CNI News

၂၀၂၂ ခုနှစ်၊ မတ်လ ၂၉

NCA ထိုးထားသည့် တိုင်းရင်းသားလက်နက်ကိုင်(၁၀)ဖွဲ့၏ စတုတ္ထအကြိမ် ဒုတိယပိုင်း ထိပ်သီး ညီလာခံကို ယနေ့ (မတ်လ ၂၉ ရက်)တွင် ကျင်းပခဲ့ပြီး ကရင်အမျိုးသားအစည်းအရုံး(KNU)ဥက္ကဋ္ဌ ဗိုလ်ချုပ်ကြီး စောမူတူးစေးဖိုး တက်ရောက်ခဲ့သည်။

အဆိုပါ ထိပ်သီး ညီလာခံကို ထိုင်းနိုင်ငံ၊ ချင်းမိုင်မြို့တွင် မတ်လ ၂၉ ရက်မှ ဧပြီလ ၂ ရက်အထိ ကျင်းပသွားမည် ဖြစ် ကြောင်း NCA-S EAO က ထုတ်ပြန်ခဲ့သည်။

ထိုထိပ်သီး ညီလာခံသို့ KNU ဥက္ကဋ္ဌ ဗိုလ်ချုပ်ကြီးစောမူတူးစေးဖိုး၊ မွန်ပြည်သစ်ပါတီ(NMSP)ဥက္ကဋ္ဌ နိုင်ဟံသာ၊ ရှမ်းပြည် ပြန် လည်ထူထောင်ရေးကောင်စီ(RCSS)ဥက္ကဋ္ဌ ဗိုလ်ချုပ်ကြီး ယွက်စစ်တို့က ဦးဆောင် သဘာပတိများအဖြစ် တာဝန်ယူခဲ့ ကြသည်။

အပစ်ရပ်အဖွဲ့များ ၂၀၂၂ ခုနှစ်၊ မတ်လ ၂၉ ရက်က ထိပ်သီး ညီလာခံ ကျင်းပနေစဉ်

အလားတူ မြန်မာနိုင်ငံဆိုင်ရာ သံအမတ်များဖြစ်ကြသည့် ကနေဒါနိုင်ငံသံအမတ်ကြီး Mr.Francois Lafreniere၊ ဖင်လန်နိုင်ငံ သံအမတ်ကြီး Mr. Pekka Shemeikka၊ နော်ဝေနိုင်ငံသံအမတ်ကြီး Ms. Hilde Solbakken အပါအဝင် သြစတြေးလျနိုင်ငံမှ သံတမန်ဖြစ်သူ Mr. Bryan Bong ၊ အီတလီနိုင်ငံမှ Deputy Head of Mission ဖြစ်သူ Mr. Andrea Ferrara ၊ ဆွစ်ဇာလန် နိုင်ငံမှ လူသားလုံခြုံရေးဆိုင်ရာ အကြံပေးပုဂ္ဂိုလ် Mr. Thomas Meier Nidecker၊ USAID မှ ယာယီဌာနေ ကိုယ်စားလှယ် ဖြစ်သူ Ms. Pamela Fessenden တို့လည်း တက်ရောက်ခဲ့ကြသည်။

CNI News

၂၀၂၂ ခုနှစ်၊ မတ်လ ၂၉

ချင်းပြည်နယ်အတွင်းသို့ တက္ကသိုလ်ဝင်စာမေးပွဲ မေးခွန်းလွှာ၊ အဖြေလွှာများနှင့် ဌာနဆိုင်ရာ ဝန်ထမ်းများအား သွားရောက် ပို့ဆောင်သည့် တပ်မတော် ရဟတ်ယာဉ်တစ်စီး ဟားခါးမြို့ ရဟတ်ယာဉ်ကွင်းအနီး ပျက်ကျခဲ့ကြောင်း သိရသည်။

ချင်းပြည်နယ်အတွင်း တက္ကသိုလ်ဝင်စာမေးပွဲ မေးခွန်းလွှာ၊ အဖြေလွှာများနှင့် ဌာနဆိုင်ရာ ဝန်ထမ်းများအား သွားရောက် ပို့ဆောင်သည့် တပ်မတော်ရဟတ်ယာဉ်သည် ယနေ့ (မတ်လ ၂၉ ရက်) နံနက် ၉ နာရီခန့်က ဟားခါးမြို့ရှိ နယ်မြေခံ တပ်ရင်း ရဟတ်ယာဉ်ကွင်း၌ ဆင်းသက်စဉ် လေထုမငြိမ်မသက် ဖြစ်ပေါ်ခဲ့မှုကြောင့် ရဟတ်ယာဉ်ကွင်းအနီး ပေ ၅၀ ခန့် အကွာနေရာ သို့ အမြင့်မီတာ ၂၀ ခန့်မှ မတော်တဆ ပြုတ်ကျမှု ဖြစ်စဉ် ဖြစ်ပွားခဲ့သည်ဟု နစက-က ထုတ်ပြန်ခဲ့သည်။

ထိုဖြစ်စဉ်ကြောင့် မေးခွန်းလွှာ၊ အဖြေလွှာများ ထိခိုက်ပျက်စီးမှု မရှိဘဲ သက်ဆိုင်ရာ စာစစ်ဌာနအသီးသီးသို့ အချိန်မီ ရောက်ရှိနိုင်ရေး ဆောင်ရွက်လျက်ရှိကြောင်း၊ ရဟတ်ယာဉ်ပေါ်တွင် လိုက်ပါလာသည့် အရပ်ဘက် ဝန်ထမ်း ၃ ဦး၊ လုံခြုံ ရေး တပ်ဖွဲ့ဝင် ၂ ဦးတို့ မစိုးရိမ်ရ ဒဏ်ရာများ ရရှိခဲ့ကြောင်း၊ လက်ရှိတွင် နယ်မြေခံ ပြည်သူ့ဆေးရုံသို့ ပို့ဆောင် ဆေးကုသမှု ခံယူနေကြောင်း နစက-က ထုတ်ပြန်ခဲ့သည်။

