CNI News

၂၀၂၂ ခုနှစ်၊ စက်တင်ဘာ ၁၀

မြန်မာ့တပ်မတော်ကို တိုက်ခိုက်နေသည့် အဖွဲ့ချင်းအတူတူဖြစ်၍ ရက္ခိုင့်တပ်တော် (ULA/AA) နှင့် ချင်းကာကွယ် ရေးတပ်ဖွဲ့(CDF)တို့အကြား ပြဿနာမရှိကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြော သည်။

ချင်းပြည်နယ်၊ ပလက်ဝမြို့နယ် သံထောင်ကျေးရွာတွင် ပြီးခဲ့သည့် ဩဂုတ်လကုန်ပိုင်းက AA နှင့် CDF တို့အကြား စစ်ရေးတင်းမာခဲ့ကြောင်း သိရသည်။

ဦးဖေသန်းက “သူတို့အနေနဲ့ ပထမအခြေစိုက်ကတည်းက ပလက်ဝလာပြီး အခြေစိုက်တာကိုး ပလက်ဝ ဧရိယာ က AA အတွက်လည်း အရေးကြီးတယ်၊ ချိတ်ဆက်တဲ့ ဧရိယာဆိုတော့ သူတို့လည်း ထိန်းထားရတာပေါ့။ နိုး မဟုတ်ရင် ဒီဖက်ကို အဲဖက်က စစ်ကြောင်းတွေ လာနိုင်တာပေ့ါ။ ဒါကြောင့် ပလက်ဝ ဆိုတာကလည်း ရခိုင်ပြည် နယ် ရေခြားမြေခြား မဟုတ်ဘူး။ ကုလားတန် ရေစီးကြောင်းမှာ အတူတူရှိရတာ။ ပလက်ဝဆိုရင် စီးပွားရေး၊ လူမှု ရေး အကုန်လုံးကို ရခိုင်ဒေသကို အမှီပြုပြီး ရပ်တည်နေရတာ စားနပ်ရိက္ခာကအစပေါ့နော်၊ ဒီလို အခြေအနေမျိုး မှာ AA တပ်မတော် အနေနဲ့ကတော့ ဒီနေရာကို ချင်းလူမျိုးတွေရဲ့ နေရာကို အလံစိုက်ဖို့တော့ မဟုတ်ဘူးပေါ့နော်၊ သူတို့အနေနဲ့ ခေတ္တယာယီတော့ အသုံးချတာတော့ ဖြစ်နိုင်ပါတယ်။ ဒီကိစ္စတော့ ကြီးကြီးကျယ်ကျယ် ရှင်းစရာ လည်း မလိုဘူး ထင်ပါတယ်ဗျ။ အဲဒီလောက်လေးနဲ့ကို သူတို့က နားလည်ပေးနိုင်ရမှာပေါ့နော်၊ မြန်မာစစ်တပ်ကို တော်လှန်တိုက်ခိုက်နေတဲ့ အဖွဲ့အစည်း အချင်းချင်းအတူတူ ဆိုရင်တော့ သူ့နေရာ ကိုယ်နေ၊ ကိုယ့်နေရာမှာ သူနေ အဲဒီလိုပဲ နေကြတာပဲလေ၊ PDF တွေလည်း ကရင်မှာ ကချင်မှာ အကုန်လုံး အဲဒီလို EAO တွေနဲ့ ပူးပေါင်းပြီး နေကြ တာပေါ့။ ဒါကတော့ ပြဿနာ မဖြစ်လောက်ဘူး၊ နိုင်ငံရေးအရ ဆွေးနွေးစရာလည်း မလိုအပ်ဘူးလို့ ကျနော်ထင်ပါ တယ်” ဟု CNI သတင်းဌာနသို့ ပြောသည်။

ပလက်ဝမြို့ကိုတွေ့ရစဉ်

အဆိုပါ ကိစ္စနှင့် ပတ်သက်၍ ချင်းပြည်နယ် ပူးတွဲကာကွယ်ရေးကော်မတီ (CJDC) ထံ ဆက်သွယ်ရာမှာ Chinland Defense Force -Daai နှင့် ဖြစ်ပွားခြင်းဖြစ်ကြောင်း၊ ၎င်းအဖွဲ့ထံ ဆက်သွယ်ရန် ပြောကြားခဲ့ သည်။
ထို့နောက် CDF(Daai) သို့ ဆက်သွယ်မေးမြန်းသော်လည်း ဖုန်းလိုင်း အခက်အခဲကြောင့် ဆက်သွယ်၍ မရရှိသေးပေ။

ဦးဖေသန်းက “အဖွဲ့အစည်းတစ်ခုနဲ့ တစ်ခုဆိုတာကတော့ မကြိုက်တာလည်း ရှိမယ်၊ ဒါပေမဲ့ အဲဒီ မကြိုက်တာက ဒီအချိန်မှာ အဓိက ဘုံရန်သူကို သူတို့လည်း တိုက်တယ်၊ ဒီဖက်လည်း တိုက်တဲ့ အခြေ အနေမျိုးမှာ ဒါက ကိုယ့်အချင်းချင်း၊ တော်လှန်ရေး အချင်းချင်း မပြောလောက်တဲ့ကိစ္စပဲ ဖြစ်ပါလိမ့်မယ်၊ အနာဂတ်မှာ ဆိုရင်တော့ ပြောစရာကိစ္စတွေ ရှိလာရင်လည်း နောက်စစ်ကောင်စီတို့ ပြုတ်ကျပြီးမှ ပေါ့ ဗျာ၊ ဖက်ဒရယ်ထူထောင်ဖို့ အခွင့်အရေးရတဲ့ အခါမှာ ဆွေးနွေးရင်လည်း ပြီးတဲ့ကိစ္စ၊ စစ်ရေးလှုပ်ရှားမှု ဆိုတာကတော့ သူ့နယ် ကိုယ့်နယ်လို့ မဟုတ်ဘူး။ ဒါကတော့ တစ်ဖက်နဲ့ တစ်ဖက် နားလည်မှု ရှိဖို့လို တာပေါ့” ဟု CNI သတင်းဌာနသို့ ပြောသည်။

ပလက်ဝမြို့နယ်အတွင်းက ကုလားတန်မြစ်အတွင်း သွားလာနေသူများ

ပြီးခဲ့သည့် ၂၀၂၀ အထွေထွေရွေးကောက်ပွဲမတိုင်မီ ပလက်ဝမြို့နယ်တွင် တပ်မတော်နှင့် AA တို့ တိုက်ပွဲ အပြင်းအထန် ဖြစ်ပွားခဲ့ပြီး ဒေသခံများ ဘေးလွတ်ရာ ထွက်ပြေးတိမ်းရှောင်ရမှုများ ရှိခဲ့သည်။

ပလက်ဝမြို့နယ်တွင် လူဦးရေ ၆၄၀၀၀ ကျော်ရှိပြီး ချင်းလူမျိုး အများစု နေထိုင်ကာ ရခိုင်လူမျိုး၊ ဗမာလူမျိုးနှင့် အခြားသော လူမျိုးစုများလည်း နေထိုင်ကြောင်း သိရသည်။ တခြားသော လူမှုရေး အဖွဲ့ အစည်းများ၏ လူဦးရေ စာရင်း ကောက်ခံထားမှုအရ ပလက်ဝမြို့နယ်တွင် လူဉီးရေ ၁ သိန်းကျော် ရှိ ကြောင်း သိရသည်။

