သတ်မှတ်ထားပါသည်။

ထိုင်း လွှတ်တော်ဥက္ကဋ္ဌ  ဝမ်မူဟာမတ်နော်မာသာကို တွေ့ရစဉ်

ဇူလိုင် ၁၉ ရက်နေ့ အစောပိုင်းက ထိုင်းဖွဲ့စည်းပုံ အခြေခံဥပေဒဆိုင်ရာ တရားရုံးက မစ္စတာပီတာအား လွှတ်တော် အမတ် တာဝန်မှ ဆိုင်းငံ့လိုက်ပြီးနောက် မဲအရေအတွက်ကိုလည်း ပြန်လည်ပြင်ဆင် သတ်မှတ်ခဲ့ခြင်း ဖြစ်သည်။ 

မဲခွဲပြီးနောက် မစ္စတာဝမ်က ပူးတော်လွှတ်တော်ကို ပိတ်သိမ်းခဲ့သည်။ 

နောက်တစ်ကြိမ် ဝန်ကြီးချုပ်ရွေးမည့် အစီအစဉ်ကို ဇူလိုင် ၂၇ ရက်တွင် သတ်မှတ်ထားပြီး ဖြူးထိုင်းပါတီ (Pheu Thai)က ၎င်း၏ ဝန်ကြီးချုပ်လောင်းကို အဆိုပြုလာဖွယ် ရှိနေသည်။ 

ဖြူးထိုင်းပါတီ၏ စီးပွားရေးလုပ်ငန်းရှင် ဆရတ်သာထာဗီဆင် (Srettha Thavisin)ကို ရွေးချယ်ဖွယ်ရှိနေပြီး ညွန့််ပေါင်းအဖွဲ့၏ ဖွဲ့စည်းပုံလည်း ပြောင်းလဲသွားဖွယ် ရှိနေသည်။ 

လက်ရှိ (၈)ပါတီ ညွန့်ပေါင်းအဖွဲ့တွင် ဖြူးထိုင်းနှင့်အတူ Move Forward ပါတီ ပါဝင်နေခြင်းကို အထက် လွှတ်တော် အမတ်အများစုက ဖျက်မြင်းအဖြစ် ယူဆနေကြသည်။ 

အကယ်၍ ဖြူးထိုင်းပါတီမှ ဝန်ကြီးချုပ်လောင်း အနေနှင့် ထောက်ခံမဲ အများစု မရပါက နောက်တစ်ကြိမ် အခွင့်အရေး ရတော့မည် မဟုတ်ပေ။ 

ထိုသို့ ဖြစ်လာနိုင်သည်ကိုလည်း မစ္စပီတာက ဇူလိုင် ၁၈ ရက်နေ့ကတည်းက ကြိုတင် သတိပေးထားသည်။ 

သူ့ကို ပိတ်ပင်ရန် မဲပေးခြင်းမှာ ပါလီမန်အတွက် အန္တရာယ်များသည့် စံနမူနာ ဖြစ်လာလိမ့်မည်ဟု သတိပေးခဲ့ ခြင်းပင် ဖြစ်သည်။ 

မဲမပေးမီတွင် ပီတာအား ပြန်လည်အဆိုပြုမှုကို လက်ခံသင့်၊ မခံသင့် လွှတ်တော်အမတ်များ နာရီပေါင်းများစွာ ငြင်းခုန်နေခဲ့ကြသည်။ 

 ဖြူးထိုင်းပါတီက ၀န်ကြီးချုပ်လောင်း ဆရတ်သာထာဗီဆင်နဲ့ ပေတုန်တန်ကိုတွေ့ရစဉ်

ကန့်ကွက်သူများကမူ လွှတ်တော် ကျင့်ထုံး အမှတ် ၄၉ အရ လွှတ်တော် ဆက်ရှင်တစ်ခုတည်းတွင် အရေးနိမ့် သွားသည့် အဆိုတစ်ခုကို ပြန်လည်တင်သွင်းမှုကို ပိတ်ပင်တားမြစ်ထားသည်။ 

ပြီးခဲ့သည့် ရက်သတ္တပတ်က ပီတာအား ပြန်လည်အဆိုပြုမှုကို ပယ်ချထားပြီး ပြန်လည်အဆိုပြုမှုကို ကျိုးကြောင်း ဆီလျော်စေမည့် အပြောင်းအလဲများလည်း ဖြစ်ပေါ်မလာသေးဟု ထောက်ပြကြသည်။ 

ပီတာကို လိုလားသည့် အမတ်များကမူ အဆိုပါ ကျင့််ထုံးမှ ယေဘုယျ အဆိုများအတွက်သာ အကြုံးဝင်ပြီး ဝန်ကြီး ချုပ် အမည်စာရင်း တင်သွင်းမှုနှင့် မသက်ဆိုင်ဟု ပြောကြသည်။ ယခုက အဆိုမဟုတ်၊ အမည်စာရင်း တင်သွင်း ခြင်းဖြစ်သည်ဟု ပြန်လည် ခုခံချေပခဲ့ကြသည်။

