- By CNI
- Category: နိုင်ငံရေး
- Hits: 838
CNI News
၂၀၂၂ ခုနှစ်၊ မတ်လ ၂၅
အာဆီယံနှင့် နစကတို့၏ ပူးပေါင်းဆောင်ရွက်မှုများဖြင့် တိုင်းပြည်ပြဿနာကို ဖြေရှင်းနိုင်မည် မဟုတ်ကြောင်း ဗအိုဝ်းအမျိုးသားဖက်ဒရယ်ကောင်စီ (PNFC)မှ ဥက္ကဋ္ဌ ခွန်မြင့်ထွန်းက CNI သတင်းဌာနသို့ ပြောသည်။
လက်ရှိ နိုင်ငံရေး အကျပ်အတည်းကို ဖြေရှင်းနိုင်ရေးအတွက်ဆိုပါက အာဆီယံ အထူးကိုယ်စားလှယ်အနေဖြင့် သက်ဆိုင်သူ အားလုံးနှင့် တွေ့ဆုံရမည်ဖြစ်ကြောင်း ၎င်းက ပြောသည်။
ခွန်မြင့်ထွန်းက “စစ်ကောင်စီနဲ့ အာဆီယံအပေါ်မှာ အခြေခံပြီးတော့ ကျနော်တို့ တိုင်းပြည်ရဲ့ ပြဿနာကို ဖြေရှင်းလို့ မရဘူး ဆိုတဲ့ အချက်က ထွက်သွားတာပေါ့၊ ဘာကြောင့်လဲဆိုတော့ အာဆီယံကိုယ်စားလှယ်ရဲ့ အလုပ်က လက်ရှိနိုင်ငံရေး အကျပ် အတည်းကို ဖြေရှင်းနိုင်ဖို့ဆိုရင် Stakeholder တွေနဲ့ တွေ့ရမှာ ဖြစ်ပါတယ်၊ Stakeholder တွေနဲ့ အခုတွေ့ခွင့် မရပဲနဲ့ စစ်ကောင်စီက ချမှတ်ပေးတဲ့၊ သတ်မှတ်ပေးတဲ့ လူနဲ့ပဲ တွေ့ခွင့်ရခဲ့တာမျိုးကတော့ အာဆီယံ အထူးကိုယ်စားလှယ်ရဲ့ ခရီးစဉ် ဟာ ဘာမှမထူးဘူး၊ အောင်မြင်မှာ မဟုတ်ဘူးဆိုတဲ့ ဟာကိုလည်း ပြနေပြီ၊ တစ်ဖက်က ကြည့်ရင်တော့ အာဆီယံရဲ့ ဆောင် ရွက်မှုတွေနဲ့ စစ်ကောင်စီရဲ့ ပူးပေါင်းဆောင်ရွက်မှု တွေနဲ့ကတော့ ကျနော်တို့ တိုင်းပြည်ကို မဖြေရှင်းနိုင်ဘူးဆိုတဲ့ဟာလည်း အဖြေထွက်ပါတယ်”ဟု ပြောသည်။
ပရတ်ဆိုခွန်နဲ့ ဗိုလ်ချုပ်မှူးကြီး မင်းအောင်လှိုင် တွေ့ဆုံစဉ်
အာဆီယံက တောင်းဆိုထားသည့် အချက် (၅) ချက်ကို နစကအနေဖြင့် လက်ခံဖြေရှင်းနိုင်မည် ပုံစံမရှိကြောင်း၊ အာဆီယံနှင့် နစကတို့၏ ဆောင်ရွက်ချက်အပေါ် မျှော်လင့်၍မရကြောင်း ခွန်မြင့်ထွန်းက ပြောသည်။
အာဆီယံအထူးကိုယ်စားလှယ် ပရတ်ဆိုခွန်သည် မတ်လ ၂၁ ရက်က မြန်မာနိုင်ငံသို့ ရောက်ရှိခဲ့ပြီး (၃)ရက်တာ ခရီးစဉ်အပြီး သတင်းစာ ရှင်းလင်းပွဲတွင် မြန်မာ့နိုင်ငံရေး အကျပ်အတည်းကို မိမိ၏ တစ်နှစ်တာ သက်တမ်းအတွင်း ဖြေရှင်းနိုင်မည် မဟုတ် ကြောင်း ပြောကြားခဲ့သည်။
လက်ရှိ မြန်မာနိုင်ငံတွင် နေ့စဉ်နှင့်အမျှ လက်နက်ကိုင် ပဋိပက္ခများ ဖြစ်ပွားနေကြောင်း၊ ရှုပ်ထွေးနေသည့် နိုင်ငံရေး အနေအထားအရ အာဆီယံကိုယ်စားလှယ်၏ ပြောကြားချက်မှာ မှန်သင့်သလောက် မှန်ကန်ကြောင်း ရခိုင်အမျိုးသားပါတီ (ANP)မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က ပြောသည်။
ဦးထွန်းအောင်ကျော်က “မြန်မာနိုင်ငံသူ၊ နိုင်ငံသားအားလုံး သိရှိတဲ့အတိုင်းပါ။ အဲဒါကြောင့် ဒီလောက်ရှုပ်ထွေးနေတဲ့၊ ပြင်းထန် နေတဲ့ ကိစ္စကို ဒါတစ်ဖက်နဲ့ တစ်ဖက်ကလည်း အင်မတန် အင်အားတွေ စုဆောင်းထားပြီးမှ အရင်လွန်ခဲ့တဲ့ နှစ်ပေါင်းများစွာနဲ့ မတူပဲနဲ့ အရင်လည်း အာဏာသိမ်းခဲ့တာတွေ ရှိတာပေါ့၊ ဒါပေမယ့် အဲဒီလို အခြေအနေနဲ့ မတူပဲနဲ့ ဒီတစ်ခေါက်ကတော့ အင်မတန် ပြင်းထန်တဲ့ လက်နက်ကိုင်ပဋိပက္ခ ပြင်းပြင်းထန်ထန် ဖြစ်ပေါ်လာတာကို တွေ့ရတယ်၊ ဒီကိစ္စကိုလည်း ညှိနှိုင်း ဆောင်ရွက်ဖို့ အတွက်ကိုလည်း အခုအာဆီယံဆိုတဲ့ ကျနော်တို့ရဲ့ မိသားစုအနေနဲ့ ပါဝင်နေတဲ့ မြန်မာနိုင်ငံက ပါဝင်တဲ့ ဒီအဖွဲ့ အစည်းကတောင်မှ ဘယ်လိုဖြေရှင်းရမလဲ မသိနိုင်တဲ့ သဘောတစ်ခုက ရှေ့မတိုးသာ နောက်မဆုပ်သာ ဖြစ်နေတာကို တွေ့ရ တဲ့အတွက် အာဆီယံ အထူးကိုယ်စားလှယ်ရဲ့ ပြောကြားခြင်းဟာ မှန်သင့်သလောက် မှန်တယ်လို့ပဲ ကျနော်တို့ အနေနဲ့ ထောက်ခံ ပြောဆိုလိုပါတယ်”ဟု ပြောသည်။
ပရတ်ဆိုခွန်နဲ့ ဦးကိုကိုကြီး တွေ့ဆုံစဉ်
နိုင်ငံတကာ၏ ပူးပေါင်းဆောင်ရွက်မှုကို ကြိုဆိုကြောင်း၊ သို့သော်လည်း တိုင်းပြည်၏ အခြေအနေနှင့် ကိုက်ညီသည့် ပူးပေါင်း ဆောင်ရွက်မှုဖြစ်ရန် လိုအပ်ကြောင်း ခွန်မြင့်ထွန်းက ပြောသည်။
“ကျနော်တို့ ဟိုကတည်းကိုက မြင်တဲ့ အမြင်က နိုင်ငံတကာရဲ့ ပူးပေါင်းဆောင်ရွက်မှုကို ကျနော်တို့က ကြိုဆိုတယ်၊ သို့သော် လည်းပဲ နိုင်ငံတကာက ပူးပေါင်းဆောင်ရွက်မှုတွေဟာ ကျနော်တို့ တိုင်းပြည်ရဲ့ လက်တွေ့ အခြေအနေနဲ့ ကိုက်ညီဖို့လည်း လို တယ်၊ နိုင်ငံတကာ ကူညီမှုဆိုတိုင်းဟာ ကျနော်တို့ တိုင်းပြည် လက်တွေ့ အခြေအနေနဲ့ ကိုက်ညီချက်မှ ကိုက်ညီမယ်၊ ဒါ ကြောင့် ကျနော်တို့ရဲ့ အခြေအနေနဲ့ ကိုက်ညီတဲ့ နိုင်ငံတကာရဲ့ ပူးပေါင်းဆောင်ရွက်မှုအတွက် ဖြစ်ဖို့အတွက်လည်း ကျနော်တို့ အားလုံး ကြိုးပမ်းဖို့လည်း လိုပါတယ်” ဟု ပြောသည်။
