CNI News

၂၀၂၂ ခုနှစ်၊ ဧပြီ ၄

ပြည်ပနိုင်ငံကြီး တချို့သည် ပထဝီနိုင်ငံရေးအရ သြဇာလွှမ်းမိုးနိုင်ရေး ကြိုးပမ်းခဲ့ရာ တပ်မတော်၏ စည်းလုံးညီညွတ်မှု စွမ်း အားကို ဖြိုခွဲရန် ဦးတည်ကြိုးပမ်းလာခဲ့ကြောင်း နစကဒုဥက္ကဋ္ဌ ဒုတိယတပ်မတော်ကာကွယ်ရေးဦးစီးချုပ် ဒုဗိုလ်ချုပ်မှူးကြီး စိုးဝင်းက ပြောသည်။

ယနေ့ (ဧပြီ ၄ ရက်) ဗထူးတပ်နယ်ရှိ တပ်မတော်(ကြည်း) အရာခံနှင့် အကြပ်ကြီး သင်ကျောင်းတွင် သင်တန်းသားများနှင့် တွေ့ဆုံစဉ် အထက်ပါအတိုင်း ၎င်းက ပြောကြားခဲ့ခြင်း ဖြစ်သည်။

ဒုဗိုလ်ချုပ်မှူးကြီးစိုးဝင်းက “ပြည်ပနိုင်ငံကြီးတချို့ အနေဖြင့် ပထဝီနိုင်ငံရေးအရ သြဇာလွှမ်းမိုးနိုင်ရေး ကြိုးပမ်းခဲ့ရာ EAOs တချို့ အပါအဝင် အကြမ်းဖက် အဖွဲ့အမျိုးမျိုးက နည်းမျိုးစုံဖြင့် ထောက်ပံ့မှုအမျိုးမျိုးဖြင့် သိမ်းသွင်း၍ ဖောက်ခွဲ ဖျက်ဆီး ရေး သင်တန်းများကို ပြုလုပ်၍ အစိုးရရပ်တည်၍ မရအောင်ဆောင်ရွက်လာကြောင်း၊ သို့သော် ပြည်သူလူထု၊ သစ္စာရှိ နိုင်ငံ့ဝန် ထမ်းများ လုံခြုံရေးအဖွဲ့ဝင်များ၏ စည်းလုံးညီညွတ်မှုဖြင့် ကြံ့ကြံ့ခံကာ ရင်ဆိုင်ကျော်လွှားနိုင်ခဲ့ပါကြောင်း။ နည်းမျိုးစုံဖြင့် အလုံးစုံပျက်သုဉ်းရေး ဆောင်ရွက်မှုမအောင်မြင်ခဲ့ကြောင်း။ ၂၀၂၂ ခုနှစ်တွင်လည်း အထက်ပါလုပ်ရပ်များအပြင် တပ်မတော်၏ စည်းလုံးညီညွတ်မှု စွမ်းအားကို ဖြိုခွဲရန် ဦးတည်ကြိုးပမ်းလာခဲ့တယ်”ဟု ပြောသည်။

ပြည်ပနိုင်ငံကြီးတချို့ဆိုသည်မှာ မည်သည့် နိုင်ငံကို ရည်ညွန်း ပြောကြားသည်ကိုတော့ တိတိကျကျ ပြောမသွားခဲ့ပေ။

တော်လှန်ရေး(မူရင်း-အကြမ်းဖက်)အဖွဲ့အစည်း အသီးသီးအနေဖြင့် ပြည်ပနိုင်ငံကြီးတချို့၏ နယ်ရုပ်များသဖွယ် ခိုင်းစေသည့် အတိုင်း အခိုင်မာဆုံး Institution တစ်ခုဖြစ်သည့် တပ်မတော်ကို ဖြိုခွဲရန် ကြိုးပမ်းလာခြင်းသာဖြစ်ကြောင်း၊ တပ်မတော် အပေါ်တွင် နိုင်ငံကြီးတချို့၏ ခြိမ်းခြောက်မှု၊ ဝင်ရောက်စွက်ဖက်မှု၊ လူမျိုးသုဉ်းသတ်ဖြတ်သူများအဖြစ် စွပ်စွဲမှု များဖြင့် ဖိအား ပေးနှောင့်ယှက် နေသော်လည်း တပ်မတော်အနေဖြင့် စုပေါင်းညီညွတ်မှုစွမ်းအားဖြင့် အဖက်ဖက်မှ အောင်မြင်စွာ ကျော်ဖြတ် သွားမည်ဟု ၎င်းက ပြောသည်။

တပ်မတော်၏ အဓိကတာဝန်သည် နိုင်ငံတော်ကာကွယ်ရေးတာဝန်ဖြစ်ပြီး ၂၀၂၀ ပြည့်နှစ် ရွေးကောက်ပွဲတွင် မဲမသမာမှု များမှတဆင့် နိုင်ငံတော်အာဏာအရပ်ရပ်ကို အဓမ္မနည်းဖြင့် ရယူရန် ကြိုးပမ်းလာမှုအပေါ် ဒီမိုကရေစီ လမ်းကြောင်းပေါ်မှ သွေဖယ်တိမ်းစောင်းမှု မဖြစ်ပေါ်စေရေး တပ်မတော်က ၂၀၀၈ ဖွဲ့စည်းပုံအခြေခံဥပဒေ နှင့်အညီ အရေးပေါ်ကာလ ပြဋ္ဌာန်း ချက်ပါအတိုင်း တာဝန်ယူထမ်းဆောင်ခဲ့ရခြင်းဖြစ်သည်ဟု နစကဒုဥက္ကဋ္ဌက ပြောသည်။

၎င်းက “အရေးပေါ်ကာလ ၁ နှစ်ကျော်ကာလအတွင်း အခက်အခဲ အမျိုးမျိုး၊ စိန်ခေါ်မှုအမျိုးမျိုးတို့ကို သစ္စာရှိဝန်ထမ်းများ၊ လုံခြုံရေး တပ်ဖွဲ့ဝင်များနှင့် တိုင်းရင်းသားပြည်သူများ၏ ပူးပေါင်းပါဝင်မှုတို့ဖြင့် ဖြတ်သန်းကျော်လွှားခဲ့ပြီးဖြစ်တယ်”ဟု ပြောသည်။

၂၀၂၁ ခုနှစ်၊ မေလက ဒီးမော့ဆိုမြို့နယ်ရှိ စစ်တပ်၏ ဂိတ်စခန်းတစ်ခုကို ပြည်သူ့ကာကွယ်ရေးတပ်ဖွဲ့က ပူးပေါင်းသိမ်းယူခဲ့စဉ်။ (ဓာတ်ပုံ − Supplied)

လက်ရှိတွင် တပ်မတော်သည် ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို NLD အစိုးရက ဖြေရှင်းခြင်း မပြု လုပ်ဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ နိုင်ငံတော်ကို အရေးပေါ် ကြေညာ၍ နစကကို ဖွဲ့စည်းကာ ဆောင်ရွက် လျက်ရှိသည်။

ထို့နောက် တပ်မတော်ကို ဆန့်ကျင် ကန့်ကွက်ကြောင်း နိုင်ငံအဝန်း ဆန္ဒပြမှုများ ပေါ်ပေါက်ခဲ့ရာ ကြမ်းတမ်းစွာ ဖြိုခွင်မှု ကြောင့် ဆန္ဒပြသူများသည် လက်နက်ကိုင် တော်လှန်ရေးနည်းလမ်းဖြင့် တပ်မတော်အား ပြန်လည် ဖြုတ်ချရန် ယနေ့အထိ ကြိုးပမ်းလျက်ရှိနေသည်။

CNI News

၂၀၂၂ ခုနှစ်၊ ဧပြီ ၄

၂၀၂၃ တွင် ပြုလုပ်မည်ဆိုသည့် ရွေးကောက်ပွဲ နိုင်ငံရေးလမ်းကြောင်း ဖြစ်နိုင်ရန်ခက်ခဲမည်ဟု ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST)၏ ပြောရေးဆိုခွင့်ရှိသူ ရဲဘော်မျိုးဝင်းက ပြောသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ရေးထိုးထားသော တိုင်းရင်းသား လက်နက် ကိုင် အဖွဲ့အစည်းများ၏ စတုတ္ထအကြိမ်မြောက် ထိပ်သီးခေါင်းဆောင်များညီလာခံ (ဒုတိယပိုင်း) အပြီး ဧပြီ ၄ ရက်နေ့ PPST သတင်းစာ ရှင်းလင်းပွဲတွင် ပြောကြားခဲ့ ခြင်းဖြစ်သည်။