ပလက်ဝမြို့နယ်တွင် AA သည် ခြေကုပ်စခန်းများ တည်ဆောက်ကာ လှုပ်ရှားလျက်ရှိပြီး ယခင်က ရခိုင် ပြည်လွတ်မြောက်ရေးပါတီ(ALP)လည်း ပလက်ဝဒေသ အိန္ဒိယနယ်စပ်အနီးမှာ လှုပ်ရှားခဲ့ဖူးသော်လည်း AA ၏ တိုက်ခိုက်ချေမှုန်းခြင်းကို ခံခဲ့ရသည်။

CNI News

၂၀၂၂ ခုနှစ်၊ စက်တင်ဘာ ၉

ရှမ်းပြည်နယ်(မြောက်ပိုင်း)ဒေသတွင် သျှမ်းပြည်ပြန်လည် ထူထောင်ရေးကောင်စီ (RCSS/SSA)၏ စစ်ရေးလှုပ်ရှား မှုများ မတွေ့ရှိတော့ဟု ဒေသခံများက ပြောသည်။

RCSS အနေဖြင့် ရှမ်းမြောက်မှ ၎င်းတို့ တပ်များကို ရုပ်သိမ်းသွားကြောင်း၊ သို့သော်လည်း ရှမ်းတောင်ရှိ မြို့နယ် အချို့တွင် ထိတွေ့တိုက်ပွဲများ ဖြစ်ပွားမှုရှိနေကြောင်း ကျောက်မဲဒေသခံတစ်ဦးဖြစ်သူ ဦးမင်းနောင်က CNI သတင်းဌာနသို့ ပြောသည်။

၎င်းက “RCSS ကတော့ ဒီရှမ်းမြောက်ကနေ ရုပ်သွားတာပေါ့နော်၊ ရှမ်းမြောက်ကနေပြီးတော့ သူရုပ်သွားတာပေါ့ နော်၊ ရုပ်သွားတဲ့ အခါကြတော့ သူဟာ သူ့ရဲ့ နယ်မြေထဲ သူပြန်ဝင်သွားတယ်၊ သူ့နယ်မြေသည် ရှမ်းအရှေ့ပေါ့၊ သို့သော်လည်းပဲ ဒီကြားလေးထဲမှာတော့ သူထပ်ပြီးတော့ အပြီးအပိုင်တော့ ရှမ်းမြောက်၊ ရှမ်းတောင်ထဲကနေတော့ ဆုတ်သွားတာ မဟုတ်ပေမယ့် ရှမ်းတောင်ထဲမှာ သူတို့ ထိတွေ့မှုတွေ ရှိနေတာ တွေ့ရတယ်။ အဲဒီတော့ သူတို့က ရှမ်းတောင်ထဲမှာတော့ နည်းနည်းလေးတော့ complaint လေးတော့ ရှိတာပေါ့။ အဲဒီဖက်က စစ်သားစုဆောင်း တာတို့၊ နောက် နယ်မြေစိုးမိုးမှု ယူတာတို့၊ ဆက်ကြေးကောက်တာတို့ စသဖြင့်တော့ အဲဒီဖက်မှာတော့ နည်းနည်း ရှုပ်ရှုပ်ထွေးထွေး ရှိတာပေါ့ဗျာ။ ရှမ်းတောင်နဲ့ ရှမ်းအရှေ့နယ်စပ်ပေါ့နော်။ ရှမ်းတောင်ထဲ ဝင်နေတာပေါ့။ ရှမ်း တောင်ထဲ ဝင်နေတာတော့ ရှိတယ်၊ ကျနော်တို့ ရှမ်းမြောက်မှာတော့ မကြားရတော့ဘူး” ဟု ပြောသည်။

RCSS တပ်ဖွဲ့၀င်များကိုတွေ့ရစဉ် (Tai Freedom)

၂၀၂၁ ခုနှစ်၊ ဇွန်လ ၁ ရက်မှ စတင်သည့် ရှမ်းတပ်(၂)တပ်ဖြစ်သည့် RCSS နှင့် ရှမ်းပြည်တိုးတက်ရေးပါတီ (SSPP/SSA) တို့အကြား ကျေးသီးမြို့နယ်၊ လွိုင်ဟွန်းတောင်(လွယ်ဟွန်းတောင်)တွင် တိုက်ပွဲများဖြစ်ပွားခဲ့ ကြပြီးနောက် ဇူလိုင်လ ဒုတိယအပတ်မှာ RCSS အနေဖြင့် တပ်ဆုတ်မှု၊ တပ်ရွှေ့ပြောင်းမှုများ ပြုလုပ်ခဲ့သည်။

ထို့အတူ ရှမ်းပြည်နယ်တောင်ပိုင်း မိုင်းကိုင်မြို့နယ်၊ လဲချားမြို့နယ်တို့တွင် RCSS တပ်ဖွဲ့များ၏ စစ်ရေးလှုပ်ရှားမှု မတွေ့ရှိရတော့ကြောင်း မိုင်းကိုင်ဒေသခံတစ်ဦးက CNI သတင်းဌာနသို့ ပြောသည်။

၎င်းက “အခု ကျနော်တို့ ဒေသထဲ RC(RCSS ကိုဆိုလို)က မရှိတော့ဘူးလေ၊ အဲဒါတော့ ကျနော်လည်း အတိအကျ မသိဘူး။ ကျနော်တို့ မြို့နယ်ထဲမှာ ကျနော်တို့ နေရာထဲမှာ RC တွေက အကုန်လုံး မရှိတော့ဘူး။ မိုင်းကိုင်၊ လဲချား တစ်ဝိုက်တော့ မရှိတော့ဘူးဗျ။ တခြားမြို့နယ်တော့ ကျနော်လည်း ပြောတတ်ဘူးဗျ။ မိုင်းကိုင်၊ လဲချား၊ ကျေးသီး ဒီဖက်ပိုင်းမှာ လုံးဝ မရှိတော့ဘူး။ အရှေ့ပိုင်း ပြန်ရောက်သွားတာ ထင်တယ်။ ရှိချင်လည်းရှိမယ်၊ ဒါပေမဲ့ လှုပ်ရှား မှု ဘာညာ ဘာမှမကြားရဘူး။ မရှိလို့ဘဲ ပြောတာပဲလေ” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ဗိုလ်ချုပ်ကြီးယွက်စစ် တွေ့ဆုံစဉ်

RCSS အနေဖြင့် တပ်သားသစ် စုဆောင်းမှုကို ၂၀၂၂ ခုနှစ်၊ စက်တင်ဘာလ ၃ ရက်နေ့မှစပြီး ယာယီရပ်ဆိုင်း ထားမည် ဖြစ်ကြောင်း သိရသည်။