လွှတ်တော်အမတ်များအနေဖြင့် ရွေးကောက်ပွဲတွင် မဲဆန္ဒရှင်များ၏ ရွေးချယ်မှုကို လေးစားသင့်သည်ဟုလည်း ၎င်းတို့က ပြောသည်။ 

မစ္စတာပီတာ၏ MFP ပါတီမှာ ရွေးကောက်ပွဲတွင် အောက်လွှတ်တော်အမတ်နေရာ ၁၅၁ နေရာဖြင့် အနိုင်ရခဲ့ သည်။ အကယ်၍ သူ့ကြိုးစားမှု အရေးနိမ့်ခဲ့လျှင် ဖြူးထိုင်းပါတီကို ဝန်ကြီးချုပ်လောင်း အဆိုပြုတင်သွင်းရန် လမ်းဖွင့်ပေးမည်ဟုလည်း ပီတာက မကြာသေးမီက ပြောကြားခဲ့သည်။ 

ဖြူးထိုင်းပါတီက အောက်လွှတ်တော် အမတ်နေရာ ၁၄၁ နေရာ ရထားပြီး MFP ပါတီနှင့်အတူ လက်ရှိ ညွန့်ပေါင်း အဖွဲ့တွင် အဓိကကျသည့် ပါတီကြီး တစ်ခုလည်း ဖြစ်သည်။

Source: ဘန်ကောက်ပို့စ်

CNI News

၂၀၂၃ ခုနှစ်၊ ဇူလိုင် ၁၉

Move Forward ပါတီ ခေါင်းဆောင် ပီတာလင်ဂျာရိုရတ်ကို ထိုင်းဖွဲ့စည်းပုံအခြေခံဥပဒေခုံရုံးက ရွေးကောက်ခံအမတ်အဖြစ်ကနေ ရပ်ဆိုင်းလိုက်ကြောင်း ယနေ့(ဇူလိုင် ၁၉ ရက်) MFP ပါတီထောက်ခံသူများက မကျေနပ်၍ ဆန္ဒပြနေကြသည်။

iTV ရှယ်ယာကိစ္စ စွပ်စွဲခံနေရမှုကိစ္စကို ၁၅ ရက်အတွင်း ဖြေရှင်းရန် ဖွဲ့စည်းပုံခုံရုံးက ကြေညာခဲ့သည်။

တခြားတစ်ဖက်မှာတော့ ထိုင်းလွှတ်တော်တွင် ဝန်ကြီးချုပ်ရာထူး မဲပေးရွေးချယ်ခြင်းကို ယနေ့(ဇူလိုင် ၁၉ ရက်)၌ ဒုတိယတစ်ကြိမ် ကျင်းပမည် ဖြစ်သည်။

ဇူလိုင် ၁၃ ရက်နေ့က ပီတာကို ဝန်ကြီးချုပ် ရာထူး အဖြစ် အဆိုပြု၍ လွှတ်တော်တွင် မဲခွဲရွေးချယ် ရာမှာ ထောက်ခံမဲ ၃၂၄ မဲသာရရှိခြင်းကြောင့် အရွေးမခံခဲ့ရပေ။

ထိုင်းလွှတ်တော်၏ ထောက်ခံမဲ ၃၇၆ မဲရမှသာ ထိုင်းဝန်ကြီးချုပ်ဖြစ်မည် ဖြစ်သည့်အတွက် ပီတာသည် ပထမအကြိမ် ရွေးချယ်မှုတွင် ရှုံးနိမ့်ခဲ့ခြင်းဖြစ်သည်။

ထို့နောက် ဇူလိုင် ၁၉ ရက်တွင် ဒုတိယအကြိမ် ရွေးချယ်ကြမည်ဖြစ်သော်လည်း ဝန်ကြီးချုပ် ရာထူး ရွေးချယ်ခြင်း မစတင်မီ ဖွဲ့စည်းပုံအခြေခံဥပဒေခုံရုံးက ပီတာကို ရွေးကောက်ခံအမတ်အဖြစ်ကနေ ရပ်ဆိုင်းကြောင်း ကြေညာချက် ထွက်ပေါ်လာခြင်း ဖြစ်သည်။

CNI International News

မော်စကို၊ ဇူလိုင် ၁၈

ယူကရိန်း၏ တိုက်ခိုက်မှုကြောင့် ခရိုင်းမီးယား နှင့် ဆက်ထားသည့် ရုရှားဖက်မှ တံတားပြိုကျသွားပြီးနောက် နာရီ ပိုင်းအကြာတွင် ရုရှားက ယူကရိန်းအား  ပင်လယ်နက်ကို ဖြတ်သန်းပြီး ဂျုံစေ့များ တင်ပို့မှုကို ခွင့်ပြုထားသည့် ကုလကမကထပြု စာချုပ်၌ ပါဝင်မှု ရပ်ဆိုင်းလိုက်ကြောင်း ရိုက်တာမှ ဖော်ပြခဲ့သည်။ 