နစက-က ၂၀၂၃ ခုနှစ်တွင် အထွေထွေရွေးကောက်ပွဲကို ကျင်းပ၍ အနိုင်ရရှိသည့် ပါတီအား အာဏာလွှဲပြောင်းပေးမည်ဟု နစက ခေါင်းဆောင်များက ပြောကြားထားသည်။

ရဲဘော်မျိုးဝင်းက “ဒီနေရာမှာ ကျနော်တို့ PPST အနေနဲ့ နားလည်ထားတာက ဗမာပြည်ရဲ့ လက်ရှိနိုင်ငံရေး အကျပ်အတည်း ကို ဖြေရှင်းတဲ့နေရာမှာ ၂၀၂၃ ရွေးကောက်ပွဲ နည်းလမ်းနဲ့ ထွက်ဖို့အနေအထားက အင်မတန်မှ ခက်ခဲလိမ့်မယ်လို့ နားလည်တယ်၊ အောင်မြင်ဖို့အတွက် ခက်လိမ့်မယ်လို့ သုံးသပ်တယ်”ဟု ပြောသည်။

ရွေးကောက်ပွဲ PR စနစ်အကြောင်း ဆွေးနွေးပွဲ

မြန်မာ့နိုင်ငံရေးပြဿနာကို ဖြေရှင်းရာတွင် အားလုံးပါဝင်သည့် ဆွေးနွေးမှု ပြုလုပ်ရန် လိုအပ်ကြောင်း၊ ထိုအတွက် PPST အနေနှင့် တွေ့ဆုံဆွေးနွေးရေး နိုင်ငံရေးလမ်းပြ မြေပုံတစ်ရပ်ကို အဆိုပြုသွားမည်ဖြစ်ကြောင်း ၎င်းက ပြောသည်။

အဆိုပါ နိုင်ငံရေးဆွေးနွေးမှုတွင် တပ်မတော်သာမကဘဲ သက်ဆိုင်သူအားလုံး ပါဝင်သည့် နိုင်ငံရေးဆွေးနွေးမှုများကို ပြုလုပ် သွားမည်ဖြစ်ကြောင်း၊ အဖွဲ့အစည်း အသီးသီးတွင် မတူကွဲပြားသည့် အခြေအနေများရှိကြောင်း၊ အဆိုပါ အခြေအနေများ ကိုလည်း လက်ခံသွားမည်ဖြစ်ကြောင်း PPST ၏ ပြောရေးဆိုခွင့်ရှိသူ ရဲဘော်မျိုးဝင်းက ပြောသည်။

၎င်းက “ဒါကြောင့်မို့ ဗမာပြည်နိုင်ငံရေးပြဿနာကို ဖြေရှင်းနိုင်မယ့် နိုင်ငံရေးထွက်ပေါက်တစ်ခုကို လမ်းကြောင်းတစ်ခုကို နိုင်ငံရေးလမ်းပြ မြေပုံဆိုင်ရာ အဆိုပြုချက်ကို ကျနော်တို့ အဆိုပြုတာ ဖြစ်ပါတယ်၊ အားလုံးညှိနှိုင်း ဆွေးနွေးပြီးတော့မှ အသွင်ကူးပြောင်းရေးဆိုင်ရာ အစီအစဉ်တစ်ရပ်ကို ဖော်ထုတ်ပေးမယ်လို့ အားလုံးညှိနှိုင်းဆွေးနွေးဖို့ပေါ့”ဟု ပြောသည်။

PPST ထိပ်သီးခေါင်းဆောင်များညီလာခံ (ဒုတိယပိုင်း)ကျင်းပခဲ့စဉ်

NCA ထိုးထားသည့် လက်နက်ကိုင်အဖွဲ့များအနေနှင့် အာဆီယံအထူးကိုယ်စားလှယ်၏ မြန်မာနိုင်ငံ ခရီးစဉ်အတွင်း ကြိုးပမ်း ဆောင်ရွက်မှုများနှင့် ရှေ့ဆက် ဆောင်ရွက်သွားမည့် အစီအစဉ်များ အပါအဝင် နိုင်ငံတကာ အသိုင်းအဝိုင်း၏ ကြိုးပမ်းမှုများ ကို ကြိုဆိုကြောင်း အပစ်ရပ် လက်နက်ကိုင်အဖွဲ့များက ထုတ်ပြန်ကြေညာခဲ့သည်။

ထို့ပြင် နိုင်ငံတကာ၏ ကြိုးပမ်းမှုများသည် မြန်မာနိုင်ငံ၏ လက်တွေ့နိုင်ငံရေး လိုအပ်ချက်များနှင့်အညီ ဖြစ်စေရေးအတွက် PPST အနေဖြင့် ကြိုးပမ်းသွားမည်ဖြစ်ကြောင်း၊ မြန်မာနိုင်ငံ၏ လက်ရှိ နိုင်ငံရေးအကျပ်အတည်းကို ဖြေရှင်းရာတွင် သက်ဆိုင်သူ အားလုံးပါဝင်သည့် နိုင်ငံရေးဆွေးနွေးမှု အခင်းအကျင်း တစ်ရပ်ပေါ်ပေါက်ရေးအတွက် ညှိနှိုင်းဆောင်ရွက်ရန် PPST အနေဖြင့် အဆင်သင့်ရှိကြောင်း ကြေညာချက်တွင် ဖော်ပြထားသည်။

CNI News

၂၀၂၂ ခုနှစ်၊ ဧပြီ ၂

လက်ရှိ တက္ကသိုလ်ဝင်တန်း စာမေးပွဲ ဖြေဆိုထားသူများကို တက္ကသိုလ်ဝင်ခွင့် လက်ခံမည် မဟုတ်ကြောင်း အမျိုးသားညီညွတ် ရေးအစိုးရ (NUG)၏ ပညာရေးဝန်ကြီးဌာန၊ ရတနာပုံတက္ကသိုလ်ကောင်စီက ယနေ့ (ဧပြီ ၂ ရက်)တွင် ထုတ်ပြန်ခဲ့သည်။

နွေဦးတော်လှန်ရေးတွင် ကျဆုံးခဲ့ကြသူများ၊ အကျဉ်းကျနေသူများ၊ CDM ဝန်ထမ်းများနှင့် မြေပေါ်မြေအောက် တော်လှန်နေ ကြသူများကို ငဲ့ကွက်၍ နစကမှ ဖွင့်လှစ်သည့် ကျောင်းသင်တန်းများနှင့် စာမေးပွဲများကို သပိတ်မှောက်ကြရန် တော်လှန်ရေး အင်အားစုများက နှိုးဆော်ထားကြောင်း သိရသည်။

NUG လက်အောက်ခံ ရတနာပုံတက္ကသိုလ်ကောင်စီက “ယခုအခါတွင် တစ်နိုင်ငံလုံး၏ တော်လှန်ရေးဖြစ်ရပ်များကို မျက်ကွယ် ပြု၍ မိမိ၏ အကျိုးစီးပွားအတွက် နစက ဖွင့်လှစ်သော အတန်းများအား တက်ရောက်ခြင်း၊ နစက လက်အောက်ခံ တက္ကသိုလ် ဝင် စာမေးပွဲများကို ဖြေဆိုခြင်းများကို ပြုလုပ်နေသူများအား တွေ့ရှိရပါသည်။ ထိုသို့ တော်လှန်ရေးကို မျက်ကွယ်ပြုကာ စစ် အုပ်စု ထောက်တိုင်များအဖြစ် ပါဝင်ကြသူ မည်သူကိုမဆို ရတနာပုံတက္ကသိုလ်က ပြင်းထန်စွာ ရှုံ့ချသည်” ဟု ထုတ်ပြန်ခဲ့ သည်။

ထို့ကြောင့် ၂၀၂၂ ခုနှစ်တွင် ပြုလုပ်လျက်ရှိသည့် နစက၏ တက္ကသိုလ်ဝင်တန်း စာမေးပွဲကို ဖြေဆိုထားသူများအား ရတနာပုံ တက္ကသိုလ်က သစ္စာဖောက်များအဖြစ် သတ်မှတ်၍ တက္ကသိုလ်ဝင်ခွင့် လက်ခံမည်မဟုတ်ကြောင်း ကြေညာခဲ့သည်။

