CNI News

၂၀၂၂ ခုနှစ်၊ မတ်လ ၂၂

မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရတ်ဆိုခွန်နှင့် တွေ့ဆုံစဉ် အသွင်ကူးပြောင်းရေး ကြားကာလ နိုင်ငံရေး သဘောတူညီမှု တစ်ခုရရှိစေရန် သက်ဆိုင်သူ အားလုံးနှင့် တွေ့ဆုံဆွေးနွေးရန် ပြည်သူ့ပါတီ(PP)ဥက္ကဋ္ဌ ဦးကိုကိုကြီးက တင်ပြ ဆွေးနွေးအကြံပြုခဲ့သည်ဟု သိရသည်။

အာဆီယံအထူးကိုယ်စားလှယ် ပရတ်ဆိုခွန် ဦးဆောင်သော ကိုယ်စားလှယ်အဖွဲ့နှင့် ဦးကိုကိုကြီး ဦးဆောင်သည့် ကိုယ်စား လှယ် အဖွဲ့တို့ ယနေ့(မတ်လ ၂၂ ရက်) နံနက် ၁၁ နာရီက ရန်ကုန်မြို့ရှိ Lotte Hotel ၌ တွေ့ဆုံ ဆွေးနွေးခဲ့ ကြသည်။

ပြည်သူ့ပါတီ(PP)က “ ဆွေးနွေးပွဲတွင် လက်ရှိ မြန်မာ့နိုင်ငံရေး အကျပ်အတည်း ပြဿနာများကို အမြင်ချင်း ဖလှယ်ကြပြီး နောက်၊ ပြည်သူ့ပါတီ၏ ရပ်တည်ချက် သဘောထားများနှင့် နိုင်ငံရေး နည်းလမ်းဖြင့် အဖြေရှာရန် နည်းလမ်းများကို ရှင်း လင်းတင်ပြခဲ့ကြသည်”ဟု ထုတ်ပြန်ခဲ့သည်။

ဦးကိုကိုကြီး ဦးဆောင်သော ကိုယ်စားလှယ်နဲ့ ပရတ်ဆိုခွန် ဦးဆောင်သော ကိုယ်စားလှယ်တွေ့ဆုံစဉ်(ပြည်သူ့ပါတီ-ဖေ့စ်ဘွတ်ခ်)

ထို့နောက် နိုင်ငံရေးအကျဉ်းသားများ အားလုံးကိုလွှတ်ပေးရန်၊ အရပ်သားထိခိုက် သေဆုံးမှုများကို ဘက်အသီးသီးမှ အကာ အကွယ်ပေးရန်၊ လူသားချင်း စာနာမှုဆိုင်ရာ အကူအညီများကို ကျယ်ကျယ်ပြန့်ပြန့် ကူညီထောက်ပံ့ပေးရန်၊ အသွင်ကူး ပြောင်းရေး ကြားကာလ နိုင်ငံရေးသဘောတူညီမှု တစ်ခုရရှိစေရန် သက်ဆိုင်သူအားလုံးနှင့် တွေ့ဆုံဆွေးနွေးရန် စသည့် အချက် ၄ ချက်ကို အာဆီယံအထူးကိုယ်စားလှယ် ပရတ်ဆိုခွန်အနေဖြင့် နစကသို့ အကြံပြု တိုက်တွန်းပေးရန် တင်ပြ တောင်း ဆိုခဲ့သည်ဟု ပြည်သူ့ပါတီ(PP)၏ ထုတ်ပြန်ချက်တွင် ဖော်ပြထားသည်။

CNI News

၂၀၂၂ ခုနှစ်၊ မတ်လ ၂၂

ဘင်္ဂါလီလူမျိုးများအပေါ် တပ်မတော်မှ လူမျိုးသုဉ်းသတ်ဖြတ်မှု ကျူးလွန်ကြောင်း အမေရိကန်၏ကြေညာချက်အပေါ် ကရင်အမျိုးသားအစည်းအရုံး(KNU)မှ ကြိုဆိုကြောင်း KNU ၏ နိုင်ငံခြားရေးတာဝန်ခံ ပဒိုစောတောနီးက ပြောသည်။

၂၀၁၇ ခုနှစ်က ဘင်္ဂါလီများအပေါ် မြန်မာတပ်မတော်က လူမျိုးသုဉ်းသတ်ဖြတ်မှု (Genocide)နှင့် လူသားမျိုးနွယ်အပေါ် ကျူးလွန်သည့် ရာဇဝတ်မှု မြောက်နေကြောင်း အမေရိကန်နိုင်ငံခြားရေးဝန်ကြီး အန်တိုနီဘလင်ကန်က မတ်လ ၂၁ ရက်တွင် ကြေညာခဲ့သည်။

မိမိတို့ ကရင်လူမျိုးများ ဖြတ်ကျော်ခဲ့ရသည့် ဖြတ်လေးဖြတ် စစ်ဆင်ရေးဆိုသည်မှာ နှစ်ပေါင်း အတော်ကြာလာပြီဖြစ် ကြောင်း၊ ၁၉၄၇ ခုနှစ်ကစပြီး ခါးသီးလှသည့် အတွေ့အကြုံများရှိခဲ့၍ ကိုယ်ချင်းစာမိကြောင်း ပဒိုစောတောနီးက ပြောသည်။

ပဒိုစောတောနီးက “အဲဒါကြောင့်မို့ ဒါတွေက ဘယ်လိုဘဲဖြစ်ဖြစ် ဒီလိုဟာမျိုးတွေက ထက်ခါထက်ခါ ဖြစ်သွားမယ်ဆိုတာ မကောင်းပါဘူး။ ကျနော်ပြောချင်တာက ရိုဟင်ဂျာပေါ့နော်၊ လူမျိုးသုဉ်းသတ်ဖြတ်မှု တစ်ခုတည်းမှ မဟုတ်ဘူး။ ကျနော်တို့ တိုင်းရင်းသားဒေသမှာ ဖြစ်ခဲ့တဲ့ ကချင်ဘက်မှာရော၊ ချင်းဘက်မှာရော၊ ဒီရှမ်းဘက်မှာရော၊ ကရင်၊ ကရင်နီနဲ့ ကျနော်တို့က ဒီလိုဟာမျိုးတွေက အလားတူပဲ ဖြစ်ခဲ့တယ်ဆိုတာ ကျနော်တို့က ၂၀၁၇ ကတည်းက ထုတ်ပြန်ကြေညာချက် ထုတ်ထားပြီး သားပါ။ ဆိုတော့ အဲဒီ အနေအထားမျိုးမှာတော့ ကျ‌နော်တို့ကတော့ ကြိုဆိုရမှာပေါ့လေ။ ကြိုနေရုံနဲ့ မကဘူး ဒီဟာလက်တွေ့ အကောင်အထည်ဖော်တဲ့ လုပ်ရပ်တွေလည်း လိုက်ပါလာဖို့ လိုတယ်ဆိုတာ ဒီနေ့ ဒီကာလမှာ စစ်ကောင်စီကို ကျနော်တို့ ဆန့် ကျင် တိုက်ခိုက်နေတဲ့ အနေအထားမျိုးမှာတော့ ဒါက ပြတ်ပြတ်သားသား ရပ်တည်ဖို့ လိုတယ်လေ၊ စိတ်ဓာတ် ရေးရာအရ ထောက်ခံတယ်ဆိုတာ ကျနော်တို့ ဝမ်းသာပါတယ်၊ ဒါပေမယ့် လက်တွေ့ အကောင်အထည်ဖော်တဲ့အခါမှာ ဒီစိတ်ဓာတ်‌ ရေးရာတစ်ခုတည်းနဲ့ မပြည့်စုံပါဘူး”ဟု ပြောသည်။

