CNI News

၂၀၂၃ ခုနှစ်၊ မေလ ၆

နိုင်ငံရေးပါတီများအနေဖြင့် သံတမန်များနှင့် တွေ့ဆုံမည်ဆိုပါက ပြည်ထောင်စု ရွေးကောက်ပွဲ ကော်မရှင် (UEC) ၏ရှေ့တွင် တွေ့ဆုံရမည်ဟု နိုင်ငံရေးပါတီများ အသိုင်းအဝန်းကြားမှာ သတင်းထွက်ပေါ်နေသည်။

ထိုကန့်သတ်ချက်မှာ လက်ရှိ ဖြစ်ပေါ်နေသည့် နိုင်ငံရေး အကျပ်အတည်းကြောင့် ဖြစ်နိုင်ကြောင်း လီဆူ အမျိုးသား ဖွံ့ဖြိုးတိုးတက်ရေးပါတီမှ ဥက္ကဋ္ဌ ဦးလီပေါ်ယဲ့က CNI သတင်းဌာနသို့ ပြောသည်။

၎င်းက “ဒါကတော့ အခု UEC လက်ရှိ နိုင်ငံရေးအခြေအနေ၊ နိုင်ငံရေး အကျပ်အတည်းတွေကြောင့် ဖြစ်မှာပါ။ တကယ်တမ်းတော့ ပါတီတွေကတော့ လွတ်လွတ်လပ်လပ် တွေ့ဆုံခွင့် ရှိပြီးသားပါ၊ ဒါပေမဲ့ လက်ရှိ နိုင်ငံရေး အခြေအနေပေါ်မှာ မူတည်ပြီးမှ သူတို့ အဲဒီဟာလေးတွေ ကြိုတင် သတ်မှတ်ချက်လေးတွေ လုပ်ထား၊ ကာထား တယ်လို့ မြင်တယ်လေနော်၊ ကျနော်တို့ကတော့ အဲဒီလိုမြင်တယ်လေ၊ ရွေးကောက်ပွဲ လုပ်ပြီးမှ လွှတ်တော် ထွက် လာမယ် ဘယ်အစိုးရပဲ တက်တက်ပါ၊ အဓိကတော့ လွှတ်တော်ကြီးရှိဖို့ လိုတယ်လေ၊ လွှတ်တော်ရှိမှ ဒီဟာတွေ က လွှတ်တော်ထဲကနဲ့ပဲ အမိန့်အာဏာတွေက တရားသော အမိန့်အာဏာဖြစ်ဖို့အတွက် လွှတ်တော်ရှိမှ လွှတ်တော်ကနေ တဆင့် ဒါတွေ ထိန်းကျောင်းလို့ ရတယ်လေ၊ အဲဒီတော့ လွှတ်တော် မရှိဘူးဆိုရင်တော့ အခုလိုပဲ ပေါ့၊ ရှင်းရှင်း ပြောမယ်ဆိုရင်တော့ တစ်ဖက်သတ် အမိန့်အာဏာပဲ ရှိလာမှာပဲလေ၊ လွှတ်တော် ရှိတာကတော့ ကျနော်တို့ ပြည်သူလူထုအတွက်ပဲ တစ်ပန်းသာမှာပေါ့ကွာ၊ နိုင်ငံရေးပါတီ အတွက်လည်း အခုလို ကိစ္စတွေက တကယ်တမ်း ရွေးကောက်ပွဲပြီးလို့ လွှတ်တော်ရှိလာရင် ဒီဟာတွေက ပျောက်သွားမှာပဲလေ” ဟု ပြောသည်။

၂၀၂၂ ခုနှစ်၊ ဇူလိုင်လက အာဆီယံအထူးကိုယ်စားလှယ် ပရတ်ဆိုခွန်နဲ့ နိုင်ငံရေးပါတီများတွေ့ဆုံနေစဉ်

နိုင်ငံရေးပါတီများ နိုင်ငံတကာ သံတမန်များနှင့် တွေ့ဆုံမည်ဆိုလျှင် UEC အရှေ့မှာ တွေ့ရမည်ဆိုသော ကန့်သတ် ချက်လုပ်ထားသည်ဆိုသော သတင်းထွက်ပေါ်မှုနှင့် ပတ်သက်၍ ပြည်ထောင်စုရွေးကောက်ပွဲကော်မရှင်(UEC)ထံ CNI သတင်းဌာနက မေးမြန်းထားသော်လည်း ပြန်လည် ဖြေကြားခြင်း မရှိသေးပေ။

နိုင်ငံရေးပါတီများ နိုင်ငံတကာ သံတမန်များနှင့် တွေ့မည်ဆိုပါက UEC အရှေ့မှာ တွေ့ရမည်ဆိုသော ကန့်သတ် ချက်ကို တရားဝင် နိုင်ငံရေးပါတီများထံသို့ စာပို့ ကန့်သတ်ခြင်းမဟုတ်ဘဲ ၎င်း၏ရုံးရှိ ဝှိုက်ဘုတ်တွင် ရေးသားထား ခြင်းဖြစ်ကြောင်း မျက်မြင်ကိုယ်တွေ့ မြင်ခဲ့သည့် နိုင်ငံရေးပါတီတစ်ခုမှ CNI သတင်းဌာနသို့ ပြောသည်။

နိုင်ငံရေးပါတီများ သံတမန်နှင့် တွေ့ဆုံပါက UEC ပါရမည်ဆိုသည်မှာ နိုင်ငံ‌ရေးပါတီများကို ကန့်သတ်ချုပ်ခြယ်မှု များပြားနေကြောင်း ကရင်အမျိုးသားဒီမိုကရက်တစ်ပါတီ ဥက္ကဋ္ဌ မန်းအောင်ပြည့်စိုးက CNI သတင်းဌာနသို့ ပြော သည်။

ပြည်ထောင်စုရွေးကောက်ပွဲ ကော်မရှင်ရုံးကို တွေ့ရစဉ်

မန်းအောင်ပြည့်စိုးက “ဒီဟာကြီးကြတော့ နည်းနည်းလေး ကျနော်တို့ကို ချုပ်ထားတာ နည်းနည်းများ များနေ မလားပေါ့၊ ချုပ်ထားတာ များနေမလားပေါ့လေ၊ အရင်တုန်းကတော့က ကျ‌နော်တို့ တွေ့ကြုံဖူးတယ်၊ နိုင်ငံခြား သံတမန်တွေနဲ့ ဘယ်သူမှ ဘာမှ မပြောဘူး။ နောက်ပြီးတော့ ကျနော်တို့ဆီ တရားဝင်စာနဲ့ ပေနဲ့တော့ မတွေ့ရ သေးဘူးဗျ၊ သူတို့ရုံးမှာပဲ ချိတ်ထားတယ်ဆိုလို့ရှိရင်လည်း တစ်ပြည်လုံးက ပါတီတွေက အဲဒီမှာ ရှိတာမှ မဟုတ် တာ တစ်ပြည်လုံးအနှံ့ရှိနေတဲ့ အခါကြတော့ သိချင်မှ သိမယ်၊ အဲဒီတော့က ကျ‌နော်ပြောချင်တာတော့ အရင်တုန်း ကတော့ ကျနော်တို့ လွတ်လွတ်လပ်လပ် တွေ့ဆုံခွင့်ရှိတယ် အခု အဲဒီလိုဆိုရင်တော့လည်း တစ်မျိုးတော့ တစ်မျိုး လေးပေါ့ဗျာ၊ သူတို့ရည်ရွယ်ချက်က ဘာလဲဆိုတော့ ကျနော်လည်း ပြောလို့မရသေးဘူးပေါ့နော်” ဟု ပြောသည်။