RCSS အနေဖြင့် တပ်သားသစ် စုဆောင်းမှုကို ယာယီရပ်ဆိုင်းမှုမှာ ကောင်းမွန်ကြောင်း၊ ဒေသခံလူထုများအတွက် အခွန်ကောက်ခံမှုများလည်း ရပ်သင့်ကြောင်း၊ ထို့အတူ တပ်မတော်နှင့် ငြိမ်းချမ်းရေးဆွေးနွေးခြင်း သာမက ရှမ်းလက်နက်ကိုင် တပ်အချင်းချင်း ငြိမ်းချမ်းရေး စကားပြောသင့်ကြောင်း ရှမ်းနိုင်ငံရေးသမားတစ်ဦးက ပြောသည်။

RCSS သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ် ရေးထိုးထားသည့် တိုင်းရင်းသား လက်နက်ကိုင်အဖွဲ့ဖြစ်သည်။

CNI News

၂၀၂၂ ခုနှစ်၊ စက်တင်ဘာ ၉

၂၀၀၈ ဖွဲ့စည်းပုံအခြေခံဥပဒေတွင် မြန်မာနိုင်ငံအတွင်း နိုင်ငံခြားတပ်ဖွဲ့များကို အခြေစိုက်ခွင့်မပြုကြောင်း ပြဋ္ဌာန်း ထားသည့်အတွက် ဖွဲ့စည်းပုံအခြေခံဥပဒေကို ကျော်လွန်လုပ်ဆောင်၍မရကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

အရှေ့ဖျားစီးပွားရေးဖိုရမ်(EEF)ကို တက်ရောက်ရန် ရုရှားနိုင်ငံသို့ စက်တင်ဘာ ၄ ရက်မှ ၈ ရက်နေ့အထိ သွားရောက်ခဲ့စဉ်အတွင်း ရုရှားနိုင်ငံမှ RIA သတင်းဌာနနှင့် တွေ့ဆုံ မေးမြန်းခန်းတွင် ၎င်းက အထက်ပါအတိုင်း ဖြေကြားသွားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ မြန်မာနိုင်ငံမှာ နိုင်ငံခြားတပ်ဖွဲ့များ တပ်စွဲနေရာချထားရေးပေါ့လေ။ ဒါနဲ့ ပတ်သက်ပြီးတော့ ကျနော်တို့ရဲ့ အခြေခံ ဥပဒေမှာ ခွင့်ပြုထားတာမရှိဘူး။ အခြေခံဥပဒေကို ကျော်လွန်ပြီး လုပ်လို့တော့ မရဘူး။ အခြေခံဥပဒေ ဘောင် အတွင်းမှာပဲ အကောင်းဆုံးကို ဘယ်လိုပူးပေါင်းဆောင်ရွက်မလဲ ဆိုတာ နည်းလမ်းရှာရမှာဖြစ်ပါတယ်။ စခန်းချဖို့ တော့ ကျနော်တို့ မပေးထားပါဘူး။ဒါပေမယ့် ပူးပေါင်းဆောင်ရွက်မှုနယ်ပယ်တွေ၊ အခွင့်အလှမ်းတွေများသာရှိတယ် ဆိုတာလေးတော့ ကျနော်တွေ့ပါတယ်”ဟု ပြောသည်။

 ဗိုလ်ချုပ်မှူးကြီးမင်းအောင်လှိုင်နဲ့ RIA သတင်းဌာန အင်တာဗျူး လုပ်ကြစဉ်

ထို့နောက် မြန်မာနိုင်ငံနှင့် ရုရှားနိုင်ငံသည် ကာကွယ်ရေးဆိုင်ရာ ပူးပေါင်းဆောင်ရွက်မှုများကို ဆယ်စုနှစ် နှစ်စု ကျော် လက်တွဲခဲ့ပြီးဖြစ်ကြောင်း၊ ဆက်လက်၍ တိုးချဲ့ဆောင်ရွက်သွားရန် စီစဉ်ထားကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ မြန်မာနိုင်ငံနဲ့ ရုရှားနိုင်ငံနဲ့ကတော့ ကာကွယ်ရေးဆိုင်ရာ ပူးပေါင်းဆောင် ရွက်မှုက ဆယ်စုနှစ် နှစ်စုကျော် လောက်တော့ ဖြစ်သွားပြီး။ တော်တော်လေးလည်း အရှိန်အဟုန်လည်း ကျနော်တို့ ရပါတယ်။ တော်တော် လေးလည်း မြင့်မားပါတယ်။ ရုရှားနိုင်ငံရဲ့ ကာကွယ်ရေးအသုံးအဆောင် ပစ္စည်းတွေက တကယ်ကို အဆင့် အတန်းလည်း မြင့်ပါတယ်။ နိုင်ငံတော်ကာကွယ်ရေးအတွက်လည်း များစွာ အထောက်အကူရပါတယ်။ ကျနော် တို့လည်း အင်မတန် နှစ်ခြိုက်ပါတယ်။ ဆက်လက်ပြီးလည်း တိုးချဲ့ ဆောင် ရွက်သွားဖို့ စီစဉ်နေဆဲ ရှိကြောင်း ပြောလိုပါတယ်”ဟု ပြောသည်။

 ပူတင်နဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

မြန်မာနိုင်ငံတွင် နိုင်ငံခြားတပ်ဖွဲ့များ အခြေစိုက်ခွင့်မပြုကြောင်း ၂၀၀၈ ဖွဲ့စည်းပုံအခြေခံဥပဒေတွင် ပြဋ္ဌာန်းထား သည့်အတွက် နစကဥက္ကဋ္ဌ ပြောသွားသည်မှာ မှန်ကန်ကြောင်း နိုင်ငံရေးလေ့လာသုံးသပ်သူ ဦးရဲထွန်းက ပြော သည်။

ဦးရဲထွန်း “သူကလည်း ရုရှားခေါင်းဆောင်ကို နည်းနည်း မြှောက်ပြောထားတာ ရှိတာကိုး။ ကမ္ဘာ့ခေါင်းဆောင် ဖြစ်တယ်။ ကမ္ဘာ့တည်ငြိမ်ရေးအတွက် စောင့်ကြည့်ထိန်းကြောင်းနေတဲ့လူဖြစ်တယ် ဘာညာဆိုပြီးတော့ အဲလိုမျိုးတွေ ချီးမြှောက်ထားတော့ ဟိုဘက်ကလည်း မေးလို့နေမှာပေါ့။ ရုရှားရေတပ်စခန်းတွေ ဘာတွေ တောင်းဆိုရင် ဖွင့်ခွင့်ပြုမှာလားဆိုတာတွေ မေးလို့နေမှာပေါ့။အခုကတော့ သူဖြေလိုက်တဲ့ဟာက မှန်ပါတယ်။ သူကအခြေစိုက်ခွင့် ပြုမယ်လို့ ဖြေလိုက်ရင်တော့ ပြဿနာတက်မှာ ကျနော်တို့ အခြေခံဥပဒေမှာ နိုင်ငံခြား တပ်တွေ အခြေစိုက်ခွင့်မပြုဆိုတာ ပါပြီးသားလေ”ဟု ပြောသည်။

၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၂ (ခ)တွင် နိုင်ငံတော်အတွင်း မည်သည့်နိုင်ငံခြားတပ်ဖွဲ့ကိုမျှ တပ်ချခွင့်မ ပြုဟု ပြဋ္ဌာန်းထားသည်။