အာဆီယံ အထူးကိုယ်စားလှယ်ဖြစ်သူ ကမ္ဘောဒီးယားနိုင်ငံခြားရေးဝန်ကြီး ပရတ်ဆိုခွန်သည် မြန်မာနိုင်ငံသို့ မတ်လ ၂၁ ရက်မှ ၂၃ ရက်အထိ မြန်မာပြည်ခရီးစဉ်တွင် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၊ နစက ဝန်ကြီးများ၊ ပြည်သူ့ပါတီ (PP) ဥက္ကဋ္ဌ ဦးကိုကိုကြီးတို့နှင့် တွေ့ဆုံ၍ မြန်မာ့အရေး ဆွေးနွေးခဲ့ကြသည်။
- By CNI
- Category: နိုင်ငံရေး
- Hits: 1255
CNI News
၂၀၂၂ ခုနှစ်၊ မတ်လ ၂၅
ထိုင်းနိုင်ငံတွင် ကျင်းပရန် စီစဉ်နေသော ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST)၏ စတုတ္ထအကြိမ်မြောက် ဒုတိယပိုင်း ထိပ်သီးညီလာခံကို ကြီးကြီးကျယ်ကျယ် မလုပ်ဘဲ သိုသိုသိပ်သိပ်သာလုပ်ရန် ထိုင်းအာဏာပိုင်များမှ အသိ ပေးလာသည်ဟု PPST အဖွဲ့ဝင် ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
အဆိုပါ အပစ်ရပ် လက်နက်ကိုင်(၁၀)ဖွဲ့၏ PPST ထိပ်သီးညီလာခံကို ယခုလကုန်ပိုင်းတွင် ပြုလုပ်မည်ဖြစ်ပြီး ငါးရက်ကြာ ကျင်းပမည်ဖြစ်ကြောင်း PPST ထံမှ သိရသည်။
ဗိုလ်မှူးကြီး ခွန်ဥက္ကာက “အဲဒါက ထိုင်းမှာလုပ်မယ်ဆိုတော့ နည်းနည်းလေး Low profile လုပ်ဖို့တော့ ထိုင်းအရာရှိတွေက ပြောထားတယ်၊ Low profile ပေါ့၊ သိုသိုသိပ်သိပ်ပေါ့။ ကြီးကြီးကျယ်ကျယ် သတင်းတွေ ဘာတွေမဟုတ်ဘူး” ဟု ပြောသည်။
ထိုင်းအာဏာပိုင်များသည် နိုင်ငံရေးအရပြုလုပ်သည့် အခမ်းအနားများကို ပေါ်ပေါ်ထင်ထင် လုပ်ခွင့်ပေးထားခြင်း မရှိကြောင်း ထိုင်းနိုင်ငံ၊ မဲဆောက်တွင် နေထိုင်နေသည့် ကိုဝဏ္ဏ (အမည်လွှဲ)က ပြောသည်။
“မရဘူး ဘာပွဲမှ မရဘူး၊ မြန်မာတွေ လုပ်ရင်မရဘူး၊ ကိုယ့်ဘာသာ ကျိတ်လုပ်ကြတာပဲရှိတယ်” ဟု ၎င်းက ပြောသည်။
၂၀၁၉ ခုနှစ်၊ မေလက ထိပ်သီးညီလာခံကျင်းပနေစဉ်(NCA-S EAO)
အဆိုပါ ထိပ်သီးညီလာခံတွင် အပစ်ရပ် လက်နက်ကိုင်အဖွဲ့များ၏ စုဖွဲ့မှုပုံစံအသစ်ကို ဆွေးနွေးခြင်း၊ ရှေ့ဆက်ဆောင်ရွက်မည့် နိုင်ငံရေး လမ်းပြမြေပုံကို ဆွေးနွေးခြင်း၊ တိုင်းရင်းသားပေါင်းစုံ ပါဝင်မည့် ညီလာခံတစ်ရပ် ထပ်မံကျင်းပရေး ယခုညီလာခံတွင် ဆွေးနွေးခြင်း စသည့် အကြောင်းအရာများ ဆွေးနွေးရန်ရှိကြောင်း ဗိုလ်မှူးကြီးခွန်ဥက္ကာက ပြောသည်။
ဗိုလ်မှူးကြီးခွန်ဥက္ကာက “EAOs တွေ အားလုံးရဲ့ Summit ကတော့ ကျနော်တို့ နောက်တစ်ခေါက်မှ သပ်သပ်ခေါ်မယ်၊ အခုက တော့ ကျနော်တို့ရဲ့ ဒီ(၁၀)ဖွဲ့ထဲမှာပဲ အရင်လုပ်မယ်၊ (၁၀)ဖွဲ့ထဲမှာပဲ ပထမအဆင့်ပေါ့ဗျာ၊ ဒုတိယအဆင့်ကျမှ အားလုံးဖိတ် မယ်”ဟု ပြောသည်။
အဆိုပါ အပစ်ရပ် (၁၀) ဖွဲ့၏ ထိပ်သီးညီလာခံ စတုတ္ထအကြိမ် ပထမပိုင်းကို ၂၀၁၉ ခုနှစ်၊ မေလက ထိုင်းနိုင်ငံ၊ ချင်းမိုင်မြို့တွင် ကျင်းပခဲ့ကြောင်း၊ ယခု ကျင်းပမည့် ညီလာခံသည် ဒုတိယပိုင်း ဖြစ်ကြောင်း သိရသည်။
တစ်နိုင်ငံလုံး အပစ်အခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် (NCA)ကို တိုင်းရင်းသား လက်နက်ကိုင်(၁၀)ဖွဲ့ လက်မှတ်ရေးထိုးထားသည်။
ထို လက်နက်ကိုင်(၁၀)ဖွဲ့မှာ ရှမ်းပြည်ပြန်လည် ထူထောင်ရေးကောင်စီ(RCSS)၊ ရခိုင်ပြည် လွတ်မြောက်ရေးပါတီ (ALP)၊ မွန်ပြည်သစ်ပါတီ(NMSP)၊ လားဟူဒီမိုကရက်တစ် အစည်းအရုံး(LDU)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက် တစ် တပ်ဦး(ABSDF)၊ ကရင်အမျိုးသားအစည်းအရုံး/ကရင်အမျိုးသား လွတ်မြောက်ရေးတပ်မတော်-ငြိမ်းချမ်းရေးကောင်စီ (KNU/KNLA-PC)၊ ဒီမိုကရေစီ အကျိုးပြု ကရင်တပ်မတော်(DKBA)၊ ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO)၊ ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF)တို့ ဖြစ်ကြသည်။
အဆိုပါ အပစ်ရပ်(၁၀)သည့် PPST ကို ဖွဲ့စည်း၍ ငြိမ်းချမ်းရေးနှင့် နိုင်ငံရေး လုပ်ငန်းများ အကောင်အထည်ဖော်လျက်ရှိသည်။
- By CNI
- Category: နိုင်ငံရေး
- Hits: 1137
CNI News
၂၀၂၂ ခုနှစ်၊ မတ်လ ၂၄
