CNI News

၂၀၂၂ ခုနှစ်၊ မတ်လ ၁၆

ဒီမိုကရေစီအင်အားစုများနှင့် တိုင်းရင်းသားအဖွဲ့အစည်းများ စည်းလုံးသွားမည်ကို အာဏာရှင်များမှ စိုးရိမ်ခဲ့ကြကြောင်း ပအိုဝ်းအမျိုးသားဖက်ဒရယ်ကောင်စီ(PNFC)ဥက္ကဋ္ဌ ခွန်မြင့်ထွန်းက ပြောသည်။

ယနေ့ (မတ်လ ၁၆ ရက်)တွင် ကျရောက်သည့် (၇၃) ကြိမ်မြောက် ပအိုဝ်းအမျိုးသားနေ့ အခမ်းအနားမှာ ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။

ခွန်မြင့်ထွန်း “ကျနော်တို့ ဒီနေ့ ဒီအချိန်ကာလမှာ ကျနော်တို့ တိုင်းပြည်အတွင်းမှာ ပြည်ထောင်စုညီညွတ်ရေးဟာ အင်မတန် အရေးကြီးပါတယ်၊ အမျိုးသားညီညွတ်ရေးက အင်မတန် အရေးကြီးပါတယ်၊ မိမိတို့ရဲ့ လူမျိုးအလိုက် စည်းလုံးညီ ညွတ်‌ရေး တွေ အရေးကြီးသလိုပဲ တိုင်းရင်းသားတွေ အကြားမှာလည်း စည်းလုံးညီညွတ်ရေးတွေ အရေးကြီးပါတယ်။ ထို့နည်းတူပဲ ကျနော်တို့ တိုင်းပြည်အရေးဟာ ဒီမိုကရေစီအရေးနဲ့ ဖက်ဒရယ်အရေး တစ်နည်းအားဖြင့် တိုင်းရင်းသား အရေးဖြစ်ပါတယ်၊ စစ်အာဏာရှင်တွေ အပါအဝင် အာဏာရှင်တွေဟာ ဒီမိုကရေစီအရေးနဲ့ တိုင်းရင်းသားအရေး နှစ်ခု ပေါင်းစည်းသွားမိမှာ အင်မတန် စိုးရိမ်သလိုပဲ၊ ဒီမိုကရေစီ အင်အားစုတွေနဲ့ တိုင်းရင်းသား အင်အားစုတွေ ပေါင်းစည်းမိမှာကိုလည်း အင်မတန် စိုးရိမ်ခဲ့ကြတယ်။ နည်းမျိုးစုံနဲ့ ဖြိုခွဲခဲ့သလို ဆက်လက်ပြီးတော့လည်း ဖြိုခွဲနေဆဲ ဖြစ်ပါတယ်” ဟု ပြောသည်။

မတရားသော စနစ်ဆိုးများ ဖျက်သိမ်းရာတွင် ပအိုဝ်းလူမျိုးများအနေနှင့် အင်အားစု တစ်ရပ်အနေဖြင့် ဆောင်ရွက်သွားမှာ ဖြစ်ကြောင်းလည်း ခွန်မြင့်ထွန်းက ပြောကြားခဲ့သည်။

ထို့အတူ ပြည်ထောင်စုသား အားလုံးညီညွတ်ရေးကို ရယူ၍ မိမိတို့လိုလားသည့် ဖက်ဒရယ်ပြည်ထောင်စုကို အတူတကွ ထူထောင်ရန် ပအိုဝ်းများမှာ အမြဲအသင့်ရှိကြောင်း ၎င်းက ပြောသည်။

၂၀၁၉ ခုနှစ်က ကျင်းပခဲ့သော ပအိုဝ်းအမျိုးသားနေ့ အခမ်းအနား

လက်ရှိနွေဦးတော်လှန်ရေးတွင် ပအိုဝ်းအမျိုးသားများနှင့် ပအိုဝ်းလူငယ်များ တွန်းတွန်းတိုက်တိုက် ပါဝင်ခဲ့မှုကို အသိအမှတ် ပြုကြောင်း အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလက ပြောသည်။

၎င်းက “လက်ရှိ နွေဦးတော်လှန်ရေးတွင် ပအိုဝ်းအမျိုးသားများနှင့် လူငယ်များ၏ တွန်းတွန်းတိုက်တိုက် ပါဝင်ခဲ့မှုကို ကျနော့် အနေဖြင့် အသိအမှတ် ပြုလိုပါတယ်၊ ရှမ်းပြည်တောင်ကြီး တစ်ဝိုက်နှင့် ရန်ကုန်တိုင်းရင်းသား လူငယ်များ သပိတ်တွင် ပအိုဝ်း လူငယ်များ တက်တက်ကြွကြွ အာဏာရှင်ကို ဆန့်ကျင် သပိတ်မှောက်ခဲ့ကြသည်မှာ သမိုင်းမှတ်တမ်းတင်မယ့် နေ့ရက်လည်း ဖြစ်ပါတယ်။ ထို့အတူ နွေဦးတော်လှန်ရေးသည် ပြည်သူလူထု တစ်ရပ်လုံး အာဏာရှင်ကို ဆန့်ကျင်တွန်းလှန်တဲ့ လူထုအုံကြွမှု တစ်ရပ်ပီပီ တိုင်းပြည်ကို တိုင်းရင်းသား ပြည်သူများ လိုလားတဲ့ ဖက်ဒရယ်ဒီမိုကရေစီစနစ်ကို တည်ဆောက်ဖို့ တော်လှန်နေ ကြတာ ဖြစ်ပါတယ်” ဟု ပြောသည်။

ပအိုဝ်းအမျိုးသားနေ့သည် ပြည်ထောင်စု ခိုင်မြဲရေးနှင့် အခြားသော အမျိုးသားများနှင့် ညီညီညွတ်ညွတ် နေထိုင်နိုင်ရေး အတွက် ပအိုဝ်းအမျိုးသားများ ကတိကဝတ် ပြုသည့်နေဟုလည်း မိမိအနေဖြင့် မှတ်ယူကြောင်း ဒူဝါလရှီးလက ပြောသည်။