ဘင်္ဂါလီများ ဘင်္ဂလားဒေ့ရှ်ဘက်သို့ ထွက်ခွာနေကြစဉ်

အဆိုပါ လူမျိုးသုဉ်း သတ်ဖြတ်မှုအတွက် ဘင်္ဂါလီများကို ကိုယ်ချင်းစာကြောင်း၊ မိမိတို့ KNU အနေဖြင့်လည်း လူမျိုးသုဉ်း သတ်ဖြတ်မှုကို ဆန့်ကျင်ကြောင်း ၂၀၁၇ ကတည်းက ထုတ်ပြန်ထားဟု ၎င်းက ပြောသည်။

အမေရိကန် အနေဖြင့် ကမ္ဘာ့အခင်းအကျင်းတွင် အဘက်ဘက်မှ ကျဆင်းနေသည့် ၎င်းတို့၏ ဂုဏ်သိက္ခာကို ထွက်ပေါက် တစ်ခုအနေဖြင့် သိက္ခာဆယ်သည့် ပုံစံမျိုးလုပ်သာ ဖြစ်သည်ဟု ယူဆကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက ပြောသည်။

ဦးသိန်းထွန်းဦး “မြန်မာနဲ့ ပတ်သက်ပြီးတော့ တစ်ဖက်သတ် သူတို့လုပ်ချင်သလိုလုပ်တဲ့ ကြေညာချက်မျိုးတွေ ထုတ်တာက‌‌ တော့ ရိုးနေပြီပေါ့နော်၊ သူတို့ရဲ့ ထုံးစံပါပဲ။ ဒါပေမယ့် ဒီတစ်ခါ ထုတ်တဲ့ဟာက နည်းနည်းထူးဆန်းတယ်၊ ကျနော်တို့ အခုလက် ရှိ ကမ္ဘာ့အခင်းအကျင်းနဲ့ ပြန်ကြည့်မယ်ဆိုရင် ဒီရုရှား - ယူကရိန်း အရေးအခင်းမှာ သူတို့ သိက္ခာကျသွားတာ တစ်ပိုင်းရှိတယ်၊ ပြောရရင်တော့ နေတိုးအဖွဲ့ကြီး တစ်ဖွဲ့လုံးကိုယ်စားရဲ့သိက္ခာ မရှိသလောက် ဖြစ်သွားတာပေါ့၊ အဲဒါက တစ်ပိုင်း၊ နောက် တစ် ချက်က ဒီအီရန်ကနေပြီးတော့ ဒုံးတွေနဲ့ ပစ်ပြီး‌တော့ အမေရိကန်သံရုံးကို ရန်စလိုက်တဲ့ကိစ္စ ဒါလည်းသူ မရှင်းနိုင်ဘူး၊ နောက် ပိုဆိုးတာက ရုရှား - ယူကရိန်းအရေးမှာ ရေနံအကျပ်အတည်း ဖြစ်လာတဲ့အခါမှာ ရေနံရောင်းဖို့အတွက် အရှေ့အလယ်ပိုင်း နိုင်ငံတွေထဲကနေ သူသွားညှိတယ်၊ အဲဒါလည်း မရခဲ့ဘူး။ အဲတော့ ဆိုလိုတာကတော့ အဖက်ဖက်ကနေ အောင်မြင်မှုတွေကို နောက်ဆုံးတော့ မြန်မာနိုင်ငံဖက်ကို လှည့်ပြီး‌တော့ ထွက်ပေါက်တစ်ခုအနေနဲ့ သိက္ခာဆယ်တဲ့ ပုံစံမျိုးလုပ်တယ်လို့ ကျနော်တို့ ယူဆပါတယ်”ဟု ပြောသည်။

ICJ မှာ နစက ကိုယ်စားလှယ် သွားရောက်ဖြေရှင်းစဉ်

လူမျိုးသုဉ်း သတ်ဖြတ်သည်မှာ သက်သေ အထောက်အထားမရှိပဲ ရမ်းသမ်း၍ စွပ်စွဲသည့် လုပ်ရပ်မျိုးဖြစ်ကြောင်း ၎င်းက ပြောသည်။

ရခိုင်ပြည်နယ်တွင် ၂၀၁၇ ခုနှစ်က တပ်မတော်၏ နယ်မြေရှင်းလင်းမူ နောက်ပိုင်း ဘင်္ဂါလီအများစု အိုးအိမ်စွန့်ခွာ၍ အိမ်နီးချင်း ဘင်္ဂလားဒေ့ရ်နိုင်ငံဘက်သို့ ထွက်ပြေးခိုလှုံခဲ့ကြရသည်။ ထို့နောက် တပ်မတော်မှ ဘင်္ဂါလီများအ‌ပေါ် လူမျိုးသုဉ်း သတ်ဖြတ်မှု ကျူးလွန်ကြောင်း လူ့အခွင့်အရေး လှုပ်ရှားသူများက ပြောကြသည်။

အဆိုပါ ဖြစ်စဉ်နှင့်ပတ်သက်ပြီး ဂမ်ဘီယာနိုင်ငံကလည်း နယ်သာလန်နိုင်ငံ၊ သည်ဟိတ်မြို့ရှိ အပြည်ပြည်ဆိုင်ရာတရားရုံး (ICJ)မှာ လူမျိုးသုဉ်း သတ်ဖြတ်သည်ဟုဆိုကာ မြန်မာနိုင်ငံကို တရားစွဲထားခြင်းကြောင့် အမှုရင်ဆိုင်ဖြေရှင်းနေရသည်။

CNI News

၂၀၂၂ ခုနှစ်၊ မတ်လ ၂၁

မွန်ညီညွတ်ရေးပါတီ(MUP)အနေဖြင့် နစကနှင့် ပူးပေါင်းဆောင်ရွက်မှုများ ရှိသည့်အတွက် ဝေဖန်မှုများ ရှိနေသော်လည်း လက်ရှိ မူဝါဒအတိုင်းသာ ဆက်လက် လျှောက်လှမ်းသွားရန် ဆုံးဖြတ်ထားကြောင်း MUP ၏ အထွေထွေအတွင်းရေးမှူး နိုင်စံတင်က CNI သတင်းဌာနသို့ ပြောသည်။

မွန်ညီညွတ်ရေးပါတီသည် နစကတွင် ကိုယ်စားလှယ်အဖြစ် ပါဝင်ခဲ့သည့်အတွက် ပါတီ၏ ဗဟိုအလုပ်အမှုဆောင် ကော်မတီ ဝင် ၆၁ ဦးအနက် ၁၀ ဦးထိ နုတ်ထွက်သွားခဲ့ကာ၊ ဗဟိုကော်မတီဝင်များ၊ မြို့နယ် အလုပ်အမှုဆောင်များ၊ ပါတီဝင်များ နုတ်ထွက်မှုများ ရှိခဲ့သည်။

လက်ရှိတွင် မွန်ညီညွတ်ရေးပါတီ (MUP) အနေနှင့် နစကအဖွဲ့ဝင် တစ်ဦးနှင့် မွန်ပြည်နယ် စီမံအုပ်ချုပ်ရေးကောင်စီ၌ အဖွဲ့ဝင် တစ်ဦး ပါဝင်နေသည်။

နိုင်စံတင်က “ကျနော်တို့ ပြည်နယ်အခြေအနေနဲ့ တခြားပြည်နယ် အခြေအနေ မတူဘူးလေ၊ မတူတဲ့ အခါကျတော့ အများစု ဆန္ဒကို ကျနော်တို့ လိုက်နာရမယ်၊ အဓိကက ပြည်သူလူထု မနစ်နာဖို့ဘဲ သူတို့ အေးအေးချမ်းချမ်းနဲ့ နေထိုင်နိုင်ဖို့အတွက် ကျနော်တို့ အဓိကရည်ရွယ်ပြီးတော့ ကျနော်တို့ ဝေဖန်ထိပါစေ ကျနော်တို့ ဒီအတိုင်းပဲ ဆက်လျှောက်ဖို့သင့်တယ်လို့ လော လောဆယ်တော့ ကျနော်တို့ အဲဒီလိုပဲ ဆုံးဖြတ်ထားတယ်”ဟု ပြောသည်။