လူမျိုးသုဉ်း သတ်ဖြတ်မှုဖြင့် တခြားနိုင်ငံတစ်နိုင်ငံမှ တရားစွဲပါက တစ်နိုင်ငံလုံးနှင့် အကျုံးဝင်ကြောင်း တိုင်းရင်းသား လက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
၂၀၁၇ ခုနှစ်က ဘင်္ဂါလီများအပေါ် မြန်မာ့တပ်မတော်သည် လူမျိုးသုဉ်းသတ်ဖြတ်မှု (Genocide)နှင့် လူသားမျိုးနွယ်အပေါ် ကျူးလွန်သည့် ရာဇဝတ်မှု မြောက်နေကြောင်း အမေရိကန်နိုင်ငံခြားရေးဝန်ကြီး အန်တိုနီဘလင်ကင်က မတ်လ ၂၁ ရက်တွင် ထုတ်ပြန် ပြောကြား၍ ကြေညာခဲ့သည်။
ထိုကျူးလွန်မှုမှာ တပ်မတော်သာ ဖြစ်သော်လည်း တရားစွဲဆိုခံရပါက နိုင်ငံသူ/နိုင်ငံသားများ၊ အစိုးရ၊ လက်နက်ကိုင်တပ်ဖွဲ့၊ ရဲ အပါအဝင် အားလုံး အကျုံးဝင်ကြောင်း ဗိုလ်မှူးကြီး ခွန်ဥက္ကာက ပြောသည်။
၎င်းက “ဒီလိုရှိတယ်ဗျ၊ လူမျိုးသုဉ်းလုပ်တယ်လို့ ဒီဟာ ကျူးလွန်တာတော့ တပ်မတော်ပေါ့ဗျာ၊ တပ်မတော်က တာဝန်ရှိတာ ကိုး ဒါပေမယ့် တိုင်းပြည်တစ်ပြည်က သတ်မှတ်တာနဲ့ပဲ အမှုကတော့ မဖြစ်ဘူးဗျ၊ အမှုဖြစ်တယ်ဆိုရင် တရားရုံးမှာ သွားတင်မှ အမှုဖြစ်တော့ ICC မှာ တင်တာကတော့ နိုင်ငံတော်ကို တင်တာပေါ့၊ ICJ မှာကြတော့ သူက ဘာနဲ့တင်ရလဲဆိုတော့ နိုင်ငံတော် ကို စွဲရတာပေါ့၊ ကုလသမဂ္ဂ အဖွဲ့ဝင် နိုင်ငံတစ်နိုင်ငံကို အခြားကုလသမဂ္ဂအဖွဲ့ဝင် နိုင်ငံတစ်ခုကနေပြီးတော့ စွဲလို့ရတာကို၊ နိုင်ငံကို နိုင်ငံအချင်းချင်း စွဲတဲ့သဘောပေါ့၊ အဲဒါကတော့ ICJ မှာကတော့ အဲဒီလို ဒါပေမယ့် အခုအမေရိကန်က သတ်မှတ် တာကတော့ တပ်မတော်ပေါ့၊ အဲဒီတုန်းက တပ်မတော်ပေါ့၊ အခုကတော့ တပ်မတော်အစိုးရဆိုတော့ နိုင်ငံတော်နဲ့ တပ်မတော် နဲ့က အခုက တစ်ထပ်တည်းဖြစ်နေတာ၊ အရင်တုန်းကတော့ လက်တွေ့မြေပြင်မှာ ကျူးလွန်တာကတော့ တပ်မတော်ပေါ့၊ အဲတုန်းကတော့ ဦးသိန်းစိန်အစိုးရ ဖြစ်ချင်ဖြစ်မယ်၊ ဒေါ်စုအစိုးရ ဖြစ်ချင်ဖြစ်မယ်၊ အဲဒီလို ဒါပေမယ့် အစိုးရတွေ၊ တပ်မတော် တွေက ဒီတရားစွဲတဲ့ အခါကြရင်က မခွဲတော့ဘူး၊ နိုင်ငံတော်ကို စွဲလိုက်ရင် နိုင်ငံတော်နဲ့ နိုင်ငံသူ၊ နိုင်ငံသားများ၊ အစိုးရ၊ လက်နက်ကိုင်အဖွဲ့၊ ရဲ အပါအဝင် အားလုံး အကျုံးဝင်သွားတယ်ပေါ့၊ State လို့ ပြောလိုက်ရင် အားလုံးပါသွားတယ်၊ အဲဒီတစ်ခု ပါပဲ” ဟု ပြောသည်။
အန်တိုနီဘလင်ကင်နဲ့ဦးဝဏ္ဏမောင်လင်ကိုတွေ့ရစဉ်
လူမျိုးသုဉ်း သတ်ဖြတ်မှု ကျူးလွန်သည်ဟု သတ်မှတ်ခံရသည့် ပုဂ္ဂိုလ်ကို ပြစ်မှုကျူးလွန်ကြောင်း ထင်ရှားပါက ကမ္ဘာ့တရား ရုံး တစ်ခုခုမှ စီရင်ချက်ချ၍ရကြောင်း ၎င်းက ပြောသည်။
အမေရိကန်အစိုးရ၏ လူမျိုးသုဉ်း သတ်ဖြတ်ကြောင်း ကြေညာချက်အပေါ် နစက၏ နိုင်ငံခြားရေးဝန်ကြီးဌာနမှ ပြင်းထန်စွာ ကန့်ကွက်ကြောင်း မတ်လ ၂၂ ရက်က ထုတ်ပြန်ခဲ့သည်။အလားတူ ဘာသာပေါင်းစုံချစ်ကြည်ညီညွတ်ရေးအဖွဲ့(ဗဟို)ကလည်း နစက၏ နိုင်ငံခြားရေးဝန်ကြီးဌာန ထုတ်ပြန်ချက်ကို ထောက်ခံကြောင်း မတ်လ ၂၃ ရက်က ထုတ်ပြန်ခဲ့သည်။
လူမျိုးသုဉ်း သတ်ဖြတ်မှု ကျူးလွန်ကြောင်း အမေရိကန်အစိုးရ၏ သတ်မှတ် ကြေညာချက်မှာ အင်အားကြီးမားသည့် နိုင်ငံများ ၏ နိုင်ငံရေးကစားကွက်လည်း ဖြစ်နိုင်ကြောင်း၊ တစ်ဖက်စောင်းနင်း မဟုတ်ဘဲ မျှမျှတတလေ့လာဖို့ လိုအပ်ကြောင်း ရခိုင် အမျိုးသားပါတီ(ANP)မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။
ဘင်္ဂါလီများကိုတွေ့ရစဉ်
ဦးထွန်းအောင်ကျော်က “အခု အမေရိကန်အစိုးရရဲ့ ထုတ်ပြန်ခြင်းဟာ မြန်မာနိုင်ငံကို နာမည်တပ်ထားတာတော့ တွေ့တယ်၊ အဲဒီလိုကတော့ ကျနော်တို့လည်း သတင်းတွေမှာ တွေ့ပါတယ်၊ တစ်နိုင်ငံလုံးကို တရားစွဲတယ်ပေါ့၊ ဘာညာ၊ အဲတော့ ဒီလုပ် ရပ်တွေက အင်အားကြီးမားတဲ့ နိုင်ငံတွေရဲ့ နိုင်ငံရေး ကစားကွက်တွေလည်း ပါတာပေါ့ခင်ဗျ၊ မိမိတို့ရဲ့နိုင်ငံရေး အမြတ်ထုတ် လိုမှုနဲ့ မိမိတို့ရဲ့ ဖန်တီးစေချင်တဲ့၊ ဝင်ရောက်စွက်ဖက်ချင်တဲ့ စိတ်နေ သဘောထားတွေလည်း ကျနော်တို့ တွေ့ရတယ်ခင်ဗျ၊ အဲတော့ မြန်မာနိုင်ငံမှာ တကယ်ဖြစ်ခဲ့တဲ့ ဖြစ်စဉ်တွေကတော့ မျှမျှတတလေ့လာဖို့ လိုတာပေါ့၊ တစ်ဖက်စောင်းနင်းကတော့ ကျနော်တို့ အဲဒီဖြစ်တဲ့ ကိစ္စတွေကတော့ ကိုယ့်ရခိုင်လူမျိုးတွေက အသိဆုံးပဲလေ၊ ရခိုင်ပြည်မှာ ဖြစ်တဲ့ကိစ္စကို အဓိက ရည် ညွန်းပြီးမှ ပြောတာကို၊ အဲဒီတော့ လက်ခုပ်ဆိုတာကတော့ နှစ်ဖက်စလုံးတီးမှ အသံမည်တာပါ၊ အဲဒါလေးတော့ အဓိက ထား ပြီးတော့ ပြောချင်ပါတယ်”ဟု ပြောသည်။