ယနေ့ကျရောက်သည့် ပအိုဝ်းအမျိုးသားနေ့ အခမ်းအနားကို ခွန်မြင့်ထွန်း၊ NUG ယာယီသမ္မတ ဒူဝါလရှီးလ၊ NUG မှ ဝန်ကြီး ချုပ် မန်းဝင်းခိုင်သန်း၊ ပြည်ထောင်စုလွှတ်တော်ကိုယ်စားပြုကော်မတီ(CRPH)မှ ဦးအောင်ကြည်ညွန့်၊ အမျိုးသားညီညွတ်ရေး အတိုင်ပင်ခံကောင်စီ (NUCC) မှ ဦးအောင်ဆန်းမြင့်၊ ဆလိုင်းအိုက်ဇက်ခင်တို့ တက်ရောက်ခဲ့ကြသည်။

CNI News

၂၀၂၂ ခုနှစ်၊ မတ်လ ၁၅

တပ်မတော်နှင့် ကရင်အမျိုးသားအစည်းအရုံး (KNU) တို့အကြား ကရင်ပြည်နယ်အတွင်း တိုက်ပွဲများ ယခုရက်ပိုင်းအတွင်း ပြန်လည်ဖြစ်ပွားလာကာ တိုက်ပွဲဖြစ်ပွားသည့် ဧရိယာ ပိုမိုကျယ်ပြန့်လာကြောင်း သိရသည်။

ပြီးခဲ့သည့် နှစ်ရက်သုံးရက်အတွင်း တပ်မတော်နှင့် KNU အကြားတွင် လေးကေ့ကော်ဒေသ၊ ကော့ကရိတ်မြို့ ပတ်ဝန်းကျင်၊ အာရှလမ်းမကြီး တစ်လျှောက်၊ ဘုရားသုံးဆူ၊ ကြာအင်းဆိပ်ကြီး စသည့် ဒေသတော်တော်များများတွင် တိုက်ပွဲများ ပြန်လည် ဖြစ်ပွားခဲ့ကြောင်း KNU ၏ နိုင်ငံခြားရေးတာဝန်ခံ ပဒိုစောတောနီးက CNI သတင်းဌာနသို့ ပြောသည်။

ပဒိုစောတောနီးက “ ဒီနှစ်ရက် သုံးရက်အတွင်းကတော့ နေရာတော်တော်များများ ဖြစ်နေတာတော့ ရှိတယ်၊ လေးကေ့ကော် ပတ်ဝန်းကျင်တွေရယ်၊ နောက်ပြီးတော့ ကော့ကရိတ်မြို့ ပတ်ဝန်းကျင်တွေရယ်၊ နောက်ပြီးတော့ အာရှလမ်းမကြီးရယ်၊ နောက်ပြီးတော့ ကြာအင်းဆိပ်ကြီးရယ် ပြန်ဖြစ်လာတယ်။ ဘုရားသုံးဆူလမ်း တစ်လျှောက်၊ ကျနော်ပြောနိုင်တာကတော့ တိုက်ပွဲက ကြီးကြီးမားမားတော့ မတွေ့ရဘူး၊ သို့သော်ငြားလည်းပဲ ဖြစ်တာတော့ ဖြစ်တယ်၊ နောက်တစ်ခုကတော့ တင်းမာမှု တွေကတော့ ရှိတယ်လို့တော့ အသေအချာ ပြောလို့ရတယ်၊ ဒီလောက်ထိပါပဲ”ဟု ပြောသည်။

လက်ရှိတွင် အာရှလမ်းမကြီးတွင် တံတားမိုင်းခွဲခံရမှု အခြေအနေများ အပါအဝင် တိုက်ပွဲဖြစ်ပွားမှုများကြောင့် နယ်စပ် ကုန် သွယ်ရေး လမ်းကြောင်းတစ်ခုဖြစ်သည့် မြဝတီ-ကော့ကရိတ်လမ်းမကြီးကို သုံးရက်ကြာ ပိတ်ထားမည်ဖြစ်ကြောင်း သိရသည်။

မတ်လ ၁၄ ရက်နှင့် ၁၅ ရက်တို့တွင် ကော့ကရိတ်မြို့နှင့် မြို့ ပြင်နေရာတချို့၌ တိုက်ပွဲများ ဖြစ်ပွားခဲ့ကြောင်း၊ ထိုင်း-မြန်မာ အာရှလမ်းမကြီးကို အခြေပြုကာ နှစ်ဖက်တိုက်ပွဲ ဖြစ်ပွားနေကြောင်း ထိုဒေသသို့ ရောက်ရှိနေသည့် ဒေသခံတစ်ဦးက ပြော သည်။

၎င်းက “ပြောရမယ်ဆို စစ်တပ်ရှိတဲ့ စစ်ကောင်စီရှိတဲ့ နေရာနဲ့ ဒီဘက်ကျေးရွာတွေနဲ့က အာရှလမ်းမကြီး ခြားတယ်၊ အဲဒီ အာရှ လမ်းမကြီးကို ကျော်ပြီးတော့ စစ်တပ်က သူတို့ရဲ့ အမြှောက်ကုန်းတွေကနေ ပစ်တာပေါ့နော်” ဟု ပြောသည်။

မြဝတီ-ကော့ကရိတ် အာရှလမ်းမကြီးသည် ထိုင်း-မြန်မာ နယ်စပ်ကုန်သွယ်ရေးအတွက် အရေးပါသည့် လမ်းကြောင်း ဖြစ် သည်။
ပြီးခဲ့သည့် မတ်လ ၇ ရက်နေ့က လေးကေ့ကော်ဒေသနှင့် ကော့ကရိတ်တောင်ပိုင်းဒေသများမှ တပ်မတော်စခန်းများ ဆုတ်ခွာ ရန် KNU အသိပေး အကြောင်းကြားစာ ထုတ်ပြန်ခဲ့သည်။