စာမေးပွဲ ဖြေကြမည့် ကျောင်းသား/သူများ

လက်ရှိ တက္ကသိုလ်ဝင်တန်း စာမေးပွဲဖြေဆိုသူများမှာ ၎င်းတို့၏ နိုင်ငံရေးခံယူချက်အပေါ် မူတည်ကြောင်း တက္ကသိုလ် ကျောင်းသား တစ်ဦးဖြစ်သူ ကိုအောင်နိုင် (အမည်လွှဲ) က ပြောသည်။

၎င်းက “ရတနာပုံကြတော့ အဲဒီဖက်မှာကြတော့ အကယ်၍များ သူတို့က ပညာရေးက နိုင်ငံရေးနဲ့ ပတ်သက်တယ်၊ နိုင်ငံရေးနဲ့ ဆိုင်တယ်ဆိုလို့ရှိရင်တော့ အဲလိုအမြင်တွေ ရှိတယ်ဆိုလို့ရှိရင်တော့ ဒါမှန်တာပေါ့နော်၊ ဒီလို လုပ်တယ်ဆိုတာ မှန်တယ်လို့ ပြောလို့ ရတယ်၊ အဲတော့ တဖက်က ကြည့်ရင် နိုင်ငံရေးက နိုင်ငံရေးသပ်သပ်၊ ပညာရေးက ပညာရေးသပ်သပ်လို့ ယူဆလို့ ရှိရင်တော့ အဲလိုအတွေးအခေါ်ရှိတဲ့ သူတွေအတွက်ဆိုရင်တော့ ဒါက မှားတယ်ပေါ့နော်၊ ဒီအပေါ်မှာတော့ ကျနော် သီးသန့် မှတ်ချက် ပေးစရာမရှိပါဘူး” ဟု ပြောသည်။

အဆိုပါ ထုတ်ပြန်ချက်နှင့် ပတ်သက်၍ တက္ကသိုလ်ဝင်တန်း စာမေးပွဲဖြေဆိုသူများနှင့် ကျောင်းသားမိဘများကို အခက်အခဲ ရှိမည်ဟု မထင်မိကြောင်း၊ ရတနာပုံတက္ကသိုလ်တွင် တက်ခွင့်မပေးပါက အခြား တက္ကသိုလ်များကို ပြောင်းတက်၍ ရသည့် အနေအထားဖြစ်နေကြောင်း ၎င်းက ပြောသည်။

၂၀၂၂ ခုနှစ် တက္ကသိုလ်ဝင်တန်း စာမေးပွဲဖြေဆိုရန် စာရင်းသွင်းသူ လူဦးရေ ၃၁၂,၄၂၄ ဦးရှိပြီး ဝင်ရောက်ဖြေဆိုသူ ၂၉၁,၇၄၁ ဦးရှိကြောင်း၊ ဖြေဆိုမှု ရာခိုင်နှုန်း ၉၀.၁၈ ရှိကြောင်း နစက၏ ပညာရေးဝန်ကြီးဌာနက ထုတ်ပြန်ထားသည်။

CNI News

၂၀၂၂ ခုနှစ်၊ ဧပြီ ၂

တရုတ်နိုင်ငံက မြန်မာနိုင်ငံ၏ နိုင်ငံရေးအကျပ်အတည်းကို နိုင်ငံရေးနည်းလမ်းဖြင့် တည်တည်ငြိမ်ငြိမ် ဖြေရှင်းနိုင်ရန် လိုလားကြောင်း ရှင်းပြသည်ဟု ပြည်သူ့ပါတီဥက္ကဋ္ဌ ဦးကိုကိုကြီးက CNI သတင်းဌာနသို့ ပြောကြားသည်။

ပြည်သူ့ပါတီဥက္ကဋ္ဌ ဦးကိုကိုကြီးနှင့် မြန်မာနိုင်ငံဆိုင်ရာ တရုတ်သံအမတ် မစ္စတာချန်ဟိုင်းတို့ မတ်လ ၂၉ ရက်နေ့က တွေ့ဆုံ စဉ် မြန်မာ့အရေး ဆွေးနွေးခဲ့ကြသည်။

ဦးကိုကိုကြီးက “လက်ရှိနိုင်ငံရဲ့ အကျပ်အတည်းပေါ်မှာ ကျနော့်သုံးသပ်ချက် အမြင်သဘောထားပေါ့၊ အဲဒါတွေနဲ့ ပတ်သက် ပြီးတော့ အပြန်အလှန် ဆွေးနွေး ဖလှယ်ဖြစ်ပါတယ်၊ သူတို့ကလည်း ယေဘုယျအားဖြင့်တော့ အိမ်နီးချင်း နိုင်ငံတွေမှာ တည်ငြိမ်မှုကို သူတို့လည်း ဖြစ်စေချင်တယ်၊ ဒါကြောင့်မို့လည်း နိုင်ငံရေးနည်းလမ်းအရ အဖြေရှာနိုင်ဖို့ကိုတော့ ကျနော်တို့ သဘောတူညီမှု ရှိကြပါတယ်” ဟု CNI သတင်းဌာနသို့ ပြောသည်။

ထို့နောက် နစက၏ နိုင်ငံခြားရေးဝန်ကြီး ဦးဝဏ္ဏမောင်လွင်သည် မတ်လ ၃၁ ရက်မှ ဧပြီလ ၂ ရက်နေ့ထိ တရုတ်နိုင်ငံသို့ သွားရောက်၍ တရုတ်နိုင်ငံခြားရေးဝန်ကြီး မစ္စတာဝမ်ယီနှင့် တွေ့ဆုံခဲ့သည်။

အဆိုပါ တွေ့ဆုံမှုတွင် ဒေသတွင်းနှင့် နိုင်ငံတကာ အကျိုးတူကိစ္စရပ်များ အထူးသဖြင့် ကုလသမဂ္ဂနှင့် အာဆီယံ မျက်နှာစာ၌ နှစ်နိုင်ငံအကြား ပိုမိုနီးကပ်စွာ ပူးပေါင်းဆောင်ရွက်သွားရေး၊ အာဆီယံ၏ တူညီဆန္ဒ(၅)ရပ် ဆက်လက် အကောင်အထည် ဖော်မှုနှင့် စပ်လျဉ်း၍ တစ်နိုင်ငံ၏ ပြည်တွင်းရေးကို ဝင်ရောက်စွက်ဖက်မှု မပြုရေး စသည့် အရေးများကို ဆွေးနွေးခဲ့ကြောင်း နစက-က ဧပြီလ ၂ ရက်နေ့တွင် သတင်းထုတ်ပြန်ခဲ့သည်။

ဦးဝဏ္ဏမောင်လွင်နဲ့ တရုတ်နိုင်ငံခြားရေးဝန်ကြီး မစ္စတာဝမ်ယီကိုတွေ့ရစဉ်

ဦးကိုကိုကြီးက “နိုင်ငံရေးနည်းလမ်းအရ ဖြေရှင်းနိုင်ဖို့နဲ့ အာဆီယံ အထူးကိုယ်စားလှယ်နဲ့ ပြောတုန်းက အချက်တွေပါပဲ၊ နိုင်ငံရေး အကျဉ်းသားတွေ ပြန်လည်လွတ်မြောက်ရေး၊ ပြီးတော့ အရပ်သား အကာအကွယ်ပေးရေး၊ ဒါကို ဘက်အသီးအသီး ကနေပြီးတော့ အရပ်သား ထိခိုက်မှုတွေ သေဆုံးမှု ဒဏ်ရာအနာတရ ဖြစ်မှုတွေ၊ အိုးအိမ်စွန့်ခွာနေရတဲ့ ကိစ္စတွေ ၊ ဒါတွေကို ဘက်အသီးသီးက ထိန်းသိမ်းကြဖို့နဲ့ လူသားချင်း စာနာမှု အကူအညီ ထိထိရောက်ရောက် ပေးပို့နိုင်ဖို့၊ ကိုဗစ်ကြောင့်ကော လက်ရှိကြောင့်ကော၊ မြန်မာနိုင်ငံရဲ့ နိုင်ငံရေးအကျပ်အတည်းကြောင့်ကော၊ နယ်စပ်ကုန်သွယ်ရေးနဲ့ ပတ်သက်လို့ ခဏခဏ ထစ်ငေါ့မှုတွေ ဖြစ်နေတာနဲ့ ပတ်သက်ပြီးတော့လည်း အဆင်ပြေစေချင်တယ်၊ ဒါတွေလည်း ကျနော်တို့ ပြောဖြစ်ပါတယ်၊ နောက်ဆုံးတစ်ခုက အရေးကြီးတာက အသွင်ကူးပြောင်းရေးကာလ သဘောတူညီချက်တစ်ရပ် ရရှိဖို့အတွက် အပူတပြင်း လိုအပ် နေတယ်ဆိုတာကို အချိန်ကာလ ကန့်သတ်ချက်တွေပါ ကျနော်တို့ ထည့်ပြီးတော့ ဆွေးနွေးဖြစ်ပါတယ်”ဟု ပြော သည်။