ရခိုင်ပြည်နယ်မှာ သမိုင်းကြောင်းအရ အင်မတန် ရှုပ်ထွေးကြောင်း၊ ထိုကိစ္စနှင့်ပတ်သက်၍ ဖြေရှင်းရာတွင် ရခိုင်ပြည်ကို ကိုယ်စားပြုသည့်ပုဂ္ဂိုလ် ပါဝင်ရန် လိုအပ်ကြောင်း ၎င်းက ပြောသည်။
ရခိုင်ပြည်နယ်တွင် ၂၀၁၇ ခုနှစ်က အာဆာ(ARSA)မှ ရဲကင်းစခန်း (၃၀)ကို တိုက်ခိုက်ခဲ့ခြင်းကြောင့် တပ်မတော်က နယ်မြေ ရှင်းလင်းရေးလုပ်စဉ် ဘင်္ဂါလီအများစု အိုးအိမ်စွန့်ခွာ၍ အိမ်နီးချင်း ဘင်္ဂလားဒေ့ရ်နိုင်ငံဘက်သို့ ထွက်ပြေးခိုလှုံခဲ့ကြရသည်။
ထို့နောက် တပ်မတော်မှ ဘင်္ဂါလီများအပေါ် လူမျိုးသုဉ်း သတ်ဖြတ်မှု ကျူးလွန်ကြောင်း လူ့အခွင့်အရေး လှုပ်ရှားသူများက ပြောကြသည်။
အဆိုပါ ဖြစ်စဉ်နှင့်ပတ်သက်ပြီး ဂမ်ဘီယာနိုင်ငံကလည်း နယ်သာလန်နိုင်ငံ၊ သည်ဟိတ်မြို့ရှိ အပြည်ပြည်ဆိုင်ရာတရားရုံး (ICJ)မှာ လူမျိုးသုဉ်း သတ်ဖြတ်သည်ဟုဆိုကာ မြန်မာနိုင်ငံကို တရားစွဲထားခြင်းကြောင့် အမှုရင်ဆိုင်ဖြေရှင်းနေရသည်။
- By CNI
- Category: နိုင်ငံရေး
- Hits: 1087
CNI News
၂၀၂၂ ခုနှစ်၊ မတ်လ ၂၄
လာမည့် မတ်လ ၂၇ ရက်နေ့တွင် ကျရောက်မည့် တပ်မတော်နေ့ အခမ်းအနားသို့ တက်ရောက်ရန် နစက-က တိုင်းရင်းသား လက်နက်ကိုင်အဖွဲ့များကို တစ်ဖွဲ့ချင်းစီ ဖိတ်ကြားစာများ ပေးပို့ထားကြောင်း အဆိုပါ တိုင်းရင်းသား လက်နက်ကိုင်အဖွဲ့များ ထံမှ သိရသည်။
နစက-က EAO များ တပ်မတော်နေ့ အခမ်းအနားသို့ တက်ရောက်ရန် ဖိတ်ကြားစာများ ပေးပို့ထားပြီးဖြစ်ကြောင်း၊ ယခင် တက်ရောက်နေကျ အဖွဲ့များ ယခုအခမ်းအနားသို့ ဆက်လက် တက်ရောက်ဖွယ်ရှိကြောင်း ပအိုဝ်းအမျိုးသားလွတ်မြောက်ရေး အဖွဲ့ချုပ်(PNLO)၏ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
ဗိုလ်မှူးကြီး ခွန်ဥက္ကာက “ဖိတ်စာတွေ တွေ့ပါတယ်၊ တော်တော်များများ သွားကြမှာပါ၊ သွားနေကျလူတွေ သွားမှာပါ၊ ဒါက သူ့ တပ်မတော်က အခုမှ မဟုတ်ဘူးလေ၊ ရှိလာတာ နှစ်ပေါင်း ၇၀ ၊ တပ်မတော်နေ့ လုပ်လာတာ အခေါက်ပေါင်း ၇၀ ကျော်ပြီ၊ ဒါဆိုတော့ သူ့အစဉ်အလာအရ သွားတဲ့သူ သွားနေကျတာပဲ”ဟု ပြောသည်။
၂၀၂၂ ခုနှစ်၊ မတ်လ ၂၇ ရက်နေ့တွင် ကျရောက်မည့် တပ်မတော်နေ့သည် (၇၇)ကြိမ်မြောက် အခမ်းအနားဖြစ်ကြောင်း၊ နေပြည်တော်တွင် စစ်ရေးပြ အခမ်းအနားနှင့် ကျင်းပမည်ဖြစ်ကြောင်း သိရသည်။
ဒုတိယဗိုလ်ချုပ်မှူးကြီးစိုးဝင်း (၇၇)ကြိမ်မြောက်တပ်မတော်နေ့ အခမ်းအနားအတွက် အကြိုလေ့ကျင့်မှုကို စစ်ဆေးနေ
အဆိုပါ တပ်မတော်နေ့ အခမ်းအနားသို့ တိုင်းရင်းသားလက်နက်ကိုင်တချို့ တက်ရောက်ခြင်းသည် လက်ရှိ နစကကို အသိ အမှတ်ပြုခြင်း မပြုခြင်းများနှင့် သက်ဆိုင်ခြင်းမရှိဘဲ တပ်မတော်၏ သမိုင်းကြောင်းအရ တည်ရှိမှုနှင့် လက္ခဏာကိုသာ အသိ အမှတ်ပြု တက်ရောက်သည့် သဘောဖြစ်ကြောင်း ဗိုလ်မှူးကြီး ခွန်ဥက္ကာက ပြောသည်။
၎င်းက “လက်ရှိ အာဏာသိမ်းထားတာတို့ မသိမ်းတာတို့ အစိုးရ၊ စစ်ကောင်စီတို့နဲ့ မဆိုင်ပါဘူး၊ တပ်မတော်က သူ့ဟာသူ ရှိနေ တဲ့ လက္ခဏာကိုပဲ ကျနော်တို့က ယူတာပါ၊ ဟိုဟာအနေနဲ့ မယူပါဘူး၊ လက်ရှိ တပ်မတော်က အာဏာသိမ်းလို့ လက်ရှိ ကောင်စီကို သွားပြီးတော့ အသိအမှတ်ပြုတယ်ဆိုတဲ့ အဓိပ္ပာယ် မရောက်ပါဘူး၊ အဲဒါလေးတော့ ကွာတာပေါ့ဗျာ” ဟု ပြော သည်။
ပြီးခဲ့သည့် ၂၀၂၁ ခုနှစ်အတွင်း တပ်မတော်က အရပ်သားအစိုးရကို ဖြုတ်ချပြီးနောက် ကျင်းပခဲ့သည့် (၇၆)နှစ်မြောက် တပ်မတော်နေ့ အခမ်းအနားသို့ တိုင်းရင်းသား လက်နက်ကိုင်အဖွဲ့တချို့ တက်ရောက်ခဲ့သေးသည်။
လက်ရှိတွင် (၇၇)ကြိမ်မြောက် တပ်မတော်နေ့ အခမ်းအနားသို့ မည်သည့် လက်နက်ကိုင်အဖွဲ့များ တက်ရောက်မည်ကိုတော့ အတိအကျ မသိရသေးပေ။
- By CNI News
- Category: နိုင်ငံရေး
- Hits: 949
CNI News
၂၀၂၂ ခုနှစ်၊ မတ်လ ၂၄
ဒုတိယဗိုလ်ချုပ်ကြီးကျော်ဆွေ(ငြိမ်း)နှင့် သူရဦးရွှေမန်း၏ သားဖြစ်သူ ဦးတိုးနိုင်မန်းတို့ ဖမ်းဆီးခံထားရသည်ဟု သတင်းများမှာ မှားယွင်းကြောင်း၊ ဖမ်းဆီးခံရခြင်းမရှိကြောင်း မိသားစုနှင့်နီးစပ်သူများ အပါအဝင် နစကဘက်က CNI သတင်းဌာနသို့ အတည်ပြု ပြောသည်။