မော်စကို၏ အလိုအရ ယူကရိန်းတွင် တိုက်ပွဲဝင်နေသည့် ရုရှားတပ်ဖွဲ့များအတွက် ပင်မ အသက်သွေးကြော သဖွယ်ဖြစ်သည့် လမ်းတံတားအား အကြမ်းဖက် တိုက်ခိုက်မှု၌ အရပ်သား ၂ ယောက် သေဆုံးခဲ့သလို မိန်းကလေး ငယ်တစ်ဦးလည်း ထိခိုက်ဒဏ်ရာ ရရှိခဲ့သည်။

“တကယ်တော့ ပင်လယ်နက် သဘောတူညီချက်တွေဟာ ဒီနေ့မှာ တရားမဝင်တော့ပါဘူး။ ကံမကောင်းစွာပဲ ဒီသဘောတူညီချက်တွေမှာ ရုရှားနဲ့ ပတ်သက်တဲ့အပိုင်းကို အခုထိ အကောင်အထည် မဖော်သေးပါဘူး။ အဲဒီတော့ သူ့ရဲ့ တရားဝင်မှုဟာလည်း အဆုံးသတ်သွားခဲ့ပါပြီ”ဟု ကရင်မလင် ပြောခွင့်ရပုဂ္ဂိုလ် ဒီမီထရီ ပက်စကော့(Dmitry Peskov )က သတင်းထောက်များကို ပြောကြားခဲ့သည်။ 

ဓာတ်ပုံများထဲတွင်မူ လမ်းတံတား အပိုင်းတစ်ပိုင်းမှာ ပြိုကျနေပြီး ကားများ ရပ်တန့်နေသည်ကို မြင်ရသော်လည်း အပြိုင် မီးရထားလမ်းတံတားမှာမူ အသုံးပြု၍ ရနေဆဲ ဖြစ်သည်။ 

အရုဏ်တက် အချိန်တွင် ၁၂ မိုင်အရှည်ရှိ တံတားပေါ်တွင် ပေါက်ကွဲမှုများ ဖြစ်ပွားကြောင်း သတင်းပို့လာခဲ့သည်ဟု ပက်စကော့က ပြောသည်။ 

ဂျုံစေ့ ရိတ်သိမ်းနေစဉ်

ထိုတံတားမှာ ၂၀၁၄ ခုနှစ်က ခရိုင်းမီးယားကျွန်းဆွယ်ကို သိမ်းယူသွတ်သွင်းပြီးနောက် သမ္မတပူတင်၏ အမိန့်အရ ဆောက်လုပ်ခဲ့သော တံတားဖြစ်သည်။ 

ယူကရိန်းအစိုးရကမူ ပေါက်ကွဲမှုများနှင့် ပတ်သက်၍ တစ်စုံတစ်ရာ ပြောကြားခြင်း မရှိသေးပေ။

ယူကရိန်းအစိုးရသည် အစဉ်အလာအားဖြင့် ခရိုင်းမီးယားနှင့် ရုရှားတွင် ဖြစ်ပွားသည့် တိုက်ခိုက်မှု သတင်းများ အပေါ် မှတ်ချက်ပေးလေ့ မရှိခဲ့ပေ။

သို့သော်လည်း ထိုတံတားကို တရားမဝင် တည်ဆောက်ထားသည်ဟု ယူကရိန်းဘက် ယူဆထားသလို ရုရှားက စစ်လက်နက်ပစ္စည်း ထောက်ပို့လမ်းကြောင်းအဖြစ် သုံးနေသောကြောင့် ပစ်မှတ်တစ်ခုတော့ ဖြစ်သည်ဟု လက်ခံ ထားသည်။

ပြီးခဲ့သည့်နှစ် အောက်တိုဘာလက တံတားသည် ကြီးကြီးမားမား တိုက်ခိုက်ခံထားပြီး ရုရှားဘက် ပြန်လည် ပြုပြင် ခဲ့ရသည်။

ခရိုင်းမီးယားတံတား ဖောက်ကွဲခံရစဉ်

ရုရှားက ပင်လယ်နက် ဂျုံစေ့ပို့ကုန် သဘောတူညီချက်ကို ဆိုင်းငံ့လိုက်သည့်အတွက် ကမ္ဘာနှင့်အဝန်း အထူးသဖြင့် အဆင်းရဲဆုံး နိုင်ငံများတွင် စားသောက်ကုန် ဈေးနှုန်းများ မြင့်တက်လာနိုင်သည်။ 