အဆိုပါ အကြောင်းကြားစာ ထုတ်ပြန်ခဲ့ပြီးနောက်မှာတော့ တပ်မတော်သည် စခန်းများ မဆုတ်ခွာသည့်အပြင် စခန်းများ တိုးချဲ့လာခြင်းကြောင့် တိုက်ပွဲများ ဖြစ်ပွားလာရခြင်းဖြစ်သည်ဟု ပဒိုစောတောနီးက ပြောသည်။

CNI News

၂၀၂၂ ခုနှစ်၊ မတ်လ ၁၅

လက်ရှိ တိုင်းပြည်၏ အခြေအနေသည် ၁၉၄၇ ခုနှစ်မတိုင်ခင် အခြေအနေသို့ ရောက်ရှိနေသည့်အတွက် မိမိတို့၏ ချင်းမျိုး နွယ်စုများကို ပြန်လည်စုစည်းကာ ချင်းပြည်ထောင်ကို ပြည်လည်အသက်သွင်းရန် ရည်မှန်းထားကြောင်း ချင်းပြည်နယ် ပူးတွဲ ကာကွယ်ရေးကော်မတီ (CJDC) မှ တာဝန်ရှိသူ တစ်ဦးက ပြောသည်။

မြန်မာနိုင်ငံတွင် အာဏာသိမ်းမှု အကြိမ်ကြိမ် ဖြစ်ပွားခဲ့ကြောင်း၊ ၂၀၂၁ အာဏာသိမ်းမှုမှာ အဆိုးဆုံးဖြစ်ကြောင်း CJDC မှ ဘဏ္ဍရေးအတွင်းရေးမှူး ဂျွန်က CNI သတင်းဌာနသို့ ပြောသည်။

ဂျွန်က “ဒီအချိန် ဒီအခါကတော့ ဘာပဲဖြစ်ဖြစ် ၁၉၄၇ ရဲ့ ပင်လုံအစ မတိုင်ခင်က အခြေအနေ ရောက်သွားတယ်၊ ဒီအချိန် ဒီအခါကနေ ကျနော်တို့ ကိုယ့်ရဲ့ လူမျိုးအလိုက်၊ ကိုယ့်ရဲ့ ဒေသအလိုက် ပြန်လည်စုစည်းပြီး‌‌တော့ ကျနော်တို့ကတော့ ချင်းပြည်ထောင် ကျနော်တို့ ပြန်လည်ပြီး‌တော့ အသက်သွင်းဖို့ အဲဒါလေးတွေကို ကျနော်တို့ ရည်မှန်းထားတာ ဖြစ်ပါတယ်”ဟု ပြောသည်။

လက်ရှိ မြန်မာပြည်သူ/သားများ၏ အခြေအနေသည် အသက်အိုးအိမ် စည်းစိမ်၊ ဘဝလုံခြုံမှု၊ ဝမ်းစာရေး စသည့် အခက်အခဲ များဖြင့် ကြုံတွေ့နေရကြောင်း ၎င်းက ပြောသည်။

ချင်းပြည်သူများ ဆုံးရှုံးနေသော လူမှုဘဝ ပြန်လည်ထူထောင်ရေးနှင့် ချင်းလဲန်း ပြန်လည်ထူထောင်ရေးအတွက် ဒေသ ကာကွယ်ရေးတပ်ဖွဲ့များ၊ ညီနောင်မဟာမိတ်များနှင့် လက်တွဲကာ စစ်ရေးအရှိန်ကို ဟန်ချက်ညီညီ မြှင့်တင်ပြီး နစက (စစ်ကောင်စီ)ကို တိုက်ခိုက်သွားမည်ဖြစ်ကြောင်း ချင်းအမျိုးသားတပ်ဦး(CNF)မှ မတ်လ ၂၀ ရက်တွင် ကျရောက်မည့် ချင်းတော်လှန်ရေးနေ့ ထုတ်ပြန်ချက်၌ ဖော်ပြထားသည်။

ကန်ပတ်လက် ချင်းဒေသကာကွယ်ရေးတပ်ဖွဲ့(CDF Kanpetlet)

ထို့အတူ နိုင်ငံရေးဦးတည်ချက်၊ ယုံကြည်ချက်နှင့် ခံယူချက်တူညီသော အစုအဖွဲ့များ ပါဝင်စေလျက် အမိမြေ ချင်းလဲန်းကို ပြန်လည် တည်ဆောက်သွားမည်ဖြစ်ကြောင်း၊ ထိုသို့ တည်ဆောက်ရာတွင် ဒေသအုပ်ချုပ်ရေး၊ လုံခြုံရေးနှင့် တရားဥပဒေ စိုးမိုးရေးများကို တဆင့်ချင်း အကောင်အထည်ဖော်သွားမည်ဟု ထုတ်ပြန်တွင် ဖော်ပြထားသည်။

ချင်းပြည်နယ်သည် ကျေးလက်ဒေသ အများဆုံးဖြစ်ပြီး ထိုကျေးလက်ဒေသ၏ ၉၅ ရာခိုင်နှုန်းကို CJDC ၏ အုပ်ချုပ်မှုအောက် တွင် ရှိနေကြောင်း ဂျွန်က ပြောသည်။

