CNI News

၂၀၂၂ ခုနှစ်၊ မတ်လ ၁၇

အာဆီယံ အထူးကိုယ်စားလှယ် ပရတ်ဆိုခွန်သည် မြန်မာနိုင်ငံခရီးစဉ်အတွင်း NCA ထိုးထားသည့် တိုင်းရင်းသားလက်နက် ကိုင် အဖွဲ့များနှင့် တွေ့ဆုံရန် စီစဉ်ထားသော်လည်း တွေ့ဆုံဆွေးနွေးမည့် အစီအစဉ်ကို ဖျက်လိုက်ကြောင်း အပစ်ရပ် အဖွဲ့ များ၏ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST)၏ အဖွဲ့ဝင်တစ်ဦးဖြစ်သူ ဗိုလ်မှူးကြီးခွန်ဥက္ကာက CNI သတင်း ဌာနသို့ ပြောသည်။

အာဆီယံ အထူးကိုယ်စားလှယ်ဖြစ်သူ ကမ္ဘောဒီးယားနိုင်ငံခြားရေးဝန်ကြီး ပရတ်ဆိုခွန်သည် မြန်မာနိုင်ငံသို့ လာမည့် မတ်လ ၂၀ ရက်နေ့တွင် လာရောက်မည်ဖြစ်သည်။

အဆိုပါ ခရီးစဉ်တွင် အပစ်ရပ် လက်မှတ်ရေးထိုးထားသည့် တိုင်းရင်းသား လက်နက်ကိုင်အဖွဲ့များနှင့် တွေ့ဆုံရန် စီစဉ်ထား ကြောင်း၊ ထိုအစီအစဉ်ကို အထူးကိုယ်စားလှယ် မအားလပ်သည့်အတွက် ဖျက်သိမ်းလိုက်ကြောင်း အကြောင်းကြားလာသည် ဟု ဗိုလ်မှူးကြီးခွန်ဥက္ကာက ပြောသည်။

၎င်းက “ပျက်သွားပြီ နေပြည်တော်က စာပြန်ရေးလာတယ်၊ မလာကြနဲ့တော့တဲ့ အထူးကိုယ်စားလှယ် မအားလပ်တဲ့အတွက် အဲဒီအစီအစဉ် ဖျက်လိုက်ပါပြီ၊ သူတော့လာမယ် ဒါပေမယ့် ကျနော်တို့နဲ့ တွေ့ဖို့ အချိန်မရတော့ဘူး၊ အဲဒါကြောင့် ရုပ်သိမ်း လိုက်တယ်”ဟု ပြောသည်။

အာဆီယံအထူးကိုယ်စားလှယ်

အာဆီယံအထူးကိုယ်စားလှယ် ပရတ်ဆိုခွန်သည် မြန်မာနိုင်ငံသို့ လာရောက်မည်ဖြစ်ပြီး တွေ့ဆုံနိုင်ရေး နစကဘက်က PPST သို့ အကြောင်းကြားခဲ့ခြင်း ဖြစ်သည်။

အဆိုပါ တွေ့ဆုံမှုကို နေပြည်တော်တွင် ပြုလုပ်မည်ဆိုပါက လာရောက်တွေ့ဆုံမည် မဟုတ်ကြောင်း PPST ၏ အဖွဲ့ဝင် ကရင်အမျိုးသားအစည်းအရုံး (KNU)မှ ပြောရေးဆိုခွင့်ရှိသူ ပဒိုစောတောနီးက CNI သတင်းဌာနသို့ ပြောကြားထားသည်။

အထူးကိုယ်စားလှယ်အနေနှင့် မြန်မာနိုင်ငံသို့ မတ်လ ၂၀ ရက်နေ့တွင် လာရောက်မည်ဖြစ်၍ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံမည်ဖြစ်ကြောင်း၊ ထို့နောက် တခြား တွေ့ဆုံသင့် တွေ့ဆုံထိုက်သူများနှင့် တွေ့ဆုံသွားမည် ဖြစ် ကြောင်း သိရသည်။

အာဆီယံ အထူးကိုယ်စားလှယ်သည် မြန်မာနိုင်ငံ ခရီးစဉ်အတွင်း မည်သည့် လူပုဂ္ဂိုလ် (သို့မဟုတ်) အဖွဲ့အစည်းများကို တွေ့ဆုံသွားမည်ဖြစ်ကြောင်းကိုတော့ ထုတ်ပြန်ထားခြင်းမရှိသေးပေ။

သို့သော် ပရတ်ဆိုခွန်သည် မြန်မာပြည်ခရီးစဉ်အတွင်း လူသားချင်း စာနာထောက်ထားမှုဆိုင်ရာ အကူအညီများ တိုးမြှင့်ရေး လုပ်ဆောင်သွားမည်ဖြစ်ကြောင်း ထုတ်ပြန်ထားသည်။

CNI News

၂၀၂၂ ခုနှစ်၊ မတ်လ ၁၇

မြန်မာနိုင်ငံသို့ လာရောက်မည့် အာဆီယံအထူးကိုယ်စားလှယ်သည် နိုင်ငံရေးပါတီများမှ ခေါင်းဆောင် တချို့နှင့် တွေ့ဆုံ၍ မြန်မာ့နိုင်ငံရေး အကျပ်အတည်းအပေါ် ဆွေးနွေးရန် စီစဉ်နေကြောင်း နိုင်ငံရေးပါတီ အသိုင်းအဝိုင်းထံမှ ကြားသိရသည်။

အာဆီယံ အထူးကိုယ်စားလှယ်သည် ပြည်သူ့ပါတီ(PP)ဥက္ကဋ္ဌ ဦးကိုကိုကြီး၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD) ဥက္ကဋ္ဌ စိုင်းညွန့်လွင်၊ ရခိုင့်ဦးဆောင်ပါတီ(AFP) ဥက္ကဋ္ဌ ဒေါက်တာအေးမောင်တို့နှင့် တွေ့ဆုံရန် စီစဉ်မှုများ ရှိနေကြောင်း သိရ သည်။

အာဆီယံအထူးကိုယ်စားလှယ်နှင့် မည်သည့် အဖွဲ့အစည်းများဖြင့် တွေ့ဆုံမည်ကို မသိရှိရသေးကြောင်း၊ မိမိအနေဖြင့် တွေ့ဆုံ ခဲ့ပါက လက်တွေ့ကျကျ မည်သည့်ကိစ္စများကို ဆောင်ရွက်နိုင်မည်ကို ညှိနှိုင်းသည့်သဘောမျိုး ဖြစ်နိုင်ကြောင်း ပြည်သူ့ပါတီ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