ယူကရိန်းနှင့် ရုရှားတို့မှာ ကမ္ဘာပေါ်တွင် ဂျုံစေ့နှင့် အစားအသောက်ပစ္စည်း အများဆုံး တင်ပို့နေသည့် နိုင်ငံများပင် ဖြစ်သည်။ 

ဂျုံစေ့ သဘောတူညီချက်မှာ ကမ္ဘာ့စားနပ်ရိက္ခာ အကျပ်အတည်းကို တားဆီးရန် ရည်ရွယ်ချက်ဖြင့် ယမန်နှစ်က ကုလနှင့် တူရကီတို့က ကမကထပြု၍ အကောင်အထည် ဖော်ခဲ့ခြင်းပင်ဖြစ်သည်။

ထို့နောက် ယူကရိန်းဆိပ်ကမ်းများကို ရုရှားက တစ်ဖတ်သက် ပိတ်ဆို့လာသည့်အခါ ယူကရိန်းသင်္ဘောများကို တူရကီတွင် အစစ်ဆေးခံပြီး ပင်လယ်နက်ကို ဖြတ်သန်းခွင့် ပြုထားသည်။ 

Source: ရိုက်တာ

CNI International News

ဘန်ကောက်၊ ဇူလိုင် ၁၈

ထိုင်းလစ်ဘရယ်ခေါင်းဆောင် ဆရီပီဆတ် တမီယာဗတ် (Sereepisuth Temeeyaves)အား ချတ်ထိုင်းပတ္တနား ပါတီ (Chart Thai Pattana)ကို ဆက်သွယ်၍ မိမိတို့ ပါတီခေါင်းဆောင် ပီတာလင်ဂျာရိုရတ်ကို နောက်တက်မည့် ဝန်ကြီးချုပ်အဖြစ် မဲပေးရန် စည်းရုံးပေးဖို့ Move Forward (MFP)ပါတီက တောင်းဆိုခဲ့သည်။ 

ချတ်ထိုင်းပတ္တနားပါတီကို ညွန့််ပေါင်းအစိုးရထဲတွင် တစ်နေရာ ပါဝင်ဖို့လည်း Move Forward ပါတီက ကမ်းလှမ်း ခဲ့သည်ဟု ချတ်ထိုင်းပတ္တနားပါတီ ခေါင်းဆောင် ဗာရာဝတ် ဆီပါအာချာ (Varawut Silpa-archa)က ဇူလိုင် ၁၇ ရက်နေ့တွင် ပြောကြားခဲ့သည်။ 

MFP ပါတီက မိမိကို ၎င်းတို့ကိုယ်စား ပြောပေးရန် ဆက်သွယ်လာခဲ့ကြောင်း၊ ဗာရာဝတ်က မဲအပြောင်းအလဲကို သူတစ်ယောက်တည်း ဆုံးဖြတ်၍ မရကြောင်း၊ ပါတီခေါင်းဆောင်ပိုင်းနှင့် တိုင်ပင်ပြီး ဖုန်းပြန်ခေါ်မည်ဟု ပြန်ကြား ခဲ့ကြောင်း ဆရီပီဆတ်က ပြောသည်။

ပထမအကြိမ် ပူးတွဲလွှတ်တော်တွင် မဲပေးရာတွင် MFP ပါတီ၏ ဘုရင်အားစော်ကားမှုကို တားမြစ်သည့်ဥပဒေကို ပြင်ဆင်မည့် ရပ်တည်ချက်အား ဆန့်ကျင်သောကြောင့် အမတ် ၁၀ နေရာရသည့် ဗာရာဝတ်ပါတီက ပီတာကို ဝန်ကြီးချုပ်လောင်းအဖြစ် မထောက်ခံခဲ့ပေ။ 

ထိုင်းလစ်ဘရယ်ခေါင်းဆောင် ဆရီပီဆတ် တမီယာဗတ် ကိုတွေ့ရစဉ်

ပြင်ဆင်ချက်အပေါ် ပါတီ၏ ရပ်တည်ချက်မှာ မပြောင်းလဲသော်လည်း ပီတာ၏ အစိုးရထဲ ပါဝင်ရန် ဖိတ်ခေါ်သည် ဆိုလျှင်မူ စဉ်းစားမည့်သဘော ဖြေကြားခဲ့သည်ဟု ဗာရာဝတ်က ပြောသည်။ 

ဇူလိုင် ၁၉ ရက်နေ့တွင် ပူးတွဲလွှတ်တော် နောက်တစ်ကြိမ် ပြန်ခေါ်မည်ဖြစ်ပြီး ပီတာအား နောက်တစ်ကြိမ် အဆို ပြုမှုကို ပြန်လည် မဲခွဲကြမည်ဖြစ်သည်။ 