မြန်မာနိုင်ငံအတွင်းရှိ မှတ်ပုံတင်ထားသော နိုင်ငံရေးပါတီများအနေဖြင့် နိုင်ငံခြားအဖွဲ့အစည်းများနှင့် တွေ့ဆုံမည် ဆိုပါက ပြည်ထောင်စုရွေးကောက်ပွဲကော်မရှင်(UEC)သို့ အကြောင်းကြားရမည်ဟု နိုင်ငံရေးပါတီများသို့ UEC က ၂၀၂၂ ခုနှစ်၊ သြဂုတ် ၁၁ ရက်က စာပို့ အကြောင်းကြားထားသည်။

CNI News

၂၀၂၃ ခုနှစ်၊ မေ ၅

ကရင်အမျိုးသားအစည်းအရုံး (KNU)၏ ခေါင်းဆောင် အပြောင်းအလဲကြောင့် ပိုမိုကောင်းမွန်သည့် စည်းရုံးမှု တစ်ခုကို ‌ရောက်ရှိသွားမည်ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ယခင် KNU ဥက္ကဋ္ဌ ဖြစ်သူ ဗိုလ်ချုပ်ကြီးစောမူတူးစေးဖိုး ပြန်လည် အရွေးမခံခြင်းမှာလည်း ကောင်းမွန်ကြောင်း၊ လက်ရှိ‌ နွေဦးတော်လှန်‌ရေးအပေါ် KNU ခေါင်းဆောင် အပြောင်းအလဲက သက်ရောက်မှုရှိမည်ဖြစ်ကြောင်း ၎င်းက ပြောသည်။

ဦးသန်းစိုးနိုင်က “ကျနော်တို့က တကယ်တမ်းကြတော့ နွေဦးတော်လှန်ရေးနဲ့ ကိုက်ညီတဲ့ ခေါင်းဆောင်ကတော့ နော်စီဖိုးရာစိန်တို့ အုပ်စုပဲလို့ ကျနော်တော့ သဘောပေါက်ပါတယ်၊ ဒါပေမဲ့ အခု ပဒိုစောကွယ်ထူးဝင်းလည်း မဆိုး ပါဘူး။ သူက ကြားသမားပေါ့ဗျာ၊ ကြားနေတာပေါ့၊ ပြင်းပြင်းထန်ထန် တိုက်တိုက်တွန်းတွန်း လုပ်တဲ့ ပုဂ္ဂိုလ်လည်း မဟုတ်ဘူး။ သူက အစွန်းရောက် လှုပ်ရှားမှုတွေလည်း မရှိဘူး။ နောက်ပြီးတော့ သက်တမ်းအရလည်း ဆိုလို့ရှိရင် လည်း သူက ဒုဥက္ကဋ္ဌဆိုတော့ သူက ဥက္ကဋ္ဌ နေရာပေးသင့်တဲ့သူ တစ်ယောက်ပေါ့ဗျာ၊ အဲဒါကြောင့် ဒီလို အပြောင်း အလဲ လုပ်လိုက်တာဟာ KNU အဖွဲ့အစည်းအတွက်တော့ ပိုမိုကောင်းမွန်တဲ့ ပိုမိုစည်းရုံးနိုင်တဲ့ အနေအထား တစ်ခု ကို ရောက်ရှိသွားနိုင်တယ်လို့ ယူဆပြီးတော့ ကြိုဆိုပါတယ်ခင်ဗျ” ဟု CNI သတင်းဌာနသို့ ပြောသည်။

ဗိုလ်ချုပ်ကြီးစောမူတူးစေးဖိုးကို တွေ့ရစဉ်

(၁၇)ကြိမ်မြောက် KNU ကွန်ကရက်မှ ဥက္ကဋ္ဌအဖြစ် ပဒိုစောကွယ်ထူးဝင်း၊ ဒုဥက္ကဋ္ဌ ပဒိုစောဆဲဂေ၊ အထွေထွေ အတွင်းရေးမှူးချုပ် ပဒိုစောတာဒိုမှူး၊ တွဲဘက်အတွင်းရေးမှူး (၁) ပဒိုစောသောသီဘွဲ၊ တွဲဘက်အတွင်းရေးမှူး (၂) ပဒိုစောလှထွန်း၊ ဗဟိုတရားသူကြီးချုပ်မှာ ပဒိုနော်မြိုင်ဖိုးတို့ ရွေးချယ်ခံခဲ့ရသည်။

လက်ရှိ ရွေးချယ်ခံရသူ အများစုမှာ အမာလိုင်းကို အားသန်သည့် ပုဂ္ဂိုလ်အများစုပါဝင်ကြောင်း ငြိမ်းချမ်းရေးနှင့် တော်လှန်ရေး မည်သည့်ဘက်ကို သွားမည်ဆိုသည်မှာ စောင့်ကြည့်ရမည်ဖြစ်ကြောင်း ကရင်အမျိုးသား ဒီမိုကရက် တစ်ပါတီဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

မန်းအောင်ပြည်စိုးက “အခုလူတွေ အများစုကတော့ အမာစားထဲက ဖြစ်နေတယ်ပေါ့ဗျာ၊ ပြောရမယ်ဆိုရင်တော့ Hard Liner ပေါ့။ Hard Liner ဆိုတော့ နည်းနည်း မာတဲ့အထဲက ဖြစ်တာပေါ့ဗျာ၊ မာတဲ့အထဲကဆိုတော့ ငြိမ်းချမ်း ရေးနဲ့ ပတ်သက်လို့ သူတို့ တင်းတင်းမာမာပဲ သွားမလား၊ ပျော့ပျော့ပြောင်းပြောင်းပဲ သွားမလား ဆိုတာကတော့ ခဏလေးတော့ စောင့်ကြည့်ရဦးမှာပေါ့လေ၊ မာတယ်လို့ ပြောပေမဲ့လည်း ပဒိုကွယ်ထူးဝင်းတို့က အရင်တုန်းက ဦးသိန်းစိန်တို့ လက်ထက်ကတည်းကိုက ငြိမ်းချမ်းရေးနဲ့ ပတ်သက်ပြီး တောက်လျှောက် လုပ်လာခဲ့တဲ့သူတွေ ဖြစ် နေတော့ အခြေအနေ အရပ်ရပ်ကို သူတို့က သိတော့ သိနေတယ်၊ ဒါပေမဲ့ အခုပါလာတဲ့ လူတွေ အတော်များများ ကတော့ လူလတ်ပိုင်းတွေ ဖြစ်နေတော့က နည်းနည်းမာတဲ့ တောနီးတို့ဘာတို့က သိတဲ့အတိုင်းပဲ ‌‌နောက် ဗိုလ်မှူးချုပ် တာမလာစောဆိုတာ လူငယ်ပဲ သူကလည်းပဲ ဒီလောက်မဆိုးဘူး။ အဲဒီတော့ ခဏလေးတော့ စောင့်ကြည့်ရမှာပေါ့လေ၊ လောလောလတ်လတ်ကြီးတော့ ကျနော် သုံးသပ်လို့ မကောင်းသေးဘူး။ သုံးသပ်လို့ မဖြစ်သေးဘူးပေါ့ဗျာ” ဟု ပြောသည်။