ထို့ပြင် မွန်ညီညွတ်ရေးပါတီသည် လက်ရှိ နိုင်ငံရေး အခင်းအကျင်းတွင် ဆွေးနွေးညှိနှိုင်း အဖြေရှာသည့် နည်းလမ်းကိုသာ သွားရန် ဆုံးဖြတ်ထားပြီး မွန်ပြည်နယ်တွင် လက်နက်ကိုင်ပဋိပက္ခများ ဖြစ်လာမည်ကို မလိုလားကြောင်း ၎င်းက ပြောသည်။

MUP ပါတီ ဥက္ကဋ္ဌအသစ် နိုင်မြင့်ဆွေ (ခေါ်) နိုင်လဝီအောင်

နိုင်စံတင်က “ကျနော်တို့ပါတီရဲ့ ရှေ့ဆက်မယ့် လမ်းစဉ်ကတော့ အဓိက ဒီနိုင်ငံ အေးချမ်းသာယာဖို့ ဆိုရင်တော့ ဒီလက်နက် ကိုင် ပဋိပက္ခတွေ ဖြေရှင်းဖို့ အရမ်းလိုအပ်တယ်၊ ဖြေရှင်းတဲ့ နေရာမှာလည်း ဆွေးနွေးညှိနှိုင်းပြီးတော့ အဖြေရှာထုတ်ဖို့ နည်း လမ်းကိုသုံးဖို့ သင့်တာပေါ့နော်၊ ကျနော်တို့ အဲဒီလို ချမှတ်ထားတယ်၊ နောက်ပြီးတော့ ဒီနိုင်ငံကို ဆက်ပြီးတော့ ဖွံ့ဖြိုးတိုးတက် စေရင် ဖက်ဒရယ်ဒီမိုကရေစီ ပြည်ထောင်စုစနစ်နဲ့ သွားဖို့သင့်တာပေါ့” ဟု ပြောသည်။

ထို့နောက် မွန်ညီညွတ်ရေးပါတီ (MUP)သည် နုတ်ထွက်သွားသော ကိုယ်စားလှယ်များနှင့် သေဆုံးသွားသော ခေါင်းဆောင် များရှိသည့်အတွက် ပါတီညီလာခံကို မတ်လ ၁၈ ရက်မှ ၂၀ ရက်ထိ သုံးရက်ကြာ ကျင်းပ၍ ဗဟိုအလုပ်အမှုဆောင် ကော်မတီ အသစ် ပြန်လည် ရွေးချယ်ခဲ့သည်။

အဆိုပါ ညီလာခံကနေ မွန်ညီညွတ်ရေးပါတီ ဥက္ကဋ္ဌအသစ် အဖြစ် ပြည်နယ် ဝန်ကြီးဟောင်းဖြစ်သူ နိုင်မြင့်ဆွေ (ခေါ်) နိုင်လဝီ အောင်ကို ရွေးချယ်ခဲ့သည်။ အဆိုပါ နိုင်မြင့်ဆွေ (ခေါ်) နိုင်လဝီအောင်သည် မွန်ပြည်နယ်အစိုးရအဖွဲ့ ဝန်ကြီးဟောင်းလည်း ဖြစ်ခဲ့သလို မွန်တိုင်းရင်းသား လက်နက်ကိုင်အဖွဲ့ မွန်ပြည် သစ်ပါတီ (NMSP) တွင်လည်း ပါဝင်ခဲ့သူဖြစ်သည်။

ထို့ပြင် ပါတီ ဒုဥက္ကဋ္ဌ (၁) အဖြစ် နိုင်တလညီ၊ ဒုဥက္ကဋ္ဌ (၂) အဖြစ် နိုင်ချမ်းတွဲ့တို့အား ရွေးချယ်ခဲ့ကြောင်း၊ အထွေထွေ အတွင်း ရေးမှူးအဖြစ် နိုင်စံတင်၊ တွဲဖက်အတွင်းရေးမှူး (၁) နိုင်လယီတမ နှင့် တွဲဖက်အတွင်းရေးမှူး (၂) မိစန္ဒာနွန်တို့ကို ရွေးချယ်ခဲ့ ကြောင်း မွန်ညီညွတ်ရေးပါတီထံမှ သိရသည်။

အဆိုပါ ကိုယ်စားလှယ် ရွေးချယ်မှုနှင့်ပတ်သက်ပြီး မွန်နိုင်ငံရေး အသိုင်းအဝန်းတွင် ဝေဖန်မှုများ ရှိနေသည်။

မွန်ညီညွတ်ရေးပါတီ(MUP)ကို ၂၀၁၉ ခုနှစ်အတွင်းက မွန်အမျိုးသားပါတီ၊ မွန်ဒေသလုံးဆိုင်ရာ ဒီမိုကရေစီပါတီ၊ မွန်ပြည်သစ်ပါတီ(NMSP)ဟောင်းများ ပူးပေါင်းကာ ဖွဲ့စည်းခဲ့ခြင်း ဖြစ်သည်။

CNI News

၂၀၂၂ ခုနှစ်၊ မတ်လ ၂၁

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရတ်ဆိုခွန်တို့ ယနေ့ (မတ်လ ၂၁ ရက်)တွေ့ဆုံ၍ အာဆီယံ ဘုံသဘောတူညီချက် (၅) ရပ်အပေါ် အကောင်အထည်ဖော် ဆောင်ရွက်မှု အခြေအနေများကို ဆွေးနွေးခဲ့ကြောင်း သိရသည်။

ထို့နောက် မြန်မာနိုင်ငံရှိ ပြည်သူများအတွက် လူသားချင်း စာနာထောက်ထားမှုဆိုင်ရာ အကူအညီများ ရရှိစေရေး ဆောင်ရွက်လျက်ရှိမှု အခြေအနေများ၊ အာဆီယံတွင် ပူးပေါင်းဆောင်ရွက်မှုမြှင့်တင်ရေးဆိုင်ရာ ကိစ္စရပ်များ၊ ယခု ခရီးစဉ် သည် ပထမဆုံး ခြေလှမ်းဖြစ်၍ တွေ့ဆုံ ဆွေးနွေးမှုများမှတဆင့် တိုးတက်မှုများ ရရှိစေရေး စသည့် အခြေအနေများကို လည်း ဆွေးနွေးခဲ့ကြကြောင်း သိရသည်။

CNI News

၂၀၂၂ ခုနှစ်၊ မတ်လ ၂၁

မြန်မာနိုင်ငံကို ရောက်ရှိနေသည့် မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရတ်ဆိုခွန်နှင့် အမျိုးသားဒီမိုကရေစီ အဖွဲ့ချုပ်(NLD)မှ ဒေါ်စုစုလွင်တို့ တွေ့ဆုံခဲ့ပါက NLD အတွင်း သဘောထားကွဲလွဲမှုများ ဖြစ်လာနိုင်ကြောင်း နိုင်ငံရေး လေ့လာ သုံးသပ်သူ ဦးရဲထွန်းက CNI သတင်းဌာနသို့ ပြောသည်။

ဒေါ်စုစုလွင် အနေဖြင့် မည်သည့် အနေအထားတွင် တွေ့ဆုံမည်ကို စောင့်ကြည့်ရန် လိုအပ်ကြောင်း၊ NLD ကိုယ်စားပြု တွေ့ဆုံမည်ဆိုပါက အဝေးရောက် NLD ခေါင်းဆောင်များနှင့် အငြင်းပွားမှု ဖြစ်လာနိုင်ကြောင်း ၎င်းက ပြောသည်။