ထိုင်းမီဒီယာတချို့တွင်မူ ပီတာ အပါအဝင် MFP ပါတီ၏ အဓိက အဖွဲ့ဝင်များက ပီတာ(Pita Limjaroenrat)ကို နောက်တက်မည့် ဝန်ကြီးချုပ်အဖြစ် ထောက်ခံရေး လက်ရှိအစိုးရအဖွဲ့ဝင်များကိုရော၊ အထက်လွှတ်တော် အမတ်များကိုပါ ဆက်သွယ်ခဲ့သည်ဟု ဖော်ပြခဲ့ကြသည်။ 

ပီတာနှင့် ပူးပေါင်းရေးကို MFP ပါတီ၏ အထွေထွေအတွင်းရေးမှူးချုပ် ချိုင်သာဝပ်တူလသွန်က ဦးဆောင် လှုပ်ရှား နေသည်။

ချတ်ထိုင်းပတ္တနားပါတီ ခေါင်းဆောင် ဗာရာဝတ် ဆီပါအာချာကို တွေ့ရစဉ်

ထို့နောက် ဇူလိုင် ၁၃ ရက် မဲပေးစဉ်တုန်းက ဆန့်ကျင်မဲ ပေးခဲ့သည့် (သို့မဟုတ်) မဲမပေးဘဲ နေခဲ့သည့် အထက် လွှတ်တော် အမတ်များကိုပါ ဖုန်းခေါ်၍ စည်းရုံးရေး ဆင်းခဲ့သည်။ 

ပီတာ၏ ပထမဆုံးအကြိမ် ကြိုးစားမှုမှာ လုံလောက်သည့် ထောက်ခံမဲ မရ၍ အရေးနိမ့်သွားခဲ့သည်။ 

အောက်အမတ် ၅၀၀ နှင့် အထက်အမတ် ၂၅၀ တို့၏ ပူးတွဲလွှတ်တော်တွင် ပီတာသည် လိုအပ်သည့် ထောက်ခံမဲ ၃၇၆ မဲတွင် ၃၂၄ မဲသာ ရခဲ့သည်။ 

တက်ရောက် လာကြသည့် အမတ်များအနက် ၁၈၂ ယောက်က ဆန့်ကျင်မဲပေးခဲ့ပြီး ၁၉၉ ယောက်က မဲမပေးဘဲ နေခဲ့သည်။ 

Source: Thai PBS 

CNI International News

ဆိုးလ်၊ ဇူလိုင် ၁၇

ပြုံယမ်းက တိုက်ချင်းပစ် ပဲ့ထိန်းဒုံးကျည် (ICBM) စမ်းသပ်ပစ်လွှတ်ပြီး ရက်ပိုင်းအကြာတွင် မြောက်ကိုရီးယား၏ နျူကလီးယားနှင့် ဒုံးကျည်အန္တရာယ်ကို တန်ပြန်ရန်အတွက် ဂျပန်၊ တောင်ကိုရီးယားနှင့် အမေရိကန်တို့က ရေတပ် ဒုံးကျည်ကာကွယ်ရေး ပူးတွဲစစ်ရေး လေ့ကျင့်ခဲ့ကြသည်ဟု အယ်ဂျာဇီးလ်ယား သတင်းမှ ဖော်ပြခဲ့သည်။ 

ဇူလိုင် ၁၆ ရက်နေ့က စစ်ရေးလေ့ကျင့်မှုကို တောင်ကိုရီးယားနှင့် ဂျပန်ကြား နိုင်ငံတကာရေပြင်တွင် ပြုလုပ်ခဲ့ကြ ကြောင်း၊ သုံးနိုင်ငံမှ အဲဂျစ်(Aegis)ရေဒါစနစ်များ တပ်ဆင်ထားသည့် ဖျက်သင်္ဘောများလည်း ပါဝင်ခဲ့ကြောင်း  တောင်ကိုရီးယားရေတပ်က ပြောသည်။

ကွန်ပျူတာဖြင့် ပုံဖော်ထားသည့် ပဲ့ထိန်းဒုံးကျည် ပစ်မှတ်ကို ခြေရာခံထောက်လှမ်း၍ သတင်းအချက်အလက် မျှဝေသည့် လုပ်ငန်းစဉ်ကို အဓိကထား လေ့ကျင့်ခဲ့ကြသည်ဟု ရေတပ်အရာရှိ တစ်ယောက်က ပြောသည်။ 

 မြောက်ကိုရီးယား ဒုံးကျည်ပစ်လွှတ်နေစဉ်

ဇူလိုင် ၁၂ ရက်နေ့တွင် မြောက်ကိုရီးယားက ၎င်း၏ အရှေ့ဖက် ကမ်းရိုးတန်း ကမ်းလွန်မှ လတ်တလော အကျဆုံး စမ်းသပ်မှုဖြစ်သည့် ဟွာဆောင်း-၁၈ (Hwasong-18)ဒုံးကျည်ကို ပစ်လွှတ်ခဲ့ရာ ထိုဒုံးကျည်မှာ မြောက်ကိုရီးယား၏ နျူကလီးယား တိုက်ခိုက်ရေး အင်အားစု၏ အသက်သွေးကြောသဖွယ် အရေးပါလှသလို ရန်သူများကို လက်တွေ့ ကျကျ သတိပေးလိုက်ခြင်းလည်း ဖြစ်သည်။ 