KNU ဒုဥက္ကဋ္ဌ အဖြစ်ရွေးချယ်ခံရသူ ပဒိုစောဆဲဂေကို တွေ့ရစဉ် (Salween Press)

KNU ၏ ဖွဲ့စည်းပုံ အခြေခံဥပဒေအရ ကွန်ဂရက်ကို လေးနှစ်တစ်ကြိမ် ကျင်းပရမည် ဖြစ်သော်လည်း ကိုဗစ်ကပ် ရောဂါနှင့် တပ်မတော်က အာဏာရယူပြီးနောက် ဖြစ်ပေါ်လာသည့် နိုင်ငံရေး အကျပ်အတည်းများကြောင့် ရွှေ့ ဆိုင်းခဲ့ရကြောင်း သိရသည်။

ကရင်အမျိုးသားအစည်းအရုံး (KNU)သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သ‌ဘောတူစာချုပ် (NCA) လက်မှတ် ရေးထိုးထားသည့် ကရင်လက်နက်ကိုင်တပ်ဖွဲ့ ဖြစ်သည်။

တခြားတစ်ဖက်မှာလည်း နွေဦးတော်လှန်ရေး အင်အားစုများကို လူသားချင်း စာနာထောက်ထားမှုအရ စောင့် ရှောက်ထားသလို PDF များနှင့် ပူးပေါင်း၍ မြန်မာ့တပ်မတော်ကို တိုက်ခိုက်လျက် ရှိနေသည်။

CNI News

၂၀၂၃ ခုနှစ်၊ မေ ၄

စစ်ကိုင်းတိုင်းဒေသကြီး အထက်ပိုင်း ဟုမ္မလင်းမြို့နယ်၊ မြင်သာကျေးရွာအနီးတွင် ဟုမ္မလင်း ပြည်သူ့ကာကွယ်ရေး တပ် (HPDF)နှင့် ဟုမ္မလင်းဒေသအတွင်း လှုပ်ရှားနေသော PDF ပူးပေါင်းတပ်နှင့် မြန်မာ့တပ်မတော်တို့အကြား ယနေ့ (မေလ ၄ ရက်) နံနက် ၁၀ နာရီခန့်က စတင် တိုက်ပွဲဖြစ်ပွားခဲ့ကြောင်း သိရသည်။

HPDF မှ မြင်သာကျေးရွာ အတွင်းသို့ ဝင်ရောက် စီးနင်းခဲ့ပြီးနောက် ယနေ့ ညနေ ၄ နာရီအထိ တပ်မတော်က လေယာဉ်ဖြင့် ပစ်ခတ်နေဆဲဖြစ်ကြောင်း ဒေသခံတစ်ဦးက CNI သတင်းဌာနကို ပြောသည်။

HPDF တပ်ဖွဲ့၀င်များကိုတွေ့ရစဉ် 

၎င်းက “ဒေသခံတွေ ပိတ်မိနေတာ၊ လေယာဉ်နဲ့ ဗုံးကြဲတာ အိမ်နောက်ဖေး ၄ လုံးလောက်ကျတာ၊ ခုထိ ကြဲနေတုန်း၊ မြင်သာတစ်ရွာလုံး PDF ဝင်စီးနေတာ” ဟု ပြောသည်။

ပြီးခဲ့သည့် ဧပြီ ၂၈ ရက်မှ စတင်ပြီး ဟုမ္မလင်းမြို့နယ်အတွင်း တိုက်ပွဲများ ဖြစ်ပွားနေကာ လက်ရှိအချိန်အထိ စစ်ရေးအရှိန် မြင့်နေဆဲဖြစ်ကြောင်း မြန်မာ့တပ်မတော်နှင့် တခြား လက်နက်ကိုင်အဖွဲ့များ တပ်ထိုင်သော နေရာများ၊ လုံခြုံရေး ကင်းထိုးသော နေရာများမှ ဝေးဝေးရှောင်ဖို့ HPDF မှ ယနေ့ မေလ ၄ ရက်နေ့မှာ ထုတ်ပြန် ခဲ့သည်။

လက်ရှိတွင် ဟုမ္မလင်းမြို့နယ်အတွင်း ဖုန်းလိုင်းများ ဖြတ်တောက်နေကြောင်း သိရသည်။

မြန်မာ့တပ်မတော်နှင့် ဟုမ္မလင်းပြည်သူ့ကာကွယ်ရေးတပ် (HPDF) ပူးပေါင်းတပ်တို့အကြား ဟုမ္မလင်းမြို့နယ် အတွင်း၌ မကြာခဏ တိုက်ပွဲများ ဖြစ်ပွားလေ့ရှိသည်။

CNI News

၂၀၂၃ ခုနှစ်၊ မေလ ၄

တရုတ်နိုင်ငံတော် ကောင်စီဝင်နှင့် တရုတ်နိုင်ငံခြားရေးဝန်ကြီး မစ္စတာကျင်းဂန်နှင့် ဗိုလ်ချုပ်မှူးကြီး(ငြိမ်း) သန်းရွှေတို့ မေလ ၂ ရက်က နေပြည်တော်မှာ တွေ့ဆုံ ဆွေးနွေးခဲ့ကြသည်ဟု တရုတ်နိုင်ငံပိုင် သတင်းဌာန တစ်ခု ဖြစ်သည့် CGTN က ရေးသား ဖော်ပြခဲ့သည်။

ဗိုလ်ချုပ်မှူးကြီး(ငြိမ်း) သန်းရွှေနှင့် တွေ့ဆုံခဲ့စဉ်တွင် မစ္စတာကျင်းဂန်က “တရုတ်သည် မြန်မာနိုင်ငံအတွက် အားကိုး၍ရသော အိမ်နီးချင်း ကောင်း၊ မိတ်ဆွေကောင်း၊ မိတ်ဖက်ကောင်း တစ်နိုင်ငံဖြစ်ကာ တည်ငြိမ်မှုကို ထိန်းသိမ်းရေးနှင့် ဖွံ့ဖြိုးတိုးတက်မှု မြှင့်တင်ရေးတို့အတွက် အစဉ်တစိုက် ထောက်ပံ့ပေးခဲ့ကြောင်း”ပြောသည်။