နိုင်ငံကြီးတချို့သည် မြန်မာနိုင်ငံအတွင်းရှိ ကိုကိုးကျွန်းတွင် ရေတပ်စခန်း အခြေစိုက်ခွင့် ရရှိရေး ကြိုးပမ်းမှု များရှိကြောင်း ကမ္ဘာ့အရေးစောင့်ကြည့်သူများက ပြောသည်။

CNI News

၂၀၂၂ ခုနှစ်၊ စက်တာဘာ ၈

စစ်ကိုင်းတိုင်းဒေသကြီး ဗန်းမောက်မြို့နယ် နောင်ပတ်ကျေးရွာ ဘုန်းတော်ကြီးကျောင်းတွင် သီတင်းသုံးနေသည့် ရှမ်းနီဆရာတော် ဦးဂန္ဓမာအား ကချင်လွတ်လပ်ရေးတပ်မတော် (KIA)၊ ဒေသကာကွယ်ရေးတပ် (PDF) တို့မှ ဖမ်း ဆီးသတ်ဖြတ်မှုကို ပြင်းထန်စွာ ကန့်ကွက်ကြောင်း ရှမ်းနီအရပ်ဖက် အဖွဲ့အစည်းများက စက်တင်ဘာ ၈ ရက်နေ့ တွင် ထုတ်ပြန်ခဲ့သည်။

KIA၊ PDF ပူးပေါင်းတပ်တို့သည် ဆရာတော် ဦးဂန္ဓမာအား စက်တင်ဘာ ၄ ရက်နေ့က ဘုန်းတော်ကြီးကျောင်း အတွင်းမှ လာရောက် ခေါ်ဆောင်သွားပြီး နန့်ဆရွာအနီးတွင် ရက်စက်စွာ သတ်ဖြတ်ပြီး မြှုပ်နှံထားခဲ့ကြောင်း ထုတ်ပြန်ချက်တွင် ဖော်ပြထားသည်။

ဖမ်းဆီးခံရပြီးနောက် ပြန်လွတ်လာသူ စိုင်းကျန်အောင်ကိုတွေ့ရစဉ်

KIA၊ PDF ပူးပေါင်းတပ်တို့သည် အပြည်ပြည်ဆိုင်ရာ လူသားချင်းစာနာထောက်ထားမှုဥပဒေနှင့် မသန်စွမ်း သူများ၏ အခွင့်အရေးဥပဒေကို လေးစားလိုက်နာခြင်း မရှိဘဲ ဆရာတော်ကို အဓမ္မလူဝတ်လဲစေ၍ ညတွင်းချင်း သတ်ဖြတ်ခြင်းသည် ကြီးလေးသည့် စစ်ရာဇဝတ်မှုကို ကျူးလွန်ခဲ့ကြကြောင်း ရှမ်းနီအရပ်ဖက် အဖွဲ့အစည်း ပေါင်း ၂၈ ဖွဲ့၏ ပူးတွဲ ထုတ်ပြန်တွင် ဖော်ပြထားသည်။

ထို့နောက် KIA၊ PDF ပူးပေါင်းတပ်ဖွဲ့သည် ဗန်းမောက်မြို့နယ်(တောင်းပိုင်း)ရှမ်းနီစာပေနှင့် ယဉ်ကျေးမှုတာဝန်ခံ စိုင်းကျန်အောင်ကို ဖမ်းဆီးနှိပ်စက်ခြင်း၊ ရှမ်းနီစာပေနှင့် ယဉ်ကျေးမှုကဏ္ဍများတွင် ဦးဆောင်နေသည့် ကြောင်လည်ရွာမှ ဆရာတော် ဦးသူရိယကို ဖမ်းဆီးခြင်း၊ ဖားကန့်မြို့နယ် ဟောင်ပါးကျေးရွာမှ ရှမ်းနီစာပေနှင့် ယဉ်ကျေးမှုကော်မတီ နာယက ဦးသန်းဖေအား လုပ်ကြံသတ်ဖြတ်ခြင်းနှင့် ဟောင်ပါးကျေးရွာ ရှမ်းနီစာပေနှင့် ယဉ်ကျေးမှုကော်မတီ စိုင်းရေကျော်အား ဖမ်းဆီး သတ်ဖြတ်ခဲ့ကြောင်း ထုတ်ပြန်ချက်တွင် ဖော်ပြထားသည်။

ရှမ်းနီအရပ်ဖက်အဖွဲ့အစည်းများ၏ ထုတ်ပြန်ချက်

လူမျိုးတစ်မျိုး ဆက်လက်ရပ်တည်ရန်အတွက် ရေသောက်မြစ်သဖွယ်ဖြစ်သော အရေးပါသည့် စာပေယဉ်ကျေး မှုကဏ္ဍကို မှေးမှိန်ပျောက်ကွယ်စေရန် ရည်ရွယ်လျက် လက်နက်ဖြင့် အဓမ္မအနိုင်ကျင့်ခြင်း၊ ခြိမ်းခြောက်ခြင်း၊ သတ်ဖြတ်ခြင်းတို့ကို ပြုလုပ်နေသော KIA၊ PDF ပူးပေါင်းတပ်တို့သည် ကုလသမဂ္ဂ၏ ဌာနေတိုင်းရင်းသား လူမျိုး များ အခွင့်အရေးဆိုင်ရာ ကြေညာစာတမ်းပါ အပိုဒ် (၃) အပိုဒ် (၈)နှင့် အပိုဒ် (၁၁) ကို ပြောင်ပြောင်တင်းတင်း ချိုးဖောက်နေခြင်း ဖြစ်ကြောင်း ထုတ်ပြန်ချက်က ဆိုသည်။

အဆိုပါ ဖြစ်စဉ်များနှင့် ပတ်သက်၍ အမျိုးသားညီညွတ်ရေးအစိုးရ (NUG) အပါအဝင် KIA၊ PDF ပူးပေါင်းတပ်တို့ အနေဖြင့် တာဝန်ယူမှု၊ တာဝန်ခံမှု ရှိရမည်ဖြစ်ကြောင်း ရှမ်းနီအရပ်ဖက် အဖွဲ့အစည်း (၂၈) ဖွဲ့မှ ထုတ်ပြန်ခဲ့သည်။

CNI News

၂၀၂၂ ခုနှစ်၊ စက်တင်ဘာ ၈

လာမည့် တစ်နှစ်အတွင်း တပ်မတော်ကို အမြစ်ပြတ်သုတ်သင်ပေးမည့် အဆုံးသတ်တိုက်ပွဲ အနှေးနှင့်အမြန် ရောက်လာမည်ဟု အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလက ပြောသည်။

NUG ၏ ပြည်သူ့ခုခံတော်လှန်စစ် ကြေညာခဲ့သော တစ်နှစ်ပြည့်သွားသည့် စက်တင်ဘာ ၇ ရက်နေ့မှာ ယာယီ သမ္မတက နိုင်င်ငံတော် အခြေပြ မိန့်ခွန်းတွင် ထည့်သွင်း ပြောကြားခဲ့ခြင်း ဖြစ်သည်။