ဦးရဲထွန်းက “နိုင်ငံရေးပါတီတွေနဲ့ တွေ့တဲ့အခါမှ NLD နဲ့ တွေ့မယ်ဆိုတဲ့ အခါကြတော့ NLD က အဓိက ခေါင်းဆောင်တွေ ကလည်း အကျဉ်းချ ခံထားရတယ်၊ တချို့ကလည်း အဝေးရောက်နေတာပေါ့ဗျာ၊ အဲလို ဖြစ်တဲ့အခါကြတော့ အခု တွေ့မယ်လို့ သူတို့မှန်းထားတဲ့ လူက ဒေါ်စုစုလွင် ဖြစ်တယ်၊ ဆိုတော့ အဲဒီ ဒေါ်စုစုလွင် တွေ့တာနဲ့ ပတ်သက်ပြီးတော့ NLD ထဲမှာ သဘော ထား ကွဲလွဲမှုတွေ ဖြစ်လာနိုင်တာပေါ့နော်၊ ဖြစ်လာနိုင်တယ်။ ဒေါ်စုစုလွင်ကရော ဘယ်လို အနေအထားကနေပြီးတော့ လက်ခံ တွေ့မှာလဲ ဘယ်လို အနေအထား ရှိမလဲဆိုတာတော့ စောင့်ကြည့်ရမှာပေါ့လေ။ သို့သော် သေချာတာကတော့ ဒေါ်စုစုလွင် နဲ့ လက်ခံတွေ့လိုက်တယ်၊ နစက-ကလည်း ဒေါ်စုစုလွင်ကို လက်ရှိ NLD ရဲ့ တရားဝင် ရပ်တည်ပိုင်ခွင့်ရှိတဲ့ ပါတီကိုယ်စား လှယ် တစ်ယောက်အနေနဲ့ အသိအမှတ်ပြုလိုက်တယ်ဆိုရင် တခြား အဝေးရောက်နေတဲ့ NUG တို့၊ CRPH တို့က NLD ခေါင်းဆောင်တွေနဲ့ အငြင်းပွားစရာ ဖြစ်လာနိုင်တာပေါ့နော်”ဟု ပြောသည်။

ဒေါ်စုစုလွင်နဲ့ ဒေါ်အောင်ဆန်းစုကြည်ကိုတွေ့ရစဉ်

အာဆီယံ အထူးကိုယ်စားလှယ်နှင့် ဒေါ်စုစုလွင်တို့ တွေ့ဆုံမည့်ကိစ္စနှင့် ပတ်သက်၍ အခြားသော NLD ခေါင်းဆောင်များ၏ သဘောထားကို သိရှိနိုင်ရန် ဆက်သွယ်ခဲ့သော်လည်း ဆက်သွယ်၍ မရရှိသေးပေ။

နိုင်ငံရေးသမား တစ်ဦးဖြစ်သူ ဒေါက်တာ လှကျော်ဇောကတော့ အာဆီယံအထူးကိုယ်စားလှယ်နှင့် NLD တွေ့ဆုံသည့် ကိစ္စနှင့် ပတ်သက်၍ မိမိအနေဖြင့် မပြောလိုကြောင်း၊ သို့သော်လည်း အာဆီယံကိုယ်စားလှယ် လာရောက်ခြင်းမှာ ပြည်သူများအတွက် အကျိုးမရှိနိုင်ကြောင်း ပြောသည်။

၎င်းက “အာဆီယံအနေနဲ့ကတော့ သူတို့ လုပ်စရာရှိတာ သူတို့ ဆက်လုပ်နေတယ်ထင်တယ်၊ သူ့ရဲ့ ဆုံးဖြတ်ချက် (၅) ချက်ကို ဗမာပြည်က ဘယ်လောက်လက်ခံနိုင်လဲ၊ လက်မခံနိုင်လဲဆိုတာ ဆက်လုပ်နေပုံရတယ်၊ အဲတော့ အာဆီယံက သူ့တစ်ခုလုံးရဲ့ မူကိုက ဗမာပြည်ကို ပစ်ထားဖို့ မဟုတ်ဘူးလေ၊ ဗမာပြည်ကို အာဆီယံထဲမှာ ပါဝင်ပြီးတော့ ဆက်လက် လုပ်ဆောင်စရာရှိတာ လုပ်ဆောင်ဖို့ပဲ၊ အဲတော့ အာဆီယံရဲ့ အဓိက လုပ်ငန်းက ဗမာပြည် ဒီမိုကရေစီရရေး မဟုတ်ဘူးဗျ၊ အာဆီယံရဲ့ အခု လော လောဆယ် ကိစ္စကတော့ ကိုဗစ် -၁၉ အပြီးမှာ စီးပွားရေးကို အားလုံး ဘယ်လိုပြန်ပြီးတော့ ကောင်းအောင် လုပ်မလဲ၊ အာဆီယံ နိုင်ငံတွေ ညီညီညွတ်ညွတ် ဘယ်လို လုပ်ကြမလဲဆိုတဲ့ဟာ သူ့ရဲ့ အဓိက ပြဿနာပဲ။ အဲတော့ အာဆီယံကလည်း သူ့ဟာနဲ့ သူ လုပ်မယ်ဗျာ၊ ကျမတို့ ဗမာပြည်သူကလည်း ကိုယ့်ရည်မှန်းချက်နဲ့ ကိုယ်လုပ်စရာရှိတာ ဆက်လုပ်ဖို့ပဲ။ ဘာမှတော့ ကျမတို့ ပြည်သူအတွက်ကတော့ သိပ်အကျိုးရှိစရာ အကြောင်းတော့ မရှိဘူးပေါ့ဗျာ” ဟု ပြောသည်။

ပရတ်ဆိုခွန်နဲ့ ဗိုလ်ချုပ်မှူးကြီး မင်းအောင်လှိုင်တို့ ၂၀၂၂ ခုနှစ်၊ မတ်လ ၂၁ ရက်က တွေ့ဆုံစဉ်

ယနေ့ (မတ်လ ၂၁ ရက်) နံနက်ပိုင်းက အာဆီယံအထူးကိုယ်စားလှယ်နှင့် နစကဥက္ကဋ္ဌတို့ တွေ့ဆုံခဲ့ပြီး အာဆီယံ ဘုံသဘော တူညီချက် (၅) ရပ်အပေါ် အကောင်အထည်ဖော်မှု အခြေအနေများ၊ မြန်မာနိုင်ငံရှိ ပြည်သူများအတွက် လူသားချင်း စာနာ ထောက်ထားမှုဆိုင်ရာ အကူအညီများ ရရှိရေး၊ အာဆီယံတွင် ပူးပေါင်းဆောင်ရွက်မှု မြှင့်တင်ရေးဆိုင်ရာများကို ဆွေးနွေးခဲ့ကြ ကြောင်း သိရသည်။

ဦးရဲထွန်းက “အဲဒီလို ကိုယ်စားပြုခွင့်ကိစ္စက တခြားလူတွေ လက်မခံသော်လည်း ကျန်တဲ့ အကျဉ်းချမခံရတဲ့ NLD လွှတ်တော် ကိုယ်စားလှယ်ဟောင်းတွေလည်းရှိတယ်၊ အဲဒီ ကိုယ်စားလှယ်ဟောင်းတွေ အများစု ဒီမြို့ပေါ်မှာ ကျန်နေခဲ့တဲ့ ကိုယ်စားလှယ် ဟောင်းတွေရဲ့ သဘောထား ဘယ်လိုလဲ၊ ပြောချင်တာက ဘယ်လိုလဲဆိုတာက NLD ကို အဓိက ခေါင်းဆောင်တွေ မပါပဲနဲ့ ဆက်သွားမှာလား ဆက်သွားမှာဆိုတာက ဘာဖြစ်လို့ဆို သိပ်မကြာတော့တဲ့ ကာလအတွင်းမှာ ရွေးကောက်ပွဲရှိတယ်လေ၊ နစက လုပ်ပေးမယ့် ရွေးကောက်ပွဲရှိတယ်၊ အဲဒီရွေးကောက်ပွဲ ပါမှာလား၊ မပါဘူးလား ဆိုတဲ့ဟာ အပေါ်မှာ အများကြီး အဆုံး အဖြတ်ပေးမှာ ဆိုတဲ့အခါကြတော့ အဲဒီလူတွေကို ဒေါ်စုစုလွင်ကရော စည်းရုံးနိုင်မှာလား။ အဲလို သွားဖို့အတွက်ရော အဓိက ခေါင်းဆောင်တွေ မပါဘဲနဲ့ရော သွားဖို့ သူ့မှာ စိတ်ဆန္ဒရှိသလားဆိုတဲ့ အချက်တွေ ပေါ်မှာတော့ မူတည်မှာပေါ့၊ ဒါတွေက တော့ ကျနော်တို့ မသိနိုင်သေးတဲ့ အချက်တွေပေါ့”ဟု ပြောသည်။