ထို့နောက် မစ္စတာကျင်းဂန်က ကိုယ်ပိုင်အခြေအနေများ၊ မြန်မာ့စရိုက်လက္ခဏာများ ပါဝင်သော ဖွံ့ဖြိုးတိုးတက်မှု လမ်းကြောင်းတစ်ခု ရှာဖွေရေးနှင့် နိုင်ငံရေး ပြုပြင်ပြောင်းလဲမှု လုပ်ငန်းစဉ် ခိုင်မာစွာ တိုးတက်လာစေရေးတို့ အတွက် ထောက်ပံ့သွားမည်ဟုလည်း ဗိုလ်ချုပ်မှူးကြီး(ငြိမ်း) သန်းရွှေနှင့်တွေ့ဆုံစဉ် ပြောခဲ့သည်။

၂၀၂၃ ခုနှစ်၊ မေလ ၂ ရက်က ဗိုလ်ချုပ်မှူးကြီး မင်းအောင်လှိုင်နဲ့ မစ္စတာကျင်းဂန် တွေ့ဆုံစဉ်

၎င်းက “ တရုတ်သည် မြန်မာနိုင်ငံ၏ အချုပ်အခြာအာဏာနှင့် နယ်မြေကို လေးစားကြောင်း၊ မြန်မာနိုင်ငံ၏ လွှတ်လပ်ရေးနှင့် ကိုယ်ပိုင်အုပ်ချုပ်ခွင့်တို့အား ထိန်းသိမ်းရေး၊ နိုင်ငံရေး တည်ငြိမ်မှုနှင့် စဉ်ဆက် မပြတ် ဖွံ့ဖြိုး တိုးတက်မှုတို့ ရရှိဖို့ ထိန်းသိမ်းရေးတို့တွင် ခိုင်မာစွာ ထောက်ပံ့ကူညီလျက်ရှိတယ်”ဟု ပြောသည်။

တရုတ်နိုင်ငံခြားရေးဝန်ကြီး မစ္စတာကျင်းဂန်သည် မြန်မာနိုင်ငံသို့ မေလ ၂ ရက်နေ့မှ ၄ ရက်ထိ ရောက်ရှိလာခဲ့သည်။

ထို့နောက် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၊ နစက၏ နိုင်ငံခြားရေးဝန်ကြီး ဦးသန်းဆွေတို့နှင့်တွေ့ဆုံ၍ စီးပွားရေး ဆိုင်ရာ ပူးပေါင်းဆောင်ရွက်ရေး၊ နယ်စပ်ဒေသတည်ငြိမ်အေးချမ်းရေးတို့ကို ဆွေးနွေးခဲ့သည်။

CNI News

၂၀၂၃ ခုနှစ်၊ မေလ ၄

အမျိုးသားညီညွတ်ရေးအစိုးရ (NUG) ကို ဖွဲ့စည်းပြီး ၂ နှစ်အတွင်းအရ မိမိတို့၏ တိုက်ခိုက်ရေး အင်အားသည် ရန်သူ့ထက် သာလွန်အင်အား ဖြစ်အောင် တည်ဆောက်နိုင်ခဲ့ကြောင်း NUG က ထုတ်ပြန်ခဲ့သည်။

ထို့အတူ မဟာမိတ် တိုင်းရင်းသား တော်လှန်ရေး အဖွဲ့များနှင့်အတူ ပူးပေါင်းကာ ဗဟိုကွပ်ကဲရေးနှင့် ပေါင်းစပ် ညှိနှိုင်းရေးကော်မတီ၊ ပူးပေါင်းညှိနှိုင်းရေးကော်မတီတို့ကို စုဖွဲ့လုပ်ဆောင်လျက်ရှိကြောင်း ဖော်ပြထားသည်။

NUG က “စစ်ရေးကဏ္ဍ တစ်ခုလုံးကို ကြည့်မယ်ဆိုရင် တစ်နိုင်ငံလုံးမှာ PDF တပ်ရင်းနဲ့ စစ်ကြောင်း စုစုပေါင်း (၃၀၀) ကျော် ၊ ရပ်ရွာအခြေပြု ပြည်သူ့ ကာကွယ်ရေးအဖွဲ့ (ပကဖ)များ ခြေကုတ်ယူထားတဲ့ မြို့နယ်ပေါင်း (၂၅၀) ကျော်နဲ့ စနစ်တကျ ဖွဲ့စည်းတည်ထောင်ထားပြီး လူအင်အား (Man Power) အရ မိမိတို့ရဲ့ တိုက်ခိုက်ရေး အင်အား သည် ရန်သူ့ထက် သာလွန်အင်အား ဖြစ်အောင် ဤအချိန် (၂) နှစ်အတွင်း စုဖွဲ့တည်ဆောက်နိုင်ခဲ့ပါတယ်” ဟု ပြောသည်။

မြန်မာ့တပ်မတော်ကို တွေ့ရစဉ်

NUG ဖွဲ့စည်းပြီး (၂) နှစ်တာ ကာလအတွင်း မဟာမိတ် ERO များနှင့် ခုခံတော်လှန်စစ် ပူးပေါင်း ဆောင်ရွက်မှုများ မှတဆင့် စနစ်ကျသော ထိန်းချုပ်ကွပ်ကဲမှု စနစ်တစ်ခုအောက်တွင် စစ်ဆင်ရေး နယ်မြေအလိုက် Chain of Command တည်ဆောက်ခြင်းများ ဆောင်ရွက်လျက်ရှိသည်ဟု ဖော်ပြထားသည်။

နိုင်ငံတစ်ဝှမ်းရှိ PDF များအားလုံး NUG ၏ လက်အောက်တွင် မရှိသေးဟု ယူဆကြောင်း၊ သို့သော်လည်း တစ်စု တစ်စည်းတည်း ဖြစ်လာပါက အားကိုးရသည့် တပ်မတော်တစ်ရပ် ဖြစ်လာမည်ဖြစ်ကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