၎င်းက “အခုကျနော်တို့ ကြားကာလ ချင်းပြည်နယ် အစိုးရဆိုတဲ့ ICNCC ပေါ့လေ၊ အဲတာလေး ကျနော်တို့ ဖွဲ့ထားတယ်၊ အဲဒီ အပြင် ပြည်သူ့အုပ်ချုပ်ရေး ပီပီပြင်ပြင် ပေါ်လာဖို့အတွက်ကိုလည်း CJDC အနေနဲ့ ပြည်သူ့အုပ်ချုပ်ရေး ပီပီပြင်ပြင်ပေါ်လာဖို့ အားပေးရမယ်၊ မဖွင့်နိုင်တဲ့ ဒေသတွေ ရှိရင်လည်း ဖွင့်နိုင်အောင် တွန်းအားပေးရမယ်ဆိုပြီးမှ ကျနော်တို့ မူချမှတ်ထားတာ ရှိ ပါတယ်၊ အခုချိန်ထိကတော့ ချင်းပြည်နယ်ရဲ့ ၉၅ ရာခိုင်နှုန်းကတော့ ကျနော်တို့ရဲ့ အုပ်ချုပ်မှုအောက်မှာ ရှိနေပါတယ်။ အဲတာ ပီပီပြင်ပြင် မသွားသေးတာက တချို့ဒေသတွေမှာ ရှိရင်ရှိမှာပေါ့နော်၊ ဒါပေမယ့် အားလုံးကိုတော့ ကျနော်တို့ CJDC ရဲ့ စီစဉ်မှု အောက်မှာ အခု ICNCC ဘက်ကလည်း သူတို့ ကြိုးစားနေတဲ့ ဟာလေးတွေ ရှိတယ်၊ ကျနော်တို့ ဝိုင်းဝန်းပြီးတော့ ပြည်သူ့ အုပ်ချုပ်ရေးအဖွဲ့ ကိုယ့်ရဲ့ ရပ်ကျေးအဆင့်၊ ကိုယ့်ရဲ့ ကောင်ချုပ်အဆင့်နဲ့ တိုက်နယ်အဆင့်နဲ့ အခုကျနော်တို့ လုပ်နေတာ ရှိပါတယ်။ အဲဒါလေးတွေ အခု ပြင်ဆင်ရင်းနဲ့ အဲဒါလေးတွေ ကျနော်တို့ မျှော်မှန်းတဲ့ ချင်းပြည်ထောင်ကို ဦးတည်နေတဲ့ သဘောရှိပါတယ်”ဟု ပြောသည်။

လက်ရှိ ချင်းပြည်နယ်တွင် ချင်းအမျိုးသားတပ်ဦး (CNF) ၊ ဒေသကာကွယ်ရေးတပ် (PDF) ပူးပေါင်းတပ်ဖွဲ့နှင့် တပ်မတော် အကြား တိုက်ပွဲများ ဖြစ်ပွားလျက်ရှိသည်။

CNI News

၂၀၂၂ ခုနှစ်၊ မတ် ၁၅

လက်ရှိ မြန်မာနိုင်ငံတွင် စက်သုံးဆီဈေးနှုန်းများ မြင့်တက်နေခြင်းနှင့် စီးပွားရေးကျဆင်း၍ အလှူရှင်များ ရှားပါးလာခြင်း ကြောင့် ပရဟိတအသင်းများ အခက်အခဲများဖြင့် ကြုံတွေ့နေရကြောင်း ပရဟိတအသင်းတချို့က CNI သတင်းဌာနသို့ ပြောသည်။

ထို့နောက် လက်ရှိကာလသည် ငွေကြေးရှားပါးမှု၊ ကုန်ဈေးနှုန်းများ မြင့်တက်မှုတို့ကြောင့် အလှူရှင်များလည်း နည်းပါးလာ ကြောင်း ပရဟိတအသင်းများက ပြောသည်။

ပရဟိတအသင်းတချို့သည် လက်ရှိတွင် လျှပ်စစ်မီး မမှန်မှု၊ ဂျိုးဖြူရေ မရရှိမှုတို့ကြောင့် ရေပြတ်လပ်နေသည့် မြို့နယ်များ တွင် ရေလှူဒါန်းမှုများ ပြုလုပ်ပေးလျက်ရှိကြောင်း၊ ထိုသို့ ရေလှူဒါန်းရာတွင် စက်သုံးဆီ အများအပြား အသုံးပြုနေရကြောင်း၊ စက်သုံးဆီဈေး မြင့်တက်မှုကြောင့် အခက်အခဲဖြစ်နေကြောင်း သိရသည်။

စေတနာရှင် ပရဟိတအသင်းကိုတွေ့ရစဉ်

ရှင်သန်ရေးကူညီမှုအသင်းဥက္ကဋ္ဌ ဦးထွန်းထွန်းဦးက “စက်သုံးဆီဝယ်ဖို့ ခက်ခဲတာက အဓိကကတော့ ငွေမရှိတာပေါ့။ အခုက ကိုဗစ်ကာလလည်း ကြာလာပြီ။ အလှူရှင်တွေ အနေနဲ့လည်း နေရာစုံ လှူနေရတော့ လက်ပန်းကျ လာတာမျိုးတွေ ရှိတယ်။ နောက်တစ်ချက် လုပ်ငန်းအားဖြင့်လည်း အလုပ်အကိုင်တွေ သိပ်မကောင်းကြဘူးပေါ့။ အဲဒီအတွက် လှူဒါန်းမှုလည်း နည်း လာတဲ့အတွက် ကျနော်တို့ ပရဟိတအသင်း တော်တော်များများကလည်း ရပ်တည်ဖို့ တော်တော်လေး ခက်ခဲလာတာမျိုးတွေ ရှိပါတယ်။ စက်သုံးဆီ ဝယ်ယူမှုကတော့ အဆင်ပြေပါတယ်။ မပြေတာက ဝယ်ယူဖို့ ငွေမရှိတာပါ”ဟု CNI သတင်းဌာနသို့ ပြောသည်။

ယခုကဲ့သို့ ရေရှည်ဆက်သွားမည်ဆိုပါက ပရဟိတအသင်းများ ရပ်နားသွားရနိုင်ခြေရှိကြောင်း ပရဟိတအသင်းများက ပြော ကြသည်။

စက်သုံးဆီဈေးနှုန်း မြင့်တက်နေသည့်အတွက် လူနာလမ်း‌ကြောင်းများရှိပါက ယခင်ကကဲ့သို့ မသွားရောက်နိုင်တော့ကြောင်း စေတနာရှင် ပရဟိတအသင်း(ရန်ကုန်)မှ ကိုဝေဖြိုးက CNI သတင်းဌာနသို့ ပြောသည်။