မကြာသေးမီရက်များက မြောက်ကိုရီးယားက ၎င်း၏ အထူးစီးပွားရေးဇုန် ရေပြင်ပေါ်တွင် အမေရိကန် ထောက် လှမ်းရေး လေယာဉ်များ ပျံဝဲနေခဲ့သည်ဟု စွပ်စွဲလိုက်သည့်အပြင် အမေရိကန် နျူစွမ်းအင်သုံး ဒုံးကျည်တင် ရေငုပ် သင်္ဘော တောင်ကိုရီးယားသို့ ဆိုက်ကပ်သည်ကိုလည်း ပြစ်တင်ရှုတ်ချ၍ တုန့်ပြန်မည်ဟု ကြုံးဝါးခဲ့သည်။

ထို့နောက် မကြာမီတွင် တိုက်ချင်းပစ် ပဲ့ထိန်းဒုံးကျည်ကို စမ်းသပ် ပစ်လွှတ်လာခဲ့ခြင်းပင် ဖြစ်သည်။ 

အမေရိကန်၊ တောင်ကိုရီးယား၊ ဂျပန် ဆွေးနွေးပွဲကိုတွေ့ရစဉ်

ဆိုးလ်၊ တိုကျိုနှင့် ဝါရှင်တန်တို့က မြောက်ကိုရီးယား၏ ပဲ့ထိန်းဒုံးကျည် စမ်းသပ်မှုကို ဆန့်ကျင်ရှုတ်ချခဲ့ကြပြီး ယင်းမှာ ကုလလုံခြုံရေးကောင်စီ ဆုံးဖြတ်ချက်ကို ပြောင်ပြောင်တင်းတင်း ချိုးဖောက်ခြင်း ဖြစ်သည့်အပြင် ကိုရီးယားကျွန်းဆွယ် ငြိမ်းချမ်းတည်ငြိမ်ရေးအတွက်လည်း အန္တရာယ်ပင်ဖြစ်သည်ဟု ပြောကြားခဲ့ကြသည်။ 

Source: အယ်ဂျာဇီးလ်ယား

CNI International News

ဘေဂျင်း၊ ဇူလိုင် ၁၇

မဟာဗျူဟာကျသည့် ရေလမ်းကြောင်းများ လုံခြုံရေးကို ကာကွယ်ရန် ရည်ရွယ်သည့် စစ်ရေးလေ့ကျင့်မှု တစ်ခု အနေဖြင့် ဂျပန်ပင်လယ်တွင် ရုရှား ရေတပ်၊ လေတပ်များနှင့် ပူးပေါင်းရန် တရုတ်ရေတပ်သင်္ဘောစုမှာ ဇူလိုင် ၁၆ ရက်နေ့က ထွက်ခွာသွားခဲ့သည်ဟု ရိုက်တာမှ ဖော်ပြခဲ့သည်။ 

နာမည်ဝှက် Northern/Interaction-2023 ဟု ပေးထားသည့် ထိုစစ်ရေး လေ့ကျင့်မှုမှာ မော်စကိုက ယူကရိန်းကို ကျူးကျော်ပြီးနောက်ပိုင်းတွင် တရုတ်နှင့် ရုရှားကြား စစ်ရေးပူးပေါင်းဆောင်ရွက်မှု တိုးမြှင့်လာသည့် လက္ခဏာပင် ဖြစ်သည်။

ထို့နောက် စစ်ဖက်ဆက်ဆံရေးများ ပြန်စရန် အမေရိကန်၏ ကမ်းလှမ်းမှုကို ဘေဂျင်းက ငြင်းဆန်နေသည့် အတောအတွင်းတွင် ရုရှားနှင့်ပူးတွဲ စစ်ရေးလေ့ကျင့်ရန် ဖြစ်တည်လာခြင်း ဖြစ်သည်။ 

ရုရှား-တရုတ် စစ်ဘက် ခေါင်းဆောင် နှစ်ဦးကိုတွေ့ရစဉ်

စစ်သင်္ဘော ၅ စင်းနှင့် ရဟတ်ယာဉ် ၄ စင်း တင်ဆောင်လာသော သင်္ဘောပါဝင်သည့် တရုတ်ရေတပ် သင်္ဘောစုမှာ အရှေ့ပိုင်း ကျင်းတောင်းဆိပ်ကမ်းမှ ထွက်ခွာလာပြီး သတ်မှတ်ထားသည့် နေရာတွင် ရုရှားတပ်ဖွဲ့များနှင့် တွေ့ဆုံ ပူးပေါင်းမည်ဟု တရုတ်ကာကွယ်ရေးဝန်ကြီးဌာနက ဇူလိုင် ၁၆ ရက်တွင် တရားဝင်ထုတ်ပြန်ခဲ့သည်။