ဦးကိုကိုကြီးသည် တရုတ်သံအမတ်၊ အာဆီယံ အထူးကိုယ်စားလှယ် အပါအဝင် နိုင်ငံတကာ သံတမန်များနှင့် ပြီးခဲ့သည့် မတ်လအတွင်းက တွေ့ဆုံ၍ မြန်မာ့အရေး ဆွေးနွေးမှုများ ပြုလုပ်ခဲ့သည်။

လက်ရှိတွင် တွေ့ဆုံဆွေးနွေးရေး လိုလားသည့် အင်အားစုများက တွေ့ဆုံဆွေးနွေးရေး လမ်းကြောင်းကို တိုက်တွန်းနေသော် လည်း လက်ရှိအချိန်ထိ နှစ်ဖက် တွေ့ဆုံဆွေးနွေးနိုင်သည့် အခြေအနေမရှိသေးပေ။

CNI News

၂၀၂၂ ခုနှစ်၊ ဧပြီ ၂

၂၀၂၃ ခုနှစ်တွင် ကျင်းပရန် ရည်ရွယ်ထားသည့် ရွေးကောက်ပွဲသည် လွတ်လပ်သည့် တရားမျှတသည့် ရွေးကောက်ပွဲ ဖြစ်ရန် အခြေခံအားဖြင့် စာရင်းဇယားမှန်ကန် တိကျရန် အဓိက လိုအပ်ကြောင်း နစကဒုဥက္ကဋ္ဌ ဒုဗိုလ်ချုပ်မှူးကြီးစိုးဝင်းက ပြောသည်။

ဧပြီ ၁ ရက်နေ့က ကျင်းပသည့် ရွေးကောက်ပွဲအတွက် မဲစာရင်းပြုစုရေးဆိုင်ရာ အစည်းအဝေးမှာ ၎င်းက အထက်ပါ အတိုင်း ထည့်သွင်း ပြောကြားခဲ့ခြင်း ဖြစ်သည်။

ဒုဗိုလ်ချုပ်မှူးကြီးစိုးဝင်းက “ ၂၀၂၃ ခုနှစ်တွင် ကျင်းပရန် ရည်ရွယ်ထားသည့် ရွေးကောက်ပွဲသည် လွတ်လပ်သည့် တရားမျှ တ သည့် ရွေးကောက်ပွဲဖြစ်ရန် အခြေခံအားဖြင့် စာရင်းဇယားမှန်ကန် တိကျရန် အဓိကလိုအပ်ပါသဖြင့် စာရင်းဇယားများ တိကျ မှန်ကန်စေရန် တိုင်းဒေသကြီးနှင့်ပြည်နယ်များအနေဖြင့် ရွေးကောက်ပွဲကော်မရှင်အဆင့်ဆင့်၊ လူဝင်မှုကြီးကြပ်ရေး နှင့်ပြည်သူ့ အင်အားဌာနများနှင့်ပေါင်းစပ်၍ ဆန္ဒမဲပေးပိုင်ခွင့်ရှိသူ တစ်ဦးချင်းစီတိုင်း နိုင်ငံသားစိစစ်ရေးကတ် ရှိ-မရှိ လဝက ပုံစံ ၆၆/၆ ရှိ-မရှိ တစ်အိမ်တ်က တစ်အိမ်ဆင်းစိစစ်ဆောင်ရွက် သွားကြရမည်”ဟု ပြောသည်။

ထို့နောက် မြေပြင်ကွင်းဆင်း တိုင်ဆိုင် စစ်ဆေးနိုင်ရေးအတွက် လူဝင်မှုကြီးကြပ်ရေးနှင့် ပြည်သူ့အင်အားဌာနရှိ တစ်နိုင်ငံ လုံး ထုတ်ပေးထားသည့် မှတ်ပုံတင်မှတ်တမ်းများကို မှတ်တမ်းစာအုပ်မှ ကွန်ပျူတာသို့ ပြောင်းနေကြောင်း၊ အဆိုပါ ကွန်ပျူ တာသို့ စာရင်းသွင်းပြီးချိန်တွင် လဝက ပုံစံ ၆၆/၆ ကိုလည်း တစ်ပြိုင်နက် ကွန်ပျူတာအတွင်း စာရင်းသွင်းလျက်ရှိကြောင်း၊ နိုင်ငံသားစိစစ်ရေးကတ်စာရင်းနှင့် လဝက ပုံစံ ၆၆/၆ များ ကွန်ပျူတာအတွင်း ရရှိပြီးပါက သက်ဆိုင်ရာ တိုင်းဒေသကြီးနှင့် ပြည်နယ်များရှိ မြို့နယ်များသို့ ပူးပေါင်း အဖွဲ့များဖြင့် ရွေးကောက်ပွဲကျင်းပရန် ရည်ရွယ်ထားသည့် ၂၀၂၃ ခုနှစ်မတိုင်မီ မြေပြင် စာရင်း မှန်ကန်မှု ရှိ-မရှိ ပြီးစီးအောင်တိုင်ဆိုင် စစ်ဆေးဆောင်ရွက်သွားကြရမည်ဟု ၎င်းက ပြောသည်။

ဒုဗိုလ်ချုပ်မှူးကြီးစိုးဝင်းက “၂၀၂၀ ပြည့်နှစ်အထွေထွေ ရွေးကောက်ပွဲတွင် အိမ်ထောင်စု လူဦးရေစာရင်းအား လဝက ပုံစံ ၆၆/၆၊ နိုင်ငံသားစိစစ်ရေးကတ် စသည်တို့နှင့် မြေပြင် တိုက်ဆိုင်စစ်ဆေး နိုင်မှုမရှိဘဲ ရှိ/ကောက် စနစ်ဆောင်ရွက်ခဲ့၍ မဲမသမာမှုများ အမြောက်အမြားဖြစ်ပေါ်ခဲ့တယ်”ဟု ပြောသည်။

လက်ရှိ မြန်မာနိုင်ငံတွင် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ တစ်နိုင်ငံလုံး မှတ်ပုံတင်ထုတ်ပေးထား သည့် စာရင်းမှာ ၅၁ သန်းကျော်ရှိကြောင်း၊ ထိုအထဲတွင် သေဆုံးသူများ၊ ပြည်ပသို့ ထွက်ခွာသွားသူများ၊ ပျက်စီး၊ ပျောက် ဆုံးနှင့် နှစ်ကြိမ် သုံးကြိမ်ထပ်သူများလည်း ပါဝင်နေနိုင်ကြောင်း၊ ထိုမှတ်ပုံတင် ထုတ်ပေးထားသည့် ၅၁ သန်းကျော် အနက် ကွန်ပျူတာသို့ စာရင်းသွင်းရာတွင် ယခုထိ ၂၇ သန်းကျော်ပြီးစီးပြီဖြစ်ကြောင်း၊ ကျန်အရေအတွက်မှာ ၂၄ သန်းကျော်ရှိ ကြောင်း သိရသည်။

နစကသည် အရေးပေါ်ကာလဆိုင်ပြဋ္ဌာန်းချက်များနှင့်အညီ ဆောင်ရွက်ပြီးစီးပါက ၂၀၀၈ ဖွဲ့စည်းပုံအခြေခံဥပဒေနှင့်အညီ လွတ်လပ်ပြီး တရားမျှတသော ပါတီစုံဒီမိုကရေစီ အထွေထွေရွေးကောက်ပွဲအား ပြန်လည် ကျင်းပပေးမည်ဖြစ်ကြောင်း၊ ထို့ နောက် အနိုင်ရရှိသည့် ပါတီအား ဒီမိုကရေစီစံနှုန်းများနှင့်အညီ နိုင်ငံတာဝန်ကို လွှဲအပ်နိုင်ရေး ဆက်လက် ဆောင်ရွက် သွားမည်ဖြစ်ကြောင်း နစကဒုဥက္ကဋ္ဌ ဒုဗိုလ်ချုပ်မှူးကြီးစိုးဝင်းက ပြောသည်။