CNI News

၂၀၂၂ ခုနှစ်၊ မတ်လ ၂၉

စစ်ကိုင်းတိုင်းဒေသကြီး၊ ဖောင်းပြင်မြို့နယ်တွင် ရှမ်းနီအမျိုးသားများတပ်မတော် (SNA) နှင့် ဒေသကာကွယ်ရေးတပ် (PDF) တို့ တိုက်ပွဲဖြစ်ပွားခဲ့ခြင်း မရှိဘူးဟု SNA မှ ပြောရေးဆိုခွင့်ရှိသူ ဒုဗိုလ်မှူးကြီး စိုင်းအောင်မိန်းက CNI သတင်းဌာနသို့ ပြောသည်။

ပြီးခဲ့သည့် မတ်လ ၂၆ ရက်က ဖောင်းပြင်မြို့နယ်တွင် SNA နှင့် PDF တို့ တိုက်ပွဲဖြစ်ပွားခဲ့ကြောင်း၊ ထိခိုက်ကျဆုံးမှုများ ရှိကြောင်း သတင်းဌာနတစ်ခုတွင် ဖော်ပြထားသည်။

ဒုဗိုလ်မှူးကြီး စိုင်းအောင်မိန်းက “ဟုတ်ကဲ့ ကျနော်တို့နဲ့ ဘာမှ မဖြစ်ပါဘူးဗျာ၊ ကောလာဟလတွေ ထွက်နေတာပါ အဲတာ၊ မရှိပါဘူး၊ မရှိပါဘူးခင်ဗျ၊ ကျနော်တို့နဲ့ ပြဿနာတက်တာ ဘာမှ မရှိပါဘူးခင်ဗျ၊ ဟို စစ်ကောင်စီနဲ့ PDF နဲ့ ဖြစ်တာ ဖြစ်ပါ လိမ့်မယ်၊ ကျနော်တို့နဲ့ ဖြစ်တာ ဘာမှမရှိပါဘူးခင်ဗျ” ဟု ပြောသည်။

လူမှုကွန်ရက်စာမျက်နှာများတွင် SNA နှင့် PDF တိုက်ပွဲဖြစ်ပွားသည်ဟု ပျံ့နှံ့နေသည်မှာ ကောလာဟလများသာဖြစ်ကြောင်း၊ နိုင်ငံရေး ရှုပ်ထွေးနေသည့် ကာလတွင် ယခုကဲ့သို့ သတင်းမှားဖြန့်နေခြင်းမှာ တစ်ဖက် အဖွဲ့အစည်းအား ရည်ရွယ်၍ လုပ်ခြင်း လားဆိုသည်မှ မသိရှိနိုင်ကြောင်း ၎င်းက ပြောသည်။

ပင်လည်ဘူးက PDF များ

မတ်လ ၂၆ ရက်နေ့က ဖောင်းပြင်၌ CDM ဆရာမ တစ်ဦး၏ နေအိမ်တွင် PDF များ ရောက်ရှိနေသည့်အတွက် တပ်မတော်မှ အင်အား အလုံးအရင်းဖြင့် ဝင်ရောက်ဖမ်းဆီးစဉ် ပစ်ခတ်မှု ဖြစ်ပွားခဲ့ခြင်းဖြစ်ကြောင်း ဒေသခံတစ်ဦးဖြစ်သူ စိုင်းအောင် (အမည်လွှဲ) က CNI သတင်းဌာနသို့ ပြောသည်။

၎င်းက “CDM လုပ်တဲ့ ကျောင်းဆရာ/ ဆရာမ အိမ်မှာ PDF တွေက လာတည်းထားတယ်လို့ ပြောတယ်၊ အဲတာကို စစ်တပ်က သတင်းရပြီး ဝင်စီးတာတဲ့ အဲလိုမျိုး၊ အဲမှာ အဲကျောင်း ဆရာ/ ဆရာမလည်း အဖမ်းခံရတယ်လို့ ပြောတာပဲ၊ PDF တွေက ထွက်ပြေးသွားတယ်တဲ့၊ ၂ ယောက်တော့ သေသွားတယ်လို့ ပြောတယ်” ဟု ပြောသည်။

ဖောင်းပြင်ရဲစခန်း

ဖောင်းပြင်မြို့နယ်အတွင်း SNA လှုပ်ရှားမှုရှိသော်လည်း PDF များနှင့် တိုက်ပွဲ ဖြစ်ပွားခြင်း မရှိကြောင်း၊ တပ်မတော်နှင့် PDF တို့ ထိတွေ့မှုများရှိကြောင်း ဒေသခံများက ပြောသည်။

ပြီးခဲ့သည့် ဇန်နဝါရီ ၂၂ ရက်က ဖောင်းပြင်မြို့နယ်အတွင်းရှိ ရဲကင်းစခန်း နှစ်ခုကို PDF များ ဝင်ရောက်တိုက်ခိုက်ခဲ့ပြီး လက်နက်များနှင့်အတူ ရဲတပ်ဖွဲ့ဝင်တချို့ကို ဖမ်းဆီးသွားခဲ့ကြောင်း နစကမှ ထုတ်ပြန်ခဲ့သေးသည်။

ရှမ်းနီအမျိုးသားများတပ်မတော်(SNA)သည် စစ်ကိုင်းတိုင်းဒေသကြီးအထက်ပိုင်း ဟုမ္မလင်းမြို့နယ်၊ ခန္တီးမြို့နယ်၊ ပင်လယ်ဘူး-ဖောင်းပြင်ဒေသအပြင် အိန္ဒိယနယ်စပ်တစ်လျှောက်နှင့် ကချင်ပြည်နယ်တို့တွင် လှုပ်ရှားနေသည့် တိုင်းရင်းသား လက်နက် ကိုင်အဖွဲ့ ဖြစ်သည်။