မတ်လ ၂၃ ရက်နေ့ညပိုင်းက ဦးတိုးနိုင်မန်းနှင့် ဒုတိယဗိုလ်ချုပ်ကြီးကျော်ဆွေ(ငြိမ်း)တို့ကို နစကဘက်က ဖမ်းဆီးလိုက်သည်ဟု သတင်းမီဒီယာတချို့အပြင် ဆိုရှယ်လူမှုကွန်ရက်သုံးစွဲသူများက ရေးသားဖော်ပြခဲ့ကြသည်။
ဗိုလ်ချုပ်ဇော်မင်းထွန်းက “မဟုတ်ပါ၊ ဗိုလ်ချုပ်ကြီးကျော်ဆွေ တပ်မတော်နေ့ အခမ်းအနားတက်တက်ရန် နေပြည်တော် ရောက်ရှိလျက်ရှိပါတယ်”ဟု ပြောသည်။
အလားတူ ဦးတိုးနိုင်မန်းသည် သမီးဖြစ်သူ၏ ကျန်းမာရေးကြောင့် စင်္ကာပူနိုင်ငံသို့ သွားရောက်နေထိုင်၍ ဆေးကုသမှုများ ပြုလုပ်နေခြင်းဖြစ်ကြောင်း၊ ဖမ်းဆီးခံရသည့် သတင်းများမှာ သတင်းအမှားသာ ဖြစ်ကြောင်း မိသားစုနှင့်နီးစပ်သူ တစ်ဦးက CNI သတင်းဌာနသို့ အတည်ပြုပြောသည်။
၎င်းက “သူက မနှစ်က ဧပြီလောက်ကစပြီးတော့ သူက သူ့သမီးလေးရဲ့ ကျန်းမာရေးအတွက် သူ့သမီးလေး ကျန်းမာရေးက သုံးလ တစ်ကြိမ် စင်္ကာပူမှာ ကျန်းမာရေးစစ်ဆေးမှုခံရတာ လုပ်ရတယ်။ အဲလို သူက သုံးလ တစ်ကြိမ် စင်္ကာပူမှာ ပြရတဲ့အခါကျတော့ အခုကိုဗစ်ကာလဆိုတော့ ဟိုရောက်တဲ့အခါမှာ ကွာရတင်း ဝင်ရ တယ်။ ဒီပြန်ရောက်တဲ့အခါကျတော့လည်း ကွာရတင်းဝင်ရတယ်။ နောက်ပုံမှန် လေကြောင်းလိုင်းလည်း မရှိ ဘူး။ သူက ဒီအသွားအလာလေးက ဆရာဝန်ချိန်းတဲ့အတိုင်း မဖြစ်ဘူးဆိုတော့ အဲတာနဲ့အဆင်ပြေအောင် ဆိုပြီးတော့ ကလေးကျန်းမာရေးအတွက် ဟိုမှာသွားနေကြတာ။ အဲစလုံး(စင်္ကာပူ)မှာပဲ သွားနေတာ။ စလုံးမှာ ပဲသွားနေတာ အခုချိန်ထိလည်း ပြန်မလာဘူး။ အဲမှာပဲရှိနေတယ် သူက”ဟု ပြောသည်။
ထို့နောက် ပြန်ကြားရေးဝန်ကြီးဟောင်း ဦးရဲထွဋ်လည်း ဖမ်းခံရသည်ဆိုသော သတင်းမှာလည်း မှားယွင်း ကြောင်း ကာယကံရှင်က ထုတ်ပြန် ပြောကြားထားသည်။
- By CNI
- Category: နိုင်ငံရေး
- Hits: 841
CNI News
၂၀၂၂ ခုနှစ်၊ မတ်လ ၂၃
အာဆီယံအထူးကိုယ်စားလှယ်၏ မြန်မာနိုင်ငံခရီးစဉ်တွင် တွေ့ဆုံသင့် တွေ့ဆုံထိုက်သူများနှင့် တွေ့ဆုံနိုင်ခဲ့ခြင်းမရှိ၍ အားရစရာမရှိကြောင်း ကရင်အမျိုးသားအစည်းအရုံး (KNU) ပြောရေးဆိုခွင့်ရှိသူ ပဒိုစောတောနီးက CNI သတင်းဌာနသို့ ပြောသည်။
အာဆီယံ အထူးကိုယ်စားလှယ်ဖြစ်သူ ကမ္ဘောဒီးယားနိုင်ငံခြားရေးဝန်ကြီး ပရတ်ဆိုခွန်သည် မြန်မာနိုင်ငံသို့ မတ်လ ၂၁ ရက်နေ့က ရောက်ရှိခဲ့ကြောင်း၊ ထို့နောက် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၊ နစက ဝန်ကြီးများ၊ ပြည်သူ့ပါတီ (PP)ဥက္ကဋ္ဌ ဦးကိုကိုကြီးတို့နှင့် တွေ့ဆုံ၍ မြန်မာ့အရေး ဆွေးနွေးခဲ့ကြသည်။
အာဆီယံအထူးကိုယ်စားလှယ်သည် ၎င်း၏ခရီးစဉ်အတွင်း တိုင်းရင်းသားလက်နက်ကိုင်အဖွဲ့များနှင့် တွေ့ဆုံခဲ့ခြင်း မရှိသလို အမျိုးသားညီညွတ်ရေးအစိုးရ (NUG) ၊ အမျိုးသားညီညွတ်ရေးအတိုင်ပင်ခံကောင်စီ (NUCC) စသည့် အစုအဖွဲ့များဖြင့် တွေ့ဆုံခဲ့ခြင်း မရှိသည့်အတွက် နိုင်ငံရေးအရ ထူးခြားမှုမရှိကြောင်း ပဒိုစောတောနီးက ပြောသည်။
ပဒိုစောတောနီးက “အခုက ဒီလိုပွဲမျိုးက တွေ့ခွင့်ရတဲ့သူတွေနဲ့ တွေ့လို့ ဖြစ်တဲ့ပွဲမှ မဟုတ်တာ၊ ဒီဟာက တတိုင်းပြည်လုံး ပြဿနာဖြစ်နေတော့၊ ပြီးခဲ့တဲ့ အာဆီယံရဲ့ နိုင်ငံခြားရေးဝန်ကြီးများ အစည်းအဝေးတုန်းကလည်း ပြောထားတာရှိတယ်လေ။ အဲဒါကလည်း အထူးသဖြင့် NUCC တို့၊ NUG အဲဒီဟာတွေနဲ့ တွေ့ဖို့သင့်တယ်ဆိုတာ အဲဒီဟာလည်း၊ အာဆီယံရဲ့ အထူး ကိုယ်စားလှယ်ဖြစ်တဲ့ အခါကျတော့ အာဆီယံအဖွဲ့ထဲမှာရှိတဲ့ သဘောထားတွေ ဆုံးဖြတ်ချက်တွေတောင်မှ ရောင်ပြန် မဟပ် တဲ့ အနေအထားရှိနေတော့ တခြားဟာတော့ မပြောတော့ဘူး”ဟု ပြောသည်။
ပရတ်ဆိုခွန်နဲ့ ဗိုလ်ချုပ်မှူးကြီး မင်းအောင်လှိုင် တွေ့ဆုံစဉ်
အာဆီယံအထူးကိုယ်စားလှယ်၏ အဆိုပါ ခရီးစဉ်တွင် အာဆီယံ၏ ဆုံးဖြတ်ချက် ၅ ချက်ကို အကောင်အထည်ဖော်မှု ရှိ/မရှိ အပေါ် ဆက်လက်လုပ်ဆောင်နေသည်ဟု သုံးသပ်ရကြောင်း နိုင်ငံရေး လေ့လာသုံးသပ်သူ ဒေါက်တာလှကျော်စောက သုံးသပ်သည်။