ဦးဖေသန်းက “တစ်နိုင်ငံလုံးမှာရှိတဲ့ PDF တွေအားလုံး NUG ရဲ့အောက်မှာ တစ်စုတစ်စည်း၊ တစ်စုတစ်ဖွဲ့တည်း အဲလို စုစည်း ထားနိုင်တယ်ဆိုရင်‌တော့ အဲဒီလိုပြောလို့ ရတာပေါ့၊ အခုနေမှာတော့ သူတို့အောက်မှာ ရှိကောင်း ရှိလိမ့်မယ်၊ တချို့အဖွဲ့တွေလည်း သူ့ဟာနဲ့တူ သီးခြားရှိနိုင်မယ်၊ အဲဒါတွေကို စည်းရုံးပြီးတော့ တစ်ဖွဲ့ထဲဖြစ်အောင် NUG ရဲ့ ကာကွယ်ရေးဝန်ကြီး‌အောက်မှာ တကယ့် standard army တစ်ခု ပုံဖော်ဖို့အထိ တဖြည်းဖြည်း ဖြစ်လာ အောင်ပေါ့၊ အင်အားစုတွေကို စုစည်းထားနိုင်ဖို့က အရေးကြီးဆုံး လုပ်ရမယ့် လုပ်ငန်းလို့ ကျနော်တို့ မြင်တယ်၊ အခုတော့ သူတို့ပြောသလောက် ဒီ PDF တွေ အားလုံးဟာ သူတို့ရဲ့ လက်အောက်မှာကြီး မဟုတ်ဘူးလို့ ကျနော်တို့ က ယူဆတယ်၊ ဘာပဲဖြစ်ဖြစ် အဲဒီလို လုပ်နိုင်မယ်ဆိုရင်တော့ အကောင်းဆုံးပဲ အင်အား ဘယ်လောက်ရှိတယ်၊ တပ်မတော်တစ်ခုကို ဖွဲ့စည်းတည်ထောင် နိုင်မလဲပေါ့၊ အဲဒီလို ခြေလှမ်းမျိုးလည်း လုပ်သင့်တယ်၊ အဲဒီလို အခြေ အနေမျိုး ဖြစ်လာမယ်ဆိုရင်တော့ တကယ့် အင်အားကြီးတစ်ရပ် NUG အောက်မှာ တကယ့် Army အားကိုးရတဲ့ တပ်မတော်တစ်ခု ဖြစ်လာမယ်လို့ ပြောလို့ရပါတယ်” ဟု ပြောသည်။

မြန်မာ့တပ်မတော်ကို တော်လှန်ရန် စစ်သင်တန်း တက်နေကြသူများကိုတွေ့ရစဉ်

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်မှ အမျိုးသားဒီမိုကရေစီအဖွဲ့ချုပ် (NLD) အစိုးရကို မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချခဲ့သည်။

ထို့နောက် မြန်မာ့တပ်မတော်အား ဖြုတ်ချနိုင်ရေး အမျိုးသားညီညွတ်ရေးအစိုးရ (NUG)ကို ဖွဲ့စည်းကာ တော်လှန် တိုက်ခိုက်လျက်ရှိပြီး လက်ရှိတွင် NUG ဖွဲ့စည်းမှု ၂ နှစ်ပြည့်ခဲ့ပြီဖြစ်သည်။

CNI News
၂၀၂၃ ခုနှစ်၊ မေလ ၂

မြန်မာနိုင်ငံကို ရောက်ရှိနေသည့် တရုတ်နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး မစ္စတာကျင်းဂန် (H.E.Mr.Qin Gang)နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ မေလ ၂ ရက်နေ့က နေပြည်တော်မှာ တွေ့ဆုံခဲ့သည်။

ထိုသို့ တွေ့ဆုံ နှစ်နိုင်ငံ သံတမန် ဆက်ဆံမှုနှင့် ချစ်ကြည်ရင်းနှီးမှု၊ ပူးပေါင်းဆောင်ရွက်မှုများ ပိုမို မြှင့်တင်ဆောင် ရွက်ရေး၊ မြန်မာနိုင်ငံ၏ နိုင်ငံရေးအခြေအနေများ၊ နိုင်ငံတည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးအတွက် ဆောင်ရွက်လျက်ရှိမှု အခြေအနေများ၊ နယ်စပ်ဒေသ တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေး၊ နယ်စပ်ကုန် သွယ်မှုများ မြှင့်တင်ရေး အခြေအနေများ၊ စွမ်းအင်နှင့်လျှပ်စစ် ကဏ္ဍဖွံ့ဖြိုးတိုးတက်ရေး ပူးပေါင်းဆောင်ရွက်မည့် အခြေအနေများကို ဆွေးနွေးခဲ့ကြောင်း နစကဘက်က သတင်းထုတ်ပြန်ခဲ့သည်။

ထို့နောက် ရင်းနှီးမြှုပ်နှံမှုများ တိုးမြှင့်ဆောင်ရွက်နိုင်ရေး ဆက်လက် ဆောင်ရွက်သွားမည့် အခြေအနေများနှင့် နိုင်ငံရေးကဏ္ဍ၊ နိုင်ငံခြားရေးကဏ္ဍနှင့် ဖွံ့ဖြိုးတိုးတက်ရေးကဏ္ဍများတွင် ပူးပေါင်းဆောင်ရွက်သွားမည့် အခြေအ နေများကိုလည်း ဆွေးနွေးခဲ့ကြောင်း သိရသည်။

၂၀၂၃ ခုနှစ်၊ မေလ ၂ ရက်နေ့က  ဗိုလ်ချုပ်မှူးကြီးမင်းအောင်လှိုင်နှင့် တရုတ်နိုင်ငံခြားရေးဝန်ကြီး မစ္စတာကျင်းဂန် တွေ့ဆုံစဉ်

မစ္စတာကျင်းဂန်က “ ယခုကဲ့သို့ ခရီးစဉ်လာရောက်မှုမှာ နှစ်နိုင်ငံ ချစ်ကြည်ရင်းနှီးမှုကို ဖော်ပြနေသည် သာမက တရုတ်နိုင်ငံအနေဖြင့် နိုင်ငံတကာ မျက်နှာစာတွင် မြန်မာနိုင်ငံဘက်မှ ရပ်တည်နေမှုကို ပြသခြင်းပင် ဖြစ် ကြောင်း” ပြောသည်။

တရုတ်နိုင်ငံခြားရေးဝန်ကြီး မစ္စတာကျင်းဂန်သည် မြန်မာနိုင်ငံသို့ မေလ ၂ ရက်နေ့မှ ၄ ရက်အထိ ခရီးစဉ်အဖြစ် ရောက်ရှိနေခြင်းဖြစ်သည်။

ထိုခရီးစဉ်အတွင်း ပုဂံ-ညောင်ဦးသို့လည်း သွားရောက်မည်ဖြစ်ကြောင်း သိရသည်။

CNI News

၂၀၂၃ ခုနှစ်၊ မေလ ၂

ကရင်အမျိုးသားအစည်းအရုံး (KNU)၏ ဥက္ကဋ္ဌအဖြစ် ပဒိုစောကွယ်ထူးဝင်းကို ယနေ့ (မေလ ၂ ရက်) နေ့မှာ ရွေးချယ်တင်မြောက်လိုက်ကြောင်း သိရသည်။

KNU ၏ ၁၇ ကြိမ်မြောက် ကွန်ကရက်မှ ရွေးချယ်တင်မြောက်ခဲ့ခြင်းဖြစ်ပြီး လက်ရှိတွင် KNU ၏ ၁၀ ဦးမြောက် ဥက္ကဋ္ဌ ဖြစ်ကြောင်း သိရသည်။

ခေတ်အဆက်ဆက် KNU ဥက္ကဋ္ဌ အဖြစ် တာဝန်ယူခဲ့သူများမှာ စောစံဖိုးသင် ၁၉၄၇ မှမေလထိ၊ စောဘဦးကြီး ၁၉၄၇ မှ ၁၉၅၀၊ စကောလယ်တော ၁၉၅၀ မှ ၁၉၅၃၊ စောဟံတာသာမွေး ၁၉၅၃ မှ ၁၉၆၃၊ မန်းဘဇန် ၁၉၆၃ မှ ၁၉၇၅၊ စောဘိုမြ ၁၉၇၆ မှ ၂၀၀၀၊ စောဘသင်စိန် ၂၀၀၀ မှ ၂၀၀၈၊ စောတာမလာဘော ၂၀၀၈ မှ၂၀၁၂၊ စောမူတူး စေးဖိုး ၂၀၁၂ မှ ၂၀၂၃ ခုနှစ်၊ ဧပြီလထိ ဖြစ်သည်။