ကိုဝေဖြိုးက “လူနာတွေက ဆင်းရဲတယ်လေ။ အဲဒီအခါကျတော့ ပြန်လည်လှူဒါန်းဖို့အတွက်လည်း အဆင်မပြေနိုင်ဘူး။ အဲ့ဒါ ကျ အခမဲ့ ပို့ပေးရတာပေါ့။ အရင်ကဆို ကားတစ်စီးကို ဖြည့်ဖို့အတွက်ဆိုရင် ၅၀၀၀၀ ကျော်၊ ၆၀၀၀၀ ဝန်းကျင်လောက်ဆို ကားပြည့်တယ်။ အခုကျ ၁၀၀၀၀၀(တစ်သိန်း)နီးနီးမှ ကားပြည့်တော့တယ်။ အဲဒီလောက် ကျတော့လည်း ပရဟိတအသင်း တွေ မထည့်နိုင်ဘူးလေ။ တစ်ခါဖြည့်ရင် ၃၀၀၀၀၊ ၄၀၀၀၀ ဖိုး အဲဒီလောက်ပဲ ဖြည့်နိုင်တယ်။ လက်ရှိဆို လမ်းကြောင်းပိုင်း တွေနဲ့ ပတ်သက်လို့ သေသေချာချာ မေးမြန်းပြီးတော့မှပဲ လမ်းကြောင်းထွက်တော့တယ်။ ဘာလို့ဆို မသေချာပဲနဲ့ဆို ဆီဈေး တွေ ကုန်တယ်ပေါ့”ဟု ပြောသည်။

ရေပြတ်လပ်မှု လှူဒါန်းနေခြင်း

ရေပြတ်လပ်သည့် နေရာများမှ အကူအညီ တောင်းခံသည့်အတွက် ရေသွားရောက် လှူဒါန်းရာတွင် ရေဂါလံ ၃၂၀၀ ဆန့် ရေသယ်ယာဉ် တစ်စီးအတွက် စက်သုံးဆီ ၅ ဂါလံခန့် အသုံးပြုရကြောင်း၊ ထိုရေအား လိုသည့်နေရာသို့ တွန်းပို့နိုင်ရန် ရေစုပ်စက်ဖြင့် တွန်းပို့ရသည့်အတွက် စက်သုံးဆီ ဂါလံဝက်ခန့် အသုံးပြုရကြောင်း ရှင်သန်ရေးကူညီမှုအသင်းဥက္ကဋ္ဌ ဦးထွန်းထွန်းဦးက ပြောသည်။

ထို့ကြောင့် တစ်ရက်လျှင် စုစုပေါင်း ကုန်ကျစရိတ်မှာ ၆၀၀၀၀ ကျော် ရှိသည့်အတွက် ယခင်က အခမဲ့ လှူဒါန်းမှုအစား ယခု အခါတွင် တတ်နိုင်သည့် လမ်းများ၌ စရိတ်မျှပေးစနစ်ဖြင့် အလှူငွေ ကောက်ခံကြောင်း၊ ထိုသို့ ကောက်ခံသည့် အခါတွင် ၆၀ ရာခိုင်နှုန်းခန့်သာ အလှူငွေ ထည့်ဝင်ကြကြောင်း သိရသည်။

လတ်တလော ရုရှား-ယူကရိန်းစစ်ပွဲကြောင့် စက်သုံးဆီ ဈေးနှုန်းများသည် တစ်ကမ္ဘာလုံး အတိုင်းအတာဖြင့် မြင့်တက်နေ ကြောင်း စီးပွားရေး လုပ်ငန်းရှင်များက ပြောသည်။

ယနေ့(မတ်လ ၁၅ ရက်) စက်သုံးဆီ ဈေးနှုန်းများမှာ ဒီဇယ်တစ်လီတာ ၁၉၈၀ ကျပ်၊ ပရီမီယမ် ဒီဇယ်တစ်လီတာ ၁၉၉၅ ကျပ်၊ အောက်တိန်း 92 တစ်လီတာ ၁၉၄၅ ကျပ်၊ အောက်တိန်း 95 တစ်လီတာ ၂၀၂၀ ကျပ် စသဖြင့် ရှိကြောင်း၊ တိုင်းဒေသကြီးနှင့် ပြည်နယ်ပေါ် မူတည်ကာ ဈေးနှုန်းကွာခြားချက် ရှိသည်။

CNI News

၂၀၂၂ ခုနှစ်၊ မတ်လ ၁၄

သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့သော သူရဦးအောင်ကိုအား အဂတိလိုက်စားမှုဖြင့် ၂၀၂၂ ခုနှစ်၊ မတ်လ ၁၄ ရက်က အလုပ်နှင့်ထောင်ဒဏ် ၁၂ နှစ် ကျခံစေရန် ရန်ကုန်တိုင်းဒေသကြီး တရားလွှတ်တော်မှ အမိန့်ချမှတ်ခဲ့ကြောင်း သိရသည်။

သူရဦးအောင်ကိုသည် နိုင်ငံတော်မှ လူပုဂ္ဂိုလ်များသို့ သာသနာ့နုဂ္ဂဟဘွဲ့ တံဆိပ် ၈ မျိုးအား နှစ်စဉ် ချီးမြှင့်ပေးအပ်ခြင်းနှင့် စပ်လျဉ်း၍ သက်ဆိုင်ရာ ပုဂ္ဂိုလ်များထံမှ ငွေသားကျပ် သိန်း ၁၀၀ နှင့် ငွေကျပ်သိန်း ၃၀၀ တန် Blank Cheque တစ်စောင် အား လက်ခံရယူခဲ့ခြင်း၊ လုပ်ငန်းရှင် တစ်ဦးမှ လုပ်ငန်းများ ရေရှည်အဆင်ပြေစေရန်အတွက် ပေးအပ်သည့် ငွေကျပ် ၁၀၀၅ သိန်းတန်ဖိုးရှိ Ford Ecerest Titanium မော်တော်ယာဉ် တစ်စီးကို လက်ခံရယူခဲ့ကြောင်း အဂတိလိုက်စားမှုတိုက်ဖျက်ရေး ကော်မရှင်က ထုတ်ပြန်ခဲ့သည်။