ဦးကိုကိုကြီးက “အခုကတော့ တစ်ယောက်နဲ့ တစ်ယောက် အကဲခတ်တဲ့ အဆင့်ပဲ ရှိဦးမယ်ထင်တယ်၊ ဘာကြောင့်လဲဆိုတော့ ဒီခရီးစဉ်က ပထမဦးဆုံး ခရီးစဉ်လည်း ဖြစ်တယ်ပေါ့နော်၊ ဖေဖော်ဝါရီ ၁ ရက်နေ့ အာဏာထိန်းပြီးနောက်ပိုင်း နိုင်ငံတကာ ဧည့်သည်တွေကို ဘီလ်ရစ်ချတ်ဆန် လာတယ်ဆိုတာလည်း သူက ပုဂ္ဂလိကအနေနဲ့ လာတာလေ၊ အခုက အာဆီယံ ကိုယ်စား လာတဲ့ဟာက ဒါပထမဦးဆုံး အဆင့်လည်းဖြစ်တော့ ဒီအခြေအနေမှာတော့ တစ်ယောက်နဲ့ တစ်ယောက် နည်းနည်း တီး ခေါက်တဲ့ သဘော၊ နောက် လက်တွေ့ကျကျ ဘယ်ကိစ္စတွေမှာ ဆောင်ရွက်နိုင်မလဲဆိုတာကို ညှိနှိုင်းတဲ့ သဘောမျိုးလောက်ပဲ ဖြစ်ဦးမယ်ထင်တယ်၊ နောက်အခေါက်တွေ အခေါက်တွေမှာတော့ ဒီထက် ပိုပြည့်စုံတဲ့၊ ထူးခြားတဲ့ တွေ့ဆုံမှုမျိုးတွေ ဖြစ်လိမ့် မယ်လို့ ထင်ပါတယ်” ဟု ပြောသည်။

ဦးကိုကိုကြီးအား တွေ့ရစဉ်

SNLD ပါတီဥက္ကဋ္ဌ စိုင်းညွန့်လွင်က အာဆီယံအထူးကိုယ်စားလှယ်နှင့် တွေ့ဆုံနိုင်ရေး မိမိနာမည် ပါဝင်သည်ကို ကြားသိမိ ကြောင်း၊ သို့သော်လည်း ယနေ့အချိန်ထိ ချိတ်ဆက်ထားခြင်း မရှိသည့်အတွက် တွေ့ဆုံနိုင်ရန် မဖြစ်နိုင်ကြောင်း CNI သတင်း ဌာနသို့ ပြောသည်။

ထို့နောက် ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်ကလည်း အာဆီယံ အထူးကိုယ်စားလှယ်နှင့် တွေ့ဆုံရန် မိမိတို့ ပါတီကို လက်ရှိအချိန်ထိ အကြောင်းကြားခြင်း မရှိသေးကြောင်း ပြောသည်။

လက်ရှိ နိုင်ငံရေးပြဿနာကို နိုင်ငံရေးနည်းအရ ဆွေးနွေးဖြေရှင်းရမည်ဆိုသည့် လမ်း‌ကြောင်းပေါ်လာရေး မိမိတို့အနေဖြင့် ကြိုးစားသွားမည်ဖြစ်ကြောင်း ဦးကိုကိုကြီးက ပြောသည်။

ဦးကိုကိုကြီးက “အဓိကကတော့ ပြဿနာကို နိုင်ငံရေး နည်းလမ်းအရ ဆွေးနွေး ဖြေရှင်းရမယ်ဆိုတဲ့ လမ်းကြောင်း ပေါ်လာဖို့ ကိုပဲ အဓိက ကျနော်တို့ မျှော်လင့်ရမှာပေါ့နော်၊ မဟုတ်ရင် ကျနော်တို့က အပြုတ်တိုက်မှရမယ်၊ တစ်ယောက်နဲ့ တစ်ယောက် လက်နက်ကိုင် တော်လှန်ရေးကလွဲပြီးတော့ အခြားနည်းလမ်း မရှိဘူးဆိုတဲ့ ပုံစံမျိုးက အင်မတန် အန္တရာယ်ကြီးတယ်၊ ဒါကြောင့်မို့လို့ ကျနော်တို့က နိုင်ငံရေးအရ တွေ့ဆုံဆွေးနွေးမှု ပြန်ပြီး ပေါ်ပေါက်လာဖို့၊ စတင်နိုင်ဖို့ပေါ့လေ၊ အဲဒါပဲ ကျ‌နော်တို့ က အဓိက ကြိုးစားမှာပါ”ဟု ပြောသည်။

မြန်မာနိုင်ငံသို့ မတ်လ ၂၀ ရက်တွင် လာရောက်မည့် မြန်မာနိုင်ငံဆိုင်ရာ အာဆီယံအထူးကိုယ်စားလှယ် မစ္စတာ ပရတ်ဆိုခွန် (Prak Sokhonn)သည် နစကဥက္ကဋ္ဌနှင့် တွေ့ဆုံမည်ဖြစ်ကြောင်း၊ ထို့နောက် နိုင်ငံ‌ရေးပါတီ တချို့နှင့်လည်း တွေ့ဆုံမည် ဖြစ် ကြောင်း၊ တခြားသော တွေ့သင့်တွေ့ထိုက်သူများကိုလည်း တွေ့ဆုံသွားရန် ရှိကြောင်း သိရသည်။

CNI News

၂၀၂၂ ခုနှစ်၊ မတ်လ ၁၆

ထိုင်းသို့ MOU စနစ်ဖြင့် သွားရောက် အလုပ်လုပ်ကိုင်မည့် မြန်မာအလုပ်သမားများအား သက်ဆိုင်ရာ အေဂျင်စီ အချို့မှ ၎င်းတို့ပြုလုပ်ပေးသည့် နိုင်ငံကူးလက်မှတ်(Passport)ဖြင့်သာ အလုပ်လုပ်ရမည်ဖြစ်ကြောင်းနှင့် စာအုပ်ဖိုး ၁၇၀၀၀၀(တစ်သိန်းခုနှစ်သောင်း) ကျပ်‌ပေးရမည်ဟု တောင်းခံနေမှုများ ရှိကြောင်း သိရသည်။

နိုင်ငံကူးလက်မှတ်(Passport)စာအုပ်အား အလုပ်သမားများဘက်မှ မိမိဘာသာ လုပ်ဆောင်လာမည်ဟု ဆိုသော် လည်း အေဂျင်စီဘက်မှ လက်မခံကြောင်းသိရသည်။

အဆိုပါကိစ္စနှင့်ပတ်သက်၍ ထိုင်းကို MOU ဖြင့် သွား‌ရောက်အလုပ်လုပ်ကိုင်မည့် မြန်မာအလုပ်သမား အများ အပြားမှ အကူအညီတောင်းခံလာကြောင်း မြန်မာ‌ရွှေ့ပြောင်းအလုပ်သမား ကူညီစောင့်ရှောက်ရေးအဖွဲ့မှ ကိုသားကြီးက CNI သတင်းဌာနသို့ ပြောသည်။

“မင်းတို့ ငါတို့ရုံးကိုလာခဲ့ စာအုပ် လာလုပ် တစ်သိန်း ခုနှစ်သောင်းတော့ပေးရမယ်။ ကလေးတွေက ပွင့်ပွင့် လင်းလင်းပြောရရင် ၅၀ ရာခိုင်နှုန်း လောက်တောင် အပြင်မှာလုပ်ထားပြီးကြပြီ။ ကျနော့်ကို အဲဒီလို ပြောလာ တော့ ကျနော်က လုပ်ထားရင်ရပြီလေ။ နိုင်ငံကူးလက်မှတ် ဘယ်ရုံးက ထုတ်ထုတ် တရားဝင်ပဲဆိုတော့ အဲ့တော့ အေဂျင်စီက မရဘူးလို့ပြောတယ်တဲ့။ မဖြစ်နိုင်ဘူး ဒါကတော့။ အလုပ်သမားတွေပေါ်မှာ ဂုတ်သွေးစုပ်မှု၊ မတရား‌ တောင်းတာပဲ။ သူထုတ်ပေးလည်း ဒီနိုင်ငံကူးလက်မှတ်ပဲ။ ကလေးတွေလုပ်တာလည်း ဒီနိုင်ငံကူးလက်မှတ်ပဲ။ ဘာကြောင့် သုံးလို့မရရမှာလဲပေါ့။ ဝန်ဆောင်မှုတွေအပြည့်ပေးပြီး မြန်မာငွေ လေး၊ ငါးသောင်းနဲ့ နိုင်ငံကူး လက်မှတ်ထုတ်ပေးတဲ့ အေဂျင်စီတွေလည်း အများကြီးရှိပါတယ်။ ဒီ တစ်သိန်းခုနှစ်သောင်းကြီးကတော့ ကျနော့် အနေနဲ့ လုံးဝကို ကန့်ကွက်တယ်။ ဒါကြီးက မတရားဂုတ်သွေးစုပ်တာပဲ အလုပ်သမားတွေပေါ်မှာ” ဟု ပြောသည်။