CNI News

၂၀၂၂ ခုနှစ်၊ မတ်လ ၂၉

အပစ်ရပ် လက်မှတ်ရေးထိုးထားသည့် တိုင်းရင်းသား လက်နက်ကိုင်အဖွဲ့များနှင့် ဒုတိယဗိုလ်ချုပ်ကြီးရာပြည့် ဦးဆောင်သည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)တို့ တွေ့ဆုံမှုတွင် နစကဘက်က ရပ်တန့်နေသည့် နိုင်ငံရေးဆွေးနွေးပွဲများ ပြန်လည်စတင်လိုသည့် သဘောထားများ ပြောကြားခဲ့ကြောင်း ပါဝင်သူများထံမှ သိ ရသည်။

NSPNC နှင့် NCA ထိုးထားသည့် လက်နက်ကိုင် ၅ ဖွဲ့ တွေ့ဆုံမှုကို မတ်လ ၂၈ ရက်က နေပြည်တော်မှာ ကျင်းပခဲ့သည်။

အဆိုပါ တွေ့ဆုံမှုတွင် နိုင်ငံရေးဆွေးနွေးပွဲများ ရပ်တန့်နေသည့် အခြေအနေကို ပြန်လည်စတင်လိုကြောင်းနှင့် ချမှတ်ထား သည့် လမ်းစဉ်အတိုင်း ငြိမ်းချမ်းရေးကို ဆက်လက် ဆွေးနွေးသွားရန် နစက-က ဆွေးနွေးခဲ့ကြောင်း ဆွေးနွေးပွဲတွင် ပါဝင်ခဲ့ သည့် ရခိုင်ပြည်လွတ်မြောက်ရေးပါတီ (ALP) တွဲဖက်အတွင်းရေးမှူး ခိုင်အောင်စိုးသန်းက CNI သတင်းဌာနသို့ ပြောသည်။

၎င်းက “ကျနော်တို့ နားလည်တာတော့ ကြီးကြီးကျယ်ကျယ်တော့ ဘာမှမပါဘူး၊ သူတို့ကတော့ PPST က အဲဒီ နိုင်ငံရေး ဆွေးနွေးပွဲ တွေ မလုပ်ဖို့အတွက်နဲ့ ပြောထားတယ်မလား၊ အဲဒါကို သူတို့က ဆက်ပြီးလုပ်ချင်တဲ့ သဘောပါပဲ”ဟု ပြောသည်။

ဆွေးနွေးပွဲတွင် NSPNC ဥက္ကဋ္ဌ ဒုတိယဗိုလ်ချုပ်ကြီးရာပြည့်က တိုင်းရင်းသား လက်နက်ကိုင်အဖွဲ့များကို ငြိမ်းချမ်းရေးဖိတ်ခေါ် မှု အခြေအနေ၊ ပဋိပက္ခများ လျှော့ချနိုင်ရေး၊ ယုံကြည်မှု တည်ဆောက်ရေး၊ နိုင်ငံရေး ဆွေးနွေးပွဲများ ကျင်းပနိုင်ရေး၊ နိုင်ငံ တော် တည်ငြိမ်အေးချမ်းရေး၊ ဒေသဖွံ့ဖြိုးရေး စသည့် အခြေအနေများကို ဆွေးနွေး ပြောကြားခဲ့သည်ဟု နစကမှ သတင်း ထုတ်ပြန်ခဲ့သည်။

ထို့နောက် နစက အနေဖြင့် ငြိမ်းချမ်းရေးဆွေးနွေးပွဲများ ပြန်လည်စတင်လိုကြောင်း၊ ရွေးကောက်ပွဲ ကျင်းပပေးမည်ဖြစ် ကြောင်း၊ ရွေးကောက်ပွဲအတွက် ဒေသတည်ငြိမ်ရေး လိုအပ်ကြောင်း ဒုတိယဗိုလ်ချုပ်ကြီးရာပြည့်က အပစ်ရပ်အဖွဲ့များကို ပြောကြားခဲ့သည်ဟု ခိုင်အောင်စိုးသန်းက ပြောသည်။

၂၀၂၂ ခုနှစ်၊ မတ်လ ၂၈ ရက် NSPNC နဲ့ NCA ထိုး ၅ ဖွဲ့ နေပြည်တော်မှာ တွေ့ဆုံနေစဉ်

၎င်းက “ဆွေးနွေးပွဲကတော့ ကျနော်အနေနဲ့ကတော့ ထူးထူးခြားခြား သိပ်မမြင်ပါဘူး၊ အဲဒီ ငြိမ်းချမ်းရေး ဆွေးနွေးပွဲတွေ သူတို့ က အကုန်လုံးစဖို့ နိုင်ငံတော်ကလည်း မူဝါဒချပေးထားတယ်၊ ပြီးတော့ သူတို့က ရွေးကောက်ပွဲကိုလည်း ကျင်းပပေးမယ်၊ သို့သော် ဒေသတည်ငြိမ်ဖို့လိုတယ်၊ အဲဒီလိုပဲ သူတို့ ပြောတာပေါ့” ဟု ပြောသည်။

ထို့နောက် တခြား တစ်ဖက်မှာတော့ အပစ်ရပ် တိုင်းရင်းသား လက်နက်ကိုင်အဖွဲ့များသည် ထိပ်သီး ညီလာခံတစ်ရပ်ကို မတ်လကုန်ပိုင်းတွင် ကျင်းပရန်ရှိသည်။

အဆိုပါ ညီလာခံတွင် အပစ်ရပ် လက်နက်ကိုင်အဖွဲ့များဖြင့် ဖွဲ့စည်းထားသည့် PPST ၏ စုဖွဲ့မှုပုံစံသစ်ကို ဆွေးနွေးသွားမည် ဖြစ်ကြောင်း၊ ညီလာခံအပြီးတွင် ရှေ့ဆက်သွားမည့် လုပ်ငန်းစဉ်များကို ချမှတ်သွားမည်ဖြစ်ကြောင်း PPST အဖွဲ့ဝင် ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောကြားထားသည်။