NUG ၏ ယာယီသမ္မတ ဒူဝါလရှီးလက “လာမယ့် တစ်နှစ်အတွင်းမှာ ယခုထက် ပိုမိုကျယ်ပြန့်တဲ့ နိုင်ငံရေး၊ စစ်ရေး၊ နိုင်ငံတကာအရေး ရလဒ်တွေ ထွက်ရှိဖို့ အရှိန်အဟုန်မြှင့် အားသွန်ကြိုးပမ်းနေကြပါတယ်။ စစ်အာဏာရှင်ဟာ အဖက်ဖက်က မှေးမိန်ချည်းနဲ့လာနေပါပြီ။ ဖက်ဆစ်သန္ဓေကို အမြစ်ပြတ် သုတ်သင်ပေးမယ့် အဆုံးသတ် တိုက်ပွဲ ဟာ အနှေးနဲ့အမြန် ရောက်လာလိမ့်မယ်၊ အဲဒီအခါ အကြမ်းဖက် အုပ်စုအနေနဲ့ လူထုတရားစီရင်ရေးကို ခံယူနိုင်ဖို့ ရင်ဆိုင်နိုင်စွမ်းရှိအောင် ခုကတည်းကနေ ကိုယ့်ကိုယ်ကို အသင့်ပြင်ထားကြဖို့ ဒီကနေ အသိပေးလိုက်ချင်ပါတယ်” ဟု ပြောသည်။

ဒီမိုကရေစီအရေးတောင်းဆိုကြ (ဖရွန်းတီးယားမြန်မာ)

ထို့အတူ နိုင်ငံတကာအဖွဲ့အစည်းများ အနေနှင့်လည်း ဒီမိုကရေစီအရေး၊ လူ့အခွင့်အရေး၊ တန်းတူရေး လွတ်လပ် ခွင့် တို့အတွက် တိုက်ပွဲဝင်နေကြသည့် ပြည်သူလူထုကို လုံလောက်သည့် နည်းပညာ၊ လက်နက်ခဲယမ်းနှင့် ငွေ ကြေး အထောက်အပံ့များ ပေးကြရန် ၎င်းက တောင်းဆိုခဲ့သည်။

လာမည့် ၂၀၂၃ ခုနှစ်မှာ နွေဦးတော်လှန်ရေး၏ ဦးတည်ချက်များ အကောင်အထည်ဖော်နိုင်ရေး အကြောင်း အချက်အလက်များ ပြည့်စုံနေပြီဟု ပြောဆိုခြင်းဖြစ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ဦးသန်းစိုးနိုင်က “စစ်အုပ်စုကို ကျနော်တို့ ချေမှုန်းသုတ်သင်ရေး၊ မြေမြှုပ် သင်္ဂြိုလ်ပစ်ရေး နွေဦးတော်လှန်ရေးရဲ့ ဦးတည်ချက်တွေ အကောင်အထည်ဖော်ဖို့အတွက် အကြောင်းအချက်အလက်တွေ ပြည့်စုံနေပြီလို့ ဆိုတာပါ။ အဲဒီလို ဆင်နွှဲနိုင်ဖို့အတွက် ၂၀၂၃ ခုနှစ်ဟာ ကျနော်တို့ တန်ပြန်ထိုးစစ်ကို စည်းလုံးလှုပ်ရှားပြီးတော့ တိုက်ပွဲဝင်ဖို့ ကျနော်တို့ PDF တွေ EAO တွေ စုပေါင်းဆောင်ရွက်မှုနဲ့ ၂၀၂၃ ခုနှစ်မှာ နွေဦးတော်လှန်ရေးကို အဆုံးသတ်နိုင် အောင် ဒါမှမဟုတ် အဆုံးသတ်နိုင်မယ့် အခြေအနေ တစ်ရပ်အထိ‌ ရောက်အောင် တွန်းတင်နိုင်လို့ ကျနော်တို့ ပြောဆိုရှင်းပြလိုက်တဲ့ အနေအထားဖြစ်တဲ့အတွက် ပြည်သူတစ်ရပ်လုံးက ကြိုဆိုမျှော်လင့်နေပါတယ်လို့ ကျနော်တို့အနေနဲ့ မြင်ပါတယ်ခင်ဗျ” ဟု ပြောသည်။

NUG အဖွဲ့၀င်များကိုတွေ့ရစဉ်

EAO နှင့် PDF တို့၏ ပူးပေါင်း ခုခံစစ်မှာ စစ်ရေး၊ အုပ်ချုပ်ရေးအရ ပိုင်ပိုင်နိုင်နိုင် စိုးမိုးထားသည့် ဒေသများစွာ ရှိလာပြီဖြစ်ပြီး နယ်မြေစိုးမိုးထားသည့် မြို့နယ်ပေါင်း ၂၄ ခုတွင် တရားသူကြီးအဖွဲ့များ စုဖွဲ့ ပြီး တရားစီရင်ရေး လုပ်ငန်းများ စတင်အကောင်အထည်ဖော်နေပြီ ဖြစ်ကြောင်း NUG ယာယီသမ္မတက ပြောသည်။

လက်ရှိတွင် တနိုင်ငံလုံးတွင် PDF တပ်ရင်းပေါင်း ၃၀၀ ကျော် ဖွဲ့စည်းနိုင်ခဲ့ကြောင်း၊ ထို့အပြင် တနိုင်ငံလုံးတွင် မြို့နယ်ပေါင်း ၃၃၀ ရှိသည့်အနက် မြို့နယ်ပေါင်း ၂၅၀ ကျော်တွင် PDF တပ်ဖွဲ့များ ဖွဲ့စည်းလည်ပတ်နေကြောင်း NUG ယာယီသမ္မတက ပြောသည်။

နိုင်ငံရေးလေ့သုံးသပ်သူတချို့ကတော့ NUG က PDF အားလုံးကို မစုစည်းနိုင်သေးသလို လက်နက်တပ်ဆင် မပေးနိုင်သေးကြောင်းနှင့် တိုင်းရင်းသား လက်နက်ကိုင်အဖွဲ့အားလုံးကို မစည်းရုံးနိုင်သေးကြောင်းတို့ကြောင့် အဆုံးအဖြတ်ပေးမည့် အခြေအနေကို ရောက်အောင် ရယူနိုင်ရေးမှာ စဉ်းစားစရာ ဖြစ်နေကြောင်း ပြောသည်။

CNI News

၂၀၂၂ ခုနှစ်၊ စက်တင်ဘာ ၇

နိုင်ငံတော်စီမံအုပ်ချုပ်ရေးကောင်စီ(နစက)နှင့် အမျိုးသားညီညွတ်‌ရေးအစိုးရ (NUG)တို့သည် ဖက်ဒရယ် ပြည်ထောင်စု တည်ဆောက်မည်ဟု ပြောနေသော်လည်း လက်ရှိအချိန်ထိ ဖက်ဒရယ်မူကို မချပြသေးကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

ဖွဲ့စည်းပုံအရ ပေးထားသည့် အခွင့်အရေးများမှာ တပ်မတော်အာဏာယူပြီးနောက် ပျက်စီးသွားကြောင်း၊ လက်နက်မရှိပါက အခွင့်အရေး မရနိုင်သည့်အတွက် ရက္ခိုင့်တပ်တော် (ULA/AA) အနေဖြင့် အင်အားစုရင်း တိုက်ပွဲဝင်ရင်း သွားလိမ့်မည်ဟု ထင်မိကြောင်း ၎င်းက ပြောသည်။