မြန်မာနိုင်ငံကူးလက်မှတ်ထုတ်ပေးရေးရုံးတွင် နိုင်ငံကူးလက်မှတ်ပြုလုပ်ရန် တန်းစီစောင့်ဆိုင်းနေကြစဉ်

ယခုကဲ့သို့ လုပ်ဆောင်နေမှုများအပေါ် သက်ဆိုင်ရာဌာနဆိုင်ရာများအနေဖြင့် သေချာကြပ်မတ်သင့်ကြောင်းလည်း ၎င်းက ဆက်ပြောသည်။
ထိုင်းသို့ MOU ဖြင့်သွားရောက်လုပ်ကိုင်ကြရာတွင် အများစုသည် နယ်မြို့များဘက်မှဖြစ်သည့်အတွက် နိုင်ငံကူး လက်မှတ်အား ကိုယ်တိုင်ကိုယ်ကျ သွားလုပ်သည်ထက် အေဂျင်စီများမှတဆင့် လုပ်ကိုင်ကြမှုမှာ များပြားကာ အချို့အေဂျင်စီများသည် ယခုကဲ့သို့ ငွေပမာဏအများအပြားတောင်းခံမှုမရှိကြောင်း သိရသည်။

အေဂျင်စီအချို့မှ ယခုကဲ့သို့ လုပ်ဆောင်နေခြင်းသည် အလုပ်သမားများအပေါ် ခေါင်းပုံဖြတ်နေသည့် သဘော ဖြစ် နေကြောင်း ထိုင်းသို့ MOU ဖြင့် သွားရောက်အလုပ်လုပ်ကိုင်ရန် စောင့်ဆိုင်းနေသည့် ကိုထွန်းလင်းနိုင်က CNI သို့ ပြောသည်။

“ကိုယ့်ဘာသာအလုပ်မခံဘူး သူတို့လုပ်ပေးမှာဆိုတဲ့ဟာက ဘယ်လောက်ကုန်ကျလို့ ကုန်ကျ မှန်းလည်း မသိဘူးလေ။ အဲဒီတော့ သူတို့က ဒီလောက်တောင်းလို့ ဒီလောက်ပေးရတာကိုလည်း တချို့ကျတော့လည်း ပေးလိုက်တာပဲလေ။ ကိုယ့်ဘာသာလုပ်လို့မရဘူးဆိုတဲ့အခြေအနေမျိုးဆိုတော့ အဲဒါကတော့ သက်သက် သွားမယ့်အလုပ်သမားတွေဆီကနေ ပွဲစားတွေ ခေါင်းပုံဖြတ်တဲ့သဘောမျိုးဖြစ်နေတာပေါ့”ဟု ပြောသည်။

လက်ရှိတွင် ရန်ကုန်မြို့ရှိ မြန်မာနိုင်ငံကူးလက်မှတ် ထုတ်ပေးရေးရုံး၌ Online Booking စနစ်ဖြင့် ရက်ချိန်းယူ ဝင်ရောက်လျှောက်ထားနိုင်သည့် စနစ်ပြောင်းလဲမည်ဟု မြန်မာနိုင်ငံကူးလက်မှတ်ထုတ်ပေးရုံးက ထုတ်ပြန် ခဲ့သည်။

ယခုကဲ့သို့ လုပ်ဆောင်ခြင်းသည် ကိုဗစ်ရောဂါ ကူးစက်မှု လျော့ကျစေရန်အတွက်ဟုဆိုကာ မတ် ၂၁ ရက်မှစတင် ၍ Online Booking စနစ်ဖြင့် ရက်ချိန်းရယူပြီးမှသာ ရုံးတွင်းသို့ ဝင်ရောက် လျှောက်ထားနိုင်သည့်စနစ်အား ပြောင်းလဲကျင့်သုံးသွားမည်ဖြစ်ကြောင်း သိရသည်။

CNI News

၂၀၂၂ ခုနှစ်၊ မတ်လ ၁၆

ဒီမိုကရေစီအင်အားစုများနှင့် တိုင်းရင်းသားအဖွဲ့အစည်းများ စည်းလုံးသွားမည်ကို အာဏာရှင်များမှ စိုးရိမ်ခဲ့ကြကြောင်း ပအိုဝ်းအမျိုးသားဖက်ဒရယ်ကောင်စီ(PNFC)ဥက္ကဋ္ဌ ခွန်မြင့်ထွန်းက ပြောသည်။

ယနေ့ (မတ်လ ၁၆ ရက်)တွင် ကျရောက်သည့် (၇၃) ကြိမ်မြောက် ပအိုဝ်းအမျိုးသားနေ့ အခမ်းအနားမှာ ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။

ခွန်မြင့်ထွန်း “ကျနော်တို့ ဒီနေ့ ဒီအချိန်ကာလမှာ ကျနော်တို့ တိုင်းပြည်အတွင်းမှာ ပြည်ထောင်စုညီညွတ်ရေးဟာ အင်မတန် အရေးကြီးပါတယ်၊ အမျိုးသားညီညွတ်ရေးက အင်မတန် အရေးကြီးပါတယ်၊ မိမိတို့ရဲ့ လူမျိုးအလိုက် စည်းလုံးညီ ညွတ်‌ရေး တွေ အရေးကြီးသလိုပဲ တိုင်းရင်းသားတွေ အကြားမှာလည်း စည်းလုံးညီညွတ်ရေးတွေ အရေးကြီးပါတယ်။ ထို့နည်းတူပဲ ကျနော်တို့ တိုင်းပြည်အရေးဟာ ဒီမိုကရေစီအရေးနဲ့ ဖက်ဒရယ်အရေး တစ်နည်းအားဖြင့် တိုင်းရင်းသား အရေးဖြစ်ပါတယ်၊ စစ်အာဏာရှင်တွေ အပါအဝင် အာဏာရှင်တွေဟာ ဒီမိုကရေစီအရေးနဲ့ တိုင်းရင်းသားအရေး နှစ်ခု ပေါင်းစည်းသွားမိမှာ အင်မတန် စိုးရိမ်သလိုပဲ၊ ဒီမိုကရေစီ အင်အားစုတွေနဲ့ တိုင်းရင်းသား အင်အားစုတွေ ပေါင်းစည်းမိမှာကိုလည်း အင်မတန် စိုးရိမ်ခဲ့ကြတယ်။ နည်းမျိုးစုံနဲ့ ဖြိုခွဲခဲ့သလို ဆက်လက်ပြီးတော့လည်း ဖြိုခွဲနေဆဲ ဖြစ်ပါတယ်” ဟု ပြောသည်။