ထို့နောက် အလေးချိန် ၂၀ ကျပ်သားခန့်ရှိသော ရွှေပန်းကန်တစ်ချပ်အား ကျသင့်တန်ဖိုးပေးချေခြင်းမရှိဘဲ လက်ခံရယူခဲ့ ခြင်းတို့ကြောင့် ပြည်ထောင်စုဝန်ကြီးဟောင်း သူရဦးအောင်ကိုအပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ ရန်ကုန်တိုင်းဒေသကြီးတရားလွှတ်တော်တွင် ၂၀၂၁ ခုနှစ်၊ မတ်လ ၉ ရက်နေ့၌ တရားစွဲဆိုခဲ့ရာ ရာဇဝတ်ကြီးမှု အမှတ် ၅/၂၀၂၁ ၊ ၆/၂၀၂၁ ၊ ၇/၂၀၂၁ နှင့် ၃၂/၂၀၂၁ တို့ဖြင့် စစ်ဆေးခဲ့ကြောင်း ထုတ်ပြန်ချက်တွင် ဖော်ပြထားသည်။

လွှတ်တော်မှာ ဒေါ်အောင်ဆန်းစုကြည်နဲ့အတူ တွေ့ရသော သူရဦးအောင်ကို

ထုတ်ပြန်ချက်တွင် “၎င်းအမှုများအပေါ် ပြစ်မှုထင်ရှားသဖြင့် ရန်ကုန်တိုင်းဒေသကြီးတရားလွှတ်တော်က ၂၀၂၂ ခုနှစ်၊ မတ်လ ၁၄ ရက်နေ့တွင် ပြည်ထောင်စုဝန်ကြီးဟောင်း သူရဦးအောင်ကိုအား ရာဇဝတ်ကြီးမှု အမှတ် ၅/၂၀၂၁၊ ၆/၂၀၂၁၊ ၇/၂၀၂၁ နှင့် ၃၂/၂၀၂၁ တို့အတွက် အလုပ်နှင့်ထောင်ဒဏ် ၃ နှစ်စီဖြင့် စုစုပေါင်း အလုပ်နှင့်ထောင်ဒဏ် ၁၂ နှစ် ကျခံစေ ရန်နှင့် Ford Everest Titanium မော်တော်ယာဉ် တစ်စီး၊ ငွေကျပ် သိန်း ၁၀၀ နှင့် ရွှေပန်းကန်ပြားတို့အား ပြည်သူ့ဘဏ္ဍာ အဖြစ် သိမ်းဆည်းစေရန် အမိန့်ချမှတ်ခဲ့သည်”ဟု ဖော်ပြထားသည်။

သူရဦးအောင်ကိုသည် အမျိုးသားဒီမိုကရေစီအဖွဲ့ချုပ်(NLD)အစိုးရ လက်ထက်တွင် သာသနာရေးနှင့်ယဉ်ကျေးမှုဝန်ကြီး ဌာန ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့သူဖြစ်သည်။

၂၀၂၁ ခုနှစ်၊ ဖေဖော်ဝါရီ ၁ ရက်တွင် တပ်မတော်က NLD အစိုးရကို ဖြုတ်ချလိုက်ပြီးနောက် ဖမ်းဆီးခံခဲ့ရပြီး ရန်ကုန်တိုင်း ဒေသကြီး၊ အင်းစိန်အကျဉ်းထောင်မှာ ချုပ်နှောင်ခံထားရသည်။

CNI News

၂၀၂၂ ခုနှစ်၊ မတ်လ ၁၄

လက်ရှိဖြစ်ပေါ်နေသည့် နိုင်ငံရေးအကျပ်အတည်းကို ဖြေရှင်းနိုင်ရန်အတွက် ကြားကာလ ဖြေရှင်းမှုတစ်ရပ် ရရှိရေး အဓိက ထား ဦးစားပေး ကြိုးပမ်းသွားမည်ဖြစ်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

ပြီးခဲ့သည့် ရက်ပိုင်းအတွင်းက ဦးကိုကိုကြီးသည် မြန်မာနိုင်ငံဆိုင်ရာ ပြင်သစ်သံအမတ်၊ ချက်သမ္မတနိုင်ငံ သံအမတ် အပါအဝင် နိုင်ငံတကာ သံတမန်များနှင့် တွေဆုံ၍ မြန်မာနိုင်ငံအရေး ဆွေးနွေးမှုများ ပြုလုပ်ခဲ့သည်။

ဦးကိုကိုကြီးက “အဓိကက ပြဿနာအားလုံးရဲ့ အခြေခံက နိုင်ငံရေး ပြဿနာဆိုပေမယ့်လို့ နိုင်ငံရေး နည်းလမ်းအပေါ်မှာ အယုံအကြည် မဲ့လာတဲ့ဟာပေါ့နော်၊ အဲဒီဟာကို နိုင်ငံရေးပါတီ နိုင်ငံရေးနည်းလမ်း ပြန်အသက်ဝင်လာဖို့ အားကောင်းလာဖို့ အရေးကြီးတယ်၊ နောက်တစ်ခုကတော့ နိုင်ငံရေးလို့ ဆိုတဲ့နေရာမှာလည်း တိုင်းရင်းသားပါတီတွေ ရှိတယ်၊ အခြား ဒီမိုကရက် တစ်ပါတီတွေ ရှိတယ်၊ အဲဒီပါတီတွေရဲ့ အခန်းကဏ္ဍ၊ သူတို့ရဲ့အသံတွေ ပျောက်နေတာပေါ့လေ၊ အဲဒီတော့ ဒီပါတီတွေရဲ့ အမြင် သဘောထားတွေက အရေးကြီးတယ်၊ ဒါတွေ ကျနော်တို့ တော်တော်များများ ပြောဖြစ်ပါတယ်”ဟု ပြောသည်။

ထို့နောက် နိုင်ငံရေးအရ တွေ့ဆုံဆွေးနွေးမှုများ ရှိလာရေးအတွက် နစက အနေနှင့်လည်း တွေ့ဆုံဆွေးနွေးမှု နည်းလမ်းကို ပိုမိုခိုင်မာအောင် ဆောင်ရွက်ရန်၊ နိုင်ငံတကာ အသိုင်းအဝိုင်းမှတဆင့် တိုက်တွန်းပေးရန် စသည့်ကိစ္စများကိုလည်း ဆွေးနွေးခဲ့ သည်ဟု ၎င်းက ပြောသည်။