“အာဆီယံအနေနဲ့ကတော့ သူတို့ လုပ်စရာရှိတာ သူတို့ ဆက်လုပ်နေတယ်ထင်တယ်၊ သူ့ရဲ့ ဆုံးဖြတ်ချက် (၅) ချက်ကို ဗမာ ပြည်က ဘယ်လောက် လက်ခံနိုင်လဲ၊ လက်မခံနိုင်လဲဆိုတာ ဆက်လုပ်နေပုံရတယ်၊ အဲတော့ အာဆီယံက သူ့တစ်ခုလုံးရဲ့ မူကိုက ဗမာပြည်ကို ပစ်ထားဖို့ မဟုတ်ဘူးလေ၊ ဗမာပြည်ကို အာဆီယံထဲမှာ ပါဝင်ပြီးတော့ ဆက်လက် လုပ်ဆောင်စရာရှိတာ လုပ်ဆောင်ဖို့ပဲ၊ အဲတော့ အာဆီယံရဲ့ အဓိက လုပ်ငန်းက ဗမာပြည် ဒီမိုကရေစီရရေး မဟုတ်ဘူးဗျ” ဟု ၎င်းက သုံးသပ်သည်။
အာဆီယံအထူးကိုယ်စားလှယ်နှင့် ပြည်သူ့ပါတီဥက္ကဋ္ဌ ဦးကိုကိုကြီးတို့ မတ်လ ၂၂ ရက်နေ့က တွေ့ဆုံစဉ်မှာတော့ နိုင်ငံရေး အကျဉ်းသားများ လွှတ်ပေးရန်၊ အရပ်သား ထိခိုက်မှုများကို ဘက်အသီးသီးက ကာကွယ်ပေးရန်၊ လူသားချင်း စာနာထောက် ထားမှု အကူအညီများ ထောက်ပံ့ပေးရန်၊ အသွင်ကူးပြောင်းရေး ကြားကာလ နိုင်ငံရေးသဘောတူညီမှု ရရှိရေး သက်ဆိုင်သူ များနှင့် တွေ့ဆုံသွားရန် စသည့် အချက်များကို တိုက်တွန်းခဲ့ကြောင်း ပြည်သူ့ပါတီက သတင်းထုတ်ပြန်ခဲ့သည်။
မူလက အာဆီယံအထူးကိုယ်စားလှယ်နှင့် အမျိုးသားဒီမိုကရေစီအဖွဲ့ချုပ် (NLD)မှ သမ္မတဟောင်း ဦးထင်ကျော်၏ ဇနီးဖြစ်သူ ဒေါ်စုစုလွင်တို့ တွေ့ဆုံရန် စီစဉ်ထားသော်လည်း တွေ့ဆုံနိုင်ခြင်း မရှိခဲ့ပေ။
- By CNI
- Category: နိုင်ငံရေး
- Hits: 1477
CNI News
၂၀၂၂ ခုနှစ်၊ မတ်လ ၂၃
အပစ်ရပ် (၁၀) ဖွဲ့ဖြင့် ဖွဲ့စည်းထားသည့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ၏ ထိပ်သီးညီလာခံမှ နိုင်ငံရေး အလှည့်အပြောင်းကို ကြီးမားစွာ ဖန်တီးနိုင်လိမ့်မည်ဖြစ်ကြောင်း PPST ဦးဆောင်မှုအလုပ်အဖွဲ့ဝင် ဗိုလ်မှူးကြီး ခွန်ဥက္ကာက ပြောသည်။
မတ်လ ၂၂ ရက်က PPST မှ ကျင်းပပြုလုပ်သည့် အစည်းအဝေး နိဂုံးချုပ်အမှာစကားတွင် ဗိုလ်မှူးကြီး ခွန်ဥက္ကာက အထက်ပါ အတိုင်း ပြောကြားခဲ့ခြင်း ဖြစ်သည်။
ဗိုလ်မှူးကြီး ခွန်ဥက္ကာက “မကြာခင် လာမယ့် ကျနော်တို့ရဲ့ ထိပ်သီးညီလာခံဆိုတာကလည်း သုံးနှစ်အကြာ ကာလကြီးကို စောင့်ဆိုင်းပြီးတော့မှ ကျနော်တို့ အကြိမ်ကြိမ် ကြိုးပမ်းပြီးတော့မှ ဖြစ်လာမယ့် ဒုတိယပိုင်း ဖြစ်တဲ့အတွက် အဲဒီအတွက် လည်း ကြိုတင်ပြီးတော့ ကျနော်တို့ ဂုဏ်ယူပါတယ်။ ဒီညီလာခံဟာ ကျနော်တို့ရဲ့ နိုင်ငံရေး အလှည့်အပြောင်းတစ်ခုကို ကြီးမားစွာ ဖန်တီးပေးနိုင်မှာ ဖြစ်ပါတယ်၊ နိုင်ငံရေး အလှည့်အပြောင်းနဲ့ ဖြစ်ပေါ်နေတဲ့ နိုင်ငံရေး အခင်းအကျင်းကို အမှီလိုက် နိုင်ဖို့အတွက်နဲ့ လိုအပ်လို့ရှိရင် ကျော်တက်၊ ကျော်လွှားသွားနိုင်ဖို့အတွက် အခင်းအကျင်းအသစ်ကို ကျနော်တို့ ပူးပေါင်း ဖန်တီး ကြရမှာ ဖြစ်ပါတယ်” ဟု ပြောသည်။
PPST ၏ ထိပ်သီးညီလာခံကို မတ်လ နောက်ဆုံး အပတ်တွင် ကျင်းပရန် စီစဉ်ထားကြောင်း သိရသည်။
ထို့နောက် PPST ၏ ထိပ်သီးညီလာခံအပေါ် မျှော်လင့်ချက် အမျိုးမျိုးရှိကြကြောင်း၊ သို့သော်လည်း မိမိအနေဖြင့် ညီလာခံမှ မည်သည့်ရလဒ် ထွက်လာမလဲဆိုသည်မှာ ကြိုပြောရန် ခက်ခဲကြောင်း PPST မှ ပြောခွင့်ရပုဂ္ဂိုလ် ရဲဘော်မျိုးဝင်းက ပြော သည်။
ရဲဘော်မျိုးဝင်းက “မျှော်လင့်ချက်တွေတော့ အမျိုးမျိုး ရှိကြမှာပေါ့နော်၊ ဒါပေမယ့်လည်း ဒီညီလာခံရဲ့ Summit ရဲ့ ရလဒ်က ပြောဖို့ စောသေးတာပေါ့နော်၊ ဘာပဲပြောပြောပါ။ လက်ရှိ နိုင်ငံရေးအကျပ်အတည်း အဖြေရှာနိုင်ဖို့ အတွက်ရော၊ အခြေ အနေတွေ အထောက်အကူ ပြုနိုင်ဖို့အတွက်တော့ ကျနော်တို့ ကြိုးစားပြီးတော့မှာ ဆွေးနွေးကြမှာပဲ၊ ဒါပေမယ့် ရလဒ် ဘာထွက်မလဲဆိုတာကတော့ ကျနော်တို့ အစည်းအဝေးပြီးမှာ ပြောနိုင်မှာပါ၊ ဘာရလဒ်ထွက်မယ်ဆိုတာ ကြိုပြောဖို့တော့ ခက်မှာပေါ့” ဟု ပြောသည်။
PPST အစည်း အဝေးတစ်ခုကို တွေ့ရစဉ်
တိုင်းပြည်ပြဿနာ ဖြေရှင်းရာတွင် နစကသည် အချက် (၅) ချက်ပါသည့် လမ်းပြမြေပုံဖြင့် ဆက်လက် ချီတက်နေသလို NUG၊ CRPH ကလည်း ၎င်းတို့၏ ဖက်ဒရယ်ချာတာ၊ လမ်းပြမြေပုံဖြစ် ချီတက်နေကြောင်း ဗိုလ်မှူးကြီးခွန်ဥက္ကာက ပြော သည်။
အလားတူ မိမိတို့ EAO များမှာ ဂုဏ်သိက္ခာရှိကြောင်း၊ တိုင်းပြည်အတွက် အရေးပါသည့် အစုအဖွဲ့ဖြစ်ကြောင်း ၎င်းက ပြောသည်။
လက်ရှိ နိုင်ငံရေးပြဿနာများ ဖြေရှင်းနိုင်ရေး တပ်မတော်ဘက်မှ ၎င်းတို့၏ နည်းလမ်းအတိုင်း ကြိုးပမ်းနေသလို၊ မိမိတို့ PPST အနေဖြင့်လည်း နိုင်ငံရေးအကျပ်အတည်း ဖြေရှင်းနိုင်ရေးအတွက် ဦးစားပေးအနေဖြင့် ဆောင်ရွက်နေကြောင်း ရဲဘော်မျိုးဝင်းက ပြောသည်။