၂၀၂၃ ခုနှစ်၊ သြဂုတ်လတွင် အထွေထွေရွေးကောက်ပွဲ ကျင်းပပေးမည်ဟုလည်း နစက-က ထုတ်ပြန်ကြေညာထားသည်။

လက်ရှိ မြန်မာနိုင်ငံသည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့ အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေ ရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်က ဖြုတ်ချ၍ နိုင်ငံတော်ကို အရေးပေါ် ကြေညာခဲ့သည်။

CNI News

၂၀၂၂ ခုနှစ်၊ ဧပြီ ၁

နစက-က အသစ်ပြန်လည် ပြင်ဆင် ပြဋ္ဌာန်းလိုက်သည့် ရဲတပ်ဖွဲ့ဥပဒေတွင် နိုင်ငံသားအခွင့်အရေးနှင့် ပုဂ္ဂလိက လွတ်လပ်ခွင့် များကို ထိခိုက်သည့် အချက်များ ပါဝင်နေကြောင်း ဥပဒေပညာရှင်များနှင့် လူ့အခွင့်အရေး လှုပ်ရှားသူများက ပြောသည်။

အဆိုပါ ပြင်ဆင်လိုက်သည့် ဥပဒေတွင် ရဲတပ်ဖွဲ့အနေနှင့် လုံခြုံရေးနှင့် ကာကွယ်ရေး အကြောင်းပြချက်ဖြင့် တရားရုံးမှ ဖမ်း ဝရမ်းမပါဘဲ လူတစ်ဦးတစ်ယောက်ကို ဖမ်းဆီးခွင့် ခွင့်ပြုထားသည့် အချက်များ ပါဝင်သည်။

လက်ရှိ အသစ်ပြဋ္ဌာန်းလိုက်သည့် မြန်မာနိုင်ငံရဲတပ်ဖွဲ့ဥပဒေတွင် နိုင်ငံ၏ လုံခြုံရေး၊ ကာကွယ်ရေးကို အဓိက ဇောင်းပေး ထားကြောင်း၊ ယခင်က ဥပဒေအရ နိုင်ငံသားတစ်ဦးကို ဖမ်းဆီးခွင့် စစ်ဆေးခွင့်များနှင့် ပတ်သက်၍ ရဲအရေးမပိုင်ပါက သက်ဆိုင်ရာ တရားရုံးမှ ခွင့်ပြုချက်ရှိမှာသာ ဖမ်းဆီးခွင့် စစ်ဆေးခွင့်ရှိကြောင်း၊ သို့သော် ယခု အသစ်ပြဋ္ဌာန်းလိုက်သည့် ဥပဒေတွင် အဆိုပါ ကန့်သတ်ချက်များ မရှိတော့ကြောင်း ဥပဒေအကြံပေး ဦးခင်မောင်မြင့်က CNI သတင်းဌာနသို့ ပြော သည်။

ဦးခင်မောင်မြင့်က “အသစ် ပြဋ္ဌာန်းလိုက်တဲ့ ရဲတပ်ဖွဲ့ ဥပဒေမှာကျတော့ အဲဒီလို ကန့်သတ်ထားတဲ့ တားမြစ်ထားတဲ့ ကန့်သတ် ချက်တွေကို ကျော်လွန်ပြီးတော့ နိုင်ငံသားတစ်ဦးအပေါ်မှာ မသင်္ကာဖွယ်ရာ အကြောင်းရှိရင် သို့မဟုတ် လုံခြုံရေးနှင့် ကာ ကွယ်ရေးဆိုင်ရာ မသင်္ကာဖွယ်ရာ အကြောင်းအချက်တွေရှိရင် ရှာဖွေခွင့်ရှိတယ်၊ ဖမ်းဆီးခွင့်ရှိတယ်၊ အဲဒီလို ရှာဖွေ ဖမ်းဆီးတဲ့ နေရာမှာ ခိုင်လုံတဲ့ အကြောင်းပြချက်မရှိဘူး၊ ထောင်ဒဏ် ၆ လ ကနေ ၂ နှစ်အထိ ချမှတ်နိုင်တယ်။ ပြဋ္ဌာန်းချက်တွေကို ပြဋ္ဌာန်းလိုက်ခြင်းကြောင့် ရဲတပ်ဖွဲ့ဝင်တွေပေါ့နော်၊ အရာရှိ အပါအဝင် ရဲတပ်ဖွဲ့ဝင်တွေရဲ့ အခွင့်အာဏာကို တော်တော်များ များ တိုးမြှင့်ပြီးတော့ ပြဋ္ဌာန်းလိုက်တယ်၊ နိုင်ငံသားတွေရဲ့ ပုဂ္ဂလိက လွတ်လပ်လုံခြုံမှုတွေ နိုင်ငံသား အခွင့်အရေးတွေ အပိုင်း မှာ ကန့်သတ်တားမြစ်ထားတဲ့ ကန့်သတ်ချက်တွေကို ကျော်လွန်ပြီးတော့ ပြဋ္ဌာန်းလိုက်တယ်ဆိုတာ သွားတွေ့ရပါတယ်”ဟု ပြောသည်။

နစကသည် မြန်မာနိုင်ငံရဲတပ်ဖွဲ့ ဥပဒေကို ပြီးခဲ့သည့် မတ်လ ၂၅ ရက်က အသစ်ပြန်လည် ပြဋ္ဌာန်းခဲ့ခြင်း ဖြစ်သည်။

မြန်မာနိုင်ငံရဲတပ်ဖွဲ့ကိုတွေ့ရစဉ်(GETTY IMAGES)

ထို့ပြင် ရဲတပ်ဖွဲ့ အကြီးအကဲ ရဲချုပ်ကို ခန့်မည်ဆိုပါက တပ်မတော်ကာကွယ်ရေးဦးစီးချုပ်နှင့် ညှိနှိုင်းပြီး ခန့်အပ်ခြင်း အတည်ပြုခြင်း၊ ပြောင်းရွှေ့ခြင်း၊ ထုတ်ပယ်ခြင်းတို့ ပြလုပ်နိုင်ကြောင်း အဆိုပါ ဥပဒေတွင် ဖော်ပြထားသည်။

ဥပဒေအကြံပေး ဦးခင်မောင်မြင့်က “လူ့အဖွဲ့အစည်းနဲ့ လူ့အဖွဲ့အစည်းထဲမှာ ပါဝင်နေတဲ့ နိုင်ငံသား တစ်ဦးချင်းစီ တစ်ဦး ချင်းစီရဲ့ ဥပဒေအရ ဘက်ညီမှုပေါ့၊ လူ့အဖွဲ့အစည်းကိုလည်း အကာအကွယ်ပေးရမယ်၊ အဲဒီလို အကာအကွယ် ပေးခြင်း ကြောင့် နိုင်ငံသားတစ်ဦးချင်းစီရဲ့ နိုင်ငံသားအခွင့်အရေးနဲ့ ပုဂ္ဂလိက လွတ်လပ်မှု လုံခြုံမှုတွေကိုလည်း မထိခိုက်စေရ ဘူး ဆိုတဲ့ မူအရ ပြဋ္ဌာန်းခဲ့တာ ဖြစ်ပါတယ်၊ အခု ဒီမှာတော့ ဒီပြဋ္ဌာန်းချက်တွေကို ကြည့်လိုက်တဲ့ အခါမှာ နိုင်ငံသားတစ်ဦး ချင်းစီ တစ်ဦးချင်းစီရဲ့ နိုင်ငံသားအခွင့်အရေးနဲ့ ပုဂ္ဂလိက လွတ်လပ်လုံခြုံမှုဆိုတဲ့ အခန်းကဏ္ဍကို ဦးစားပြီးတော့ စဥ်းစား ထားတာ မတွေ့ဘူး၊ နိုင်ငံသို့မဟုတ် လူ့အဖွဲ့အစည်းရဲ့ လုံခြုံရေးနဲ့ ကာကွယ်ရေးကိုပဲ ဇောင်းပေးပြီး ဆောင်ရွက် ထားတာ ဖြစ်တဲ့အတွက် အနည်းငယ်တော့ ဟန်ချက်ကတော့ မမျှဘူးလို့ ပြောလို့ရပါတယ်”ဟု ပြောသည်။