ဇူလိုင် ၁၅ ရက်နေ့ ကတည်းကပင် ဂျပန်ပင်လယ်တွင် ပြုလုပ်မည့် စစ်ရေးလေ့ကျင့်မှု၌ ရုရှားရေတပ်နှင့် လေတပ် များ ပါဝင်လိမ့်မည်ဟု တရုတ်ကာကွယ်ရေးဝန်ကြီးဌာနက ပြောသည်။ 

Global Times သတင်းစာက စစ်ရေးလေ့လာသူများကို ကိုးကားဖော်ပြချက်အရ ရုရှား ရေတပ်နှင့် လေတပ် နှစ်ခု စလုံး ပါဝင်လာသည့် ပထမဆုံး စစ်ရေးလေ့ကျင့်မှု ဖြစ်လာလိမ့်မည်ဟု ဆိုသည်။ 

ရုရှား-တရုတ် စစ်သားများကိုတွေ့ရစဉ်

ဂျပန်ပင်လယ် စစ်ရေးလေ့ကျင့်မှုတွင် ပါဝင်သည့် ရုရှားစစ်သင်္ဘော ၂ စင်းမှာ ယခုလ အစောပိုင်းကလည်း ရှန်ဟိုင်း ၌ တရုတ်ရေတပ်နှင့် ဆက်သွယ်ရေး၊ ကယ်ဆယ်ရေး စသည့် သီးခြား လေ့ကျင့်မှုများ ပြုလုပ်ခဲ့သေးသည်။ 

စီးပွားရေးမြို့တော် ရှန်ဟိုင်းသို့ မဆိုက်ကပ်မီ အဆိုပါ သင်္ဘောများမှာ ထိုင်ဝမ်နှင့် ဂျပန်ကို ဖြတ်သန်းသွားရာ တိုင်ပေနှင့် တိုကျိုက စောင့်ကြည့် နေခဲ့ကြရသည်။ 

ရုရှားက ယူကရိန်းကို မကျူးကျော်မီ ရက်ပိုင်းအလိုတွင် ရုရှားသမ္မတပူတင်နှင့် တရုတ်သမ္မတ ရှီကျင့်ဖျင်တို့က အကန့်အသတ်မရှိသည့် မိတ်ဖက်များအဖြစ် ကြေညာခဲ့သည်။

ထိုကြေညာချက်က အမေရိကန်၏ သြဇာကို တွန်းလှန်ရန် ရည်ရွယ်သည်။ 

CNI International News

ဘန်ကောက်၊ ဇူလိုင် ၁၇

Move Forward ပါတီခေါင်းဆောင် ပီတာလင်ဂျာရိုရတ်(Pita Limjaroenrat)အနေဖြင့် ဝန်ကြီးချုပ်ရွေးချယ်ခံခြင်းကို ဒုတိယအကြိမ် အရွေးမခံရပါက တိုင်းပြည် ဆုံးရှုံးနစ်နာမှုများ မရှိစေရေး စွန့်လွှတ်ရနိုင်သည်ဟု ဖြူးထိုင်းပါတီ ဒုခေါင်းဆောင် ဖန်သန် ဝီချာယာချိုင်း (Phumtham Wechayachai)က ပြောသည်။

ဇူလိုင် ၁၉ ရက်နေ့တွင် ဝန်ကြီးချုပ်ရွေးချယ်မည့် ဒုတိယအကြိမ် အောက်နှင့်အထက် ပူးတွဲလွှတ်တော်မှာ ဝန်ကြီး ချုပ်အဖြစ် အရွေးခံရရေး Move Forward(MFP)ပါတီခေါင်းဆောင် ပီတာလင်ဂျာရိုရတ်၏ နောက်ဆုံး ကြိုးစားမှု ဖြစ်သင့်သည်ဟု ဖြူးထိုင်းပါတီ ဒုခေါင်းဆောင် ဖန်သန်က ပြောကြောင်း Thai PBS သတင်းမှ ဖော်ပြခဲ့သည်။  

ပီတာနှင့် MFP ပါတီအနေဖြင့် တိုင်းပြည် ရှေ့ဆက်ပြီး စီးပွားရေးလည်း ပြန်မတ်လာအောင် စွန့်လွှတ်မှု လုပ်ရနိုင် ကြောင်း၊ ထိုင်းနိုင်ငံအနေဖြင့် အချိန်အကြာကြီး  အစိုးရမရှိဘဲ မနေနိုင်သလို ပရာယွတ်ချန်အိုချာ၏ အိမ်စောင့်   အစိုးရကို နောက်နှစ်အထိ ဆက်နေရန် ခွင့်ပြုရတော့မလို ဖြစ်သွားနိုင်ကြောင်း ဖန်သန်က ပြောသည်။ 