မတရားသော စနစ်ဆိုးများ ဖျက်သိမ်းရာတွင် ပအိုဝ်းလူမျိုးများအနေနှင့် အင်အားစု တစ်ရပ်အနေဖြင့် ဆောင်ရွက်သွားမှာ ဖြစ်ကြောင်းလည်း ခွန်မြင့်ထွန်းက ပြောကြားခဲ့သည်။

ထို့အတူ ပြည်ထောင်စုသား အားလုံးညီညွတ်ရေးကို ရယူ၍ မိမိတို့လိုလားသည့် ဖက်ဒရယ်ပြည်ထောင်စုကို အတူတကွ ထူထောင်ရန် ပအိုဝ်းများမှာ အမြဲအသင့်ရှိကြောင်း ၎င်းက ပြောသည်။

၂၀၁၉ ခုနှစ်က ကျင်းပခဲ့သော ပအိုဝ်းအမျိုးသားနေ့ အခမ်းအနား

လက်ရှိနွေဦးတော်လှန်ရေးတွင် ပအိုဝ်းအမျိုးသားများနှင့် ပအိုဝ်းလူငယ်များ တွန်းတွန်းတိုက်တိုက် ပါဝင်ခဲ့မှုကို အသိအမှတ် ပြုကြောင်း အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလက ပြောသည်။

၎င်းက “လက်ရှိ နွေဦးတော်လှန်ရေးတွင် ပအိုဝ်းအမျိုးသားများနှင့် လူငယ်များ၏ တွန်းတွန်းတိုက်တိုက် ပါဝင်ခဲ့မှုကို ကျနော့် အနေဖြင့် အသိအမှတ် ပြုလိုပါတယ်၊ ရှမ်းပြည်တောင်ကြီး တစ်ဝိုက်နှင့် ရန်ကုန်တိုင်းရင်းသား လူငယ်များ သပိတ်တွင် ပအိုဝ်း လူငယ်များ တက်တက်ကြွကြွ အာဏာရှင်ကို ဆန့်ကျင် သပိတ်မှောက်ခဲ့ကြသည်မှာ သမိုင်းမှတ်တမ်းတင်မယ့် နေ့ရက်လည်း ဖြစ်ပါတယ်။ ထို့အတူ နွေဦးတော်လှန်ရေးသည် ပြည်သူလူထု တစ်ရပ်လုံး အာဏာရှင်ကို ဆန့်ကျင်တွန်းလှန်တဲ့ လူထုအုံကြွမှု တစ်ရပ်ပီပီ တိုင်းပြည်ကို တိုင်းရင်းသား ပြည်သူများ လိုလားတဲ့ ဖက်ဒရယ်ဒီမိုကရေစီစနစ်ကို တည်ဆောက်ဖို့ တော်လှန်နေ ကြတာ ဖြစ်ပါတယ်” ဟု ပြောသည်။

ပအိုဝ်းအမျိုးသားနေ့သည် ပြည်ထောင်စု ခိုင်မြဲရေးနှင့် အခြားသော အမျိုးသားများနှင့် ညီညီညွတ်ညွတ် နေထိုင်နိုင်ရေး အတွက် ပအိုဝ်းအမျိုးသားများ ကတိကဝတ် ပြုသည့်နေဟုလည်း မိမိအနေဖြင့် မှတ်ယူကြောင်း ဒူဝါလရှီးလက ပြောသည်။

ယနေ့ကျရောက်သည့် ပအိုဝ်းအမျိုးသားနေ့ အခမ်းအနားကို ခွန်မြင့်ထွန်း၊ NUG ယာယီသမ္မတ ဒူဝါလရှီးလ၊ NUG မှ ဝန်ကြီး ချုပ် မန်းဝင်းခိုင်သန်း၊ ပြည်ထောင်စုလွှတ်တော်ကိုယ်စားပြုကော်မတီ(CRPH)မှ ဦးအောင်ကြည်ညွန့်၊ အမျိုးသားညီညွတ်ရေး အတိုင်ပင်ခံကောင်စီ (NUCC) မှ ဦးအောင်ဆန်းမြင့်၊ ဆလိုင်းအိုက်ဇက်ခင်တို့ တက်ရောက်ခဲ့ကြသည်။

CNI News

၂၀၂၂ ခုနှစ်၊ မတ်လ ၁၅

တပ်မတော်နှင့် ကရင်အမျိုးသားအစည်းအရုံး (KNU) တို့အကြား ကရင်ပြည်နယ်အတွင်း တိုက်ပွဲများ ယခုရက်ပိုင်းအတွင်း ပြန်လည်ဖြစ်ပွားလာကာ တိုက်ပွဲဖြစ်ပွားသည့် ဧရိယာ ပိုမိုကျယ်ပြန့်လာကြောင်း သိရသည်။

ပြီးခဲ့သည့် နှစ်ရက်သုံးရက်အတွင်း တပ်မတော်နှင့် KNU အကြားတွင် လေးကေ့ကော်ဒေသ၊ ကော့ကရိတ်မြို့ ပတ်ဝန်းကျင်၊ အာရှလမ်းမကြီး တစ်လျှောက်၊ ဘုရားသုံးဆူ၊ ကြာအင်းဆိပ်ကြီး စသည့် ဒေသတော်တော်များများတွင် တိုက်ပွဲများ ပြန်လည် ဖြစ်ပွားခဲ့ကြောင်း KNU ၏ နိုင်ငံခြားရေးတာဝန်ခံ ပဒိုစောတောနီးက CNI သတင်းဌာနသို့ ပြောသည်။

ပဒိုစောတောနီးက “ ဒီနှစ်ရက် သုံးရက်အတွင်းကတော့ နေရာတော်တော်များများ ဖြစ်နေတာတော့ ရှိတယ်၊ လေးကေ့ကော် ပတ်ဝန်းကျင်တွေရယ်၊ နောက်ပြီးတော့ ကော့ကရိတ်မြို့ ပတ်ဝန်းကျင်တွေရယ်၊ နောက်ပြီးတော့ အာရှလမ်းမကြီးရယ်၊ နောက်ပြီးတော့ ကြာအင်းဆိပ်ကြီးရယ် ပြန်ဖြစ်လာတယ်။ ဘုရားသုံးဆူလမ်း တစ်လျှောက်၊ ကျနော်ပြောနိုင်တာကတော့ တိုက်ပွဲက ကြီးကြီးမားမားတော့ မတွေ့ရဘူး၊ သို့သော်ငြားလည်းပဲ ဖြစ်တာတော့ ဖြစ်တယ်၊ နောက်တစ်ခုကတော့ တင်းမာမှု တွေကတော့ ရှိတယ်လို့တော့ အသေအချာ ပြောလို့ရတယ်၊ ဒီလောက်ထိပါပဲ”ဟု ပြောသည်။

လက်ရှိတွင် အာရှလမ်းမကြီးတွင် တံတားမိုင်းခွဲခံရမှု အခြေအနေများ အပါအဝင် တိုက်ပွဲဖြစ်ပွားမှုများကြောင့် နယ်စပ် ကုန် သွယ်ရေး လမ်းကြောင်းတစ်ခုဖြစ်သည့် မြဝတီ-ကော့ကရိတ်လမ်းမကြီးကို သုံးရက်ကြာ ပိတ်ထားမည်ဖြစ်ကြောင်း သိရသည်။