မတ်လ ၂၈ ရက်နေ့က NSPNC နှင့် အလွတ်သဘော တွေ့ဆုံမှုတွင် အပစ်ရပ် တိုင်းရင်းသား လက်နက်ကိုင်အဖွဲ့များဘက်မှ ရှမ်းပြည်ပြန်လည်ထူထောင်ရေးကောင်စီ (RCSS) ၊ ရခိုင်ပြည်လွတ်မြောက်ရေးပါတီ (ALP) ၊ ဒီမိုကရေစီအကျိုးပြု ကရင့်တပ်မတော် (DKBA) ၊ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေး ကောင်စီ (KNU/KNLA-PC) ၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) တို့ တက်ရောက်ခဲ့ကြောင်း နစက-က သတင်းထုတ်ပြန်ခဲ့သည်။

လက်ရှိတွင် အပစ်ရပ် လက်မှတ်ရေးထိုးထားသည့် တိုင်းရင်းသား လက်နက်ကိုင်အဖွဲ့များအနေနှင့် ၎င်းတို့၏ ထိပ်သီး ညီလာခံ တစ်ရပ်ကို ထိုင်းနိုင်ငံတွင် ယခုလ မတ်လကုန်တွင် ကျင်းပရန် စီစဉ်ထားပြီး အဆိုပါ ညီလာခံကို ငါးရက်ကြာ ကျင်းပသွားမည်ဖြစ်ကြောင်း သိရသည်။

CNI News

၂၀၂၂ ခုနှစ်၊ မတ်လ ၂၉

ရခိုင်ပြည်နယ်၊ စစ်တွေမြို့ရှိ နေအိမ်တစ်အိမ်ကို လက်နက်များ ကိုင်ဆောင်ထားသော လူတစ်စုက ဝင်ရောက် အနိုင်ကျင့် ရမ်းကားမှုမှာ ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော် (ULA/AA )နှင့် တစ်စုံတစ်ရာ ပတ်သက် ဆက်စပ်မှု မရှိကြောင်း ယနေ့ (မတ်လ ၂၉ ရက်)တွင် AA က ထုတ်ပြန်ခဲ့သည်။

ပြီးခဲ့သည့် မတ်လ ၂၆ ရက်က လူအင်အား ၃၀ ပါသည့် လူတစ်စုသည် တုတ်၊ ဓါးနှင့် သေနတ်များ ကိုင်ဆောင်၍ စစ်တွေမြို့ရှိ နေအိမ်တစ်အိမ်သို့ ဝင်ရောက်ပြီး အုပ်စုဖွဲ့ အနိုင်ကျင့်ခဲ့ကြောင်း၊ ထိုလူအုပ်စုသည် AA မှဖြစ်ကြောင်း ထုတ်ဖော်ပြောကြား၍ အနိုင်ကျင့်ခဲ့ကြောင်း သိရသည်။

ULA/AA က “အုပ်စုဖွဲ့ အနိုင်ကျင့် ရမ်းကားမှုမှာ မိမိတို့ ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော်နဲ့ တစ်စုံတစ်ရာ ပါဝင် ပတ်သက်မှုမရှိကြောင်း အများပြည်သူများ သိရှိစေရန် လေးစားစွာဖြင့် အသိပေး ရှင်းလင်းအပ်ပါသည်”ဟု ယနေ့ (မတ်လ ၂၉ ရက်) ထုတ်ပြန်ချက်တွင် ပြောထားသည်။

ထိုဖြစ်စဉ်နှင့်ပတ်သက်ပြီး တရားမျှတမှုကို လိုလားကြောင်း အနိုင်ကျင့်ခံရသူ မိသားစုဝင်များမှ တောင်းဆိုထားသည်။

လက်ရှိအချိန်ထိ လက်နက်များကိုင်ဆောင် အုပ်စုလိုက် အနိုင်ကျင့်ခဲ့သူများမှာ မည်သည့် အဖွဲ့အစည်းကဖြစ်ကြောင်း မသိရ သေးပေ။

CNI News

၂၀၂၂ ခုနှစ်၊ မတ်လ ၂၈

အမျိုးသားစည်းလုံးညီညွတ်ရေးနှင့်ငြိမ်းချမ်းရေး ဖော်ဆောင်မှုဆွေးနွေးရေးကော်မတီ(NSPNC) နှင့် NCA လက်မှတ်ထိုး ထား သည့် တိုင်းရင်းသား လက်နက်ကိုင်အဖွဲ့တချို့ ယနေ့(မတ်လ ၂၈ ရက်) နေပြည်တော်မှာ တွေ့ဆုံ ဆွေးနွေးခဲ့ကြ ကြောင်း သိရသည်။

အဆိုပါ တွေ့ဆုံမှုတွင် RCSS ဘက်မှ အတွင်းရေးမှူး(၁) ဗိုလ်မှူးကြီးစိုင်းငင်း တက်ရောက်ခဲ့ပြီး ရှမ်းပြည်နယ်အတွင်း လက်ရှိ ဖြစ်ပွားနေသည့် စစ်ရေးပဋိပက္ခနှင့် တိုက်ပွဲရှောင်များကို ကူညီပံ့ပိုးရေးနှင့်ပတ်သက်၍ NSPNC နှင့် RCSS သီးသန့် တွေ့ဆုံ ဆွေးနွေးပွဲမှာ ဆက်လက် ဆွေးနွေးသွားမှာဖြစ်ကြောင်း ထည့်သွင်း ဆွေးနွေးခဲ့သည်ဟု သိရသည်။