၂၀၁၅ ခုနှစ်၊ အောက်တိုဘာ ၁၅ ရက်နေ့က  NCA စာချုပ်လက်မှတ်ထိုးစဉ် ပဒိုစောကွယ်ထူးဝင်းကို တွေ့ရစဉ်

KNU ၏ ဖွဲ့စည်းပုံ အခြေခံဥပဒေအရ ကွန်ဂရက်ကို လေးနှစ်တစ်ကြိမ် ကျင်းပရမည် ဖြစ်သော်လည်း ကိုဗစ်ကပ် ရောဂါနှင့် တပ်မတော်က အာဏာရယူပြီးနောက် ဖြစ်ပေါ်လာသည့် နိုင်ငံရေး အကျပ်အတည်းများကြောင့် ရွှေ့ဆိုင်းခဲ့ရကြောင်း သိရသည်။

KNU ၏ ကွန်ကရက်ကို ပြီးခဲ့သည့် ဧပြီလကုန်ပိုင်းက စတင်ကျင်းပခဲ့ရာ ဥက္ကဋ္ဌကို ရွေးချယ်ခဲ့ခြင်း ဖြစ်သည်။ ထို့နောက် စစ်ဘက်ဆိုင်ရာ အစည်းအဝေးများကို ဆက်လက် ပြုလုပ်သွားမည်ဖြစ်ကြောင်း သိရသည်။

ကရင်အမျိုးသားအစည်းအရုံး (KNU) သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သ‌ဘောတူစာချုပ် (NCA) လက်မှတ်ရေးထိုးထားသည့် ကရင်လက်နက်ကိုင် တပ်ဖွဲ့ဖြစ်သည်။

KNU ဥက္ကဋ္ဌအဖြစ် ပဒိုစောကွယ်ထူးဝင်း ရွေးချယ်ခံရခြင်းကြောင့် လက်ရှိ KNU ၏ စစ်ရေး-နိုင်ငံရေး ရပ်တည်ချက် များ မည်သို့ အပြောင်းအလဲများ ဖြစ်လာမလဲဆိုသည့်အပေါ် အားလုံးက သတိကြီးကြီး စောင့်ကြည့်နေကြသည်။

CNI News

၂၀၂၃ ခုနှစ်၊ မေလ ၂

ပြည်တွင်းရှိ လက်နက်ကိုင် အဖွဲ့အစည်းများကို နှိမ်နင်းလို၍ ကာကွယ်ရေး အသုံးစရိတ်အား တိုးမြှင့်လိုက်ခြင်း ဖြစ်နိုင်ကြောင်း တိုင်းရင်းသားလက်နက်ကိုင် ‌ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်း ဌာနသို့ ပြောသည်။

မြန်မာပြည်မှာ ပြည်ပရန် လုံးဝ မ‌ရှိကြောင်း၊ ထို့ကြောင့် ပြည်တွင်း လက်နက်ကိုင် ပဋိပက္ခများကို နှိမ်နင်းလို၍ ဖြစ်ကြောင်း ၎င်းက ပြောသည်။

ဗိုလ်မှူးကြီး ခွန်ဥက္ကာက “ပြည်တွင်းမှာ လက်နက်ကိုင်ပဋိပက္ခတွေ အနှံ့အပြား ဖြစ်နေတယ်လေဗျာ၊ ဒါကြောင့် ဒီဟာတွေနဲ့ ယှဉ်ပြိုင်ဖို့ နည်းနည်းလေး တည်ငြိမ် အေးချမ်းမှုရအောင် ပြန်လုပ်ချင်တယ်ဆိုရင် နည်းနည်းတော့ အသုံးစရိတ်ပေးတဲ့ သဘောလို့ ယူဆပါတယ်။ ပြည်မရန် ဗမာပြည်မှာ ပြည်ပရန် မရှိပါဘူးဗျာ၊ ပြည်ပရန် လုံးဝ မရှိပါဘူး ဗမာပြည်မှာ ဘာကြောင့်လဲဆိုတော့ အမေရိကန်ရဲ့ NDAA ကလည်း ဗမာပြည်တွင်းကို ဝင်ဖို့အကြောင်း မရှိပါဘူး။ ထို့အတူပဲ တရုတ်က အိမ်နီးနားချင်းဖြစ်နေတော့ တရုတ်ကလည်း ဘယ်သူမှ အဝင်ခံမှာ မဟုတ်ပါဘူး၊ ဗမာပြည်တွင်းရေးမှာ ထို့အတူပဲ အိန္ဒိယဆိုရင်လည်း တရုတ်ရဲ့ နောက်လိုက်ဆိုတော့ အိန္ဒိယ၊ ဘင်္ဂလားဒေ့ရှ် အိမ်းနီးနားချင်းတွေလည်း ဗမာပြည်ကို ကျူးကျော်ဖို့ မရှိပါဘူး။ ဒါကြောင့် ပြည်ပရန်က လုံးဝ မရှိသလောက်ပါဘဲ။ ပြည်တွင်းမှာ ဖြစ်နေတဲ့ ပဋိပက္ခတွေကိုပဲ နှိမ်နင်းချင်တဲ့ သဘောလို့ ယူဆပါတယ်” ဟု CNI သတင်းဌာနသို့ ပြောသည်။

တိုင်းရင်းသားလက်နက်ကိုင် TNLA တပ်ဖွဲ့ကိုတွေ့ရစဉ်

၂၀၂၁ ခုနှစ်၊ ကာကွယ်ရေး အသုံးစရိတ်မှာ ၁၀ ဒသမ ၆၆ ရာခိုင်နှုန်း၊ ၂၀၂၂-၂၃ မှာ ၂၀ ဒသမ ၅၈ ရာခိုင်နှုန်း၊ ၂၀၂၃-၂၄ မှာ ၂၈ ဒသမ ၂၃ ရာခိုင်နှုန်း တိုးမြင့်ထားပြီး ကျပ်ဘီလီယံ ၅,၆၀၀ ကျော်အထိ သုံးစွဲရန် တောင်းခံထားသည်။

ထို့ကြောင့် ယခင်နှစ်ထက် ကျပ်ဘီလီယံ ၂,၀၀၀ နီးပါး တိုးမြှင့်လာခဲ့ကြောင်း ISP Myanmar ၏ ဖော်ပြချက်အရ သိရသည်။

တစ်နိုင်ငံလုံး လက်နက်ကိုင် ပဋိပက္ခများ ဖြစ်ပွားနေသည့်အတွက် ကာကွယ်ရေးအသုံးစရိတ် တိုးမြှင့်ခြင်း ဖြစ်နိုင်ကြောင်း မြန်မာ့နိုင်ငံရေး လေ့လာသုံးသပ်သူ‌ ဒေါက်တာ အောင်မျိုးက CNI သတင်းဌာနသို့ ပြောသည်။