မြန်မာနိုင်ငံသို့ ရောက်ရှိနေသည့် အာဆီယံအထူးကိုယ်စားလှယ် မစ္စတာ ပရတ်ဆိုခွန် (Prak Sokhonn) သည် နစက ဥက္ကဋ္ဌ နှင့် တွေ့ဆုံခဲ့ပြီးနောက် နိုင်ငံရေးပါတီ တချို့နှင့် တွေ့ဆုံမည်ဖြစ်ကြောင်း သိရသည်။

CNI News

၂၀၂၂ ခုနှစ်၊ မတ်လ ၂၁

တပ်မတော် အနေဖြင့် ရေပက်မဝင်သည့် ကျစ်လစ်ခိုင်မာသော စည်းလုံးမှုဖြင့် ရပ်တည်လျက်ရှိသည်ဟု ဒုတိယတပ်မတော် ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်းက မတ်လ ၂၀ ရက်နေ့က အလယ်ပိုင်းတိုင်းစစ်ဌာနချုပ်၊ မိုင်းမော တပ်နယ်ရှိ အရာရှိ၊ စစ်သည်၊ မိသားစုဝင်များဖြင့် တွေ့ဆုံစဉ် ပြောကြားခဲ့သည်။

နစကသည် ဖွဲ့စည်းပုံအခြေခံဥပဒေ(၂၀၀၈)နှင့်အညီ ရှေ့လုပ်ငန်းစဉ် ၅ ရပ်၊ ဦးတည်ချက် ၉ ရပ် ချမှတ်၍ နိုင်ငံတော်၏ အကျိုး စီးပွားကို ဖော်ဆောင်ကြိုးပမ်းလျက်ရှိကြောင်း၊ တပ်မတော်သည် နိုင်ငံတော်၏ အစိတ်အပိုင်းတစ်ခုဖြစ်၍ တပ်မတော်သားများ အနေဖြင့် နိုင်ငံ့အရေးအရာနှင့် ပတ်သက်၍ ကျရာအခန်းကဏ္ဍမှ တာဝန်ကျေပွန်စွာ ထမ်းဆောင်ကြ ရန်လိုကြောင်း ၎င်းက ပြောသည်။

၂၀၂၂ ခုနှစ်၊ မတ်လ ၂၁ ရက်က မိုင်းမောတပ်နယ်မှာဒုတိယဗိုလ်ချုပ်မှူးကြီး စိုးဝင်းကို တွေ့ရစဉ်

ဒုတိယဗိုလ်ချုပ်မှူးကြီး စိုးဝင်းက “တပ်မတော် အနေဖြင့် ရေပက်မဝင်သည့် ကျစ်လစ်ခိုင်မာသော စည်းလုံးမှုဖြင့် ရပ်တည် လျက်ရှိကြောင်း၊ ၎င်းတို့အနေဖြင့် တပ်မတော်ပြိုကွဲရေးကို စဉ်ဆက်မပြတ် ဆက်လက် လုပ်ဆောင်နေမည်ဖြစ်သဖြင့် တပ်မတော်သားများနှင့် မိသားစုဝင်များအနေဖြင့် ရှိပြီးသော စိတ်ဓာတ်ခိုင်မာသည့် စည်းလုံးညီညွတ်မှုဖြင့် ကာကွယ်တား ဆီးရမည်ဖြစ်ကြောင်း၊ စည်းလုံးညီညွတ်ရန် အထက်အောက် အပြန်အလှန်လေးစားမှု၊ အုပ်ချုပ်ရေး ညီညွတ်မျှတမှုရှိရန် လိုအပ်ပြီး စိတ်ဓာတ်၊ စည်းကမ်း ကောင်းမွန်ရန်လိုကြောင်း။ အလားတူ အမိန့်နာခံတတ်မှုနှင့်စစ်သည်တော်တိုင်း ကျင့်ကြံ လိုက်နာရမည့် ကျင့်ဝတ်အပါး ၆၀ တို့ကိုလည်း စောင့်ထိန်းလိုက်နာရန်လိုတယ်”ဟု ပြောသည်။

တပ်မတော်သည် ဗမာပြည်ကွန်မြူနစ်ကို ဖြိုခွဲစဉ်က အတွင်းစည်းကို ပြိုကွဲအောင် ဖုန်ကြားရှင်ကို စည်းရုံးခဲ့ကြောင်း၊ ယခု တပ်မတော်သည် အတွင်းစည်းဖြိုခွဲခြင်း နည်းဗျူဟာအပေါ် စိုးရိမ်နေနိုင်ကြောင်း နိုင်ငံရေး လေ့လာသုံးသပ်သူ ဦးရဲထွန်းက ပြောသည်။

ဦးရဲထွန်းက “ကျနော့် အတွေ့အကြုံအရတော့ နှစ်ဖက် ဒီပြိုင်ဆိုင် တိုက်ခိုက်နေတဲ့၊ အပြုတ်တိုက်နေတဲ့ အင်အားစုတွေ ကြားမှာပေါ့လေ။ဒီလို ထိပ်တိုက်ဖြစ်တာအပြင် အတွင်းပိုင်းကနေ ဖြိုခွဲတဲ့ နည်းတွေကိုလည်း သုံးကြတယ်။ အခုဟာက တပ်မတော်က အတွင်းပိုင်းကို ဖြိုခွဲခံရတဲ့အလှည့်ပေါ့ဗျာ။ အရင်တုန်းကတော့ ဗမာပြည်ကွန်မြူနစ်ပါတီ ပြိုကွဲသွားတာက သူက တိုက်လို့ ပြိုတာမဟုတ်ဘူး၊ သူ့အတွင်းပိုင်းမှာ ပြိုကွဲသွားတာ၊ အဲလိုပြိုကွဲသွားအောင်ကလည်း တပ်မတော်ကပဲ လုပ် ခဲ့တာ ဒီအတွေ့အကြုံက ကြောက်စရာကောင်းတာပေါ့နော်။ တပ်မတော်အနေနဲ့လည်း အဲဒီအတွေ့အကြုံကို အဲဒီ နည်းဗျူ ဟာကို သုံးတယ်။ အခုလည်း သူတို့အတွင်းပိုင်းကို အဲလိုဖြိုခွဲတဲ့ဟာက တော်တော်ကို ကြီးကြီးမားမားရှိနေတယ်လို့ ထင် တယ်။ ယူဆရတာပေါ့နော်”ဟု ပြောသည်။

နွေဦးတော်လှန်ရေး လက်နက်ကိုင် တိုက်ခိုက်နေသော ကယားပြည်နယ်က ဒေသခံကာကွယ်ရေးတပ်ဖွဲ့

ဆန္ဒပြခြင်း၊ CDM ပြုလုပ်စေခြင်းတို့ဖြင့် အောင်မြင်မှု မရသဖြင့် လက်နက်ဖြင့် အပြစ်မဲ့ပြည်သူများကို သတ်ဖြတ်ခြင်း၊ လုံခြုံ ရေး တပ်ဖွဲ့ဝင်များကို ချောင်းမြောင်း ပစ်ခတ်ခြင်း စသည့် လုပ်ရပ်များကို ပြုလုပ်လာခဲ့ကြောင်း၊ နောက်ဆုံးအဆင့်အဖြစ် တပ်မတော်ကို ဖြိုခွဲရန် ဦးတည်ကြိုးပမ်းလာခဲ့ကြောင်း၊ ထိုသို့ ဆောင်ရွက်ရာတွင် တာဝန်ခံမှုမရှိသည့် လူမှုကွန်ရက်များကို အသုံးချ၍ သတင်းတု သတင်းမှားများ ဖန်တီးထုတ်လွှင့်ခြင်းများ ပြုလုပ်လာကြောင်း ဒုတိယဗိုလ်ချုပ်မှူးကြီး စိုးဝင်းက ပြော သည်။