မတ်လ ၁၄ ရက်နှင့် ၁၅ ရက်တို့တွင် ကော့ကရိတ်မြို့နှင့် မြို့ ပြင်နေရာတချို့၌ တိုက်ပွဲများ ဖြစ်ပွားခဲ့ကြောင်း၊ ထိုင်း-မြန်မာ အာရှလမ်းမကြီးကို အခြေပြုကာ နှစ်ဖက်တိုက်ပွဲ ဖြစ်ပွားနေကြောင်း ထိုဒေသသို့ ရောက်ရှိနေသည့် ဒေသခံတစ်ဦးက ပြော သည်။

၎င်းက “ပြောရမယ်ဆို စစ်တပ်ရှိတဲ့ စစ်ကောင်စီရှိတဲ့ နေရာနဲ့ ဒီဘက်ကျေးရွာတွေနဲ့က အာရှလမ်းမကြီး ခြားတယ်၊ အဲဒီ အာရှ လမ်းမကြီးကို ကျော်ပြီးတော့ စစ်တပ်က သူတို့ရဲ့ အမြှောက်ကုန်းတွေကနေ ပစ်တာပေါ့နော်” ဟု ပြောသည်။

မြဝတီ-ကော့ကရိတ် အာရှလမ်းမကြီးသည် ထိုင်း-မြန်မာ နယ်စပ်ကုန်သွယ်ရေးအတွက် အရေးပါသည့် လမ်းကြောင်း ဖြစ် သည်။
ပြီးခဲ့သည့် မတ်လ ၇ ရက်နေ့က လေးကေ့ကော်ဒေသနှင့် ကော့ကရိတ်တောင်ပိုင်းဒေသများမှ တပ်မတော်စခန်းများ ဆုတ်ခွာ ရန် KNU အသိပေး အကြောင်းကြားစာ ထုတ်ပြန်ခဲ့သည်။

အဆိုပါ အကြောင်းကြားစာ ထုတ်ပြန်ခဲ့ပြီးနောက်မှာတော့ တပ်မတော်သည် စခန်းများ မဆုတ်ခွာသည့်အပြင် စခန်းများ တိုးချဲ့လာခြင်းကြောင့် တိုက်ပွဲများ ဖြစ်ပွားလာရခြင်းဖြစ်သည်ဟု ပဒိုစောတောနီးက ပြောသည်။

CNI News

၂၀၂၂ ခုနှစ်၊ မတ်လ ၁၅

လက်ရှိ တိုင်းပြည်၏ အခြေအနေသည် ၁၉၄၇ ခုနှစ်မတိုင်ခင် အခြေအနေသို့ ရောက်ရှိနေသည့်အတွက် မိမိတို့၏ ချင်းမျိုး နွယ်စုများကို ပြန်လည်စုစည်းကာ ချင်းပြည်ထောင်ကို ပြည်လည်အသက်သွင်းရန် ရည်မှန်းထားကြောင်း ချင်းပြည်နယ် ပူးတွဲ ကာကွယ်ရေးကော်မတီ (CJDC) မှ တာဝန်ရှိသူ တစ်ဦးက ပြောသည်။

မြန်မာနိုင်ငံတွင် အာဏာသိမ်းမှု အကြိမ်ကြိမ် ဖြစ်ပွားခဲ့ကြောင်း၊ ၂၀၂၁ အာဏာသိမ်းမှုမှာ အဆိုးဆုံးဖြစ်ကြောင်း CJDC မှ ဘဏ္ဍရေးအတွင်းရေးမှူး ဂျွန်က CNI သတင်းဌာနသို့ ပြောသည်။

ဂျွန်က “ဒီအချိန် ဒီအခါကတော့ ဘာပဲဖြစ်ဖြစ် ၁၉၄၇ ရဲ့ ပင်လုံအစ မတိုင်ခင်က အခြေအနေ ရောက်သွားတယ်၊ ဒီအချိန် ဒီအခါကနေ ကျနော်တို့ ကိုယ့်ရဲ့ လူမျိုးအလိုက်၊ ကိုယ့်ရဲ့ ဒေသအလိုက် ပြန်လည်စုစည်းပြီး‌‌တော့ ကျနော်တို့ကတော့ ချင်းပြည်ထောင် ကျနော်တို့ ပြန်လည်ပြီး‌တော့ အသက်သွင်းဖို့ အဲဒါလေးတွေကို ကျနော်တို့ ရည်မှန်းထားတာ ဖြစ်ပါတယ်”ဟု ပြောသည်။

လက်ရှိ မြန်မာပြည်သူ/သားများ၏ အခြေအနေသည် အသက်အိုးအိမ် စည်းစိမ်၊ ဘဝလုံခြုံမှု၊ ဝမ်းစာရေး စသည့် အခက်အခဲ များဖြင့် ကြုံတွေ့နေရကြောင်း ၎င်းက ပြောသည်။

ချင်းပြည်သူများ ဆုံးရှုံးနေသော လူမှုဘဝ ပြန်လည်ထူထောင်ရေးနှင့် ချင်းလဲန်း ပြန်လည်ထူထောင်ရေးအတွက် ဒေသ ကာကွယ်ရေးတပ်ဖွဲ့များ၊ ညီနောင်မဟာမိတ်များနှင့် လက်တွဲကာ စစ်ရေးအရှိန်ကို ဟန်ချက်ညီညီ မြှင့်တင်ပြီး နစက (စစ်ကောင်စီ)ကို တိုက်ခိုက်သွားမည်ဖြစ်ကြောင်း ချင်းအမျိုးသားတပ်ဦး(CNF)မှ မတ်လ ၂၀ ရက်တွင် ကျရောက်မည့် ချင်းတော်လှန်ရေးနေ့ ထုတ်ပြန်ချက်၌ ဖော်ပြထားသည်။

ကန်ပတ်လက် ချင်းဒေသကာကွယ်ရေးတပ်ဖွဲ့(CDF Kanpetlet)

ထို့အတူ နိုင်ငံရေးဦးတည်ချက်၊ ယုံကြည်ချက်နှင့် ခံယူချက်တူညီသော အစုအဖွဲ့များ ပါဝင်စေလျက် အမိမြေ ချင်းလဲန်းကို ပြန်လည် တည်ဆောက်သွားမည်ဖြစ်ကြောင်း၊ ထိုသို့ တည်ဆောက်ရာတွင် ဒေသအုပ်ချုပ်ရေး၊ လုံခြုံရေးနှင့် တရားဥပဒေ စိုးမိုးရေးများကို တဆင့်ချင်း အကောင်အထည်ဖော်သွားမည်ဟု ထုတ်ပြန်တွင် ဖော်ပြထားသည်။

ချင်းပြည်နယ်သည် ကျေးလက်ဒေသ အများဆုံးဖြစ်ပြီး ထိုကျေးလက်ဒေသ၏ ၉၅ ရာခိုင်နှုန်းကို CJDC ၏ အုပ်ချုပ်မှုအောက် တွင် ရှိနေကြောင်း ဂျွန်က ပြောသည်။