တိုင်းရင်းသားလက်နက်ကိုင်အဖွဲ့အစည်းများ ညီလာခံကိုတွေ့ရစဉ်

ဦးဖေသန်းက “ဖက်ဒရယ်မှာ ‌မော်ဒယ်အမျိုးမျိုးရှိမှာပေါ့နော်၊ မော်ဒယ်ဘယ်လောက် မြင့်မလဲပေါ့။ ဘယ်လောက် ထိ တိုင်းရင်းသားတွေကို လုပ်ပိုင်ခွင့် ပေးမလဲပေါ့။ ဥပမာ Power Sharing ‌ပေါ့။ ဘယ်လောက်ထိ မျှဝေခွင့်၊ လုပ်ပိုင်ခွင့်ကို မျှဝေပေးနိုင်မလဲ။ နောက် Resource Sharing ပေါ့။ သူ့ဒေသထွက်တဲ့ သယံဇာတတွေ ဘယ် လောက် ရာခိုင်နှုန်း ပေးနိုင်မလဲ။ နောက်ပြီးတော့မှ Tax Sharing ပေါ့၊ အခွန်အခတွေ ဘယ်လောက်အထိ ကောက်ခံပိုင်ခွင့်ပေးမလဲ၊ အဲဒါတွေ မကဘူး သူတို့မှာ တကယ့် ဒီတပ်တွေကို ဘယ်လို တည်ဆောက်ကြမလဲ၊ တစ်ခုတည်းသော တပ်မ‌တော်ဆိုတဲ့ ခေါင်းစဉ်မျိုးကတော့ စစ်ကောင်စီရဲ့ စစ်တပ်အောက်ကို ရောက်သွားတဲ့ ပုံစံ မျိုးကတော့ သူတို့က အဖြစ်ခံမှာ မဟုတ်ဘူး။ ဘာလို့လဲဆိုတော့ တကယ့်ကို ဖွဲ့စည်းပုံအရ ပေးထားတဲ့ အခွင့် အရေးတွေတောင်မှ စစ်အာဏာသိမ်းလိုက်ပြီဆိုရင် အကုန်လုံး ပျက်စီးသွားတယ်၊ အဲဒီ‌နောက်ပိုင်းမှာ လက်နက် မရှိရင်‌တော့ ဘယ်လိုမှ အဲဒီအခွင့်အရေးကို ထပ်တောင်းလို့ မရတော့ဘူး။ အဲဒီလို အကြိမ်ကြိမ် ဖြစ်ခဲ့ပြီးပြီ။ ဆို တော့ ဒီလို လက်နက်ကို အချိန်အတိုင်းအတာ တစ်ခုအထိပေါ့နော်၊ သူတို့ဖက်ကတော့ ကိုင်ထားဖို့ ဆန္ဒရှိလိမ့်မယ်၊ လိုလည်း လိုလိမ့်မယ်။ အဲဒါကြောင့် ဟိုဖက်က ဖက်ဒရယ်၊ ဒီဖက်က ဖက်ဒရယ် ဘယ်လိုပဲပြောပြော ဘယ်ဖက်က မှ ဖက်ဒရယ်ရဲ့ မူကို မချပြသေးဘူး။ အဲဒါကြောင့် ULA/AA အနေနဲ့ကတော့ စောင့်ကြည့်ရင်း အင်အားစုရင်း တိုက်ပွဲဝင်ရင်း အဲဒီလိုပဲ သွားနေလိမ့်မယ်လို့ ကျနော်ထင်ပါတယ်” ဟု CNI သတင်းဌာနသို့ ပြောသည်။

နစက ပြုလုပ်သည့် ငြိမ်းချမ်းရေး၊ ဖက်ဒရယ်ပြည်ထောင်စု အရေးတို့ကို အယုံအကြည်မရှိကြောင်း တရုတ် အရေး ကျွမ်းကျင်သူ ဒေါက်တာလှကျော်ဇောက CNI သတင်းဌာနသို့ ပြောသည်။

AA တပ်မှူးချုပ် ဗိုလ်ချုပ်ထွန်းမြတ်နိုင်

၎င်းက “ဒီလိုရှိတယ်ဗျ၊ နစက-ကတော့ ဘာပြောပြော ကျမတို့က ယုံစရာမရှိဘူးလေ၊ သူတို့က နှစ်ပေါင်း ၆၀ ကျော် ၇၀ နီးပါး အမျိုးမျိုး ဆယ်(လှည့်)စားလာတာကို။ ဒါကြောင့်မို့လို့ သူတို့ ချမပြတာလည်း ကောင်းပါတယ်။ အခု သူတို့ဆီ သွားနေတာဆိုလည်း ခြောက်ချိခြောက်ချက် အဖွဲ့လေးတွေပဲလေ။ သိပ်ကြီးကြီးမားမား ဩဇာကြီး တဲ့ အဖွဲ့တွေလည်း မပါပါဘူး။ အဲဒီတော့ သိပ်တော့ ပူစရာမရှိပါဘူး။ နောက် သူတို့လုပ်မယ်ဆိုတဲ့ ငြိမ်းချမ်းရေးတို့ ဘာတို့ဆိုတာလည်း မင်းအောင်လှိုင် ကိုယ်တိုင်ပြောပြီးပြီပဲ၊ လက်နက်ကိုင်မယ်ဆိုရင် ဟိုဒင်း လုပ်ကြဆိုတာ အပြတ် ပြောထားပြီးပြီ။ အဲဒီတော့ သူတို့ လိုချင်တဲ့ ဖက်ဒရယ်ဆိုတာ ဒါပဲလေ။ သူတို့ရဲ့ စစ်တပ်ထဲ အားလုံး ပါဝင် လာပြီး စစ်တပ်ထဲ ဩဇာကို ခံမယ့်ဟာမျိုးပဲ ဖြစ်မှာပေါ့။ ဒါကြောင့်မို့လို့ မက်လောက်စရာမရှိပါဘူး” ဟု ပြော သည်။

လက်ရှိ အာဏာရနေသည့် အဖွဲ့အစည်းအနေဖြင့် ဖက်ဒရယ်ပြည်ထောင်စု တည်ဆောက်ရေးကို လုပ်ဆောင်သင့် ကြောင်း ရခိုင်အမျိုးသားပါတီ (ANP) မှ မူဝါဒရေးရာဦးဆောင် ကော်မတီဝင် ဦးထွန်းအောင်ကျော်က CNI သတင်း ဌာနသို့ ပြောသည်။