ဗိုလ်မှူးကြီး စိုင်းငင်းက “တပ်မတော်ကာကွယ်ရေးဦးစီးချုပ်ရဲ့ (၇၇)နှစ်မြောက် တပ်မတော်နေ့ မိန့်ခွန်းမှာ ၂၀၂၂ ခုနှစ် နှစ်ကုန် ပိုင်းအထိ တပ်မတော်အနေနဲ့ တစ်ဖတ်သတ် ပစ်ခတ်တိုက်ခိုက်မှုရပ်စဲထားတယ်။ ကြိုတင်ကန့်သတ်ချက် မထားတဲ့ ငြိမ်းချမ်း ရေး ဆွေးနွေးပွဲပြုလုပ်နိုင်ဖို့ ဖိတ်ခေါ် ကမ်းလှမ်းချက်တွေနဲ့အတူ NCA ပါ သဘောတူညီချက်များအတိုင်း ဖြစ်နိုင် သမျှ အလေး ထားလုပ်ဆောင်သွားမှာ ဖြစ်ကြောင်း စတဲ့ ပြောကြားချက်တွေဟာ ငြိမ်းချမ်းရေးလုပ်ငန်းစဉ်အတွက်ရော ဖက်ဒရယ် တည် ဆောက်ရေး လုပ်ငန်းစဉ်အတွက်ပါ အရေးကြီးတဲ့ အပြုသဘောဆောင် ဖြေလျှော့မှုတွေ ဖြစ်တယ်လို့ မြင်ပါတယ်”ဟု ပြော ကြားခဲ့သည်။

ဒုတိယဗိုလ်ချုပ်ကြီးရာပြည့်ကိုတွေ့ရစဉ်

NCA ကို ရှမ်းပြည်ပြန်လည်ထူထောင်ရေးကောင်စီ(RCSS)၊ ကရင်အမျိုးသားအစည်းအရုံး(KNU)၊ ဒီမိုကရေစီအကျိုးပြု ကရင်တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေး ကောင်စီ(KNU/KNLA-PC)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(ALP)၊ မွန်ပြည်သစ်ပါတီ(NMSP)၊ လားဟူဒီမိုကရက်တစ်အစည်းအရုံး(LDU)၊ ချင်းအမျိုးသားတပ်ဦး(CNF)၊ မြန်မာနိုင်ငံလုံးဆိုင် ရာကျောင်းသားများ ဒီမိုကရက်တစ်တပ်ဦး(ABSDF) တို့ လက်မှတ်ရေးထိုးထားသည်။

အဆိုပါ NCA ထိုး ၁၀ ဖွဲ့ထဲမှ ၆ ဖွဲ့ဝန်းကျင်နှင့် NSPNC တို့ ယနေ့(မတ်လ ၂၈ ရက်)တွင် နေပြည်တော်မှာ ငြိမ်းချမ်းရေး လုပ်ငန်းစဉ်များကို တွေ့ဆုံ ဆွေးနွေးခဲ့ကြသည်ဟု ငြိမ်းချမ်းရေး လုပ်ငန်းစဉ်နှင့်နီးစပ်သူများထံမှ သိရသည်။

CNI News

၂၀၂၂ ခုနှစ်၊ မတ်လ ၂၈

ရခိုင်ပြည်နယ်အတွင်းက တိုက်ပွဲရှောင်စခန်းများကို အစိုးရမှ ပုံမှန်ထောက်ပံ့နေသည့် ဆန်ရိက္ခာထောက်ပံ့မှုများ ရပ်ဆိုင်း ထားခြင်းမရှိဘဲ ပုံမှန်ထောက်ပံ့နေကြောင်း ရခိုင်ပြည်နယ် စီမံအုပ်ချုပ်ရေးကောင်စီ ပြောရေးဆိုခွင့်ရှိသူ ပြည်နယ်ဥပဒေချုပ် ဦးလှသိန်းက CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ တိုက်ပွဲရှောင် စခန်းများကို အစိုးရက ပုံမှန်ထောက်ပံ့မှုများ ရပ်ဆိုင်းထားကြောင်း ပြောဆိုမှုများ အပေါ် ၎င်းက အထက်ပါအတိုင်း ပြောကြားခြင်း ဖြစ်သည်။

ပြည်နယ်ဥပဒေချုပ် ဦးလှသိန်းက “ပုံမှန်ပေါ့ ရှိတာပေါ့၊ ဘေးစီမံကလည်း ထောက်ပံ့တယ်၊ WFP ကလည်း ထောက်ပံ့တယ်၊ ၂၆ ရက်နေ့ကပဲ အမ်းစစ်ဘေးရှောင်တွေ နေရပ်ပြန်မယ်ဆိုလို့ သီးခြားသုံးလစာ ထောက်ပံ့တာမျိုးလည်း ရှိသေးတယ်၊ ပုံမှန် ကတော့ ထောက်ပံ့ပါတယ်၊ ဒါကတော့ ဘယ်လိုပြောရမလဲ ဘေးစီမံက ပုံမှန် ဆန်ရိက္ခာ ထောက်ပံ့နေတာ အခုထိပေါ့၊ ဘတ်ဂျတ်လည်း မဖြတ်ဘူး၊ ဘတ်ဂျတ်ဖြတ်တာလည်း မရှိဘူး၊ ပုံမှန်ထောက်ပံ့တယ်” ဟု ပြောသည်။

ပြည်နယ်အစိုးရမှ ဆန်ရိက္ခာ ထောက်ပံ့နေသည်ဟု ပြောကြားသော်လည်း အစိုးရက ထောက်ပံ့သည့် ဆန်ရိက္ခာ ယခုလ မတ်လအတွက် မရရှိတော့ဟု အကြောင်းကြားလာသည်ဟု တိမ်ညို တိုက်ပွဲရှောင်စခန်းမှ တာဝန်ခံ ဦးစိုးနိုင်က CNI သတင်း ဌာနသို့ ပြောသည်။

ရခိုင်တိုက်ပွဲရှောင်များ

ဦးစိုးနိုင်က “ပုံမှန်ဆိုရင် သူတို့ ဧပြီ ၁၀ ကျော် ၁၂၊ ၁၃ ၊ ၁၄ အဲဒီလောက်တော့ ရောက်တယ် (မတ်လအတွက်) အဲဒီလို လစဉ် ထောက်ပံ့တာ ရှိတယ်၊ ဒါပေမယ့် ဒီလကို မတ်လဆန်းကတည်းက သူက ကြိုတင်ပြီးတော့ သုံးလေးရက် အကြောင်းကြား တယ်၊ ဒီလတော့ ဆန်မရောက်နိုင်ဘူးတဲ့ ဘာလို့လဲဆိုတော့ သူတို့ တစ်လတစ်လကို ကြိုပြီးရင် ဘတ်ဂျတ် တင်ရတယ်တဲ့ အစိုးရက ဒီလတော့ တစ်နိုင်ငံလုံး အတိုင်းအတာအရ စစ်ဘေးရှောင်တွေ အကုန်လုံးကို ဒီတစ်လတော့ ရိက္ခာထောက်ပံ့နိုင်မှာ မဟုတ်ဘူးလို့တော့ အဲဒီလိုတော့ ပြောတယ်” ဟု ပြောသည်။