လက်ရှိ မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေ ရွေးကောက်ပွဲ မဲစာရင်းအငြင်းပွားမှုအပေါ် မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်က ဖြုတ်ချခဲ့ သည်။

ထို့နောက် နိုင်ငံတော်ကို အရေးပေါ်ကြေညာ၍ ဆောင်ရွက်လျက်ရှိရာ ဒီမိုကရေစီအင်အားစုများ၊ တိုင်းရင်းသား လက်နက်ကိုင် အဖွဲ့များ၊ NLD ပါတီဝင်များက လက်နက်ကိုင် တိုက်ခိုက်ခြင်းဖြင့် တပ်မတော်ကို ပြန်လည်ဖြုတ်ချရန် ကြိုးပမ်းလျက်ရှိနေသည်။

CNI News

၂၀၂၂ ခုနှစ်၊ မတ်လ ၁၉

နိုင်ငံရေးပါတီငယ်များဖြင့် စုဖွဲ့ထားသည့် ဒီမိုကရက်တစ် ဖက်ဒရယ်ညွန့်ပေါင်းအဖွဲ့ချုပ်(DFA)ကို ဖွဲ့စည်းလိုက်ကြောင်း အဆိုပါ မဟာမိတ်အဖွဲ့တွင် ပါဝင်မည့် ပါတီခေါင်းဆောင်များထံမှ သိရသည်။

အဆိုပါမဟာမိတ်အဖွဲ့တွင် နိုင်ငံရေးပါတီ ၁၂ ပါတီ ပါဝင်မည်ဖြစ်ပြီး ပါဝင်သည့် နိုင်ငံရေးပါတီများကို မတ်လကုန်တွင် ရုံးဖွင့် ပွဲလုပ်ကာ တရားဝင်ထုတ်ပြန်သွားရန်ရှိကြောင်း၊ လက်ရှိအချိန်တွင် ပါတီနာမည်များကို လုံခြုံရေးအရ ထုတ်ပြန်ထားခြင်း မရှိ သေးကြောင်း အမည်မဖော်လိုသည့် ပါတီခေါင်းဆောင်တစ်ဦးက CNI သတင်းဌာနသို့ ပြောသည်။

၎င်းက “ဖွဲ့တာမှန်ပါတယ်၊ အကြမ်းဖျင်းတော့ ၁၂ ပါတီဖွဲ့တယ်၊ ၁၇ ရက်နေ့ကပေါ့၊ ဘယ်ပါတီတွေ ပါတယ်ဆိုတာ လောလောဆယ်မှာ ပြောခွင့် အတိအကျ မရသေးတဲ့အတွက် ပြောလို့မရလို့ပါ၊ ကျနော်တို့ လကုန်ရင်တော့ သိရမှာပါ” ဟု ပြော သည်။

နိုင်ငံရေးပါတီ(၁၂)ပါတီ ပါဝင်သည့် အဆိုပါ ဒီမိုကရက်တစ် ဖက်ဒရယ်ညွန့်ပေါင်းအဖွဲ့ချုပ် (DFA) မဟာမိတ်အဖွဲ့ကို မတ်လ ၁၇ ရက်နေ့က စတင်ဖွဲ့စည်းလိုက်ကြောင်း သဘောတူလက်မှတ်ထိုးခဲ့သည်ဟု ဖွဲ့စည်းရာတွင် ပါဝင်သည့် အမျိုးသား ညီညွတ် သော ဒီမိုကရက်တစ်ပါတီ(NUD)ဥက္ကဋ္ဌ ဦးစိန်ဝင်းက ၎င်း၏ လူမှုကွန်ရက်တွင် ထုတ်ပြန်ထားသည်။

ထို့နောက် အဆိုပါအဖွဲ့၏ ရုံးချုပ်ကို လာမည့် မတ်လကုန်တွင် ဖွင့်လှစ်မည်ဖြစ်ကြောင်း၊ ညွန့်ပေါင်းအဖွဲ့ချုပ်၏ မူဘောင်၊ ပဋိညာဉ်စာချုပ်ကို ဧပြီလကုန်တွင် အပြီးရေးဆွဲသွားမည်ဖြစ်ကြောင်း ၎င်းက ရေးသားထားသည်။

မတ်လ ၁၇ ရက်က ဖွဲ့စည်းခဲ့သည့် မဟာမိတ်အဖွဲ့တွင် မိမိတို့ ဒီမိုကရက်တစ်ပါတီ(မြန်မာ)လည်း ပါဝင်ကြောင်း ပါတီဥက္ကဋ္ဌ ဦးသုဝေက CNI သတင်းဌာနသို့ အတည်ပြု ပြောသည်။

“ကျနော်တို့ရဲ့ ပါတီပါပါတယ်၊ ဝင်လုပ်တယ်လေ၊ ကျနော်ကတော့ meeting တွေက ကြာပြီ ငြိမ်းချမ်းရေးမှာကော၊ ဘာကော ဆိုတော့ ကျနော်ကတော့ မပါတော့ဘူး” ဟု ၎င်းက ပြောသည်။

လက်ရှိတွင် ပြည်တွင်း နိုင်ငံရေးပါတီများ မဟာမိတ်စုဖွဲ့မှုတွင် တိုင်းရင်းသားပါတီများဖြင့် ဖွဲ့စည်းထားသည့် စည်းလုံးညီညွတ် သော တိုင်းရင်းသားလူမျိုးများမဟာမိတ်(UNA) ၊ ညီနောင်တိုင်းရင်းသားများ ဖက်ဒရေးရှင်း (NBF) စသည့် အစုအဖွဲ့များ ရှိနေ သည်။

နစကသည် လာမည့် ၂၀၂၃ ခုနှစ်တွင် ရွေးကောက်ပွဲ ပြုလုပ်မည်ဖြစ်ကြောင်း၊ ရွေးကောက်ပွဲတွင် အချိုးကျကိုယ်စားပြုစနစ် (PR) စနစ်ကိုလည်း ကျင့်သုံးသွားရန်လည်း ကြိုးပမ်းနေကြောင်း၊ ထို့ကြောင့် နိုင်ငံရေးပါတီငယ်များသည် မဟာမိတ်စုဖွဲ့၍ ကြိုးတင်ပြင်ဆင်ခြင်း ဖြစ်နိုင်သည်ဟု နိုင်ငံရေးလေ့လာသုံးသပ်သူများက ပြောသည်။

CNI News

၂၀၂၂ ခုနှစ်၊ မတ်လ ၁၈

မွန်ညီညွတ်ရေးပါတီ (MUP)သည် ပါတီဥက္ကဋ္ဌနှင့် ဗဟိုအလုပ်အမှုဆောင်အသစ်များကို ပါတီညီလာခံမှတဆင့် ရွေးချယ် သွားမည်ဖြစ်ကြောင်း မွန်ညီညွတ်ရေးပါတီ တွဲဖက်အတွင်းရေးမှူး(၂) နိုင်စံတင်က CNI သတင်းဌာနသို့ ပြောသည်။

မွန်ညီညွတ်ရေးပါတီ(MUP)သည် ပါတီညီလာခံကို ယနေ့ (မတ်လ ၁၈ ရက်)မှ ၂၀ ရက်နေ့ထိ မွန်ပြည်နယ်၊ မော်လမြိုင်မြို့ တွင် ကျင်းပလျက်ရှိကြောင်း၊ ထိုညီလာခံတွင် ပါတီဥက္ကဋ္ဌနှင့် ဗဟိုအလုပ်အမှုဆောင် အသစ်များကို ပြန်လည်ရွေးချယ်မည် ဖြစ်ကြောင်း သိရသည်။