၎င်းက “ဖေဖော်ဝါရီ ၁ ရက်နေ့ကနေပြီတော့ NCA အပေါ်မှာ အခြေခံတဲ့ NCA အကောင်အထည်ဖော်မှု၊ NCA ရဲ့ မူဘောင် အတိုင်း အကောင်အထည်ဖော်မှုကတော့ ငြိမ်းချမ်းရေး လုပ်ငန်းစဉ်အတိုင်း နိုင်ငံရေးဆွေးနွေးမှုကိုတော့ ရပ်ထားတယ်၊ ဒါပေမယ့် လက်ရှိနိုင်ငံရေး အကျပ်အတည်းကို ကျော်လွှားနိုင်ရေးအတွက်တော့ ကျနော်တို့ ကြိုးပမ်းနေတာပေါ့၊ တပ်မတော် ဘက်ကတော့ တပ်မတော်ရဲ့ နည်းလမ်းနဲ့ သူတို့ ကြိုးပမ်းနေတာ ရှိတာပေါ့နော်၊ အဲတာကိုတော့ ကျနော်တို့ ထူးထူးထွေထွေ ပြောစရာမရှိပါဘူး။ လက်ရှိ အခြေအနေမှာတော့ အခုလိုမျိုး ကာလမှာတော့ ကျနော်တို့ လက်ရှိ နိုင်ငံရေး အကျပ်အတည်းကို ဖြေရှင်းနိုင်ရေးအတွက်တော့ ဦးစားပေးတယ်လို့ပဲ ကျနော်တို့ အနေနဲ့ ပြောချင်ပါတယ်” ဟု ပြောသည်။
PPST ကို တစ်နိုင်ငံလုံး အပစ်အခတ်တိုက်ခိုက်မှု ရပ်စဲရေးသဘောတူစာချုပ်(NCA)ထိုးထားသည့် လက်နက်ကိုင်များဖြစ် သည့် ရှမ်းပြည်ပြန်လည် ထူထောင်ရေးကောင်စီ(RCSS/SSA)၊ ကရင်အမျိုးသားအစည်းအရုံး (KNU)၊ ဒီမိုကရေစီ အကျိုးပြု ကရင် တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသားလွတ် မြောက်ရေးတပ်မတော်-ငြိမ်းချမ်းရေး ကောင်စီ (KNU/KNLA-PC)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး(ABSDF)၊ ချင်းအမျိုးသားတပ်ဦး(CNF)၊ ရခိုင်ပြည်လွတ်မြောက်ရေးပါတီ(ALP)၊ မွန်ပြည်သစ်ပါတီ (NMSP)၊ လားဟူဒီမိုကရက်တစ် အစည်းအရုံး (LDU) တို့ဖြစ် ဖွဲ့စည်းထားသည်။
- By CNI News
- Category: နိုင်ငံရေး
- Hits: 1350
CNI News
၂၀၂၂ ခုနှစ်၊ မတ်လ ၂၂
အမေရိကန် နိုင်ငံခြားရေးဝန်ကြီး မစ္စတာအန်တိုနီ ဘလင်ကင်၏ မြန်မာ့တပ်မတော်အနေဖြင့် ရခိုင်ပြည်နယ်မြောက်ပိုင်းရှိ ဘင်္ဂါလီများအပေါ် လူမျိုးသုဉ်း သတ်ဖြတ်မှု ကျူးလွန်သည့် ရာဇဝတ်မှုများ ကျူးလွန်ခဲ့သည်ဟု ပြောကြားချက်အား နစက-က ပြင်းထန်စွာ ကန့်ကွက်ကြောင်း ထုတ်ပြန်ခဲ့သည်။
၂၀၂၂ ခုနှစ်၊ မတ်လ ၂၁ ရက်က အမေရိကန်နိုင်ငံ၊ ဝါရှင်တန်မြို့ရှိ ဟိုလိုကော့စ် အထိမ်းအမှတ်ပြတိုက်၌ အမေရိကန် နိုင်ငံခြားရေးဝန်ကြီး မစ္စတာအန်တိုနီ ဘလင်ကင်က မြန်မာ့တပ်မတော်အနေဖြင့် ဘင်္ဂါလီအသိုက်အဝန်းအပေါ် လူမျိုးသုဉ်း သတ်ဖြတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ကျူးလွန်ခဲ့ကြောင်း ထုတ်ပြန်ကြေညာခဲ့သည်။
အမေရိကန် နိုင်ငံခြားရေးဝန်ကြီး မစ္စတာအန်တိုနီ ဘလင်ကင်က “ ဒုတိယကမ္ဘာစစ်အတွင်း ဂျူးလူမျိုးများ အစုအပြုံလိုက် သတ်ဖြတ်ခံခဲ့ရခြင်းနောက်ပိုင်းတွင် လူမျိုးသုဉ်း သတ်ဖြတ်မှု ကျူးလွန်ခြင်းအဖြစ် အမေရိကန်ပြည်ထောင်စုမှ သတ်ဖြတ် ခြင်း (၇)ကြိမ်ရှိခဲ့ပါသည်။ မြန်မာစစ်တပ်သည် ရိုဟင်ဂျာလူမျိုးများအပေါ် လူမျိုးသုဉ်း သတ်ဖြတ်မှုနှင့် လူသားမျိုးနွယ် အပေါ် ကျူးလွန်သည့် ရာဇဝတ်မှုများ ကျူးလွန်ခဲ့သည်ဟု မိမိ သတ်မှတ်ဆုံးဖြတ်ပြီးသည်ဖြစ်၍ (၈)ကြိမ်မြောက် သတ် မှတ်ခြင်းကို ယနေ့(မတ်လ ၂၁ ရက်) အတည်ပြုပါသည်”ဟု ပြောခဲ့သည်။
အဆိုပါ ထုတ်ပြန်ပြောကြားချက်အား ပြင်းထန်စွာ ကန့်ကွက်ပြီး ပြတ်သားစွာ ပယ်ချကြောင်း နစက လက်အောက်ရှိ နိုင်ငံခြားရေးဝန်ကြီးဌာနက ယနေ့(မတ်လ ၂၂ ရက်)ထုတ်ပြန်ခဲ့သည်။
နိုင်ငံခြားရေးဝန်ကြီးဌာနက “မြန်မာနိုင်ငံသည် လူမျိုးသုဉ်းသတ်ဖြတ်မှုကို တားဆီးရန်နှင့် ပြစ်ဒဏ်ပေးရန် နိုင်ငံတကာ စာချုပ်နှင့် ကုလသမဂ္ဂ၏ ပဋိညာဉ်အောက်ရှိ အပြည်ပြည်ဆိုင်ရာ တရားရုံး၏ စာချုပ်အဖွဲ့ဝင် နိုင်ငံတစ်နိုင်ငံ ဖြစ်သည်နှင့် အညီ တည်ဆဲသက်ဆိုင်ရာ ကတိကဝတ်များကို အပြည့်အဝ လေးစားလိုက်နာလျက်ရှိကြောင်း ထပ်လောင်းအတည်ပြု သည်။ သို့ပါ၍ မြန်မာနိုင်ငံအနေဖြင့် လူမျိုးသုဉ်းစေမှုလုပ်ရပ်များ ကျူးလွန်မှု မရှိခြင်း၊ လူတစ်စုနှင့်တစ်စုဖြစ်စေ၊ လူမျိုး တစ်မျိုးကိုဖြစ်စေ၊ ဘာသာတစ်ခုနှင့် တစ်ခု ကိုးကွယ်သည့် လူမျိုးအလိုက်ဖြစ်စေ သတ်ဖြတ်ခြင်း၊ ဖျက်ဆီးခြင်းတို့ မည်သည့်အခါမှ မရှိခဲ့ပါ”ဟု ထုတ်ပြန်ချက်တွင် ပြောထားသည်။