 Move Forward ပါတီခေါင်းဆောင် ပီတာကိုတွေ့ရစဉ်

MFP ပါတီ၏ ဖွဲ့စည်းပုံဥပဒေပါ အပိုဒ် ၂၇၂ ကို ပြင်ဆင်ရန် အစီအစဉ်နှင့် အထက်လွှတ်တော် အမတ်များကို ဝန်ကြီးချုပ် ရွေးချယ်ပိုင်ခွင့် လျှော့ချပစ်မည့် အစီအစဉ်များမှာ ညွန့််ပေါင်း(၈)ပါတီက လက်မှတ်ထိုးထားသည့် နားလည်မှု စာချွန်လွှာထဲတွင် မပါဝင်ကြောင်း ဖန်သန်က Suthihai Yoon နှင့် အင်တာဗျူးတွင် ပြောကြားခဲ့သည်။ 

ထို့နောက် MFP ပါတီ၏ ဖွဲ့စည်းပုံပြင်ဆင်ရေး ကြိုးပမ်းမှုမှာ မဖြစ်နိုင်သလောက် နီးပါးပင်ဖြစ်သည်ဟု ဖန်သန်က သုံးသပ်ပြသည်။

အပိုဒ် ၂၇၂ ကို ပြင်ဆင်ဖို့ အထက်လွှတ်တော် အမတ်များ၏ ထောက်ခံမဲ ၈၆ မဲအထိ လိုအပ်ကြောင်း၊ လက်ရှိတွင် ပါတီမှာ ပီတာကို ဝန်ကြီးချုပ်အဖြစ် သဘောတူဖို့ အထက်လွှတ်တော်မှ ထောက်ခံမဲ ၆၄ မဲကိုမျှ မရနိုင်ဖြစ်နေ သည်ဟု ၎င်းက ထောက်ပြသည်။ 

ပီတာ ဝန်ကြီးချုပ်အဖြစ် အရွေးမခံရမချင်း ပါတီက ဆက်လက် တိုက်ပွဲဝင်သွားမည်ဆိုသည့် ပီတာ၏ ပြောဆိုချက် နှင့် ပတ်သက်၍လည်း ဖန်သန်က သူတို့မှာ နိုင်စရာအကြောင်း မရှိဘူးဆိုတာ သဘောပေါက်လာဖို့ ဘယ်လောက် ကြာဦးမှာလဲဟု မေးခွန်းထုတ်လိုက်သည်။ 

၈ ပါတီညွန်ပေါင်းကိုတွေ့ရစဉ်

 “နောက်နှစ်အထိ မဲပေးပြီးရင်း မဲပေးနေရတော့မှာလား။ အထက်လွှတ်တော် အမတ်တွေရဲ့ ဝန်ကြီးချုပ် ရွေးချယ် ပိုင်ခွင့်တောင် သက်တမ်းကုန်သွားလိမ့်မယ်။ ကျနော်တို့ အဲဒီလောက် အကြာကြီး မစောင့်နိုင်ဘူး။ နိုင်ငံနဲ့ ပြည်သူ တွေရဲ့ အကျိုးကိုပဲ ဦးစားပေးရမယ်”ဟု ဖြူးထိုင်းပါတီ ဒုခေါင်းဆောင် ဖန်သန်က ပြောသည်။
 
ဇူလိုင် ၁၉ ရက်နေ့ ဒုတိယအကြိမ် မဲပေးမှုနှင့် ပတ်သက်၍လည်း MFP ပါတီအနေဖြင့် နောက်ထပ် အမတ် ဘယ်လောက်များများကို ပီတာအား မဲပေးဖို့ ဆွဲဆောင်နိုင်မည်လဲ မသိရသော်လည်း ဘုရင်အား စော်ကားမှုကို တားမြစ်သည့် ဥပဒေအပေါ် အထက်လွှတ်တော် အမတ်များ၏ ရပ်တည်ချက်မှာ သိသာထင်ရှားနေပါသည်ဟု  ဖန်သန်က ပြောသည်။ 

ထိုအခြေအနေတွင် ဖြူးထိုင်းပါတီအနေဖြင့် ပီတာကို ဝန်ကြီးချုပ်လောင်းအဖြစ် ထောက်ခံဆဲ ဖြစ်သော်လည်း ဒုတိယအကြိမ်မှာလည်း ပထမအကြိမ်လိုပဲ ရလဒ်ထွက်လာခဲ့ရင်တော့ ခက်ခဲသည်ဆိုသော အမှန်တရားကို လက်ခံရမည်ဟု ၎င်းက ထပ်လောင်း ပြောကြားခဲ့သည်။

Source: The PBS