MUP ပါတီ တွဲဖက်အတွင်းရေးမှူး(၂) နိုင်စံတင်က “စီးအီးစီအသစ်တွေ ပြန်လည်ဖွဲ့စည်းမှာပေါ့ဗျာ၊ အဟောင်းပါရင်ပါမယ်၊ အသစ်တွေ ပြန်ပါရင်ပါမယ်၊ တက်လာတဲ့ပါတီ ကိုယ်စားလှယ်တွေရဲ့ ရွေးချယ်မှုတွေအပေါ်မှာ မူတည်တာပေါ့”ဟု ပြောသည်။

မွန်ညီညွတ်ရေးပါတီ မဲဆွယ်နေစဉ်

မွန်ညီညွတ်ရေးပါတီဥက္ကဋ္ဌဖြစ်သူ နိုင်အောင်တင်သည် ပြီးခဲ့သည့် ၂၀၂၁ ခုနှစ်၊ အောက်တိုဘာလက ကွယ်လွန်သွားခဲ့ကြောင်း၊ ပါတီ ဗဟိုအလုပ်အမှုဆောင် တချို့လည်း ပါတီမှ နုတ်ထွက်သွားခဲ့သည်။

ထို့ကြောင့် လက်ရှိ ကျင်းပသည့် ညီလာခံတွင် နုတ်ထွက်သွားသည့် ဗဟိုအလုပ်အမှုဆောင် နေရာများအတွက် အသစ်များ ပြန်လည် ရွေးချယ်မည်ဖြစ်ပြီး ညီလာခံ နောက်ဆုံးရက်တွင် ပါတီဥက္ကဋ္ဌ နေရာကိုပါ ရွေးချယ်သွားမည်ဟု နိုင်စံတင်က ပြော သည်။

မွန်ညီညွတ်ရေးပါတီသည် ပါတီညီလာခံကို ပြီးခဲ့သည့် ၂၀၂၁ ခုနှစ်၊ ဒီဇင်ဘာလတွင် ကျင်းပရန် စီစဉ်ထားခဲ့သော်လည်း နိုင်ငံရေး အခြေအနေများကြောင့် ရွှေ့ဆိုင်းခဲ့ရပြီး ယခုလ(မတ်လ)မှ ပြန်လည် ကျင်းပနိုင်ခဲ့ခြင်းဖြစ်ကြောင်း သိရသည်။

အဆိုပါ ညီလာခံတွင် ပါတီ၏ ဖွဲ့စည်းပုံစည်းမျဉ်းများ ပြန်လည်ပြင်ဆင်မည်ဖြစ်ကြောင်း၊ လက်ရှိ ပါတီ၏ နိုင်ငံရေး ရပ်တည် ချက်အပေါ်လည်း တက်ရောက်လာမည့် ကိုယ်စားလှယ်များ၏ သဘောထားများအပေါ် မူတည်မည်ဖြစ်ကြောင်း နိုင်စံတင်က ပြောသည်။

ကွယ်လွန်သွားပြီးဖြစ်သည့် မွန်ညီညွတ်ရေးပါတီဥက္ကဋ္ဌ နိုင်အောင်တင်ကိုတွေ့ရစဉ်

၎င်းက “ညီလာခံမှာတော့ တက်လာတဲ့ ကိုယ်စားလှယ်တွေအပေါ်မှာ မူတည်တယ်လေ၊ ကျနော်တို့ ဘယ်လိုရွေးချယ်မလဲ ကျနော်တို့ ပြောလို့မရဘူး၊ တက်လာတဲ့ ကိုယ်စားလှယ်တွေရဲ့ သဘောထားအပေါ်မှာ ကြည့်ပြီးတော့ သူတို့ရဲ့ အမြင်သဘော ထားအပေါ်မှာ ကြည့်ပြီးတော့ ပြောင်းလဲသွားမှာပဲ၊ ကျနော်တို့ ညီလာခံလုပ်ရတဲ့ ရည်ရွယ်ချက်က အဲဒါလည်း ပါတယ်၊ လော လောဆယ် ကျနော်တို့ ပါတီရဲ့ ဖွဲ့စည်းပုံစည်းမျဉ်း မပြည့်စုံဘူး၊ ကျနော်တို့ သိပြီးသား၊ ကမန်းကတန်းနဲ့ ရေးရတာရယ်၊ ပေါင်းစည်း ထားတာရယ်၊ ဒါကြောင့် ဒီပါတီညီလာခံမှာ အချိန်ယူပြီးတော့ ပြင်ဆင်ဖြည့်စွက်သွားမယ်လို့ တက်လာတဲ့ ကိုယ်စားလှယ်တွေအပေါ်မှာ မူတည်နေပါတယ်” ဟု ပြောသည်။

လက်ရှိတွင် မွန်ညီညွတ်ရေးပါတီသည် တပ်မတော်က အရပ်သားအစိုးရကို ဖြုတ်ချပြီးနောက် နစကတွင် ကိုယ်စားလှယ် အဖြစ် ပါဝင်လျက်ရှိသည်။ ထို့နောက် ပါတီ၏ ဗဟိုအလုပ်အမှုဆောင်ကော်မတီဝင် ၆၁ ဦးအနက် ၁၀ ဦး နုတ်ထွက်ခဲ့သလို ဗဟိုကော်မတီဝင်များ၊ မြို့နယ်အလုပ်အမှုဆောင်များနှင့် ပါတီဝင်များ နုတ်ထွက်မှုများရှိခဲ့သည်။

အဆိုပါ မွန်ညီညွတ်ရေးပါတီကို ပြီးခဲ့သည့် ၂၀၁၉ ခုနှစ်က မွန်အမျိုးသားပါတီ၊ မွန်ဒေသလုံးဆိုင်ရာ ဒီမိုကရေစီပါတီ၊ မွန်ပြည် သစ်ပါတီ(NMSP)ကိုယ်စားလှယ်ဟောင်းများ ပူးပေါင်း၍ ဖွဲ့စည်းခဲ့သည်။

CNI News

၂၀၂၂ ခုနှစ်၊ မတ်လ ၁၈

လက်ရှိ ပြည်တွင်းမှာ တိုက်ပွဲဖြစ်ပွားနေခြင်းကြောင့် တရုတ်နယ်စပ်အနီး ရှမ်းပြည်နယ်မြောက်ပိုင်းဒေသရှိ တိုင်းရင်းသား လက်နက်ကိုင် တပ်ဖွဲ့များနှင့် တပ်မတော်အကြား တိုက်ပွဲဖြစ်ပွားမှု နည်းလာခြင်းဖြစ်ကြောင်း တရုတ်အရေးကျွမ်းကျင်သူ ဒေါက်တာ လှကျော်ဇောက CNI သတင်းဌာနသို့ ပြောသည်။

ဒေသကာကွယ်ရေးတပ် (PDF)နှင့် တပ်မတော်တို့အကြား စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ကယား(ကရင်နီ) ပြည်နယ်၊ ချင်းပြည်နယ်နှင့် ကရင်ပြည်နယ်တို့တွင် တိုက်ပွဲများ ဖြစ်ပွားလျက်ရှိသည်။

ဒေါက်တာ လှကျော်ဇောက “တရုတ်ကလည်း ဒီနယ်စပ်က လူတွေကို ဖိအားပေးထားတာတော့ ရှိတော့ရှိပါတယ်၊ တတ်နိုင် သမျှ တည်ငြိမ်အောင်လို့ နောက်တစ်ခုကလည်း ဒီလိုဗျ၊ ကိုဗစ်ကလည်း ဒီဖက်မှာ တော်တော် အခြေအနေ ဆိုးနေတယ်လေ၊ တရုတ်နယ်စပ်မှာကိုက အဲဒါကြောင့်မို့ ပိတ်ဆို့ တားဆီးတာတွေလည်း တော်တော်များတယ်၊ အဲဒီကိုဗစ်ကို အကြောင်းပြပြီး တော့ နယ်စပ် တစ်လျှောက်မှာလည်း တရုတ်က တော်တော်တင်းတင်းကြပ်ကြပ်တွေ လုပ်ထားတာလည်း ရှိတယ်၊ နောက်တစ် ခုက ဒီလိုနဲ့ တူတယ်ဗျ၊ ခါတိုင်းက နယ်စပ်မှာ ဖြစ်တာက တကယ်တော့ စစ်ကောင်စီက ဝင်ဝင်တိုက်လို့လေ၊ ဗမာစစ်တပ်က ဝင်ဝင်တိုက်လို့ ဖြစ်တာကိုး၊ အခုဟာက စစ်တပ်က ပြည်တွင်းမှာ မဲနေရတာကို ဖြစ်တာကိုနော်၊ PDF တွေကို ဟုတ်လား၊ စစ်ကိုင်းတိုင်းတို့၊ ကရင်ပြည်နယ်တို့ ဘာတို့မှာ အဲဒီဖက်မှာ ပိုပြီးတော့ သူတို့ အားစိုက်နေရတာ ဖြစ်တော့ ဒီဖက်မှာ အလို အ‌လျောက် သဘာဝအလျောက် နည်းသွားတာ ဖြစ်နိုင်ပါတယ်” ဟု ပြောသည်။