လက်ရှိ ပြင်ဆင် ပြဋ္ဌာန်းလိုက်သည့် ဥပဒေသည် ယခင်က ကိုလိုနီခေတ်ကတည်းက ပြဋ္ဌာန်းထားသည့် ရဲဥပဒေများကို အစားထိုး ပြဋ္ဌာန်းခဲ့ခြင်းဖြစ်ပြီး  ကာလကြာပြီဖြစ်သည့် ဥပဒေဟောင်းများကိုဖျက်ကာ အသစ်ပြဋ္ဌာန်းခြင်းဖြစ်ကြောင်း လွှတ်တော် ကိုယ်စားလှယ်ဟောင်း ဦးရဲထွန်း(သီပေါ) က ပြောသည်။

ဦးရဲထွန်းက “ဝရမ်းမပါဘဲ ရှာဖွေခွင့်တွေက နေရာတကာမှာ ရှာဖွေခွင့် ပေးထားတာတော့ မဟုတ်ဘူး၊ အများပြည်သူနဲ့ သက်ဆိုင်တဲ့ နေရာတွေမှာ၊ နောက်တစ်ခါ နေဝင်ချိန်ကနေ နေထွက်ချိန်ရဲ့ ကြားပေါ့ဗျာ၊ ည မှောင်သွားတဲ့ အချိန်မှာ အများဆိုင်ရာ နေရာတွေမှာ လမ်းကြိုလမ်းကြားတွေထဲမှာ တွေ့တယ်ဆိုရင် ဝရမ်းမပါဘဲနဲ့ ရှာဖွေခွင့်တွေ အဲဒီလို လုပ် ထားတာ တွေ့ရတယ်”ဟု ပြောသည်။

ထို့ပြင် အစိုးရဌာန အဖွဲ့အစည်းများ၊ ပုဂ္ဂလိက အဖွဲ့အစည်းများ အပါအဝင် မည်သူမဆို စုပေါင်းအိမ်ရာ၊ ဈေး၊ အဆောက် အအုံ၊ ဟိုတယ်၊ မိုတယ်၊ စက်ရုံ၊ အလုပ်ရုံများ ဆောက်မည်ဆိုပါက မြို့နယ်ရဲတပ်ဖွဲ့မှူးရုံးကို တင်ပြရမည်ဖြစ်ကြောင်း ပြဋ္ဌာန်းထားသည်။

အဆိုပါ ဥပဒေသစ် ပြဋ္ဌာန်းချက်နှင့်အတူ ယခင်က ပြဋ္ဌာန်းထားပြီးဖြစ်သည့် ရန်ကုန်ရဲအက်ဥပဒေ ၁၈၉၉၊ ရဲအက်ဥပဒေ ၁၉၄၅၊ ကရင်ပြည်နယ် ရဲအက်ဥပဒေ၊ ၁၉၅၉ ကယားပြည်နယ် ရဲအဖွဲ့ အက်ဥပဒေတို့ကို အစားထိုး ရုပ်သိမ်းလိုက် ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က လက်မှတ်ရေးထိုး ထုတ်ပြန်ခဲ့ခြင်း ဖြစ်သည်။

CNI News

၂၀၂၂ ခုနှစ်၊ ဧပြီလ ၁

ရှမ်းပြည်နယ် တောင်ပိုင်းသို့ ရောက်ရှိနေသည့် ရှမ်းပြည်တိုးတက်ရေးပါတီ (SSPP/SSA)၏ တပ်ဖွဲ့များ ပြန်လည်ဆုတ်ခွာရန် တပ်မတော်က ပြောကြောင်း SSPP မှ အထွေထွေအတွင်းရေးမှူး (၂) ဒုဗိုလ်မှူးကြီး စိုင်းဆုက CNI သတင်းဌာနသို့ ပြော သည်။

မတ်လ ၃၁ ရက်က နေပြည်တော်တွင် ဒုတိယဗိုလ်ချုပ်ကြီးရာပြည့် ဦးဆောင်သည့် အမျိုးသား စည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ(NSPNC )နှင့် SSPP တို့ တွေ့ဆုံဆွေးနွေးစဉ် အထက်ပါအတိုင်း တောင်းဆို ခဲ့ခြင်း ဖြစ်သည်။

ဒုဗိုလ်မှူးကြီး စိုင်းဆုက “အဓိက ဘာတွေဆွေးနွေးလဲဆိုတော့ ငြိမ်းချမ်းရေးပေါ့၊ ငြိမ်းချမ်းရေး ဆိုတာကလည်း နိုင်ငံရေး နဲ့ မသက်ဆိုင်ဘူး၊ ကျနော်တို့က မြေပြင်မှာ ဖြစ်နေတဲ့ စစ်ရေးပဋိပက္ခတွေကို ကျနော်တို့က ဥပမာ ကျနော်တို့က လှုပ်ရှား သွား လာရောက်ရှိနေတဲ့ နေရာတွေ အများစုက ဆုတ်ခိုင်းတာ ကျနော်တို့ကို၊ အဲဒါကို ကျနော်တို့က ရောက်ရှိနေတဲ့ နေရာက လည်း ပြဿနာရှိတာပေါ့၊ သူတို့ စစ်အင်အားတွေ လိုက်ပြီးတော့ ချည်းကပ်တာမျိုးတွေ တိုက်ပွဲတွေ ဖြစ်နိုင်တာပေါ့၊ တိုက်ပွဲ မဖြစ်အောင် ခင်ဗျားတို့ လိုက်ပြီးတော့ ချည်းကပ်မှုတွေ မလုပ်ပါနဲ့လို့ ကျနော်တို့ သူတို့ကို အဲလိုမျိုးပြောတာ”ဟု ပြောသည်။

NSPNC နှင့် SSPP ကိုယ်စားလှယ်များကို ၂၀၂၂ ခုနှစ်၊ မတ်လ ၃၁ ရက်က တွေ့ရစဉ်

အဆိုပါ တွေ့ဆုံ ဆွေးနွေးပွဲတွင် NSPNC ဘက်က လက်ရှိ ငြိမ်းချမ်းရေးဆောင်ရွက်နေမှု၊ အစိုးရအနေဖြင့် ၂၀၂၂ ခုနှစ်ကို ငြိမ်းချမ်းရေး နှစ်အဖြစ် သတ်မှတ်ပြီး ကြိုတင်သတ်မှတ်ချက်များမရှိဘဲ လက်နက်ကိုင် အဖွဲ့အစည်းများနှင့် တွေ့ဆုံ ဆွေးနွေး မှု၊ အပစ်အခတ်ရပ်စဲ ထားမှု၊ ဒေသဖွံ့ဖြိုးတက်ရေး လုပ်ငန်းများဆောင်ရွက်နိုင်ရေး၊ ပဋိပက္ခများလျှော့ချနိုင်ရေး၊ ဒေသခံ ပြည်သူများ၏ လိုအပ်ချက်များကို တွေ့ဆုံညှိနှိုင်း ဖြည့်ဆည်းဆောင်ရွက်နိုင်ရေး၊ လွတ်လပ်ပြီး တရားမျှတသော ပါတီစုံ ဒီမိုကရေစီ အထွေထွေရွေးကောက်ပွဲ အောင်မြင်စွာ ကျင်းပနိုင်ရေးအတွက် ပူးပေါင်းဆောင်ရွက်ရေးနှင့် နယ်မြေဒေသ တည်ငြိမ်အေးချမ်းရေး စသည့် ကိစ္စရပ်များကို ဆွေးနွေးခဲ့ကြောင်း နစက-က ထုတ်ပြန်ခဲ့သည်။

၂၀၂၃ ခုနှစ်တွင် ရွေးကောက်ပွဲ ကျင်းပနိုင်ရေး နယ်မြေတည်ငြိမ် အေးချမ်းစေရန်၊ နိုင်ငံရေးပါတီ အများစု သွားလာစည်းရုံး နိုင်ရန်၊ ပြည်သူလူထုများကို ကန့်သတ်မှုများ မလုပ်ရန် NSPNC က တောင်းဆိုခဲ့ကြောင်း ဒုဗိုလ်မှူးကြီး စိုင်းဆုက ပြောသည်။