ဒေါက်တာအောင်မျိုးက “ဒါကတော့ ရှင်းပါတယ်။ အခုဟာက ပြောရလို့ရှိရင် တစ်နိုင်ငံလုံး အတိုင်းအတာနဲ့ လုပ်နေရတာလေ။ တစ်နိုင်ငံလုံး အတိုင်းအတာအနေနဲ့ ကျနော်တို့ ပြည်တွင်း သောင်းကျန်းမှု နှိမ်နင်းရေးက လုပ်နေရတာလေ၊ ဒီအတွက်ကြောင့်မို့လို့ ဒါက ပိုပြီးတော့ လုပ်ရမှာပဲလေ၊ ဒါက သဘာဝကျတဲ့ ဖြစ်စဉ်တစ်ခုပါ၊ လှုပ်ရှားမှုလည်း များတယ်၊ တပ်တွေလည်း ပြောရရင် စစ်ဆင်ရေး တာဝန်ထမ်းဆောင်ရတာ များတဲ့အခါကြတော့ နောက်ပြီးတော့ လက်နက်ခဲယမ်းလည်း ကုန်ကျမယ်၊ ဒါကြောင့်မို့လို့ ဒါလုပ်ရတာတော့ သဘာဝကျပါတယ်” ဟု ပြောသည်။

မြန်မာ့တပ်မတော် လေတပ်က ပစ်ခတ်နေစဉ်

ထိုသို့ တိုးမြှင့်လိုက်သည့် ကာကွယ်ရေး အသုံးစရိတ်ကို တပ်သားများအား လစာတိုးမြှင့်ခြင်းထက် စစ် လက်နက်များတွင် ပိုမို အသုံးပြုနိုင်ကြောင်း ၎င်းက ပြောသည်။

လက်ရှိတွင် မြန်မာ့တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းအချို့၊ ဒေသကာကွယ်ရေးတပ် (PDF) ပူးပေါင်းတပ်တို့အကြား နိုင်ငံတစ်ဝှမ်း၌ တိုက်ပွဲများ ဖြစ်ပွားလျက်ရှိသည်။

ဒေသတွင်းနိုင်ငံများ ဖြစ်သည့် တရုတ်သည် ၂၀၂၃ ခုနှစ်တွင် စစ်အသုံးစရိတ်ကို ဒေါ်လာ ဘီလျံ ၂၀၀ ကျော် (၇ ရာခိုင်နှုန်း) တိုးမြှင့်ခဲ့သည်။ သို့သော် အမေရိကန်၏ စစ်အသုံးစရိတ်သည် တရုတ်ထက် လေးဆ ပိုများသည်။

ထို့နောက် ထိုင်းနိုင်ငံသည် ၂၀၂၃ ခုနှစ်အတွင် စစ်အသုံးစရိတ် ကာကွယ်ရေးဘတ်ဂျက်အတွက် ဘတ်ငွေ ၁၉၇.၂၉၂ ဘီလျံ တောင်းခံထားသလို အိန္ဒိယကလည်း တရုတ်ကို တန်ပြန်ရေးအတွက်၂၀၂၃ ခုနှစ်တွင် စစ်ရေးအသုံးစရိတ်ကို ၁၃ ရာခိုင်နှုန်းတိုးမြှင့်၍ အမေရိကန်ဒေါ်လာ ၇၃ ဘီလျံအထိ တိုးမြှင့်ထားသည်။

CNI News

၂၀၂၃ ခုနှစ်၊ ဧပြီ ၂၉

နိုင်ငံတကာ သံတမန်များသည် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံ၍ နေပြည်တော်မှာ ခြေရှုပ်နေကြခြင်းကြောင့် မြန်မာ့နိုင်ငံရေး အပြောင်းအလဲ တစ်ခု ဖြစ်လာမလား စောင့်ကြည့်နေကြသည်။

ပြီးခဲ့သည့် ဧပြီ ၁၆ ရက်က တရုတ်ကွန်မြူနစ်ပါတီရဲ့ နိုင်ငံတကာဆက်ဆံရေး ညွှန်ကြားရေးမှူးချုပ် Peng Xiubin သည်လည်းကောင်း၊ ဧပြီ ၂၁ ရက်တွင် ထိုင်းနိုင်ငံ ဒုဝန်ကြီးချုပ် H. E. Mr. Don Pramudwinai သည်လည်း ကောင်း၊ ဧပြီ ၂၃ ရက်၌ ဘန်ကီမွန်းသည်လည်းကောင်း မြန်မာနိုင်ငံသို့ လာရောက်၍ ဗိုလ်ချုပ်မှူးကြီး မင်းအောင် လှိုင်နှင့် တွေ့ဆုံခဲ့ကြသည်။

အလားတူ မြန်မာနိုင်ငံဆိုင်ရာ အိန္ဒိယသံအမတ်ကြီး၊ မြန်မာနိုင်ငံဆိုင်ရာ တရုတ်သံအမတ်ကြီးနှင့် တရုတ် သံမတန် တို့သည်လည်း မကြာခဏ နေပြည်တော်သို့ သွားရောက်၍ နစက ဥက္ကဋ္ဌ၊ ဒုဥက္ကဋ္ဌ တို့အပါအဝင် ပြည်ထောင်စု ဝန်ကြီးများနှင့် တွေ့ဆုံ ဆွေးနွေးလေ့ရှိနေသည်။

၂၀၂၃ ခုနှစ်၊ ဧပြီ ၂၈ ရက်နေ့က ဒုတိယဗိုလ်ချုပ်မှူးကြီး စိုးဝင်းနှင့် တရုတ်သံအမတ်ကြီး တို့တွေ့ဆုံစဉ်

သံတမန်များ နေပြည်တော်သို့ လာရောက်ခြင်းမှာ မြန်မာ့ငြိမ်းချမ်းရေးနှင့် နယ်စပ်တည်ငြိမ်ရေး၊ ဖွံ့ဖြိုး ရေးများနှင့် ဆက်စပ်နိုင်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