၎င်းက “အခုကျနော်တို့ ကြားကာလ ချင်းပြည်နယ် အစိုးရဆိုတဲ့ ICNCC ပေါ့လေ၊ အဲတာလေး ကျနော်တို့ ဖွဲ့ထားတယ်၊ အဲဒီ အပြင် ပြည်သူ့အုပ်ချုပ်ရေး ပီပီပြင်ပြင် ပေါ်လာဖို့အတွက်ကိုလည်း CJDC အနေနဲ့ ပြည်သူ့အုပ်ချုပ်ရေး ပီပီပြင်ပြင်ပေါ်လာဖို့ အားပေးရမယ်၊ မဖွင့်နိုင်တဲ့ ဒေသတွေ ရှိရင်လည်း ဖွင့်နိုင်အောင် တွန်းအားပေးရမယ်ဆိုပြီးမှ ကျနော်တို့ မူချမှတ်ထားတာ ရှိ ပါတယ်၊ အခုချိန်ထိကတော့ ချင်းပြည်နယ်ရဲ့ ၉၅ ရာခိုင်နှုန်းကတော့ ကျနော်တို့ရဲ့ အုပ်ချုပ်မှုအောက်မှာ ရှိနေပါတယ်။ အဲတာ ပီပီပြင်ပြင် မသွားသေးတာက တချို့ဒေသတွေမှာ ရှိရင်ရှိမှာပေါ့နော်၊ ဒါပေမယ့် အားလုံးကိုတော့ ကျနော်တို့ CJDC ရဲ့ စီစဉ်မှု အောက်မှာ အခု ICNCC ဘက်ကလည်း သူတို့ ကြိုးစားနေတဲ့ ဟာလေးတွေ ရှိတယ်၊ ကျနော်တို့ ဝိုင်းဝန်းပြီးတော့ ပြည်သူ့ အုပ်ချုပ်ရေးအဖွဲ့ ကိုယ့်ရဲ့ ရပ်ကျေးအဆင့်၊ ကိုယ့်ရဲ့ ကောင်ချုပ်အဆင့်နဲ့ တိုက်နယ်အဆင့်နဲ့ အခုကျနော်တို့ လုပ်နေတာ ရှိပါတယ်။ အဲဒါလေးတွေ အခု ပြင်ဆင်ရင်းနဲ့ အဲဒါလေးတွေ ကျနော်တို့ မျှော်မှန်းတဲ့ ချင်းပြည်ထောင်ကို ဦးတည်နေတဲ့ သဘောရှိပါတယ်”ဟု ပြောသည်။

လက်ရှိ ချင်းပြည်နယ်တွင် ချင်းအမျိုးသားတပ်ဦး (CNF) ၊ ဒေသကာကွယ်ရေးတပ် (PDF) ပူးပေါင်းတပ်ဖွဲ့နှင့် တပ်မတော် အကြား တိုက်ပွဲများ ဖြစ်ပွားလျက်ရှိသည်။

CNI News

၂၀၂၂ ခုနှစ်၊ မတ် ၁၅

လက်ရှိ မြန်မာနိုင်ငံတွင် စက်သုံးဆီဈေးနှုန်းများ မြင့်တက်နေခြင်းနှင့် စီးပွားရေးကျဆင်း၍ အလှူရှင်များ ရှားပါးလာခြင်း ကြောင့် ပရဟိတအသင်းများ အခက်အခဲများဖြင့် ကြုံတွေ့နေရကြောင်း ပရဟိတအသင်းတချို့က CNI သတင်းဌာနသို့ ပြောသည်။

ထို့နောက် လက်ရှိကာလသည် ငွေကြေးရှားပါးမှု၊ ကုန်ဈေးနှုန်းများ မြင့်တက်မှုတို့ကြောင့် အလှူရှင်များလည်း နည်းပါးလာ ကြောင်း ပရဟိတအသင်းများက ပြောသည်။

ပရဟိတအသင်းတချို့သည် လက်ရှိတွင် လျှပ်စစ်မီး မမှန်မှု၊ ဂျိုးဖြူရေ မရရှိမှုတို့ကြောင့် ရေပြတ်လပ်နေသည့် မြို့နယ်များ တွင် ရေလှူဒါန်းမှုများ ပြုလုပ်ပေးလျက်ရှိကြောင်း၊ ထိုသို့ ရေလှူဒါန်းရာတွင် စက်သုံးဆီ အများအပြား အသုံးပြုနေရကြောင်း၊ စက်သုံးဆီဈေး မြင့်တက်မှုကြောင့် အခက်အခဲဖြစ်နေကြောင်း သိရသည်။

စေတနာရှင် ပရဟိတအသင်းကိုတွေ့ရစဉ်

ရှင်သန်ရေးကူညီမှုအသင်းဥက္ကဋ္ဌ ဦးထွန်းထွန်းဦးက “စက်သုံးဆီဝယ်ဖို့ ခက်ခဲတာက အဓိကကတော့ ငွေမရှိတာပေါ့။ အခုက ကိုဗစ်ကာလလည်း ကြာလာပြီ။ အလှူရှင်တွေ အနေနဲ့လည်း နေရာစုံ လှူနေရတော့ လက်ပန်းကျ လာတာမျိုးတွေ ရှိတယ်။ နောက်တစ်ချက် လုပ်ငန်းအားဖြင့်လည်း အလုပ်အကိုင်တွေ သိပ်မကောင်းကြဘူးပေါ့။ အဲဒီအတွက် လှူဒါန်းမှုလည်း နည်း လာတဲ့အတွက် ကျနော်တို့ ပရဟိတအသင်း တော်တော်များများကလည်း ရပ်တည်ဖို့ တော်တော်လေး ခက်ခဲလာတာမျိုးတွေ ရှိပါတယ်။ စက်သုံးဆီ ဝယ်ယူမှုကတော့ အဆင်ပြေပါတယ်။ မပြေတာက ဝယ်ယူဖို့ ငွေမရှိတာပါ”ဟု CNI သတင်းဌာနသို့ ပြောသည်။

ယခုကဲ့သို့ ရေရှည်ဆက်သွားမည်ဆိုပါက ပရဟိတအသင်းများ ရပ်နားသွားရနိုင်ခြေရှိကြောင်း ပရဟိတအသင်းများက ပြော ကြသည်။

စက်သုံးဆီဈေးနှုန်း မြင့်တက်နေသည့်အတွက် လူနာလမ်း‌ကြောင်းများရှိပါက ယခင်ကကဲ့သို့ မသွားရောက်နိုင်တော့ကြောင်း စေတနာရှင် ပရဟိတအသင်း(ရန်ကုန်)မှ ကိုဝေဖြိုးက CNI သတင်းဌာနသို့ ပြောသည်။

ကိုဝေဖြိုးက “လူနာတွေက ဆင်းရဲတယ်လေ။ အဲဒီအခါကျတော့ ပြန်လည်လှူဒါန်းဖို့အတွက်လည်း အဆင်မပြေနိုင်ဘူး။ အဲ့ဒါ ကျ အခမဲ့ ပို့ပေးရတာပေါ့။ အရင်ကဆို ကားတစ်စီးကို ဖြည့်ဖို့အတွက်ဆိုရင် ၅၀၀၀၀ ကျော်၊ ၆၀၀၀၀ ဝန်းကျင်လောက်ဆို ကားပြည့်တယ်။ အခုကျ ၁၀၀၀၀၀(တစ်သိန်း)နီးနီးမှ ကားပြည့်တော့တယ်။ အဲဒီလောက် ကျတော့လည်း ပရဟိတအသင်း တွေ မထည့်နိုင်ဘူးလေ။ တစ်ခါဖြည့်ရင် ၃၀၀၀၀၊ ၄၀၀၀၀ ဖိုး အဲဒီလောက်ပဲ ဖြည့်နိုင်တယ်။ လက်ရှိဆို လမ်းကြောင်းပိုင်း တွေနဲ့ ပတ်သက်လို့ သေသေချာချာ မေးမြန်းပြီးတော့မှပဲ လမ်းကြောင်းထွက်တော့တယ်။ ဘာလို့ဆို မသေချာပဲနဲ့ဆို ဆီဈေး တွေ ကုန်တယ်ပေါ့”ဟု ပြောသည်။