ဒုဗိုလ်မှူးကြီး စိုင်းဆုက “တော်တော်များများ ကျနော်တို့ ရှိနေတဲ့ ဒီ RCSS နဲ့ တိုက်ပွဲတွေက ရှိနေတဲ့ နေရာတွေ တော်တော် များများ အများအားဖြင့် အဲဒေသတွေမှာ ဖြစ်တယ်၊ အများစုက တပ်က လိုက်ပြီးတော့ စစ်ကြောင်းတွေ လိုက်ပြီး ချည်းကပ်မှု မလုပ်ဘူးဆိုရင် ပြဿနာ မရှိလောက်ဘူး၊ လိုက်ပြီးတော့ ချည်းကပ်မှုတွေလုပ်တယ်၊ ပြောလို့ မရဘူးဆိုရင်လည်း ဒါကတော့ ပြောလို့မရဘူးလေ။ ကျနော်တို့မှာလည်း ရှောင်လမ်းမရှိဘူးဆိုရင်တော့ ထိပ်တိုက်မှုတွေ ဖြစ်နိုင်တာပေါ့” ဟု ပြောသည်။

SSPP အတွင်းရေးမှူး(၂) ဒုဗိုလ်မှူးကြီးစိုင်းဆု

SSPP သည် ရှမ်းပြည်နယ်၊ ကျေးသီးမြို့နယ် ဝမ်ဟိုင်းဒေသတွင် ဌာနချုပ်ထားရှိ၍ သီပေါ၊ ကျောက်မဲ၊ မိုင်းရှုး၊ နမ့်ခမ်း၊ ခိုလမ်၊ ကျေးသီး၊ တန့်ယန်း၊ လားရှိုးနှင့် မုန်းယိုင်မြို့နယ်များမှာ လှုပ်ရှားလျက်ရှိကြောင်း သိရသည်။

သို့သော် အထက်ပါ ဒေသများတွင် RCSS နှင့် တိုက်ပွဲများဖြစ်ပြီး ရှမ်းပြည်နယ် တောင်ပိုင်းသို့ RCSS ကို တိုက်ထုတ်ခဲ့ရာမှ လက်ရှိ ရှမ်းပြည်တောင်ပိုင်းထိ တပ်လှုပ်ရှားမှုများ ပြုလုပ်လျက်ရှိနေသည်။ ထို့ကြောင့် တပ်မတော်က SSPP ကို ရှမ်းပြည် နယ် မြောက်ပိုင်းသို့ တပ်များ ပြန်ဆုတ်ရန် မတ်လ ၃၁ ရက်နေ့က တွေ့ဆုံစဉ် ဆွေးနွေးခဲ့ကြောင်း သိရသည်။

SSPP သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ကို လက်မှတ်မရေးထိုးသေးပဲ ထိုးနိုင်ရန် ဆွေးနွေးနေဆဲ ရှမ်းလက်နက်ကိုင်တပ်ဖွဲ့ဖြစ်သည်။

CNI News

၂၀၂၂ ခုနှစ်၊ မတ်လ ၃၁

အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ(NSPNC)နှင့် ရှမ်းပြည်တိုးတက်ရေး ပါတီ(SSPP)တို့ ယနေ့(မတ်လ ၃၁ ရက်)တွင် နေပြည်တော်၌ တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့ကြ သည်။

အဆိုပါ တွေ့ဆုံ ဆွေးနွေးပွဲသို့ NSPNC ဘက်မှ ဒုတိယဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ်အဖွဲ့နှင့် SSPP ဘက်မှ ဒုဥက္ကဋ္ဌ(၂) စဝ်ခွန်ဆိုင်၊ အတွင်းရေးမှူး(၂) စဝ်စိုင်းဆု၊ ဗဟိုကော်မတီဝင် စဝ်နော်လိတ်၊ စဝ်သန်းအောင်တို့ ပါဝင်သော ကိုယ်စားလှယ်အဖွဲ့တို့ တက်ရောက်ခဲ့ကြသည်။

၂၀၂၂ ခုနှစ်၊ မတ်လ ၃၁ ရက်က NSPNC နှင့် SSPP တွေ့ဆုံစဉ်

NSPNC ဘက်က လက်ရှိ ငြိမ်းချမ်းရေးဆောင်ရွက်နေမှု၊ အစိုးရအနေဖြင့် ၂၀၂၂ ခုနှစ်ကို ငြိမ်းချမ်းရေး နှစ်အဖြစ် သတ် မှတ်ပြီး ကြိုတင်သတ်မှတ်ချက်များမရှိဘဲ လက်နက်ကိုင်အဖွဲ့အစည်းများနှင့် တွေ့ဆုံ ဆွေးနွေးမှု၊ အပစ်အခတ်ရပ်စဲ ထားမှု၊ ဒေသဖွံ့ ဖြိုး တက်ရေး လုပ်ငန်းများဆောင်ရွက်နိုင်ရေး၊ ပဋိပက္ခများလျှော့ချနိုင်ရေး၊ ဒေသခံပြည်သူများ၏ လိုအပ်ချက်များကို တွေ့ဆုံ ညှိနှိုင်း ဖြည့်ဆည်းဆောင်ရွက်နိုင်ရေး၊ လွတ်လပ်ပြီး တရားမျှတသော ပါတီစုံ ဒီမိုကရေစီ အထွေထွေရွေးကောက်ပွဲ အောင် မြင်စွာ ကျင်းပနိုင်ရေးအတွက် ပူးပေါင်းဆောင်ရွက်ရေးနှင့် နယ်မြေဒေသ တည်ငြိမ်အေး ချမ်းရေး စသည့် ကိစ္စရပ်များကို ဆွေးနွေးခဲ့ကြောင်း နစက-က ထုတ်ပြန်ထားသည်။

SSPP ၏ ဒုဥက္ကဋ္ဌ(၂)စဝ်ခွန်ဆိုင်

ထို့နောက် SSPP ၏ ဒုဥက္ကဋ္ဌ(၂)စဝ်ခွန်ဆိုင်က တိုင်းပြည် ဖွံ့ဖြိုးတိုးတက်ရေးအတွက် တည်ငြိမ်အေးချမ်းပြီး တရားဥပဒေ စိုးမိုး မှုရှိသည့် ပတ်ဝန်းကျင်ကောင်းတစ်ခု ဖန်တီးရေး၊ ဒေသတည်ငြိမ်အေးချမ်းရေးနှင့်လုံခြုံမှုရရှိရေးအတွက် တစ်ဖက်နှင့် တစ် ဖက် ယုံကြည်မှု ပိုမိုတည်ဆောက်နိုင်ရေး၊ အကြိမ်ကြိမ် တွေ့ဆုံဆွေးနွေးညှိနှိုင်းပြီး အခက်အခဲ အတားအဆီးများ ကျော်လွှား နိုင်ရေး စသည့် အခြေအနေများကို ဆွေးနွေးခဲ့ကြောင်း သိရသည်။

ထို့ပြင် NSPNC နှင့် SSPP တို့သည် ရှမ်းပြည်နယ်အတွင်းရှိ တိုင်းရင်းသား လက်နက်ကိုင်အဖွဲ့များအကြား လက်ရှိ ဖြစ်ပေါ် နေသည့် ကိစ္စရပ်များ၊ ရှေ့ဆက် ဆောင်ရွက်မည့် ငြိမ်းချမ်းရေး လုပ်ငန်းစဉ်များနှင့် ဒေသဖွံ့ဖြိုးရေးဆိုင်ရာကိစ္စများအား ညှိနှိုင်း ဆွေးနွေးခဲ့ကြကြောာင်းလည်း သိရသည်။

 SSPP သည် ပြည်နယ်-ပြည်ထောင်စုအဆင့် ပဏာမအပစ်အခတ်ရပ်စဲရေးစာချုပ် (Bilateral) ရေးထိုးထားသည့် ရှမ်းလက်နက်ကိုင်အဖွဲ့ဖြစ်ပြီး တစ်နိုင်ငံ လုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ကိုတော့ လက်မှတ် မထိုးနိုင်သေးပေ။

CNI News

၂၀၂၂ ခုနှစ်၊ မတ်လ ၃၁

ကရင်ပြည်နယ် မြဝတီ - ကော့ကရိတ် အာရှလမ်းမကြီးပေါ်တွင် လတ်တလော ဖြစ်ပွားနေသည့် တိုက်ပွဲကြောင့် ကုန်စည်ကား များ ပိတ်မိနေကြောင်း သိရသည်။