ထို့နောက် အမေရိကန် နိုင်ငံခြားရေးဝန်ကြီး၏ ပြောကြားချက်သည် ပကတိအခြေအနေမှန်များနှင့် လွန်စွာ ကင်းကွာလျက် ရှိပြီး မခိုင်လုံသော အရင်းအမြစ်များ၊ အတည်ပြုနိုင်ခြင်းမရှိသော အချက်အလက်များနှင့် မမှန်မကန် စွပ်စွဲချက်များကို ရည် ညွှန်းကိုးကားထားကြောင်း တွေ့ရှိရသည်ဟုလည်း နိုင်ငံခြားရေးဝန်ကြီးဌာနက ဆိုထားသည်။
၂၀၁၇ ခုနှစ်၊ သြဂုတ်လက ရခိုင်ပြည်နယ်၊ ဘူးသီးတောင်၊ မောင်းတော၊ ရသေ့တောင် စသည့် မြို့နယ်များအတွင်းရှိ ရဲကင်းစခန်း(၃၀)ကို အာဆာ(ARSA)မှ တစ်ပြိုင်တည်း အကြမ်းဖက်တိုက်ခိုက်ခဲ့သည်။ ထို့နောက် မြန်မာ့တပ်မတော်က နယ်မြေ ရှင်းလင်းရေး လုပ်စဉ် ဘင်္ဂါလီလူမျိုးများ ဘင်္ဂလားဒေ့ရှ်ဘက်သို့ သိန်းနှင့်ချီ ထွက်ပြေးတိမ်းရှောင်နေရသည်မှာ ယနေ့အထိပင် ဖြစ်သည်။
- By CNI
- Category: နိုင်ငံရေး
- Hits: 1804
CNI News
၂၀၂၂ ခုနှစ်၊ မတ်လ ၂၂
ပြည်သူများကို ကာကွယ်ရမည့် တပ်ဖွဲ့များ ဖြစ်သည့်အားလျော်စွာ နေရာဒေသပေါင်းစုံမှ ဒေသကာကွယ်ရေးတပ် (PDF) များအနေဖြင့် အမျိုးသားညီညွတ်ရေးအစိုးရ (NUG)၏ တသွေးတသံတမိန့် ကွပ်ကဲမှုကို နာခံရန် လိုအပ်ကြောင်း NUG ၏ ယာယီသမ္မတ ဒူဝါလရှီးလက ပြောသည်။
ယနေ့ (မတ်လ ၂၂ ရက်) NUG က ပြုလုပ်သည့် ၄၇ ကြိမ်မြောက် အစိုးရအဖွဲ့ အစည်းအဝေးတွင် အထက်ပါအတိုင်း ပြောကြားခဲ့ခြင်း ဖြစ်သည်။
လက်ရှိ နွေဦးတော်လှန်ရေးမှာ ပြည်သူကာကွယ်ရေး တပ်ဖွဲ့များကို မြို့ရောတောပါမကျန် ဖွဲ့စည်းနိုင်ခဲ့ကြောင်း၊ အင်အားမှာ လည်း သောင်းဂဏန်း အကြီးပိုင်းကို ရောက်နေပြီဖြစ်ကြောင်း ယာယီသမ္မတ ဒူဝါလရှီးလက ပြောသည်။
၎င်းက “ပြည်သူကို ကာကွယ်ရမည့်တပ်ဖွဲ့များ ဖြစ်တဲ့အားလျော်စွာ နေရာဒေသပေါင်းစုံမှ PDF တပ်ဖွဲ့တွေက အမျိုးသား ညီညွတ်ရေးအစိုးရ၊ ကာကွယ်ရေးဝန်ကြီးဌာနအောက်မှာ တသွေးတသံတမိန့် ကွပ်ကဲမှုကို နာခံပြီး ကြီးမားတဲ့ စုစည်းမှုနဲ့ ပြည်သူ့ရန်သူ မင်းအောင်လှိုင်နဲ့အပေါင်းအပါတွေကို ချေမှုန်းရန်လိုပါတယ်။ အထူးသဖြင့် လက်နက်ကိုင် တပ်ဖွဲ့များဖြစ်တဲ့ အတွက် စစ်စည်းကမ်း စစ်ကျင့်ဝတ်ကို တင်းကြပ်စွာလိုက်နာပြီး ပြည်သူကို ကာကွယ်တဲ့တပ်ဖွဲ့၊ ပြည်သူ့အကျိုး သယ်ပိုးတဲ့ တပ်ဖွဲ့တွေဖြစ်အောင်နဲ့ ပြည်သူအများ လေးစားမှု ယုံကြည်မှုခံယူတဲ့ တပ်ဖွဲ့တွေဖြစ်အောင် အမြဲကြိုးစားကြရမယ်၊ ထိမ်း သိမ်းကြရမယ်ဆိုတာ သတိချပ်စေချင်ပါတယ်လို့ ပြောပါတယ်” ဟု ပြောသည်။
NUG ကို ၂၀၂၁ ခုနှစ်၊ ဧပြီ ၁၆ ရက်က စတင်ဖွဲ့စည်း ကတည်းက မရပ်မနား ကြိုးစားလာခဲ့သည်မှာ ၁ နှစ်နီးပါး ရောက်ရှိလာ ပြီဖြစ်ကြောင်း၊ တော်လှန်သည့် တိုက်ပွဲဝင် အစိုးရဖြစ်သည့် အားလျှော်စွာ ပြည်သူလူထုအတွက် အသက်အိုးအိမ် စွန့်လွတ် ကြိုးပမ်းနေကြခြင်း ဖြစ်သည့်အတွက် လေးစားဂုဏ်ယူကြောင်း ဒူဝါလရှီးလက ပြောသည်။
ကယားပြည်နယ်က ဒေသခံကာကွယ်ရေးတပ်ဖွဲ့ကိုတွေ့ရစဉ်
ပြည်သူများ ပါဝင်ထောက်ပံ့နေသည့် ငွေကြေးဓနအင်အားက တော်လှန်ရေးအောင်မြင်ရန် အရေးကြီးသည့် အခန်းကဏ္ဍ တစ်ခုအဖြစ် ရှိနေကြောင်း၊ ငွေတိုက်စာချုပ်ရောင်းချမှုမှာ ပြည်သူများ ပိုမိုဝယ်ယူ ထောက်ပံ့ကြရန် ဝန်ကြီးအားလုံးကို အထူးတိုက်တွန်းပေးရန် ပြောကြားလိုကြောင်း ၎င်းက ပြောသည်။
NUG ၏ လက်အောက်ခံ (သို့မဟုတ်) ပူးပေါင်းဆောင်ရွက်မှုတို့ဖြစ် လှုပ်ရှားနေသော PDF တပ်ဖွဲ့ပေါင်း ရာနှင့်ချီရှိကြောင်း၊ ထိုအဖွဲ့ပေါင်းများစွာကို NUG က စနစ်တကျ ကိုင်တွယ်ထိန်းချုပ်နိုင်ခြင်းမရှိသေးကြောင်း၊ စစ်ကိုင်းတိုင်းဒေသကြီးရှိ ယင်းမာပင်ပြည်သူ့ကာကွယ်ရေးတပ်ဖွဲ့(YMB PDF)သည် တော်လှန်ရေးအဖွဲ့အစည်း အချင်းချင်း သတ်ဖြတ်သည့် ဖြစ်စဉ်များကို NUG က ကိုင်တွယ်မဖြေရှင်းပေးနိုင်ဘဲ ဖြစ်နေကြောင်း၊ ထိုအခြေအနေများကို NUG က ထိန်းသိမ်းနိုင်ရန် လိုအပ်ကြောင်း နိုင်ငံရေးလေ့လာသုံးသပ်သူများက ပြောသည်။
လက်ရှိတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကယား(ကရင်နီ)ပြည်နယ်နှင့် ကရင်ပြည်နယ် တို့တွင် တိုင်းရင်းသားလက်နက်ကိုင်တပ်ဖွဲ့၊ ဒေသကာကွယ်ရေးတပ် (PDF) ပူးပေါင်းတပ်ဖွဲ့နှင့် တပ်မတော်တို့အကြား တိုက်ပွဲများ ဖြစ်ပွားလျက်ရှိသည်။