၎င်းက “ကျနော်တို့က ဥပဒေဘောင်ထဲက နိုင်ငံရေးပါတီ ဖြစ်တဲ့အတွက် မိမိတို့ရဲ့ မူဝါဒက ခိုင်ခိုင်မာမာ ကျနော်တို့ မှာ ရှိတယ်။ စစ်မှန်တဲ့ ပြည်ထောင်စုတစ်ခု ဖြစ်စေချင်တယ်။ အဲဒါကြောင့် ဒီဖက်ဒရယ်မူဝါဒကို ကျ‌နော်တို့ တစိုက် မတ်မတ်တောင်းလည်း တောင်းဆိုခဲ့တယ်၊ လွှတ်‌တော် အသီးသီးမှာလည်း တင်ပြခဲ့တယ်၊ အခုလည်း ကျနော်တို့ နိုင်ငံရေးမူဝါဒ ချပြီးတော့ လုပ်နေတယ်။ အဲဒီတော့ ဒီနေ့ အာဏာရနေတဲ့ အဖွဲ့အစည်းတွေက တိုင်းရင်းသားတွေ ရဲ့ အခက်အခဲကို သေသေချာချာ နားလည်တဲ့ အဖွဲ့အစည်းတွေ ဖြစ်ပါတယ်။ ကျနော်တို့ မြင်တာကတော့ မိမိတို့ရဲ့ ရရှိတဲ့ အာဏာကို တိုင်းရင်းသားတွေကို ခွဲမပေးနိုင်တဲ့အတွက် ဒီအရုပ်ဆိုး အကျဉ်းတန်ပြီးတော့ အင်မတန် အခံရ ခက်တဲ့ ကြီးမားတဲ့ ဒုက္ခဆင်းရဲဖြစ်နေတာ အနှစ် ၇၀ ပြည်တွင်းစစ် တိုက်ပွဲဖြစ်နေတာ အခုထိလည်း ဒီအုပ်ချုပ်တဲ့ လူတွေက တိုင်းရင်းသားတွေ အပေါ်မှာ စစ်မှန်တဲ့ စေတနာမရှိဘူးလို့ ကျနော်တို့ မြင်တယ်၊ စစ်မှန်တဲ့ စေတနာ ရှိရင် တိုင်းရင်းသားတွေ တစာစာတောင်းနေတဲ့ တန်းတူညီမျှခွင့်နဲ့ ကိုယ်ပိုင်ပြဋ္ဌာန်းခွင့်တို့ စစ်မှန်တဲ့ ဖက်ဒရယ် ပေါ်ပေါက်ရေးတို့ကို ဒါလုပ်သင့်တာက အချိန်အလွန်ကြီးကို လွန်သွားပြီ။ အဲဒီတော့ နှစ်ဖက်စလုံး အခုထိ အဲဒီလို ချမပြနိုင်တာက မိမိတို့ရဲ့ ဖြစ်ချင်တဲ့ ပုံစံပဲ ထင်ရှားပါတယ်ခင်ဗျ။ ပြည်သူတွေရဲ့ အမြင်ကတော့ ဒီအတိုင်း မြင်နေရ ပါတယ်ခင်ဗျ” ဟု ပြောသည်။

တိုင်းရင်းသားအဖွဲ့အစည်းပေါင်းစုံနဲ့ တရုတ် ၊ ကုလ သံတမန်တို့ကိုတွေ့ရစဉ်

ဒီမိုကရေစီဖက်ဒရယ်ပြည်ထောင်စုကို တည်ဆောက်မည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားထားသလို NUG ကလည်း ဒီမိုကရေစီဖက်ဒရယ်ပြည်ထောင်စုကို တည်ဆောက်မည်ဟု ပြောကြားထား သည်။

သို့သော်လည်း လက်ရှိ အချိန်ထိ ဖက်ဒရယ်မူများကို ချပြနိုင်ခြင်း မရှိသေးပေ။

တိုင်းရင်းသား လက်နက်ကိုင် အဖွဲ့များကတော့ တချို့က ဖက်ဒရယ်ပြည်ထောင်စု တည်ဆောက်ရေး တောင်းဆို နေသလို ULA/AA ကတော့ ဖက်ဒရယ်ထက် မြင့်မားသည့် အခွင့်အာဏာရှိသော ကွန်ဖက်ဒရေးရှင်း(ကွန်ဖက်ဒ ရိတ်)အဆင့်အတန်း ရလိုကြောင်း တောင်းဆိုလျက်ရှိသည်။

ထို့နောက် “ဝ”ပြည်သွေးစည်းညီညွတ်ရေးတပ်မတော်(UWSA)ကမူ ဖက်ဒရယ်ဟု မပြောသလို ကွန်ဖက်ဒရေးရှင်း ဟုလည်း မပြောဘဲ တရုတ်နိုင်ငံကဲ့သို့ တစ်နိုင်ငံတည်း မူဝါဒ ၂ ခုဖြင့် အုပ်ချုပ်နိုင်သော အခြေအနေကို ဖန်တီးရယူ ထားသလိုဖြစ်နေသည်ဟု နိုင်ငံရေးလေ့လာသုံးသပ်သူများက ပြောသည်။

CNI News

၂၀၂၂ ခုနှစ်၊ စက်တင်ဘာ ၇

မြန်မာနိုင်ငံသည် ရုရှား၏ ရေရှည် ယုံကြည်စိတ်ချရသည့် မိတ်ဖက်နိုင်ငံဖြစ်သည်ဟု ရုရှားသမ္မတ ဗလာဒီမာ ပူတင်က ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် သမ္မတပူတင်တို့ ရုရှားနိုင်ငံ၊ ဗလာဒီဗော့စတော့ခ်မြို့၊ FEFU Campus တွင် စက်တင်ဘာ ၇ ရက်နေ့က တွေ့ဆုံစဉ် ၎င်းက အထက်ပါအတိုင်း ပြောကြားခဲ့ခြင်းသည်။

ရုရှားသမ္မတပူတင်က “ မြန်မာနိုင်ငံဟာ ရုရှားရဲ့ ရေရှည်ပြီး ယုံကြည်စိတ်ချရတဲ့ မိတ်ဖက် ဖြစ်ပါတယ်။ လာမယ့် နှစ်မှာဆိုရင် ကျနော်တို့ နှစ်နိုင်ငံ သံတမန် ဆက်ဆံရေး ၇၅ နှစ်မြောက် နှစ်ပတ်လည်နေ့ကို ဂုဏ်ပြုပါမယ်။ ကျနော်တို့ နှစ်နိုင်ငံဆက်ဆံ ရေးနဲ့ ပူးပေါင်းဆောင်ရွက်ရေး ကောင်းကောင်းတိုးတက်နေပါတယ်။ အရှေ့ဖျား စီးပွားရေးဖိုရမ်ကို ကျနော်တို့ ဖိတ်တာ လက်ခံရောက်ရှိလာလို့ ကျေးဇူးအများကြီးတင်ပါတယ်”ဟု ပြောသည်။

ထို့နောက် ဗိုလ်ချုပ်မှူးကြီးမင်းအောင်လှိုင်က ရုရှားနိုင်ငံသည် ကမ္ဘာ့ထိပ်တန်းနိုင်ငံဖြစ်သလို ရုရှားသမ္မတ ပူတင် သည် ကမ္ဘာ့ခေါင်းဆောင်တစ်ဦး ဖြစ်ကြောင်း ပြောသည်။

၂၀၂၂ ခုနှစ်၊ စက်တင်ဘာ ၇ ရက်က ပူတင်နဲ့ ဗိုလ်ချုပ်မှူးကြီးမင်းအောင်လှိုင်တွေ့ဆုံစဉ်