ဒေါက်တာအေးမောင်က “အဲဒီတော့ တရုတ်ရဲ့ အရွေ့ကလည်း ကြီးကြီးမားမား နယ်စပ်တည်ငြိမ်ရေးကို ဆောင် ရွက်လာနိုင်တဲ့ အနေအထား နောက်ပိုင်းမှာ တွေ့နိုင်တာပေါ့၊ ဘန်ကီမွန်းရဲ့ ခရီးစဉ်ကလည်း ထိုင်းဒုဝန်ကြီးချုပ် အဆိုပြုခဲ့တဲ့ နောက်ပိုင်းမှာ ဖြစ်လာတဲ့ အခင်းအကျင်း ဖြစ်တဲ့အခါမှာ အဲဒီလိုပဲ သုံးသပ်တာပေါ့ဗျာ၊ သီးသန့် ခရီး စဉ် ဖြစ်ချင်ဖြစ်မှာပေါ့၊ ဒါပေမဲ့ ကြည့်ရတာ အာဆီယံဘက်ကလည်း မြန်မာ့နိုင်ငံရေး အခင်းအကျင်းကို ဖြေရှင်းလို တဲ့ သဘောတွေ့နိုင်တယ်၊ ပစ်ခတ်ရပ်စဲရေး ကဏ္ဍတွေမှာ ဘန်ကီမွန်း ပါခဲ့တဲ့ ခရီးလမ်းကိုကြည့်ရင် NCA စာချုပ် ချုပ်တဲ့ကာလက ပထမအကြိမ်၊ ဒုတိယအကြိမ် စသဖြင့်ပေါ့ဗျာ၊ ငြိမ်းချမ်းရေးညီလာခံကို ကြည့်ရင် ဘန်ကီမွန်း ကိုယ်တိုင်ပါခဲ့တဲ့ အခင်းအကျင်းတွေ တွေ့နိုင်တယ်၊ အဲဒီတော့ မြန်မာ့ငြိမ်းချမ်းရေးနဲ့ နယ်စပ်တည်ငြိမ်ရေး မြန်မာ နိုင်ငံ ဖွံ့ဖြိုးတိုးတက်ရေးနဲ့ ဒီမိုကရေစီဖက်ဒရယ် ပြည်ထောင်စုဖြစ်ရေးတွေက ဆက်စပ်နေတယ်လို့ပဲ သူတို့ သုံးသပ်တယ်။ ဆိုတော့ နိုင်ငံကြီးတွေရဲ့ ခေါင်းဆောင်မှုတွေ မြန်မာ့နိုင်ငံရေး အခင်းအကျင်းမှာ လာရောက်ပြီးမှ SAC နဲ့ တွေ့တာ ကတော့ NUG ဘက်က သိပ်ကျေနပ်တဲ့ပုံတော့ မပေါက်ဘူး။ ဒါပေမဲ့ SAC နဲ့ ဆွေးနွေးမှ ဖြစ်မယ် ဆိုတဲ့ ယူဆချက် တစ်ခုကတော့ဖြင့် အာဆီယံရော၊ ကုလသမဂ္ဂရော၊ Elders ရော၊ တရုတ်ရော၊ အိန္ဒိယရောဘက် က ဒီအတိုင်းပဲ သတ်မှတ်ချက်က ရှိထားပုံပေါက်တယ်” ဟု ပြောသည်။

လက်ရှိတွင်လည်း တရုတ်၊ ရုရှားမှ ကိုယ်စားလှယ်တို့နှင့် နစကတို့ နေပြည်တော်တွင် တွေ့ဆုံ ဆွေးနွေးလျက် ရှိနေသည်။

နစက ကျင်းပမည့် ရွေးကောက်ပွဲကို တရုတ်က ထောက်ခံသလို ၎င်းတို့ အကျိုးစီးပွားအရ လာရောက်ခြင်း ဖြစ်ကြောင်း တရားလွှတ်တော်ရှေ့နေ ဦးကြီးမြင့်က CNI သတင်းဌာနသို့ ပြောသည်။

၂၀၂၃ ခုနှစ်၊ ဧပြီ ၂၈ ရက်နေ့က ဗိုလ်ချုပ်မှူးကြီး မင်းအောင်လှိုင်နဲ့ ရုရှား-မြန်မာ ချစ်ကြည်ရေးနှင့် ပူးပေါင်းဆောင်ရွက်ရေးအသင်း ဒုတိယဥက္ကဋ္ဌ Mr. Anatoly Bulochnikov တွေ့ဆုံစဉ်

ဦးကြီးမြင့်က “ဆိုလိုတာကတော့ တရုတ်က စကစက ရွေးကောက်ပွဲလုပ်မယ်ဆို တရုတ်က ထောက်ခံတယ်၊ ထောက်ခံတဲ့အပြင်ကို သူက သူ့အကျိုးစီးပွားလည်း ကြိုက်တာကိုး။ ထောက်ခံတဲ့အပြင် သူက မြောက်ပိုင်း ၇ ဖွဲ့နဲ့ ရခိုင်ကို မင်းတို့ စစ်အစိုးရကို မတိုက်နဲ့တော့ မတိုက်နဲ့ ရွေးကောက်ပွဲကို ထောက်ခံလိုက်ကြ၊ ရွေးကောက်ပွဲလည်း လုပ်လိုက်ကြတော့လို့ သူက ဖိအားပေးပြီးပြီ၊ အဲဒါကို မင်းအောင်လှိုင်နဲ့ဆို မဖြစ်ဘူး။ မင်းအောင်လှိုင်နဲ့ဆို မဖြစ်နိုင် ဘူး။ ဒါကို ဦးသန်းရွှေတို့ ခင်ဗျားတို့ ကြီးကြပ်လုပ်ကြပါဦးဆိုပြီး လာပြောတာပဲလေ၊ ဘန်ကီမွန်းကတော့ ထားပါ တော့ဗျာ၊ ဒီစစ်အစိုးရက အသုံးချတာပါ ဘန်ကီမွန်းကတော့ ဘာမှ မဟုတ်ပါဘူး” ဟု ပြောသည်။

နိုင်ငံတကာမှ လာရောက်ခြင်းမှာ လက်ရှိ နိုင်ငံရေး အကျပ်အတည်းများကို ဖြေရှင်းနိုင်မည့် နည်းလမ်းများ ထွက် ပေါ် လာနိုင်သည်ဟု သုံးသပ်ကြောင်း ကရင်အမျိုးသားဒီမိုကရက်တစ်ပါတီ ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

မန်းအောင်ပြည်စိုးက “ဒါကတော့ နိုင်ငံတကာက လာတာကတော့ လက်ရှိ နစကကို ဒါက နားလည် အသိအမှတ် ပြုတဲ့ သဘောလို့လည်း ပြောလို့ ရတာပေါ့လေ၊ ဘန်ကီမွန်းတို့ ဘာတို့ကတော့ ဘာကိစ္စလည်းတော့ မပြောတတ် ဘူးပေါ့၊ ထိုင်းနဲ့ တရုတ်ကတော့ လာပြီးတော့ ဆက်စပ်တယ်ဆိုတော့က ဒါကကျနော်တို့ တစ်ခုခု အဖြေထွက် မလားပေါ့လေ၊ ကောင်းတဲ့ဖက်က ဖြေရှင်းနိုင်တဲ့ နည်းများ ထွက်မလား အဲဒါလေးတော့ သုံးသပ်မိတယ်၊ အဲဒါ လေးတော့ ယူဆမိတယ်” ဟု ပြောသည်။

နစကအနေဖြင့် တရုတ်၊ အိန္ဒိယ၊ ရုရှားနှင့် ထိုင်းနိုင်ငံတို့မှ သံတမန်များ၊ ဒုဝန်ကြီးချုပ်များနှင့် မကြာခဏ ဆိုသလို တွေ့ဆုံမှုများ ရှိနေသည်။