အာရှလမ်းမပေါ်တွင် ကရင်အမျိုးသားအစည်းအရုံး (KNU) တပ်မဟာ- ၆၊ ဒေသကာကွယ်ရေးတပ် (PDF) တို့ ပူးပေါင်းတပ်ဖွဲ့ နှင့် တပ်မတော်အကြား မတ်လ ၂၇ ရက်မှ စတင်ကာ တိုက်ပွဲများ ဖြစ်ပွားခဲ့သည်။

အာရှလမ်းပိုင်း ကော့ကရိတ်ဘက်ခြမ်း တတန်ကူး တံတားအနီးတွင် ကုန်စည်ကား (၂) စီး၊ အိမ်စီးကား (၂) မီးရှို့ဖျက်ဆီးခံခဲ့ ရပြီး ကုန်စည်ကားများ ပိတ်မိနေကြောင်း သိရသည်။

ထို့နောက် မတ်လ ၂၉ ရက်က ကုန်စည်ကားနှင့် အိမ်စီးမော်တော်ကားများကို PDF များမှ မီးရှို့ ဖျက်ဆီးခဲ့ကြောင်း မတ်လ ၃၀ ရက်တွင် နစကဘက်မှ ထုတ်ပြန်ခဲ့သည်။

နစက-က “ထိုကဲ့သို့ စစ်ရေးပစ်မှတ် မဟုတ်သည့် အစိုးရရုံး အဆောက်အဦများနှင့် အများပြည်သူ နေအိမ်များအပြင် အများ ပြည်သူ သွားလာနေသည့် လမ်းမကြီးများနှင့် ခရီးသွားပြည်သူများအား ပစ်မှတ်ထား တိုက်ခိုက်ခြင်းနှင့် လူမှုစီးပွားကို ထိခိုက် ပျက်စီးစေပြီး ကုန်စည်စီးဆင်းမှုကို အဟန့်အတားဖြစ်စေသည့် အကြမ်းဖက်လုပ်ရန်များကို အခြေခံကာ မီးရှို့ဖျက်ဆီးခဲ့သည့် PDF များအား ဖော်ထုတ် အရေးယူနိုင်ရေးနှင့် နယ်မြေလုံခြုံရေးအတွက် လုံခြုံရေးတပ်ဖွဲ့ဝင်များက လိုအပ်သည်များ ဆက် လက် ဆောင်ရွက်နေသည်” ဟု ထုတ်ပြန်ခဲ့သည်။

 မြဝတီ - ကော့ကရိတ် အာရှလမ်းမပေါ် မှာ မတ်လ ၂၉ ရက်နေ့က မီးရှို့ခံရသောကားများ

အဆိုပါ ကုန်စည်ကားနှင့် အိမ်စီးကားများ မီးရှို့ဖျက်ဆီးခံရသည့် ကိစ္စနှင့်ပတ်သက်၍ CNI အနေဖြင့် သီခြား အတည်မပြုနိုင် သေးပေ။

ဒေသခံတချို့ကတော့ ကော့ကရိတ်- မြဝတီ အာရှလမ်း ပုံမှန်သွားလာလျှက် ရှိကြောင်း၊ ကုန်စည် စီးဆင်းမှု အနေဖြင့် ပြောင်း၊ ကြက်သွန် တင်ဆောင်ထားသည့် ၂၂ ဘီး တွဲကားများ မြဝတီသို့ တက်နေပြီဖြစ်ကြောင်း၊ ထိုင်းထုတ် အိမ်ဆောက် ပစ္စည်းများ တင်ဆောင်ထားသည့် ကုန်ကားများ ဆင်းလာသည်ကို မြင်ရကြောင်း ပြောသည်။

မြဝတီ - ကော့ကရိတ် လမ်းမကြီးအား အသုံးပြုကာ KNU တပ်မဟာ-၆ နယ်မြေအတွင်း တပ်မတော်မှ တပ်အင်အားများ ပို့ဆောင် လျက်ရှိကြောင်း၊ မြဝတီ - ကော့ကရိတ် လမ်းမကြီးအား ပြည်သူလူထုများ ဖြတ်သန်းခွင့် ယာယီရပ်ဆိုင်းကြောင်း မတ်လ ၂၆ ရက်က တပ်မဟာ-၆ မှ ထုတ်ပြန်ခဲ့သည်။

မတ်လ ၂၇ ရက်မှ စတင်၍ မြဝတီ - ကော့ကရိတ် လမ်းမကြီးနှင့် မြဝတီ - ဝေါလေ လမ်းမကြီးအား အသုံးပြုလျက် ယာဉ်များ ဖြတ်သန်းသွားလာခြင်း၊ ကူးသန်းရောင်းဝယ်ခြင်းများကို ယာယီရပ်ဆိုင်းထားကြရန်လည်း ထိုထုတ်ပြန်ချက်တွင် ထည့် သွင်း ဖော်ပြထားသည်။

ထိုနောက် အဆိုပါ ထုတ်ပြန်ချက်အား ပြန်လည်ပယ်ဖျက်သည့် ထုတ်ပြန်ကြေငြာချက် မထုတ်ပြန်မချင်း အတည်ဖြစ်ကြောင်း ဖော်ပြထားသည်။

နှစ်ဖက် တပ်များ တင်းမာနေသည့် အခြေအနေများကြောင့် ညှိနှိုင်းရန် ခက်ခဲကြောင်း၊ အချိန်ကြာလာသည်နှင့်အမျှ ဒေသခံ ပြည်သူလူထုများ ထိခိုက်နစ်နာမှုများ ပိုများလာကြောင်း ကရင်ပြည်နယ်အဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲ စောင့်ကြည့်ရေးကော်မတီ (JMC-S) မှ နော်စေးဝါးက ပြောသည်။

 မြဝတီ - ကော့ကရိတ် အာရှလမ်းမပေါ် မှာ မတ်လ ၂၉ ရက်နေ့က မီးရှို့ခံရသောကားများ

၎င်းက “ဒီလိုမျိုးဆိုရင်တော့ ညှိနှိုင်းဖို့က ခက်ခဲလာမှာပေါ့၊ ပိုပြီးတော့ တင်းမာလာကြတာပေါ့၊ ဒီလိုမျိုး သွားနေမယ်ဆိုရင် တော့ နစ်နာမှာက ကိုယ့်ပြည်သူလူထုတွေပဲလေ၊ ကိုယ့်နိုင်ငံသား အချင်းချင်း ပြန်ပြီး နစ်နာကြမယ်၊ အချိန်ကြာလာလေ ပျက်စီးမှုက များလာလေပဲပေါ့၊ ဒေသခံလူထုလည်း နစ်နာတယ် တိုက်ပွဲဖြစ်ပြီ ဆိုရင်တော့ အခုဆိုရင် ထွက်ပြေးနေရတာပေါ့ နော်၊ အထူးသဖြင့် ကော့ကရိတ်ရဲ့ တောင်ပိုင်းတို့ ထွက်ပြေးနေရတာပေါ့၊ ဒေသခံလူထုတွေ ရွာကလူတွေ၊ တပ်မဟာ-၆ ဘက် က လူတွေက နစ်နာတာပေါ့၊ ဒါပေမယ့် မပြောတတ်ဘူးပေါ့နော်။ သူတို့ရဲ့ ယုံကြည်ချက်၊ ခံယူချက်တွေက အဓိက အခုဟာက လက်နက်ကိုင် အဖွဲ့အစည်းတွေပဲလေ၊ ရွာသားတွေတော့ စစ်တိုက်တာတော့ ဘယ်လိုချင်ပါ့မလဲ၊ ကျမတို့တွေလည်း အခုမှ ငြိမ်းချမ်းစပဲ ရှိသေးတယ်လေ၊ တကယ်လို့သာ အဲဒီလိုမျိုး တိုက်နေ၊ ခိုက်နေကြမယ်ဆိုရင်တော့ ပြေလည်အောင် ပြန်ညှိဖို့က တအားကို အချိန်ယူရဦးမယ်” ဟု ပြောသည်။

မြဝတီ - ကော့ကရိတ် အာရှလမ်းကြီးပေါ်က တိုက်ပွဲများကြောင်း ကော့ကရိတ်တောင်ပိုင်းရှိ ဒေသခံရွာသားများ ဘေးလွတ်ရာ သို့ ထွက်ပြေး တိမ်းရှောင်နေကြကြောင်း သိရသည်။

အဆိုပါ တိုက်ပွဲများကြောင့် မြန်မာ-ထိုင်း ကုန်သွယ်မှုများ ထိခိုက်စေခဲ့ကြောင်း သိရသည်။