ဗိုလ်ချုပ်မှူးကြီးမင်းအောင်လှိုင်က “ ကျနော်တို့ နှစ်နိုင်ငံဆက်ဆံရေးက ၇၅ နှစ်ပြည့် ကာလရောက်ရှိခဲ့ပြီးဖြစ်ပါ တယ်။ ဒါကြောင့် ထူးခြားတဲ့ သမိုင်း ကြောင်းရှိတယ်လို့ ကျနော်တို့ ပြောရပါလိမ့်မယ်။ ဒီလို ကာလအတွင်းမှာ လည်း ဖြစ်ပေါ်ပြောင်းလဲမှုက အနိမ့် အမြင့် အများကြီး ရှိခဲ့ပါတယ်။ သို့သော်လည်းပဲ လွန်ခဲ့တဲ့ ၁၀ စုနှစ် နှစ်စု ကျော်လောက်က စပြီး မြန်မာနိုင်ငံနဲ့ ရုရှားနိုင်ငံနဲ့ဆက်ဆံရေးဟာ သိသိသာသာ ကောင်းမွန်လာတဲ့ အနေအ ထား ရှိတာကို ကျနော်တို့ တွေ့ပါတယ်။ ရုရှားနိုင်ငံကလည်း သမိုင်းအစဉ်အလာ ကြီးမားတဲ့ နိုင်ငံတစ်ခု ဖြစ်ပါ တယ်။ လွန်ခဲ့တဲ့ နှစ်ပေါင်း ၃၀ လောက်က အခြေအနေမှာ အခက်အခဲများစွာ ရှိခဲ့ပေမယ့် အဲဒါကို ကျော်လွှားခဲ့ ပြီးတော့မှ အဆွေတော် တာဝန်ယူခဲ့ပြီး တော့မှ ဆယ်စုနှစ်ကာလအတွင်းမှာ ရုရှားနိုင်ငံတော်ဟာ တကယ်ကို ကြီးကျယ်တဲ့ ကမ္ဘာ့ထိပ်တန်းနိုင်ငံတစ်ခု အနေနဲ့ရောက်ရှိနေတာဖြစ်ပါတယ်။ အဆွေတော်ရဲ့ ဦးဆောင်မှု ကြောင့် ရုရှားနိုင်ငံ အခုလို ထိပ်တန်း နိုင်ငံ ဖြစ်လာတာကြောင့် အဆွေတော်ရဲ့ ခေါင်းဆောင်မှုကို ချီးကျူးဂုဏ် ပြုပါတယ်။ အဆွေတော်ဟာ ကမ္ဘာ့ခေါင်း ဆောင်တစ်ဦး ဖြစ်ပြီးတော့မှ ကမ္ဘာ့အရေးအခင်း ကိစ္စများကိုလည်း သမာသမတ်ရှိရှိ မှန်မှန်ကန်ကန်နဲ့ လုပ် ဆောင်နေတာကိုလည်း ကျနော်တို့ တွေ့ပါတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင် ဦးဆောင်သည့် ကိုယ်စားလှယ်အဖွဲ့သည် မြန်မာနိုင်ငံ ကိုယ်စားပြုပြီး စက်တင်ဘာ ၇ ရက်နေ့တွင် ကျင်းပသော အရှေ့ဖျားစီးပွားရေးဖိုရမ်(EEF)ကို တက်ရောက်ရန် ရုရှားနိုင်ငံသို့ စက်တင်ဘာ ၄ ရက်မှ ၈ ရက်နေ့အထိ သွားရောက်လျက်ရှိသည်။

အဆိုပါ ရုရှားခရီးစဉ်အတွင်း နျူကလီးယားစွမ်းအင် ပူးပေါင်းဆောင်ရွက်ရေး ရုရှား-မြန်မာ နှစ်နိုင်ငံ စာချွန်လွှာ လက်မှတ်ရေးထိုးခဲ့သလို စီးပွားရေး၊ နည်းပညာ၊ စစ်ရေးများ ပူးပေါင်းဆောင်ရွက်ရေးလည်း ဆွေးနွေးခဲ့ကြသည်။

CNI News
၂၀၂၂ ခုနှစ်၊ စက်တင်ဘာ ၇

ရုရှားသမ္မတ ဗလာဒီမာပူတင်နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ စက်တင်ဘာ ၇ ရက်နေ့ နံနက်ပိုင်းက ရုရှားနိုင်ငံမှာ တွေ့ဆုံခဲ့ကြသည်။

အဆိုပါ တွေ့ဆုံမှုတွင် နှစ်နိုင်ငံ နိုင်ငံရေး အခြေအနေများနှင့် ဒေသတွင်း အခြေအနေများကို တွေ့ဆုံ ဆွေးနွေးခဲ့ ကြသည်။

ဗိုလ်ချုပ်မှူးကြီးမင်းအောင်လှိုင်က “ဒီလို ကာလအတွင်းမှာ အနိမ့်အမြင့် အများကြီး ရှိခဲ့ပါတယ်။ ဒါပေမယ့် ရုရှားနဲ့ မြန်မာ နှစ်နိုင်ငံဆက်ဆံရေးဟာ သိသိသာသာ တိုးတက်ပြောင်းလဲလာခဲ့ပါတယ်။ ရုရှားနိုင်ငံကလည်း သမိုင်းအစဉ်အလာ ကြီးမားတဲ့နိုင်ငံဖြစ်ပါတယ်။ လွန်ခဲ့တဲ့ နှစ်ပေါင်း ၃၀ အတွင်း ရုရှားနိုင်ငံဟာ အခက်အခဲများ ရှိခဲ့သော်လည်း အခုဆိုရင် ထိပ်ဆုံးကို ရောက်နေတာကို မြင်ရပါတယ်။ အဆွေတော်ရဲ့ ဦးဆောင်မှုကြောင့် အခု ရုရှားနိုင်ငံ ထိပ်ဆုံးကို ရောက်လာတာဖြစ်ပါတယ်။ အဆွေတော်က ကမ္ဘာထိပ်ဆုံး ခေါင်းဆောင်တစ်ယောက်ဖြစ် ပါတယ်”ဟု ပြောသည်။

၂၀၂၂ ခုနှစ်၊ စက်တင်ဘာ ၇ ရက်နေ့တွင် ရုရှားသမ္မတ ပူတင်နဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံ

ဗိုလ်ချုပ်မှူးကြီးမင်းအောင်လှိုင် ဦးဆောင်သည့် နစက ကိုယ်စားလှယ်အဖွဲ့သည် ရုရှားနိုင်ငံတွင် ကျင်းပမည့် အရှေ့ဖျားစီးပွားရေးဖိုရမ်(EEF)တက်ရောက်ရန် စက်တင်ဘာ ၄ ရက်နေ့ကတည်းက ရောက်ရှိနေခြင်းဖြစ်သည်။

ထို့နောက် စက်တင်ဘာ ၇ ရက်နေ့တွင် ရုရှားသမ္မတ ပူတင်နှင့် တွေ့ဆုံ ဆွေးနွေးကြခြင်း ဖြစ်သည်။