၂၀၂၂ ခုနှစ်၊ ဖေဖော်ဝါရီ ၁၂ ရက်နေ့က ဦးကိုကိုကြီးနဲ့ နစကဥက္ကဋ္ဌကို တွေ့ရစဉ်

ဦးကိုကိုကြီးက “ကျနော်တို့က မြန်မာနိုင်ငံ ပြုပြင်ပြောင်းလဲဖို့အတွက် စိတ်ဝင်တစားနဲ့ အားပေးကြတာ ထောက်ခံကြတာ တွေ အားလုံးကို ကျေးဇူးတင်တယ်၊ သို့သော် တစ်ချိန်တည်းမှာ နိုင်ငံကို ထိခိုက်နာကျင်မှု အနည်းဆုံးနဲ့ ပြုပြင်ပြောင်းလဲနိုင်ဖို့ အတွက်က နိုင်ငံရေးနည်းလမ်း ပြန်ပြီးတော့ အသက်ဝင်လာဖို့ လိုတယ်၊ အဲဒီတော့ ဒီနစက အနေနဲ့လည်း တွေ့ဆုံဆွေးနွေးမှု လမ်းကြောင်းကို ပိုပြီးတော့ ဒီထက် ထိထိရောက်ရောက် ခိုင်ခိုင်မာမာ ဆောင်ရွက်ဖို့ လိုတယ်ဆိုတာတွေကို ကျနော်တို့ ပြော ဖြစ်ပါတယ်၊ အဲဒီတော့ နိုင်ငံတကာ အသိုင်းအဝိုင်းကလည်း အဲဒါကို ဝိုင်းပြီးတော့ တိုက်တွန်းကြဖို့၊ နောက်တစ်ခုကတော့ အခု ဒီအကျပ်အတည်းကို ကျော်လွှားဖို့အတွက်က အသွင်ကူးပြောင်းရေးကာလပေါ့၊ ကြားကာလ ဖြေရှင်းမှု တစ်ရပ်ရရှိဖို့ အတွက် ကို အဓိက ကျနော်တို့ ဦးစားပေးပြီးတော့ ကြိုးပမ်းသွားမှာ ဖြစ်ပါတယ်”ဟု ပြောသည်။

လက်ရှိ မြန်မာ့နိုင်ငံရေး အကျပ်အတည်းကို ဖြေရှင်းနိုင်ရန်အတွက် နိုင်ငံတကာက အာဆီယံအား ဗဟိုချက်မအဖြစ် ထား၍ ကြိုးပမ်းလျက်ရှိနေကြောင်း၊ မတ်လ ၂၀ ရက်မှ ၂၃ ရက်အထိ အာဆီယံ၏ မြန်မာနိုင်ငံဆိုင်ရာ အထူးကိုယ်စားလှယ် မစ္စတာ ပရတ်ဆိုခွန် မြန်မာနိုင်ငံသို့ လာရောက်မည်ဖြစ်ကြောင်း၊ ထိုခရီးစဉ်အတွင်း တွေ့ဆုံသင့် တွေ့ဆုံထိုက်သူများကို တွေ့ဆုံခွင့် ပေးရန်လည်း အာဆီယံအထူးကိုယ်စားလှယ်က တောင်းဆိုထားကြောင်း သိရသည်။

အဆိုပါ အာဆီယံအထူးကိုယ်စားလှယ်၏ ခရီးစဉ်တွင် တိုင်းရင်းသားလက်နက်ကိုင် အဖွဲ့အစည်းများ ပြည်တွင်းမှ နိုင်ငံရေး ပါတီများနှင့် တွေ့ဆုံဖွယ်ရှိကြောင်း သိရသည်။

CNI News

၂၀၂၂ ခုနှစ်၊ မတ်လ ၁၄

လက်ရှိ ဆင်နွှဲနေသည့် နွေဦးတော်လှန်ရေးသည် မြန်မာနိုင်ငံအတွက် သမိုင်းအလှည့်အပြောင်းကို ဖန်တီးမည့် တော်လှန်ရေး ဖြစ်ကြောင်း အမျိုးသားညီညွတ်ရေးအစိုးရ(NUG)၏ ကာကွယ်ရေးဝန်ကြီးဌာနမှ ထုတ်ပြန်ခဲ့သည်။

ပြည်သူ့ခုခံတွန်းလှန်စစ် ဆင်နွှဲခဲ့သည့် (၆)လပြည့် အစီရင်ခံစာကို ယနေ့ (မတ်လ ၁၄ ရက်)တွင် အထက်ပါအတိုင်း ထုတ်ပြန် ခဲ့သည်။
NUG က “ကျနော်တို့ ဆင်နွှဲနေတဲ့ တော်လှန်ရေးဟာ မြန်မာနိုင်ငံအတွက် သမိုင်းအလှည့်အပြောင်းကို ဖန်တီးမယ့် တော်လှန် ရေး ဖြစ်ပါတယ်။ ဒီတော်လှန်‌ရေးမှာ ပါဝင်ခွင့်ရခြင်းဟာ PDF ရဲဘော်များ အပါအဝင် ကျနော်တို့ အားလုံးအတွက် ဂုဏ်ယူစရာ ဖြစ်ပါတယ်၊ တော်လှန်ရေး မအောင်မခြင်း အဆုံးအထိ သွားမယ်ဆိုတဲ့ စိတ်ဒုံးဒုံးချထားနိုင်ဖို့ အရေးကြီးပါတယ်” ဟု ထုတ်ပြန် ချက်တွင် ဖော်ပြထားသည်။