ရေပြတ်လပ်မှု လှူဒါန်းနေခြင်း

ရေပြတ်လပ်သည့် နေရာများမှ အကူအညီ တောင်းခံသည့်အတွက် ရေသွားရောက် လှူဒါန်းရာတွင် ရေဂါလံ ၃၂၀၀ ဆန့် ရေသယ်ယာဉ် တစ်စီးအတွက် စက်သုံးဆီ ၅ ဂါလံခန့် အသုံးပြုရကြောင်း၊ ထိုရေအား လိုသည့်နေရာသို့ တွန်းပို့နိုင်ရန် ရေစုပ်စက်ဖြင့် တွန်းပို့ရသည့်အတွက် စက်သုံးဆီ ဂါလံဝက်ခန့် အသုံးပြုရကြောင်း ရှင်သန်ရေးကူညီမှုအသင်းဥက္ကဋ္ဌ ဦးထွန်းထွန်းဦးက ပြောသည်။

ထို့ကြောင့် တစ်ရက်လျှင် စုစုပေါင်း ကုန်ကျစရိတ်မှာ ၆၀၀၀၀ ကျော် ရှိသည့်အတွက် ယခင်က အခမဲ့ လှူဒါန်းမှုအစား ယခု အခါတွင် တတ်နိုင်သည့် လမ်းများ၌ စရိတ်မျှပေးစနစ်ဖြင့် အလှူငွေ ကောက်ခံကြောင်း၊ ထိုသို့ ကောက်ခံသည့် အခါတွင် ၆၀ ရာခိုင်နှုန်းခန့်သာ အလှူငွေ ထည့်ဝင်ကြကြောင်း သိရသည်။

လတ်တလော ရုရှား-ယူကရိန်းစစ်ပွဲကြောင့် စက်သုံးဆီ ဈေးနှုန်းများသည် တစ်ကမ္ဘာလုံး အတိုင်းအတာဖြင့် မြင့်တက်နေ ကြောင်း စီးပွားရေး လုပ်ငန်းရှင်များက ပြောသည်။

ယနေ့(မတ်လ ၁၅ ရက်) စက်သုံးဆီ ဈေးနှုန်းများမှာ ဒီဇယ်တစ်လီတာ ၁၉၈၀ ကျပ်၊ ပရီမီယမ် ဒီဇယ်တစ်လီတာ ၁၉၉၅ ကျပ်၊ အောက်တိန်း 92 တစ်လီတာ ၁၉၄၅ ကျပ်၊ အောက်တိန်း 95 တစ်လီတာ ၂၀၂၀ ကျပ် စသဖြင့် ရှိကြောင်း၊ တိုင်းဒေသကြီးနှင့် ပြည်နယ်ပေါ် မူတည်ကာ ဈေးနှုန်းကွာခြားချက် ရှိသည်။

CNI News

၂၀၂၂ ခုနှစ်၊ မတ်လ ၁၄

သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့သော သူရဦးအောင်ကိုအား အဂတိလိုက်စားမှုဖြင့် ၂၀၂၂ ခုနှစ်၊ မတ်လ ၁၄ ရက်က အလုပ်နှင့်ထောင်ဒဏ် ၁၂ နှစ် ကျခံစေရန် ရန်ကုန်တိုင်းဒေသကြီး တရားလွှတ်တော်မှ အမိန့်ချမှတ်ခဲ့ကြောင်း သိရသည်။

သူရဦးအောင်ကိုသည် နိုင်ငံတော်မှ လူပုဂ္ဂိုလ်များသို့ သာသနာ့နုဂ္ဂဟဘွဲ့ တံဆိပ် ၈ မျိုးအား နှစ်စဉ် ချီးမြှင့်ပေးအပ်ခြင်းနှင့် စပ်လျဉ်း၍ သက်ဆိုင်ရာ ပုဂ္ဂိုလ်များထံမှ ငွေသားကျပ် သိန်း ၁၀၀ နှင့် ငွေကျပ်သိန်း ၃၀၀ တန် Blank Cheque တစ်စောင် အား လက်ခံရယူခဲ့ခြင်း၊ လုပ်ငန်းရှင် တစ်ဦးမှ လုပ်ငန်းများ ရေရှည်အဆင်ပြေစေရန်အတွက် ပေးအပ်သည့် ငွေကျပ် ၁၀၀၅ သိန်းတန်ဖိုးရှိ Ford Ecerest Titanium မော်တော်ယာဉ် တစ်စီးကို လက်ခံရယူခဲ့ကြောင်း အဂတိလိုက်စားမှုတိုက်ဖျက်ရေး ကော်မရှင်က ထုတ်ပြန်ခဲ့သည်။

ထို့နောက် အလေးချိန် ၂၀ ကျပ်သားခန့်ရှိသော ရွှေပန်းကန်တစ်ချပ်အား ကျသင့်တန်ဖိုးပေးချေခြင်းမရှိဘဲ လက်ခံရယူခဲ့ ခြင်းတို့ကြောင့် ပြည်ထောင်စုဝန်ကြီးဟောင်း သူရဦးအောင်ကိုအပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ ရန်ကုန်တိုင်းဒေသကြီးတရားလွှတ်တော်တွင် ၂၀၂၁ ခုနှစ်၊ မတ်လ ၉ ရက်နေ့၌ တရားစွဲဆိုခဲ့ရာ ရာဇဝတ်ကြီးမှု အမှတ် ၅/၂၀၂၁ ၊ ၆/၂၀၂၁ ၊ ၇/၂၀၂၁ နှင့် ၃၂/၂၀၂၁ တို့ဖြင့် စစ်ဆေးခဲ့ကြောင်း ထုတ်ပြန်ချက်တွင် ဖော်ပြထားသည်။

လွှတ်တော်မှာ ဒေါ်အောင်ဆန်းစုကြည်နဲ့အတူ တွေ့ရသော သူရဦးအောင်ကို

ထုတ်ပြန်ချက်တွင် “၎င်းအမှုများအပေါ် ပြစ်မှုထင်ရှားသဖြင့် ရန်ကုန်တိုင်းဒေသကြီးတရားလွှတ်တော်က ၂၀၂၂ ခုနှစ်၊ မတ်လ ၁၄ ရက်နေ့တွင် ပြည်ထောင်စုဝန်ကြီးဟောင်း သူရဦးအောင်ကိုအား ရာဇဝတ်ကြီးမှု အမှတ် ၅/၂၀၂၁၊ ၆/၂၀၂၁၊ ၇/၂၀၂၁ နှင့် ၃၂/၂၀၂၁ တို့အတွက် အလုပ်နှင့်ထောင်ဒဏ် ၃ နှစ်စီဖြင့် စုစုပေါင်း အလုပ်နှင့်ထောင်ဒဏ် ၁၂ နှစ် ကျခံစေ ရန်နှင့် Ford Everest Titanium မော်တော်ယာဉ် တစ်စီး၊ ငွေကျပ် သိန်း ၁၀၀ နှင့် ရွှေပန်းကန်ပြားတို့အား ပြည်သူ့ဘဏ္ဍာ အဖြစ် သိမ်းဆည်းစေရန် အမိန့်ချမှတ်ခဲ့သည်”ဟု ဖော်ပြထားသည်။