ထိုသို့ ကွဲလွဲနေသည့် အခြေအနေများ ဖြစ်ပေါ်နေရခြင်းမှာ နိုင်ငံရေး ဘေးပယောဂများကြောင့်ဖြစ်ပြီး အစိုးရအနေနှင့် ပုံမှန် ထောက်ပံ့နေကြောင်း ရခိုင်ပြည်နယ်ဥပဒေချုပ် ဦးလှသိန်းက ပြောသည်။

ဦးလှသိန်းက “ကျနော်တို့ လုံးဝအာမခံပါတယ် လစဉ်ပေးနေတယ်၊ ဒုက္ခသည်စစ်ဘေးရှောင် ၇၀၀၀၀ ကျော်ရှိတယ်၊ ခုရက်ပိုင်း ၁၀၀၀ ကျော်လောက်ပြန်တယ်။ ဒါလည်း ၇၀၀၀၀ ကျော်နေအုံးမှာပေါ့၊ တိုက်ပွဲရှောင်စခန်းပေါင်း ၁၇၀ ရှိတယ်၊ မြို့နယ် ၁၀ မြို့နယ်မှာ တိုက်ပွဲရှောင် စခန်း ၁၇၀ ရှိတယ်၊ လူဦးရေ ၇၀၀၀၀ ကျော်ရှိတယ်။ အဲဒီ ၇၀၀၀၀ ကျော်အတွက် ဆန်ရိက္ခာတွေ ပေးနေတယ်၊ စစ်ဘေးရှောင်စခန်းတွေ တိုက်ပွဲရှောင်စခန်းတွေကတော့ များသောအားဖြင့် မြို့တွေမှာရှိကြတာ တချို့လည်း ဆွေမျိုးအိမ်မှာ နေကြတယ်၊ ဆွေမျိုးအိမ်မှာနေပေမယ့် သူတို့က ကျနော်တို့ဆီမှာ စာရင်းပေါက်တဲ့အတွက် လစဉ် လူကယ် ပြန်က စာရင်းထဲမှာ ပါနေတယ်”ဟု ပြောသည်။

ရခိုင်ပြည်နယ်ရှိ တိုက်ပွဲရှောင်စခန်းများကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနက ပုံမှန် ဆန်နှင့် ရိက္ခာ ထောက်ပံ့ပေးမှုများရှိကြောင်း၊ ကမ္ဘာ့စားနပ်ရိက္ခာ အဖွဲ့အစည်း (WFP) ကလည်း ထောက်ပံ့နေမှုများရှိကြောင်း သိရသည်။

လက်ရှိတွင် တပ်မတော်နှင့် AA ကြား တိုက်ပွဲများ မရှိသည့်အတွက် တိုက်ပွဲရှောင်များ နေရပ်ပြန် နိုင်ပြီဖြစ်ကြောင်း ပြည်နယ်ကောင်စီက ပြောကြားထားသည်။

CNI News

၂၀၂၂ ခုနှစ်၊ မတ်လ ၂၈

အကြမ်းဖက်အဖွဲ့အစည်းများနှင့် အကြမ်းဖက်များကို အားပေးနေသည့် အဖွဲ့အစည်းများကို တွေ့ဆုံဆွေးနွေးမှာ မဟုတ်ဘဲ နှိမ်နင်းသွားမည်ဟု နစကဥက္ကဋ္ဌ ပြောဆိုချက်မှာ ယခုထက်ပိုဆိုးသည့် အပိုင်းကို ဦးတည်သွားစေကြောင်း ကရင်အမျိုးသား အစည်းအရုံး (KNU) မှ နိုင်ငံခြားရေးတာဝန်ခံ ပဒိုစောတောနီးက CNI သတင်းဌာနကိုပြောသည်။

မတ်လ ၂၇ ရက်က ကျရောက်သည့် (၇၇) ကြိမ်မြောက် တပ်မတော်နေ့ အခမ်းအနားတွင် ဗိုလ်ချုပ်မှူးကြီး မင်းအောင်လှိုင်က အထက်ပါအတိုင်း မိန့်ခွန်းပြောကြားစဉ် ထည့်သွင်း ပြောကြားခဲ့သည်။

ပဒိုစောတောနီးက “မနေ့က ပြောသွားတဲ့ဟာတော့ ကျနော်တို့ အနေနဲ့တော့ အပြုသဘော မဆောင်ဘူးလို့ပဲ ပြောချင်တယ်၊ ဘာဖြစ်လို့လဲဆိုတော့ တိုင်းပြည်တစ်ပြည်ရဲ့ အေးရာအေးကြောင်း ငြိမ်းချမ်းရာ ငြိမ်းချမ်းကြောင်း ဖြစ်စေချင်ရင် လူတွေအား လုံး၊ အစုအဖွဲ့ အားလုံးနဲ့ ထိုင်ပြီးတော့ စကားပြောဖို့ လိုတယ်၊ အဲမှာ သမာသမတ်ကျတဲ့ တွေ့ဆုံဆွေးနွေးပွဲ တစ်ခုလိုတယ် ဆို ရင်လည်းပဲ ကိုယ့်အယူအဆ တစ်ခုတည်းနဲ့ ဆုပ်ကိုင်ထားလို့မရဘဲ တခြား အယူအဆတွေကိုလည်း ထည့်သွင်း စဉ်းစားသင့် ပြီးတော့ ဘယ်ဟာ အကောင်းဆုံးဖြစ်သင့်လဲ ဆိုတဲ့ဟာကိုတော့ စဉ်းစားဖို့လိုတယ်၊ ဆိုတော့ ကိုယ့်ဖက်ကနေ အထိုင်သက် သက် တစ်ခုပဲ အသေဆုပ်ကိုင်ထားပြီး လုပ်သွားမယ်ဆိုရင်တော့ ဒါကြီးဘယ်လိုမှ အလုပ်မဖြစ်နိုင်တော့ဘူး ဆိုတာတော့ အခု လောက်တော့ သိသင့်ပြီလေ။ အဲဒါကြောင့်မို့ ဒီနေ့ဒီအချိန်အခါ ကျနော်တို့ကတော့ အလုပ်မဖြစ်တဲ့နည်းကို စွန့်လွှတ်သင့် ပြီလို့ ကျနော်တို့ ပြောချင်တယ်၊ အဲလိုမှ မစွန့်လွှတ်ဘူးဆိုရင် ဒီထက်ပိုဆိုးသွားတဲ့ အပိုင်းကိုပဲ ဦးတည်သွားမယ်ဆိုတာ ဒါကျနော်တို့ သေချာပေါက်တွေးလို့ရတယ်၊ သိလည်း သိနေတယ် မြင်လည်း မြင်နေရပါတယ်”ဟု ပြောသည်။