မြောက်ပိုင်းမဟာမိတ်အဖွဲ့ကိုတွေ့ရစဉ်

တပ်မတော်အနေဖြင့် ပြည်တွင်းတွင်လည်း ထိန်းသိမ်းနိုင်သည့် အနေအထားမရှိသည့်အတွက် မြောက်ပိုင်းတပ်ဖွဲ့များနှင့် ထိတွေ့မှု မဖြစ်ပွားအောင် စစ်ဆင်ရေးများ လျှော့ချထားခြင်းဖြစ်ကြောင်း ၎င်းက ပြောသည်။

ယခင်က ရှမ်းပြည်နယ် မြောက်ပိုင်းတွင် မြောက်ပိုင်းမဟာမိတ်များဖြစ်သည့် TNLA၊ MNDAA၊ KIA၊ AA တို့နှင့် တပ်မတော် ကြား တိုက်ပွဲများ မကြာခဏ ဖြစ်ပွားလျက်ရှိသော်လည်း လက်ရှိမှာတော့ တိုက်ပွဲများ ငြိမ်သက်လျက်ရှိသည်။

တပ်မတော်က နိုင်ငံတော်ကာကွယ်ရေးနှင့် အုပ်ချုပ်မှုဆိုင်ရာ ကိစ္စရပ်များအပြင် နိုင်ငံတော်အစိုးရ၏ လုံခြုံရေးနှင့် အုပ်ချုပ် ရေး ယန္တရားများအား နှောင့်ယှက်ထိပါး တိုက်ခိုက်ချိန်မှအပ တပ်မတော်၏ စစ်ရေးဆိုင်ရာ လှုပ်ရှားမှုများကို ၂၀၂၂ ခုနှစ်၊ မတ် လ ၁ ရက်မှ ဒီဇင်ဘာလ ၃၁ ရက်နေ့အထိ ရပ်စဲကြောင်း ဖေဖော်ဝါရီ ၂၈ ရက်က ထုတ်ပြန်ကြေညာခဲ့သည်။

လက်ရှိ ကယား (ကရင်နီ)ပြည်နယ်တွင် တိုက်ပွဲများ ပြင်းထန်နေကြောင်း၊ လက်နက်ကြီးပစ်ခတ်မှုများ ရှိနေကြောင်း ကရင်နီ လူ့အခွင့်အရေးအဖွဲ့မှ ကိုဗညားက CNI သတင်းဌာနသို့ ပြောသည်။

ကိုဗညားက “မနေ့က အထိတောင်မှ တိုက်ပွဲတော်တော်လေး ပြင်းထန်တယ်၊ ဒီဖက်ခြမ်းကလည်း ထိခိုက်မှုတွေ တော်တော် များတယ်၊ ကျနော်တို့ အနည်းဆုံး ၂ နေရာ၊ ၃ နေရာ တိုက်ပွဲဖြစ်ပါတယ်၊ ဒီးမော့ဆိုမှာကတော့ ကျနော်တို့ ဒေါငံခါး အကျော် နားလေးမှာပေါ့နော်၊ သူတို့ခေါ်တာ ပုရီရွာဖက်မှာပေါ့နော်၊ အဲဒီဖက်မှာ တိုက်ပွဲတွေဖြစ်တယ်၊ စစ်ကောင်စီကနေတော့ အဓိက ကတော့ လက်နက်ကြီးတွေပေါ့နော် အပြင်းအထန် ပစ်ခတ်တာရှိတာပေါ့နော်၊ နောက် လွိုင်ကော် မြောက်ဖက်ခြမ်းမှာလည်း တိုက်ပွဲတွေဖြစ်တယ်၊ နောက် ဒီဖက်ခြမ်း ဖရူဆိုဖက်မှာလည်း တိုက်ပွဲတွေ ဖြစ်တယ်၊ ရက်တိုင်းကတော့ မဖြစ်ဘူးဆို တစ် နေရာ၊ နှစ်နေရာကတော့ ပုံမှန်ဖြစ်ပါတယ်၊ တိုက်ပွဲ ပြင်းပြင်းထန်ထန်ဖြစ်တာနဲ့ ကျနော်တို့ ခေါ်တာက ပြောက်ကျားစနစ်နဲ့ ဖြစ်တာပဲ နည်းနည်းပဲ ကွာပါတယ်”ဟု ပြောသည်။

စစ်ကိုင်းတိုင်းဒေသကြီး၊ မုံရွာမြို့အ၀င်ကိုတွေ့ရစဉ်

လက်ရှိတွင် တိုင်းရင်းသား လက်နက်ကိုင် အဖွဲ့အစည်းများနှင့် PDF တို့ ဆွေးနွေးသင့်ကြောင်း၊ တပ်ပေါင်းစု ဖွဲ့စည်းရန် ကြိုးစားသင့်ကြောင်း ဒေါက်တာလှကျော်ဇောက ပြောသည်။

၎င်းက “အဓိကတော့ ဘယ်လိုခေါ်မလဲ ကျမတို့က မြောက်ပိုင်းအဖွဲ့တွေနဲ့ တစ်စုံတစ်ရာ တည်ငြိမ်နေတာလဲ ကောင်းတဲ့ အချက်ပါပဲ၊ ဘာဖြစ်လို့လဲဆိုတော့ တစ်စုံတစ်ရာ တည်ငြိမ်နေပေမယ့် ကိုယ်ပြင်ဆင်စရာရှိတာ အေးအေးဆေးဆေး ပြင်ဆင်လို့ ရတာပေါ့ဗျာ အဲဒီဖက်က၊ အဲတော့ ကိုယ်ပြင်ဆင်စရာရှိတာ အေးအေးဆေးဆေး ပြင်ဆင်၊ ပြီးတော့ ကျမကြားတာ တော့ PDF က EAO တွေလို့ ခေါ်မှာပေါ့နော်၊ အဲလို တပ်ဖွဲ့တွေနဲ့လည်း တတ်နိုင်သမျှ သူတို့ ဘယ်လိုခေါ်မလဲ ဆွေးနွေးလို့ရ အောင်၊ တပ်ပေါင်းစုဖွဲ့လို့ရအောင် ကြိုးစားနေတာကိုလည်း ကျမတို့က သဘောကျပါတယ်၊ အဲဟာတွေ မြိုင်မြိုင်ဆိုင်ဆိုင် ဖြစ်လာဖို့ ပိုလိုမယ်ထင်ပါတယ်”ဟု ပြောသည်။

လက်ရှိတွင် ကရင်အမျိုးသားအစည်းအရုံး (KNU)၊ ကရင်နီတိုးတက်ရေးပါတီ (KNPP)၊ ချင်းအမျိုးသားတပ်ဦး (CNF)၊ ကချင် လွတ်လပ်ရေးတပ်မတော်(KIA)၊ ဒေသကာကွယ်ရေးတပ်(PDF) ပူးပေါင်းတပ်တို့နှင့် တပ်မတော်အကြား တိုက်ပွဲများ ဖြစ်ပွား လျက် ရှိသည်။