သူရဦးအောင်ကိုသည် အမျိုးသားဒီမိုကရေစီအဖွဲ့ချုပ်(NLD)အစိုးရ လက်ထက်တွင် သာသနာရေးနှင့်ယဉ်ကျေးမှုဝန်ကြီး ဌာန ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့သူဖြစ်သည်။

၂၀၂၁ ခုနှစ်၊ ဖေဖော်ဝါရီ ၁ ရက်တွင် တပ်မတော်က NLD အစိုးရကို ဖြုတ်ချလိုက်ပြီးနောက် ဖမ်းဆီးခံခဲ့ရပြီး ရန်ကုန်တိုင်း ဒေသကြီး၊ အင်းစိန်အကျဉ်းထောင်မှာ ချုပ်နှောင်ခံထားရသည်။

CNI News

၂၀၂၂ ခုနှစ်၊ မတ်လ ၁၄

လက်ရှိဖြစ်ပေါ်နေသည့် နိုင်ငံရေးအကျပ်အတည်းကို ဖြေရှင်းနိုင်ရန်အတွက် ကြားကာလ ဖြေရှင်းမှုတစ်ရပ် ရရှိရေး အဓိက ထား ဦးစားပေး ကြိုးပမ်းသွားမည်ဖြစ်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

ပြီးခဲ့သည့် ရက်ပိုင်းအတွင်းက ဦးကိုကိုကြီးသည် မြန်မာနိုင်ငံဆိုင်ရာ ပြင်သစ်သံအမတ်၊ ချက်သမ္မတနိုင်ငံ သံအမတ် အပါအဝင် နိုင်ငံတကာ သံတမန်များနှင့် တွေဆုံ၍ မြန်မာနိုင်ငံအရေး ဆွေးနွေးမှုများ ပြုလုပ်ခဲ့သည်။

ဦးကိုကိုကြီးက “အဓိကက ပြဿနာအားလုံးရဲ့ အခြေခံက နိုင်ငံရေး ပြဿနာဆိုပေမယ့်လို့ နိုင်ငံရေး နည်းလမ်းအပေါ်မှာ အယုံအကြည် မဲ့လာတဲ့ဟာပေါ့နော်၊ အဲဒီဟာကို နိုင်ငံရေးပါတီ နိုင်ငံရေးနည်းလမ်း ပြန်အသက်ဝင်လာဖို့ အားကောင်းလာဖို့ အရေးကြီးတယ်၊ နောက်တစ်ခုကတော့ နိုင်ငံရေးလို့ ဆိုတဲ့နေရာမှာလည်း တိုင်းရင်းသားပါတီတွေ ရှိတယ်၊ အခြား ဒီမိုကရက် တစ်ပါတီတွေ ရှိတယ်၊ အဲဒီပါတီတွေရဲ့ အခန်းကဏ္ဍ၊ သူတို့ရဲ့အသံတွေ ပျောက်နေတာပေါ့လေ၊ အဲဒီတော့ ဒီပါတီတွေရဲ့ အမြင် သဘောထားတွေက အရေးကြီးတယ်၊ ဒါတွေ ကျနော်တို့ တော်တော်များများ ပြောဖြစ်ပါတယ်”ဟု ပြောသည်။

ထို့နောက် နိုင်ငံရေးအရ တွေ့ဆုံဆွေးနွေးမှုများ ရှိလာရေးအတွက် နစက အနေနှင့်လည်း တွေ့ဆုံဆွေးနွေးမှု နည်းလမ်းကို ပိုမိုခိုင်မာအောင် ဆောင်ရွက်ရန်၊ နိုင်ငံတကာ အသိုင်းအဝိုင်းမှတဆင့် တိုက်တွန်းပေးရန် စသည့်ကိစ္စများကိုလည်း ဆွေးနွေးခဲ့ သည်ဟု ၎င်းက ပြောသည်။

၂၀၂၂ ခုနှစ်၊ ဖေဖော်ဝါရီ ၁၂ ရက်နေ့က ဦးကိုကိုကြီးနဲ့ နစကဥက္ကဋ္ဌကို တွေ့ရစဉ်

ဦးကိုကိုကြီးက “ကျနော်တို့က မြန်မာနိုင်ငံ ပြုပြင်ပြောင်းလဲဖို့အတွက် စိတ်ဝင်တစားနဲ့ အားပေးကြတာ ထောက်ခံကြတာ တွေ အားလုံးကို ကျေးဇူးတင်တယ်၊ သို့သော် တစ်ချိန်တည်းမှာ နိုင်ငံကို ထိခိုက်နာကျင်မှု အနည်းဆုံးနဲ့ ပြုပြင်ပြောင်းလဲနိုင်ဖို့ အတွက်က နိုင်ငံရေးနည်းလမ်း ပြန်ပြီးတော့ အသက်ဝင်လာဖို့ လိုတယ်၊ အဲဒီတော့ ဒီနစက အနေနဲ့လည်း တွေ့ဆုံဆွေးနွေးမှု လမ်းကြောင်းကို ပိုပြီးတော့ ဒီထက် ထိထိရောက်ရောက် ခိုင်ခိုင်မာမာ ဆောင်ရွက်ဖို့ လိုတယ်ဆိုတာတွေကို ကျနော်တို့ ပြော ဖြစ်ပါတယ်၊ အဲဒီတော့ နိုင်ငံတကာ အသိုင်းအဝိုင်းကလည်း အဲဒါကို ဝိုင်းပြီးတော့ တိုက်တွန်းကြဖို့၊ နောက်တစ်ခုကတော့ အခု ဒီအကျပ်အတည်းကို ကျော်လွှားဖို့အတွက်က အသွင်ကူးပြောင်းရေးကာလပေါ့၊ ကြားကာလ ဖြေရှင်းမှု တစ်ရပ်ရရှိဖို့ အတွက် ကို အဓိက ကျနော်တို့ ဦးစားပေးပြီးတော့ ကြိုးပမ်းသွားမှာ ဖြစ်ပါတယ်”ဟု ပြောသည်။

လက်ရှိ မြန်မာ့နိုင်ငံရေး အကျပ်အတည်းကို ဖြေရှင်းနိုင်ရန်အတွက် နိုင်ငံတကာက အာဆီယံအား ဗဟိုချက်မအဖြစ် ထား၍ ကြိုးပမ်းလျက်ရှိနေကြောင်း၊ မတ်လ ၂၀ ရက်မှ ၂၃ ရက်အထိ အာဆီယံ၏ မြန်မာနိုင်ငံဆိုင်ရာ အထူးကိုယ်စားလှယ် မစ္စတာ ပရတ်ဆိုခွန် မြန်မာနိုင်ငံသို့ လာရောက်မည်ဖြစ်ကြောင်း၊ ထိုခရီးစဉ်အတွင်း တွေ့ဆုံသင့် တွေ့ဆုံထိုက်သူများကို တွေ့ဆုံခွင့် ပေးရန်လည်း အာဆီယံအထူးကိုယ်စားလှယ်က တောင်းဆိုထားကြောင်း သိရသည်။

အဆိုပါ အာဆီယံအထူးကိုယ်စားလှယ်၏ ခရီးစဉ်တွင် တိုင်းရင်းသားလက်နက်ကိုင် အဖွဲ့အစည်းများ ပြည်တွင်းမှ နိုင်ငံရေး ပါတီများနှင့် တွေ့ဆုံဖွယ်ရှိကြောင်း သိရသည်။