ပါတီစုံအစိုးရကာလမှာ ငြမ်းချမ်းရေး ဖိတ်ခေါ်ကမ်းလှမ်းမှုများ ပြုလုပ်ခဲ့ကြောင်း၊ ကိုယ်စားလှယ် အသီးသီးမှ အဆင့်ဆင့် ဆွေနွေးခဲ့ကြပြီး တိုင်းရင်းသား လက်နက်ကိုင် (၁၀)ဖွဲ့နှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)ချုပ်ဆိုနိုင်ခဲ့ကြောင်း ဗိုလ်ချုပ်မှူးကြီး မင်းအောင်လှိုင်က ပြောသည်။

ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

၎င်းက “တိုင်းရင်းသား လက်နက်ကိုင် အဖွဲ့အစည်းလို့ ဆိုရာမှာ လွတ်လပ်ရေးမရခင်နဲ့ လွတ်လပ်ရေး ရပြီးနောက်ပိုင်း နိုင်ငံ ရေးအရ တိုင်းရင်းသားရေးအရ၊ အယူဝါဒရေးရာအရ သဘောထား မတိုက်ဆိုင်တဲ့အတွက် လက်နက်ကိုင်ရတဲ့ အဖွဲ့အစည်း တွေရှိသလို ၂၀၁၁ ခုနှစ်၊ ပါတီစုံ ဒီမိုကရေစီစနစ်ကို ပြောင်းလဲပြီးမှ ဒီမိုကရေစီကို မျက်ကွယ်ပြုပြီး ပေါ်ပေါက်လာတဲ့ လက် နက်ကိုင် အဖွဲ့အစည်းတွေ လည်းရှိတယ်၊ ဒါ့အပြင် ၂၀၂၀ ရွေးကောက်ပွဲပြီးမှ လက်နက်ကိုင် အကြမ်းဖက်လာတဲ့ အဖွဲ့တွေ လည်း ရှိလာတယ်၊ လက်ရှိအချိန်မှာ ဖြစ်ပေါ်နေတဲ့ အကြမ်းဖက်မှုများဟာ အချို့သော EAO များထံကနေ မြစ်ဖျားခံခဲ့တာကို လည်း တွေ့ကြရမှာဖြစ်တယ်၊ တပ်မတော်အနေနဲ့ ထာဝရငြိမ်းချမ်းရေးရရှိဖို့အတွက် အကြမ်းဖက်အဖွဲ့တွေနဲ့ အကြမ်းဖက် အဖွဲ့အစည်းကို အားပေးထောက်ခံတဲ့ အဖွဲ့တွေကလွဲရင် NCA လက်မှတ်ရေးထိုးထားတဲ့ အဖွဲ့တွေနဲ့ အမြဲမပြတ် တွေ့ဆုံ ဆွေး နွေးသွားမှာ ဖြစ်သလို၊ လက်မှတ်ရေးထိုးထားခြင်း မရှိသေးတဲ့ တိုင်းရင်းသား လက်နက်ကိုင် အဖွဲ့တွေနဲ့လည်း လွတ်လပ်ပြီး ကြိုတင် ကန့်သတ်ချက်မထားပဲ ငြိမ်းချမ်းရေး တွေ့ဆုံဆွေးနွေးပွဲတွေ ပြုလုပ်သွားမှာ ဖြစ်တယ်” ဟု ပြောသည်။

နိုင်ငံရေးလေ့လာသုံးသပ်သူ ဦးရဲထွန်းက ဒေသကာကွယ်ရေးတပ်(PDF) များအနေဖြင့် တပ်မတော်နှင့် ဆွေးနွေးမှာ မဟုတ် ကြောင်း၊ ၎င်းတို့၏ ရည်မှန်းချက်မှာ တိုင်းရင်းသား လက်နက်ကိုင် အဖွဲ့အစည်းများနှင့် မတူညီကြောင်း ပြောသည်။

ဦးရဲထွန်းက “တပ်က နေရာပေးဖို့ဆိုတာက သူတို့ (PDF) ကလည်း ဆွေးနွေးချင်စိတ် မရှိဘူးလေ၊ PDF တွေကလည်း သူတို့ ရည်မှန်းချက်က စစ်တပ် ပြိုကွဲရေး၊ စစ်တပ်ဖြုတ်ချရေး၊ စစ်တပ် ချေမှုန်း‌‌ရေးပဲလေ၊ တိုင်းရင်းသားတွေနဲ့ ရည်မှန်းချက်က မတူ ဘူး။ တိုင်းရင်းသား လက်နက်ကိုင် အဖွဲ့အစည်းတွေရဲ့ ရည်မှန်းချက်က သူတို့ဒေသ၊ သူတို့ လူမျိုးတွေ ဒီကိုယ်ပိုင်အုပ်ချုပ်ခွင့်နဲ့ ဖက်ဒရယ်စနစ်ပေါ့ဗျာ၊ အဲဟာသွားဖို့ အဲဒါက ဆွေးနွေးလို့ရတယ်၊ ဖြေရှင်းလို့ရတယ်ဆိုတဲ့ သဘောပေါ့၊ ခုန PDF တွေကတော့ မဟုတ်ဘူး၊ တပ်ကို နိုင်ငံရေးက ဖယ်ထုတ်ရေး၊ တပ်မတော်ကို အပြီးအပြတ် ချေမှုန်းရေးဆိုတော့ သူတို့ကလည်း အဲလို ဆွေး နွေးတာကို လက်မခံဘူးလေ” ဟု ပြောသည်။