ထို့အတူ တစ်ဦးချင်း၏ နိုင်ငံရေးခံယူချက်နှင့် စိတ်ဓါတ်ခိုင်မာမှု အထူးလိုအပ်ကြောင်း၊ တပ်မတော်ဘက်မှ ရုပ်ဝတ္ထုအင်အား အရ မိမိတို့ထက် သာလွန်သော်လည်း PDF ရဲဘော်များနှင့် ပြည်သူများ၏ မဆုတ်မနှစ်သည့် ဇွဲသတ္တိနှင့် ဉာဏ်ပညာကို မုချ ဒူးထောက် အရှုံးပေးရမှာဖြစ်ကြောင်း ဖော်ပြထားသည်။

နိုင်ငံသမိုင်း အလှည့်အပြောင်းဆိုပါက NUG တစ်ဖွဲ့တည်း မဖြစ်နိုင်ကြောင်း၊ အစိတ်အပိုင်း တစ်ရပ်အနေဖြင့်တော့ ဖြစ်နိုင် ကြောင်း တိုင်းရင်းသားလက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီးခွန်ဥက္ကာက ပြောသည်။

နွေဦးတော်လှန်ရေး သပိတ်(AFP)

ဗိုလ်မှူးကြီးခွန်ဥက္ကာက “ကျနော်တွက်တာတော့ သူတို့ချည်းပဲ သပ်သပ်တော့ အလှည့်အပြောင်းတော့ မဖြစ်နိုင်ဘူး၊ အလှည့် အပြောင်း ဖြစ်မယ့် အစိတ်အပိုင်း တစ်ရပ်ဆိုရင် ဖြစ်နိုင်ပါတယ်။ အလှည့်အပြောင်း ဖြစ်ဖို့အတွက် အစိတ်အပိုင်း တစ်ရပ်ပေါ့ ဗျာ၊ အဲဒီလို အင်အားတစ်ရပ်ဆိုရင်တော့ ဖြစ်နိုင်ပါတယ်။ သူချည်းပဲ သပ်သပ်တော့ အလှည့်အပြောင်းကတော့ ကျနော့် အတွေ့အကြုံအရပေါ့လေ။ မလွယ်ကူဘူးလို့ ထင်ပါတယ်”ဟု ပြောသည်။

ထိုသို့ ပြောခြင်းမှာ စိတ်ဓာတ် ခွန်အားတက်ရန် ပြောခြင်းလည်း ဖြစ်နိုင်ကြောင်း၊ ထို့အတူ လက်နက်ကိုင် ပဋိပက္ခကြောင့် ဖြစ်ပေါ်လာသည့် တိုက်ပွဲရှောင်များကို အကူအညီပေးနိုင်ရေးကိုလည်း ထည့်သွင်းစဉ်းစားရန် လိုအပ်ကြောင်း ၎င်းက ပြော သည်။

အကယ်၍ နွေဦးတော်လှန်ရေး အောင်မြင်ခဲ့ပါက ထိုအောင်မြင်မှုသည် သမိုင်းဝင် အောင်မြင်မှု ဖြစ်သွားမှာဖြစ်ကြောင်း နိုင်ငံရေးလေ့လာသုံးသပ်သူ ဦးရဲထွန်းက ပြောသည်။

ဦးရဲထွန်းက “ဟုတ်တယ်၊ သူတို့ အောင်ပွဲရလို့ရှိရင်‌တော့ ဒီဟာက မြန်မာနိုင်ငံအတွက် သာမက ကျနော်တို့ ကမ္ဘာ့သမိုင်းမှာပါ၊ ဒါကတော့ တစ်ခုပေါ့၊ မှတ်တမ်းတင်ရမယ့် ကိစ္စတစ်ခု၊ သမိုင်းဝင်ဖြစ်ရပ် တစ်ခုဖြစ်သွားမှာပေါ့၊ ဘာဖြစ်လို့တုန်းဆိုတော့ ဒီလို မျိုး နယ်ချဲ့ခုခံရေးစစ်ပွဲ မဟုတ်ဘဲနဲ့ ဒီကိုယ့်အမျိုးသား အချင်းချင်းပေါ့၊ ဒီအာဏာရှင်တိုက်တဲ့ စစ်ပွဲမျိုးက သမိုင်းမှာတော့ အောင်မြင်ခဲ့တဲ့ဟာ မရှိခဲ့ဖူးဘူးလေ။ သမိုင်းမှာ ရှိခဲ့တဲ့ အောင်ပွဲတွေကတော့ နယ်ချဲ့ဆန့်ကျင်ရေး စစ်ပွဲတွေ အဲမှာပဲ အောင် မြင်ခဲ့တာဆိုတော့ တကယ်လို့ အောင်မြင်ခဲ့တယ်ဆိုရင် ဒါသူတို့ပြောသလို သမိုင်းဝင်ဖြစ်ရပ် ဖြစ်သွားမှာပေါ့”ဟု ပြောသည်။

နွေဦးတော်လှန်ရေး လက်နက်ကိုင်တိုက်ပွဲ၀င်နေတဲ့ ကယားပြည်နယ်က PDF များ(AFP)

တော်လှန်ရေးမှာ အောင်မြင်မှု မရရှိဘဲ ရေရှည်ဆက်သွားနေပါက အဆုံးတွင် တွေ့ဆုံဆွေးနွေးရေးဖြင့် ညှိနှိုင်းလုပ်ဆောင်ရမှာ ဖြစ်ကြောင်းလည်း ၎င်းက ပြောသည်။

PDF များသည် ပြည်သူများ၏ မျှော်လင့်ချက်ဖြစ်ကြောင်း၊ ထို့အတူ တော်လှန်ရေး၏ အဓိက မောင်းနှင်အားလည်း ဖြစ် ကြောင်း NUG ၏ ထုတ်ပြန်ချက်တွင် ‌ဖော်ပြထားသည်။

လက်ရှိတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကရင်ပြည်နယ်နှင့် ကယားပြည်နယ်တို့တွင် တပ်မတော်နှင့် တိုင်းရင်းသား လက်နက်ကိုင်တပ်ဖွဲ့များ၊ ဒေသကာကွယ်ရေးတပ် (PDF) ပူးပေါင်းတပ်တို့အကြား တိုက်ပွဲများ ဖြစ်ပွားလျက်ရှိသည်။