နစက-က အမျိုးသား ညီညွတ်ရေးအစိုးရ (NUG)၊ ပြည်သူ့ကာကွယ်ရေးတပ်ဖွဲ့ (PDF)နှင့် အဆိုပါအဖွဲ့အစည်းများ၏ လက် အောက်ခံ အဖွဲ့အစည်း အားလုံးကို အကြမ်းဖက် အုပ်စုများအဖြစ် သတ်မှတ် ကြေညာကြောင်း ၂၀၂၁ ခုနှစ်၊ မေလ ၈ ရက်က ထုတ်ပြန်ကြေညာခဲ့သည်။

အလားတူ NUG ကလည်း တပ်မတော်ကို အကြမ်းဖက်အဖွဲ့အဖြစ် သတ်မှတ်ကြောင်း ကြေညာထားသည်။

CNI News
၂၀၂၂ ခုနှစ်၊ မတ်လ ၂၇

အကြမ်းဖက်မှုများကို ရပ်တန့်ရန်နှင့် မြန်မာနိုင်ငံကို ဒီမိုကရေစီလမ်းကြောင်းပေါ်သို့ ပြန်လည်ပို့ဆောင်ရန် တပ်မတော်ကို မိမိတို့ ထပ်မံတောင်းဆိုပါကြောင်း အမေရိကန် အပါအဝင် ဥရောပနှင့် အနောက်အုပ်စုများက ယနေ့(မတ်လ ၂၇ ရက်) တွင် ထုတ်ပြန်ခဲ့သည်။

အဆိုပါ ပူးတွဲ ထုတ်ပြန်ချက်ကို ဥရောပသမဂ္ဂကိုယ်စား အဆင့်မြင့် ကိုယ်စားလှယ်နှင့် အဲလ်ဘေးနီးယား၊ သြစတေးလျ၊ ဘော့စနီးယားနှင့် ဟာဇီဂိုးဗီးနား၊ ကနေဒါ၊ ဂျော်ဂျီယာ၊ အိုက်စ်လန်၊ လက်ချင်စတိန်း၊ မာရှယ်အိုင်လန်၊ မက်ခရိုနီးရှား၊ မွန် တီနီဂရိုး၊ နယူးဇီလန်၊ မက်ဆီဒိုးနီးယား(မြောက်)၊ နော်ဝေး၊ ပလောင်း၊ ကိုရီးယား၊ ဆားဘီးယား၊ ဆွစ်ဇာလန်၊ ယူကရိန်း၊ ယူနိုက်တက်ကင်းဒမ်းနှင့် အမေရိကန်နိုင်ငံတို့ ပါဝင်ကြသည်။

ပူးတွဲထုတ်ပြန်ချက်တွင် “ယနေ့ကျရောက်သည့် တပ်မတော်နေ့တွင် ယခင်နှစ် ယခုလိုနေ့တွင် အနည်းဆုံး လူ ၁၀၀ ခန့် သတ်ဖြတ်ခံခဲ့ရခြင်း အပါအဝင် ကုန်လွန်ခဲ့သည့် တစ်နှစ်တာ ကာလအတွင်း သတ်ဖြတ်ခံရသော သူများနှင့် အကြမ်းဖက် မှုများကြောင့် နေရပ်စွန့်ခွာထွက်ပြေးရသူများကို မိမိတို့ အမှတ်ရမိပါသည်”ဟု ပြောထားသည်။

ယနေ့(မတ်လ ၂၇ ရက်)သည် မြန်မာ့တပ်မတော်နေ့ဖြစ်ရာ ထိုနေ့ကို ဦးတည်၍ ထုတ်ပြန်ခဲ့ခြင်း ဖြစ်သည်။

ထို့နောက် တချို့သော နိုင်ငံများသည် မြန်မာတပ်မတော်ကို လက်နက်အထောက်အပံ့များ ဆက်လက် ပေးအပ်လျက်ပင် ရှိကြောင်း၊ ကုလသမဂ္ဂ အထွေထွေညီလာခံ ဆုံးဖြတ်ချက် A/RES/75/287 နှင့်အညီ မြန်မာနိုင်ငံသို့ စစ်လက်နက် ပစ္စည်း ကိရိယာများ၊ အရပ်ဘက်-စစ်ဘက်သုံး ပစ္စည်းကိရိယာများ ရောင်းချခြင်း၊ လွှဲပြောင်းပေးအပ်ခြင်း၊ နည်းပညာ အကူအညီ ပေးအပ်ခြင်းများ ရပ်တန့်ခြင်းဖြင့် မြန်မာပြည်သူများကို အားပေးထောက်ခံကြရန် နိုင်ငံသားအားလုံးကို မိမိတို့ တိုက်တွန်း ပါကြောင်း ပူးတွဲထုတ်ပြန်ချက်က ဆိုသည်။

ထို့နောက် အကြမ်းဖက်မှုများကို ရပ်တန့်ရန်နှင့် မြန်မာနိုင်ငံကို ဒီမိုကရေစီလမ်းကြောင်းပေါ်သို့ ပြန်လည်ပို့ဆောင်ရန် တပ်မတော်ကို ထပ်မံတောင်းဆိုပါသည်ဟု ပူးတွဲထုတ်ပြန်ချက်တွင် တောင်းဆိုထားသည်။